📜
စတုဝီသတိမော ပရိစ္ဆေဒေါ
၂၄။ ပရိဂ္ဂဟဝိသုဒ္ဓိကထာ
သီလစိတ္တဝိသုဒ္ဓီဟိ၊ ယထာဝုတ္တာဟိ မဏ္ဍိတော၊
ပယောဂါသယသမ္ပန္နော၊ နိဗ္ဗာနာဘိရတော တတော။
ခန္ဓာယတနဓာတာဒိပ္ပဘေဒေဟိ ¶ ယထာရဟံ၊
လက္ခဏပစ္စုပဋ္ဌာန-ပဒဋ္ဌာနဝိဘာဂတော။
ပရိဂ္ဂဟေတွာ သင်္ခါရေ၊ နာမရူပံ ယထာကထံ၊
ဝဝတ္ထပေန္တော တတ္ထေဝမနုပဿတိ ပညဝါ။
နာမရူပမိဒံ သုဒ္ဓံ၊ အတ္တဘာဝေါတိ ဝုစ္စတိ၊
နတ္ထေတ္ထ ကောစိ အတ္တာ ဝါ၊ သတ္တော ဇီဝေါ စ ပုဂ္ဂလော။
ယထာပိ အင်္ဂသမ္ဘာရာ၊ ဟောတိ သဒ္ဒေါ ရထော ဣတိ၊
ဧဝံ ခန္ဓေသု သန္တေသု၊ ဟောတိ သတ္တောတိ သမ္မုတိ။
ခန္ဓာယတနဓာတူနံ၊ ယထာယောဂမနုက္ကမော၊
အဗ္ဗောစ္ဆိန္နော ပဝတ္တန္တော၊ သံသာရောတိ ပဝုစ္စတိ။
ဣတိ နာနပ္ပကာရေန၊ တေဘူမကပရိဂ္ဂဟော၊
ဘူမိဓမ္မဝဝတ္ထာနံ၊ သုဒ္ဓသင်္ခါရဒဿနံ။
အတ္တဒိဋ္ဌိပဟာနေန ¶ ၊ ဒိဋ္ဌိသံက္လေသသောဓနံ၊
ဒိဋ္ဌိဝိသုဒ္ဓိ နာမာတိ၊ ဉာဏမေတံ ပဝုစ္စတိ။
ပရိဂ္ဂဟိတသင်္ခါရော၊ နာမရူပမပတ္ထိယာ၊
တတော ပရံ ယထာယောဂံ၊ ပရိဂ္ဂဏှတိ ပစ္စယေ။
ဒုက္ခသမုဒယော တတ္ထ၊ တဏှာ သံသာရနာယိကာ၊
သမောဓာနေတိ သင်္ခါရေ၊ တတ္ထ တတ္ထုပပတ္တိယာ။
တဏှာသမ္ဘဝမေဝေတံ၊ တသ္မာ ဒုက္ခံ ပဝုစ္စတိ၊
တဒပ္ပဝတ္တိ နိဗ္ဗာနံ၊ မဂ္ဂေါ တံပါပကောတိ စ။
စတုသစ္စဝဝတ္ထာန-မုခေနေဝမ္ပိ ပစ္စယေ၊
ပရိဂ္ဂဏှန္တိ ဧကစ္စေ၊ သင်္ခါရာနမထာပရေ။
အာလောကာကာသဝါယာပပထဝိဉ္စုပနိဿယံ၊
ဘဝင်္ဂပရိဏာမဉ္စ၊ လဘိတွာဝ ယထာရဟံ။
ဆ ဝတ္ထူနိ စ နိဿာယ၊ ဆ ဒွါရာရမ္မဏာနိ စ၊
ပဋိစ္စ မနသိကာရံ၊ ပဝတ္တန္တိ အရူပိနော။
ယထာသကသမုဋ္ဌာနံ ¶ ၊ ဝိဘာဂေဟိ စ ရူပိနော၊
ပဝတ္တန္တိ ဧကစ္စေတိ၊ ပရိဂ္ဂဏှန္တိ ပစ္စယေ။
အဝိဇ္ဇာပစ္စယာ ဟောန္တိ၊ သင်္ခါရာ တု တတော တထာ၊
ဝိညာဏံ နာမရူပဉ္စ၊ သဠာယတနနာမကံ။
ဖဿော စ ဝေဒနာ တဏှာ၊ ဥပါဒါနံ ဘဝေါ တတော၊
ဇာတိ ဇရာ မရဏဉ္စ၊ ပဝတ္တတိ ယထာရဟံ။
တတော သောကော ပရိဒေဝေါ၊ ဒုက္ခဉ္စေဝ တထာပရံ၊
ဒေါမနဿမုပါယာသော၊ သမ္ဘောတိ စ ယထာရဟံ။
ဧတဿ ကေဝလဿေဝံ၊ ဒုက္ခက္ခန္ဓဿ သမ္ဘဝေါ၊
ပဋိစ္စသမုပ္ပာဒေါဝ၊ နတ္ထညော ကောစိ ကာရကော။
တတ္ထာဝိဇ္ဇာဒယော ¶ ဒွေပိ၊ အဒ္ဓါတီတော အနာဂတော၊
ဇာတာဒယောပရေ အဋ္ဌ၊ ပစ္စုပ္ပန္နောတိ ဝဏ္ဏိတော။
