📜
၄။ စတုတ္ထော ပရိစ္ဆေဒေါ
ဝိညာဏက္ခန္ဓပကိဏ္ဏကနယသင်္ခေပေါ
ဧကဓာဒိနယောဒါနိ ¶ ၊ ပဋုဝဍ္ဎာယ ယောဂိနံ၊
ဝုစ္စတေ ဝိသယဂ္ဂါဟာ၊ သဗ္ဗမေကဝိဓံ မနံ။
ဧကာသီတိ တိဘူမဋ္ဌံ၊ လောကိယံ သုတ္တရဉ္စ တံ၊
သေသံ လောကုတ္တရံ အဋ္ဌ၊ အနုတ္တရဉ္စိတီ ဒွိဓာ။
လောကပါကကြိယာဟေတူ ¶ ၊ စေကဟေတူတိ သတ္တဟိ၊
တိံသ နာဓိပတိ သာဓိ-ပတိ သေသာတိပီ ဒွိဓာ။
ဆန္ဒစိတ္တီဟဝီမံသာ-သွေကေန မတိမာ ယုတံ၊
ဝိနာ ဝီမံသမေကေန၊ ဉာဏဟီနမနံ ယုတံ။
ပရိတ္တာနပ္ပမာဏာနိ၊ မဟဂ္ဂတမနာနိတိ၊
တိဓာ ဆနဝ စဋ္ဌ စ၊ တိနဝါ စ ယထာက္ကမံ။
ဒွိပဉ္စ စိတ္တံ ဝိညာဏံ၊ တိဿော ဟိ မနောဓာတုယော၊
ဆသတ္တတိ မနောဉာဏ-ဓာတူတိ တိဝိဓာ ပုန။
ဧကာရမ္မဏစိတ္တာနိ၊ အနဘိညံ မဟဂ္ဂတံ၊
အမလံ ပဉ္စဝိညာဏံ၊ နဝပဉ္စ ဘဝန္တိမေ။
ပဉ္စာလမ္ဗံ မနောဓာတု၊ သာဘိညံ ကာမဓာတုဇံ၊
သေသံ ဆာရမ္မဏံ တံ ဟိ၊ တေစတ္တာလီသ သင်္ချတော။
ကာမပါကဒုသာ စာဒိ-မဂ္ဂေါ စာဒိကြိယာ ဒုဝေ၊
ရူပါ သဗ္ဗေတိရူပေ န၊ တေစတ္တာလီသ ဟောန္တိမေ။
ဝိနာဝ ရူပေနာရုပ္ပ-ဝိပါကာ စတုရော သိယုံ၊
ဒွေစတ္တာလီသ သေသာနိ၊ ဝတ္တန္တုဘယထာပိ စ။
စတုဓာပိ အဟေတွေကဒွိဟေတုကတိဟေတုတော၊
အဋ္ဌာရသ ဒွေ ဗာဝီသ၊ သတ္တစတ္တာလိသံ ဘဝေ။
ကာမေ ¶ ဇဝါ သဝေါဋ္ဌဗ္ဗာ၊ အဘိညာဒွယမေဝ စ၊
ရူပိရိယာပထဝိညတ္တိကရာမေ စတုရဋ္ဌကာ။
ဆဗ္ဗီသတိ ဇဝါ သေသာ၊ ကရာ ရူပိရိယာပထေ၊
ဒွိပဉ္စမနဝဇ္ဇာနိ၊ ကာမရူပဖလာနိ စ။
အာဒိကြိယာတိ စေကူန-ဝီသ ရူပကရာ ဣမေ၊
သေသာ စုဒ္ဒသ ဘိန္နာဝစုတိ သန္ဓိ န တီဏိပိ။
ဧကကိစ္စာဒိတော ¶ ပဉ္စ-ဝိဓာ တတ္ထေကကိစ္စကာ၊
ဒွိပဉ္စစိတ္တံ ဇဝနံ၊ မနောဓာတုဋ္ဌသဋ္ဌိမေ။
ဒွိကိစ္စာဒီနိ ဝေါဋ္ဌဗ္ဗံ၊ သုခတီရံ မဟဂ္ဂတေ၊
