📜

၅။ သေသကသိဏနိဒ္ဒေသော

အာပေါကသိဏကထာ

၉၁။ ဣဒါနိ ပထဝီကသိဏာနန္တရေ အာပေါကသိဏေ ဝိတ္ထာရကထာ ဟောတိ။ ယထေဝ ဟိ ပထဝီကသိဏံ၊ ဧဝံ အာပေါကသိဏမ္ပိ ဘာဝေတုကာမေန သုခနိသိန္နေန အာပသ္မိံ နိမိတ္တံ ဂဏှိတဗ္ဗံ၊ ကတေ ဝါ အကတေ ဝါတိ သဗ္ဗံ ဝိတ္ထာရေတဗ္ဗံ။ ယထာ စ ဣဓ၊ ဧဝံ သဗ္ဗတ္ထ။ ဣတော ပရဉှိ ဧတ္တကမ္ပိ အဝတွာ ဝိသေသမတ္တမေဝ ဝက္ခာမ။

ဣဓာပိ ပုဗ္ဗေကတာဓိကာရဿ ပုညဝတော အကတေ အာပသ္မိံ ပေါက္ခရဏိယာ ဝါ တဠာကေ ဝါ လောဏိယံ ဝါ သမုဒ္ဒေ ဝါ နိမိတ္တံ ဥပ္ပဇ္ဇတိ စူဠသိဝတ္ထေရဿ ဝိယ။ တဿ ကိရာယသ္မတော လာဘသက္ကာရံ ပဟာယ ဝိဝိတ္တဝါသံ ဝသိဿာမီတိ မဟာတိတ္ထေ နာဝမာရူဟိတွာ ဇမ္ဗုဒီပံ ဂစ္ဆတော အန္တရာ မဟာသမုဒ္ဒံ ဩလောကယတော တပ္ပဋိဘာဂံ ကသိဏနိမိတ္တံ ဥဒပါဒိ။

အကတာဓိကာရေန စတ္တာရော ကသိဏဒေါသေ ပရိဟရန္တေန နီလပီတလောဟိတောဒါတဝဏ္ဏာနမညတရဝဏ္ဏံ အာပံ အဂဟေတွာ ယံ ပန ဘူမိံ အသမ္ပတ္တမေဝ အာကာသေ သုဒ္ဓဝတ္ထေန ဂဟိတံ ဥဒကံ၊ အညံ ဝါ တထာရူပံ ဝိပ္ပသန္နံ အနာဝိလံ၊ တေန ပတ္တံ ဝါ ကုဏ္ဍိကံ ဝါ သမတိတ္တိကံ ပူရေတွာ ဝိဟာရပစ္စန္တေ ဝုတ္တပ္ပကာရေ ပဋိစ္ဆန္နေ ဩကာသေ ဌပေတွာ သုခနိသိန္နေန န ဝဏ္ဏော ပစ္စဝေက္ခိတဗ္ဗော။ န လက္ခဏံ မနသိ ကာတဗ္ဗံ။ နိဿယသဝဏ္ဏမေဝ ကတွာ ဥဿဒဝသေန ပဏ္ဏတ္တိဓမ္မေ စိတ္တံ ဌပေတွာ အမ္ဗု၊ ဥဒကံ၊ ဝါရိ၊ သလိလန္တိအာဒီသု အာပေါနာမေသု ပါကဋနာမဝသေနေဝ ‘‘အာပေါ အာပေါ’’တိ ဘာဝေတဗ္ဗံ။

တဿေဝံ ဘာဝယတော အနုက္ကမေန ဝုတ္တနယေနေဝ နိမိတ္တဒွယံ ဥပ္ပဇ္ဇတိ။ ဣဓ ပန ဥဂ္ဂဟနိမိတ္တံ စလမာနံ ဝိယ ဥပဋ္ဌာတိ၊ သစေ ဖေဏပုပ္ဖုဠကမိဿံ ဥဒကံ ဟောတိ၊ တာဒိသမေဝ ဥပဋ္ဌာတိ၊ ကသိဏဒေါသော ပညာယတိ။ ပဋိဘာဂနိမိတ္တံ ပန နိပ္ပရိပ္ဖန္ဒံ အာကာသေ ဌပိတမဏိတာလဝဏ္ဋံ ဝိယ မဏိမယာဒါသမဏ္ဍလမိဝ စ ဟုတွာ ဥပဋ္ဌာတိ။ သော တဿ သဟ ဥပဋ္ဌာနေနေဝ ဥပစာရဇ္ဈာနံ၊ ဝုတ္တနယေနေဝ စတုက္ကပဉ္စကဇ္ဈာနာနိ စ ပါပုဏာတီတိ။ အာပေါကသိဏံ။

