📜
၅။ ပဉ္စမော ပရိစ္ဆေဒေါ
နိဗ္ဗာနပညတ္တိပရိဒီပနော
ရာဂါဒီနံ ¶ ခယံ ဝုတ္တံ၊ နိဗ္ဗာနံ သန္တိလက္ခဏံ၊
သံသာရဒုက္ခသန္တာပတတ္တဿာလံ သမေတဝေ။
ခယမတ္တံ န နိဗ္ဗာနံ၊ သဂမ္ဘီရာဒိဝါစတော၊
အဘာဝဿ ဟိ ကုမ္မာနံ၊ လောမဿေဝ န ဝါစတာ။
ခယောတိ ဝုစ္စတေ မဂ္ဂေါ၊ တပ္ပာပတ္တာ ဣဒံ ခယံ၊
အရဟတ္တံ ဝိယုပ္ပာဒ-ဝယာဘာဝါ ဓုဝဉ္စ တံ။
သင်္ခတံ သမ္မုတိဉ္စာပိ၊ ဉာဏမာလမ္ဗ နေဝ ဟိ၊
ဆိန္ဒေ မလေ တတော ဝတ္ထု၊ ဣစ္ဆိတဗ္ဗမသင်္ခတံ။
ပတ္တုကာမေန တံ သန္တိံ၊ ဆဗ္ဗိသုဒ္ဓိံ သမာဒိယ၊
ဉာဏဒဿနသုဒ္ဓီ တု၊ သာဓေတဗ္ဗာ ဟိတတ္ထိနာ။
စေတနာဒိဝိဓာ သီလ-သုဒ္ဓိ တတ္ထ စတုဗ္ဗိဓာ၊
သောပစာရသမာဓီ တု၊ စိတ္တသုဒ္ဓီတိ ဝုစ္စတေ။
သမ္ပာဒေတွာဒိဒွေသုဒ္ဓိံ၊ နမနာ နာမံ တု ရုပ္ပ-
တော ရူပံ နတ္ထိ အတ္တာဒိဝတ္ထူတိ စ ဝဝတ္ထပေ။
မဏိန္ဓနာတပေ ¶ အဂ္ဂိ၊ အသန္တောပိ သမာဂမေ၊
ယထာ ဟောတိ တထာ စိတ္တံ၊ ဝတ္ထာလမ္ဗာဒိသင်္ဂမေ။
ပင်္ဂုလန္ဓာ ယထာ ဂန္တုံ၊ ပစ္စေကမသမတ္ထကာ၊
ယန္တိ ယုတ္တာ ယထာ ဧဝံ၊ နာမရူပဝှယာ ကြိယာ။
န နာမရူပတော အညော၊ အတ္တာဒိ ဣတိ ဒဿနံ၊
သောဓနတ္တာ ဟိ ဒုဒ္ဒိဋ္ဌိံ၊ ဒိဋ္ဌိသုဒ္ဓီတိ ဝုစ္စတိ။
အဝိဇ္ဇာတဏှုပါဒါန-ကမ္မေနာဒိမှိ ¶ တံ ဒွယံ၊
ရူပံ ကမ္မာဒိတော နာမံ၊ ဝတ္ထာဒီဟိ ပဝတ္တိယံ။
သဒါ သဗ္ဗတ္ထ သဗ္ဗေသံ၊ သဒိသံ န ယတော တတော၊
နာဟေတုနာညော အတ္တာဒိနိစ္စဟေတူတိ ပဿတိ။
ဧဝံ တီရယတေ ကင်္ခါ၊ ယာယ ပညာယ ပစ္စယေ၊
ဒိဋ္ဌတ္တာ သုဒ္ဓိ သာ ကင်္ခါတရဏံ ဣတိ ဝုစ္စတိ။
ပတ္တညာတပရိညော သော၊ အတြဋ္ဌော ယတတေယတိ၊
တီရဏဝှပရိညာယ၊ ဝိသုဒ္ဓတ္ထံ သဒါဒရော။
တိကာလာဒိဝသာ ခန္ဓေ၊ သမာသေတွာ ကလာပတော၊
အနိစ္စာ ဒုက္ခာနတ္တာတိ၊ အာဒေါ ဧဝံ ဝိပဿတိ။
ခန္ဓာနိစ္စာ ခယဋ္ဌေန၊ ဘယဋ္ဌေန ဒုခါဝ တေ၊
အနတ္တာသာရကဋ္ဌေန၊ ဣတိ ပဿေ ပုနပ္ပုနံ။
