📜
ဆဗ္ဗိသတိမော ပရိစ္ဆေဒေါ
၂၆။ ဝုဋ္ဌာနဝိသုဒ္ဓိကထာ
တဿေဝံ ပဋိပန္နဿ၊ သိခါပတ္တာ ဝိပဿနာ၊
ဝုဋ္ဌာနဂါမိနီ နာမ၊ ယဒါ ဟောတိ တဒါ ပန။
ပရိကမ္မောပစာရာနုလောမဂေါတြဘုတော ပရံ၊
မဂ္ဂေါ တတော ဖလံ ဟောတိ၊ ဘဝင်္ဂါ ပစ္စဝေက္ခဏာ။
ပရိကမ္မောပစာရာနုလောမသင်္ခါတဂေါစရာ ¶ ၊
မဂ္ဂဿာဝဇ္ဇနံ ဟုတွာ၊ နိဗ္ဗာနေ ဟောတိ ဂေါတြဘု။
စတုတ္ထံ ပဉ္စမံ ဝါထ၊ ဆဋ္ဌံ ဝါပိ ယထာရဟံ၊
အပ္ပေတိ မဂ္ဂဇဝနံ၊ နိဗ္ဗာနေ သကိမေဝ တံ။
တတော ¶ ဖလာနိ တီဏိ ဒွေ၊ ဧကံ ဝါထ ယထာက္ကမံ၊
မဂ္ဂါဝသေသနိရောဓမဂ္ဂဝုဋ္ဌာနဝီထိယံ။
တတော ဘဝင်္ဂပါတောဝ၊
တံ ဆေတွာ ပစ္စဝေက္ခဏာ၊
တိဿော ပဉ္စဝိဓာ ဟောန္တိ၊
ယထာယောဂံ တထာ ဟိ စ။
မဂ္ဂံ ဖလဉ္စ နိဗ္ဗာနံ၊ အဝဿံ ပစ္စဝေက္ခတိ၊
ဟီနေ ကိလေသေ သေသေ စ၊ ပစ္စဝေက္ခတိ ဝါ န ဝါ။
တတော စ ပုန သင်္ခါရေ၊ ဝိပဿန္တော ယထာ ပုရေ၊
အပ္ပေတိ အနုပုဗ္ဗေန၊ သေသမဂ္ဂဖလာနိ စ။
တတ္ထ ဝုစ္စန္တိ နိဗ္ဗာန-ဖလမဂ္ဂဝိပဿနာ၊
သုညတာ စာနိမိတ္တာ စ၊ တထာပဏိဟိတာနိ စ။
သုညတာဝိပဿနာဒိနာမေန ဟိ ဝိပဿတိ၊
ဝိမောက္ခမုခဘူတာတိ၊ တိဝိဓာ ဘာဇိတာ တထာ။
သုညတာဒိကနာမေန၊ ဝိမောက္ခာ တိဝိဓာ မတာ၊
နိဗ္ဗာနဖလမဂ္ဂါ စ၊ သမာပတ္တိသမာဓယော။
တတ္ထေဝ ပဌမဘူမိံ၊ ပတ္တော အရိယပုဂ္ဂလော၊
သတ္တက္ခတ္တုပရမော သော၊ သောတာပန္နောတိ ဝုစ္စတိ။
ပတ္တော ဒုတိယဘူမိဉ္စ၊ သကဒါဂါမိနာမကော၊
သကိမေဝ ဣမံ လောကံ၊ အာဂန္တွာ ဟောတိ မာနုသံ။
ပတ္တော ¶ တတိယဘူမိဉ္စ၊ အနာဂါမီတိ ဝုစ္စတိ၊
ဗြဟ္မလောကာ အနာဂန္တွာ၊ ဣဓကာမောပပတ္တိယာ။
ပတ္တော စတုတ္ထဘူမိဉ္စ၊ အရဟာ အဂ္ဂပုဂ္ဂလော၊