တေဇောကသိဏကထာ

၉၂။ တေဇောကသိဏံ ဘာဝေတုကာမေနာပိ တေဇသ္မိံ နိမိတ္တံ ဂဏှိတဗ္ဗံ။ တတ္ထ ကတာဓိကာရဿ ပုညဝတော အကတေ နိမိတ္တံ ဂဏှန္တဿ ဒီပသိခါယ ဝါ ဥဒ္ဓနေ ဝါ ပတ္တပစနဋ္ဌာနေ ဝါ ဒဝဒါဟေ ဝါ ယတ္ထ ကတ္ထစိ အဂ္ဂိဇာလံ ဩလောကေန္တဿ နိမိတ္တံ ဥပ္ပဇ္ဇတိ စိတ္တဂုတ္တတ္ထေရဿ ဝိယ။ တဿ ဟာယသ္မတော ဓမ္မဿဝနဒိဝသေ ဥပေါသထာဂါရံ ပဝိဋ္ဌဿ ဒီပသိခံ ဩလောကေန္တဿေဝ နိမိတ္တံ ဥပ္ပဇ္ဇိ။

ဣတရေန ပန ကာတဗ္ဗံ။ တတြိဒံ ကရဏဝိဓာနံ၊ သိနိဒ္ဓါနိ သာရဒါရူနိ ဖာလေတွာ သုက္ခာပေတွာ ဃဋိကံ ဃဋိကံ ကတွာ ပတိရူပံ ရုက္ခမူလံ ဝါ မဏ္ဍပံ ဝါ ဂန္တွာ ပတ္တပစနာကာရေန ရာသိံ ကတွာ အာလိမ္ပေတွာ ကဋသာရကေ ဝါ စမ္မေ ဝါ ပဋေ ဝါ ဝိဒတ္ထိစတုရင်္ဂုလပ္ပမာဏံ ဆိဒ္ဒံ ကာတဗ္ဗံ။ တံ ပုရတော ဌပေတွာ ဝုတ္တနယေနေဝ နိသီဒိတွာ ဟေဋ္ဌာ တိဏကဋ္ဌံ ဝါ ဥပရိ ဓူမသိခံ ဝါ အမနသိကရိတွာ ဝေမဇ္ဈေ ဃနဇာလာယ နိမိတ္တံ ဂဏှိတဗ္ဗံ၊ နီလန္တိ ဝါ ပီတန္တိ ဝါတိအာဒိဝသေန ဝဏ္ဏော န ပစ္စဝေက္ခိတဗ္ဗော၊ ဥဏှတ္တဝသေန လက္ခဏံ န မနသိ ကာတဗ္ဗံ။ နိဿယသဝဏ္ဏမေဝ ကတွာ ဥဿဒဝသေန ပဏ္ဏတ္တိဓမ္မေ စိတ္တံ ဌပေတွာ ပါဝကော၊ ကဏှဝတ္တနီ၊ ဇာတဝေဒေါ၊ ဟုတာသနောတိအာဒီသု အဂ္ဂိနာမေသု ပါကဋနာမဝသေနေဝ ‘‘တေဇော တေဇော’’တိ ဘာဝေတဗ္ဗံ။

တဿေဝံ ဘာဝယတော အနုက္ကမေန ဝုတ္တနယေနေဝ နိမိတ္တဒွယံ ဥပ္ပဇ္ဇတိ။ တတ္ထ ဥဂ္ဂဟနိမိတ္တံ ဇာလံ ဆိဇ္ဇိတွာ ဆိဇ္ဇိတွာ ပတနသဒိသံ ဟုတွာ ဥပဋ္ဌာတိ။ အကတေ ဂဏှန္တဿ ပန ကသိဏဒေါသော ပညာယတိ၊ အလာတခဏ္ဍံ ဝါ အင်္ဂါရပိဏ္ဍော ဝါ ဆာရိကာ ဝါ ဓူမော ဝါ ဥပဋ္ဌာတိ။ ပဋိဘာဂနိမိတ္တံ နိစ္စလံ အာကာသေ ဌပိတရတ္တကမ္ဗလက္ခဏ္ဍံ ဝိယ သုဝဏ္ဏတာလဝဏ္ဋံ ဝိယ ကဉ္စနတ္ထမ္ဘော ဝိယ စ ဥပဋ္ဌာတိ။ သော တဿ သဟ ဥပဋ္ဌာနေနေဝ ဥပစာရဇ္ဈာနံ၊ ဝုတ္တနယေနေဝ စတုက္ကပဉ္စကဇ္ဈာနာနိ စ ပါပုဏာတီတိ။ တေဇောကသိဏံ။