အာကာရေဟိ အနိစ္စာဒိစတ္တာလီသေဟိ သမ္မသေ၊
လက္ခဏာနံ ဝိဘူတတ္ထံ၊ ခန္ဓာနံ ပန သဗ္ဗသော။
ဧဝဉ္စာပိ အသိဇ္ဈန္တေ၊ နဝဓာ နိသိတိန္ဒြိယော၊
သတ္တကဒွယတော သမ္မာ၊ ရူပါရူပေ ဝိပဿယေ။
ရူပမာဒါနနိက္ခေပါ၊ ဝယောဝုဒ္ဓတ္တဂါမိတော၊
သမ္မသေဝန္နဇာဒီဟိ၊ ဓမ္မတာရူပတောပိ စ။
နာမံ ကလာပယမတော၊ ခဏတော ကမတောပိ စ၊
ဒိဋ္ဌိမာနနိကန္တီနံ၊ ပဿေ ဥဂ္ဃာဋနာဒိတော။
အဝိဇ္ဇာတဏှာကမ္မန္န-ဟေတုတော ¶ ရူပံ ဥဗ္ဘဝေ၊
ဝိနာဟာရံ သဖဿေဟိ၊ ဝေဒနာဒိတ္တယံ ဘဝေ။
တေဟိယေဝ ဝိနာ ဖဿံ၊
နာမရူပါဓိကေဟိ တု၊
စိတ္တံ ¶ ဟေတုက္ခယာ သော သော၊
ဝေတိ ဝေ တဿ တဿ တု။
ဟေတုတောဒယနာသေဝံ၊ ခဏောဒယဝယေနပိ၊
ဣတိ ပညာသာကာရေဟိ၊ ပဿေ ပုနူဒယဗ္ဗယံ။
ယောဂိဿေဝံ သမာရဒ္ဓဥဒယဗ္ဗယဒဿိနော၊
ပါတုဘောန္တိ ဥပက္လေသာ၊ သဘာဝါ ဟေတုတောပိ စ။
တေ ဩဘာသမတုဿာဟပဿဒ္ဓိသုခုပေက္ခနာ၊
သတိ ပီတာဓိမောက္ခော စ၊ နိကန္တိ စ ဒသီရိတာ။
တဏှာဒိဋ္ဌုန္နတိဂ္ဂါဟဝတ္ထုတော တိံသဓာ တေ စ၊
တဒုပ္ပန္နေ စလေ ဗာလော၊ အမဂ္ဂေ မဂ္ဂဒဿကော။
ဝိပဿနာ ပထောက္ကန္တာ၊ တဒါသိ မတိမာဓုနာ၊
န မဂ္ဂေါ ဂါဟဝတ္ထုတ္တာ၊ တေသံ ဣတိ ဝိပဿတိ။
ဥပက္လေသေ အနိစ္စာဒိ-ဝသဂေ သောဒယဗ္ဗယေ၊
ပဿတော ဝီထိနောက္ကန္တဒဿနံ ဝုစ္စတေ ပထော။
မဂ္ဂါမဂ္ဂေ ဝဝတ္ထေတွာ၊ ယာ ပညာ ဧဝမုဋ္ဌိတာ၊
မဂ္ဂါမဂ္ဂိက္ခသင်္ခါတာ၊ သုဒ္ဓိ သာ ပဉ္စမီ ဘဝေ။
ပဟာနဝှပရိညာယ၊ အာဒိတော သုဒ္ဓိသိဒ္ဓိယာ၊
တီရဏဝှပရိညာယ၊ အန္တဂေါ ယတတေဓုနာ။
ဇာယတေ နဝဉာဏီ သာ၊ ဝိသုဒ္ဓိ ကမတောဒယ-
ဗ္ဗယာဒီ ဃဋမာနဿ၊ နဝ ဟောန္တိ ပနေတ္ထ ဟိ။
သန္တတီရိယတော စေဝ၊ ဃနေနာပိ စ ဆန္နတော၊
လက္ခဏာနိ န ခါယန္တေ၊ သံကိလိဋ္ဌာ ဝိပဿနာ။
တတောတြ ¶ သမ္မသေ ဘိယျော၊ ပုနဒေဝုဒယဗ္ဗယံ၊
တေနာနိစ္စာဒိသမ္ပဿံ၊ ပဋုတံ ပရမံ ဝဇေ။
အာဝဋ္ဋေတွာ ¶ ယဒုပ္ပာဒဋ္ဌိတိအာဒီဟိ ပဿတော၊
