📜
တေဝီသတိမော ပရိစ္ဆေဒေါ
၄။ နိဗ္ဗာနဝိဘာဂေါ
၂၃။ မူလဝိသုဒ္ဓိကထာ
ဣတ္ထံ ¶ ¶ စိတ္တံ စေတသိကံ၊ ရူပဉ္စေဝါတိ သင်္ခတာ၊
ဝုတ္တာ အသင်္ခတံ ဒါနိ၊ နိဗ္ဗာနန္တိ ပဝုစ္စတိ။
သီလဝိသုဒ္ဓိ အာဒိမှိ၊ တတော စိတ္တဝိသုဒ္ဓိ စ၊
ဒိဋ္ဌိဝိသုဒ္ဓိနာမာ စ၊ ကင်္ခါဝိတရဏာပိ စ။
တတော ပရံ မဂ္ဂါမဂ္ဂ-ဉာဏဒဿနနာမိကာ၊
တထာ ပဋိပဒါဉာဏ-ဒဿနာ ဉာဏဒဿနံ။
ဣစ္စာနုက္ကမတော ဝုတ္တာ၊ သတ္တ ဟောန္တိ ဝိသုဒ္ဓိယော၊
သတ္တမာနုတ္တရာ တတ္ထ၊ ပုဗ္ဗဘာဂါ ဆ လောကိယာ။
သံဝရော ပါတိမောက္ခော စ၊ တထေဝိန္ဒြိယသံဝရော၊
အာဇီဝပါရိသုဒ္ဓိ စ၊ သီလံ ပစ္စယနိဿိတံ။
ဣတိ သီလဝိသုဒ္ဓီတိ၊ သုဒ္ဓမေတံ ပဝုစ္စတိ၊
စတုပါရိသုဒ္ဓိသီလံ၊ ဓုတင်္ဂပရိဝါရိတံ။
ကသိဏာနိ ဒသာသုဘာ၊ ဒသာနုဿတိယော ပန၊
အပ္ပမညာ စ သညာ စ၊ ဝဝတ္ထာရုပ္ပကာတိ စ။
သမထက္ကမ္မဋ္ဌာနာနိ၊ တာလီသဋ္ဌကထာနယေ၊
ပါဠိယံ တု ဝိဘတ္တာနိ၊ အဋ္ဌတိံသာတိ ဝဏ္ဏိတံ။
ပထဝါပေါ စ တေဇော စ၊
ဝါယော နီလဉ္စ ပီတကံ၊
လောဟိတောဒါတမာကာသံ ¶ ၊
အာလောကကသိဏန္တိ စ။
ကသိဏာနိ ဒသေတာနိ၊ ဝုတ္တာနဋ္ဌကထာနယေ၊
အဋ္ဌေဝ ပါဠိယံ ဟိတွာ၊ အန္တေ တု ကသိဏဒွယံ။
ဥဒ္ဓုမာတံ ဝိနီလဉ္စ၊ ဝိပုဗ္ဗကံ ဝိခါယိတံ၊
ဝိစ္ဆိဒ္ဒကဉ္စ ဝိက္ခိတ္တံ၊ ဟတဝိက္ခိတ္တလောဟိတံ။
ပုဠဝကံ ¶ အဋ္ဌိကဉ္စေတိ၊ အသုဘာ ဒသ ဒေသိတာ၊
ရူပကာယဝိဘာဂါယ၊ ဒသကာယဝိပတ္တိယာ။
ဗုဒ္ဓေ ဓမ္မေ စ သင်္ဃေ စ၊ သီလေ စာဂေ စ အတ္တနာ၊
ဒေဝတောပသမာယဉ္စ၊ သတ္တာနုဿတိယော ကမာ။
မရဏဿတိ နာမေကာ၊ တထာ ကာယဂတာသတိ၊
အာနာပါနဿတိစ္စေဝံ၊ ဒသာနုဿတိယော မတာ။
မေတ္တာ ကရုဏာ မုဒိတာ၊ ဥပေက္ခာတိ စတုဗ္ဗိဓာ၊
ဝုတ္တာ ဗြဟ္မဝိဟာရာ စ၊ အပ္ပမညာတိ တာဒိနာ။