ဝါယောကသိဏကထာ

၉၃။ ဝါယောကသိဏံ ဘာဝေတုကာမေနာပိ ဝါယုသ္မိံ နိမိတ္တံ ဂဏှိတဗ္ဗံ။ တဉ္စ ခေါ ဒိဋ္ဌဝသေန ဝါ ဖုဋ္ဌဝသေန ဝါ။ ဝုတ္တဉှေတံ အဋ္ဌကထာသု ‘‘ဝါယောကသိဏံ ဥဂ္ဂဏှန္တော ဝါယုသ္မိံ နိမိတ္တံ ဂဏှာတိ၊ ဥစ္ဆဂ္ဂံ ဝါ ဧရိတံ သမေရိတံ ဥပလက္ခေတိ၊ ဝေဠဂ္ဂံ ဝါ…ပေ… ရုက္ခဂ္ဂံ ဝါ ကေသဂ္ဂံ ဝါ ဧရိတံ သမေရိတံ ဥပလက္ခေတိ၊ ကာယသ္မိံ ဝါ ဖုဋ္ဌံ ဥပလက္ခေတီ’’တိ။ တသ္မာ သမသီသဋ္ဌိတံ ဃနပတ္တံ ဥစ္ဆုံ ဝါ ဝေဠုံ ဝါ ရုက္ခံ ဝါ စတုရင်္ဂုလပ္ပမာဏံ ဃနကေသဿ ပုရိသဿ သီသံ ဝါ ဝါတေန ပဟရိယမာနံ ဒိသွာ ‘‘အယံ ဝါတော ဧတသ္မိံ ဌာနေ ပဟရတီ’’တိ သတိံ ဌပေတွာ၊ ယံ ဝါ ပနဿ ဝါတပါနန္တရိကာယ ဝါ ဘိတ္တိဆိဒ္ဒေန ဝါ ပဝိသိတွာ ဝါတော ကာယပ္ပဒေသံ ပဟရတိ၊ တတ္ထ သတိံ ဌပေတွာ ဝါတမာလုတအနိလာဒီသု ဝါယုနာမေသု ပါကဋနာမဝသေနေဝ ‘‘ဝါတော ဝါတော’’တိ ဘာဝေတဗ္ဗံ။ ဣဓ ဥဂ္ဂဟနိမိတ္တဝဍ္ဎနတော ဩတာရိတမတ္တဿ ပါယာသဿ ဥသုမဝဋ္ဋိသဒိသံ စလံ ဟုတွာ ဥပဋ္ဌာတိ။ ပဋိဘာဂနိမိတ္တံ သန္နိသိန္နံ ဟောတိ နိစ္စလံ။ သေသံ ဝုတ္တနယေနေဝ ဝေဒိတဗ္ဗန္တိ။ ဝါယောကသိဏံ။

