📜

ဂန္ထာရမ္ဘကထာဝဏ္ဏနာ

၁။ ပရမနိပုဏဝိစိတ္တနယသမန္နာဂတံ သကသမယသမယန္တရဂဟနဝိဂ္ဂါဟဏသမတ္ထံ သုဝိမလဝိပုလပညာဝေယျတ္တိယဇနနံ ပကရဏမိဒမာရဘန္တောယမာစရိယော ပဌမံ တာဝ ရတနတ္တယပ္ပဏာမကရဏေန အန္တရာယနိဝါရဏဉ္စေဝ ပညာပါဋဝဉ္စ ပတ္ထေတိ။ ရတနတ္တယပ္ပဏာမော ဟိ အတ္ထတော ပဏာမကိရိယာဘိနိပ္ဖာဒိကာ ကုသလစေတနာ။ သာ စ ဝန္ဒနေယျဝန္ဒကာနံ ခေတ္တဇ္ဈာသယသမ္ပဒါဟိ ဒိဋ္ဌဓမ္မဝေဒနီယဘူတာ ယထာလဒ္ဓသမ္ပတ္တိနိမိတ္တကဿ ကမ္မဿ အနုဗလပ္ပဒါနဝသေန တန္နိဗ္ဗတ္တိတဝိပါကသန္တတိယာ အန္တရာယကရာနိ ဥပပီဠကဥပစ္ဆေဒကကမ္မာနိ ပဋိဗာဟိတွာ တန္နိဒါနာနံ ယထာဓိပ္ပေတသိဒ္ဓိဝိဗန္ဓကာနံ ရောဂါဒိအန္တရာယာနမပ္ပဝတ္တိံ သာဓေတိ၊ ရာဂါဒိမလဝိက္ခာလနေန စ စိတ္တသန္တာနံ ပရိသောဓေတွာ တန္နိဿိတာယ ပညာယ ယထာဓိပ္ပေတသိဒ္ဓိသမ္ပာဒကံ တိက္ခဝိသဒဘာဝမာဝဟတိ။ ကိဉ္စိ အာစိဏ္ဏမေတံ ပဏ္ဍိတာနံ၊ ယဒိဒံ ဂန္ထသမာရမ္ဘေ ရတနတ္တယပ္ပဏာမကရဏံ၊ တသ္မာ သပ္ပုရိသာစာရာနုရက္ခဏတ္ထဉ္စ အာဒိမှိ ရတနတ္တယဝန္ဒနာ အာရဒ္ဓါတိ ဧဝမာဒိနာ အညာနိပိ ဗဟူနိ ပယောဇနာနိ နိဒ္ဓါရေတဗ္ဗာနိ။ တာနိ ပန တတ္ထ တတ္ထ ဗဟုဓာ ဝိတ္ထာရိတာနီတိ တံ ပပဉ္စပရိဿမံ ဌပေတွာ ယထာနုပ္ပတ္တမေဝ တာဝ ဝဏ္ဏယိဿာမ။

ဧတ္ထ စ ရတနတ္တယပ္ပဏာမံ ကတ္တုကာမော တထာဂတမူလကတ္တာ သေသရတနာနံ ပဌမံ တာဝ တထာဂတဿ ထောမနာပုဗ္ဗင်္ဂမံ ပဏာမမာရဘန္တော အာဟ ‘‘အနန္တကရုဏာပည’’န္တိအာဒိ။ ထောမနာပုဗ္ဗင်္ဂမေန ဟိ ပဏာမေန သတ္ထု ဂုဏာတိသယယောဂေါ၊ တတော စဿ အနုတ္တရဝန္ဒနီယဘာဝေါ၊ တေန စ အတ္တနော ဝန္ဒနာယ ခေတ္တင်္ဂတဘာဝေါ၊ ခေတ္တင်္ဂတာယ စ ဝန္ဒနာယ ယထာဓိပ္ပေတနိပ္ဖတ္တိယာ ဟေတုဘာဝေါ စ ဒဿိတော ဟောတိ။

တတ္ထ ဝန္ဒိတွာတိ ပုဗ္ဗကာလကိရိယာနိဒ္ဒေသော။ တဿ ပန ဩသာနဂါထာယံ ‘‘ပဝက္ခာမီ’’တိ ဣမိနာ အပရကာလကိရိယာဝစနေန သဟ သမ္ဗန္ဓော။ ဗုဒ္ဓန္တိ ဝန္ဒနကိရိယာယ ကမ္မနိဒ္ဒေသော။ ‘‘အနန္တကရုဏာပည’’န္တိအာဒိကံ ပန တဗ္ဗိသေသနံ။ တတ္ထ ကိရတီတိ ကရုဏာ၊ ပရဒုက္ခံ ဝိက္ခိပတိ အပနေတီတိ အတ္ထော။ ကိရီယတိ ဒုက္ခိတေသု ပသာရီယတီတိ ဝါ ကရုဏာ။ အထ ဝါ ကရောတီတိ ကရုဏာ၊ ပရဒုက္ခေ သတိ သာဓူနံ ကမ္ပနံ ဟဒယခေဒံ ဇနယတီတိ အတ္ထော။ ကိဏာတီတိ ဝါ ကရုဏာ၊ ပရဿ ဒုက္ခံ ပစ္စယဝေကလ္လကရဏတော ဟိံသတီတိ အတ္ထော။ ပဇာနာတီတိ ပညာ၊ ယထာသဘာဝံ ပကာရေဟိ ပဋိဝိဇ္ဈတီတိ အတ္ထော။ ကရုဏာ စ ပညာ စ ကရုဏာပညာ၊ နတ္ထိ ဧတာသံ အန္တောတိ အနန္တာ၊ အနန္တာ ကရုဏာပညာ ဧတဿာတိ အနန္တကရုဏာပညော၊ တံ အနန္တကရုဏာပညံ။

ဧတ္ထ စ ဥပ္ပာဒဝယန္တတာဝသေန စေဝ သန္တတိပရိယောသာနဝသေန စ သတိပိ ဘဂဝတော ကရုဏာပညာနံ သပရိယန္တဘာဝေ အနန္တာရမ္မဏေသု ပဝတ္တနတော အနန္တတာ ဝေဒိတဗ္ဗာ။ သမ္မာသမ္ဗုဒ္ဓဿ ဟိ သဗ္ဗသတ္တာနံ ဒုက္ခာပနယနာကာရပ္ပဝတ္တာ အနညသာဓာရဏာ မဟာကရုဏာ ကဉ္စိ သတ္တံ အဝဇ္ဇေတွာ သဗ္ဗေသု သတ္တေသု နိရဝသေသေန ပဝတ္တတိ၊ တထာ သဗ္ဗဓမ္မသဘာဝဗောဓနသမတ္ထာ သဗ္ဗညုတညာဏသင်္ခါတာ ပညာပိ သကလဉေယျဓမ္မေသု အနဝသေသတော ပဝတ္တတိ၊ တသ္မာ အနန္တာရမ္မဏပ္ပဝတ္တကရုဏာဉာဏဝန္တတာယ အနန္တကရုဏာပညော ဘဂဝါ။ ကရုဏာပညာဂ္ဂဟဏေန စေတ္ထ ဘဂဝတော သဗ္ဗလောကိယလောကုတ္တရဂုဏသမ္ပတ္တိ ဒဿိတာ ဟောတိ။ တထာ ဟိ ကရုဏာဂ္ဂဟဏေန လောကိယေသု မဟဂ္ဂတဘာဝပ္ပတ္တာသာဓာရဏဂုဏဒီပနတော သကလလောကိယဂုဏသမ္ပတ္တိ ဒဿိတာ၊ ပညာဂ္ဂဟဏေန သဗ္ဗညုတညာဏပဒဋ္ဌာနမဂ္ဂဉာဏဒီပနတော သဗ္ဗလောကုတ္တရဂုဏသမ္ပတ္တိ ဒဿိတာတိ။

အပိစ သဗ္ဗဗုဒ္ဓဂုဏာနံ ကရုဏာ အာဒိ၊ ပညာ ပရိယောသာနံ။ မဟာကရုဏာသဉ္စောဒိတမာနသော ဟိ ဘဂဝါ သံသာရပင်္ကတော သတ္တာနံ သမုဒ္ဓရဏတ္ထာယ ကတာဘိနီဟာရော အနုပုဗ္ဗေန ပါရမိယော ပူရေတွာ အနုတ္တရသမ္မာသမ္ဗောဓိယာ အဓိဂမေန သကလဗုဒ္ဓဂုဏေ ပဋိလဘိ။ ဣတိ သကလဗုဒ္ဓဂုဏာနံ တန္နိဒါနဘာဝတော ကရုဏာ သဗ္ဗဗုဒ္ဓဂုဏာနမာဒိ၊ သဗ္ဗညုတညာဏပဒဋ္ဌာနဿ ပန မဂ္ဂဉာဏဿ ပဋိလဘနတော ဥတ္တရိကရဏီယာဘာဝတော ပညာ ပရိယောသာနံ။ အာဒိပရိယောသာနဒဿနေန စ သကလဗုဒ္ဓဂုဏာ နယတော ဒဿိတာ ဟောန္တိ။ နယဂ္ဂါဟော ဧဝ ဟိ သဗ္ဗဗုဒ္ဓဂုဏာနံ ဒဿနုပါယော၊ ဣတရထာ တာဒိသဿ သဗ္ဗညုဗုဒ္ဓဿပိ ဝစနပထာတီတံ တထာဂတဂုဏံ အနုပဒံ ဝဏ္ဏေန္တော ကော နာမ ပရိယောသာနမာဟရိတုံ သက္ကုဏေယျာတိ။

