📜

၅။ ကထာဝတ္ထုမာတိကာ

ပုဂ္ဂလကထာဝဏ္ဏနာ

ဣဒါနိ ကထာဝတ္ထုမာတိကာယ အတ္ထသံဝဏ္ဏနာနယော ဟောတိ။ တတ္ထ အနုတ္တာနတ္ထတော တာဝ ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ အယံ ပုစ္ဆာ၊ ‘‘အာမန္တာ’’တိ အယံ ပဋိဇာနနာ။ ကဿ ပနာယံ ပုစ္ဆာ၊ ကဿ ပဋိဇာနနာတိ? ‘‘အသုကဿာ’’တိ န ဝတ္တဗ္ဗာ။ န ဟိ ဘဂဝါ ပရဝါဒီဟိ သဒ္ဓိံ ဝိဂ္ဂါဟိကကထံ ကထေန္တော ဣမံ မာတိကံ ဌပေသိ၊ ပုဂ္ဂလပညတ္တိဒေသနာဒိံ ပန နိဿာယ ‘‘ပရမတ္ထတော အတ္တာ နာမ အတ္ထီ’’တိအာဒိနာ အနာဂတေ ဝိပလ္လာသဂါဟိဘိက္ခူနံ၊ ပရဝါဒီနဉ္စ နာနပ္ပကာရဒိဋ္ဌိဋ္ဌာနဝိသောဓနတ္ထံ မောဂ္ဂလိပုတ္တတိဿတ္ထေရဿ ဝါဒနယဒဿနဝသေန ပုဂ္ဂလဝါဒမေတံ အာရဗ္ဘ တန္တိဝသေန မာတိကံ ဌပေန္တော သကဝါဒိပရဝါဒီနံ ပုစ္ဆာဝိသဇ္ဇနဒေါသာရောပနနိဂ္ဂဟပါပနာဒိဝစနပဋိဝစနဝသေနေဝ ဌပေသိ၊ တသ္မာ တဒတ္ထဿ သုခါဝဓာရဏတ္ထံ သကဝါဒီပုစ္ဆာ ပရဝါဒီပုစ္ဆာ သကဝါဒီပဋိညာ ပရဝါဒီပဋိညာတိ ဧဝံ ဝိဘာဂံ ဒဿေတွာ အတ္ထဝဏ္ဏနံ ကရိဿာမ။

‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေနာ’’တိ အယံ သကဝါဒီပုစ္ဆာ၊ တာယ စ ‘‘ယေ ‘အတ္ထိ ပုဂ္ဂလော’တိ ဧဝံလဒ္ဓိကာ ပုဂ္ဂလဝါဒိနော၊ တေ ဧဝံ ပုစ္ဆိတဗ္ဗာ’’တိ ဒီပေတိ။ ကေ ပန တေ ပုဂ္ဂလဝါဒိနောတိ? သာသနေ ဝဇ္ဇိပုတ္တကာ စေဝ သမ္မိတိယာ စ ဗဟိဒ္ဓါ ဗဟူ အညတိတ္ထိယာ စ။ ကဒါ ပနေတေ သာသနေ ဥပ္ပန္နာတိ? ပရိနိဗ္ဗာနတော ဒုတိယေ ဝဿသတေ။ ဘဂဝတိ ကိရ ပရိနိဗ္ဗုတေ မဟာကဿပတ္ထေရေန သမုဿာဟိတေဟိ တပ္ပမုခေဟိ ဝသိဂဏေဟိ သုဘဒ္ဒဝုဍ္ဎပဗ္ဗဇိတာဒီနံ ပါပဘိက္ခူနံ ပဝေသောကာသနိသေဓနတ္ထံ အဇာတသတ္တုရာဇာနံ သဟာယံ လဘိတွာ ဓမ္မဝိနယသရီရံ သင်္ဂဟံ အာရောပေတွာ သာသနေ အစလေ ပဝတ္တာပိတေ တတော ဝဿသတဿ အစ္စယေန ဝေသာလိယံ ဝဇ္ဇိပုတ္တကေဟိ ဒီပိတာနိ ဒသ ဝတ္ထူနိ မဒ္ဒိတွာ တေ စ ဘိက္ခူ နိဂ္ဂဟေတွာ ယသတ္ထေရသမုဿာဟိတေဟိ ဝသိဂဏေဟိ ပုန ဓမ္မဝိနယသင်္ဂဟေ ကတေ တေဟိ နိဂ္ဂဟိတာ ဒသသဟဿာ ဝဇ္ဇိပုတ္တကာ ကဉ္စိ ဒုဗ္ဗလရာဇာနံ ဗလံ လဘိတွာ မူလသင်္ဂဟံ ဘိန္ဒိတွာ အတ္တနော အနာစာရာနုကူလဝစနံ ပက္ခိပိတွာ ဗုဒ္ဓဝစနဉ္စ ဆဍ္ဍေတွာ မဟာသင်္ဂီတီဟိ ဝိသုံ ဓမ္မဝိနယသင်္ဂဟံ ကတွာ မဟာသင်္ဃိကာစရိယကုလံ နာမ အကံသု။ ပရိသုဒ္ဓသာသနံ ပန ထေရေဟိ ပရိပါလိတတ္တာ ‘‘ထေရဝါဒေါ’’တိ ပညာယိ၊ ဣမေသု ပန ဒွီသု ဝါဒေသု မဟာသင်္ဃိကတော ဘိဇ္ဇိတွာ ဧကဗျောဟာရိကာ၊ ဂေါကုလိကာ စ၊ တတော ပဏ္ဏတ္တိဝါဒါ၊ ဗဟုလိယာ၊ စေတိယဝါဒါ စာတိ ပဉ္စ ဝါဒါ၊ မဟာသင်္ဃိကေဟိ ပန သဒ္ဓိံ ဆ အာစရိယကုလာနိ နာမ ဇာတာနိ။ တထာ ထေရဝါဒတော ဘိဇ္ဇိတွာ မဟိသာသကာ၊ ဝဇ္ဇိပုတ္တကာ စ၊ တတော ဓမ္မုတ္တရိယာ၊ ဘဒြယာနိကာ၊ ဆန္နာဂါရိကာ၊ သမ္မိတိယာ စ၊ မဟိသာသကတော ဓမ္မဂုတ္တိကာ၊ သဗ္ဗတ္ထိကာ စ၊ တတော ကဿပိကာ၊ တတော သင်္ကန္တိကာ၊ တတော သုတ္တဝါဒါ စာတိ ဣမေ ဧကာဒသ ဝါဒါ ဇာတာ။ တေ ပုရိမေဟိ ဆဟိ သဒ္ဓိံ သတ္တရသ ဘိန္နဝါဒါ ဒုတိယေ ဝဿသတေ ဥပ္ပန္နာ၊ ထေရဝါဒေါ ပန ဧကောဝ အသမ္ဘိန္နကော၊ တေန သဒ္ဓိံ သာသနေ အဋ္ဌာရသ နိကာယာ ဇာတာတိ ဝေဒိတဗ္ဗာ၊ ယေ ‘‘အဋ္ဌာရသာစရိယကုလာနီ’’တိ ပဝုစ္စန္တိ။ ဣမေသံ ပန အဋ္ဌာရသန္နံ အာစရိယဝါဒါနံ ဝသေန အာယတိံ သာသနဿ အာလုဠနံ ဉတွာ သမ္မာသမ္ဗုဒ္ဓါ ဒွိန္နံ ဝဿသတာနံ အစ္စယေန သာသနေ ပဋိလဒ္ဓသဒ္ဓေန အသောကေန ဓမ္မရညာ ဗာဟိရကေ အနောလောကေတွာ သာသနေ ဧဝ လာဘသက္ကာရေ ပဝတ္တန္တေ လာဘသက္ကာရတ္ထာယ သာသနဝေသံ ဂဟေတွာ သကာနိ သကာနိ ဒိဋ္ဌိဂတာနိ တထတော ဒီပေန္တေသု ဒွါသဋ္ဌိဒိဋ္ဌိဂတိကေသု ယထာဝုတ္တသတ္တရသာစရိယကုလေသု စ သမယကုသလတာယ ဝိစိနိတွာ သေတကာနိ ဒတွာ ဥပ္ပဗ္ဗာဇိတေသု ပရိသုဒ္ဓေ မဟာဘိက္ခုသင်္ဃေ နိသီဒိတွာ မောဂ္ဂလိပုတ္တတိဿတ္ထေရဿ ယာနိ တဒါ ဥပ္ပန္နာနိ ဝတ္ထူနိ၊ ယာနိ စ အာယတိံ ဥပ္ပဇ္ဇိဿန္တိ၊ သဗ္ဗာနိပိ တာနိ အတ္တနော သတ္ထာရာ ဒိန္နမာတိကာမုခမတ္တေန ပဋိဗာဟိတွာ သုတ္တသဟဿပဋိမဏ္ဍိတံ ပရပ္ပဝါဒမထနံ အာယတိလက္ခဏံ ကထာဝတ္ထုပ္ပကရဏံ မာတိကာဝိဘဇနဝသေန ဘာသိတွာ တံ တတိယသင်္ဂီတိယံ သင်္ဂဟံ အာရောပေတွာ အာလုဠိတံ သာသနံ ပဂ္ဂဟေတုံ သမတ္ထဘာဝံ ဘိက္ခုသင်္ဃေ ပကာသနတ္ထံ အာယတိဝါဒပ္ပဋိဗာဟနနယဒဿနဝသေန ဣမံ ကထာဝတ္ထုမာတိကံ ဝတွာ ထေရဿ ဩကာသံ ဌပေန္တော တဿာ ဝိဘင်္ဂံ န အဝေါစာတိ ဝေဒိတဗ္ဗံ။

တတ္ထ ပုဂ္ဂလောတိ အတ္တာ ဇီဝေါ သတ္တော။ ဥပလဗ္ဘတီတိ ပညာယ ဥပဂန္တွာ လဗ္ဘတိ၊ ဉာယတီတိ အတ္ထော။ သစ္စိကဋ္ဌပရမတ္ထေနာတိ ဧတ္ထ သစ္စိကဋ္ဌောတိ မာယာမရီစိအာဒယော ဝိယ အဘူတာကာရေန အဂ္ဂဟေတဗ္ဗော ဘူတဋ္ဌော။ ပရမတ္ထောတိ အနုဿဝါဒိဝသေန အဂ္ဂဟေတဗ္ဗော ဥတ္တမတ္ထော။ ဥဘယေနာပိ ယထာ ရူပဝေဒနာဒယော ဓမ္မာ ဘူတေန သဘာဝေန ဥပလဗ္ဘန္တိ၊ ဧဝံ တာဝ ‘‘ပုဂ္ဂလော ဥပလဗ္ဘတီ’’တိ ပုစ္ဆတိ။ ပရဝါဒီ ‘‘အာမန္တာ’’တိ ပဋိဇာနာတိ။ ပဋိဇာနနဉှိ ကတ္ထစိ ‘‘အာမ ဘန္တေ’’တိ အာဂစ္ဆတိ၊ ကတ္ထစိ ‘‘အာမော’’တိ အာဂစ္ဆတိ၊ ဣဓ ပန ‘‘အာမန္တာ’’တိ အာဂတံ။ တတြာယံ အဓိပ္ပာယော – ပရဝါဒီ ဟိ ယသ္မာ ဘဂဝတာ ‘‘အတ္ထိ ပုဂ္ဂလော အတ္တဟိတာယ ပဋိပန္နော’’တိအာဒိနာ (အ။ နိ။ ၄။၉၅-၉၆) ပုဂ္ဂလော ပကာသိတော၊ ဘဂဝါ စ အဝိတထဝါဒီ၊ တသ္မာ သော ‘‘သစ္စိကဋ္ဌပရမတ္ထေနေဝ အတ္ထီ’’တိ လဒ္ဓိံ ဂဟေတွာ ‘‘အာမန္တာ’’တိ ပဋိဇာနာတိ။