နီလကသိဏကထာ

၉၄။ တဒနန္တရံ ပန နီလကသိဏံ ဥဂ္ဂဏှန္တော နီလကသ္မိံ နိမိတ္တံ ဂဏှာတိ ပုပ္ဖသ္မိံ ဝါ ဝတ္ထသ္မိံ ဝါ ဝဏ္ဏဓာတုယာ ဝါတိ ဝစနတော ကတာဓိကာရဿ ပုညဝတော တာဝ တထာရူပံ မာလာဂစ္ဆံ ဝါ ပူဇာဌာနေသု ပုပ္ဖသန္ထရံ ဝါ နီလဝတ္ထမဏီနံ ဝါ အညတရံ ဒိသွာဝ နိမိတ္တံ ဥပ္ပဇ္ဇတိ။ ဣတရေန နီလုပ္ပလဂိရိကဏ္ဏိကာဒီနိ ပုပ္ဖာနိ ဂဟေတွာ ယထာ ကေသရံ ဝါ ဝဏ္ဋံ ဝါ န ပညာယတိ၊ ဧဝံ စင်္ဂေါဋကံ ဝါ ကရဏ္ဍပဋလံ ဝါ ပတ္တေဟိယေဝ သမတိတ္တိကံ ပူရေတွာ သန္ထရိတဗ္ဗံ။ နီလဝဏ္ဏေန ဝါ ဝတ္ထေန ဘဏ္ဍိကံ ဗန္ဓိတွာ ပူရေတဗ္ဗံ။ မုခဝဋ္ဋိယံ ဝါ အဿ ဘေရိတလမိဝ ဗန္ဓိတဗ္ဗံ။ ကံသနီလပလာသနီလအဉ္ဇနနီလာနံ ဝါ အညတရေန ဓာတုနာ ပထဝီကသိဏေ ဝုတ္တနယေန သံဟာရိမံ ဝါ ဘိတ္တိယံယေဝ ဝါ ကသိဏမဏ္ဍလံ ကတွာ ဝိသဘာဂဝဏ္ဏေန ပရိစ္ဆိန္ဒိတဗ္ဗံ။ တတော ပထဝီကသိဏေ ဝုတ္တနယေန ‘‘နီလံ နီလ’’န္တိ မနသိကာရော ပဝတ္တေတဗ္ဗော။ ဣဓာပိ ဥဂ္ဂဟနိမိတ္တေ ကသိဏဒေါသော ပညာယတိ၊ ကေသရဒဏ္ဍကပတ္တန္တရိကာဒီနိ ဥပဋ္ဌဟန္တိ။ ပဋိဘာဂနိမိတ္တံ ကသိဏမဏ္ဍလတော မုဉ္စိတွာ အာကာသေ မဏိတာလဝဏ္ဋသဒိသံ ဥပဋ္ဌာတိ။ သေသံ ဝုတ္တနယေနေဝ ဝေဒိတဗ္ဗန္တိ။ နီလကသိဏံ။

ပီတကသိဏကထာ

၉၅။ ပီတကသိဏေပိ ဧသေဝ နယော။ ဝုတ္တဉှေတံ ပီတကသိဏံ ဥဂ္ဂဏှန္တော ပီတကသ္မိံ နိမိတ္တံ ဂဏှာတိ ပုပ္ဖသ္မိံ ဝါ ဝတ္ထသ္မိံ ဝါ ဝဏ္ဏဓာတုယာ ဝါတိ။ တသ္မာ ဣဓာပိ ကတာဓိကာရဿ ပုညဝတော တထာရူပံ မာလာဂစ္ဆံ ဝါ ပုပ္ဖသန္ထရံ ဝါ ပီတဝတ္ထဓာတူနံ ဝါ အညတရံ ဒိသွာဝ နိမိတ္တံ ဥပ္ပဇ္ဇတိ စိတ္တဂုတ္တတ္ထေရဿ ဝိယ။ တဿ ကိရာယသ္မတော စိတ္တလပဗ္ဗတေ ပတ္တင်္ဂပုပ္ဖေဟိ ကတံ အာသနပူဇံ ပဿတော သဟ ဒဿနေနေဝ အာသနပ္ပမာဏံ နိမိတ္တံ ဥဒပါဒိ။ ဣတရေန ကဏိကာရပုပ္ဖာဒိနာ ဝါ ပီတဝတ္ထေန ဝါ ဓာတုနာ ဝါ နီလကသိဏေ ဝုတ္တနယေနေဝ ကသိဏံ ကတွာ ‘‘ပီတကံ ပီတက’’န္တိ မနသိကာရော ပဝတ္တေတဗ္ဗော။ သေသံ တာဒိသမေဝါတိ။ ပီတကသိဏံ။

လောဟိတကသိဏကထာ

၉၆။ လောဟိတကသိဏေပိ ဧသေဝ နယော။ ဝုတ္တဉှေတံ လောဟိတကသိဏံ ဥဂ္ဂဏှန္တော လောဟိတကသ္မိံ နိမိတ္တံ ဂဏှာတိ ပုပ္ဖသ္မိံ ဝါ ဝတ္ထသ္မိံ ဝါ ဝဏ္ဏဓာတုယာ ဝါတိ။ တသ္မာ ဣဓာပိ ကတာဓိကာရဿ ပုညဝတော တထာရူပံ ဗန္ဓုဇီဝကာဒိမာလာဂစ္ဆံ ဝါ ပုပ္ဖသန္ထရံ ဝါ လောဟိတကဝတ္ထမဏိဓာတူနံ ဝါ အညတရံ ဒိသွာဝ နိမိတ္တံ ဥပ္ပဇ္ဇတိ။ ဣတရေန ဇယသုမနဗန္ဓုဇီဝကရတ္တကောရဏ္ဍကာဒိပုပ္ဖေဟိ ဝါ ရတ္တဝတ္ထေန ဝါ ဓာတုနာ ဝါ နီလကသိဏေ ဝုတ္တနယေနေဝ ကသိဏံ ကတွာ ‘‘လောဟိတကံ လောဟိတက’’န္တိ မနသိကာရော ပဝတ္တေတဗ္ဗော။ သေသံ တာဒိသမေဝါတိ။ လောဟိတကသိဏံ။

