📜
သတ္တရသမော ပရိစ္ဆေဒေါ
၁၇။ ဒိဋ္ဌိသင်္ဂဟကထာ
ယေဝါပနကနာမေန ¶ ၊ ဓမ္မာ ဆန္ဒာဒယော တထာ၊
ခန္ဓာဒယော စ ကောဋ္ဌာသာ၊ ဥဒ္ဒိဋ္ဌာ ဟိ ယထာရဟံ။
တတ္ထ ဆန္ဒာဒယော ဓမ္မာ၊ ဝိဘတ္တာဝ ယထာရဟံ၊
ခန္ဓာဒိရာသယော ဝါပိ၊ ဝိညေယျာ ဒါနိ သမ္ဘဝါ။
ဝေဒနာ ဝေဒနာက္ခန္ဓော၊ စက္ခုသမ္ဖဿဇာဒိကာ၊
သညာ စ သညာက္ခန္ဓောတိ၊ ဆဗ္ဗိဓာပိ ပကာသိတာ။
သင်္ခါရက္ခန္ဓနာမေန၊ သေသာ စေတသိကာ မတာ၊
ဝုတ္တာ ဝိညာဏကာယာ ဆ၊ ဝိညာဏက္ခန္ဓနာမတော။
ရူပက္ခန္ဓော ¶ ပုနေကောဝ၊ သမ္ပယုတ္တာဝိယောဂိနော၊
အရူပိနော စ စတ္တာရော၊ ပဉ္စက္ခန္ဓာ ပဝုစ္စရေ။
မနာယတနနာမံ တု၊ စိတ္တမေဝ တထာပရာ၊
စက္ခုဝိညာဏဓာတာဒိသတ္တဝိညာဏဓာတုယော။
သဗ္ဗေ စေတသိကာ ဓမ္မာ၊ ဓမ္မာယတနသင်္ဂဟာ၊
ဓမ္မဓာတူတိ စ ဝုတ္တာ၊ ဒွိပညာသာပိ သဗ္ဗထာ။
သုခုမာနိ စ ရူပါနိ၊ နိဗ္ဗာနဉ္စေတ္ထ ဂယှရေ၊
ဩဠာရိကာနိ ရူပါနိ၊ ဒသာယတနဓာတုယော။
စက္ခုသောတဃာနဇိဝှာ-ကာယာယတနနာမကာ၊
ရူပသဒ္ဒဂန္ဓရသ-ဖောဋ္ဌဗ္ဗာယတနာနိ စ။
ဒွါဒသာယတနာ သဗ္ဗေ၊ ဟောန္တဋ္ဌာရသဓာတုယော၊
ခန္ဓာ ဌပေတွာ နိဗ္ဗာနံ၊ နတ္ထိ ပဏ္ဏတ္တိ တီသုပိ။
အာဟာရာဒိ ¶ စ ကောဋ္ဌာသာ၊ ပုဗ္ဗေ ဝုတ္တနယာဝ တေ၊
ဣတိ မိဿကသင်္ခေပေါ၊ ဝိညာတဗ္ဗော ဝိဘာဝိနာ။
ဒွါဒသာကုသလေသွေဝ၊ စုဒ္ဒသာပိ ဝဝတ္ထိတာ၊
ယေ သာဝဇ္ဇာဝ တေသမ္ပိ၊ သင်္ဂဟော ဒါနိ နိယျတေ။
ကာမာသဝေါ ဘဝါသဝေါ၊ ဒိဋ္ဌာဝိဇ္ဇာသဝါတိ စ၊
စတ္တာရော အာသဝါ ဝုတ္တာ၊ တယော ဓမ္မာ သရူပတော။
အာသဝါ အာသဝဋ္ဌေန၊
ဩဃာ ဝုယှနတော တထာ၊
ယောဇေန္တီတိ စ ယောဂါတိ၊
တေ စတ္တာရော စ ဒေသိတာ။
ကာမဗ္ဘဝေါ စ ပဋိဃော၊ မာနော ဒိဋ္ဌိ စ သံသယော၊
သီလဗ္ဗတပရာမာသော၊ ဘဝရာဂေါ တထာပရော။
