📜

၇။ သတ္တမော ပရိစ္ဆေဒေါ

ဝိပါကစိတ္တပ္ပဝတ္တိနိဒ္ဒေသဝဏ္ဏနာ

၃၇၆။

အနန္တဉာဏေနနိရင်္ဂဏေန၊

ဂုဏေသိနာ ကာရုဏိကေန တေန၊

ဝုတ္တေ ဝိပါကေ မတိပါဋဝတ္ထံ၊

ဝိပါကစိတ္တပ္ပဘဝံ သုဏာထ။

ယေန ဇိနေန အနန္တဉာဏေန နိက္ကိလေသေန ဂုဏေသိနာ ကာရုဏိကေန တေန ဇိနေန ဝုတ္တေ ဝိပါကသ္မိံ မတိပါဋဝတ္ထံ မတိဆေကဘာဝတ္ထာယ ဝိပါကစိတ္တပ္ပဘဝံ မယာ ဘဏမာနံ ဝိပါကစိတ္တပ္ပဝတ္တိံ တုမှေ သုဏာထ။

၃၇၇။ ဧကူနတိံသ ကမ္မာနိ၊ ပါကာ ဒွတ္တိံသ ဘဂဝတာ ဒဿိတာ၊ ကမ္မာနိ တီသု ဒွါရေသု ဒိဿရေ၊ ဝိပါကာ ဆသု ဒွါရေသု ဒိဿန္တိ။

၃၇၈-၉။ ကုသလံ ကာမလောကသ္မိံ ကာမလောကမှိ ကုသလံ ပဝတ္တေ၊ ပဋိသန္ဓိယဉ္စ တံတံပစ္စယမာဂမ္မ တံတံပစ္စယံ ပဋိစ္စ။ သော သော ပစ္စယော တံတံပစ္စယော၊ ‘‘တတပစ္စယော’’တိ ဝတ္တဗ္ဗေ နိဂ္ဂဟီတာဂမဝသေန ‘‘တံတံပစ္စယော’’တိ ဝုတ္တံ။ ဝိစ္ဆာကမ္မဓာရယသမာသောယံ။ ဝိဝိဓံ ဖလံ ဒဒါတိ။ ဧကာယ စေတနာယ ဧကာ ပဋိသန္ဓိ ဘဂဝတာ ပကာသိတာ။ နာနာကမ္မေဟိ နာနာ ပဋိသန္ဓိယော စ ဘဝန္တိ။

၃၈၀-၁။ တိဟေတုကံ တု ယံ ကမ္မံ တိဟေတုကံ ယံ ကမ္မံ ပန ကာမာဝစရသညိတံ တိဟေတုကံ ဝိပါကံ ဒုဟေတုဉ္စ ဝိပါကံ အဟေတုဉ္စ ဝိပါကံ ဒေတိ။ ဒုဟေတုကံ တု ယံ ကမ္မံ ဒုဟေတုကံ ယံ ကမ္မံ ပန၊ တံ ကမ္မံ တိဟေတုကံ ဝိပါကံ န ဒေတိ၊ အတ္တနော ဝိပါကံ ဒုဟေတုဉ္စ အဟေတုဉ္စ ဒေတိ။

၃၈၂-၃။ တိဟေတုကေနကမ္မေန၊ ပဋိသန္ဓိ တိဟေတုကာ ဟောတိ၊ ဒုဟေတုကာပိ ပဋိသန္ဓိ ဟောတေဝ၊ အဟေတုကာ ပဋိသန္ဓိ နေဝ ဟောတိ၊ ဥက္ကဋ္ဌတိဟေတုကကမ္မေန တိဟေတုကာ ပဋိသန္ဓိ၊ ဩမကတိဟေတုကကမ္မေန ဒုဟေတုကာ ပဋိသန္ဓိ ဟောတီတိ အဓိပ္ပာယော။ ဒုဟေတုကေန ကမ္မေန ဒုဟေတုကာ ပဋိသန္ဓိ၊ အဟေတုကာပိ ပဋိသန္ဓိ ဟောတေဝ၊ တိဟေတုကာ ပဋိသန္ဓိ နေဝ ဟောတိ။ ဥက္ကဋ္ဌဒုဟေတုကကမ္မေန ဒုဟေတုကာ ပဋိသန္ဓိ၊ ဩမကဒုဟေတုကကမ္မေန အဟေတုကာ ပဋိသန္ဓိ ဟောတီတိ အဓိပ္ပာယော။

၃၈၄။ အသင်္ခါရကမ္မံ အသင်္ခါရဝိပါကံ ဒေတိ၊ သသင်္ခါရဝိပါကမ္ပိ ဒေတိ၊ သသင်္ခါရကမ္မံ သသင်္ခါရဖလံ၊ တထာ အသင်္ခါရဖလံ ဒေတိ။

၃၈၅။ ဧကာယ စေတနာယေတ္ထ ဧတ္ထ ဧတာသု စေတနာသု ဧကာယ ကုသလာယ စေတနာယ သောဠသဝိဓာ ဝိပါကစိတ္တာနိ ဘဝန္တိ။ ဣတိ ဝစနံ ဇိနော ပကာသယေ။

