📜
၈။ အဋ္ဌမော ပရိစ္ဆေဒေါ
ပကိဏ္ဏကနိဒ္ဒေသော
ဣဒါနိ ¶ ¶ ပန သဗ္ဗေသံ၊ ဧတေသံ မာနသံ မယာ၊
ပါဋဝတ္ထာယ ဘိက္ခူနံ၊ ကထီယတိ ပကိဏ္ဏကံ။
ပန္ထမက္ကဋကော နာမ၊ ဒိသာသု ပန ပဉ္စသု၊
တတ္ထ သုတ္တံ ပသာရေတွာ၊ ဇာလမဇ္ဈေ နိပဇ္ဇတိ။
ပဌမာယ ဒိသာယေတ္ထ၊ သုတ္တေ ပန ပသာရိတေ၊
ပါဏကေန ပဋင်္ဂေန၊ ဃဋ္ဋိတေ မက္ခိကာယ ဝါ။
နိပန္နဋ္ဌာနတော ကိဉ္စိ၊ စလိတွာ ဥဏ္ဏနာဘိ တု၊
ဂန္တွာ သုတ္တာနုသာရေန၊ ယူသံ ပိဝတိ တဿ သာ။
ပုနာဂန္တွာန တတ္ထေဝ၊ နိပဇ္ဇတိ ယထာသုခံ၊
ဧဝမေဝ ကရောတေဝ၊ ဒိသာသု ဒုတိယာဒိသု။
ပသာဒါ ¶ ပဉ္စ ဒဋ္ဌဗ္ဗာ၊ သုတ္တံ ပဉ္စဒိသာသွိဝ၊
စိတ္တံ ပန စ ဒဋ္ဌဗ္ဗံ၊ မဇ္ဈေ မက္ကဋကော ဝိယ။
ပါဏကာဒီဟိ သုတ္တဿ၊ တဿ သင်္ဃဋ္ဋနာ ဝိယ၊
ပသာဒါနံ တု ဒဋ္ဌဗ္ဗာ၊ ဃဋ္ဋနာရမ္မဏေန ဟိ။
စလနံ ဝိယ တံမဇ္ဈေ၊ နိပန္နာယုဏ္ဏနာဘိယာ၊
ပသာဒဃဋ္ဋနံ တတ္ထ၊ ဂဟေတွာရမ္မဏံ ပန။
မနောဓာတုကြိယာစိတ္တံ၊ ဘဝင်္ဂါဝဋ္ဋနံ မတံ၊
တဿာ သုတ္တာနုသာရံဝ၊ ဝီထိစိတ္တပဝတ္တနံ။
သီသေ ပနဿ ဝိဇ္ဈိတွာ၊ ယူသပါနံဝ စေတသော၊
အာရမ္မဏေသု ဒဋ္ဌဗ္ဗံ၊ ဇဝနဿ ပဝတ္တနံ။
ပုနာဂန္တွာ ¶ ယထာ သုတ္တ-ဇာလမဇ္ဈေ နိပဇ္ဇနံ၊
ဝတ္ထုံယေဝ စ နိဿာယ၊ စိတ္တဿ ပရိဝတ္တနံ။
ဣဒံ တု ပန ဩပမ္မံ၊ အတ္ထံ ဒီပေတိ ကိံ တု ဟိ၊
အာရမ္မဏေန ပဌမံ၊ ပသာဒေ ဃဋ္ဋိတေ ပန။
ပသာဒဝတ္ထုတော စိတ္တာ၊ ဝတ္ထုသန္နိဿိတံ မနော၊
တတော ဟိ ပဌမံယေဝ၊ ဇာယတီတိ ဟိ ဒီပိတံ။
ဧကေကာရမ္မဏံ ¶ ဒွီသု၊ ဒွီသု ဒွါရေသု သဗ္ဗသော၊
အာဂစ္ဆတိ တေနာပါထံ၊ အယမတ္ထောပိ ဒီပိတော။
ရူပံ စက္ခုပသာဒမှိ၊ ဃဋ္ဋိတွာ တင်္ခဏေ ပန၊
မနောဒွါရေ တထာပါထ-မာဂစ္ဆတိ နိသံသယော။
ခဂေါ ယထာ ဟိ ရုက္ခဂ္ဂေ၊ နိလီယန္တောဝ သာခိနော၊
သာခံ ဃဋ္ဋေတိ တဿီဓ၊ ဆာယာ ဖရတိ ဘူမိယံ။
သာခါယ ¶ ဃဋ္ဋနစ္ဆာယာ၊ ဖရဏာနိ စ သဗ္ဗသော၊
