📜

၆။ ယမကမာတိကာ

မူလယမကမာတိကတ္ထဝဏ္ဏနာ

ဣဒါနိ ယမကမာတိကာယ သံဝဏ္ဏနာနယော ဟောတိ။ သာ ပနေသာ မူလယမကမာတိကာ ခန္ဓအာယတနဓာတုသစ္စသင်္ခါရအနုသယစိတ္တဓမ္မဣန္ဒြိယယမကမာတိကာတိ ဒသဝိဓာ ဟောတိ။ ကေနဋ္ဌေန စေတ္ထ ယမကန္တိ? ယုဂဠဋ္ဌေန။ ယုဂဠံ ဟိ ‘‘ယမကပါဋိဟာရိယံ’’၊ ‘‘ယမကသာလာ’’တိအာဒီသု ‘‘ယမက’’န္တိ ဝုစ္စတိ၊ ဣတိ ယုဂဠသင်္ခါတာနံ ယမကာနံ ဝသေန ဒေသိတတ္တာ ဣမေသု ဒသသု ဧကေကမ္ပိ၊ ဧတေသံ ဝိဘဇနတ္တာ နိဒ္ဒေသောပိ၊ သဗ္ဗေသံ သမူဟတ္တာ ပကရဏမ္ပိ ယမကံ နာမ။ ဣဓ ပနေတာ နိဒ္ဒေသယမကံ ဥပါဒါယ ‘‘ယမကမာတိကာ’’တွေဝ ဝုတ္တာ၊ တာသံ ပန ဒသန္နံ ယမကမာတိကာနံ မူလယမကမာတိကာ အာဒိ။ တတ္ထာပိ ‘‘ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလာ။ ယေ ဝါ ပန ကုသလမူလာ၊ သဗ္ဗေ တေ ဓမ္မာ ကုသလာ’’တိ ဣဒံ ယမကံ အာဒိ။ တဿ ကုသလမူလသင်္ခါတာနံ ဒွိန္နံ အတ္ထာနံ ဝသေန အတ္ထယမကန္တိ ဝါ၊ တေသညေဝ အတ္ထာနံ အနုလောမတော ပဋိလောမတော ပဝတ္တပါဠိဓမ္မဝသေန ဓမ္မယမကန္တိ ဝါ၊ အနုလောမပဋိလောမတော ပဝတ္တပုစ္ဆာဝသေန ပုစ္ဆာယမကန္တိ ဝါ တိဓာ ယမကဘာဝေါ ဝေဒိတဗ္ဗော။ သေသေသုပိ ဧသေဝ နယော။

ဣဒါနိ ဣမေသံ ယမကာနံ ဝသေန ဒေသိတာယ ဣမိဿာ မူလယမကမာတိကာယ တာဝ နယယမကပုစ္ဆာအတ္ထဝါရပ္ပဘေဒဝသေန ပါဠိဝဝတ္ထာနံ ဧဝံ ဝေဒိတဗ္ဗံ – ကုသလတ္တိကမာတိကာယ ဟိ ‘‘ကုသလာ ဓမ္မာ’’တိ ဣဒံ အာဒိပဒံ နိဿာယ မူလနယော မူလမူလနယော မူလကနယော မူလမူလကနယောတိ ဣမေ စတ္တာရော နယာ ဟောန္တိ။ တေသု ဧကေကသ္မိံ နယေ မူလယမကံ ဧကမူလယမကံ အညမညမူလယမကန္တိ တီဏိ တီဏိ ယမကာနီတိ ဒွါဒသ ယမကာနိ။ ဧကေကသ္မိံ ယမကေ အနုလောမပဋိလောမဝသေန ဒွေ ဒွေ ပုစ္ဆာတိ စတုဝီသတိ ပုစ္ဆာ၊ ဧကေကပုစ္ဆာယ သန္နိဋ္ဌာနသံသယဝသေန ဒွေ ဒွေ အတ္ထာတိ အဋ္ဌစတ္တာလီသ အတ္ထာ။

တတ္ထ ယေ ကေစိ ကုသလာတိ ကုသလေသု ‘‘ကုသလာ နု ခေါ၊ န ကုသလာ နု ခေါ’’တိ သန္ဒေဟာဘာဝတော ဣမသ္မိံ ပဒေ သန္နိဋ္ဌာနတ္ထော ဝေဒိတဗ္ဗော။ သဗ္ဗေ တေ ကုသလမူလာတိ ‘‘သဗ္ဗေ တေ ကုသလာ ဓမ္မာ ကုသလမူလာ နု ခေါ၊ န နု ခေါ’’တိ ဧဝံ ဝိမတိဝသေန ပုစ္ဆိတတ္တာ ဣမသ္မိံ ပဒေ သံသယတ္ထော ဝေဒိတဗ္ဗော။ သော စ ခေါ ဝေနေယျာနံ သံသယဋ္ဌာနေ သံသယံ ဒီပေတွာ တံဝိနောဒနတ္ထံ ဘဂဝတာ ဝုတ္တော၊ တထာဂတဿ ပန သံသယဋ္ဌာနံ နာမ နတ္ထိ။ ဣတော ပရေသုပိ ပုစ္ဆာပဒေသု ဧသေဝ နယော။ ယထာ စ ကုသလပဒံ နိဿာယ ဣမေ စတုနယာဒယော ဟောန္တိ၊ အကုသလပဒံ နိဿာယပိ တထေဝ၊ အဗျာကတပဒံ နိဿာယပိ တထေဝ၊ ကုသလာဒီနိ တီဏိပိ ပဒါနိ ဧကတော ကတွာ နိဒ္ဒိဋ္ဌံ နာမပဒံ နိဿာယ တထေဝါတိ ကုသလတ္တိကမာတိကာယ စတူသု ပဒေသု သဗ္ဗေပိ သောဠသ နယာ၊ အဋ္ဌစတ္တာလီသ ယမကာနိ၊ ဆန္နဝုတိ ပုစ္ဆာ၊ ဒွါနဝုတိသတံ အတ္ထာ စ ဥဒ္ဒေသဝသေန ဝုတ္တာတိ ဝေဒိတဗ္ဗာ။ ဧတ္တာဝတာ မူလဝါရော ဟေတုဝါရော နိဒါနဝါရော သမ္ဘဝဝါရော ပဘဝဝါရော သမုဋ္ဌာနဝါရော အာဟာရဝါရော အာရမ္မဏဝါရော ပစ္စယဝါရော သမုဒယဝါရောတိ သဗ္ဗေပိ ဒသ ဝါရာ ဟောန္တိ။ တတ္ထ မူလဝါရေ အာဂတပရိစ္ဆေဒေနေဝ အဝသေသေသုပိ နယာဒယော ဝေဒိတဗ္ဗာ။ ပါဠိ ပနေတ္ထ အတိသံခိတ္တာ။ ဣတိ သဗ္ဗေသုပိ ဒသသု ဝါရေသု သဋ္ဌိသတံ နယာ၊ အသီတိအဓိကာနိ စတ္တာရိ ယမကသတာနိ၊ သဋ္ဌိအဓိကာနိ နဝ ပုစ္ဆာသတာနိ၊ ဝီသာဓိကာနိ ဧကူနဝီသတိ အတ္ထသတာနိ စ ဥဒ္ဒိဋ္ဌာနီတိ ဝေဒိတဗ္ဗာနိ။

ဧဝမေတ္ထ နယယမကပုစ္ဆာ အတ္ထဝါရပ္ပဘေဒဝသေန ပါဠိဝဝတ္ထာနံ ဝိဒိတွာ ဣဒါနိ တဿာ အနုတ္တာနပဒတ္ထာနုသာရေနေဝ ဝိဘင်္ဂနယသဟိတော သင်္ခေပတ္ထဝဏ္ဏနာနယော ဧဝံ ဝေဒိတဗ္ဗော – တတ္ထ ယေ ကေစီတိ အနဝသေသဝစနံ။ ကုသလာ ဓမ္မာတိ အနဝဇ္ဇသုခဝိပါကာ နိဿတ္တသဘာဝါ။ သဗ္ဗေ တေ ကုသလမူလာတိ ကိံ တေ သဗ္ဗေယေဝ ကုသလမူလာ ဟောန္တီတိ ပုစ္ဆာ။ ဣမာနိ ပန ဝိဿဇ္ဇနမာတိကာယ နတ္ထိ။ ယမကမာတိကာယ ဟိ သဗ္ဗတ္ထ ပုစ္ဆာပဒါနေဝ ဥဒ္ဓဋာနိ၊ န ဝိဿဇ္ဇနာနီတိ။ ဝိဿဇ္ဇနာနိ ပန နိဒ္ဒေသေယေဝ ဝုတ္တာနိ၊ တသ္မာ သဗ္ဗတ္ထ နိဒ္ဒေသနယေနေဝ ဝိဿဇ္ဇနမုခံ ဒဿယိဿာမ။ ဣမိဿာဝ ‘‘ယေ ကေစိ ကုသလာ ဓမ္မာ၊ သဗ္ဗေ တေ ကုသလမူလာ’’တိ ပုစ္ဆာယ ဝိဘင်္ဂနယေန ဣဒံ ဝိဿဇ္ဇနမုခံ။ ‘‘တီဏေဝ ကုသလမူလာနိ၊ အဝသေသာ ကုသလာ ဓမ္မာ န ကုသလမူလာ’’တိ တဿာ စာယမတ္ထော – န တေ သဗ္ဗေ ကုသလာ ဓမ္မာ ကုသလမူလာနိ ဟောန္တိ၊ အလောဘာဒီနိ ပန တီဏေဝ ကုသလမူလာနီတိ။ ယေ ဝါ ပန ကုသလမူလာ တယော အလောဘာဒယော ကုသလာနံ မူလာတိ ဝုတ္တာ၊ သဗ္ဗေ တေ ကုသလာ ဓမ္မာတိ ကိံ တေ သဗ္ဗေ တယောပိ ဓမ္မာ ကုသလာတိ ပုစ္ဆာ။ တဿာ နိဒ္ဒေသေ ‘‘အာမန္တာ’’တိ ဝိဿဇ္ဇနံ။ တဿ တေသံ တိဏ္ဏံ မူလာနံ ကုသလဘာဝမ္ပိ သမ္ပဋိစ္ဆာမီတိ အတ္ထော။ အယံ တာဝ မူလနယေ မူလယမကနယော။

ဧကမူလယမကေ ပန သဗ္ဗေ တေ ကုသလမူလေန ဧကမူလာတိ ဂဏနဋ္ဌေန ဧကမူလကံ အဂ္ဂဟေတွာ သမာနတ္ထေန ဂဟေတဗ္ဗာ၊ အယံ ဟေတ္ထ အတ္ထော – ‘‘သဗ္ဗေ တေ ကုသလမူလေန ဧကံ သမာနံ မူလံ ဧတေသန္တိ ဧကမူလာ’’တိ။ ယံ ဖဿဿ မူလံ၊ ကိံ တဒေဝ ဝေဒနာဒီနန္တိ အယံ ပုစ္ဆာ။ အထ နေသံ တထာဘာဝံ သမ္ပဋိစ္ဆနဝသေန ‘‘အာမန္တာ’’တိ ဝိဘင်္ဂေ ဝိဿဇ္ဇနံ။ ယေ ဝါ ပန ကုသလမူလေန ဧကမူလာ၊ သဗ္ဗေ တေ ဓမ္မာ ကုသလာတိ ပုစ္ဆာ။ တဿာ ပန ကုသလစိတ္တသမုဋ္ဌာနံ ရူပံ ကုသလမူလေန ဧကမူလမေဝ၊ န ကုသလံ၊ ဖဿာဒိဓမ္မဇာတံ ပန ကုသလမူလေန ဧကမူလဉ္စေဝ ကုသလဉ္စာတိ ဣဒံ ဝိဿဇ္ဇနံ။ ယထေဝ ဟိ ဖဿာဒီနံ အလောဘာဒယော သုပ္ပတိဋ္ဌိတဘာဝသာဓနေန ဟေတုပစ္စယတ္တာ မူလံ၊ တထာ တံသမုဋ္ဌာနရူပဿာပီတိ တံရူပမ္ပိ အရူပဓမ္မေဟိ သဒ္ဓိံ သမာနမူလန္တိ ဝုစ္စတိ၊ န ပန ကုသလံ အနဝဇ္ဇသုခဝိပါကတ္တာဘာဝါ။ ဧကမူလယမကနယော။

အညမညမူလယမကေ ပန ‘‘ယေ ကေစိ ကုသလာ’’တိ အပုစ္ဆိတွာ ‘‘ယေ ကေစိ ကုသလမူလေန ဧကမူလာ’’တိ ပုစ္ဆာ ကတာ။ ကသ္မာ? ဣမိနာပိ ဗျဉ္ဇနေန တဿေဝတ္ထဿ သမ္ဘဝဒဿနတ္ထံ၊ ကုသလသမုဋ္ဌာနရူပဿာပိ သမ္ပိဏ္ဍနတ္ထဉ္စ။ အညမညမူလာတိ သဗ္ဗေဝ တေ ကိံ အညမညဿ ဟေတုပစ္စယဋ္ဌေန မူလာနိ ဟောန္တီတိ ပုစ္ဆာ။ တဿာ ယာနိ ဒွေ တီဏိ မူလာနိ ဧကတော ဥပ္ပဇ္ဇန္တိ၊ တာနေဝ ဧကမူလာနိ စေဝ အညမညမူလာနိ စ၊ အဝသေသာ ကုသလမူလသဟဇာတာ ရူပါရူပဓမ္မာ ကုသလမူလေန ဧကမူလာဝ၊ န စ အညမညမူလာတိ ဝိဿဇ္ဇနံ။ တဿေဝ ပဋိလောမနယေ သဗ္ဗေ တေ အညမညမူလာ အလောဘာဒယော ကုသလာတိ ပုစ္ဆာ။ အာမန္တာတိ ဝိဿဇ္ဇနံ။ မူလနယော။

ယထာ စ မူလနယေ မူလယမကဧကမူလယမကအညမညမူလယမကဝသေန ဆဗ္ဗိဓာ ပုစ္ဆာဝိဿဇ္ဇနနယာ ဝုတ္တာ၊ ဧဝံ မူလမူလနယာဒီသုပိ ဝေဒိတဗ္ဗာ။ အယံ ပနေတ္ထ ဝိသေသော – သဗ္ဗေ တေ ကုသလမူလမူလာတိ သဗ္ဗေ တေ ကုသလမူလသင်္ခါတာ မူလာ၊ ကုသလမူလမူလာတွေဝ အတ္ထော။ ဧကမူလမူလာတိ သမာနဋ္ဌေန ဧကမေဝ မူလမူလံ ဧတေသန္တိ ဧကမူလမူလာ၊ သမာနမူလမူလာတွေဝ အတ္ထော။ အညမညမူလမူလာတိ အညမညဿ မူလံ အညမညမူလံ၊ တံ ဟေတုပစ္စယဋ္ဌေန မူလံ ဧတေသန္တိ အညမညမူလမူလာ၊ အညမညမူလမူလာတွေဝ အတ္ထော။ သေသံ တာဒိသမေဝါတိ။ မူလမူလနယော။

မူလကနယေ ပန သဗ္ဗေ တေ ကုသလမူလကာတိ သဗ္ဗေ တေ ကုသလာ ဟေတုပစ္စယဋ္ဌေန ကုသလဘူတံ မူလံ ဧတေသန္တိ ကုသလမူလကာတိ ပုစ္ဆာ။ အာမန္တာတိ ဝိဿဇ္ဇနံ။ ‘‘ယေ ဝါ ပန ကုသလမူလကာ၊ သဗ္ဗေ တေ ဓမ္မာ ကုသလာ’’တိ ပုစ္ဆာ။ ယံ ရူပံ၊ တံ ဌပေတွာ သေသံ ကုသလန္တိ ဝိဿဇ္ဇနံ၊ သေသံ တာဒိသမေဝါတိ။ မူလကနယော။

မူလမူလကနယေ ပန ကုသလမူလမူလကာတိ ကုသလမူလသင်္ခါတံ မူလံ ဧတေသန္တိ ကုသလမူလမူလကာ။ သေသံ တာဒိသမေဝါတိ။

အယံ တာဝ ကုသလပဒေသု ပုစ္ဆာဝိဿဇ္ဇနနယော။ အကုသလပဒါဒီသုပိ ဧသေဝ နယော။ အယံ ပန ဝိသေသော – အကုသလပဒမူလေသု ဧကမူလယမကေ ‘‘ယေ ကေစိ အကုသလာ ဓမ္မာ၊ သဗ္ဗေ တေ အကုသလမူလေန ဧကမူလာ’’တိ ပဌမပုစ္ဆာယ ‘‘အဟေတုကံ အကုသလံ အကုသလမူလေန ဧကမူလ’’န္တိ နိဒ္ဒေသေ ဝိဿဇ္ဇနံ ကတံ။ တတ္ထ အဟေတုကံ အကုသလန္တိ ဒွီသု မောဟမူလစိတ္တေသု မောဟံ သန္ဓာယ ဝုတ္တံ၊ အဗျာကတပဒမူလေသု ဧကမူလယမကေ ‘‘ယေ ကေစိ အဗျာကတာ ဓမ္မာ၊ သဗ္ဗေ တေ အဗျာကတမူလေန ဧကမူလာ’’တိ ပုစ္ဆာယ ‘‘အဟေတုကံ အဗျာကတံ ဌပေတွာ သေသာ အဗျာကတမူလေန ဧကမူလကာ’’တိ ဝိဿဇ္ဇနံ။ တတ္ထ အဟေတုကံ အဗျာကတန္တိ အဋ္ဌာရသာဟေတုကစိတ္တုပ္ပာဒါ၊ ရူပံ၊ နိဗ္ဗာနဉ္စ။ ဧတ္ထ စ ကိဉ္စာပိ သဟေတုကအဗျာကတစိတ္တသမုဋ္ဌာနရူပမ္ပိ အဗျာကတမူလေန ဧကမူလမေဝ၊ တံ ပန အဗ္ဗောဟာရိကံ ကတွာ နိဒ္ဒေသေ ဧကတော လဗ္ဘမာနကဝသေနပေတံ ဝိဿဇ္ဇနံ ကတန္တိ ဝေဒိတဗ္ဗံ။

နာမပဒမူလေသု စ ‘‘ယေ ကေစိ နာမာ ဓမ္မာ၊ သဗ္ဗေ တေ နာမမူလာ’’တိ ပုစ္ဆာယ ‘‘နဝေဝ နာမမူလာနိ၊ အဝသေသာ နာမာ ဓမ္မာ၊ န နာမမူလာ’’တိ ဝိဿဇ္ဇနံ။ ဧကမူလနယေ ပနေတ္ထ ‘‘ယေ ကေစိ နာမာ ဓမ္မာ၊ သဗ္ဗေ တေ နာမမူလေန ဧကမူလာ’’တိ ပုစ္ဆာ။ ‘‘အဟေတုကံ နာမံ ဌပေတွာ သေသံ နာမမူလေန ဧကမူလ’’န္တိ ဝိဿဇ္ဇနံ။ တတ္ထ အဟေတုကစိတ္တုပ္ပာဒဝိစိကိစ္ဆုဒ္ဓစ္စသမ္ပယုတ္တမောဟနိဗ္ဗာနဝသေန အဟေတုကံ နာမံ ဝေဒိတဗ္ဗံ။ သေသံ သဗ္ဗတ္ထ ကုသလပဒေ ဝုတ္တာနုသာရေန သုဝိညေယျမေဝါတိ။ အယံ မူလဝါရေ နယော။

ဣတော ပရေသု ဟေတုဝါရာဒီသု နဝသု ဝါရေသု မူလဝါရသဒိသောဝ သဗ္ဗတ္ထ သံဝဏ္ဏနာနယော။ ဟေတုအာဒိပဒမတ္တမေဝ ဟေတ္ထ ဝိသေသော၊ တာနိ စ မူလ-သဒ္ဒပရိယာယတော အလောဘာဒိဟေတုကာနေဝ။ အလောဘာဒယော ဟိ သဟဇာတဓမ္မသင်္ခါတဿ အတ္တနော ဖလဿ ပတိဋ္ဌာနဋ္ဌေန မူလံ။ တဿ နိပ္ဖာဒနတ္ထံ ဟိနောတိ ပဝတ္တတီတိ ဟေတု၊ ‘‘ဟန္ဒ နံ ဂဏှထာ’’တိ ဒဿေန္တံ ဝိယ အတ္တနော ဖလံ နိဒေတီတိ နိဒါနံ။ ဧတသ္မာ ဖလံ သမ္ဘဝတီတိ သမ္ဘဝေါ။ ပဘဝတီတိ ပဘဝေါ။ သမုဋ္ဌာတိ တံ ဧတ္ထ၊ ဧတေနာတိ ဝါ သမုဋ္ဌာနံ။ တံ အာဟရတီတိ အာဟာရော။ အပဋိက္ခိပိတဗ္ဗဋ္ဌေန တေန အာလမ္ဗီယတီတိ အာလမ္ဗဏံ။ ဧတံ ပဋိစ္စ တံ ဧတီတိ ပစ္စယော။ ဧတသ္မာ တံ သမုဒေတီတိ သမုဒယော။ သဗ္ဗံ ကာရဏပရိယာယေန ဝုတ္တာ ‘‘မူလံ ဟေတု နိဒါနဉ္စာ’’တိ ဂါထာ ဒသန္နမ္ပိ ဝါရာနံ ဥဒ္ဒါနဂါထာ နာမ။ အယံ မူလယမကမာတိကတ္ထဝဏ္ဏနာနယော။

ခန္ဓယမကမာတိကတ္ထဝဏ္ဏနာ

ခန္ဓယမကပါဠိယာ ပန ပါဠိဝဝတ္ထာနံ တာဝ ဧဝံ ဝေဒိတဗ္ဗံ – ‘‘ပဉ္စက္ခန္ဓာ’’တိ ပဒံ အာဒိံ ကတွာ ယာဝ ‘‘န ခန္ဓာ န သင်္ခါရာ’’တိ ပဒံ၊ တာဝ ပဝတ္တာ အယံ ခန္ဓယမကမာတိကာ နာမ။ သာ ပဏ္ဏတ္တိဝါရဿ ‘‘ဥဒ္ဒေသဝါရော’’တိပိ ‘‘ပုစ္ဆာဝါရော’’တိပိ ဝုစ္စတိ။ သော စ ပဒသောဓနဝါရော ပဒသောဓနမူလစက္ကဝါရော သုဒ္ဓခန္ဓဝါရော သုဒ္ဓခန္ဓမူလစက္ကဝါရောတိ စတူဟိ နယဝါရေဟိ ပဋိမဏ္ဍိတော။ တတ္ထ ‘‘ရူပံ ရူပက္ခန္ဓော၊ ရူပက္ခန္ဓော ရူပ’’န္တိအာဒိနာ နယေန ပဒမေဝ သောဓေတွာ ဂတော ပဒသောဓနဝါရော နာမ။ သော အနုလောမပဋိလောမဝသေန ဒုဝိဓော ဟောတိ ။ တဿ အနုလောမဝါရေ ‘‘ရူပံ ရူပက္ခန္ဓော၊ ရူပက္ခန္ဓော ရူပ’’န္တိအာဒီနိ ပဉ္စ ယမကာနိ။ ပဋိလောမဝါရေပိ ‘‘န ရူပံ န ရူပက္ခန္ဓော၊ န ရူပက္ခန္ဓော န ရူပ’’န္တိအာဒိနာ ပဉ္စ ဝါရာ။

တတော ပရံ တေသညေဝ ပဒသောဓနဝါရေ သောဓိတာနံ ခန္ဓာနံ ‘‘ရူပံ ရူပက္ခန္ဓော၊ ခန္ဓာ ဝေဒနာက္ခန္ဓော’’တိအာဒိနာ နယေန ဧကေကခန္ဓမူလကာနိ စတ္တာရိ စတ္တာရိ စက္ကာနိ ဗန္ဓိတွာ ဂတော ပဒသောဓနမူလကာနံ စက္ကာနံ အတ္ထိတာယ ပဒသောဓနမူလစက္ကဝါရော နာမ။ သောပိ အနုလောမပဋိလောမဝသေန ဒုဝိဓော ဟောတိ။ တဿ အနုလောမဝါရေ ‘‘ရူပံ ရူပက္ခန္ဓော၊ ခန္ဓာ ဝေဒနာက္ခန္ဓော’’တိအာဒီနိ ဧကေကခန္ဓမူလကာနိ စတ္တာရိ စတ္တာရိ ကတွာ ဝီသတိ ယမကာနိ။ ပဋိလောမဝါရေပိ ‘‘န ရူပံ န ရူပက္ခန္ဓော၊ န ခန္ဓာ န ဝေဒနာက္ခန္ဓော’’တိအာဒီနိ ဝီသတိမေဝ။

တတော ပရံ ‘‘ရူပံ ခန္ဓော၊ ခန္ဓာ ရူပ’’န္တိအာဒိနာ နယေန သုဒ္ဓခန္ဓဝသေနေဝ ဂတော သုဒ္ဓခန္ဓဝါရော နာမ။ သောပိ အနုလောမပဋိလောမဝသေန ဒုဝိဓော ဟောတိ။ တဿ အနုလောမဝါရေ ‘‘ရူပံ ခန္ဓော ၊ ခန္ဓာ ရူပ’’န္တိအာဒီနိ ပဉ္စ ယမကာနိ။ ပဋိလောမဝါရေပိ ‘‘န ရူပံ န ခန္ဓော၊ န ခန္ဓာ န ရူပ’’န္တိအာဒီနိ ပဉ္စေဝ။

တတော ပရံ တေသညေဝ သုဒ္ဓခန္ဓာနံ ‘‘ရူပံ ခန္ဓော၊ ခန္ဓာ ဝေဒနာ’’တိအာဒိနာ နယေန ဧကေကခန္ဓမူလကာနိ စတ္တာရိ စတ္တာရိ စက္ကာနိ ဗန္ဓိတွာ ဂတော သုဒ္ဓခန္ဓမူလကာနံ စက္ကာနံ အတ္ထိတာယ သုဒ္ဓခန္ဓမူလစက္ကဝါရော နာမ။ သောပိ အနုလောမပဋိလောမဝသေန ဒုဝိဓော ဟောတိ။ တဿ အနုလောမဝါရေ ‘‘ရူပံ ခန္ဓော၊ ခန္ဓာ ဝေဒနာ’’တိအာဒီနိ ဧကေကခန္ဓမူလကာနိ စတ္တာရိ စတ္တာရိ ကတွာ ဝီသတိ ယမကာနိ။ ပဋိလောမဝါရေပိ ‘‘န ရူပံ န ခန္ဓော၊ န ခန္ဓာ န ဝေဒနာ’’တိအာဒီနိ ဝီသတိမေဝ။ ဧဝမေတ္ထ စတူသု နယဝါရေသု ဧကံ ယမကသတံ၊ ဒွေ ပုစ္ဆာသတာနိ၊ ဧကေကပုစ္ဆာယ သန္နိဋ္ဌာနသံသယဝသေန ဒွေ ဒွေ အတ္ထေ ကတွာ စတ္တာရိ စ အတ္ထသတာနိ ဥဒ္ဒိဋ္ဌာနီတိ ဝေဒိတဗ္ဗာနိ။

ဧဝမေတိဿာ ပါဠိဝဝတ္ထာနံ ဝိဒိတွာ ဣဒါနိ အနုတ္တာနပဒတ္ထာနုသာရေန ဝိဘင်္ဂနယသဟိတသင်္ခေပတ္ထဝဏ္ဏနာနယော ဧဝံ ဝေဒိတဗ္ဗော။ ပဉ္စက္ခန္ဓာတိ အယံ ယမကဝသေန ပုစ္ဆိတဗ္ဗာနံ ခန္ဓာနံ ဥဒ္ဒေသော။ ရူပက္ခန္ဓော…ပေ… ဝိညာဏက္ခန္ဓောတိ တေသညေဝ ပဘေဒတော နာမဝဝတ္ထာနံ။ တတော ပရံ ပဒသောဓနဝါရာဒယော စတ္တာရော နယဝါရာ။ တတ္ထ ရူပံ ရူပက္ခန္ဓောတိ ယံ ကိဉ္စိ ‘‘ရူပ’’န္တိ ဝုစ္စတိ၊ သဗ္ဗံ တံ ‘‘ရူပက္ခန္ဓော’’တိ ပုစ္ဆတီတိ ဝစနသောဓနတ္ထံ ပုစ္ဆာ။ တဿာ စ ‘‘ပိယရူပံ သာတရူပံ ရူပံ န ရူပက္ခန္ဓော၊ ရူပက္ခန္ဓော ရူပဉ္စေဝ ရူပက္ခန္ဓော စာ’’တိ ဣဒံ နိဒ္ဒေသနယေန ဝိဿဇ္ဇနံ။ တတ္ထ ပိယရူပံ သာတရူပန္တိအာဒီသု ယံ ‘‘ရူပ’’န္တိ ဝုတ္တံ၊ တံ ရူပမေဝ န ရူပက္ခန္ဓော။ ယော ပန ‘‘ရူပက္ခန္ဓော’’တိ ဝုတ္တော၊ သော ‘‘ရူပ’’န္တိပိ ‘‘ရူပက္ခန္ဓော’’တိပိ ဝတ္တုံ ဝဋ္ဋတီတိ အတ္ထော။ ရူပက္ခန္ဓော ရူပန္တိ ဧတ္ထ ပန ‘‘အာမန္တာ’’တိ ဝိဿဇ္ဇနံ ရူပက္ခန္ဓဿ နိယမေန ရူပန္တိ ဝတ္တဗ္ဗတ္တာ။ ဝေဒနာ ဝေဒနာက္ခန္ဓောတိ ပုစ္ဆာယ၊ ဝေဒနာက္ခန္ဓော ဝေဒနာတိ ပုစ္ဆာယ စ ‘‘အာမန္တာ’’တိ ဝိဿဇ္ဇနံ။ သညာသညာက္ခန္ဓောတိ ပုစ္ဆာယ ‘‘ပပဉ္စသညာ’’တိအာဒီသု အာဂတာ ဒိဋ္ဌိသညာ သညာ န သညာက္ခန္ဓော၊ သညာက္ခန္ဓော သညာ စေဝ သညာက္ခန္ဓော စာတိ ဝိဿဇ္ဇနံ။ သညာက္ခန္ဓော သညာတိ ပုစ္ဆာယ စ ‘‘အာမန္တာ’’တိ ဝိဿဇ္ဇနံ။ သင်္ခါရာ သင်္ခါရက္ခန္ဓောတိ ပုစ္ဆာယ ‘‘အနိစ္စာ ဝတ သင်္ခါရာ’’တိအာဒီသု အာဂတော သင်္ခါရက္ခန္ဓော၊ တတော အဝသေသာ သင်္ခတဓမ္မာ သင်္ခါရာ န သင်္ခါရက္ခန္ဓောတိ ဝိဿဇ္ဇနံ။ သင်္ခါရက္ခန္ဓော သင်္ခါရာတိ ပုစ္ဆာယ ‘‘အာမန္တာ’’တိ ဝိဿဇ္ဇနံ။ ဝိညာဏံဝိညာဏက္ခန္ဓောတိ ပုစ္ဆာယ၊ ဝိညာဏက္ခန္ဓော ဝိညာဏန္တိ ပုစ္ဆာယ စ ‘‘အာမန္တာ’’တိ ဝိဿဇ္ဇနံ။

