📜
၆။ ဆဋ္ဌော ပရိစ္ဆေဒေါ
အာရမ္မဏဝိဘာဂနိဒ္ဒေသော
ဧတေသံ ¶ ¶ ¶ ပန စိတ္တာနံ၊ အာရမ္မဏမိတော ပရံ၊
ဒဿယိဿာမဟံ တေန၊ ဝိနာ နတ္ထိ ဟိ သမ္ဘဝေါ။
ရူပံ သဒ္ဒံ ဂန္ဓံ ရသံ၊ ဖောဋ္ဌဗ္ဗံ ဓမ္မမေဝ စ၊
ဆဓာ အာရမ္မဏံ အာဟု၊ ဆဠာရမ္မဏကောဝိဒါ။
တတ္ထ ဘူတေ ဥပါဒါယ၊ ဝဏ္ဏော စတုသမုဋ္ဌိတော၊
သနိဒဿနပဋိဃော၊ ရူပါရမ္မဏသညိတော။
ဒုဝိဓော ဟိ သမုဒ္ဒိဋ္ဌော၊ သဒ္ဒေါ စိတ္တောတုသမ္ဘဝေါ၊
သဝိညာဏကသဒ္ဒေါဝ၊ ဟောတိ စိတ္တသမုဋ္ဌိတော။
အဝိညာဏကသဒ္ဒေါ ယော၊
သော ဟောတူတုသမုဋ္ဌိတော၊
ဒုဝိဓောပိ အယံ သဒ္ဒေါ၊
သဒ္ဒါရမ္မဏတံ ဂတော။
ဓရီယတီတိ ဂစ္ဆန္တော၊ ဂန္ဓော သူစနတောပိ ဝါ၊
အယံ စတုသမုဋ္ဌာနော၊ ဂန္ဓာရမ္မဏသမ္မတော။
ရသမာနာ ရသန္တီတိ၊ ရသောတိ ပရိကိတ္တိတော၊
သောဝ စတုသမုဋ္ဌာနော၊ ရသာရမ္မဏနာမကော။
ဖုသီယတီတိ ဖောဋ္ဌဗ္ဗံ၊ ပထဝီတေဇဝါယဝေါ၊
ဖောဋ္ဌဗ္ဗံ စတုသမ္ဘူတံ၊ ဖောဋ္ဌဗ္ဗာရမ္မဏံ မတံ။
သဗ္ဗံ နာမဉ္စ ရူပဉ္စ၊ ဟိတွာ ရူပါဒိပဉ္စကံ၊
လက္ခဏာနိ စ ပညတ္တိ-ဓမ္မာရမ္မဏသညိတံ။
ဆာရမ္မဏာနိ ¶ လဗ္ဘန္တိ၊ ကာမာဝစရဘူမိယံ၊
တီဏိ ရူပေ ပနာရူပေ၊ ဓမ္မာရမ္မဏမေကကံ။
ခဏဝတ္ထုပရိတ္တတ္တာ ¶ ၊ အာပါထံ န ဝဇန္တိ ယေ၊
တေ ဓမ္မာရမ္မဏာ ဟောန္တိ၊ ယေသံ ရူပါဒယော ကိရ။
တေ ပဋိက္ခိပိတဗ္ဗာဝ၊ အညမညဿ ဂေါစရံ၊
နေဝ ပစ္စနုဘောန္တာနံ၊ မနော တေသံ တု ဂေါစရံ။
တဉ္စ ¶ ‘‘ပစ္စနုဘောတီ’’တိ၊ ဝုတ္တတ္တာ ပန သတ္ထုနာ၊
ရူပါဒါရမ္မဏာနေဝ၊ ဟောန္တိ ရူပါဒယော ပန။
ဒိဗ္ဗစက္ခာဒိဉာဏာနံ၊ ရူပါဒီနေဝ ဂေါစရာ၊
အနာပါထဂတာနေဝ၊ တာနီတိပိ န ယုဇ္ဇတိ။
ယံ ရူပါရမ္မဏံ ဟောန္တံ၊ တံ ဓမ္မာရမ္မဏံ ကထံ၊
ဧဝံ သတိ ပနေတေသံ၊ နိယမောတိ ကထံ ဘဝေ။
သဗ္ဗံ အာရမ္မဏံ ဧတံ၊ ဆဗ္ဗိဓံ သမုဒီရိတံ၊
တံ ပရိတ္တတ္တိကာဒီနံ၊ ဝသေန ဗဟုဓာ မတံ။