အပုဗ္ဗာစရိမံ ဧက-က္ခဏသ္မိံယေဝ ဇာယရေ။
ဧဝမေဝ စ ရူပဿ၊ ပသာဒဿ စ ဃဋ္ဋနံ၊
ဘဝင်္ဂစလနဿာပိ၊ ပစ္စယတ္တေန အတ္ထတော။
တထေဝ စ မနောဒွါရေ၊ အာပါထဂမနမ္ပိ စ၊
အပုဗ္ဗာစရိမံ ဧက-က္ခဏသ္မိံယေဝ ဟောတိတိ။
တတော ဘဝင်္ဂံ ဆိန္ဒိတွာ၊ စက္ခုဒွါရေ ယထာက္ကမံ၊
အာဝဇ္ဇနေ သမုပ္ပန္နေ၊ ဒဿနေ သမ္ပဋိစ္ဆနေ။
သန္တီရဏေ သမုပ္ပန္နေ၊ တတော ဝေါဋ္ဌဗ္ဗနေပိ စ၊
ကုသလံ ဇဝနံ စိတ္တံ၊ တထာကုသလမေဝ ဝါ။
ဧသော ဧဝ နယော သောတ-ဒွါရာဒီသုပိ ဝိညုနာ၊
အဝိသေသေန ဝိညေယျော၊ သဒ္ဒါဒီနံ တု ဃဋ္ဋနေ။
ဒေါဝါရိကောပမာဒီနိ ¶ ၊ ဧတဿတ္ထဿ ဒီပနေ၊
ဥဒ္ဓရိတွာန တာနေတ္ထ၊ ဒဿေတဗ္ဗာနိ ဝိညုနာ။
အသမ္ဘေဒေန စက္ခုဿ၊ ရူပါပါထဂမေန စ၊
အာလောကနိဿယေနာပိ၊ သမနက္ကာရဟေတုနာ။
ပစ္စယေဟိ ပနေတေဟိ၊ သမေတေဟိ စတူဟိပိ၊
ဇာယတေ စက္ခုဝိညာဏံ၊ သမ္ပယုတ္တေဟိ တံ သဟ။
အသမ္ဘေဒေန သောတဿ၊ သဒ္ဒါပါထဂမေန စ၊
အာကာသနိဿယေနာပိ၊ သမနက္ကာရဟေတုနာ။
ပစ္စယေဟိ ပနေတေဟိ၊ သမေတေဟိ စတူဟိပိ၊
ဇာယတေ သောတဝိညာဏံ၊ သမ္ပယုတ္တေဟိ တံ သဟ။
အသမ္ဘေဒေန ¶ ဃာနဿ၊ ဂန္ဓာပါထဂမေန စ၊
ဝါယောသန္နိဿယေနာပိ၊ သမနက္ကာရဟေတုနာ။
ပစ္စယေဟိ ပနေတေဟိ၊ သမေတေဟိ စတူဟိပိ၊
ဇာယတေ ဃာနဝိညာဏံ၊ သမ္ပယုတ္တေဟိ တံ သဟ။
အသမ္ဘေဒေန ဇိဝှာယ၊ ရသာပါထဂမေန စ၊
အာပေါသန္နိဿယေနာပိ၊ သမနက္ကာရဟေတုနာ။
ပစ္စယေဟိ ပနေတေဟိ၊ သမေတေဟိ စတူဟိပိ၊
ဇာယတေ ဇိဝှာဝိညာဏံ၊ သမ္ပယုတ္တေဟိ တံ သဟ။
အသမ္ဘေဒေန ¶ ကာယဿ၊ ဖောဋ္ဌဗ္ဗာပါထသင်္ဂမာ၊
ပထဝီနိဿယေနာပိ၊ သမနက္ကာရဟေတုနာ။
ပစ္စယေဟိ ပနေတေဟိ၊ သမေတေဟိ စတူဟိပိ၊
ဇာယတေ ကာယဝိညာဏံ၊ သမ္ပယုတ္တေဟိ တံ သဟ။
အသမ္ဘေဒါ မနဿာပိ၊ ဓမ္မာပါထဂမေန စ၊
ဝတ္ထုသန္နိဿယေနာပိ၊ သမနက္ကာရဟေတုနာ။
ပစ္စယေဟိ ¶ ပနေတေဟိ၊ သမေတေဟိ စတူဟိပိ၊