ပဋိလောမဝါရေ န ရူပံ န ရူပက္ခန္ဓောတိ ပုစ္ဆာယ ‘‘အာမန္တာ’’တိ ဝိဿဇ္ဇနံ။ တဿ ရူပ-သဒ္ဒဝစနီယာ ဓမ္မာ ရူပက္ခန္ဓော န ဟောန္တီတိ အတ္ထော။ န ရူပက္ခန္ဓော န ရူပန္တိ ပုစ္ဆာယ ရူပက္ခန္ဓဝိရဟိတာ ‘‘ပိယရူပံ သာတရူပ’’န္တိ ဝုတ္တာ ဓမ္မာ န ရူပက္ခန္ဓော၊ ရူပံ၊ ပိယရူပသာတရူပရူပက္ခန္ဓဝိရဟိတာ ပန ဓမ္မာ န ရူပက္ခန္ဓော စေဝ န ရူပဉ္စာတိ ဝိဿဇ္ဇနံ။ န ဝေဒနာ န ဝေဒနာက္ခန္ဓောတိ ပုစ္ဆာယ၊ န ဝေဒနာက္ခန္ဓော န ဝေဒနာတိ ပုစ္ဆာယ၊ န သညာ န သညာက္ခန္ဓောတိ ပုစ္ဆာယ စ ‘‘အာမန္တာ’’တိ ဝိဿဇ္ဇနံ။ န သင်္ခါရာ န သင်္ခါရက္ခန္ဓောတိ ပုစ္ဆာယ ‘‘အာမန္တာ’’တိ ဝိဿဇ္ဇနံ။ န သညာက္ခန္ဓော န သညာတိ ပုစ္ဆာယ ပန ဒိဋ္ဌိသညာ န သညာက္ခန္ဓော၊ သညာ၊ တံ ဒိဋ္ဌိသညံ၊ သညာက္ခန္ဓဉ္စ ဌပေတွာ အဝသေသာ န စေဝ သညာ န စ သညာက္ခန္ဓောတိ ဝိဿဇ္ဇနံ။ န သင်္ခါရာ န သင်္ခါရက္ခန္ဓောတိ ပုစ္ဆာယ ‘‘အာမန္တာ’’တိ ဝိဿဇ္ဇနံ။ န သင်္ခါရက္ခန္ဓော န သင်္ခါရာတိ ပုစ္ဆာယ သင်္ခါရက္ခန္ဓံ ဌပေတွာ အဝသေသသင်္ခတဓမ္မာ န သင်္ခါရက္ခန္ဓော၊ သင်္ခါရာ၊ အသင်္ခတာ ပန ဓာတု န စေဝ သင်္ခါရာ န စ သင်္ခါရက္ခန္ဓောတိ ဝိဿဇ္ဇနံ။ န ဝိညာဏံ န ဝိညာဏက္ခန္ဓောတိ ပုစ္ဆာယ၊ န ဝိညာဏက္ခန္ဓော န ဝိညာဏန္တိ ပုစ္ဆာယ စ ‘‘အာမန္တာ’’တိ ဝိဿဇ္ဇနံ။ ဣမိနာဝ နယေန ဣတော ပရေသုပိ သဗ္ဗတ္ထ ဝိဿဇ္ဇနနယော ဝေဒိတဗ္ဗော၊ ဝိသေသမတ္တမေဝ ပန ဝက္ခာမ။

ပဒသောဓနမူလစက္ကဝါရေ ပန အယံ ဝိသေသော – ခန္ဓာ ဝေဒနာက္ခန္ဓောတိ ယေ ကေစိ ခန္ဓာ၊ သဗ္ဗေ တေ ဝေဒနာက္ခန္ဓောတိ ပုစ္ဆာ။ တဿာ ‘‘ဝေဒနာက္ခန္ဓော ခန္ဓော စေဝ ဝေဒနာက္ခန္ဓော စ၊ အဝသေသာ ပန ခန္ဓာ၊ န ဝေဒနာက္ခန္ဓော’’တိ ဝိဿဇ္ဇနံ။ သေသေသုပိ ဧသေဝ နယော။ ပဋိလောမေ ပန န ခန္ဓာ န ဝေဒနာက္ခန္ဓောတိ ပုစ္ဆာယ ‘‘အာမန္တာ’’တိ ဝိဿဇ္ဇနံ။ ဧတ္ထ စ ယေ ပညတ္တိနိဗ္ဗာနသင်္ခါတာ ဓမ္မာ ခန္ဓာပိ န ဟောန္တိ၊ တေ ယသ္မာ ဝေဒနာက္ခန္ဓောပိ န ဟောတိ၊ တသ္မာ ‘‘အာမန္တာ’’တိ ဝိဿဇ္ဇနံ၊ သေသံ သုဝိညေယျမေဝ။ ပဒသောဓနမူလစက္ကဝါရော။

သုဒ္ဓခန္ဓဝါရေ ပန ‘‘ရူပံ ခန္ဓော’’တိ ပုစ္ဆာယ ‘‘အာမန္တာ’’တိ ဝိဿဇ္ဇနံ ပိယရူပါဒီနဉ္စ ပဉ္စသု ခန္ဓေသု သင်္ဂဟိတတ္တာ။ ‘‘ခန္ဓာ ရူပ’’န္တိအာဒီသု ယေ ကေစိ ခန္ဓာ၊ သဗ္ဗေ တေ ရူပက္ခန္ဓောတိအာဒိနာ အတ္ထော ဂဟေတဗ္ဗော။ တေနေဝ ဟိဿ နိဒ္ဒေသေ ‘‘ခန္ဓာ ရူပ’’န္တိအာဒိနာ ပဒံ အနုဒ္ဓရိတွာ ‘‘ခန္ဓာ ရူပက္ခန္ဓော’’တိအာဒိနာ အတ္ထဝသေနေဝ ပဒံ ဥဒ္ဓရိတွာ ‘‘ရူပက္ခန္ဓော ခန္ဓော စေဝ ရူပက္ခန္ဓော စ၊ အဝသေသာ ခန္ဓာ၊ န ရူပက္ခန္ဓော’’တိ ဝိဿဇ္ဇနံ ကတံ။ တေနေဝ စ ကာရဏေန သုဒ္ဓခန္ဓဝါရောတိ ဝုတ္တော။ ဝစနသောဓနေ ဝိယ ဟိ ဧတ္ထ န ဝစနံ ပမာဏံ၊ ယထာ ပန သုဒ္ဓခန္ဓာ လဗ္ဘန္တိ၊ တထာ တထာ အတ္ထောဝ ပမာဏံ။ ပရတော အာယတနယမကမာတိကာဒီသုပိ ဧသေဝ နယော။ ပဋိလောမေ ‘‘န ရူပံ န ခန္ဓော’’တိ ယံ ဓမ္မဇာတံ ရူပံ န ဟောတိ၊ တံ ခန္ဓောပိ န ဟောတီတိ ပုစ္ဆာ၊ တဿာ ‘‘ရူပက္ခန္ဓဝိရဟိတာ ခန္ဓာ၊ န ရူပံ၊ တထာ နိဗ္ဗာနံ န ပန ရူပဉ္စေဝ န ခန္ဓော စာ’’တိ ဝိဿဇ္ဇနံ။ သေသံ သုဝိညေယျမေဝ။ သုဒ္ဓခန္ဓဝါရော။

သုဒ္ဓခန္ဓမူလစက္ကဝါရေပိ ‘‘ခန္ဓာ ဝေဒနာက္ခန္ဓော’’တိအာဒိနာ ဟေဋ္ဌာ ဝုတ္တနယေန အတ္ထော ဝေဒိတဗ္ဗောတိ အယံ ပဏ္ဏတ္တိဝါရေ နယော။

ယသ္မာ ပန နိဒ္ဒေသေ ဣမိဿာ ပန မာတိကာယ ပဏ္ဏတ္တိဝါရသင်္ခါတံ နိဒ္ဒေသံ ဝတွာ တတော ဣမံ မာတိကာက္ကမံ မုဉ္စိတွာ အပရေန ပရိယာယေန အညေပိ ဥဒ္ဒေသဝါရဝိရဟိတာ ‘‘ပဝတ္တိဝါရော ပရိညာဝါရော’’တိ ဒွေ မဟာဝါရာ ပုစ္ဆာဝိဿဇ္ဇနဝသေန ဝုတ္တာ၊ တသ္မာ တေသံ ဒွိန္နမ္ပိ ဝါရာနံ နယော ဒဿေတဗ္ဗော။ တတော ပဝတ္တိဝါရေ တာဝ ပါဠိဝဝတ္ထာနပုဗ္ဗိကာ မုခမတ္တပ္ပကာသနာ – ဣမသ္မိံ ဟိ ဥပ္ပာဒဝါရော နိရောဓဝါရော ဥပ္ပာဒနိရောဓဝါရောတိ တယော အန္တရဝါရာ ဟောန္တိ။ တတ္ထ ဥပ္ပာဒဝါရေ တာဝ တိဏ္ဏံ အဒ္ဓါနံ ဝသေန ဆ ကာလဘေဒါ ဟောန္တိ ပစ္စုပ္ပန္နော၊ အတီတော၊ အနာဂတော၊ ပစ္စုပ္ပန္နေနာတီတော၊ ပစ္စုပ္ပန္နေနာနာဂတော၊ အတီတေနာနာဂတောတိ။ ဧဝမေတေသု ဆသု ကာလဘေဒေသု ယွာယံ ပဌမော ပစ္စုပ္ပန္နော၊ တတ္ထ ပုဂ္ဂလတော ဩကာသတော ပုဂ္ဂလောကာသတောတိ တယော ဝါရာ ဟောန္တိ။

တတ္ထ ‘‘ယဿ ရူပက္ခန္ဓော ဥပ္ပဇ္ဇတိ၊ တဿ ဝေဒနာက္ခန္ဓော ဥပ္ပဇ္ဇတီတိ? အသညသတ္တံ ဥပပဇ္ဇန္တာနံ တေသံ ရူပက္ခန္ဓော ဥပ္ပဇ္ဇတိ၊ နော စ တေသံ ဝေဒနာက္ခန္ဓော ဥပ္ပဇ္ဇတိ။ ပဉ္စဝေါကာရံ ဥပပဇ္ဇန္တာနံ တေသံ ရူပက္ခန္ဓော စ ဥပ္ပဇ္ဇတိ၊ ဝေဒနာက္ခန္ဓော စ ဥပ္ပဇ္ဇတိ။ ယဿ ဝါ ပန ဝေဒနာက္ခန္ဓော ဥပ္ပဇ္ဇတိ၊ တဿ ရူပက္ခန္ဓော ဥပ္ပဇ္ဇတီတိ? အရူပံ ဥပပဇ္ဇန္တာနံ တေသံ ဝေဒနာက္ခန္ဓော ဥပ္ပဇ္ဇတိ၊ နော စ တေသံ ရူပက္ခန္ဓော ဥပ္ပဇ္ဇတိ။ ပဉ္စဝေါကာရံ ဥပပဇ္ဇန္တာနံ တေသံ ဝေဒနာက္ခန္ဓော စ ဥပ္ပဇ္ဇတိ၊ ရူပက္ခန္ဓော စ ဥပ္ပဇ္ဇတိ။ ယဿ ရူပက္ခန္ဓော ဥပ္ပဇ္ဇတိ…ပေ… တဿ ဝိညာဏက္ခန္ဓော ဥပ္ပဇ္ဇတိ…ပေ… ယဿ ဝါ ပန ဝိညာဏက္ခန္ဓော ဥပ္ပဇ္ဇတိ၊ တဿ ရူပက္ခန္ဓော ဥပ္ပဇ္ဇတီတိ…ပေ… ပဉ္စဝေါကာရံ …ပေ… ဥပ္ပဇ္ဇတီ’’တိ ဧဝံ ရူပက္ခန္ဓမူလကာနိ စတ္တာရိ၊ ‘‘ယဿ ဝေဒနာက္ခန္ဓော ဥပ္ပဇ္ဇတိ၊ တဿ သညာက္ခန္ဓော ဥပ္ပဇ္ဇတီ’’တိအာဒိနာ စ ဝေဒနာက္ခန္ဓမူလကာနိ တီဏိ၊ သညာက္ခန္ဓမူလကာနိ ဒွေ၊ သင်္ခါရက္ခန္ဓမူလကံ ဧကန္တိ ဧဝမေတာနိ ပစ္စုပ္ပန္နကာလေ ပုဂ္ဂလဝါရေ အနုလောမနယေ ဒသ ယမကာနိ ဟောန္တိ။ တတ္ထ ရူပက္ခန္ဓမူလကေသု စတူသု အာဒိတော ဧကမေဝ ပါဠိယံ ဝိဿဇ္ဇိတံ၊ သေသာနိ တေန သဒိသဝိဿဇ္ဇနာနီတိ တန္တိယာ လဟုဘာဝတ္ထံ သံခိတ္တာနိ။

ဝေဒနာက္ခန္ဓမူလကေ ပန သဗ္ဗတ္ထ ‘‘အာမန္တာ’’တိ ဧကသဒိသမေဝ ဝိဿဇ္ဇနံ။ ဝေဒနာဒီသု ဥပ္ပန္နေသု နိယမေန သညာဒီနံ ဥပ္ပဇ္ဇနတော တတ္ထ သဗ္ဗာနိ သံခိတ္တာနိ။ ယထာ စ ပုဂ္ဂလဝါရေ ဒသ ယမကာနိ၊ ဧဝံ ဩကာသဝါရေပိ ‘‘ယတ္ထ ရူပက္ခန္ဓော ဥပ္ပဇ္ဇတိ၊ တတ္ထ ဝေဒနာက္ခန္ဓော ဥပ္ပဇ္ဇတီတိ? အသညသတ္တေ တတ္ထ…ပေ… ပဉ္စဝေါကာရေ တတ္ထ…ပေ… ဥပ္ပဇ္ဇတီ’’တိအာဒိနာ၊ ပုဂ္ဂလောကာသဝါရေပိ ‘‘ယဿ ယတ္ထ ရူပက္ခန္ဓော ဥပ္ပဇ္ဇတိ၊ တဿ တတ္ထ ဝေဒနာက္ခန္ဓော ဥပ္ပဇ္ဇတီတိ? အသညသတ္တံ…ပေ… ပဉ္စဝေါကာရံ…ပေ… ဥပ္ပဇ္ဇတီ’’တိအာဒိနာ။ ပစ္စုပ္ပန္နကာလေ တီသု ဝါရေသု အနုလောမနယေ တိံသ ယမကာ ဟောန္တိ။ ယထာ အနုလောမနယေ တိံသ၊ ဧဝံ ပဋိလောမနယေပိ ‘‘ယဿ ရူပက္ခန္ဓော နုပ္ပဇ္ဇတိ၊ တဿ ဝေဒနာက္ခန္ဓော နုပ္ပဇ္ဇတီတိ? အရူပံ ဥပပဇ္ဇန္တာနံ တေသံ ရူပက္ခန္ဓော နုပ္ပဇ္ဇတိ၊ နော စ တေသံ ဝေဒနာက္ခန္ဓော နုပ္ပဇ္ဇတိ။ သဗ္ဗေသံ စဝန္တာနံ တေသံ ရူပက္ခန္ဓော စ နုပ္ပဇ္ဇတိ ဝေဒနာက္ခန္ဓော စ နုပ္ပဇ္ဇတိ။ ယဿ ဝါ ပန ဝေဒနာက္ခန္ဓော နုပ္ပဇ္ဇတိ၊ တဿ ရူပက္ခန္ဓော နုပ္ပဇ္ဇတီတိ? အသညသတ္တံ ဥပပဇ္ဇန္တာနံ တေသံ ဝေဒနာက္ခန္ဓော နုပ္ပဇ္ဇတိ၊ နော စ တေသံ ရူပက္ခန္ဓော နုပ္ပဇ္ဇတိ။ သဗ္ဗေသံ စဝန္တာနံ တေသံ ဝေဒနာက္ခန္ဓော စ နုပ္ပဇ္ဇတိ ရူပက္ခန္ဓော စ နုပ္ပဇ္ဇတီ’’တိအာဒိနာ၊ ‘‘ယတ္ထ ရူပက္ခန္ဓော နုပ္ပဇ္ဇတိ၊ တတ္ထ ဝေဒနာက္ခန္ဓော နုပ္ပဇ္ဇတီတိ? ဥပ္ပဇ္ဇတိ။ ယတ္ထ ဝါ ပန…ပေ… နုပ္ပဇ္ဇတီတိ? ဥပ္ပဇ္ဇတီ’’တိအာဒိနာ စ၊ ‘‘ယဿ ယတ္ထ ရူပက္ခန္ဓော နုပ္ပဇ္ဇတိ၊ တဿ တတ္ထ ဝေဒနာက္ခန္ဓော နုပ္ပဇ္ဇတီတိ…ပေ… သဗ္ဗေသံ စဝန္တာနံ တဒုဘယံ နုပ္ပဇ္ဇတီ’’တိအာဒိနာ စာတိ တိံသ ယမကာ။ ဧဝံ ပစ္စုပ္ပန္နကာလေ သဋ္ဌိ ယမကာနိ၊ တဒ္ဒိဂုဏာ ပုစ္ဆာ၊ တဒ္ဒိဂုဏာ စ အတ္ထာ ဝေဒိတဗ္ဗာ။

တတ္ထ ယဿ ရူပက္ခန္ဓော ဥပ္ပဇ္ဇတီတိ ယဿ ပုဂ္ဂလဿ ပဋိသန္ဓိက္ခဏေ ရူပက္ခန္ဓော ဥပ္ပဇ္ဇတိ။ တဿ ဝေဒနာက္ခန္ဓောတိ ဝေဒနာက္ခန္ဓောပိ တဿ တသ္မိံယေဝ ခဏေ ဥပ္ပဇ္ဇတီတိ အတ္ထော ဣမိနာဝ နယေန။ တတ္ထ အသညသတ္တန္တိ အသညတ္တဘဝံ ပဋိသန္ဓိဝသေန ဥပပဇ္ဇန္တာနံ တေသံ ဥပ္ပဇ္ဇနက္ခဏေ ရူပက္ခန္ဓော ဥပ္ပဇ္ဇတိ၊ နော စ တေသံ အစိတ္တကတ္တာ ဝေဒနာက္ခန္ဓော ဥပ္ပဇ္ဇတီတိ အတ္ထော ။ ဣမိနာဝ နယေန ‘‘ယဿ ဝါ ပန ဝေဒနာက္ခန္ဓော’’တိအာဒိကေသု ပုစ္ဆာဝိဿဇ္ဇနေသု၊ တတော ပရေသုပိ သဗ္ဗတ္ထ အတ္ထော ဝေဒိတဗ္ဗော။

ဣဒံ ပနေတ္ထ ဥပ္ပာဒနိရောဓေသု နိယမလက္ခဏံ – သကလေပိ ဟိ ဣမသ္မိံ ခန္ဓယမကေ တတ္ထ တတ္ထ ဥပ္ပန္နာနံ သတ္တာနံ ပဝတ္တေ ယာဝ မရဏာ ဝါ ခန္ဓာနံ အပရိယန္တေသု ဥပ္ပာဒနိရောဓေသု ဝိဇ္ဇမာနေသုပိ လဟုပရိဝတ္တာနံ ဓမ္မာနံ ဝိနိဗ္ဘောဂံ ကတွာ ဥပ္ပာဒနိရောဓေ ဒဿေတုံ န သုကရန္တိ ပဝတ္တိယံ ဥပ္ပာဒနိရောဓေ အနာမသိတွာ ပဋိသန္ဓိဥပ္ပာဒဝသေနေဝ ဥပ္ပာဒဝါရော၊ နိရောဓမရဏကာလေ နိရောဓဝသေနေဝ စ နိရောဓဝါရော ကထိတော။ ဧဝမေတ္ထ ဥပ္ပာဒနိရောဓေသု နိယမလက္ခဏံ ဝိဒိတွာ ပဋိသန္ဓိဥပ္ပာဒမေဝ စ စုတိနိရောဓမေဝ စ ဂဟေတွာ တေသု တေသု ဌာနေသု အာဂတာနံ ပုစ္ဆာဝိဿဇ္ဇနာနံ အတ္ထဝိနိစ္ဆယော ဝေဒိတဗ္ဗော။

ပဋိလောမနယေ ပန သဗ္ဗေသံ စဝန္တာနန္တိ မရဏစိတ္တဿ ဘင်္ဂက္ခဏသမန္နာဂတာနံ။ တေသံ ဟိ တတ္ထ ရူပက္ခန္ဓော နုပ္ပဇ္ဇတိ၊ ဝေဒနာက္ခန္ဓော စ စုတိစိတ္တဿ ဥပ္ပတ္တိက္ခဏေ ဧဝ ဥပ္ပန္နတ္တာ။ ‘‘ယတ္ထ ရူပက္ခန္ဓော နုပ္ပဇ္ဇတိ၊ တတ္ထ ဝေဒနာက္ခန္ဓော နုပ္ပဇ္ဇတီ’’တိ ပုစ္ဆာယ အရူပဘဝံ သန္ဓာယ ‘‘ဥပ္ပဇ္ဇတီ’’တိ ဣဒံ ဝိဿဇ္ဇနံ ကတံ၊ အနန္တရပုစ္ဆာယ အသညိဘဝံ သန္ဓာယ ‘‘ဥပ္ပဇ္ဇတီ’’တိ ဣဒံ ဝိဿဇ္ဇနန္တိ ဝေဒိတဗ္ဗံ။ သေသံ သုဝိညေယျမေဝါတိ အယံ ပစ္စုပ္ပန္နကာလေ နယော။

ယထာ စ ပစ္စုပ္ပန္နကာလေ သဋ္ဌိ ယမကာဒီနိ၊ ဧဝံ သေသေသုပိ ပဉ္စသု ကာလဘေဒေသု ပစ္စေကန္တိ ဂဟေတဗ္ဗံ။ ပုစ္ဆာဝိဿဇ္ဇနေသု ပနေတ္ထ ကိဉ္စာပိ ‘‘ယဿ ရူပက္ခန္ဓော ဥပ္ပဇ္ဇိတ္ထ၊ တဿ ဝေဒနာက္ခန္ဓော ဥပ္ပဇ္ဇိတ္ထာတိ? အာမန္တာ’’တိအာဒိနာ၊ ‘‘ယတ္ထ ရူပက္ခန္ဓော ဥပ္ပဇ္ဇိတ္ထ၊ တတ္ထ ဝေဒနာက္ခန္ဓော ဥပ္ပဇ္ဇိတ္ထာတိ? ပဉ္စဝေါကာရေ ဥပ္ပဇ္ဇိတ္ထ၊ နာညတ္ထာ’’တိအာဒိနာ စ၊ ‘‘ယဿ ယတ္ထ ရူပက္ခန္ဓော ဥပ္ပဇ္ဇိတ္ထ၊ တဿ တတ္ထ ဝေဒနာက္ခန္ဓော ဥပ္ပဇ္ဇိတ္ထာတိ? ပဉ္စဝေါကာရာနံ တေသံ တတ္ထ ဥပ္ပဇ္ဇိတ္ထ၊ နာညတ္ထာ’’တိအာဒိနာ စ အတီတကာလေ အနုလောမနယေ၊ ‘‘ယဿ ရူပက္ခန္ဓော နုပ္ပဇ္ဇိတ္ထ၊ တဿ ဝေဒနာက္ခန္ဓော နုပ္ပဇ္ဇိတ္ထာတိ? နတ္ထီ’’တိအာဒိနာ၊ ‘‘ယတ္ထ ရူပက္ခန္ဓော နုပ္ပဇ္ဇိတ္ထ၊ တတ္ထ ဝေဒနာက္ခန္ဓော နုပ္ပဇ္ဇိတ္ထာတိ? ဥပ္ပဇ္ဇိတ္ထာ’’တိအာဒိနာ၊ ‘‘ယဿ ယတ္ထ ရူပက္ခန္ဓော နုပ္ပဇ္ဇိတ္ထ၊ တဿ တတ္ထ ဝေဒနာက္ခန္ဓော နုပ္ပဇ္ဇိတ္ထာတိ? အရူပါနံ တေသံ တတ္ထ ရူပက္ခန္ဓော နုပ္ပဇ္ဇိတ္ထ၊ နော စ တေသံ…ပေ… သုဒ္ဓါဝါသာနံ တေသံ တတ္ထ တဒုဘယံ နုပ္ပဇ္ဇိတ္ထာ’’တိအာဒိနာ တီသု ဝါရေသု ပဋိလောမနယေ စ၊

‘‘ယဿ ရူပက္ခန္ဓော ဥပ္ပဇ္ဇိဿတိ၊ တဿ ဝေဒနာက္ခန္ဓော ဥပ္ပဇ္ဇိဿတီတိ? အာမန္တာ’’တိအာဒိနာ၊ ‘‘ယတ္ထ ရူပက္ခန္ဓော ဥပ္ပဇ္ဇိဿတိ၊ တတ္ထ ဝေဒနာက္ခန္ဓော ဥပ္ပဇ္ဇိဿတီတိ…ပေ… ပဉ္စဝေါကာရေ ဥပ္ပဇ္ဇိဿတီ’’တိအာဒိနာ၊ ‘‘ယဿ ယတ္ထ ရူပက္ခန္ဓော ဥပ္ပဇ္ဇိဿတိ၊ တဿ တတ္ထ ဝေဒနာက္ခန္ဓော ဥပ္ပဇ္ဇိဿတိ…ပေ… ပဉ္စဝေါကာရာနံ တေသံ တတ္ထ ဥပ္ပဇ္ဇိဿတီ’’တိအာဒိနာ စ အနာဂတကာလေ အနုလောမနယေ၊ ‘‘ယဿ ရူပက္ခန္ဓော နုပ္ပဇ္ဇိဿတိ၊ တဿ ဝေဒနာက္ခန္ဓော နုပ္ပဇ္ဇိဿတီတိ? ယေ အရူပံ ဥပပဇ္ဇိတွာ ပရိနိဗ္ဗာယိဿန္တိ၊ တေသံ ရူပက္ခန္ဓော နုပ္ပဇ္ဇိဿတိ၊ နေတရော၊ ပစ္ဆိမဘဝိကာနံ တဒုဘယံ နုပ္ပဇ္ဇိဿတီ’’တိအာဒိနာ၊ ‘‘ယတ္ထ ရူပက္ခန္ဓော နုပ္ပဇ္ဇိဿတိ၊ တတ္ထ ဝေဒနာက္ခန္ဓော နုပ္ပဇ္ဇိဿတီ’’တိအာဒိနာ၊ ‘‘ယဿ ယတ္ထ ရူပက္ခန္ဓော နုပ္ပဇ္ဇိဿတိ၊ တဿ တတ္ထ ဝေဒနာက္ခန္ဓော နုပ္ပဇ္ဇိဿတီတိ? အရူပါနံ တေသံ တတ္ထ ရူပက္ခန္ဓော နုပ္ပဇ္ဇိဿတိ၊ နေတရော၊ ပစ္ဆိမဘဝိကာနံ တဒုဘယံ နုပ္ပဇ္ဇိဿတီ’’တိအာဒိနာ ပဋိလောမနယေ စ၊