ဩဒါတကသိဏကထာ

၉၇။ ဩဒါတကသိဏေပိ ဩဒါတကသိဏံ ဥဂ္ဂဏှန္တော ဩဒါတသ္မိံ နိမိတ္တံ ဂဏှာတိ ပုပ္ဖသ္မိံ ဝါ ဝတ္ထသ္မိံ ဝါ ဝဏ္ဏဓာတုယာ ဝါတိ ဝစနတော ကတာဓိကာရဿ တာဝ ပုညဝတော တထာရူပံ မာလာဂစ္ဆံ ဝါ ဝဿိကသုမနာဒိပုပ္ဖသန္ထရံ ဝါ ကုမုဒပဒုမရာသိံ ဝါ ဩဒါတဝတ္ထဓာတူနံ ဝါ အညတရံ ဒိသွာဝ နိမိတ္တံ ဥပ္ပဇ္ဇတိ၊ တိပုမဏ္ဍလရဇတမဏ္ဍလစန္ဒမဏ္ဍလေသုပိ ဥပ္ပဇ္ဇတိယေဝ။ ဣတရေန ဝုတ္တပ္ပကာရေဟိ ဩဒါတပုပ္ဖေဟိ ဝါ ဩဒါတဝတ္ထေန ဝါ ဓာတုနာ ဝါ နီလကသိဏေ ဝုတ္တနယေနေဝ ကသိဏံ ကတွာ ‘‘ဩဒါတံ ဩဒါတ’’န္တိ မနသိကာရော ပဝတ္တေတဗ္ဗော။ သေသံ တာဒိသမေဝါတိ။ ဩဒါတကသိဏံ။

အာလောကကသိဏကထာ

၉၈။ အာလောကကသိဏေ ပန အာလောကကသိဏံ ဥဂ္ဂဏှန္တော အာလောကသ္မိံ နိမိတ္တံ ဂဏှာတိ ဘိတ္တိဆိဒ္ဒေ ဝါ တာဠစ္ဆိဒ္ဒေ ဝါ ဝါတပါနန္တရိကာယ ဝါတိ ဝစနတော ကတာဓိကာရဿ တာဝ ပုညဝတော ယံ ဘိတ္တိဆိဒ္ဒါဒီနံ အညတရေန သူရိယာလောကော ဝါ စန္ဒာလောကော ဝါ ပဝိသိတွာ ဘိတ္တိယံ ဝါ ဘူမိယံ ဝါ မဏ္ဍလံ သမုဋ္ဌာပေတိ၊ ဃနပဏ္ဏရုက္ခသာခန္တရေန ဝါ ဃနသာခါမဏ္ဍပန္တရေန ဝါ နိက္ခမိတွာ ဘူမိယမေဝ မဏ္ဍလံ သမုဋ္ဌာပေတိ၊ တံ ဒိသွာဝ နိမိတ္တံ ဥပ္ပဇ္ဇတိ။ ဣတရေနာပိ တဒေဝ ဝုတ္တပ္ပကာရမောဘာသမဏ္ဍလံ ‘‘ဩဘာသော ဩဘာသော’’တိ ဝါ ‘‘အာလောကော အာလောကော’’တိ ဝါ ဘာဝေတဗ္ဗံ။ တထာ အသက္ကောန္တေန ဃဋေ ဒီပံ ဇာလေတွာ ဃဋမုခံ ပိဒဟိတွာ ဃဋေ ဆိဒ္ဒံ ကတွာ ဘိတ္တိမုခံ ဌပေတဗ္ဗံ။ တေန ဆိဒ္ဒေန ဒီပါလောကော နိက္ခမိတွာ ဘိတ္တိယံ မဏ္ဍလံ ကရောတိ၊ တံ အာလောကော အာလောကောတိ ဘာဝေတဗ္ဗံ။ ဣဒမိတရေဟိ စိရဋ္ဌိတိကံ ဟောတိ။ ဣဓ ဥဂ္ဂဟနိမိတ္တံ ဘိတ္တိယံ ဝါ ဘူမိယံ ဝါ ဥဋ္ဌိတမဏ္ဍလသဒိသမေဝ ဟောတိ။ ပဋိဘာဂနိမိတ္တံ ဃနဝိပ္ပသန္နအာလောကပုဉ္ဇသဒိသံ။ သေသံ တာဒိသမေဝါတိ။ အာလောကကသိဏံ။

