📜
သောဠသမော ပရိစ္ဆေဒေါ
၁၆။ စိတ္တုပ္ပာဒကထာ
စိတ္တုပ္ပာဒေသု ဓမ္မာနံ၊ ဣတိ ဉတွာ ဝိနိစ္ဆယံ၊
စိတ္တုပ္ပာဒါနမေဝါထ၊ ဉာတဗ္ဗော ဘေဒသင်္ဂဟော။
ဝေဒနာဟာရတော စေဝ၊ ဟေတာဓိပတိတော တထာ၊
ဈာနိန္ဒြိယမဂ္ဂဗလာ၊ ယေဝါပနပထာဒိတော။
တတ္ထ သုခါ စ ဒုက္ခာ စ၊ အဒုက္ခမသုခါတိ စ၊
တိဿော စ ဝေဒနာ ဝုတ္တာ၊ သမ္ဘောဂတ္ထဝိသေသတော။
သုခံ ဒုက္ခံ သောမနဿံ၊ ဒေါမနဿမထာပရံ၊
ဥပေက္ခိန္ဒြိယမိစ္စေဝံ၊ ပဉ္စိန္ဒြိယဝိဘာဂတော။
ကာယဝိညာဏယုဂဠေ၊ သုခဒုက္ခာ ဟိ ဝေဒနာ၊
သောမနဿံ ဒေါမနဿံ၊ ဣတိ နာမံ လဘန္တိ န။
အညတ္ထ ပန သဗ္ဗတ္ထ၊ သုခါ ဒုက္ခာ စ ဝေဒနာ၊
သောမနဿံ ဒေါမနဿံ၊ ဣတိ နာမံ လဘန္တိ စ။
အဒုက္ခိ ¶ အသုခေါပေက္ခာ၊ မဇ္ဈတ္တာတိ စ ဝေဒနာ၊
ပဉ္စပညာသစိတ္တေသု၊ တဒညေသု ပကာသိတာ။
သုခဒုက္ခိန္ဒြိယယုတ္တံ၊ ကာယဝိညာဏကဒွယံ၊
ဒေါမနဿိန္ဒြိယယုတ္တံ၊ ပဋိဃဒွယမာနသံ။
အဋ္ဌာရသ ¶ ပရိတ္တာနိ၊ စတုက္ကဇ္ဈာနမာဒိတော၊
သောမနဿိန္ဒြိယယုတ္တာ၊ ဒွါသဋ္ဌိဝိဓ မာနသာ။
ဒွတ္တိံသ စ ပရိတ္တာနိ၊ တေဝီသ ဈာနပဉ္စမာ၊
ဟောန္တိပေက္ခိန္ဒြိယယုတ္တာ၊ ပဉ္စပညာသ မာနသာ။
သုခယုတ္တာ တု တေသဋ္ဌိ၊ ဒုက္ခယုတ္တာ တယော တဟိံ၊
အဒုက္ခမသုခယုတ္တာ၊ ပဉ္စပညာသုပေက္ခကာ။
ဩဇဋ္ဌမကရူပဉ္စ၊ ဝေဒနံ သန္ဓိမာနသံ၊
နာမရူပဉ္စ ကမတော၊ အာဟရန္တီတိ ဒေသိတာ။
အာဟာရာ ကဗဠီကာရော၊ ဖဿော သဉ္စေတနာ တထာ၊
ဝိညာဏဉ္စေတိ စတ္တာရော၊ ဥပတ္ထမ္ဘာ စ သမ္ဘဝါ။
စိတ္တုပ္ပာဒေသု သဗ္ဗတ္ထ၊
အာဟာရာရူပိနော တယော၊
ကဗဠီကာရော အာဟာရော၊
ကာမေ ကာယာနုပါလကော။
အလောဘော စ အဒေါသော စ၊
အမောဟော စ တထာပရော၊
လောဘော ဒေါသော စ မောဟော စ၊