ပါကာ ကာမမဟာပါကာ၊ သေသာ တီရာ ယထာက္ကမံ။
ဒဿနံ သဝနံ ဒိဋ္ဌံ၊ သုတံ ဃာယနကာဒိကံ၊
တယံ မုတံ မနောဓာတုတ္တယံ ဒိဋ္ဌံ သုတံ မုတံ။
ဒိဋ္ဌံ သုတံ မုတံ ဉာတံ၊ သာဘိညံ သေသကာမိကံ၊
ဝိညာတာရမ္မဏံ သေသမေဝံ ဆဗ္ဗိဓမီရယေ။
သတ္တဓာ သတ္တဝိညာဏဓာတူနံ တု ဝသာ ဘဝေ၊
ဝုစ္စတေဒါနိ တဿေဝ၊ အနန္တရနယက္ကမော။
ပုညေသွာဒိဒွယာ ကာမေ၊ ရူပပုညမနန္တကံ၊
တပ္ပာဒကုတ္တရာနန္တံ၊ ဘဝင်္ဂဉ္စာဒိတီရဏံ။
ဒုတိယန္တဒွယာ တီရံ၊ ဘဝင်္ဂံ တတိယဒွယာ၊
တေ အနန္တာမလံ ပုညံ၊ မဇ္ဈတ္တဉ္စ မဟဂ္ဂတံ။
သဗ္ဗဝါရေ သယဉ္စေတိ၊ တေပညာသ တိသတ္တ စ၊
တေတ္တိံသ စ ဘဝန္တေတေ၊ ရူပေသု ပန ပုညတော။
တပ္ပာကာ စ မတိယုတ္တ-ကာမပါကာ သယံ ဒသ၊
အာရုပ္ပပုညတော တေ စ၊ သကော ပါကော သယံ ပုန။
အဓောပါကာ စ အန္တမှာ၊ တတိယဉ္စ ဖလန္တိမေ၊
ဒသေကဒွိတိပဉ္စာဟိ၊ မဂ္ဂါ စေကံ သကံ ဖလံ။
လောဘမူလေကဟေတူဟိ ¶ ၊ အန္တကာမသုဘာ ဝိယ၊
သတ္တ ဒေါသဒွယာ ကာမ-ဘဝင်္ဂပေက္ခဝါ သယံ။
မဟာပါကတိဟေတူဟိ၊ သာဝဇ္ဇာ သဗ္ဗသန္ဓိယော၊
ကာမစ္စုတီဟိ သေသာဟိ၊ သာဝဇ္ဇာ ကာမသန္ဓိယော။
ကာမစ္စုတိ ¶ စ ဝေါဋ္ဌဗ္ဗံ၊ သယဉ္စ သုခတီရတော၊
ပဋိစ္ဆာ တီရဏာနိ ဒွေ၊ ဣတရာ သကတီရဏံ။
သကံ သကံ ပဋိစ္ဆံ တု၊ ဝိညာဏေဟိ ဒွိပဉ္စဟိ၊
ရူပပါကေဟိ သာဝဇ္ဇာ၊ သန္ဓိယောဟေတုဝဇ္ဇိတာ။
အရူပပါကေသွာဒိမှာ၊ ကာမပါကာ တိဟေတုကာ၊
အန္တာဝဇ္ဇမ္ပိ စာရုပ္ပ-ပါကာ စ နဝ ဟောန္တိမေ။
ဒုတိယာဒီဟိ တေယေဝ၊ အဓောပါကံ ဝိနာ ဝိနာ၊
ဖလာ တိဟေတုကာ ပါကာ၊ သယဉ္စေတိ စတုဒ္ဒသ။
ဒွိပဉ္စာဒိကြိယာ ဟာသာ၊ သယဉ္စာရုပ္ပဝဇ္ဇိတာ၊
ဉာဏယုတ္တဘဝင်္ဂါတိ၊ ဒသ ဝေါဋ္ဌဗ္ဗတော ပန။
ကာမေ ဇဝါ ဘဝင်္ဂါ စ၊ ကာမရူပေ သယမ္ပိ ဝါ၊
နဝပဉ္စ သဟေတာဒိ-ကိရိယဒွယတော ပန။