၃၈၆-၉၂။ ဝေဒနာပရိဝတ္တနံ အာရမ္မဏေန ဟောတေဝ၊ တဒါရမ္မဏစိတ္တမ္ပိ ဇဝနေန နိယာမိတံ၊ သောမနဿယုတ္တေ ကုသလေ ဇဝနေ ဇဝိတေ တဒါရမ္မဏမ္ပိ သောမနဿယုတ္တမေဝ ဟောတီတိ အတ္ထော။ ဥပေက္ခာယုတ္တကုသလေပိ ဧသေဝ နယော။ ကာမာဝစရစိတ္တေန ကုသလေနာဒိနာ ပဌမေန ကုသလေန တုလျေန ဝိပါကစိတ္တေန။ တတိယာဝိသေသနံ။ ယေန သတ္တေန ဂဟိတာ ပဋိသန္ဓိ စေ ယဒိ၊ ဣဋ္ဌေ ဗလဝါရမ္မဏေ မနာပေ အတိမဟန္တာရမ္မဏေ တဿ သတ္တဿ စက္ခုဿ စက္ခုပသာဒဿ အာပါထံ ပါကဋဘာဝံ အာဂတေ သတိ မနောဓာတုယာ တာယ ဘဝင်္ဂသ္မိံ အာဝဋ္ဋိတေ ဘဝင်္ဂသောတေ ဆိန္ဒိတေ သတိ စက္ခုဝိညာဏကာဒီသု ဝီထိစိတ္တေသု ဇာတေသု ပဌမံ ကုသလံ ကာမမာနသံ ဇဝနံ ဟုတွာ ဇာယတေ။ သတ္တက္ခတ္တုဝါရာနိ ဇဝိတွာန ပဌမေ မဟာကုသလေ ဂတေ တဒေဝ တံ ဧဝ ဣဋ္ဌံ အာရမ္မဏံ ကတွာ တေနေဝ ပဌမမဟာကုသလေန သဒိသံ တဒါရမ္မဏဝိပါကစိတ္တံ။ သန္ဓိယာ တုလျတော ပဋိသန္ဓိယာ တုလျဘာဝေန မူလဘဝင်္ဂန္တိ မူလဘဝင်္ဂံ နာမ ဘဂဝတာ ပဝုစ္စတေ။ တဉ္စ တဒါရမ္မဏစိတ္တံ သန္တီရဏံ သောမနဿယုတ္တံ သန္တီရဏံ ဒဿနံ သမ္ပဋိစ္ဆနံ ဧတ္ထ ဧတသ္မိံ ဝီထိစိတ္တေ ဂဏနူပဂစိတ္တာနိ ဂဏနံ ဥပဂတာနိ စိတ္တာနိ စတ္တာရိ ဧဝ ဘဝန္တိ။

၃၉၃-၄။ ယဒါ ဟိ ဒုတိယံ စိတ္တံ၊ ကုသလံ ဇဝနံ ယဒါ ယသ္မိံ ကာလေ တဿေဝ သောမနဿတိဟေတုနော ပုဂ္ဂလဿ ဒုတိယံ ကုသလံ စိတ္တံ ဇဝနံ ဟောတိ၊ တဒါ တသ္မိံ ကာလေ တေန ဇဝနေန တုလျဝိပါကံ တဒါရမ္မဏံ။ တဿ သန္ဓိယာ အသမာနတ္တာ တဿ တဒါရမ္မဏစိတ္တဿ သန္ဓိယာ အသမာနတ္တာ ဒွေ နာမာနိ အဿ ဝိပါကစိတ္တဿ အနေန ဝိပါကစိတ္တေန လဗ္ဘရေ လဗ္ဘန္တိ၊ ‘‘အာဂန္တုကဘဝင်္ဂ’’န္တိ နာမံ ‘‘တဒါရမ္မဏက’’န္တိ စ နာမံ ဣတိ ဒွေ နာမာနိ လဗ္ဘန္တိ။

၃၉၅-၆။ ယဒါ တဿေဝ ပုဂ္ဂလဿ တတိယံ ပုညံ ဇဝနံ ဟောတိ၊ တဒါ တေန ဇဝနေန သဒိသံ တတိယံ ပါကံ တဒါရမ္မဏိကံ သိယာ။ ဣဒံ ဝိပါကစိတ္တံ အာဂန္တုကဘဝင်္ဂန္တိ အာဂန္တုဘဝင်္ဂံ နာမ ဘဂဝတာ ဝုစ္စတေ၊ ပုရိမာနိ စ ပဉ္စ ဝိပါကစိတ္တာနိ ဣမိနာ ပန တတိယဝိပါကေန ပန သဒ္ဓိံ ဆ စိတ္တာနိ ဟောန္တိ။

၃၉၇-၈။ ယဒါ စတုတ္ထံ ကုသလံ ဇဝနံ ဟောတိ၊ တဒါ တေန ဇဝနေန တုလျံ စတုတ္ထဝိပါကံ တဒါရမ္မဏဘာဝံ ဝဇေ ဂစ္ဆေယျ။ စတုတ္ထဝိပါကံ အာဂန္တုကဘဝင်္ဂံ တဒါရမ္မဏနာမကံ ဟောတိ၊ ပုရိမာနိ ဆ ပါကာနိ ဣမိနာ သဟ စတုတ္ထပါကေန သတ္တ စိတ္တာနိ ဟောန္တိ။

