📜
ပန္နရသမော ပရိစ္ဆေဒေါ
၁၅။ ရာသိသင်္ဂဟကထာ
တေတ္တိံသ စေဝ ဒွတ္တိံသ၊ ဧကတိံသ စ တိံသ စ၊
ဧကဒွတ္တိံသဟီနာ စ၊ တိံသ ဓမ္မာနဝဇ္ဇကေ။
ဒသ ဓမ္မာ တု သာဝဇ္ဇေ၊ ဆပဉ္စစတုရာဓိကာ၊
ဧကာဒသ ဒသ နဝ၊ သတ္တဓာဟေတုကေ ပန။
ဣတ္ထံ စုဒ္ဒသဓာ ဘိန္နာ၊ ကောဋ္ဌာသာ တု သရူပတော၊
ဝိဘတ္တာ တေဟိ ယုတ္တာ စ၊ စိတ္တုပ္ပာဒါ ယထာက္ကမံ။
တိကဋ္ဌကာ ပဉ္စဝီသ၊ ဒသ ပဉ္စာဓိကာ နဝ၊
အဋ္ဌာရသေတိ သတ္တေတေ၊ အနဝဇ္ဇာ တထေတရေ။
ဒွေ စတ္တာရော ဆဠေကံ ဒွေ၊
ပဉ္စာထ ဒသဓာပရေ၊
သာဝဇ္ဇာဟေတုကာ စေတိ၊
ကောဋ္ဌာသာ ဟောန္တိ စုဒ္ဒသ။
နဝ ¶ စာပိ ဆ စတ္တာရော၊ စတုပဉ္စဆသတ္တကာ၊
နဝ ဒွေ ဒွေ တထေကော စ၊ ယေဝါပနကသင်္ဂဟာ။
တေဟိ ¶ ယုတ္တာ ပနဋ္ဌာထ၊ ဝီသေကတိံသ မာနသာ၊
ဒွေ ဒွေ ဒွေ တီဏိ စေကံ ဒွေ၊ အဋ္ဌ ဒသ ယထာက္ကမံ။
သတ္တတိံသကတော ယာဝ၊ ဧကတိံသာနဝဇ္ဇကေ၊
တိကဋ္ဌကာဒိကေ သတ္တ၊ ဌိတာ နိယတသင်္ဂဟာ။
ပါပေသု ဝီသ စေကူန-ဝီသဋ္ဌာရသ သောဠသ၊
စတုဓာ ဒွီသု စတူသု၊ စတူသု ဒွီသု စဋ္ဌိတာ။
ဧကဒွိပဉ္စဒသသု၊ စ ဒွိဓာဟေတုကေသု စ၊
တိကဒွေကာဓိကာ ဓမ္မာ၊ ဒသဋ္ဌ စ ယထာက္ကမံ။
ပဉ္စဒွေကဒွိဘိပဉ္စ၊ ကောဋ္ဌာသာ နိယတာ ဌိတာ၊
တေဟိ ယုတ္တာ ပနဋ္ဌာထ၊ ဝီသ ဒွေ ဒွေ တိကေကကာ။
ပုဗ္ဗာပရဒွယာပုညေ၊ ကာမပါကေ အဟေတုကေ၊
ပဉ္စမာနုတ္တရာရုပ္ပေ၊ နတ္ထာနိယတသမ္ဘဝေါ။
ဆတ္တိံသမာနသေသွေဝ၊ လဗ္ဘန္တာနိယတာ န ဝါ၊
တေပညာသာဝသေသာ တု၊ သဗ္ဗေ နိယတယောဂိနော။
နိယတာနိယတေ ကတွာ၊ လဗ္ဘန္တောဘယထာ တထာ၊
သရူပယေဝေါဘယကာ၊ တိဝိဓေဝံ တု သင်္ဂဟာ။
ဉေယျာ ဝုတ္တာနုသာရေန၊ တေဟိ ယုတ္တာဝ မာနသာ၊
တတော ပုန ဝိဘာဝေယျ၊ သဗ္ဗသင်္ဂါဟိကံ နယံ။
ဧကူနတာလီသကတော၊ ယာဝေကတ္တိံသကာ ဌိတာ၊
နဝဓာ အနဝဇ္ဇေသု၊ တေဟိ ယုတ္တာ စ မာနသာ။
ဒွေ စတ္တာရော ဒသေဝါထ၊ တိကပဉ္စာဓိကာ ဒသ၊
တေဝီသ ကမတော သတ္တ၊ ဒွေ စ ပဉ္စဒသာပရေ။
ဒွေ စ ဒွေ တိကဒွေ ဒွေကာ၊ သာဝဇ္ဇေသု စ သောဠသ၊
ဧကူနဝီသ ဝီသာထ၊ ဝီသေကဒွိတယာဓိကာ။
အဟေတုကေ ¶ ¶ ပနဋ္ဌာထ၊ ဒသေကဒွိတယာဓိကာ၊
ဒသပဉ္စ ဒွိကေကာတိ၊ ဘဝန္တေကူနဝီသတိ။
လဗ္ဘမာနာနုသာရေန၊ ဓမ္မာနံ ပန သင်္ဂဟော၊
သက္ကာ ဝုတ္တနယေနေဝ၊ ဝိညာတုံ ပန ဝိညုနာတိ။
ဣတိ စေတသိကဝိဘာဂေ ရာသိသင်္ဂဟကထာ နိဋ္ဌိတာ။
ပန္နရသမော ပရိစ္ဆေဒေါ။