သယံ ဘဝင်္ဂမတိမာ၊ ရူပေ သာတကြိယာပိ စ၊
တပ္ပာဒကန္တိမဉ္စေတိ၊ ဗာဝီသ တတိယာ ပန။
တေ စ ပါကာ သယဉ္စန္တေ၊ ဖလံ မဇ္ဈာ မဟဂ္ဂတာ၊
ကြိယာတိ ဝီသတိ ဟောန္တိ၊ သေသဒွီဟိ ဒုကေဟိ တု။
ဝုတ္တပါကာ သယဉ္စေတိ၊ စုဒ္ဒသေဝံ ကြိယာဇဝါ၊
တဒါရမ္မဏံ မုဉ္စိတွာ၊ ပဋ္ဌာနနယတော နယေ။
အထ သာတကြိယာ သာတံ၊ သေသံ သေသကြိယာပိ စ၊
တဒါလမ္ဗံ ယထာယောဂံ၊ ဝဒေ အဋ္ဌကထာနယာ။
မဟဂ္ဂတာ ကြိယာ သဗ္ဗာ၊ သကပုညသမာ တဟိံ၊
အန္တာ ဖလန္တိမံ ဟောတိ၊ အယမေဝ ဝိသေသတာ။
ဣမဿာနန္တရာ ¶ ဓမ္မာ၊ ဧတ္တကာတိ ပကာသိတာ၊
ဣမံ ပနေတ္တကေဟီတိ၊ ဝုစ္စတေယံ နယောဓုနာ။
ဒွီဟိ ¶ ကာမဇဝါ တီဟိ၊ ရူပါရူပါ စတူဟိ တု၊
မဂ္ဂါ ဆဟိ ဖလာဒိ ဒွေ၊ သေသာ ဒွေ ပန သတ္တဟိ။
ဧကမှာ ဒသ ပဉ္စဟိ၊ ပဋိစ္ဆာ သုခတီရဏံ၊
ကာမေ ဒေါသကြိယာဟီန-ဇဝေဟိ ဂဟတော သကာ။
ကာမေ ဇဝါ ကြိယာဟီနာ၊ တဒါလမ္ဗာ သဝေါဋ္ဌဗ္ဗာ၊
သဂဟဉ္စေတိ တေတ္တိံသစိတ္တေဟိ ပရတီရဏာ။
ကာမပုညသုခီတီရကဏှဝေါဋ္ဌဗ္ဗတော ဒွယံ၊
မဟာပါကန္တိမံ ဟောတိ၊ အနာရုပ္ပစုတီဟိ စ။
သတ္တတိံသ ပနေတာနိ၊ ဧတ္ထ ဟိတွာ ဒုသဒွယံ၊
ဧတေဟိ ပဉ္စတိံသေဟိ၊ ဇာယတေ ဒုတိယဒွယံ။
သုခတီရာဒိ သတ္တေတေ၊ ကြိယတော စာပိ သမ္ဘဝါ၊
ဉေယျာ သေသာနိ စတ္တာရိ၊ ဘဝင်္ဂေန စ လဗ္ဘရေ။
မဂ္ဂဝဇ္ဇာ သဝေါဋ္ဌဗ္ဗသုခိတီရဇဝါခိလာ၊
စုတီတိ နဝကဋ္ဌာဟိ၊ တတိယဒွယမာဒိသေ။
ဧတေဟိ ဒေါသဝဇ္ဇေဟိ၊ သတ္တတီဟိတရဒွယံ၊
ရူပပါကာ ဝိနာရုပ္ပပါကာဟေတုဒုဟေတုကေ။
တေဟေဝေကူနသဋ္ဌီဟိ၊ ဟောန္တိရုပ္ပာဒိကံ ဝိနာ၊
ဟာသာဝဇ္ဇေ ဇဝေ ရူပေ၊ အဋ္ဌဆက္ကေဟိ တေဟိ တု။
သာဓောပါကေဟိ တေဟေဝ၊ ဒုတိယာဒီနိ အတ္တနာ၊
အဓောဓောဇဝဟီနေဟိ၊ ဧကေကူနေဟိ ဇာယရေ။
သုခတီရဘဝင်္ဂါနိ၊ သယဉ္စာတိ တိသတ္တဟိ၊
