📜
အဋ္ဌာရသမော ပရိစ္ဆေဒေါ
၃။ ရူပဝိဘာဂေါ
၁၈။ သရူပကထာ
တေပညာသ ပနိစ္စေဝံ၊ နာမဓမ္မာ ပကာသိတာ၊
အဋ္ဌဝီသဝိဓံ ဒါနိ၊ ရူပံ နာမ ကထီယတိ။
ပထဝါပေါ စ တေဇော စ၊ ဝါယော စေတိ စတုဗ္ဗိဓော၊
စက္ခုသောတဃာနဇိဝှာ၊ ကာယောတိ ပန ပဉ္စ စ။
ရူပသဒ္ဒဂန္ဓရသာ၊ စတ္တာရော စ အထာပရံ၊
ဣတ္ထိပုမ္ဘာဝယုဂဠံ၊ ဇီဝိတံ ဟဒယမ္ပိ စ။
ကာယဝိညတ္တိ ¶ ¶ စေဝါထ၊ ဝစီဝိညတ္တိ စ ဒွယံ၊
အာကာသဓာတု ရူပဿ၊ လဟုတာ မုဒုတာ တဿ။
ကမ္မညတာ ဥပစယော၊ သန္တတိ ဇရတာ ပန၊
အနိစ္စတာ စ ကဗဠီကာရာဟာရောတိ သဗ္ဗထာ။
အဋ္ဌဝီသဝိဓံ ဟောတိ၊ ရူပမေတံ သရူပတော၊
တဿ လက္ခဏဘေဒေန၊ သဘာဝဉ္စ ဝိဘာဝယေ။
သန္ဓာရဏံ တု ပထဝီဓာတု ကက္ခဠလက္ခဏာ၊
အာဗန္ဓနမာပေါဓာတု၊ အာပဂ္ဃရဏလက္ခဏာ။
ပရိပါစနတာ တေဇောဓာတု ဥဏှတ္တလက္ခဏာ၊
သမုဒီရဏတာ ဝါယောဓာတု ဝိတ္ထမ္ဘလက္ခဏာ။
သဗ္ဗတ္ထာဝိနိဘုတ္တာပိ၊ အသမ္မိဿကလက္ခဏာ၊
တံတံဘာဝသမုဿန္နသမ္ဘာရေသုပလက္ခိတာ။
အညမညေနုပတ္ထဒ္ဓါ၊ သေသရူပဿ နိဿယာ၊
စတုဓေဝံ ကလာပေသု၊ မဟာဘူတာ ပဝတ္တရေ။
စက္ခု သမ္ဘာရစက္ခုမှိ၊ သတ္တက္ခိပဋလောစိတေ၊
ကဏှမဏ္ဍလမဇ္ဈမှိ၊ ပသာဒေါတိ ပဝုစ္စတိ။
ယေန စက္ခုပသာဒေန၊ ရူပါနိ အနုပဿတိ၊
ပရိတ္တံ သုခုမဉ္စေတံ၊ ဦကာသိရသမူပမံ။
သောတံ သောတဗိလဿန္တော၊
တမ္ဗလောမာစိတေ တထာ၊
အင်္ဂုလိဝေဓနာကာရေ၊
ပသာဒေါတိ ပကာသိတော။
အန္တော အဇပဒဋ္ဌာနေ၊ ဃာနံ ဃာနဗိလေ ဌိတံ၊
ဇိဝှာ ဇိဝှာယ မဇ္ဈမှိ၊ ဥပ္ပလာကာရသန္နိဘေ။
ဣစ္စေဝံ ¶ ပန စတ္တာရော၊ တံတံဒေသဝဝတ္ထိတာ၊
ကာယပ္ပသာဒေါပါဒိန္နေ၊ သဗ္ဗကေတိ ယထာက္ကမံ။
ရူပါဒျာဘိဃာတာရဟဘူတာနံ ¶ ဝါ ယထာရဟံ၊
ဒဋ္ဌုကာမနိဒါနာဒိကမ္မဘူတာနမေဝ ဝါ။
ပသာဒလက္ခဏာ ဘူတရူပါနံ ဘူတနိဿိတာ၊
ကပ္ပာသပဋလသ္နေဟသန္နိဘာတိ စ ဝဏ္ဏိတာ။
ပဉ္စာပိ ဇီဝိတာရက္ခာ၊ ရူပါဒိပရိဝါရိတာ၊
ဓီတရာဝ ကုမာရာဝ၊ ကလာပန္တရဝုတ္တိနော။