မနောဝိညာဏမေဝံ တု၊ သမ္ပယုတ္တေဟိ ဇာယတေ။
မနော ဘဝင်္ဂစိတ္တန္တိ၊ ဝေဒိတဗ္ဗံ ဝိဘာဝိနာ၊
အာဝဇ္ဇနကြိယာစိတ္တံ၊ သမနက္ကာရောတိ သညိတံ။
ဝတ္ထုသန္နိဿယေနာတိ၊ နာယံ သဗ္ဗတ္ထ ဂစ္ဆတိ၊
ဘဝံ တု ပဉ္စဝေါကာရံ၊ သန္ဓာယ ကထိတော ပန။
ပဋိသန္ဓာဒိစိတ္တာနိ၊ သဗ္ဗာနေကူနဝီသတိ၊
ကာမေ ဒသ စ ရူပေသု၊ ပဉ္စ စတ္တာရိရူပိသု။
ကမ္မံ ¶ ကမ္မနိမိတ္တဉ္စ၊ တထာ ဂတိနိမိတ္တကံ၊
ဣဒံ ဟိ တိဝိဓံ တေသံ၊ အာရမ္မဏမုဒီရိတံ။
ကာမာဝစရသန္ဓီနံ၊ ပရိတ္တာရမ္မဏံ မတံ၊
ပစ္စုပ္ပန္နမတီတံ ဝါ၊ ဟောတိ နတ္ထိ အနာဂတံ။
အဋ္ဌေဝ စ မဟာပါကာ၊ တီဏိ သန္တီရဏာနိ စ၊
ဧကာဒသဝိဓံ စိတ္တံ၊ တဒါရမ္မဏသညိတံ။
ဧကာဒသဝိဓေ စိတ္တေ၊ တဒါရမ္မဏသညိတေ၊
ဒသ ပုညဝိပါကာနိ၊ ဧကံ ဟောတိ အပုညဇံ။
မဟာပါကာ န ဇာယန္တေ၊ ရူပါရူပဘဝဒွယေ၊
ကာမေ ရူပေ ဘဝေ စေဝ၊ ဟောတိ သန္တီရဏတ္တယံ။
တဒါရမ္မဏစိတ္တာနိ၊ ယာနိ ဝုတ္တာနိ သတ္ထုနာ၊
တေသု စိတ္တံ ပနေကမ္ပိ၊ ရူပါရူပဘဝဒွယေ။
န တဒါရမ္မဏံ ဟုတွာ၊ ပဝတ္တတိ ကဒါစိပိ၊
ကသ္မာ န ဟောတိ စေ တတ္ထ၊ ဗီဇဿာဘာဝတော ပန။
ပဋိသန္ဓိဗီဇံ နတ္ထေတ္ထ၊ ကာမာဝစရသညိတံ၊
ရူပါဒိဂေါစရေ တဿ၊ ဘဝေယျ ဇနကံ တု ယံ။
စက္ခုဝိညာဏကာဒီနံ ¶ ၊ နတ္ထိတာပဇ္ဇတီတိ စေ၊
နိန္ဒြိယာနံ ပဝတ္တာနု-ဘာဝတော စိတ္တသမ္ဘဝေါ။
ဧကန္တေန ယထာ စေတံ၊ တဒါရမ္မဏမာနသံ၊
နပ္ပဝတ္တတိ သဗ္ဗမ္ပိ၊ ရူပါရူပဘဝဒွယေ။
အကာမာဝစရဓမ္မေပိ၊ တဒေတံ နာနုဗန္ဓတိ၊
ကသ္မာ အဇနကတ္တာ ဟိ၊ ဇနကဿာသမာနတော။
ဇနကံ ¶ တေန တုလျံ ဝါ၊ ကာမာဝစရသညိတံ၊
ကုသလာကုသလာဒိံ တု၊ ဇဝနံ အနုဗန္ဓတိ။
ကာမာဝစရဓမ္မာပိ ¶ ၊ ယေ မဟဂ္ဂတဂေါစရာ၊
ဟုတွာ ဝတ္တန္တိ တေ စာပိ၊ ဣဒံ နေဝါနုဗန္ဓတိ။
ပရိတ္တာရမ္မဏတ္တာ စ၊ ဧကန္တေန ပနဿ ဟိ၊
တထာပရိစိတတ္တာ စ၊ နာနုဗန္ဓတိ သဗ္ဗဒါ။