အန္တာဝဇ္ဇံ အနာရုပ္ပဘဝင်္ဂေဟိ ပနေတရံ။
ဝုတ္တာနန္တရသင်္ခါတော၊ နယော ဒါနိ အနေကဓာ၊
ပုဂ္ဂလာဒိပ္ပဘေဒါပိ၊ ပဝတ္တိ တဿ ဝုစ္စတေ။
ပုထုဇ္ဇနဿ ¶ ¶ ဇာယန္တေ၊ ဒိဋ္ဌိကင်္ခါယုတာနိ ဝေ၊
သေက္ခဿေဝါမလာ သတ္တ၊ အနန္တာနိတရဿ တု။
အန္တာမလံ အနာဝဇ္ဇကြိယာ စေကူနဝီသတိ၊
ကုသလာကုသလာ သေသာ၊ ဟောန္တိ သေက္ခပုထုဇ္ဇနေ။
ဣတရာနိ ပနာဝဇ္ဇဒွယံ ပါကာ စ သာသဝါ၊
တိဏ္ဏန္နမ္ပိ သိယုံ ဧဝံ၊ ပဉ္စဓာ သတ္တဘေဒတော။
ကာမေ သောဠသ ဃာနာဒိတ္တယံ ဒေါသမဟာဖလာ၊
ရူပါရူပေ သပါကောတိ၊ ပဉ္စဝီသတိ ဧကဇာ။
ကာမပါကာ စ သေသာဒိမဂ္ဂေါ အာဒိကြိယာ ဒုဝေ၊
ရူပေ ဇဝါတိ ဗာဝီသ၊ ဒွိဇာ သေသာ တိဓာတုဇာ။
ဝိတ္ထာရောပိ စ ဘူမီသု၊ ဉေယျော ကာမသုဘာသုဘံ၊
ဟာသဝဇ္ဇမဟေတုဉ္စ၊ အပါယေ သတ္တတိံသိမေ။
ဟိတွာ မဟဂ္ဂတေ ပါကေ၊ အသီတိ သေသကာမိသု၊
စက္ခုသောတမနောဓာတု၊ တီရဏံ ဝေါဋ္ဌဗ္ဗမ္ပိ စ။
ဒေါသဟီနဇဝါ သော သော၊ ပါကော ရူပေ အနာရိယေ၊
ပဉ္စသဋ္ဌိ ဆသဋ္ဌီ တု၊ ပရိတ္တာဘာဒီသု တီသု။
အာဒိပဉ္စာမလာ ကင်္ခါဒိဋ္ဌိယုတ္တေ ဝိနာ တဟိံ၊
တေယေဝ ပဉ္စပညာသ၊ ဇာယရေ သုဒ္ဓဘူမိသု။
အာဒိမဂ္ဂဒုသာဟာသရူပဟီနဇဝါ သကော၊
ပါကော ဝေါဋ္ဌဗ္ဗနဉ္စာတိ၊ တိတာလီသံ သိယုံ နဘေ။
အဓောဓောမနဝဇ္ဇာ တေ၊
ပါကော စေဝ သကော သကော၊
ဒုတိယာဒီသု ဇာယန္တေ၊
ဒွေ ဒွေ ဦနာ တတော တတော။
အရူပေသွေကမေကသ္မိံ ¶ ၊ ရူပေသွာဒိတ္တိကေပိ စ၊
တိကေ စ တတိယေ ဧကံ၊ ဒွေ ဟောန္တိ ဒုတိယတ္တိကေ။
အန္တိမံ ¶ ရူပပါကံ တု၊ ဆသု ဝေဟပ္ဖလာဒိသု၊
ကာမသုဂတိယံယေဝ၊ မဟာပါကာ ပဝတ္တရေ။
ဃာယနာဒိတ္တယံ ကာမေ၊ ပဋိဃဒွယမေဝ စ၊
သတ္တရသေသု ပဌမံ၊ အမလံ မာနဝါဒိသု။
အရိယာပါယဝဇ္ဇေသု၊ စတုရောဒိပ္ဖလာဒိကာ၊
အပါယာရုပ္ပဝဇ္ဇေသု၊ ဟာသရူပသုဘကြိယံ။
