📜
၃။ တတိယော ပရိစ္ဆေဒေါ
စိတ္တပဝတ္တိပရိဒီပနော
စိတ္တံ ဝိသယဂ္ဂါဟံ တံ၊ ပါကာပါကဒတော ဒုဓာ၊
ကုသလာကုသလံ ပုဗ္ဗံ၊ ပရမဗျာကတံ မတံ။
ကုသလံ ¶ တတ္ထ ကာမာဒိဘူမိတော စတုဓာ သိယာ၊
အဋ္ဌ ပဉ္စ စတ္တာရိ စ၊ စတ္တာရိ ကမတော ကထံ။
သောမနဿမတိယုတ္တမသင်္ခါရမနမေကံ၊
သသင်္ခါရမနဉ္စေကံ၊ တထာ ဟီနမတိဒွယံ။
တထောပေက္ခာမတိယုတ္တံ၊ မတိဟီနန္တိ အဋ္ဌဓာ၊
ကာမာဝစရပုညေတ္ထ၊ ဘိဇ္ဇတေ ဝေဒနာဒိတော။
ဒါနံ ¶ သီလဉ္စ ဘာဝနာ၊ ပတ္တိဒါနာနုမောဒနာ၊
ဝေယျာဝစ္စာပစာယဉ္စ၊ ဒေသနာ သုတိ ဒိဋ္ဌိဇု။
ဧတေသွေကမယံ ဟုတွာ၊ ဝတ္ထုံ နိဿာယ ဝါ န ဝါ၊
ဒွါရဟီနာဒိယောနီနံ၊ ဂတိယာဒိပ္ပဘေဒဝါ။
တိကာလိကပရိတ္တာဒိဂေါစရေသွေကမာဒိယ၊
ဥဒေတိ ကာလမုတ္တံ ဝါ၊ မတိဟီနံ ဝိနာမလံ။
ဆဂေါစရေသု ရူပါဒိပဉ္စကံ ပဉ္စ ဂေါစရာ၊
သေသံ ရူပမရူပဉ္စ၊ ပညတ္တိ ဆဋ္ဌဂေါစရော။
ဉာဏယုတ္တဝရံ တတ္ထ၊ ဒတွာ သန္ဓိံ တိဟေတုကံ၊
ပစ္ဆာ ပစ္စတိ ပါကာနံ၊ ပဝတ္တေ အဋ္ဌကေ ဒုဝေ။
တေသုယေဝ နိဟီနံ တု၊ ဒတွာ သန္ဓိံ ဒုဟေတုကံ၊
ဒေတိ ဒွါဒသ ပါကေ စ၊ ပဝတ္တေ ဓီယုတံ ဝိနာ။
ဧဝံ ဓီဟီနမုက္ကဋ္ဌံ၊ သန္ဓိယဉ္စ ပဝတ္တိယံ၊
ဟီနံ ပနုဘယတ္ထာပိ၊ ဟေတုဟီနေဝ ပစ္စတိ။
ကာမသုဂတိယံယေဝ၊ ဘဝဘောဂဒဒံ ဣဒံ၊
ရူပါပါယေ ပဝတ္တေဝ၊ ပစ္စတေ အနုရူပတော။
ဝိတက္ကစာရပီတီဟိ၊ သုခေကဂ္ဂယုတံ မနံ၊
အာဒိ စာရာဒိပီတာဒိသုခါဒီဟိ ပရံ တယံ။
ဥပေက္ခေကဂ္ဂတာယန္တမာရုပ္ပဉ္စေဝမင်္ဂတော ¶ ၊
ပဉ္စဓာ ရူပပုညံ တု၊ ဟောတာရမ္မဏတော ပန။
အာဒိဿာသုဘမန္တဿု-
ပေက္ခာ မေတ္တာဒယော တယော၊
အာဒေါ စတုန္နံ ပဉ္စန္နံ၊
သဿာသကသိဏာနိ တု။