၃၉၉-၄၀၃။ ယဒါ ယသ္မိံ ကာလေ တသ္မိံ စက္ခုဒွါရေ ဣဋ္ဌမဇ္ဈတ္တာရမ္မဏံ ပန တထာ အာပါထံ အာဂစ္ဆတိ စ၊ တဒါ ဝုတ္တနယေန အာဝဇ္ဇနဒဿနသမ္ပဋိစ္ဆနစိတ္တေသု ဇာတေသု ဣဓ ဣမသ္မိံ မဇ္ဈတ္တာရမ္မဏေ အာရမ္မဏဝသေန ဝေဒနာ ပရိဝတ္တတိ၊ တသ္မာ ဥပေက္ခာသဟဂတံ သန္တီရဏံ မနော ဟောတိ။ ဥပေက္ခာသဟဂတေသု ဧဝ စတူသုပိ ဇဝနေသု ဇဝိတေသု တေဟိ ဇဝနေဟိ တုလျာနိ စတ္တာရိ ဝိပါကစိတ္တာနိ ဇာယရေ။ အစ္စန္တံ ဧကန္တေန ဝေဒနာယ ဥပေက္ခာဝေဒနာယ ပုရိမေဟိ သောမနဿသဟဂတေဟိ စိတ္တေဟိ အသမာနတ္တာ စတ္တာရိ စိတ္တာနိ နာမတော ပိဋ္ဌိဘဝင်္ဂါနိ နာမ ဟောန္တိ၊ ပိဋ္ဌိဘဝင်္ဂါနိ သောမနဿဝိပါကာနံ ပစ္ဆာဘာဂေ ဘဝင်္ဂါနီတိ အတ္ထော။ ဣမာနိ ဥပေက္ခာသဟဂတာနိ ပဉ္စ ဝိပါကာနိ ပုရိမေဟိ သတ္တဟိ ဝိပါကေဟိ သဒ္ဓိံ ဒွါဒသ ဝိပါကာနိ ဘဝန္တိ။ ဣတိ ဝစနံ ဓီရော ဝိနိဒ္ဒိသေ။

၄၀၄-၆။ ယထာ စက္ခုဒွါရေ ဒွါဒသ ဝိပါကာနိ ဟောန္တိ၊ တထာ ဧဝံ သောတာဒီသု ဒွါရေသုပိ ဒွါဒသ ပါကာနိ ဟောန္တိ။ ဣတိ ဝစနံ ဓီရော နိဒ္ဒိသေ၊ ဣမေ မယာ ဝုတ္တာ ဝိပါကာ သမသဋ္ဌိ ဘဝန္တိ။ ဧဝံ ဣမိနာ မယာ ဝုတ္တပ္ပကာရေန ဧကာယ စေတနာယ ကမ္မေ အာယူဟိတေ ပဝတ္တိတေ သမသဋ္ဌိ ဝိပါကာနိ ဥပ္ပဇ္ဇန္တိ၊ ဣမသ္မိံ ဝစနေ သံသယော နတ္ထိ။ ဂဟိတာဂ္ဂဟဏေနေတ္ထ ဧတ္ထ ဧတေသု ဝိပါကေသု ဂဟိတာနံ ဝိပါကာနံ အဂ္ဂဟဏေန စက္ခုဒွါရေ ဒွါဒသ ပါကာ၊ သောတဝိညာဏကာဒီနိ စတ္တာရိ စာတိ သောဠသ ပါကာနိ ဟောန္တိ။

၄၀၇-၁၁။ ဧကေန တိဟေတုကကုသလေန အသင်္ခါရိကေန ကမ္မေန အာယူဟိတေ ယထာ၊ ဧဝမေဝ သသင်္ခါရတိဟေတုကကုသလေနာပိ အသင်္ခါရသသင်္ခါရဥပေက္ခာသဟဂတေဟိပိ ကုသလေဟိ ကမ္မေ အာယူဟိတေ ပဝတ္တိတေ တေသံ တိဏ္ဏံ ကုသလာနံ ဝိပါကေဟိ တီဟိပိ ဒိန္နာယ ပဋိသန္ဓိယာ ဧသေဝ နယော ပဏ္ဍိတေန ဇာနိတဗ္ဗော။ ဣဓ ဣမသ္မိံ ဥပေက္ခာသဟဂတဒွယေ ဣဋ္ဌမဇ္ဈတ္တဂေါစရဿ ဝသေန ဝိပါကစိတ္တပ္ပဝတ္တိံ ပဌမံ ဒဿေတွာ ဒဿေတဗ္ဗာထ ပစ္ဆာ တု၊ ဣဋ္ဌသ္မိံ ဂေါစရေ ဣဓ အထ ပစ္ဆာ မယာ ဝုတ္တစိတ္တပ္ပဝတ္တိတော ပစ္ဆာကာလေ ပန ဣဓ ဣမသ္မိံ ဣဋ္ဌဂေါစရေ ဧကေကသ္မိံ ပန ဒွါဒသ ဒွါဒသ ပါကာ ပဏ္ဍိတေန ဒဿေတဗ္ဗာ။ ဂဟိတာဂ္ဂဟဏေနေတ္ထ ဧတ္ထ ဧတေသု ဝိပါကေသု ဂဟိတာနံ ဝိပါကာနံ အဂ္ဂဟဏေန သောဠသ ပါကစိတ္တာနိ ဟောန္တိ။ ပုဗ္ဗေ ကာလေ မယာ ဝုတ္တနယေနေဝ သဗ္ဗံ ဝစနံ အသေသတော အသေသဘာဝေန ပဏ္ဍိတေန ဉေယျံ။

