📜
ဧကဝီသတိမော ပရိစ္ဆေဒေါ
၂၁။ ဥပ္ပတ္တိကထာ
အဋ္ဌဝီသတိ ရူပါနိ၊ ကလာပါ စေကဝီသတိ၊
ဝုတ္တာ စေတ္တာဝတာ တေသံ၊ ဥပ္ပာဒေါ ဒါနိ နိယျတေ။
အဏ္ဍဇာ ဇလာဗုဇာ စ၊ သံသေဒဇောပပါတိကာ၊
ဣစ္စုပ္ပတ္တိပဘေဒေန၊ စတဿော ယောနိယော မတာ။
ဘုမ္မဝဇ္ဇေသု ဒေဝေသု၊
ပေတေ နိဇ္ဈာမတဏှိကေ၊
နိရယေသု စ သမ္ဘောတိ၊
ယောနေကာဝေါပပါတိကာ။
ဘုမ္မဒေဝေ မနုဿေသု၊
တိရစ္ဆာနာသုရေ တထာ၊
ပေတေသု စာဝသေသေသု၊
စတဿောပိ စ ယောနိယော။
တတ္ထဏ္ဍဇာ ဇလာဗုဇာ၊ ဂဗ္ဘသေယျသမုဂ္ဂမော၊
သံသေဒဇောပပါတိကာ၊ ဩပပါတိကနာမကာ။
တတ္ထ ¶ သမ္ပုဏ္ဏာယတနော၊ ဂဗ္ဘသေယျသမုဂ္ဂမော၊
အဘာဝေါ ဒွေ သဘာဝါ စ၊ ဣတ္ထိပုမ္ဘာဝမိဿိတာ။
ပရိပုဏ္ဏာပရိပုဏ္ဏော၊ ဩပပါတိကနာမကော၊
အဘာဝေါ ဒွေ သဘာဝါ စ၊ စတုရာပါယဘူမိယံ။
သမ္ပုဏ္ဏာယတနောဝေသော ¶ ၊
ကာမေ သုဂတိယံ ပန၊
အာဒိကပ္ပေ အဘာဝေါ စ၊
ဒွေ သဘာဝါ တတော ပရံ။
အပရိပုဏ္ဏာယတနော၊ အဘာဝေါ စ မဟဂ္ဂတေ၊
ဣစ္စေဝံ ဒသဓာ ဟောန္တိ၊ သဗ္ဗာ သန္ဓိသမုဂ္ဂမာ။
တတ္ထေဝ ဒသဓာ ဘိန္နေ၊ အတ္တဘာဝသမုဂ္ဂမေ၊
သန္ဓိယဉ္စ ပဝတ္တေ စ၊ ရူပုပ္ပတ္တိံ ဝိဘာဝယေ။
တတ္ထာဘာဝကသတ္တာနံ၊ ဂဗ္ဘသေယျသမုဂ္ဂမေ၊
ကာယဝတ္ထုဝသာ ဒွေဝ၊ ဒသကာ ဟောန္တိ ကမ္မဇာ။
ရူပသန္တတိသီသာနိ၊ ဒွေ စ ရူပါနိ ဝီသတိ၊
အဂဟီတဂ္ဂဟဏေန၊ တတ္ထေကာဒသ နိဒ္ဒိသေ။
တတော ပရံ ပဝတ္တိမှိ၊ ဝဍ္ဎမာနဿ ဇန္တုနော၊
စက္ခုဒသကာဒယော စ၊ စတ္တာရော ဟောန္တိ သမ္ဘဝါ။
ဣစ္စာဘာဝကသတ္တာနံ၊ ဆဠေဝုတ္တမကောဋိယာ၊
ဟေဋ္ဌိမကောဋိယာ ဒွေဝ၊ ဂဗ္ဘသေယျသမုဂ္ဂမေ။
စက္ခုသောတဃာနဝသာ၊ တတ္ထ တိဒွေကဟီနကာ၊
ဧကော တယော တယော စေဝ၊ သိယုံတိစတုပဉ္စကာ။
ဩပပါတိကသင်္ခါတေ၊ အဘာဝကသမုဂ္ဂမေ၊
