📜
ဧကူနတိံသတိမော ပရိစ္ဆေဒေါ
၂၉။ နာမပညတ္တိကထာ
နာမဝေါဟာရသင်္ကေတကာရဏောပနိဗန္ဓနာ၊
ယထာဝုတ္တတ္ထသဒ္ဒါနံ၊ အန္တရာ စိန္တနာ ဂတာ။
နာမပညတ္တိ နာမာယံ၊ အတ္ထသဒ္ဒဝိနိဿဋာ၊
တံဒွယာဗဒ္ဓသင်္ကေတဉေယျာကာရောပလက္ခိတာ။
ယာ ဂယှတိ နာမဃောသဂေါစရုပ္ပန္နဝီထိယာ၊
ပဝတ္တာနန္တရုပ္ပန္န-မနောဒွါရိကဝီထိယာ။
မဉ္စပီဌာဒိသဒ္ဒံ ဟိ၊ သောတဝိညာဏဝီထိယာ၊
သုတွာ တမေဝ စိန္တေတွာ၊ မနောဒွါရိကဝီထိယာ။
တတော သင်္ကေတနိပ္ဖန္နံ၊ နာမံ စိန္တာယ ဂယှတိ၊
နာမပညတ္တိအတ္ထာ တု၊ တတော ဂယှန္တိ သမ္ဘဝါ။
သဒ္ဒနာမတ္ထပညတ္တိပရမတ္ထဝသေန ဟိ၊
စတုဓာ တိဝိဓာ ဝါထ၊ စိန္တနာ တတ္ထ ဣစ္ဆိတာ။
ဣတ္ထမဋ္ဌကထာမဂ္ဂံ၊ ဝဏ္ဏေန္တေန ဟိ ဒဿိတော၊
နယော အာစရိယေနေတိ၊ ဝိဘာဂေါယံ ပကာသိတော။
နတ္ထညာ ¶ ကာစိ ဝိညတ္တိ၊ ဝိကာရသဟိတော ပန၊
သဒ္ဒေါဝ နာမပညတ္တိ၊ ဣစ္စေကစ္စေဟိ ဝဏ္ဏိတံ။
တဒေတံ နာမပညတ္တိဘာဝေနေကဝိဓမ္ပိ စ၊
နေရုတ္တိကယာဒိစ္ဆကဝသာ နာမံ ဒွိဓာ ဘဝေ။
သညာသု ဓာတုရူပါနိ၊ ပစ္စယဉ္စ တတော ပရံ၊
ကတွာ ဝဏ္ဏာဂမာဒိဉ္စ၊ သဒ္ဒလက္ခဏသာဓိတံ။
နေရုတ္တိကမုဒီရေန္တိ ¶ ၊ နာမံ ယာဒိစ္ဆကံ ပဒံ၊
ယဒိစ္ဆာယ ကတမတ္တံ၊ ဗျဉ္ဇနတ္ထဝိဝဇ္ဇိတံ။
တိဝိဓမ္ပိ တဒနွတ္ထကာဒိမဉ္စောပစာရိမံ၊
နိဗ္ဗစနတ္ထသာပေက္ခံ၊ တတ္ထာနွတ္ထမုဒီရိတံ။
ယဒိစ္ဆာကတသင်္ကေတံ၊ ကာဒိမဉ္စောပစာရိမံ၊
အတမ္ဘူတဿ တဗ္ဘာဝဝေါဟာရောတိ ပဝုစ္စတိ။
တထာ သာမညနာမဉ္စ၊ ဂုဏနာမဉ္စ ကိတ္တိမံ၊
ဩပပါတိကမိစ္စေဝံ၊ နာမံ ဟောတိ စတုဗ္ဗိဓံ။
မဟာဇနသမ္မတဉ္စ၊ အနွတ္ထဉ္စေဝ တာဒိသံ၊
တီဏိ နာမာနိ စန္ဒာဒိနာမံ တတ္ထောပပါတိကံ။
ယာဒိစ္ဆကမာဝတ္ထိကံ၊ နေမိတ္တကမထာပရံ၊
လိင်္ဂိကံ ရုဠှိကဉ္စေတိ၊ နာမံ ပဉ္စဝိဓံ ဘဝေ။
ယာဒိစ္ဆကံ ယထာဝုဍ္ဎံ၊ ဝစ္ဆဒမ္မာဒိကံ ပန၊