ဧကာဟာရေ ပဋိက္ကူလ-သညာ နာမေကမေဝ တု၊
စတုဓာတုဝဝတ္ထာနံ၊ စတုဓာတုပရိဂ္ဂဟော။
အာကာသာနဉ္စာယတနံ၊ ဝိညာဏဉ္စမထာပရံ၊
အာကိဉ္စညံ တထာ နေဝ-သညာနာသညနာမကံ။
ဣစ္စာနုက္ကမတော ဝုတ္တာ၊ အရူပဇ္ဈာနိကာ ပန၊
အရူပကမ္မဋ္ဌာနာနိ၊ စတ္တာရောပိ ပကိတ္တိတာ။
ကသိဏာသုဘကောဋ္ဌာသေ၊ အာနာပါနေ စ သဗ္ဗထာ၊
ဒိသွာ သုတွာ ဖုသိတွာ ဝါ၊ ပရိကမ္မံ တု ကုဗ္ဗတော။
ဥဂ္ဂဟော နာမ သမ္ဘောတိ၊ နိမိတ္တံ တတ္ထ ယုဉ္ဇတော၊
ပဋိဘာဂေါ တမာရဗ္ဘ၊ တတ္ထ ဝတ္တတိ အပ္ပနာ။
သာဓု ¶ သတ္တာ သုခီ ဟောန္တု၊ ဒုက္ခာ မုစ္စန္တု ပါဏိနော၊
အဟော သတ္တာ သုခပ္ပတ္တာ၊ ဟောန္တု ယဒိစ္ဆကာတိ စ။
ဥဒ္ဒိဿ ဝါ အနောဒိဿ၊ ယုဉ္ဇတော သတ္တဂေါစရေ၊
အပ္ပမညာ ပနပ္ပေန္တိ၊ အနုပုဗ္ဗေန ဝတ္တိကာ။
ကသိဏုဂ္ဃာဋိမာကာသေ၊ ပဌမာရုပ္ပမာနသေ၊
တဿေဝ နတ္ထိဘာဝေ စ၊ တတိယာရုပ္ပကေတိ စ။
ယုဉ္ဇန္တဿ ¶ ပနေတေသု၊ ဂေါစရေသု စတူသုပိ၊
အပ္ပေန္တိ အနုပုဗ္ဗေန၊ အာရုပ္ပာပိ စတုဗ္ဗိဓာ။
အာနာပါနဉ္စ ကသိဏံ၊ ပဉ္စကဇ္ဈာနိကံ တဟိံ၊
ပဌမဇ္ဈာနိကာ ဝုတ္တာ၊ ကောဋ္ဌာသာသုဘဘာဝနာ။
သုခိတဇ္ဈာနိကာ တိဿော၊ အပ္ပမညာ စ ဟေဋ္ဌိမာ၊
ဥပေက္ခာရုပ္ပကာ ပဉ္စ၊ ဥပေက္ခာဈာနိကာတိ စ။
ဧကာ ဒသေကာ ဒသ စ၊ တယော ပဉ္စေတိ သဗ္ဗထာ၊
ပရိကမ္မဝသာ တိံသ၊ ဆ ကောဋ္ဌာသာ ယထာက္ကမံ။
ပဉ္စကာဒိသုခေါပေက္ခာ၊ ဈာနဘေဒါ စတုဗ္ဗိဓာ၊
ဧကစ္စတုပဉ္စဈာန-ဝသေန တိဝိဓာ သိယုံ။
ရူပါရူပဝသာ ဒွေ စ၊ အပ္ပနာတော ပုနေကဓာ၊
ဣစ္စေဝမပ္ပနာ ကမ္မ-ဋ္ဌာနဘေဒါ သမိဿိတာ။
ဒွေ စ သညာဝဝတ္ထာနာ၊ အဋ္ဌာနုဿတိယောတိ စ၊
သေသာ ဒသ ပဝုစ္စန္တိ၊ ဥပစာရသမာဓိကာ။