ဣဿာ မစ္ဆရိယာဝိဇ္ဇာ၊ ဣတိ သံယောဇနာ ဒသ၊
အဋ္ဌ ဓမ္မာ သရူပေန၊ အဘိဓမ္မေ ပကာသိတာ။
ဣဿာမစ္ဆရိယံ ¶ ဟိတွာ၊ ကတွာ မာနုဒ္ဓဝံ တဟိံ၊
ဘိန္ဒိတွာ ဘဝရာဂဉ္စ၊ ရူပါရူပဝသာ ဒွိဓာ။
ပဉ္စောရမ္ဘာဂိယာ စေဝ၊ ပဉ္စုဒ္ဓမ္ဘာဂိယာတိ စ၊
ဒသ သံယောဇနာ ဝုတ္တာ၊ သုတ္တေ သတ္တ သရူပတော။
ဂန္ထာ ဓမ္မာ စ စတ္တာရော၊ တယော ဓမ္မာ သရူပတော၊
အဘိဇ္ဈာကာယဂန္ထော စ၊ ဗျာပါဒေါ စ ပဝုစ္စတိ။
သီလဗ္ဗတပရာမာသော၊ ကာယဂန္ထော တထာပရော၊
ဣဒံသစ္စာဘိနိဝေသော၊ ဣတိ ဒိဋ္ဌိ ဝိဘေဒိတော။
ကာမစ္ဆန္ဒော စ ဗျာပါဒေါ၊ ထိနမိဒ္ဓမထာပရံ၊
တထာ ဥဒ္ဓစ္စကုက္ကုစ္စံ၊ ကင်္ခါဝိဇ္ဇာတိ အဋ္ဌိမေ။
ဓမ္မာ ¶ နိဝရဏာ နာမ၊ ဆဓာ စ ပန ဒေသိတာ၊
မိစ္ဆာဒိဋ္ဌိ ပနေကာဝ၊ ပရာမာသောတိ ဝုစ္စတိ။
ဥပါဒါနာနိ စတ္တာရိ၊ ကာမုပါဒါဒိနာမကာ၊
ဒိဋ္ဌိသီလဗ္ဗတံ အတ္တ-ဝါဒုပါဒါနမေဝ စ။
လောဘဒိဋ္ဌိဝသာ ဒွေဝ၊ တိဝိဓာ ဒိဋ္ဌိ ဒေသိတာ၊
ဒိဋ္ဌိ သီလဗ္ဗတမတ္တ-ဝါဒေါ စေတိ မဟေသိနာ။
လောဘော ဒေါသော စ မောဟော စ၊
မာနော ဒိဋ္ဌိ စ သံသယော၊
ထိနမုဒ္ဓစ္စမေဝါထ၊
လောကနာသယုဂံ တထာ။
ဣတ္ထံ ကိလေသဝတ္ထူနိ၊ ကိလေသာတိ ပကာသိတာ၊
ဒသေတေ တု သမာနာဝ၊ ပရတော စ သရူပတော။
ကာမရာဂေါ စ ပဋိဃော၊ မာနော ဒိဋ္ဌိ စ သံသယော၊
ဘဝရာဂေါ အဝိဇ္ဇာတိ၊ ဆ သတ္တာနုသယာ မတာ။
၆၂၀။ ဂါဟာ စ ပလိဗောဓာ စ၊ ပပဉ္စာ စေဝ မညနာ။
တဏှာ မာနော စ ဒိဋ္ဌိ စ၊ ဒိဋ္ဌိ တဏှာ စ နိဿယာ။
ပရာမာသေကကော ¶ ဒွေဝ၊ နိဿယာ မညနာ တယော၊
အာသဝေါဃယောဂဂန္ထာ၊ ဥပါဒါနာ စ ဒုဗ္ဗိဓာ။
အဋ္ဌ နီဝရဏာ ဝုတ္တာ၊ သတ္တဓာနုသယာ ကထာ၊
သံယောဇနာ ကိလေသာ စ၊ ဒသေဝ ပရတော ဌိတာ။
ဧကဒွိတိဆသတ္တဋ္ဌဒသကာ တု ယထာရဟံ၊