‘‘ယဿ ရူပက္ခန္ဓော ဥပ္ပဇ္ဇတိ၊ တဿ ဝေဒနာက္ခန္ဓော ဥပ္ပဇ္ဇိတ္ထာ’’တိအာဒိနာ၊ ‘‘ယတ္ထ ရူပက္ခန္ဓော ဥပ္ပဇ္ဇတိ၊ တတ္ထ ဝေဒနာက္ခန္ဓော ဥပ္ပဇ္ဇိတ္ထာတိ…ပေ… ပဉ္စဝေါကာရေ ဥပ္ပဇ္ဇတီ’’တိအာဒိနာ၊ ‘‘ယဿ ယတ္ထ ရူပက္ခန္ဓော ဥပ္ပဇ္ဇတိ၊ တဿ တတ္ထ ဝေဒနာက္ခန္ဓော ဥပ္ပဇ္ဇိတ္ထာတိ? သုဒ္ဓါဝါသံ အသညသတ္တံ ဥပပဇ္ဇန္တာနံ တေသံ တတ္ထ ရူပက္ခန္ဓော ဥပ္ပဇ္ဇတိ၊ နော စ တေသံ တတ္ထ ဝေဒနာက္ခန္ဓော ဥပ္ပဇ္ဇိတ္ထ၊ ပဉ္စဝေါကာရေ ပန ဥပ္ပဇ္ဇိတ္ထာ’’တိအာဒိနာ ပစ္စုပ္ပန္နေန အတီတကာလေ အနုလောမနယေ၊ ‘‘ယဿ ရူပက္ခန္ဓော နုပ္ပဇ္ဇတိ၊ တဿ ဝေဒနာက္ခန္ဓော နုပ္ပဇ္ဇိတ္ထာ’’တိအာဒိနာ၊ ‘‘ယတ္ထ ရူပက္ခန္ဓော နုပ္ပဇ္ဇတိ၊ တတ္ထ ဝေဒနာက္ခန္ဓော နုပ္ပဇ္ဇိတ္ထာတိ? ဥပ္ပဇ္ဇိတ္ထာ’’တိအာဒိနာ၊ ‘‘ယဿ ယတ္ထ ရူပက္ခန္ဓော နုပ္ပဇ္ဇတိ ၊ တဿ တတ္ထ ဝေဒနာက္ခန္ဓော နုပ္ပဇ္ဇိတ္ထာတိ? ပဉ္စဝေါကာရာ စဝန္တာနံ အရူပါနဉ္စ တေသံ တတ္ထ ရူပက္ခန္ဓော နုပ္ပဇ္ဇတိ၊ နော စ တေသံ တတ္ထ ဝေဒနာက္ခန္ဓော နုပ္ပဇ္ဇိတ္ထ၊ သုဒ္ဓါဝါသေ ပရိနိဗ္ဗန္တာနံ အသညသတ္တာ စဝန္တာနံ တေသံ တတ္ထ ရူပက္ခန္ဓော စ နုပ္ပဇ္ဇတိ ဝေဒနာက္ခန္ဓော စ နုပ္ပဇ္ဇိတ္ထာ’’တိအာဒိနာ ပဋိလောမနယေ စ၊

‘‘ယဿ ရူပက္ခန္ဓော ဥပ္ပဇ္ဇတိ၊ တဿ ဝေဒနာက္ခန္ဓော ဥပ္ပဇ္ဇိဿတီတိ? ပစ္ဆိမဘဝိကာနံ ပဉ္စဝေါကာရံ ဥပပဇ္ဇန္တာနံ တေသံ ရူပက္ခန္ဓော ဥပ္ပဇ္ဇတီ’’တိအာဒိနာ၊ ‘‘ယတ္ထ ရူပက္ခန္ဓော ဥပ္ပဇ္ဇတိ၊ တတ္ထ ဝေဒနာက္ခန္ဓော ဥပ္ပဇ္ဇိဿတီတိ? ပဉ္စဝေါကာရေ…ပေ… ဥပ္ပဇ္ဇိဿတီ’’တိအာဒိနာ စ၊ ‘‘ယဿ ယတ္ထ ရူပက္ခန္ဓော ဥပ္ပဇ္ဇတိ၊ တဿ တတ္ထ ဝေဒနာက္ခန္ဓော ဥပ္ပဇ္ဇိဿတီတိ ? ပစ္ဆိမဘဝိကာနံ ပဉ္စဝေါကာရေ…ပေ… ဥပ္ပဇ္ဇိဿတီ’’တိအာဒိနာ စ ပစ္စုပ္ပန္နေန အနာဂတကာလေ အနုလောမနယေ၊ ‘‘ယဿ ရူပက္ခန္ဓော နုပ္ပဇ္ဇတိ၊ တဿ ဝေဒနာက္ခန္ဓော နုပ္ပဇ္ဇိဿတီတိ ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ…ပေ… နုပ္ပဇ္ဇိဿတီ’’တိအာဒိနာ၊ ‘‘ယတ္ထ ရူပက္ခန္ဓော နုပ္ပဇ္ဇတိ၊ တတ္ထ ဝေဒနာက္ခန္ဓော နုပ္ပဇ္ဇိဿတီတိ? ဥပ္ပဇ္ဇိဿတီ’’တိအာဒိနာ၊ ‘‘ယဿ ယတ္ထ ရူပက္ခန္ဓော နုပ္ပဇ္ဇတိ၊ တဿ တတ္ထ ဝေဒနာက္ခန္ဓော နုပ္ပဇ္ဇိဿတီတိ…ပေ… ပဉ္စဝေါကာရေ ပရိနိဗ္ဗန္တာနံ အရူပေ ပစ္ဆိမဘဝိကာနံ အသညသတ္တာ စဝန္တာနံ တေသံ တတ္ထ…ပေ… နုပ္ပဇ္ဇိဿတီ’’တိအာဒိနာ ပဋိလောမနယေ စ၊

‘‘ယဿ ရူပက္ခန္ဓော ဥပ္ပဇ္ဇိတ္ထ၊ တဿ ဝေဒနာက္ခန္ဓော ဥပ္ပဇ္ဇိဿတီတိ? ပစ္ဆိမဘဝိကာနံ ဥပ္ပဇ္ဇိဿတီ’’တိအာဒိနာ၊ ‘‘ယတ္ထ ရူပက္ခန္ဓော ဥပ္ပဇ္ဇိတ္ထ၊ တတ္ထ ဝေဒနာက္ခန္ဓော ဥပ္ပဇ္ဇိဿတီတိ…ပေ… ပဉ္စဝေါကာရေ ဥပ္ပဇ္ဇိဿတီ’’တိအာဒိနာ၊ ‘‘ယဿ ယတ္ထ ရူပက္ခန္ဓော ဥပ္ပဇ္ဇိတ္ထ၊ တဿ တတ္ထ ဝေဒနာက္ခန္ဓော ဥပ္ပဇ္ဇိဿတီတိ? ပဉ္စဝေါကာရေ ပစ္ဆိမဘဝိကာနံ အသညသတ္တာနံ…ပေ… ဥပ္ပဇ္ဇိဿတီ’’တိအာဒိနာ အတီတေန အနာဂတကာလေ အနုလောမနယေ၊ ‘‘ယဿ ရူပက္ခန္ဓော ဥပ္ပဇ္ဇိတ္ထ၊ တဿ ဝေဒနာက္ခန္ဓော ဥပ္ပဇ္ဇိဿတီတိ? နတ္ထီ’’တိအာဒိနာ၊ ‘‘ယတ္ထ ရူပက္ခန္ဓော နုပ္ပဇ္ဇိတ္ထ၊ တတ္ထ ဝေဒနာက္ခန္ဓော နုပ္ပဇ္ဇိဿတီတိ? ဥပ္ပဇ္ဇိဿတီ’’တိအာဒိနာ၊ ‘‘ယဿ ယတ္ထ ရူပက္ခန္ဓော နုပ္ပဇ္ဇိတ္ထ၊ တဿ တတ္ထ ဝေဒနာက္ခန္ဓော နုပ္ပဇ္ဇိဿတီတိ…ပေ… သုဒ္ဓါဝါသာနံ အရူပေ ပစ္ဆိမဘဝိကာနံ တေသံ တတ္ထ ရူပက္ခန္ဓော စ နုပ္ပဇ္ဇိတ္ထ ဝေဒနာက္ခန္ဓော စ နုပ္ပဇ္ဇိဿတီ’’တိအာဒိနာ ပဋိလောမနယေ စ သုဒ္ဓါ အတ္ထဝိသေသာ ဥပလဗ္ဘန္တိ။ တထာပိ ဂန္ထဝိတ္ထာရဘယေန အနဝသေသတော န ဒဿယိဿာမ၊ ဒဿိတနယေနေဝ သဗ္ဗတ္ထ ပုစ္ဆာဝိဿဇ္ဇနံ သက္ကာ ပဏ္ဍိတေန ဉာတုန္တိ အယံ ဥပ္ပာဒဝါရေ နယော။

ယထာ စ ဥပ္ပာဒဝါရေ ဆသု ကာလဘေဒေသု ပစ္စေကံ ပုဂ္ဂလာဒိဘေဒတော အနုလောမပဋိလောမနယုဘယေန ဆ ဆ ဝါရာ၊ ဧကေကသ္မိံ ဝါရေ ဒသ ဒသ ကတွာ သဋ္ဌိ သဋ္ဌိ ယမကာနိ၊ သဗ္ဗာနိပိ သဋ္ဌိအဓိကာနိ တီဏိ ယမကသတာနိ၊ တတော ဒွိဂုဏာ ပုစ္ဆာ၊ ဒွိဂုဏာ အတ္ထာ စ ဟောန္တိ၊ ဧဝံ နိရောဓဝါရေ ဥပ္ပာဒနိရောဓဝါရေပိ ဝေဒိတဗ္ဗာ။ တတ္ထ စ ‘‘ယဿ ရူပက္ခန္ဓော နိရုဇ္ဈတိ၊ တဿ ဝေဒနာက္ခန္ဓော နိရုဇ္ဈတီတိ…ပေ… ပဉ္စဝေါကာရာ စဝန္တာနံ…ပေ… နိရုဇ္ဈတီ’’တိအာဒိနာ၊ ‘‘ယဿ ရူပက္ခန္ဓော န နိရုဇ္ဈတိ၊ တဿ ဝေဒနာက္ခန္ဓော န နိရုဇ္ဈတီတိ…ပေ… သဗ္ဗေသံ ဥပပဇ္ဇန္တာနံ…ပေ… န နိရုဇ္ဈတီ’’တိအာဒိနာ နိရောဓဝါရေ၊ ‘‘ယဿ ရူပက္ခန္ဓော ဥပ္ပဇ္ဇတိ၊ တဿ ဝေဒနာက္ခန္ဓော နိရုဇ္ဈတီတိ? နော။ ယဿ ရူပက္ခန္ဓော နုပ္ပဇ္ဇတိ၊ တဿ ဝေဒနာက္ခန္ဓော န နိရုဇ္ဈတီတိ…ပေ… အရူပံ ဥပပဇ္ဇန္တာနံ အသညသတ္တာ စဝန္တာနံ တေသံ ရူပက္ခန္ဓော စ နုပ္ပဇ္ဇတိ၊ ဝေဒနာက္ခန္ဓော စ န နိရုဇ္ဈတီ’’တိအာဒိနာ ဥပ္ပာဒနိရောဓဝါရေ စ ဟေဋ္ဌာ ဝုတ္တာနုသာရေန သဗ္ဗတ္ထ ပုစ္ဆာဝိဿဇ္ဇနနယော ဉာတဗ္ဗောတိ အယံ ပဝတ္တိဝါရေ နယော။

ပရိညာဝါရေ ပန ပုဂ္ဂလဝါရာဒီသု တီသု ပုဂ္ဂလဝါရော ဧကောဝ လဗ္ဘတိ၊ န ဩကာသပုဂ္ဂလောကာသဝါရာ သဒိသဝိဿဇ္ဇနတ္တာ။ ယော ဟိ ကောစိ ပုဂ္ဂလော ရူပါဒိံ ပရိဇာနန္တောဝ ၊ ယတ္ထ ကတ္ထစိ နိရုဒ္ဓါပိ တာဒိသောဝ ဟောတိ၊ တသ္မာ ဆသု ကာလဘေဒေသု အနုလောမတော ပုဂ္ဂလဝသေန ဒွေ ဒွေ ဝါရာ၊ ဧကေကသ္မိံ ဝါရေ ဒသ ဒသ ကတွာ ဝီသတိ ဝီသတိ ယမကာနီတိ ဝီသံ ယမကသတံ၊ တဒ္ဒိဂုဏာ ပုစ္ဆာ၊ တဒ္ဒိဂုဏာ စ အတ္ထာ ဝေဒိတဗ္ဗာ။ တတ္ထ စ ‘‘ယော ရူပက္ခန္ဓံ ပရိဇာနာတိ၊ သော ဝေဒနာက္ခန္ဓံ ပရိဇာနာတီတိ? အာမန္တာ’’တိအာဒိနာ စ၊ ‘‘ယော ရူပက္ခန္ဓံ န ပရိဇာနာတိ၊ သော ဝေဒနာက္ခန္ဓံ န ပရိဇာနာတီတိ? အာမန္တာ’’တိ အာဒိနာ စ အနုလောမပဋိလောမတော အာဒိတော တီသု ကာလေသု သဗ္ဗပုစ္ဆာနံ ‘‘အာမန္တာ အာမန္တာ’’တွေဝ ဝိဿဇ္ဇနံ။ ဣတရေသု ပန တီသု မိဿကကာလေသု ‘‘ယော ရူပက္ခန္ဓံ ပရိဇာနာတိ၊ သော ဝေဒနာက္ခန္ဓံ ပရိဇာနိတ္ထာတိ? နော။ ယော ဝါ ပန…ပေ… နော’’တိ ဧဝံ ဣတရကာလဒွယေပိ အနုလောမနယေ ‘‘နော နော’’တွေဝ ဝိဿဇ္ဇနံ။

ပဋိလောမနယေ ပန ‘‘ယော ရူပက္ခန္ဓံ န ပရိဇာနာတိ၊ သော ဝေဒနာက္ခန္ဓံ န ပရိဇာနိတ္ထာတိ? အရဟာ ရူပက္ခန္ဓံ န ပရိဇာနာတိ၊ နော စ သော ဝေဒနာက္ခန္ဓံ န ပရိဇာနိတ္ထ။ အဂ္ဂမဂ္ဂသမင်္ဂိဉ္စ အရဟန္တဉ္စ ဌပေတွာ အဝသေသာ ပုဂ္ဂလာ ရူပက္ခန္ဓဉ္စ န ပရိဇာနန္တိ၊ ဝေဒနာက္ခန္ဓဉ္စ န ပရိဇာနိံသူ’’တိအာဒိနာ၊ ‘‘ယော ရူပက္ခန္ဓံ န ပရိဇာနာတိ၊ သော ဝေဒနာက္ခန္ဓံ န ပရိဇာနိဿတီတိ? ယေ မဂ္ဂံ ပဋိလဘိဿန္တိ၊ တေ ရူပက္ခန္ဓံ န ပရိဇာနန္တိ၊ နော စ ဝေဒနာက္ခန္ဓံ န ပရိဇာနိဿန္တိ။ အရဟာ ယေ စ ပုထုဇ္ဇနာ မဂ္ဂံ န ပဋိလဘိဿန္တိ၊ တေ ရူပက္ခန္ဓဉ္စ န ပရိဇာနန္တိ၊ ဝေဒနာက္ခန္ဓဉ္စ န ပရိဇာနိဿန္တီ’’တိအာဒိနာ စ၊ ‘‘ယော ရူပက္ခန္ဓံ န ပရိဇာနိတ္ထ၊ သော ဝေဒနာက္ခန္ဓံ န ပရိဇာနိဿန္တီတိ? ယေ မဂ္ဂံ ပဋိလဘိဿန္တိ၊ တေ ရူပက္ခန္ဓံ န ပရိဇာနိံသု၊ နော စ ဝေဒနာက္ခန္ဓံ န ပရိဇာနိဿန္တိ။ အဂ္ဂမဂ္ဂသမင်္ဂီ ယေ စ ပုထုဇ္ဇနာ မဂ္ဂံ န ပဋိလဘိဿန္တိ၊ တေ ရူပက္ခန္ဓဉ္စ န ပရိဇာနိံသု၊ ဝေဒနာက္ခန္ဓဉ္စ န ပရိဇာနိဿန္တီ’’တိအာဒိနာ စ ပုစ္ဆာဝိဿဇ္ဇနနယော ဝေဒိတဗ္ဗော။

ဧတ္ထ စ အတီတာနာဂတပစ္စုပ္ပန္နသင်္ခါတာ တယော အဒ္ဓါ ပဝတ္တိဝါရေ စုတိပဋိသန္ဓိဝသေန န လဗ္ဘန္တိ၊ ပဝတ္တေ စိတ္တက္ခဏဝသေနေဝ လဗ္ဘန္တိ။ လောကုတ္တရမဂ္ဂက္ခဏသ္မိံ ဟိ နိဗ္ဗာနာရမ္မဏေန စိတ္တေန ပဉ္စသု ခန္ဓေသု ပရိညာကိစ္စနိပ္ဖတ္တိယာ ယံ ကဉ္စိ ဧကံ ခန္ဓံ ပရိဇာနန္တော ဣတရမ္ပိ ‘‘ပရိဇာနာတီ’’တိ အနုလောမပဉှေသု ပရိညာကိစ္စဿ မတ္ထကပ္ပတ္တံ အဂ္ဂမဂ္ဂသမင်္ဂိံ သန္ဓာယ ‘‘အာမန္တာ’’တိ ဝိဿဇ္ဇနံ ဝုတ္တံ။ ‘‘န ပရိဇာနာတီ’’တိ ပဋိလောမပဉှေသု ပုထုဇ္ဇနာဒယော သန္ဓာယ ‘‘အာမန္တာ’’တိ ဝိဿဇ္ဇနံ ဝုတ္တန္တိ ဝေဒိတဗ္ဗံ။ ‘‘ပရိဇာနိတ္ထာ’’တိ ဣမသ္မိံ ပန အတီတကာလဝါရေ မဂ္ဂါနန္တရေ အဂ္ဂဖလေ ဌိတောပိ ပရိညာကိစ္စဿ နိဋ္ဌိတတ္တာ ပရိဇာနိတ္ထယေဝ နာမ။ ‘‘ပရိဇာနာတီ’’တိ စ အဂ္ဂမဂ္ဂသမင်္ဂီ ဝုစ္စတိ၊ ‘‘ပရိဇာနိဿန္တီ’’တိ ပုထုဇ္ဇနာဒယော၊ တသ္မာ ယော န ပရိဇာနာတိ၊ သော ပရိဇာနိတ္ထာတိ ဝါ၊ ပရိဇာနိဿတီတိအာဒိနာ ဝါ ဝတ္တုံ အသက္ကုဏေယျတာယ ‘‘အာမန္တာ’’တိ ဝိဿဇ္ဇနံ ကတံ။

ပဋိလောမနယေ ပန ‘‘အဂ္ဂမဂ္ဂသမင်္ဂိဉ္စ အရဟန္တဉ္စ ဌပေတွာ’’တိ ဣဒံ အဂ္ဂမဂ္ဂသမင်္ဂိနော ‘‘န ပရိဇာနာတီ’’တိ ဝစနံ၊ အရဟတော စ ‘‘န ပရိဇာနိတ္ထာ’’တိ ဝတ္တုံ အသက္ကုဏေယျတာယ ဝုတ္တံ၊ ‘‘ယေ စ ပုထုဇ္ဇနာ မဂ္ဂံ န ပဋိလဘိဿန္တီ’’တိ ဣမိနာ အတီတေ ဝိယ အနာဂတေပိ အနန္တကာလံ အမုစ္စနကာ သတ္တာ နာမ အတ္ထီတိ ဒဿေတိ၊ တေ စ အရဟတာ နိဋ္ဌိတပရိညာကိစ္စေန၊ ‘‘န ပရိဇာနိဿန္တီ’’တိ ဝတ္တဗ္ဗတံ ဝါ အာပန္နေန သမကာ ဇာတာ၊ သဗ္ဗတ္ထ စ ဧကံ ခန္ဓံ ပရိဇာနန္တော သဗ္ဗံ ပရိဇာနာတိ၊ အပရိဇာနန္တောပိ စ သဗ္ဗံ န ပရိဇာနာတီတိ ဝေဒိတဗ္ဗန္တိ အယံ ခန္ဓယမကမာတိကတ္ထသံဝဏ္ဏနာနယော။

အာယတနယမကမာတိကတ္ထဝဏ္ဏနာ

အာယတနယမကမာတိကာယ ပန ပါဠိဝဝတ္ထာနာဒိကံ သဗ္ဗံ ခန္ဓယမကမာတိကာယ ဝုတ္တနယေနေဝ ဝေဒိတဗ္ဗံ အညတြ ဝိသေသာ ၊ တတြာယံ ဝိသေသော – ‘‘ဒွါဒသာယတနာနီ’’တိ ပဒံ အာဒိံ ကတွာ ယာဝ ‘‘နာယတနာ န မနော’’တိ၊ တာဝ ပဝတ္တာ အယံ အာယတနမာတိကာ နာမ။ တတ္ထ ဒွါဒသာယတနာနိ ဥဒ္ဒိသိတွာ ယမကဝသေန ပုစ္ဆာသု ခန္ဓပဒံ ဌပေတွာ စက္ခာဒီနိ ပဉ္စ အဇ္ဈတ္တိကာယတနာနိ ပဌမံ ဝုတ္တာနိ၊ ပစ္ဆာ ရူပါဒိပဉ္စဗာဟိရာယတနာနိ၊ ပရိယောသာနေ မနာယတနဓမ္မာယတနာနီတိ ဧဝံ ပါဠိဝဝတ္ထာနေ ပဉှေ။ ဝိဿဇ္ဇနေ ပန ‘‘စက္ခု စက္ခာယတနန္တိ? ဒိဗ္ဗစက္ခု ပညာစက္ခု စက္ခုမေဝ၊ န စက္ခာယတနံ၊ စက္ခာယတနံ စက္ခု စေဝ စက္ခာယတနဉ္စ။ သောတံ သောတာယတနန္တိ? ဒိဗ္ဗသောတံ တဏှာသောတံ သောတမေဝ၊ န သောတာယတနံ။ ဃာနံ ဃာနာယတနန္တိ? အာမန္တာ…ပေ… ကာယော ကာယာယတနန္တိ? နာမကာယော စိတ္တကာယောတိအာဒိ ကာယော၊ န ကာယာယတနံ။ ရူပံ ရူပါယတနန္တိ? ဘူတာဒိ၊ ပိယရူပါဒိ စ ရူပံဝ၊ န ရူပါယတနံ။ သဒ္ဒေါ သဒ္ဒါယတနန္တိ? အာမန္တာ။ ဂန္ဓော ဂန္ဓာယတနန္တိ? သီလဂန္ဓာဒယော ဂန္ဓောဝ၊ န ဂန္ဓာယတနံ။ ရသော ရသာယတနန္တိ? အတ္ထရသာဒယော ရသောဝ၊ န ရသာယတနံ။ ဓမ္မော ဓမ္မာယတနန္တိ? ပရိယတ္တိဓမ္မာဒယော ဓမ္မောဝ၊ န ဓမ္မာယတနံ။ ဓမ္မာယတနံ ဓမ္မောတိ? အာမန္တာ’’တိ အယံ ပဏ္ဏတ္တိဝါရေ ဝိသေသော။

ပဝတ္တိဝါရေ ပန ‘‘ယဿ စက္ခာယတနံ ဥပ္ပဇ္ဇတိ၊ တဿ သောတာယတနံ ဥပ္ပဇ္ဇတီတိ? သစက္ခုကာနံ အသောတကာနံ ဥပပဇ္ဇန္တာနံ တေသံ စက္ခာယတနံ ဥပ္ပဇ္ဇတိ၊ နော စ တေသံ သောတာယတနံ ဥပ္ပဇ္ဇတိ။ သစက္ခုကာနံ သသောတကာနံ ဥပပဇ္ဇန္တာနံ တေသံ စက္ခာယတနဉ္စ ဥပ္ပဇ္ဇတိ၊ သောတာယတနဉ္စ ဥပ္ပဇ္ဇတိ…ပေ… ယဿ ရူပါယတနံ ဥပ္ပဇ္ဇတိ၊ တဿ မနာယတနံ ဥပ္ပဇ္ဇတီတိ? အစိတ္တကာနံ ရူပါယတနံ ဥပ္ပဇ္ဇတိ၊ နော စ တေသံ မနာယတနံ ဥပ္ပဇ္ဇတိ။ ပဉ္စဝေါကာရေ ဥပ္ပာဒက္ခဏေ တဒုဘယံ ဥပ္ပဇ္ဇတိ။ ယဿ ဝါ ပန မနာယတနံ ဥပ္ပဇ္ဇတိ၊ တဿ ရူပါယတနံ ဥပ္ပဇ္ဇတီတိ? အရူပဘဝဝဇ္ဇိတေ သညာဘဝေ ဥပပဇ္ဇန္တာနံ…ပေ… ဥပ္ပဇ္ဇတိ ။ ယဿ ရူပါယတနံ ဥပ္ပဇ္ဇတိ၊ တဿ ဓမ္မာယတနံ ဥပ္ပဇ္ဇတီတိ? အာမန္တာ။ ယဿ ဝါ ပန…ပေ… ဥပ္ပဇ္ဇတီတိ? အရူပဘဝဝဇ္ဇိတေ သဗ္ဗတ္ထ ဥပ္ပဇ္ဇတိ။ ယဿ မနာယတနံ ဥပ္ပဇ္ဇတိ၊ တဿ ဓမ္မာယတနံ ဥပ္ပဇ္ဇတီတိ? အာမန္တာ၊ ယဿ ဝါ ပန…ပေ… ဥပ္ပဇ္ဇတီတိ? အသညဘဝဝဇ္ဇိတေ သဗ္ဗတ္ထ ဥပ္ပဇ္ဇတီ’’တိ ဧဝံ သဒ္ဒါယတနဝဇ္ဇိတာ သေသာယတနမာတိကာယမကယောဇနာ ယထာနုရူပံ ဝေဒိတဗ္ဗာ။ သဒ္ဒါယတနံ ဟိ ပဋိသန္ဓိက္ခဏေ န လဗ္ဘတိ၊ အယံ ဥပ္ပာဒဝါရေ ဝိသေသော၊ ဣမိနာ နယေန နိရောဓဝါရာဒီသု၊ ပရိညာဝါရေ စ ယောဇနာဝိသေသော ဝေဒိတဗ္ဗော၊ သဗ္ဗတ္ထ စ ခန္ဓတော အာယတနာနံ ဗဟုတာ စ ယမကဝါရဗဟုတာ စ ဝေဒိတဗ္ဗာ။ သေသံ တာဒိသမေဝါတိ အယံ အာယတနယမကမာတိကတ္ထသံဝဏ္ဏနာနယော။

ဓာတုယမကမာတိကတ္ထဝဏ္ဏနာ

ဓာတုယမကမာတိကာယ ပန ပါဠိဝဝတ္ထာနံ သဗ္ဗံ အာယတနယမကမာတိကာယ ဝုတ္တနယေနေဝ ဝေဒိတဗ္ဗန္တိ အယံ ဓာတုယမကမာတိကတ္ထသံဝဏ္ဏနာနယော။

သစ္စယမကမာတိကတ္ထဝဏ္ဏနာ

သစ္စယမကမာတိကာယ ပန ခန္ဓယမကေ ဝုတ္တနယေန ဝါရဘေဒါ၊ ကာလာဒိဘေဒါ စ ဝေဒိတဗ္ဗာ၊ ပါဠိဝဝတ္ထာနေ ပနေတ္ထ စတုန္နံ သစ္စာနံ ဝသေန ပဒသောဓနဝါရော ပဒသောဓနမူလစက္ကဝါရော သုဒ္ဓသစ္စဝါရော သုဒ္ဓသစ္စမူလစက္ကဝါရောတိ ဣမေသု စတူသု ဝါရေသု ယမကဂဏနာ ဝေဒိတဗ္ဗာ။ ပုစ္ဆာဝိဿဇ္ဇနေသု ပန ‘‘ဒုက္ခံ ဒုက္ခသစ္စန္တိ? အာမန္တာ။ ဒုက္ခသစ္စံ ဒုက္ခန္တိ? ကာယိကစေတသိကံ ဒုက္ခံ ဌပေတွာ အဝသေသံ ဒုက္ခသစ္စံ၊ န ဒုက္ခံ။ ကာယိကစေတသိကံ ဒုက္ခံ ပန ဒုက္ခဉ္စေဝ ဒုက္ခသစ္စဉ္စ။ သမုဒယော သမုဒယသစ္စန္တိ? တဏှံ ဌပေတွာ အဝသေသာ သစ္စဝိဘင်္ဂေ နိဒ္ဒိဋ္ဌာ ကုသလာဒိဓမ္မာ သမုဒယော၊ န သမုဒယသစ္စံ။ တဏှာ ပန သမုဒယော စေဝ သမုဒယသစ္စဉ္စ။ သမုဒယသစ္စံ သမုဒယောတိ? အာမန္တာ။ နိရောဓော နိရောဓသစ္စန္တိ? တဒင်္ဂနိရောဓာဒယော၊ ခဏိကနိရောဓော စ နိရောဓောဝ၊ န နိရောဓသစ္စံ။ နိဗ္ဗာနံ ပန နိရောဓော စေဝ နိရောဓသစ္စဉ္စ။ နိရောဓသစ္စံ နိရောဓောတိ? အာမန္တာ။ မဂ္ဂေါ မဂ္ဂသစ္စန္တိ? မိစ္ဆာမဂ္ဂင်္ဂါဒယော မဂ္ဂေါ၊ န မဂ္ဂသစ္စံ။ အရိယမဂ္ဂေါ ပန မဂ္ဂေါ စေဝ မဂ္ဂသစ္စဉ္စ။ မဂ္ဂသစ္စံ မဂ္ဂေါတိ? အာမန္တာ’’တိအာဒိနာ ပဏ္ဏတ္တိဝါရေ နယော ဝေဒိတဗ္ဗော။

