📜
အဋ္ဌဝီသတိမော ပရိစ္ဆေဒေါ
၂၈။ အတ္ထပညတ္တိကထာ
တတ္ထ စ ပုဗ္ဗာပရိယ-ပဝတ္တက္ခန္ဓသမ္မတာ၊
ဝိညတ္တိန္ဒြိယဝိပ္ဖာရ-ဝိသေသောပနိဗန္ဓနာ။
ဒေဝယက္ခမနုဿာဒိ-နာနာဘေဒါ သလက္ခိကာ၊
သတ္တပညတ္တိ နာမာယံ၊ သွာယံ သတ္တောတိ သမ္မတော။
ဝဋ္ဋတ္တယမုပါဒါယ၊
ခန္ဓာယတနဝုတ္တိယာ၊
ကာရကော ဝေဒကော ဝါယံ၊
သန္ဓာဝတိ ဘဝေ ဘဝေ။
တသ္မာ သံသာရမာပန္နော၊ သတ္တော နာမ သ ပုဂ္ဂလော၊
အဟမတ္တာပရာ ဣတ္ထီ၊ ပုရိသောတိ စ ကပ္ပိတော။
သွာယံ ¶ ခန္ဓာဒိတော သတ္တော၊ အညောတိ စ န ဝုစ္စတိ၊
ခန္ဓာဒိဝိနိမုတ္တဿ၊ သတ္တဿေဝ အဘာဝတော။
ခန္ဓာ ခန္ဓာနမေဝါယံ၊ သတ္တောတိ စ န ဝုစ္စတိ၊
ခန္ဓဝေါဟာရတော တဿ၊ အညဝေါဟာရသမ္ဘဝါ။
ဣစ္စေဝံ ¶ ခန္ဓနာနတ္တေ-ကတ္တမုတ္တောပိ အတ္ထတော၊
တဗ္ဗိသေသာဝစရိတ-ဝေါဟာရော စ တု ဒိဿတိ။
တေနာယံ ပုဂ္ဂလော သတ္တော၊ ဇာယတိဇ္ဇိယျတီတိ စ၊
မီယတီတိ စ တဿာယံ၊ သံသာရောတိ ပဝုစ္စတိ။
မတော ဇာတော စ န သွေဝ၊ ခန္ဓဘေဒေါပစာရတော၊
နာပရော သွေဝ သန္တာနဘေဒါဘာဝေါပစာရတော။
နာနတ္တေကတ္တမိစ္စေဝံ၊ ပုဂ္ဂလဿောပစာရတော၊
ဥစ္ဆေဒသဿတတ္တံ ဝါ၊ တသ္မာ နောပေတိ ပုဂ္ဂလော။
ဣစ္စာယံ ပုဂ္ဂလော နာမ၊ သတ္တော သံသာရကာရကော၊
ခန္ဓာဒိကမုပါဒါယ၊ ပညတ္တောတိ ပဝုစ္စတိ။
တသ္မာ ပုဂ္ဂလသင်္ခါတာ၊ သံသာရောပနိဗန္ဓနာ၊
သတ္တပညတ္တိ နာမာတိ၊ ဝိညာတဗ္ဗာ ဝိဘာဝိနာ။
အဇ္ဈတ္တိကာ စ ကေသာဒိကောဋ္ဌာသာ ဗာဟိရေသု စ၊
ဘူမိပဗ္ဗတပါသာဏတိဏရုက္ခလတာဒိကာ။
ဘူတသမ္ဘာရနိဗ္ဗတ္တိဝိဘာဂပရိကပ္ပိတာ၊
တမုပါဒါယ သမ္ဘာရပညတ္တီတိ ပဝုစ္စတိ။
ဘူတသမ္ဘာရသဏ္ဌာနဝိဘာဂပရိကပ္ပိတာ၊
သဏ္ဌာနပညတ္တိ နာမ၊ ထမ္ဘကုမ္ဘာဒိကာ မတာ။