ဒိဋ္ဌေဝ ဓမ္မေ ဒုက္ခဂ္ဂိံ၊ နိဗ္ဗာပေတီတိ ဝုစ္စတိ။
ဣတိ ¶ မဂ္ဂဖလဋ္ဌာနံ၊ ဝသာ အရိယပုဂ္ဂလာ၊
ဒွိဓာပိ စတုဓာ ယုဂ္ဂါ၊ အဋ္ဌ ဟောန္တိ ဝိဘာဂတော။
ဥဘတောဘာဂဝိမုတ္တ-
ဝိဘာဂါဒိဝသာ ပန၊
ဝိဘတ္တာ ဟောန္တိ သတ္တေတေ၊
ယထာယောဂံ တထာ ဟိ စ။
သဒ္ဓါဓုရဿာနိစ္စတော၊ ဝုဋ္ဌာနံ ဒုက္ခတောပိ စ၊
ပညာဓုရဿာနတ္တတော၊ ဣတိ ဒီပေန္တိ ပဏ္ဍိတာ။
သဒ္ဓါနုသာရိ အာဒိမှိ၊ မဇ္ဈေ သဒ္ဓါဝိမုတ္တကော၊
အန္တေ ပညာဝိမုတ္တောဝ၊ တသ္မာ သဒ္ဓါဓုရော သိယာ။
ဓမ္မာနုသာရိ အာဒိမှိ၊ ဒိဋ္ဌိပ္ပတ္တော တတောပရိ၊
အန္တေ ပညာဝိမုတ္တောဝ၊ ဟောတိ ပညာဓုရောပိ စ။
သမထယာနိကာ စေဝ၊ ရူပါနုတ္တရပါဒကာ၊
ဝိပဿနာယာနိကာ စ၊ သဗ္ဗေ သုက္ခဝိပဿကာ။
ဓုရဝုဋ္ဌာနဘေဒေန၊ ဟောန္တိ ပဉ္စေဝ သဗ္ဗထာ၊
အာရုပ္ပပါဒကာ စာပိ၊ အာဒိမှိ ဒုဝိဓာ တထာ။
ဆသု ဌာနေသု မဇ္ဈကေ၊ ကာယသက္ခီတိ ဘာဇိတာ၊
ဥဘတောဘာဂဝိမုတ္တော၊ အရဟတ္တေ ပတိဋ္ဌိတော။
ဣတ္ထံ ဝုတ္တယာနဓုရ-ဝုဋ္ဌာနာနံ ဝိဘာဂတော၊
မဂ္ဂပ္ဖလဘူမိယော စ၊ သတ္တဋ္ဌာရိယပုဂ္ဂလာ။
တတ္ထ ¶ စာနုတ္တရဉာဏံ၊ သစ္စာနံ ပဋိဝေဓကံ၊
သမုစ္ဆေဒပ္ပဟာနေန၊ က္လေသာနုသယသောဓနံ။
စတုမဂ္ဂဝိဘာဂေန၊ ဝုဋ္ဌာနန္တိ ပကိတ္တိတံ၊
ဉာဏဒဿနဝိသုဒ္ဓိ၊ နာမ ဟောတိ တထာပိ စ။
မဂ္ဂေါ စ ပရိဇာနာတိ၊ ဒုက္ခံ တေဘူမကံ တထာ၊
ယထာယောဂံ ပဇဟတိ၊ တဏှာသမုဒယမ္ပိ စ။
နိရောဓံ ¶ သစ္ဆိကရောတိ၊ မဂ္ဂသစ္စမနုတ္တရံ၊
ဘာဝနာဝီထိမောတိဏ္ဏော၊ ဘာဝေတီတိ ပဝုစ္စတိ။
ဒိဋ္ဌိဂ္ဂတဝိစိကိစ္ဆာ-သီလဗ္ဗတမသေသတော၊
အပါယဂမနီယဉ္စ၊ ရာဂဒေါသာဒိကတ္တယံ။
