📜
၉။ နဝမော ပရိစ္ဆေဒေါ
ပုညဝိပါကပစ္စယနိဒ္ဒေသော
ဗာတ္တိံသ ¶ ပါကစိတ္တာနိ၊ လောကိကာနေဝ ယာနိ ဟိ၊
ဧတေသံ ပါကစိတ္တာနံ၊ ပဋိသန္ဓိပဝတ္တိသု။
ပုညာပုညာဒိသင်္ခါရာ၊ ယထာ ယေသဉ္စ ပစ္စယာ၊
ဘဝါဒီသု တထာ တေပိ၊ ဝိညာတဗ္ဗာ ဝိဘာဝိနာ။
တယော ဘဝါ စတဿော စ၊ ယောနိယော ဂတိပဉ္စကံ၊
ဝိညာဏဋ္ဌိတိယော သတ္တ၊ သတ္တာဝါသာ နဝေရိတာ။
ကာမေ ¶ ပုညာဘိသင်္ခါရ-သညိတာ အဋ္ဌ စေတနာ၊
နဝန္နံ ပါကစိတ္တာနံ၊ ကာမေ သုဂတိယံ ပန။
နာနာက္ခဏိကကမ္မူပ-နိဿယပစ္စယေဟိ စ၊
ဒွေဓာ ဟိ ပစ္စယာ တေသံ၊ ဘဝန္တိ ပဋိသန္ဓိယံ။
ဥပေက္ခာသဟိတာဟေတု-မနောဝိညာဏဓာတုယာ ¶ ၊
ဝိနာ ပရိတ္တပါကာနံ၊ ဟောန္တိ ဒွေဓာ ပဝတ္တိယံ။
တာယေဝ စေတနာ ရူပ-ဘဝေ ဒွေဓာဝ ပစ္စယာ၊
ပဉ္စန္နံ ပါကစိတ္တာနံ၊ ဘဝန္တိ ဟိ ပဝတ္တိယံ။
အဋ္ဌန္နံ တု ပရိတ္တာနံ၊ ကာမေ ဒုဂ္ဂတိယံ တထာ၊
ပဝတ္တေ ပစ္စယာ ဟောန္တိ၊ န ဟောန္တိ ပဋိသန္ဓိယံ။
ဟောန္တိ ဝုတ္တပ္ပကာရာဝ၊ ကာမေ သုဂတိယံ တထာ၊
သောဠသန္နံ ဝိပါကာနံ၊ ပဝတ္တေ ပဋိသန္ဓိယံ။
ရူပေ ပုညာဘိသင်္ခါရာ၊ ရူပါဝစရဘူမိယံ၊
ပဉ္စန္နံ ပါကစိတ္တာနံ၊ ပစ္စယာ ပဋိသန္ဓိယံ။
ဟောန္တိမာပုညသင်္ခါရာ၊ ကာမေ ဒုဂ္ဂတိယံ ဒွိဓာ၊
ဝိညာဏဿ ပနေကဿ၊ ပစ္စယာ ပဋိသန္ဓိယံ။
ဆန္နံ ပန ပဝတ္တေဝ၊ ဟောန္တိ နော ပဋိသန္ဓိယံ၊
သတ္တန္နမ္ပိ ဘဝန္တေဝ၊ ပဝတ္တေ ပဋိသန္ဓိယံ။
ကာမေ သုဂတိယံ တေသံ၊ သတ္တန္နမ္ပိ တထေဝ စ၊
ပဝတ္တေ ပစ္စယာ ဟောန္တိ၊ န ဟောန္တိ ပဋိသန္ဓိယံ။
ဝိညာဏာနံ စတုန္နမ္ပိ၊ တေသံ ရူပဘဝေ တထာ၊
ပဝတ္တေ ပစ္စယာ ဟောန္တိ၊ န ဟောန္တိ ပဋိသန္ဓိယံ။
သော ¶ စ ကာမဘဝေနိဋ္ဌ-ရူပါဒိဥပလဒ္ဓိယံ၊
အနိဋ္ဌရူပါဒယော ပန၊ ဗြဟ္မလောကေ န ဝိဇ္ဇရေ။
