📜

နမော တဿ ဘဂဝတော အရဟတော သမ္မာသမ္ဗုဒ္ဓဿ

အဘိဓမ္မာဝတာရ-ပုရာဏဋီကာ

၁။ ပဌမော ပရိစ္ဆေဒေါ

စိတ္တနိဒ္ဒေသဝဏ္ဏနာ

၈။ တတ္ထ တေသု စတုဗ္ဗိဓေသု ပရမတ္ထေသု၊ ဇာတိနိဒ္ဓါရဏံ။ စိတ္တန္တိ စိတ္တံ နာမ။ ဝိဇာနာတီတိ ဝိဇာနနံ၊ ဝိသယာနံ ဝိဇာနနံ ဝိသယဝိဇာနနံ။ စိတ္တသရူပပရိဒီပနမိဒံ ဝစနံ။ တဿ ပန စိတ္တဿ ကော ဝစနတ္ထော ကော သဒ္ဒတ္ထော။ ဝုစ္စတေ အာစရိယေန။ သဗ္ဗသင်္ဂါဟကဝသေန သဗ္ဗေသံ စိတ္တာနံ သင်္ဂါဟကနယဝသေန။ အာရမ္မဏံ စိန္တေတိ ဇာနာတီတိ စိတ္တံ၊ တဒါ သဗ္ဗံ စိတ္တံ အဓိပ္ပေတံ။ ဇဝနဝီထိဝသေန အတ္တသန္တာနံ စိနောတီတိ စိတ္တံ၊ တဒါ ကုသလာကုသလမဟာကိရိယာစိတ္တံ အဓိပ္ပေတံ။ အညေသံ ဇဝနာနံ အဂ္ဂဟဏံ ကာမာဝစရဇဝနာနိ ဧဝ ယေဘုယျဝသေန သတ္တက္ခတ္တုံ ဇဝန္တီတိ ဉာပနတ္ထံ။

၉။ ဝိစိတ္တံ ကရဏံ ယဿ တံ ဝိစိတ္တကရဏံ၊ တဿ ဘာဝေါ ဝိစိတ္တကရဏာ။ ‘‘ဣမဿ ရူပဿ ဥဒ္ဓံ ဣဒံ ဟောတု၊ ဟေဋ္ဌာ ဣဒံ ဟောတု၊ ဥဘယပဿေ ဣဒ’’န္တိ စိန္တေတွာ ယထာစိန္တိတေန ကမေန သေသစိတ္တရူပနိပ္ဖာဒနံ ဟောတိ၊ ဧဝံ ယံ ကိဉ္စိ လောကေ ဝိစိတ္တံ သိပ္ပဇာတံ၊ သဗ္ဗံ တံ စိတ္တေနေဝ ကရီယတိ။ ဧဝံ ဝိစိတ္တကရဏတာယ စိတ္တံ။ တဒါ ကရဏတာယ စိတ္တံ ကရောတီတိ စိတ္တံ။ ဣဒံ တဒ္ဓိတပဒံ။ ဝါ အယံ အညော နယော ။ တံ အတ္တနော စိတ္တတာယ အညဒေဝ သရာဂံ စိတ္တံ၊ အညံ သဒေါသံ၊ အညံ သမောဟံ။ အညံ ကာမာဝစရံ၊ အညံ ရူပါဝစရာဒိဘေဒံ။ အညံ ရူပါရမ္မဏံ၊ အညံ သဒ္ဒါဒိအာရမ္မဏံ။ ရူပါရမ္မဏေသုပိ အညံ နီလာရမ္မဏံ၊ အညံ ပီတာဒိအာရမ္မဏံ။ သဒ္ဒါဒိအာရမ္မဏေသုပိ ဧသေဝ နယော။ သဗ္ဗေသုပိ တေသု အညံ ဟီနံ၊ အညံ မဇ္ဈိမံ၊ အညံ ပဏီတံ။ ဟီနာဒီသုပိ အညံ ဆန္ဒာဓိပတေယျံ၊ အညံ စိတ္တာဓိပတေယျံ၊ အညံ ဝီရိယာဓိပတေယျံ၊ အညံ ဝီမံသာဓိပတေယျံ၊ တသ္မာ ယဿ ဣမေသံ သမ္ပယုတ္တဘူမိအာရမ္မဏဟီနမဇ္ဈိမပဏီတာဓိပတီနံ ဝသေန အတ္တနော စိတ္တတာယ စိတ္တံ။ စိတ္တော ဧတသ္မိံ အတ္ထီတိ စိတ္တံ။ တဒါ သဗ္ဗံ စိတ္တံ။ ပညတ္တိယမ္ပိ ဝိညာဏေ ဝိစိတ္တေ စိတ္တဿ ကမ္မံ စိတ္တကမ္မံ၊ စိတ္တကမ္မမေဝ စိတ္တကမ္မကံ၊ စိတ္တကမ္မကေ ဝိစိတ္တေ ဣဓ ဣမသ္မိံ အဓိကာရေ စိတ္တသမ္မုတိ စိတ္တသဒ္ဒေါ ဝိညာဏေ စိတ္တေ ဝိညုနာ ဒဋ္ဌဗ္ဗော။

တံ ပန သဗ္ဗသင်္ဂါဟကဝသေန စိန္တေတီတိအာဒိနာ ဝုတ္တပ္ပကာရံ စိတ္တံ။ သာရမ္မဏတော သာရမ္မဏဘာဝေန ဧကဝိဓံ။ သဝိပါကာဝိပါကတော သဝိပါကာဝိပါကဝသေန ဒုဝိဓံ။ တတ္ထ တသ္မိံ ဒုဝိဓေ စိတ္တေ သဝိပါကံ နာမ စိတ္တံ ကုသလာကုသလံ၊ အဝိပါကံ အဗျာကတံ၊ ကုသလာကုသလဘာဝေန အကထိတန္တိ အတ္ထော။ ကုသလဇာတိ အကုသလဇာတိ အဗျာကတဇာတီတိ ဇာတိဘေဒတော တိဝိဓံ။

တတ္ထ တသ္မိံ ဝစနေ ‘‘ကုသလ’’န္တိ ဧတဿ သဒ္ဒဿ ပန ကော ဝစနတ္ထော။

၁၀။ ကုစ္ဆိတာနံ သလနတော ပါပကာနံ ဓမ္မာနံ ကမ္ပနတော ဝိဒ္ဓံသနတော။ ကုစ္ဆိတေနာကာရေန သယန္တီတိ ကုသာ၊ ကုသာနံ အကုသလသင်္ခါတာနံ လဝနေန ဆိန္ဒနတော။ ကုစ္ဆိတေ သာတိ တနုံ ကရောတီတိ ကုသံ၊ ကုသေန ဉာဏေန လာတဗ္ဗတ္တာ ဂဟေတဗ္ဗတ္တာ။ ဝါ အယံ အညော နယော။