နဘတမ္မနတဿုညတစ္စိတ္တစတုဂေါစရေ၊
ကမေနာတိက္ကမာရုပ္ပပုညံ ဟောတိ စတုဗ္ဗိဓံ။
အမလံ ¶ သန္တိမာရဗ္ဘ၊ ဟောတိ တံ မဂ္ဂယောဂတော၊
စတုဓာ ပါဒကဇ္ဈာနဘေဒတော ပုန ဝီသတိ။
ဒိဋ္ဌိကင်္ခါနုဒံ အာဒိ၊ ကာမဒေါသတနူကရံ၊
ပရံ ပရံ တဒုစ္ဆေဒီ၊ အန္တံ သေသကနာသကံ။
ဧဝံ ဘူမိတ္တယံ ပုညံ၊ ဘာဝနာမယမေတ္ထ ဟိ၊
ပဌမံ ဝတ္ထုံ နိဿာယ၊ ဒုတိယံ ဥဘယေနပိ။
တတိယေ အာဒိ နိဿာယ၊
သေသာ နိဿာယ ဝါ န ဝါ၊
ဟောန္တိ အာဒိဒွယံ တတ္ထ၊
သာဓေတိ သကဘူဘဝံ။
သာဓေတာနုတ္တရံ သန္တိံ၊ အဘိညာ ပနိဓေဝ တု၊
ဈာနူဒယဖလတ္တာ န၊ ဖလဒါနာပိ သမ္ဘဝါ။
နာညဘူဖလဒံ ကမ္မံ၊ ရူပပါကဿ ဂေါစရော၊
သကမ္မဂေါစရောယေဝ၊ န စညောယမသမ္ဘဝေါ။
ပါပံ ကာမိကမေဝေကံ၊ ဟေတုတော တံ ဒွိဓာ ပုန၊
မူလတော တိဝိဓံ လောဘ-ဒေါသမောဟဝသာ သိယာ။
သောမနဿကုဒိဋ္ဌီဟိ ¶ ၊ ယုတ္တမေကမသင်္ခရံ၊
သသင်္ခါရမနဉ္စေကံ၊ ဟီနဒိဋ္ဌိဒွယံ တထာ။
ဥပေက္ခာဒိဋ္ဌိယုတ္တမ္ပိ၊ တထာ ဒိဋ္ဌိဝိယုတ္တကံ၊
ဝေဒနာဒိဋ္ဌိအာဒီဟိ၊ လောဘမူလေဝမဋ္ဌဓာ။
သဒုက္ခဒေါသာသင်္ခါရံ၊ ဣတရံ ဒေါသမူလကံ၊
မောဟမူလမ္ပိ သောပေက္ခံ၊ ကင်္ခုဒ္ဓစ္စယုတံ ဒွိဓာ။
တတ္ထ ဒေါသဒွယံ ဝတ္ထုံ၊ နိဿာယေဝိတရေ ပန၊
နိဿာယ ဝါ န ဝါ ဟောန္တိ၊ ဝဓာဒိသဟိတာ ကထံ။
ဖရုဿဝဓဗျာပါဒါ၊ သဒေါသေန သလောဘတော၊
ကုဒိဋ္ဌိမေထုနာဘိဇ္ဈာ၊ သေသာ ကမ္မပထာ ဒွိဘိ။
သန္ဓိံ ¶ စတူသွပါယေသု၊ ဒေတိ သဗ္ဗတ္ထ ဝုတ္တိယံ၊
ပစ္စတေ ဂေါစရံ တဿ၊ သကလံ အမလံ ဝိနာ။
အဗျာကတံ ဒွိဓာ ပါက-ကြိယာ တတ္ထာဒိ ဘူမိတော၊
စတုဓာ ကာမပါကေတ္ထ၊ ပုညပါကာဒိတော ဒုဓာ။
ပုညပါကာ ဒွိဓာဟေတု-သဟေတူတိ ဒွိရဋ္ဌကာ၊
အဟေတူ ပဉ္စ ဉာဏာနိ၊ ဂဟဏံ တီရဏာ ဥဘော။
