📜

ပစ္စယ သင်္ဂဟ ပရမတ္ထဒီပနီ

၁၆၆။ ဧဝံ သတ္တဟိ ပရိစ္ဆေဒေဟိ ပထမဿ နာမရူပပရိစ္ဆေဒ ဉာဏဿ ဝိဓာနံ ဒဿေတွာ ဣဒါနိ ဒုတီယဿ ပစ္စယပရိဂ္ဂဟဉာဏဿ ဝိဓာနံ ဒဿေန္တော ယေသံသင်္ခတဓမ္မာနန္တိအာဒိ မာဟ။ ဣဒါနိ ယေသံ သင်္ခတဓမ္မာနံ သင်္ခတာသင်္ခတဘူတာ ယေဓမ္မာ ယထာ ယေဟိ ဟေတာဒီဟိ ပစ္စယာကာရေဟိ ပစ္စယာ ဥပကာရကာ ဟောန္တိ။ တံ ဝိဘာဂံ တေသံ သင်္ခတဓမ္မာနံ ပစ္စယုပ္ပန္နဘူတာနံ ဝိဘာဂဉ္စ တေသံ ပစ္စယဓမ္မာနံ ဝိဘာဂဉ္စ တေသံပစ္စယာကာရာနံ ဣဟ ဝိဘာဂဉ္စ ဣမသ္မိံ ဝုစ္စမာနေ ပစ္စယသင်္ဂဟေ ယထာရဟံ ပဝက္ခာမီတိ ယောဇနာ။

[၂၂၄] ဝိဘာဝနိယံ ပန

‘‘ပစ္စယေ ဒဿေတု’’န္တိ ဝုတ္တံ။ တံ တံ ဝိဘာဂန္တိ ဣမိနာ န သမေတိ။

[၂၂၅] ယဉ္စ တတ္ထ

‘‘ဣဟ ဣမသ္မိံ သမုစ္စယ သင်္ဂဟာနန္တရေ ဌာနေ’’တိ ဣဟ သဒ္ဒဿ အတ္ထဝိဘာဝနံ ဝုတ္တံ။ တံပိ န ယုဇ္ဇတိ။

ဧတသ္မိဉှိ အတ္ထေ သတိ ဣဒါနိ သဒ္ဒေါ နိရတ္ထကော ဟောတီတိ၊ ပဋိစ္စ ဖလံ သမုပ္ပဇ္ဇတိ ဧတသ္မာတိ ပဋိစ္စသမုပ္ပာဒေါ။ တတ္ထ ပဋိစ္စာတိ အဝိနာ၊ အမုဉ္စိတွာတိ အတ္ထော။ အဝိဇ္ဇာဒိကော ပစ္စယဓမ္မောတိ ဝဏ္ဏေန္တိ။ အထဝါ၊ သမုပ္ပဇ္ဇနံ သမုပ္ပာဒေါ။ သဟဇာတဓမ္မေဟိ သဟေဝ ကလာပဝသေန အဘိနိဗ္ဗတ္တိ ပါတုဘာဝေါတိ အတ္ထော။ ယထာသကံ ပစ္စယံ ပဋိစ္စ တေန အဝိနာဘာဝီဟုတွာ သမုပ္ပာဒေါ ပဋိစ္စ သမုပ္ပာဒေါ၊ အတ္ထတော ပန သဗ္ဗေသံ ပစ္စယပစ္စယုပ္ပန္နဘူတာနံ သင်္ခတ ဓမ္မာနံ ပစ္စယာယတ္တဝုတ္တိတာသင်္ခါတံ သဗ္ဗသင်္ခတသာဓာရဏံ ဧကံ သာမညလက္ခဏံ။ ယံ ဣဒပ္ပစ္စယတာတိစ ဝုစ္စတိ။ တတ္ထစ ဣဒပ္ပစ္စယ တာတိ အယံ ဣမဿ ပစ္စယော အယံ ဣမဿ ပစ္စယောတိ ဧဝံ နိဒ္ဒိသိတဗ္ဗော အယံ ပစ္စယော ဧတေသန္တိ ဣဒပ္ပစ္စယာ။ သင်္ခတဓမ္မာ။ ဣဒပ္ပစ္စယာနံ ဘာဝေါ ဣဒပ္ပစ္စယတာ။ ယထာဝုတ္တ သာမညလက္ခဏံ ဧဝါတိ အတ္ထော ဝေဒိတဗ္ဗော၊ န ပဋိစ္စ ဖလံ သမုပ္ပဇ္ဇတိ ဧတသ္မာတိ ပဋိစ္စသမုပ္ပာဒေါ။ အဝိဇ္ဇာဒိကော ပစ္စယဓမ္မောတိစ ဣမေသံ ပစ္စယာ ဣဒပ္ပစ္စယာ။ ဣဒပ္ပစ္စယာဧဝ ဣဒပ္ပစ္စယတာတိစ။ ဝိသုဒ္ဓိမဂ္ဂေ ပန သမုပ္ပဇ္ဇနံ သမုပ္ပာဒေါတိ အယမတ္ထော ပဋိက္ခိတ္တော။ ပါဠိယံ ပန အယမေဝ အဓိပ္ပေတော ဝိယ ဒိဿတိ။ ယထာဟ –

ကတမောစ ဘိက္ခဝေ ပဋိစ္စသမုပ္ပာဒေါ။ ဇာတိပစ္စယာ ဘိက္ခဝေ ဇရာမရဏံ၊ ဥပ္ပာဒါဝါ တထာဂတာနံ အနုပ္ပာဒါဝါ တထာဂတာနံ ဌိတာဝ သာ ဓာတု၊ ဓမ္မဋ္ဌိတတာ ဓမ္မနိယာမတာ ဣဒပ္ပစ္စယတာတိ။လ။ အဝိဇ္ဇာပစ္စယာ သင်္ခါရာ ဥပ္ပာဒါဝါ။လ။ ဣဒပ္ပစ္စယတာ။ ဣတိ ခေါ ဘိက္ခဝေ တတြ တထတာ အဝိတထတာ အနညထတာ ဣဒပ္ပစ္စယတာ။ အယံ ဝုစ္စတိ ဘိက္ခဝေ ပဋိစ္စသမုပ္ပာဒေါတိ။

ဧတ္ထ ဟိ ဌိတာဝ သာ ဓာတူတိအာဒိနာ တတြ တထတာ အဝိတထတာတိအာဒိနာစ ယထာဝုတ္တံ ဣဒပ္ပစ္စယတာ သင်္ခါတံ သာမည လက္ခဏမေဝ ပဋိစ္စသမုပ္ပာဒေါနာမာတိ ဒဿေတိ။ န စေတ္ထ ဘာဝသာဓနေ ကတေ သတိ ပဋိစ္စသဒ္ဒေန သဟ သမုပ္ပာဒသဒ္ဒဿ အသမာနကတ္တုတာသင်္ခါတော ဗျဉ္ဇနယုတ္တိဝိရောဓော အတ္ထိ။ ယော ပဋိစ္စ ကြိယာယ ကတ္တာ၊ တဿေဝ သမုပ္ပာဒကြိယာယပိ ကတ္တုတာ သမ္ဘဝတော။ န ဟိ ကြိယာနာမ ကတ္တုရဟိတာသမ္ဘဝတီတိ။ သင်္ခတဓမ္မေသုစ ဂမ္ဘီရေသု သတိ အနိစ္စတာဒိလက္ခဏံ ဝိယ ဣဒံပိ သင်္ခတလက္ခဏံ ဂမ္ဘီရမေဝ ဟောတီတိ နယိဓ ဂမ္ဘီရဝစနဝိရောဓော သမ္ဘဝတိ။ အထခေါ သင်္ခတဓမ္မတော သင်္ခတလက္ခဏမေဝ ဂမ္ဘီရတရံ ဟောတီတိ။ တာဒိသေန ပန သာမညလက္ခဏေန သမ္ပန္နာ ယထာဝုတ္တာ အဝိဇ္ဇာဒယော သင်္ခတဓမ္မာ ပဋိစ္စသမုပ္ပန္နာနာမ။ ယထာဟ-ကတမေစ ဘိက္ခဝေ ပဋိစ္စသမုပ္ပန္နာဓမ္မာ ဇရာမရဏံ ဘိက္ခဝေ ပဋိစ္စသမုပ္ပန္နံ။လ။ အဝိဇ္ဇာ ဘိက္ခဝေ ပဋိစ္စသမုပ္ပန္နာတိ။ ဣတိ သဗ္ဗေသံ ပစ္စယပစ္စယုပ္ပန္န ဘူတာနံ သင်္ခတဓမ္မာနံ ပစ္စယာ သတ္တ ဝုတ္တိတာသင်္ခါတော ပဋိစ္စသမုပ္ပာဒေါစ သော နီယတိ ဉာယတိ ပဋိဝိဇ္ဈီယတီတိ ကတွာ နယောစာတိ ပဋိစ္စသမုပ္ပာဒနယော။ ပဌပေတိ သင်္ခတဓမ္မေ နာနာပကာရေဟိ ပစ္စယဘေဒေဟိ ပဝတ္တေတိ ဒေသေတိ ဧတ္ထာတိ ပဋ္ဌာနံ။ မဟာပကရဏံ။ ပဋ္ဌာနေ ဒေသိတော နယော ပဋ္ဌာနနယော။

တသ္မိံ တသ္မိံ ပစ္စယဓမ္မေ ဘာဝေ ဝိဇ္ဇမာနေ သတိ တေ တေ ဘဝန္တိ သီလေနာတိ တဗ္ဘာဝဘာဝိနော။ သင်္ခတဓမ္မာ။ တေသံ ဘာဝေါ တဗ္ဘာဝဘာဝိဘာဝေါ၊ ဣမသ္မိံ သတိ ဣဒံ ဟောတိ။ ဣမဿ ဥပ္ပာဒါ ဣဒံ ဥပ္ပဇ္ဇတီတိ ဧဝံ ပဝတ္တော သင်္ခတဓမ္မနိယာမော။ တဗ္ဘာဝဘာဝိဘာဝေါဧဝ အာကာရော တဗ္ဘာဝဘာဝိဘာဝါကာရော။ သော ဧဝ တဗ္ဘာဝဘာဝိဘာဝါကာရမတ္တံ။ မတ္တသဒ္ဒေန ဟေတာဒိပစ္စယ သတ္တိနိယမံ နိဝတ္တေတိ။ တေန ဥပလက္ခိတော နယော ပဋိစ္စသမုပ္ပာဒ နယော။ အာဟစ္စပစ္စယဋ္ဌိတိံ အာရဗ္ဘာတိ ဧတ္ထ ဟေတု အာရမ္မဏာ ဒိဝသေန တထာတထာ ဥပကာရကတာသင်္ခါတော ပစ္စယသတ္တိ ဝိသေသော အာဟစ္စပစ္စယဋ္ဌိတိနာမ။ သော ဟိ အဝိဇ္ဇာပစ္စယာ သင်္ခါရာတိအာဒီသု ဝိယ ပစ္စယဓမ္မုဒ္ဓါရမတ္တေ အဋ္ဌတွာ ဟေတုပစ္စယော အာရမ္မဏပစ္စဟောတိအာဒိနာ ပစ္စယသတ္တိ ဝိသေသုဒ္ဓါရဝသေန အာဟစ္စ မတ္ထကံ ပါပေတွာ ဒေသိတတ္တာ အာဟစ္စပစ္စယဋ္ဌိတီတိ ဝုစ္စတိ။ ပစ္စယဓမ္မာ တိဋ္ဌန္တိ အတ္တနော ပစ္စယုပ္ပန္နာဘိသင်္ခရဏ ကိစ္စံ ပတွာ အနောသက္ကမာနာ ဟုတွာ ပဝတ္တန္တိ ဧတာယာတိ ကတွာ။ အာရဗ္ဘာတိ ပဋိစ္စ။ ဝုစ္စတီတိ ဘဂဝတာ ကထီယတိ။

ဥဘယံ ပန ဝေါမိဿိတွာ ပပဉ္စေန္တိ အာစရိယာတိ ဣဒံ ပဋိစ္စ သမုပ္ပာဒံ ပပဉ္စေန္တေ သန္ဓာယ ဝုတ္တံ။ တေဟိ တံ ပပဉ္စယန္တာ ပဋ္ဌာန နယံပိ အာဟရိတွာ ပပဉ္စေန္တီတိ။ ယထာ သူရိယော ဥဒယန္တော အန္ဓကာရေ ဝိဓမေတွာ ဒဗ္ဗသမ္ဘာရေ မဟာဇနဿ ပါကဋေ ကရောတိ။ ဧဝမေဝံ ဥပ္ပန္နံ စတုသစ္စဉာဏံ အဝိဇ္ဇန္ဓကာရံ ဝိဓမိတွာ စတုသစ္စ ဓမ္မံ ဝိဒတိ ပါကဋံ ကရောတီတိ ဝိဇ္ဇာ။ တပ္ပဋိပက္ခတ္တာ မောဟော အဝိဇ္ဇာနာမ။ သော ဟိ ဥပ္ပဇ္ဇမာနော ဓမ္မေသု အညာဏအဒဿန သင်္ခါတံ အန္ဓကာရံ ဇနေတွာဝ ဥပ္ပဇ္ဇတိ။ ပဋိစ္စ ဖလံ ဧတိ အာဂစ္ဆတိ ဧတသ္မာ ဧတေနာတိ ဝါ ပစ္စယော။ အဝိဇ္ဇာစ သာ ပစ္စယော စာတိ အဝိဇ္ဇာပစ္စယော။ တသ္မာ အဝိဇ္ဇာပစ္စယာ သင်္ခါရာ သမ္ဘဝန္တီတိ သမ္ဗန္ဓော။ သင်္ခတံ ကာယဝစီမနောကမ္မံ အဘိသင်္ခရောန္တိ သတ္တာ ဧတေဟီတိ သင်္ခါရာ။ ဝိဇာနာတီတိ ဝိညာဏံ။ ဝိဇာနန္တိ သတ္တာ ဧတေနာတိ ဝါ ဝိညာဏံ။ အာရမ္မဏေ နမတီတိ နာမံ။ ရုပ္ပတိ ဝိကာရံ အာပဇ္ဇတီတိ ရူပံ။ အဓိဋ္ဌာနဋ္ဌေန အာယတနံ။ ဒေဝါနံ ဒေဝါယတနမိဝ။ ဖုသတီတိ ဖဿော။ ဖုသန္တိ သမ္ပယုတ္တကာ ဓမ္မာ ဧတေနာတိ ဝါ ဖဿော။ ဝေဒယတီတိ ဝေဒနာ။ ဝေဒယန္တိ ပစ္စနုဘဝန္တိ သတ္တာ ဧတာယာတိဝါ ဝေဒနာ။ တဿတိ ပရိတဿတီတိ တဏှာ။ နိစ္စပိပါသဝသေန အာရမ္မဏဟေတု နိစ္စံ စဉ္စလတိ ပတ္ထေတိ ဝါတိ အတ္ထော။ တဿန္တိ ပရိတဿန္တိ စဉ္စလန္တိ သတ္တာ ဧတာယာတိ ဝါ တဏှာ။ ဥပါဒိယတီတိ ဥပါဒါနံ။ အမုဉ္စဂါဟံ ဂဏှာတီတိ အတ္ထော။ ဥပါဒိယန္တိ သတ္တာ ဧတေနာတိ ဝါ ဥပါဒါနံ။

ဘဝတိ ဝဍ္ဎတီတိ ဘဝေါ။ ဘဝန္တိ ဇာယန္တိ ဝဍ္ဎန္တိ သုခဒုက္ခာနိ ဧတေနာတိ ဝါ ဘဝေါ။ ဇနနံ ဇာတိ။ ဇာယန္တိ ပါတုဘဝန္တိ သင်္ခတ ဓမ္မာ ဧတာယာတိ ဝါ ဇာတိ။ ဇီရဏံ ဇရာ။ ဇီရန္တိ ဇိဏ္ဏဘာဝံ ဂစ္ဆန္တိ ဧတာယာတိ ဝါ ဇရာ။ သောစနံ သောကော။ သောစန္တိ စိတ္တပရိဠာဟံ ဂစ္ဆန္တိ ဧတေနာတိ ဝါ သောကော။ ပရိဒေဝနံ ပရိဒေဝေါ။ တံ တံ ပဝတ္တိံ ပရိကိတ္တေတွာ ဒေဝန္တိ ကန္ဒန္တိ ဧတေနာတိ ဝါ ပရိဒေဝေါ။ ခမိတုံ သဟိတုံ ဒုက္ကရန္တိ ဒုက္ခံ။ ဒုမ္မနဿ ဝိရူပစိတ္တဿ ဘာဝေါ ဒေါမနဿံ။ ဘုသော အာယာသနံ ဥပါယာသော။ အာယာသနန္တိ အနဿာသနံ။ ဝိသီဒနန္တိ အတ္ထော။ ဧဝန္တိ ဣမိနာ ယထာဝုတ္တေန။ အဝိဇ္ဇာဒိ သင်္ခါရာဒိပစ္စယပစ္စယုပ္ပန္န ပရံပရဝိဓိနာ သမုဒယော ဟောတီတိ သမ္ဗန္ဓော။ ဧတဿကေဝလဿဒုက္ခက္ခန္ဓဿာတိ အဝိဇ္ဇာဒိကဿ ဧတဿ သကလဿ ဒုက္ခရာသိဿ ကေနစိ သုခေန အသံမိဿဿ ဝါ ဒုက္ခရာသိဿ အဘိနိဗ္ဗတ္တိ ဟောတီတိ အတ္ထော။ ဧတ္ထစ ဒုဝိဓော ပဋိစ္စသမုပ္ပာဒနယော သုတ္တန္တိကနယော အဘိဓမ္မနယောတိ။ တတ္ထ သုတ္တန္တိကနယေန တာဝ အဝိဇ္ဇာ စတုဗ္ဗိဓာ ဒုက္ခပဋိစ္ဆာဒိကာ သမုဒယပဋိစ္ဆာဒိကာ နိရောဓပဋိစ္ဆာဒိကာ မဂ္ဂပဋိစ္ဆာဒိကာစာတိ။ အဘိဓမ္မနယေန ပန ပုဗ္ဗန္တပဋိစ္ဆာဒိကာ အပရန္တ ပဋိစ္ဆာဒိကာ ပုဗ္ဗန္တာပရန္တပဋိစ္ဆာဒိကာ ပဋိစ္စသမုပ္ပာဒပဋိစ္ဆာဒိကာတိ စတူဟိ သဒ္ဓိံ အဋ္ဌ ဝိဓာတိ ဝေဒိတဗ္ဗာ။