ပရိကမ္မောပစာရာနုလောမဂေါတြဘုတော ပရံ၊
ပဉ္စမံ ဝါ စတုတ္ထံ ဝါ၊ ဇဝနံ ဟောတိ အပ္ပနာ။
အပ္ပနာဇဝနံ သဗ္ဗံ၊ လောကုတ္တရမဟဂ္ဂတံ၊
တိဟေတုကပရိတ္တာနိ၊ ပုရိမာနိ ယထာရဟံ။
အာဝဇ္ဇနာ ¶ စ ဝသိတာ၊ တံသမာပဇ္ဇနာ တထာ၊
အဓိဋ္ဌာနာ စ ဝုဋ္ဌာနာ၊ ပစ္စဝေက္ခဏ ပဉ္စမာ။
ဝသိတာဟိ ဝသီဘူတာ၊ ဣတိ ကတွာန ပဉ္စဟိ၊
ဘာဝေန္တဿ ပနပ္ပေန္တိ၊ ဥပရူပရိ အပ္ပနာ။
ယုဉ္ဇန္တဿ တု ဝုဋ္ဌာယ၊ ကသိဏဇ္ဈာနပဉ္စမာ၊
ပဉ္စာဘိညာ ဟိ အပ္ပေန္တိ၊ ရူပသဒ္ဒါဒိဂေါစရေ။
လောကုတ္တရာ ပနပ္ပေန္တိ၊ သဗ္ဗေ နိဗ္ဗာနဂေါစရေ၊
အနိစ္စဒုက္ခာနတ္တာတိ၊ ဘူမိဓမ္မေ ဝိပဿတော။
တတ္ထ ¶ စ ပါဒကဇ္ဈာနံ၊ သမ္မဋ္ဌဇ္ဈာနမေဝ ဝါ၊
အဇ္ဈာသယော စ ဝုဋ္ဌာန-ဂါမိနီ စ ဝိပဿနာ။
မဂ္ဂါနံ ဈာနဘေဒါယ၊ ယထာယောဂံ နိယာမတာ၊
ယထာသကံ ဖလာနံ တု၊ မဂ္ဂါ ဟောန္တိ နိယာမတာ။
မဂ္ဂါနန္တရမေဝါထ၊ ဘူမိဓမ္မေ ဝိပဿတော၊
ဖလသမာပတ္တိယမ္ပိ၊ အပ္ပေတိ ဖလမာနသံ။
အနုပုဗ္ဗသမာပတ္တိံ၊ သမာပဇ္ဇိဿ ဝုဋ္ဌိတော၊
ဈာနဓမ္မေ ဝိပဿိတွာ၊ တတ္ထ တတ္ထေဝ ပဏ္ဍိတော။
စတုတ္ထာရုပ္ပမပ္ပေတွာ၊ ဧကဒွိဇဝနာပရံ၊
နိရောဓံ နာမ ဖုသတိ၊ သမာပတ္တိမစိတ္တကံ။
အရဟာ ဝါ အနာဂါမီ၊ ပဉ္စဝေါကာရဘူမိယံ၊
ယထာသကံ ဖလုပ္ပာဒေါ၊ ဝုဋ္ဌာနန္တိ တတော မတော။
အပ္ပနာပရိယောသာနေ၊ သိယာ သဗ္ဗတ္ထ သမ္ဘဝါ၊
ဘဝင်္ဂပါတော တံ ဆေတွာ၊ ဇာယတေ ပစ္စဝေက္ခဏာ။
ဣတိ ဝုတ္တာနုသာရေန၊ အပ္ပနာနယသင်္ဂဟံ၊
ယထာယောဂံ ဝိဘာဝေယျ၊ တတ္ထ တတ္ထ ဝိစက္ခဏော။
စိတ္တဝိသုဒ္ဓိ ¶ နာမာယံ၊ စိတ္တသံက္လေသသောဓနော၊
ဥပစာရပ္ပနာဘေဒေါ၊ သမထော ပုဗ္ဗဘာဂိယောတိ။
ဣတိ နိဗ္ဗာနဝိဘာဂေ မူလဝိသုဒ္ဓိကထာ နိဋ္ဌိတာ။
တေဝီသတိမော ပရိစ္ဆေဒေါ။