📜
ဧကူနဝီသတိမော ပရိစ္ဆေဒေါ
၁၉။ ပဘေဒကထာ
အဋ္ဌဝီသဝိဓမ္ပေတံ၊ ရူပံ ဒါနိ ယထာရဟံ၊
ဘူတရူပါဒိဘေဒေဟိ၊ ဝိဘဇေယျ ဝိစက္ခဏော။
ပထဝါဒိကမိဒန္တိ၊ ဘူတရူပံ စတုဗ္ဗိဓံ၊
ဥပါဒါရူပမညံ တု၊ စတုဝီသတိဝိဓံ ဘဝေ။
ပဉ္စဝိဓမ္ပိ စက္ခာဒိရူပမဇ္ဈတ္တိကံ မတံ၊
တေဝီသတိဝိဓံ သေသံ၊ ဗာဟိရန္တိ ပဝုစ္စတိ။
ရူပသဒ္ဒဂန္ဓရသဖောဋ္ဌဗ္ဗာ သတ္တ ပဉ္စဓာ၊
ပဉ္စပ္ပသာဒဝိသယာ၊ ပဉ္စာရမ္မဏနာမကာ။
ဧကဝီသတိဝိဓံ ¶ သေသံ၊ ဓမ္မာရမ္မဏသင်္ဂဟံ၊
မနောဝိညာဏဝိညေယျံ၊ မနောဒွါရဿ ဂေါစရံ။
ပသာဒါ ဝိသယာ စေဝ၊ ပဉ္စကာ ဒွေပိ သမ္ဘဝါ၊
ဒွါဒသာပိ သရူပေန၊ ဒသာယတနဓာတုယော။
ယဒေဒံ ပန သဗ္ဗမ္ပိ၊ ရူပံ သပ္ပဋိဃံ မတံ၊
တဒေဝေါဠာရိကံ နာမ၊ သန္တိကေတိ ပဝုစ္စတိ။
သေသမပ္ပဋိဃံ နာမ၊ ဓမ္မာယတနဓာတု စ၊
သုခုမဉ္စေဝ ရူပဉ္စ၊ ရူပံ သောဠသဓာ ဌိတံ။
ဆဗ္ဗိဓာ ဝတ္ထုရူပံ တု၊ ပသာဒဟဒယမ္ပိ စ၊
အဝတ္ထုရူပံ သေသံ တု၊ ဒွါဝီသတိဝိဓံ ဘဝေ။
ပသာဒါ ¶ စေဝ ဝိညတ္တိ၊ ဒွါရရူပံ တု သတ္တဓာ၊
သေသံ အဒွါရရူပံ တု၊ ဧကဝီသဝိဓမ္ပိ စ။
ပသာဒါ ဘာဝယုဂဠံ၊ ဇီဝိတဉ္စေတိ အဋ္ဌဓာ၊
ဣန္ဒြိယရူပမညံ တု၊ ဝီသဓာနိန္ဒြိယံ သိယာ။
ဝဏ္ဏော ဂန္ဓော ရသော ဩဇာ၊ ဘူတရူပန္တိ အဋ္ဌဓာ၊
အဝိနိဗ္ဘောဂမိတရံ၊ ဝိနိဗ္ဘောဂံ တု ဝီသဓာ။
အဝိနိဗ္ဘောဂရူပါနိ၊ သဒ္ဒဝတ္ထိန္ဒြိယာနိ စ၊
နိပ္ဖန္နံ အဋ္ဌာရသဓာ၊ ရူပရူပန္တိ ဝေဒိတံ။
ပရိစ္ဆေဒေါ ပနာကာသော၊ ဝိညတ္တိလဟုတာဒယော၊
ဝိကာရာ လက္ခဏာ စေဝ၊ ရူပဿုပစယာဒယော။
ဒသဓာပိ အနိပ္ဖန္နံ၊ နတ္ထေတံ ပရမတ္ထတော၊
ရူပဿေတန္တိ ကတွာန၊ ရူပမိစ္စေဝ ဝုစ္စတိ။
ရူပါယတနမေဝေကံ၊ သနိဒဿနမီရိတံ၊
အနိဒဿနမညံ တု၊ သတ္တဝီသတိဝိဓမ္ပိ စ။
ကမ္မဇံ ¶ ပနုပါဒိန္နံ၊ အနုပါဒိန္နကာပရံ၊