သဗ္ဗော ကာမဝိပါကော စ၊ ကြိယာဟေတုဒွယမ္ပိ စ၊
ပဉ္စဝီသတိ ဧကန္တံ၊ ပရိတ္တာရမ္မဏာ သိယုံ။
ဣဋ္ဌာဒိဘေဒါ ပဉ္စေဝ၊ ရူပသဒ္ဒါဒယော ပန၊
ဝိညာဏာနံ ဒွိပဉ္စန္နံ၊ ဂေါစရာ ပဋိပါဋိယာ။
ရူပါဒိပဉ္စကံ သဗ္ဗံ၊ မနောဓာတုတ္တယဿ တု၊
တေရသန္နံ ပနေတေသံ၊ ရူပက္ခန္ဓောဝ ဂေါစရော။
နာရူပံ န စ ပညတ္တိံ၊ နာတီတံ န စနာဂတံ၊
အာရမ္မဏံ ကရောန္တေ စ၊ ဝတ္တမာနော ဟိ ဂေါစရော။
တေရသေတာနိ စိတ္တာနိ၊ ဇာယန္တေ ကာမဓာတုယံ၊
စတ္တာရိ ရူပါဝစရေ၊ နေဝ ကိဉ္စိ အရူပိသု။
မဟာပါကာနမဋ္ဌန္နံ ¶ ¶ ၊ သန္တီရဏတ္တယဿပိ၊
ဆသု ဒွါရေသု ရူပါဒိဆပရိတ္တာနိ ဂေါစရာ။
ရူပါဒယော ပရိတ္တာ ဆ၊ ဟသိတုပ္ပာဒဂေါစရာ၊
ပဉ္စဒွါရေ ပဋုပ္ပန္နာ၊ မနောဒွါရေ တိကာလိကာ။
ဒုတိယာရုပ္ပစိတ္တဉ္စ၊ စတုတ္ထာရုပ္ပမာနသံ၊
ဆဗ္ဗိဓံ နိယတံ ဟောတိ၊ တံ မဟဂ္ဂတဂေါစရံ။
နိဗ္ဗာနာရမ္မဏတ္တာ ဟိ၊ ဧကန္တေန အနညတော၊
အဋ္ဌာနာသဝစိတ္တာနံ၊ အပ္ပမာဏောဝ ဂေါစရော။
စတ္တာရော ဉာဏဟီနာ စ၊ ကာမာဝစရပုညတော၊
ကြိယတောပိ စ စတ္တာရော၊ ဒွါဒသာကုသလာနိ စ။
ပရိတ္တာရမ္မဏာ စေဝ၊ တေ မဟဂ္ဂတဂေါစရာ၊
ပညတ္တာရမ္မဏတ္တာ ဟိ၊ နဝတ္တဗ္ဗာဝ ဟောန္တိ တေ။
စတ္တာရော ဉာဏသံယုတ္တာ၊ ပုညတော ကြိယတောပိ စ၊
တထာဘိညာဒွယဉ္စေဝ၊ ကြိယာဝေါဋ္ဌဗ္ဗနမ္ပိ စ။
ဧကာဒသန္နမေတေသံ၊ တိဝိဓော ဟောတိ ဂေါစရော၊
ပညတ္တာရမ္မဏတ္တာ ဟိ၊ နဝတ္တဗ္ဗာပိ ဟောန္တိမေ။
ယာနိ ဝုတ္တာဝသေသာနိ၊ စိတ္တာနိ ပန တာနိ ဟိ၊
နဝတ္တဗ္ဗာရမ္မဏာနီတိ၊ ဝိညေယျာနိ ဝိဘာဝိနာ။
ပရိတ္တာရမ္မဏတ္တိကံ သမတ္တံ။
ဒုတိယာရုပ္ပစိတ္တဉ္စ ¶ ၊ စတုတ္ထာရုပ္ပမာနသံ၊
ဆဗ္ဗိဓံ ပန ဧကန္တ-အတီတာရမ္မဏံ သိယာ။
ဝိညာဏာနံ ဒွိပဉ္စန္နံ၊ မနောဓာတုတ္တယဿ စ၊
ပဉ္စ ရူပါဒယော ဓမ္မာ၊ ပစ္စုပ္ပန္နာဝ ဂေါစရာ။
အဋ္ဌ ¶ ¶ ကာမမဟာပါကာ၊ သန္တီရဏတ္တယမ္ပိ စ၊