ကာယဉာဏံ သုခီ တတ္ထ၊ သောမနဿာဒိ တီရဏံ၊
သောပေက္ခာနိ ဆ သေသာနိ၊ သပုညံဝ သဟေတုကံ။
ကေဝလံ သန္ဓိဘဝင်္ဂ-တဒါလမ္ဗစုတိဗ္ဗသာ၊
ဇာယတေ သေသမေတဿ၊ ပုဗ္ဗေ ဝုတ္တနယာ နယေ။
မနုဿဝိနိပါတီနံ၊ သန္ဓာဒိ အန္တတီရဏံ၊
ဟောတိ အညေန ကမ္မေန၊ သဟေတုပိ အဟေတုနံ။
ပါပဇာ ပုညဇာဟေတု-သမာ တီရံ ဝိနာဒိကံ၊
သဒုက္ခံ ကာယဝိညာဏံ၊ အနိဋ္ဌာရမ္မဏာ ဣမေ။
တေ ¶ သာတဂေါစရာ တေသု၊ ဒွိဋ္ဌာနံ အာဒိတီရဏံ၊
ပဉ္စဋ္ဌာနာပရာ ဒွေ တေ၊ ပရိတ္တဝိသယာခိလာ။
သမ္ပဋိစ္ဆဒွိပဉ္စန္နံ၊ ပဉ္စ ရူပါဒယော တဟိံ၊
ပစ္စုပ္ပန္နာဝ သေသာနံ၊ ပါကာနံ ဆ တိကာလိကာ။
ရူပါရူပဝိပါကာနံ၊ သဗ္ဗသော သဒိသံ ဝဒေ၊
သကပုညေန သန္ဓာဒိ-သကိစ္စတ္တယတံ ဝိနာ။
သမာနုတ္တရပါကာပိ၊ သကပုညေန သဗ္ဗသော၊
ဟိတွာ မောက္ခမုခံ တံ ဟိ၊ ဒွိဓာ မဂ္ဂေ တိဓာ ဖလေ။
ကြိယာ တိဓာမလာဘာဝါ၊
ဘူမိတော တတ္ထ ကာမိကာ၊
ဒွိဓာ ဟေတုသဟေတူတိ၊
တိဓာဟေတု တဟိံ ကထံ။
အာဝဇ္ဇဟသိတာဝဇ္ဇာ ¶ ၊ သောပေက္ခသုခုပေက္ခဝါ၊
ပဉ္စဆကာမာဝစရာ၊ သကလာရမ္မဏာ စ တေ။
သဟေတုရူပရူပါ စ၊ သကပညံဝါရဟတော၊
ဝုတ္တိယာ န ဖလေ ပုပ္ဖံ၊ ယထာ ဆိန္နလတာ ဖလံ။
အနာသေဝနယာဝဇ္ဇ-ဒွယံ ပုထုဇ္ဇနဿ ဟိ၊
န ဖလေ ဝတ္တမာနမ္ပိ၊ မောဃပုပ္ဖံ ဖလံ ယထာ။
တိသတ္တ ဒွိဆ ဆတ္တိံသ၊ စတုပဉ္စ ယထာက္ကမံ၊
ပုညံ ပါပံ ဖလံ ကြိယာ၊ ဧကူနနဝုတီဝိဓံ။
သန္ဓိ ဘဝင်္ဂမာဝဇ္ဇံ၊ ဒဿနာဒိကပဉ္စကံ၊
ဂဟတီရဏဝေါဋ္ဌဗ္ဗ-ဇဝတဂ္ဂေါစရံ စုတိ။
ဣတိ ဧသံ ဒွိသတ္တန္နံ၊ ကိစ္စဝုတ္တိဝသာဓုနာ၊
စိတ္တပ္ပဝတ္တိ ဆဒွါရေ၊ သင်္ခေပါ ဝုစ္စတေ ကထံ။
ကာမေ ¶ သရာဂိနံ ကမ္မ-နိမိတ္တာဒိ စုတိက္ခဏေ၊