ဇိဝှာကာယဝတ္ထုဝသာ၊ တယော ဟေဋ္ဌိမကောဋိယာ။
ဥတ္တမကောဋိယာ ¶ ဟောန္တိ၊ ဆဠေဝေါဘိန္နမန္တရေ၊
စတုက္ကပဉ္စကာ တတ္ထ၊ ဒွေကဟီနာ တယော တယော။
ဆက္ကာဒယော အဘာဝါနံ၊
ဣစ္စေဝံ ပဉ္စသင်္ဂဟာ၊
ဧကော တယော တယော စေကော၊
ဧကောတိ စ ယထာက္ကမံ။
သဘာဝကာနံ ¶ ဒွိန္နမ္ပိ၊ ဒုဝိဓာ သတ္တကာဒယော၊
ဘာဝါဒိကာ ယထာဝုတ္တာ၊ နဝဓာ နဝဓာ သိယုံ။
သတ္တေဝုတ္တမတော ဟေဋ္ဌာ၊ တိစတုက္ကာ တဒန္တရေ၊
စတုက္ကပဉ္စကစ္ဆက္ကာ၊ ပဉ္စဆက္ကာပိ စ ဒွိဓာ။
တိဏ္ဏန္နမ္ပိ ဝသေနေဝ၊ သတ္တကစ္ဆက္ကပဉ္စကာ၊
စတုက္ကတိကဒုက္ကာ စ၊ ဆ ကောဋ္ဌာသာ ယထာရဟံ။
ဒွေ သတ္တ စ နဝ ပဉ္စ၊ တယော စေကော ယထာက္ကမံ၊
ရူပသန္တတိသီသာနံ၊ ရာသယော သတ္တဝီသတိ။
ကမ္မဇာတာ ယထာယောဂံ၊ ပဝတ္တန္တိ ခဏေ ခဏေ၊
ကာမာဝစရသတ္တာနံ၊ ပဋိသန္ဓိပဝတ္တိယံ။
တတ္ထ သန္တတိသီသာနိ၊ ရူပါနိ စ ယထာရဟံ၊
ပုဗ္ဗေ ဝုတ္တနယေနေဝ၊ သဗ္ဗတ္ထာပိ ဝိနိဒ္ဒိသေ။
သီတုဏှောတုသမညာတာ၊
တေဇောဓာတု ဌိတိက္ခဏေ၊
ဘူတာ သန္ဓိက္ခဏေ ရူပံ၊
ဇနေတိ ဥတုဇဋ္ဌကံ။
ပဋိသန္ဓိမတိက္ကမ္မ၊ စိတ္တံ စိတ္တဇမဋ္ဌကံ၊
ဘဝင်္ဂါဒိမုပါဒါယ၊ ဇနေတုပ္ပတ္တိယံ ပန။
ဘုတ္တာဟာရော ¶ ဌိတိပ္ပတ္တော၊ မာတရာ စ သယမ္ပိ စ၊
သရီရာနုဂတော ဟုတွာ၊ ဇနေတာဟာရဇဋ္ဌကံ။
ဣတိ သုဒ္ဓဋ္ဌကာနိ စ၊ တေသမုဋ္ဌာနိကာပရေ၊
သဒ္ဒဝိညတ္တိလဟုတာ၊ သမ္ဘဝေ သမ္ဘဝန္တိ စ။
ဣတ္ထံ စတုသမုဋ္ဌာနာ၊ ကလာပါ ကာမဘူမိယံ၊
ယာဝဇီဝံ ပဝတ္တန္တိ၊ ဒီပဇာလာဝ သန္တတိ။
စက္ခုသောတဝတ္ထုဝသာ၊ ဒသကာ စ တယော ပရံ၊
ဇီဝိတနဝကဉ္စေဝ၊ ရူပါဝစရဘူမိယံ။
ဟောန္တိ ¶ သန္ဓိပဝတ္တီသု၊ စတ္တာရော ကမ္မဇာ သဒါ၊
ပုဗ္ဗေ ဝုတ္တနယေနေဝ၊ ပဝတ္တေ ဥတုစိတ္တဇာ။
ဇီဝိတနဝကဉ္စေကံ၊ ပဋိသန္ဓိပဝတ္တိယံ၊