အထဿ တာဒိသဿ လေသဝစနဿ ဆလဝါဒဿ ဩကာသံ အဒဒမာနော သကဝါဒီ ‘‘ယော သစ္စိကဋ္ဌော’’တိအာဒိမာဟ။ တတြာယံ အဓိပ္ပာယော – ယွာယံ ဟေဋ္ဌာ ရူပဝေဒနာဒိကော ဓမ္မပ္ပဘေဒေါ အာဂတော၊ န သမ္မုတိသစ္စဝသေန၊ နာပိ အနုဿဝါဒိဝသေန ဂဟေတဗ္ဗော၊ အတ္တနော ပန ဘူတတာယ ဧဝ သစ္စိကဋ္ဌော၊ အတ္တပစ္စက္ခတာယ စ ပရမတ္ထော၊ သော တထာပဋိညာတော ပုဂ္ဂလော တတော တေန သစ္စိကဋ္ဌပရမတ္ထေန အာကာရေန ဥပလဗ္ဘတိ၊ ယထာ ရုပ္ပနာနုဘဝနာဒိနာ သကိယေနာကာရေန ပုန သစ္စိကဋ္ဌပရမတ္ထော ဥပလဗ္ဘတိ၊ ကိံ တဝ ပုဂ္ဂလောပိ ဧဝံ ဥပလဗ္ဘတီတိ ဝုတ္တံ ဟောတိ။ န ဟေဝံ ဝတ္တဗ္ဗေတိ အဝဇာနနာ ပရဝါဒိဿ။ သော ဟိ တထာရူပံ ပုဂ္ဂလံ အနိစ္ဆန္တော အဝဇာနာတိ။ န ဟိ အတ္တာ နာမ ခန္ဓာဒိဝိမုတ္တော ကောစိ ဒိဿတိ အညတြ ဗျာမောဟမတ္တာ။ တတြာယံ ပဒစ္ဆေဒေါ – န ဟိ ဧဝံ ဝတ္တဗ္ဗေတိ။ ‘‘န ဟ ဧဝ’’န္တိပိ ပဌန္တိ၊ ဒွိန္နမ္ပိ ဧဝံ န ဝတ္တဗ္ဗောတိ အတ္ထော။

အာဇာနာဟိ နိဂ္ဂဟန္တိ သကဝါဒိဝစနံ။ ယသ္မာ တေ ပုရိမာယ ဝတ္တဗ္ဗပဋိညာယ ပစ္ဆိမာ နဝတ္တဗ္ဗပဋိညာ၊ ပစ္ဆိမာယ စ ပုရိမာ န သန္ဓီယတိ၊ တသ္မာ နိဂ္ဂဟံ ပတ္တော၊ တံ နိဂ္ဂဟံ ဒေါသံ အပရာဓံ အာဇာနာဟိ၊ သမ္ပဋိစ္ဆာဟီတိ အတ္ထော။ ဧဝံ နိဂ္ဂဟံ အာဇာနာပေတွာ ဣဒါနိ တံ ဌပနာယ စေဝ အနုလောမပဋိလောမတော ပါပနာရောပနာနဉ္စ ဝသေန ပါကဋံ ကရောန္တော ‘‘ဟဉ္စိ ပုဂ္ဂလော’’တိအာဒိမာဟ။ တတ္ထ ဟဉ္စီတိ ယဒိ၊ သစေ ပုဂ္ဂလော ဥပလဗ္ဘတီတိ အတ္ထော။ အယံ တာဝ ပရဝါဒီပက္ခဿ အနုဝဒနေန ဌပနတော နိဂ္ဂဟပတိဋ္ဌာပနတော နိဂ္ဂဟပါပနာရောပနာနံ လက္ခဏဘူတာ အနုလောမဋ္ဌပနာ နာမ။ တေန ဝတ ရေတိအာဒိ အနုလောမပက္ခေ နိဂ္ဂဟဿ ပါပိကတ္တာ အနုလောမပါပနာ နာမ။ တတ္ထ တေနာတိ ကာရဏဝစနံ။ ဝတာတိ ဩကပ္ပနဝစနံ နိယမဝစနံ။ ရေတိ အာမန္တနဝစနံ။ ဣဒံ ဝုတ္တံ ဟောတိ – တေန ဝတ ရေ ဝတ္တဗ္ဗေ ဝတ ရေ ဟမ္ဘော ဘဒြမုခ တေန ကာရဏေန ဝတ္တဗ္ဗော ဧဝါတိ အတ္ထော။ ယံ တတ္ထ ဝဒေသီတိအာဒိ အနုလောမပက္ခေ နိဂ္ဂဟဿ အာရောပိတတ္တာ အနုလောမရောပနာ နာမ။ ယဉ္စဿ ပရိယောသာနေ ‘‘မိစ္ဆာ’’တိ ပဒံ၊ တဿ ပုရတော ‘‘ဣဒံ တေ’’တိ အာဟရိတဗ္ဗံ။ ဣဒံ တေ မိစ္ဆာတိ အယဉှေတ္ထ အတ္ထော။ ဧဝံ ဥပရိပိ ။ ပရတော ပါဠိယမ္ပိ ဧတံ အာဂတမေဝ။ နော စေ ပန ဝတ္တဗ္ဗေတိအာဒိ ‘‘န ဟေဝံ ဝတ္တဗ္ဗေ’’တိ ပဋိက္ခိတ္တပက္ခဿ အနုဝဒနေန ဌပိတတ္တာ ပဋိလောမတော နိဂ္ဂဟပါပနာရောပနာနံ လက္ခဏဘူတာ ပဋိလောမဋ္ဌပနာ နာမ။ နော စ ဝတ ရေတိအာဒိ ပဋိလောမပက္ခေ နိဂ္ဂဟဿ ပါပိတတ္တာ ပဋိလောမပါပနာ နာမ။ ပုန ယံ တတ္ထ ဝဒေသီတိအာဒိ ပဋိလောမပက္ခေ နိဂ္ဂဟဿ အာရောပိတတ္တာ ပဋိလောမရောပနာ နာမ။

တတြာယံ အာဒိတော ပဋ္ဌာယ သင်္ခေပတ္ထော – ယဒိ ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ တေန ဝတ ဘော သော ဥပလဗ္ဘတီတိ ဝတ္တဗ္ဗော။ ယံ ပန တတ္ထ ဝဒေသိ ‘‘ဝတ္တဗ္ဗော ခေါ ပုရိမပဉှေ ‘သစ္စိကဋ္ဌပရမတ္ထေန ဥပလဗ္ဘတီ’တိ နော စ ဝတ္တဗ္ဗော ဒုတိယပဉှေ ‘တတော သော ပုဂ္ဂလော ဥပလဗ္ဘတီ’’’တိ၊ ဣဒံ တေ မိစ္ဆာတိ ဧဝံ တာဝ အနုလောမတော ဌပနာပါပနာရောပနာ ဟောန္တိ။

အထ န ဝတ္တဗ္ဗော ဒုတိယပဉှေ ‘‘တတော သော ပုဂ္ဂလော ဥပလဗ္ဘတီ’’တိ၊ ပုရိမပဉှေပိ န ဝတ္တဗ္ဗောဝ။ ယံ ပန တတ္ထ ဝဒေသိ ‘‘ဝတ္တဗ္ဗော ခေါ ပုရိမပဉှေ ‘သစ္စိကဋ္ဌပရမတ္ထေန ဥပလဗ္ဘတီ’တိ၊ နော စ ဝတ္တဗ္ဗော ဒုတိယပဉှေ ‘တတော သော ပုဂ္ဂလော ဥပလဗ္ဘတီ’’’တိ၊ ဣဒံ တေ မိစ္ဆာတိ ဧဝံ ပဋိလောမတော ဌပနာပါပနာရောပနာ ဟောန္တိ။ ဧဝမေတံ နိဂ္ဂဟဿ စ အနုလောမတော ဒွိန္နံ၊ ပဋိလောမတော ဒွိန္နန္တိ စတုန္နံ ပါပနာရောပနာနဉ္စ ဝုတ္တတ္တာ ဥပလဗ္ဘတီတိအာဒိကံ အနုလောမပဉ္စကံ နာမ။ ဧတ္ထ စ ကိဉ္စာပိ အနုလောမတော ပါပနာရောပနာဟိ ဧကော၊ ပဋိလောမတော ပါပနာရောပနာဟိ ဧကောတိ ဒွေ နိဂ္ဂဟာ ကတာ၊ အာဇာနာဟိ နိဂ္ဂဟန္တိ ဧတဿေဝ ပန ပဌမဿ နိဂ္ဂဟဿ ဒွီဟာကာရေဟိ အာရောပိတတ္တာ ဧကောဝါယံ နိဂ္ဂဟောတိ ဂဟေတဗ္ဗော။ ပဌမော နိဂ္ဂဟော။

ဣဒါနိ ပစ္စနီကနယော ဟောတိ။ တတ္ထ ပုဂ္ဂလော နုပလဗ္ဘတီတိ ပုစ္ဆာ ပရဝါဒိဿ။ သကဝါဒီ ယထာ ရူပဝေဒနာဒယော ဓမ္မာ ဥပလဗ္ဘန္တိ၊ ဧဝံ အနုပလဗ္ဘနီယတော ‘‘အာမန္တာ’’တိ ပဋိဇာနာတိ။ ပုန ဣတရော အတ္တနာ အဓိပ္ပေတံ သစ္စိကဋ္ဌံယေဝ သန္ဓာယ ‘‘ယော သစ္စိကဋ္ဌော’’တိအာဒိမာဟ။ သမ္မုတိသစ္စပရမတ္ထသစ္စာနိ ဝါ ဧကတော ကတွာပိ ပရဝါဒီ ဧဝမာဟ။ သကဝါဒီ ပုဂ္ဂလော ဟိ ဥပါဒါယပညတ္တိသဗ္ဘာဝတောပိ ဒွိန္နံ သစ္စာနံ ဧကတော ကတွာ ပုစ္ဆိတတ္တာပိ ‘‘န ဟေဝ’’န္တိ ပဋိက္ခိပတိ။ ဣဒါနိ ကိဉ္စာပိ တေန ပဌမံ ပရမတ္ထသစ္စဝသေန နုပလဗ္ဘနီယတာ သမ္ပဋိစ္ဆိတာ၊ ပစ္ဆာ ပန သမ္မုတိသစ္စဝသေန ဝါ ဝေါမိဿကဝသေန ဝါ ပဋိက္ခိတ္တာ။ ပရဝါဒီ ပန ‘‘နုပလဗ္ဘတီ’’တိ ဝစနသာမညမတ္တံ ဆလဝါဒံ နိဿာယ ‘‘ယံ တယာ ပဌမံ ပဋိညာတံ၊ တံ ပစ္ဆာ ပဋိက္ခိတ္တ’’န္တိ ဘဏ္ဍနဿ ပဋိဘဏ္ဍနံ ဝိယ အတ္တနော ကတဿ နိဂ္ဂဟကမ္မဿ ပဋိကမ္မံ ကရောန္တော ‘‘အာဇာနာဟိ ပဋိကမ္မ’’န္တိ အာဟ။ ဣဒါနိ ယထာဿ အနုလောမပဉ္စကေ သကဝါဒိနာ ဝါဒဋ္ဌပနံ ကတွာ အနုလောမပဋိလောမတော ပါပနာရောပနာဟိ ပရဝါဒိနိဂ္ဂဟော ပါကဋော ကတော၊ ဧဝံ ပဋိကမ္မံ ပါကဋံ ကရောန္တော ‘‘ဟဉ္စိ ပုဂ္ဂလော’’တိအာဒိမာဟ။ တံ ဟေဋ္ဌာ ဝုတ္တနယေနေဝ အတ္ထတော ဝေဒိတဗ္ဗံ။ ယသ္မာ ပနေတ္ထ ဌပနာ နာမ ပရဝါဒိပက္ခဿ ဌပနတော ‘‘အယံ တဝ ဒေါသော’’တိ ဒဿေတုံ ဌပနမတ္တမေဝ ဟောတိ၊ န နိဂ္ဂဟဿ ဝါ ပဋိကမ္မဿ ဝါ ပါကဋီဘာဝကရဏံ၊ ပါပနာရောပနာဟိ ပနဿ ပါကဋီကရဏံ ဟောတိ၊ တသ္မာ ဣဒံ အနုလောမပဋိလောမတော ပါပနာရောပနာနံ ဝသေန စတူဟာကာရေဟိ ပဋိကမ္မဿ ကတတ္တာ ပဋိကမ္မစတုက္ကံ နာမာတိ ဧကံ စတုက္ကံ ဝေဒိတဗ္ဗံ။