သင်္ခါရာ သုတ္တန္တိကနယေန သာသဝါ ကုသလာကုသလစေတနာ အပုညာဘိသင်္ခါရော ပုညာဘိသင်္ခါရော အာနေဉ္ဇာ ဘိသင်္ခါရောတိ ပန တိဝိဓာ ဟောန္တိ။ တတ္ထ ဒွါဒသ အကုသလစေတနာ အပုညာတိ သင်္ခါရောနာမ။ ကာမရူပ ကုသလစေတနာ ပုညာဘိသင်္ခါရောနာမ။ အရူပကုသလစေတနာ အာနေဉ္ဇာတိသင်္ခါရောနာမ။ အဘိဓမ္မနယေန ပန သဗ္ဗာပိ လောကိယလောကုတ္တရဘူတာ ကုသလာကုသလစေတနာ သင်္ခါရာနာမ။ ကိရိယစေတနာ ပန သဗ္ဗာပိ ဝိဘင်္ဂေ နဂဟိတာ။ အဋ္ဌကထာယဉ္စ ကိရိယဓမ္မာနံ ပန ယသ္မာ နေဝ အဝိဇ္ဇာ န ကုသလာ ကုသလမူလာနိ ဥပနိဿယပစ္စယတ္တံ လဘန္တိ။ တသ္မာ ကိရိယဝသေန ပစ္စယာကာရော နဝုတ္တောတိ ဝုတ္တံ။ အဝိဇ္ဇာစ ကုသလာကုသလမူလာ နိစ ကိရိယဓမ္မာနံ ဥပနိဿယ ပစ္စယာ န ဟောန္တိ။ တသ္မာ ကိရိယဓမ္မာ ပဋိစ္စသမုပ္ပာဒဒေသနာယံ နဂဟိတာတိ ဝုတ္တံ ဟောတိ။ သံယုတ္တေပိ ယတော ခေါ ဘိက္ခဝေ ဘိက္ခုနော အဝိဇ္ဇာ ပဟီနာ ဟောတိ။ ဝိဇ္ဇာဥပ္ပန္နာ။ သော အဝိဇ္ဇာ ဝိရာဂါ ဝိဇ္ဇုပ္ပာဒါ နေဝ ပုညာဘိသင်္ခါရံ အဘိသင်္ခရောတိ။ န အပုညာဘိသင်္ခါရံ။ န အာနေဉ္ဇာဘိသင်္ခါရံ အဘိသင်္ခရောတီတိ ဝုတ္တံ။ အတ္တနော အနုရူပပစ္စယဝသေန ပန တေသံပိ ပဋိစ္စ သမုပ္ပာဒေါ အဝါရိတောယေဝ။ နဟိ ကောစိ ပဋိစ္စသမုပ္ပာဒရဟိတော သင်္ခတဓမ္မောနာမ အတ္ထီတိ။ ဧသ နယော ဝိညာဏာဒီသုပီတိ။ ဝိညာဏန္တိ ဗာတ္တိံသဝိဓံ လောကိယဝိပါကဝိညာဏံ သုတ္တန္တိကနယေန။ အဘိဓမ္မနယေန ပန ကိရိယစိတ္တဝဇ္ဇိတံ ဧကူနသတ္တတိဝိဓံ လောကိယလောကုတ္တရဝိညာဏံ။ နာမရူပန္တိ လောကိယ ဝိညာဏ သဟဇာတံ ဝေဒနာဒိခန္ဓတ္တယံ ပဋိသန္ဓိယံ ကမ္မဇရူပံ ပဝတ္တိယံ စိတ္တဇ ရူပဉ္စ သုတ္တန္တိကနယေန။ အဘိဓမ္မနယေန ပန သဗ္ဗံ ကုသလာကုသလ ဝိပါကသမ္ပယုတ္တံ ခန္ဓတ္တယံ ဝုတ္တပ္ပကာရရူပဉ္စ။ အဋ္ဌကထာယံ ပန လဒ္ဓပစ္ဆာဇာတပစ္စယံ သဗ္ဗံပိ စတုသမုဋ္ဌာနရူပံ ဂဟိတမေဝ။

[၂၂၆] ဝိဘာဝနိယံ ပန

‘‘တဒုဘယံပိ ဣဓ ပဋိသန္ဓိဝိညာဏသဟဂတ’’န္တိ ဝုတ္တံ။ တံ အနုပပန္နံ။

သဠာယတနန္တိ ဆ အဇ္ဈတ္တိကာယတနာနိ ဧဝ သဗ္ဗတ္ထ ပါဠိယံ ဝိဘတ္တာနိ။ ဧကစ္စေ ပန အာစရိယာ ဗာဟိရာယတနာနိ ဖဿဿ ပစ္စယာ ဟောန္တီတိ ကတွာ တာနိပိ ဣဓ ဂဏှန္တိ။ တံပိ နိဒါနဝဂ္ဂ ပါဠိယာ သမေတိယေဝ။ ယထာဟ –

ကတမောစ ဘိက္ခဝေ လောကဿ သမုဒယော။ စက္ခုဉ္စ ပဋိစ္စ ရူပေစ ဥပ္ပဇ္ဇတိ စက္ခုဝိညာဏံ။ တိဏ္ဏံ သင်္ဂတိ ဖဿော။ ဖဿပစ္စယာ ဝေဒနာ။ ဝေဒနာပစ္စယာ တဏှာ။လ။ ဒေါမနဿုပါယာသာ သမ္ဘဝန္တီတိ အယံ လောကဿ သမုဒယော။ သောတဉ္စ။လ။ မနဉ္စ ပဋိစ္စ ဓမ္မေစ ဥပ္ပဇ္ဇတိ မနောဝိညာဏံ။ တိဏ္ဏံ သင်္ဂတိ ဖဿော။လ။ လောကဿ သမုဒယောတိ။

ဖဿဝေဒနာဒယောပိ နယဒွယေ တံ တံ ဝိညာဏသမ္ပယုတ္တာ ဝေဒိတဗ္ဗာ။ တဏှုပါဒါနာနိ ပါကဋာနိ။ ဘဝေါ ဒုဝိဓော ကမ္မဘဝေါ ဥပပတ္တိဘဝေါစ။ လောကိယကုသလာကုသလဘူတာ စေတနာစ။ စေတနာသမ္ပယုတ္တာ အဘိဇ္ဈာဒယော အနဘိဇ္ဈာဒယောစ ကမ္မဘဝေါ။ ယထာဟ-သဗ္ဗံပိ ဘဝဂါမိကမ္မံ ကမ္မဘဝေါတိ။ ကမ္မနိဗ္ဗတ္တာ ပန သဗ္ဗေပိ လောကိယဝိပါကက္ခန္ဓာ သဗ္ဗာနိစ ကမ္မဇရူပါနိ ဥပပတ္တိဘဝေါ သုတ္တန္တိကနယေန။ အဘိဓမ္မနယေန ပန လောကုတ္တရ ခန္ဓာပိ ဝိဘင်္ဂေ အာဂတာဧဝ။ ဇာတိဇရာမရဏာနိ သဗ္ဗေသံ သင်္ခတ ဓမ္မာနံ လက္ခဏပတ္တာနိ။ သောကာဒီသု ဉာတိဗျသနာဒီဟိ ဖုဋ္ဌဿ သောစနာကာရေန ပဝတ္တာ ဒေါမနဿဝေဒနာ သောကောနာမ။ ရောဒနာကာရေန ပဝတ္တော အနိဋ္ဌော စိတ္တဇသဒ္ဒေါ ပရိဒေဝေါနာမ။ ကာယိကာ ဒုက္ခဝေဒနာ ဒုက္ခံနာမ။ စေတသိကာ ဒုက္ခဝေဒနာ ဒေါမနဿံနာမ။ ဉာတိဗျသနာဒိနိမိတ္တံ သံသီဒနဝိသီဒနာကာရပဝတ္တော ဒေါသော ဥပါယာသောနာမ။ အယမေတ္ထ ဝိဘာဂေါ။ ယေသံ ပန ခန္ဓဒုက္ခေ အဝိဇ္ဇာ အပ္ပဟီနာ ဟောတိ။ တေသံ ဣတရသစ္စေသုပိ သာ အပ္ပဟီနာဧဝ ဟောတီတိ တေ ခန္ဓပဝတ္တိယံဧဝ သုခသညံ လဘန္တိ။ ခန္ဓနိရောဓေ ဒုက္ခသညံ။ ခန္ဓပဝတ္တိမဂ္ဂေဧဝ သုခမဂ္ဂသညံ လဘန္တိ။ ခန္ဓနိရောဓမဂ္ဂေ ဒုက္ခမဂ္ဂသညံ။ တသ္မာ ခန္ဓပဝတ္တိပစ္စယဘူတာ ပုညာ ပုညာနေဉ္ဇာဘိသင်္ခါရဓမ္မာဧဝ တေသံ အဝိဇ္ဇာနိဝုဋာနံ သုခကာမာနံ ဒုက္ခပဋိကူလာနံ သတ္တာနံ ပဋိသရဏာ ဟောန္တီတိ ဝုတ္တံ အဝိဇ္ဇာပစ္စ ယာသင်္ခါရာတိ။ ဧတ္ထစ ဝိသေသတော ပစ္စုပ္ပန္နခန္ဓပဋိစ္ဆာဒိကာယ အဝိဇ္ဇာယ ဒုစ္စရိတဘူတာ အပုညာဘိသင်္ခါရာ သမ္ဘဝန္တိ။ အနာဂတ ခန္ဓပဋိစ္ဆာဒိကာယ အဝိဇ္ဇာယ သုစရိတဘူတာ ပုညာနေဉ္ဇာဘိသင်္ခါရာ သမ္ဘဝန္တီတိ ဝေဒိတဗ္ဗာ။ သင်္ခါရေသု သတိ အပ္ပဟီနဘဝတဏှာနံ သတ္တာနံ စုတိအနန္တရံ ပုနဘဝါဘိနိဗ္ဗတ္တိယာ ကောစိ ဝိဗန္ဓော နာမ နတ္ထိ။ တသ္မာ သင်္ခါရပစ္စယာ ဝိညာဏံ နာမရူပံ သဠာယတနံ ဖဿော ဝေဒနာတိ ဣမေ အတ္တဘာဝသညိတာ ပဉ္စဓမ္မာ ဘဝန္တရေ ပါတု ဘဝန္တိ။ တတ္ထ ပန ဝိညာဏမေဝ ပဓာနံ ဇေဋ္ဌကံ ဟောတီတိ ဝုတ္တံ။ သင်္ခါရပစ္စယာဝိညာဏန္တိ ဝိညာဏေစ သတိ တဿ ဥဒယဘူတာနံ နာမရူပါနံ ဥပ္ပတ္တိယာ ဝိဗန္ဓောနာမ နတ္ထီတိ ဝုတ္တံ။ ဝိညာဏပစ္စယာနာမ ရူပန္တိ။ ဧတ္တာဝတာ သာမညတော ပရိပုဏ္ဏောနာမ ကာယော ရူပ ကာယောစ ဝုတ္တော ဟောတိ။ ဧဝံသန္တေပိ တေသု ဒွီသု ကာယေသု ယေဓမ္မာ သတ္တပညတ္တိယာ ပဓာနင်္ဂဘူတာ ဟောန္တိ။ ယေဟိစ ဖဿာ ဒီနိ ဥပရိ အင်္ဂါနိ အာဂတာနိ ဟောန္တိ။ ယေသုစ သတ္တာ အတ္တဂါဟံ ဒဠှတရံ ဂဏှန္တိ။ တေ ဝိသုံ နီဟရိတွာ ဒဿေတုံ နာမရူပပစ္စယာ သဠာယတနန္တိ ဝုတ္တံ။ နာမရူပေ သတိ တေသံပိ ဥပ္ပတ္တိယာ ဝိဗန္ဓော နတ္ထိယေဝ။ သဠာယတနသမုဋ္ဌိတောစ ဖဿော သဠာယတနေ သတိ ဧကန္တေန သမ္ဘဝတီတိ ဝုတ္တံ သဠာယတနပစ္စယာဖဿောတိ။ ဖဿသမုဋ္ဌိတာစ ဝေဒနာ ဖဿေ သတိ ဧကန္တေန သမ္ဘဝတိယေဝါတိ ဝုတ္တံ ဖဿပစ္စယာဝေဒနာတိ။ သုခဝေဒနာသဒိသော တဏှာယ အဝဿယောနာမ နတ္ထီတိ ဝုတ္တံ ဝေဒနာပစ္စယာတဏှာတိ။ ကာမုပါဒါနဉ္စနာမ ဧကသ္မိံ အာရမ္မဏေ ပုနပ္ပုနံ သမုဒါစရိတွာ ဒဠှတ္တပ္ပတ္တာ တဏှာဧဝ၊ ဒိဋ္ဌိယောစ အတ္တနိစ အတ္တနော အာရမ္မဏေသုစ အဿာဒန ခမန ရောစန ဘူတာယ တဏှာယ ဝသေန ဒဠှတ္တံ အာပဇ္ဇန္တီတိ ဝုတ္တံ တဏှာပစ္စယာဥပါဒါနန္တိ။ ဥပါဒိယန္တာစ တဿ တဿ ဥပါဒါနိယဿ အတ္ထဿ ဟိတဝုဍ္ဎိသညိတံ တံတံ ကမ္မဘဝံ အာယူဟန္တိယေဝါတိ ဝုတ္တံ ဥပါဒါနပစ္စယာဘဝေါတိ။ ဘဝသဒ္ဒေါ ဟေတ္ထ ဝဍ္ဎိပရိယာယော။ ယထာ –

သုဝိဇာနော ဘဝံ ဟောတိ၊ ဒုဝိဇာနော ပရာဘဝေါတိ။

ကမ္မဘဝေ သတိ ဧကန္တေန ပုနဘဝေါပိ သမ္ဘဝတီတိ ဝုတ္တံ ဘဝပစ္စယာဇာတီတိ။ ဇာတိယာစ သတိ ဧကန္တေန ဇရာမရဏံ ဟောတိယေဝါတိ ဝုတ္တံ ဇာတိပစ္စယာဇရာမရဏန္တိ။ အယမေတ္ထ တဗ္ဘာဝဘာဝိဘာဝဝိဓိ။ သောကာဒိဝစနဉ္စေတ္ထ ဤဒိသေန တဗ္ဘာဝ ဘာဝိဘာဝေန ပဝတ္တဿ သကလဿ ဝဋ္ဋဓမ္မဿ အာဒီနဝရာသိဒဿ နတ္ထံ ဝုတ္တန္တိ။ ဧတ္ထာတိ ဣမသ္မိံ ပစ္စယသင်္ဂဟေ။ တတ္ထာတိ တသ္မိံ ပဋိစ္စသမုပ္ပာဒနယေ။ အဒ္ဓါနဝန္တေ ဓမ္မေ ဘုသော ဓာရေတီတိ အဒ္ဓါ။ ကာလော။ သော ဟိ တေကာလိကေ ဓမ္မေ သန္တာနာနုပဗန္ဓဝသေန ကပ္ပပရံပရာ ဝဿ ဥတု မာသ ပက္ခ ရတ္တိ ဒိဝ ပရံပရာစ ဟုတွာ အပတမာနေ ဓာရေန္တော ဝိယ ဥပဋ္ဌာတီတိ။ အထဝါ၊ ဘုသော ဒဟန္တိ တိဋ္ဌန္တိ ပဝတ္တန္တိ တေကာလိကာ ဓမ္မာ ဧတ္ထာတိ အဒ္ဓါ။ ကာလောယေဝ။ သော ပန သယံ အဘိန္နောပိ ဘေဒဝန္တေ ဓမ္မေ ဥပါဒါယ ဘိန္နော ဝိယ ဥပစရိတုံ ယုတ္တောတိ ဝုတ္တံ တယောအဒ္ဓါတိ။