၄၁၂-၄။ တိဟေတုကေန ကမ္မေန၊ ပဋိသန္ဓိ တိဟေတုကာ ဘဝတိ၊ ဣတိ အယံ ဝါရော ဧတ္တာဝတာ ဧတ္တကေန ဝစနေန မယာ ဝုတ္တော။ ဧကံ ကမ္မံ ဧကသ္မိံ ဘဝေ ဧကံ ပဋိသန္ဓိံ ဇနေတိ၊ တတော ပဋိသန္ဓိတော အပရံ အညံ ဒုတိယံ ပဋိသန္ဓိံ န ဇနေတိ၊ ပဝတ္တိယံ အနေကာနိ ဝိပါကာနိ သဉ္ဇနေတိ။ ဟိ သစ္စံ ‘‘ဧကံ ကမ္မ’’န္တိအာဒိကံ ဝစနံ။ ဧကသ္မာ ဗီဇာ ဧကတော ဗီဇတော ဧကံ အင်္ကုရံ ဇာယတိ၊ အဿ ဗီဇဿ ဗဟူနိ ဖလာနိ ဟေတုပ္ပဝတ္တိတော သလိလာဒိဟေတုပ္ပတ္တိယာ ဟောန္တိ။

၄၁၅-၂၁။ ဒုဟေတုကေန ကမ္မေန၊ ပဋိသန္ဓိ ဒုဟေတုကာ ဟောတိ၊ ဣတိ ဝစနံ အယံ ဝါရော အနုပုဗ္ဗေန အနုပဋိပါဋိယာ အာဂတော။ ဣဓ ဣမသ္မိံ အဓိကာရေ ဒုဟေတုကေန ပုညေန သောမနဿယုတ္တေန အသင်္ခါရိကေန စိတ္တေန ကမ္မေ အာယူဟိတေ ပန ဒုဟေတုကေန သောမနဿယုတ္တကုသလေန တုလျေန ပါကေန ယေန သတ္တေန ဂဟိတာ ပဋိသန္ဓိ စေ၊ ဣဋ္ဌေ အာရမ္မဏေ တဿ သတ္တဿ စက္ခုဒွါရေ အာပါထံ အာဂတေ သောမနဿယုတ္တေ ဉာဏဟီနေ ကုသလမာနသေ တသ္မိံ ဒုဟေတုကေ သတ္တက္ခတ္တုံ ဇဝိတွာန ဂတေ တံ ဧဝ အာရမ္မဏံ ကတွာ တဒနန္တရံ တဿ ဇဝနဿ အနန္တရံ တံသရိက္ခကံ တေန ဇဝနေန သဒိသံ ဧကန္တံ အသင်္ခါရိကမာနသံ ဇာယတိ။ တန္တိ တံ စိတ္တံ မူလဘဝင်္ဂန္တိ မူလဘဝင်္ဂံ နာမ တဒါရမ္မဏမိစ္စပိ တဒါရမ္မဏံ နာမ ဥဘယမ္ပိ နာမံ တဿေဝ နာမံ တဿ စိတ္တဿ ဧဝ နာမံ။ ဣတိ ဧဝံ ဣမိနာ ပကာရေန ဘဂဝတာ ပရိဒီပိတံ။ ဒုဟေတုကေ သသင်္ခါရေ ကုသလေ ဇဝနေ ဇဝိတေပိ စ တံသမံ တေန စိတ္တေန သဒိသံ အာဂန္တုကသင်္ခါတံ တဒါရမ္မဏမာနသံ ဟောတိ။

၄၂၂-၉။ တထေဝ စ တထာ ဧဝ စ ဣဋ္ဌမဇ္ဈတ္တဂေါစရေ ဒုဟေတူနံ ဒွိန္နံ ဥပေက္ခာယုတ္တာနံ ဇဝနာနံ အနန္တရံ တာဒိသာနိ တေဟိ ဇဝနေဟိ သဒိသာနိ ဒွေ တဒါရမ္မဏမာနသာနိ ဇာယန္တေ၊ တေသံ တဒါရမ္မဏမာနသာနံ ‘‘ပိဋ္ဌိဘဝင်္ဂ’’န္တိ နာမံ၊ ‘‘အာဂန္တုကဘဝင်္ဂ’’န္တိ စ နာမံ ဟောတိ။ သန္တီရဏဒွယဉ္စေဝ ဒဿနံ သမ္ပဋိစ္ဆနံ ဣမာနိ ဒွေ ဘဝင်္ဂါနိ စာတိ အဋ္ဌ ဝိပါကာ စက္ခုဒွါရေ ဟောန္တိ။ ဧဝံ ဣမိနာ မယာ ဝုတ္တပ္ပကာရေန ပဉ္စသု ဒွါရေသုပိ စ အဋ္ဌ အဋ္ဌ ဝိပါကေ ကတွာ ပဝတ္တိယံ စတ္တာလီသ ဝိပါကာနိ ဘဝန္တိ။ ဂဟိတာဂ္ဂဟဏေနေတ္ထ၊ စက္ခုဒွါရေ ပနဋ္ဌ စ ဧတ္ထ ဧတေသု ဝိပါကေသု ဂဟိတာနံ ဝိပါကာနံ အဂ္ဂဟဏေန စက္ခုဒွါရေ အဋ္ဌ စ ဝိပါကာ သောတဃာနာဒိနာ ဝိပါကေန သဒ္ဓိံ ဒွါဒသ ဧဝ ဝိပါကာနိ ဘဝန္တိ။ ဧကာယ စေတနာယေဝံ ဧဝံ ဣမိနာ မယာ ဝုတ္တပ္ပကာရေန ဧကာယ စေတနာယ ကမ္မေ အာယူဟိတေ ပဝတ္တိတေ ပန သတိ ဒွါဒသေဝ ဝိပါကာနိ ဘဝန္တိ။ ဣတိ ဝစနံ ဝိဇိတကုသလယုဒ္ဓသင်္ဂါမေန ပကာသိတံ ဒေသိတံ။ ဒုဟေတုကတ္တယေနာပိ၊ သေသေန သဒိသေန တု မယာ ဝုတ္တတော ဒုဟေတုတော သေသေန ဒုဟေတုကတ္တယေနာပိ သဒိသေန ပါကေန အာဒိန္နသန္ဓိနော ဂဟိတပဋိသန္ဓိကဿ သတ္တဿ ဧဝံ နယော မတော ကထိတော နိရင်္ဂဏေန။ ဒုဟေတုကေန ကမ္မေန ဒုဟေတုကာ ပဋိသန္ဓိ ဟောတိ။ ဣတိ အယံ ဝါရော စ ဧတ္တာဝတာ ဧတ္တကေန ဝစနေန မယာ ဝုတ္တော။

