📜
ပဉ္စဝီသတိမော ပရိစ္ဆေဒေါ
၂၅။ ဝိပဿနာဝုဒ္ဓိကထာ
သီလစိတ္တဒိဋ္ဌိကင်္ခါဝိတရဏဝိသုဒ္ဓိယော ¶ ၊
ပတွာ ကလာပတော တာဝ၊ သမ္မသေယျ တတော ပရံ။
ကလာပတော သမ္မသနံ၊ ဥဒယဗ္ဗယဒဿနံ၊
ဘင်္ဂဉာဏံ ဘယဉာဏံ၊ တထာဒီနဝနိဗ္ဗိဒါ။
မုစ္စိတုကမျတာဉာဏံ၊ ပဋိသင်္ခါနုပဿနာ၊
သင်္ခါရုပေက္ခာနုလောမမိစ္စာနုက္ကမတော ဌိတာ။
ဝိပဿနာတိ စက္ခာတာ၊ ဒသဉာဏပရမ္ပရာ၊
လက္ခဏတ္တယမာဟစ္စ၊ သင်္ခါရေသု ပဝတ္တတိ။
တသ္မာ ကလာပတော တာဝ၊ သမ္မသေယျ တိလက္ခဏံ၊
သမ္မသိတွာ အတီတာဒိခန္ဓာယတနဓာတုယော။
အနိစ္စာ တေ ခယဋ္ဌေန၊ ခန္ဓာ ဒုက္ခာ ဘယဋ္ဌတော၊
အနတ္တာ အသာရကဋ္ဌေန၊ ဣစ္စာဘိဏှံ ဝိစိန္တယံ။
တဿေဝံ သမ္မသန္တဿ၊ ဥပဋ္ဌာတိ တိလက္ခဏံ၊
သင်္ခါရေသု တတော ယောဂီ၊ ခဏသန္တတိအဒ္ဓတော။
ပစ္စုပ္ပန္နာန ဓမ္မာနံ၊ ဥဒယဉ္စ ဝယံ တထာ၊
ပညာသာကာရဘေဒေဟိ၊ အနုပဿတိ တတ္ထ ဟိ။
အဝိဇ္ဇာတဏှာကမ္မာနံ၊ ဥဒယာ စ နိရောဓတော၊
သမုဒယာ နိရောဓာ စ၊ ပဉ္စန္နံ ဒဿိတာ တထာ။
ရူပဿာဟာရတော ¶ တိဏ္ဏံ၊ ဖဿတော နာမရူပတော၊
ဝိညာဏဿေတိ သဗ္ဗေပိ၊ စတ္တာလီသ သမိဿိတာ။
နိဗ္ဗတ္တိလက္ခဏံ ¶ ဘင်္ဂ-
လက္ခဏဉ္စေတ္ထ ပဿတော၊
ခဏတောဒယတော စေတိ၊
သမပညာသ ဟောန္တိ တေ။
ဣတိ ခန္ဓမုခေနေတေ၊ ဝိဘတ္တာ ဥဒယဗ္ဗယာ၊
အာယတန္နာဒိဘေဒေဟိ၊ ယောဇေတဗ္ဗာ ယထာရဟံ။
ဥဒယဉ္စ ဝယဉ္စေဝံ၊ ပဿတော တဿ ယောဂိနော၊
ဝိဘူတာ ဟောန္တိ သင်္ခါရာ၊ သမုဋ္ဌာတိ တိလက္ခဏံ။
ဗောဓိပက္ခိယဓမ္မာ စ၊
တေ ပဿန္တိ ဝိသေသတော၊
တတော ဇာယန္တုပက္လေသာ၊
ဒသောပက္လေသဝတ္ထုကာ။
ဩဘာသော ပီတိ ပဿဒ္ဓိ၊ အဓိမောက္ခော စ ပဂ္ဂဟော၊
သုခံ ဉာဏမုပဋ္ဌာနံ၊ ဥပေက္ခာ စ နိကန္တိ စ။
တဏှာမာနဒိဋ္ဌိဂ္ဂါဟဝသေန တိဝိဓေပိ တေ၊
အဿာဒေန္တော ဥန္နမန္တော၊ မမာယန္တော ကိလိဿတိ။
မဂ္ဂံ ဖလဉ္စ နိဗ္ဗာနံ၊ ပတ္တောသ္မီတိ အကောဝိဒေါ၊
ဝေက္ခဗုဇ္ဈာတိ မညန္တော၊ ပပ္ပောတိ အဓိမာနိကော။
မဂ္ဂါဒယော န ဟောန္တေတေ၊
တဏှာဂါဟာဒိဝတ္ထုတော၊
တဏှာမာနဒိဋ္ဌိယော စုပက္လေသာ ပရိပန္ထကာ။
ပေါရာဏမေဝ ခန္ဓာနံ၊ ဥဒယဗ္ဗယဒဿနံ၊
တိလက္ခဏာရမ္မဏတော၊ မဂ္ဂေါ နိဗ္ဗာနပစ္စယော။