တထေဝါနေဉ္ဇသင်္ခါရော ¶ ၊ အရူပါဝစရဘူမိယံ၊
စတုန္နံ ပါကစိတ္တာနံ၊ ပဝတ္တေ ပဋိသန္ဓိယံ။
ဧဝံ ¶ တာဝ ဘဝေသွေတေ၊ ပဋိသန္ဓိပဝတ္တိသု၊
ယထာ စ ပစ္စယာ ဟောန္တိ၊ တထာ ဉေယျာ ဝိဘာဝိနာ။
ဧသေဝ စ နယော ဉေယျော၊ ယောနိအာဒီသု တတြိဒံ၊
အာဒိတော ပန ပဋ္ဌာယ၊ မုခမတ္တနိဒဿနံ။
အဝိသေသေန ပုညာဘိ-သင်္ခါရော ဒွိဘဝေသုပိ၊
ဒတွာန ပဋိသန္ဓိံ တု၊ သဗ္ဗပါကံ ဇနေတိ သော။
တထာ စတူသု ဝိညေယျော၊ အဏ္ဍဇာဒီသု ယောနိသု၊
ဗဟုဒေဝမနုဿာနံ၊ ဂတီသု ဒွီသု ဧဝ စ။
တထာ နာနတ္တကာယာဒိ-ဝိညာဏာနံ ဌိတီသုပိ၊
တထာ ဝုတ္တပ္ပကာရသ္မိံ၊ သတ္တာဝါသေ စတုဗ္ဗိဓေ။
ဧဝံ ပုညာဘိသင်္ခါရော၊ ဘဝါဒီသု ယထာရဟံ၊
ဧကဝီသတိပါကာနံ၊ ပစ္စယော ဟောတိ စ ဒွိဓာ။
ကာမေ အပုညသင်္ခါရော၊ ဘဝေ စတူသု ယောနိသု၊
တီသု ဂတီသု ဧကိဿာ၊ ဝိညာဏဋ္ဌိတိယာပိ စ။
သတ္တာဝါသေ ပနေကသ္မိံ၊
ဥဟောတိ သော ပစ္စယော ဒွိဓာ၊
သတ္တန္နံ ပါကစိတ္တာနံ၊
ပဝတ္တေ ပဋိသန္ဓိယံ။
တထေဝါနေဉ္ဇသင်္ခါရော၊ ဧကာရူပဘဝေ ပုန၊
ဧကိဿာ ယောနိယာ စေဝ၊ ဧကိဿာ ဂတိယာပိ စ။
တီသု စိတ္တဋ္ဌိတီသွေဝ၊ သတ္တာဝါသေ စတုဗ္ဗိဓေ၊
စတုန္နံ ပါကစိတ္တာနံ၊ ဒွေဓာ သော ဟောတိ ပစ္စယော။
ပဋိသန္ဓိပဝတ္တီနံ ¶ ၊ ဝသေနေဝ ဘဝါဒိသု၊
ဝိဇာနိတဗ္ဗာ သင်္ခါရာ၊ ယထာ ယေသဉ္စ ပစ္စယာ။
န ¶ ရူပါရူပဓမ္မာနံ၊ သင်္ကန္တိ ပန ဝိဇ္ဇတိ၊
သင်္ကန္တိဘာဝေ အသတိ၊ ပဋိသန္ဓိ ကထံ သိယာ။
နတ္ထိ စိတ္တဿ သင်္ကန္တိ၊ အတီတဘဝတော ဣဓ၊
တတော ဟေတုံ ဝိနာ တဿ၊ ပါတုဘာဝေါ န ဝိဇ္ဇတိ။
သုလဒ္ဓပစ္စယံ ရူပါ-ရူပမတ္တံ တု ဇာယတိ၊
ဥပ္ပဇ္ဇမာနမေဝံ တု၊ လဘိတွာ ပစ္စယံ ပန။
ဘဝန္တရမုပေတီတိ၊ သမညာယ ပဝုစ္စတိ၊