ဟသိတုပ္ပာဒစိတ္တန္တိ၊ ဒွါဒသေတေ တု မာနသာ။
သိယာတီတာရမ္မဏာ ပစ္စု-ပ္ပန္နာနာဂတဂေါစရာ၊
ကုသလာကုသလာ ကာမေ၊ ကြိယတော နဝ မာနသာ။
အဘိညာမာနသာ ဒွေပိ၊ သိယာတီတာဒိဂေါစရာ၊
သန္တပညတ္တိကာလေပိ၊ နဝတ္တဗ္ဗာ ဘဝန္တိမေ။
သေသာနိ ပန သဗ္ဗာနိ၊ ရူပါရူပဘဝေသုပိ၊
နဝတ္တဗ္ဗာနိ ဟောန္တေဝ၊ အတီတာရမ္မဏာဒိနာ။
ကာမတော စ ကြိယာ ပဉ္စ၊ ရူပတော ပဉ္စမီ ကြိယာ၊
စိတ္တာနံ ဆန္နမေတေသံ၊ နတ္ထိ ကိဉ္စိ အဂေါစရံ။
နိဗ္ဗာနဉ္စ ဖလံ မဂ္ဂံ၊ ရူပဉ္စာရူပမေဝ စ၊
သက္ကောန္တိ ဂေါစရံ ကာတုံ၊ ကတိ စိတ္တာနိ မေ ဝဒ။
စတ္တာရော ဉာဏသံယုတ္တာ၊
ပုညတော ကြိယတော တထာ၊
အဘိညာဟဒယာ ဒွေပိ၊
ကြိယာ ဝေါဋ္ဌဗ္ဗနမ္ပိ စ။
သက္ကောန္တိ ဂေါစရံ ကာတုံ၊ စိတ္တာနေကာဒသာပိ စ၊
နိဗ္ဗာနဉ္စ ဖလံ မဂ္ဂံ၊ ရူပဉ္စာရူပမေဝ စ။
စိတ္တေသု ပန သဗ္ဗေသု၊ ကတိ စိတ္တာနိ မေ ဝဒ၊
အရဟတ္တဖလံ မဂ္ဂံ၊ ကာတုံ သက္ကောန္တိ ဂေါစရံ။
သဗ္ဗေသု ပန စိတ္တေသု၊ ဆ စ စိတ္တာနိ မေ သုဏ၊
အရဟတ္တဖလံ မဂ္ဂံ၊ ကာတုံ သက္ကောန္တိ ဂေါစရံ။
စတ္တာရော ဉာဏသံယုတ္တာ၊ ကြိယာ ဝေါဋ္ဌဗ္ဗနမ္ပိ စ၊
ကြိယာဘိညာ မနောဓာတု၊ ဆ စ သက္ကောန္တိ ဂေါစရံ။
စတ္တာရော ¶ ¶ ဉာဏသံယုတ္တာ-ဘိညာစိတ္တဉ္စ ပုညတော၊
နာရဟတ္တံ ဖလံ မဂ္ဂံ၊ ကာတုံ သက္ကောန္တိ ဂေါစရံ။
ကသ္မာ အရဟတော မဂ္ဂ-စိတ္တံ ဝါ ဖလမာနသံ၊
ပုထုဇ္ဇနာ ဝါ သေက္ခာ ဝါ၊ န သက္ကောန္တိ ဟိ ဇာနိတုံ။
ပုထုဇ္ဇနော န ဇာနာတိ၊
သောတာပန္နဿ မာနသံ၊
သောတာပန္နော န ဇာနာတိ၊
သကဒါဂါမိဿ မာနသံ။
သကဒါဂါမီ န ဇာနာတိ၊ အနာဂါမိဿ မာနသံ၊
အနာဂါမီ န ဇာနာတိ၊ အရဟန္တဿ မာနသံ။
ဟေဋ္ဌိမော ¶ ဟေဋ္ဌိမော နေဝ၊ ဇာနာတိ ဥပရူပရိ၊
ဥပရူပရိ ဇာနာတိ၊ ဟေဋ္ဌိမဿ စ မာနသံ။
ယော ဓမ္မော ယဿ ဓမ္မဿ၊
ဟောတိ အာရမ္မဏံ ပန၊
တမုဒ္ဓရိတွာ ဧကေကံ၊
ပဝက္ခာမိ ဣတော ပရံ။