ဟေတူ ဓမ္မာ ဆ ဒေသိတာ။
ကုသလာကုသလာ ဟေတူ၊ တယော အဗျာကတာတိ စ၊
နဝဒွါဒသဓာ တတ္ထ၊ ဝိပါကကြိယဘေဒတော။
ဒသ ¶ ပဉ္စာဓိကာ ဟောန္တိ၊ ဘူမိဘေဒါ တတော တဟိံ၊
ပုညပါကကြိယာဘေဒါ၊ တာလီသ စတုနူနကာ။
သန္တီရဏမနောဓာတု-ပဉ္စဝိညာဏမာနသေ၊
ဝေါဋ္ဌဗ္ဗနေ စ ဟသိတေ၊ ဟေတု နာမ န ဝိဇ္ဇတိ။
လောဘမူလေသု ¶ လောဘော စ၊
မောဟော စ ပဋိဃဒွယေ၊
ဒေါသော မောဟော စ လဗ္ဘန္တိ၊
မောဟော ဧကောဝ မောမုဟေ။
ဉာဏေန ဝိပ္ပယုတ္တေသု၊
အလောဘာဒိဒွယံ ဘဝေ၊
တတော သေသေသု သဗ္ဗတ္ထ၊
အလောဘာဒိတယောပိ စ။
တိဟေတုကာ သတ္တစတ္တာ-လီသ ဟောန္တိ ဒွိဟေတုကာ၊
ဗာဝီသ ဒွေကဟေတုကာ၊ အဋ္ဌာရသ အဟေတုကာ။
ဆန္ဒော စိတ္တဉ္စ ဝီရိယံ၊ ဝီမံသာတိ စတုဗ္ဗိဓာ၊
သဟဇာတာဓိပါ ဓမ္မာ၊ ဝုတ္တာဓိပတယော သိယုံ။
ယမာလမ္ဗံ ဂရုံ ကတွာ၊ နာမဓမ္မာ ပဝတ္တရေ၊
အာရမ္မဏာဓိပနာမေန၊ တဒါလမ္ဗဏမီရိတံ။
တိဟေတုကဇဝေသွေကော၊ စတူသုပိ ယထာရဟံ၊
ဒွိဟေတုကေသု သမ္ဘောတိ၊ ဝီမံသာဓိပတိံ ဝိနာ။
အနုတ္တရေ ကာမပုညေ၊ တိဟေတုကမဟာကြိယေ၊
လောဘမူလေ စ သာဝဇ္ဇေ၊ လဗ္ဘတာလမ္ဗဏာဓိပေါ။
တတ္ထ စာနိယတာ ကာမေ၊ လဗ္ဘမာနာပိ လဗ္ဘရေ၊
မဟဂ္ဂတာနုတ္တရေသု၊ နိယတာဝ ယထာရဟံ။
ကြိယာဒွိဟေတုပဋိဃေ ¶ ၊
နတ္ထေဝါလမ္ဗဏာဓိပေါ၊
မောမူဟာဟေတုကေ ပါကေ၊
လောကိယေ စ န ကောစိပိ။
ဥဘယာဓိပယုတ္တာ စ၊ သဟဇာဓိပယောဂိနော၊
ဥဘယာနိယတာဓိပ္ပာ၊ သဟဇာနိယတာဓိပါ။
ဥဘယဝိပ္ပယုတ္တာ ¶ စ၊ ပဉ္စဓာ တတ္ထ မာနသာ၊
အဋ္ဌဋ္ဌာရသ ဝီသံ ဆ၊ သတ္တတိံသ ယထာက္ကမံ။
ပဉ္စာဓိပတိယောဂါ စ၊ စတုရာဓိပယောဂိနော၊
တိဝိဓာဓိပယုတ္တာ စ၊ ဝိမုတ္တာပိ စ သဗ္ဗထာ။
သောဠသာထ သမတ္တိံသ၊ ဆဠေဝါထ ယထာက္ကမံ၊