[၂၂၇] ယံ ပန ဝိဘာဝနိယံ

‘‘အတတိ သတတံ ဂစ္ဆတိ ပဝတ္တတီတိ အဒ္ဓါတိ ဝုတ္တံ’’။ တံ န သုန္ဒရံ။

ဧဝဉှိ သတိ အဒ္ဓါနန္တိ နသိဇ္ဈတိ။ ယထာ အဒ္ဓါနမဂ္ဂပဋိပန္နောတိ။ အင်္ဂါနီတိ အဝယဝပဓာနင်္ဂါနိ။ ပဓာနသမ္ဘာရာတိ ဝုတ္တံ ဟောတိ။ အာကာရာတိ အဝယဝကောဋ္ဌာသာ။ ကောဋ္ဌာသတ္ထော ဟေတ္ထ အာကာရသဒ္ဒေါ။ ယထာ ဒွတ္တိံသာကာရာတိ။ အာကိရန္တိ တတ္ထ တတ္ထ ပကိရိတွာ ထပိတာ ဝိယ ဟောန္တီတိ အာကာရာတိပိ ဝဒန္တိ။ သန္ဓီတိ ဒွိန္နံ ဒွိန္နံ သင်္ခေပါနံ သင်္ဃဋနဋ္ဌာနံ။ သင်္ခေပါတိ ပဓာနဓမ္မသင်္ဂဟာ။ ဝဋ္ဋန္တိ ပုနပ္ပုနံ အာဝဋ္ဋန္တီတိ ဝဋ္ဋာနိ။ မူလယန္တိ သဗ္ဗေပိ ဝဋ္ဋဓမ္မာ ဧတ္ထ တိဋ္ဌန္တိ တဒါယတ္တဝုတ္တိတာယာတိ မူလာနိ။ ပတိဋ္ဌာ။ ပဘဝါတိ အတ္ထော။ ယသ္မာ ဧကော ပုရိသော ဧကာယ အင်္ဂုလိယာ သမုဒ္ဒေါ ဒကံ ဂဟေတွာ မဟာဇနဿ မုခေ ပက္ခိပိတွာ စတူသု မဟာသမုဒ္ဒေသု ဥဒကဿ လောဏဘာဝံ သညာပေန္တော ဝိယ ဘဂဝါပိ အဝိဇ္ဇာ ပစ္စယာ သင်္ခါရာတိအာဒိနာ ဧကမေဝ ပစ္စုပ္ပန္နဘဝံ ပရိပုဏ္ဏံ ဒေသေတွာ အနမတဂ္ဂဿ သကလဿ သံသာရဝဋ္ဋဿ ပဝတ္တိံ ဉာပေသိ။ ပရိပုဏ္ဏံ ဒေသေန္တေနစ နာမ တဿ ဧကဿ ဘဝဿ ဟေတုစ ဒေသေတဗ္ဗော ဟောတိ။ ဖလဉ္စ ဒေသေတဗ္ဗံ ဟောတိ။ တတ္ထ ဟေတူ နာမ ပုရိမဘဝေ သိဒ္ဓါ အဝိဇ္ဇာ သင်္ခါရာ။ ဖလံနာမ အနာဂတဘဝေ ဇာတိ။ ဣတိ ဧကဘဝဝိသယာပိ အယံ ဒေသနာ ဧကဒေသေန အတီတာနာဂတ သာဓာရဏာစ ဟောတီတိ ဝုတ္တံ အဝိဇ္ဇာသင်္ခါရာအတီတောအဒ္ဓါတိအာဒိ။ ဧတ္ထစ အဒ္ဓုနော အဒ္ဓါဝန္တာနဉ္စ အဘေဒံ ဝိယ ကတွာ ဝစနံ ဓမ္မတော ဝိသုံ အဒ္ဓါသင်္ခါတဿ ကာလဿ အဘာဝံ ဒဿေတိ။ ကာလောယေဝ လောကံ ပဝတ္တေတိ နိဝတ္တေတီတိ ပဝတ္တံ မိစ္ဆာဝါဒဉ္စ နီဝါရေတိ။ န ဟိ သယံ အဘာဝဘူတော ကာလော ကဿစိ ပဝတ္တကော နိဝတ္တကောစ ဘဝိတုံ ယုတ္တောတိ။ ကသ္မာ ပနေတ္ထ ဧကမေကဿ ပစ္စုပ္ပန္နဿ အတ္တဘာဝဿ ပဝတ္တိံ ဒဿေန္တော ဘဂဝါ အတီတဘဝေ ဟေတုဉ္စ အနာဂတဘဝေ ဖလဉ္စ ဒဿေတီတိ။ အဟေတုဝိသမဟေတုဒိဋ္ဌီနံ နီဝါရဏတ္ထံ အတီတဟေတု ဒဿနံ။ ဥစ္ဆေဒဒိဋ္ဌိ နီဝါရဏတ္ထံ အနာဂတဖလဒဿနံ။ သဿတ ဒိဋ္ဌိနီဝါရဏတ္ထံ ဥဘယဒဿနန္တိ ဒဋ္ဌဗ္ဗံ။ တတ္ထ အဟေတု အပစ္စယာ သတ္တာ ပဝတ္တန္တိ နိဝတ္တန္တိ သံကိလိဿန္တိ ဝိသုဇ္ဈန္တီတိ ပဝတ္တာ ဒိဋ္ဌိ အဟေတုဒိဋ္ဌိနာမ။ ဗြဟ္မာ ပဇာပတိ ဣဿရနိမ္မာနာဒိဝသေန အဘူတ ဟေတုဒဿနံ ဝိသမဟေတုဒိဋ္ဌိနာမ။ သတ္တာ မရဏေ ဥစ္ဆိဇ္ဇန္တိ၊ အနာဂတေ ဇာတိနာမ နတ္ထီတိ ပဝတ္တာ ဒိဋ္ဌိ ဥစ္ဆေဒဒိဋ္ဌိနာမ။ အတ္တာနိစ္စော ဓုဝေါ၊ သောဝ ဘဝတော ဘဝံ သန္ဓာဝတိ သံသရတီတိ ပဝတ္တာ ဒိဋ္ဌိ သဿတဒိဋ္ဌိနာမ။ ဧဝံ နိစ္စော ဟုတွာ သန္ဓာဝန္တောပန အဝိဇ္ဇာဒီဟိ သာဓေတဗ္ဗော နဟောတိ။ တသ္မာ အဝိဇ္ဇာသင်္ခါရေဟိ ဘဝန္တရေ ပုန ဝိညာဏုပ္ပတ္တိံ ဝဒန္တေန သဿတဒိဋ္ဌိ နီဝါရိတာ ဟောတီတိ။

ကသ္မာ ပနေတ္ထ သောကာဒယော အင်္ဂေသု နဂဟိတာတိ။ ဇာတိယာ သတိ သောကာဒယော ဧကန္တေန သမ္ဘဝန္တီတိ ဧဝံ တဗ္ဘာဝ ဘာဝိဘာဝ လက္ခဏဿ အဘာဝတော။ သတိပိ ဟိ ဇာတိယာ ရူပ လောကေ အရူပလောကေစ တေ န သမ္ဘဝန္တိ။ ကာမလောကေပိ ကေသဉ္စိ န သမ္ဘဝန္တိယေဝါတိ။ ယဒိဧဝံ ကိမတ္ထံ တေသံ ဝစနန္တိ။ ဇာတိယာဝါ အဝိဇ္ဇာဒိကဿဝါ ဝုတ္တပ္ပကာရဿ သကလဿ ဝဋ္ဋပဝတ္တဿ မဟာအာဒီနဝရာသိဒဿနတ္ထန္တိ ဒဿေတုံ သောကာဒိဝစနံ ပနေတ္ထ နိဿန္ဒ ဖလနိဒဿနန္တိ ဝုတ္တံ။ တတ္ထ နိဿန္ဒဖလနိဒဿနန္တိ ဇာတိယာ မဟာအာဒီနဝ ရာသိသင်္ခါတဿ ဥဒယဖလဿ နိဒဿနန္တိ အတ္ထော။ ကသ္မာ ပန ဣမဿ ပစ္စုပ္ပန္န ဘဝဿ အတီတပစ္စယာ ဒွေ အဝိဇ္ဇာ သင်္ခါရာ ဧဝ ပါဠိယံ ဝုတ္တာ။ ကိံ ပန တေ ဧဝ ဒွေ ဣမဿ ပစ္စယာ ဟောန္တီတိ။ အညေပိ ဟောန္တိယေဝ။ အထ ကသ္မာ တေ ပါဠိယံ န ဝုတ္တာတိ။ အဝုတ္တာနံပိ တေသံ အတ္ထတော လဒ္ဓတ္တာတိ။ ကထဉ္စ တေ အဝုတ္တာပိ လဒ္ဓါတိ။ တဗ္ဘာဝ ဘာဝိဘာဝလက္ခဏေန တဒဝိနာဘာဝိဘာဝလက္ခဏေနစ လဒ္ဓါတိ ဒဿေန္တော အဝိဇ္ဇာသင်္ခါရဂ္ဂဟဏေနာတိအာဒိ မာဟ။ ဧသ နယော ပရတ္ထပိ။ တတ္ထ အဝိဇ္ဇာ သင်္ခါရဂ္ဂဟဏေနာတိ ပါဠိယံ အာဒိတော ဝုတ္တေန အဝိဇ္ဇာသင်္ခါရ ဝစနေန။ တဏှုပါဒါနဘဝါပိ ဂဟိတာ ဘဝန္တီတိ အဝိဇ္ဇာဘာဝေ ဘာဝတော၊ အဘာဝေစ အဘာဝတော အဝိဇ္ဇာဂဟဏေန တဏှုပါဒါနာနိပိ ဂဟိတာနိ ဘဝန္တိ။ သင်္ခါရဘာဝေစ ဘာဝတော၊ အဘာဝေစ အဘာဝတော သင်္ခါရဂ္ဂဟဏေန ကမ္မဘဝေါပိ ဂဟိတော ဘဝတီတိ အတ္ထော။

ဝိဘာဝနိယံ ပန

ကိလေသဘာဝသာမညတော အဝိဇ္ဇာဂဟဏေန တဏှုပါဒါနာနိ။ ကမ္မဘာဝ သာမညတော သင်္ခါရဂ္ဂဟဏေန ကမ္မဘဝေါ ဂဟိတောတိ ဝုတ္တံ။ တံပိ ယုဇ္ဇတိ။

တထာ အဝိဇ္ဇာ သင်္ခါရာ ဂဟိတာ ဘဝန္တီတိ သမ္ဗန္ဓော။ တဒဝိနာ ဘာဝိဘာဝေန တဏှုပါဒါနဝစနေန အဝိဇ္ဇာစ ဘဝဝစနေန သင်္ခါရာစ ဂဟိတာတိ အတ္ထော။ လက္ခဏဓမ္မာနံ လက္ခိတဗ္ဗဓမ္မေဟိ အဝိနာဘာဝိဘာဝတော တဒဝိနာဘာဝိဘာဝေန ဇာတိဇရာ။လ။ ဂဟိတန္တိ ဝုတ္တံ။ ဣတိကတွာတိ ဣမိနာ ကာရဏေန။ ဝီသတာကာရာ ဘဝန္တီတိ သမ္ဗန္ဓော။ ပထမံ ဟေတုပဉ္စကံ ဧကော သင်္ခေပေါ။ ဒုတီယံ ဖလပဉ္စကံ ဧကော။ တတီယံ ဟေတုပဉ္စကံ ဧကော။ စတုတ္ထံ ဖလပဉ္စကံ ဧကော သင်္ခေပေါတိ စတုသင်္ခေပါ ဟောန္တိ။ စတ္တာရော သင်္ဂဟာ ဟောန္တီတိ အတ္ထော။ စတူသု ပန သင်္ခေပေသု သိဒ္ဓေသု ပထမေန ဒုတီယဿ ဒုတီယေန တတီယဿ တတီယေန စတုတ္ထဿာတိ ဧဝံ တိဿော သန္ဓိယောပိ သိဇ္ဈန္တိယေဝါတိ ဝုတ္တံ တိသန္ဓိ စတုသင်္ခေပါစ ဘဝန္တီတိ။ ဧတ္ထစ ဟေတုပဉ္စကံ ဖလပဉ္စကန္တိ ဧတံ လောကဿ ပါကဋဝေါဟာရဝသေန ဝုတ္တံ။ ဟေတုဖလ သဒ္ဒါ ပန ပစ္စယပစ္စယုပ္ပန္နပရိယာယာ ဧဝ ဟောန္တီတိ ဒုတီယပဉ္စကဿ ပထမံ ဥပါဒါယ ဖလပဉ္စကတာ တတီယံ ဥပါဒါယ ဟေတုပဉ္စကတာစ န န သမ္ဘဝတိ။ တထာ တတီယဿပိ စတုတ္ထံ ဥပါဒါယ ဟေတုပဉ္စကတာ ဒုတီယံ ဥပါဒါယ ဖလပဉ္စကတာစာတိ။ ဧဝဉှိ သတိ ဟေတုတော ဖလမေဝ သိယာ။ န ဖလတော ဟေတူတိ စောဒနာ အနောကာသာဧဝ ဟောတီတိ။ ဒွီသု ပန ဟေတုပဉ္စကေသု သင်္ခါရကမ္မဘဝါနံ ဝိသေသော အဋ္ဌကထာယံ ဝုတ္တောယေဝ။ ယထာဟ-ဒါနံ ဒဿာမီတိ စိတ္တံ ဥပ္ပာဒေတွာ မာသံပိ သံဝစ္ဆရံပိ ဒါနုပကရဏာနိ သဇ္ဇန္တဿ ဥပ္ပန္နာ ပုရိမစေတနာယော အာယူဟနသင်္ခါရာနာမ။ ပဋိဂ္ဂါဟကာနံ ပန ဟတ္ထေ ဒက္ခိဏံ ပတိဋ္ဌာပယတော ဥပ္ပန္နာ စေတနာ ဘဝေါတိ ဝုစ္စတိ။ ဧကာဝဇ္ဇနေသုဝါ ဆသု ဇဝနေသု စေတနာ အာယူဟန သင်္ခါရာနာမ။ သတ္တမဇဝနစေတနာ ဘဝေါ။ ယာကာစိဝါ ပန စေတနာ ဘဝေါ။ တံသမ္ပယုတ္တာ အာယူဟန သင်္ခါရာနာမာတိ။ ကမ္မဘဝေါ ဥပပတ္တိဘဝေါတိ ဒွေ ဘဝါ ဒွါဒသသု အင်္ဂေသု ဧကဿေဝ ဘဝ အင်္ဂဿ အဝယဝါနာမ ဟောန္တီတိ ဝုတ္တံ ကမ္မဘဝသင်္ခါတောဘဝေ ကဒေသောတိအာဒိ။ ဧတ္ထစ သင်္ခါရကမ္မဘဝါနံ ဝိသေသော ဝုတ္တ နယေနေဝ ဝေဒိတဗ္ဗော။

[၂၂၈] ယံ ပန ဝိဘာဝနိယံ

‘‘ကမ္မဘဝသင်္ခါတော ဘဝေကဒေသောတိ ဧတ္ထ အာယတိံ ပဋိသန္ဓိယာ ပစ္စယစေတနာ သင်္ခါရာတိ ဝေဒိတဗ္ဗာ’’တိ ဝုတ္တံ။ တံ ဣဓ န ယုဇ္ဇတိ။

တေသံ ဒွိန္နံပိ ဒွီသု ဟေတုပဉ္စကေသု သင်္ဂဟိတတ္တာတိ။ ယထာ ရုတပါဠိနယေနဝါ ဧတံ ဝုတ္တန္တိ ဒဋ္ဌဗ္ဗံ။ အဝသေသာစာတိ ဣဒံ ဇာတိဇရာမရဏေဟိ သဒ္ဓိံ ဝိညာဏာဒိဖလပဉ္စကံ သန္ဓာယ ဝုတ္တံ။ ဧတ္ထစ ယဒေတံ ပုဗ္ဗေ ဇာတိဇရာမရဏဂ္ဂဟဏေန ဝိညာဏာဒိ ဖလ ပဉ္စကံ ဂဟိတံ။ တံ အတ္ထတော ဥပပတ္တိဘဝေါဧဝ။ နဟိ ဖလပဉ္စကတော အညော ဥပပတ္တိဘဝေါနာမ အတ္ထီတိ။ ဧဝံ သန္တေပိ ဓမ္မဝိဘာဂ ရက္ခဏတ္ထံ ဥပပတ္တိဘဝသဒ္ဒေန စတုတ္ထပဉ္စကံ ဂဟိတန္တိ ယုတ္တံ။ ဒွါဒသသု အင်္ဂေသု အဝိဇ္ဇာနာမ မောဟော။ သောစ အကုသလမူလံ။ တဏှာနာမ လောဘော။ သောစ အကုသလ မူလန္တိ ဝုတ္တံ အဝိဇ္ဇာ တဏှာဝသေန ဒွေ မူလာနီတိ။ အထဝါ၊ မူလန္တိ သီသံ။ ဒွေ ဝဋ္ဋသီသာနီတိ အတ္ထော။ အဋ္ဌကထာယံ ပန ပုရိမံ ပဉ္စကဒွယံ ဧကံ ဘဝစက္ကံ ပစ္ဆိမံ ပဉ္စကဒွယံ ဧကံ ဘဝစက္ကန္တိ ကတွာ ပုရိမံ အဝိဇ္ဇာမူလံ။ တဉ္စ ဒိဋ္ဌိစရိတာနံဝါ အပါယဂါမီနံဝါ စက္ကံ။ ပစ္ဆိမံ တဏှာမူလံ။ တဉ္စ ရာဂစရိတာနံဝါ သုဂတိဂါမီနံဝါ စက္ကန္တိ ဒဿိတံ။ စက္ကန္တိ ပန ယတော ပဋ္ဌာယ ဝဋ္ဋသန္တာနဿ အာရဗ္ဘော ဟောတိ။ တသ္မိံ ပုန အာဂတေဧဝ စက္ကံနာမ သိယာ။ တသ္မာ ဣဓ ဒုတီယေန ဟေတုဖလ ယုဂဠေန သဒ္ဓိံ သဗ္ဗံ ဧကမေဝ စက္ကန္တိ ယုတ္တံ။

ကသ္မာ ပနေတ္ထ အာဂမနသမ္ဘာရေသု အဝိဇ္ဇာဧဝ သီသံ ကတွာ ဝုတ္တာ။ ဂမနသမ္ဘာရေသုစ တဏှာဧဝ။ နနု ဥဘယတ္ထ ဥဘယံပိ သီသံ ကတွာ ဝတ္တဗ္ဗန္တိ။ ဝုစ္စတေ၊ သုခဝေဒနာသဒိသော ဟိ တဏှာယ အာဟာရောနာမ နတ္ထိ။ တသ္မာ ဝေဒနင်္ဂတော ပရံ ဝဋ္ဋင်္ဂံ ဃဋေန္တေန ဝေဒနာ နုရူပါတဏှာဧဝ ဝတ္တဗ္ဗာ။ န အဝိဇ္ဇာတိ ဂမနသမ္ဘာရေသု တာဝ အဝိဇ္ဇာယ ဩကာသော နတ္ထိ။ သဗ္ဗပထမံ အာရဗ္ဘဋ္ဌာနေစ သဗ္ဗပဓာနာ အဝိဇ္ဇာဧဝ ဝတ္တဗ္ဗာ ဟောတိ။ သာစ သင်္ခါရုပ္ပာဒနေ အဝိရဇ္ဈနကင်္ဂဘူတာတိ န တေသံ အန္တရေ ဧကဿ အင်္ဂဿ အတ္ထာယ ကိဉ္စိ ဝတ္တဗ္ဗံ အတ္ထီတိ အာဂမနသမ္ဘာရေသု တဏှာယ ဩကာသော နတ္ထီတိ။ အယဉှိ ပဋိစ္စသမုပ္ပာဒဒေသနာနာမ ပဓာနင်္ဂပရိဂ္ဂဟ ဝသေန ပဝတ္တာ။ န လဗ္ဘမာန သဗ္ဗဓမ္မ ပရိဂ္ဂဟ ဝသေနာတိ။