ပရိစ္ဆိန္နာကာသကသိဏကထာ

၉၉။ ပရိစ္ဆိန္နာကာသကသိဏေပိ အာကာသကသိဏံ ဥဂ္ဂဏှန္တော အာကာသသ္မိံ နိမိတ္တံ ဂဏှာတိ ဘိတ္တိဆိဒ္ဒေ ဝါ တာဠစ္ဆိဒ္ဒေ ဝါ ဝါတပါနန္တရိကာယ ဝါတိ ဝစနတော ကတာဓိကာရဿ တာဝ ပုညဝတော ဘိတ္တိဆိဒ္ဒါဒီသု အညတရံ ဒိသွာဝ နိမိတ္တံ ဥပ္ပဇ္ဇတိ။ ဣတရေန သုစ္ဆန္နမဏ္ဍပေ ဝါ စမ္မကဋသာရကာဒီနံ ဝါ အညတရသ္မိံ ဝိဒတ္ထိစတုရင်္ဂုလပ္ပမာဏံ ဆိဒ္ဒံ ကတွာ တဒေဝ ဝါ ဘိတ္တိဆိဒ္ဒါဒိဘေဒံ ဆိဒ္ဒံ ‘‘အာကာသော အာကာသော’’တိ ဘာဝေတဗ္ဗံ။ ဣဓ ဥဂ္ဂဟနိမိတ္တံ သဒ္ဓိံ ဘိတ္တိပရိယန္တာဒီဟိ ဆိဒ္ဒသဒိသမေဝ ဟောတိ၊ ဝဍ္ဎိယမာနမ္ပိ န ဝဍ္ဎတိ။ ပဋိဘာဂနိမိတ္တမာကာသမဏ္ဍလမေဝ ဟုတွာ ဥပဋ္ဌာတိ၊ ဝဍ္ဎိယမာနဉ္စ ဝဍ္ဎတိ။ သေသံ ပထဝီကသိဏေ ဝုတ္တနယေနေဝ ဝေဒိတဗ္ဗန္တိ။ ပရိစ္ဆိန္နာကာသကသိဏံ။

ဣတိ ကသိဏာနိ ဒသဗလော၊

ဒသ ယာနိ အဝေါစ သဗ္ဗဓမ္မဒသော၊

ရူပါဝစရမှိ စတုက္ကပဉ္စကဇ္ဈာနဟေတူနိ။

ဧဝံ တာနိ စ တေသဉ္စ၊

ဘာဝနာနယမိမံ ဝိဒိတွာန၊

တေသွေဝ အယံ ဘိယျော၊

ပကိဏ္ဏကကထာပိ ဝိညေယျာ။

ပကိဏ္ဏကကထာ

၁၀၀။ ဣမေသု ဟိ ပထဝီကသိဏဝသေန ဧကောပိ ဟုတွာ ဗဟုဓာ ဟောတီတိအာဒိဘာဝေါ၊ အာကာသေ ဝါ ဥဒကေ ဝါ ပထဝိံ နိမ္မိနိတွာ ပဒသာ ဂမနံ၊ ဌာနနိသဇ္ဇာဒိကပ္ပနံ ဝါ၊ ပရိတ္တအပ္ပမာဏနယေန အဘိဘာယတနပဋိလာဘောတိ ဧဝမာဒီနိ ဣဇ္ဈန္တိ။

အာပေါကသိဏဝသေန ပထဝိယံ ဥမ္မုဇ္ဇနနိမ္မုဇ္ဇနံ၊ ဥဒကဝုဋ္ဌိသမုပ္ပာဒနံ၊ နဒီသမုဒ္ဒါဒိနိမ္မာနံ၊ ပထဝီပဗ္ဗတပါသာဒါဒီနံ ကမ္ပနန္တိ ဧဝမာဒီနိ ဣဇ္ဈန္တိ။