ပဝတ္တေ ဥတုဇဉ္စေတိ၊ ဒွေဓာသညီနမုဒ္ဒိသေ။
ဣစ္စုပ္ပတ္တိကမံ ဉတွာ၊ ဝိဘာဝေယျ တတော ပရံ၊
ကလာပါနဉ္စ ရူပါနံ၊ သမ္ဘဝါသမ္ဘဝမ္ပိ စ။
ဣန္ဒြိယဗဒ္ဓသန္တာနေ၊ သဗ္ဗေ သမ္ဘောန္တိ သမ္ဘဝါ၊
ကလာပါ စေဝ ရူပါနိ၊ တထာ သန္တတိရာသယော။
ဗဟိဒ္ဓါ မတကာယေ စ၊ နောပလဗ္ဘန္တိ ကမ္မဇာ၊
စိတ္တောဇဇာ ကလာပါ စ၊ ဥတုဇာ လဟုတာဒယော။
တထာ သုဒ္ဓဋ္ဌကသဒ္ဒ-နဝကဉ္စောတု သဗ္ဗထာ၊
ကလာပါ တတ္ထ လဗ္ဘန္တိ၊ ဒွေ စ ရူပါနိ ဥဒ္ဒိသေ။
တေသမုဋ္ဌာနိကာ သဗ္ဗေ၊ ကလာပါ နတ္ထိ သန္ဓိယံ၊
ဥပ္ပာဒကာလေ သဗ္ဗတ္ထ၊ ဇရတာနိစ္စတာပိ စ။
ကလာပါ ကမ္မဇာ သန္တိ၊ ဇာတိရူပဉ္စ သန္ဓိယံ၊
ရူပါနိ စ ကလာပါ စ၊ သဗ္ဗေပိ စ ပဝတ္တိယံ။
သန္တိ ¶ သဗ္ဗာနိ ရူပါနိ၊ ကာမေသု စတုသမ္ဘဝါ၊
ဇီဝိတနဝကံ ဟိတွာ၊ ကလာပါ ဟောန္တိ ဝီသတိ။
ဒသကေသွေဝ ဂဟိတံ၊ ဝိသုံ ကာမေ န လဗ္ဘတိ၊
ဇီဝိတနဝကံ နာမ၊ ရူပလောကေ ဝိသုံ သိယာ။
အာဟာရဇကလာပါ စ၊ ဘာဝါ ဒွေ စာဒိကပ္ပိကေ၊
အာဒိကာလေ န လဗ္ဘန္တိ၊ ပစ္ဆာ လဗ္ဘန္တိ ကေစိပိ။
ဃာနဇိဝှာကာယဘာဝ-ဒသကာ ရူပဘူမိယံ၊
အာဟာရဇကလာပါ စ၊ န လဗ္ဘန္တေဝ သဗ္ဗထာ။
စက္ခုသောတဝတ္ထုသဒ္ဒါ၊ ကလာပါ စိတ္တဇာပိ စ၊
အသညိဘူမိယံ ပုဗ္ဗေ၊ ဝုတ္တာပိ စ န လဗ္ဘရေ။
ကလာပါ ¶ သတ္တ ရူပါနိ၊ ပဉ္စ ရူပေသွသညိသု၊
နတ္ထေကာဒသ ရူပါနိ၊ ကလာပေကူနဝီသတိ။
တသ္မာ တေဝီသ ရူပါနိ၊ ကလာပါ ပန စုဒ္ဒသ၊
တေသမုဋ္ဌာနိကာ သန္တိ၊ ရူပါဝစရဘူမိယံ။
သတ္တရသေဝ ရူပါနိ၊ ကလာပါ ဒွေ ဒွိသမ္ဘဝါ၊
အသညီနံ တု သမ္ဘောန္တိ၊ နတ္ထာရူပေသု ကိဉ္စိပိ။
ဥပ္ပတ္တိက္ကမမိစ္စေဝံ၊ သမ္ဘဝါသမ္ဘဝမ္ပိ စ၊
ကလာပါနဉ္စ ရူပါနံ၊ ယထာယောဂံ ဝိဘာဝယေတိ။
ဣတိ ရူပဝိဘာဂေ ဥပ္ပတ္တိကထာ နိဋ္ဌိတာ။
ဧကဝီသတိမော ပရိစ္ဆေဒေါ။