ယံ ပန ဝိဘာဝနိယံ

ပုဗ္ဗန္တဿ အဝိဇ္ဇာမူလံ။ အပရန္တဿ တဏှာမူလန္တိ ဝုတ္တံ။

တတ္ထ ပုဗ္ဗန္တဿာတိ ပုဗ္ဗဿ ဟေတုဖလကောဋ္ဌာသဿ။ အပရန္တဿာတိ ပစ္ဆိမဿ ဟေတုဖလ ကောဋ္ဌာသဿာတိ အတ္ထောတိ။ ကသ္မာ ပနေတာနိ ဒွေမူလာနိနာမ ဟောန္တီတိ အာဟ –

တေသမေဝစ မူလာနံ၊ နိရောဓေန နိရုဇ္ဈတီတိ။

တေသံ သမုဒယေန သကလဝဋ္ဋံ သမုဒေတိ။ နိရောဓေနစ နိရုဇ္ဈတိ။ တသ္မာ တာနိ ဒွေမူလာနိနာမာတိ ဝုတ္တံ ဟောတိ။ ကေစိ ပန ပဋိလောမ ပဋိစ္စသမုပ္ပာဒ ဒဿနမေတန္တိ ဝဒန္တိ။ ပဋိလောမ ပဋိစ္စ သမုပ္ပာဒေါနာမ အဝိဇ္ဇာနိရောဓာ သင်္ခါရနိရောဓော သင်္ခါရနိရောဓာ ဝိညာဏနိရောဓောတိအာဒိကော နိရောဓဝါရော။ ဣဒါနိ သောကာဒိ ဝစနံ န ကေဝလံ နိဿန္ဒဖလ နိဒဿနတ္ထမေဝ ဟောတိ။ အထခေါ ဇရာမရဏေန သဒ္ဓိံ ဧကံ အင်္ဂံ ဟုတွာ ဥပရိ ဝဋ္ဋမူလဓမ္မပဋိပါဒကာနံ ဒုက္ခဓမ္မာနံ နိဒဿနတ္ထံပိ ဟောတီတိ ဒဿေန္တော ဇရာမရဏ မုစ္ဆာယာတိအာဒိ မာဟ။ တတ္ထ မုစ္ဆာသဒ္ဒေန သောကာဒီနံ ဂဟဏံ။ တေပိ ဟိ သယံ အာသဝသမ္ဘူတာ ဟုတွာ ပုန အာသဝုပ္ပာဒါယ ပစ္စယာ ဟောန္တီတိ ဧတေန တေသံ ဇရာမရဏင်္ဂေ ဂဟဏံ သိဒ္ဓံ ဘဝတိ။ ဇရာမရဏမုစ္ဆာယ အဘိဏှသော ပီဠိတာနံ ဗာလာနံ အာသဝါ အဘိဏှသော သမုပ္ပဇ္ဇန္တိ။ အာသဝါနံသမုပ္ပာဒါအဝိဇ္ဇာစ ပဝဍ္ဎတိ။ အာသဝသမုဒယာ အဝိဇ္ဇာသမုဒယောတိ ဟိ ဝုတ္တံ။ ဧဝဉ္စ သတိ အဝိဇ္ဇာပစ္စယာ သင်္ခါရာတိ ပုန အာဗန္ဓမေဝ ဝဋ္ဋန္တိ အတ္ထော။ ဧတ္ထစ –

နာနာ ဗျသနဖုဋ္ဌဿ၊ သောကာဒီနံ ပဝတ္တိတော၊

အဝိဇ္ဇာ တဏှာ ဝဍ္ဎန္တိ၊ ယတော ဝဋ္ဋံ ပဝတ္တတီ တိပိ။

ဝတ္တဗ္ဗံ။ ယထာဟ-ကတမောစ ဘိက္ခဝေ ဒုက္ခဿ ဝိပါကော။ သမ္မောဟဝေပက္ကံ ဝါဟံ ဘိက္ခဝေ ဒုက္ခံ ဝဒါမိ။ ပရိယေဋ္ဌိဝေပက္ကံဝါတိ တတ္ထ သမ္မောဟော အဝိဇ္ဇာ။ ပရိယေဋ္ဌိ တဏှာ။ တဒုဘယံ ဝိပါကံ ဧတဿာတိ ကတွာဇရာမရဏသောကာဒိကံ ဒုက္ခံ သမ္မောဟဝေပက္ကံ ပရိယေဋ္ဌိဝေပက္ကန္တိစ ဝုစ္စတီတိ။ တတ္ထ သမ္မောဟောနာမ ဉာတိဗျသနာ ဒိနာ ဖုဋ္ဌောသောစတိ ပရိဒေဝတိ ဥရတာဠိ ကန္ဒတိ၊ သမ္မောဟံ အာပဇ္ဇတီတိ ဧဝံ အာဂတော သမ္မောဟော။ ပရိယိဋ္ဌိနာမ ယထာ ဇိဂစ္ဆာတိ ပီဠိတော။ ဘောဇနံ ပတ္ထေတိ ပရိယေသတိ ပိပါသာဘိပီဠိတော။ ပါဏိယံ ပတ္ထေတိ ပရိယေသတိ၊ ဧဝံ ကေနစိ ဒုက္ခေန ဖုဋ္ဌော သုခံ ပတ္ထေတိ ပရိယေသတီတိ ဧဝံ ပဝတ္တာ ပရိယိဋ္ဌိတဏှာ။ ဧတ္ထ ပန ယသ္မာ ဇရာမရဏသဒိသံ မဟန္တံ ဝိသဋံ နိယတဉ္စ ဣမဿ လောကဿ ဒုက္ခဋ္ဌာနံနာမ နတ္ထိ။ ဒုက္ခနိဿရဏတ္ထဉ္စ သတ္ထုသာသနံ။ တသ္မာ အယံ ပဋိစ္စသမုပ္ပာဒဒေသနာ ဇရာမရဏနိဒါနာ ဟောတိ။ ယထာဟ-ကိစ္ဆံ ဝတာယံ လောကော အာပန္နော ဇာယတိစ ဇိယျတိစ မိယျတိစ စဝတိစ ဥပပဇ္ဇတိစ။ အထစ ပနိမဿံ ဒုက္ခဿ နိဿရဏံ နပ္ပဇာနာတိ ဇရာမရဏဿာတိအာဒိ။ ယေသု ပန အင်္ဂေသု အာဒိတော ပဋ္ဌာယ ဉာတေသု ဇရာမရဏံ သမူလံ ခနိတွာ တတော အတ္တာနံ မောစေတုံ သက္ကောတိ။ တာနိ ဒဿေတုံ ဇာတိအာဒီနိ ပုရိမာနိ အင်္ဂါနိ ဒေသိတာနိ။ အပိစ။ ဧကသ္မိံ ဘဝေ ဌတွာ အာဂမနသမ္ဘာရေဟိစ ဂမနသမ္ဘာရေဟိစ အာဂတိယာစ ဂတိယာစ သဒ္ဓိံ အတ္တဘာဝနိဗ္ဗတ္တိယာ ဒဿိတာယ အတီတေ အနာဂတေစ သကလသံသာရေ တသ္မိံ တသ္မိံ ဘဝေ တဿ တဿ အတ္တဘာဝဿ နိဗ္ဗတ္တိ ဒဿိတာဧဝ ဟောတိ။ သဗ္ဗာနိစ ဒိဋ္ဌိဂတာနိ နိဝတ္တိတာနိ။ ဘဝစက္ကဉ္စ အနာဒိမန္တံ ဟုတွာ အာဗန္ဓတိယေဝ။ တသ္မာ ဇရာမရဏဝစနေနဝါ သောကာဒိဝစနေနဝါ အဝိဇ္ဇံ အစိန္တေတွာ ဝဋ္ဋပဝတ္တဿ မဟာအာဒီနဝရာသိဒဿနမေဝ ပစ္စေတဗ္ဗန္တိ။ ဣစ္စေဝန္တိအာဒိ နိဂမနံ။ ဣစ္စေဝံ အဝိဇ္ဇာပစ္စယာ သင်္ခါရာတိအာဒိနာ နယေန ပဌပေသီတိ သမ္ဗန္ဓော။ ဣစ္စေဝံ အာဗန္ဓံ အနာဒိကံ တေဘူမကံ ဝဋ္ဋန္တိပိ ယောဇေန္တိ။

တတ္ထ ဣစ္စေဝံ အာဗန္ဓန္တိ ဇရာမရဏမုစ္ဆာယာတိအာဒိနာ ဝုတ္တ နယေန ပုနပ္ပုနံ အာဗန္ဓံ။ အနာဒိကန္တိ ကသ္မာ ဝုတ္တံ။ နနု အဝိဇ္ဇာ အာဒိမှိ ဝုတ္တာတိ။ ဝုစ္စတေ၊ ဝဋ္ဋဿ အာဒိဘူတတ္တာ သာ အာဒိမှိ ဝုတ္တာ န ဟောတိ။ ဝဋ္ဋကထာယ သီသ ဘူတတ္တာဧဝ သာ အာဒိမှိ ဝုတ္တာ။ ဧဝံ ဝုတ္တာယ ပန တာယ ဝဋ္ဋဿ အနာဒိကဘာဝေါပိ ဒဿိတော။ အဝိဇ္ဇာ ဟိ နာမ ဗဟိဒ္ဓါ န လဗ္ဘတိ။ သတ္တသန္တာနေ ဧဝ လဗ္ဘတီတိ ပစ္စက္ခတောဝ သိဒ္ဓမေတံ။ တသ္မာ ဣဓ အတီတဘဝေ အဝိဇ္ဇာယ သိဒ္ဓါယ တဿာအဓိဋ္ဌာနဘူတော အတ္တဘာဝေါပိ တသ္မိံ ဘဝေ သိဇ္ဈတိယေဝ။ သိဇ္ဈန္တော စ ဣမဿံ ဒသနောယံ ဝုတ္တ နယေန အညာယ အဝိဇ္ဇာယ ဧဝ သိဇ္ဈတိ၊ န အညထာ။ ဧဝဉ္စ သဘိ ပုန တဿပိ အဓိဋ္ဌာနဘူတော အတ္တဘာဝေါ သိဇ္ဈတိယေဝါတိ အဝိဇ္ဇာ အတ္တဘာဝေါစာတိ ဥဘယံ ပေတံ အနဝဋ္ဌိတံ အနာဒိကမေဝ ဟောတီတိ။ ဝဋ္ဋဿ ပန တိဝိဓဿပိ ပဓာနပစ္စယဘူတတ္တာ သာ ဝဋ္ဋကထာယ သီသဘူတာ ဟောတိ။ ယဒိ သာ ဝဋ္ဋဿ အာဒိဘူတာ န ဟောတိ။ အထ တဿာပိ ပစ္စယော ဝတ္တဗ္ဗောတိ။ သစ္စံ။ တဿာ ပန ပစ္စယေ ဝုတ္တေပိ တဿ ပစ္စယဿပိ ပစ္စယော ဝတ္တဗ္ဗောတိ အာဂစ္ဆတိယေဝ။ ဧဝဉ္စ သတိ တဿ တဿာတိ နိဋ္ဌာနမေဝ နပညာ ယေယျာတိ။ အညတ္ထ ပန ဝုတ္တောယေဝ။ ယထာဟ-အာသဝသမုဒယာ အဝိဇ္ဇာသမုဒယောတိ။ ယထာစာဟ-အဝိဇ္ဇံ ပါဟံ ဘိက္ခဝေ သာဟာရံ သနိဒါနံ ဝဒါမိ။ ကောစဿာ အာဟာရော။ ပဉ္စနီဝရဏာ တိဿ ဝစနီယန္တိ။ ယထာစာဟ-အဝိဇ္ဇာ ပစ္စယော၊ သင်္ခါရာ ပစ္စယုပ္ပန္နာ။ ဥဘယမေတံ ပဋိစ္စ သမုပ္ပန္နန္တိ။ ပဌပေသီတိ ပညာပေသိ ဒေသေသီတိ အတ္ထော။ [ပဋိစ္စသမုပ္ပာဒနယော။]

၁၆၇။ ဣဒါနိ ပဋ္ဌာနနယံ ဒဿေတုံ ဟေတုပစ္စယောတိအာဒိ အာရဒ္ဓံ။ တတ္ထဟေတုစ သော ပစ္စယောစာတိ ဟေတုပစ္စယော၊ ဟေတု ဟုတွာ ပစ္စယော ဟေတုဘာဝေန ပစ္စယောတိ ဝုတ္တံ ဟောတိ။ တတ္ထ ကေနဋ္ဌေန ဟေတူတိ မူလဋ္ဌေန၊ ကောစ မူလဋ္ဌောတိ။ ရုက္ခာနံ ရုက္ခမူလဿ ဝိယ ဘူမိယံ သဟဇာတဓမ္မာနံ အာရမ္မဏေသု သုပ္ပတိဋ္ဌိ တဘာဝသာဓနဋ္ဌော မူလဋ္ဌောနာမ။ သဟဇာတဓမ္မာနံ ကုသလာဒိ ဘာဝသာဓနဋ္ဌော မူလဋ္ဌောနာမာတိပိ ဝဒန္တိ။ ယံ ပနေတ္ထ ဝတ္တဗ္ဗံ။ တံ ဟေဋ္ဌာ ဝုတ္တမေဝ။ သဒ္ဒတ္ထတော ပန ဟိနောန္တိ ဝုဒ္ဓိဝိရုဠှိဝေပုလ္လပတ္တိဝသေန သုဋ္ဌု ပတိဋ္ဌဟန္တိ သဟဇာတဓမ္မာ ဧတ္ထ ဧတေနဝါ အာရမ္မဏေ ဒဠှနိပါတိနာ ထာမဗလသမ္ပန္နေနာတိ ဟေတု။ ပစ္စယ သဒ္ဒေါ ပန ဥပကာရကဋ္ဌော။ ဥပကာရကောတိစ သယံ ယာဒိသေန သဘာဝေန ဥပလဗ္ဘမာနေ အနုပ္ပန္နာဝါ ဓမ္မာ ဥပ္ပဇ္ဇန္တိ။ ဥပ္ပန္နာဝါ တိဋ္ဌန္တိ ဌိတာဝါ ဥပရုပရိဝုဒ္ဓိဝိရုဠှိယာ ပစ္စယတ္တံ ဥပဂစ္ဆန္တိ။ တာဒိ သေနသဘာဝေန ဥပလဒ္ဓိယေဝ။ နဟိ သဘာဝဓမ္မေသု ဤဟာဝါ ဗျာပါရောဝါ ဥပလဗ္ဘတိ။ ယေန ကတ္တာဝါ ကာရေတာဝါ ဥပလဗ္ဘေယျာတိ။ တထာ ဥပလဒ္ဓိယံ ပန သတိ အနုရူပါနံ ပစ္စယုပ္ပန္နဓမ္မာနံ အနုပ္ပန္နာနံဝါ ဥပ္ပဇ္ဇနတော ဥပ္ပန္နာနံဝါ ဌိတိဘာဝပတ္တိတော ဌိတာနံ ဝါ ဥပရုပရိဝုဒ္ဓိဝိရုဠှိယာ ပစ္စယတ္တုပဂမနတော သုဋ္ဌု ကရာန္တော ဝိယ သာဓေန္တော ဝိယ ဟောတီတိ ကတွာ ဥပကာရကော တွေဝ ဝုစ္စတီတိ။ ဣတိ အာရမ္မဏေ ထိရဘာဝဝုဒ္ဓိ ဝိရုဠှိဘာဝသာဓန သင်္ခါတေန မူလဘာဝေန ဥပကာရကာ ဆဟေတုဓမ္မာ ဟေတုပစ္စယော နာမ။