ရူပံ နိဘာသော ဘူတာနံ၊ သဒ္ဒေါ နိဂ္ဃောသနံ တထာ၊
ဂန္ဓော စ ဂန္ဓနံ တတ္ထ၊ ရသော စ ရသနီယတာ။
ဘူတတ္တယဉ္စ ဖောဋ္ဌဗ္ဗံ၊ အာပေါဓာတုဝိဝဇ္ဇိတံ၊
သဒ္ဒေါ အနိယတော တတ္ထ၊ တဒညေ သဟဝုတ္တိနော။
စက္ခာဒိပဋိဟနနလက္ခဏာ တု ယထာက္ကမံ၊
ပဉ္စေဝ ပဉ္စဝိညာဏဝီထိယာ ဝိသယာ မတာ။
ဣတ္ထိန္ဒြိယံ ပနိတ္ထိတ္တံ၊ ဣတ္ထိဘာဝေါတိ ဒေသိတော၊
ပုရိသတ္တံ တထာဘာဝေါ၊ ပုရိသိန္ဒြိယ နာမကော။
တံ ဒွယံ ပနုပါဒိန္နေ၊ ကာယေ သဗ္ဗတ္ထ လဗ္ဘတိ၊
ကလာပန္တရဘိန္နဉ္စ၊ ဘိန္နသန္တာနဝတ္တိ စ။
ရူပါနံ ကမ္မဇာတာနံ၊ အနုပါလနလက္ခဏံ၊
ဇီဝိတိန္ဒြိယရူပန္တိ၊ အာယု နာမ ပဝုစ္စတိ။
မနောဓာတုယာ စ တထာ၊ မနောဝိညာဏဓာတုယာ၊
နိဿယလက္ခဏံ ဝတ္ထုရူပံ ဟဒယနိဿိတံ။
မဇ္ဈေ ဟဒယကောသမှိ၊ အဍ္ဎပ္ပသတလောဟိတေ၊
ဘူတရူပမုပါဒါယ၊ စက္ခာဒိ ဝိယ ဝတ္တတိ။
အာကာသဓာတု ¶ ရူပါနံ၊ ပရိစ္ဆေဒကလက္ခဏာ၊
တံတံရူပကလာပါနံ၊ ပရိယန္တောတိ ဝုစ္စတိ။
စိတ္တံ သဟဇရူပါနံ၊ ကာယဿ ဂမနာဒိသု၊
သန္ထမ္ဘနသန္ဓာရဏစလနဿ တု ပစ္စယော။
ဝါယောဓာတုဝိကာရောယံ ¶ ၊ ကာယဝိညတ္တိနာမကော၊
ဝါယောဓာတာဓိကာနံ တု၊ ဘူတာနမိတိ ကေစနာ။
တထာ စိတ္တသမုဋ္ဌိနော၊ ဝစီဃောသပ္ပဝတ္တိယံ၊
ဥပါဒိန္နရူပကာယဃဋ္ဋနဿ တု ပစ္စယော။
ပထဝီဓာတုဝိကာရောယံ၊ ဝစီဝိညတ္တိနာမကော၊
ပထဝီဓာတာဓိကာနံ တု၊ ဘူတာနမိတိ ကေစနာ။
ဒွေပိ ကာယဝစီကမ္မဒွါရဘူတာ ယထာက္ကမံ၊
တေ ပန ဃဋ္ဋနာဟေတု-ဝိကာရာကာရလက္ခဏာ။
ဝိညာပေတီတိ ကာယေန၊ ဝါစာယ စ ဝိစိန္တိတံ၊
သယဉ္စ ဝိညာယတီတိ၊ ဝိညတ္တီတိ ပကိတ္တိတာ။
လဟုတာ ပန ရူပါနံ၊ အဒန္ဓာကာရလက္ခဏာ၊
မုဒုတာပိ စ ရူပါနံ၊ မဒ္ဒဝါကာရလက္ခဏာ။
ကမ္မညတာ စ ရူပါနံ၊ ယောဂ္ဂတာကာရလက္ခဏာ၊
ဂါရဝထဒ္ဓတာ ယောဂ္ဂပဋိပက္ခာ ယထာက္ကမံ။
သပ္ပာယမုတုမာဟာရံ၊ လဘိတွာ စိတ္တသမ္ပဒံ၊
