📜
သတ္တဝီသတိမော ပရိစ္ဆေဒေါ
၅။ ပညတ္တိဝိဘာဂေါ
၂၇။ ပဘေဒကထာ
စိတ္တံ ¶ စေတသိကံ ရူပံ၊ နိဗ္ဗာနမ္ပိ စ ဘာဇိတံ၊
တသ္မာ ဒါနိ ယထာယောဂံ၊ ပညတ္တိပိ ပဝုစ္စတိ။
သာ စာယံ အတ္ထပညတ္တိ-နာမပညတ္တိဘေဒတော၊
ဒုဝိဓာ ဟောတိ ပညတ္တိ၊ အတ္ထပညတ္တိ တတ္ထ စ။
သတ္တသမ္ဘာရသဏ္ဌာန-သင်္ဃာဋပရိဏာမတော၊
ဝိကပ္ပုပဋ္ဌာနာကာရဝေါဟာရာဘိနိဝေသတော။
တထာ ပဝတ္တသင်္ကေတသိဒ္ဓါ အတ္ထာ ပကပ္ပိတာ၊
ပညာပီယန္တိ နာမာတိ၊ ပညတ္တီတိ ပကိတ္တိတာ။
အတ္ထာ ဟိ ပရမတ္ထတ္ထာ၊ ပညတ္တတ္ထာတိ စ ဒွိဓာ၊
တတ္ထ စ ပရမတ္ထတ္ထာ၊ သစ္စိကဋ္ဌာ သလက္ခဏာ။
ပညတ္တတ္ထာ ¶ သစ္စိကဋ္ဌသလက္ခဏသဘာဝတော၊
အညထာ ဂဟိတာ တံတမုပါဒါယ ပကပ္ပိတာ။
တသ္မာ ဥပါဒါပညတ္တိ၊ အတ္ထပညတ္တိနာမကာ၊
ပညပေတဗ္ဗနာမာဝ၊ ပညတ္တတ္ထာဝ သဗ္ဗထာ။
ပရမတ္ထာ ယထာဝုတ္တာ၊ စိတ္တစေတသိကာဒယော၊
ပညတ္တာ ဣတ္ထိပုရိသမဉ္စပီဌပဋာဒယော။
ယေန ဝုစ္စတိ တံ နာမံ၊ ပညပေတီတိ ဝုစ္စတိ၊
ပညတ္တီတိ စ သာ နာမပညတ္တီတိ တတော မတာ။
သင်္ခါ ¶ သမညာ ပညတ္တိ၊ ဝေါဟာရောတိ စ ဘာဇိတာ၊
စတုဓာ ပညပေတဗ္ဗပညတ္တီတိ ဟိ ဝဏ္ဏိတာ။
တတော နာမံ နာမကမ္မံ၊ နာမဓေယျံ အထာပရံ၊
နိရုတ္တိ ဗျဉ္ဇနမဘိလာပေါတိ ပန ဘာဇိတာ။
နာမပညတ္တိ နာမာတိ၊ ပညတ္တိ ဒုဝိဓာ ကတာ၊
သဗ္ဗေဝ ဓမ္မာ ပညတ္တိပထာတိ ပန ဘာဇိတာ။
ပရမတ္ထပညတ္တတ္ထာ၊ ဒုဝိဓာ ဟောန္တိ တတ္ထ စ၊
ပညတ္တိပထာဝ ဟောန္တိ၊ ပရမတ္ထာ သလက္ခဏာ။
ပညတ္တတ္ထာ ပညတ္တိ စ၊ ပညပေတဗ္ဗမတ္တတော၊
ပညတ္တိပထာ စ နာမပညတ္တိပထဘာဝတော။
နာမမ္ပိ ပညာပေတဗ္ဗမေဝ ကိဉ္စာပိ ကေနစိ၊
နာမမေဝမ္ပေတံ တတ္ထ၊ ပညတ္တိစ္စေဝ ဝဏ္ဏိတံ။
ပညပေတဗ္ဗဓမ္မာ စ၊ တေသံ ပညာပိတာပိ စ၊
ဣစ္ဆိတဗ္ဗာပိ ပညတ္တိပထာ ပညတ္တိနာနတာ။
ဣတိ ဝုတ္တာနုသာရေန၊ ဝုတ္တံ အဋ္ဌကထာနယေ၊
နယံ ဂဟေတွာ ဧတ္ထာပိ၊ ပညတ္တိ ဒုဝိဓာ ကတာ။
တသ္မိမ္ပိ ¶ ပရမတ္ထာ စ၊ သစ္စိကဋ္ဌသလက္ခဏာ၊
အတ္ထာ ပညတ္တိမတ္တာ စ၊ အတ္ထပညတ္တိနာမကာ။
တေသံ ပညာပိကာ စေဝ၊ နာမပညတ္တိနာမိကာ၊
ဣစ္စေဝံ ဝဏ္ဏနာမဂ္ဂေ၊ ဉေယျတ္တာ တိဝိဓာ ကတာ။
ပရမတ္ထသစ္စံ နာမ၊ ပရမတ္ထာဝ တတ္ထ စ၊
သစ္စိကဋ္ဌသဘာဝတ္တာ၊ အဝိသံဝါဒကာ ဟိ တေ။
သမ္မုတိသစ္စံ ပညတ္တိဒွယံ ဝေါဟာရဝုတ္တိယာ၊
လောကသမညာဓိပ္ပာယာဝိသံဝါဒကဘာဝတော။
ဣတိ ¶ သစ္စဒွယမ္ပေတံ၊ အက္ခာသိ ပုရိသုတ္တမော၊
တေနာပိ နာမသံဝိညူ၊ ဝေါဟရေယျုဘယမ္ပိ ဝါ။
ဣတိ ပညတ္တိဝိဘာဂေ ပဘေဒကထာ နိဋ္ဌိတာ။
သတ္တဝီသတိမော ပရိစ္ဆေဒေါ။