ဓမ္မာ သရူပတော ဟောန္တိ၊ ယထာဝုတ္တေသု ရာသိသု။
ကာမရာဂဘဝရာဂါ၊ ကာမာသဝဘဝါသဝါ၊
ရူပရာဂါရူပရာဂ၊ ဣတိ လောဘော ဝိဘေဒိတော။
ဣဒံသစ္စာဘိနိဝေသော ¶ ၊ ဒိဋ္ဌိ သီလဗ္ဗတံ တထာ၊
အတ္တဝါဒေါ ပရာမာသော၊ ဣတိ ဒိဋ္ဌိ ပဝုစ္စတိ။
ဒိဋ္ဌိ ပဉ္စဒသဝိဓာ၊ လောဘဋ္ဌာရသဓာ တဟိံ၊
သေသာ သပရရာသီဟိ၊ သမာနာ ဒွါဒသဋ္ဌိတာ။
ဧကာဒသသမုဋ္ဌာနေ၊ ဒိဋ္ဌိလောဘာ ဝဝတ္ထိတာ၊
အဝိဇ္ဇာ သတ္တသု ဝုတ္တာ၊ ပဋိဃော ပန ပဉ္စသု။
မာနော စ ဝိစိကိစ္ဆာ စ၊ စတုဋ္ဌာနေသု ဥဒ္ဓဋော၊
တီသု ဒွီသု စ ထီနန္တိ၊ အဋ္ဌေတေ သဝိဘတ္တိကာ။
ဣဿာမစ္ဆေရကုက္ကုစ္စမိဒ္ဓလောကဝိနာသကာ၊
ဆာဝိဘတ္တိကဓမ္မာတိ၊ အသမ္ဘိန္နာ စတုဒ္ဒသ။
ရူပရာဂါရူပရာဂ-ကာမာသဝဘဝါသဝါ၊
ဟောန္တိ ဒိဋ္ဌိဝိယုတ္တေသု၊ ပုဗ္ဗေ ဝုတ္တနယာ ပန။
ဣတိ သာဝဇ္ဇသင်္ခေပံ၊ ဉတွာ ပုန ဝိစက္ခဏော၊
ဗောဓိပက္ခိယဓမ္မာနံ၊ သင်္ဂဟမ္ပိ ဝိဘာဝယေ။
ယေသု သညာစိတ္တဒိဋ္ဌိ-ဝိပလ္လာသာ ယထာက္ကမံ၊
သုဘံ သုခံ နိစ္စမတ္တာ၊ ဣတိ ဒွါဒသဓာ ဌိတာ။
တတ္ထ ကာယေ ဝေဒနာသု၊ စိတ္တေ ဓမ္မေသု စက္ကမာ၊
အသုဘံ ဒုက္ခမနိစ္စမနတ္တာတိ ဥပဋ္ဌိတာ။
ယထာဝုတ္တဝိပလ္လာသပဟာနာယ ¶ ယထာရဟံ၊
ဘိန္နာ ဝိသယကိစ္စာနံ၊ ဝသေန ပန သမ္ဘဝါ။
စတ္တာရော သတိပဋ္ဌာနာ၊ ကာယာနုပဿနာဒယော၊
ဣတိ ဝုတ္တာ ပနေကာဝ၊ သမ္မာသတိ မဟေသိနာ။
ဥပ္ပန္နာနုပ္ပန္နပါပပဟာနာနုပ္ပန္နာယ စ၊
အနုပ္ပန္နုပ္ပန္နေဟိ ဝါ၊ နိဗ္ဗတ္တိ အဘိဝုဒ္ဓိယာ။
ပဒဟန္တဿ ¶ ဝါယာမော၊ ကိစ္စာဘောဂဝိဘာဂတော၊
သမ္မပ္ပဓာနာ စတ္တာရော၊ ဣတိ ဝုတ္တာ မဟေသိနာ။
ဆန္ဒော စ ဝီရိယံ စိတ္တံ၊ ဝီမံသာတိ စ တာဒိနာ၊
စတ္တာရော ဣဒ္ဓိပါဒါတိ၊ ဝိဘတ္တာ စတုရာဓိပါ။