ဘင်္ဂေဝ တိဋ္ဌတေ ဉာဏံ၊ တဒါ ဘင်္ဂမတီ သိယာ။
ဧဝံ ပဿယတော ဘင်္ဂံ၊ တိဘဝေါ ခါယတေ ယဒါ၊
သီဟာဒိဝ ဘယံ ဟုတွာ၊ သိယာ လဒ္ဓါ ဘယိက္ခဏာ။
သာဒီနဝါ ပတိဋ္ဌန္တေ၊ ခန္ဓာဒိတ္တဃရံ ဝိယ၊
ယဒါ တဒါ သိယာ လဒ္ဓါ၊ အာဒီနဝါနုပဿနာ။
သင်္ခါရာဒီနဝံ ဒိသွာ၊ ရမတေ န ဘဝါဒိသု၊
မတိ ယဒါ တဒါ လဒ္ဓါ၊ သိယာ နိဗ္ဗိဒပဿနာ။
ဉာဏံ မုစ္စိတုကာမံ တေ၊ သဗ္ဗဘူသင်္ခတေ ယဒါ၊
ဇာလာဒီဟိ စ မစ္ဆာဒီ၊ တဒါ လဒ္ဓါ စဇ္ဇမတိ။
သင်္ခါရေ အသုဘာနိစ္စဒုက္ခတောနတ္တတော မတိ၊
ပဿန္တီ စတ္တုမုဿုက္ကာ၊ ပဋိသင်္ခါနုပဿနာ။
ဝုတ္တာတြ ပဋုဘာဝါယ၊ သဗ္ဗဉာဏပဝတ္တိယာ၊
မီနသညာယ သပ္ပဿ၊ ဂါဟလုဒ္ဒသမောပမာ။
အတ္တတ္တနိယတော သုညံ၊ ဒွိဓာ ‘‘နာဟံ ကွစာ’’ဒိနာ၊
စတုဓာ ဆဗ္ဗိဓာ စာပိ၊ ဗဟုဓာ ပဿတော ဘုသံ။
အာဝဋ္ဋတိဂ္ဂိမာသဇ္ဇ၊
နှာရူဝ မတိ သင်္ခတံ၊
စတ္တဘရိယော ယထာ ဒေါသေ၊
တထာ တံ သမုပေက္ခတေ။
တာဝ သာဒီနဝါနမ္ပိ၊ လက္ခဏေ တိဋ္ဌတေ မတိ၊
န ပဿေ ယာဝ သာ တီရံ၊ သာမုဒ္ဒသကုဏီ ယထာ။
သင်္ခါရုပေက္ခာဉာဏာယံ၊ သိခါပတ္တာ ဝိပဿနာ၊
ဝုဋ္ဌာနဂါမိနီတိ စ၊ သာနုလောမာတိ ဝုစ္စတိ။
ပတွာ ¶ ¶ မောက္ခမုခံ သတ္တ၊ သာဓေတိရိယပုဂ္ဂလေ၊
ဈာနင်္ဂါဒိပ္ပဘေဒေ စ၊ ပါဒကာဒိဝသေန သာ။
အနိစ္စတော ဟိ ဝုဋ္ဌာနံ၊ ယဒိ ယဿာသိ ယောဂိနော၊
သောဓိမောက္ခဿ ဗာဟုလ္လာ၊ တိက္ခသဒ္ဓိန္ဒြိယော ဘဝေ။
ဒုက္ခတောနတ္တတော တဉ္စေ၊ သိယာ ဟောန္တိ ကမေန တေ၊
ပဿဒ္ဓိဝေဒဗာဟုလ္လာ၊ တိက္ခေကဂ္ဂမတိန္ဒြိယာ။
ပညာဓုရတ္တမုဒ္ဒိဋ္ဌံ၊ ဝုဋ္ဌာနံ ယဒိနတ္တတော၊
သဒ္ဓါဓုရတ္တံ သေသေဟိ၊ တံ ဝိယာဘိနိဝေသတော။
ဒွေ တိက္ခသဒ္ဓသမထာ၊ သိယုံ သဒ္ဓါနုသာရိနော၊
အာဒေါ မဇ္ဈေသု ဌာနေသု၊ ဆသု သဒ္ဓါဝိမုတ္တကာ။
ဣတရော ဓမ္မာနုသာရီဒေါ၊ ဒိဋ္ဌိပ္ပတ္တော အနန္တကေ၊
ပညာမုတ္တောဘယတ္ထန္တေ၊ အဈာနိဈာနိကာ စ တေ။
တိက္ခသဒ္ဓဿ စန္တေပိ၊ သဒ္ဓါမုတ္တတ္တမီရိတံ၊