၁၁။ ကုသလသဒ္ဒေါယံ အယံ ကုသလသဒ္ဒေါ ဆေကေ အတ္ထေ အာရောဂျတ္ထေ အနဝဇ္ဇတ္ထေ ဣဋ္ဌဝိပါကေ အတ္ထေပိ ဒိဋ္ဌော အမှေဟိ။ ဣဓ ဣမသ္မိံ အဓိကာရေ အနဝဇ္ဇာဒိကေ အတ္ထေ ဒိဋ္ဌော။ အာဒိ-သဒ္ဒေန အာရောဂျတ္ထဣဋ္ဌဝိပါကတ္ထာ ဂဟေတဗ္ဗာ။ ဒိဋ္ဌော ယသ္မာ၊ တသ္မာ အနဝဇ္ဇဣဋ္ဌဝိပါကလက္ခဏံ ကုသလံ။ နတ္ထိ အဝဇ္ဇံ ကိလေသာဝဇ္ဇံ ကိလေသဒေါသော ကိလေသဒရထော ဧတဿာတိ အနဝဇ္ဇံ၊ ကမ္မေန ဝိပစ္စီယတေတိ ဝိပါကော၊ ဣဋ္ဌာနိဋ္ဌာဒိအာရမ္မဏာနုဘဝနဝသေန၊ အတ္တနော သဘာဝေန စ ဣဋ္ဌော ဝိပါကော ဧတဿာတိ ဣဋ္ဌဝိပါကံ၊ အနဝဇ္ဇမေဝ ဣဋ္ဌဝိပါကံ၊ တံ လက္ခီယတိ အနေန အဝိညာတံ လက္ခိတဗ္ဗံ ကုသလန္တိ လက္ခဏံ၊ အနဝဇ္ဇဣဋ္ဌဝိပါကံ လက္ခဏံ ဧတဿာတိ အနဝဇ္ဇဣဋ္ဌဝိပါကလက္ခဏံ။ အနဝဇ္ဇဣဋ္ဌဝိပါကမေဝ ကုသလံ။ နနု ကထံ သယမေဝ အတ္တနော လက္ခဏံ ဘဝေယျာတိ စောဒနာ ဘဝေယျ ဝိညာတာဝိညာတသဒ္ဒတ္ထဘာဝေန လက္ခဏလက္ခိတဗ္ဗဘာဝယုတ္တိတော။ ကုသလသဒ္ဒတ္ထဝသေန ဟိ အဝိညာတံ အပါကဋံ ကုသလံ လက္ခိတဗ္ဗံ ဟောတိ။ အနဝဇ္ဇဣဋ္ဌဝိပါကသဒ္ဒတ္ထဝသေန ဝိညာတံ ပါကဋံ ကုသလံ လက္ခဏံ ဟောတိ။ အကုသလဝိဒ္ဓံသနရသံ အကုသလာနံ ဝိဒ္ဓံသနံ အကုသလဝိဒ္ဓံသနံ၊ တံ ရသော ကိစ္စမေတဿာတိ အကုသလဝိဒ္ဓံသနရသံ၊ အကုသလဝိဒ္ဓံသနကိစ္စံ။ ဝေါဒါနဘာဝေန ပစ္စုပဋ္ဌာတီတိ ဝေါဒါနပစ္စုပဋ္ဌာနံ၊ ဝေါဒါနဥပဋ္ဌာနာကာရံ ဝေါဒါနဂယှာကာရံ။ ဝါ အယံ အညော နယော။ ဝဇ္ဇပဋိပက္ခတ္တာ အနဝဇ္ဇလက္ခဏမေဝ ကုသလံ၊ ဝဇ္ဇပဋိပက္ခလက္ခဏံ ကုသလန္တိ အတ္ထော။ ဝေါဒါနဘာဝရသံ ဝေါဒါနဘာဝသမ္ပတ္တိကံ။ ဣဋ္ဌဝိပါကပစ္စုပဋ္ဌာနံ ဣဋ္ဌဝိပါကဖလံ။ ယောနိသောမနသိကာရပဒဋ္ဌာနံ ပဒဉ္စ တံ ဌာနဉ္စာတိ ပဒဋ္ဌာနံ၊ ဥဘော ကာရဏတ္ထာဓိဝစနံ၊ တသ္မာ အာသန္နကာရဏန္တိ အတ္ထော၊ ဣတရထာ ပုနရုတ္တိဒေါသော သိယာ၊ ယောနိသောမနသိကာရော ပဒဋ္ဌာနံ အာသန္နကာရဏံ ဧတဿာတိ ယောနိသောမနသိကာရပဒဋ္ဌာနံ။

သာဝဇ္ဇာနိဋ္ဌဝိပါကလက္ခဏံ အကုသလံ။ တဒုဘယဝိပရီတံ တေဟိ ဥဘယေဟိ ကုသလာကုသလေဟိ ဝိပရီတံ အဝိပါကလက္ခဏံ ဧတဿာတိ တဒုဘယဝိပရီတလက္ခဏံ အဗျာကတံ။ ဝါ အယံ အညော နယော။ အဝိပါကာရဟံ ဝိပါကဿ အနနုစ္ဆဝိကံ။

သဝတ္ထုကာဝတ္ထုကဘေဒတောတိ သဝတ္ထုကံ ဟဒယဝတ္ထုကံ၊ အဝတ္ထုကံ ဟဒယဝတ္ထုဝိရဟိတံ။

၁၂။ ဥဒ္ဒါနတော သင်္ခေပဝသေန ကိလေသဝတ္ထုဝသေန ဒုဝေ ကာမာ ဟောန္တိ။ ဆန္ဒရာဂေါဝ ကိလေသော၊ တေဘူမကေ ပဝတ္တံ ဝဋ္ဋသဟိတံ ဝတ္ထု၊ ဝသတိ ကိလေသော ဧတ္ထာတိ ဝတ္ထု။

၁၃။ ကိလေသကာမော ဝတ္ထုံ ကာမေတိ ဣစ္ဆတိ၊ ဝတ္ထု ကိလေသကာမေန ကာမီယတိ ဣစ္ဆီယတီတိ ကတ္တုကာရကကမ္မကာရကဒွယေ သာဓနဒွယေ ဧသ ဧသော ဒုဝိဓောပိ ကာမော သိဇ္ဈတိ။

၁၄-၅။ သော အယံ ဒုဝိဓောပိ ကာမော ယသ္မိံ ပဒေသေ သမ္ပတ္တီနံ ဝသေန အဝစရတိ၊ ဣတိ တသ္မာ ကာရဏာ သော ပန ပဒေသော စတုပါယာနံ ဆန္နံ ဒေဝါနံ မနုဿာနံ ဝသေန ဧဝ ဧကာဒသဝိဓော ဟောတိ။

၁၆။ ကာမောဝစရတီတိ ဧတ္ထ ဧတသ္မိံ ဧကာဒသဝိဓေ ပဒေသေ ကာမော အဝစရတိ၊ ဣတိ တသ္မာ ကာရဏာ သော ပဒေသော အဿ ကာမဿ အနေန ကာမေန အဘိလက္ခိတတ္တာ ကာမာဝစရသညိတော။ အဘိလက္ခိတသဒ္ဒပ္ပယောဂေ တတိယတ္ထေ ‘‘အဿာ’’တိ ဆဋ္ဌီ ဟောတီတိ သဒ္ဒသတ္ထဝိဒူ ပဌန္တိ။ သသတ္ထာဝစရော ပဒေသော ဝိယ သတ္တေ သသန္တိ ဟိံသန္တိ တေဟီတိ သတ္ထာ၊ သဟ သတ္ထေဟီတိ သသတ္ထာ၊ သသတ္ထာ ပုရိသာ အဝစရန္တိ ဧတ္ထာတိ သသတ္ထာဝစရော။ ယထာ ဟိ ယသ္မိံ ပဒေသေ သသတ္ထာ ပုရိသာ အဝစရန္တိ၊ သော ပဒေသော ဝိဇ္ဇမာနေသုပိ အညေသု ဒွိပဒစတုပ္ပဒေသု အဝစရန္တေသု တေသံ ဥပလက္ခိတတ္တာ ‘‘သသတ္ထာဝစရော’’တွေဝ ဝုစ္စတိ၊ ဧဝံ ဝိဇ္ဇမာနေသုပိ အညေသု ရူပါဝစရာဒီသု တတ္ထ အဝစရန္တေသု တေသံ အဘိလက္ခိတတ္တာ အယံ ပဒေသော ‘‘ကာမာဝစရော’’တွေဝ ဝုစ္စတိ။

၁၇။ ယထာ ရူပဘဝေါ ဥတ္တရပဒဿ လောပံ ကတွာ ရူပန္တိ ဝုတ္တော၊ ဧဝံ တထာ သွာယံ သော အယံ ဧသော ကာမာဝစရော ဥတ္တရပဒဿ လောပံ ကတွာ ကာမော ဣတိ သညိတော ကာမော နာမ ဥဒီရိတော ပဏ္ဍိတေန ကထိတော။

၁၈။ တသ္မိံ ကာမေ ဣဒံ စိတ္တံ တသ္မိံ ကာမာဝစရေ သဒါ အဝစရတိ၊ ဣတိ တသ္မာ ကာရဏာ ကာမာဝစရံ ဣတိ ဧဝံ ကာမဃာတိနာ ကာမာနံ ဝိနာသကေန ဗုဒ္ဓေန ကထိတံ။ ကိဉ္စာပိ ဧတံ ရူပါရူပဘဝေသုပိ အဝစရတိ၊ ယထာ ပန သင်္ဂါမေ ယေဘုယျေန အဝစရဏတော ‘‘သင်္ဂါမာဝစရော’’တိ လဒ္ဓနာမော နာဂေါ နဂရေ စရန္တောပိ ‘‘သင်္ဂါမာဝစရော’’တွေဝ ဝုစ္စတိ၊ ထလစရဇလစရာ ပါဏိနော အထလေ အဇလေ ဌိတာပိ ‘‘ထလစရဇလစရာ’’တွေဝ ဝုစ္စန္တိ၊ ဧဝံ ဣဒံ အညတ္ထ အဝစရန္တမ္ပိ ကာမာဝစရမေဝါတိ ဒဋ္ဌဗ္ဗံ။ အာရမ္မဏကရဏဝသေန ဝါ ဧတ္ထ ကာမော အဝစရတီတိပိ ကာမာဝစရံ။ ကာမဉ္စေသ ရူပါရူပါဝစရေသုပိ အဝစရတိ၊ ယထာ ပန ဝဒတီတိ ဝစ္ဆော၊ မဟိယံ သေတီတိ မဟိံသောတိ ဝုတ္တေ န ယတ္တကာ ဝဒန္တိ၊ မဟိယံ ဝါ သေန္တိ၊ သဗ္ဗေသံ တံ နာမံ ဟောတိ၊ ဧဝံသမ္ပဒမိဒံ ဒဋ္ဌဗ္ဗံ။