ဧဝံ ပဋိကမ္မံ ကတွာ ဣဒါနိ ယွာဿ အနုလောမပဉ္စကေ သကဝါဒိနာ နိဂ္ဂဟော ကတော၊ တဿ တမေဝ ဆလဝါဒံ နိဿာယ ဒုက္ကဋဘာဝံ ဒဿေန္တော ‘‘တွံ စေ ပန မညသီ’’တိအာဒိမာဟ။ တတ္ထ တွံ စေ ပန မညသီတိ ယဒိ တွံ မညသိ။ ‘‘ဝတ္တဗ္ဗေခေါ’’တိ ဣဒံ ပစ္စနီကေ ‘‘အာမန္တာ’’တိ ပဋိဇာနနံ သန္ဓာယ ဝုတ္တံ၊ ‘‘နော စ ဝတ္တဗ္ဗေ’’တိ ဣဒံ ပန ‘‘န ဟေဝါ’’တိ အဝဇာနနံ သန္ဓာယ ဝုတ္တံ။ တေန တဝ တတ္ထာတိ တေန ကာရဏေန တွံယေဝ တသ္မိံ ‘‘ယော နုပလဗ္ဘတီ’’တိ ပက္ခေ ဟေဝံ ပဋိဇာနန္တိ ‘‘အာမန္တာ’’တိ ဧဝံ ပဋိဇာနန္တော။ ဟေဝံ နိဂ္ဂဟေတဗ္ဗေတိ ပုန ‘‘န ဟေဝါ’’တိ အဝဇာနန္တော ဧဝံ နိဂ္ဂဟေတဗ္ဗော။ အထ တံ နိဂ္ဂဏှာမာတိ အထေဝံ နိဂ္ဂဏှနာရဟံ တံ နိဂ္ဂဏှာမ၊ သုနိဂ္ဂဟိတော စ ဟောသီတိ သကေန မတေန နိဂ္ဂဟိတတ္တာ သုနိဂ္ဂဟိတော စ ဘဝသိ။ ဧဝမဿ နိဂ္ဂဟေတဗ္ဗဘာဝံ ဒဿေတွာ ဣဒါနိ တံ နိဂ္ဂဏှန္တော ‘‘ဟဉ္စီ’’တိအာဒိမာဟ။ တတ္ထ ဌပနာပါပနာရောပနာ ဟေဋ္ဌာ ဝုတ္တနယေနေဝ ဝေဒိတဗ္ဗာ။ ပရိယောသာနေ ပန ဣဒံ တေ မိစ္ဆာတိ ဣဒံ တဝ ဝစနံ မိစ္ဆာ ဟောတီတိ အတ္ထော။ ဣဒံ ဆလဝါဒေန စတူဟိ အာကာရေဟိ နိဂ္ဂဟဿ ကတတ္တာ နိဂ္ဂဟစတုက္ကံ နာမ။

ဧဝံ နိဂ္ဂဟံ ကတွာပိ ဣဒါနိ ‘‘ယဒိ အယံ မယာ တဝ မတေန ကတော နိဂ္ဂဟော ဒုန္နိဂ္ဂဟော၊ ယောပိ မမ တယာ ဟေဋ္ဌာ အနုလောမပဉ္စကေ ကတော နိဂ္ဂဟော၊ သောပိ ဒုန္နိဂ္ဂဟော’’တိ ဒဿေန္တော ‘‘ဧသေ စေ ဒုန္နိဂ္ဂဟိတေ’’တိအာဒိမာဟ။ တတ္ထ ဧသေ စေ ဒုန္နိဂ္ဂဟိတေတိ ဧသော စေ တဝ ဝါဒေါ မယာ ဒုန္နိဂ္ဂဟိတော၊ အထ ဝါ ဧသော စေ တဝ မယာ ကတော နိဂ္ဂဟော ဒုန္နိဂ္ဂဟော။ ဟေဝမေဝံ တတ္ထ ဒက္ခာတိ တတ္ထာပိ တယာ မမ ဟေဋ္ဌာ ကတေ နိဂ္ဂဟေ ဧဝမေဝံ ပဿ။ ဣဒါနိ ယွာဿ ဟေဋ္ဌာ သကဝါဒိနာ နိဂ္ဂဟော ကတော၊ တံ ‘‘ဝတ္တဗ္ဗေ ခေါ’’တိအာဒိဝစနေန ဒဿေတွာ ပုန တံ နိဂ္ဂဟံ အနိဂ္ဂဟဘာဝံ ဥပနေန္တော ‘‘နော စ မယံ တယာ’’တိအာဒိမာဟ။ တတ္ထ နော စ မယံ တယာ တတ္ထ ဟေတာယ ပဋိညာယာတိအာဒီသု အယမတ္ထော – ယသ္မာ သော တယာ မမ ကတော နိဂ္ဂဟော ဒုန္နိဂ္ဂဟော၊ တသ္မာ မယံ တယာ တတ္ထ အနုလောမပဉ္စကေ ‘‘အာမန္တာ’’တိ ဧတာယ ပဋိညာယ ဧဝံ ပဋိဇာနန္တာ ပုန ‘‘န ဟေဝါ’’တိ ပဋိက္ခေပေ ကတေပိ ‘‘အာဇာနာဟိ နိဂ္ဂဟ’’န္တိ ဧဝံ နိဂ္ဂဟေတဗ္ဗာယေဝ၊ ဧဝံ အနိဂ္ဂဟေတဗ္ဗမ္ပိ မံ နိဂ္ဂဏှာသိ၊ ဤဒိသေန ပန နိဂ္ဂဟေန ဒုန္နိဂ္ဂဟိတာ မယံ ဟောမ။ ဣဒါနိ ယံ နိဂ္ဂဟံ သန္ဓာယ ဒုန္နိဂ္ဂဟိတာ စ ဟောမာတိ အဝေါစ၊ တံ ဒဿေတုံ ‘‘ဟဉ္စိ ပုဂ္ဂလော…ပေ… ဣဒံ တေ မိစ္ဆာ’’တိ အာဟ။ ဧဝမိဒံ အနုလောမပဋိလောမတော စတူဟိ ပါပနာရောပနာဟိ နိဂ္ဂဟဿ ဥပနီတတ္တာ ဥပနယနစတုက္ကံ နာမ ဟောတိ။

ဣဒါနိ န ဟေဝံ နိဂ္ဂဟေတဗ္ဗေတိအာဒိကံ နိဂ္ဂမနစတုက္ကံ နာမ ဟောတိ။ တတ္ထ န ဟေဝံ နိဂ္ဂဟေတဗ္ဗေတိ ယထာဟံ တယာ နိဂ္ဂဟိတော၊ န ဟိ ဧဝံ နိဂ္ဂဟေတဗ္ဗော၊ ဧတဿ ဟိ နိဂ္ဂဟဿ ဒုန္နိဂ္ဂဟဘာဝေါ မယာ သာဓိတော။ တေန ဟီတိ တေန ကာရဏေန။ ယသ္မာ ဧသ နိဂ္ဂဟော ဒုန္နိဂ္ဂဟော၊ တသ္မာ ယံ မံ နိဂ္ဂဏှာသိ။ ဟဉ္စိ ပုဂ္ဂလော…ပေ… ဣဒံ တေ မိစ္ဆာတိ ဣဒံ နိဂ္ဂဏှနံ တဝ မိစ္ဆာတိ အတ္ထော။ တေန ဟိ ယေ ကတေ နိဂ္ဂဟေတိ ယေန ကာရဏေန ဣဒံ မိစ္ဆာ၊ တေန ကာရဏေန ယော တယာ နိဂ္ဂဟော ကတော၊ သော ဒုက္ကဋော။ ယံ မယာ ပဋိကမ္မံ ကတံ၊ တဒေဝ သုကတံ။ ယာပိ စေသာ ပဋိကမ္မစတုက္ကာဒိဝသေန ကထာမဂ္ဂသမ္ပဋိပါဒနာ ကတာ၊ သာပိ သုကတာတိ။ တဒေဝ ပုဂ္ဂလော ဥပလဗ္ဘတီတိအာဒိကဿ အနုလောမပဉ္စကဿ နုပလဗ္ဘတီတိအာဒိကာနံ ပဋိကမ္မနိဂ္ဂဟောပနယနနိဂ္ဂမနစတုက္ကာနဉ္စ ဝသေန အနုလောမပစ္စနီကံ နာမ နိဒ္ဒိဋ္ဌန္တိ ဝေဒိတဗ္ဗံ။ ဧတ္တာဝတာ သကဝါဒိနော ပုဗ္ဗပက္ခေ သတိ ပရဝါဒိနော ဝစနသာမညမတ္တေန ဆလဝါဒေန ဇယော ဟောတိ။

ဣဒါနိ ယထာ ပရဝါဒိနော ပုဗ္ဗပက္ခေ သတိ သကဝါဒိနော ဓမ္မေနေဝ တထေန ဇယော ဟောတိ၊ တထာ ဝါဒုပ္ပတ္တိံ ဒဿေတုံ ‘‘ပုဂ္ဂလော နုပလဗ္ဘတီ’’တိ ပစ္စနီကာနုလောမပဉ္စကံ အာရဒ္ဓံ။ တတ္ထ ပစ္စနီကေ ပုစ္ဆာ ပရဝါဒိဿ၊ ရူပါဒိဘေဒံ သစ္စိကဋ္ဌပရမတ္ထံ သန္ဓာယ ပဋိညာ သကဝါဒိဿ၊ သုဒ္ဓသမ္မုတိသစ္စံ ဝါ ပရမတ္ထမိဿကံ ဝါ သမ္မုတိသစ္စံ သန္ဓာယ ‘‘ယော သစ္စိကဋ္ဌော’’တိ ပုန အနုယောဂေါ ပရဝါဒိဿ၊ သမ္မုတိဝသေန ‘‘ပုဂ္ဂလော နုပလဗ္ဘတီ’’တိ နဝတ္တဗ္ဗတ္တာ မိဿကဝသေန ဝါ အနုယောဂဿ သံကိဏ္ဏတ္တာ ‘‘န ဟေဝ’’န္တိ ပဋိက္ခေပေါ သကဝါဒိဿ၊ ပဋိညာတံ ပဋိက္ခိပတီတိ ဝစနသာမညမတ္တေန ‘‘အာဇာနာဟိ နိဂ္ဂဟ’’န္တိအာဒိဝစနံ ပရဝါဒိဿ။ ဧဝမယံ ပုဂ္ဂလော နုပလဗ္ဘတီတိ ဒုတိယဝါဒံ နိဿာယ ဒုတိယော နိဂ္ဂဟော ဟောတီတိ ဝေဒိတဗ္ဗော။ ဧဝံ တေန ဆလေန နိဂ္ဂဟော အာရောပိတော။

ဣဒါနိ ဓမ္မေန သမေန ပရဝါဒိပဋိညာယ အတ္တနော ဝါဒေ ဇယံ ဒဿေတုံ အနုလောမနယေ ပုစ္ဆာ သကဝါဒိဿ၊ အတ္တနော လဒ္ဓိံ နိဿာယ ပဋိညာ ပရဝါဒိဿ၊ လဒ္ဓိယာ ဩကာသံ အဒတွာ ပရမတ္ထဝသေန ပုန အနုယောဂေါ သကဝါဒိဿ၊ ပရမတ္ထဝသေန ပုဂ္ဂလဿ အနုပလဗ္ဘနတော ပဋိက္ခေပေါ ပရဝါဒိဿ၊ တတော ပရံ ဓမ္မေန သမေန အတ္တနော ဇယဒဿနတ္ထံ ‘‘အာဇာနာဟိ ပဋိကမ္မ’’န္တိအာဒိ သဗ္ဗံ သကဝါဒိဝစနမေဝ ဟောတိ။ တတ္ထ သဗ္ဗေသံ ပဋိကမ္မနိဂ္ဂဟောပနယနနိဂ္ဂမနစတုက္ကာနံ ဟေဋ္ဌာ ဝုတ္တနယေနေဝ အတ္ထော ဝေဒိတဗ္ဗော။ ဧဝမိဒံ ‘‘ပုဂ္ဂလော နုပလဗ္ဘတီ’’တိအာဒိကဿ ပစ္စနီကပဉ္စကဿ ‘‘ဥပလဗ္ဘတီ’’တိအာဒီနံ ပဋိကမ္မနိဂ္ဂဟောပနယနနိဂ္ဂမနစတုက္ကာနဉ္စ ဝသေန ပစ္စနီကာနုလောမပဉ္စကံ နာမ နိဒ္ဒိဋ္ဌံ ဟောတိ။ ဧဝမေတာနိ ပဌမသစ္စိကဋ္ဌေ ဒွေ ပဉ္စကာနိ နိဒ္ဒိဋ္ဌာနိ၊ တတ္ထေတံ ဝုစ္စတိ –