ပဝတ္တိဝါရေ ပန ‘‘ယဿ ဒုက္ခသစ္စံ ဥပ္ပဇ္ဇတိ၊ တဿ သမုဒယသစ္စံ ဥပ္ပဇ္ဇတီတိ? သဗ္ဗေသံ ဥပပဇ္ဇန္တာနံ ပဝတ္တေ တဏှာဝိပ္ပယုတ္တစိတ္တဿ ဥပ္ပာဒက္ခဏေ တေသံ ဒုက္ခသစ္စံ ဥပ္ပဇ္ဇတိ၊ နော စ တေသံ သမုဒယသစ္စံ ဥပ္ပဇ္ဇတိ။ တဏှာယ ဥပ္ပာဒက္ခဏေ တဒုဘယံ ဥပ္ပဇ္ဇတိ။ ယဿ ဒုက္ခသစ္စံ ဥပ္ပဇ္ဇတိ၊ တဿ မဂ္ဂသစ္စံ ဥပ္ပဇ္ဇတီတိ…ပေ… ပဉ္စဝေါကာရေ မဂ္ဂဿ ဥပ္ပာဒက္ခဏေ တဒုဘယံ ဥပ္ပဇ္ဇတိ။ ယဿ ဝါ ပန…ပေ… ဥပ္ပဇ္ဇတီတိ? အရူပေ မဂ္ဂဿ ဥပ္ပာဒက္ခဏေ တေသံ မဂ္ဂသစ္စံ ဥပ္ပဇ္ဇတိ၊ နော စ တေသံ ဒုက္ခသစ္စံ ဥပ္ပဇ္ဇတိ။ ပဉ္စဝေါကာရေ တဒုဘယံ ဥပ္ပဇ္ဇတိ။ ယဿ သမုဒယသစ္စံ ဥပ္ပဇ္ဇတိ၊ တဿ မဂ္ဂသစ္စံ ဥပ္ပဇ္ဇတီတိ? နော၊ ယဿ ဝါ ပန…ပေ… နော’’တိအာဒိနာ ပုဂ္ဂလဝါရေ၊ ‘‘ယတ္ထ ဒုက္ခသစ္စံ ဥပ္ပဇ္ဇတိ၊ တတ္ထ သမုဒယသစ္စံ ဥပ္ပဇ္ဇတီတိ? အသညသတ္တေ တတ္ထ ဒုက္ခသစ္စံ ဥပ္ပဇ္ဇတိ၊ နော စ တတ္ထ တဒညံ၊ အညတ္ထ တဒုဘယမ္ပိ။ ယတ္ထ ဒုက္ခသစ္စံ ဥပ္ပဇ္ဇတိ၊ တတ္ထ မဂ္ဂသစ္စံ ဥပ္ပဇ္ဇတီတိ? အပါယေ၊ အသညသတ္တေ စ ဒုက္ခမေဝ၊ နော စ တတ္ထ တဒညံ၊ အညတ္ထ တဒုဘယမ္ပီ’’တိအာဒိနာ ဩကာသဝါရေ၊ ပုဂ္ဂလောကာသဝါရေပီတိ ဧဝံ အနုလောမနယေ၊

‘‘ယဿ ဒုက္ခသစ္စံ နုပ္ပဇ္ဇတိ၊ တဿ သမုဒယသစ္စံ နုပ္ပဇ္ဇတီတိ? အာမန္တာ။ ယဿ ဝါ ပန…ပေ… နုပ္ပဇ္ဇတီတိ? သဗ္ဗေသံ ဥပပဇ္ဇန္တာနံ ပဝတ္တေ တဏှာဝိပ္ပယုတ္တစိတ္တဿ ဥပ္ပာဒက္ခဏေ သမုဒယသစ္စံ နုပ္ပဇ္ဇတိ၊ နော စ တေသံ ဒုက္ခသစ္စံ နုပ္ပဇ္ဇတိ။ သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပာဒက္ခဏေ တေသံ သမုဒယသစ္စဉ္စ နုပ္ပဇ္ဇတိ၊ ဒုက္ခသစ္စဉ္စ နုပ္ပဇ္ဇတီ’’တိအာဒိနာ၊ ‘‘ယတ္ထ ဒုက္ခသစ္စံ နုပ္ပဇ္ဇတိ၊ တတ္ထ သမုဒယသစ္စံ နုပ္ပဇ္ဇတီတိ? နတ္ထိ။ ယတ္ထ ဝါ ပန သမုဒယသစ္စံ နုပ္ပဇ္ဇတိ၊ တတ္ထ ဒုက္ခသစ္စံ နုပ္ပဇ္ဇတီတိ? ဥပ္ပဇ္ဇတီ’’တိအာဒိနာ စ၊ ‘‘ယဿ ယတ္ထ ဒုက္ခသစ္စံ နုပ္ပဇ္ဇတိ၊ တဿ တတ္ထ သမုဒယသစ္စံ နုပ္ပဇ္ဇတီတိ? အာမန္တာ။ ယဿ ဝါ ပန ယတ္ထ သမုဒယသစ္စံ နုပ္ပဇ္ဇတိ၊ တဿ တတ္ထ ဒုက္ခသစ္စံ နုပ္ပဇ္ဇတီတိ? သဗ္ဗေသံ ဥပပဇ္ဇန္တာနံ ပဝတ္တေ တဏှာဝိပ္ပယုတ္တစိတ္တဿ ဥပ္ပာဒက္ခဏေ တေသံ တတ္ထ သမုဒယသစ္စံ ဧဝ နုပ္ပဇ္ဇတိ၊ နေတရံ၊ သဗ္ဗေသံ ပန စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဿ စ ဖလဿ စ ဥပ္ပာဒက္ခဏေ တေသံ တတ္ထ တဒုဘယမ္ပိ နုပ္ပဇ္ဇတီ’’တိအာဒိနာ စ သဗ္ဗတ္ထ ပဋိလောမနယေ စ၊

‘‘ယဿ ဒုက္ခသစ္စံ ဥပ္ပဇ္ဇိတ္ထ၊ တဿ သမုဒယသစ္စံ ဥပ္ပဇ္ဇိတ္ထာတိ? အာမန္တာ။ ယဿ ဒုက္ခသစ္စံ ဥပ္ပဇ္ဇိတ္ထ၊ တဿ မဂ္ဂသစ္စံ ဥပ္ပဇ္ဇိတ္ထာတိ? အဘိသမေတာဝီနံ ဥပ္ပဇ္ဇိတ္ထ၊ န ဣတရေသ’’န္တိအာဒိနာ၊ ‘‘ယဿ ယတ္ထ ဒုက္ခသစ္စံ ဥပ္ပဇ္ဇိတ္ထ၊ တဿ တတ္ထ သမုဒယသစ္စံ ဥပ္ပဇ္ဇိတ္ထာတိ? သုဒ္ဓါဝါသာနံ ဒုတိယေ စိတ္တေ ဝတ္တမာနေ အသညသတ္တာနံ တတ္ထ ဒုက္ခသစ္စံ ဥပ္ပဇ္ဇိတ္ထ၊ နေတရံ၊ ဣတရေသံ တဒုဘယံ ဥပ္ပဇ္ဇိတ္ထာ’’တိအာဒိနာ၊ ‘‘ယဿ ဒုက္ခသစ္စံ ဥပ္ပဇ္ဇိဿတိ၊ တဿ သမုဒယသစ္စံ ဥပ္ပဇ္ဇိဿတီတိ? အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ၊ တေသံ ဒုက္ခသစ္စံ ဥပ္ပဇ္ဇိဿတိ၊ နေတရံ၊ ဣတရေသံ တဒုဘယံ ဥပ္ပဇ္ဇိဿတီ’’တိအာဒိနာ စ၊ ‘‘ယဿ ဒုက္ခသစ္စံ ဥပ္ပဇ္ဇတိ၊ တဿ သမုဒယသစ္စံ ဥပ္ပဇ္ဇိတ္ထာတိ? အာမန္တာ၊ ယဿ ဝါ ပန…ပေ… ဥပ္ပဇ္ဇတီတိ? သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အရူပေ မဂ္ဂဖလုပ္ပတ္တိက္ခဏေ တေသံ သမုဒယသစ္စံ ဥပ္ပဇ္ဇိတ္ထ၊ နော စ တေသံ ဒုက္ခသစ္စံ ဥပ္ပဇ္ဇတိ။ သဗ္ဗေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပာဒက္ခဏေ သမုဒယသစ္စဉ္စ ဥပ္ပဇ္ဇိတ္ထ ၊ ဒုက္ခသစ္စဉ္စ ဥပ္ပဇ္ဇတီ’’တိအာဒိနာ စ သေသကာလဘေဒေသု စ အနုလောမပဋိလောမာဒီသု စ ဝုတ္တာနုသာရေန ဥပ္ပာဒဝါရေ သဗ္ဗတ္ထ ဝိဿဇ္ဇနနယော ယထာနုရူပံ ဉာတဗ္ဗော။ ‘‘ယဿ ဒုက္ခသစ္စံ နိရုဇ္ဈတိ၊ တဿ သမုဒယသစ္စံ နိရုဇ္ဈတီတိ…ပေ… တဏှာယ ဘင်္ဂက္ခဏေ တေသံ တဒုဘယံ နိရုဇ္ဈတီ’’တိအာဒိနာ နိရောဓဝါရေ၊ ဥပ္ပာဒနိရောဓဝါရေပီတိ ဧဝံ ပဝတ္တိဝါရေ သဗ္ဗတ္ထ ယထာနုရူပတော ယောဇနာ ဝေဒိတဗ္ဗာ။

တထာ ‘‘ယော ဒုက္ခသစ္စံ ပရိဇာနာတိ၊ သော သမုဒယသစ္စံ ပဇဟတီတိ? အာမန္တာ’’တိအာဒိနာ ပရိညာဝါရေပီတိ ဧဝမေတ္ထ ပါဠိနယော ဉာတဗ္ဗော။

အတ္ထဝိနိစ္ဆယေ ပနေတ္ထ ဣဒံ လက္ခဏံ – ပဝတ္တိ ဝါရေ တာဝေတ္ထ နိရောဓသစ္စံ န လဗ္ဘတေဝ၊ သေသေသု ပန တီသု သစ္စေသု သမုဒယမဂ္ဂသစ္စာနိ ဧကန္တေန ပဝတ္တိယံ ဧဝ လဗ္ဘန္တိ။ ဒုက္ခသစ္စံ စုတိပဋိသန္ဓီသုပိ ပဝတ္တေပီတိ ဧဝမေတ္ထ ယံ ယံ သဗ္ဗတ္ထ လဗ္ဘတိ၊ တဿ တဿ ဝသေန အတ္ထဝိနိစ္ဆယော ဝေဒိတဗ္ဗော။ တတြိဒံ နယမုခံ – သဗ္ဗေသံ ဥပပဇ္ဇန္တာနန္တိ အန္တမသော သုဒ္ဓါဝါသာနမ္ပိ။ တေပိ ဟိ ဒုက္ခသစ္စေနေဝ ဥပ္ပဇ္ဇန္တိ။ တဏှာဝိပ္ပယုတ္တစိတ္တဿာတိ ဣဒံ ဒုက္ခသစ္စသမုဒယသစ္စေသု ဧကကောဋ္ဌာသဿ ဥပ္ပတ္တိဒဿနတ္ထံ ဝုတ္တံ၊ တသ္မာ ပဉ္စဝေါကာရဝသေနေဝ ဂဟေတဗ္ဗံ။ စတုဝေါကာရေ ပန တဏှာဝိပ္ပယုတ္တဖလသမာပတ္တိယာ ဥပ္ပာဒက္ခဏေ ဧကမ္ပိ သစ္စံ နုပ္ပဇ္ဇတိ။ တဒုဘယန္တိ ဒုက္ခသမုဒယသစ္စဒွယံ။ တသ္မိံ ဟိ ခဏေ တဏှံ ဌပေတွာ သေသံ ဒုက္ခသစ္စံ နာမ ဟောတီတိ တံ သန္ဓာယေတံ ဝုတ္တံ။ မဂ္ဂဿ ဥပ္ပာဒက္ခဏေ ပန ရူပမေဝ ဒုက္ခသစ္စံ နာမ၊ သေသာ မဂ္ဂသဟဇာတာ ဓမ္မာ သစ္စဝိနိမုတ္တာဝ။ တေနေဝ ကာရဏေန ‘‘အရူပေ မဂ္ဂဿ ဥပ္ပာဒက္ခဏေ တေသံ မဂ္ဂသစ္စံ ဥပ္ပဇ္ဇတိ၊ နော စ တေသံ ဒုက္ခသစ္စံ ဥပ္ပဇ္ဇတီ’’တိ ဝုတ္တံ။ သဗ္ဗေသံ ဥပပဇ္ဇန္တာနံ ပဝတ္တေ တဏှာဝိပ္ပယုတ္တစိတ္တဿ ဥပ္ပာဒက္ခဏေ။ တေသံ တတ္ထာတိ တေသံ တသ္မိံ ဥပပတ္တိက္ခဏေ တဏှာဝိပ္ပယုတ္တစိတ္တုပ္ပတ္တိက္ခဏေ စာတိ ဧဝမေတ္ထ ခဏဝသေန ဩကာသော ဝေဒိတဗ္ဗော။ အညေသုပိ ဧဝရူပေသု ဧသေဝ နယော။ အနဘိသမေတာဝီနန္တိ အနဘိသမိတသစ္စာနန္တိ ဣမိနာ နယမုခေန သဗ္ဗတ္ထ အတ္ထဝိနိစ္ဆယော ဝေဒိတဗ္ဗော။

ပရိညာဝါရေ ပန ဉာတတီရဏပဟာနဝသေန တိဿောပိ ပရိညာယော လဗ္ဘန္တိ။ ယသ္မာ ပန လောကုတ္တရဓမ္မေသု ပရိညာနာမ နတ္ထိ၊ တသ္မာ ဣဓ ဒွေ ဧဝ သစ္စာနိ ဂဟိတာနိ။ တတ္ထ ‘‘ဒုက္ခသစ္စံ ပရိဇာနာတီ’’တိ ဉာတတီရဏပရိညာဝသေန ဝုတ္တံ၊ ‘‘သမုဒယသစ္စံ ပဇဟတီ’’တိ ဉာတပဟာနပရိညာဝသေန ၊ ဣတိ ဣမာသံ ပရိညာနံ ဝသေန သဗ္ဗတ္ထ အတ္ထော ဝေဒိတဗ္ဗော။ အယံ သစ္စယမကမာတိကတ္ထသံဝဏ္ဏနာနယော။

သင်္ခါရယမကမာတိကတ္ထဝဏ္ဏနာ

သင်္ခါရယမကမာတိကာယ ပန ဟေဋ္ဌာ ဝုတ္တနယေနေဝ မဟာဝါရန္တရာဒိဘေဒါ ဝေဒိတဗ္ဗာ။ အယံ ပနေတ္ထ ဝိသေသော – မာတိကာယ တာဝ ယထာ ဟေဋ္ဌာ ခန္ဓာဒယော ဓမ္မေ ဥဒ္ဒိသိတွာ ‘‘ရူပံ ရူပက္ခန္ဓော’’တိအာဒိနာ ပဒသောဓနဝါရော အာရဒ္ဓါ၊ တထာ အနာရဘိတွာ ‘‘အဿာသပဿာသာ ကာယသင်္ခါရော’’တိအာဒိနာ ပဌမံ တယောပိ သင်္ခါရာ ဝိဘဇိတွာ ဒဿိတာ။ တတ္ထ ကာယဿ သင်္ခါရော ကာယသင်္ခါရော၊ အဿာသပဿာသာ။ ‘‘ကာယိကာ ဧတေ ဓမ္မာ ကာယပဋိဗဒ္ဓါ’’တိ (မ။ နိ။ ၁။၄၆၃၊ သံ။ နိ။ ၄။၃၄၈) ဝစနတော ကာရဏဘူတဿ ကရဇကာယဿ ဖလဘူတော ဧသ သင်္ခါရောတိ ကာယသင်္ခါရော။ အပရော နယော – သင်္ခရီယတီတိ သင်္ခါရော။ ကေန သင်္ခရီယတိ? ကာယေန။ အယံ ဟိ ဝါတော ဝိယ ဘသ္တာယ ကရဇကာယေန သင်္ခရီယတိ၊ ဧဝမ္ပိ ကာယဿ သင်္ခါရောတိ ကာယသင်္ခါရော၊ ကာယေန ကတော အဿာသပဿာသဝါတောတိ အတ္ထော။ စေတသာ ဝိတက္ကေတွာ ဝိစာရေတွာ ပစ္ဆာ ဝါစံ ဘိန္ဒတိ၊ တသ္မာ ‘‘ဝိတက္ကဝိစာရာ ဝစီသင်္ခါရော’’တိ (မ။ နိ။ ၁။၄၆၃) ဝစနတော ပန သင်္ခရောတီတိ သင်္ခါရော၊ ကိံ သင်္ခရောတိ? ဝစိံ။ ဝစိယာ သင်္ခါရောတိ ဝစီသင်္ခါရော၊ ဝစီဘေဒသမုဋ္ဌာပကဿ ဝိတက္ကဝိစာရဒွယဿေတံ နာမံ။ ‘‘သညာ စ ဝေဒနာ စ စေတသိကာ ဧတေ ဓမ္မာ စိတ္တပဋိဗဒ္ဓါ’’တိ (မ။ နိ။ ၁။၄၆၃၊ သံ။ နိ။ ၄။၃၄၈) ဝစနတောယေဝ ပန တတိယပဒေ သင်္ခရီယတီတိ သင်္ခါရော၊ ကေန သင်္ခရီယတိ? စိတ္တေန၊ ဣတိ စိတ္တဿ သင်္ခါရောတိ စိတ္တသင်္ခါရော၊ သဗ္ဗေသမ္ပိ စိတ္တသမုဋ္ဌာနာနံ စေတသိကာနံ ဓမ္မာနံ ဧတံ အဓိဝစနံ။ ဝိတက္ကဝိစာရာနံ ပန ဝစီသင်္ခါရဘာဝေန ဝိသုံ ဂဟိတတ္တာ ‘‘ဌပေတွာ ဝိတက္ကဝိစာရေ’’တိ ဝုတ္တံ။

ဣဒါနိ ‘‘ကာယော ကာယသင်္ခါရော’’တိ ပဒသောဓနဝါရော အာရဒ္ဓါ၊ တဿ အနုလောမနယေ တီဏိ၊ ပဋိလောမနယေ တီဏီတိ ဆ ယမကာနိ။ ပဒသောဓနမူလစက္ကဝါရေ ဧကေကသင်္ခါရမူလကာနိ ဒွေ ဒွေ ကတွာ အနုလောမနယေ ဆ၊ ပဋိလောမနယေ ဆာတိ ဒွါဒသ ယမကာနိ။ သုဒ္ဓသင်္ခါရဝါရေ ပန ယထာ သုဒ္ဓခန္ဓဝါရာဒီသု ‘‘ရူပံ ခန္ဓော၊ ခန္ဓာ ရူပ’’န္တိအာဒိနာ နယေန ယမကာနိဝုတ္တာနိ၊ ဧဝံ ‘‘ကာယော သင်္ခါရော၊ သင်္ခါရာ ကာယော’’တိ အဝတွာ ‘‘ကာယသင်္ခါရော ဝစီသင်္ခါရော’’တိအာဒိနာ နယေန ကာယသင်္ခါရမူလကာနိ ဒွေ၊ ဝစီသင်္ခါရမူလကံ ဧကန္တိ အနုလောမေ တီဏိ၊ ပဋိလောမေ တီဏီတိ ဆ ယမကာနိ ဝုတ္တာနိ။ ကိံ ကာရဏာ? သုဒ္ဓိကဧကေကပဒဝသေန အတ္ထဘေဒါဘာဝတော၊ ကာယသင်္ခါရောတိ ပန ဒွီဟိပိ ပဒေဟိ ဧကောဝ အတ္ထော လဗ္ဘတီတိ အယံ ဝိသေသောဝ၊ တသ္မာ ဧကေကပဒဝသေန န ဝုတ္တံ၊ ‘‘ကာယော ကာယသင်္ခါရော’’တိအာဒိ ပန ဝတ္တဗ္ဗံ သိယာ၊ သောပိ နယော ပဒသောဓနဝါရေ ဝိနာပိ အတ္ထေန ဝစနံ ယုဇ္ဇတီတိ တတ္ထေဝ ဝုတ္တော၊ ဣဓ ပန ကာယသင်္ခါရာဒီနံ ဝစီသင်္ခါရာဒီဟိ အညတ္တာ ‘‘ကာယသင်္ခါရော ဝစီသင်္ခါရော’’တိအာဒိနာပိ ယမကာနိ ဝုတ္တာနိ။ သုဒ္ဓသင်္ခါရမူလစက္ကဝါရော ပနေတ္ထ န ဂဟိတောတိ အယံ တာဝေတ္ထ ပါဠိဝဝတ္ထာနေ ဝိသေသော။

ပဉှဝိဿဇ္ဇနေသု ပန ‘‘ကာယော ကာယသင်္ခါရောတိ? နော၊ ကာယသင်္ခါရော ကာယောတိ? နော’’တိ ဝါ ဧဝံ သဗ္ဗတ္ထ ပဋိသေဓော။ ဝိဿဇ္ဇနာနံ ကာယာဒီနံ ဧဝ ကာယသင်္ခါရာဒိနာမတ္တာ။ န ဟိ ကာယာဒယော ဝိယ ကာယသင်္ခါရာဒီနံ နာမံ ဟောတိ၊ ပဋိလောမေ ပန န ကာယော န ကာယသင်္ခါရောတိ ယော ကာယော န ဟောတိ၊ သော ကာယသင်္ခါရောပိ န ဟောတီတိ ပုစ္ဆာယ အတ္ထော၊ တဿာ ကာယသင်္ခါရော န ကာယော ကာယသင်္ခါရောတိ ကာယသင်္ခါရော ကာယော န ဟောတိ၊ ကာယသင်္ခါရောယေဝ ပနေသော ဟောတိ၊ ကာယဉ္စ ကာယသင်္ခါရဉ္စ ဌပေတွာ အဝသေသံ သင်္ခတာသင်္ခတာဒိဘေဒံ သဗ္ဗံ န စ ကာယော၊ န စ ကာယသင်္ခါရောတိ ဝိဿဇ္ဇနံ။ သေသေသုပိ ဧသေဝ နယော၊ ဣတရေသု စ အနုလောမပဋိလောမေသု ‘‘ကာယော ကာယသင်္ခါရောတိ? နော၊ သင်္ခါရာ ဝစီသင်္ခါရောတိ? ဝစီသင်္ခါရော သင်္ခါရော စေဝ ဝစီသင်္ခါရော စ၊ အဝသေသာ သင်္ခါရာ၊ န ဝစီသင်္ခါရော၊ န သင်္ခါရာ န ဝစီသင်္ခါရောတိ? အာမန္တာ’’တိအာဒိနာ သဗ္ဗတ္ထ ပုစ္ဆာဝိဿဇ္ဇနနယော ဝေဒိတဗ္ဗော။

ပဝတ္တိဝါရေ ပန ‘‘ယဿ ကာယသင်္ခါရော ဥပ္ပဇ္ဇတိ၊ တဿ ဝစီသင်္ခါရော ဥပ္ပဇ္ဇတီတိ? ဝိနာ ဝိတက္ကဝိစာရေဟိ အဿာသပဿာသာနံ ဥပ္ပာဒက္ခဏေ တေသံ ကာယသင်္ခါရော ဥပ္ပဇ္ဇတိ၊ နေတရော၊ သဝိတက္ကသဝိစာရစိတ္တသမင်္ဂီနံ ပန ကာမာဝစရသတ္တာနံ တဒုဘယမ္ပိ ဥပ္ပဇ္ဇတိ။ ယဿ ဝါ ပန…ပေ… ဥပ္ပဇ္ဇတီတိ? ရူပါရူပဘဝိကာနံ ဝိတက္ကဝိစာရုပ္ပာဒက္ခဏေ ဝစီသင်္ခါရောဝ ဥပ္ပဇ္ဇတိ၊ နေတရော…ပေ… ယထာဝုတ္တကာမာဝစရာနံ ပန တဒုဘယံ ဥပ္ပဇ္ဇတိ။ ယဿ ကာယသင်္ခါရော ဥပ္ပဇ္ဇတိ၊ တဿ စိတ္တသင်္ခါရော ဥပ္ပဇ္ဇတီတိ? အာမန္တာ…ပေ… ယဿ ဝါ ပန…ပေ… ဥပ္ပဇ္ဇတီတိ…ပေ… အဿာသပဿာသာနံ ဥပ္ပာဒက္ခဏေ တဒုဘယံ ဥပ္ပဇ္ဇတိ။ ယဿ ဝစီသင်္ခါရော ဥပ္ပဇ္ဇတိ၊ တဿ စိတ္တသင်္ခါရော ဥပ္ပဇ္ဇတီတိ? အာမန္တာ…ပေ… ယတ္ထ ကာယသင်္ခါရော ဥပ္ပဇ္ဇတိ၊ တတ္ထ ဝစီသင်္ခါရော ဥပ္ပဇ္ဇတီတိ ? ကာမာဝစရသတ္တာနံ ဒုတိယဇ္ဈာနေ တတိယဇ္ဈာနေ တတ္ထ ကာယသင်္ခါရောဝ ဥပ္ပဇ္ဇတိ၊ နေတရော၊ ပဌမဇ္ဈာနာဒီသု ပန တဒုဘယံ ဥပ္ပဇ္ဇတိ။ ယတ္ထ ဝါ ပန …ပေ… ဥပ္ပဇ္ဇတီတိ? ကာမာဝစရေ ဥပ္ပဇ္ဇတိ၊ န ရူပါရူပဘဝေသု။ ယတ္ထ ကာယသင်္ခါရော ဥပ္ပဇ္ဇတိ၊ တတ္ထ စိတ္တသင်္ခါရော ဥပ္ပဇ္ဇတီတိ? အာမန္တာ။ ယတ္ထ ဝါ ပန…ပေ… ဥပ္ပဇ္ဇတီတိ? ကာမာဝစရသတ္တာနံ စတုတ္ထဇ္ဈာနေ ရူပါရူပဘဝေ စ တတ္ထ စိတ္တသင်္ခါရောဝ ဥပ္ပဇ္ဇတိ၊ နေတရော၊ ဣတရဇ္ဈာနာဒီသု ပန တဒုဘယံ ဥပ္ပဇ္ဇတီ’’တိအာဒိနာ၊

‘‘ယဿ ကာယသင်္ခါရော နုပ္ပဇ္ဇတိ၊ တဿ ဝစီသင်္ခါရော နုပ္ပဇ္ဇတီတိ? ဝိနာ အဿာသပဿာသေဟိ ဝိတက္ကဝိစာရာနံ ဥပ္ပာဒက္ခဏေ တေသံ ကာယသင်္ခါရောဝ နုပ္ပဇ္ဇတိ၊ နေတရော၊ သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ အဝိတက္ကအဝိစာရစိတ္တဿ ဥပ္ပာဒက္ခဏေ နိရောဓသမာပန္နာနံ အသညသတ္တာနဉ္စ တဒုဘယမ္ပိ နုပ္ပဇ္ဇတိ…ပေ… ယဿ ကာယသင်္ခါရော နုပ္ပဇ္ဇတိ၊ တဿ စိတ္တသင်္ခါရော နုပ္ပဇ္ဇတီတိ…ပေ… သဗ္ဗစိတ္တာနံ ဘင်္ဂက္ခဏေ နိရောဓသမာပန္နာနံ အသညသတ္တာနဉ္စ နုပ္ပဇ္ဇတီ’’တိအာဒိနာ စ၊ ‘‘ယတ္ထ ကာယသင်္ခါရော နုပ္ပဇ္ဇတိ၊ တတ္ထ ဝစီသင်္ခါရော နုပ္ပဇ္ဇတီတိ…ပေ… စတုတ္ထဇ္ဈာနက္ခဏေ ရူပဘဝါဒီသု နုပ္ပဇ္ဇတီ’’တိအာဒိနာ စ၊ ‘‘ယဿ ကာယသင်္ခါရော ဥပ္ပဇ္ဇိတ္ထ၊ တဿ ဝစီသင်္ခါရော ဥပ္ပဇ္ဇိတ္ထာတိ? အာမန္တာ’’တိအာဒိနာ၊ ‘‘ယဿ ကာယသင်္ခါရော နုပ္ပဇ္ဇိတ္ထ၊ တဿ စိတ္တသင်္ခါရော နုပ္ပဇ္ဇိတ္ထာတိ? နတ္ထီ’’တိအာဒိနာ၊ ‘‘ယဿ ယတ္ထ ကာယသင်္ခါရော နုပ္ပဇ္ဇိတ္ထ၊ တဿ တတ္ထ ဝစီသင်္ခါရော နုပ္ပဇ္ဇိတ္ထာတိ…ပေ… စတုတ္ထဇ္ဈာနံ သမာပန္နာနံ သုဒ္ဓါဝါသာနံ ဒုတိယေ စိတ္တေ ဝတ္တမာနေ အသညသတ္တာနံ တေသံ တတ္ထ ကာယသင်္ခါရော စ နုပ္ပဇ္ဇိတ္ထ ဝစီသင်္ခါရော စာ’’တိအာဒိနာ စ၊

‘‘ယဿ ကာယသင်္ခါရော ဥပ္ပဇ္ဇိဿတိ၊ တဿ ဝစီသင်္ခါရော ဥပ္ပဇ္ဇိဿတီတိ? အာမန္တာ။ ယဿ ဝါ ပန…ပေ… ဥပ္ပဇ္ဇိဿတီတိ? ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ၊ ရူပါရူပဘဝေ ပစ္ဆိမဘဝိကာနံ ဝစီသင်္ခါရောဝ ဥပ္ပဇ္ဇိဿတိ၊ န ကာယသင်္ခါရော ၊ အညေသံ ပန တဒုဘယံ ဥပ္ပဇ္ဇိဿတီ’’တိအာဒိနာ စ၊ ‘‘ယဿ ကာယသင်္ခါရော နုပ္ပဇ္ဇိဿတိ၊ တဿ ဝစီသင်္ခါရော နုပ္ပဇ္ဇိဿတီတိ…ပေ… ပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ၊ တေသံ တဒုဘယံ နုပ္ပဇ္ဇိဿတီ’’တိအာဒိနာ သဗ္ဗကာလဘေဒေသု ယထာနုရူပတော ဥပ္ပာဒဝါရေ ယောဇနာနယော ဝေဒိတဗ္ဗော။ ‘‘ယဿ ကာယသင်္ခါရော နိရုဇ္ဈတိ၊ တဿ ဝစီသင်္ခါရော နိရုဇ္ဈတီတိ…ပေ… ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဘင်္ဂက္ခဏေ တဒုဘယံ နိရုဇ္ဈတိ။ ယဿ ကာယသင်္ခါရော နိရုဇ္ဈတိ၊ တဿ စိတ္တသင်္ခါရော နိရုဇ္ဈတီတိ? အာမန္တာ’’တိအာဒိနာ နိရောဓဝါရေ၊ ‘‘ယဿ ကာယသင်္ခါရော ဥပ္ပဇ္ဇတိ၊ တဿ ဝစီသင်္ခါရော နိရုဇ္ဈတီတိ? နော’’တိအာဒိနာ ဥပ္ပာဒနိရောဓဝါရေ စ၊