အာရမန္တိ စိတ္တစေတသိကာ ဓမ္မာ သုဋ္ဌု ရတိံ အနုဘဝန္တာ ဝိယ အဇ္ဈောလမ္ဗမာနာ ပဝတ္တန္တိ ဧတ္ထာတိ အာရမ္မဏံ။ အာရမ္မဏဘာနေဝ ဥပကာရကာ ဆဠာရမ္မဏဓမ္မာ အာရမ္မဏပစ္စယော။ အဓိပတိ သဒ္ဒတ္ထော ဟေဋ္ဌာ ဝုတ္တောယေဝ။ အဓိပတိ ဘာဝေန ဥပကာရကော ဓမ္မော အဓိပတိပစ္စယော။ သော ဒုဝိဓော အာရမ္မဏာဓိပတိ သဟာဇာတာဓိပတိဝသေန။ အာရမ္မဏဓမ္မာပိ ဟိ ကေစိ ဂရုကတာ အတ္တနော အာရမ္မဏိကဓမ္မေ သာမိနော ဝိယ ဒါသေ အတ္တနော ဝသေဝတ္တယမာနာ အတ္တနိ နိစ္စံ နိန္နပေါဏပဗ္ဘာရေဧဝ ကရောန္တီတိ။ နတ္ထိ အန္တရံ ဧတဿာတိ အနန္တရော၊ အနန္တရဘာဝေန ဥပကာရကော ဓမ္မော အနန္တရပစ္စယော။ သုဋ္ဌု အနန္တရဘာဝေန ဥပကာရကော ဓမ္မော သမနန္တရပစ္စယော။ ဣမေသံ ဒွိန္နံ ပစ္စယာနံ ဓမ္မတော ဝိသေသော နတ္ထိ။ အတ္ထတော ပန ပုရိမစိတ္တေ နိရုဒ္ဓေပိ ပစ္ဆာ သန္တာနံ ဥစ္ဆိဇ္ဇိတုံ အဒတွာ သန္တာနာနုဗန္ဓဝသေန သာရမ္မဏဓမ္မ ဘာဝေန အတ္တသဒိသဿ ဓမ္မန္တရဿ ဥပ္ပာဒနံ အနန္တရပစ္စယတာ။ ဓမ္မန္တရေ ဥပ္ပာဒိယမာနေပိ ယံကိဉ္စိ ဓမ္မံ အနုပ္ပာဒေတွာ ပဋိသန္ဓာဒီနံ ကိစ္စဋ္ဌာနာနံ ပဋိပါဋိယာ စိတ္တနိယာမံ နာမ သာဓေတွာ အနုရူပဿေဝ ဓမ္မန္တရဿ ဥပ္ပာဒနံ သမနန္တရပစ္စယတာတိ။ ဧဝဉှိ သတိ နိရောဓာ ဝုဋ္ဌဟန္တဿ အသညသတ္တာ စဝန္တဿစ ပုရိမပစ္ဆိမဘာဂပဝတ္တာနံ စိတ္တုပ္ပာဒါနံပိ အနန္တရတာ သမနန္တရတာစ ဥပပန္နာ ဟောတီတိ။ နဟိ အဘာဝ ဘူတော အန္တရေ ကာလော တေသံ အန္တရံ ကရောတိနာမ။ နစ အညသန္တာနဘူတော အန္တရေ ရူပဓမ္မော။ အညဉှိ ရူပသန္တာနံ၊ အညံ အရူပသန္တာနံ။ အဋ္ဌကထာယံ ပန ကာလာနန္တရတာ သမနန္တရပစ္စယောတိ ဝါဒံ ပဋိက္ခိပိတွာ သဏ္ဌာနာဘာဝတော သုဋ္ဌု အနန္တရာတိ သမနန္တရာတိ ဝုတ္တံ။ ဧတေန ယထာသဏ္ဌာနဝန္တာနံ ရူပဓမ္မာနံ အနန္တရတာနာမ မဇ္ဈေ ပရိစ္ဆေဒသဟိတာယေဝ ဟောတိ။ န တထာ သဏ္ဌာနရဟိတာနံ အရူပဓမ္မာနံ။ တသ္မာ ပုရိမပစ္ဆိမာနံ တေသံ ဧကီဘူတာနံ ဝိယ ပဝတ္တိသမနန္တရတာနာမ။ တထာ ပဝတ္တန သမတ္ထတာ သမနန္တရပစ္စယတာတိ ဒဿေတိ။

ယေ ပန ဓမ္မာ အတ္တနိ ဇာတေ ဧဝ ဇာယန္တိ၊ နော အဇာတေ။ အတ္တနာ သဟေဝစ ဇာယန္တိ၊ နော ပုရေ ပစ္ဆာစ၊ တေသံ ဇာတတ္ထာယ ဝိယ သယံ တေဟိ သဟ ဇာတဘာဝေန ဥပကာရကော ဓမ္မော သဟဇာတပစ္စယော။ ပကာသဿ ပဒီပေါ ဝိယ။ ပဒီပဇာလဉှိ ဥပ္ပဇ္ဇမာနံ ပကာသသင်္ခါတေန အာလောကေန သဟေဝ ဥပ္ပဇ္ဇတီတိ။ အညမညံ ဥပတ္ထမ္ဘန္တံ တိဒဏ္ဍံ ဝိယ အညမညံ ဥပတ္ထမ္ဘနဝသေန ဥပကာရကော ဓမ္မော အညမညပစ္စယော။ ဧဝဉ္စ သတိ ဣမဿ ပစ္စယဿ ပုရိမေန သဟ ဝိသေသော ပါကဋော ဟောတိ။ နဟိ သဟ ဇာတသဒ္ဒေါ ဧဝရူပံ အညမညောပတ္ထမ္ဘနံ ဗောဓေတီတိ။ နိဿယန္တိ ဧတ္ထာတိ နိဿယော။ နိဿယဘာဝေန ဥပကာရကော ဓမ္မော နိဿယပစ္စယော။ သော ပန သဟဇာတနိဿယော ဝတ္ထုပုရေဇာတ နိဿယောတိ ဒုဝိဓော ဟောတိ။ တတ္ထ သဟဇာတောဝ သမာနော ပဋကောဋ္ဌကော ဝိယ စိတ္တကမ္မာနံ ပတိဋ္ဌာဘာဝေန ဥပကာရကော ဓမ္မော သဟဇာတနိဿယော။ ပထဝီ ဝိယ တိဏရုက္ခာဒီနံ ပုရေ ဇာတော ဟုတွာ အဓိဋ္ဌာနဘာဝေန ဥပကာရကော ဝတ္ထုပုရေဇာတ နိဿယော။ ဗလဝတရော ပန နိဿယော ဥပနိဿယော။ ယထာ ဟိ သာလိဘတ္တဿ ဥပ္ပတ္တိယာ သူဒေါဝါ ဥက္ခလိဝါကဋ္ဌံဝါ အဂ္ဂိဝါနိဿယော ဧဝ ဟောတိ၊ န ဥပနိဿယော။ သာလိခေတ္တဝုဋ္ဌိဓာရာ ဧဝ ပန ဥပနိဿယော၊ န ဟိ တာသုအသတိ ဘတ္တုပ္ပတ္တိယာ သူဒါဒီနံပိ ထာမောနာမ အတ္ထီတိ။ တထာ ယဟိံ ပစ္စယေ အသတိ နိဿယဓမ္မာပိ နတ္ထိ။ ကုတော နိဿိတဓမ္မာ။ သော ပစ္စယော နိဿယတောပိ ဗလဝတရဋ္ဌေန ဥပနိဿယောတိ ဝုစ္စတီတိ။

သော ပန အာရမ္မဏူပနိဿယော အနန္တရူပနိဿယော ပကတူပနိဿယောတိ တိဝိဓော ဟောတိ။ တတ္ထ ဂရုကတာ အာရမ္မဏ ဓမ္မာ ဂရုကတတ္တာဧဝ အဓိပတိဘူတာ ဗလဝ နိဿယဘူတာစ ဟောန္တိ။ အနန္တရပစ္စယဓမ္မာစ တေဟိ ဝိနာ စိတ္တသန္တာနပဝတ္တိယာ ဧဝ အဘာဝတော ဗလဝနိဿယာဧဝ ဟောန္တိ။ ပကတူပနိဿယောတိ ဧတ္ထ ပန ပကတော ဥပနိဿယောတိ ပကတူပနိဿယော။ ပကတောတိစ ယထာ ကတေ သတိ အနုရူပေ ကာလေ တသ္မိံသန္တာနေ ဧကန္တေန ပစ္စယုပ္ပန္နဓမ္မာ ပါတုဘဝန္တိ၊ တထာ သုဋ္ဌု ကတောတိ အတ္ထော။ ကရဏဉ္စေတ္ထ သဒ္ဓါ သီလံ သုတံ စာဂေါ ပညာတိစ ရာဂေါ ဒေါသော မောဟော မာနော ဒိဋ္ဌိ ပတ္ထနာတိစ ဝုတ္တာနံ ဓမ္မာနံ အတ္တနော သန္တာနေ ပုဗ္ဗဘာဂေ ဝုတ္တပ္ပကာရေန သုဋ္ဌု ဥပ္ပာဒနံ။ ကာယိကံ သုခံ ကာယိကံ ဒုက္ခံ ပုဂ္ဂလော ဥတု ဘောဇနံ သေနာသနန္တိ ဧဝံ ဝုတ္တာနံ ဓမ္မာနံ သုဋ္ဌု ဥပသေဝနဉ္စ ဝေဒိတဗ္ဗံ။

ပုရေတရံ ဥပ္ပဇ္ဇိတွာ ဝတ္တမာနဘာဝေန ဥပကာရကော ဓမ္မော ပုရေဇာတပစ္စယော။ သော ဒုဝိဓော အာရမ္မဏပုရေဇာတ နိဿယ ပုရေဇာတ ဝသေန။ နိဿယာရမ္မဏဓမ္မာ ဧဝ ဟိ ကေစိ ပုရေဇာတ တာမတ္တဝိသိဋ္ဌာ ပုရေဇာတပစ္စယောတိ ဝုတ္တာတိ။ အာစရိယာနန္ဒတ္ထေရေန ပန နိဿယာရမ္မဏာကာရာဒီဟိ ဝိသိဋ္ဌာ ပုရေဇာတာကာရေန ဥပကာရကတာ ပုရေဇာတပစ္စယတာတိ ဝုတ္တံ။ ဧဝံ သန္တေပိ ပုရေ ဇာတတာဝိသိဋ္ဌေဟိ နိဿယာရမ္မဏသတ္တိဝိသေသေဟိ အညော ဝိသုံ ပုရေဇာတသတ္တိဝိသေသောနာမ နဒိဿတိယေဝ။ ပုရေ ရောပေတွာ ဇာတာနံ ရုက္ခပေါတကာနံ ဝိယ ပစ္ဆာ အာသိဉ္စိယမာနံ ဥဒကံ ပုရေ ဇာတာနံ စတုသမုဋ္ဌာနိကရူပဓမ္မာနံ ဝုဒ္ဓဝိရုဠှဘာဝဉ္စ ပစ္ဆာပိ အတ္တနာ သဒိသဿ ရူပသန္တာနဿ ပဝတ္တိယာ ပစ္စယဘာဝဉ္စ ပါပေတွာ ဥပတ္ထမ္ဘနဝသေန ဥပကာရကော ပစ္ဆာဇာတော အရူပဓမ္မော ပစ္ဆာ ဇာတပစ္စယော။ အဋ္ဌကထာယံ ပန ဂိဇ္ဈပေါတကသရီရာနံ အာဟာရာသာ စေတနာဝိယာတိ ဝုတ္တံ။ မူလဋီကာယဉ္စ ဧတေန မနောသဉ္စေ တနာဟာရဝသေန ပဝတ္တမာနေဟိ အရူပဓမ္မေဟိ ရူပကာယဿ ဥပတ္ထမ္ဘိတ ဘာဝံ ဒဿေတိ၊ တေနေဝ အာဟာရာသာ ဝိယာတိ အဝတွာ စေတနာဂဟဏံ ကရောတီတိ ဝုတ္တံ။ သာ ပန ပစ္ဆာဇာတာ သသမ္ပယုတ္တာ အာဟာရာသာ စေတနာ ပုရေဇာတာနံ တေသံ ဂိဇ္ဈသရီရရူပါနံ စိရကာလံ ကဗဠီကာရာဟာရေန ဝိနာပိ အမိလာတ ဘာဝံ ဥပရူပရိစ ဝုဒ္ဓဝိရုဠှရူပသန္တာနုပ္ပတ္တိယာ ပစ္စယဘာဝံ ပါပေတွာ ဥပတ္ထမ္ဘတိယေဝ။ ယသ္မာ သုပါကဋေန ပစ္ဆာဇာတပစ္စယေက ဒေသေန သကလဿ ပစ္ဆာဇာတပစ္စယဿ သာဓနတ္ထာယ အယံ ဥပမာ ဣဓ ဝုတ္တာ ဝိယ ဒိဿတိ။ စေတနာ ဂဟဏဉ္စ ပစ္ဆာဇာတ ပစ္စယံ ပတွာပိ စေတနာဧဝ ပဓာနာ ဇာတာတိ ဒဿနတ္ထံ ဂဟိတန္တိ န န သက္ကာ ဝတ္တုံ။ ဧဝဉှိ သတိ ပစ္ဆာဇာတဿ အတ္ထဿ ပစ္ဆာ ဇာတာယ ဧဝ ဥပမာယ သာဓနံ ဥပပန္နံ ဟောတီတိ။ ယထာဝုတ္တ ဋီကာပါဌေပိ အယမတ္ထော လဗ္ဘတိယေဝ။

အာသေဝန္တိ တံ သုဋ္ဌု ဘဇန္တိ အပရာပရံ ဥပ္ပဇ္ဇမာနာ ဓမ္မာ သုဋ္ဌု သေဝမာနာ ဝိယ ဘဇမာနာ ဝိယ တဿ ပုရိမဿ သဗ္ဗပါရိပူရံ အာကာရံ ဂဟေတွာ ဧဝ ပုနပ္ပုနံ ပဝတ္တန္တီတိ အာသေဝနံ။ အာသေဝေတိဝါ တေ ဓမ္မေ အတ္တနော ပရိဝါသံ သုဋ္ဌု ဂါဟာပေတိ။ ဝဍ္ဎေတီတိဝါ အာသေဝနံ။ အပိစ ကုသလာဒိဘာဝေန အတ္တနာ သဒိသဿ ပယောဂေန ကရဏီယဿ အနန္တရဓမ္မဿ ပုနပ္ပုနံ ကရဏံ ပဝတ္တနံ အတ္တသဒိသဿဝါ အတ္တသဒိသဘာဝါပါဒနံ ဝါသနံ အာသေဝနဋ္ဌောတိ မူလဋီကာယံ ဝုတ္တံ။ တတ္ထ ပယောဂေန ကရဏီယဿာတိ ဧတေန အာဝဇ္ဇနဒွယဉ္စ သဗ္ဗဝိပါကဓမ္မေစ နိဝတ္တေတိ။ နဟိ အာဝဇ္ဇန ဒွယဿ ဒွတ္တိက္ခတ္တုံ ပဝတ္တမာနဿပိ ဝဍ္ဎေတုံဝါ ဟာပေတုံဝါ ပယောဂေန ကရဏီယတာနာမ အတ္ထိ ပရိဒုဗ္ဗလတ္တာ။ ဝိပါကေသုစ အရိယဖလာနိ ပရိကမ္မပယောဂေန ကရဏီယာနိပိ မဂ္ဂစေတနာနုဘာဝေန ဝိနာ ကေဝလေန တေန ပယောဂေနေဝ သာဓေတဗ္ဗာနိ န ဟောန္တိ။ ကေဝလံ ကမ္မဝေဂေန သန္တာနေ ပါတိတေသု လောကိယဝိပါကေသု ဝတ္တဗ္ဗမေဝ နတ္ထီတိ။ ပုနပ္ပုနံ ကရဏံ ပဝတ္တနန္တိ ဥပရုပရိ ပဂုဏ ဗလဝဘာဝါပါဒနေန သဟ ပဝတ္တနံ သန္ဓာယ ဝုတ္တံ။ ဧဝဉှိ သတိ ပရိယတ္တိဓမ္မ ဝိဇ္ဇာသိပ္ပုဂ္ဂဟဏေသု ပုရိမာဘိယောဂေါ ဝိယ အာသေဝနဋ္ဌေန အနန္တရေ ပဝတ္တာနံ သဇာတိယာနံ ဓမ္မာနံ ပဂုဏဗလဝဘာဝါယ ဥပကာရကော ဓမ္မော အာသေဝနပစ္စယော နာမာတိ သိဒ္ဓံ ဟောတီတိ။

ကာယင်္ဂဝါစင်္ဂစိတ္တင်္ဂါဘိသင်္ခရဏဘူတေန စိတ္တပ္ပယောဂသင်္ခါတေ န ကိရိယာဘာဝေန ဥပကာရကော ဓမ္မော ကမ္မပစ္စယော။ သော ဒုဝိဓော သဟဇာတနာနာက္ခဏိကဝသေန။ တတ္ထ ဇေဋ္ဌသိဿ မဟာ ဝဍ္ဎကိအာဒယော ဝိယ သကိစ္စပရကိစ္စသာဓနဝသေန ပဝတ္တာ သဗ္ဗာပိ သဟဇာတစေတနာ သဟဇာတပစ္စယော။ ယထာ ပန ဣတ္ထိပုရိသာနံ သကိံ သန္နိပါတပ္ပယောဂေါ ကာမသုခါနုဘဝနကိစ္စဉ္စ ကာလန္တရေ ပုတ္တပါတုဘာဝတ္ထာယဝတ္ထုမှိ ဗီဇနိဓာန ကိစ္စဉ္စ သမ္ပာဒေတိ။ ဧဝမေဝံ ယထာဝုတ္တာဘိသင်္ခရဏကိစ္စဉ္စ တဒဘိသင်္ခရဏဝေဂဇနိတံ ကာလန္တရေ ဝိပါကကဋတ္တာရူပါနံ ပါတုဘာဝတ္ထာယ သန္တာနေ ကိရိယာ ဝိသေသနိဓာန ကိစ္စဉ္စ သမ္ပာဒေတွာ နိရုဒ္ဓါ ကုသလာကုသလ စေတနာ နာနာက္ခဏိကကမ္မပစ္စယောနာမ။ ဝိပစ္စနမတ္တဘာဝေန ဥပကာရကော ဓမ္မော ဝိပါကပစ္စယော။ ဝိပစ္စန ဘာဝေါစ နာမ လောကေ သဗ္ဗေသံ ပုပ္ဖဖလာဒီနံ သုဋ္ဌု ဝိပက္ကဘာဝံ ပတ္တကာလေ သဗ္ဗာကာရေန မန္ဒဘာဝေါ ဟောတိ။ ဧဝံ နိရုဿာဟသန္တ ဘာဝသင်္ခါကေန မန္ဒမန္ဒာကာရေန သန္တာနေ ပါတုဘာဝေါ။ တတောယေဝစ ဝိပါကာနံ ပဝတ္တိ အဝိဘူတာ ဟောတိ။ သဗ္ဗရတ္တိံ နိဒ္ဒါယန္တဿ ပုရိမဘဝသိဒ္ဓေ ကမ္မာဒိ အာရမ္မဏေ ပဝတ္တာနိပိ တာနိ ဝုဋ္ဌိတကာလေ ကိဉ္စိဇာနနစိတ္တ ပဝတ္တိယာ ပစ္စယာ နဟောန္တီတိ။ ပဉ္စဝိညာဏာဒီနိ ပန ပစ္ဆာဇာနနစိတ္တ ပဝတ္တိယာ ပစ္စယာ ဟောန္တာနိပိ ဝတ္ထာရမ္မဏ ဃဋ္ဋနာနုဘာဝ ဗလေန သဟေဝ ဟောန္တိ။ န တေသံ ဥဿာဟဗျာပါရမတ္တ ဝသေနာတိ ဒဋ္ဌဗ္ဗံ။