၁၉။ ပဋိသန္ဓိံ ဘဝေ ကာမေ ကာမဘဝသင်္ခါတေ ကာမေ ပဋိသန္ဓိံ အဝစာရယတိ၊ ဣတိ တသ္မာ ကာမာဝစရံ ။ ဣတိ ဧဝံ ဝါ အယံ အညော နယော။ တတြ တသ္မိံ ကာမာဝစရေ ပရိယာပန္နံ အန္တောဂဓံ၊ ဣတိ တသ္မာ ကာမာဝစရံ။

၂၀။ အဋ္ဌဝိဓံ စိတ္တံ ကာမာဝစရသညိတံ ဣဒံ အဋ္ဌဝိဓံ စိတ္တံ။ ဒသပုညကိရိယဝတ္ထုဝသေနေဝ ပုညကိရိယာ ဧဝ တေသံ တေသံ ဖလာနိသံသာနံ ဝတ္ထူနိ ကာရဏာနီတိ ပုညကိရိယဝတ္ထူနိ၊ တေသံ ဝသော၊ တေန ပဝတ္တတိ။

၂၁။ ဒါနံ သီလံ ဘာဝနာ ပတ္တိဒါနံ ဝေယျာဝစ္စံ ဓမ္မဒေသနာ အနုမောဒနာ ဒိဋ္ဌိဇုဘာဝေါ သံသုတိ ဓမ္မဿဝနဉ္စ အပစာယော အပစာယနံ၊ ဧဝံ ဣမိနာ မယာ ဝုတ္တပ္ပကာရေန ပုညာနိ ဧဝ ဝတ္ထူနိ ပုညဝတ္ထူနိ၊ တေသံ ပဘေဒေါ ပုညဝတ္ထုပ္ပဘေဒေါ ဉေယျော ပဏ္ဍိတေန ဇာနိတဗ္ဗော။

၂၂-၃။ ဂစ္ဆန္တိ သင်္ဂဟံ ဒါနေ ပတ္တိဒါနာနုမောဒနာ ဒါနေ သင်္ဂဟံ ဂစ္ဆန္တိ၊ ဝေယျာဝစ္စာပစာယနာ သီလမယေ ပုညေ သင်္ဂဟံ ဂစ္ဆန္တိ၊ ဓမ္မဒေသနာ ဓမ္မဿဝနံ ဒိဋ္ဌိဥဇုကာ ဘာဝနာမယေ ပုညေ သင်္ဂဟံ ဂစ္ဆန္တိ၊ ဒသ ပုညကိရိယာပိ စ တီဏိ ဧဝ သမ္ဘောန္တိ။

၂၄။ သဗ္ဗာနုဿတိပုညဉ္စ ပသံသာ သရဏတ္တယံ ရတနတ္တယဂုဏပသံသာ စ ဧတေ ဒိဋ္ဌိဇုကမ္မမှိ သင်္ဂယှန္တိ၊ တသ္မိံ သင်္ဂဟပါပုဏေ သံသယော သန္ဒေဟော နတ္ထိ။

၂၅။ ပုရိမာ စေတနာ တတော ပုဗ္ဗဘာဂေ ပဝတ္တာ စေတနာ၊ မုဉ္စစေတနာ ပစ္စုပ္ပန္နာ စေတနာ၊ ပရစေတနာ ပစ္ဆာကာလေ ပဝတ္တာ စေတနာ၊ တိဿောပိ စေတနာ ဒါနမယေ ပုညေ ဟောန္တိ။ ဧဝန္တိ ယထာ တိဿောပိ စေတနာ ဒါနမယေ ပုညေ ဟောန္တိ၊ ဧဝံ တထာ ဒါနမယပုညတော သေသေသုပိ သီလမယဘာဝနာမယေသု တိဿော စေတနာ ပဏ္ဍိတော ဒီပယေ ကထေယျ။

ဟိ သစ္စံ ယဒါ ပန ယော ပုဂ္ဂလော ဒေယျဓမ္မပဋိဂ္ဂါဟကာဒိသမ္ပတ္တိံ အာဂမ္မ ပဋိစ္စ။ ပဋိဂ္ဂါဟကာဒိသမ္ပတ္တိန္တိ ဧတ္ထ အာဒိ-သဒ္ဒေန ဒေသကာလကလျာဏမိတ္တာဒယော ဂဟိတာ။ အညံ ဝါ သောမနဿဟေတုန္တိ အည-ဂ္ဂဟဏေန သဒ္ဓါဗဟုလတာဝိသုဒ္ဓိဒိဋ္ဌိတာကုသလကိရိယာနိသံသဒဿိတာသောမနဿပဋိသန္ဓိကတာဒီနံ သင်္ဂဟော။ အတ္ထိ ဒိန္နံ ဒါနဿ ဖလံ အတ္ထိ။ အာဒိ-သဒ္ဒေန အတ္ထိဟုတာဒယော ဂဟိတာ။ ပုရက္ခတွာတိ ပုရတော ကတွာ။ ပရေဟိ အနုဿာဟိတော အစောဒိတော ဒါနာဒီနိ ပုညာနိ ကရောတိ။ ဒါနာဒီနီတိ ဝစနေန ဒေယျဓမ္မံ နိဿာယ ပဝတ္တဒါနစေတနာ ဂဟေတဗ္ဗာ။ တဒါ အဿ ပုဂ္ဂလဿ။ သင်္ခရဏံ သင်္ခါရော၊ နတ္ထိ သင်္ခါရော ဧတဿာတိ အသင်္ခါရော၊ တံ ဧဝ အသင်္ခါရိကံ၊ အပ္ပယောဂန္တိ အတ္ထော။ ဝုတ္တနယေနာတိ ဝုတ္တနယော နာမ ‘‘ဒေယျဓမ္မပဋိဂ္ဂါဟကာဒိသမ္ပတ္တိ’’န္တိ ဝစနံ။ ဣမသ္မိံ ပနတ္ထေ သင်္ခရောတီတိ သင်္ခါရော နာမ အတ္တနော ဝါ ပဝတ္တဿ ပုဗ္ဗပ္ပယောဂဿ အဓိဝစနံ၊ ပရဿ ဝါ ပဝတ္တပုဗ္ဗပ္ပယောဂဿ အဓိဝစနံ။ အယမဿ အဓိပ္ပာယော – ယဒါ ယော ‘‘ဒါနာဒီနိ ကရိဿာမီ’’တိ စိတ္တံ သမုပ္ပာဒေတွာ နာကာသိ၊ ပစ္ဆာ အတ္တနော ပုဗ္ဗစေတနာယ ဥဿာဟိတော ကရောတိ၊ တဒါ သသင်္ခါရိကံ ဟောတိ၊ အတ္တနော ပုဗ္ဗပ္ပယောဂေန သဟ ပဝတ္တတီတိ အတ္ထော။ ပဋိပတ္တိဒဿနေန ပဋိပဇ္ဇိတဗ္ဗာ သီလာဒီဟိ ပဋိပဇ္ဇန္တိ ဇာနန္တိ ဂစ္ဆန္တိ ဝါ နိဗ္ဗာနံ ဧတာယာတိ ပဋိပတ္တိ၊ တာယ ဒဿနံ ပဋိပတ္တိဒဿနံ၊ တေန။ ဇာတော ပရိစယော ဧတေသန္တိ ဇာတပရိစယာ။ သဟသာတိ ဝေဂေန။ စတူသုပိ ဝိကပ္ပေသု ဒဿေယျ။

၂၆။ ဒသပုညကြိယာဒီနံ ဝသေန စ ဗဟူနိပိ ဘဝန္တိ ဧတာနိ ပန စိတ္တာနိ ဒသပုညကိရိယာဒီနံ ဝသေနပိ ဗဟူနိပိ ဘဝန္တိ ဣတိ ဧဝံ ပကာသယေ ဘဂဝါ ပကာသေယျ။