သဒ္ဓိန္ဒြိယဉ္စ ဝီရိယံ၊ သတိ စေဝ သမာဓိ စ၊
ပညိန္ဒြိယဉ္စ ပဉ္စေဝ၊ ဗောဓိပက္ခိယသင်္ဂဟေ။
ဣန္ဒြိယာနိန္ဒြိယဋ္ဌေန၊ ဗလဋ္ဌေန ဗလာနိ စ၊
ဣတိ ဘိန္နာ ဝိဘတ္တာ စ၊ ဒုဝိဓာပိ မဟေသိနာ။
သတီ စ ဓမ္မဝိစယော၊ တထာ ဝီရိယပီတိယော၊
ပဿဒ္ဓိ စ သမာဓိ စ၊ ဥပေက္ခာတိ စ တာဒိနာ။
ဒေသိတာ သတ္တ ဗောဇ္ဈင်္ဂါ၊ ဗုဇ္ဈန္တဿ သဘာဝတော၊
ကာယစိတ္တဝသာ ဘိန္နံ၊ ကတွာ ပဿဒ္ဓိမေကကံ။
သမ္မာဒိဋ္ဌိ စ သင်္ကပ္ပော၊ ဝါယာမော ဝိရတိတ္တယံ၊
သမ္မာသတိ သမာဓီ စ၊ မဂ္ဂေါ အဋ္ဌင်္ဂိကော မတော။
ဣတိ သတ္တေဝ သင်္ခေပါ၊ သတ္တတိံသ ပဘေဒတော၊
ဧကံ ကတွာန ပဿဒ္ဓိံ၊ အသမ္ဘိန္နာ စတုဒ္ဒသ။
နဝဓာ ဝီရိယံ ဝုတ္တံ၊ ဆသု ရာသီသု ပဉ္စသု၊
အဋ္ဌဓာ သတိ သေသာ တု၊ သမာနပဒရာသိကာ။
ပဉ္စသွေဝ တု ပညာ စ၊ သမာဓိ စတုရာသိကော၊
သဒ္ဓါ ဒွီသု ဝိဘတ္တာတိ၊ ပဉ္စေတေ သဝိဘတ္တိကာ။
နဝါ ¶ ဝိဘတ္တိကာ သေသာ၊ ဆန္ဒော စိတ္တမထာပရံ၊
ပီတိ ပဿဒ္ဓိပေက္ခာ စ၊ သင်္ကပ္ပော ဝိရတိတ္တယံ။
ဣတိ ဝုတ္တနယာ သဗ္ဗေ၊ ဗောဓိပက္ခိယသင်္ဂဟာ၊
လောကုတ္တရေသု သမ္ဘောန္တိ၊ သဗ္ဗထာပိ ယထာရဟံ။
ပုဗ္ဗဘာဂေ ¶ ယထာယောဂံ၊ လောကိယေသု စ လဗ္ဘရေ၊
နိဗ္ဗေဒဘာဝနာကာလေ၊ ဆဗ္ဗိသုဒ္ဓိပဝတ္တိယံ။
ဣတိ မိဿကသာဝဇ္ဇာ၊ ဗောဓိပက္ခိယသင်္ဂဟာ၊
ယေဝါပနကရာသိမှိ၊ ယထာသမ္ဘဝတော ဌိတာ။
ကမ္မပထာ တု သမ္ဘောန္တိ၊ ပုညာပုညေသု သဗ္ဗထာ၊
အပထာ စ သုစရိတာ၊ တထာ ဒုစ္စရိတာပိ စ။
တတ္ထ ကမ္မပထဋ္ဌာနေ၊ အနဘိဇ္ဈာဒယော ပန၊
ဥပစာရေန ဝုစ္စန္တိ၊ ဝိပါကေသု ကြိယေသု ဝါတိ။
ဣတိ စေတသိကဝိဘာဂေ ဒိဋ္ဌိသင်္ဂဟကထာ နိဋ္ဌိတာ။
သတ္တရသမော ပရိစ္ဆေဒေါ။
နိဋ္ဌိတော စ သဗ္ဗထာပိ စေတသိကဝိဘာဂေါ။