တိဝိဓံ စိတ္တဇဉ္စေဝ၊ ဥတုဇာဟာရဇန္တိ စ။
စက္ခုသမ္ဖဿဝတ္ထူတိ၊ စက္ခုဓာတု ပကိတ္တိတာ၊
န ဝတ္ထု တဿ သေသံ တု၊ သတ္တဝီသတိဝိဓံ ဘဝေ။
သောတသမ္ဖဿဝတ္ထာဒိ-ဝသာ စ ဒုဝိဓာ တထာ၊
တိဝိဓာ စ ဝိဘာဝေယျ၊ ယထာသမ္ဘဝတော ကထံ။
သနိဒဿနရူပဉ္စ၊ ဝဏ္ဏော သပ္ပဋိဃမ္ပိ စ၊
အနိဒဿနမညံ တု၊ ထူလံ သပ္ပဋိဃံ ဘဝေ။
အနိဒဿနရူပဉ္စ၊ သေသမပ္ပဋိဃမ္ပိ စ၊
သောဠသာတိ စ သဗ္ဗမ္ပိ၊ ရူပံ တိဝိဓမုဒ္ဒိသေ။
အပတ္တဂါဟကံ နာမ၊ စက္ခုသောတဒွယံ ပန၊
သမ္ပတ္တဂါဟကံ နာမ၊ ဃာနာဒိတ္တယမီရိတံ။
အဂါဟကမတော ¶ သေသံ၊ တေဝီသတိဝိဓံ ဘဝေ၊
ကိဉ္စိ သာရမ္မဏံ နာမ၊ န ဂယှတီတိ သဗ္ဗထာ။
ဥပါဒါ အဇ္ဈတ္တိကံ ရူပံ၊ ဥပါဒါ ဗာဟိရံ တထာ၊
နောပါဒါ ဗာဟိရဉ္စေတိ၊ ဧဝမ္ပိ တိဝိဓံ ဘဝေ။
အဇ္ဈတ္တိကမုပါဒိန္နံ၊ ဗာဟိရဉ္စ တထာပရံ၊
အနုပါဒိန္နကဉ္စေတိ၊ ဧဝမာဒိဝသာပိ စ။
ဒိဋ္ဌံ ရူပံ သုတံ သဒ္ဒေါ၊ ဂန္ဓာဒိ တိဝိဓံ မုတံ၊
ဝိညာတမညဝိညေယျံ၊ မနသာတိ စတုဗ္ဗိဓံ။
ရူပရူပံ ပရိစ္ဆေဒေါ၊ ဝိကာရော လက္ခဏံ ကမာ၊
အဋ္ဌာရသေကကံ ပဉ္စ၊ စတုက္ကန္တိ စ တံ တထာ။
ဒွါရဉ္စ ဟောတိ ဝတ္ထု စ၊ န ဝတ္ထု ဒွါရမေဝ တု၊
န ဒွါရံ ဝတ္ထုမေဝါထ၊ နောဘယန္တိ စ နိဒ္ဒိသေ။
ဥပါဒါ ¶ အနုပါဒိန္နံ၊ အနုပါဒိန္နကံ တထာ၊
နောပါဒါ ဒုဝိဓဉ္စေတိ၊ စတုဒ္ဓေဝမ္ပိ ဒေသိတံ။
သပ္ပဋိဂ္ဃမုပါဒါ စ၊ ရူပမပ္ပဋိဃံ တထာ၊
နောပါဒါ ဒုဝိဓဉ္စေတိ၊ စတုဒ္ဓါ ဧဝမာဒိတော။
ဧကာဒသေကဇရူပံ၊ ဟဒယိန္ဒြိယနဝကံ၊
ကမ္မဇံ စိတ္တဇဉ္စေဝ၊ တထာ ဝိညတ္တိကံ ဒွယံ။
သဒ္ဒေါ စိတ္တောတုဇော တသ္မာ၊ ရူပမေကံ ဒွိဇံ မတံ၊
စိတ္တောတာဟာရသမ္ဘူတံ၊ လဟုတာဒိတ္တယံ တိဇံ။
နဝါကာသာဝိနိဗ္ဘောဂါ၊ ကမ္မာဒိစတုသမ္ဘဝါ၊