ခါယတေ မနသောယေဝ၊ သေသာနံ ကမ္မဂေါစရော။
ဥပဋ္ဌိတံ တမာရဗ္ဘ၊ ပဉ္စဝါရံ ဇဝေါ ဘဝေ၊
တဒါလမ္ဗံ တတော တမှာ၊ စုတိ ဟောတိ ဇဝေဟိ ဝါ။
အဝိဇ္ဇာတဏှာသင်္ခါရ-သဟဇေဟိ အပါယိနံ၊
ဝိသယာဒီနဝစ္ဆာဒိ-နမနက္ခိပကေဟိ တု။
အပ္ပဟီနေဟိ သေသာနံ၊ ဆာဒနံ နမနမ္ပိ စ၊
ခိပကာ ပန သင်္ခါရာ၊ ကုသလာဝ ဘဝန္တိဟ။
ကိစ္စတ္တယေ ကတေ ဧဝံ၊ ကမ္မဒီပိတဂေါစရေ၊
တဇ္ဇံ ဝတ္ထုံ သဟုပ္ပန္နံ၊ နိဿာယ ဝါ န ဝါ တဟိံ။
တဇ္ဇာ သန္ဓိ သိယာ ဟိတွာ၊ အန္တရတ္တံ ဘဝန္တရေ၊
အန္တရတ္တံ ဝိနာ ဒူရေ၊ ပဋိသန္ဓိ ကထံ ဘဝေ။
ဣဟေဝ ကမ္မတဏှာဒိ-ဟေတုတော ပုဗ္ဗစိတ္တတော၊
စိတ္တံ ဒူရေ သိယာ ဒီပ-ပဋိဃောသာဒိကံ ယထာ။
နာသညာ ¶ စဝမာနဿ၊ နိမိတ္တံ န စုတီ စ ယံ၊
ဥဒ္ဓံ သန္ဓိနိမိတ္တံ ကိံ၊ ပစ္စယောပိ ကနန္တရော။
ပုဗ္ဗဘဝေ စုတိ ဒါနိ၊ ကာမေ ဇာယနသန္ဓိယာ၊
အညစိတ္တန္တရာဘာဝါ၊ ဟောတာနန္တရကာရဏံ။
ဘဝန္တရကတံ ကမ္မံ၊ ယမောကာသံ လဘေ တတော၊
ဟောတိ သာ သန္ဓိ တေနေဝ၊ ဥပဋ္ဌာပိတဂေါစရေ။
ယသ္မာ စိတ္တဝိရာဂတ္တံ၊ ကာတုံ နာသက္ခိ သဗ္ဗသော၊
တသ္မာ သာနုသယဿေဝ၊ ပုနုပ္ပတ္တိ သိယာ ဘဝေ။
ပဉ္စဒွါရေ သိယာ သန္ဓိ၊ ဝိနာ ကမ္မံ ဒွိဂေါစရေ၊
ဘဝသန္ဓာနတော သန္ဓိ၊ ဘဝင်္ဂံ တံ တဒင်္ဂတော။
တမေဝန္တေ ¶ စုတိ တသ္မိံ၊ ဂေါစရေ စဝနေန တု၊
ဧကသန္တတိယာ ဧဝံ၊ ဥပ္ပတ္တိဋ္ဌိတိဘေဒကာ။
အထညာရမ္မဏာပါထ-ဂတေ စိတ္တန္တရဿ ဟိ၊
ဟေတုသင်္ချံ ဘဝင်္ဂဿ၊ ဒွိက္ခတ္တုံ စလနံ ဘဝေ။
ဃဋ္ဋိတေ အညဝတ္ထုမှိ၊ အညနိဿိတကမ္ပနံ၊
ဧကာဗဒ္ဓေန ဟောတီတိ၊ သက္ခရောပမယာ ဝဒေ။
မနောဓာတုကြိယာဝဇ္ဇံ၊ တတော ဟောတိ သကိံ ဘဝေ၊