၄၃၀-၈။ ဒုဟေတုကေန ကမ္မေန အဟေတုကာ ပဋိသန္ဓိ ဟောတိ၊ ဣတိ အယံ ဝါရော အနုပုဗ္ဗေန ပဋိပါဋိယာ အာဂတော။ တေသု စတူသုပိ ဒုဟေတုကေသု ကုသလေသု စိတ္တေသု အညတရေနေဝ ဟေတုကေန ကမ္မေ အာယူဟိတေ ပဝတ္တိတေ သတိ တဿေဝ ဒုဟေတုကဿ ကုသလဇဝနဿ ပါကဘူတာယ ဥပေက္ခာသဟဂတာဟေတုကာယ မနောဝိညာဏဓာတုယာ အာဒိန္နပဋိသန္ဓိနော သတ္တဿ သာ ပဋိသန္ဓိ ကမ္မသဒိသာ နာမ န ဝတ္တဗ္ဗာ ပဏ္ဍိတေဟိ။ ဟိ သစ္စံ ‘‘ပဋိသန္ဓိ န ဝတ္တဗ္ဗာ’’တိအာဒိကံ ဝစနံ။ ကမ္မံ ဒုဟေတုကံ ဟောတိ၊ ပဋိသန္ဓိ အဟေတုကာ ဟောတိ။ တဿ ဒေဟိနော သတ္တဿ ဝုဍ္ဎိမုပေတဿ ဝုဍ္ဎိံ ဥပဂတဿ စက္ခုဒွါရေ ပန ဣဋ္ဌမဇ္ဈတ္တဂေါစရေ အာပါထမာဂတေ သတိ ဒုဟေတုကာနံ စတုန္နံ ပုညာနံ ယဿ ကဿစိ ဇဝနဿ အဝသာနမှိ ဣဒံ အဟေတုကံ မနော တဒါရမ္မဏဘာဝေန ဇာယတိ။ ဧတ္ထ ဧတသ္မိံ ဝစနေ သံသယော သန္ဒေဟော နတ္ထိ၊ တံ အဟေတုကစိတ္တံ မူလဘဝင်္ဂဉ္စ တဒါရမ္မဏမေဝ စ ဟောတိ။ စက္ခုဝိညာဏကာဒီသုပိ ဝီထိစိတ္တေသု ဇာတေသု ဥပေက္ခာသဟဂတံယေဝ သန္တီရဏမ္ပိ စ ဟောတိ။ တေသု ဧကံ ဌပေတွာန၊ ဂဟိတာဂ္ဂဟဏေနိဓ တေသု ဒွီသု သန္တီရဏတဒါရမ္မဏကိစ္စေသု ဝိပါကေသု ဧကံ သန္တီရဏကိစ္စံ တဒါရမ္မဏကိစ္စံ တံ စိတ္တံ ဌပေတွာ ဂဟိတာနံ ဝိပါကာနံ အဂ္ဂဟဏေန ဣဓ ဣဋ္ဌမဇ္ဈတ္တာရမ္မဏေ ဂဏနူပဂစိတ္တာနိ တီဏိယေဝ ဘဝန္တိ။

၄၃၉-၄၁။ ဣဋ္ဌေ အာရမ္မဏေ စက္ခု-ဒွါရေ အာပါထမာဂတေ တဒါ သန္တီရဏဉ္စေဝ သောမနဿယုတ္တံယေဝ ဟောတိ၊ တဒါရမ္မဏမာနသဉ္စ သောမနဿယုတ္တံယေဝ ဟောတိ၊ တေသု သန္တီရဏတဒါရမ္မဏကိစ္စေသု ဝိပါကေသု ဧကေကံ သန္တီရဏကိစ္စံ၊ တဒါရမ္မဏကိစ္စံ ဝါ စိတ္တံ ဂဟေတွာ ပုရိမာနိ စ တီဏိ စတ္တာရိ ဧဝ ဝိပါကာနိ ဘဝန္တိ။ ဧဝံ ဣမိနာ မယာ ဝုတ္တပ္ပကာရေန ပဉ္စသု ဒွါရေသုပိ စတ္တာရိ စတ္တာရိ ဝိပါကစိတ္တာနီတိ ပဝတ္တိယံ ဝိပါကာနိ ဝီသတိ စိတ္တာနိ ဟောန္တိ။