ဧဝံ ကရုဏာပညာမုခေန သင်္ခေပတော သကလဗုဒ္ဓဂုဏေဟိ ဘဂဝန္တံ ထောမေတွာပိ ပုန အတ္တနော ဗုဒ္ဓဂုဏသံကိတ္တနေ အတိတ္တာဘာဝေန စေဝ ပရေသဉ္စ ပသာဒဗာဟုလ္လဇနနတ္ထံ တဒန္တောဂဓေပိ ဝိသိဋ္ဌဂုဏေ ပဓာနဘာဝေန နီဟရိတွာ ဒဿေန္တော အာဟ ‘‘တထာဂတ’’န္တိအာဒိ။ တတ္ထ ‘‘တထာဂတ’’န္တိ တထာ အာဂတတာဒီဟိ အဋ္ဌဟိ ကာရဏေဟိ တထာဂတံ။ ဝုတ္တဉှေတံ (ဒီ။ နိ။ အဋ္ဌ။ ၁။၇၊ မ။ နိ။ အဋ္ဌ။ ၁။၁၂၊ ဗု။ ဝံ။ အဋ္ဌ။ ၁။၂ နိဒါနကထာ၊ အ။ နိ။ အဋ္ဌ။ ၁။၁။၁၇၀) –

‘‘အဋ္ဌဟိ ကာရဏေဟိ ဘဂဝါ တထာဂတော၊ တထာ အာဂတောတိ တထာဂတော၊ တထာ ဂတောတိ တထာဂတော၊ တထလက္ခဏံ အာဂတောတိ တထာဂတော၊ တထဓမ္မေ ယာထာဝတော အဘိသမ္ဗုဒ္ဓါတိ တထာဂတော၊ တထဒဿိတာယ တထာဂတော၊ တထဝါဒိတာယ တထာဂတော၊ တထာကာရိတာယ တထာဂတော၊ အဘိဘဝနဋ္ဌေန တထာဂတော’’တိ။

‘‘ကထံ ဘဂဝါ တထာ အာဂတောတိ တထာဂတော? ယထာ သဗ္ဗလောကဟိတာယ ဥဿုက္ကမာပန္နာ ပုရိမကာ သမ္မာသမ္ဗုဒ္ဓါ အာဂတာ၊ ကိံ ဝုတ္တံ ဟောတိ? မနုဿတ္တာဒိအဋ္ဌင်္ဂသမန္နာဂတေန ယေန အဘိနီဟာရေန တေ ဘဂဝန္တော အာဂတာ၊ တေနေဝ စ အဘိနီဟာရေန အယမ္ပိ ဘဂဝါ အာဂတော၊ ယထာ စ တေ ဘဂဝန္တော သမတိံသ ပါရမိယော ပူရေတွာ ပဉ္စမဟာပရိစ္စာဂါဒီနိ သမ္ပာဒေတွာ အာဂတာ၊ ယထာ စ တေ သတ္တတိံသ ဗောဓိပက္ခိယဓမ္မေ ဘာဝေတွာ ဗြူဟေတွာ အာဂတာ၊ တထာ အယမ္ပိ ဘဂဝါ အာဂတောတိ ဧဝံ တာဝ တထာ အာဂတော’’တိ တထာဂတော။ (၁)

‘‘ကထံ တထာ ဂတောတိ တထာဂတော? ယထာ သမ္ပတိဇာတာ တေ ဘဂဝန္တော သတ္တပဒဝီတိဟာရေန ဂတာ၊ ယထာ ဝါ တေ သမထဝိပဿနာမဂ္ဂေဟိ တံ တံ အကုသလပက္ခံ ဝိဓမိတွာ ဂတာ၊ တထာ အယမ္ပိ ဘဂဝါ ဂတော၊ ဧဝံ တထာ ဂတောတိ တထာဂတော။ (၂)

‘‘ကထံ တထလက္ခဏံ အာဂတောတိ တထာဂတော? ယသ္မာ တေသံ တေသံ ဓမ္မာနံ ယံ သဘာဝသရသလက္ခဏံ တထံ အဝိတထံ၊ တဉ္စေသ တထလက္ခဏံ အာဂတော ယာထာဝတော အဓိဂတော၊ တသ္မာ တထလက္ခဏံ အာဂတောတိ တထာဂတော ဂမနတ္ထာနံ ဗုဇ္ဈနတ္ထသမ္ဘဝတော။ တထာ ဟိ ဝဒန္တိ ‘ယေ ဂတိအတ္ထာ၊ တေ ဗုဇ္ဈနတ္ထာ။ ယေ ဗုဇ္ဈနတ္ထာ၊ တေ ဂတိအတ္ထာ’တိ။ (၃)

‘‘ကထံ တထဓမ္မေ ယာထာဝတော အဘိသမ္ဗုဒ္ဓါတိ တထာဂတော? ယသ္မာ ‘ဣဒံ ဒုက္ခန္တိ၊ ဘိက္ခဝေ၊ တထမေတံ အဝိတထမေတ’န္တိအာဒိဝစနတော (သံ။ နိ။ ၅။၁၀၉၀) ‘အဝိဇ္ဇာယ သင်္ခါရာနံ ပစ္စယဋ္ဌော သင်္ခါရာနံ အဝိဇ္ဇာပစ္စယသမ္ဘူတသမုဒါဂတဋ္ဌော တထော အဝိတထော အနညထော’တိအာဒိဝစနတော စ တထဓမ္မသင်္ခါတေ သစ္စပဋိစ္စသမုပ္ပာဒေ ယာထာဝတော အာဂတော အဘိသမ္ဗုဒ္ဓါ၊ တသ္မာ တထဓမ္မေ ယာထာဝတော အဘိသမ္ဗုဒ္ဓါတိ တထာဂတော။ (၄)

‘‘ကထံ တထဒဿိတာယ တထာဂတော? ယသ္မာ အပရိမာဏာသု လောကဓာတူသု အပရိမာဏာနံ သတ္တာနံ ဆဒွါရဂ္ဂဟိတေ အာရမ္မဏေ အဝိပရီတမေဝ ပဿတိ ဇာနာတိ၊ ဉတွာ စ ပနေဝံ ‘ကတမံ တံ ရူပါယတနံ၊ ယံ စတုန္နံ မဟာဘူတာနံ ဥပါဒါယာ’တိအာဒိနာ (ဓ။ သ။ ၆၁၆ အာဒယော) တထမေသ အဝိပရီတံ ဝိဘဇတိ ဒဿေတိ၊ တသ္မာ တထံ အာဂစ္ဆတိ ပဿတိ ဇာနာတိ၊ တံ ဝါ အာဂမယတိ ဒဿေတီတိ တထာဂတောတိ ဧဝံ တထဒဿိတာယ တထာဂတော။ (၅)

‘‘ကထံ တထဝါဒိတာယ တထာဂတော? ယသ္မာ ဧသ အဘိသမ္ဗောဓိတော ယာဝ ပရိနိဗ္ဗာနာ ရာဂမဒါဒိနိမ္မထနဝသေန ဧကသဒိသမေဝ ဓမ္မံ တထံ အဝိတထံ ဘာသတိ၊ တသ္မာ တထံ ဂဒတိ၊ တထော အဝိပရီတော အာဂဒေါဝစနမေတဿာတိ ဝါ ဒ-ကာရဿ တ-ကာရံ ကတွာ တထာဂတောတိ ဝုတ္တောတိ ဧဝံ တထဝါဒိတာယ တထာဂတော။ (၆)

‘‘ကထံ တထာကာရိတာယ တထာဂတော? ဘဂဝါ ဟိ ‘ယထာ ဝါဒီ တထာ ကာရီ’တိ (အ။ နိ။ ၄။၂၃၊ စူဠနိ။ ပေါသာလမာဏဝပုစ္ဆာနိဒ္ဒေသ ၈၃) ဝစနတော အတ္တနော ဝါစာယ အနုရူပမေဝ ကရောတိ၊ တသ္မာ ယထာ ဝါစာ၊ တထာ ကာယောပိ ဂတော ပဝတ္တော ဣမဿာတိ တထာဂတောတိ ဧဝံ တထာကာရိတာယ တထာဂတော။ (၇)