ကုသလာရမ္မဏံ ကာမေ၊ ကုသလာကုသလဿ စ၊
အဘိညာမာနသဿာပိ၊ ကုသလဿ ကြိယဿ စ။
ကာမာဝစရပါကဿ၊ တထာ ကာမကြိယဿ စ၊
ဧတေသံ ပန ရာသီနံ၊ ဆန္နံ အာရမ္မဏံ သိယာ။
ရူပါဝစရပုညာနိ၊ ကာမပါကံ တတော ဝိနာ၊
ပဉ္စန္နံ ပန ရာသီနံ၊ ဟောန္တိ အာရမ္မဏာနိ ဟိ။
အာရုပ္ပကုသလဉ္စာပိ၊ တေဘူမကုသလဿ စ၊
တေဘူမကကြိယဿာပိ၊ တထေဝါကုသလဿပိ။
အရူပါဝစရပါကာနံ ¶ ¶ ၊ ဒွိန္နံ ပန စတုတ္ထဒု၊
ဣမေသံ အဋ္ဌရာသီနံ၊ ဟောတာရမ္မဏပစ္စယော။
အပရိယာပန္နပုညမ္ပိ၊ ကာမာဝစရတောပိ စ၊
ရူပတော ပဉ္စမဿာပိ၊ ကုသလဿ ကြိယဿ စ။
စတုန္နံ ပန ရာသီနံ၊ ဟောတိ အာရမ္မဏံ သဒါ၊
တထေဝါကုသလံ ကာမ-ရူပါဝစရတော ပန။
ကုသလဿ ကြိယဿာပိ၊ တထေဝါကုသလဿ စ၊
ကာမာဝစရပါကာနံ၊ ဆန္နံ ရာသီနမီရိတံ။
ဝိပါကာရမ္မဏံ ကာမေ၊ ကာမာဝစရတောပိ စ၊
ရူပါဝစရတော စေဝ၊ ကုသလဿ ကြိယဿ စ။
ကာမာဝစရပါကာနံ၊ တထေဝါကုသလဿ စ၊
ဆန္နဉ္စ ပန ရာသီနံ၊ ဟောတာရမ္မဏပစ္စယော။
ဝိပါကာရမ္မဏံ ရူပေ၊ ကာမာဝစရတောပိ စ၊
ရူပါဝစရတော စေဝ၊ ကုသလဿ ကြိယဿ စ။
အပုညဿာတိ ပဉ္စန္နံ၊ ရာသီနံ ဟောတိ ဂေါစရော၊
အရူပါဝစရပါကေသု၊ အယမေဝ နယော မတော။
အပရိယာပန္နပါကမ္ပိ၊ ကာမတော ရူပတောပိ စ၊
ကုသလဿ ကြိယဿာပိ၊ ဟောတိ အာရမ္မဏံ ပန။
ကြိယစိတ္တမိဒံ ကာမေ၊ ကာမာဝစရတောပိ စ၊
ရူပါဝစရတော စေဝ၊ ကုသလဿ ကြိယဿ စ။
ကာမာဝစရပါကဿ၊ တထေဝါကုသလဿ စ၊
ဆန္နံ ရာသီနမေတေသံ၊ ဟောတာရမ္မဏပစ္စယော။
ယံ ¶ ကြိယာမာနသံ ရူပေ၊ ကာမပါကံ တတော ဝိနာ၊
ပဉ္စန္နံ ပန ရာသီနံ၊ ဟောတိ အာရမ္မဏံ ပန။
ကြိယာစိတ္တံ ¶ ¶ ပနာရုပ္ပေ၊ တေသံ ပဉ္စန္နမေဝ စ၊
အာရုပ္ပဿ ကြိယဿာပိ၊ ဆန္နံ ဟောတေဝ ဂေါစရော။
ရူပံ စတုသမုဋ္ဌာနံ၊ ရူပါရမ္မဏသညိတံ၊
ကာမာဝစရပုညဿ၊ တထေဝ ကုသလဿ စ။
အဘိညာဒွယစိတ္တဿ၊ ကာမပါကကြိယဿ စ၊
ဆန္နံ ရာသီနမေတေသံ၊ ဟောတာရမ္မဏပစ္စယော။