၂၇။

သတ္တရသ သဟဿာနိ၊ ဒွေ သတာနိ အသီတိ စ၊

ကာမာဝစရပုညာနိ၊ ဘဝန္တီတိ ဝိနိဒ္ဒိသေတိ။ –

ကာမာဝစရပုညာနိ သတ္တရသ သဟဿာနိ စ ဒွေ သတာနိ စ အသီတိ စ ဘဝန္တိ၊ ဣတိ ဝစနံ ဝိနိဒ္ဒိသေ အာစရိယော ကထေယျ။

ဒသပုညကြိယာဝတ္ထု၊ ဆဒွါရာဓိပတီဟိ စ၊

ကာယာဒီဟိ စ တီဟေဝ၊ ဟီနာဒီဟိ စ တီဟိ တု။

ဒွီသုဘဝေသု ကာမဘဝရူပဘဝေသု။ ပဋိပဒါဒိဘေဒတော ဒုက္ခာပဋိပဒံ ဒန္ဓာဘိညံ၊ ဒုက္ခာပဋိပဒံ ခိပ္ပာဘိညံ၊ သုခါပဋိပဒံ ဒန္ဓာဘိညံ၊ သုခါပဋိပဒံ ခိပ္ပာဘိညံ။ ရူပါဝစရဘာဝနာပုညဝသပ္ပဝတ္တံ ရူပါဝစရေ ပဝတ္တဿ ဘာဝနာပုညဿ ဝသေန ပဝတ္တံ ရူပါဝစရူပပတ္တိနိပ္ဖာဒကံ ရူပါဝစရေ ဥပပတ္တိယာ ပဋိသန္ဓိယာ နိပ္ဖာဒကံ ဟောတိ။

သဝတ္ထုကာဝတ္ထုကဘေဒတောတိ အရူပါဝစရံ ယဒါ ကာမရူပေ ဇာယတိ၊ တဒါ ဟဒယဝတ္ထုံ နိဿာယ ဇာယတိ၊ ဣတိ တသ္မာ သဝတ္ထုကံ နာမ ဇာတံ။ ယဒါ အရူပေ ဇာယတိ၊ တဒါ ဟဒယဝတ္ထုံ အနိဿာယ ဇာယတိ၊ ဣတိ တသ္မာ အဝတ္ထုကံ နာမ ဇာတံ။

အာကာသာနဉ္စာယတနဿ ကသိဏုဂ္ဃာဋိမာကာသံ အာရမ္မဏံ။ ဝိညာဏဉ္စာယတနဿ တတ္ထ ပဝတ္တဝိညာဏံ၊ တသ္မိံ ကသိဏုဂ္ဃာဋိမာကာသေ ပဝတ္တံ ဝိညာဏံ စိတ္တံ အာရမ္မဏံ ဟောတိ။ အာကိဉ္စညာယတနဿ တဿ အပဂမော တဿ အာကာသာနဉ္စာယတနဿ အပဂမော အဘာဝေါ ဝေါဟာရော အာရမ္မဏံ ဟောတိ။ နေဝသညာနာသညာယတနဿ အာကိဉ္စညာယတနံ အာရမ္မဏံ ဟောတိ။

ရူပေ သညာ ရူပသညာ။ သညာသီသေန စိတ္တမ္ပိ ဂဟိတံ။ သမတိက္ကမာ ကသိဏုဂ္ဃာဋိမာကာသသမတိက္ကမနေန။ ပဋိဃေ ဒွါရာရမ္မဏာနံ သင်္ဃဋ္ဋနေ ပဝတ္တာ သညာ ပဋိဃသညာ။ ဒွိပဉ္စဝိညာဏာနံ အဓိဝစနံ။ တာသံ ပဋိဃသညာနံ ဒွိပဉ္စဝိညာဏာနံ အတ္ထင်္ဂမာ အတ္ထင်္ဂမေန။ နာနာ အတ္တာ သဘာဝေါ ဧတဿာတိ နာနတ္တံ၊ အာရမ္မဏံ၊ နာနတ္တေ နာနာသဘာဝေ ပဝတ္တာ သညာ နာနတ္တသညာ၊ နာနာ အတ္တာ သဘာဝေါ ဧတိဿာတိ ဝါ နာနတ္တာ၊ သာယေဝ သညာ နာနတ္တသညာ၊ ကာမာဝစရသညာတိ အတ္ထော။ တာသံ နာနတ္တသညာနံ အမနသိကာရာ အမနသိကာရေန။

နိယတာနိယတဝတ္ထုကဘေဒတောတိ သောတာပတ္တိမဂ္ဂေါ နိယတဝတ္ထုကော။ ကသ္မာ? ကာမရူပေသုယေဝ ဟဒယဝတ္ထုံ နိဿာယ ဥပ္ပဇ္ဇနတော။ ဣတရေ ပန တယော မဂ္ဂါ အနိယတဝတ္ထုကာ။ ကသ္မာ? ကာမရူပေသု ဟဒယဝတ္ထုံ နိဿာယ ဇာယန္တိ၊ အရူပေ ဟဒယဝတ္ထုံ အနိဿာယ ဇာယန္တိ၊ တသ္မာ အနိယတဝတ္ထုကာ။ တီဟိ ဝိမောက္ခမုခေဟီတိ သုညတအနိမိတ္တအပ္ပဏိဟိတသင်္ခါတေဟိ တီဟိ ဝိမောက္ခမုခေဟိ။

ယဿ သံဝိဇ္ဇန္တိ၊ တံ ပုဂ္ဂလံ ဝဋ္ဋသ္မိံ သံယောဇေန္တိ ဗန္ဓန္တီတိ သံယောဇနာ။ သက္ကာယဒိဋ္ဌိဝိစိကိစ္ဆာသီလဗ္ဗတပရာမာသာယေဝ သံယောဇနာ သက္ကာယဒိဋ္ဌိဝိစိကိစ္ဆာသီလဗ္ဗတပရာမာသသံယောဇနာ၊ တေသံ ပဟာနံ သက္ကာယဒိဋ္ဌိဝိစိကိစ္ဆာသီလဗ္ဗတပရာမာသသံယောဇနပ္ပဟာနံ၊ တံ ကရောတီတိ သက္ကာယဒိဋ္ဌိဝိစိကိစ္ဆာသီလဗ္ဗတပရာမာသသံယောဇနပ္ပဟာနကရံ၊ သောတာပတ္တိမဂ္ဂစိတ္တံ။ မာနောပိ ဧကဒေသတော အပါယဂါမိကောယေဝ ပဟိယျတေ။ သောတာပတ္တိမဂ္ဂေန နိဿေသတော န ပဟိယျတေ။ သေသကိလေသေသုပိ ဧသေဝ နယော။ ဥဒ္ဓစ္စံ ပန ဧကဒေသတောပိ အပါယဂါမိကမ္ပိ န ပဟိယျတိ။ သကဒါဂါမိမဂ္ဂစိတ္တံ ရာဂဒေါသမောဟာနံ တနုတ္တကရံ။ သောတာပတ္တိမဂ္ဂေန နာသိတသံယောဇနာနံ ပဟာနံ ကသ္မာ န ဝုတ္တန္တိ စေ? ပဌမမဂ္ဂတော ဒုတိယမဂ္ဂဿ မဟန္တတ္တာ ပဌမမဂ္ဂေန နာသိတာ သံယောဇနာ ဒုတိယမဂ္ဂေန နာသိတာတိ ပညာယတိ၊ ဣတိ ယသ္မာ၊ တသ္မာ န ဝုတ္တံ။ တတိယစတုတ္ထမဂ္ဂေသုပိ ဧသေဝ နယော။ ဧတ္ထ ဧတသ္မိံ လောကုတ္တရစိတ္တေ။ ဧကေကန္တိ ဝိစ္ဆာဝသေန ဝုတ္တံ။ မဂ္ဂါနုရူပန္တိ ဝစနံ ပဌမမဂ္ဂဿ ပဌမဖလဉ္စ အနုရူပန္တိ ဝိညာပနတ္ထံ။

၂၈။ ကာမေ အဋ္ဌေဝ ကာမာဝစရေ အဋ္ဌ ဧဝ စိတ္တာနိ၊ ရူပေ ရူပဘဝေ ပဉ္စ စိတ္တာနိ၊ အရူပိသု စတ္တာရိ စိတ္တာနိ၊ အနုတ္တရာနိ လောကုတ္တရစိတ္တာနိ စတ္တာရိ၊ ဧဝံ ဣမိနာ မယာ ဝုတ္တပ္ပကာရေန ကုသလာနိ စိတ္တာနိ ဧကဝီသတိ ဟောန္တိ။