‘‘ကထံ အဘိဘဝနဋ္ဌေန တထာဂတော? ယသ္မာ ပနေသ အနုပမာယ သကလလောကိယလောကုတ္တရဂုဏသမ္ပဒါယ သမန္နာဂတတ္တာ သဒေဝကံ လောကံ အဘိဘုယျ ပဝတ္တတိ၊ တသ္မာ အဘိဘဝနဋ္ဌေန တထာဂတောတိ ဝုစ္စတီ’’တိ။

တတြေဝံ ပဒသိဒ္ဓိ ဝေဒိတဗ္ဗာ – အဂဒေါ ဝိယာတိ အဂဒေါ၊ ဒေသနာဝိလာသော စေဝ ပုညုဿယော စ။ တေန ဟေသ မဟာနုဘာဝေါ ဘိသက္ကော ဝိယ ဒိဗ္ဗာဂဒေန သပ္ပေ သဗ္ဗပရပ္ပဝါဒိနော၊ သဒေဝကဉ္စ လောကံ အဘိဘဝတိ။ ဣတိ သဗ္ဗလောကာဘိဘဝနေ တထော အဝိပရီတော ယထာဝုတ္တော အဂဒေါ ဧတဿာတိ ဒ-ကာရဿ တ-ကာရံ ကတွာ တထာဂတောတိ ဝုစ္စတီတိ အယမေတ္ထ သင်္ခေပေါ။ ဝိတ္ထာရော ပန ဒီဃာဂမသံဝဏ္ဏနာဒီသု ဂဟေတဗ္ဗော။ အာဟ စေတ္ထ –

‘‘ယထေဝ လောကမှိ ဝိပဿိအာဒယော၊

သဗ္ဗညုဘာဝံ မုနယော ဣဓာဂတာ၊

တထာ အယံ သကျမုနီပိ အာဂတော၊

တထာဂတော ဝုစ္စတိ တေန စက္ခုမာ။ (ဒီ။ နိ။ အဋ္ဌ။ ၁။၇၊ မ။ နိ။ အဋ္ဌ။ ၁။၁၂၊ အ။ နိ။ အဋ္ဌ။ ၁။၁။၁၇၀၊ ဗု။ ဝံ။ အဋ္ဌ။ ၁။၂ နိဒါနကထာ)၊

‘‘ပဟာယ ကာမာဒိမလေ ယထာ ဂတာ၊

သမာဓိဉာဏေဟိ ဝိပဿိအာဒယော၊

မဟေသိနော သကျမုနီ ဇုတိန္ဓရော၊

တထာ ဂတော တေန တထာဂတော မတော။

‘‘တထဉ္စ ဓာတွာယတနာဒိလက္ခဏံ၊

သဘာဝသာမညဝိဘာဂဘေဒတော၊

သယမ္ဘုဉာဏေန ဇိနောယမာဂတော၊

တထာဂတော ဝုစ္စတိ သကျပုင်္ဂဝေါ။

‘‘တထာနိ သစ္စာနိ သမန္တစက္ခုနာ၊

တထာ ဣဒပ္ပစ္စယတာ စ သဗ္ဗသော၊

အနညဉေယျေန ယတော ဝိဘာဝိတာ၊

ယာထာဝတော တေန ဇိနော တထာဂတော။

‘‘အနန္တဘေဒါသုပိ လောကဓာတုသု၊

ဇိနဿ ရူပါယတနာဒိဂေါစရေ၊

ဝိစိတ္တဘေဒေ တထမေဝ ဒဿနံ၊

တထာဂတော တေန သမန္တလောစနော။

‘‘ယတော စ ဓမ္မံ တထမေဝ ဘာသတိ၊

ကရောတိ ဝါစာယနုလောမမတ္တနော၊

ဂုဏေဟိ လောကံ အဘိဘုယျိရီယတိ၊

တထာဂတော တေနပိ လောကနာယကော’’တိ။ (ဣတိဝု။ အဋ္ဌ။ ၃၈၊ ဒီ။ နိ။ ဋီ။ ၁။၇)၊

ကေနစိ ဂုဏေန အတ္တနော ဝိသိဋ္ဌဿ ကဿစိ အဘာဝတော နတ္ထိ ဧတဿ ဥတ္တရောတိ အနုတ္တရော။ ဘဂဝတော ဟိ အဝီစိတော ပဋ္ဌာယ ယာဝ ဘဝဂ္ဂံ တိရိယံ အပရိမာဏာသု လောကဓာတူသု န ကောစိ ကေနစိ ဂုဏေန သမသမောပိ အတ္ထိ၊ ကုတော ပန ဥတ္တရိတရော။ ယထာဟ –

‘‘ရူပေ သီလေ သမာဓိမှိ၊ ပညာယ စ အသာဒိသော၊

ဝိမုတ္တိယာ သမသမော၊ ဓမ္မစက္ကပ္ပဝတ္တနေ’’တိ။

ဝိန္ဒိတွာတိ တီဟိ ဝန္ဒနာဟိ တန္နိန္နတာဒိဝသေန နမဿိတွာ။ ကာယဝစီမနောဒွါရဝသေန ဟိ တိဿော ဝန္ဒနာ။ ယထာဟ ‘‘တိဿော ဣမာ၊ ဘိက္ခဝေ၊ ဝန္ဒနာ ကာယေန ဝန္ဒတိ၊ ဝစသာ ဝန္ဒတိ၊ မနသာ ဝန္ဒတီ’’တိ။ တတ္ထ ဗုဒ္ဓါဒိဂုဏာရမ္မဏာ ကာမာဝစရကုသလကိရိယာနမညတရာ စေတနာ ကာယဝိညတ္တိံ သမုဋ္ဌာပေတွာ ကာယဒွါရပ္ပဝတ္တိဝသေန ဥပ္ပန္နာ ကာယဝန္ဒနာတိ ဝုစ္စတိ၊ သာယေဝ ဝစီဝိညတ္တိံ သမုဋ္ဌာပေတွာ ဝစီဒွါရပ္ပဝတ္တိဝသေန ဥပ္ပန္နာ ဝစီဝန္ဒနာတိ၊ ဥဘယဝိညတ္တိယော ပန အသမုဋ္ဌာပေတွာ ကေဝလံ မနောဒွါရပ္ပဝတ္တိဝသေန ဥပ္ပန္နာ မနောဝန္ဒနာတိ။ သိရသာတိ ဥတ္တမင်္ဂေန ကရဏဘူတေန။ အဗုဇ္ဈိ၊ ဗောဓေတီတိ ဝါ ဗုဒ္ဓါ။ အယဉှိ စတုသစ္စဓမ္မေ သယမ္ပိ အဗုဇ္ဈိ၊ ပရေပိ ဗောဓေတိ ၊ တသ္မာ ဗုဇ္ဈနဗောဓနဋ္ဌေန ‘‘ဗုဒ္ဓါ’’တိ ဝုစ္စတိ။ ယထာဟ ‘‘ဗုဇ္ဈိတာ သစ္စာနီတိ ဗုဒ္ဓါ၊ ဗောဓေတာ ပဇာယာတိ ဗုဒ္ဓါ’’တိ (မဟာနိ။ ၁၉၂၊ စူဠနိ။ ပါရာယနတ္ထုတိဂါထာနိဒ္ဒေသ ၉၇၊ ပဋိ။ မ။ ၁။၁၆၂)။ အထ ဝါ ဗုဓ-သဒ္ဒဿ ဇာဂရဏဝိကသနတ္ထေသုပိ ပဝတ္တနတော အဗုဇ္ဈိ သဝါသနသမ္မောဟနိဒ္ဒါယ အစ္စန္တံ ဝိဂတော၊ ဗုဒ္ဓိယာ ဝိကသိတဝါတိ ဝါ ဗုဒ္ဓါ။ ဘဂဝါ ဟိ ဝတ္ထုသဘာဝဒဿနဝိဗန္ဓိကာယ အဝိဇ္ဇာသင်္ခါတာယ နိဒ္ဒါယ အရိယမဂ္ဂဉာဏေန သဟ ဝါသနာယ သမုစ္ဆိန္နတ္တာ တတော အစ္စန္တံ ဝိဂတော။ ပရမရုစိရသိရိသောဘဂ္ဂသမာဂမေန ဝိကသိတမိဝ ပဒုမံ အပရိမိတဂုဏဂဏာလင်္ကတသဗ္ဗညုတညာဏသမာဂမေန ဝိကသိတော ဝိကာသမနုပ္ပတ္တော၊ တသ္မာ ဇာဂရဏဝိကသနတ္ထဝသေနပိ ‘‘ဗုဒ္ဓါ’’တိ ဝုစ္စတိ။

