📜
ဝီသတိမော ပရိစ္ဆေဒေါ
၂၀။ ကလာပကထာ
ဣတိ ¶ ဝုတ္တပ္ပကာရေန၊ သဗ္ဗံ ရူပမ္ပိ ပိဏ္ဍိတံ၊
သဟဝုတ္တိနိယာမေန၊ ဧကဝီသဝိဓံ ကထံ။
ကမ္မံ စိတ္တောတုကာဟာရသမုဋ္ဌာနာ ယထာက္ကမံ၊
နဝ ဆ စတုရော ဒွေ စ၊ ကလာပါ ဧကဝီသတိ။
ဇီဝိတဉ္စာဝိနိဗ္ဘောဂ-ရူပါနိ စ ယထာက္ကမံ၊
စက္ခာဒိကေဟိ ယောဇေတွာ၊ ဒသကာ အဋ္ဌ ဒီပိတာ။
စက္ခုသောတဃာနဇိဝှာဒသကာ စ စတုဗ္ဗိဓာ၊
ကာယိတ္ထိပုမ္ဘာဝဝတ္ထုဒသကာ စ တထာပရေ။
ဇီဝိတေနာဝိနိဗ္ဘောဂရူပါနိ နဝကန္တိ စ၊
နဝေတေ ကမ္မဇာ နာမ၊ ကလာပါ သမုဒီရိတာ။
အဝိနိဗ္ဘောဂရူပါနိ၊ သုဒ္ဓဋ္ဌကမထာပရံ၊
ကာယဝိညတ္တိနဝကံ၊ ကာယဝိညတ္တိယာ သဟ။
ဝစီဝိညတ္တိဒသကံ၊ သဒ္ဒေန သဟဝုတ္တိတော၊
လဟုတာဒေကာဒသကံ၊ တိဏ္ဏန္နံ သဟ သမ္ဘဝါ။
ကာယဝိညတ္တိလဟုတာဒီဟိ ဒွါဒသကံ ဘဝေ၊
ဝစီဝိညတ္တိလဟုတာဒီဟိ တေရသကံ တထာ။
ဣတိ စိတ္တသမုဋ္ဌာနာ၊ ကလာပါ ဆ ပကာသိတာ၊
ရူပါကာရဝိကာရမ္ပိ၊ သင်္ဂဟေတွာ ယထာရဟံ။
သုဒ္ဓဋ္ဌကံ ¶ တု ပဌမံ၊ သဒ္ဒေန နဝကံ ဘဝေ၊
လဟုတာဒေကာဒသကံ၊ လဟုတာဒီဟိ တီဟိပိ။
သဒ္ဒေန ¶ လဟုတာဒီဟိ၊ တထာ ဒွါဒသကန္တိ စ၊
ကလာပါ ဥတုသမ္ဘူတာ၊ စတုဓာဝ ပကိတ္တိတာ။
သုဒ္ဓဋ္ဌကဉ္စ ပဌမံ၊ အာဟာရဇမထာပရံ၊
လဟုတာဒေကာဒသကံ၊ ဣတိ ဒွေ ဩဇဇာ မတာ။
ကလာပါနံ ပရိစ္ဆေဒလက္ခဏတ္တာ ဝိစက္ခဏာ၊
န ကလာပင်္ဂမိစ္စာဟု၊ အာကာသံ လက္ခဏာနိ စ။
တတ္ထ စေကူနနဝုတိ၊ တေသဋ္ဌိ စ ယထာက္ကမံ၊
တာလီသေကူနဝီသာ စ၊ ကလာပင်္ဂါနိ တာနိ စ။
လက္ခဏာကာသရူပါနိ၊ ကလာပေသု တဟိံ တဟိံ၊
ပဉ္စ ပဉ္စေတိ ရူပါနိ၊ တိသတံ သောဠသာဓိကံ။
အဂဟီတဂ္ဂဟဏေန၊ အဋ္ဌဝီသဝိဓာနိပိ၊
ရူပကောဋ္ဌာသနာမေန၊ ပဉ္စဝီသတိ ဘာဝယေ။
ဘူတတ္တယံ တု ဖောဋ္ဌဗ္ဗံ၊ ကတွာပစယသန္တတိံ၊
ဇာတိမေကဉ္စ ကတွာ ဝါ၊ ဝိနာထ ဟဒယံ တဟိံ။
ဓမ္မသင်္ဂဏိယံ ဟေတံ၊ ရူပကဏ္ဍေ သရူပတော၊
ဝတ္ထုရူပံ န နိဒ္ဒိဋ္ဌံ၊ ပဋ္ဌာနေ ဒေသိတံ တု တံ။
ဒွေ သဒ္ဒနဝကာ စေဝ၊
တယော သုဒ္ဓဋ္ဌကာပိ စ၊
ဒွေ ဒွေ စိတ္တောတုသမ္ဘူတာ၊
ဧကော အာဟာရဇောတိ စ။
တေသမုဋ္ဌာနိကာ ပဉ္စ၊ ကမ္မဇာနိ နဝေတိ စ၊
ရူပရူပဝသေနေတေ၊ ကလာပါ စုဒ္ဒသေရိတာ။
ဒသကေသွေဝ သင်္ဂယှ၊ ဇီဝိတနဝကံ တဟိံ၊
ဘာဝဒ္ဒသကမေကံ ဝါ၊ ကတွာ ဝတ္ထုံ ဝိနာ တထာ။
သဒ္ဒါ ¶ ¶ စိတ္တောတုဇာ ဒွေဝ၊ တေသမုဋ္ဌာနိကာ တယော၊