ဘူတသမ္ဘာရသင်္ဃာတဝိသေသပရိကပ္ပိတာ၊
သင်္ဃာတပညတ္တိ နာမ၊ ရထဂေဟာဒိကာ မတာ။
ဘူတသမ္ဘာရဝိသေသပရိဏာမပကပ္ပိတာ၊
ပရိဏာမပညတ္တီတိ၊ ဒဓိဘတ္တာဒိကာ မတာ။
ဣတ္ထမဇ္ဈတ္တဗဟိဒ္ဓါ ¶ ၊ ဓမ္မာ သမ္ဘာရသမ္ဘူတာ၊
သန္တာနဝုတ္တိ သင်္ကေတသိဒ္ဓါ ပညတ္တိ ပဉ္စဓာ။
တထာ ¶ တထာ သမုပ္ပန္နဝိကပ္ပာဘောဂသမ္မတာ၊
ဝိကပ္ပပညတ္တိ နာမ၊ ကာလာကာသဒိသာဒိကာ။
တံ တံ နိမိတ္တမာဂမ္မ၊ တတောပဋ္ဌာနကပ္ပိတာ၊
ဥပဋ္ဌာနပညတ္တီတိ၊ ပဋိဘာဂါဒိကာ မတာ။
ဝိသေသာကာရမတ္တာပိ၊ အတ္ထန္တရပကပ္ပိတာ၊
အာကာရပညတ္တိ နာမ၊ ဝိညတ္တိလဟုတာဒိကာ။
တံ တံ ကာရဏမာဂမ္မ၊ တထာ ဝေါဟာရကပ္ပိတာ၊
ဝေါဟာရပညတ္တိ နာမ၊ ကထိနာပတ္တိအာဒိကာ။
ဗာလော ယော သော စ မေ အတ္တာ၊
သော ဘဝိဿာမိ မံ စ တု၊
နိစ္စော ဓုဝေါ သဿတောတိ-
အာဒိကာ ပန သဗ္ဗထာ။
တဗ္ဗောဟာရနိမိတ္တာနံ၊ အဘာဝေပိ ပဝတ္တိတော၊
အဘိနိဝေသပညတ္တိ၊ နာမ တိတ္ထိယကပ္ပိတာ။
ဣစ္စေဝံ လောကသာသနတိတ္ထာယတနကပ္ပိတာ၊
သန္တာနမုတ္တသင်္ကေတသိဒ္ဓါ အတ္ထာပိ ပဉ္စဓာ။
သင်္ကာနဝုတ္တိသန္တာနမုတ္တဘေဒဝသာ ဒွိဓာ၊
အတ္ထပညတ္တိ နာမာယံ၊ ဒသဓာ ပရိဒီပိတာ။
ဣတိ ဝုတ္တပ္ပကာရေသု၊ ပညတ္တတ္ထေသု ပဏ္ဍိတာ၊
ပညတ္တိမတ္တံ သန္ဓာယ၊ ဝေါဟရန္တိ ယထာကထံ။
တဒညေ ပန ဗာလာ စ၊ တိတ္ထိယာပိ အကောဝိဒါ၊
ပညတ္တိမတိဓာဝိတွာ၊ ဂဏှန္တိ ပရမတ္ထတော။
တေ တထာ ဂဟိတာကာရာ၊ အညာဏဂဟိတာ ဇနာ၊
မိစ္ဆတ္တာဘိနိဝိဋ္ဌာ စ၊ ဝဍ္ဎန္တိ ဘဝဗန္ဓနံ။
ဒုဝိဓေသုပိ ¶ ¶ အတ္ထေသု၊ တသ္မာ ပဏ္ဍိတဇာတိကော၊
ပရမတ္ထပညတ္တီသု၊ ဝိဘာဂမိတိ လက္ခယေတိ။
ဣတိ ပညတ္တိဝိဘာဂေ အတ္ထပညတ္တိကထာ နိဋ္ဌိတာ။
အဋ္ဌဝီသတိမော ပရိစ္ဆေဒေါ။