၂၉။ ကုသလာကုသလာပဂတေနသတာ မုနိနာ ကုသလတော၊ အကုသလတော စ အပဂတေန သတာ သတိသမ္ပန္နေန ကုသလေ ကုသလေန ဆေကေန ဝသိနာ ပဉ္စဝသီဟိ သမန္နာဂတေန ယံ ကုသလစိတ္တံ စတုဘူမိဂတံ စတူသု ဘူမီသု ပဝတ္တံ သကလံ သဗ္ဗံ လပိတံ ကထိတံ၊ တံ ကုသလစိတ္တံ မယာပိ ဗုဒ္ဓဒတ္တာစရိယေန လပိတံ ကထိတံ။

နိယတာနိယတဝတ္ထုဝသေနာတိ ပဋိဃသမ္ပယုတ္တဒွယံ ကာမေယေဝ ဟဒယဝတ္ထုံ နိဿာယ ဇာယတိ၊ အညဘူမီသု န ဇာယတိ၊ တသ္မာ နိယတဝတ္ထုကံ ဟောတိ။ ဣတရာနိ ပန အကုသလာနိ ကာမရူပေသု ဥပ္ပဇ္ဇနကာလေ ဟဒယဝတ္ထုံ နိဿာယ ဇာယန္တိ၊ အရူပေ ဟဒယဝတ္ထုံ အနိဿာယ ဇာယန္တိ၊ တသ္မာ အနိယတဝတ္ထုကာနိ၊ တေန။ ပဋိသန္ဓိဇနကာဇနကဝသေန စာတိ ဥဒ္ဓစ္စသဟဂတံ ပဋိသန္ဓိံ န ဇနေတိ။ ယဒိ ပဋိသန္ဓိံ ဇနေယျ၊ အပါယေသုယေဝ ဇနေယျ။ ကသ္မာ? သောတာပတ္တိမဂ္ဂေန ဧကဒေသတော အပါယဂါမိကမ္ပိ န ဇဟိတံ၊ သဗ္ဗံ န ဇဟိတန္တိ အတ္ထော။ သောပိ မဂ္ဂေါ အပါယဂါမီ န ဟောတိ။ အညေ ပန ကိလေသာ ဧကဒေသဝသေန အပါယဂါမိကာ ဇဟိတာ၊ တေန ပဌမမဂ္ဂေနာတိ တသ္မာ န ဇနေတိ။ ဧကာဒသဝိဓံ ပန ပဋိသန္ဓိံ ဇနေတိ၊ တေန။

ဒိဋ္ဌမင်္ဂလာဒီနီတိ အာဒိ-သဒ္ဒေန သုတမင်္ဂလာဒီနိ ဂဟိတာနိ။ သာရတော ဥတ္တမတော ပစ္စေတိ သဒ္ဒဟတိ။ သဘာဝတိက္ခေန သဘာဝေါ တိက္ခော ဧတဿာတိ သဘာဝတိက္ခံ၊ တေန သဘာဝတိက္ခေန။

အဿပန ပဋိဃသမ္ပယုတ္တဿ ပါဏာတိပါတာဒီသု အကုသလကမ္မေသု တိက္ခပ္ပဝတ္တိကာလေ အသင်္ခါရိကဿ ဥပ္ပတ္တိ၊ မန္ဒပ္ပဝတ္တိကာလေ သသင်္ခါရိကဿ ဥပ္ပတ္တိ ဝေဒိတဗ္ဗာ။

တဿ မောမူဟဿ။

ဒုက္ခဝိသေသဿ ဒုက္ခနာနတ္တဿ။

၃၀။ လောဘမူလဝသေန အဋ္ဌ စိတ္တာနိ၊ ဒေါသမူလဝသာ ဒုဝေ စိတ္တာနိ၊ မောဟမူလဝသေန ဒွေ စိတ္တာနိ။ ဧဝံ ဣမိနာ မယာ ဝုတ္တပ္ပကာရေန အကုသလာနိ ဒွါဒသပ္ပကာရာနိ သိယုံ ဘဝေယျုံ။

၃၁။ ယံ ပါပမာနသံ ယံ အကုသလစိတ္တံ ပါပါပါပေသု ပါပအပါပေသု ကုသလာကုသလေသု အပါပေန အပ္ပဝတ္တေန ပါပါပါပပ္ပဟီနေန ဝုတ္တံ ဤရိတံ ကထိတံ၊ တံ ပါပမာနသံ တံ အကုသလစိတ္တံ မယာ သမုဒါဟဋံ ကထိတံ။

ယထာ ပနဿ ယထာ ပန အဿ ဝိပါကဿ ကုသလံ ဒါနာဒိဝသေန ဒါနာဒီနံ ဒသပုညကိရိယဝတ္ထူနံ ဝသေန ဆသု အာရမ္မဏေသု ပဝတ္တတိ၊ ဣဒံ ဝိပါကစိတ္တံ တထာ န ပဝတ္တတိ။ ဟိ သစ္စံ ဣဒံ ဝိပါကံ ပဋိသန္ဓိဘဝင်္ဂစုတိတဒါရမ္မဏဝသေန ပရိတ္တဓမ္မပရိယာပန္နေသု ကာမာဝစရဓမ္မန္တောဂဓေသု ဆသု အာရမ္မဏေသု ပဝတ္တတိ။ သမ္ပယုတ္တဓမ္မာနဉ္စ ဝိသေသေ အသတိပိ ကုသလသမ္ပယုတ္တဓမ္မတော အဿ ဝိပါကဿ၊ သမ္ပယုတ္တဓမ္မာနဉ္စ နာနတ္တေ အသတိပိ ဣဒံ ဝိပါကံ အာဒါသတလာဒီသု ဓမ္မဇာတေသု မုခနိမိတ္တံ ဝိယ နိရုဿာဟံ။ အယမဿာဓိပ္ပာယော – ယထာ အာဒါသတလေ မုခနိမိတ္တံ မုခေ စလိတေ စလတိ၊ အစလိတေ န စလတိ၊ မုခဿ ကာရဏံ ဝိနာ မုခနိမိတ္တဿ ဝိယ ကာရဏံ နတ္ထိ၊ ဧဝံ ကုသလကာရဏာ ဝိပါကဿ အညံ ကာရဏံ နတ္ထိ၊ နိရုဿာဟံ ဝိပါကံ။

၃၂။ ကာမာဝစရဒေဝါနံ မနုဿာနံ ဣမေ အဋ္ဌ မဟာဝိပါကာ ဒုဟေတုကတိဟေတုကာနံ ကာမာဝစရဒေဝါနံ၊ မနုဿာနဉ္စ ပဋိသန္ဓိယော ဘဝန္တိ။

၃၃-၄။ တတော ပရံ ပဝတ္တိယံ ယာဝတာယုကံ ဘဝင်္ဂံ ဟုတွာ ဗလဝါရမ္မဏေ အတိမဟန္တဝိဘူတာရမ္မဏေ တဒါရမ္မဏဉ္စ ဟုတွာ တတော ပရံ မရဏကာလသ္မိံ စုတိ ဟုတွာ ပဝတ္တန္တိ ၊ ဧဝံ ဣမိနာ မယာ ဝုတ္တပ္ပကာရေန စတူသု ဌာနေသု ဝိပစ္စန္တိ ဝိပါကဘာဝေန ဇာယန္တိ။

၃၅။ သဘူမိကုသလေဟေဝ မဟာပါကာ သမာ ဝိနာ မဟာပါကာ ကမ္မဒွါရံ ကမ္မကာရဏံ ဝိနာ၊ ကမ္မဉ္စ မဟာပုညာနံ ကိရိယဝတ္ထုကံ ဝိနာ ဝဇ္ဇေတွာ သဘူမိကုသလေဟေဝ အတ္တနော ဘူမိယံ ပဝတ္တေဟိ ကုသလေဟိ ဧဝ သမာ သဒိသာ။ ကမ္မဒွါရံ နာမ ကာယဝိညတ္တိကမ္မဒွါရံ၊ ဝစီဝိညတ္တိကမ္မဒွါရံ၊ ဘဝင်္ဂသင်္ခါတံ မနောဒွါရံ၊ ဣတိ တိဝိဓံ ကမ္မဒွါရံ ကမ္မကာရဏံ။ ကမ္မံ နာမ အဋ္ဌကာမာဝစရကုသလစေတနာ ဣဓ အဓိပ္ပေတာ။