လဟူ မုဒု စ ကမ္မညံ၊ ယဒါ ရူပံ ပဝတ္တတိ။
တထာပဝတ္တရူပဿ၊ ပဝတ္တာကာရဘေဒိတံ၊
လဟုတာဒိတ္တယမ္ပေတံ၊ သဟဝုတ္တိ တဒါ ဘဝေ။
သပ္ပာယံ ပဋိဝေဓာယ၊ ပဋိပတ္တုပကာရိတာ၊
သာကာရာ ရူပသမ္ပတ္တိ၊ ပညတ္တာဝ မဟေသိနာ။
ရူပဿောပစယော ¶ နာမ၊ ရူပဿာစယလက္ခဏော၊
ပဝတ္တိလက္ခဏာ ရူပသန္တတီတိ ပကာသိတာ။
ရူပမာစယရူပေန၊ ဇာယတိစ္စုပရူပရိ၊
ပေက္ခတောပစယာကာရာ၊ ဇာတိ ဂယှတိ ယောဂိနော။
အနုပ္ပဗန္ဓာကာရေန၊ ဇာယတီတိ သပေက္ခတော၊
တဒါယံ သန္တတာကာရာ၊ ဇာတိ ဂယှတိ တဿ တု။
ဧဝမာဘောဂဘေဒေန ¶ ၊ ဇာတိရူပံ ဒွိဓာ ကတံ၊
အတ္တူပလဒ္ဓိဘာဝေန၊ ဇာယန္တံ ဝါထ ကေဝလံ။
ရူပံ ဝိဝိတ္တောကာသဿ၊ ပူရကဋ္ဌေန စီယတိ၊
အဘာဝါ ပုနဘာဝါယ၊ ပဝတ္တံ သန္တတီတိ စ။
ဧဝမာကာရဘေဒါဝ၊ သဗ္ဗာကာရဝရာကရော၊
ဇာတိရူပံ ဒွိဓာကာသိ၊ ဇာတိရူပဝိရောစနော။
ဇရတာ နဝတာဟာယာ၊ ရူပါနံ ပါကလက္ခဏာ၊
အနိစ္စတန္တိ မပ္ပတ္တိ၊ ပရိဘိဇ္ဇနလက္ခဏာ။
ဣတိ လက္ခဏရူပံ တု၊ တိဝိဓံ ဘိန္နကာလိကံ၊
သဘာဝရူပဓမ္မေသု၊ တံတံကာလောပလက္ခိတံ။
ယေန လက္ခီယတိ ရူပံ၊ ဘိန္နာကာရံ ခဏေ ခဏေ၊
ဝိပဿနာနယတ္ထာယ၊ တမိစ္စာဟ တထာဂတော။
ကဗဠီကာရော အာဟာရော၊
ယာပေတဗ္ဗောဇလက္ခဏော၊
အာဟာရော သေန္ဒြိယဇာတော၊
ရူပကာယာနုပါလကော။
ဣစ္စေဝံ သပရိစ္ဆေဒါ၊ သဝိကာရာ သလက္ခဏာ၊
အကိစ္စပဋိဝေဓာယ၊ ဒယာပန္နေန တာဒိနာ။
တတ္ထ ¶ တတ္ထ ယထာယောဂံ၊ ဒေသိတာတိ ပကာသိတာ၊
ရူပဓမ္မာ သရူပေန၊ အဋ္ဌဝီသတိ သဗ္ဗထာ။
ကတွာန ဇာတိမေကံ တု၊ တတ္ထောပစယသန္တတိံ၊
သတ္တဝီသတိ ရူပါနိ၊ ဘဝန္တီတိ ဝိနိဒ္ဒိသေ။
ဘူတတ္တယံ တု ဖောဋ္ဌဗ္ဗံ၊ ကတွာ ဆဗ္ဗီသဓာပိ စ၊
ဥဘယံ ဇာတိဖောဋ္ဌဗ္ဗံ၊ ဂဟေတွာ ပဉ္စဝီသတိ။
ရူပဓမ္မာနမိစ္စေဝံ ¶ ၊ ဝိဘာဝေယျ ဝိသာရဒေါ၊
သရူပံ နာမသင်္ခေပံ၊ သဘာဝဉ္စ သလက္ခဏန္တိ။
ဣတိ ရူပဝိဘာဂေ သရူပကထာ နိဋ္ဌိတာ။
အဋ္ဌာရသမော ပရိစ္ဆေဒေါ။