ဝိသုဒ္ဓိမဂ္ဂေ မဇ္ဈဿ၊ ကာယသက္ခိတ္တမဋ္ဌသု။
ဝုတ္တံ မောက္ခကထာယံ ယံ၊ တိက္ခပညာရဟဿ တု၊
ဒိဋ္ဌိပတ္တတ္တံ ဟေတဉ္စ၊ တဉ္စ နတ္ထာဘိဓမ္မိကေ။
တေ သဗ္ဗေ အဋ္ဌမောက္ခာနံ၊ လာဘီ စေ ဆသု မဇ္ဈသု၊
ကာယသက္ခီ သိယုံ အန္တေ၊ ဥဘတောဘာဂမုတ္တကာ။
အနုလောမာနိ စတ္တာရိ၊ တီဏိ ဒွေ ဝါ ဘဝန္တိ ဟိ၊
မဂ္ဂဿ ဝီထိယံ မန္ဒမဇ္ဈတိက္ခမတိဗ္ဗသာ။
ဝိသုဒ္ဓိမဂ္ဂေ စတ္တာရိ၊ ပဋိသိဒ္ဓါနိ သဗ္ဗထာ၊
ဧဝမဋ္ဌသာလိနိယာ၊ ဝုတ္တတ္တာ ဧဝမီရိတံ။
ဘဝင်္ဂါသန္နဒေါသောပိ၊ နပ္ပနာယ ထိရတ္တတော၊
သုဒ္ဓိံ ပဋိပဒါဉာဏဒဿနေဝံ လဘေ ယတိ။
အာဝဇ္ဇံ ¶ ¶ ဝိယ မဂ္ဂဿ၊ ဆဋ္ဌသတ္တမသုဒ္ဓိနံ၊
အန္တရာ သန္တိမာရဗ္ဘ၊ တေဟိ ဂေါတြဘု ဇာယတေ။
သံယောဇနတ္တယစ္ဆေဒီ၊ မဂ္ဂေါ ဥပ္ပဇ္ဇတေ တတော၊
ဖလာနိ ဧကံ ဒွေ တီဏိ၊ တတော ဝုတ္တမတိက္ကမာ။
တထာ ဘာဝယတော ဟောတိ၊ ရာဂဒေါသတနူကရံ၊
ဒုတိယော တပ္ဖလံ တမှာ၊ သကဒါဂါမိ တပ္ဖလီ။
ဧဝံ ဘာဝယတော ရာဂဒေါသနာသကရုဗ္ဘဝေ၊
တတိယော တပ္ဖလံ တမှာ၊ တပ္ဖလဋ္ဌောနာဂါမိကော။
ဧဝံ ဘာဝယတော သေသဒေါသနာသကရုဗ္ဘဝေ၊
စတုတ္ထော တပ္ဖလံ တမှာ၊ အရဟာ တပ္ဖလဋ္ဌကော။
ကတကိစ္စော ဘဝစ္ဆေဒေါ၊ ဒက္ခိဏေယျောပဓိက္ခယာ၊
နိဗ္ဗုတိံ ယာတိ ဒီပေါဝ၊ သဗ္ဗဒုက္ခန္တသညိတံ။
ဧဝံ သိဒ္ဓါ သိယာ သုဒ္ဓိ၊ ဉာဏဒဿနသညိတာ၊
ဝုတ္တံ ဧတ္တာဝတာ သစ္စံ၊ ပရမတ္ထံ သမာသတော။
သစ္စံ သမ္မုတိ သတ္တာဒိအဝတ္ထု ဝုစ္စတေ ယတော၊
န လဗ္ဘာလာတစက္ကံဝ၊ တံ ဟိ ရူပါဒယော ဝိနာ။
တေန တေန ပကာရေန၊ ရူပါဒိံ န ဝိဟာယ တု၊
တထာ တထာဘိဓာနဉ္စ၊ ဂါဟဉ္စ ဝတ္တတေ တတော။
လဗ္ဘတေ ပရိကပ္ပေန၊ ယတော တံ န မုသာ တတော၊
အဝုတ္တာလမ္ဗမိစ္စာဟု၊ ပရိတ္တာဒီသွဝါစတော။
ပါပကလျာဏမိတ္တောယံ၊ သတ္တောတိ ခန္ဓသန္တတိ၊
ဧကတ္တေန ဂဟေတွာန၊ ဝေါဟရန္တီဓ ပဏ္ဍိတာ။
ပထဝါဒိ ဝိယေကောပိ၊ ပုဂ္ဂလော န ယတော တတော၊
