📜
ဒွါဝီသတိမော ပရိစ္ဆေဒေါ
၂၂။ ပကိဏ္ဏကကထာ
ဣတ္ထံ ¶ ရူပါနမုပ္ပတ္တိံ၊ ဒီပေတွာ ဒါနိ ဝုစ္စတိ၊
ပဝတ္တိကောသလ္လတ္ထာယ၊ တတ္ထေဝေတံ ပကိဏ္ဏကံ။
ဒုဝိဓာ သန္ဓိယော တတ္ထ၊ မိဿာမိဿဝိဘာဂတော၊
တိဝိဓာပိ စေကစတု-ပဉ္စဝေါကာရဘေဒတော။
ရူပမတ္တာ အသညီနံ၊ နာမာဘာဝါ အမိဿိတာ၊
နာမမတ္တာ အရူပီနံ၊ ရူပါဘာဝါတိ စ ဒွိဓာ။
ကာမာဝစရိကာ စေဝ၊ ရူပါဝစရိကာတိ စ၊
ဒုဝိဓာ မိဿိတာ စေတိ၊ ဘဝန္တိ စ စတုဗ္ဗိဓာ။
ဧကစ္စတုဝေါကာရာ စ၊ အမိဿာ ပဉ္စ သန္ဓိယော၊
ဆဗ္ဗီသတိဝိဓာ မိဿာ၊ ပဉ္စဝေါကာရသန္ဓိယော။
ဣတ္ထံ ဘူမိပ္ပဘေဒေန၊ ဧကတိံသဝိဓာပိ စ၊
သန္တတိရာသိဘေဒေန၊ သိယုံ တိံသဝိဓာ ကထံ။
ရူပသန္တတိသီသာနံ ¶ ၊
ရာသယော သတ္တဝီသတိ၊
ဝုတ္တာ ကာမေ ဝသာ တေသံ၊
သတ္တကာ ကာမသန္ဓိယော။
ဝေဒနာသညာသင်္ခါရ-ဝိညာဏက္ခန္ဓသင်္ဂဟာ၊
သဗ္ဗတ္ထာပိ စတဿောဝ၊ နာမသန္တတိယော သိယုံ။
ဣစ္စုဘိန္နံ ဝသာ ဟောန္တိ၊ တတ္ထေကာဒသကာဒယော၊
သန္တတိရာသယော ပုဗ္ဗေ၊ ဝိဘတ္တာ သတ္တကာဒယော။
ဧကာဒသကဒသက-နဝဋ္ဌသတ္တကာ ¶ သိယုံ၊
ဆက္ကေန သဒ္ဓိံ ဝိညေယျာ၊ တသ္မာ တတ္ထ ဆ သင်္ဂဟာ။
အဋ္ဌ သန္တတိယော ဟောန္တိ၊ ရူပလောကေန မိဿိတာ၊
အဋ္ဌကော ရာသိ တတ္ထေကော၊ တသ္မာ သန္တတိ ဝုစ္စတိ။
ဇီဝိတနဝကော တွေကော၊ အသညီ ပဋိသန္ဓိယံ၊
အရူပီနံ စတဿောပိ၊ နာမသန္တတိယော သိယုံ။
ဣစ္စေကကစတုက္ကာနံ၊ ဝသေန ဒွေ အမိဿိတာ၊
အဋ္ဌဝီသဉ္စ မိဿာတိ၊ တိံသေဝ ဟောန္တိ သန္ဓိယော။
ဧကုပ္ပာဒနိရောဓာ စ၊ အမိဿာ တတ္ထ ရာသယော၊
မိဿိတာနံ ဝိဘာဂေါယံ၊ ယထာယောဂံ ကထီယတိ။
ဥပ္ပာဒဋ္ဌိတိဘင်္ဂါနံ၊ ဝသာ တီဏိ ခဏာနိပိ၊
သမာနာနေဝ နာမာနံ၊ ဧကစိတ္တက္ခဏံ မတံ။
တုလျမုပ္ပာဒဘင်္ဂါနံ၊ ရူပါနမ္ပိ ခဏဒွယံ၊
ဧကူနပညာသမတ္တံ၊ ဌိတိက္ခဏမုဒီရိတံ။
နာမရူပါနမုပ္ပာဒေါ၊ ဘင်္ဂေါပိ ဟိ သမော မတော၊