ကိံ တေန ယုတ္တိဝါဒေန၊ ဝုတ္တံ အဋ္ဌကထာသု ဟိ၊
တဒါရမ္မဏစိတ္တာနိ၊ ဧကာဒသပိ သဗ္ဗသော။
နာမဂေါတ္တံ ပနာရဗ္ဘ၊ ဇဝနေ ဇဝိတေပိ စ၊
တဒါရမ္မဏံ န ဂဏှန္တိ၊ ရူပါရူပဘဝေသု ဝါ။
ယဒါ ပညတ္တိမာရဗ္ဘ၊ ဇဝနေ ဇဝိတေပိ ဝါ၊
တထာ ဝိပဿနာယာပိ၊ လက္ခဏာရမ္မဏာယ စ။
တဒါရမ္မဏာ န လဗ္ဘန္တိ၊ မိစ္ဆတ္တနိယတေသုပိ၊
န လောကုတ္တရဓမ္မေပိ၊ အာရဗ္ဘ ဇဝနေ ဂတေ။
တထာ မဟဂ္ဂတေ ဓမ္မေ၊ အာရဗ္ဘ ဇဝနေ ပန၊
ပဋိသမ္ဘိဒါဉာဏာနိ၊ အာရဗ္ဘ ဇဝိတေပိ စ။
မနောဒွါရေပိ သဗ္ဗေသံ၊ ဇဝနာနမနန္တရံ၊
တဒါရမ္မဏစိတ္တာနိ၊ ဘဝန္တိ အနုပုဗ္ဗတော။
န ¶ ဝိဇ္ဇတိ မနောဒွါရေ၊ ဃဋ္ဋနာရမ္မဏဿ ဟိ၊
ကထံ ဘဝင်္ဂတော ဟောတိ၊ ဝုဋ္ဌာနံ ပန စေတသော။
မနောဒွါရေပိ အာပါထ-မာဂစ္ဆန္တေဝ ဂေါစရာ၊
ဃဋ္ဋနာယ ဝိနာ တသ္မာ၊ စိတ္တာနံ ဟောတိ သမ္ဘဝေါ။
ဒွါဒသာပုညစိတ္တာနံ ¶ ၊ ဝိပါကာ သတ္တသတ္တတိ၊
ဘဝန္တိ စတုရာသီတိ၊ ပါပပါကာ ပဝတ္တိယံ။
ဧကာဒသဝိဓာနံ တု၊ ဟိတွာ ဥဒ္ဓစ္စမာနသံ၊
ဧကာဒသဝိဓာ စေဝ၊ ဘဝန္တိ ပဋိသန္ဓိယော။
ကြိယစိတ္တေသု သဗ္ဗေသု၊ ဇဝနံ န စ ဟောတိ ယံ၊
တံ ဝေ ကရဏမတ္တတ္တာ၊ ဝါတပုပ္ဖသမံ မတံ။
ဇဝနတ္တံ တု သမ္ပတ္တံ၊ ကိစ္စသာဓနတော ပန၊
ဆိန္နမူလဿ ရုက္ခဿ၊ ပုပ္ဖံဝ အဖလံ သိယာ။
ပဋိစ္စ ပန ဧတသ္မာ၊ ဖလမေတီတိ ပစ္စယော၊
ယော ဓမ္မော ယဿ ဓမ္မဿ၊ ဌိတိယုပ္ပတ္တိယာပိ ဝါ။
ဥပကာရော ဟိ သော တဿ၊ ပစ္စယောတိ ပဝုစ္စတိ၊
သမ္ဘဝေါပဘဝေါ ဟေတု၊ ကာရဏံ ပစ္စယော မတော။
လောဘာဒိ ပန ယော ဓမ္မော၊ မူလဋ္ဌေနုပကာရကော၊
ဟေတူတိ ပန သော ဓမ္မော၊ ဝိညာတဗ္ဗော ဝိဘာဝိနာ။
လောဘော ဒေါသော စ မောဟော စ၊
တထာလောဘာဒယော တယော၊
ဆဠေဝ ဟေတုယော ဟောန္တိ၊
ဇာတိတော နဝဓာ သိယုံ။
ဓမ္မာနံ ကုသလာဒီနံ၊ ကုသလာဒိတ္တသာဓကော၊
မူလဋ္ဌောတိ ဝဒန္တေဝံ၊ ဧကေ အာစရိယာ ပန။
ဧဝံ ¶ ¶ သန္တေ တု ဟေတူနံ၊ တံသမုဋ္ဌာနရူပိသု၊