ဧတ္တာဝတာ စ ဒွီဟိ အာကာရေဟိ ဘဂဝတော ထောမနာ ကတာ ဟောတိ အတ္တဟိတသမ္ပတ္တိတော၊ ပရဟိတပဋိပတ္တိတော စ။ တာသု အတ္တဟိတသမ္ပတ္တိ အနာဝရဏဉာဏာဓိဂမော သဝါသနသကလသံကိလေသာနမစ္စန္တပ္ပဟာနံ အနုပါဒိသေသနိဗ္ဗာနာဓိဂမော စ၊ ပရဟိတပဋိပတ္တိ ပန အာသယပ္ပယောဂဝသေန ဒုဝိဓံ ပရဟိတသမီဟနံ။ တတ္ထ ဓမ္မဒေသနာယ အဘာဇနေသု ဒေဝဒတ္တာဒီသု ဝိရောဓိသတ္တေသုပိ နိစ္စံ ဟိတဇ္ဈာသယတာ အပရိပါကဂတိန္ဒြိယာနံ ဣန္ဒြိယပရိပါကကာလာဂမနဉ္စ အာသယော နာမ။ တဒညသတ္တာနံ ပန လာဘသက္ကာရာဒိနိရပေက္ခစိတ္တဿ ယာနတ္တယမုခေန သဗ္ဗဒုက္ခနိယျာနိကဓမ္မဒေသနာ ပယောဂေါ နာမ။ ဒုဝိဓာသု ပနေတာသု ပရဟိတပဋိပတ္တီသု၊ တိဝိဓာသု စ အတ္တဟိတသမ္ပတ္တီသု အနန္တကရုဏာ-ဝစနေန၊ တထာ အာဂတဋ္ဌေန စ တထာဂတ-သဒ္ဒေန အာသယဝသေန ပရဟိတပဋိပတ္တိ ဒဿိတာ၊ ဗောဓနဋ္ဌေန ဗုဒ္ဓ-သဒ္ဒေန၊ တထဒဿနဋ္ဌေန စ တထာဂတဋ္ဌေန စ တထာဂတသဒ္ဒေန ပယောဂဝသေန၊ အနန္တပညာ-ဝစနေန၊ ဉာဏဂတိဒီပကေန တထာဂတ-သဒ္ဒေန၊ ဗုဇ္ဈနဇာဂရဏဝိကသနဋ္ဌေန စ ဗုဒ္ဓ-သဒ္ဒေန တိဝိဓာပိ အတ္တဟိတသမ္ပတ္တိ၊ အနုတ္တရဝစနေန စ အတ္တဟိတပရဟိတသမ္ပတ္တိ ပကာသိတာတိ ဝေဒိတဗ္ဗာ။

အပိစ ဟေတုဖလသတ္တူပကာရသမ္ပဒါဝသေန တီဟာကာရေဟိပိ ဘဂဝတော ထောမနာ ပဝတ္တတီတိ တံဝသေနပေတ္ထ ထောမနာ ဒဋ္ဌဗ္ဗာ။ တတ္ထ ဟေတုသမ္ပဒါ နာမ မဟာကရုဏာသမာယောဂေါ၊ ဗောဓိသမ္ဘာရသမ္ဘရဏဉ္စ တမ္မူလကတ္တာ သကလဗုဒ္ဓဂုဏာနံ။ ဖလသမ္ပဒါ ပန စတုဗ္ဗိဓာ ဉာဏသမ္ပဒါ၊ ပဟာနသမ္ပဒါ၊ အာနုဘာဝသမ္ပဒါ၊ ရူပကာယသမ္ပဒါ စာတိ။ တာသု သဗ္ဗညုတညာဏပဒဋ္ဌာနံ မဂ္ဂဉာဏံ၊ မဂ္ဂဉာဏပဒဋ္ဌာနံ သဗ္ဗညုတညာဏံ၊ တမ္မူလကာနိ စ ဒသဗလာဒိဉာဏာနိ ဉာဏသမ္ပဒါ နာမ။ အဂ္ဂမဂ္ဂဘာဝနာယ သဗ္ဗကိလေသာနံ သဟ ဝါသနာဟိ အနုပ္ပတ္တိဓမ္မတာပါဒနံ ပဟာနသမ္ပဒါ။ အစိန္တေယျာပရိမိတာနံ သဗ္ဗလောကဟိတာနံ နိပ္ဖာဒနေ၊ သဒေဝကလောကာဘိဘဝနေ စ အာဓိပစ္စံ အာနုဘာဝသမ္ပဒါ။ သကလလောကနယနာဘိသေကဘူတာ ပန လက္ခဏာနုဗျဉ္ဇနပဋိမဏ္ဍိတာ အတ္တဘာဝသမ္ပတ္တိ ရူပကာယသမ္ပဒါ နာမ။ သတ္တူပကာရော ဟေဋ္ဌာ ဝုတ္တပရဟိတပဋိပတ္တိဝသေနေဝ ဝေဒိတဗ္ဗော။ ဣမာသု ပန အနန္တကရုဏာ-ဝစနေန၊ တထာ အာဂတဋ္ဌေန စ တထာဂတ-သဒ္ဒေန ဟေတုသမ္ပဒါ ဒဿိတာ။ ဖလသမ္ပဒါသု ဉာဏသမ္ပဒါ စေဝ ပဟာနသမ္ပဒါ စ အနန္တပညာ-ဝစနေန၊ အဘိသမယပရိဒီပကေန တထာဂတသဒ္ဒေန၊ ဗုဇ္ဈနဇာဂရဏဝိကသနဋ္ဌေန၊ စ ဗုဒ္ဓ-သဒ္ဒေန ဒဿိတာ၊ အာနုဘာဝသမ္ပဒါပိ အဘိဘဝနဋ္ဌေန တထာဂတ-သဒ္ဒေန၊ အနုတ္တရ-ဝစနေန စ ဝိဘာဝိတာ၊ ရူပကာယသမ္ပဒါ ပန ရူပဂ္ဂပ္ပတ္တိဒီပကေန အနုတ္တရ-သဒ္ဒေန ဒဿိတာတိ ဒဋ္ဌဗ္ဗံ။

ဧဝံ ဗုဒ္ဓရတနဿ ထောမနာပုဗ္ဗင်္ဂမံ ပဏာမံ ကတွာ ဣဒါနိ သေသရတနာနမ္ပိ ပဏာမမာရဘန္တော အာဟ ‘‘ဓမ္မံ သာဓုဂဏမ္ပိ စာ’’တိ။ ဘဂဝတော ထောမနေန စ သွာက္ခာတတာဒယော ဓမ္မဂုဏာ၊ သုပ္ပဋိပန္နတာဒယော သင်္ဃဂုဏာ စ ဒဿိတာ ဟောန္တိ တပ္ပဘဝဿ အနညထာဘာဝတောတိ န တေသံ ဝိသုံ ထောမနာ ကတာ။ အဓိဂတမဂ္ဂေ သစ္ဆိကတနိရောဓေ ပုဂ္ဂလေ ယထာနုသိဋ္ဌံ ပဋိပဇ္ဇမာနေ စ အပါယဒုက္ခေသု စေဝ ဝဋ္ဋဒုက္ခေသု စ အပတမာနေ ကတွာ ဓာရေတီတိ ဓမ္မော၊ သော စတုန္နံ အရိယမဂ္ဂါနံ၊ စတုန္နဉ္စ သာမညဖလာနံ၊ နိဗ္ဗာနဿ၊ ပရိယတ္တိဓမ္မဿ စ ဝသေန ဒသဝိဓော။ ဝုတ္တဉှေတံ ဆတ္တဝိမာနေ –