‘‘နိဂ္ဂဟော ပရဝါဒိဿ၊ သုဒ္ဓါ ပဌမပဉ္စကေ၊

အသုဒ္ဓါ ပန တဿေဝ၊ ပဋိကမ္မဇယော တဟိံ။

‘‘နိဂ္ဂဟော သကဝါဒိဿ၊ အသုဒ္ဓါ ဒုတိယပဉ္စကေ၊

ဝိသုဒ္ဓါ ပန တဿေဝ၊ ပဋိကမ္မဇယော တဟိံ။

‘‘တသ္မာ ဒွီသုပိ ဌာနေသု၊ ဇယောဝ သကဝါဒိနော၊

ဓမ္မေန ဟိ ဇယော နာမ၊ အဓမ္မေန ကုတော ဇယော။

‘‘သစ္စိကဋ္ဌေ ယထာ စေတ္ထ၊ ပဉ္စကဒွယမဏ္ဍိတေ၊

ဓမ္မာဓမ္မဝသေနေဝ၊ ဝုတ္တော ဇယပရာဇယော။

‘‘ဣတော ပရေသု သဗ္ဗေသု၊ သစ္စိကဋ္ဌေသု ပဏ္ဍိတော၊

ဧဝမေဝ ဝိဘာဝေယျ၊ ဥဘော ဇယပရာဇယေ’’တိ။ (ကထာ။ အဋ္ဌ။ ၇-၁၀)၊

ပဌမော သုဒ္ဓိကသစ္စိကဋ္ဌော နိဋ္ဌိတော။

ဧဝံ သုဒ္ဓိကသစ္စိကဋ္ဌံ ဝိတ္ထာရေတွာ ဣဒါနိ တမေဝ အပရေဟိပိ ဩကာသာဒီဟိ နယေဟိ ဝိတ္ထာရေတုံ ပုန ‘‘ပုဂ္ဂလော ဥပလဗ္ဘတီ’’တိအာဒိ အာရဒ္ဓံ။ တတ္ထ ပုစ္ဆာ သကဝါဒိဿ၊ ပဋိညာ ပရဝါဒိဿ။ ပုန သဗ္ဗတ္ထာတိ သရီရံ သန္ဓာယ အနုယောဂေါ သကဝါဒိဿ၊ ရူပသ္မိံ အတ္တာနံ သမနုပဿနာဒေါသဉ္စ ‘‘အညံ ဇီဝံ အညံ သရီရ’’န္တိ အာပဇ္ဇနဒေါသဉ္စ ဒိသွာ ပဋိက္ခေပေါ ပရဝါဒိဿ။ သေသမေတ္ထ အနုလောမပစ္စနီကပဉ္စကေ ဟေဋ္ဌာ ဝုတ္တနယေနေဝ ဝေဒိတဗ္ဗံ။ ပါဌော ပန သံခိတ္တော။ တတ္ထ ယသ္မာ သရီရံ သန္ဓာယ ‘‘သဗ္ဗတ္ထ နုပလဗ္ဘတီ’’တိ ဝုတ္တေ သရီရတော ဗဟိ ဥပလဗ္ဘတီတိ အာပဇ္ဇတိ၊ တသ္မာ ပစ္စနီကေ ပဋိက္ခေပေါ သကဝါဒိဿ၊ ပဌမံ အနုဇာနိတွာ ပစ္ဆာ အဝဇာနာတီတိ ဆလဝါဒဿ ဝသေန ပဋိကမ္မံ ပရဝါဒိဿ၊ သေသံ ပါကဋမေဝ။

ဒုတိယနယေ သဗ္ဗဒါတိ ပုရိမပစ္ဆိမဇာတိကာလဉ္စ ဓရမာနပရိနိဗ္ဗုတကာလဉ္စ သန္ဓာယ အနုယောဂေါ သကဝါဒိဿ၊ သွေဝ ခတ္တိယော သော ဗြာဟ္မဏောတိအာဒီနံ အာပတ္တိဒေါသဉ္စ ဓရမာနပရိနိဗ္ဗုတာနံ ဝိသေသာဘာဝဒေါသဉ္စ ဒိသွာ ပဋိက္ခေပေါ ပရဝါဒိဿ။ သေသံ ပဌမနယေ ဝုတ္တသဒိသမေဝ။

တတိယနယေ သဗ္ဗေသူတိ ခန္ဓာယတနာဒီနိ သန္ဓာယ ပုစ္ဆာ သကဝါဒိဿ၊ ရူပသ္မိံ အတ္တာ၊ စက္ခုသ္မိံ အတ္တာတိအာဒိဒေါသဘယေန ပဋိက္ခေပေါ ပရဝါဒိဿ။ သေသံ တာဒိသမေဝါတိ။

ဧဝမိမာနိ တီဏိ မုခါနိ အနုလောမပစ္စနီကပဉ္စကေ အနုလောမမတ္တဝသေနေဝ တာဝ ပဋိပါဋိယာ ဘာဇေတွာ ပုန ပစ္စနီကာနုလောမပဉ္စကေ ပစ္စနီကမတ္တဝသေနေဝ ဘာဇေတုံ ‘‘ပုဂ္ဂလော နုပလဗ္ဘတီ’’တိအာဒိ အာရဒ္ဓံ။ တတ္ထ ဟေဋ္ဌာ ဝုတ္တနယေန အတ္ထော ဝေဒိတဗ္ဗော။ ဧတ္တာဝတာ သုဒ္ဓိကဿ စေဝ ဣမေသဉ္စ တိဏ္ဏန္တိ စတုန္နံ သစ္စိကဋ္ဌာနံ ဧကေကသ္မိံ သစ္စိကဋ္ဌေ အနုလောမပစ္စနီကဿ၊ ပစ္စနီကာနုလောမဿ စာတိ ဒွိန္နံ ဒွိန္နံ ပစ္စနီကာနံ ဝသေန အယံ အဋ္ဌမုခါ နာမ ဝါဒယုတ္တိ နိဒ္ဒိဋ္ဌာ ဟောတီတိ ဝေဒိတဗ္ဗာ။ ယာ ဧကေကသ္မိံ မုခေ ဧကေကဿ နိဂ္ဂဟဿ ဝသေန ဝုစ္စတိ။ တတ္ထေတံ ဝုစ္စတိ –

‘‘ဧဝံ စတုဗ္ဗိဓေ ပဉှေ၊ ပဉ္စကဒွယဘေဒတော၊

ဧသာ အဋ္ဌမုခါ နာမ၊ ဝါဒယုတ္တိ ပကာသိတာ။

‘‘အဋ္ဌေဝ နိဂ္ဂဟာ တတ္ထ၊ စတ္တာရော တေသု ဓမ္မိကာ၊

အဓမ္မိကာ စ စတ္တာရော၊ သဗ္ဗတ္ထ သကဝါဒိနော၊

ဇယော ပရာဇယော စေဝ၊ သဗ္ဗတ္ထ ပရဝါဒိနော’’တိ။ (ကထာ။ အဋ္ဌ။ ၁၄)၊

အယံ တာဝေတ္ထ အနုတ္တာနတ္ထတော သံဝဏ္ဏနာ။

အတ္ထဝိနိစ္ဆယော ပနေတ္ထာပိ မောဂ္ဂလိပုတ္တတိဿတ္ထေရေန ကတနိဒ္ဒေသဿ နယမုခမတ္တဒဿနဝသေနေဝ ဟောတိ။ ထေရေန ဟိ ဘဂဝတာ ဌပိတာယ ဧတိဿာ မာတိကာယ ပဒုဒ္ဓါရဝသေန နိဒ္ဒေသံ အကတွာ ဘဂဝတာ ဒိန္နအဋ္ဌမုခဝါဒယုတ္တိနယေ ဌတွာ အပရေဟိ ပရိယာယေဟိ ပုဂ္ဂလဝါဒံ၊ တဒညံ နာနပ္ပကာရံ မိစ္ဆာဂါဟဉ္စ နိရာကရောန္တေနေဝ ပုဂ္ဂလကထံ အာဒိံ ကတွာ သာဓိကဒွိသတကထာဟိ နိဒ္ဒေသော ကတော။

တတ္ထ ပုဂ္ဂလဝါဒနိရာကရဏတ္ထံ တာဝ ခန္ဓာယတနဓာတုဣန္ဒြိယဝသေန သတ္တပညာသာယ ဓမ္မေသု ဧကေကေန သဒ္ဓိံ ‘‘ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ ရူပဉ္စ ဥပလဗ္ဘတိ သစ္စိကဋ္ဌပရမတ္ထေန…ပေ… ပုဂ္ဂလော ဥပလဗ္ဘတိ သစ္စိကဋ္ဌပရမတ္ထေန၊ ဝေဒနာပိ ဥပလဗ္ဘတိ သစ္စိကဋ္ဌပရမတ္ထေနာ’’တိအာဒိနာ နယေန ပုဂ္ဂလသံသန္ဒနဝသပ္ပဝတ္တံ သုဒ္ဓိကသံသန္ဒနံ၊ ယထာ ရူပဝေဒနာဒယော သတ္တပညာသ ဓမ္မာ အညမညာ ဝိသဒိသာ ဥပလဗ္ဘန္တိ၊ ဧဝံ ရူပါဒီဟိ ဝိသဒိသော ပုဂ္ဂလော ဥပလဗ္ဘတီတိ ပုစ္ဆနဝသပ္ပဝတ္တံ ဩပမ္မသံသန္ဒနံ၊ ‘‘ရူပံ ပုဂ္ဂလော၊ ရူပသ္မိံ ပုဂ္ဂလော၊ အညတြ ရူပါ ပုဂ္ဂလော၊ ပုဂ္ဂလသ္မိံ ရူပ’’န္တိ ဧဝံ စတုက္ကနယေန သတ္တပညာသာယ ဓမ္မေဟိ ပုစ္ဆနဝသပ္ပဝတ္တံ စတုက္ကနယသံသန္ဒနန္တိ တိဝိဓာ သံသန္ဒနနယာ ဝုတ္တာ။ တတ္ထ ပုဂ္ဂလဿ ရူပါဒိသဘာဝတ္တေ နိစ္စသဿတုစ္ဆေဒါဒိပ္ပသင်္ဂတော ယထာနုရူပံ နိရာကရဏံ ဝေဒိတဗ္ဗံ၊ အတိဝိတ္ထာရဘယေနေတ္ထ ဥပရိ စေတံ န ဝိတ္ထာရီယတိ။

တတော ‘‘ယထာ ရူပါဒယော သပ္ပစ္စယာ၊ အပ္ပစ္စယာဒယော ဝါ ဟောန္တိ၊ ဧဝံ တဝ ပုဂ္ဂလောပိ သပ္ပစ္စယတာဒိလက္ခဏယုတ္တော’’တိ ပုစ္ဆနဝသပ္ပဝတ္တာ လက္ခဏယုတ္တိကထာ၊ ‘‘ပုဂ္ဂလော’’တိ၊ ‘‘ဥပလဗ္ဘတီ’’တိ စ ပဒဒွယာဒိသောဓနတ္ထံ ‘‘ယော ပုဂ္ဂလော၊ သော ဥပလဗ္ဘတိ။ ယော ဝါ ဥပလဗ္ဘတိ၊ သော ပုဂ္ဂလော’’တိအာဒိပုစ္ဆနဝသပ္ပဝတ္တံ ဝစနသောဓနံ၊ ‘‘ရူပဓာတုယာ ရူပီ’’တိအာဒိ နာမပညတ္တိသောဓနဝသပ္ပဝတ္တော ပညတ္တာနုယောဂေါ စ၊ ‘‘သောဝ ပုဂ္ဂလော သန္ဓာဝတိ အသ္မာ လောကာ ပရံ လောကံ၊ အညော ဝါ၊ န အညော ဝါ၊ နေဝ အညော နာနညော ဝါ’’တိအာဒိနာ ဂတိပရိဝတ္တနမုခေန စုတိပဋိသန္ဓာနုယောဂေါ၊ ‘‘ရုက္ခံ ဥပါဒါယ ဆာယာဒီနံ ဝိယ ခန္ဓာဒိံ ဥပါဒါယ ပရမတ္ထတော ပုဂ္ဂလပညတ္တီ’’တိ ဝါဒေ တဿ အနိစ္စသင်္ခတတာဒိပ္ပသင်္ဂဒီပကော ဥပါဒါပညတ္တာနုယောဂေါ၊ ‘‘ကလျာဏပါပကာနံ ကမ္မာနံ ကာရကော ပုဂ္ဂလော’’တိ ဝါဒေ တဿ ဝဋ္ဋဒုက္ခာနုပစ္ဆေဒါဒိပ္ပသင်္ဂဒီပကော ပုရိသကာရာနုယောဂေါ စ၊ ‘‘ယော ဣဒ္ဓိဝိကုဗ္ဗကော၊ သော ပုဂ္ဂလော’’တိအာဒိဝါဒဘေဒကော အဘိညာနုယောဂေါ၊ ‘‘မာတာပိတာဒယော နာမ အတ္ထိ၊ တေန ပုဂ္ဂလော အတ္ထီ’’တိ ဝါဒဘေဒကော ဉာတကာနုယောဂေါ၊ ‘‘ဧဝံ ခတ္တိယော’’တိအာဒိ ဇာတျာနုယောဂေါ၊ ‘‘ဂဟဋ္ဌော ပဗ္ဗဇိတော’’တိအာဒိ ပဋိပတ္တာနုယောဂေါ၊ ‘‘ဒေဝေါ မနုဿော’’တိအာဒိ ဥပပတ္တာနုယောဂေါ၊ ‘‘သောတာပန္နော’’တိအာဒိ ပဋိဝေဓာနုယောဂေါ၊ ‘‘အဋ္ဌ ပုရိသပုဂ္ဂလာ’’တိအာဒိ သင်္ဃာနုယောဂေါ၊ ‘‘ပုဂ္ဂလော သင်္ခတော’’တိအာဒိဝသပ္ပဝတ္တော သစ္စိကဋ္ဌသဘာဂါနုယောဂေါ၊ ‘‘သုခံ ဝေဒနံ ဝေဒိယမာနော’’တိအာဒိ ဝေဒကာနုယောဂေါ၊ ‘‘ကာယေ ကာယာနုပဿီ’’တိအာဒိ ကိစ္စာနုယောဂေါ၊ ‘‘အတ္ထိ ပုဂ္ဂလော အတ္တဟိတာယ ပဋိပန္နော’’တိအာဒိနာ ပုဂ္ဂလသဘာဝသာဓကသုတ္တေသု သန္နိဿိတေသု –