သတ္တတိံသတိဝိဓာတိ၊ စတုဓေဝမ္ပိ နိဒ္ဒိသေ။
ဝီမံသာဓိပယုတ္တာ စ၊ သဟဇာဓိပယောဂိနော၊
အာလမ္ဗာဓိပယုတ္တာ စ၊ ဝိပ္ပမုတ္တာပိ သဗ္ဗထာ။
စတုတ္တိံသ ဒွိပညာသ၊ အဋ္ဌဝီသ ယထာက္ကမံ၊
သတ္တတိံသတိ စေဝေတိ၊ စတုဓေဝမ္ပိ နိဒ္ဒိသေ။
သဟဇာဓိပလဒ္ဓါ တု၊ ဒွေပညာသေဝ သဗ္ဗထာ၊
အာလမ္ဗာဓိပလဒ္ဓါ စ၊ ဥဘယာဓိပလာဘိနော။
အဋ္ဌဝီသေဝ သဗ္ဗေပိ၊ ဒွေပညာသေဝ သာဓိပါ၊
သေသာ နိရာဓိပါ သဗ္ဗေ၊ သတ္တတိံသာပိ သဗ္ဗထာ။
ဝေဒနာဒိဝသေနေဝံ၊ ဉတွာ ဘေဒံ စတုဗ္ဗိဓံ၊
ဈာနိန္ဒြိယမဂ္ဂဗလ-ဝသေနာပိ ဝိဘာဝယေ။
ဝိတက္ကဟေဋ္ဌိမံ ဈာနံ၊ မနောပရံ မနိန္ဒြိယံ၊
ဟေတုပရဉ္စ မဂ္ဂင်္ဂံ၊ ဗလံ ဝီရိယပစ္ဆိမံ။
အဝိတက္ကေ ¶ ပကတိယာ၊ တသ္မာ ဈာနံ န ဝိဇ္ဇတိ၊
အဟေတုကေ စ မဂ္ဂင်္ဂံ၊ ဗလဉ္စာဝီရိယေ ယထာ။
အဋ္ဌ ရူပိန္ဒြိယာနေတ္ထ၊ အဂယှန္တေဝ သဗ္ဗထာ၊
မဂ္ဂိန္ဒြိယဗလဋ္ဌေသု၊ သမာဓိ စ န ကင်္ခိတေ။
ကာမပုညေသွနိယတာ၊ ဝိရတီပိ အနုဒ္ဓတာ၊
ပညာနုတ္တရစိတ္တေသု၊ ဣန္ဒြိယတ္တယဘာဇိတာ။
သေသာ ဝုတ္တာနုသာရေန၊ လဗ္ဘမာနဇ္ဈာနာဒိကာ၊
တေဟိ ယုတ္တာ စ ဝိညေယျာ၊ စိတ္တုပ္ပာဒါ ယထာက္ကမံ။
သောမနဿယုတ္တာ ¶ ကာမေ၊ လောကုတ္တရမဟဂ္ဂတေ၊
ပဌမဇ္ဈာနစိတ္တာ စ၊ ပဉ္စဈာနင်္ဂိကာ မတာ။
ဒုက္ခုပေက္ခာယုတ္တာ ကာမေ၊ ပဉ္စဝိညာဏဝဇ္ဇိတာ၊
ဒုတိယဇ္ဈာနစိတ္တာ စ၊ စတုဈာနင်္ဂိကာ သိယုံ။
ဈာနင်္ဂတ္တယသံယုတ္တာ၊ တတိယဇ္ဈာနမာနသာ၊
စတုတ္ထပဉ္စမာရုပ္ပာ၊ ဈာနင်္ဂဒွယယောဂိနော။
ပဉ္စဝိညာဏယုဂဠေ၊ ဈာနင်္ဂံ နတ္ထိ ကိဉ္စိပိ၊
ဣတ္ထံ ဈာနာနံ ဘေဒေန၊ ပဉ္စဓာ မာနသာ ဌိတာ။
ဧကူနတိံသတိ သတ္တ-တိံသ စေကာဒသာပရေ၊
စတုတ္တိံသ ဒသေဝါထ၊ ဂဏိကာ တု ယထာက္ကမံ။