‘‘ရာဂဝိရာဂမနေဇမသောကံ၊

ဓမ္မမသင်္ခတမပ္ပဋိကူလံ၊

မဓုရမိမံ ပဂုဏံ သုဝိဘတ္တံ၊

ဓမ္မမိမံ သရဏတ္ထမုပေဟီ’’တိ။ (ဝိ။ ဝ။ ၈၈၇)၊

ဧတ္ထ ဟိ ကာမရာဂါဒိဘေဒေါ သဗ္ဗောပိ ရာဂေါ ဝိရဇ္ဇတိ ဧတေနာတိ ‘‘ရာဂဝိရာဂေါ’’တိ မဂ္ဂေါ ကထိတော။ ဧဇာသင်္ခါတာယ တဏှာယ၊ အန္တောနိဇ္ဈာနလက္ခဏဿ စ သောကဿ တဒုပ္ပတ္တိယံ သဗ္ဗသော ပရိက္ခီဏတ္တာ ‘‘အနေဇမသောက’’န္တိ ဖလံ ကထိတံ။ ကေနစိ ပစ္စယေန အသင်္ခတတ္တာ ‘‘ဓမ္မမသင်္ခတ’’န္တိ နိဗ္ဗာနံ ဝုတ္တံ။ အဝိရောဓဒီပနတော ပန အတ္ထဗျဉ္ဇနဿ သမ္ပန္နတာယ၊ ပကဋ္ဌဂုဏဝိဘာဝနတော သုဋ္ဌု ဝိဘဇိတတ္တာ စ ‘‘အပ္ပဋိကူလ’’န္တိအာဒိနာ သဗ္ဗောပိ ပရိယတ္တိဓမ္မော ကထိတော။ တတ္ထ အရိယမဂ္ဂနိဗ္ဗာနာနိ နိပ္ပရိယာယေနေဝ အပါယာဒိတော ဓာရဏတော ဓမ္မော၊ ဖလပရိယတ္တိယော ပန ပရိယာယေန။ တထာ ဟေတ္ထ ဓာရဏံ နာမ အပါယာဒိနိဗ္ဗတ္တကကိလေသဝိဒ္ဓံသနံ။ ဣတိ အရိယမဂ္ဂဿ ကိလေသသမုစ္ဆေဒကတာယ၊ နိဗ္ဗာနဿ စ အာလမ္ဗဏဘာဝေန တဿ တဒတ္ထသိဒ္ဓိဟေတုတာယပိ ဥဘိန္နမ္ပိ နိပ္ပရိယာယတော လဗ္ဘတိ။ ဣတရေသု ပန အရိယဖလဿ မဂ္ဂေန သမုစ္ဆိန္နကိလေသာနံ ပဋိပဿဒ္ဓကိစ္စတာယ၊ မဂ္ဂါနုကူလပ္ပဝတ္တိတော ပရိယတ္တိဓမ္မဿ စ တဒဓိဂမဟေတုတာယာတိ ဥဘိန္နမ္ပိ ပရိယာယတောဝ လဗ္ဘတီတိ။

အတ္တဟိတပရဟိတံ သာဓေန္တီတိ သာဓူ၊ တေသံ ဂဏော သမုဒါယောတိ သာဓုဂဏော၊ သာဓု စာယံ ဂဏော စာတိ ဝါ သာဓုဂဏော၊ သာဓုနော ဝါ သမ္မာသမ္ဗုဒ္ဓဿ အာယတ္တော ဂဏော တဿ ဩရသပုတ္တဘာဝတောတိ သာဓုဂဏော။ သော ပန စတုန္နံ အရိယမဂ္ဂသမင်္ဂီနံ၊ စတုန္နဉ္စ ဖလသမင်္ဂီနံ ဝသေန အဋ္ဌဝိဓော အရိယသင်္ဃော၊ တံ သာဓုဂဏံ။ ပိစာတိ နိပါတသမုဒါယော၊ ဧကော ဝါ နိပါတော၊ တိဏ္ဏံ ရတနာနံ ဝန္ဒနကိရိယာယ သမ္ပိဏ္ဍနတ္ထော။ ကေစိ ‘‘ဂဏော’’တိ ဣဓ ပကရဏတောဝ အရိယဂဏပုဂ္ဂလောဝ လဗ္ဘတီတိ သာဓူတိ ဘာဝနပုံသကဝသေန ‘‘ဝန္ဒိတွာ’’တိ ဣမိနာ သဟ ယောဇေန္တိ၊ တဒါ ပန သာဓူတိ ဘယလာဘာဒိဝိရဟေန သက္ကစ္စံ အာဒရန္တိ အတ္ထော။

၂။ ဧဝံ ပကရဏာရမ္ဘေ ယထာဓိပ္ပေတံ ရတနတ္တယပ္ပဏာမံ ကတွာ ဣဒါနိ ယတ္ထ ပါဋဝတ္ထာယ ဣဒံ ပကရဏံ ပဋ္ဌပီယတိ၊ တံ သဒ္ဓိံ ဒေသကဒေသပဋိဂ္ဂါဟကသမ္ပတ္တီဟိ ဝိဘာဝေတွာ ဒဿေန္တော အာဟ ‘‘ပဏ္ဍုကမ္ဗလနာမာယာ’’တိအာဒိ။ တတ္ထ ဒေဝရာဇဿ ပဏ္ဍုကမ္ဗလနာမာယ သိလာယ ဝိမလေ သီတလေ တလေ နိသိန္နော အတုလဝိက္ကမော ဒေဝဒေဝေဟိ ပူဇိတော ဒေဝဒေဝေါ ဒေဝပုရက္ခတော ဒေဝါနံ ဒေဝလောကသ္မိံ ယံ ဓမ္မံ ဒေသေသီတိ သမ္ဗန္ဓော။

အယံ ပနေတ္ထ အတ္ထော – ပဏ္ဍုကမ္ဗလသရိက္ခဝဏ္ဏတာယ ‘‘ပဏ္ဍုကမ္ဗလ’’န္တိ နာမံ သမညာ ဧတိဿာတိ ပဏ္ဍုကမ္ဗလနာမာ။ သာ ဟိ သက္ကဿ တာဒိသပုညာနုဘာဝေန နိဗ္ဗတ္တာ ပဏ္ဍုကမ္ဗလဇယသုမနပုပ္ဖသမာနေန ဝဏ္ဏေန သဗ္ဗကာလံ ဝိရောစတိ ၊ ပမာဏတော ပန သဋ္ဌိယောဇနာယာမာ၊ ပညာသယောဇနဝိတ္ထာရာ၊ ပန္နရသယောဇနုဗ္ဗေဓာ စ ဟောတိ။ သိလာယာတိ အဝယဝသမ္ဗန္ဓေ သာမိဝစနံ။ တုလာယ သမ္မိတော တုလျော၊ န တုလျော အတုလျော၊ အတုလျော ဝိက္ကမော ဗလံ ဧတဿာတိ အတုလျဝိက္ကမော။ သမ္မာသမ္ဗုဒ္ဓဿ ဟိ ပရမပါရမိတာနုဘာဝသံသိဒ္ဓေန ဟတ္ထိဂဏနာယ ကောဋိသဟဿဟတ္ထီနံ၊ ပုရိသဂဏနာယ ဒသကောဋိသဟဿပုရိသာနံ ဗလေဟိ သမပ္ပမာဏေန ကာယဗလေန၊ အပ္ပမာဏေန စ ဉာဏဗလေန န ကဿစိ ဒေဝဗြဟ္မာဒီသု အညတရဿ ဗလတုလနာယ ဥပနေတဗ္ဗံ အတ္ထိ ။ အထ ဝါ အနညသာဓာရဏတ္တာ အတုလျော ပရက္ကမသင်္ခါတော အပရိမာဏဂုဏဝိသေသာဝဟေန အနညသာဓာရဏေန သမ္မပ္ပဓာနေန သမန္နာဂတတ္တာ ဝါ အတုလျော သမ္မပ္ပဓာနသင်္ခါတော ဝိက္ကမော ဣမဿာတိ အတုလျဝိက္ကမော။ ‘‘အတုလျဝိက္ကမော’’တိ စ ဝတ္တဗ္ဗေ ဂါထာဗန္ဓဝသေန ယ-ကာရလောပံ ကတွာ ‘‘အတုလဝိက္ကမော’’တိ ဝုတ္တံ။ အထ ဝါ သမ္မိတတ္ထေ အ-ကာရပစ္စယဿာပိ သမ္ဘဝတော အတုလော ဝိက္ကမော အဿာတိ ‘‘အတုလဝိက္ကမော’’တိ ဝုတ္တံ။

ဒိဗ္ဗန္တီတိ ဒေဝါ၊ ပဉ္စကာမဂုဏာဒီဟိ ကီဠန္တိ၊ တေသု ဝါ ဝိဟရန္တိ၊ ဝိဇယသမတ္ထတာယောဂေန ဗာဟိရဗ္ဘန္တရိကေ ပစ္စတ္ထိကေ ဝိဇေတုံ ဣစ္ဆန္တိ၊ ဣဿရိယဓနာဒိသက္ကာရဒါနဂ္ဂဟဏံ၊ တံတံအတ္ထာနုသာသနဉ္စ ကရောန္တာ ဝေါဟရန္တိ၊ ပုညဉာဏာနုဘာဝပ္ပတ္တာယ ဇုတိယာ ဇောတေန္တိ၊ ယထာဓိပ္ပေတဉ္စ ဝိသယံ အပ္ပဋိဃာတေန ဂစ္ဆန္တိ၊ ယထိစ္ဆိတနိပ္ဖာဒနေ စ သက္ကောန္တီတိ အတ္ထော။ အထ ဝါ ဒေဝနီယာ တံတံဗျသနနိတ္ထရဏတ္ထိကေဟိ ‘‘သရဏံ ပရာယဏ’’န္တိ ဂမနီယာ၊ အဘိတ္ထဝနီယာ သောဘာဝိသေသယောဂေန ကမနီယာတိ ဝါ ဒေဝါ၊ တေ တိဝိဓာ – သမ္မုတိဒေဝါ ဥပပတ္တိဒေဝါ ဝိသုဒ္ဓိဒေဝါတိ။ တတ္ထ သမ္မုတိဒေဝါ နာမ မဟာသမ္မတာဒယော ခတ္တိယာ။ ဥပပတ္တိဒေဝါ နာမ စာတုမဟာရာဇိကေ ဥပါဒါယ တဒုတ္တရိဒေဝါ။ ဝိသုဒ္ဓိဒေဝါ နာမ ခီဏာသဝါ။ ဣဓ ပန ဥပပတ္တိဒေဝါ ဒဋ္ဌဗ္ဗာ။ နော စ ခေါ တေပိ အဝိသေသေန၊ ဌပေတွာ ပန ယာမာဒိကေ စာတုမဟာရာဇိကတာဝတိံသဝါသိနောဝ အဓိပ္ပေတာ။ တေသံ စတူဟိ သင်္ဂဟဝတ္ထူဟိ ရဉ္ဇနတော ရာဇာ၊ ဒေဝါနံ ရာဇာ ဣဿရော ဒေဝရာဇာ၊ တဿ ဒေဝရာဇဿ၊ ‘‘သက္ကဿ ဒေဝရညော’’တိ အဓိပ္ပာယော။ န ဟိ အညေသံ ဒေဝလောကေသု နိသိန္နော ဘဂဝါ အဘိဓမ္မပိဋကံ ဒေသေသီတိ။