ဣတိ ¶ မဂ္ဂံ အမဂ္ဂဉ္စ၊ ဝိသောဓေန္တဿ သိဇ္ဈတိ၊
ဝိသုဒ္ဓိ စ မဂ္ဂါမဂ္ဂဉာဏဒဿနနာမိကာ။
တထာပရာ ¶ ဝိသုဒ္ဓီနံ၊ ဥဒယဗ္ဗယဒဿနံ၊
အာဒိံ ကတွာ ပဋိပဒါဉာဏဒဿနနာမိကာ။
ပစ္ဆာ သံက္လေသဝိက္ခေပဝိသုဒ္ဓန္တံ ယထာ ပုရေ၊
ပဋိပဇ္ဇတိ မေဓာဝီ၊ ဥဒယဗ္ဗယဒဿနံ။
ဣတိ ခေါဒယဗ္ဗယာနုပဿနာဉာဏဝီထိယံ၊
သိက္ခန္တဿာစိရေနေဝ၊ ပရိပက္ကာ ဝိပဿနာ။
ပဟာယောဒယဝေါဟာရံ၊ ဝယမေဝါဓိမုစ္စတော၊
ဥပ္ပာဒါဘောဂမောဟာယ၊ ဘင်္ဂမေဝါနုတိဋ္ဌတိ။
တတော နိဇ္ဈရဓာရာဝ၊ ဂင်္ဂါဝါရောဒကံ ဝိယ၊
ဘိဇ္ဇမာနတိဏာနိဝ၊ ပဋိပဇ္ဇာ သိခါ ဝိယ။
ပတန္တေ စ ဝယန္တေ စ၊ ဘိဇ္ဇန္တိစ္စေဝ သင်္ခတေ၊
ပဿတော တဿ ဘင်္ဂါနုပဿနာဉာဏမီရိတံ။
တတော ဘယာနုပဿနာ၊ သဘယာတိ ဝိပဿတော၊
အာဒီနဝါနုပဿနာ-ဉာဏံ အာဒီနဝါတိ စ။
နိဗ္ဗိဒါနုပဿနာ စ၊ နိဗ္ဗိန္ဒန္တဿ ယောဂိနော၊
မုစ္စိတုကမျတာဉာဏံ၊ တတော မုစ္စိတုမိစ္ဆတော။
နိစ္စာ စေ န နိရုဇ္ဈေယျ၊ န ဗာဓေယျ သုခါ ယဒိ၊
ဝသေ ဝတ္တေယျ အတ္တာ စေ၊ တဒဘာဝါ န တေ တထာ။
သုဋ္ဌု မုစ္စိတုမိစ္စေဝံ၊ ပဋိပစ္စက္ခတော တတော၊
ပဋိသင်္ခါနုပဿနာ-ဉာဏံ ဇာတန္တိ ဝုစ္စတိ။
သာဓုကံ ပဋိသင်္ခါယ၊ သင်္ခါရေသု တိလက္ခဏံ၊
သုပရိညာတသင်္ခါရေ၊ တထေဝ ပဋိပဿတိ။
အနိစ္စာ ဒုက္ခာနတ္တာ စ၊ သင်္ခါရာဝ န စာပရော၊
အတ္တာ ဝါ အတ္တနီယံ ဝါ၊ နာဟံ န တု မမာတိ စ။
တတောဝ ¶ ¶ တတ္ထ မဇ္ဈတ္တော၊ နန္ဒိရာဂဝိနိဿဋော၊
အတ္တတ္တနိယဘာဝေန၊ သင်္ခါရေသွဇ္ဈုပေက္ခတိ။
သင်္ခါရုပေက္ခာသင်္ခါတံ၊ ဉာဏံ တဿ ဣတီရိတံ၊
တတော ဝုဋ္ဌာနဃဋိတံ၊ အနုလောမန္တိ ဝုစ္စတိ။
သုပရိညာတသင်္ခါရေ၊ သုသမ္မဋ္ဌတိလက္ခဏေ၊
ဥပေက္ခန္တဿ တဿေဝ၊ သိခါပတ္တာ ဝိပဿနာ။
သင်္ခါရဓမ္မေ အာရဗ္ဘ၊ တာဝ ကာလံ ပဝတ္တတိ၊
တီရဒဿီဝ သကုဏော၊ ယာဝ ပါရံ န ပဿတိ။
ယဒါ ပဿတိ နိဗ္ဗာနံ၊ ဝုဋ္ဌာနဂဟိတာ တဒါ၊
ဝုဋ္ဌာနဂါမိနီ နာမ၊ သာနုလောမာ ပဝုစ္စတိ။
ဣတိ ဒွီဟိ ဝိသုဒ္ဓီဟိ၊ ဝိသုဒ္ဓါယ ဝိပဿတော၊
ဝိပဿနာပဋိပဒံ၊ ပူရေတီတိ ပဝုစ္စတီတိ။
ဣတိ နိဗ္ဗာနဝိဘာဂေ ဝိပဿနာဝုဒ္ဓိကထာ နိဋ္ဌိတာ။
ပဉ္စဝီသတိမော ပရိစ္ဆေဒေါ။