၃၆။ ပါကာ ကုသလဝိပါကာ အဝိညတ္တိဇနတ္တာ စ ဝိညတ္တိ စ ဝိညတ္တိ စ ဝိညတ္တိဝိညတ္တိယောတိ ဝတ္တဗ္ဗေ သရူပေကသေသံ ကတွာ ‘‘ဝိညတ္တီ’’တိ ဝုတ္တံ၊ တာ ဇနေန္တီတိ ဝိညတ္တိဇနာ၊ န ဝိညတ္တိဇနာ အဝိညတ္တိဇနာ၊ တေသံ ဘာဝေါ အဝိညတ္တိဇနတ္တံ။ တသ္မာ အဝိညတ္တိဇနတ္တာ ကာယဝိညတ္တိဝစီဝိညတ္တိသင်္ခါတာနံ ကမ္မဒွါရာနံ အဇနကတ္တာ မနောဒွါရသင်္ခါတဿ ကမ္မဒွါရဿ ဝသေန စ အပ္ပဝတ္တနတော အဝိပါကသဘာဝတော စ အကမ္မဘာဝတော စ အပ္ပဝတ္တနတော စေဝ ပုညကိရိယဝတ္ထုဝသေန အပ္ပဝတ္တနတော စေဝ ပုညေဟိ နော သမာ အသဒိသာ။

၃၇-၉။ ပရိတ္တာရမ္မဏတ္တာ ဟိ တေသမေကန္တတော တေသံ ဝိပါကာနံ ဧကန္တတော ပရိတ္တာရမ္မဏတ္တာ ကာမာဝစရာရမ္မဏတ္တာ တေသု ဝိပါကေသု သတ္တပညတ္တိကာရမ္မဏာ ကရုဏာမုဒိတာ ကဒါစိ ကိသ္မိဉ္စိ ကာလေ န ဇာယန္တိ၊ တထာ ဧဝံ တိဿော ပန ဝိရတိယော ဧတေသု ဝိပါကေသု န ဇာယန္တိ၊ ဟိ ကသ္မာ ကာရဏာ န ဇာယန္တိ၊ ပဉ္စ သိက္ခာပဒါ ကုသလာတိ ကုသလာ နာမာတိ သတ္ထုနာ ဝုတ္တာ ယသ္မာ ကာရဏာ၊ တသ္မာ န ဇာယန္တိ။ တထာဓိပတိနောပေတ္ထ တထာ ဧဝမေဝ စတ္တာရော အဓိပတိနောပိ ဧတေသု ဝိပါကေသု န သန္တိ။ ကသ္မာ ? ဆန္ဒာဒီနိ ဓမ္မဇာတာနိ ပုရေတရံ ကတွာ အနုပ္ပဇ္ဇနတော န သန္တိ၊ ဣတိ ဝစနံ ဝိနိဒ္ဒိသေ အာစရိယော ကထေယျ။

၄၀။ အသင်္ခါရသသင်္ခါရဝိဓာနံ ပန ပုညတော ဝိပါကေသု အသင်္ခါရသသင်္ခါရဝိဓာနံ ပုညတော ကုသလတော အာဂမနဝသေန ဉေယျံ။ တတ္ထ ဧကစ္စာနံ အာစရိယာနံ မတေန မုခေ စလိတေ အာဒါသတလေ မုခနိမိတ္တစလနံ ဝိယ အသင်္ခါရဿ ကုသလဿ ဝိပါကော အသင်္ခါရော ဟောတိ၊ သသင်္ခါရဿ ကုသလဿ ဝိပါကော သသင်္ခါရော ဟောတိ၊ ဧဝံ အာဂမနဝသေန ဉေယျံ။ ပစ္စယတော စေဝ ဉေယျံ တတ္ထ ဧကစ္စာနံ အာစရိယာနံ မတေန ဗလဝန္တေဟိ ဝိဘူတေဟိ ပစ္စယေဟိ ကမ္မာဒီဟိ ဥပ္ပန္နော အသင်္ခါရော ဒုဗ္ဗလေဟိ သသင်္ခါရောတိ ဧဝံ ပစ္စယဝသေန ဝိညေယျံ ဇာနိတဗ္ဗံ။

၄၁-၂။ ဟီနာဒီနံ ပုညာနံ ဝိပါကတ္တာ ဟီနာဒယော ဝိပါကာ ပုညဝါဒိနာ ဇိနေန ပရိဒီပိတာ ဘဝန္တိ၊ ဣတိ ဧဝံ ဣမိနာ ဝုတ္တပ္ပကာရေန ပဝတ္တံ ဣဒံ အဋ္ဌဝိဓံ စိတ္တံ ဧကန္တေန သဝတ္ထုကံ ကာမလောကသ္မိံ ဇာယတေ၊ အညတ္ထ ပန အညာသု ဘူမီသု န ဇာယတေ။

ဝိညာဏပဉ္စကံ နိယတာရမ္မဏန္တိ စက္ခုဝိညာဏဿ ရူပမေဝ အာရမ္မဏံ၊ န သဒ္ဒါဒယော။ သေသတ္တယံ ယဒါ စက္ခုဝိညာဏေန ဂဟိတံ အာရမ္မဏံ ကရောတိ၊ တဒါဿ ရူပံ အာရမ္မဏံ ဟောတိ။ ယဒါ သောတဝိညာဏေန ဂဟိတံ၊ တဒါဿ သဒ္ဒေါ အာရမ္မဏော ဟောတိ။ ယဒါ ဃာနဇိဝှာကာယဝိညာဏေဟိ ဂဟိတာနိ အာရမ္မဏာနိ ကရောန္တိ၊ တဒါဿ ဂန္ဓရသဖောဋ္ဌဗ္ဗာရမ္မဏာနိ ဟောန္တိ။ မနောဝိညာဏဓာတုဒွယံ ယဒါ တဒါရမ္မဏံ ဟောတိ၊ တဒါ ဆအာရမ္မဏံ ဟောတိ၊ ဧဝံ အနိယတာရမ္မဏံ ဟောတိ။

ရူပါရမ္မဏာယ ကိရိယာမနောဓာတုယာ အပဂမော ပဒဋ္ဌာနံ အာသန္နကာရဏံ ဧတဿာတိ အပဂမပဒဋ္ဌာနံ၊ တာယ အာဝဇ္ဇနံ ကတွာ ဌိတာယ စက္ခုဝိညာဏေန ဒဿနကိစ္စံ ကရီယတီတိ အတ္ထော။ တထာဘာဝပစ္စုပဋ္ဌာနံ သမ္ပဋိစ္ဆနဘာဝေန ဂယှာကာရံ။ သန္တီရဏာဒိရသာ သောမနဿယုတ္တာ မနောဝိညာဏဓာတုသန္တီရဏတဒါရမ္မဏရသာ၊ ဥပေက္ခာယုတ္တာ ပန သန္တီရဏတဒါရမ္မဏပဋိသန္ဓိဘဝင်္ဂစုတိရသာ၊ တထာဘာဝပစ္စုပဋ္ဌာနာ သန္တီရဏာဒိဘာဝေန ဂယှာကာရံ။

၄၃။ ကာမာဝစရပုညဿ ကာမာဝစရကုသလဿ သောဠသ ဝိပါကာ ဟောန္တိ။ ဣတိ ယံ ဝစနံ ဝုတ္တံ၊ တံ ဝစနံ တိဟေတုကပုညဿ ဥက္ကဋ္ဌဿ ဝသေန အာစရိယော ပရိဒီပယေ။ အယမေတ္ထ အတ္ထော – ဆန္ဒာဓိပတေယျာဒီနံ ဝသေန ဥက္ကဋ္ဌတိဟေတုကကုသလံ ကာမသုဂတိယံ တိဟေတုကပဋိသန္ဓိံ ဒတွာ ပဝတ္တေ အဋ္ဌ အဟေတုကကုသလဝိပါကာနိ၊ အဋ္ဌ မဟာကုသလဝိပါကာနီတိ သောဠသ ပါကာနိ နိပ္ဖာဒေတိ။

၄၄။ ကုသလာနုဂတံ ကတွာ ဘာဇိတံ ကိံ မဟဂ္ဂတံ ဝိပါကစိတ္တံ ကုသလာနုဂတံ ကုသလံ အနုဂတံ ကတွာ မဟဂ္ဂတကုသလစိတ္တေန သမာနံ ကတွာ ဘဂဝတာ ဘာဇိတံ ဒေသိတံ။ ကိံ ကေန ကာရဏေန? ကာမာဝစရပုညံဝ ကာမာဝစရကုသလံ ဣဝ အသမာနဖလံ နတ္ထိ ယတော ယသ္မာ ကာရဏာ၊ တသ္မာ ဝိပါကံ ကုသလာနုဂတံ ကတွာ ဘဂဝတာ ဘာဇိတံ ဒေသိတံ။ ကာမာဝစရပုညံဝါတိ ယထာ အဋ္ဌဝိဓေသု ကာမာဝစရကုသလေသု ဥက္ကဋ္ဌတိဟေတုကကုသလံ ကာမသုဂတိယံ တိဟေတုကပဋိသန္ဓိံ ဒတွာ ပဝတ္တေ သောဠသ ကုသလဝိပါကာနိ နိပ္ဖာဒေတိ၊ တိဟေတုကဩမကဉ္စ ဒုဟေတုကဥက္ကဋ္ဌဉ္စ ကာမသုဂတိယံ ဒုဟေတုကပဋိသန္ဓိံ ဒတွာ ပဝတ္တေ တိဟေတုကဝိရဟိတာနိ အဟေတုကဒုဟေတုကသင်္ခါတာနိ ဝိပါကာနိ နိပ္ဖာဒေတိ၊ ဒုဟေတုကဩမကံ ပန ကာမသုဂတိယံ အဟေတုကပဋိသန္ဓိံ ဒတွာ ပဝတ္တေ အဋ္ဌ အဟေတုကဝိပါကာနိ နိပ္ဖာဒေတိ၊ ဧဝံ ကာမာဝစရပုညံ အသမာနဖလံဝ ဟောတိ။