န စ သတ္တော န စ ဇီဝေါ၊ န အတ္တာ ဝါပိ ဝိဇ္ဇတိ။
တယိဒံ ပါကဋံ ကတွာ၊ ပဋိသန္ဓိက္ကမံ ပန၊
ဒဿယိဿာမဟံ သာဓု၊ နိဗောဓထ သုဒုဗ္ဗုဓံ။
အတီတသ္မိံ ¶ ဘဝေ တဿ၊ အာသန္နမရဏဿ ဟိ၊
ဟရိတံ တာလပဏ္ဏံဝ၊ ပက္ခိတ္တံ အာတပေ ပန။
သုဿမာနေ သရီရသ္မိံ၊ နဋ္ဌေ စက္ခုန္ဒြိယာဒိကေ၊
ဟဒယဝတ္ထုမတ္တသ္မိံ၊ ဌိတေ ကာယပ္ပသာဒိကေ။
ဝတ္ထုသန္နိဿိတံ စိတ္တံ၊ ဟောတိ တသ္မိံ ခဏေပိ စ၊
ပုဗ္ဗာနုသေဝိတံ ကမ္မံ၊ ပုညံ ဝါပုညမေဝ ဝါ။
ကမ္မံ ကမ္မနိမိတ္တံ ဝါ၊ အာလမ္ဗိတွာ ပဝတ္တတိ၊
ဧဝံ ပဝတ္တမာနံ တံ၊ ဝိညာဏံ လဒ္ဓပစ္စယံ။
အဝိဇ္ဇာယ ပဋိစ္ဆန္နာ-ဒီနဝေ ဝိသယေ ပန၊
တဏှာ နမေတိ သင်္ခါရာ၊ ခိပန္တိ သဟဇာ ပန။
န မီယမာနံ တဏှာယ၊ တံ သန္တတိဝသာ ပန၊
ဩရိမာ ပန တီရမှာ၊ အာလမ္ဗိတွာန ရဇ္ဇုကံ။
မာတိကာတိက္ကမောဝေတံ ¶ ¶ ၊ ပုရိမံ ဇဟတိ နိဿယံ၊
အပရံ ကမ္မသမ္ဘူတံ၊ လမ္ဗိတွာ ဝါပိ နိဿယံ။
တံ ပနာရမ္မဏာဒီဟိ၊ ပစ္စယေဟိ ပဝတ္တတိ၊
ပုရိမံ စဝနံ ဧတ္ထ၊ ပစ္ဆိမံ ပဋိသန္ဓိ တု။
တဒေတံ နာပိ ပုရိမာ၊ ဘဝတောပိ ဣဓာဂတံ၊
ကမ္မာဒိဉ္စ ဝိနာ ဟေတုံ၊ ပါတုဘူတံ န စေဝ တံ။
ဧတ္ထ စေတဿ စိတ္တဿ၊ ပုရိမာ ဘဝတော ပန၊
ဣဓာနာဂမနေတီတ-ဘဝဟေတူဟိ သမ္ဘဝေ။
ပဋိဃောသဒီပမုဒ္ဒါဒီ၊ ဘဝန္တေတ္ထ နိဒဿနာ၊
ယထာ အာဂန္တွာ အညတြ၊ ဟောန္တိ သဒ္ဒါဒိဟေတုကာ။
ဧဝမေဝ စ ဝိညာဏံ၊ ဝေဒိတဗ္ဗံ ဝိဘာဝိနာ၊
သန္တာနဗန္ဓတော နတ္ထိ၊ ဧကတာ ဝါပိ နာနတာ။
သတိ သန္တာနဗန္ဓေ တု၊ ဧကန္တေနေကတာ သိယာ၊
ခီရတော ဒဓိသမ္ဘူတံ၊ န ဘဝေယျ ကဒါစိပိ။
အထာပိ ပန ဧကန္တ-နာနတာ သာ ဘဝေယျ စေ၊
ခီရသာမီ နရော နေဝ၊ ဒဓိသာမီ ဘဝေယျ သော။
တသ္မာ ဧတ္ထ ပနေကန္တ-ဧကတာနာနတာပိ ဝါ၊
န စေဝ ဥပဂန္တဗ္ဗာ၊ ဝိညုနာ သမယညုနာ။