တဒေကဋ္ဌေ ကိလေသေ စ၊ သဟဇာတပ္ပဟာနတော၊
ပဇဟာတိ သောတာပတ္တိ-မဂ္ဂေါ ပဌမဘူမိကော။
တဒေကဋ္ဌေ ပဇဟတိ၊ ရာဂဒေါသာဒိကေပိ စ၊
ထူလေ တု သကဒါဂါမိ-မဂ္ဂေါ ဒုတိယဘူမိကော။
ပဇဟာတိ အနာဂါမိ-မဂ္ဂေါ နိရဝသေသတော၊
ကာမရာဂဗျာပါဒေ စ၊ တဒေကဋ္ဌေ စ သမ္ဘဝါ။
ရူပါရူပရာဂမာနု-ဒ္ဓစ္စာဝိဇ္ဇာတိ ပဉ္စကံ၊
အဂ္ဂမဂ္ဂေါ ပဇဟတိ၊ က္လေသေ သေသေ စ သဗ္ဗထာ။
ဣတိ သစ္စပဋိဝေဓံ၊ က္လေသက္ခယဖလာဝဟံ၊
မဂ္ဂဉာဏံ ပကာသေန္တိ၊ ဝိသုဒ္ဓိံ သတ္တမံ ဗုဓာ။
ဆဗ္ဗိသုဒ္ဓိကမေနေဝံ၊ သဗ္ဗထာယ ဝိသုဒ္ဓိယာ၊
သတ္တမာယာနုပတ္တဗ္ဗံ၊ နိဗ္ဗာနန္တိ ပဝုစ္စတိ။
က္လေသက္ခယကရံ တာဏံ၊ သံသာရာတိက္ကမံ ပရံ၊
ပါရိမံ တီရမဘယံ၊ သဗ္ဗသင်္ခါရနိဿဋံ။
တေနမ္မဒနိမ္မဒနံ ¶ ၊ ပိပါသဝိနယာဒိနာ၊
က္လေသသံသာရသင်္ခါရ-ပဋိပက္ခနိဒဿိတံ။
အဇရာမရမစ္စန္တ-မနုပ္ပာဒမသင်္ခတံ၊
အနုတ္တရမသင်္ခါရံ၊ အနန္တမတုလဉ္စ တံ။
ပရမတ္ထမနောပမ္မံ၊ သန္တိ အပ္ပဋိမံ သုခံ၊
နိရောဓသစ္စ နိဗ္ဗာနံ၊ ဧကန္တံ အမတံ ပဒံ။
သောပါဒိသေသနိဗ္ဗာန-ဓာတု ¶ စေဝ တထာပရာ၊
အနုပါဒိသေသာ စေတိ၊ ဒုဝိဓာ ပရိယာယတော။
သုညတံ စာနိမိတ္တဉ္စ၊ တထာပဏိဟိတန္တိ စ၊
အတ္တာဒိဂါဟာဘာဝေန၊ တိဝိဓာပိ စ ဘာဇိတံ။
က္လေသသံသာရသင်္ခါရ-ပစ္စနီကဝိဘာဂတော၊
ဘဝက္ခယာဒိဘေဒေဟိ၊ ဗဟုဓာပိ ပဝုစ္စတိ။
တဒေဝမစ္စုတံ ဓမ္မံ၊ လောကုတ္တရမကာလိကံ၊
ဝါနာဘာဝါ ဝါနာတီတော၊ ‘‘နိဗ္ဗာန’’န္တိ ပကိတ္တိတံ။
ဣတိ နိဗ္ဗာနဝိဘာဂေ ဝုဋ္ဌာနဝိသုဒ္ဓိကထာ နိဋ္ဌိတာ။
ဆဗ္ဗီသတိမော ပရိစ္ဆေဒေါ။
နိဋ္ဌိတော စ သဗ္ဗထာပိ နိဗ္ဗာနဝိဘာဂေါ။