ပုညာပုညာနေဉ္ဇဝသာ၊ သင်္ခါရာ တိဝိဓာ တထာ၊
ဘဝေကဒေသော ကမ္မဉ္စ၊ ကမ္မဝဋ္ဋန္တိ ဝုစ္စတိ။
အဝိဇ္ဇာတဏှုပါဒါနာ၊ က္လေသဝဋ္ဋမထာပရေ၊
ဝိပါကဝဋ္ဋံ သတ္တာပိ၊ ဥပပတ္တိဘဝေါပိ စ။
အဝိဇ္ဇာသင်္ခါရာနံ တု၊ ဂဟဏေ ဂဟိတာဝ တေ၊
တဏှုပါဒါနဘဝါတိ၊ အတီတေ ပဉ္စ ဟေတဝေါ။
တဏှုပါဒါနဘဝါနံ၊ ဂဟဏေ ဂဟိတာဝ တေ၊
အဝိဇ္ဇာ သင်္ခါရာ စေတိ၊ ပစ္စုပ္ပန္နေပိ ပဉ္စကေ။
ဝိညာဏာဒိသရူပေန၊ ဒဿိတံ ဖလပဉ္စကံ၊
တထာ တဒေဝ ဇာတာဒိ-နာမေနာနာဂတန္တိ စ။
အတီတေ ဟေတဝေါ ပဉ္စ၊ ဣဒါနိ ဖလပဉ္စကံ၊
ဣဒါနိ ဟေတဝေါ ပဉ္စ၊ အာယတိံ ဖလပဉ္စကံ။
ဟေတုဖလံ ဖလဟေတု၊ ပုန ဟေတုဖလာနိ စ၊
တိသန္ဓိ စတုသင်္ခေပံ၊ ဝီသတာကာရမဗြဝုံ။
အတ္ထဓမ္မပဋိဝေဓ-ဒေသနာနံ ¶ ယထာရဟံ၊
ဂမ္ဘီရတ္တာ စတုန္နမ္ပိ၊ စတုဂမ္ဘီရတာ မတာ။
ဧကတ္တနာနတ္တနယာ၊ အဗျာပါရနယောပရော၊
တထေဝံဓမ္မတာ စေတိ၊ နယာ ဝုတ္တာ စတုဗ္ဗိဓာ။
ဇရာမရဏသောကာဒိ-ပီဠိတာနမဘိဏှသော၊
အာသဝါနံ သမုပ္ပာဒါ၊ အဝိဇ္ဇာ စ ပဝတ္တတိ။
အဝိဇ္ဇာပစ္စယာ ဟောန္တိ၊ သင်္ခါရာပိ ယထာ ပုရေ၊
ဗဒ္ဓါဝိစ္ဆေဒမိစ္စေဝံ၊ ဘဝစက္ကမနာဒိကံ။
တဏှာဝိဇ္ဇာနာဘိကံ ¶ တံ၊ ဇရာမရဏနေမိကံ၊
သေသာကာရာဒိဃဋိကံ၊ တိဘဝါရထယောဇိတံ။
တိအဒ္ဓဉ္စ တိဝဋ္ဋဉ္စ၊ တိသန္ဓိဃဋိကံ တထာ၊
စတုသင်္ခေပဂမ္ဘီရနယမဏ္ဍိတဒေသနံ။
ဝီသတာကာရဝိဘာဂံ၊ ဒွါဒသာကာရသင်္ဂဟံ၊
ဓမ္မဋ္ဌိတီတိ ဒီပေန္တိ၊ ဣဒပ္ပစ္စယတံ ဗုဓာ။
ပဋိစ္စသမုပ္ပာဒေါယံ၊ ပစ္စယာကာရနာမတော၊
သင်္ခေပတော စ ဝိတ္ထာရာ၊ ဝိဝိဓာကာရဘေဒတော။
ဇနေတိ ပစ္စယုပ္ပန္နေ၊ အဝိဇ္ဇာဒိပဝတ္တိယာ၊
အဝိဇ္ဇာဒိနိရောဓေန၊ နိရောဓေတိ စ သဗ္ဗထာ။
ပစ္စယပ္ပစ္စယုပ္ပန္န-ဝသေနေဝ ပဝတ္တတိ၊
သံသာရောယန္တိ ဧကစ္စေ၊ ပရိဂ္ဂဏှန္တိ ပစ္စယေ။
သမန္တပဋ္ဌာနမဟာပကရဏဝိဘာဂတော၊
ဧကစ္စေ ပရိဂ္ဂဏှန္တိ၊ စတုဝီသတိ ပစ္စယေ။
ဣတိ နာနပ္ပကာရေန၊ ပစ္စယာနံ ပရိဂ္ဂဟော၊
သပ္ပစ္စယနာမရူပံ၊ ဝဝတ္ထာနန္တိ ဝေဒိတံ။
ဣဒပ္ပစ္စယတာဉာဏံ၊ ပစ္စယာကာရဒဿနံ၊
ဓမ္မဋ္ဌိတိ ယထာဘူတဉာဏဒဿနနာမကံ။
ကာလတ္တယဝိဘာဂေသု ¶ ၊ ကင်္ခါသံက္လေသသောဓနံ၊
ကင်္ခါဝိတရဏာ နာမ၊ ဝိသုဒ္ဓီတိ ပဝုစ္စတီတိ။
ဣတိ နိဗ္ဗာနဝိဘာဂေ ပရိဂ္ဂဟဝိသုဒ္ဓိကထာ နိဋ္ဌိတာ။
စတုဝီသတိမော ပရိစ္ဆေဒေါ။