အရူပိနော တယော အာဟာရာ သဟဇာတဓမ္မာနံ ဇနနဋ္ဌေန ဥပတ္ထမ္ဘနဋ္ဌေနစ၊ ကဗဠီကာရာဟာရော ပန ဣမဿ စတုသမုဋ္ဌာနိ ကဿ ကာယဿ ဥပတ္ထမ္ဘနဋ္ဌေနေဝ ဥပကာရကတာ အာဟာရပစ္စယော။ အပိစ၊ အာဟာရဋ္ဌောနာမ ဥပတ္ထမ္ဘနပ္ပဓာနော ဟောတိ။ တေနေဝ ဟိ ပါဠိယံ ကဗဠီကာရော အာဟာရော အာဟာရသမုဋ္ဌာနဿ ရူပဿ အာဟာရပစ္စယေန ပစ္စယောတိ အဝတွာ ဣမဿ ကာယဿ အာဟာရပစ္စယေန ပစ္စယောတွေဝ ဝုတ္တံ။ တသ္မာ အရူပါဟာရာနံပိ အာဟာရဋ္ဌော ဥပတ္ထမ္ဘနဝသေနေဝ ဝေဒိတဗ္ဗော။ ဇနယန္တာပိ ဟိ အာဟာရာ အတ္တနာ ဇနိတာနဉ္စ တဒညေသဉ္စသန္တာနဋ္ဌိတိယာ ပစ္စယဘာဝတ္ထာယ ဥပတ္ထမ္ဘနေန သဟေဝ ဇနေန္တီတိ။

ဣဿရိယဋ္ဌေန ဥပကာရကော ဓမ္မော ဣန္ဒြိယပစ္စယော။ သော တိဝိဓော သဟဇာတာဒိဝသေန။ တတ္ထ သဟဇာတဓမ္မာနံ အတ္တနော အတ္တနော ကိစ္စေသု ဣဿရဘူတာ အရူပိန္ဒြိယဓမ္မာ သဟဇာတိန္ဒြိယပစ္စယော။ ပစ္ဆာ ဇာတာနံ ပဉ္စဝိညာဏ ဓမ္မာနံ ဒဿနာဒိ ကိစ္စေသု ဣဿရဘူတာ ပုရေ ဇာတာ ပဉ္စပသာဒိန္ဒြိယဓမ္မာ ပုရေ ဇာတိန္ဒြိယပစ္စယော။ သဟဇာတာနံ ကဋတ္တာရူပါနံ စိရတရပဝတ္တိယံ ဣဿရဘူတံ ရူပဇီဝိတံ ရူပဇီဝိတိန္ဒြိယပစ္စယော။ ကသ္မာ ပနေတ္ထ ဘာဝိန္ဒြိယဒွယံ ဣဓ န ဂဟိတန္တိ။ ဝုစ္စတေ၊ ယဿ ဇနကတ္တံဝါ ဥပတ္ထမ္ဘကတ္တံဝါ အနုပါလကတ္တံဝါ အတ္ထိ။ သော ပစ္စယဓမ္မောနာမ။ ဘာဝဒွယဿ ပန သဟဇာတ ဓမ္မာနံ အတ္ထာယ ဧတံ တယံပိ နတ္ထိ။ ကေဝလံ ပန တံသဟိတေ သန္တာနေ ကမ္မာဒီဟိ အတ္တနော အတ္တနော ပစ္စယေဟိ ပဝတ္တမာနာနံ စတုသမုဋ္ဌာနိကဓမ္မာနံ ဣတ္ထာကာရာဒိဝသေနေဝ ယော ပဝတ္တိနိယမော အတ္ထိ၊ သော ဘာဝရူပါ နုဘာဝေန သိဒ္ဓါ။ တသ္မာ တေသံ ဓမ္မာနံ တာဒိသေ နိယာမကိစ္စေ ဣဿရတ္တာယေဝ ဒွယံ ဣန္ဒြိယံနာမ ဟောတိ။ န ဣန္ဒြိယပစ္စယတ္တေ နာတိ တံ ဣဓ နဂဟိတန္တိ ဒဋ္ဌဗ္ဗံ။ အာရမ္မဏံ ဥပဂန္တွာ တသ္မိံ ဘုသံ ဒဠှံ နိပတိတွာ ဝိယ ဈာယနဋ္ဌေန ဩလောကနဋ္ဌေန ဥပကာရကော ဓမ္မော ဈာနပစ္စယော။ ဒုဂ္ဂတိ သုဂတိ နိဗ္ဗာန သမ္ပာပကဋ္ဌေန ဥပကာရကော ဓမ္မော မဂ္ဂပစ္စယော။ ဧတ္ထစ ယေနယေန သမ္မာဒဿနာဒိနာ လက္ခဏဝိသေသေန သမ္ပန္နတ္တာ ကုသလဘူတာ သမ္မာဒိဋ္ဌာဒယော သုဂတိ နိဗ္ဗာန သမ္ပာပကဋ္ဌေန မဂ္ဂပစ္စယာနာမ ဟောန္တိ။ အဗျာကတဘူတာနံပိ တေသံ သော သော လက္ခဏဝိသေသော အတ္ထိယေဝါတိ တေသမ္ပိ တေနေဝဋ္ဌေန မဂ္ဂပစ္စယတာ ဝုတ္တာတိ ဒဋ္ဌဗ္ဗာ။ သတိပိ မဂ္ဂင်္ဂါနံ တံတံ သမ္ပာပကဋ္ဌေနစ ဥပကာရကတ္တေ တံသမုဋ္ဌိတာနံ ရူပဓမ္မာနံ သော အတ္ထော န ပါပုဏာတိ။ တေသံ ပန မဂ္ဂပစ္စယဓမ္မေဟိ သမုဋ္ဌိတတ္တာယေဝ မဂ္ဂပစ္စယုပ္ပန္နတာ ပစ္စေတဗ္ဗာ။ ဧသနယော ဟေတုကမ္မိန္ဒြိယဈာန ပစ္စယေသုပီတိ။

ဧကုပ္ပာဒတာဒီဟိ ပကာရေဟိ သမံ ဧကီဘူတော ဝိယ ဟုတွာ အညမညယုတ္တဘာဝေန ဥပကာရကော ဓမ္မော သမ္ပယုတ္တပစ္စယော။ သမာနေပိ သဟဇာတဘာဝေန နိဿယ နိဿိတ ဘာဝေနစ ယုတ္တဘာဝေ ဧကုပ္ပာဒတာဒိကဿ သမ္ပယောဂလက္ခဏဿ ဝိရဟတော ဝိပ္ပယုတ္တဘာဝေန ဥပကာရကော ဓမ္မော ဝိပ္ပယုတ္တပစ္စယော။ ယတ္ထ သမ္ပယုတ္တာ သင်္ကာ သမ္ဘဝတိ၊ တတ္ထေဝ တဒါသင်္ကာ ဝိဂမနတ္ထံ အယံ ဝိပ္ပယုတ္တပစ္စယောနာမ ဝုတ္တောတိ တဒါသင်္ခါ ရဟိတေသု အာရမ္မဏာနန္တရာဒီသု ဝိပ္ပယုတ္တပစ္စယပသင်္ဂေါ နတ္ထီတိ ဝေဒိတဗ္ဗော။ ဟေဋ္ဌာဝုတ္တပ္ပကာရေသု ဧဝ ပစ္စယဓမ္မေသု ယော ယော အတ္ထိတာ သင်္ခါတေန ခဏပစ္စုပ္ပန္န သမင်္ဂိဘာဝေန တာဒိသဿေဝ ခဏပစ္စုပ္ပန္န သမင်္ဂိနော ဓမ္မဿ သဟဇာတာဒိဝသေန ဥပကာရကော သော သော အတ္ထိပစ္စယော။ ယသ္မိံ ဝိဇ္ဇာမာနေ သတိ အညော ဥပ္ပဇ္ဇိတုံ ဩကာသံ နလဘတိ။ သော တဿ အညဿ ဩကာသဒါန သင်္ခါတေန သယံ အန္တရဟိတဘာဝေန ဥပကာရကော ဓမ္မော နတ္ထိပစ္စယော။ အယံပိ ဝိသုံ သတ္တိဝိသေသော န ဟောတိ။ တေနေဝ စိတ္တေန ဂစ္ဆတိ နိသီဒတိ တိဋ္ဌတီတိအာဒိနာ ပစ္ဆိမစိတ္တေ ဌိတာနံပိ ပုရိမစိတ္တံ ဝတ္တတိယေဝါတိ လောကဿ အဘိမာနော ဟောတိ။ တသ္မာ ယတ္ထ အတ္ထိတာသင်္ကာ သမ္ဘဝတိ။ တတ္ထ တဒါသင်္ကာ နိဝတ္တနတ္ထံ အယံ ပစ္စယော ဝုတ္တောတိ ဝေဒိတဗ္ဗော။

ဝိနာသံ ဂတော ဝိဂတော။ ယသ္မိံ အဝိဂတေ အညော ဥပ္ပဇ္ဇိတုံ ဩကာသံ နလဘတိ၊ သော တဿ ဩကာသဒါနသင်္ခါတေန သယံ ဝိဂတဘာဝေန ဥပကာရကော ဓမ္မော ဝိဂတပစ္စယော။ ဝတ္တမာနတာ သင်္ခါတေန အဝိဂတဘာဝေန တာဒိသဿေဝ ဓမ္မဿ ဥပကာရကော ဓမ္မော အဝိဂတပစ္စယော။ ပုရိမပစ္စယ ဒုကမေဝ စေတ္ထ နာနတ္ထ ပသင်္ဂနိဝတ္တနတ္ထံ ဉာဏဝိသဒတ္ထဉ္စ ပရိယာယန္တရေန ဝိဂတဒုကံနာမ ကတွာ ဒေသိတန္တိ ဝေဒိတဗ္ဗံ။ တထာ ဟိ အတ္ထီတိ ခေါ ကစ္စာန အယမေကော အန္တော။ နတ္ထီတိ အယံ ဒုတီယော အန္တောတိအာဒိနာ နာနာအတ္ထဒီပကာ အတ္ထိ နတ္ထိ သဒ္ဒါ သာသနေ လောကေစ ဒိဿန္တိ။ ပုဗ္ဗေ ဝုတ္တဿေဝ စ အတ္ထဿ ပုန ပရိယာယန္တရေန ဝစနံ သောတူနံ ဉာဏဝိသဒတ္ထာယ ဟောတီတိ။ ဋီကာကာရာ ပန ဗဟုံ တေသံ ပစ္စယ ဒုကာနံ နာနတ္ထသမ္ဘဝံ ဝဏ္ဏေန္တိယေဝါတိ။ [ပစ္စယုဒ္ဒေသော]

၁၆၈။ ဣဒါနိ ယထာ ဥဒ္ဒိဋ္ဌေ စတုဝီသတိပစ္စယေ ပထမံ ဆဟိ ရာသီဟိ သင်္ဂဟေတွာ ပုန ရာသီနံ အနုက္ကမေန တေသံ ပစ္စယာနံ နိဒ္ဒေသံ ဒဿေန္တော ဆဓာနာမန္တုနာမဿာတိ ဂါထာဒွယ မာဟ။ နာမံ နာမဿ ဆဓာ ဆဗ္ဗိဓေဟိ ပစ္စယေဟိ ပစ္စယော ဟောတိ။ နာမံ နာမရူပီနံ ပဉ္စဓာ။ ပုန နာမံ ရူပဿ ဧကဓာ၊ ရူပံ နာမဿ ဧကဓာဧဝ။ ပညတ္တိနာမရူပါနိ နာမဿ ဒုဝိဓာ၊ ဒွယံ နာမရူပံ ဒွယဿေဝ နာမရူပဿ နဝဓာတိ ဧဝံ ဆက္ကပဉ္စကာဒိဝသေန ပစ္စယာ ဆဗ္ဗိဓာ ဟောန္တိ။ ကထံ ဟောန္တီတိ ယောဇနာ။

[၂၂၉] ယံပန ဝိဘာဝနိယံ

‘‘ပညတ္တိနာမရူပါနိ နာမဿ ဒွိဓာ ဒွိပကာရာ ပစ္စယာ ဟောန္တီတိ ဝုတ္တံ’’။ တံ န သုန္ဒရံ။

ပစ္စယကထာ ဟိ နာမ ပစ္စယတော ပစ္စယုပ္ပန္နတော ပစ္စယသတ္တိတောတိ တီဟိ ပကာရေဟိ ဝုတ္တာယေဝ သုဝုတ္တာ ဟောတီတိ။ ယသ္မာ ပန အနန္တရာဒိပစ္စယာနာမ စိတ္တသန္တာနဿ အဝိစ္ဆေဒါယ ကိစ္စဋ္ဌာနာနုက္ကမပဋိပါဒနာယ ဧဝ စ ဟောန္တိ။ တသ္မာ ကုသလာဒီသု အရူပဓမ္မေသု ယောကောစိ ဓမ္မော ယဿ ကဿစိ အဝိရုဒ္ဓဿ ဓမ္မဿ ပစ္စယော န န ဟောတီတိ ဝုတ္တံ အနန္တရနိရုဒ္ဓါစိတ္တစေတသိကာဓမ္မာတိအာဒိ။ တတ္ထ အဝိရုဒ္ဓဿာတိဧတေန အညမညဝိရုဒ္ဓါနံ ကုသလာကုသလာနံ သောမနဿဒေါမနဿာနဉ္စ အညမညံ အနန္တရ ပစ္စယပဋိက္ခေပေါ ဝေဒိတဗ္ဗော။ ပဋုပ္ပန္နာနန္တိ ပုနုပ္ပန္နာနံ ပဋိပါဋိယာ ဥပ္ပန္နာနံဝါ။ ပုနပ္ပုနံ သန္တာနပရိဘာဝနာဝသေန ပဝတ္တော အာသေဝနပစ္စယောနာမ၊ ကေဝလံ ပယောဂသာဓနီယေသု ဇဝဝေဂ သဟိတေသု စိတ္တုပ္ပာဒေသု ဧဝ လဗ္ဘတီတိ ဝုတ္တံ ပုရိမာနိ ဇဝနာနီတိအာဒိ။ တတ္ထ ဇဝနာနီတိ မဂ္ဂဖလဇဝနဝဇ္ဇာနိ လောကိယ ကုသလာ ကုသလကြိယဇဝနာနိ ပစ္ဆိမာနံဇဝနာနန္တိ ဖလဇဝနဝဇ္ဇာနံ ကုသလာကုသလကြိယဇဝနာနံ။ ဘိန္နဇာတိကာ ဟိ ဓမ္မာ အညမညံ သဗ္ဗာကာရပါရိပူရံ ပရိဝါသံနာမ ဂဟေတုံဝါ ဂါဟာပေတုံပါ န သက္ကောန္တိ။ ယဒိ သက္ကုဏေယျုံ၊ ဇာတိမတ္တေနပိ ဓမ္မာ ပုဗ္ဗာပရံ အဘိန္နာဧဝ သိယုန္တိ။ တသ္မာ ဘိန္နဇာတိကံ ဖလဇဝနံ မဂ္ဂတော ပရိဝါသံ ဂဟေတုံ န သက္ကောတိ။ မဂ္ဂေါပိ အတ္တနော ပရိဝါသံ ဖလဿ ဒါတုံ န သက္ကောတိ။ ဖလစိတ္တာနိစ ပရိကမ္မပယောဂဗလေန ဇဝန ကိစ္စာနိ ဟောန္တိ၊ န အညမညံ ပရိဝါသဒါန ဂဟဏ ဗလေနာတိ။ ယသ္မာ ကာမာဝစရဘာဝတော မဟဂ္ဂတာ နုတ္တရ ဘာဝပ္ပတ္တိနာမ အာသေဝနဗလေန ဟောတိ၊ တသ္မာ ဂေါတြဘု ဈာန မဂ္ဂါနံ ဘူမိ ဘေဒေါ ဣဓ အပ္ပမာဏန္တိ ဒဋ္ဌဗ္ဗံ။