၄၄၂-၈။ စက္ခုဒွါရေ တု စတ္တာရိ၊ ဂဟိတာဂ္ဂဟဏေနိဓ ဂဟိတာနံ ဝိပါကာနံ အဂ္ဂဟဏေန စက္ခုဒွါရေ ပန စတ္တာရိ ဝိပါကာနိ ဣဓ ဣမသ္မိံ ဣဋ္ဌာရမ္မဏေ သောတဃာနာဒိနာ ဝိပါကေန သဒ္ဓိံ အဟေတုကံ အဋ္ဌကံ ဟောတိ ဧဝ။ အဟေတုကပဋိသန္ဓိဿ သတ္တဿ ဒုဟေတုကံ၊ တိဟေတုကံ ဝါ တဒါရမ္မဏံ န ဘဝေ န ဘဝေယျ၊ ဒုဟေတုပဋိသန္ဓိနော သတ္တဿ တိဟေတုကံ တဒါရမ္မဏံ န ဘဝေ။ ဇာတာ သုဂတိယံ ယေန၊ ပါကေန ပဋိသန္ဓိ တု သုဂတိယံ ယေန ပါကေန ပဋိသန္ဓိ ဇာတာ၊ တေန ဝိပါကေန တုလျမ္ပိ၊ ဟီနံ ဝါ တေသံ တဒါရမ္မဏံ ဘဝေယျ။ မနုဿလောကံ သန္ဓာယ၊ ဝုတ္တဉ္စာဟေတုကဋ္ဌကံ သုဂတိယံ အဟေတုကဋ္ဌကဉ္စ မနုဿလောကဉ္စ သန္ဓာယ ပဋိစ္စ ကာရဏံ ကတွာ မယာ ဝုတ္တံ။ စတူသုပိ အပါယေသု ပန အပေတော အယော ပတိဋ္ဌာ ဧတေဟီတိ အပါယော၊ တေသု။ ပဝတ္တေ အဟေတုကံ အဋ္ဌကံ အာပါယိကေဟိ လဗ္ဘတိ။ ထေရော နေရယိကာနံ တု၊ ဓမ္မံ ဒေသေတိ ဝဿတိ ထိရော ထိရကာရဓမ္မော ယသ္မိံ အတ္ထီတိ ထေရော၊ ဒုတိယအဂ္ဂသာဝကဘူတော ဣဒ္ဓိမာ မောဂ္ဂလ္လာနတ္ထေရော နေရယိကာနံ နိရယေ ဇာတာနံ သတ္တာနံ ဓမ္မံ ဒေသေတိ ဝဿတိ၊ ‘‘ဥစ္ဆင်္ဂေ မံ နိသီဒိတွာ’’တိအာဒီသု ဝိယ ဒေဝံ ဝဿာပေတီတိ အတ္ထော။ ဂန္ဓံ ဝါယုဉ္စ မာပေတိ ယဒါ၊ တဒါ ပန တေသံ နေရယိကာနံ သတ္တာနံ တေဟိ နေရယိကသတ္တေဟိ ထေရံ ဒိသွာ၊ ဓမ္မဉ္စ သုတွာ၊ ဂန္ဓဉ္စ ဃာယိတွာ ဇလံ ဥဒကဉ္စ ပိဝတံ ပိဝန္တာနံ မုဒုံ ဝါယုဉ္စ တေဟိ ဖုသတံ ဖုသန္တာနံ တေသံ နေရယိကသတ္တာနံ စက္ခုဝိညာဏကာဒီနိ ပဉ္စပိ ပုညဇာနိ ဧဝ ကုသလဝိပါကာနိ ဧဝ သန္တီရဏဒွယံ ပုညဇံ ဧဝ ကုသလဝိပါကံ ဧဝ ပုညဇာ ဧဝ ဧကာ မနောဓာတု ဣတိ အဋ္ဌကံ ဟောတိ။

၄၄၉-၅၀။ အယံ တာဝ ကထာ ‘‘စက္ခုဝိညာဏကာဒီနိ ပုညဇာနေဝါ’’တိအာဒိကာ အယံ ကထာ ဣဋ္ဌဣဋ္ဌမဇ္ဈတ္တဂေါစရေ ကာမာဝစရေ ပုညာနံ ဇဝနာနံ ဝသေန မယာ ဝုတ္တာ။ တဒါရမ္မဏစေတသော တဒါရမ္မဏစိတ္တဿ ယံ နိယမတ္တံ ‘‘တဒါရမ္မဏမာနသံ ဇဝနေန နိယာမိတ’’န္တိအာဒိဝစနေန မယာ ဝုတ္တံ၊ တံ နိယမတ္တံ ကုသလံ သန္ဓာယ ဝုတ္တံ။ သောမနဿယုတ္တေ ကာမာဝစရကုသလေ ဇဝိတေ တဒါရမ္မဏမ္ပိ သောမနဿယုတ္တမေဝ ဟောတိ၊ ဥပေက္ခာယုတ္တေ ကာမာဝစရကုသလေ ဇဝိတေ တဒါရမ္မဏမ္ပိ ဥပေက္ခာယုတ္တမေဝ ဟောတိ၊ နေတံ အကုသလေ ဥပေက္ခာယုတ္တေ ဝိစိကိစ္ဆာဒိကေ အကုသလေ ဇဝနေ ပန ဇဝိတေ သောမနဿယုတ္တမ္ပိ တဒါရမ္မဏံ ဟောတီတိ အဓိပ္ပာယော။ ဣတိပိ ဝစနံ အာစရိယေန ဒီပိတံ။