သဗ္ဗေ ဓမ္မာ အနတ္တာ (မ။ နိ။ ၁။၃၅၃၊ ၃၅၆၊ ဓ။ ပ။ ၂၇၉)၊ ဒုက္ခမေဝ ဥပ္ပဇ္ဇမာနံ ဥပ္ပဇ္ဇတိ (သံ။ နိ။ ၂။၁၅)။

ကိန္နု သတ္တောတိ ပစ္စေသိ၊ မာရ ဒိဋ္ဌိဂတံ နု တေ၊

သုဒ္ဓသင်္ခါရပုဉ္ဇောယံ၊ နယိဓ သတ္တူပလဗ္ဘတိ။

ဒုက္ခမေဝ ဟိ သမ္ဘောတိ၊ ဒုက္ခံ တိဋ္ဌတိ ဝေတိ စ၊

နာညတြ ဒုက္ခာ သမ္ဘောတိ၊ နာညံ ဒုက္ခာ နိရုဇ္ဈတိ။ (သံ။ နိ။ ၁။၁၇၁)၊

ယသ္မာ စ ခေါ၊ အာနန္ဒ၊ သုညံ အတ္တေန ဝါ အတ္တနိယေန ဝါ…ပေ… တသ္မာ သုညော လောကောတိ ဝုစ္စတိ (သံ။ နိ။ ၄။၈၅)။

‘‘အတ္တနိ ဝါ၊ ဘိက္ခဝေ၊ သတိ အတ္တနိယံ မေတိ အဿာတိ…ပေ… အတ္တနိ စ ဘိက္ခဝေ အတ္တနိယေ စ သစ္စတော ထေတတော အနုပလဗ္ဘနိယမာနေ ယမ္ပိ တံ ဒိဋ္ဌိဋ္ဌာနံ၊ သော လောကော၊ သော အတ္တာ၊ သော ပေစ္စ ဘဝိဿာမိ၊ နိစ္စော ဓုဝေါ သဿတော အဝိပရိဏာမဓမ္မော၊ သဿတိသမံ တထေဝ ဌဿာမီတိ ၊ နနာယံ၊ ဘိက္ခဝေ၊ ကေဝလော ပရိပူရော ဗာလဓမ္မော’’တိ (မ။ နိ။ ၁။၂၄၄)၊ ‘‘တတြ၊ သေနိယ၊ ယွာယံ သတ္ထာ ဒိဋ္ဌေ စေဝ ဓမ္မေ အတ္တာနံ သစ္စတော ထေတတော န ပညာပေတိ၊ အဘိသမ္ပရာယေ စ…ပေ… အယံ ဝုစ္စတိ၊ သေနိယ၊ သတ္ထာ သမ္မာသမ္ဗုဒ္ဓါ’’တိအာဒိနာ ပုဂ္ဂလာဘာဝဒီပကသုတ္တသန္ဒဿနဝသပ္ပဝတ္တော သုတ္တသန္ဒဿနာနုယောဂေါ စာတိ ဧတ္တကေန ကထာမဂ္ဂေန ဝိတ္ထာရတော ပဌမာ ပုဂ္ဂလကထာ ဝိဘတ္တာ။ တတ္ထ ‘‘အတ္ထိ ပုဂ္ဂလော အတ္တဟိတာယ ပဋိပန္နော’’တိအာဒီသု ယထာ ရူပါဒယော ဓမ္မာ ပစ္စတ္တလက္ခဏသာမညလက္ခဏဝသေန လဗ္ဘန္တိ၊ န ဧဝံ ပုဂ္ဂလော၊ ရူပါဒီသု ပန သတိ လောကဝေါဟာရမတ္တေန ‘‘အတ္ထိ ပုဂ္ဂလော’’တိ ဝုစ္စတီတိ။ ဝုတ္တမ္ပိ စေတံ ဘဂဝတာ – ‘‘ဣမာ ခေါ၊ စိတ္တ…ပေ… လောကဝေါဟာရာ လောကပညတ္တိယော’’တိ (ဒီ။ နိ။ ၁။၄၄၀)။ ဒွိဓာပိ ဗုဒ္ဓါနံ ကထာ သမ္မုတိကထာ၊ ပရမတ္ထကထာ စ။ တတ္ထ ‘‘သတ္တော ပုဂ္ဂလော ဂါမော ပဗ္ဗတော’’တိအာဒိကာ သမ္မုတိကထာ နာမ၊ ‘‘အနိစ္စံ ဒုက္ခံ အနတ္တာ ခန္ဓာ အာယတနာနီ’’တိအာဒိကာ ပရမတ္ထကထာ နာမ။ ဗုဒ္ဓါ ဟိ ယေ ယေ သတ္တာ ယထာ ယထာ ဗုဇ္ဈိတွာ စတုသစ္စပဋိဝေဓံ ကာတုံ သက္ကောန္တိ၊ တေသံ တေသံ တထာ တထာ သမ္မုတိဝသေန ဝါ ပရမတ္ထဝသေန ဝါ ဝေါမိဿကဝသေန ဝါ ဒေသေတွာ နာမရူပပရိစ္ဆေဒဒဿနဝသေနေဝ အမတံ မဂ္ဂံ ပကာသေန္တိ။ အယဉှိ –

ဒုဝေ သစ္စာနိ အက္ခာသိ၊ သမ္ဗုဒ္ဓါ ဝဒတံ ဝရော၊

သမ္မုတိံ ပရမတ္ထဉ္စ၊ တတိယံ နုပလဗ္ဘတိ။

တတ္ထ –

သင်္ကေတဝစနံ သစ္စံ၊ လောကသမ္မုတိကာရဏံ၊

ပရမတ္ထဝစနံ သစ္စံ၊ ဓမ္မာနံ တထလက္ခဏံ။

တသ္မာ ဝိညူ အကတွာန၊ ဗျဉ္ဇနေဘိနိဝေသနံ၊

ပရမတ္ထေ ပတိဋ္ဌာယ၊ ပုဂ္ဂလာဒိံ ဝိဝဇ္ဇယေ။

ပညတ္တိံ အနတိက္ကမ္မ၊ ပရမတ္ထော ပကာသိတော၊

ဝိနာယကေန သော ယသ္မာ၊ တသ္မာ အညောပိ ပဏ္ဍိတော၊

ပရမတ္ထံ ပကာသေန္တော၊ သမညံ နာတိဓာဝယေတိ။ (ကထာ။ အဋ္ဌ။ ၂၃၇)၊

အယံ ပုဂ္ဂလကထာနယော။

ပရိဟာနိကထာဒိဝဏ္ဏနာ

ပုဂ္ဂလကထာတော ပရံ ‘‘ပရိဟာယတိ အရဟာ အရဟတ္တာ’’တိအာဒိနာ အသေခါ၊ သောတာပန္နဝဇ္ဇိတသေခါ စ အဂ္ဂမဂ္ဂဖလတော ပရိဟာယန္တီတိ ပဝတ္တာ ပရိဟာနိကထာ။ ပဗ္ဗဇ္ဇာ ဝိယ ပဋိဝေဓသင်္ခါတော ဗြဟ္မစရိယဝါသောပိ မနုဿေသု ဧဝ ဘဝတိ၊ နတ္ထိ ဒေဝေသု ဗြဟ္မစရိယဝါသောတိ ပဝတ္တာ ဗြဟ္မစရိယကထာ။ ဒုက္ခဒဿနေန ဧကဒေသတော ကိလေသာ ပဟီယန္တိ၊ တထာ သမုဒယဒဿနာဒီဟီတိ ဧဝံ နာနာဘိသမယဝသေန ဩဓိသော ကိလေသာ ပဟီယန္တီတိ ပဝတ္တာ ဩဓိသောကထာ။ ဈာနလာဘီ ပုထုဇ္ဇနော ကာမရာဂဗျာပါဒေ သမုစ္ဆေဒဝသေန ဇဟတိ၊ သော စတုသစ္စာဘိသမယာ ပဌမမေဝ အနာဂါမီ ဟောတီတိ ပဝတ္တာ ဇဟတိကထာ။ အတီတာဒိဘေဒံ သဗ္ဗံ ခန္ဓာဒိကံ ကာလတ္တယေပိ ခန္ဓာဒိသဘာဝေန အတ္ထီတိ ပဝတ္တာ သဗ္ဗမတ္ထီတိကထာ။ အတီတံ၊ အနာဂတဉ္စ ခန္ဓာဒိကံ အတ္ထီတိ ပဝတ္တာ အတီတက္ခန္ဓာဒိကထာ။ အတီတေသု ဝိပါကဓမ္မဓမ္မေသု ဧကစ္စံ အဝိပက္ကဝိပါကမေဝ အတ္ထိ၊ န ဣတရန္တိ ပဝတ္တာ ဧကစ္စမတ္ထီတိကထာ။ သဗ္ဗေ ဓမ္မာ သတိပဋ္ဌာနာတိ ပဝတ္တာ သတိပဋ္ဌာနကထာ။ အတီတာနာဂတာဒိဝသေန နတ္ထိ၊ သကဘာဝေန ဝါ အတ္ထိ၊ ပရဘာဝေန နတ္ထီတိ ပဝတ္တာ ဟေဝတ္ထိကထာ။ တတ္ထ ဟေဝတ္ထီတိ ဧဝံ ဣမိနာ ပကာရေန အတ္ထီတိ အတ္ထော။

အဓိမာနိကာနံ၊ ကုဟကာနံ ဝါ အရဟတ္တပဋိညာနံ သုက္ကဝိဿဋ္ဌိံ ဒိသွာ မာရကာယိကာ ဒေဝတာ ဥပသံဟရန္တီတိ ပဝတ္တာ ပရူပဟာရကထာ။ အရဟတော ပရေသံ နာမဂေါတ္တာဒီသု အတ္ထိ အညာဏံ၊ အတ္ထိ ကင်္ခါ၊ ပရေဟိ ဉာပနီယတော အတ္ထိ ပရဝိတရဏာတိ တိဿော ကထာ။ သောတာပတ္တိမဂ္ဂက္ခဏေ ဒုက္ခန္တိ ဝါစာ ဘိဇ္ဇတီတိ ပဝတ္တာ ဝစီဘေဒကထာ။ ဒုက္ခန္တိ ဝါစံ ဘာသန္တော ဒုက္ခေ ဉာဏံ အာဟရတိ၊ တဉ္စ လောကုတ္တရန္တိ ပဝတ္တာ ဒုက္ခာဟာရကထာ။ သမာပတ္တိယံ၊ ဘဝင်္ဂေ စ စိတ္တံ စိရံ တိဋ္ဌတီတိ ပဝတ္တာ စိတ္တဋ္ဌိတိကထာ။ သဗ္ဗေ သင်္ခါရာ နိပ္ပရိယာယေန အာဒိတ္တာ ကုက္ကုဠနိရယသဒိသာတိ ပဝတ္တာ ကုက္ကုဠကထာ။ ပစ္စေကံ စတုသစ္စဒဿနဝသေန ဧကေကဿ မဂ္ဂဿ စတုက္ခတ္တုံ ဥပ္ပတ္တိဝသေန သောဠသဟိ ကောဋ္ဌာသေဟိ အရဟတ္တပ္ပတ္တီတိ ပဝတ္တာ အနုပုဗ္ဗာဘိသမယကထာ။ ဗုဒ္ဓါနံ ဝေါဟာရဝစနံ လောကုတ္တရန္တိ ပဝတ္တာ ဝေါဟာရကထာ။ သုဒ္ဓသတ္တာနံ အပ္ပဋိသင်္ခါယ မဂ္ဂေန ဝိနာ ကိလေသနိရောဓသင်္ခါတော အပ္ပဋိသင်္ခါနိရောဓော၊ ပဋိသင်္ခါယ တေန မဂ္ဂေန ကိလေသနိရောဓောတိ ဒွေ နိရောဓာတိ ပဝတ္တာ နိရောဓကထာ။