၃။ ယန္တိ အနိယမနိဒ္ဒေသော၊ တဿ ပန ‘‘တတ္ထာ’’တိ ဣမိနာ နိယမနံ ဝေဒိတဗ္ဗံ။ ယထာဝုတ္တာနံ တိဏ္ဏမ္ပိ ဒေဝါနံ ဥတ္တမော ဒေဝေါ တေဟိ သဗ္ဗေဟိ အဓိကတရံ ကီဠနာဒိယောဂတောတိ ဒေဝဒေဝေါ၊ ဘဂဝါ။ သော ဟိ နိရတိသယာယ အဘိညာကီဠာယ ဥတ္တမေဟိ ဒိဗ္ဗဗြဟ္မအရိယဝိဟာရေဟိ သပရသန္တာနသိဒ္ဓါယ ပဉ္စဝိဓမာရဝိဇယိစ္ဆာနိဗ္ဗတ္တိယာ စိတ္တိဿရိယသတ္တဓနာဒိသမ္မာပဋိပတ္တိအဝေစ္စပ္ပသာဒသက္ကာရဒါနဂ္ဂဟဏသင်္ခါတေန၊ ယထာပရာဓယထာနုလောမယထာဓမ္မာနုသာသနသင်္ခါတေန စ ဝေါဟာရာတိသယေန ပရမာယ ပညာယ စ သရီရပ္ပဘာသင်္ခါတာယ ဇုတိယာ အနုပမာယ ဉာဏသရီရဂတိယာ မာရဝိဇယသဗ္ဗညုတညာဏပရဟိတနိပ္ဖာဒနေသု အပ္ပဋိဟတာယ သတ္တိယာ စ သမန္နာဂတတ္တာ သဒေဝကေန ဝါ လောကေန ‘‘သရဏ’’န္တိ ဂမနီယတော၊ အဘိတ္ထဝနီယတော၊ ဘတ္တိဝသေန ကမနီယတော စ သဗ္ဗေ တေ ဒေဝေ တေဟိ တေဟိ ဂုဏေဟိ အဘိဘုယျ ဌိတောတိ သဗ္ဗဒေဝေဟိ ပူဇနီယတရော ဒေဝေါ ၊ ဝိသုဒ္ဓိဒေဝဘာဝသင်္ခါတဿ ဝါ သဗ္ဗညုဂုဏာလင်္ကာရဿ အဓိဂတတ္တာ အညေသဉ္စ ဒေဝါနံ အတိသယေန ဒေဝေါတိ ဒေဝဒေဝေါ။ ဒေဝါနန္တိ တဒါ ဓမ္မပဋိဂ္ဂါဟကာနံ ဒသသဟဿစက္ကဝါဠာဓိဝါသီနံ မာတုဒေဝပုတ္တပ္ပမုခါနံ ဥပပတ္တိဒေဝါနံ။ ဝိသုဒ္ဓိဒေဝါနမ္ပေတ္ထ ဂဟဏန္တိ ဝဒန္တိ။ တေ ပန ဥပပတ္တိဒေဝေသွေဝ သင်္ဂဟိတာ မနုဿအရဟန္တာနံ တတ္ထ အဘာဝတော ။ ဒေဝဒေဝေဟီတိ ဝိသုဒ္ဓိဒေဝေဟိ။ ဝိသုဒ္ဓိဒေဝါ ဟိ ဝုတ္တနယေန ဣတရဒေဝေဟိ သာတိသယံ ကီဠနာဒိယောဂတော ဣဓ ‘‘ဒေဝဒေဝါ’’တိ အဓိပ္ပေတာ၊ တေဟိ။ ပူဇိတောတိ ပူဇိတဗ္ဗော၊ ပူဇိတုံ အရဟောတိ အတ္ထော။ ဧတေန ဝိသုဒ္ဓိဒေဝေသုပိ ဘဂဝတော အဂ္ဂပုဂ္ဂလတံ ဒီပေတိ။ ဒေသေသီတိ မဓုရကရဝီကသဒ္ဒသဒိသံ ဗြဟ္မဿရံ နိစ္ဆာရေန္တော ပကာသေသိ။ ဒေဝလောကသ္မိန္တိ တာဝတိံသဒေဝလောကေ။ သဘာဝသာမညလက္ခဏံ ဓာရေတီတိ ဓမ္မော၊ ကုသလာဒိဘေဒေါ အဘိဓမ္မော၊ ဣဓ ပန တပ္ပကာသကံ အဘိဓမ္မပိဋကံ ‘‘ဓမ္မ’’န္တိ ဝုတ္တံ။ တထာ ဟိ ဝက္ခတိ ‘‘ပိဋကုတ္တမေ’’တိ။ ဒေဝပုရက္ခတောတိ ဒသသဟဿစက္ကဝါဠဝါသိဒိဗ္ဗဗြဟ္မေဟိ ပုရက္ခတော၊ ပရိဝါရိတောတိ အတ္ထော။

နနု စ ‘‘ဒေဝါန’’န္တိ ဝစနေနေဝ ဒေဝပုရက္ခတဘာဝေါ သိဒ္ဓါတိ ကိံ ‘‘ဒေဝပုရက္ခတော’’တိ ဝစနေန? နာယံ ဒေါသော။ ဘဂဝါ ဟိ ကဒါစိ စူဠပန္ထကတ္ထေရာဒီနံ ဝိယ ပရမ္မုခေပိ နိသီဒိတွာ ဩဘာသံ ဝိဿဇ္ဇေတွာ သတ္တာနံ သမ္မုခေ နိသိန္နံ ဝိယ ဒဿေန္တော ဓမ္မံ ဒေသေတိ၊ ကဒါစိပိ ပါရာယနိကဗြာဟ္မဏာဒီနံ ဝိယ သမ္မုခေပိ နိသီဒိတွာ အညေဟိ စ ပရိဝုတော အညေသမ္ပိ ဓမ္မံ ဒေသေတိ၊ ဣဓ ပန န တထာ၊ ဒေဝေဟိယေဝ ပရိဝုတော ဒေဝါနံ ဒေသေတီတိ ဒဿနတ္ထံ ‘‘ဒေဝပုရက္ခတော’’တိပိ ဝတ္တဗ္ဗမေဝါတိ။

၄။ ဧဝမေတသ္မိံ ပကရဏေ ဂါရဝဇနနတ္ထံ တေန သမ္ပာဒေတဗ္ဗပါဋဝဝိသယံ အဘိဓမ္မပိဋကံ ဒေသကာဒိသမ္ပတ္တီဟိ သဟ ဝိဘာဝေတွာ ဣဒါနိ ယထာဓိပ္ပေတပကရဏာရမ္ဘပယောဇနာဘိဓာနာဘိဓေယျသောတုဇနသမုဿာဟနကရဏပ္ပကာရာနိ စ ဝိဘာဝေတုံ ‘‘တတ္ထာဟ’’န္တိအာဒိ ဝုတ္တံ။ တတ္ထ ‘‘ပါဋဝတ္ထာယာ’’တိ ဣမိနာ ပကရဏာရမ္ဘပယောဇနံ ဝုတ္တံ။ ‘‘အဘိဓမ္မာဝတာရ’’န္တိ ဣမိနာ အဘိဓာနာဘိဓေယျာနိ။ ‘‘မဓုရ’’န္တိအာဒီဟိ ပကရဏံ ဝိသေသေတိ။ ‘‘သမာသေနာ’’တိ စ ဣမိနာ သောတုဇနသမုဿာဟနကရဏပ္ပကာရာနီတိ ဒဋ္ဌဗ္ဗံ။ ‘‘အဟ’’န္တိ ကတ္တုဘူတံ အတ္တာနံ နိဒ္ဒိသတိ။ တထာ ဟိ ယော ပရော န ဟောတိ၊ သော နိယကဇ္ဈတ္တသင်္ခါတော အတ္တာ ‘‘အဟ’’န္တိ ဝုစ္စတိ။