အာဝတ္ထိကံ နေမိတ္တကံ၊ သီလဝါပညဝါဒိကံ။
လိင်္ဂိကံ ဒိဋ္ဌလိင်္ဂံ တု၊ ဒဏ္ဍီဆတ္တီတိအာဒိကံ၊
ရုဠှိကံ လေသမတ္တေန၊ ရုဠှံ ဂေါမဟိံသာဒိကံ။
ဝိဇ္ဇမာနာဝိဇ္ဇမာန-ပညတ္တောဘယမိဿိတာ၊
ဝိဘတ္တာ နာမပညတ္တိ၊ ဆဗ္ဗိဓာ ဟောတိ တတ္ထ ဟိ။
ဝိဇ္ဇမာနပညတ္တီတိ ¶ ၊ ဝိဇ္ဇမာနတ္ထဒီပိတာ၊
ဝုစ္စတိ ခန္ဓာယတန-ဓာတုပဉ္စိန္ဒြိယာဒိကာ။
အဝိဇ္ဇမာနပညတ္တိ-နာမိကာ ပရမတ္ထတော၊
အဝိဇ္ဇမာနမဉ္စာဒိ၊ အတ္ထပညတ္တိဒီပိတာ။
ဝိဇ္ဇမာနေန အဝိဇ္ဇ-မာနပညတ္တိနာမိကာ၊
တေဝိဇ္ဇော ဆဠဘိညော စ၊ သီလဝါ ပညဝါပိ စ။
အဝိဇ္ဇမာနေန ဝိဇ္ဇ-မာနပညတ္တိနာမိကာ၊
ဣတ္ထိရူပံ ဣတ္ထိသဒ္ဒေါ၊ ဣတ္ထိစိတ္တန္တိအာဒိကာ။
ဝိဇ္ဇမာနေန ¶ တု ဝိဇ္ဇ-မာနပညတ္တိနာမိကာ၊
စက္ခုဝိညာဏံ စ စက္ခု-သမ္ဖဿော စေဝမာဒိကာ။
အဝိဇ္ဇမာနေနာဝိဇ္ဇ-မာနပညတ္တိနာမိကာ၊
ခတ္တိယပုတ္တော ဗြာဟ္မဏ-ပုတ္တော ဣစ္စေဝမာဒိကာ။
ဣတိ ဝုတ္တာနုသာရေန၊ နာမပညတ္တိယာ ဗုဓော၊
သရူပံ ဝိသယဉ္စေဝ၊ ဝိဘာဂဉ္စ ဝိဘာဝယေ။
ဣစ္စေဝံ ပရမတ္ထာ စ၊ ယထာဝုတ္တာ စတုဗ္ဗိဓာ၊
ပညတ္တိ ဒုဝိဓာ စေတိ၊ ဉေယျတ္ထာ ဆဗ္ဗိဓာ မတာတိ။
ဣတိ ပညတ္တိဝိဘာဂေ နာမပညတ္တိကထာ နိဋ္ဌိတာ။
ဧကူနတိံသတိမော ပရိစ္ဆေဒေါ။
နိဋ္ဌိတော စ သဗ္ဗထာပိ ပညတ္တိဝိဘာဂေါ။
နိဂမနကထာ
သေဋ္ဌေ ¶ ကဉ္စိဝရေ ရဋ္ဌေ၊ ကာဝေရိနဂရေ ဝရေ၊
ကုလေ သဉ္ဇာတဘူတေန၊ ဗဟုဿုတေန ဉာဏိနာ။
အနုရုဒ္ဓေန ထေရေန၊ အနိရုဒ္ဓယသဿိနာ၊
တမ္ဗရဋ္ဌေ ဝသန္တေန၊ နဂရေ တဉ္ဇနာမကေ။
တတ္ထ သင်္ဃဝိသိဋ္ဌေန၊ ယာစိတေန အနာကုလံ၊
မဟာဝိဟာရဝါသီနံ၊ ဝါစနာမဂ္ဂနိဿိတံ။
ပရမတ္ထံ ပကာသေန္တံ၊ ပရမတ္ထဝိနိစ္ဆယံ၊
ပကရဏံ ကတံ တေန၊ ပရမတ္ထတ္ထဝေဒိနာတိ။
ဣတိ အနုရုဒ္ဓါစရိယေန ရစိတော
ပရမတ္ထဝိနိစ္ဆယော နိဋ္ဌိတော။
နမော တဿ ဘဂဝတော အရဟတော သမ္မာသမ္ဗုဒ္ဓဿ