နနု ဧဝမသင်္ကန္တိ-ပါတုဘာဝေ တဿ သတိ၊
ယေ ဣမသ္မိံ မနုဿတ္တ-ဘာဝေ ခန္ဓာဘိသမ္ဘဝါ။
တေသံ ဣဓ နိရုဒ္ဓတ္တာ၊ ကမ္မဿ ဖလဟေတုနော၊
ပရတ္ထာဂမတော စေဝ၊ ဣဓ တဿ ကတဿ ဟိ။
အညဿ ¶ အညတော စေဝ၊ ကမ္မတော တံ ဖလံ သိယာ၊
တသ္မာ န သုန္ဒရံ ဧတံ၊ ဝိဓာနံ သဗ္ဗမေဝ စ။
ဧတ္ထာဟ ¶ –
သန္တာနေ ¶ ယံ ဖလံ ဧတံ၊ နာညဿ န စ အညတော၊
ဗီဇာနံ အဘိသင်္ခါရော၊ ဧတဿတ္ထဿ သာဓကော။
ဧကသ္မိံ ပန သန္တာနေ၊ ဝတ္တမာနံ ဖလံ ပန၊
အညဿာတိပိ ဝါ နေဝ၊ အညတော ဝါ န ဟောတိ တံ။
ဗီဇာနံ အဘိသင်္ခါရာ၊ ဧတဿတ္ထဿ သာဓကော၊
ဗီဇာနံ အဘိသင်္ခါရေ၊ ကတေ တု မဓုအာဒိနာ။
တဿ ဗီဇဿ သန္တာနေ၊ ပဌမံ လဒ္ဓပစ္စယော၊
မဓုရော ဖလသော တဿ၊ ဟောတိ ကာလန္တရေ ပန။
န ဟိ တာနိ ဟိ ဗီဇာနိ၊ အဘိသင်္ခရဏမ္ပိ ဝါ၊
ပါပုဏန္တိ ဖလဋ္ဌာနံ၊ ဧဝံ ဉေယျမိဒမ္ပိ စ။
ဗာလကာလေ ပယုတ္တေန၊ ဝိဇ္ဇာသိပ္ပောသဓာဒိနာ၊
ဒီပေတဗ္ဗော အယံ ဝုဒ္ဓ-ကာလသ္မိံ ဖလဒါယိနာ။
ဧဝံ သန္တေပိ တံ ကမ္မံ၊ ဝိဇ္ဇမာနမ္ပိ ဝါ ပန၊
ဖလဿ ပစ္စယော ဟောတိ၊ အထ ဝါဝိဇ္ဇမာနကံ။
ဝိဇ္ဇမာနံ သစေ ဟောတိ၊ တပ္ပဝတ္တိက္ခဏေ ပန၊
ဘဝိတဗ္ဗံ ဝိပါကေန၊ သဒ္ဓိမေဝ စ ဟေတုနာ။
အထ ဝါဝိဇ္ဇမာနံ တံ၊ နိရုဒ္ဓံ ပစ္စယော ဘဝေ၊
ပဝတ္တိက္ခဏတော ပုဗ္ဗေ၊ ပစ္ဆာ နိစ္စဖလံ သိယာ။
ဝုစ္စတေ ¶ –
ကဋတ္တာ ပစ္စယော ကမ္မံ၊ တသ္မာ နိစ္စဖလံ န စ၊
ပါဋိဘောဂါဒိကံ ကမ္မံ၊ ဝေဒိတဗ္ဗံ နိဒဿနံ။
ကဋတ္တာယေဝ ¶ တံ ကမ္မံ၊ ဖလဿ ပန ပစ္စယော၊
န စဿ ဝိဇ္ဇမာနတ္တံ၊ တဿ ဝါဝိဇ္ဇမာနတာ။
အဘိဓမ္မာဝတာရောယံ၊ ပရမတ္ထပကာသနော၊
သောတဗ္ဗော ပန သောတူနံ၊ ပီတိဗုဒ္ဓိဝိဝဍ္ဎနော။
ဣတိ အဘိဓမ္မာဝတာရေ ပုညဝိပါကပစ္စယနိဒ္ဒေသော နာမ
နဝမော ပရိစ္ဆေဒေါ။