အပါယုဒ္ဓတ္တယံ ဟိတွာ၊ ဟောတာကာသသုဘကြိယံ၊
တထာပါယုဒ္ဓဒွေ ဟိတွာ၊ ဝိညာဏကုသလကြိယံ။
ဘဝဂ္ဂါပါယဝဇ္ဇေသု၊ အာကိဉ္စညသုဘကြိယံ၊
ဒိဋ္ဌိကင်္ခါယုတာ သုဒ္ဓေ၊ ဝိနာ သဗ္ဗာသု ဘူမိသု။
အမလာနိ စ တီဏန္တေ၊
ဘဝဂ္ဂေ စ သုဘကြိယာ၊
မဟာကြိယာ စ ဟောန္တေတေ၊
တေရသေဝါနပါယိသု။
အနာရုပ္ပေ မနောဓာတု၊ ဒဿနံ သဝတီရဏံ၊
ကာမေ အနိဋ္ဌသံယောဂေ၊ ဗြဟ္မာနံ ပါပဇံ ဖလံ။
ဝေါဋ္ဌဗ္ဗံ ကာမပုညဉ္စ၊ ဒိဋ္ဌိဟီနံ သဥဒ္ဓဝံ၊
စုဒ္ဒသေတာနိ စိတ္တာနိ၊ ဇာယရေ တိံသဘူမိသု။
ဣန္ဒြိယာနိ ဒုဝေ အန္တဒွယဝဇ္ဇေသွဟေတုသု၊
တီဏိ ကင်္ခေတရာဟေတုပါပေ စတ္တာရိ တေရသ။
ဆ ဉာဏဟီနေ တဗ္ဗန္တသာသဝေ သတ္တ နိမ္မလေ၊
စတ္တာလီသေ ပနဋ္ဌေဝံ၊ ဉေယျမိန္ဒြိယဘေဒတော။
ဒွေ ¶ ဗလာနိ အဟေတွန္တဒွယေ တီဏိ တု သံသယေ၊
စတ္တာရိတရပါပေ ဆ၊ ဟောန္တိ သေသဒုဟေတုကေ။
ဧကူနာသီတိစိတ္တေသု၊ မတိယုတ္တေသု သတ္တ တု၊
အဗလာနိ ဟိ သေသာနိ၊ ဝီရိယန္တံ ဗလံ ဘဝေ။
အဈာနင်္ဂါနိ ¶ ဒွေပဉ္စ၊ တက္ကန္တာ ဟိ တဒင်္ဂတာ၊
ဈာနေ ပီတိဝိရတ္တေ တ-ပ္ပာဒကေ အမလေ ဒုဝေ။
တတိယေ သာမလေ တီဏိ၊ စတ္တာရိ ဒုတိယေ တထာ၊
ကာမေ နိပ္ပီတိကေ စာပိ၊ ပဉ္စင်္ဂါနိ ဟိ သေသကေ။
မဂ္ဂါ ဒွေ သံသယေ ဒိဋ္ဌိဟီနသေသာသုဘေ တယော၊
ဒုဟေတုကေတရေ သုဒ္ဓဇ္ဈာနေ စ ဒုတိယာဒိကေ။
စတ္တာရော ပဉ္စ ပဌမဈာနကာမတိဟေတုကေ၊
သတ္တာမလေ ဒုတိယာဒိ-ဈာနိကေ အဋ္ဌ သေသကေ။
ဟေတွန္တတော ဟိ မဂ္ဂဿ၊ အမဂ္ဂင်္ဂမဟေတုကံ၊
ဆမဂ္ဂင်္ဂယုတံ နတ္ထိ၊ ဗလေဟိပိ စ ပဉ္စဟိ။
သုခိတီရတဒါလမ္ဗံ၊ ဣဋ္ဌေ ပုညဇုပေက္ခဝါ၊
ဣဋ္ဌမဇ္ဈေတရံ ဟောတိ၊ တဗ္ဗိပက္ခေ တု ဂေါစရေ။
ဒေါသဒွယာ တဒါလမ္ဗံ၊ န သုခိကြိယတော ပန၊
သဗ္ဗံ သုဘာသုဘေ နဋ္ဌေ၊ တဒါလမ္ဗဏဝါစတော။