လောကုတ္တရေသု သဗ္ဗေသု၊ ဣန္ဒြိယာနိ နဝုစ္စရေ၊
တိဟေတုကေသု သဗ္ဗေသု၊ လောကိယေသု ပနဋ္ဌဓာ။
ဉာဏေန ဝိပ္ပယုတ္တေသု၊ သတ္တဓာဝ သမုဒ္ဓရေ၊
သိတဝေါဋ္ဌဗ္ဗနာ ပုညေ၊ ပဉ္စဓာဝ ပကာသယေ။
ဝိစိကိစ္ဆာသဟဂတေ၊ စတုဓာဝ ဝိနိဒ္ဒိသေ၊
တီဏိန္ဒြိယာနိ ဝုတ္တာနိ၊ သေသာဟေတုကမာနသေ။
အဋ္ဌ ¶ စေကူနတာလီသ၊ ဒွါဒသ ဝါထ တေရသ၊
ဧကဉ္စ သောဠသ စေတိ၊ ဆဗ္ဗိဓာ တတ္ထ သင်္ဂဟော။
ပဌမာနုတ္တရံ ဈာနံ၊ အဋ္ဌမဂ္ဂင်္ဂိကံ မတံ၊
သတ္တမဂ္ဂင်္ဂိကံ နာမ၊ သေသံ ဈာနမနုတ္တရံ။
လောကိယံ ပဌမံ ဈာနံ၊ တထာ ကာမေ တိဟေတုကံ၊
ပဉ္စမဂ္ဂင်္ဂိကာ နာမ၊ စိတ္တုပ္ပာဒါ ပကာသိတာ။
သေသံ မဟဂ္ဂတံ ဈာနံ၊ သမ္ပယုတ္တာ စ ဒိဋ္ဌိယာ၊
ဉာဏေန ဝိပ္ပယုတ္တာ စ၊ စတုမဂ္ဂင်္ဂိကာ မတာ။
ဒေါသမူလဒွယဉ္စေဝ၊ ဥဒ္ဓစ္စသဟိတံ တထာ၊
ဒိဋ္ဌိယာ ဝိပ္ပယုတ္တာ စ၊ မဂ္ဂင်္ဂတ္တယယောဂိနော။
ဝိစိကိစ္ဆာသမ္ပယုတ္တော ¶ ၊ ဝုတ္တော မဂ္ဂေါ ဒုဝင်္ဂိကော၊
အမဂ္ဂါဟေတုကော စေတိ၊ သတ္တဓာ တတ္ထ သင်္ဂဟော။
အဋ္ဌ ဒွတ္တိံသတိ စေဝ၊ ဒသ ပဉ္စာဓိကာပရေ၊
တာလီသ ကမတော သတ္တ၊ ဧကဉ္စဋ္ဌဒသာပရေ။
ဗလာနိ ပန သတ္တေဝ၊ သဗ္ဗတ္ထာပိ တိဟေတုကေ၊
ဉာဏေန ဝိပ္ပယုတ္တေသု၊ ဆ ဗလာနိ သမုဒ္ဒိသေ။
စတုဓာကုသလေ ဟောန္တိ၊ တိဝိဓာ ကင်္ခိတေ ပန၊
ဒွိဗလံ သိတဝေါဋ္ဌဗ္ဗံ၊ အဗလံ သေသမီရိတံ။
ဆဗ္ဗိဓော သင်္ဂဟော တတ္ထ၊ သတ္တတာလီသထာပရေ၊
ဒွါဒသေကာဒသေကံ ဒွေ၊ သောဠသေတိ ယထာက္ကမံ။
ဣတ္ထံ ပဉ္စ ဆ သတ္တ ဆ-ကောဋ္ဌာသာ ကမတော ဌိတာ၊
စတုဝီသတိ သဗ္ဗေပိ၊ ဈာနင်္ဂါဒိဝသာ ကထာ။
ဣတိ စေတသိကဝိဘာဂေ စိတ္တုပ္ပာဒကထာ နိဋ္ဌိတာ။
သောဠသမော ပရိစ္ဆေဒေါ။