‘‘ယော ကာယသင်္ခါရံ ပရိဇာနာတိ၊ သော ဝစီသင်္ခါရံ ပရိဇာနာတီတိ? အာမန္တာ’’တိအာဒိနာ ပရိညာဝါရေ စ ဟေဋ္ဌာ ဝုတ္တာနုသာရေန သဗ္ဗတ္ထ ပါဠိနယော ဝေဒိတဗ္ဗော။

ပဝတ္တိဝါရေ ပနေတ္ထ ပစ္စုပ္ပန္နကာလေ ပုဂ္ဂလဝါရဿ အနုလောမနယေ ကာယသင်္ခါရမူလကာနိ ဒွေ၊ ဝစီသင်္ခါရမူလကံ ဧကန္တိ တီဏေဝ ယမကာနိ လဗ္ဘန္တိ။ တဿ ပဋိလောမနယေပိ ဩကာသဝါရာဒီသုပိ ဧသေဝ နယော။ ဧဝမေတ္ထ သဗ္ဗဝါရေသု တိဏ္ဏံ တိဏ္ဏံ ယမကာနံ ဝသေန ယမကဂဏနာ ဝေဒိတဗ္ဗာ။ အတ္ထဝိနိစ္ဆယေ ပနေတ္ထ ဣဒံ လက္ခဏံ – ဣမသ္မိံ ဟိ သင်္ခါရယမကေ ‘‘အဿာသပဿာသာနံ ဥပ္ပာဒက္ခဏေ၊ ဝိတက္ကဝိစာရာနံ ဥပ္ပာဒက္ခဏေ’’တိအာဒိဝစနတော (ယမ။ ၂။သင်္ခါရယမက။၁၉) ပစ္စုပ္ပန္နာဒိကာလဘေဒေါ ပဝတ္တိဝသေနာပိ ဂဟေတဗ္ဗော၊ န စုတိပဋိသန္ဓိဝသေနေဝ။ ‘‘ဒုတိယဇ္ဈာနေ တတိယဇ္ဈာနေ တတ္ထ ကာယသင်္ခါရော ဥပ္ပဇ္ဇတီ’’တိအာဒိဝစနတော (ယမ။ ၂။သင်္ခါရယမက။၂၁) စ ဈာနမ္ပိ ဩကာသဝသေန ဂဟိတန္တိ ဝေဒိတဗ္ဗံ။ ဧဝမေတ္ထ ယံ ယံ လဗ္ဘတိ၊ တဿ တဿ ဝသေန အတ္ထဝိနိစ္ဆယော ဝေဒိတဗ္ဗော။ တတြိဒံ နယမုခံ – ‘‘ဝိနာ ဝိတက္ကဝိစာရေဟီ’’တိ ဒုတိယတတိယဇ္ဈာနဝသေန ဝုတ္တံ၊ န စတုတ္ထဇ္ဈာနဝသေန တတ္ထ အဿာသပဿာသာနံ အဘာဝတော။ ‘‘စိတ္တဿ ဘင်္ဂက္ခဏေ’’တိ ဣဒံ ကာယသင်္ခါရဿ ဧကန္တစိတ္တသမုဋ္ဌာနတ္တာ ဝုတ္တံ၊ ဥပ္ပဇ္ဇမာနမေဝ ဟိ စိတ္တံ ရူပံ၊ အရူပံ ဝါ သမုဋ္ဌာပေတိ၊ န ဘိဇ္ဇမာနံ၊ ဌိတံ ဝါ။ ‘‘ပစ္ဆိမစိတ္တသမင်္ဂီန’’န္တိ သဗ္ဗပစ္ဆိမေန အပ္ပဋိသန္ဓိကစိတ္တေန သမင်္ဂီနံ ခီဏာသဝါနံ။ ‘‘အဝိတက္ကအဝိစာရံ ပစ္ဆိမစိတ္တ’’န္တိ ဧတ္ထ ရူပါဝစရာနံ ဒုတိယဇ္ဈာနိကာဒိစုတိစိတ္တဝသေန၊ အရူပါဝစရာနဉ္စ စတုတ္ထဇ္ဈာနိကစုတိစိတ္တဝသေန အတ္ထော ဂဟေတဗ္ဗော။

‘‘ယဿ ကာယသင်္ခါရော နိရုဇ္ဈတိ၊ တဿ စိတ္တသင်္ခါရော နိရုဇ္ဈတီ’’တိ ဧတ္ထ နိယမတော ကာယသင်္ခါရဿ စိတ္တသင်္ခါရေန သဒ္ဓိံ ဧကက္ခဏေ နိရုဇ္ဈနတော ‘‘အာမန္တာ’’တိ ပဋိဝစနံ ဒိန္နံ န ဧကစိတ္တက္ခဏိကတ္တာ။ စိတ္တသင်္ခါရော ဟိ ကာယသင်္ခါရေန ဝိနာပိ ဥပ္ပဇ္ဇတိ စ နိရုဇ္ဈတိ စ။ ကာယသင်္ခါရော ပန စိတ္တသမုဋ္ဌာနတ္တာ ယေန စိတ္တေန သဒ္ဓိံ ဥပ္ပဇ္ဇတိ၊ တတော ပဋ္ဌာယ သတ္တရသမေန သဒ္ဓိံ နိရုဇ္ဈတိ၊ ဧသာ စိတ္တသမုဋ္ဌာနရူပဿ ဓမ္မတာ။ ယံ ပန ဝိဘင်္ဂပ္ပကရဏဿ သီဟဠဋ္ဌကထာယ ‘‘စိတ္တသမုဋ္ဌာနရူပံ သတ္တရသမစိတ္တဿ ဥပ္ပာဒက္ခဏေ နိရုဇ္ဈတီ’’တိ ဝုတ္တံ၊ တံ ဣမာယ ပါဠိယာ ဝိရုဇ္ဈတိ။ ‘‘ယဿ ကာယသင်္ခါရော ဥပ္ပဇ္ဇတိ၊ တဿ ဝစီသင်္ခါရော နိရုဇ္ဈတီ’’တိ ဧတ္ထ ယသ္မာ ကာယသင်္ခါရော စိတ္တဿ ဥပ္ပာဒက္ခဏေ ဥပ္ပဇ္ဇတိ၊ န စ တသ္မိံ ခဏေ ဝိတက္ကဝိစာရာ နိရုဇ္ဈန္တိ၊ တသ္မာ ‘‘နော’’တိ ပဋိသေဓော ကတော။ ဣမိနာ နယမုခေန သဗ္ဗတ္ထ ဝိနိစ္ဆယော ဝေဒိတဗ္ဗော။ အယံ သင်္ခါရယမကမာတိကတ္ထသံဝဏ္ဏနာနယော။

အနုသယယမကမာတိကတ္ထဝဏ္ဏနာ

အနုသယယမကမာတိကာယ ပန ပါဠိဝဝတ္ထာနံ တာဝ ဧဝံ ဝေဒိတဗ္ဗံ။ အနုသယယမကေပိ ခန္ဓယမကမာတိကာဒီသု ဝိယ ဒေသနံ အကတွာ အညေန နယေန ပါဠိဒေသနာ ကတာ။ ကထံ? ပဌမံ တာဝ ပရိစ္ဆေဒဝါရော ပရိစ္ဆိန္နုဒ္ဒေသဝါရောတိ ဒွေ ဝါရာ ဥဒ္ဒေသဝသေန ဒေသိတာ၊ တတော ဥပ္ပတ္တိဋ္ဌာနဝါရောတိ ဧကော ခုဒ္ဒကဝါရော။ တတော အနုသယဝါရော သာနုသယဝါရော ပဇဟနဝါရော ပရိညာဝါရော ပဟီနဝါရော ဥပ္ပဇ္ဇနဝါရော ဓာတုဝါရောတိ အနုသယေ ယောဇေတွာ ယမကဝသေန ပပဉ္စတော နိဒ္ဒိဋ္ဌာ သတ္တ မဟာဝါရာတိ အဋ္ဌကနိဒ္ဒေသဝသေန ဒေသိတာ၊ ဧဝံ ဒသဟိ ဝါရေဟိ အနုသယယမကဒေသနာ ကတာ။ တေသု ယေ ဣမေ ဟိ ပရိစ္ဆေဒဝါရောတိအာဒိနာ ဒွေ ဝါရာ ဥဒ္ဒေသဝသေန ဝုတ္တာ၊ တေ ဣဓ အနုသယယမကမာတိကာတိ ဂဟေတဗ္ဗာ။

တတ္ထ ဟိ သတ္တ အနုသယာတိ အယံ ဂဏနာယ ပရိစ္ဆိန္ဒိတွာ အနုသယာနံ ဒေသိတတ္တာ ပရိစ္ဆေဒဝါရော နာမ။ ကာမရာဂါနုသယော…ပေ… အဝိဇ္ဇာနုသယောတိ အယံ ပရိစ္ဆေဒဝသေန ပရိစ္ဆိန္နာနံ နာမမတ္တံ ဥဒ္ဒိသိတွာ ‘‘ဣမေ နာမ တေ’’တိ ဒေသိတတ္တာ ပရိစ္ဆိန္နုဒ္ဒေသဝါရော နာမ။ တတ္ထ အနုတ္တာနတ္ထတော တာဝ အနုသယာတိ ကေနဋ္ဌေန အနုသယာ? အနုသယနဋ္ဌေန။ ကော ဧသ အနုသယနဋ္ဌော နာမာတိ? အပ္ပဟီနဋ္ဌော။ ကာမရာဂါနုသယာဒယော ဟိ အပ္ပဟီနဋ္ဌေန တဿ တဿ သန္တာနေ အနုသေန္တိ နာမ၊ တသ္မာ ‘‘အနုသယာ’’တိ ဝုစ္စန္တိ၊ အနုသေန္တီတိ စ တံ တံ အနုရူပံ ကာရဏံ လဘိတွာ ဥပ္ပဇ္ဇန္တီတိ အတ္ထော။ အထာပိ သိယာ – အနုသယနဋ္ဌော နာမ အပ္ပဟီနာကာရော၊ အပ္ပဟီနာကာရော စ န ဥပ္ပဇ္ဇတိ၊ တသ္မာ အနုသယာ န ဥပ္ပဇ္ဇန္တီတိ။ တတြိဒံ ပဋိဝစနံ – အပ္ပဟီနာကာရော အနုသယော၊ အနုသယောတိ ပန အပ္ပဟီနဋ္ဌေန ထာမဂတကိလေသော ဝုစ္စတိ၊ သော စိတ္တသမ္ပယုတ္တော သာရမ္မဏော သပ္ပစ္စယဋ္ဌေန သဟေတုကော ဧကန္တာကုသလောဝ ဟောတိ ကထာဝတ္ထုသ္မိံ (ကထာ။ ၅၅၄ အာဒယော) အနုသယာနံ စိတ္တဝိပ္ပယုတ္တဘာဝဿ ပဋိသေဓိတတ္တာ ၊ သော စ အတီတောပိ ဟောတိ၊ အနာဂတောပိ ပစ္စုပ္ပန္နောပိ၊ တသ္မာ ဥပ္ပဇ္ဇတီတိ ဝတ္တုံ ယုတ္တံ။ တထာ ဟိ ဓမ္မသင်္ဂဟေ မောဟဿ ပဒဘာဇနေ ၃၁၇ ‘‘အဝိဇ္ဇာနုသယော အဝိဇ္ဇာပရိယုဋ္ဌာနံ…ပေ… အယံ တသ္မိံ သမယေ မောဟော ဟောတီ’’တိ (ဓ။ သ။ ၃၉၀)။ ဣမသ္မိဉ္စ ယမကေ ဥပ္ပဇ္ဇနဝါရေ ‘‘ယဿ ကာမရာဂါနုသယော ဥပ္ပဇ္ဇတိ၊ တဿ ပဋိဃာနုသယော ဥပ္ပဇ္ဇတီ’’တိအာဒိ ဝုတ္တံ၊ တသ္မာ ‘‘အနုသေန္တီတိ တံ တံ အနုရူပံ ကာရဏံ လဘိတွာ ဥပ္ပဇ္ဇန္တီ’’တိ ယံ ဝုတ္တံ၊ တံ သုဝုတ္တန္တိ ဝေဒိတဗ္ဗံ။ ကာမရာဂါနုသယောတိ ကာမရာဂေါ စ သော အပ္ပဟီနဋ္ဌေန အနုသယော စာတိ ကာမရာဂါနုသယော။ သေသပဒေသုပိ ဧသေဝ နယော။ အယံ တာဝေတ္ထ အနုတ္တာနတ္ထော။ အတ္ထဝိနိစ္ဆယော ပနေတ္ထာပိ နိဒ္ဒေသနယမုခဒဿနဝသေနေဝ ဟောတိ၊ နိဒ္ဒေသော စေတ္ထ ဟေဋ္ဌာ ဝုတ္တော။

ဥပ္ပတ္တိဋ္ဌာနဝါရာဒယော အဋ္ဌ ဝါရာ စ၊ တတြာယံ ပါဠိဝဝတ္ထာနာနုပုဗ္ဗိကာမုခမတ္တပ္ပကာသနာ။ တေသံ ဟိ ပဌမော အနုသယာနံ ဥပ္ပတ္တိဋ္ဌာနဝါရော နာမ။ တတ္ထ ဝါရဘေဒေါ ယမကယောဇနဝါရေ နတ္ထိ၊ ဣတရေသု ပန သတ္တသု မဟာဝါရေသု အတ္ထိ။ တေသု ဟိ ပဌမော အနုသယဝါရော အနုလောမပဋိလောမနယဝသေန ဒုဝိဓော ဟောတိ။ တတ္ထ အနုလောမနယေ ‘‘ယဿ ယတ္ထ…ပေ… အနုသေတီ’’တိ ပုဂ္ဂလောကာသတဒုဘယနာမဝသေန တယော အန္တရဝါရာ ဟောန္တိ၊ တေသု ဧကေကသ္မိံ ဧကမူလကဒွိမူလကတိမူလကစတုမူလကပဉ္စမူလကဆမူလကာနံ ဝသေန ယမကဘေဒါ ဟောန္တိ။ ယထာ စ အနုလောမနယေ၊ ဧဝံ ပဋိလောမနယေပိ ဝေဒိတဗ္ဗာ။ ယထာ စေတ္ထ အနုသယဝါရေ၊ ဧဝံ သာနုသယဝါရပဇဟနဝါရပရိညာဝါရပဟီနဝါရဥပ္ပဇ္ဇနဝါရေသု ပဉ္စသုပိ။ အယံ ပနေတ္ထ ပုရိမေသု တီသု ဝါရေသု ဝိသေသော။ ဩကာသဝါရေ ‘‘ယတ္ထ တတ္ထာ’’တိ အဝတွာ ‘‘ယတော တတော’’တိ နိဿက္ကဝစနေန ဒေသနာ ကတာ။ သေသံ တာဒိသမေဝ ။ ယော ပနာယံ သဗ္ဗပစ္ဆိမော ဓာတုဝါရော နာမ၊ သော ပုစ္ဆာဝါရော ဝိဿဇ္ဇနဝါရောတိ ဒွိဓာ ဌိတော။ တတ္ထ ပုစ္ဆာဝါရော အနုလောမပဋိလောမဝသေန ဒုဝိဓော။ တဿာဝသာနေ ပုစ္ဆာနုက္ကမေန ဝိဿဇ္ဇနံ ကတန္တိ။ ဧဝံ တာဝေတ္ထ ပါဠိဝဝတ္ထာနံ ဝေဒိတဗ္ဗံ။

တတြိဒံ အဋ္ဌန္နံ ဝါရာနံ အာဒိတော ပဋ္ဌာယ မုခမတ္တဒဿနံ။ ‘‘ကတ္ထ ကာမရာဂါနုသယော အနုသေတိ? ကာမဓာတုယာ ဒွီသု ဝေဒနာသု ဧတ္ထ ကာမရာဂါနုသယော အနုသေတိ။ ကတ္ထ ပဋိဃာနုသယော အနုသေတိ? ဒုက္ခာယ ဝေဒနာယ…ပေ… မာနာနုသယော ကာမဓာတုယာ ဒွီသု ဝေဒနာသု ရူပဓာတုယာ အရူပဓာတုယာ စ အနုသေတိ။ ဒိဋ္ဌာနုသယော၊ ဝိစိကိစ္ဆာနုသယော စ သဗ္ဗသက္ကာယပရိယာပန္နေသု ဓမ္မေသု၊ ဘဝရာဂါနုသယော ရူပါရူပဓာတူသု၊ အဝိဇ္ဇာနုသယော သဗ္ဗသက္ကာယပရိယာပန္နေသု ဓမ္မေသု အနုသေတီ’’တိ အယံ တာဝ ပဌမဝါရေ ပါဠိနယော။

တတ္ထ ကာမဓာတုယာ ဒွီသု ဝေဒနာသူတိ ကာမာဝစရဘူမိယံ သုခါယ စေဝ ဥပေက္ခာယ စာတိ ဒွီသု ဝေဒနာသု၊ ကာမရာဂါနုသယော ပန သဟဇာတဝသေန၊ အာရမ္မဏဝသေန စာတိ ဒွီဟာကာရေဟိ အနုသေတိ ဥပ္ပဇ္ဇတိ၊ တတ္ထ အကုသလာဟိ သုခဥပေက္ခာဟိ သဟဇာတောပိ ဟုတွာ တာ အာရမ္မဏံ ကတွာပိ ဥပ္ပဇ္ဇတိ။ အဝသေသာ ပန ကာမာဝစရကုသလဝိပါကကိရိယဝေဒနာ အာရမ္မဏမေဝ ကတွာ ဥပ္ပဇ္ဇတိ၊ ဣမာသု ဝေဒနာသု အနုသယမာနော စေသ တာဟိ ဝေဒနာဟိ သမ္ပယုတ္တေသု သညာသင်္ခါရဝိညာဏေသုပိ အနုသေတိယေဝ။ ဣမာသံ ပန ဝေဒနာနံ အဿာဒဋ္ဌေန ကာမရာဂါနုသယုပ္ပတ္တိယာ သေသသမ္ပယုတ္တေဟိ ပဓာနတ္တာ၊ ဩဠာရိကတ္တေန ဝေနေယျာနံ သုဗောဓတ္တာ စ ဒွီသု ဝေဒနာသုယေဝ အနုသေတီတိ ဝုတ္တံ၊ ဧဝံ ဥပရိပိ။ န ကေဝလဉ္စေသ အနုသယမာနော ဣမာသု ဒွီသု ဝေဒနာသုယေဝ၊ ဝေဒနာသမ္ပယုတ္တေသု ဓမ္မေသု စ အနုသေတိ၊ ဣဋ္ဌေသု ပန ရူပါဒီသုပိ အနုသေတိ ဧဝ။ ဝုတ္တမ္ပိ စေတံ ဝိဘင်္ဂပ္ပကရဏေ ‘‘ယံ လောကေ ပိယရူပံ သာတရူပံ၊ ဧတ္ထ သတ္တာနံ ကာမရာဂါနုသယော အနုသေတီ’’တိ (ဝိဘ။ ၈၁၆)၊ ဧတ္ထာနုသယယမကေပိ ဝုတ္တံ ‘‘ဒုက္ခာယ ဝေဒနာယ ရူပဓာတုယာ ဧတ္ထ ကာမရာဂါနုသယော နာနုသေတီ’’တိအာဒိ။ ဧတေန ဝုတ္တာဝသေသရူပါဒီသု ဆသုပိ အာရမ္မဏေသု အနုသေတီတိ ဝုတ္တံ ဟောတိ။ ဣဓ ပန တံ သဗ္ဗံ အဝတွာ ကိဉ္စိဒေဝ ပဓာနတ္တာဒိနာ ကာရဏေန ဝုတ္တန္တိ ဂဟေတဗ္ဗံ။

ဒုက္ခာယာတိ ဧတ္ထ ပဋိဃစိတ္တသမ္ပယုတ္တာ ဒွေ ဒေါမနဿဝေဒနာ၊ ကာယဝိညာဏသမ္ပယုတ္တာ ဒုက္ခဝေဒနာ စာတိ တိဿော ဝေဒနာ၊ တံ သမ္ပယုတ္တာ စ ဓမ္မာ၊ အနိဋ္ဌာ ဆ ရူပါဒယော ဓမ္မာ ပဋိဃာနုသယသဟဇာတဝသေန၊ အာရမ္မဏဝသေန စ ယထာရဟံ အနုသယနဋ္ဌာနံ။ ကိံ ပန ဣတရာ ဒွေ ဝေဒနာ ဣဋ္ဌာရမ္မဏံ ဝါ ပဋိဃဿ အာရမ္မဏံ န ဟောန္တီတိ? နော န ဟောန္တိ။ ပရိဟီနဇ္ဈာနဿ ဟိ နဋ္ဌံ ဣဋ္ဌံ သသမ္ပယုတ္တဓမ္မံ ဈာနမာရဗ္ဘ ဒေါမနဿံ ဥပ္ပဇ္ဇတိ၊ တံ ပန အာရမ္မဏမတ္တမေဝ၊ နာနုသယနဋ္ဌာနံ ဣဋ္ဌတ္တာ။ အနိဋ္ဌမေဝ ဟိ ဣဋ္ဌတော ပဋိဟနနနိမိတ္တံ၊ ယံ ပန တတ္ထုပ္ပန္နံ၊ တဿ ပဋိဃမတ္တမေဝ ဟောတိ၊ န ပဋိဃာနုသယောတိ။ ပဋိဃာနုသယော ဟိ အနိဋ္ဌာရမ္မဏေ ပဋိဟနနဝသေန ဥပ္ပန္နော ထာမဂတော ကိလေသော၊ ဣတရော ဒေါမနဿေန သဒ္ဓိံ ဥပ္ပန္နောပိ အတ္တနော ပဋိဟနနကိစ္စဿ အကရဏတော ပဋိဃာနုသယော န ဟောတိ၊ အဗ္ဗောဟာရိကတ္တံ ဂစ္ဆတိ။ ယထာ ဟိ ပါဏာတိပါတစေတနာယ သဒ္ဓိံ ဥပ္ပန္နောပိ ဗျာပါဒေါ မနောကမ္မံ နာမ န ဟောတိ၊ အဗ္ဗောဟာရိကတ္တံ ဂစ္ဆတိ၊ ဧဝန္တိ ဂဟေတဗ္ဗံ။ တေနေဝ နေက္ခမ္မဿိတံ ဒေါမနဿံ သေဝိတဗ္ဗံ ဝုတ္တံ။ မာနာနုသယဿ ပန ဒုက္ခဒေါမနဿဝဇ္ဇိတာ သဗ္ဗေ လောကိယာ ဓမ္မာ အနုသယနဋ္ဌာနံ။ ‘‘ဒုက္ခာယ ဝေဒနာယ အပရိယာပန္နေ ဧတ္ထ…ပေ… မာနာနုသယော စ နာနုသေတီ’’တိ ဟိ ဝုတ္တံ။ ဒိဋ္ဌာနုသယဝိစိကိစ္ဆာနုသယာနံ ပန လောကုတ္တရဝဇ္ဇိတာ သဗ္ဗေပိ ဓမ္မာ အနုသယနဋ္ဌာနံ။ တေန ဝုတ္တံ ‘‘သဗ္ဗသက္ကာယပရိယာပန္နေသု ဓမ္မေသူ’’တိ။ တတ္ထ သံသာရဝဋ္ဋနိဿိတဋ္ဌေန သက္ကာယပရိယာပန္နေသု သဗ္ဗဓမ္မေသူတိ အတ္ထော။ ဧဝံ အဝိဇ္ဇာနုသယောပိ ဝေဒိတဗ္ဗော။ သဗ္ဗတ္ထ စ သဟဇာတာရမ္မဏဘေဒေါ ဟေဋ္ဌာ ဝုတ္တနယေနေဝ ဝေဒိတဗ္ဗော။

ဘဝရာဂါနုသယော ပန ကိဉ္စာပိ ဒိဋ္ဌိဝိပ္ပယုတ္တေသု စတူသု စိတ္တေသု ဥပ္ပဇ္ဇနတော သဟဇာတဝသေန ကာမဓာတုယာ ဒွီသု ဝေဒနာသု အနုသေတီတိ ဝတ္တဗ္ဗော ဘဝေယျ၊ သော ပန ယသ္မာ ရူပါရူပါဝစရမေဝါရမ္မဏံ လဘတိ၊ န ကာမာဝစရာရမ္မဏမေဝ၊ အနုသယာနံ ပန တံ န အနုသယနဋ္ဌာနံ၊ တသ္မာ အာရမ္မဏဝသေန နိယမံ အကတွာ ‘‘ရူပဓာတုယာ အရူပဓာတုယာ ဧတ္ထ ဘဝရာဂါနုသယော အနုသေတီ’’တိ ဝုတ္တံ။ တံ ရာဂဝသေန သော စ သဗ္ဗောပိ ရာဂေါ ကာမရာဂါနုသယော ဂဟေတဗ္ဗောတိ အယံ ဥပ္ပတ္တိဋ္ဌာနဝါရေ နယော။

ဣတရေသု ပန သတ္တသု မဟာဝါရေသု တာဝ ‘‘ယဿ ကာမရာဂါနုသယော အနုသေတိ၊ တဿ ပဋိဃာနုသယော အနုသေတီတိ? အာမန္တာ။ ယဿ ဝါ ပန ပဋိဃာနုသယော အနုသေတိ၊ တဿ ကာမရာဂါနုသယော အနုသေတီတိ? အာမန္တာ။ ယဿ ကာမရာဂါနုသယော အနုသေတိ၊ တဿ မာနာနုသယော အနုသေတီတိ? အာမန္တာ။ ယဿ ဝါ ပန မာနာနုသယော အနုသေတိ၊ တဿ ကာမရာဂါနုသယော အနုသေတီတိ? အနာဂါမိဿ မာနာနုသယော အနုသေတိ၊ နော စ တဿ ကာမရာဂါနုသယော အနုသေတိ၊ တိဏ္ဏံ ပုဂ္ဂလာနံ မာနာနုသယော စ အနုသေတိ၊ ကာမရာဂါနုသယော စ အနုသေတိ။ ယဿ ကာမရာဂါနုသယော အနုသေတိ၊ တဿ ဒိဋ္ဌာနုသယော အနုသေတီတိ? ဒွိန္နံ ပုဂ္ဂလာနံ ကာမရာဂါနုသယော အနုသေတိ၊ နော စ…ပေ… ဒိဋ္ဌာနုသယော စ အနုသေတိ၊ ယဿ ဝါ ပန…ပေ… အာမန္တာ။ ယဿ ကာမရာဂါနုသယော အနုသေတိ၊ တဿ ဝိစိကိစ္ဆာနုသယော အနုသေတီ’’တိ ပုစ္ဆာယပိ ဒိဋ္ဌာနုသယသဒိသမေဝ ဝိဿဇ္ဇနံ။ ယဿ ကာမရာဂါနုသယော အနုသေတိ၊ တဿ ဘဝရာဂါနုသယော အနုသေတီတိ? အာမန္တာ။ ယဿ ဝါ ပန…ပေ… အနုသေတီတိ…ပေ… တိဏ္ဏံ ပုဂ္ဂလာနံ ဘဝရာဂါနုသယော စ အနုသေတိ၊ ကာမရာဂါနုသယော စ အနုသေတိ။ အဝိဇ္ဇာနုသယေပိ ဧသေဝ နယော။ ဣမိနာ နယေန ပဋိဃာနုသယာဒိမူလိကာသု ပုစ္ဆာသု ဝိဿဇ္ဇနနယော ဝေဒိတဗ္ဗော။ အယံ ဧကမူလကေ နယော။

ယဿ ကာမရာဂါနုသယော စ ပဋိဃာနုသယော စ အနုသေတိ၊ တဿ မာနာနုသယော အနုသေတီတိ? အာမန္တာ။ ဒွိန္နံ ဒွိမူလိကာ…ပေ… ပဉ္စမူလိကာနံ ပန ဧကမူလေ ဝုတ္တာနုသာရေန ဝိဿဇ္ဇနနယော ဉာတဗ္ဗော။ တတြာယံ ပစ္ဆိမာနုသယေ ယောဇနာ – ‘‘ယဿ ကာမရာဂါနုသယော စ ပဋိဃာနုသယော စ မာနာနုသယော စ ဒိဋ္ဌာနုသယော စ ဝိစိကိစ္ဆာနုသယော စ ဘဝရာဂါနုသယော စ အနုသေတိ၊ တဿ အဝိဇ္ဇာနုသယော အနုသေတီတိ? အာမန္တာ။ ယဿ ဝါ ပန အဝိဇ္ဇာနုသယော အနုသေတိ၊ တဿ ကာမရာဂါနုသယော စ…ပေ… ဘဝရာဂါနုသယော စ အနုသေတီတိ? အနာဂါမိဿ အဝိဇ္ဇာနုသယော စ မာနာနုသယော စ ဘဝရာဂါနုသယော စ အနုသေတိ၊ န ဣတရေ၊ ဒွိန္နံ ပုဂ္ဂလာနံ အဝိဇ္ဇာနုသယော စ ကာမရာဂပဋိဃမာနဘဝရာဂါနုသယာ စ အနုသေန္တိ၊ န ဒိဋ္ဌိဝိစိကိစ္ဆာနုသယာ၊ ပုထုဇ္ဇနဿ ပန သဗ္ဗေပိ အနုသေန္တီ’’တိ အယံ ပုဂ္ဂလဝါရေ နယော။