ကြိယတော ဝါ တဒါလမ္ဗံ၊ သောပေက္ခာယ သုခီ န ဟိ၊
ဣတရာ ဣတရဉ္စေတိ၊ ဣဒံ သုဋ္ဌုပလက္ခယေ။
သန္ဓိဒါယကကမ္မေန၊ တဒါလမ္ဗပဝတ္တိယံ၊
နိယာမနံ ဇဝဿာဟ၊ ကမ္မဿေဝညကမ္မတော။
စိတ္တေ စေတသိကာ ယသ္မိံ၊
ယေ ဝုတ္တာ တေ သမာသတော၊
ဝုစ္စရေ ¶ ဒါနိ ဒွေပဉ္စေ၊
သဗ္ဗဂါ သတ္တ ဇာယရေ။
တက္ကစာရာဓိမောက္ခေဟိ၊ တေယေဝ ဇာယရေ ဒသ၊
ပဉ္စဋ္ဌာနမနောဓာတု-ပဉ္စကေ သုခတီရဏေ။
ဧတေ ပီတာဓိကာ ဟာသေ၊ ဝါယာမေန စ ဒွါဓိကာ၊
ဝေါဋ္ဌဗ္ဗနေပိ ဧတေဝ၊ ဒသေကာ ပီတိဝဇ္ဇိတာ။
ပါပသာဓာရဏာ ¶ တေ စ၊ တိပဉ္စုဒ္ဓစ္စသညုတေ၊
ကင်္ခါယုတ္တေပိ ဧတေဝ၊ သကင်္ခါ ဟီနနိစ္ဆယာ။
ကင်္ခါဝဇ္ဇာ ပနေတေဝ၊ သဒေါသစ္ဆန္ဒနိစ္ဆယာ၊
သတ္တရသ ဒုသေ ဟောန္တိ၊ သလောဘန္တဒွယေ ပန။
ဒေါသဝဇ္ဇာ သလောဘာ တေ၊
တတိယာဒိဒုကေသု တေ၊
ဒိဋ္ဌိပီတိဒွယာဓိကာ၊
ဒွိနဝေကူနဝီသတိ။
ပီတိစာရပ္ပနာဝဇ္ဇာ၊ အာဒိတော ယာဝ တိံသိမေ၊
ဥပ္ပဇ္ဇန္တိ စတုတ္ထာဒိ-ရူပါရူပမနေသု ဝေ။
ပီတိစာရဝိတက္ကေသု၊
ဧကေန ဒွိတိတိက္ကမာ၊
တတိယာဒီသု တေယေဝ၊
တိံသေကဒွေတယောဓိကာ။
ဧတေဝါဒိဒွယေ ကာမေ၊ ဒုတိယာဒိဒုကေသု ဟိ၊
မတိံ ပီတိံ မတိပ္ပီတိံ၊ ဟိတွာ တေ ကမတော သိယုံ။
ဈာနေ ဝုတ္တာဝ တဇ္ဈာနိကာမလေ ဝိရတာဓိကာ၊
တတ္ထေတာ နိယတာ ဝိတ္တိံ၊ ဝဒေ သဗ္ဗတ္ထ သမ္ဘဝါ။
ကာမပုညေသု ¶ ပစ္စေကံ၊
ဇယန္တာနိယတေသု ဟိ၊
ဝိရတီယော ဒယာမောဒါ၊
ကာမေ သာတသုဘကြိယေ။
မဇ္ဈတ္တေပိ ဝဒန္တေကေ၊ သဟေတုကသုဘကြိယေ၊
သုခဇ္ဈာနေပိ ပစ္စေကံ၊ ဟောန္တိယေဝ ဒယာမုဒါ။
ထိနမိဒ္ဓံ သသင်္ခါရေ၊ ဒိဋ္ဌိဟီနဒွယေ တဟိံ၊
မာနေန ဝါ တယော သေသဒိဋ္ဌိဟီနေ ဝိဓေကကော။
ဣဿာမစ္ဆေရကုက္ကုစ္စာ ¶ ၊ ဝိသုံ ဒေါသယုတဒွယေ၊
တတ္ထန္တကေ သိယုံ ထိနမိဒ္ဓကေန တယောပိ ဝါ။