အထ လက္ခဏရူပန္တိ၊ ရူပမေဝံ တု ပဉ္စဓာ။
နဝါကာသာဝိနိဗ္ဘောဂါ၊ နဝ ဝတ္ထိန္ဒြိယာနိ စ၊
အဋ္ဌာရသဝိဓံ ရူပံ၊ ကမ္မဇံ ဟောတိ ပိဏ္ဍိတံ။
သဒ္ဒါကာသာဝိနိဗ္ဘောဂါ၊ ဝိညတ္တိလဟုတာဒယော၊
ပဉ္စဒသဝိဓံ ရူပံ၊ စိတ္တသမ္ဘဝမုဒ္ဒိသေ။
သဒ္ဒါကာသာဝိနိဗ္ဘောဂါ ¶ ၊ လဟုတာဒိတ္တယန္တိ စ၊
ဥတုသမ္ဘဝမီရေန္တိ၊ ရူပံ တေရသဓာ ဌိတံ။
ပရိစ္ဆေဒါဝိနိဗ္ဘောဂါ၊ လဟုတာဒိတ္တယမ္ပိ စ၊
ဧဝမာဟာရဇံ နာမ၊ ရူပံ ဒွါဒသဓာ ဌိတံ။
ဇာတိ ဇရာ စ မရဏံ၊ န ကုတောစိပိ ဇာယတိ၊
ဧဝမ္ပိ ပဉ္စဓာ ဟောတိ၊ ရူပဇာတိဝိဘာဂတော။
ပဉ္စဝီသတိဝိဓံ ကမ္မံ၊ ကာမရူပဝဝတ္ထိတံ၊
ဇနေတိ ကမ္မဇံ ရူပံ၊ ကာမရူပဘဝဒွယေ။
ပဉ္စဝိညာဏမာရုပ္ပ-ဝိပါကာ သဗ္ဗသန္ဓိယော၊
စုတိ ခီဏာသဝဿေတိ၊ သောဠသေတေ ဝိဝဇ္ဇယေ။
ပဉ္စသတ္တတိ ¶ သေသာနိ၊ စိတ္တာနိမာနိ သမ္ဘဝါ၊
ဇနေန္တိ စိတ္တဇံ ရူပံ၊ ပဉ္စဝေါကာရဘူမိယံ။
ဇနေဘိ ဥတုဇံ ရူပံ၊ တေဇောဓာတု ဘဝဒွယေ၊
ကာမဘူမိယမောဇာ တု၊ ဇနေတာဟာရဇံ တထာ။
ကမ္မံ ဇနေတိ ရူပါနိ၊ အတ္တဇာနိ ခဏေ ခဏေ၊
စိတ္တမုပ္ပာဒကာလမှိ၊ ဥပ္ပာဒါနန္တရံ ပရံ။
ဥတုသမ္ဘဝမီရေန္တိ၊ ရူပံ တေရသဓာ ဌိတံ၊
ပရိစ္ဆေဒါဝိနိဗ္ဘောဂါ၊ လဟုတာဒိတ္တယမ္ပိ စ။
သန္ဓိယမ္ပိ ကမ္မဇံ တု၊ ပဝတ္တေပိ စ သမ္ဘဝါ၊
ဇနေတိ ရူပံ သေသာနိ၊ ပဝတ္တေ၊ န တု သန္ဓိယံ။
ဣန္ဒြိယဗဒ္ဓသန္တာနေ၊ ကမ္မာဒိ တိဝိဓမ္ပိ စ၊
ဇနေတိ ရူပံ မတကေ၊ ဗာဟိရေ တု ယထာရဟံ။
ဣတိ ကမ္မာဒယော ရူပံ၊ ဇနေန္တိ စ ယထာသကံ၊
သေသာနမ္ပိ စ ရူပါနံ၊ ပစ္စယာ ဟောန္တိ သမ္ဘဝါ။
ဣတိ ¶ ရူပဝိဘာဂဉ္စ၊ ဇာတိဘေဒဉ္စ သမ္ဘဝါ၊
ဇနကာဒိပ္ပဘေဒဉ္စ၊ ရူပါနံ တတ္ထ ဒီပယေတိ။
ဣတိ ရူပဝိဘာဂေ ပဘေဒကထာ နိဋ္ဌိတာ။
ဧကူနဝီသတိမော ပရိစ္ဆေဒေါ။