နိဗ္ဗာနာရမ္မဏံ ကာမ-ရူပါဝစရတော ပန၊
ကုသလဿုဘယဿာပိ၊ ကာမရူပကြိယဿ စ။
အပရိယာပန္နတော စေဝ၊ ဖလဿ ကုသလဿ စ၊
ဆန္နံ ရာသီနမေတေသံ၊ ဟောတာရမ္မဏပစ္စယော။
နာနပ္ပကာရကံ သဗ္ဗံ၊ ပညတ္တာရမ္မဏံ ပန၊
တေဘူမကဿ ပုညဿ၊ တထေဝါကုသလဿ စ။
ရူပါရူပဝိပါကဿ၊ တေဘူမကကြိယဿ စ၊
နဝန္နံ ပန ရာသီနံ၊ ဟောတာရမ္မဏပစ္စယော။
ရူပါရမ္မဏိကာ ဒွေ တု၊ ဒွေ ဒွေ သဒ္ဓါဒိဂေါစရာ၊
ပဉ္စာရမ္မဏိကာ နာမ၊ စိတ္တုပ္ပာဒါ တယော မတာ။
ဣဓေကစတ္တာလီသေဝ၊ ဆဠာရမ္မဏိကာ မတာ၊
ကာမာဝစရစိတ္တာန-မယမာရမ္မဏက္ကမော။
ပဉ္စာဘိညာ ဝိဝဇ္ဇေတွာ၊ ရူပါရူပါ အနာသဝါ၊
စိတ္တုပ္ပာဒါ ဣမေ သဗ္ဗေ၊ ဓမ္မာရမ္မဏဂေါစရာ။
ပဌမာရုပ္ပကုသလံ၊ ဒုတိယာရုပ္ပစေတသော၊
ကုသလဿ ဝိပါကဿ၊ ကြိယဿာရမ္မဏံ ဘဝေ။
ပဌမာရုပ္ပပါကောယံ ¶ ၊ ဒုတိယာရုပ္ပစေတသော၊
ကုသလဿ ဝိပါကဿ၊ ကြိယဿာရမ္မဏံ န ဟိ။
ပဌမံ ¶ တု ကြိယာစိတ္တံ၊ ဒုတိယာရုပ္ပစေတသော၊
န ပုညဿ န ပါကဿ၊ ဟောတိ အာရမ္မဏံ ပန။
ပဌမံ တု ကြိယာစိတ္တံ၊ ဒုတိယာရုပ္ပစေတသော၊
ကြိယဿာရမ္မဏံ ဟောတိ၊ ဣတိ ဉေယျံ ဝိဘာဝိနာ။
ပုထုဇ္ဇနဿ သေက္ခဿ၊ အရူပါရမ္မဏံ ဒွိဓာ၊
ကုသလံ ကုသလဿာပိ၊ ဝိပါကဿ စ တံ သိယာ။
ခီဏာသဝဿ ဘိက္ခုဿ၊ ပဌမာရုပ္ပမာနသံ၊
အာရမ္မဏံ တိဓာ ဟောတိ၊ ဣတိ ဝုတ္တံ မဟေသိနာ။
ကြိယဿာပိ ကြိယာ ဟောတိ၊ ကုသလမ္ပိ ကြိယဿ စ၊
ကုသလံ တု ဝိပါကဿ၊ ဧဝံ ဟောတိ တိဓာ ပန။
တတိယာရုပ္ပစိတ္တမ္ပိ၊ စတုတ္ထာရုပ္ပစေတသော၊
ဧဝမေဝ ဒွိဓာ စေဝ၊ တိဓာ စာရမ္မဏံ သိယာ။
ယံ ယံ ပန ဣဓာရဗ္ဘ၊
ယေ ယေ ဇာယန္တိ ဂေါစရံ၊
သော သော တေသဉ္စ တေသဉ္စ၊
ဟောတာရမ္မဏပစ္စယော။
ယော ¶ ပနိမဿ နရော ကိရ ပါရံ၊
ဒုတ္တရမုတ္တရမုတ္တရတီဓ၊
သော အဘိဓမ္မမဟဏ္ဏဝပါရံ၊
ဒုတ္တရမုတ္တရမုတ္တရတေဝ။
ဣတိ အဘိဓမ္မာဝတာရေ အာရမ္မဏဝိဘာဂေါ နာမ
ဆဋ္ဌော ပရိစ္ဆေဒေါ။