၄၅၁-၇။ ဣဓ ဣမသ္မိံ အဓိပ္ပာယေ အကုသလစိတ္တေသု သောမနဿယုတ္တေသု စတူသုပိ ဣဋ္ဌေ အာရမ္မဏေ တေသု စိတ္တေသု ဇဝိတေသု သောမနဿယုတ္တာ အဟေတုမနောဝိညာဏဓာတု တဒနန္တရံ တေသံ အကုသလဇဝနာနံ အနန္တရံ တဒါရမ္မဏဘာဝေန ဇာယတိ။ ဥပေက္ခာယုတ္တေသု ဆသု အကုသလစိတ္တေသု ဣဋ္ဌမဇ္ဈတ္တေ ဂေါစရေ ဇဝိတေသု ပုညဇာ ဥပေက္ခာသဟဂတာ အဟေတုမနောဝိညာဏဓာတု ဧဝ တဒနန္တရံ ဝါ တေသံ ဥပေက္ခာသဟဂတာနံ ဆန္နံ အကုသလဇဝနာနံ အနန္တရံ တဒါရမ္မဏဘာဝေန ဇာယတိ။ ဣဋ္ဌာရမ္မဏယောဂသ္မိံ ဗုဒ္ဓရူပါဒိဣဋ္ဌာရမ္မဏယောဂသ္မိံ ကင်္ခတော ‘‘ဗုဒ္ဓါ နု ခေါ၊ နော ဗုဒ္ဓါ’’တိ ကင်္ခန္တဿ သတ္တဿ ဥဒ္ဓတဿ ဝါ သတ္တဿ တဒါရမ္မဏမာနသံ သောမနဿယုတ္တံ အဟေတုကံ ဝိပါကံ ဟောတိ ပိဋ္ဌိဘဝင်္ဂံ။ သောမနဿယုတေ စိတ္တေ၊ ဇဝနေ ဇဝိတေ ပန သောမနဿယုတ္တာ ဧဝ ပဉ္စ တဒါရမ္မဏမာနသာ ပဏ္ဍိတေန ဂဝေသိတဗ္ဗာ။ ဥပေက္ခာသဟဂတေ စိတ္တေ ဇဝနေ ပန ဇဝိတေ သတိ ဥပေက္ခာသဟဂတာ ဆ စ တဒါရမ္မဏမာနသာ ပဏ္ဍိတေန ဂဝေသိတဗ္ဗာ။

၄၅၈-၆၃။ တိဟေတုသောမနဿေန၊ အာဒိန္နပဋိသန္ဓိနော သတ္တဿ ဈာနတော ပရိဟီနဿ ဝိပ္ပဋိသာရိနော တံ ဈာနံ ပစ္စဝေက္ခတော ပစ္စဝေက္ခန္တဿ ဒေါမနဿယုတ္တံ စိတ္တံ ဟောတိ။ တဿ ဒေါမနဿဿ အနန္တရံ ကိံ မာနသံ ဇာယတေ၊ တွံ ဒေါမနဿယုတ္တဇဝနဿ အနန္တရမာနသံ ဗြူဟိ ကထေဟိ။ ပဋ္ဌာနေ ပဋိသိဒ္ဓါ ဟိ ဒေါမနဿဿာနန္တရံ သောမနဿဿ ဥပ္ပတ္တိ ပဋ္ဌာနေ ပဋိသိဒ္ဓါ ပဋ္ဌာနပ္ပကရဏေ ဘဂဝတာ နိဝါရိတာ၊ အဿ သောမနဿဿ ဝါ အနန္တရံ ဒေါမနဿဿ ဥပ္ပတ္တိ ပဋ္ဌာနေ ပဋ္ဌာနပ္ပကရဏေ ပဋိသိဒ္ဓါ ဘဂဝတာ နိဝါရိတာ။ မဟဂ္ဂတံ ပနာရဗ္ဘ မဟဂ္ဂတံ ပဋိစ္စ ဇဝနေ ဇဝိတေပိ စ တဒါရမ္မဏမာနသံ တတ္ထေဝ တသ္မိံ ပဋ္ဌာနေ ဧဝ ပဋိသိဒ္ဓံ ဘဂဝတာ နိဝါရိတံ။ တသ္မာ ကာရဏာ ဘဝင်္ဂပါတော ဝါ တဒါရမ္မဏမေဝ ဝါ န ဟောတိ။ ကိံ နု ကာတဗ္ဗံ တေသံ ဘဝင်္ဂတဒါရမ္မဏာနံ အဘာဝေ ကာရဏံ ယံ ကာတဗ္ဗံ၊ အမှေဟိ တံ ကာရဏံ ကိံ နု ပုစ္ဆာမ၊ တံ တဒတ္ထံ အာဘိဓမ္မိကဘာဝေန အာဘိဓမ္မိက တံ ကာရဏံ ဝဒ ဝဒါဟိ။ ဥပေက္ခာသဟဂတာဟေတုမနောဝိညာဏဓာတု ပုညာပုညဝိပါကာ တဒါရမ္မဏိကာ သိယာ ဘဝေယျ။