တေဇောကသိဏဝသေန ဓူမာယနာ၊ ပဇ္ဇလနာ၊ အင်္ဂါရဝုဋ္ဌိသမုပ္ပာဒနံ၊ တေဇသာ တေဇောပရိယာဒါနံ၊ ယဒေဝ သော ဣစ္ဆတိ တဿ ဍဟနသမတ္ထတာ၊ ဒိဗ္ဗေန စက္ခုနာ ရူပဒဿနတ္ထာယ အာလောကကရဏံ၊ ပရိနိဗ္ဗာနသမယေ တေဇောဓာတုယာ သရီရဇ္ဈာပနန္တိ ဧဝမာဒီနိ ဣဇ္ဈန္တိ။

ဝါယောကသိဏဝသေန ဝါယုဂတိဂမနံ၊ ဝါတဝုဋ္ဌိသမုပ္ပာဒနန္တိ ဧဝမာဒီနိ ဣဇ္ဈန္တိ။

နီလကသိဏဝသေန နီလရူပနိမ္မာနံ၊ အန္ဓကာရကရဏံ၊ သုဝဏ္ဏဒုဗ္ဗဏ္ဏနယေန အဘိဘာယတနပဋိလာဘော၊ သုဘဝိမောက္ခာဓိဂမောတိ ဧဝမာဒီနိ ဣဇ္ဈန္တိ။

ပီတကသိဏဝသေန ပီတကရူပနိမ္မာနံ၊ သုဝဏ္ဏန္တိ အဓိမုစ္စနာ၊ ဝုတ္တနယေနေဝ အဘိဘာယတနပဋိလာဘော၊ သုဘဝိမောက္ခာဓိဂမော စာတိ ဧဝမာဒီနိ ဣဇ္ဈန္တိ။

လောဟိတကသိဏဝသေန လောဟိတကရူပနိမ္မာနံ၊ ဝုတ္တနယေနေဝ အဘိဘာယတနပဋိလာဘော၊ သုဘဝိမောက္ခာဓိဂမောတိ ဧဝမာဒီနိ ဣဇ္ဈန္တိ။

ဩဒါတကသိဏဝသေန ဩဒါတရူပနိမ္မာနံ၊ ထိနမိဒ္ဓဿ ဒူရဘာဝကရဏံ၊ အန္ဓကာရဝိဓမနံ၊ ဒိဗ္ဗေန စက္ခုနာ ရူပဒဿနတ္ထာယ အာလောကကရဏန္တိ ဧဝမာဒီနိ ဣဇ္ဈန္တိ။

အာလောကကသိဏဝသေန သပ္ပဘာရူပနိမ္မာနံ၊ ထိနမိဒ္ဓဿ ဒူရဘာဝကရဏံ၊ အန္ဓကာရဝိဓမနံ၊ ဒိဗ္ဗေန စက္ခုနာ ရူပဒဿနတ္ထံ အာလောကကရဏန္တိ ဧဝမာဒီနိ ဣဇ္ဈန္တိ။

အာကာသကသိဏဝသေန ပဋိစ္ဆန္နာနံ ဝိဝဋကရဏံ၊ အန္တောပထဝီပဗ္ဗတာဒီသုပိ အာကာသံ နိမ္မိနိတွာ ဣရိယာပထကပ္ပနံ၊ တိရောကုဍ္ဍာဒီသု အသဇ္ဇမာနဂမနန္တိ ဧဝမာဒီနိ ဣဇ္ဈန္တိ။

သဗ္ဗာနေဝ ဥဒ္ဓံ အဓော တိရိယံ အဒွယံ အပ္ပမာဏန္တိ ဣမံ ပဘေဒံ လဘန္တိ။ ဝုတ္တဉှေတံ ‘‘ပထဝီကသိဏမေကော သဉ္ဇာနာတိ။ ဥဒ္ဓမဓောတိရိယံ အဒွယမပ္ပမာဏ’’န္တိအာဒိ။