သုဒ္ဓဋ္ဌကာ စ သတ္တေဝ၊ ကမ္မဇာ ဒသကာနိ စ။
ဆန္နဝူတိဝိဓံ တတ္ထ၊ ရူပံ ဘာသန္တိ ပဏ္ဍိတာ၊
အဂဟီတဂ္ဂဟဏေန၊ အဋ္ဌာရသဝိဓံ ဘဝေ။
တေသမေဝ ကလာပါနံ၊ သတ္တကစ္ဆက္ကပဉ္စကာ၊
စတုက္ကာ စ တိကဒွိကာ၊ ဧကကာ စ ယထာရဟံ။
ဒွေ သတ္တ နဝ ဆ တယော၊ တယောပိ စ ယထာက္ကမံ၊
စတ္တာရောတိ စတုတ္တိံသ၊ သဟဝုတ္တိကရာသယော။
စက္ခုသောတဃာနဇိဝှာ-ကာယဝတ္ထုဝသာ သိယုံ၊
ဣတ္ထိပုမ္ဘာဝဒသကသဟိတာ သတ္တကာ ဒွိဓာ။
စက္ခုသောတဃာနဟီနာ၊ ပစ္စေကံ ဒွေ သဘာဝကာ၊
အဘာဝတော ဘာဝဟီနော၊ ဣတ္ထံ ဆက္ကာပိ သတ္တဓာ။
စက္ခုသောတဝိဟီနာ စ၊
စက္ခုဃာနဝိဟီနကာ၊
သောတဃာနဝိဟီနာ စ၊
သဘာဝါ ဒွေ တယော တယော။
စက္ခာဒေကေကတော ဟီနာ၊
တိဝိဓာပိ အဘာဝတော၊
ဣစ္စေဝံ ပဉ္စကာ နာမ၊
နဝကာ ရာသယော သိယုံ။
စက္ခာဒိတ္တယဟီနာဝ၊ ဧကတော ဒွေ သဘာဝကာ၊
စက္ခာဒိတ္တယတော ဒွီဟိ၊ တယော ဟီနာ အဘာဝကာ။
ရူပလောကေ စက္ခုသောတ-ဝတ္ထုဇီဝိတနဝကာ၊
စတ္တာရောဝ ကလာပါတိ၊ စတုက္ကာ ဆ ယထာရဟံ။
အဘာဝေါ ဒွေ သဘာဝကာ၊
ကာယဘာဝဝတ္ထုဝသာ၊
ဣတိ ဟောန္တိ တယော တိကာ။
ကာယဝတ္ထုဝသေနေကော၊ ဒွေ စ စိတ္တောတုသမ္ဘဝါ၊
သဒ္ဒနဝကဋ္ဌကာတိ၊ ဒုကာ စ တိဝိဓာ သိယုံ။
ဇီဝိတနဝကဉ္စေကံ၊ တေသမုဋ္ဌာနိကာနိ စ၊
သုဒ္ဓဋ္ဌကာနိ တီဏီတိ၊ စတ္တာရော ဧကကာ သိယုံ။
စတုတ္တိံသ ပနိစ္စေတေ၊ သန္ဓိယဉ္စ ပဝတ္တိယံ၊
ရူပရူပကလာပါနံ၊ ရာသယော ဟောန္တိ သမ္ဘဝါ။
သတ္တတိ သဋ္ဌိမိစ္စေဝမာဒိနာ စ ယထာရဟံ၊
ကလာပရာသိရူပါနိ၊ တတ္ထ တတ္ထ ဝိဘာဝယေ။
သောဠသ ပဉ္စဒသေတိအာဒိဘေဒဝသာပိ စ၊
အဂဟီတဂ္ဂဟဏေန၊ တတ္ထ တတ္ထ ဝိနိဒ္ဒိသေ။
စတုစတ္တာလီသသတံ၊ ကလာပါ ဟောန္တိ ပိဏ္ဍိတာ၊
ဆဗ္ဗီသ တတ္ထ ရူပါနိ၊ သဟဿဉ္စ စတုဿတံ။
ဣစ္စာပါယစတုက္ကေ စ၊ ကာမေ သုဂတိသတ္တကေ၊
ရူပေ စ ပဉ္စဒသကေ၊ အသညာပါယဘူမိယံ။
စတုကောဋ္ဌာသိကေသွေဝ၊ သတ္တဝီသဝိဓေသုပိ၊
ဇာတိဋ္ဌာနေသု သတ္တာနံ၊ သန္ဓိယဉ္စ ပဝတ္တိယံ။
ဣန္ဒြိယဗဒ္ဓသန္တာနေ၊ တထာနိန္ဒြိယကမှိ စ၊
ဗဟိသင်္ခါရသန္တာနေ၊ မတကာယေ စ သမ္ဘဝါ။
လဗ္ဘမာနကလာပါ စ၊ ကလာပါနဉ္စ ရာသယော၊
တတ္ထ ဝိတ္ထာရသင်္ခေပါ၊ ရူပါနံ ဂဏနာပိ စ။
ဧတ္ထ ¶ ¶ ရူပါ အဝုတ္တာ ဟိ၊ ယထာဝုတ္တာနုသာရတော၊
ဝိတ္ထာရေတွာန ဝိညေယျာ၊ သဗ္ဗထာပိ စ ဝိညုနာတိ။
ဣတိ ရူပဝိဘာဂေ ကလာပကထာ နိဋ္ဌိတာ။
ဝီသတိမော ပရိစ္ဆေဒေါ။