ဟေတု။လ။ နာမရူပါနန္တိ ဧတ္ထ ဟေတုမဂ္ဂင်္ဂါနိ အဟေတုကဝဇ္ဇိတာနံ၊ ဈာနင်္ဂါနိ ပဉ္စဝိညာဏဝဇ္ဇိတာနံ သဟဇာတာနံ နာမရူပါနံ။ သဟဇာတရူပလက္ခဏံ ပန သယမေဝ ဝက္ခတိ။ စေတနာနာမ ပဝတ္တမာနာ ဒွေ ကိစ္စာနိ သာဓေတိ သဟဇာတာနံ သံဝိဓာနဉ္စ အာယတိံ ဝိပါကပါတု ဘာဝတ္ထာယ တသ္မိံ သန္တာနေ အတ္တနော ပဝတ္တာ ကာရသင်္ခါတ ဗီဇနိဓာနဉ္စာတိ။ တတ္ထ သံဝိဓာနကိစ္စံ သဗ္ဗစေတနာ သာဓာရဏံ ဟောတိ။ ဗီဇနိဓာနကိစ္စံ ပန ကုသလာကုသလဘာဝပ္ပတ္တာယဧဝ စေတနာယ ဟောတီတိ ဝုတ္တံ သဟဇာတာစေတနာတိအာဒိ။ တတ္ထ သဟဇာတာစေတနာတိ အန္တမသော ပဉ္စဝိညာဏ သဟဇာတာပိ စေတနာ။ သာပိ ဟိ သဟဇာတာနံ သံဝိဒဟနသင်္ခါတေန ကမ္မဘာဝေန ပဝတ္တတ္တာ ကမ္မံဧဝနာမ ဟောတီတိ။ ယသ္မာ အတ္တနော ပဝတ္တာကာရသင်္ခါတဿ ဝိပါကဗီဇဿ နိဒဟနံနာမ၊ န တာဝဒေဝ ဗီဇကိစ္စံ သမ္ပာဒေတိ။ အမ္ဗဗီဇာဒီနိ ဝိယ ပရိဏတဘာဝံ ပတွာ ခဏန္တရေဧဝ သမ္ပာဒေတီတိ ဝုတ္တံ နာနာက္ခဏိကာ စေတနာတိအာဒိ။ တတ္ထ နာနာက္ခဏိကာစေတနာတိ အတ္တနော ပစ္စယုပ္ပန္နဓမ္မ ပဝတ္တိက္ခဏတော ဝိသုံ ဘူတေ အတီတကာလေ သိဒ္ဓါ ကုသလာ ကုသလစေတနာ။ ကုသလာကုသလစေတနာတိဝါ ပါဌော သိယာ။

ဝိပါကက္ခန္ဓာအညမညံသဟဇာတာနံရူပါနန္တိ ဧတ္ထ အညမညဿစ သဟဇာတရူပါနဉ္စာတိ အတ္ထော။ ယထာနာမ ပုရေ ဇာတာ သာလရုက္ခပေါတကာ ပစ္ဆာ အနုဝဿံ ဝဿန္တာနံ ဝုဋ္ဌိဓာရာနံ ဝသေန ဝုဒ္ဓိံ ဝိရုဠှိံ ဝေပုလ္လံ ပတွာ တသ္မိံ ဌာနေ ယာဝကပ္ပာဝသာနာပိ မဟန္တဿ သာလဝနသဏ္ဍဿ ပဝတ္တိယာ ပစ္စယာ ဟောန္တိ။ ဧဝံ ပဋိသန္ဓိက္ခဏတော ပဋ္ဌာယ ပုရိမစိတ္တက္ခဏေသု ဥပ္ပန္နာ သကလသရီရေ ကမ္မဇကာယော စိတ္တဇကာယော ဥတုဇကာယော အာဟာရဇ ကာယောတိ သဗ္ဗေ သကလသရီရဋ္ဌကာ စတုသမုဋ္ဌာနိက ရူပဓမ္မာ ပစ္ဆာဇာတာနံ ပထမဘဝင်္ဂါဒီနံ စိတ္တစေတသိကာနံ ဝသေန ဝုဒ္ဓိံ ဝိရုဠှိံ ဝေပုလ္လံ ပတွာ ဥပရုပရိ စတုသမုဋ္ဌာနိက ရူပပရံပရာပဝတ္တိယာ ပစ္စယတ္တံ ဥပဂစ္ဆန္တီတိ ဝုတ္တံ ပစ္ဆာဇာတာ စိတ္တစေတသိကာ ဓမ္မာတိအာဒိ။ တတ္ထ ပုရေဇာတဿာတိ အာတီတာနန္တရစိတ္တေ ဇာတဿာတိ ဝဒန္တိ။ ယာဝ အဋ္ဌမစိတ္တာဝါ ပုရေဇာတဿ။ ဧတ္တကော ဟိ ကာလော ရူပဓမ္မာနံ ဝဍ္ဎနကာလောနာမ။ တတောပရံ ဟာယနကာလေ ပစ္ဆာဇာတေန ပယောဇနံ နတ္ထီတိ။ ယာဝ သောဠသမစိတ္တာ ဧဝ ဝါ ပုရေဇာတဿ။ ယဒဂ္ဂေန ဟိ မရဏာသန္နကာလေ ဝတ္ထုရူပံ စုတိစိတ္တဿ ပုရေဇာတပစ္စယတံ ဥပဂစ္ဆတိ။ တဒဂ္ဂေန စုတိစိတ္တံပိ တဿ ဝတ္ထုရူပဿ ပစ္ဆာဇာတပစ္စယော န ဟောတီတိ နဝတ္တဗ္ဗော။ တထာ သေသရူပါနဉ္စ။ ယထာ ဟိ ဥပတ္ထမ္ဘန္တော အာဟာရော ဝဍ္ဎနပက္ခေ ဌိတမေဝ ဥပတ္ထမ္ဘတိ။ ဟာယနပက္ခေ ဌိတံ နုပတ္ထမ္ဘတီတိ နတ္ထိ။ တဒါပိ တဒနုရူပဿ ဥပတ္ထမ္ဘနဿ ဣစ္ဆိတဗ္ဗတ္တာ။ ဧဝမယံပီတိ။

အရူပဓမ္မာနံ အာနုဘာဝေါနာမ မဟာဝိပ္ဖာရော ဟောတိ။ တသ္မာ တေ ကာယေကဒေသေ ဝတ္ထုမှိ ဥပ္ပန္နာပိ သကလံ ဣမံ စတုဇကာယံ ဥပတ္ထမ္ဘေတုံ သက္ကောန္တိယေဝါတိ ဝုတ္တံ ဣမဿကာယဿာတိ။ စက္ခာဒီနိ ပသာဒဝတ္ထူနိ ရူပါဒီဟိ သဟလဒ္ဓဃဋ္ဋနာနိဧဝ ဝိညာဏဿ အာဓာရဘာဝံ ဂစ္ဆန္တိ။ ဃဋ္ဋနဉ္စ ဌိတိပတ္တကာလေဧဝါတိ တေသံ နိစ္စကာလံပိ အတ္တနော ဝိညာဏဿ ပုရေဇာတပစ္စယတာ သိဒ္ဓိ ဟောတိ။ ဝိညာဏဉ္စနာမ ပဉ္စဝေါကာရဘဝေ ဝတ္ထုနိဿယေန ဝိနာ ဥပ္ပဇ္ဇိတုံ နသက္ကောတီတိ၊ ယဒါ ပုရေဇာတံဝါ ဝဍ္ဎနပက္ခေ ဌိတံဝါ ဝတ္ထုံ န လဘတိ၊ တဒါ ပဋိသန္ဓိကာလေဝါ မရဏာသန္နကာလေဝါ ယံ ယံ လဘတိ၊ တံ တံ နိဿာယ ဥပ္ပဇ္ဇတိယေဝ။ ယဒါ ပန ပုရေ ဇာတံ သုဋ္ဌု ဗလဝန္တဉ္စ ဝတ္ထုံ လဘတိ၊ တဒါ တဒေဝ နိဿာယ ပဝတ္တတိ။ တဉ္စ နိယမတော ပဝတ္တိကာလေဧဝ လဗ္ဘတိ၊ နော ပဋိသန္ဓိကာလေ။ နဟိ တဒါ ဝိညာဏပစ္စယေန ဥပ္ပန္နံ ဝတ္ထုပုရေဇာတံ ဘဝိတုံ သက္ကောတီတိ ဝုတ္တံ ဆဝတ္ထူနိ ပဝတ္တိယန္တိ။

ပဉ္စာလမ္ဗဏာနိစ ပဉ္စဝိညာဏဝီထိယာတိ ဣဒံ နိယမသိဒ္ဓိဂဟဏ ဝသေန ဝုတ္တံ။ သဗ္ဗာနိ ပန ပစ္စုပ္ပန္နဘူတာနိ နိပ္ဖန္နရူပါနိ မနောဝိညာဏ ဝီထိယာ ပုရေဇာတပစ္စယာ ဟောန္တိယေဝ။ ဧဝဉ္စ ကတွာ ပဋ္ဌာနေ ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ ပုရေဇာတပစ္စယေန ပစ္စယော။ အာရမ္မဏပုရေဇာတံ စက္ခုံ အနိစ္စတော ဒုက္ခတော အနတ္တတော ဝိပဿတိ။ သောတံ၊ ဃာနံ၊ ဇိဝှံ၊ ကာယံ၊ ရူပေ၊ သဒ္ဒေ၊ ဂန္ဓေ၊ ရသေ၊ ဖောဋ္ဌဗ္ဗေ၊ ဝတ္ထုံ၊ ပစ္စုပ္ပန္နေ ခန္ဓေ အနိစ္စတော ဒုက္ခတော အနတ္တတော ဝိပဿတိ၊ ပစ္စုပ္ပန္နံ စက္ခုံ အဿာဒေတိ အဘိနန္ဒတီတိအာဒိ ဝုတ္တံ။ အဋ္ဌကထာယဉ္စ ဥပ္ပာဒက္ခဏံ အတိက္ကမိတွာ ဌိတိပတ္တံ အဋ္ဌာရသဝိဓံ ရူပမေဝ ပုရေဇာတပစ္စယောတိ ဝုတ္တန္တိ။ ဧတ္ထစ ကိဉ္စာပိ ပဋ္ဌာနေ ပစ္စုပ္ပန္နာရမ္မဏံ ပဋိသန္ဓိစိတ္တံ ပစ္စုပ္ပန္နာရမ္မဏဿ ဘဝင်္ဂဿအနန္တရပစ္စယေန ပစ္စယောတိ ဧဝံ ပဋိသန္ဓိဘဝင်္ဂါနံပိ ပစ္စုပ္ပန္နာရမ္မဏတာယ ဝုတ္တတ္တာ ပစ္စုပ္ပန္နဘူတာနိ ကမ္မနိမိတ္တ ဂတိနိမိတ္တာနိ အာရဗ္ဘ ပဝတ္တိ ကာလေ ပဋိသန္ဓိစိတ္တာနံပိ အာရမ္မဏပုရေဇာတံ လဗ္ဘမာနံ ဝိယ ဒိဿတိ။ ဧဝံသန္တေပိ ပုရေဇာတပစ္စယဿ ပစ္စနိယေ ပဋိသန္ဓိက္ခဏေ ဝိပါကာ ဗျာကတော ဧကော ခန္ဓောတိအာဒိနာ ပါဠိယံဧဝ တံ ပဋိက္ခိတ္တန္တိ။ ဧတ္ထစ အာရုပ္ပေ ဝိယ ပဋိသန္ဓိက္ခဏေပိ ဝတ္ထုပုရေ ဇာတဿ အဘာဝါ အပရိဗျတ္တတ္တာဝါ တဿ အာရမ္မဏဿ အာရမ္မဏမတ္တဘာဝေဧဝ ဌိတတ္တာ ပဋိက္ခိတ္တန္တိ ကာရဏံ ဝဒန္တိ။ အာရမ္မဏမေဝဂရုကတန္တိ ပစ္စဝေက္ခနဝသေန အဿာဒနာဒိဝသေနစ ဂရုကတံ ဣဋ္ဌာရမ္မဏ မာဟ။ တဉ္စ ခေါ တဿတဿ ပုဂ္ဂလဿ ဣစ္ဆာဝသေန ဝေဒိတဗ္ဗံ။ ဂူထကုဏပါဒီနိပိ ဟိ တဒဘိနန္ဒန္တာနံ ကိမိမက္ခိက သုနခ ဂိဇ္ဈ ကာကာဒီနံ ဂရုကတာနိဧဝ အာရမ္မဏာနိ ဟောန္တီတိ။

[၂၃၀] ယံ ပန ဝိဘာဝနိယံ

‘‘ဂရုကတန္တိ ဂရုံ ကတွာ ပစ္စဝေက္ခိတ’’န္တိအာဒိ ဝုတ္တံ။ တံ အနုပပန္နံ။

စက္ခုံ ဂရုံ ကတွာ အဿာဒေတိ အဘိနန္ဒတီတိအာဒိနာ အဿာ ဒနာဒိဝသေနပိ အဿ နိဒ္ဒေသဿ ပဝတ္တတ္တာတိ။ ရာဂါဒယော ပန ဓမ္မာတိ ဧတေန ရာဂေါ ဒေါသော မောဟော မာနော ဒိဋ္ဌိ ပတ္ထနာတိ ဧဝံ ဝုတ္တေဟိ ဓမ္မေဟိ သဟ ဒသ အကုသလကမ္မပထာ ပဉ္စအနန္တရိယ ကမ္မာနိစ ဂဟိတာနိ ဟောန္တိ။ တတ္ထ အနန္တရိယဝဇ္ဇာနိ တာနိ သမတိက္ကမမုခေန ယထာရဟံ အဇ္ဈတ္တံ သဗ္ဗေသံ စတုဘူမက ကုသလာနံ အနန္တရိယကမ္မာနိ ပန ကာမာဝစရကုသလာနမေဝ ဥပ္ပတ္တိယာ ဗလဝနိဿယာ ဟောန္တိ။ တာနိယေဝစ သဗ္ဗာနိ ယထာရဟံ အဇ္ဈတ္တဉ္စ ဗဟိဒ္ဓါစ ရာဂါဒီနံ ပါဏာတိပါတာဒီနဉ္စ သဗ္ဗေသံ အကုသလာနံ ကာယိကသုခဒုက္ခာဒီနဉ္စ အဗျာကတဓမ္မာနံ ဥပ္ပတ္တိယာ ဗလဝ နိဿယာ ဟောန္တိ။ သဒ္ဓါဒယောတိ ဧတေန သဒ္ဓါ သီလံ သုတံ စာဂေါ ပညာတိ ဧဝံ ဝုတ္တေဟိ ဓမ္မေဟိ သဟ သဗ္ဗေ ဒါနသီလာဒယော စတုဘူမကကု သလာနံ ရာဂါဒိ အကုသလာနံ သုခဒုက္ခာဒိစတုဘူမက အဗျာကတာ နဉ္စ ဥပ္ပတ္တိယာ ဗလဝနိဿယာ ဟောန္တီတိ။ သုခံ ဒုက္ခံ ပုဂ္ဂလော ဘောဇနံ ဥတုသေနာသနန္တိ ဧတေန နိဗ္ဗာနဝဇ္ဇာ သဗ္ဗေ စတုဘူမကာ ဗျာကတာ ဂဟိတာ၊ တေပိ ဟိ ယထာရဟံ အဇ္ဈတ္တဉ္စ ဗဟိဒ္ဓါစ ကုသလာကုသလာ ဗျာကတဓမ္မာနံ ဥပ္ပတ္တိယာ ဗလဝနိဿယာ ဟောန္တီတိ။ ကမ္မံဝိပါကာနန္တိ ဧတ္ထ သုဋ္ဌု ဗလဝံ ကမ္မံ အဓိပ္ပေတံ၊ န ဒုဗ္ဗလန္တိ။ ကသ္မာ ပနေတ္ထ ရူပဓမ္မာ ပစ္စယုပ္ပန္နေသု န ဂဟိတာ။ နနု တေသံပိ ဗဟိဒ္ဓါ ရုက္ခတိဏာဒီနံ ဝုဒ္ဓိဝိရုဠှိ ဝေပုလ္လတ္ထာယ အဇ္ဈတ္တဉ္စ အာရောဂျာဒိအတ္ထာယ ပထဝိရသ အာပေါရသ ဝဿောဒက ဗိဇမူလဘေသဇ္ဇာဒယော ဗလဝနိဿယာ ဟောန္တီတိ။ အယံ ပနတ္ထော မူလဋီကာယံ ကထိတောယေဝ။ ဝုတ္တဉှိ တတ္ထ –

နဟိ ရူပါဗျာကတံ ပကတူပနိဿယံ လဘတိ။ အစေတနေန ရူပသန္တာနေန ပကတဿေဝ အဘာဝတော။ ယထာ ဟိ အရူပသန္တာနေန ကတ္တုဘူတေန သဒ္ဓါဒယော နိပ္ဖာဒိတာ ဥတုဘောဇနာဒယောစ ဥပသေဝိတာ။ န ဧဝံ ရူပသန္တာနေန။ ယသ္မိဉ္စ ဥတုဗီဇာဒိကေ ကမ္မာဒိကေစ သတိ ရူပံ ပဝတ္တတိ။ န တံ တေန ရူပေန ပကတံ ဟောတိ။ သစေတနဿေဝ ဟိ ဥပ္ပာဒနုပသေဝနပယောဂဝသေန စေတနံ ပကပ္ပနံ ပကရဏံ။ ရူပဉ္စ အစေတနန္တိ။

ဣဒံ ဝုတ္တံ ဟောတိ၊ ဒုဝိဓံ သန္တာနံ ရူပသန္တာနံ အရူပသန္တာနန္တိ။ တတ္ထ ယေန သန္တာနေန ပုဗ္ဗေ ကိဉ္စိ သုဋ္ဌုဥပ္ပာဒိတံဝါ ဟောတိ ဥပသေဝိတံဝါ၊ တဿေဝ ပုဗ္ဗေ အတ္တနာ ဥပ္ပာဒိတုပသေဝိတာ ဓမ္မာ ကာလန္တရေ အတ္တနော ဥပနိဿယပစ္စယာ ဟောန္တိ။ ပကရဏသင်္ခါတဉ္စ တထာ ဥပ္ပာဒနုပသေဝနံနာမ သစေတနေ အရူပသန္တာနေဧဝ လဗ္ဘတိ၊ န အစေတနေ ရူပသန္တာနေတိ။ တသ္မာ ရူပဓမ္မာ ဥပနိဿယံနာမ နလဗ္ဘန္တီတိ။ ဣမသ္မိံ သတိ ဣဒံ ဟောတိ၊ အသတိ န ဟောတီတိ ဧဝံ ဝုတ္တေန သုတ္တန္တိကပရိယာယေန ပန ဥပနိဿယော နာမ ရူပဓမ္မာနံ မဇ္ဈေပိ ဝတ္တဗ္ဗောယေဝါတိ။