တတ္ထ ဥဒ္ဓန္တိ ဥပရိဂဂနတလာဘိမုခံ။ အဓောတိ ဟေဋ္ဌာဘူမိတလာဘိမုခံ။ တိရိယန္တိ ခေတ္တမဏ္ဍလမိဝ သမန္တာ ပရိစ္ဆိန္ဒိတံ။ ဧကစ္စော ဟိ ဥဒ္ဓမေဝ ကသိဏံ ဝဍ္ဎေတိ၊ ဧကစ္စော အဓော၊ ဧကစ္စော သမန္တတော။ တေန တေန ဝါ ကာရဏေန ဧဝံ ပသာရေတိ။ အာလောကမိဝ ဒိဗ္ဗစက္ခုနာ ရူပဒဿနကာမော။ တေန ဝုတ္တံ ဥဒ္ဓမဓောတိရိယန္တိ။ အဒွယန္တိ ဣဒံ ပန ဧကဿ အညဘာဝါနုပဂမနတ္ထံ ဝုတ္တံ။ ယထာ ဟိ ဥဒကံ ပဝိဋ္ဌဿ သဗ္ဗဒိသာသု ဥဒကမေဝ ဟောတိ၊ န အညံ၊ ဧဝမေဝ ပထဝီကသိဏံ ပထဝီကသိဏမေဝ ဟောတိ၊ နတ္ထိ တဿ အညော ကသိဏသမ္ဘေဒေါတိ။ ဧသေဝ နယော သဗ္ဗတ္ထ။ အပ္ပမာဏန္တိ ဣဒံ တဿ ဖရဏအပ္ပမာဏဝသေန ဝုတ္တံ။ တဉှိ စေတသာ ဖရန္တော သကလမေဝ ဖရတိ။ န အယမဿ အာဒိ ဣဒံ မဇ္ဈန္တိ ပမာဏံ ဂဏှာတီတိ။

၁၀၁။ ယေ စ တေ သတ္တာ ကမ္မာဝရဏေန ဝါ သမန္နာဂတာ ကိလေသာဝရဏေန ဝါ သမန္နာဂတာ ဝိပါကာဝရဏေန ဝါ သမန္နာဂတာ အသဒ္ဓါ အစ္ဆန္ဒိကာ ဒုပ္ပညာ အဘဗ္ဗာ နိယာမံ ဩက္ကမိတုံ ကုသလေသု ဓမ္မေသု သမ္မတ္တန္တိ ဝုတ္တာ၊ တေသမေကဿာပေကကသိဏေပိ ဘာဝနာ န ဣဇ္ဈတိ။ တတ္ထ ကမ္မာဝရဏေန သမန္နာဂတာတိ အာနန္တရိယကမ္မသမင်္ဂိနော။ ကိလေသာဝရဏေန သမန္နာဂတာတိ နိယတမိစ္ဆာဒိဋ္ဌိကာ စေဝ ဥဘတောဗျဉ္ဇနကပဏ္ဍကာ စ။ ဝိပါကာဝရဏေန သမန္နာဂတာတိ အဟေတုကဒွိဟေတုကပဋိသန္ဓိကာ။ အသဒ္ဓါတိ ဗုဒ္ဓါဒီသု သဒ္ဓါဝိရဟိတာ။ အစ္ဆန္ဒိကာတိ အပစ္စနီကပဋိပဒါယံ ဆန္ဒဝိရဟိတာ ။ ဒုပ္ပညာတိ လောကိယလောကုတ္တရသမ္မာဒိဋ္ဌိယာ ဝိရဟိတာ။ အဘဗ္ဗာနိယာမံ ဩက္ကမိတုံ ကုသလေသု ဓမ္မေသု သမ္မတ္တန္တိ ကုသလေသု ဓမ္မေသု နိယာမသင်္ခါတံ သမ္မတ္တသင်္ခါတဉ္စ အရိယမဂ္ဂံ ဩက္ကမိတုံ အဘဗ္ဗာတိ အတ္ထော။ န ကေဝလဉ္စ ကသိဏေယေဝ၊ အညေသုပိ ကမ္မဋ္ဌာနေသု ဧတေသမေကဿပိ ဘာဝနာ န ဣဇ္ဈတိ။ တသ္မာ ဝိဂတဝိပါကာဝရဏေနပိ ကုလပုတ္တေန ကမ္မာဝရဏဉ္စ ကိလေသာဝရဏဉ္စ အာရကာ ပရိဝဇ္ဇေတွာ သဒ္ဓမ္မဿဝနသပ္ပုရိသူပနိဿယာဒီဟိ သဒ္ဓဉ္စ ဆန္ဒဉ္စ ပညဉ္စ ဝဍ္ဎေတွာ ကမ္မဋ္ဌာနာနုယောဂေ ယောဂေါ ကရဏီယောတိ။

ဣတိ သာဓုဇနပါမောဇ္ဇတ္ထာယ ကတေ ဝိသုဒ္ဓိမဂ္ဂေ

သမာဓိဘာဝနာဓိကာရေ

သေသကသိဏနိဒ္ဒေသော နာမ

ပဉ္စမော ပရိစ္ဆေဒေါ။