ဒန္ဓံ ဟိ ဝတ္တိကံ ရူပံ၊ နာမံ တု လဟုဝတ္တိကံ။
တထာ ဟိ ရူပေ တိဋ္ဌန္တေ၊ စိတ္တုပ္ပာဒါ တု သောဠသ၊
ဥပ္ပဇ္ဇိတွာ ပဝတ္တိတွာ၊ ဘိဇ္ဇန္တိ စ လဟုံ လဟုံ။
တသ္မာ ¶ ဟိ ဧကပညာသ-ခဏရူပက္ခဏံ တထာ၊
သတ္တရသစိတ္တက္ခဏံ၊ တိခဏန္တိ စ ဝုစ္စတိ။
စိတ္တက္ခဏံ ဟိ တိဏ္ဏန္နံ၊ တတ္ထ ဝိညတ္တိကဒွယံ၊
လက္ခဏတ္တယရူပံ တု၊ သလက္ခဏဝဝတ္ထိတံ။
တသ္မာ ဟိတွာ ဒွယဉ္စေတံ၊ ဗာဝီသတိဝိဓမ္ပိ စ၊
ရူပံ နာမ စတုက္ကဉ္စ၊ သလက္ခဏနိယာမိတံ။
ဧကုပ္ပာဒနိရောဓာ ¶ စ၊ တတ္ထ တုလျက္ခဏာ မတာ၊
အတုလျက္ခဏဓမ္မာနံ၊ သိယာ ဘေဒံ ယထာရဟံ။
ပဋိသန္ဓိက္ခဏေ ဇာတံ၊ တသ္မာ ရူပံ တတော ပရံ၊
သတ္တရသမစိတ္တဿ၊ ဘင်္ဂေန သဟ ဘိဇ္ဇတိ။
တဿ ဌိတိက္ခဏေ ဇာတံ၊ ရူပမ္ပိ စ တတော ပရံ၊
အဋ္ဌာရသမစိတ္တဿ၊ ဥပ္ပာဒေ ပန ဘိဇ္ဇတိ။
တဿ ဘင်္ဂက္ခဏေ ဇာတံ၊ ရူပမ္ပိ စ တတော ပရံ၊
အဋ္ဌာရသမစိတ္တဿ၊ ဌိတိကာလေသု ဘိဇ္ဇတိ။
တထာ ဒုတိယစိတ္တဿ၊ ဥပ္ပာဒမှိ သမုဋ္ဌိတံ၊
အဋ္ဌာရသမစိတ္တဿ၊ ဘင်္ဂေန သဟ ဘိဇ္ဇတိ။
ဣတိ ဝုတ္တနိယာမေန၊ သဇာတိက္ခဏတော ပရံ၊
ဌတွာ ဧကူနပညာသ၊ ခဏာနိ ပုန ဘိဇ္ဇတိ။
တသ္မာ ဧကူနပညာသ၊ ကလာပါ သဟ ဝတ္တရေ၊
ဧကော ဇာယတိ ဧကော စ၊ ဘိဇ္ဇတီတိ စ သဗ္ဗထာ။
ဧကသန္တတိသမ္ဗန္ဓာ၊ ကလာပါ သဟ ကမ္မဇာ၊
ယထာနုပုဗ္ဗဃဋိတာ၊ ဧကပညာသ လဗ္ဘရေ။
သတ္တဝီသ ပနိစ္စေဝံ၊ ကာမေ ဒွေ ရူပဘူမိယံ၊
ရူပသန္တတိသီသာနံ၊ ရာသယော သတ္တကာဒယော။
ဧကူနတိံသ သဗ္ဗေပိ၊ ကမ္မဇာတာ ယထာရဟံ၊
ဧကပညာသ ဃဋိကာ၊ ပဝတ္တန္တိ ခဏေ ခဏေ။
တတ္ထ ¶ သန္ဓိက္ခဏေ ဇာတံ၊ သတ္တရသမစေတသော၊
ဥပ္ပာဒေ ဘိဇ္ဇတိစ္စေဝံ၊ ဝုတ္တော အဋ္ဌကထာနယော။
တံ နယံ ပဋိဗာဟိတွာ၊ စိတ္တေန သဟ ဘိဇ္ဇတိ၊
စိတ္တေန သဟ ဇာတန္တိ၊ ဝုတ္တမာစရိယေန ဟိ။
အာနာပါနတက္ကစာရာ ¶ ၊ ဧကုပ္ပာဒနိရောဓကာ၊
ဝုတ္တာ ဟိ ယမကေ ကာယဝစီသင်္ခါရနာမကာ။
စိတ္တုပ္ပာဒက္ခဏေ ဇာတာ၊ ဥတု တဿ ဌိတိက္ခဏေ၊