ယေ ဝုတ္တာ ဧတ္တကာ ဧတ္ထ၊ ဣတိ စေတသိကာခိလာ၊
တတ္ထေတ္တကေသွိဒန္တေဝံ၊ ဝုစ္စတေယံ နယောဓုနာ။
တေသဋ္ဌိယာ သုခံ ဒုက္ခံ၊ တီသုပေက္ခာပိ ဝေဒနာ၊
ပဉ္စပညာသစိတ္တေသု၊ ဘဝေ ဣန္ဒြိယတော ပန။
ဧကတ္ထေကတ္ထ စေဝ ဒွေသဋ္ဌိယာ ဒွီသု ပဉ္စဟိ၊
ပညာသာယာတိ ဝိညေယျံ၊ သုခါဒိန္ဒြိယပဉ္စကံ။
ဒသုတ္တရသတေ ဟောတိ၊ နိစ္ဆယော ဝီရိယံ တတော၊
ပဉ္စဟီနေ တတောကူနေ၊ သမာဓိန္ဒြိယမာဒိသေ။
ဆန္ဒော ဧကသတေကူနဝီသ သဒ္ဓါဒယော ပန၊
ဉာဏဝဇ္ဇာ နဝဟီနသတေ ဟောန္တိ မတီ ပန။
ဧကူနာသီတိယာ စာရော၊ ဆသဋ္ဌီသု ပနပ္ပနာ၊
ပဉ္စပညာသကေ ပီတိ၊ ဧကပညာသကေ သိယာ။
ဝိရတီ ဆဋ္ဌကေ ဝီသေ၊ ကရုဏာမုဒိတာထ ဝါ၊
အဋ္ဌသောပေက္ခစိတ္တေန၊ အဋ္ဌဝီသတိယာ သိယုံ။
အဟီရိကမနောတ္တပ္ပမောဟုဒ္ဓစ္စာ ¶ ဒွါဒသေဝ၊
လောဘော အဋ္ဌသု စိတ္တေသု၊ ထိနမိဒ္ဓံ တု ပဉ္စသု။
မာနော စတူသု ဒိဋ္ဌိ စ၊ တထာ ဒွီသု မနေသု ဟိ၊
ဒေါသော ဣဿာ စ မစ္ဆေရံ၊ ကုက္ကုစ္စဉ္စ ဘဝန္တိမေ။
ဧကသ္မိံ ဝိမတီ ဟောတိ၊ ဧဝံ ဝုတ္တာနုသာရတော၊
အပ္ပဝတ္တိနယော စာပိ၊ သက္ကာ ဉာတုံ ဝိဇာနတာ။
အသ္မိံ ခန္ဓေဝ ဝိညေယျော၊ ဝေဒနာဒီသွယံ နယော၊
ဧကဓာဒိဝိဓော ယုတ္တိ-ဝသာတေနာဝိယောဂတော။
ဥပမာ ဖေဏုပိဏ္ဍော စ၊ ဗုဗ္ဗုဠော မိဂတဏှိကာ၊
ကဒလီ မာယာ ဝိညေယျာ၊ ခန္ဓာနံ တု ယထာက္ကမံ။
တေသံ ¶ ဝိမဒ္ဒါသဟနခဏသောဘပ္ပလောဘန-
နိသာရဝဉ္စကတ္တေဟိ၊ သမာနတ္တံ သမာဟဋံ။
တေ သာသဝါ ဥပါဒါနက္ခန္ဓာ ခန္ဓာဝနာသဝါ၊
တတ္ထာဒီ ဒုက္ခဝတ္ထုတ္တာ၊ ဒုက္ခာ ဘာရာ စ ခါဒကာ။
ခန္ဓာနိစ္စာဒိဓမ္မာ တေ၊ ဝဓကာ သဘယာ ဣတီ၊
အသုခဒ္ဓမ္မတော စိက္ခာ၊ ဥက္ခိတ္တာသိကရီ ယထာ။
ဣတိ သစ္စသင်္ခေပေ ဝိညာဏက္ခန္ဓပကိဏ္ဏကနယသင်္ခေပေါ နာမ
စတုတ္ထော ပရိစ္ဆေဒေါ။