ဩကာသဝါရေ ပန ‘‘ယတ္ထ ကာမရာဂါနုသယော အနုသေတိ၊ တတ္ထ ပဋိဃာနုသယော အနုသေတီတိ? နော။ ယတ္ထ ဝါ ပန…ပေ… အနုသေတီတိ? နော။ ယတ္ထ ကာမရာဂါနုသယော အနုသေတိ၊ တတ္ထ မာနာနုသယော အနုသေတီတိ? အာမန္တာ။ ယတ္ထ ဝါ ပန မာနာနုသယော အနုသေတိ၊ တတ္ထ ကာမရာဂါနုသယော အနုသေတီတိ? ရူပဓာတုယာ အရူပဓာတုယာ ဧတ္ထ မာနာနုသယော အနုသေတိ ၊ န ကာမရာဂါနုသယော၊ ကာမဓာတုယာ ဒွီသု ဝေဒနာသု တဒုဘယံ အနုသေတိ။ ယတ္ထ ကာမရာဂါနုသယော…ပေ… အနုသေတီတိ? အာမန္တာ။ ယတ္ထ ဝါ ပန…ပေ… အနုသေတီတိ? ဒုက္ခာယ ဝေဒနာယ ရူပဓာတုယာ အရူပဓာတုယာ ဧတ္ထ ဝိစိကိစ္ဆာနုသယော အနုသေတိ၊ န ကာမရာဂါနုသယော၊ ကာမဓာတုယာ ဒွီသု ဝေဒနာသု တဒုဘယံ အနုသေတိ။ ယတ္ထ ကာမရာဂါနုသယော…ပေ… အနုသေတိ၊ တတ္ထ ဘဝရာဂါနုသယော အနုသေတီတိ? နော။ ယတ္ထ ဝါ ပန…ပေ… နော။ ယတ္ထ ကာမရာဂါနုသယော အနုသေတိ၊ တတ္ထ အဝိဇ္ဇာနုသယော အနုသေတီတိ? အာမန္တာ။ ယတ္ထ ဝါ ပန…ပေ… အနုသေတီတိ? ဒုက္ခာယ ဝေဒနာယ ရူပါရူပဓာတုယာ ဧတ္ထ အဝိဇ္ဇာနုသယော အနုသေတိ၊ န ကာမရာဂါနုသယော၊ ကာမဓာတုယာ ဒွီသု ဝေဒနာသု တဒုဘယံ အနုသေတိ။

ယတ္ထ ပဋိဃာနုသယော အနုသေတိ၊ တတ္ထ မာနာနုသယော အနုသေတီတိ? နော။ ယတ္ထ ဝါ ပန…ပေ… နော။ ယတ္ထ ပဋိဃာနုသယော အနုသေတိ၊ တတ္ထ ဒိဋ္ဌာနုသယော ဝိစိကိစ္ဆာနုသယော အနုသေတီတိ? အာမန္တာ။ ယတ္ထ ဝါ ပန…ပေ… အနုသေတီတိ? ကာမဓာတုယာ ဒွီသု ဝေဒနာသု ရူပါရူပဓာတုယာ ဧတ္ထ ဝိစိကိစ္ဆာနုသယော အနုသေတိ၊ န ပဋိဃာနုသယော၊ ဒုက္ခာယ ပန ဝေဒနာယ တဒုဘယံ အနုသေတိ။ ယတ္ထ ပဋိဃာနုသယော အနုသေတိ၊ တတ္ထ ဘဝရာဂါနုသယော အနုသေတီတိ? နော။ ယတ္ထ ဝါ ပန…ပေ… နော။ ယတ္ထ ပဋိဃာနုသယော အနုသေတိ၊ တတ္ထ အဝိဇ္ဇာနုသယော အနုသေတီတိ? အာမန္တာ။ ယတ္ထ ဝါ ပန…ပေ… အနုသေတီတိ…ပေ… ဒုက္ခာယ ဝေဒနာယ တဒုဘယံ အနုသေတိ၊ အညတ္ထ အဝိဇ္ဇာနုသယော စ။

ယတ္ထ မာနာနုသယော အနုသေတိ၊ တတ္ထ ဒိဋ္ဌာနုသယော ဝိစိကိစ္ဆာနုသယော အနုသေတီတိ? အာမန္တာ။ ယတ္ထ ဝါ ပန…ပေ… အနုသေတီတိ? ဒုက္ခာယ ဝေဒနာယ ဒိဋ္ဌာနုသယောဝ၊ နေတရော ၊ တဒညေသု သဗ္ဗတ္ထ အနုသေတိ။ ယတ္ထ မာနာနုသယော အနုသေတိ၊ တတ္ထ ဘဝရာဂါနုသယော အနုသေတီတိ? ကာမဓာတုယာ ဒွီသု ဝေဒနာသု မာနာနုသယော၊ နေတရော၊ ရူပါရူပဓာတုယာ ပန တဒုဘယံ အနုသေတိ။ ယတ္ထ ဝါ ပန…ပေ… အာမန္တာ။ ယတ္ထ မာနာနုသယော အနုသေတိ၊ တတ္ထ အဝိဇ္ဇာနုသယော…ပေ… အာမန္တာ။ ယတ္ထ ဝါ ပန…ပေ… အနုသေတီတိ? ဒုက္ခဝေဒနံ ဌပေတွာ တဒညာသု သဗ္ဗတ္ထ တဒုဘယံ အနုသေတိ။ ယတ္ထ ဒိဋ္ဌာနုသယော၊ တတ္ထ ဝိစိကိစ္ဆာနုသယော…ပေ… အာမန္တာ။ ယတ္ထ ဒိဋ္ဌာနုသယော၊ တတ္ထ ဘဝရာဂါနုသယော အနုသေတီတိ? ကာမဓာတုယာ တီသု ဝေဒနာသု ဒိဋ္ဌာနုသယောဝ၊ ရူပါရူပဘဝေသု တဒုဘယံ အနုသေတိ။ ယတ္ထ ဝါ ပန…ပေ… အာမန္တာ။ ယတ္ထ ဒိဋ္ဌာနုသယော အနုသေတိ၊ တတ္ထ အဝိဇ္ဇာနုသယော…ပေ… အာမန္တာ။ ယတ္ထ ဝါ ပန…ပေ… အာမန္တာ။ ဧသ နယော ဝိစိကိစ္ဆာမူလကေသုပိ။ ယတ္ထ ဘဝရာဂါနုသယော၊ တတ္ထ အဝိဇ္ဇာနုသယော အနုသေတီတိ? အာမန္တာ။ ယတ္ထ ဝါ ပန…ပေ… အနုသေတိ၊ တတ္ထ ကာမဓာတုယာ တီသု ဝေဒနာသု အဝိဇ္ဇာနုသယောဝ၊ ရူပါရူပဘဝေသု ပန တဒုဘယံ အနုသေတီ’’တိ အယမေတ္ထ ဧကမူလနယော။

‘‘ယဿ…ပေ… နာနုသေတိ။ ယဿ…ပေ… နာနုသေတိ မာနာနုသယော၊ အရဟတော ပန တဒုဘယမ္ပိ နာနုသေတိ။ ယဿ ဝါ ပန…ပေ… အာမန္တာ။ ယဿ ကာမရာဂါနုသယော နာနုသေတိ၊ တဿ ဒိဋ္ဌာနုသယော ဝိစိကိစ္ဆာနုသယော နာနုသေတီတိ? အာမန္တာ။ ယဿ ဝါ ပန…ပေ… နာနုသေတီတိ? ဒွိန္နံ ပုဂ္ဂလာနံ ဝိစိကိစ္ဆာနုသယောဝ နာနုသေတိ၊ နေတရော၊ အနာဂါမိအရဟန္တာနံ တဒုဘယမ္ပိ နာနုသေတီ’’တိအာဒိနာ နယေန ပုဂ္ဂလဝါရေ၊

‘‘ယတ္ထ ကာမရာဂါနုသယော နာနုသေတိ၊ တတ္ထ ပဋိဃာနုသယော နာနုသေတီတိ? ဒုက္ခာယ ဝေဒနာယ ကာမရာဂါနုသယောဝ နာနုသေတိ၊ နေတရော၊ ရူပါရူပဓာတုပရိယာပန္နေသု တဒုဘယံ နာနုသေတိ။ ယတ္ထ ဝါ ပန…ပေ… နာနုသေတီတိ ? ကာမဓာတုယာ ဒွီသု ဝေဒနာသု ပဋိဃာနုသယောဝ၊ ရူပါရူပပရိယာပန္နေသု ပန တဒုဘယံ နာနုသေတိ။ ယတ္ထ ကာမရာဂါနုသယော နာနုသေတိ၊ တတ္ထ မာနာနုသယော နာနုသေတီတိ? ရူပါရူပဓာတူသု ကာမရာဂါနုသယောဝ၊ ဒုက္ခာယ ပန ဝေဒနာယ၊ အပရိယာပန္နေသု စ တဒုဘယံ နာနုသေတိ။ ယတ္ထ ဝါ ပန…ပေ… အာမန္တာ။ ယတ္ထ ကာမရာဂါနုသယော နာနုသေတိ၊ တတ္ထ ဒိဋ္ဌာနုသယော၊ ဝိစိကိစ္ဆာနုသယော နာနုသေတီတိ? ဒုက္ခာယ ဝေဒနာယ ရူပါရူပဓာတူသု ကာမရာဂါနုသယောဝ၊ အပရိယာပန္နေ ပန တဒုဘယံ နာနုသေတီ’’တိအာဒိနာ နယေန ဩကာသဝါရေ စ၊

‘‘ယဿ ယတ္ထ ကာမရာဂါနုသယော နာနုသေတိ၊ တဿ တတ္ထ ပဋိဃာနုသယော နာနုသေတီတိ? တိဏ္ဏံ ပုဂ္ဂလာနံ ဒုက္ခာယ ဝေဒနာယ ကာမရာဂါနုသယောဝ၊ ရူပါရူပပရိယာပန္နေသု တဒုဘယံ နာနုသေတိ၊ ဒွိန္နံ ပုဂ္ဂလာနံ သဗ္ဗတ္ထ တဒုဘယံ နာနုသေတိ။ ယဿ ဝါ ပန ယတ္ထ…ပေ… နာနုသေတီတိ? တိဏ္ဏံ ပုဂ္ဂလာနံ ကာမဓာတုယာ ဒွီသု ဝေဒနာသု ပဋိဃာနုသယောဝ၊ ရူပါရူပပရိယာပန္နေသု တဒုဘယံ နာနုသေတိ၊ ဒွိန္နံ ပုဂ္ဂလာနံ သဗ္ဗတ္ထ တဒုဘယံ နာနုသေတိ။ ယဿ ယတ္ထ ကာမရာဂါနုသယော နာနုသေတိ၊ တဿ တတ္ထ မာနာနုသယော နာနုသေတီတိ? တိဏ္ဏံ ပုဂ္ဂလာနံ ရူပါရူပဓာတုယာ ကာမရာဂါနုသယောဝ၊ နေတရော၊ ဒုက္ခာယ ဝေဒနာယ၊ အပရိယာပန္နေ စ တဒုဘယံ နာနုသေတိ၊ အနာဂါမိဿ ကာမဓာတုယာ ဒွီသု ဝေဒနာသု ရူပါရူပဓာတုယာ ကာမရာဂါနုသယောဝ၊ အရဟတော ပန သဗ္ဗတ္ထ တဒုဘယံ နာနုသေတီ’’တိအာဒိနာ ပုဂ္ဂလောကာသဝါရေ စ ဝုတ္တာနုသာရေန နယော ဉာတဗ္ဗောတိ အယံ ပါဠိနယော။

တတ္ထ ‘‘ယဿ ကာမရာဂါနုသယော အနုသေတိ၊ တဿ ပဋိဃာနုသယော အနုသေတီ’’တိ ဧတ္ထ ယဒေတံ ‘‘အာမန္တာ’’တိ ပဋိဝစနံ ဒိန္နံ၊ တံ ဒုဒ္ဒိန္နံ ဝိယ ခါယတိ။ ကသ္မာ? ကာမရာဂပဋိဃာနံ ဧကက္ခဏေ အနုပ္ပတ္တိတော။ ယထာ ဟိ ‘‘ယဿ မနာယတနံ ဥပ္ပဇ္ဇတိ၊ တဿ ဓမ္မာယတနံ ဥပ္ပဇ္ဇတီ’’တိအာဒီသု မနာယတနဓမ္မာယတနာဒီနိ ဧကက္ခဏေ ဥပ္ပဇ္ဇန္တိ၊ န တထာ ကာမရာဂပဋိဃာ၊ ဝိသုညေဝ ဥပ္ပဇ္ဇနတော၊ တသ္မာ ဧတ္ထ ‘‘နော’’တိ ပဋိသေဓော ကတ္တဗ္ဗော သိယာ၊ တံ ပန အကတွာ ‘‘အာမန္တာ’’တိ ပဋိဝစနဿ ဒိန္နတ္တာ ဟေဋ္ဌာ ယမကေသု ဝိယ ဧတ္ထ ခဏပစ္စုပ္ပန္နဝသေန ဝတ္တမာနဝေါဟာရံ အဂ္ဂဟေတွာ အညထာ ဂဟေတဗ္ဗော။ ကထံ ဂဟေတဗ္ဗော? အပ္ပဟီနဝသေန။ အပ္ပဟီနတံ ဟိ သန္ဓာယ အယံ အနုသေတီတိ ဝတ္တမာနဝေါဟာရော ဝုတ္တော၊ န ခဏပစ္စုပ္ပန္နတံ၊ တသ္မာ ဣမိဿာ ပုစ္ဆာယ ယဿ ကာမရာဂါနုသယော အပ္ပဟီနော၊ န အနုပ္ပတ္တိဓမ္မတံ အာပါဒိတော၊ တဿ ပဋိဃာနုသယော အပ္ပဟီနော၊ န အနုပ္ပတ္တိဓမ္မတံ အာပါဒိတော၊ တဿ ပဋိဃာနုသယော အပ္ပဟီနောတိ ဧဝမတ္ထော ဂဟေတဗ္ဗော။ ယသ္မာ စ တေသု ကာမရာဂပဋိဃေသု ယဿေကော အပ္ပဟီနော၊ တဿ ဣတရောပိ အပ္ပဟီနောဝ ဟောတိ၊ တသ္မာ ‘‘အာမန္တာ’’တိ ဝုတ္တံ။ ဣတော ပရေသုပိ ဧဝရူပေသု ဥပ္ပဇ္ဇတိဝါရာဒိဝိဿဇ္ဇနေသု ဧသေဝ နယော။ တိဏ္ဏံ ပုဂ္ဂလာနန္တိ ပုထုဇ္ဇနသောတာပန္နသကဒါဂါမီနံ။ ဒွိန္နန္တိ သောတာပန္နသကဒါဂါမီနံ။ ဧဝံ ဥပ္ပဇ္ဇနံ ဒီပိတံ။ ဩကာသဝါရဿ ပဌမဒုတိယပုစ္ဆာသု ယသ္မာ ကာမရာဂပဋိဃာ ဧကစိတ္တေ န ဥပ္ပဇ္ဇန္တိ၊ တသ္မာ ‘‘နော’’တိ ပဋိသေဓော ကတော။ ဒုကမူလာဒီသု စ ယသ္မာ ကာမရာဂပဋိဃာဒယော ဧကသ္မိံ ဌာနသင်္ခါတေ စိတ္တေ၊ အာရမ္မဏေ ဝါ န ဥပ္ပဇ္ဇန္တိ၊ တသ္မာ ‘‘နတ္ထီ’’တိ တတ္ထ ပဋိက္ခေပေါ ကတော၊ အယံ ပုစ္ဆာ အပုဗ္ဗာ ဧဝါတိ အဓိပ္ပာယော။ ပုဂ္ဂလောကာသဝါရေ စတုန္နန္တိ ပုထုဇ္ဇနသောတာပန္နသကဒါဂါမိအနာဂါမီနံ။ ပဋိလောမေ ဒွိန္နန္တိ အနာဂါမိအရဟန္တေ သန္ဓာယ ဝုတ္တန္တိ အယံ အနုသယဝါရေ နယော။

သာနုသယဝါရေ ပန ‘‘ယော ကာမရာဂါနုသယေန သာနုသယော၊ သော ပဋိဃာနုသယေန သာနုသယောတိ? အာမန္တာ…ပေ… မာနာနုသယေန သာနုသယောတိ? အာမန္တာ။ ယော ဝါ ပန မာနာနုသယေန သာနုသယော၊ သော ကာမရာဂါနုသယေန သာနုသယောတိ? အနာဂါမီ မာနာနုသယေနေဝ၊ န ကာမရာဂါနုသယေန၊ တယော ပန ပုဂ္ဂလာ တဒုဘယေနာပိ အနုသယေနာ’’တိ ဣမိနာ နယေန သေသေသု ဒုကမူလာဒီသု ပုစ္ဆာဝိဿဇ္ဇနနယော ဉာတဗ္ဗော၊ အယံ ပုဂ္ဂလဝါရေ နယော။

‘‘ယတော ကာမရာဂါနုသယေန သာနုသယော၊ တတော ပဋိဃာနုသယေန သာနုသယောတိ? နော…ပေ… မာနာနုသယေန သာနုသယောတိ? အာမန္တာ။ ယတော ဝါ ပန မာနာနုသယေန သာနုသယော၊ တတော ကာမရာဂါနုသယေန သာနုသယောတိ? ရူပါရူပဓာတုယာ မာနာနုသယေနေဝ၊ နေတရေန၊ ကာမဓာတုယာ ဒွီသု ဝေဒနာသု တဒုဘယေနာပီ’’တိအာဒိနာ ဩကာသဝါရေ စ၊

‘‘ယော ယတော ကာမရာဂါနုသယေန သာနုသယော၊ သော တတော ပဋိဃာနုသယေန သာနုသယောတိ? နော’’တိအာဒိနာ ပုဂ္ဂလောကာသဝါရေ စာတိ ဧဝံ အနုလောမနယေ စ၊ ‘‘ယော ကာမရာဂါနုသယေန နိရနုသယော၊ သော ပဋိဃာနုသယေန နိရနုသယောတိ? အာမန္တာ’’တိအာဒိနာ ပဋိလောမနယေပိ သဗ္ဗတ္ထ အနုသယဝါရေ ဝုတ္တာနုသာရတော ပုစ္ဆာဝိဿဇ္ဇနနယော ဉာတဗ္ဗော။

တတ္ထ ယတော ကာမရာဂါနုသယေန သာနုသယောတိ ယတော ကာရဏတော ဥပ္ပန္နေန ကာမရာဂါနုသယေန သာနုသယော၊ ကိံ သော တတော ကာရဏတော ဥပ္ပန္နပဋိဃာနုသယေနပိ သာနုသယောတိ ဝုစ္စတိ။ ယသ္မာ ပနေတေ ဒွေ ဧကသ္မာ ဌာနာ န ဥပ္ပဇ္ဇန္တိ၊ တသ္မာ ‘‘နော’’တိ ပဋိသေဓော ကတော သေသံ တာဒိသမေဝါတိ အယံ သာနုသယဝါရေ နယော။

ပဇဟနဝါရေ ပန ‘‘ယော ကာမရာဂါနုသယံ ပဇဟတိ၊ သော ပဋိဃာနုသယံ ပဇဟတီတိ? အာမန္တာ…ပေ… မာနာနုသယံ ပဇဟတီတိ? တဒေကဋ္ဌံ ပဇဟတိ။ ယော ဝါ ပန မာနာနုသယံ ပဇဟတိ၊ သော ကာမရာဂါနုသယံ ပဇဟတီတိ? နော…ပေ… သော ဒိဋ္ဌာနုသယံ ဝိစိကိစ္ဆာနုသယံ ပဇဟတီတိ? နော။ ယော ဝါ ပန ဝိစိကိစ္ဆာနုသယံ ပဇဟတိ၊ သော ကာမရာဂါနုသယံ ပဇဟတီတိ ? တဒေကဋ္ဌံ ပဇဟတိ။ ယော…ပေ… ဘဝရာဂါနုသယံ အဝိဇ္ဇာနုသယံ ပဇဟတီတိ? တဒေကဋ္ဌံ ပဇဟတိ…ပေ… ယော ကာမရာဂါနုသယဉ္စ ပဋိဃာနုသယဉ္စ မာနာနုသယဉ္စ…ပေ… ပဇဟတီတိ? နတ္ထီ’’တိအာဒိနာ ပုဂ္ဂလဝါရေ၊

‘‘ယတော ကာမရာဂါနုသယံ ပဇဟတိ၊ တတော ပဋိဃာနုသယံ ပဇဟတီတိ? နော…ပေ… ယတော ကာမရာဂါနုသယံ ပဇဟတိ၊ တတော မာနာနုသယံ ပဇဟတီတိ? အာမန္တာ။ ယတော ဝါ ပန မာနာနုသယံ ပဇဟတိ၊ တတော ကာမရာဂါနုသယံ ပဇဟတီတိ? ရူပါရူပဓာတုယာ တတော မာနာနုသယမေဝ၊ ကာမဓာတုယာ ပန ဒွီသု ဝေဒနာသု တတော မာနာနုသယံ ပဇဟတီ’’တိအာဒိနာ ဩကာသဝါရေ စ၊

‘‘ယော ယတော ကာမရာဂါနုသယံ ပဇဟတိ၊ သော တတော ပဋိဃာနုသယံ ပဇဟတီတိ? နော…ပေ… မာနာနုသယံ ပဇဟတီတိ? တဒေကဋ္ဌံ ပဇဟတိ…ပေ… ဝိစိကိစ္ဆာနုသယံ ပဇဟတီတိ? နော။ ယော ဝါ ပန ယတော ဝိစိကိစ္ဆာနုသယံ ပဇဟတိ၊ သော တတော ကာမရာဂါနုသယံ ပဇဟတီတိ? အဋ္ဌမကော ဒုက္ခာယ ဝေဒနာယ ရူပါရူပဓာတုယာ သော တတော ဝိစိကိစ္ဆာနုသယံ ပဇဟတိ၊ နော စ သော တတော ကာမရာဂါနုသယံ ပဇဟတိ၊ သွေဝ ပုဂ္ဂလော ကာမဓာတုယာ ဒွီသု ဝေဒနာသု သော တတော ဝိစိကိစ္ဆာနုသယံ ပဇဟတိ၊ ကာမရာဂါနုသယံ တဒေကဋ္ဌံ ပဇဟတီ’’တိအာဒိနာ ပုဂ္ဂလောကာသဝါရေ စာတိ ဧဝံ အနုလောမနယေ စ၊ ‘‘ယော ကာမရာဂါနုသယံ န ပဇဟတိ၊ သော ပဋိဃာနုသယံ န ပဇဟတီတိ? အာမန္တာ…ပေ… ဝိစိကိစ္ဆာနုသယံ န ပဇဟတီတိ ? အဋ္ဌမကော ကာမရာဂါနုသယံ န ပဇဟတိ၊ နေတရံ၊ အနာဂါမိမဂ္ဂသမင်္ဂိံ၊ အဋ္ဌမကဉ္စ ဌပေတွာ အဝသေသာ ပုဂ္ဂလာ တဒုဘယံ န ပဇဟန္တီ’’တိအာဒိနာ ပဋိလောမနယေ စ သဗ္ဗတ္ထ ပုစ္ဆာဝိဿဇ္ဇနနယော ဉာတဗ္ဗော။

တတ္ထ ပဇဟတီတိ တေန တေန မဂ္ဂေန ပဟာနပရိညာဝသေန ပဇဟတိ။ တဒေကဋ္ဌန္တိ ပဟာနေကဋ္ဌတံ သန္ဓာယ ဝုတ္တံ။ ပဌမမဂ္ဂါဒိနာ ဟိ န ကေဝလံ ဒိဋ္ဌာဒိကာ ဧဝ ဓမ္မာ ပဟီယန္တိ၊ အထ ခေါ အပါယဂမနိယာ တေန ကာမရာဂပဋိဃမာနာဒယောပိ ပဟီယန္တိ ဧဝ။ ပဌမမဂ္ဂဝဇ္ဈာ ဟိ ကာမရာဂါ၊ အပါယဂမနိယာ စ မာနာဝိဇ္ဇာဒယောပိ၊ တတိယမဂ္ဂဝဇ္ဈာတိ ပဟာနေကဋ္ဌာ ဟုတွာ ပဟီယန္တိ ဧဝါတိ ‘‘နော’’တိ အရဟတ္တမဂ္ဂဋ္ဌံ သန္ဓာယ ဝုတ္တံ။ သော ဟိ ကာမရာဂါနုသယံယေဝ ပဟီနတ္တာ န ပဇဟတီတိ။ ယတော ကာမရာဂါနုသယံ ပဇဟတီတိ ယတော ဥပ္ပဇ္ဇနကံ ကာမရာဂါနုသယံ ပဇဟတီတိ အတ္ထော၊ အဋ္ဌမကောတိ သောတာပတ္တိမဂ္ဂဋ္ဌော။ သော ဟိ ဒက္ခိဏေယျက္ကမေန အရဟတ္တဖလဋ္ဌတော ပဋ္ဌာယ ဂဏိယမာနော အဋ္ဌမကော နာမ။ ပဋိလောမနယေ အနာဂါမိမဂ္ဂသမင်္ဂိဉ္စ အဋ္ဌမကဉ္စ ဌပေတွာ အဝသေသာတိ ပုထုဇ္ဇနသေသသေခါသေခါ။ တေသု ဟိ ပုထုဇ္ဇနာ ပဟာနပရိညာယ အဘာဝေန န ပဇဟန္တိ၊ သေသာ တေသံ ပဟီနတ္တာတိ ဣမိနာ နယေန သဗ္ဗတ္ထ ဝိနိစ္ဆယော ဝေဒိတဗ္ဗောတိ အယံ ပဇဟနဝါရေ နယော။

ပရိညာဝါရော ပန ‘‘ယော ကာမရာဂါနုသယံ ပရိဇာနာတိ၊ သော ပဋိဃာနုသယံ ပရိဇာနာတီ’’တိအာဒိနာ ပဇဟနဝါရသဒိသောဝ။ အယမ္ပိ ဟိ ပဇဟနဝါရော ဝိယ မဂ္ဂဋ္ဌာနညေဝ ဝသေန ဝိဿဇ္ဇိတော။ တတ္ထ ပရိဇာနာတီတိ တီဟိ ပရိညာဟိ ပရိဇာနာတီတိ အတ္ထော။ အယံ ပရိညာဝါရေ နယော။

ပဟီနဝါရေ ပန ‘‘ယဿ ကာမရာဂါနုသယော ပဟီနော၊ တဿ ပဋိဃာနုသယော ပဟီနောတိ? အာမန္တာ…ပေ… မာနာနုသယော ပဟီနောတိ? အနာဂါမိဿ ကာမရာဂါနုသယောဝ၊ အရဟတော ပန မာနာနုသယောပိ ပဟီနော’’တိအာဒိနာ ပုဂ္ဂလဝါရေ၊ ‘‘ယတ္ထ ကာမရာဂါနုသယော ပဟီနော၊ တတ္ထ ပဋိဃာနုသယော ပဟီနောတိ? န ဝတ္တဗ္ဗော ပဟီနောတိ ဝါ အပ္ပဟီနောတိ ဝါ။ ယတ္ထ ဝါ ပန…ပေ… န ဝတ္တဗ္ဗော…ပေ… တတ္ထ မာနာနုသယော ပဟီနောတိ? အာမန္တာ။ ယတ္ထ ဝါ ပန…ပေ… ပဟီနောတိ? ရူပါရူပဓာတုယာ ဧတ္ထ မာနာနုသယော ပဟီနော၊ ကာမရာဂါနုသယော န ဝတ္တဗ္ဗော၊ ကာမဓာတုယာ ဒွီသု ဝေဒနာသု ဧတ္ထ တဒုဘယံ ပဟီန’’န္တိအာဒိနာ ဩကာသဝါရေ၊ ပုဂ္ဂလောကာသဝါရေတိ ဧဝံ အနုလောမနယေ၊ ‘‘ယဿ ကာမရာဂါနုသယော အပ္ပဟီနော၊ တဿ ပဋိဃာနုသယော အပ္ပဟီနောတိ? အာမန္တာ။ ယဿ ဝါ ပန…ပေ… အာမန္တာ…ပေ… ယဿ ဝါ ပန မာနာနုသယော အပ္ပဟီနော၊ တဿ ကာမရာဂါနုသယော အပ္ပဟီနောတိ? အနာဂါမိဿ မာနာနုသယောဝ၊ တိဏ္ဏံ ပုဂ္ဂလာနံ တဒုဘယံ အပ္ပဟီန’’န္တိအာဒိနာ ပဋိလောမနယေ စ ဝုတ္တနယေနေဝ ပုစ္ဆာဝိဿဇ္ဇနနယော ဉာတဗ္ဗော။