တထာဂတဗလံ သာဝကသာဓာရဏန္တိ ပဝတ္တာ ဗလကထာ။ အာသဝက္ခယဉာဏဝိရဟိတံ နဝဗလံ လောကုတ္တရန္တိ ပဝတ္တာ အရိယန္တိကထာ။ သရာဂံ စိတ္တံ နိဗ္ဗာနံ အာရဗ္ဘ ရာဂတော ဝိမုစ္စတီတိ ပဝတ္တာ ဝိမုတ္တိကထာ။ ဈာနေန ဝိက္ခမ္ဘနဝိမုတ္တိယာ ပဌမံ ဝိမုတ္တံ စိတ္တံ မဂ္ဂက္ခဏေ သမုစ္ဆေဒဝိမုတ္တိယာ ဝိမုစ္စမာနံ နာမ ဟောတီတိ ပဝတ္တာ ဝိမုစ္စမာနကထာ။ အဋ္ဌမကသင်္ခါတဿ သောတာပတ္တိမဂ္ဂဋ္ဌဿ အနုလောမဂေါတြဘုက္ခဏေ ဒိဋ္ဌိဝိစိကိစ္ဆာ ပဟီယန္တိ နာမ၊ မဂ္ဂက္ခဏေ ပဟီနာ နာမာတိ ပဝတ္တာ အဋ္ဌမကကထာ။ အဋ္ဌမကဿ မဂ္ဂက္ခဏေ သဒ္ဓိန္ဒြိယာဒီနိ ပဋိလဘန္တိ၊ န ပဋိလဒ္ဓါနီတိ ပဝတ္တာ အဋ္ဌမကဿ ဣန္ဒြိယကထာ။ စတုတ္ထဇ္ဈာနဓမ္မုပတ္ထဒ္ဓံ မံသစက္ခုမေဝ ဒိဗ္ဗစက္ခု နာမာတိ ပဝတ္တာ ဒိဗ္ဗစက္ခုကထာ။ တထာ မံသသောတေ ဒိဗ္ဗသောတကထာ။ ယထာကမ္မူပဂတဉာဏမေဝ ဒိဗ္ဗစက္ခူတိ ပဝတ္တာ ယထာကမ္မူပဂတဉာဏကထာ။ ဒေဝဗြဟ္မာနံ ပါဏာတိပါတာဒိအသံဝရာဘာဝမတ္တေန သမ္ပတ္တဝိရတိယာ အဘာဝေပိ သံဝရော အတ္ထီတိ ပဝတ္တာ သံဝရကထာ။ အသညီနမ္ပိ စုတိပဋိသန္ဓိက္ခဏေ သညာ အတ္ထီတိ ပဝတ္တာ အသညကထာ။ နေဝသညာနာသညာယတနဘူမိယံ သညာ နပ္ပဝတ္တတီတိ ပဝတ္တာ နေဝသညာနာသညာယတနကထာ။

အရဟာ ဂိဟီ အဿာတိ ပဝတ္တာ ဂိဟိဿ အရဟာတိကထာ။ အနာဂါမိနော သုဒ္ဓါဝါသေသု ပဋိသန္ဓိစိတ္တေန ဥပပတ္တိက္ခဏေ အရဟန္တော ဟောန္တီတိ ပဝတ္တာ ဥပပတ္တိကထာ။ အရဟတော လောကိယဓမ္မာပိ အနာသဝါတိ ပဝတ္တာ အနာသဝကထာ။ ပစ္စုပ္ပန္နက္ခဏေ သမင်္ဂိဘာဝသမန္နာဂမော စ ရူပါဝစရာဒိဘူမန္တရပဋိလာဘသမန္နာဂမော စာတိ ဒွေ သမန္နာဂမာ၊ ယေသံ ပန ဣမေ ဒွေ သမန္နာဂမေ ဌပေတွာ အညောပိ ဟေတ္ထ ဥပပတ္တိဓမ္မဝသေန ဧကော သမန္နာဂမော နာမ အတ္ထိ၊ တေန အရဟာ စတူဟိ ဖလေဟိ သမန္နာဂတောတိ ပဝတ္တာ သမန္နာဂတကထာ။ ဣမိနာဝ နယေန အရဟာ ဆဟိ ဥပေက္ခာဟိ သမန္နာဂတောတိ ပဝတ္တာ ဥပေက္ခာသမန္နာဂတကထာ။ မဂ္ဂဉာဏသဗ္ဗညုတညာဏသင်္ခါတဗောဓိယာ သဒါ သန္နိဟိတဘာဝေန ဗုဒ္ဓါတိ ပဝတ္တာ ဗောဓိယာ ဗုဒ္ဓါတိကထာ။ မဟာပုရိသလက္ခဏယုတ္တာဝ ဗောဓိသတ္တာတိ ပဝတ္တာ လက္ခဏကထာ။ ဗောဓိသတ္တာနမ္ပိ မဂ္ဂနိယာမော အတ္ထီတိ ပဝတ္တာ နိယာမောက္ကန္တိကထာ။ စတုတ္ထမဂ္ဂဋ္ဌော တီဟိ ဖလေဟိ သမန္နာဂတောတိအာဒိနာ ပဝတ္တာ အပရာပိ သမန္နာဂတကထာ။ ပဌမမဂ္ဂါဒီဟိ ပဟီနေဟိ သဒ္ဓိံ နိပ္ပရိယာယတော အရဟတ္တံ သဗ္ဗသံယောဇနပ္ပဟာနန္တိ ပဝတ္တာ သဗ္ဗသံယောဇနပဟာနကထာ။

နိပ္ပရိယာယတော ဖလံ ဝိမုတ္တိ နာမ၊ ဝိပဿနာမဂ္ဂပစ္စဝေက္ခဏဉာဏာနိ ပန ပရိယာယတော။ ဧဝံ ပန အဂ္ဂဟေတွာ ယံ ကိဉ္စိ ကိလေသဝိပ္ပယုတ္တံ ဉာဏံ ဝိမုတ္တီတိ ပဝတ္တာ ဝိမုတ္တိကထာ။ ဗုဒ္ဓါဒိအသေခါရမ္မဏံ အသေခဉာဏန္တိ ပဝတ္တာ အသေခဉာဏကထာ။ ပထဝီကသိဏာဒိသမာပတ္တိယော ပရမတ္ထတော အဝိဇ္ဇမာနေ ပညတ္တာရမ္မဏေ ပဝတ္တတ္တာ ဝိပရီတဉာဏန္တိ ပဝတ္တာ ဝိပရီတကထာ။ တတ္ထ အနိစ္စေ နိစ္စန္တိအာဒိနာ စတုဗ္ဗိဓော ဝိပလ္လာသော ဝေဒိတဗ္ဗော။ သဗ္ဗေသံ ပုထုဇ္ဇနာနံ နိယာမဂမနာယ ဉာဏံ အတ္ထီတိ ပဝတ္တာ နိယာမကထာ။ သဗ္ဗံ ဉာဏံ ပဋိသမ္ဘိဒါတိ ပဝတ္တာ ပဋိသမ္ဘိဒါကထာ။ သမ္မုတိဝိသယမ္ပိ ဉာဏံ ဘူတာရမ္မဏမေဝါတိ ပဝတ္တာ သမ္မုတိဉာဏကထာ။ စေတောပရိယဉာဏံ စိတ္တာရမ္မဏမေဝ၊ န တံသမ္ပယုတ္တရာဂါဒိစေတသိကာရမ္မဏန္တိ ပဝတ္တာ စိတ္တာရမ္မဏကထာ။ သဗ္ဗသ္မိံ အနာဂတဓမ္မေ သဗ္ဗေသံ ဉာဏံ အတ္ထီတိ ပဝတ္တာ အနာဂတဉာဏကထာ။ ပစ္စုပ္ပန္နေ အတ္တနော ဉာဏေပိ ဉာဏံ ပဝတ္တတီတိ ပဝတ္တာ ပဋုပ္ပန္နဉာဏကထာ။ ဗုဒ္ဓါ ဝိယ သာဝကာပိ တေန တေန ဝေနေယျဇနေန ပတ္တဗ္ဗဖလံ ဉတွာဝ တဒတ္ထာယ ဓမ္မံ ဒေသေန္တီတိ ပဝတ္တာ ဖလဉာဏကထာ။

သမ္မတ္တနိယာမော နိယမတော နိစ္စဋ္ဌေန အသင်္ခတောတိ ပဝတ္တာ နိယာမကထာ။ ‘‘ဓမ္မဋ္ဌိတတာ ဓမ္မနိယာမတာ’’တိအာဒိဝစနတော ပဋိစ္စသမုပ္ပာဒေါ အသင်္ခတောတိ ပဝတ္တာ ပဋိစ္စသမုပ္ပာဒကထာ။ ‘‘သစ္စာနိ တထာနိ အဝိတထာနီ’’တိအာဒိဝစနတော စတုသစ္စာနိ အသင်္ခတာနီတိ ပဝတ္တာ သစ္စကထာ။ ‘‘စတ္တာရော အာရုပ္ပာ အာနေဉ္ဇာ’’တိ ဝစနတော အသင်္ခတာတိ ပဝတ္တာ အာရုပ္ပကထာ။ နိရောဓသမာပတ္တိ အသင်္ခတာတိ ပဝတ္တာ နိရောဓသမာပတ္တိကထာ။ အသင်္ခတော အာကာသောတိ အာကာသကထာ။ အာကာသော သနိဒဿနောတိကထာ။ ပထဝီဓာတု သနိဒဿနာတိအာဒိံ ကတွာ ကာယကမ္မံ သနိဒဿနန္တိ ပရိယောသာနကထာ။

နတ္ထိ ကေစိ ဓမ္မာ ကေဟိစိ ဓမ္မေဟိ သင်္ဂဟိတာ၊ တေန ဧကဝိဓေန ရူပသင်္ဂဟောတိအာဒိ နိရတ္ထကန္တိ ပဝတ္တာ သင်္ဂဟိတကထာ။ ဝေဒနာဒယော အရူပဓမ္မာ အညမညံ န သမ္ပယုတ္တာတိ ပဝတ္တာ သမ္ပယုတ္တကထာ။ စေတသိကံ နတ္ထီတိ ပဝတ္တာ စေတသိကကထာ။ စေတနာဓမ္မောဝ ဒါနံ၊ န ဒေယျဓမ္မောတိ ပဝတ္တာ ဒါနကထာ။ ပဋိဂ္ဂါဟကာနံ ပရိဘောဂမယံ ပုညံ အတ္ထီတိ ပဝတ္တာ ပရိဘောဂကထာ။ ပေတာ ဣတော ဒိန္နစီဝရာဒီဟေဝ ယာပေန္တီတိ ပဝတ္တာ ဣတောဒိန္နကထာ။ ပထဝီကမ္မဝိပါကောတိကထာ။ ဇရာမရဏံ ဝိပါကောတိကထာ။ ကိလေသပ္ပဟာနမတ္တမေဝ သာမညဖလံ၊ န စိတ္တစေတသိကာ ဓမ္မာတိ ပဝတ္တာ အရိယဓမ္မဝိပါကကထာ။ အညမညာဒိပစ္စယတာယ ဝိပါကော ဝိပါကဓမ္မဓမ္မောတိကထာ။

အသုရကာယေန သဒ္ဓိံ ဆ ဂတိယောတိ ပဝတ္တာ ဂတိကထာ။ မတသတ္တော မာတုဥတုသမယဉ္စ မာတာပိတုသံယောဂဉ္စ ဩလောကယမာနော သတ္တာဟံ၊ အတိရေကသတ္တာဟံ ဝါ ယသ္မိံ ဘဝေ တိဋ္ဌတိ၊ သော အန္တရာဘဝေါ နာမ အတ္ထီတိ ပဝတ္တာ အန္တရာဘဝကထာ။ ရူပါဒိပဉ္စကာမဂုဏာဝ ကာမဓာတု နာမ၊ န တု ဝတ္ထုကာမကိလေသကာမာတိ ပဝတ္တာ ကာမဂုဏကထာ။ ပဉ္စေဝါယတနာနိ ကာမာတိကထာ။ ရူပဓမ္မာဝ ရူပဓာတူတိကထာ။ အရူပဓမ္မာဝ အရူပဓာတူတိကထာ။ ရူပဓာတုယာ သတ္တာ ဃာနာဒီဟိ သဒ္ဓိံ သဠာယတနိကာတိ ပဝတ္တာ ရူပဓာတုယာအာယတနကထာ။ အာရုပ္ပေပိ အတ္ထိ သုခုမရူပန္တိကထာ။ ကာယဝစီဝိညတ္တိဝသေန ရူပံ ကမ္မန္တိကထာ။ စိတ္တဝိပ္ပယုတ္တော အရူပဓမ္မောဝ ဇီဝိတိန္ဒြိယံ၊ ရူပဇီဝိတိန္ဒြိယံ နတ္ထီတိ ပဝတ္တာ ဇီဝိတိန္ဒြိယကထာ။ အရိယုပဝါဒကမ္မေန အရဟတ္တာ ပရိဟာယတီတိ ပဝတ္တာ ကမ္မဟေတုကထာ။