ပဋုနော ဘာဝေါ ပါဋဝံ၊ တံယေဝ အတ္ထော ပယောဇနဋ္ဌေနာတိ ပါဋဝတ္ထော၊ တဒတ္ထာယ။ တံ သန္ဓာယ ဝိဝိဓနယဂ္ဂဟဏသမတ္ထဿ သုတမယဉာဏဿ ဥပ္ပာဒနတ္ထန္တိ ဝုတ္တံ ဟောတိ။ သံသာရေ ဘယံ ဣက္ခန္တိ၊ ဘိန္ဒန္တိ ဝါ ပါပကေ အကုသလေ ဓမ္မေတိ ဘိက္ခူ၊ တေသံ။ ပိဋကဉ္စ တံ ဥတ္တမဉ္စာတိ ပိဋကုတ္တမံ၊ တသ္မိံ ပိဋကုတ္တမေ၊ အဘိဓမ္မပိဋကေတိ အဓိပ္ပာယော။ တဉှိ ပရိယတ္တိဘာဇနတ္ထတော ပိဋကံ၊ တီသု ပိဋကေသု ဝိသိဋ္ဌဘာဝတော ဥတ္တမဉ္စာတိ ပိဋကုတ္တမံ။ တတ္ထ ပရိယတ္တိဘာဇနတ္ထတောတိ ပရိယတ္တိအတ္ထေန စေဝ ဘာဇနတ္ထေန စ။ တထာ ဟိ ‘‘မာ ပိဋကသမ္ပဒါနေနာ’’တိအာဒီသု (အ။ နိ။ ၃။၆၆) ပရိယတ္တိ ပိဋကန္တိ ဝုစ္စတိ။ ‘‘အထ ပုရိသော အာဂစ္ဆေယျ ကုဒါလပိဋက’’န္တိအာဒီသု (မ။ နိ။ ၁။၂၂၈၊ အ။ နိ။ ၃။၇၀) ယံ ကိဉ္စိ ဘာဇနမ္ပိ။ တသ္မာ ဣဒမ္ပိ ပရိယာပုဏိတဗ္ဗဋ္ဌေန ပရိယတ္တိ၊ အဘိဓမ္မတ္ထာနမာဓာရဏတ္ထေန ဘာဇနဉ္စာတိ ပရိယတ္တိဘာဇနတ္ထတော ပိဋကန္တိ ဝုစ္စတိ။ တေနေဝါဟု –

‘‘ပိဋကံ ပိဋကတ္ထဝိဒူ၊

ပရိယတ္တိဗ္ဘာဇနတ္ထတော အာဟု၊

တေန သမောဓာနေတွာ၊

တယောပိ ဝိနယာဒယော ဉေယျာ’’တိ။ (ဒီ။ နိ။ အဋ္ဌ။ ၁။ပဌမမဟာသင်္ဂီတိကထာ၊ ပါရာ။ အဋ္ဌ။ ၁။ပဌမမဟာသင်္ဂီတိကထာ၊ ဓ။ သ။ အဋ္ဌ။ နိဒါနကထာ)၊

ဝိသိဋ္ဌဘာဝေါ ပနဿ လောကဝေါဟာရမတိက္ကမ္မ ယထာသဘာဝဝသေန ဒေသနတော၊ ဝိသိဋ္ဌဓမ္မက္ခန္ဓဝိဘာဝနတော စ ဝေဒိတဗ္ဗော။ ဧတ္ထ ဟိ ‘‘သတ္တော ပုဂ္ဂလော ဘိက္ခူ’’တိအာဒိကံ လောကဝေါဟာရမတိက္ကမ္မ ‘‘ခန္ဓဓာတုအာယတန’’န္တိအာဒိနာ ယထာဓမ္မဝသေနေဝ ဗာဟုလ္လဒေသနာ ပဝတ္တာ၊ န ဣတရေသု ဝိယ ယထာဝုတ္တဝေါဟာရဝသေန၊ ယတော ဣဒံ ယထာဓမ္မသာသနန္တိ ဝုစ္စတိ။ သဗ္ဗသင်္ခတဓမ္မဝိသိဋ္ဌော စေတ္ထ ပညာက္ခန္ဓော ဝိသေသတော ဝိဘာဝိတော၊ တသ္မာ တိဏ္ဏမ္ပိ ပိဋကာနံ ဗုဒ္ဓဝစနဘာဝေပိ ယထာသဘာဝါနတိက္ကမဒေသနာဒိတော ဣဒမေဝ တီသု ပိဋကေသု ဝိသိဋ္ဌန္တိ ယုတ္တံ။ အပိစ ဓမ္မာတိရေကဓမ္မဝိသေသဘာဝတော စဿ ဝိသိဋ္ဌဘာဝေါ ဝေဒိတဗ္ဗော။ အဘိဓမ္မေ ဟိ နိပ္ပဒေသတော ခန္ဓာယတနာဒိဓမ္မာနံ ဝိဘတ္တတ္တာ ဣတရဒွယတော အတိရေကတရာ၊ ဝိသိဋ္ဌာ စ ပါဠိ ဟောတိ၊ တသ္မာ အတိရေကဿ၊ ဝိသိဋ္ဌဿ စ ပါဠိဓမ္မဿ ဝသေန ဣဒမေဝ တီသု ပိဋကေသု ဥတ္တမန္တိ ဝတ္တုံ ဝဋ္ဋတိ။ ယထာဝုတ္တဝိသိဋ္ဌဘာဝယောဂတောယေဝ စေတံ ‘‘အဘိဓမ္မပိဋက’’န္တိ ဝုစ္စတိ အဘိ-သဒ္ဒဿ ဝိသိဋ္ဌဘာဝဇောတနတော ။ အပိစ ဝုဍ္ဎိမန္တာဒိဓမ္မာနံ ဧတ္ထ ဝုတ္တတ္တာ စေတံ အဘိဓမ္မပိဋကံ။ ယထာဟု ပေါရာဏာ –

‘‘ယံ ဧတ္ထ ဝုဍ္ဎိမန္တော၊ သလက္ခဏာ ပူဇိတာ ပရိစ္ဆိန္နာ၊

ဝုတ္တာဓိကာ စ ဓမ္မာ၊ အဘိဓမ္မော တေန အက္ခာတော’’တိ။ (ဒီ။ နိ။ အဋ္ဌ။ ၁။ပဌမမဟာသင်္ဂီတိကထာ၊ ပါရာ။ အဋ္ဌ။ ၁။ပဌမမဟာသင်္ဂီတိကထာ၊ ဓ။ သ။ အဋ္ဌ။ နိဒါနကထာ)၊