ဧတ္ထ စ ဖလဋ္ဌဝသေနေဝ အတ္ထော ဂဟေတဗ္ဗော မဂ္ဂဋ္ဌာနံ ပဟီနကိလေသတ္တာဘာဝါ။ တေသံ ဟိ အနုသယာ ပဟီယန္တိ ဧဝ၊ န ပန ပဟီနာတိ အနာဂါမိအာဒယော ဖလဋ္ဌာဝ ဂဟေတဗ္ဗာ၊ ဩကာသဝါရေ ပန ‘‘န ဝတ္တဗ္ဗော’’တိ ဣဒံ ဥဘိန္နံ ဥပ္ပတ္တိဋ္ဌာနဿ အသာဓာရဏတ္တာ ဝုတ္တံ။ အညံ ဟိ ကာမရာဂါနုသယဿ ဥပ္ပတ္တိဋ္ဌာနံ၊ အညံ ပဋိဃာနုသယဿ။ အဘာဝိတမဂ္ဂဿ စ ယတ္ထ အနုသယော ဥပ္ပဇ္ဇတိ၊ မဂ္ဂေ ဘာဝိတေ တတ္ထေဝ သော ပဟီနော နာမ ဟောတိ၊ တသ္မာ သော တတ္ထ ပဟီနောတိ ဝါ၊ အပ္ပဟီနောတိ ဝါ န ဝတ္တဗ္ဗော၊ သဗ္ဗတ္ထာပိ ပန သယံ အဘာဝေန တတ္ထ အပ္ပဟီနောတိ န ဝတ္တဗ္ဗော။ ဥဘိန္နံ ပန သာဓာရဏဋ္ဌာနံ သန္ဓာယ ‘‘အာမန္တာ’’တိ ဝုတ္တံ။ မာနာနုသယော ဟိ ကာမဓာတုယာ ဝေဒနာဒွယသင်္ခါတေ သာဓာရဏဋ္ဌာနေ ကာမရာဂေန သဒ္ဓိံ ပဟီနော နာမ ဟောတိ ။ ယဿ ကာမရာဂါနုသယော အပ္ပဟီနောတိ ပုထုဇ္ဇနဿ၊ သောတာပတ္တိသကဒါဂါမိဖလဋ္ဌာနဉ္စ ဝသေန အတ္ထော ဂဟေတဗ္ဗော။ ‘‘တိဏ္ဏံ ပုဂ္ဂလာန’’န္တိ ဟိ ဝုတ္တံ။ သေသံ သုဝိညေယျမေဝါတိ အယံ ပဟီနဝါရေ နယော။

ဥပ္ပဇ္ဇနဝါရေ ပန ‘‘ယဿ ကာမရာဂါနုသယော ဥပ္ပဇ္ဇတိ၊ တဿ ပဋိဃာနုသယော ဥပ္ပဇ္ဇတီ’’တိအာဒိနာ သဗ္ဗတ္ထ အနုသယဝါရသဒိသောဝါတိ အယံ ဥပ္ပဇ္ဇနဝါရေ နယော။

ဓာတုဝါရေ ပန ‘‘ကာမဓာတုယာ စုတဿ ကာမဓာတုံ ဥပပဇ္ဇန္တဿ ကတိ အနုသယာ အနုသေန္တိ၊ ကတိ အနုသယာ နာနုသေန္တိ၊ ကတိ အနုသယာ ဘင်္ဂါ? ကာမဓာတုယာ စုတဿ ရူပဓာတုံ ဥပပဇ္ဇန္တဿ…ပေ… ကတိ ဘင်္ဂါ? ကာမဓာတုယာ စုတဿ အရူပဓာတုံ ဥပပဇ္ဇန္တဿ…ပေ… ရူပဓာတုံ ဥပပဇ္ဇန္တဿ န အရူပဓာတုံ ဥပပဇ္ဇန္တဿ…ပေ… ကတိ ဘင်္ဂံ? ကာမဓာတုယာ စုတဿ န ကာမဓာတုံ၊ န အရူပဓာတုံ ဥပပဇ္ဇန္တဿ…ပေ… န ရူပဓာတုံ န အရူပဓာတုံ ဥပပဇ္ဇန္တဿ။ န ကာမဓာတုံ န ရူပဓာတုံ ဥပပဇ္ဇန္တဿ ကတိ ဘင်္ဂါ’’တိ ဧဝံ ကာမဓာတုမူလကာ နဝ ပုစ္ဆာ၊ တထာ ‘‘ရူပဓာတုယာ စုတဿာ’’တိအာဒိနာ ရူပဓာတုမူလကာ နဝ၊ အရူပဓာတုယာ နဝ စာတိ သတ္တဝီသတိ အနုလောမပုစ္ဆာ၊ တထာ ‘‘န ကာမဓာတုယာ စုတဿာ’’တိအာဒိနာ သတ္တဝီသတိ ပဋိလောမပုစ္ဆာ စ၊ တထာ ‘‘န ကာမဓာတုယာ န အရူပဓာတုယာ စုတဿ ကာမဓာတုံ ဥပပဇ္ဇန္တဿာ’’တိအာဒိနာ သတ္တဝီသတိ ဒုကမူလကာ ပုစ္ဆာ စာတိ ဧဝံ ပုစ္ဆာဝါရေ ဧကာသီတိ ပုစ္ဆာ ဝေဒိတဗ္ဗာ။

တတ္ထ အနုသေန္တီတိ စိတ္တသန္တာနေ အနုဂတာ ဟုတွာ ကတိ အနုသေန္တိ၊ ဘင်္ဂါတိ အနုသေန္တိ စ နာနုသေန္တိ စာတိ ဧဝံ ကတိ ဝိဘဇိတဗ္ဗာတိ အတ္ထော။ န ကာမဓာတုံ ဥပပဇ္ဇန္တဿာတိ ကာမဓာတုဝိရဟိတာ ဒွေ ရူပါရူပဓာတုယော ဥပပဇ္ဇန္တဿ။ န ကာမဓာတုံ န ရူပဓာတုန္တိ အရူပဓာတုံ ဥပပဇ္ဇန္တဿ။ န ကာမဓာတုယာတိ ရူပါရူပဓာတူဟိ စုတဿ၊ ဧဝံ သေသေသုပိ သဗ္ဗတ္ထ ပဋိသန္ဓိဝသေန၊ ဓာတုဝသေန စ အတ္ထော ဝေဒိတဗ္ဗောတိ အယံ ဥဒ္ဒေသဝါရေ နယော။

နိဒ္ဒေသဝါရေ ပနဿ ‘‘ကာမဓာတုယာ စုတဿ ကာမဓာတုံ ဥပပဇ္ဇန္တဿ ကဿစိ သတ္တ အနုသယာ အနုသေန္တိ၊ ကဿစိ ပဉ္စ အနုသယာ အနုသေန္တိ၊ အနုသယာ ဘင်္ဂါ နတ္ထိ၊ ကာမဓာတုယာ စုတဿ ရူပဓာတုံ ဥပပဇ္ဇန္တဿ ကဿစိ သတ္တ အနုသယာ အနုသေန္တိ၊ ကဿစိ ပဉ္စ၊ ကဿစိ တယော …ပေ… ဘင်္ဂါ နတ္ထီ’’တိ ဣမိနာ နယေန သဗ္ဗတ္ထ ဝိဿဇ္ဇနံ ဝေဒိတဗ္ဗံ၊ အယံ ပနေတ္ထ ဝိသေသော – ရူပဓာတုယာ စုတဿ ကာမဓာတုံ ဥပပဇ္ဇန္တဿ သတ္တေဝ အနုသယာ အနုသေန္တိ၊ တထာ ‘‘အရူပဓာတုယာ စုတဿ ကာမဓာတုံ ဥပပဇ္ဇန္တဿာ’’တိအာဒီသုပိ၊ အရူပဓာတုယာ ပန စုတဿ ရူပဓာတုယာ ဥပပတ္တိ နတ္ထိ၊ ဟေဋ္ဌာ ဥပပဇ္ဇမာနော ကာမဓာတုံ ဧဝ ဥပပဇ္ဇတိ၊ သတ္တေဝ အနုသယာ အနုသေန္တီတိ ဧဝံ အညေသုပိ ဧဝရူပေသု ဝိဿဇ္ဇနနယော ဝေဒိတဗ္ဗောတိ အယံ ဝိသေသော၊ သေသံ ဝုတ္တနယမေဝါတိ အယမေတ္ထ ပါဠိနယော။

တတ္ထ ကဿစိ သတ္တာတိ ပုထုဇ္ဇနဝသေန ဝုတ္တံ၊ ပဉ္စာတိ သောတာပန္နသကဒါဂါမီနံ ဝသေန။ တေသံ ဟိ ဒိဋ္ဌိဝိစိကိစ္ဆာနုသယာ ပဟီနာတိ၊ ကာမဓာတုယာ ပန အနာဂါမီနံ ဥပပတ္တိအဘာဝတော ပဌမဝါရေ ‘‘ကဿစိ တယော’’တိ န ဝုတ္တံ၊ ရူပါရူပဓာတူသု ဥပ္ပဇ္ဇနဝါရေသု ဧဝ ဝုတ္တံ…ပေ… အနာဂါမီနံ ဟိ ကာမရာဂပဋိဃာနမ္ပိ ပဟီနတ္တာ တယောဝ အနုသယာ အနုသေန္တိ၊ ဣဓ စ အနုသယာနံ ဥပ္ပတ္တိဝသေန နယော၊ အနုသယာနံ အနုသယနံ အဂ္ဂဟေတွာ အပ္ပဟီနဘာဝေန ပဋိသန္ဓိက္ခဏေ အပိ အနုသယနံ ဂဟေတဗ္ဗံ။ သတ္တေဝါတိ အရိယသာဝကဿ ရူပါရူပဓာတုယာ စုတဿ ဟေဋ္ဌာ ကာမဘဝါဒီသု ဥပပတ္တိ နာမ နတ္ထိ၊ ပုထုဇ္ဇနဿေဝ ဟောတိ၊ တသ္မာ ‘‘သတ္တေဝါ’’တိ နိယမေတွာ ဝုတ္တံ၊ အရူပဓာတုယာ စုတဿ ရူပဓာတုယာ ဥပပတ္တိ နတ္ထီတိ။ ကသ္မာ နတ္ထိ? အရူပီနံ ရူပဇ္ဈာနဿ အဘာဝါ။ တေ ဟိ သဗ္ဗသော ရူပသညာနံ သမတိက္ကမနရူပဓာတုံ ဥပပန္နာတိ။ သေသံ နယတော သုဝိညေယျမေဝါတိ အယံ ဓာတုဝါရေ နယော။ အယံ အနုသယယမကမာတိကတ္ထသံဝဏ္ဏနာနယော။

စိတ္တယမကမာတိကတ္ထဝဏ္ဏနာ

စိတ္တယမကမာတိကာယံ ပန ပါဠိဝဝတ္ထာနံ တာဝ ဧဝံ ဝေဒိတဗ္ဗံ။ ဣမိဿံ ဟိ မာတိကာယံ ပုဂ္ဂလဝါရော ဓမ္မဝါရော ပုဂ္ဂလဓမ္မဝါရောတိ အာဒိတောဝ တယော သုဒ္ဓိကမဟာဝါရာ ဟောန္တိ၊ တတ္ထ ‘‘ယဿ စိတ္တံ ဥပ္ပဇ္ဇတိ န နိရုဇ္ဈတီ’’တိ ဧဝံ ပုဂ္ဂလဝသေန စိတ္တဿ ဥပ္ပဇ္ဇနနိရုဇ္ဈနာဒိဘေဒံ ဒီပေန္တော ဂတော ပုဂ္ဂလဝါရော နာမ။ ‘‘ယံ စိတ္တံ ဥပ္ပဇ္ဇတိ န နိရုဇ္ဈတီ’’တိ ဧဝံ ဓမ္မဝသေနေဝ စိတ္တဿ ဥပ္ပဇ္ဇနနိရုဇ္ဈနာဒိဘေဒံ ဒီပေန္တော ဂတော ဓမ္မဝါရော နာမ။ ‘‘ယဿ ယံ စိတ္တံ ဥပ္ပဇ္ဇတိ န နိရုဇ္ဈတီ’’တိ ဧဝံ ဥဘယဝသေနေဝ စိတ္တဿ ဥပ္ပဇ္ဇနနိရုဇ္ဈနာဒိဘေဒံ ဒီပေန္တော ဂတော ပုဂ္ဂလဓမ္မဝါရော နာမ။

တတော ‘‘ယဿ သရာဂံ စိတ္တ’’န္တိအာဒီနံ သောဠသန္နံ ပဒါနံ ဝသေန အပရေ သရာဂါဒိပဒဝိသေသိတာ သောဠသ ပုဂ္ဂလဝါရာ၊ သောဠသ ဓမ္မဝါရာ၊ သောဠသ ပုဂ္ဂလဓမ္မဝါရာတိ အဋ္ဌစတ္တာလီသ မိဿကဝါရာ ဟောန္တိ၊ တေ သရာဂါဒိပဒမတ္တံ ဒဿေတွာ သံခိတ္တာ။ တတော ‘‘ယဿ ကုသလံ စိတ္တ’’န္တိအာဒိနာ နယေန ဆသဋ္ဌိဒွိသတသင်္ခါတာနံ အဘိဓမ္မမာတိကာပဒါနံ ဝသေန အပရေ ကုသလာဒိပဒဝိသေသိတာ ဆသဋ္ဌိဒွိသတပုဂ္ဂလဝါရာ၊ ဆသဋ္ဌိဒွိသတဓမ္မဝါရာ၊ ဆသဋ္ဌိဒွိသတပုဂ္ဂလဓမ္မဝါရာတိ အဋ္ဌနဝုတိသတ္တသတာ မိဿကဝါရာ ဟောန္တိ၊ တေပိ ကုသလာဒိပဒမတ္တံ ဒဿေတွာ သံခိတ္တာယေဝ၊ ယာနိပေတ္ထ သနိဒဿနာဒီနိ ပဒါနိ စိတ္တေန သဒ္ဓိံ န ယုဇ္ဇန္တိ၊ တာနိ မောဃပုစ္ဆာဝသေန ဂဟိတာနီတိ။

တေသု ပန တီသု ဝါရေသု သဗ္ဗပဌမေ သုဒ္ဓိကပုဂ္ဂလမဟာဝါရေ တာဝ ဥပ္ပာဒနိရောဓကာလသမ္ဘေဒဝါရော ဥပ္ပာဒုပ္ပန္နဝါရော နိရောဓုပ္ပန္နဝါရော ဥပ္ပာဒဝါရော နိရောဓဝါရော ဥပ္ပာဒနိရောဓဝါရော ဥပ္ပဇ္ဇမာနနနိရောဓဝါရော ဥပ္ပဇ္ဇမာနုပ္ပန္နဝါရော နိရုဇ္ဈမာနုပ္ပန္နဝါရော ဥပ္ပန္နုပ္ပာဒဝါရော အတီတာနာဂတဝါရော ဥပ္ပန္နုပ္ပဇ္ဇမာနဝါရော နိရုဒ္ဓနိရုဇ္ဈမာနဝါရော အတိက္ကန္တကာလဝါရော စာတိ စုဒ္ဒသ အန္တရဝါရာ၊ တေသု ဥပ္ပာဒဝါရော နိရောဓဝါရော ဥပ္ပာဒနိရောဓဝါရောတိ ဣမေသု တီသု ဝါရေသု ပစ္စေကံ ဝတ္တမာနာတီတဿ၊ ဝတ္တမာနာနာဂတဿ၊ အတီတာနာဂတဿ စာတိ တိဏ္ဏံ ကာလဘေဒါနံ ဝသေန အနုလောမပဋိလောမတော ဆ ဆ ကတွာ အဋ္ဌာရသ ယမကာနိ၊ ဥပ္ပန္နုပ္ပာဒဝါရေ အတီတာနာဂတကာလဝသေန အနုလောမတော ဒွေ၊ ပဋိလောမတော ဒွေတိ စတ္တာရိ ယမကာနိ၊ သေသေသု အာဒိတော နိဒ္ဒိဋ္ဌေသု တီသု၊ အန္တရေ နိဒ္ဒိဋ္ဌေသု တီသု၊ အဝသာနေ နိဒ္ဒိဋ္ဌေသု စတူသူတိ ဒသသု ဝါရေသု အနုလောမတော ဧကံ၊ ပဋိလောမတော ဧကန္တိ ဒွေ ဒွေ ကတွာ ဝီသတိ ယမကာနိ၊ ဧဝံ သဗ္ဗေသုပိ စုဒ္ဒသသု အန္တရဝါရေသု ဒွါစတ္တာလီသ ယမကာနိ၊ စတုရာသီတိ ပုစ္ဆာ၊ အဋ္ဌသဋ္ဌိအတ္ထသတံ ဟောတိ။ ယထာ စ ဧကသ္မိံ သုဒ္ဓိကပုဂ္ဂလမဟာဝါရေ၊ တထာ သုဒ္ဓိကဓမ္မမဟာဝါရေ၊ သုဒ္ဓိကပုဂ္ဂလဓမ္မမဟာဝါရေပီတိ တီသု မဟာဝါရေသု ဆဗ္ဗီသတိယမကသတံ၊ တတော ဒိဂုဏာ ပုစ္ဆာ၊ ဒိဂုဏာ အတ္ထာ စ ဝေဒိတဗ္ဗာ၊ ဣဒံ ပန ဝါရတ္တယံ သရာဂါဒိဝသေန သောဠသဂုဏံ၊ ကုသလာဒိဝသေန ဆသဋ္ဌိဒွိသတဂုဏံ ကတွာ ဣမိဿာ စိတ္တယမကမာတိကာယ အနေကာနိ ယမကသဟဿာနိ၊ တဒ္ဒိဂုဏာ ပုစ္ဆာ၊ တဒ္ဒိဂုဏာ အတ္ထာ စ ဟောန္တိ၊ ပါဌော ပန သံခိတ္တော။ ဧဝမေတ္ထ ပါဠိဝဝတ္ထာနံ ဝိဒိတွာ ဣဒါနိ အနုတ္တာနပဒတ္ထာနုသာရေန ဝိဘင်္ဂနယသဟိတော သင်္ခေပတ္ထဝဏ္ဏနာနယော ဧဝံ ဝေဒိတဗ္ဗော။

ယဿ စိတ္တံ ဥပ္ပဇ္ဇတီတိ ယဿ ပုဂ္ဂလဿ စိတ္တံ ဥပ္ပာဒက္ခဏသမင်္ဂိတာယ ဥပ္ပဇ္ဇတိ။ န နိရုဇ္ဈတီတိ နိရောဓက္ခဏံ အပ္ပတ္တတာယ န နိရုဇ္ဈတိ။ တဿ စိတ္တန္တိ ကိံ တဿ ပုဂ္ဂလဿ တတော ပဋ္ဌာယ စိတ္တံ နိရုဇ္ဈိဿတီတိ ပုစ္ဆာ၊ တဿာ စ၊ ‘‘ပစ္ဆိမစိတ္တဿ ဥပ္ပာဒက္ခဏေ တေသံ စိတ္တံ ဥပ္ပဇ္ဇတိ န နိရုဇ္ဈတိ၊ နိရုဇ္ဈိဿတိ နုပ္ပဇ္ဇိဿတိ၊ ဣတရေသံ စိတ္တဿ ဥပ္ပာဒက္ခဏေ တေသံ စိတ္တံ ဥပ္ပဇ္ဇတိ န နိရုဇ္ဈတိ၊ နိရုဇ္ဈိဿတိ စေဝ ဥပ္ပဇ္ဇိဿတိ စာ’’တိ ဝိဿဇ္ဇနံ။ တတ္ထ တေသံ စိတ္တန္တိ ယေသံ ခီဏာသဝါနံ ပစ္ဆိမစိတ္တသင်္ခါတဿ စုတိစိတ္တဿ ဥပ္ပာဒက္ခဏေ ဝတ္တတိ၊ တေသံ တဒေဝ စုတိစိတ္တံ ဥပ္ပာဒပ္ပတ္တတာယ ဥပ္ပဇ္ဇတိ နာမ၊ ဘင်္ဂံ အပ္ပတ္တတာယ န နိရုဇ္ဈတိ နာမ၊ ဣဒါနိ ပန ဘင်္ဂံ ပတွာ တံ တေသံ စိတ္တံ နိရုဇ္ဈိဿတိ၊ တတော အပ္ပဋိသန္ဓိကတ္တာ အညံ နုပ္ပဇ္ဇိဿတိ။ ဣတရေသန္တိ ပစ္ဆိမစိတ္တသမင်္ဂိံ ခီဏာသဝံ ဌပေတွာ အဝသေသာနံ သေခါသေခပုထုဇ္ဇနာနံ နိရုဇ္ဈိဿတိ စေဝ အညံ ပန တသ္မိံ ဝါ အတ္တဘာဝေ ဥပ္ပဇ္ဇိဿတိ စာတိ အတ္ထော။

‘‘ယဿ ဝါ ပန စိတ္တံ နိရုဇ္ဈိဿတိ နုပ္ပဇ္ဇိဿတိ၊ တဿ စိတ္တံ ဥပ္ပဇ္ဇတိ န နိရုဇ္ဈတီ’’တိ ဣမိဿာ ဒုတိယပုစ္ဆာယ ပစ္ဆိမစိတ္တသမင်္ဂိနော ခီဏာသဝဿ စိတ္တံ သန္ဓာယ ‘‘အာမန္တာ’’တိ ဝိဿဇ္ဇနံ။ ‘‘ယဿ စိတ္တံ နုပ္ပဇ္ဇတိ နိရုဇ္ဈတိ၊ တဿ စိတ္တံ န နိရုဇ္ဈိဿတိ ဥပ္ပဇ္ဇိဿတီ’’တိ ပုစ္ဆာယ ‘‘နော’’တိ ပဋိသေဓောဝ ဝိဿဇ္ဇနံ။ န ဥပ္ပဇ္ဇတိ နိရုဇ္ဈတီတိ ဟိ ဘင်္ဂက္ခဏေ အရဟတော ပစ္ဆိမစိတ္တမ္ပိ သေသာနံ ဘိဇ္ဇမာနစိတ္တမ္ပိ ပုစ္ဆတိ၊ တတော ပဋ္ဌာယ ပန အရဟတော တာဝ စိတ္တံ န နိရုဇ္ဈိဿတီတိ သက္ကာ ဝတ္တုံ၊ ဥပ္ပဇ္ဇိဿတီတိ ပန န သက္ကာ၊ တသ္မာ ‘‘နော’’တိ ဧတ္ထ ပဋိသေဓော ကတော၊ ‘‘ယဿ ဝါ ပန စိတ္တံ န နိရုဇ္ဈိဿတိ ဥပ္ပဇ္ဇိဿတိ၊ တဿ စိတ္တံ နုပ္ပဇ္ဇတိ နိရုဇ္ဈတီ’’တိ ပုစ္ဆာယ ‘‘နတ္ထီ’’တိ ပဋိက္ခေပေါဝ ဝိဿဇ္ဇနံ။ ယဿ ဟိ စိတ္တံ န နိရုဇ္ဈိဿတိ ဥပ္ပဇ္ဇိဿတိ၊ သော စ ပုဂ္ဂလော နတ္ထီတိ။

ယဿ စိတ္တံ ဥပ္ပဇ္ဇတိ၊ တဿ စိတ္တံ ဥပ္ပန္နန္တိ? အာမန္တာ၊ ယဿ ဝါ ပန…ပေ… ဥပ္ပဇ္ဇတီတိ? သဗ္ဗေသံ စိတ္တဿ ဘင်္ဂက္ခဏေ တံ စိတ္တံ ဥပ္ပန္နံ၊ နော စ ဥပ္ပဇ္ဇတိ၊ သဗ္ဗေသံ စိတ္တဿ ဥပ္ပာဒက္ခဏေ တေသံ စိတ္တံ ဥပ္ပန္နဉ္စေဝ ဥပ္ပဇ္ဇတိ စ၊ ယဿ စိတ္တံ နုပ္ပဇ္ဇတိ ၊ တဿ စိတ္တံ နုပ္ပန္နန္တိ? စိတ္တဿ ဘင်္ဂက္ခဏေ စိတ္တံ နုပ္ပဇ္ဇတိ၊ နော စ နုပ္ပန္နံ၊ နိရောဓသမာပန္နာနံ အသညသတ္တာနံ စိတ္တံ နုပ္ပဇ္ဇတိ စေဝ နုပ္ပန္နဉ္စ။ ယဿ ဝါ ပန…ပေ… နုပ္ပဇ္ဇတီတိ? အာမန္တာ။ ဧတ္ထ စ ဥပ္ပန္နန္တိ ဥပ္ပာဒသမင်္ဂိနောပေတံ နာမံ၊ ဥပ္ပဇ္ဇတီတိ စ ဥပ္ပာဒသမင်္ဂိနောဝ။

ယဿ စိတ္တံ နိရုဇ္ဈတိ၊ တဿ စိတ္တံ ဥပ္ပန္နန္တိ? အာမန္တာ။ ယဿ ဝါ ပန…ပေ… နိရုဇ္ဈတီတိ? ဘင်္ဂက္ခဏေ တထာ။ ယဿ စိတ္တံ န နိရုဇ္ဈတိ၊ တဿ စိတ္တံ နုပ္ပန္နန္တိ? နိရောဓသမာပန္နာဒီနံ စိတ္တံ။ ယဿ ဝါ ပန…ပေ… အာမန္တာ။

ယဿ စိတ္တံ ဥပ္ပဇ္ဇတိ၊ တဿ စိတ္တံ ဥပ္ပဇ္ဇိတ္ထာတိ? အာမန္တာ။ ယဿ ဝါ ပန…ပေ… ဥပ္ပဇ္ဇတီတိ? သဗ္ဗေသံ စိတ္တဿ ဥပ္ပာဒက္ခဏေ တထာ။ ဧတ္ထ စ ဥပ္ပာဒပ္ပတ္တတ္တာ ဥပ္ပဇ္ဇိတ္ထ၊ တံ အနတီတတ္တာ ဥပ္ပဇ္ဇတိ နာမာတိ အတ္ထောတိ အဋ္ဌကထာယံ ခဏပစ္စုပ္ပန္နဝသေန အတ္ထော ဝုတ္တော။ ဥပ္ပဇ္ဇိတ္ထာတိ ပန ဣမဿ အတီတစိတ္တက္ခဏဝသေန အတ္ထေ ဂယှမာနေ ဧဝ ဥပရိပါဠိယာ န ဝိရုဇ္ဈတိ၊ န အညထာတိ ပညာယတိ၊ တသ္မာ ပုဗ္ဗာပရံ ဩလောကေတွာ ပါဠိအဝိရောဓေန အတ္ထော ဂဟေတဗ္ဗော။

ယဿ စိတ္တံ နုပ္ပဇ္ဇတိ၊ တဿ စိတ္တံ နုပ္ပဇ္ဇိတ္ထာတိ? ဥပ္ပဇ္ဇိတ္ထ။ ယဿ ဝါ ပန…ပေ… နုပ္ပဇ္ဇတီတိ? နတ္ထိ။ ယဿ စိတ္တံ ဥပ္ပဇ္ဇတိ၊ တဿ စိတ္တံ ဥပ္ပဇ္ဇိဿတီတိ? ပစ္ဆိမစိတ္တသမင်္ဂိခီဏာသဝဝိရဟိတာနံ စိတ္တံ တထာ။ ယဿ ဝါ ပန…ပေ… ဥပ္ပဇ္ဇတီတိ? ဥပ္ပာဒက္ခဏေ တထာ။ ယဿ စိတ္တံ…ပေ… နုပ္ပဇ္ဇိဿတီတိ? အသေခါနံ ပစ္ဆိမစိတ္တဿ ဘင်္ဂက္ခဏေ တထာ။ ယဿ ဝါ ပန…ပေ… နုပ္ပဇ္ဇတီတိ? ပစ္ဆိမစိတ္တဿ ဘင်္ဂက္ခဏေ တထာ။ ယဿ စိတ္တံ ဥပ္ပဇ္ဇိတ္ထ၊ တဿ စိတ္တံ ဥပ္ပဇ္ဇိဿတီတိ? ပစ္ဆိမစိတ္တသမင်္ဂိံ ဌပေတွာ သေသာနံ တထာ။ ယဿ ဝါ ပန…ပေ… အာမန္တာ။ ယဿ စိတ္တံ နုပ္ပဇ္ဇိတ္ထ၊ တဿ စိတ္တံ နုပ္ပဇ္ဇိဿတီတိ? နတ္ထိ။ ယဿ ဝါ ပန…ပေ… နုပ္ပဇ္ဇိတ္ထာတိ? ဥပ္ပဇ္ဇိတ္ထ။

ယဿ စိတ္တံ နိရုဇ္ဈတိ၊ တဿ စိတ္တံ နိရုဇ္ဈိတ္ထာတိ? အာမန္တာ။ ယဿ ဝါ ပန…ပေ… နိရုဇ္ဈတီတိ? ဘင်္ဂက္ခဏေ တထာ။ ယဿ စိတ္တံ…ပေ… န နိရုဇ္ဈိတ္ထာတိ? နိရုဇ္ဈိတ္ထ။ ယဿ ဝါ ပန…ပေ… နတ္ထိ။ ယဿ စိတ္တံ နိရုဇ္ဈတိ၊ တဿ စိတ္တံ နိရုဇ္ဈိဿတီတိ? ပစ္ဆိမစိတ္တသမင်္ဂိံ ဌပေတွာ သေသာနံ စိတ္တဿ ဘင်္ဂက္ခဏေ တထာ။ ယဿ ဝါ ပန…ပေ… သေသာနံ ဘင်္ဂက္ခဏေ တထာ။ ယဿ စိတ္တံ…ပေ… နိရုဇ္ဈိဿတိ။ ယဿ ဝါ ပန…ပေ… နိရုဇ္ဈတိ။

ယဿ စိတ္တံ နိရုဇ္ဈိတ္ထ၊ တဿ စိတ္တံ နိရုဇ္ဈိဿတီတိ? ပစ္ဆိမစိတ္တဿ ဘင်္ဂက္ခဏေ ဌပေတွာ သေသာနံ စိတ္တံ တထာ။ ယဿ ဝါ ပန…ပေ… အာမန္တာ။ ယဿ စိတ္တံ န နိရုဇ္ဈိတ္ထ၊ တဿ စိတ္တံ န နိရုဇ္ဈိဿတီတိ? နတ္ထိ။ ယဿ ဝါ ပန…ပေ… န နိရုဇ္ဈိတ္ထာတိ? နိရုဇ္ဈိတ္ထ။