ဟေတုပစ္စယတာ နေဝ၊ သမ္ပဇ္ဇတိ ကဒါစိပိ။
န ဟိ တေ ပန ရူပါနံ၊ သာဓေန္တိ ကုသလာဒိကံ၊
န တေသံ ပန ရူပါနံ၊ ပစ္စယာ န စ ဟောန္တိ တေ။
တသ္မာ ¶ ဟိ ကုသလာဒီနံ၊ ကုသလာဒိတ္တသာဓကော၊
မူလဋ္ဌောတိ န ဂန္တဗ္ဗော၊ ဝိညုနာ သမယညုနာ။
သုပ္ပတိဋ္ဌိတဘာဝဿ၊ သာဓနေနုပကာရကော၊
မူလဋ္ဌောတိ စ ဟေတူနံ၊ ဝိညာတဗ္ဗော ဝိဘာဝိနာ။
ကုသလာကုသလာ ဟေတူ၊ ကြိယာဟေတူ စ သဗ္ဗသော၊
ဓမ္မာနံ သမ္ပယုတ္တာနံ၊ တံသမုဋ္ဌာနရူပိနံ။
ဟေတုပစ္စယတံ ယာတာ၊ ပဉ္စဝေါကာရဘူမိယံ၊
သမ္ပယုတ္တာနမေဝေတေ၊ စတုဝေါကာရဘူမိယံ။
ကာမေ ဝိပါကဟေတူပိ၊ ကာမာဝစရဘူမိယံ၊
အတ္တနာ သမ္ပယုတ္တာနံ၊ ပဋိသန္ဓိက္ခဏေ ပန။
ကဋတ္တာရူပဇာတာနံ၊ တထေဝ စ ပဝတ္တိယံ၊
စိတ္တဇာနဉ္စ ရူပါနံ၊ ဟေတုပစ္စယတံ ဂတာ။
ရူပေ ဝိပါကဟေတု စ၊ ရူပါဝစရဘူမိယံ၊
တထာ ဝုတ္တပ္ပကာရာနံ၊ ဟောန္တိ တေ ဟေတုပစ္စယာ။
ဟေတုယော ပဉ္စဝေါကာရေ၊ လောကုတ္တရဝိပါကဇာ၊
စိတ္တဇာနဉ္စ ရူပါနံ၊ သမ္ပယုတ္တာနမေဝ စ။
တေ ဟေတုပစ္စယာ ဟောန္တိ၊ စတုဝေါကာရဘူမိယံ၊
ဘဝန္တိ သမ္ပယုတ္တာနံ၊ ဣတရေ စ သဘူမိယံ။
ဟေတုတ္ထော ဟေတုယော စေဝ၊ ဟေတုပစ္စယသမ္ဘဝေါ၊
ဧဝမေဝ စ ဝိညေယျော၊ သဉ္ဇာတသုခဟေတုနာ။
ဆန္ဒော ¶ စိတ္တဉ္စ ဝီရိယံ၊ ဝီမံသာ စာတိ သတ္ထုနာ၊
လောကာဓိပတိနာ ဝုတ္တာ၊ စတုဓာဓိပတီ သိယုံ။
ဆန္ဒံ ¶ တု ဇေဋ္ဌကံ ကတွာ၊ ဆန္ဒံ ကတွာ ဓုရံ ပန၊
စိတ္တဿုပ္ပတ္တိကာလသ္မိံ၊ ဆန္ဒာဓိပတိ နာမသော။
ဧသေဝ စ နယော ဉေယျော၊ သေသေသုပိ စ တီသုပိ၊
အဓိပ္ပတီတိ နိဒ္ဒိဋ္ဌော၊ ဇေဋ္ဌဋ္ဌေနုပကာရကော။
သုမတိမတိဝိဗောဓနံ ဝိစိတ္တံ၊
ကုမတိမတိန္ဓနပါဝကံ ပဓာနံ၊
ဣမမတိမဓုရံ အဝေဒိ ယော ယော၊
ဇိနဝစနံ သကလံ အဝေဒိ သော သော။
ဣတိ အဘိဓမ္မာဝတာရေ ပကိဏ္ဏကနိဒ္ဒေသော နာမ
အဋ္ဌမော ပရိစ္ဆေဒေါ။