ရူပံ ဇနေတိ တတ္ထာပိ၊ ဥတု ဘင်္ဂက္ခဏေပိ စ။
အနုပုဗ္ဗက္ကမေနေဝံ၊ ဇာတံ ရူပံ တထာပရံ၊
အဋ္ဌာရသမဥပ္ပာဒဋ္ဌိတိအာဒီသု ဘိဇ္ဇတိ။
ဣတ္ထံ ကလာပါ ဃဋိတာ၊ ဥတုဇာဟာရဇာပိ စ၊
ဧကသန္တတိသမ္ဗန္ဓာ၊ ဧကပညာသ လဗ္ဘရေ။
ကလာပါ စိတ္တဇာ ယသ္မာ၊ ဥပ္ပာဒက္ခဏသမ္ဘူတာ၊
ဃဋိကာ သဟ လဗ္ဘန္တိ၊ တသ္မာ သတ္တရသေဝ တေ။
သဗ္ဗေပိ ရူပဇနကာ၊ စိတ္တုပ္ပာဒေ ယထာသကံ၊
ဇနေန္တိ ဌိတိဘင်္ဂေသု၊ န ဇနေန္တီတိ ကေစနာ။
ကုသလာဗျာကတာဒီနံ၊ ဧကုပ္ပာဒနိရောဓတာ၊
ဓမ္မာနံ ယမကေ ဝုတ္တာ၊ ဣတိ ပါဠိ ဝဒန္တိ စ။
ကုသလာဒိကသမ္ဗန္ဓာ၊ တတ္ထ တတ္ထ ဟိ ဒေသိတာ၊
ဣတိ ဝတွာ ပုရေ ဝုတ္တံ၊ ဣစ္ဆန္တာစရိယာ နယံ။
ဣစ္စေဝံ စတုသမ္ဘူတာ၊ ရူပသန္တတိရာသယော၊
ရူပါနိ စ ကလာပါ စ၊ ဧကာဗဒ္ဓါ ယထာရဟံ။
သုတ္တပဝတ္တမတ္တာနံ၊ သမ္ဗုဒ္ဓါနမ္ပိ ပါဏိနံ၊
ယာဝ မရဏကာလာပိ၊ ပဝတ္တန္တိ နိရန္တရံ။
အာယုက္ခယာ ¶ စ မရဏံ၊ တထာ ကမ္မက္ခယာ သိယာ၊
ဥဘိန္နံ ဝါ ခယာ စာထ၊ ဥပစ္ဆေဒကကမ္မုနာ။
စတုဓာပိ မရန္တဿ၊ တဿေဝံ တု ယထာရဟံ၊
သတ္တရသစိတ္တက္ခဏမတ္တသေသမှိ ဇီဝိတေ။
ဥပရိစ္စုတိစိတ္တဿ ¶ ၊ သတ္တရသမစေတသော၊
ဌိတိကာလမုပါဒါယ၊ န တု ဇာယတိ ကမ္မဇံ။
တဿုပ္ပာဒက္ခဏေ ဇာတံ၊
ရူပဉ္စ စုတိယာ သဟ၊
ဘိဇ္ဇတီတိ မတော နာမ၊
တတော ဟောတိ သ ပုဂ္ဂလော။
စိတ္တဇာဟာရဇဉ္စာပိ၊ န ဇာယတိ တတော ပရံ၊
ဥတုသမ္ဘဝရူပံ တု၊ အဝသိဿတိ ဝါ န ဝါ။
တတော ဝုတ္တနယေနေဝ၊ မတသတ္တော ယထာရဟံ၊
မိဿာမိဿာဟိ သန္ဓီဟိ၊ ပုနဒေဝေါပပဇ္ဇတိ။
တတော ဝုတ္တနယေနေဝ၊ ဧကူနတိံသ ကမ္မဇာ၊
တေသမုဋ္ဌာနိကာ ပဉ္စ၊ စတုတ္တိံသ သမိဿိတာ။
ကလာပါ ရာသယော ဟောန္တိ၊ သတ္တဝီသတိဘူမိသု၊
ဣတိ သဗ္ဗပကာရေန၊ ရူပဓမ္မာ ပကာသိတာတိ။
ဣတိ ရူပဝိဘာဂေ ပကိဏ္ဏကကထာ နိဋ္ဌိတာ။
ဒွါဝီသတိမော ပရိစ္ဆေဒေါ။
နိဋ္ဌိတော စ သဗ္ဗထာပိ ရူပဝိဘာဂေါ။