ယဿ စိတ္တံ ဥပ္ပဇ္ဇတိ၊ တဿ စိတ္တံ နိရုဇ္ဈိတ္ထာတိ? အာမန္တာ။ ယဿ ဝါ ပန…ပေ… ဥပ္ပဇ္ဇတီတိ? သဗ္ဗေသံ စိတ္တဿ ဥပ္ပာဒက္ခဏေ တထာ။ ယဿ စိတ္တံ နုပ္ပဇ္ဇတိ၊ တဿ စိတ္တံ န နိရုဇ္ဈိတ္ထာတိ? နိရုဇ္ဈိတ္ထ။ ယဿ ဝါ ပန…ပေ… နတ္ထိ၊ ယဿ စိတ္တံ ဥပ္ပဇ္ဇတိ၊ တဿ စိတ္တံ နိရုဇ္ဈိဿတီတိ? အာမန္တာ။ ယဿ ဝါ ပန…ပေ… ဥပ္ပဇ္ဇတီတိ? သဗ္ဗေသံ စိတ္တဿ ဥပ္ပာဒက္ခဏေ တထာ။ ယဿ စိတ္တံ နုပ္ပဇ္ဇတိ၊ တဿ စိတ္တံ န နိရုဇ္ဈိဿတီတိ? ပစ္ဆိမစိတ္တဿ ဘင်္ဂက္ခဏေ တထာ။ ယဿ ဝါ ပန…ပေ… အာမန္တာ။ ယဿ စိတ္တံ ဥပ္ပဇ္ဇိတ္ထ၊ တဿ စိတ္တံ နိရုဇ္ဈိဿတီတိ? နိရုဇ္ဈမာနံ ပစ္ဆိမစိတ္တံ ဌပေတွာ တထာ။ ယဿ ဝါ ပန…ပေ… အာမန္တာ။ ယဿ စိတ္တံ နုပ္ပဇ္ဇိတ္ထ၊ တဿ စိတ္တံ န နိရုဇ္ဈိဿတီတိ? နတ္ထိ။ ယဿ ဝါ ပန…ပေ… နုပ္ပဇ္ဇိတ္ထာတိ? ဥပ္ပဇ္ဇိတ္ထ။

ယဿ စိတ္တံ ဥပ္ပဇ္ဇတိ၊ တဿ စိတ္တံ န နိရုဇ္ဈတီတိ? အာမန္တာ။ ယဿ ဝါ ပန…ပေ… ဥပ္ပဇ္ဇတီတိ? သဗ္ဗေသံ စိတ္တဿ ဥပ္ပာဒက္ခဏေ တထာ။ ယဿ စိတ္တံ နုပ္ပဇ္ဇတိ၊ တဿ စိတ္တံ နိရုဇ္ဈတီတိ? သဗ္ဗေသံ စိတ္တဿ ဘင်္ဂက္ခဏေ တထာ။ ယဿ ဝါ ပန…ပေ… နုပ္ပဇ္ဇတီတိ? အာမန္တာ။

ယဿ စိတ္တံ ဥပ္ပဇ္ဇမာနံ၊ တဿ စိတ္တံ ဥပ္ပန္နန္တိ? အာမန္တာ။ ယဿ ဝါ ပန…ပေ… ဥပ္ပဇ္ဇမာနန္တိ? သဗ္ဗေသံ စိတ္တဿ ဥပ္ပာဒက္ခဏေ တထာ။ ယဿ စိတ္တံ နုပ္ပဇ္ဇမာနံ၊ တဿ စိတ္တံ နုပ္ပန္နန္တိ? နိရောဓသမာပန္နာဒီနံ စိတ္တံ တထာ။ ယဿ ဝါ ပန…ပေ… အာမန္တာ။

ယဿ စိတ္တံ နိရုဇ္ဈမာနံ၊ တဿ စိတ္တံ ဥပ္ပန္နန္တိ? အာမန္တာ။ ယဿ ဝါ ပန…ပေ… ဘင်္ဂက္ခဏေ တထာ။ ယဿ စိတ္တံ န နိရုဇ္ဈမာနံ၊ တဿ စိတ္တံ နုပ္ပန္နန္တိ? နိရောဓသမာပန္နာဒီနံ စိတ္တံ တထာ။ ယဿ ဝါ ပန…ပေ… အာမန္တာ။

ယဿ စိတ္တံ ဥပ္ပန္နံ၊ တဿ စိတ္တံ ဥပ္ပဇ္ဇိတ္ထာတိ? အာမန္တာ။ ယဿ ဝါ ပန…ပေ… ဥပ္ပန္နန္တိ ? စိတ္တသမင်္ဂီနံ တထာ။ ယဿ စိတ္တံ နုပ္ပန္နံ၊ တဿ စိတ္တံ နုပ္ပဇ္ဇိတ္ထာတိ? ဥပ္ပဇ္ဇိတ္ထ။ ယဿ ဝါ ပန…ပေ… နုပ္ပန္နန္တိ? နတ္ထိ…ပေ… ယဿ စိတ္တံ နုပ္ပန္နံ၊ တဿ စိတ္တံ နုပ္ပဇ္ဇိဿတီတိ? ဥပ္ပဇ္ဇိဿတိ။ ယဿ ဝါ ပန…ပေ… နုပ္ပန္နန္တိ? ဥပ္ပန္နံ။

ယဿ စိတ္တံ ဥပ္ပဇ္ဇိတ္ထ နော စ တဿ စိတ္တံ ဥပ္ပန္နံ၊ တဿ စိတ္တံ ဥပ္ပဇ္ဇိဿတီတိ? အာမန္တာ။ ယဿ ဝါ ပန စိတ္တံ ဥပ္ပဇ္ဇိဿတိ နော စ တဿ စိတ္တံ ဥပ္ပန္နံ၊ တဿ စိတ္တံ ဥပ္ပဇ္ဇိတ္ထာတိ? အာမန္တာ။ ဧတ္ထ ‘‘နော စ တဿ စိတ္တံ နုပ္ပန္န’’န္တိ ဣဒံ အသညာဒိအစိတ္တကေ သန္ဓာယ ဝုတ္တံ။ တေသံ နိယမေန စိတ္တုပ္ပတ္တိယာ အဘာဝတော ‘‘အာမန္တာ’’တိ ဥဘယတ္ထ ဝိဿဇ္ဇနံ ဝုတ္တံ။ အယဉ္စ ဝါရော ကာလတ္တယေ ဂဟေတွာ သမတ္ထိတောတိ ဂဟေတဗ္ဗော။

‘‘ယဿ စိတ္တံ နုပ္ပဇ္ဇိတ္ထ နော စ တဿ စိတ္တံ နုပ္ပန္နံ၊ တဿ စိတ္တံ နုပ္ပဇ္ဇိဿတီတိ? နတ္ထိ။ ယဿ ဝါ ပန စိတ္တံ နုပ္ပဇ္ဇိဿတိ နော စ တဿ စိတ္တံ နုပ္ပန္နံ၊ တဿ စိတ္တံ နုပ္ပဇ္ဇိတ္ထာတိ? ဥပ္ပဇ္ဇိတ္ထ။

ဥပ္ပန္နံ ဥပ္ပဇ္ဇမာနန္တိ? ဥပ္ပာဒက္ခဏေ စိတ္တံ တထာ။ ဥပ္ပဇ္ဇမာနံ ဥပ္ပန္နန္တိ? အာမန္တာ။ နုပ္ပန္နံ နုပ္ပဇ္ဇမာနန္တိ? အာမန္တာ။ နုပ္ပဇ္ဇမာနံ နုပ္ပန္နန္တိ? အတီတာနာဂတစိတ္တံ တထာ။

နိရုဒ္ဓံ နိရုဇ္ဈမာနန္တိ? နော၊ နိရုဇ္ဈမာနံ နိရုဒ္ဓန္တိ? နော၊ နနိရုဒ္ဓံ နနိရုဇ္ဈမာနန္တိ? ဥပ္ပာဒက္ခဏေ အနာဂတဉ္စ စိတ္တံ တထာ။ နနိရုဇ္ဈမာနံ နနိရုဒ္ဓန္တိပိ တထေဝ။

ယဿ စိတ္တံ ဥပ္ပဇ္ဇမာနံ ခဏံ ခဏံ ဝီတိက္ကန္တံ အတိက္ကန္တကာလံ၊ နိရုဇ္ဈမာနံ ခဏံ ခဏံ ဝီတိက္ကန္တံ အတိက္ကန္တကာလံ၊ တဿ စိတ္တန္တိ? နော စ ဘင်္ဂက္ခဏံ ဝီတိက္ကန္တံ၊ အတီတံ စိတ္တံ တဒုဘယံ ဝီတိက္ကန္တံ၊ ယဿ ဝါ ပန စိတ္တံ နိရုဇ္ဈမာနံ ခဏံ ခဏံ ဝီတိက္ကန္တံ အတိက္ကန္တကာလံ၊ ဥပ္ပဇ္ဇမာနံ ခဏံ ခဏံ ဝီတိက္ကန္တံ အတိက္ကန္တကာလံ၊ တဿ စိတ္တန္တိ? အတီတံ စိတ္တ’’န္တိ ဣမိနာ နယေန ပုဂ္ဂလဝါရေ သဗ္ဗတ္ထ ဝိဿဇ္ဇနနယော ဝေဒိတဗ္ဗော။

တတ္ထ ဥပ္ပဇ္ဇမာနံ ခဏန္တိ ဥပ္ပဇ္ဇမာနဿ ခဏံ၊ ဥပ္ပာဒက္ခဏန္တိ အတ္ထော။ ခဏံ ဝီတိက္ကန္တံအတိက္ကန္တကာလန္တိ န စိရံ ဝီတိက္ကန္တံ၊ တမေဝ ပန ဥပ္ပာဒက္ခဏံ ဝီတိက္ကန္တံ ဟုတွာ အတိက္ကန္တကာလန္တိ သင်္ခံ ဂစ္ဆတိ၊ နိရုဇ္ဈမာနံ ခဏန္တိ နိရုဇ္ဈမာနဿ ခဏံ၊ ဘင်္ဂက္ခဏန္တိ အတ္ထော။ ခဏံ ဝီတိက္ကန္တံ အတိက္ကန္တကာလန္တိ ကိံ တဿ စိတ္တံ ဧဝံ နိရောဓက္ခဏမ္ပိ ဝီတိက္ကန္တံ ဟုတွာ အတိက္ကန္တကာလံ နာမ ဟောတီတိ ပုစ္ဆတိ။ ယဿ ဘင်္ဂက္ခဏေ စိတ္တံ ဥပ္ပာဒက္ခဏံ ခဏံ ဝီတိက္ကန္တံ ဟုတွာ အတိက္ကန္တကာလံ နာမ ဟောတိ၊ နိရောဓက္ခဏံ ဝီတိက္ကန္တံ ဟုတွာ အတိက္ကန္တကာလံ နာမ ဟောတိ၊ အတီတံ ပန စိတ္တံ ဥဘောပိ ခဏေ ခဏံ ဝီတိက္ကန္တံ ဟုတွာ အတိက္ကန္တကာလံ နာမ ဟောတီတိ အတီတစိတ္တဝသေန ဝိဿဇ္ဇနံ ကတံ။ ဣမိနာဝ ဥပါယေန ဥပရိမေသု အတ္ထဓမ္မဝါရာဒီသု စ သဗ္ဗဝိဿဇ္ဇနေသု အတ္ထော ဝေဒိတဗ္ဗော။ အယံ အတိက္ကန္တကာလဝါရေ နယော။

ယံ စိတ္တံ ဥပ္ပဇ္ဇတိ နနိရုဇ္ဈတိ၊ တံ စိတ္တံ နိရုဇ္ဈိဿတိ နုပ္ပဇ္ဇိဿတီတိ? အာမန္တာ။ ယံ ဝါ ပန…ပေ… အာမန္တာ။ ယံ စိတ္တံ နုပ္ပဇ္ဇတိ နိရုဇ္ဈတိ၊ တံ စိတ္တံ နနိရုဇ္ဈိဿတိ ဥပ္ပဇ္ဇိဿတီတိ? နော။ ယံ ဝါ ပန စိတ္တံ နနိရုဇ္ဈိဿတိ ဥပ္ပဇ္ဇိဿတိ၊ တံ စိတ္တံ နုပ္ပဇ္ဇတိ နိရုဇ္ဈတီတိ? နတ္ထိ။

ယံ စိတ္တံ ဥပ္ပဇ္ဇတိ၊ တံ စိတ္တံ ဥပ္ပန္နန္တိ? အာမန္တာ။ ယံ ဝါ ပန…ပေ… ဥပ္ပဇ္ဇတီတိ? ဥပ္ပာဒက္ခဏေ စိတ္တံ တထာ၊ ဧဝံ ပဋိလောမပုစ္ဆာသုပိ တတော သေသာသုပိ။ ‘‘ယံ စိတ္တံ နုပ္ပဇ္ဇတိ၊ တံ စိတ္တံ နုပ္ပန္နန္တိ? အတီတာနာဂတံ စိတ္တံ တထာ။ ယံ ဝါ ပန…ပေ… အာမန္တာ…ပေ… ဘင်္ဂက္ခဏေ စိတ္တ’’န္တိအာဒိနာ၊ ‘‘ယံ စိတ္တံ ဥပ္ပဇ္ဇတိ၊ တံ စိတ္တံ ဥပ္ပဇ္ဇိတ္ထာတိ? နော။ ယံ စိတ္တံ နုပ္ပဇ္ဇတိ၊ တံ စိတ္တံ နုပ္ပဇ္ဇိတ္ထာတိ? ဘင်္ဂက္ခဏေ စိတ္တံ အနာဂတဉ္စာ’’တိအာဒိနာ၊ ‘‘ယံ စိတ္တံ ဥပ္ပဇ္ဇတိ၊ တံ စိတ္တံ ဥပ္ပဇ္ဇိဿတီတိ? နော။ ယံ ဝါ ပန…ပေ… နော၊ ယံ စိတ္တံ နုပ္ပဇ္ဇတိ၊ တံ စိတ္တံ နုပ္ပဇ္ဇိဿတီတိ? အနာဂတံ စိတ္တံ နုပ္ပဇ္ဇတိ၊ နော စ တံ စိတ္တံ နုပ္ပဇ္ဇိဿတိ၊ ဘင်္ဂက္ခဏေ စိတ္တံ အတီတံ စိတ္တ’’န္တိအာဒိနာ စ၊ ‘‘ယံ စိတ္တံ ဥပ္ပဇ္ဇိတ္ထ၊ တံ စိတ္တံ ဥပ္ပဇ္ဇိဿတီတိ? နော။ ယံ ဝါ ပန…ပေ… နော၊ ယံ စိတ္တံ နုပ္ပဇ္ဇိတ္ထ၊ တံ စိတ္တံ နုပ္ပဇ္ဇိဿတီတိ? အနာဂတံ စိတ္တ’’န္တိအာဒိနာ စ၊

‘‘ယံ စိတ္တံ နိရုဇ္ဈတိ၊ တံ စိတ္တံ နိရုဇ္ဈိတ္ထာတိ? နော’’တိအာဒိနာ စ၊ ‘‘ယံ စိတ္တံ ဥပ္ပဇ္ဇတိ၊ တံ စိတ္တံ နိရုဇ္ဈိတ္ထာတိ? နော’’တိအာဒိနာ စ၊ ‘‘ယံ စိတ္တံ ဥပ္ပဇ္ဇတိ၊ တံ စိတ္တံ နိရုဇ္ဈိဿတီတိ ? အာမန္တာ’’တိအာဒိနာ စ၊ ‘‘ယံ စိတ္တံ ဥပ္ပဇ္ဇိတ္ထ၊ တံ စိတ္တံ နိရုဇ္ဈိဿတီတိ? နော’’တိအာဒိနာ စ၊

‘‘ယံ စိတ္တံ ဥပ္ပဇ္ဇမာနံ၊ တံ စိတ္တံ ဥပ္ပန္နန္တိ? အာမန္တာ။ ယံ ဝါ ပန…ပေ… ဥပ္ပဇ္ဇမာနန္တိ…ပေ… ဥပ္ပာဒက္ခဏေ စိတ္တ’’န္တိအာဒိနာ စ၊ ‘‘ယံ စိတ္တံ နိရုဇ္ဈမာနံ၊ တံ စိတ္တံ ဥပ္ပန္နန္တိ? အာမန္တာ’’တိအာဒိနာ စ၊ ‘‘ယံ စိတ္တံ ဥပ္ပန္နံ၊ တံ စိတ္တံ ဥပ္ပဇ္ဇိတ္ထာတိ? နော။ ယံ ဝါ ပန…ပေ… နော’’တိအာဒိနာ စ၊

‘‘ယံ စိတ္တံ ဥပ္ပဇ္ဇိတ္ထ နော စ တံ စိတ္တံ ဥပ္ပန္နံ၊ တံ စိတ္တံ ဥပ္ပဇ္ဇိဿတီတိ? နော။ ယံ ဝါ ပန…ပေ… နော။ ယံ စိတ္တံ နုပ္ပဇ္ဇိတ္ထ နော စ တံ စိတ္တံ နုပ္ပန္နံ၊ တံ စိတ္တံ နုပ္ပဇ္ဇိဿတီတိ? အာမန္တာ’’တိအာဒိနာ စ၊ ‘‘ဥပ္ပန္နံ ဥပ္ပဇ္ဇမာနန္တိ…ပေ… ဥပ္ပာဒက္ခဏေ ဥပ္ပန္နဉ္စေဝ ဥပ္ပဇ္ဇမာနဉ္စ။ ဥပ္ပဇ္ဇမာနံ ဥပ္ပန္နန္တိ? အာမန္တာ’’တိအာဒိနာ စ၊ ‘‘နိရုဒ္ဓံ နိရုဇ္ဈမာနန္တိ? နော’’တိအာဒိနာ စ၊

‘‘ယံ စိတ္တံ ဥပ္ပဇ္ဇမာနံ ခဏံ ခဏံ ဝီတိက္ကန္တံ အတိက္ကန္တကာလံ၊ နိရုဇ္ဈမာနံ ခဏံ ခဏံ ဝီတိက္ကန္တံ အတိက္ကန္တကာလံ၊ တံ စိတ္တန္တိ…ပေ… အတီတံ စိတ္တ’’န္တိအာဒိနာ စ ဓမ္မဝါရေ၊

‘‘ယဿ ယံ စိတ္တံ ဥပ္ပဇ္ဇတိ န နိရုဇ္ဈတိ၊ တဿ တံ စိတ္တံ နိရုဇ္ဈိဿတိ နုပ္ပဇ္ဇိဿတီတိ? အာမန္တာ’’တိအာဒိနာ စ ပုဂ္ဂလဓမ္မဝါရေ စ၊ သရာဂါဒိပဒေဟိ၊ ကုသလာဒိပဒေဟိ စ မိဿေသု သဗ္ဗဝါရေသု စ ပုစ္ဆာသု ဟေဋ္ဌာ ဝုတ္တာနုသာရေန ဝိဿဇ္ဇနနယော ဝေဒိတဗ္ဗော။ အယံ စိတ္တယမကမာတိကတ္ထသံဝဏ္ဏနာနယော။

ဓမ္မယမကမာတိကတ္ထဝဏ္ဏနာ

ဓမ္မယမကမာတိကာယ ပန ခန္ဓယမကေ ဝုတ္တနယေနေဝ ပါဠိဝဝတ္ထာနံ ဝေဒိတဗ္ဗံ။ ‘‘ယော ကုသလံ ဓမ္မံ ဘာဝေတိ၊ သော အကုသလံ ဓမ္မံ ပဇဟတီ’’တိ အာဂတတ္တာ ပနေတ္ထ ပရိညာဝါရော ဘာဝနာဝါရော နာမ။ တတ္ထ ယသ္မာ အဗျာကတော ဓမ္မော နေဝ ဘာဝေတဗ္ဗော န ပဟာတဗ္ဗော၊ တသ္မာ ပဒမေဝ န ဥဒ္ဓဋန္တိ ဝေဒိတဗ္ဗံ ။ ပုစ္ဆာဝိဿဇ္ဇနေ ပနေတ္ထ ‘‘ကုသလာကုသလာ ဓမ္မာတိ? အာမန္တာ’’တိအာဒိနာ၊ ‘‘ဓမ္မာ အကုသလာ ဓမ္မာတိ? အကုသလာ ဓမ္မာ ဓမ္မာ စေဝ အကုသလာ ဓမ္မာ စ၊ အဝသေသာ ဓမ္မာ န အကုသလာ ဓမ္မာ’’တိအာဒိနာ စ ပဏ္ဏတ္တိဝါရေ ဝိဿဇ္ဇနနယော ဉာတဗ္ဗော။

‘‘ယဿ ကုသလာ ဓမ္မာ ဥပ္ပဇ္ဇန္တိ၊ တဿ အကုသလာ ဓမ္မာ ဥပ္ပဇ္ဇန္တီတိ? နော။ ယဿ ဝါ ပန…ပေ… ယဿ ကုသလာ ဓမ္မာ ဥပ္ပဇ္ဇန္တိ၊ တဿ အဗျာကတာ ဓမ္မာ ဥပ္ပဇ္ဇန္တီတိ? ပဉ္စဝေါကာရေ ကုသလာနံ ဥပ္ပာဒက္ခဏေ…ပေ… ဥပ္ပဇ္ဇန္တီ’’တိအာဒိနာ စ၊ ‘‘ယတ္ထ ကုသလာ ဓမ္မာ ဥပ္ပဇ္ဇန္တိ၊ တတ္ထ အကုသလာ ဓမ္မာ ဥပ္ပဇ္ဇန္တီတိ? အာမန္တာ…ပေ… တတ္ထ အဗျာကတာ ဓမ္မာ ဥပ္ပဇ္ဇန္တီတိ? အာမန္တာ။ ယတ္ထ ဝါ ပန အဗျာကတာ ဓမ္မာ ဥပ္ပဇ္ဇန္တိ၊ တတ္ထ ကုသလာ ဓမ္မာ ဥပ္ပဇ္ဇန္တီတိ …ပေ… စတုဝေါကာရေ…ပေ… ဥပ္ပဇ္ဇန္တီ’’တိအာဒိနာ စ၊ ‘‘ယဿ ယတ္ထ ကုသလာ ဓမ္မာ…ပေ… ဥပ္ပဇ္ဇန္တီတိ? နော’’တိအာဒိနာ စ၊

‘‘ယဿ ကုသလာ ဓမ္မာ နုပ္ပဇ္ဇန္တိ၊ တဿ အကုသလာ ဓမ္မာ နုပ္ပဇ္ဇန္တီတိ…ပေ… သဗ္ဗေသံ စိတ္တဿ ဘင်္ဂက္ခဏေ အဗျာကတစိတ္တဿ ဥပ္ပာဒက္ခဏေ နိရောဓသမာပန္နာနံ အသညသတ္တာနံ တေသံ ကုသလာ စ ဓမ္မာ နုပ္ပဇ္ဇန္တိ၊ အကုသလာ စ ဓမ္မာ နုပ္ပဇ္ဇန္တီ’’တိအာဒိနာ စ၊ ‘‘ယဿ ကုသလာ ဓမ္မာ နုပ္ပဇ္ဇန္တိ၊ တဿ အဗျာကတာ ဓမ္မာ နုပ္ပဇ္ဇန္တီတိ…ပေ… သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အာရုပ္ပေ အကုသလာနံ ဥပ္ပာဒက္ခဏေ စ နုပ္ပဇ္ဇန္တီ’’တိအာဒိနာ စ၊ ‘‘ယတ္ထ ကုသလာ ဓမ္မာ နုပ္ပဇ္ဇန္တိ၊ တတ္ထ အကုသလာ ဓမ္မာ နုပ္ပဇ္ဇန္တီတိ? အာမန္တာ…ပေ… တတ္ထ အဗျာကတာ ဓမ္မာ နုပ္ပဇ္ဇန္တီတိ? ဥပ္ပဇ္ဇန္တိ။ ယတ္ထ ဝါ ပန အဗျာကတာ ဓမ္မာ နုပ္ပဇ္ဇန္တိ၊ တတ္ထ အကုသလာ ဓမ္မာ နုပ္ပဇ္ဇန္တီတိ? နတ္ထီ’’တိအာဒိနာ စ ဥပ္ပာဒဝါရေ၊

‘‘ယဿ ကုသလာ ဓမ္မာ နိရုဇ္ဈန္တိ၊ တဿ အကုသလာ ဓမ္မာ နိရုဇ္ဈန္တီတိ? နော’’တိအာဒိနာ နိရောဓဝါရေ စ၊

‘‘ယဿ ကုသလာ ဓမ္မာ ဥပ္ပဇ္ဇန္တိ၊ တဿ အကုသလာ ဓမ္မာ နိရုဇ္ဈန္တီတိ? နော’’တိအာဒိနာ ဥပ္ပာဒနိရောဓဝါရေ စ၊

‘‘ယော ကုသလံ ဓမ္မံ ဘာဝေတိ၊ သော အကုသလံ ဓမ္မံ ပဇဟိတ္ထာတိ? နော…ပေ… ယော ကုသလံ ဓမ္မံ န ဘာဝေတိ၊ သော အကုသလံ ဓမ္မံ နပ္ပဇဟိတ္ထာတိ? အဂ္ဂမဂ္ဂသမင်္ဂိဉ္စ အရဟန္တဉ္စ ဌပေတွာ အဝသေသာ ပုဂ္ဂလာ’’တိအာဒိနာ ဘာဝနာဝါရေ စ ပုစ္ဆာဝိဿဇ္ဇနနယော ဟေဋ္ဌာ ဝုတ္တာနုသာရေန ဉာတဗ္ဗော။

အတ္ထဝိနိစ္ဆယေ ပနေတ္ထ ဣဒံ လက္ခဏံ။ ဣမဿ ဟိ ဓမ္မယမကဿ ပဝတ္တိမဟာဝါရေ ဥပ္ပဇ္ဇန္တိ နိရုဇ္ဈန္တီတိ ဣမေသု ဥပ္ပာဒနိရောဓေသု ကုသလာကုသလဓမ္မာ တာဝ ဧကန္တေန ပဝတ္တိယံယေဝ လဗ္ဘန္တိ၊ န စုတိပဋိသန္ဓီသု၊ အဗျာကတဓမ္မာ ပန ပဝတ္တေ စ စုတိပဋိသန္ဓီသု စာတိ တီသုပိ ကာလေသု လဗ္ဘန္တိ၊ ဧဝမေတ္ထ ယံ ယတ္ထ ယတ္ထ လဗ္ဘတိ၊ တဿ ဝသေန တတ္ထ တတ္ထ ဝိနိစ္ဆယော ဝေဒိတဗ္ဗော။

တတြိဒံ နယမုခံ – ကုသလာကုသလာနံ တာဝ ဧကက္ခဏေ အနုပ္ပဇ္ဇနတော ‘‘နော’’တိ ပဋိသေဓော ကတော။ အဗျာကတာ စာတိ ဣဒံ စိတ္တသမုဋ္ဌာနရူပံ သန္ဓာယ ဝုတ္တံ။ ယတ္ထ ကုသလာ ဓမ္မာ နုပ္ပဇ္ဇန္တီတိ အသညဘဝံ သန္ဓာယ ဝုတ္တံ၊ အဗျာကတာနံ ဓမ္မာနံ အနုပ္ပတ္တိဋ္ဌာနဿာဘာဝါ ‘‘နတ္ထီ’’တိ ပဋိက္ခေပေါ ကတော၊ နိရောဓဝါရေ ကုသလာကုသလာနံ ဧကတော အနိရုဇ္ဈနတော ‘‘နော’’တိ ဝုတ္တန္တိ ဣမိနာဝ နယမုခေန သဗ္ဗတ္ထ ဝိနိစ္ဆယော ဝေဒိတဗ္ဗော။ အယံ ဓမ္မယမကမာတိကတ္ထသံဝဏ္ဏနာနယော။

ဣန္ဒြိယယမကမာတိကတ္ထဝဏ္ဏနာ

ဣန္ဒြိယယမကမာတိကာယံ ပန ခန္ဓယမကမာတိကာဒီသု ဝုတ္တနယေနေဝ ပါဠိဝဝတ္ထာနာဒိကော သဗ္ဗော အတ္ထသံဝဏ္ဏနာနယော ဝေဒိတဗ္ဗော။ မနိန္ဒြိယံ ပနေတ္ထ ယထာ စက္ခုန္ဒြိယာဒိမူလကေဟိ၊ တထေဝ ဣတ္ထိန္ဒြိယာဒိမူလကေဟိ သဒ္ဓိံ သမ္ပယောဂံ ဂစ္ဆတိ၊ တသ္မာ နိက္ခိတ္တပဋိပါဋိယာ အယောဇေတွာ သဗ္ဗေဟိပိ စက္ခုန္ဒြိယမူလာဒီဟိ သဒ္ဓိံ ပရိယောသာနေ ယောဇိတံ၊ စက္ခုန္ဒြိယေန စ သဒ္ဓိံ သုခိန္ဒြိယဒုက္ခိန္ဒြိယဒေါမနဿိန္ဒြိယာနိ၊ လောကုတ္တရိန္ဒြိယာနိ စ ပဋိသန္ဓိယံ နတ္ထီတိ န ဂဟိတာနိ။ ယထာ စေတ္ထ၊ ဧဝံ သေသိန္ဒြိယမူလကေသုပိ ယထာနုရူပံ ဉာတဗ္ဗံ။ ဣန္ဒြိယာနံ ပန ဗဟုကတာယ ဓာတုယမကတောပိ ဗဟုတရာနိ ယမကာနိ ဟောန္တိ အယံ ဝိသေသော၊ သေသံ ဟေဋ္ဌာ ဝုတ္တာနုသာရေန ဉာတဗ္ဗန္တိ။ အယံ ဣန္ဒြိယယမကမာတိကတ္ထသံဝဏ္ဏနာနယော။

မောဟဝိစ္ဆေဒနိယာ အဘိဓမ္မမာတိကတ္ထဝဏ္ဏနာယ

ယမကမာတိကတ္ထဝဏ္ဏနာ နိဋ္ဌိတာ။