၄၅။ ဂဇာဒီနံ ဆာယာ ဂဇာဒိသဒိသာ ဟောတိ ယထာ၊ ဧဝံ မဟဂ္ဂတဝိပါကံ သဗ္ဗထာ သဗ္ဗပကာရေန အတ္တနော ကုသလေဟေဝ သမာနံ ဟောတိ။

၄၆-၇။ ကာမာဝစရပုညံဝ နာပရာပရိယဝေဒနံ ဣဒံ မဟဂ္ဂတကုသလံ ကာမာဝစရပုညံဝ အပရာပရိယဝေဒနံ အပရသ္မိံ ဘဝေ ဖလဒါယကံ န ဟောတိ၊ ဈာနာ အပရိဟီနဿ ဘဝဂါမိနော ပဋိသန္ဓိဂါမိနော သတ္တဿ ကုသလာနန္တရံယေဝ ဖလံ ဥပ္ပဇ္ဇတိ၊ ဣတိ စ ဉာပနတ္ထံ ဧတဿ မဟဂ္ဂတဝိပါကဿ ကုသလာနုဂတံ ကုသလာနုဂမနံ ဘဂဝတာ ကတံ။

၄၈။ ဧတ္ထ ဧတသ္မိံ မဟဂ္ဂတဝိပါကေ ပဋိပဒါက္ကမော တေသဉ္စ ဟီနာဒီနံ ဘေဒတော ဈာနာဂမနတော မဟဂ္ဂတကုသလဈာနဿ အာဂမနဝသေန ဝိဘာဝိနာ ပဏ္ဍိတေန ဝေဒိတဗ္ဗော။

၄၉။ ဧတ္ထ ဝိပါကေ ဆန္ဒာဒိအဓိပတီနံ အဘာဝေါ၊ အယမေဝ ဝိသေသတော ကုသလတော အယံ ဧဝ ဝိသေသော၊ သေသံ သဗ္ဗပကာရံ အဝိသေသေန ကုသလေန သမံ မတံ ကထိတံ ဘဂဝတာ။

၅၀။ သုညတံ အနိမိတ္တန္တိ၊ တထာပဏိဟိတန္တိပိ သုညတံ အနတ္တာ၊ အနိမိတ္တံ အနိစ္စံ၊ အပ္ပဏိဟိတံ ဒုက္ခံ ဣတိ ဧတာနိ တီဏိ နာမာနိ မဂ္ဂဿ အနန္တရေ စတုဗ္ဗိဓဿ မဂ္ဂဿ အနန္တရေ စတုဗ္ဗိဓေ ဖလေ ဟောန္တိ။

၅၁။ လဗ္ဘန္တိ ပရဘာဂသ္မိံ မဂ္ဂါနန္တရေ ပဝတ္တဖလတော အညသ္မိံ ကာလေ ဝဠဉ္ဇနဖလေသု ဖလသမာပတ္တိသမာပဇ္ဇနကာလေသု ဧတာနိ တီဏိ နာမာနိ န လဗ္ဘန္တေ၊ ဖလေဟိ ဝိပဿနာဝသေနေဝ အနတ္တအနိစ္စဒုက္ခသင်္ခါတာနံ တိဏ္ဏံ ဝိပဿနာနံ ဝသေန ဧဝ တာနိ တီဏိ နာမာနိ လဗ္ဘရေ ဖလေဟိ လဗ္ဘန္တေ။

၅၂။ ဟောန္တိသာဓိပတီနေဝ လောကုတ္တရဖလာနိ တု ဧကန္တတော သာဓိပတီနိ ဧဝ ဟောန္တိ၊ လောကုတ္တရဖလာနိ ဌပေတွာ အညသ္မိံ ဝိပါကေ အဓိပတီ နတ္ထိ။

၅၃။ မဂ္ဂေါ အတ္တနော မဂ္ဂဘာဝေန မဂ္ဂေါ နာမ ဝုစ္စတေ ဘဂဝတာ။ ဖလံ မဂ္ဂံ ဥပါဒါယ အဋ္ဌင်္ဂိကမဂ္ဂံ နိဿယံ ကတွာ မဂ္ဂေါ နာမ ဣတိ ဝစနံ ဝုစ္စတေ ဘဂဝတာ။

၅၄။ ဣမေ သတ္တ အကုသလဝိပါကာ။ ဂါဝေါ စရန္တိ ဧတ္ထာတိ ဂေါစရော၊ တဿဒိသတ္တာ ဂေါစရော အာရမ္မဏန္တိ အတ္ထော၊ အနိဋ္ဌော စ အနိဋ္ဌမဇ္ဈတ္တော စ အနိဋ္ဌာနိဋ္ဌမဇ္ဈတ္တာ၊ တေယေဝ ဂေါစရော အနိဋ္ဌာနိဋ္ဌမဇ္ဈတ္တဂေါစရော၊ တသ္မိံ အနိဋ္ဌာနိဋ္ဌမဇ္ဈတ္တဂေါစရေ ဝတ္တရေ ဝတ္တန္တိ။ သုခါဒိတ္တယယုတ္တာ တေ တေ အဋ္ဌ အဟေတုကကုသလဝိပါကာ သုခါဒိတ္တယယုတ္တာ သုခသောမနဿဥပေက္ခာဝေဒနာဟိ သဟဂတာ။ ဒုက္ခုပေက္ခာယုတာ ဣမေ ဣမေ သတ္တ အဟေတုကအကုသလဝိပါကာ ဒုက္ခုပေက္ခာဝေဒနာဟိ သဟဂတာ။

၅၅။ ဧဝံ ဆတ္တိံသဓာ ပါကံ ပါကသာသနပူဇိတော သုဂတော။ ကိံ ဝိသိဋ္ဌော? ပါကံ နာမ အသုရံ၊ တံ သာသတိ၊ ပါကေန အတ္တနော ပုညဖလေန ဒေဝေ အနုသာသတီတိ ဝါ ပါကသာသနော၊ ကော သော? သက္ကော။ တေန ပါကသာသနေန ပူဇိတော သဝိပါကာဝိပါကေသု ကုသလဝိပါကကိရိယေသု ကုသလော ဆေကော ဧဝံ ဣမိနာ မယာ ဝုတ္တပ္ပကာရေန ပါကံ စိတ္တံ ဆတ္တိံသပ္ပကာရံ အဗြွိ အဝေါစ။

အနုဠာရေသူတိ ခုဒ္ဒကေသု။ တထာဘာဝပစ္စုပဋ္ဌာနာ ဆဠာရမ္မဏဝိဇာနနဂယှာကာရာ။ သဗ္ဗညုတညာဏဿ ဂတိ ဝိယ ဂတိ ဧတိဿာတိ သဗ္ဗညုတညာဏဂတိကာ။

၅၆။ သောမနဿယုတ္တာနဋ္ဌ၊ ကုသလာကုသလာနိ စ သောမနဿယုတ္တာနိ အဋ္ဌ ကုသလာကုသလာနိ စ၊ ကြိယတော ပန ပဉ္စ ဧဝံ ဣမိနာ မယာ ဝုတ္တပ္ပကာရေန ဟာသစိတ္တာနိ တေရသ။

၅၇။ ပုထုဇ္ဇနာ ဟသန္တေတ္ထ ဧတ္ထ ဧတေသု တေရသစိတ္တေသု ပုထုဇ္ဇနာ ပန အဋ္ဌဟိ စိတ္တေဟိ ဟသန္တိ ။ သေခါ သတ္တ အရိယာ ဆဟိ စိတ္တေဟိ ဟသန္တိ။ အသေခါ ခီဏာသဝါ ပဉ္စဟိ စိတ္တေဟိ ဟသန္တိ။

