📜
၇။ ပဋ္ဌာနမာတိကာ
ဟေတုပစ္စယော ¶ အာရမ္မဏပစ္စယော အဓိပတိပစ္စယော အနန္တရပစ္စယော သမနန္တရပစ္စယော သဟဇာတပစ္စယော အညမညပစ္စယော နိဿယပစ္စယော ဥပနိဿယပစ္စယော ပုရေဇာတပစ္စယော ပစ္ဆာဇာတပစ္စယော အာသေဝနပစ္စယော ကမ္မပစ္စယော ဝိပါကပစ္စယော အာဟာရပစ္စယော ဣန္ဒြိယပစ္စယော ဈာနပစ္စယော မဂ္ဂပစ္စယော သမ္ပယုတ္တပစ္စယော ဝိပ္ပယုတ္တပစ္စယော အတ္ထိပစ္စယော နတ္ထိပစ္စယော ဝိဂတပစ္စယော အဝိဂတပစ္စယောတိ (ပဋ္ဌာ။ ၁။၁။ပစ္စယုဒ္ဒေသ)။
ပဋ္ဌာနမာတိကာ နိဋ္ဌိတာ။
နိဂမနံ
သတ္တပ္ပကရဏနာမတော ¶ ¶ ၊ အဘိဓမ္မမဒေသယိ၊
ဒေဝါတိဒေဝေါ ဒေဝါနံ၊ ဒေဝလောကမှိ တံ ပုရေ။
တဿာယံ မာတိကာ သဗ္ဗာ၊ သကလဿာပိ ဥဒ္ဓရာ၊
စိရဋ္ဌိတတ္ထံ ဓမ္မဿ၊ တံ ပဂ္ဂဏှန္တု သာဓဝေါ။
ဒွါဝီသတိ တိကာ စေဝ၊ တထေဝ ဟေတုဂေါစ္ဆကံ၊
စူဠန္တရဒုကာ သတ္တ၊ ဂေါစ္ဆကာ စ တတော ပရံ။
မဟန္တရဒုကာ စာပိ၊ တတော စုဒ္ဒသ နိဒ္ဒိသေ၊
ဂေါစ္ဆကာနိ ဒုဝေ ပိဋ္ဌိ-ဒုကာနိဋ္ဌာရသေဒိသာ။
ဒွါစတ္တာလီသ သုတ္တန္တ-ဒုကာ တေဝန္တိ ပဉ္စဓာ၊
သတ္တပ္ပကရဏိကာ ဘိန္နာ၊ ဓမ္မသင်္ဂဏိမာတိကာ။
အဘိဓမ္မမာတိကာပါဠိ နိဋ္ဌိတာ။
နမော တဿ ဘဂဝတော အရဟတော သမ္မာသမ္ဗုဒ္ဓဿ
မောဟဝိစ္ဆေဒနီ
ဂန္ထာရမ္ဘကထာ
၁။ ကာရုညဘာဝိတံ ¶ ¶ ယဿ၊ ဉာဏစက္ခု မဟောဒယံ။
အန္ဓဘူတဿ လောကဿ၊ ဇာတံ သာမညလောစနံ။
၂။ တံ ဗုဒ္ဓံ သုဂတံ ဓီရံ၊ သသဒ္ဓမ္မံ သသာဝကံ။
ဝန္ဒိတွာနုဿရိတွာ စ၊ ထောမေတွာ စ ဝိနာယကံ။
၃။ ထေရေ စ ထိရသီလာဒိ-ဂုဏာလင်္ကာရသောဘိတေ။
သာသနုဇ္ဇောတကေ ဓီရေ၊ ပုဗ္ဗကေ ဝံသပါလကေ။
၄။ ဝိသုဒ္ဓိဒေဝဒေဝေါ ¶ ယံ၊ ဒေဝါနံ တိဒသာလယေ။
ပညာယ ဒေသယီ တဿ၊ အဘိဓမ္မဿ မာတိကာ။
၅။ ယာ တဿာ ဝိပုလတ္ထာယ၊ ဓမ္မသင်္ဂဏိအာဒိဟိ။
အနေကေဟိ ပကာရေဟိ၊ ပါဠိအဋ္ဌကထာဟိ စ။
၆။ အတ္ထော ဝိနိစ္ဆယော စေဝ၊
ဝိဘတ္တော သာဂရူပမော၊
အနန္တနယဝေါကိဏ္ဏော၊
ဒုက္ခောဂါဟော ယတော တတော။
၇။ သမာသေနာဘိဓမ္မတ္ထံ၊ မာတိကာမုခတောခိလံ။
ဉာတုကာမေဟိ သုဒ္ဓေဟိ၊ အန္တေဝါသီဟိ ယာစိတော။
၈။ သင်္ကဍ္ဎိတွာန ¶ နယတော၊ ပါဠိအဋ္ဌကထာဂတံ။
အတ္ထံ ဝိနိစ္ဆယဉ္စေဝ၊ သမာသေန နိရာကုလံ။
၉။ သာမတ္ထိယဂတံ အတ္ထံ၊ နိကာယန္တရနိဿဋံ။
မဟာဝိဟာရဝါသီနံ၊ ကမာဘတနယာနုဂံ။
၁၀။ ဒီပယန္တော နယညူနံ၊ သဒါ သမ္မောဒကာရိနိံ။
မောဟဝိစ္ဆေဒနိံ နာမ၊ ကရိဿာမတ္ထဝဏ္ဏနန္တိ။
ဂန္ထာရမ္ဘကထာ နိဋ္ဌိတာ။