အနိစ္စာဒိဝသေန သင်္ခါရေ အာဒီနဝတော အပဿိတွာ နိဗ္ဗာနံ အာနိသံသတော ပဿန္တဿ သံယောဇနပ္ပဟာနံ ဟောတီတိ ပဝတ္တာ အာနိသံသဒဿာဝိကထာ။ နိဗ္ဗာနာရမ္မဏမ္ပိ သံယောဇနံ အတ္ထီတိ ပဝတ္တာ အမတာရမ္မဏကထာ။ ရူပံ သာရမ္မဏန္တိကထာ။ အနုသယာ အနာရမ္မဏာတိကထာ။ ဉာဏံ အနာရမ္မဏန္တိကထာ။ အတီတာရမ္မဏဉ္စ အနာဂတာရမ္မဏဉ္စ စိတ္တံ အနာရမ္မဏန္တိကထာဒွယံ။ သဗ္ဗံ စိတ္တံ ဝိတက္ကာနုပတိတန္တိကထာ။ ဝိတက္ကဝိပ္ဖာရောဝ သဒ္ဒေါ၊ သော စ န သောတဝိညေယျောတိ ပဝတ္တာ ဝိတက္ကဝိပ္ဖာရသဒ္ဒကထာ။ ဝိနာပိ စိတ္တေန ဝါစာ ပဝတ္တတီတိ ပဝတ္တာ နယထာစိတ္တဿဝါစာတိကထာ။ ဝိနာပိ စိတ္တေန ကာယကမ္မံ ပဝတ္တတီတိ ပဝတ္တာ နယထာစိတ္တဿကာယကမ္မန္တိကထာ။ အတီတေဟိပိ ဈာနေဟိ၊ အနာဂတေဟိပိ ယောဂိနော သမန္နာဂတာတိ ပဝတ္တာ အတီတာနာဂတသမန္နာဂတကထာ။

ဘဝင်္ဂစိတ္တေ အနိရုဒ္ဓေ ဧဝ ကုသလာကုသလစိတ္တာနိ ဥပ္ပဇ္ဇန္တိ၊ တဒဘာဝေ စ သန္တတိနိရောဓော သိယာတိ ပဝတ္တာ နိရောဓကထာ။ သဟ ဝါစာဟိ ဝိညတ္တိရူပံ မဂ္ဂေါတိကထာ။ ပဉ္စဝိညာဏသမင်္ဂိဿာပိ မဂ္ဂဘာဝနာ အတ္ထီတိ ပဝတ္တာ ပဉ္စဝိညာဏသမင်္ဂိဿမဂ္ဂကထာ။ ပဉ္စဝိညာဏာ ကုသလာပိ အကုသလာပီတိကထာ။ ပဉ္စဝိညာဏာ သာဘောဂါတိကထာ။ မဂ္ဂက္ခဏေ လောကိယေန၊ လောကုတ္တရေန စာတိ ဒွီဟိ သီလေဟိ ယုတ္တာတိကထာ။ သီလံ အစေတသိကန္တိကထာ။ သီလံ န စိတ္တာနုပရိဝတ္တီတိကထာ။ သမာဒါနဟေတုစိတ္တဝိပ္ပယုတ္တော ပုညောပစယော ဟောတီတိ ပဝတ္တာ သမာဒါနဟေတုကကထာ။ ဝိညတ္တိ သီလန္တိကထာ။ ပါဏာတိပါတာဒယော ဝိနာပိ ဝိညတ္တိံ ဟောန္တီတိ ပဝတ္တာ အဝိညတ္တိဒုဿီလျကထာ။

အနုသယာ အဗျာကတာ၊ အဟေတုကာ၊ စိတ္တဝိပ္ပယုတ္တာတိ တိဿောပိ အနုသယကထာ။ အသေခဿ ဉာဏဝိပ္ပယုတ္တပ္ပဝတ္တိယာ သော ဉာဏီတိ နဝတ္တဗ္ဗောတိ ပဝတ္တာ ဉာဏကထာ။ ဉာဏံ စိတ္တဝိပ္ပယုတ္တန္တိကထာ ။ မဂ္ဂက္ခဏေ ဣဒံ ဒုက္ခန္တိ ဉာဏံ ပဝတ္တန္တိ ပဝတ္တာ ဣဒံ ဒုက္ခန္တိကထာ။ ဗုဒ္ဓါ ဣဒ္ဓိဗလေန အာယုကပ္ပံ ဝိနာပိ မဟာကပ္ပံ တိဋ္ဌန္တီတိ ပဝတ္တာ ဣဒ္ဓိဗလကထာ။ စိတ္တသန္တတိ သမာဓိ၊ န ဧကစိတ္တက္ခဏိကောတိ ပဝတ္တာ သမာဓိကထာ။ အဝိဇ္ဇာဒိပဋိစ္စသမုပ္ပာဒင်္ဂေဟိ အညာ ဓမ္မဋ္ဌိတတာတိ ပဝတ္တာ ဓမ္မဋ္ဌိတတာကထာ။ ရူပါဒီဟိ အညာ အနိစ္စတာတိ ပဝတ္တာ အနိစ္စတာကထာ။

ဝိညတ္တိယော ဝိနာပိ ဣန္ဒြိယသံဝရော ကာယဝစီကမ္မန္တိ ပဝတ္တာ ကထာ။ သဗ္ဗံ ကမ္မံ ဝိပါကဇနကန္တိ ပဝတ္တာ ကမ္မကထာ။ သဒ္ဒေါ ဝိပါကောတိ ပဝတ္တာ ကထာ။ သဠာယတနံ ဝိပါကောတိ ပဝတ္တာ ကထာ။ မဂ္ဂံ ဝိနာပိ သတ္တက္ခတ္တုပရမောတိကထာ။ တထာ ကောလံကောလဧကဗီဇိကထာသုပိ။ ဒိဋ္ဌိသမ္ပန္နော ဇီဝိတာ ဝေါရောပေတီတိကထာ။ ဒိဋ္ဌိသမ္ပန္နဿ အပါယဒုဂ္ဂတိယာ သဒ္ဓိံ ရူပါဒိတဏှာသင်္ခါတဒုဂ္ဂတိပဟီနာတိ ပဝတ္တာ ဒုဂ္ဂတိကထာ။ သတ္တမဘဝိကဿ တဏှာသမ္ဘဝတော ဒုဂ္ဂတိ အပ္ပဟီနာတိ ပဝတ္တာ သတ္တမဘဝိကကထာ။

သင်္ဃဘေဒါဒိကပ္ပဋ္ဌံ ကမ္မံ ကတွာ တေန မဟာကပ္ပံ အသီတိဘာဂံ ကတွာ တတော ဧကဘာဂမတ္တံ ကာလံ အာယုကပ္ပံ နိရယေ ပစ္စန္တီတိ အဂ္ဂဟေတွာ သကလံ မဟာကပ္ပံ ပစ္စန္တိ၊ ဝိနဿမာနေပိ ကပ္ပေ စက္ကဝါဠန္တရေသု ပစ္စန္တီတိ ပဝတ္တာ ကပ္ပဋ္ဌကထာ။ သင်္ဃဘေဒကော အပ္ပနာကုသလာနိ ဝိယ ကာမာဝစရကုသလမ္ပိ န ပဋိလဘတီတိ ပဝတ္တာ ကုသလပဋိလာဘကထာ။ အင်္ဂသမ္ပန္နာယ အာဏတ္တိယာ အဘာဝေပိ မာတုဃာတာဒိအာနန္တရိယကမ္မပယောဇကော မိစ္ဆတ္တနိယတော ဧဝါတိ ပဝတ္တာ အနန္တရာပယုတ္တကထာ။ အနိယတဓမ္မေသုပိ ကေစိ ကုသလသမ္ပယုတ္တာနိယတာ အတ္ထီတိ ပဝတ္တာ နိယတဿ နိယာမကထာ။ နီဝရဏေဟိ နိဝုတေန ပဋိစ္ဆန္နေနေဝ စိတ္တေန နီဝရဏံ ပဇဟန္တီတိ ပဝတ္တာ နိဝုတကထာ။ သမ္မုခီဘူတံ သံယောဇနမေဝ ဇဟတီတိ ပဝတ္တာ သမ္မုခီဘူတကထာ။ သမာပန္နော စ ဈာနာရမ္မဏနိကန္တိယာ ဈာနံ အဿာဒေတီတိ ပဝတ္တာ သမာပန္နော အဿာဒေတီတိကထာ။ ဒုက္ခဝေဒနာယပိ ရာဂဿာဒဝေဒနာ ဟောတီတိ ပဝတ္တာ အဿာတရာဂကထာ။ ဓမ္မတဏှာ အဗျာကတာတိကထာ။ ဓမ္မတဏှာ န ဒုက္ခသမုဒယောတိကထာ။

ကုသလံ ဝါ အကုသလဿ၊ အကုသလံ ဝါ ကုသလဿ အနန္တရာ ဥပ္ပဇ္ဇန္တီတိ ပဝတ္တာ ကုသလာကုသလပဋိသန္ဒဟနကထာ။ ဂဗ္ဘသေယျကာနမ္ပိ ဗီဇမတ္တံ သဠာယတနံ ပဋိသန္ဓိက္ခဏေ ဥပ္ပဇ္ဇတီတိ ပဝတ္တာ သဠာယတနုပ္ပတ္တိကထာ။ ပဉ္စဝိညာဏာနိ အညမညဿ အနန္တရာ ဥပ္ပဇ္ဇန္တီတိ ပဝတ္တာ အနန္တရပစ္စယကထာ။ သမ္မာဝါစာကမ္မန္တဝိညတ္တိယော အရိယရူပန္တိကထာ။ ကာမရာဂါဒိတော အညော အနုသယောတိကထာ။ ကိလေသပရိယုဋ္ဌာနံ စိတ္တဝိပ္ပယုတ္တန္တိကထာ။ ယထာ ကာမရာဂေါ ကာမဓာတုယံ ပရိယာပန္နော၊ ဧဝံ ရူပရာဂအရူပရာဂါ ရူပါရူပဘူမိယံ ပရိယာပန္နာတိ ပဝတ္တာ ပရိယာပန္နကထာ။ ဒွယံ ဒိဋ္ဌိဂတံ အဗျာကတန္တိကထာ။ ဒိဋ္ဌိဂတံ အပရိယာပန္နန္တိကထာ။ ယော ယေသံ ဟေတုပစ္စယော၊ သော ပုန တေသံ သဟဇာတာဒိပစ္စယော န ဟောတိ၊ ဧကဓာဝ ဧကဿ ပစ္စယော ဟောတီတိ ပဝတ္တာ ပစ္စယတာကထာ။ အဝိဇ္ဇာဝ သင်္ခါရာနံ ပစ္စယော၊ န ပန သင်္ခါရာ အဝိဇ္ဇာယာတိ ပဝတ္တာ အညမညပစ္စယကထာ။ ကာလဒ္ဓါနာ ဣမေ ပရိနိပ္ဖန္နေန ပညတ္တိမတ္တာတိ ပဝတ္တာ အဒ္ဓါကထာ။ ဧဝံ ခဏလယမုဟုတ္တကထာ။ အညဿ အာသဝဿ အဘာဝါ အာသဝါ အနာသဝါတိ ပဝတ္တာ အာသဝကထာ။ လောကုတ္တရာနံ ဓမ္မာနံ ဇရာမရဏံ လောကုတ္တရန္တိ ပဝတ္တာ ဇရာမရဏကထာ။ နိရောဓသမာပတ္တိ လောကုတ္တရာတိ ပဝတ္တာ သညာဝေဒယိတကထာ။ သာ လောကိယာတိ ပဝတ္တာ ဒုတိယသညာဝေဒယိတကထာ။ နိရောဓသမာပန္နောပိ ကာလံ ကရေယျာတိ ပဝတ္တာ တတိယသညာဝေဒယိတကထာ။ နိရောဓသမာပတ္တိ အသညသတ္တုပိကာတိကထာ။ ကမ္မတော အညော စိတ္တဝိပ္ပယုတ္တော ကမ္မူပစယောတိကထာ။

ဗလပ္ပတ္တာ ဗုဒ္ဓါဒယော ဣဒ္ဓိဗလေန သတ္တာနံ စိတ္တံ ရာဂါဒိအနုပ္ပတ္တိယာ နိဂ္ဂဏှန္တီတိ ပဝတ္တာ နိဂ္ဂဟကထာ။ ဧဝံ ကုသလုပ္ပတ္တိယာ ပရစိတ္တပဂ္ဂဟနကထာ။ ဗုဒ္ဓါ ဣဒ္ဓိယာ ပရေသံ သုခံ ဒေန္တီတိ ပဝတ္တာ သုခါနုပ္ပဒါနကထာ။ ‘‘သင်္ခါရာ အနိစ္စာ’’တိ မနသိကရောတော အတီတာဒိဘေဒဘိန္နေ သဗ္ဗေ သင်္ခါရေ အာရမ္မဏဝသေန ဧကတော အဓိဂဏှာတီတိ ပဝတ္တာ အဓိဂယှမနသိကာရကထာ။ ရူပံ ဟေတုကန္တိကထာ။ ဧဝံ ရူပံ သဟေတုကန္တိကထာ။ ရူပံ ကုသလာကုသလန္တိကထာ။ ရူပံ ဝိပါကောတိကထာ၊ ယထာ ကာမာဝစရကမ္မေန ဇာတံ ရူပံ ကာမာဝစရံ၊ ဧဝံ ရူပါဝစရာရူပါဝစရကမ္မေဟိ ဇာတံ ရူပံ ရူပါဝစရာရူပါဝစရန္တိကထာ ။ ရူပရာဂေါ ရူပဓာတုယာ၊ အရူပရာဂေါ စ အရူပဓာတုယာ ပရိယာပန္နောတိကထာ။