ကုဒိဋ္ဌိဝတ္ထုဘာဝေန၊ ပုဂ္ဂလဂ္ဂဟဏံ ဘဝေ။
ဧတံ ¶ ဝိသယတော ကတွာ၊ သင်္ခါဒီဟိ ပဒေဟိ တု၊
အဝိဇ္ဇမာနပညတ္တိ၊ ဣတိ တညူဟိ ဘာသိတာ။
ပညတ္တိ ¶ ဝိဇ္ဇမာနဿ၊ ရူပါဒိဝိသယတ္တတော၊
ကာယံ ပညတ္တိ စေ သုဋ္ဌု၊ ဝဒတော သုဏ သစ္စတော။
သဝိညတ္တိဝိကာရော ဟိ၊ သဒ္ဒေါ သစ္စဒွယဿ တု၊
ပညာပနတ္တာ ပညတ္တိ၊ ဣတိ တညူဟိ ဘာသိတာ။
ပစ္စုပ္ပန္နာဒိအာလမ္ဗံ၊ နိရုတ္တိပဋိသမ္ဘိဒါ-
ဉာဏဿာတိ ဣဒဉ္စေဝံ၊ သတိ ယုဇ္ဇတိ နာညထာ။
သဒ္ဒါဘိဓေယျသင်္ခါဒိ၊ ဣတိ စေ သဗ္ဗဝတ္ထုနံ၊
ပညာပေတဗ္ဗတော ဟောတိ၊ ပညတ္တိပဒသင်္ဂဟော။
‘‘သဗ္ဗေ ပညတ္တိဓမ္မာ’’တိ၊ ဒေသေတဗ္ဗံ တထာ သတိ၊
အထ ပညာပနဿာပိ၊ ပညာပေတဗ္ဗဝတ္ထုနံ။
ဝိဘာဂံ ဉာပနတ္ထံ ဟိ၊ တထုဒ္ဒေသော ကတောတိ စေ၊
န ကတ္တဗ္ဗံ ဝိသုံ တေန၊ ပညတ္တိပထသင်္ဂဟံ။
ပညာပိယတ္တာ စတူဟိ၊ ပညတ္တာဒိပဒေဟိ သာ၊
ပရေဟိ ပညာပနတ္တာ၊ ဣတိ အာစရိယာဗြဝုံ။
ရူပါဒယော ဥပါဒါယ၊ ပညာပေတဗ္ဗတော ကိရ၊
အဝိဇ္ဇမာနောပါဒါယပညတ္တိ ပဌမာ တတော။
သောတဝိညာဏသန္တာနာနန္တရံ ပတ္တဇာတိနာ၊
ဂဟိတပုဗ္ဗသင်္ကေတမနောဒွါရိကစေတသာ။
ပညာပေန္တိ ဂဟိတာယ၊ ယာယ သတ္တရထာဒယော၊
ဣတိ သာ နာမပညတ္တိ၊ ဒုတိယာတိ စ ကိတ္တိတာ။
သဒ္ဒတော အညနာမာဝဗောဓေနတ္ထာဝဗောဓနံ၊
ကိစ္ဆသာဓနတော ပုဗ္ဗနယော ဧဝ ပသံသိယော။
သာ ¶ ဝိဇ္ဇမာနပညတ္တိ၊ တထာ အဝိဇ္ဇမာနတာ၊
ဝိဇ္ဇမာနေန စာဝိဇ္ဇမာနာ တဗ္ဗိပရီတကာ။
အဝိဇ္ဇမာနေန ဝိဇ္ဇမာနတဗ္ဗိပရီတကာ၊
ဣစ္စေတာ ဆဗ္ဗိဓာ တာသု၊ ပဌမာ မတိအာဒိကာ။
သတ္တော ¶ သဒ္ဓါ နရုဿာဟော၊
သေနိယော မနစေတနာ၊
ဣစ္စေဝမေတာ ဝိညေယျာ၊
ကမတော ဒုတိယာဒိကာ။
ဧဝံ လက္ခဏတော ဉတွာ၊
သစ္စဒွယမသင်္ကရံ၊
ကာတဗ္ဗော ပန ဝေါဟာရော၊
ဝိညူဟိ န ယထာ တထာတိ။
ဣတိ သစ္စသင်္ခေပေ နိဗ္ဗာနပညတ္တိပရိဒီပနော နာမ
ပဉ္စမော ပရိစ္ဆေဒေါ။
သစ္စသင်္ခေပေါ နိဋ္ဌိတော။