ဒဿနာဒိ သကဒွါရ-ဂေါစရော ဂဟဏံ တတော။
သန္တီရဏံ တတော တမှာ၊ ဝေါဋ္ဌဗ္ဗဉ္စ သကိံ တတော၊
သတ္တက္ခတ္တုံ ဇဝေါ ကာမေ၊ တမှာ တဒနုရူပတော။
တဒါလမ္ဗဒွိကံ တမှာ၊ ဘဝင်္ဂံတိမဟန္တရိ၊
ဇဝါ မဟန္တေ ဝေါဋ္ဌဗ္ဗာ၊ ပရိတ္တေ နိတရေ မနံ။
ဝေါဋ္ဌဗ္ဗဿ ပရိတ္တေ တု၊ ဒွတ္တိက္ခတ္တုံ ဇဝေါ ဝိယ၊
ဝဒန္တိ ဝုတ္တိံ တံ ပါဌေ၊ အနာသေဝနတော န ဟိ။
နိယမောပိဓ စိတ္တဿ၊ ကမ္မာဒိနိယမော ဝိယ၊
ဉေယျော အမ္ဗောပမာဒီဟိ၊ ဒဿေတွာ တံ သုဒီပယေ။
မနောဒွါရေတရာဝဇ္ဇံ ¶ ၊ ဘဝင်္ဂမှာ သိယာ တတော၊
ဇဝေါကာမေ ဝိဘူတေ တု၊ ကာမဝှေ ဝိသယေ တတော။
ကာမီနံ တု တဒါလမ္ဗံ၊ ဘဝင်္ဂံ တု တတော သိယာ၊
အဝိဘူတေ ပရိတ္တေ စ၊ ဘဝင်္ဂံ ဇဝတော ဘဝေ။
အဝိဘူတေ ဝိဘူတေ စ၊ ပရိတ္တေ အပရိတ္တကေ၊
ဇဝါယေဝ ဘဝင်္ဂံ တု၊ ဗြဟ္မာနံ စတုဂေါစရေ။
မဟဂ္ဂတံ ပနာရဗ္ဘ၊ ဇဝိတေ ဒေါသသံယုတေ၊
ဝိရုဒ္ဓတ္တာ ဘဝင်္ဂံ န၊ ကိံ သိယာ သုခသန္ဓိနော။
ဥပေက္ခာတီရဏံ ¶ ဟောတိ၊ ပရိတ္တေနာဝဇ္ဇံ ကထံ။
နိယမော န ဝိနာဝဇ္ဇံ၊ မဂ္ဂတော ဖလသမ္ဘဝါ။
မဟဂ္ဂတာမလာ သဗ္ဗေ၊ ဇဝါ ဂေါတြဘုတော သိယုံ၊
နိရောဓာ စ ဖလုပ္ပတ္တိ၊ ဘဝင်္ဂံ ဇဝနာဒိတော။
သဟေတုသာသဝါ ပါကာ၊ တီရဏာ ဒွေ စုပေက္ခကာ၊
ဣမေ သန္ဓိ ဘဝင်္ဂါ စ၊ စုတိ စေကူနဝီသတိ။
ဒွေ ဒွေ အာဝဇ္ဇနာဒီနိ၊ ဂဟဏန္တာနိ တီဏိ တု၊
သန္တီရဏာနိ ဧကံဝ၊ ဝေါဋ္ဌဗ္ဗမိတိနာမကံ။
အဋ္ဌ ကာမမဟာပါကာ၊ တီဏိ သန္တီရဏာနိ စ၊
ဧကာဒသ ဘဝန္တေတေ၊ တဒါရမ္မဏနာမကာ။
ကုသလာကုသလံ သဗ္ဗံ၊ ကြိယာ စာဝဇ္ဇဝဇ္ဇိတာ၊
ဖလာနိ ပဉ္စပညာသ၊ ဇဝနာနိ ဘဝန္တိမေ။
ဣတိ သစ္စသင်္ခေပေ စိတ္တပဝတ္တိပရိဒီပနော နာမ
တတိယော ပရိစ္ဆေဒေါ။