အတ္ထိ အရဟတော ပုညူပစယောတိကထာ။ နတ္ထိ အရဟတော အကာလမစ္စူတိကထာ။ ယံ ကိဉ္စိ ဥပ္ပဇ္ဇတိ၊ သဗ္ဗမိဒံ ကမ္မတောတိကထာ။ ဣန္ဒြိယဗဒ္ဓမေဝ ဒုက္ခံ၊ န သဗ္ဗေ သင်္ခါရာတိ ပဝတ္တာ ဣန္ဒြိယဗဒ္ဓကထာ။ သဗ္ဗေ သင်္ခါရာ ဒုက္ခာ ဌပေတွာ အရိယမဂ္ဂန္တိကထာ။ မဂ္ဂဖလာနေဝ သင်္ဃော နာမ၊ န စ တာနိ ဒက္ခိဏံ ပဋိဂ္ဂဏှန္တိ၊ တသ္မာ န ဝတ္တဗ္ဗံ သင်္ဃော ဒက္ခိဏံ ပဋိဂ္ဂဏှာတီတိကထာ။ တထာ န ဝတ္တဗ္ဗံ သင်္ဃော ဒက္ခိဏံ ဝိသောဓေတီတိကထာ။ န ဝတ္တဗ္ဗံ သင်္ဃော ဘုဉ္ဇတီတိကထာ။ န ဝတ္တဗ္ဗံ သင်္ဃဿ ဒိန္နံ မဟပ္ဖလန္တိကထာ။ ဗုဒ္ဓါ န ကိဉ္စိ ဘုဉ္ဇန္တိ၊ တသ္မာ န ဝတ္တဗ္ဗံ ဗုဒ္ဓဿ ဒိန္နံ မဟပ္ဖလန္တိကထာ။ ဒါယကတော ဒါနံ ဝိသုဇ္ဈတိ၊ န ပဋိဂ္ဂါဟကတောတိ ပဝတ္တာ ဒက္ခိဏာဝိသုဒ္ဓိကထာ။

ဗုဒ္ဓါ တုသိတလောကေ ဧဝ နိဗ္ဗတ္တန္တိ၊ န မနုဿလောကေ။ ဧတ္ထ ဟိ နိမ္မိတရူပမတ္တံ ဒဿေန္တီတိ ပဝတ္တာ မနုဿလောကကထာ။ နိမ္မိတရူပံ ဓမ္မံ ဒေသေတိ၊ န ဗုဒ္ဓါတိ ပဝတ္တာ ဓမ္မဒေသနာကထာ။ ရာဂေါဝ ကရုဏာ နာမ၊ တတော နတ္ထိ ဗုဒ္ဓါနံ ကရုဏာတိကထာ။ ဗုဒ္ဓါနံ ဥစ္စာရပဿာဝေါ အညေ ဂန္ဓဇာတေ အတိဝိယ အဓိဂဏှာတီတိ ပဝတ္တာ ဂန္ဓဇာတကထာ။ ဗုဒ္ဓါ ဧကေန မဂ္ဂေန စတ္တာရိ သာမညဖလာနိ သစ္ဆိကရောန္တီတိ ပဝတ္တာ ဧကမဂ္ဂကထာ။ ပရိကမ္မာဒိံ ဝိနာဝ ပဌမာဒိဇ္ဈာနာ ဒုတိယာဒိဇ္ဈာနံ သင်္ကမတီတိ ပဝတ္တာ ဈာနသင်္ကန္တိကထာ။ ပဉ္စကနယေ အဝိတက္ကဝိစာရမတ္တံ ဈာနံ ဝိသုံ ဈာနံ နာမ န ဟောတိ၊ ဈာနန္တရိကံ နာမ ဟောတီတိ ပဝတ္တာ ဈာနန္တရိကကထာ။ သမာပန္နော သဒ္ဒံ သုဏာတီတိကထာ။ ဝိညာဏံ ဝိနာ ပသာဒစက္ခုနာ ရူပံ ပဿတီတိကထာ။

တေကာလိကေ ကိလေသေ ပဇဟတီတိ ပဝတ္တာ ကိလေသပ္ပဇဟနကထာ။ နိဗ္ဗာနသင်္ခါတာပိ သုညတာ သင်္ခါရက္ခန္ဓပရိယာပန္နာတိ ပဝတ္တာ သုညတကထာ။ အသင်္ခတမေဝ သာမညဖလန္တိကထာ ။ ယေသံ ကေသဉ္စိ ဓမ္မာနံ ပဋိလာဘာ အသင်္ခတာတိ ပဝတ္တာ ပတ္တိကထာ။ သဗ္ဗဓမ္မာနံ သဘာဝသင်္ခါတာ တထတာ အသင်္ခတာတိ ပဝတ္တာ တထတာကထာ။ အနဝဇ္ဇဋ္ဌေန နိဗ္ဗာနမ္ပိ ကုသလန္တိကထာ။ အာနန္တရိယာဒိံ ဝိနာပိ အတ္ထိ ပုထုဇ္ဇနဿ အစ္စန္တနိယာမတာတိကထာ။ လောကိယသဒ္ဓါဒယော န ဣန္ဒြိယာနီတိ ပဝတ္တာ ဣန္ဒြိယကထာ။

အသဉ္စိစ္စာပိ အာနန္တရိကော ဟောတီတိ ပဝတ္တာ အသဉ္စိစ္စကထာ။ နတ္ထိ ပုထုဇ္ဇနဿ ဉာဏန္တိ ပဝတ္တာ ဉာဏကထာ။ နေရယိကာနံ ကမ္မာနေဝ နိရယပါလရူပေန ဝဓေန္တိ၊ န နိရယပါလာတိ ပဝတ္တာ နိရယပါလကထာ။ အတ္ထိ ဒေဝေသု တိရစ္ဆာနာတိကထာ။ ဝိရတိတ္တယံ စိတ္တဝိပ္ပယုတ္တံ၊ ပဉ္စင်္ဂိကောဝ မဂ္ဂေါတိ ပဝတ္တာ မဂ္ဂကထာ။ ပဋိစ္စသမုပ္ပာဒေသု ဉာဏံ လောကုတ္တရန္တိ ပဝတ္တာ ဉာဏကထာ။

တိဿော သင်္ဂီတိယော အာရဗ္ဘ သာသနံ နဝံ ကတန္တိ ပဝတ္တာ သာသနကထာ။ ပုထုဇ္ဇနော ဧကက္ခဏေ တေဓာတုကေဟိ ဓမ္မေဟိ အဝိဝိတ္တောတိ ပဝတ္တာ အဝိဝိတ္တကထာ။ ဉေယျာဝရဏဟေတုကံ ကိဉ္စိ သံယောဇနံ အပ္ပဟာယပိ အရဟာ ဟောတီတိ ပဝတ္တာ သံယောဇနကထာ။ ‘‘သင်္ခါရာ နိစ္စာ ဟောန္တု၊ ရုက္ခာ နိစ္စပုပ္ဖဖလာဒိယုတ္တာ ခေမိနော ဟောန္တူ’’တိအာဒိနာ ယထာဓိပ္ပာယံ ဣဒ္ဓိ ပဝတ္တတီတိ ပဝတ္တာ ဣဒ္ဓိကထာ။ ဗုဒ္ဓါနံ သရီရအာယုပဘာဝေမတ္တတော အညာပိ ဝေမတ္တတာ အတ္ထီတိ ပဝတ္တာ ဗုဒ္ဓကထာ။ ဧကသ္မိံ ခဏေ သဗ္ဗလောကဓာတူသု အနေကေ ဗုဒ္ဓါ သန္တီတိ ပဝတ္တာ သဗ္ဗဒိသာကထာ။ သဗ္ဗေ ဓမ္မာ နိယတာတိ ပဝတ္တာ ဓမ္မကထာ။ သဗ္ဗကမ္မာနိ ဖလဒါနေ နိယတာနီတိ ပဝတ္တာ ကမ္မကထာ။

အရဟာ အသဗ္ဗညုဘာဝေန သဗ္ဗညုဝိသယေ ကိဉ္စိ သံယောဇနံ အပ္ပဟာယ ပရိနိဗ္ဗာတီတိ ပဝတ္တာ ပရိနိဗ္ဗာနကထာ။ အရဟာ ကုသလစိတ္တော ပရိနိဗ္ဗာယတီတိ ပဝတ္တာ ကုသလစိတ္တကထာ။ အရဟာ အာနေဉ္ဇေ သဏ္ဌိတော ပရိနိဗ္ဗာယတီတိ ပဝတ္တာ အာနေဉ္ဇကထာ။ အတ္ထိ ဂဗ္ဘသေယျာယ ဓမ္မာဘိသမယော၊ အတ္ထိ ဂဗ္ဘသေယျာယ အရဟတ္တပ္ပတ္တိ၊ သုပိနန္တေ ဓမ္မာဘိသမယော၊ အရဟတ္တပ္ပတ္တိ စာတိ ပဝတ္တာ တိဿောပိ ကထာ။ သဗ္ဗံ သုပိနစိတ္တံ အဗျာကတန္တိကထာ။ ခဏိကတာယ စိတ္တာနံ နတ္ထိ အာသေဝနပစ္စယတာတိကထာ။ သဗ္ဗေ သင်္ခတာ ဧကစိတ္တက္ခဏိကာတိ ပဝတ္တာ ခဏိကကထာ။

ဣတ္ထိယာ သဒ္ဓိံ ဧကတော သမ္ပတ္တိံ အနုဘဝိဿာမာတိ ပူဇာဒိံ ကတွာ ဧကာဓိပ္ပာယပ္ပတ္တဿ ဘိက္ခုနော မေထုနော ဓမ္မော ပဋိသေဝိတဗ္ဗောတိ ပဝတ္တာ ဧကာဓိပ္ပာယကထာ။ ပါပဘိက္ခူသု မေထုနံ ပဋိသေဝန္တေသု အရဟန္တာနံ ဝဏ္ဏေန အမနုဿာ မေထုနံ ပဋိသေဝန္တီတိ ပဝတ္တာ အရဟန္တဝဏ္ဏကထာ။ ကေစိ သတ္တာ အတ္တနော ဣဿရိယေန ကာမကာရိကာဝသေန ဝိနိပါတံ ဂစ္ဆန္တိ၊ န ကမ္မဝသေနာတိ ပဝတ္တာ ဣဿရိယကာမကာရိကာကထာ။ န ရာဂေါ ရာဂပတိရူပကောတိအာဒိ ပတိရူပကထာ။ ခန္ဓာယတနာဒယော အပရိနိပ္ဖန္နာတိ ပဝတ္တာ အပရိနိပ္ဖန္နကထာတိ သာဓိကဒွိသတကထာ။ ပါဠိယံ အဋ္ဌမုခဝါဒယုတ္တိဝသေနေဝ သမ္မိတိယာဒီနံ ဘိန္နလဒ္ဓိကာနံ လဒ္ဓိဘေဒဝသေန နာနာပကာရတော ဝိဘတ္တာ၊ တာ ပန သဗ္ဗကထာ ပုဂ္ဂလကထာဝ။ တာ တံတံလဒ္ဓိဘေဒဝသေန သင်္ခေပတောပိ ဝုစ္စမာနာ အတိဘာရိယံ ဂန္ထံ ကရောန္တိ၊ တသ္မာ န ဝိတ္ထာရိတာ။ တံ ပန နယံ ဣစ္ဆန္တေဟိ ပါဠိအဋ္ဌကထာသု (ကထာ။ ၁ အာဒယော၊ ကထာ။ အဋ္ဌ။ နိဒါနကထာ) ဧဝ ဝိတ္ထာရတော ဂဟေတဗ္ဗောတိ အယမေတ္ထ ပါဠိနယေန သဒ္ဓိံ အတ္ထဝိနိစ္ဆယော။

မောဟဝိစ္ဆေဒနိယာ အဘိဓမ္မမာတိကတ္ထဝဏ္ဏနာယ

ကထာဝတ္ထုမာတိကတ္ထဝဏ္ဏနာ နိဋ္ဌိတာ။