၄၆၄-၇။ ဣမဿ တဒါရမ္မဏဿ အာဝဇ္ဇနံ ကိံ နတ္ထိ? တံ တဒါရမ္မဏမာနသံ ကထံ ကေန ပကာရေန ဇာယတေ? ဘဝင်္ဂအာဝဇ္ဇနာနံ စိတ္တာနံ ကိံ အာဝဇ္ဇနမတ္တံ? မဂ္ဂဿ အနန္တရဿ စ ဖလဿာပိ ကိံ အာဝဇ္ဇနံ နတ္ထိ? နိရောဓာ စ နိရောဓတော ဝုဋ္ဌဟန္တဿ ဘိက္ခုနော ဖလစိတ္တဿ ဝါတိ မယာ သုတံ၊ ဧဝံ ဣမိနာ မယာ ဝုတ္တပ္ပကာရေန အာဝဇ္ဇနံ နတ္ထိ။ ဝိနာ အာဝဇ္ဇနေနာပိ၊ ဟောတု ဇာယတု မာနသံ စိတ္တံ အာဝဇ္ဇနေန ဝိနာ အာဝဇ္ဇနံ ဝဇ္ဇေတွာ ဟောတု ဇာယတု၊ ကိမဿာရမ္မဏံ အဿ တဒါရမ္မဏမာနသဿ ကိံ အာရမ္မဏံ၊ ပဏ္ဍိတ၊ တွံ အာရမ္မဏံ ယဒိ ဇာနာသိ၊ တံ အာရမ္မဏံ ဗြူဟိ မယှံ ကထေဟိ။ ဝိနာ အာရမ္မဏေနေတံ ဧတံ မာနသံ အာရမ္မဏေန ဝိနာ အာရမ္မဏံ ဝဇ္ဇေတွာ န ဇာယတိ။ ဟိ သစ္စံ ‘‘ဝိနာ အာရမ္မဏေနေတ’’န္တိအာဒိကံ ဝစနံ၊ တဒါရမ္မဏမာနသံ ယဒါ ဒေါမနဿယုတ္တံ ဇဝနံ မဟဂ္ဂတာရမ္မဏံ ဇဝတိ၊ တဒါ တသ္မိံယေဝ ဇဝနစိတ္တက္ခဏေ ပရိတ္တေသု ကာမာဝစရာရမ္မဏေသု ယံ ကိဉ္စိ ပရိတ္တာရမ္မဏံ အာရဗ္ဘ ပဋိစ္စ ဇာယတိ။

၄၆၈-၇၃။ ဥတုဗီဇနိယာမော စ ဥတုနိယာမော ဗီဇနိယာမော စ ကမ္မဓမ္မနိယာမတာ စ ကမ္မနိယာမတာ စ သီလာဒိပါရမီဓမ္မနိယာမတာ စ စိတ္တဿ နိယာမော စာတိ ပဉ္စ နိယာမတာ ပဏ္ဍိတေန ဉေယျာ။ တတ္ထ တေသု ပဉ္စသု နိယာမေသု သဗ္ဗေသံ ပန ရုက္ခာနံ ဧကပ္ပဟာရေန ဖလပုပ္ဖာဒိဓာရဏံ ဥတု၊ အယံ ဥတုနိယာမတာ။ တေသံ တေသံ တု ဗီဇာနံ၊ တံတံတုလျဖလုဗ္ဘဝေါ တေသံ တေသံ ဗီဇာနံ ပန တေဟိ တေဟိ ဗီဇေဟိ တုလျာနမ္ပိ သဿာနံ ဖလာနံ ဥပ္ပတ္တိ၊ အယံ ဗီဇနိယာမတာ ။ မတ္ထကေ နာဠိကေရဿ နာဠိကေရဖလဿ မတ္ထကေ ဆိဒ္ဒတ္တံ ဆိဒ္ဒဘာဝေါ၊ အယံ ဗီဇဇော ဗီဇတော ဇာတော နိယာမော။ တိဟေတုကကမ္မံ တိဟေတုကဉ္စ ဝိပါကံ ဒုဟေတုကဉ္စ ဝိပါကံ အဟေတုကဉ္စ ဝိပါကံ ယတော ယံ ကမ္မံ ဒေတိ၊ အယံ ကမ္မနိယာမတာ။ ဗောဓိသတ္တဿ ဇာတိယံ ဇိနင်္ကုရဿ ဇာတိက္ခဏေ မေဒနီကမ္ပနာဒိကံ အနေကဝိသေသတ္တံ၊ အယံ သီလာဒိပါရမီဓမ္မနိယာမတာ။ တေန ဂေါစရေန ပသာဒသ္မိံ ဃဋ္ဋိတေ သတိ ဣဓ ဣမသ္မိံ စိတ္တဝီထိယံ အာဝဇ္ဇနာဒီနံ စိတ္တာနံ ဥပ္ပတ္တိ၊ အယံ စိတ္တနိယာမတာ။

၄၇၄။ ယော ပုဂ္ဂလော ဓီရော ဓီရသမ္ပန္နော ဂုဏသမ္ပန္နော ဝိက္ခိတ္တပါပေါ မောဟန္ဓကာရာပဂမံ အန္ဓကာရမနိဿာယ အဝိဇ္ဇာနိဿရဏံ ယဒိစ္ဆေ သစေ ဣစ္ဆေယျ၊ သော ဓီရော ဣမံ အဘိဓမ္မာဝတာရပ္ပကရဏံ အန္ဓဇ္ဇနာနံ အန္ဓသဒိသဗာလဇနာနံ ဟဒယန္ဓကာရံ ဝိဒ္ဓံသနံ အန္ဓကာရသန္နိဿိတဿ ယဿ ဟဒယဿ ဝိဒ္ဓံသနကရံ ဇလန္တံ ဒီပံ ဇလမာနံ ဒီပံ။ ပယတ္တောတိ ပကာရေန ယတတိ ဝီရိယံ ကရောတီတိ ပယတ္တော၊ သတတံ သဗ္ဗဒါ သိက္ခေထ သဇ္ဈာယနဓာရဏစိန္တနဝသေန သိက္ခေယျ။

ဣတိ အဘိဓမ္မာဝတာရဋီကာယ

ဝိပါကစိတ္တပ္ပဝတ္တိနိဒ္ဒေသဝဏ္ဏနာ နိဋ္ဌိတာ။

သတ္တမော ပရိစ္ဆေဒေါ။