တထာ ဟေတ္ထ ‘‘ရူပူပပတ္တိယာ မဂ္ဂံ ဘာဝေတိ၊ မေတ္တာသဟဂတေန စေတသာ ဧကံ ဒိသံ ဖရိတွာ ဝိဟရတီ’’တိအာဒိနာ (ဓ။ သ။ ၁၆၀ အာဒယော) ဝုဍ္ဎိမန္တောပိ ဓမ္မာ ဝုတ္တာ၊ ‘‘ရူပါရမ္မဏံ ဝါ သဒ္ဒါရမ္မဏံ ဝါ’’တိအာဒိနာ (ဓ။ သ။ ၁) နယေန အာရမ္မဏာဒီဟိ လက္ခိတဗ္ဗတ္တာ သလက္ခဏာပိ ‘‘သေက္ခာ ဓမ္မာ အသေက္ခာ ဓမ္မာ၊ လောကုတ္တရာ ဓမ္မာ’’တိအာဒိနာ နယေန ပူဇိတာ ပူဇာရဟာပိ ‘‘ဖဿော ဟောတိ၊ ဝေဒနာ ဟောတီ’’တိအာဒိနာ (ဓ။ သ။ ၁) နယေန သဘာဝပရိစ္ဆိန္နတ္တာ ပရိစ္ဆိန္နာပိ ‘‘မဟဂ္ဂတာ ဓမ္မာ အပ္ပမာဏာ ဓမ္မာ (ဓ။ သ။ တိကမာတိကာ ၁၂၊ ဒုကမာတိကာ ၉၉)၊ အနုတ္တရာ ဓမ္မာ’’တိအာဒိနာ နယေန အဓိကာ ဝိသိဋ္ဌာပိ ဓမ္မာ ဝုတ္တာ၊ တသ္မာ အဘိ-သဒ္ဒဿ ဝုဍ္ဎိအာဒိအတ္ထေသုပိ ပဝတ္တနတော ‘‘ဝုဍ္ဎိမန္တော ဓမ္မာ ဧတ္ထာ’’တိအာဒိနာ နိဗ္ဗစနေန ဣဒံ ပိဋကံ ‘‘အဘိဓမ္မ’’န္တိ ဝုစ္စတိ။ အဘိဓမ္မံ ဩတရန္တိ အနေနာတိ အဘိဓမ္မာဝတာရံ နာမ ပကရဏံ။ ဣမိနာ ပနဿ အတ္ထာနုဂတမဘိဓာနံ ဒဿေတိ။ တု-သဒ္ဒေါ ပဒပူရဏေ။ အာစရိယေန ဟိ ဂါထာပဒပူရဏတ္ထံ ယေဘုယျေန တတ္ထ တတ္ထ နိပါတာ ဝုစ္စန္တိ။ ယတ္ထ ပန နေသံ ပယောဇနဝိသေသော ဒိဿတိ၊ တတ္ထေဝ တမတ္ထံ ဝက္ခာမ။ မဓုရန္တိ နိပ္ပရိယာယတော မဓုရ-သဒ္ဒေါယံ ဇိဝှာဝိညေယျေ ရသဝိသေသေ ဝတ္တတိ၊ ဣဓ ပန ဣဋ္ဌဘာဝသာမညေန အတ္ထဗျဉ္ဇနသမ္ပတ္တိ မဓုရသဒ္ဒေန ဝုတ္တာ။ ဘဝတိ ဟိ တံသဒိသဿ တံ-သဒ္ဒေနာဘိဓာနံ ယထာ ‘‘အဂ္ဂိမာဏဝေါ’’တိ။ တေန ပန မဓုရေန ယောဂတော ဣဒမ္ပိ မဓုရံ ယထာ နီလဂုဏယောဂတော နီလုပ္ပလန္တိ။ နိပုဏဂမ္ဘီရာယ ဗျဉ္ဇနသမ္ပတ္တိယာ စေဝ အတ္ထသမ္ပတ္တိယာ စ အဘိဓမ္မဝိသယံ မတိံ ဝဍ္ဎေတီတိ မတိဝဍ္ဎနံ။ အထ ဝါ ဗျဉ္ဇနသမ္ပတ္တိယာ ‘‘မဓုရ’’န္တိ ဝုတ္တံ၊ အတ္ထသမ္ပတ္တိယာ ‘‘မတိဝဍ္ဎန’’န္တိ။

၅။ တာဠန္တိ ကုဉ္စိကံ၊ ကုဉ္စိကာသဒိသန္တိ အတ္ထော။ မုယှန္တိ တေနာတိ မောဟော၊ အဝိဇ္ဇာယေတံ အဓိဝစနံ၊ မောဟောယေဝ အဘိဓမ္မမဟာပုရံ ပဝိသန္တာနံ ပဝေသနနိဝါရဏတ္တာ ကဝါဋဘူတောတိ မောဟကဝါဋံ၊ တဿ။ ဝိဃာဋေတိ၊ ဝိဃာဋီယတိ အနေနာတိ ဝါ ဝိဃာဋနံ။ နနု စ အဝိဇ္ဇာကဝါဋံ ပညာယ ဥဂ္ဃာဋီယတိ။ သာ ဟိ တဿာ ဥဇုဝိပစ္စနီကဘူတာတိ? သစ္စံ၊ ဣဒမ္ပိ တဿာ ကာရဏဘာဝေန ‘‘မောဟကဝါဋဝိဃာဋနကရ’’န္တိ ဝုတ္တံ။ ကာရဏကာရဏမ္ပိ ဟိ ကာရဏဝသေန ဝုစ္စတိ ယထာ ‘‘စောရေဟိ ဂါမော ဒဍ္ဎော၊ တိဏေဟိ ဘတ္တံ သိဒ္ဓ’’န္တိ။

၆။ သုဒုတ္တရန္တိ ဓမ္မတ္ထဒေသနာပဋိဝေဓသင်္ခါတစတုဂမ္ဘီရဘာဝပဋိသံယုတ္တတာယ မန္ဒဗုဒ္ဓီဟိ တရိတုံ အသက္ကုဏေယျတ္တာ အတိဒုတ္တရံ၊ တေနေဝ စေဒံ မဟောဒဓိသမာနတ္တာ ‘‘မဟောဒဓီ’’တိ ဝုတ္တံ။ မဟဏ္ဏဝေါပိ ဟိ စတုရာသီတိယောဇနသဟဿဂမ္ဘီရော န သက္ကာ အညတြ သိနေရုပဗ္ဗတရာဇတော ကေနစိ ပတိဋ္ဌံ လဒ္ဓုံ၊ ဧဝမိဒမ္ပိ စတုဂမ္ဘီရတာပဋိသံယုတ္တံ အညတြ တထာဂတာ န ကေနစိ ပတိဋ္ဌံ လဒ္ဓုံ သက္ကာတိ။ တရန္တာနန္တိ အတ္ထဂ္ဂဟဏဝသေန ဥတ္တရိတုကာမာနံ။ ဧတ္ထ စ ‘‘တရံဝါ’’တိ အဓိကာရဝသေန ဝတ္တဗ္ဗံ၊ ဝက္ခမာနံ ဝါ အာနေတွာ သမ္ဗန္ဓိတဗ္ဗံ။ တရန္တာနန္တိ ပရတီရသမ္ပာပုဏနတ္ထံ ဥတ္တရန္တာနံ။ တရံဝါတိ ဥဠုမ္ပံ ဝိယ၊ တံသမာနန္တိ အတ္ထော။ မကရာ နာမ မစ္ဆဇာတိကာ၊ တေသံ အာကရော နိဝါသဘူမီတိ မကရာကရော၊ တံ။

၇။ အဘိဓမ္မေ နိယုတ္တာ အာဘိဓမ္မိကာ၊ တေသံ။ ဟတ္ထသာရံ ဝိယာတိ ဟတ္ထသာရံ။ ယထာ ဟိ မနုဿာနံ ဗဟူသု ရတနာဒီသု ဝိဇ္ဇမာနေသုပိ အာပဒါသု စ သုခပရိဘောဂတ္ထံ ဟတ္ထေ ကယိရမာနံ သာရရတနာဒိကံ ‘‘ဟတ္ထသာရ’’န္တိ ဝုစ္စတိ၊ ဧဝမိဒမ္ပိ သတိပိ မဟန္တေ အဘိဓမ္မပိဋကေ တဿ သဗ္ဗသော ဝိတ္တိဏ္ဏတာယ ပရိဟရိတုံ အသက္ကုဏေယျတ္တာ တဒတ္ထသာရသမ္ပိဏ္ဍနဝသေန ကယိရမာနံ အာဘိဓမ္မိကဘိက္ခူနံ သုခပရိဟရဏတ္ထာယ သမ္ပဇ္ဇတီတိ ဟတ္ထသာရသဒိသတ္တာ ‘‘ဟတ္ထသာရ’’န္တိ ဝုတ္တံ။ ပဝက္ခာမီတိ ပကာရေန ကထေဿာမိ၊ အနာဂတဝစနဉ္စေတံ၊ ဝတ္တမာနသမီပတ္တာ ဝါ အနာဂတေ ဝတ္တမာနူပစာရတော ဝတ္တမာနဝစနံ၊ ပဋိညာနန္တရမေဝ ဝက္ခတီတိ။ အတ္ထဝသေန ပကာရေန ကထေန္တောပိ သဒ္ဒဝသေန သင်္ခိပိတွာ ကထေဿာမီတိ ဒဿေန္တော အာဟ ‘‘သမာသေနာ’’တိ။ သမသနံ သံခိပနံ သမာသော၊ တေန သမာသေန၊ န ဗျာသဝသေနာတိ ဝုတ္တံ ဟောတိ။ ဧတ္တာဝတာ စ ပယောဇနာဘိဓာနာဘိဓေယျသောတုဇနသမုဿာဟနကရဏပ္ပကာရာနိ ဒဿေတွာ ဣဒါနိ ယသ္မာ သောတုဇနသမုဿာဟနံ နာမ တေသံ သက္ကစ္စသဝနေ နိယုဉ္ဇနံ၊ တသ္မာ တေ တတ္ထ နိယောဇေန္တော အာဟ ‘‘တံ သုဏာထ သမာဟိတာ’’တိ။ သက္ကစ္စသဝနပဋိဗဒ္ဓါ ဟိ သမ္မာပဋိပတ္တီတိ။ တတ္ထ တန္တိ တံ မယာ ဝက္ခမာနံ အဘိဓမ္မာဝတာရံ သုဏာထ နိသာမယထ။ သမာဟိတာ သမ္မာ အာဟိတာ၊ အဝိက္ခိတ္တစိတ္တာတိ အတ္ထော။

ဂန္ထာရမ္ဘကထာဝဏ္ဏနာ နိဋ္ဌိတာ။