ကုသလာနိ ပန ရူပါရူပကုသလာနိ သေခပုထုဇ္ဇနာနံ ဥပ္ပဇ္ဇန္တိ။ ဣမာနိ ရူပါရူပကိရိယာနိ ခီဏာသဝါနံ ဘာဝနာယေဝ ကာရော ဘာဝနာကာရော၊ တဿ ဝသော ဘာဝနာကာရဝသော၊ တေန ပဝတ္တာနိ။ တာနိ ရူပါရူပကုသလာနိ ဘာဝနာပုညဝသပ္ပဝတ္တာနိ ဘာဝနာကုသလဝသေန ပဝတ္တာနိ။ ဣမေသံ ရူပါရူပကိရိယာနံ တေသဉ္စ ရူပါရူပကုသလာနံ အယမေဝ ဝိသေသော။

၅၈-၉။ ယာ ပုထုဇ္ဇနကာလသ္မိံ၊ အဘိနိဗ္ဗတ္တိတာ ပန ပုထုဇ္ဇနကာလသ္မိံ ပုထုဇ္ဇနဘာဝဋ္ဌိတေန ယောဂိနာ အဘိနိဗ္ဗတ္တိတာ ယာ ရူပါရူပသမာပတ္တိ၊ သာ ရူပါရူပသမာပတ္တိ သော ယောဂီ ခီဏာသဝေါ ဘိက္ခု ဟုတွာ နံ ရူပါရူပသမာပတ္တိံ ယာဝ ယတ္တကံ ကာလံ န သမာပဇ္ဇတေ၊ တာဝ တတ္တကေန ကာလေန တဿ ခီဏာသဝဘိက္ခုနော ကုသလာ ဧဝ ရူပါရူပကုသလာ ဧဝ ဟောတိ။ ခီဏာသဝေန သာ ရူပါရူပသမာပတ္တိ သစေ ယဒိ သမာပန္နာ သမာပဇ္ဇိတာ၊ ကြိယာ ရူပါရူပကိရိယာ ဟောတိ။

၆၀။ ဧကာဒသဝိဓံ ကာမေ ကာမာဝစရေ ကိရိယစိတ္တံ ဧကာဒသဝိဓံ၊ ရူပေ ရူပါဝစရေ ပဉ္စ၊ အရူပိသု စတ္တာရိ ဣတိ သဗ္ဗာနိ ကြိယစိတ္တာနိ ဝီသတိ။

၆၁။ လောကုတ္တရကြိယစိတ္တံ၊ ပန ကသ္မာ န ဝိဇ္ဇတိ? မဂ္ဂဿ ဧကစိတ္တက္ခဏိကတ္တာ န ဝိဇ္ဇတိ။ အယမေတ္ထ အဓိပ္ပာယော – စတုမဂ္ဂဋ္ဌော ခီဏာသဝေါ နာမ န ဟောတိ၊ မဂ္ဂါနန္တရမေဝ ဖလံ ဥပ္ပဇ္ဇတိ၊ မဂ္ဂေါပိ ဧကစိတ္တက္ခဏိကော ယဒိ စိတ္တံ ဗဟုစိတ္တက္ခဏိကံ၊ ဖလသမင်္ဂိနော ခီဏာသဝဿပိ မဂ္ဂစိတ္တံ ဘဝေယျ၊ ဧဝံ သတိ လောကုတ္တရကိရိယစိတ္တံ ဘဝေယျာတိ အဓိပ္ပာယော။

၆၂။ ကြိယာကြိယာပတ္တိဝိဘာဂဒေသကော ကရဏံ ကြိယံ၊ ကြိယံ နာမ ဝိနယပရိယာယေန အကတ္တဗ္ဗဿ ကရဏံ၊ န ကရဏံ အကြိယံ၊ အကြိယံ နာမ ဝိနယပရိယာယေန ကတ္တဗ္ဗဿ အကရဏံ၊ အာပဇ္ဇနံ အာပတ္တိ၊ ကြိယာယ ကရဏေန အာပတ္တိ ကြိယာပတ္တိ၊ အကြိယာယ အကရဏေန အာပတ္တိ အကြိယာပတ္တိ၊ ကြိယာပတ္တိ စ အကြိယာပတ္တိ စ ကြိယာပတျာကြိယာပတ္တိယော၊ ဧကဿ အာပတ္တိ-သဒ္ဒဿ လောပံ ကတွာ ‘‘ကြိယာကြိယာပတ္တိယော’’တိ ဝုတ္တံ၊ တာသံ ဝိဘာဂေါ ကြိယာကြိယာပတ္တိဝိဘာဂေါ၊ ဒေသေတီတိ ဒေသကော၊ တဿ ဒေသကော ကြိယာကြိယာပတ္တိဝိဘာဂဒေသကော။ ဏွု-တု-ပစ္စယေသု ပရေသု ကမ္မတ္ထေ ဆဋ္ဌီ ဟောတီတိ ဝဒန္တိ။ ဇိနော ကိံ ဝိသိဋ္ဌော? ကြိယာကြိယာပတ္တိဝိဘာဂဒေသကော ဟိတာဟိတာနံ သကြိယာကြိယာရတော ဟိတဿ သကြိယာယ ရတော၊ အဟိတဿ အကြိယာယ ရတော၊ ယံ ကြိယာကြိယံ၊ ကြိယံ နာမ ကြိယစိတ္တံ၊ အကြိယံ နာမ ကုသလာကုသလဝိပါကစိတ္တံ ဣစ္ဆန္တိ ဧကေ။ တံ န။ ကသ္မာ? ကုသလာဓိကာရေ ‘‘ကုသလံ မုနိနာ လပိတံ’’ အကုသလာဓိကာရေ ‘‘ပါပမာနသံ ပါပါပါပေသွပါပေန ဝုတ္တံ’’ ဝိပါကာဓိကာရေ ‘‘ပါကံ သုဂတော အဗြဝီ’’တိ ဝတွာ ပုန ကြိယာဓိကာရေ ‘‘ကုသလာကုသလဝိပါကာနိ အဝေါစာ’’တိ ဝစနဿ ဝတ္တဗ္ဗာဘာဝတော။ တေန ဝါဿ ကြိယာကြိယံ ဧတဿာတိ ကြိယာကြိယံ၊ ကြိယာကြိယသဘာဝန္တိ အတ္ထော။ အယမေဝ သာရတော ပစ္စေတဗ္ဗော။ ယံ ကြိယာကြိယံ စိတ္တံ ကြိယာကြိယာသဘာဝံ အဝေါစ ဒေသေသိ၊ တံ ကြိယာကြိယံ ကြိယာကြိယသဘာဝံ မယာ သမီရိတံ၊ သမ္မာ ပကာရေန ဤရိတံ ကထိတံ။

၆၄။ ဧကူနနဝုတိသဗ္ဗေ၊ စိတ္တုပ္ပာဒါ မဟေသိနာ လောကုတ္တရေ အဋ္ဌ ကတွာ ဧကူနနဝုတိ သဗ္ဗေ စိတ္တုပ္ပာဒါ မဟေသိနာ တထာဂတေန သမာသတော သင်္ခေပတော နိဒ္ဒိဋ္ဌာ။

၆၅။ ပိဋကေ အဘိဓမ္မသ္မိံ၊ ယေ ဘိက္ခူ ပါဋဝတ္ထိနော အဘိဓမ္မပိဋကေ ပဋုနော ဘာဝေါ ပါဋဝံ၊ တေန အတ္ထော ပါဋဝတ္ထော၊ သော ဧတေသံ အတ္ထီတိ ပါဋဝတ္ထိနော၊ ဆေကဘာဝတ္ထိကာ ယေ ဘိက္ခူ၊ တေဟိ ဘိက္ခူဟိ အယံ အဘိဓမ္မာဝတာရော ဥဂ္ဂဟေတဗ္ဗော သိက္ခိတဗ္ဗော ပုနပ္ပုနံ စိန္တိတဗ္ဗော။

၆၆။ ယေ ဇနာ တဿင်္ကာသေန တံသန္နိဘေန အဘိဓမ္မာဝတာရေန အဘိဓမ္မမဟောဒဓိံ မဟာသာဂရသန္နိဘံ အဘိဓမ္မံ တရန္တိ၊ တေ ဣမံ လောကံ ပရလောကဉ္စ တရန္တိ။ ဣတီတိ ပရိသမာပနေ။

ဣတိ အဘိဓမ္မာဝတာရဋီကာယ

စိတ္တနိဒ္ဒေသဝဏ္ဏနာ နိဋ္ဌိတာ။

ပဌမော ပရိစ္ဆေဒေါ။