📜
၁၉။ ဧကူနဝီသတိမော ပရိစ္ဆေဒေါ
ကင်္ခါဝိတရဏဝိသုဒ္ဓိနိဒ္ဒေသဝဏ္ဏနာ
၁၂၃၁။ ဣစ္စေဝမာဒိဗာတ္တိံသကောဋ္ဌာသာနံ ¶ ပစ္စယဿ ဟေတုပစ္စယေ တာဝ ယောဂီ မနသာ ပရိဂ္ဂဏှာတိ။
၁၂၃၃။ ဟေတွင်္ကုရဿ ဗီဇံ တု ဗီဇံ အင်္ကုရဿ ဟေတုဇနကံ၊ ပထဝါဒယော အင်္ကုရဿ ပစ္စယာ။
၁၂၃၄။ ပဉ္စ ¶ ဓမ္မာတိ အဝိဇ္ဇာတဏှုပါဒါနကမ္မာဟာရာ ဟေတုပစ္စယာ ဓမ္မာ။
၁၂၃၅။ ကမ္မံ ပုတ္တဿ ဇနကော ပိတာ ဝိယ နာမရူပဿ ဇနကံ။
၁၂၄၀။ ယာ သာတိ ယာ သာ ကင်္ခါ။ ပုဗ္ဗန္တေ ပုဗ္ဗကောဋ္ဌာသေ။
၁၂၄၁။ သဗ္ဗထာ သဗ္ဗကောဋ္ဌာသတော အနဝသေသာဝ တဿ ယောဂိနော သာ ကင်္ခါ ပဟိယျတိ နာသီယတေ။
၁၂၄၃။ အတ္ထသာဓိကာတိ ကုသလပက္ခေ ဒါနာဒိအတ္ထသာဓိကာ၊ အကုသလပက္ခေ ပါဏာတိပါတာဒိအတ္ထသာဓိကာ။
တံ ဝိပါကန္တိ ဥပဃာတကကမ္မဿ တံ ဝိပါကံ ဥပ္ပန္နံ နာမ ဟောတိ။ ဧဝံ ဧကော ယောဂီ ကမ္မဝိပါကဝသေန နာမရူပဿ ပစ္စယပရိဂ္ဂဟံ ကရောတိ။
၁၂၄၆။ ဟေတုဖလဿ သမ္ဗန္ဓဝသေနာတိ ဟေတုဖလသမ္ဗန္ဓဝသေန ဣဒံ နာမရူပံ ကေဝလံ ဧကန္တေန ပဝတ္တတိ၊ ဣတိ သမ္မာ အဝိပရီတာကာရေန သံ အနုပဿတိ။
၁၂၄၇။ ပါကပ္ပဝတ္တိတော ¶ ဥဒ္ဓံ ပါကပဋိဝေဒကံ န ပဿတိ န ဇာနိယတေ။
၁၂၅၀-၁။ အပ္ပဝတ္တိ နာမ န ဒိဿတိ၊ ဥပပန္နံ ဒိဿတိ။ တိတ္ထိယာ ဧတမတ္ထံ အနညာယ အဇာနိတွာ အသယံဝသီ သတ္တသညန္တိ ‘‘သတ္တော’’တိ သညံ ဂဟေတွာန သဿတဥစ္ဆေဒဒဿိနော အညမညံ ဝိရောဓိနော ဟုတွာ ဒွါသဋ္ဌိဒိဋ္ဌိံ ဂဏှန္တိ။
၁၂၅၄။ ဥဘောတိ ဥဘော ကမ္မဝိပါကာ အညမညတော သုညာ။ န စ ကမ္မံ ဝိနာ ဖလန္တိ ကမ္မံ ဝိနာ ဖလံ န စ ဟောတိ။
၁၂၅၅။ သမ္ဘာရေဟီတိ ¶ သူရိယာဒိသမ္ဘာရေဟိ။
၁၂၅၈။ ဟေတုသမ္ဘာရပစ္စယာတိ ဟေတုနာ စ သမ္ဘာရပစ္စယေဟိ စ။
ဣတိ အဘိဓမ္မာဝတာရဋီကာယ
ကင်္ခါဝိတရဏဝိသုဒ္ဓိနိဒ္ဒေသဝဏ္ဏနာ နိဋ္ဌိတာ။
ဧကူနဝီသတိမော ပရိစ္ဆေဒေါ။