[၂၃၁] ဝိဘာဝနိယံ ပန

‘‘ယထာရဟံ အဇ္ဈတ္တဉ္စ ဗဟိဒ္ဓါစ ရာဂါဒယော။လ။ သေနာသနဉ္စာတိ’’ ဝိယောဇေတွာ ‘‘ရာဂါဒယော ဟိ အဇ္ဈတ္တံ နိပ္ဖာဒိကာ။ ပုဂ္ဂလာဒယော ဗဟိဒ္ဓါ သေဝိတာတိ’’ ဝုတ္တံ။ တံ နသုန္ဒရံ။

န ဟိ အတ္တနော ပရဿစ ဥပ္ပန္နာ ရာဂါဒယော ပရဿ အတ္တနော စ သန္တာနေ ရာဂါဒီနံ ဗလဝနိဿယာ န ဟောန္တိ။ သမာနစ္ဆန္ဒာနံ ဣတ္ထိ ပုရိသာဒီနံ မနောပဒေါသိက ဒေဝါဒီနဉ္စေတ္ထ ရာဂါဒယော နိဒဿနံ။

[၂၃၂] ယာစ တတ္ထ

‘‘ယထာဌိတဝသေန ယောဇနံ’’ ကတွာ ‘‘အတ္တနောဟိ ရာဂါဒယော’’တိအာဒိနာ အတ္ထဝိဘာဝနာ ကတာ။ သာပိ အနုပပန္နာယေဝ။

တာယ ဟိ အတ္တနော ရာဂါဒယော သဒ္ဓါဒယောစ အဇ္ဈတ္တံ ကုသလာဒီနံ အတ္တနော သဒ္ဓါယော ပန ဗဟိဒ္ဓါ ကုသလဿာတိ ဧဝံ အပရိပုဏ္ဏဿ အတ္ထဿ ဝိဘာဝိတတ္တာတိ။

[၂၃၃] ယဉ္စ

‘တတ္ထာ’တိအာဒိနာ အတ္တနောရာဂါဒယောနိဿာယအဇ္ဈတ္တံ ကုသလာကုသလာနမေဝ ဥပ္ပတ္တိဝိဓာနံ ဝုတ္တံ။ တံပိ အနုပပန္နမေဝ။

နယဒဿနမတ္တဘူတံပိ ဟိ သံဝဏ္ဏနာဝါကျံနာမ နယမုခံ ပရိပုဏ္ဏံ ကတွာ ဝတ္တဗ္ဗံ ဟောတီတိ။ ဂရုကတံအာရမ္မဏန္တိ ဧတ္ထ သဗ္ဗံ လောကိယကုသလံ ဟေဋ္ဌိမမဂ္ဂဖလနိဗ္ဗာနာနိ စ ကာမာဝစရ ကုသလဿ အရဟတ္တမဂ္ဂဖလနိဗ္ဗာနာနိ စတုန္နံ ဉာဏသမ္ပယုတ္တ မဟာကြိယဇဝနာနံ။ နိဗ္ဗာနံ အဋ္ဌဝိဓလောကုတ္တရဿ ထပေတွာ ပဋိဃဒွယ မောမူဟ ဒွယ ဒုက္ခသဟဂတ ကာယဝိညာဏာနိ အဝသေသံ သဗ္ဗံ လောကိယ ကုသလာကုသလာဗျာကတဓမ္မဇာတံ လောဘသဟဂတစိတ္တဿာတိ ဧဝံ ပစ္စယ ပစ္စယုပ္ပန္န ဝိဘာဂေါ ဝေဒိတဗ္ဗော။

[၂၃၄] ယံ ပန ဝိဘာဝနိယံ

‘‘ဂရုက တံအာလမ္ဗဏန္တိ ပစ္စဝေက္ခနအဿာဒါဒိနာ ဂရုကတံ အာရမ္မဏ’’န္တိ ဝတွာ တံ ဝိဘာဝေန္တေန ‘‘တဉှိ ဈာနမဂ္ဂ ဖလဝိပဿနာ နိဗ္ဗာနာဒိဘေဒံ ပစ္စဝေက္ခန အဿာဒါဒိမဂ္ဂဖလာဒိဓမ္မေ အတ္တာဓီနေ ကရောတီတိ အာရမ္မဏာဓိပတိနာမာ’’တိ ဝုတ္တံ။ တံ န သုန္ဒရံ။

ဒါန သီလ ဥပေါသထကမ္မ ပုဗ္ဗေ သုစိဏ္ဏဂေါတြဘု ဝေါဒါန မဂ္ဂဖလ နိဗ္ဗာနာနိစေဝ ရာဂဒိဋ္ဌိစက္ခုသောတာဒီနိစာတိ ပန ဝတ္တဗ္ဗံ။ ဝိပဿနာတိစ ဣဒံ ဂေါတြဘုဝေါဒါနာနိယေဝ သန္ဓာယ ဝုတ္တံ သိယာ။ နစ တာနိ နိဗ္ဗာနာရမ္မဏာနိ ဝိပဿနာနာမ ဟောန္တီတိ။ သဟဇာတာနံနာမရူပါနန္တိ ဒွိဟေတုက တိဟေတုက ဇဝနသဟ ဇာတာနန္တိ အဓိပ္ပာယော။ အညမညံ သဟဇာတ ရူပါနဉ္စာတိ အညမညဿစ ပဋိသန္ဓိက္ခဏေ ကမ္မသမုဋ္ဌာနရူပါနံ ပဝတ္တိယံ စိတ္တ သမုဋ္ဌာနရူပါနဉ္စ။ ဧသ နယော ပရတ္ထပိ။ ပဉ္စဝေါကာရဘဝေ ပဋိသန္ဓိက္ခဏေ ဝိညာဏံ ဝတ္ထုနာ ဝိနာ ပတိဋ္ဌံ နလဘတိ။ ဝတ္ထုစတေန ဝိနာ ပတိဋ္ဌံ နလဘတီတိ ဝုတ္တံ ပဋိသန္ဓိက္ခဏေ ဝတ္ထုဝိပါကာ အညမညန္တိ။ အညမညပစ္စယေ ယော အတ္တနော ဥပတ္ထမ္ဘကံ ပစ္စုပတ္ထမ္ဘတိ။ သောဧဝ ပစ္စယုပ္ပန္နဘာဝံ ဂစ္ဆတိ။ စိတ္တသမုဋ္ဌာန ရူပါနိစ စိတ္တံ ကိဉ္စိ ဥပတ္ထမ္ဘေတုံ နသက္ကောန္တိ။ တထာ ဥပါဒါရူပါနိစ မဟာဘူတေတိ ဝုတ္တံ စိတ္တစေတသိကာဓမ္မာအညမညန္တိအာဒိ။

[၂၃၅] ဝိဘာဝနိယံ ပန

‘‘ယသ္မာ ပန အညမညုဝတ္ထမ္ဘနဝသေနေဝ အညမညပစ္စယတာ။ န သဟဇာတမတ္တတောတိ ပဝတ္တိယံ ရူပံ နာမာနံ အညမညပစ္စယော န ဟောတိ။ တသ္မာ ဝုတ္တံ စိတ္တစေတသိကာ ဓမ္မာ အညမညန္တိ’’ ဝုတ္တံ။ တတ္ထ န သဟဇာတမတ္တတောတိ ဧတေန ယဒိ သဟဇာတမတ္တတော အညမညပစ္စယတာသိယာ။ ဧဝံသတိ ပဝတ္တိယံ ရူပံ နာမာနံ အညမညပစ္စယော သိယာတိ အနုညာတံ ဟောတိ။ သဟဇာတပစ္စယေပိ ပန ပဝတ္တိယံ ရူပံ နာမာနံ ပစ္စယော နဟောတိယေဝ။ တသ္မာ န သုန္ဒရမေတန္တိ။

ဆဝတ္ထူနိ သတ္တန္နံ ဝိညာဏဓာတူနန္တိ ဧတ္ထ ဝတ္ထုသဟဇာတ နိဿယော ဝတ္ထုပုရေဇာတနိဿယော ဝတ္ထာရမ္မဏပုရေဇာတနိဿယောတိ တိဝိဓော ဝတ္ထုနိဿယော။ တတ္ထ ပဋိသန္ဓိက္ခဏေ ဝတ္ထု ဝိပါကာနံ ခန္ဓာနံ ဝတ္ထုသဟဇာတနိဿယော။ ယံ ပန ပဝတ္တိယံ ပုရေဇာတံ၊ ဝတ္ထုံ နိဿာယ စိတ္တံ ဥပ္ပဇ္ဇတိ၊ တံ တဿ စိတ္တဿ ဝတ္ထုပုရေဇာတနိဿယောနာမ။ ယံ ပန ပုရေဇာတံ ဝတ္ထု ယဿ စိတ္တဿ နိဿယောစေဝ ဟောတိ အာရမ္မဏဉ္စ၊ တံ တဿ ဝတ္ထာရမ္မဏ ပုရေဇာတနိဿယောနာမ။ ဝုတ္တဉှေတံ ပဋ္ဌာနေ အာရမ္မဏ နိဿယ ပုရေဇာတဝိပ္ပယုတ္တ အတ္ထိအဝိဂတန္တိ တီဏီတိ။ ကထဉ္စ တံ စိတ္တဿ နိဿယောစ အာရမ္မဏဉ္စ ဟောတီတိ။ ပစ္စုပ္ပန္နံ ဝတ္ထုံ အာရဗ္ဘ သမ္မသနဝသေနဝါ အဿာဒနာဒိဝသေနဝါ ဣဒ္ဓိဝိဓကိစ္စာဓိဋ္ဌာနဝသေနဝါ စိတ္တံ ဥပ္ပဇ္ဇတိ၊ ဧဝံ တံ စိတ္တဿ နိဿယောစ အာရမ္မဏဉ္စ ဟောတီတိ။ ဝုတ္တဉှေတံ ပဋ္ဌာနေ-အဇ္ဈတ္တံ ဝတ္ထုံ အနိစ္စတော ဒုက္ခတော ဝိပဿတိ၊ အဿာဒေတိ။ အဘိနန္ဒတိ။ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ ဥပ္ပဇ္ဇတိ၊ ဥဒ္ဓစ္စံ ဥပ္ပဇ္ဇတိ။ ဒေါမနဿံ ဥပ္ပဇ္ဇတီတိ။

ဧတ္ထ ပန အာစရိယာ ဣမံ ဝတ္ထာရမ္မဏပုရေဇာတနိဿယံနာမ မရဏာသန္နကာလေဧဝ ဝါစနာမဂ္ဂံ အာရောပယိံသု။ အယံပနေတ္ထ တေသံ အဓိပ္ပာယော။ အဋ္ဌကထာယံ တာဝ အနိဋ္ဌေ ဌာနေ အာဝဇ္ဇနေန ဝိနာ ဝီထိစိတ္တာနံ ပဝတ္တိ ပဋိသိဒ္ဓါ ဟောတိ။ တထာ ဧကာဝဇ္ဇနဝီထိ ယဉ္စ စိတ္တာနံ အာရမ္မဏံနာမ ဓမ္မတောစ ကာလတောစ အဘိန္နမေဝ ဣစ္ဆန္တိ အဋ္ဌကထာစရိယာ။ ပကတိကာလေစ စိတ္တာနိနာမ ပစ္စေက ဝတ္ထုနိဿယာနိ ဟောန္တိ။ တသ္မာ ယဒါ ပစ္စုပ္ပန္နံ အဇ္ဈတ္တံ ဝတ္ထုံ အာရဗ္ဘအနိစ္စာဒိဝသေန သမ္မသန္တိ၊ ဧတံ မမာတိဝါ အဿာဒေန္တိ၊ တဒါယံ ဝတ္ထု အာဝဇ္ဇိတံ ဟောတိ။ ဇဝနာနိပိ တဒေဝ ဂဏှန္တိ။ န အတ္တနော အတ္တနော နိဿယဝတ္ထူနိ။ ယဒိ ဟိ တာနိဝါ အညံဝါ အာရမ္မဏံ ဂဏှေယျုံ။ နိရာဝဇ္ဇနာနိနာမ ဇဝနာနိ ဟောန္တိ။ ကသ္မာ၊ အာဝဇ္ဇနေန အာဝဇ္ဇိတံ အဂဟေတွာ အညံ ဂဟေတွာ ပဝတ္တနတောတိ။ ဘိန္နာ ရမ္မဏာနိစနာမ ဟောန္တိ။ ပစ္ဆာ ဥပ္ပန္နာနိ ပစ္စေကဝတ္ထူနိဝါ အညံဝါ ဂဟေတွာ ပဝတ္တနတောတိ။ နစ တထာ သက္ကာ ဘဝိတုံ အဋ္ဌကထာ ဝိရောဓတော။ တသ္မာ သော ဝတ္ထာရမ္မဏ ပုရေဇာတပစ္စယော ပကတိ ကာလေ န သက္ကာ လဒ္ဓုန္တိ။ မရဏာသန္နကာလေ ပန သဗ္ဗာနိ အာဝဇ္ဇနာဒီနိ စိတ္တာနိ ဧကမေဝ ဝတ္ထုံ နိဿာယ ပဝတ္တန္တီတိ တံ အာရဗ္ဘ ပဝတ္တာနံ အာဝဇ္ဇနာဒီနံ တေသံ တဒေဝ ဝတ္ထုစ အာရမ္မဏဉ္စ ဟောတိ။ ဧဝဉှိ သတိ တေသံ နိရာဝဇ္ဇနတာဝါ ဘိန္နာရမ္မဏတာဝါ နတ္ထီတိ အယံ တေသံ အဓိပ္ပာယောတိ။

တတ္ထ ပန ယဒိ အာဝဇ္ဇနေန အာဝဇ္ဇိတံ ဝတ္ထုံ အဂဟေတွာ အတ္တနော အတ္တနော နိဿယဝတ္ထူနိ ဂဏှေယျုံ။ နိရာဝဇ္ဇနာနိနာမ ဇဝနာနိ ဘဝေယျုန္တိ ဣဒံ တာဝ န ယုဇ္ဇတိ။ အာဝဇ္ဇနေန အာဝဇ္ဇိ တပ္ပကာရဿေဝ ဂဟဏတော။ ယထာ ဟိ အာဝဇ္ဇနံပိ ဝတ္ထုန္တွေဝ အာဝဇ္ဇတိ။ တထာ ဇဝနာနိစ ဝတ္ထုန္တွေဝ ဇဝန္တိ။ နော အညထာတိ နတ္ထိ ဇဝနာနံ နိရာဝဇ္ဇနတာတိ။ ယထာ စ နိရာဝဇ္ဇနတာ နတ္ထိ၊ တထာ ဘိန္နာရမ္မဏတာပိ တေသံ နတ္ထိယေဝ။ ကသ္မာ၊ ဝိဘာဂဿ အသမ္ဘဝတော။ နဟိ သန္တတိဃနဝသေန ဧကီဘူတမိဝ ပုဗ္ဗာပရံ ပဝတ္တ မာနေသု ဗဟူသု ဝတ္ထုသု ဧကမေကံ ဝတ္ထုံ ဣဒမေဝါတိ ဝိသုံ ကတွာ အာဝဇ္ဇနံဝါဇဝနာနိဝါ ဂဟေတုံ သက္ကောန္တိ။ နစ တထာ အသက္ကုဏေယျေသု ဌာနေသု ဧကန္တေန ဓမ္မတောဝါ ကာလတောဝါ ဘိန္နာ ရမ္မဏတာနာမ သက္ကာ လဒ္ဓုန္တိ ဣတိ ဘိန္နာရမ္မဏတာပိ တေသံ နတ္ထိ ယေဝါတိ။ ဧတ္တာဝတာ ဣမဿ ဝတ္ထာရမ္မဏပုရေဇာတနိဿယ ဝိဓာနဿ ပကတိကာလေပိ လဗ္ဘမာနတာ သာဓိတာ ဟောတီတိ။

အပိစ၊ သဗ္ဗံ ပစ္စုပ္ပန္နံ အတ္တနော ရူပကာယံ အာရဗ္ဘ ရူပံ မေ အနိစ္စန္တိဝါ ဧတံ မမာတိဝါ သမနုပဿန္တာနံ အဇ္ဈတ္တရူပေသု ဣဒံ နာမရူပံ တဿစိတ္တဿ အာရမ္မဏံ နဟောတီတိ နဝတ္တဗ္ဗံ။ အာရမ္မဏ ဘူတေသု ပန တေသု ကိဉ္စိ အာရမ္မဏမတ္တံ ကိဉ္စိ အာရမ္မဏပုရေဇာတံ ကိဉ္စိ ဝတ္ထာရမ္မဏပုရေဇာတံ ဟောတီတိ သက္ကာ ဝတ္တုန္တိ။ ကဗဠီ ကာရော အာဟာရောတိ ကာမာဝစရသတ္တာနံ ပဋိသန္ဓိတော ပဋ္ဌာယ ဥပ္ပန္နော စတုသမုဋ္ဌာနိက ရူပါဟာရောစေဝ ဗဟိဒ္ဓါဟာရောစ။ ဂဗ္ဘသေယျကာနဉှိ ယာဝ မာတုယာ အာဟာရဖရဏံ နလဗ္ဘတိ၊ တာဝ ကလလာဒိကာလေသု တိသမုဋ္ဌာနိကော အဇ္ဈတ္တာဟာရောယေဝ ဥပတ္ထမ္ဘနကိစ္စံ သာဓေတိ။ ဝုတ္တဉှေတံ ပဋ္ဌာနေ-ပဋိသန္ဓိက္ခဏေ ကဗဠီကာရော အာဟာရော ဣမဿ ကာယဿ အာဟာရပစ္စယေန ပစ္စယောတိ၊ ဩဇဋ္ဌမကရူပသမုဋ္ဌာပနံ ပနဿ ဗဟိဒ္ဓါဟာရုပတ္ထမ္ဘနံ လဒ္ဓကာလေယေဝါတိ ဒဋ္ဌဗ္ဗံ။ ယဒိဧဝံ –

ယဉ္စဿ ဘုဉ္ဇတိ မာတာ၊ အန္နံ ပါနဉ္စ ဘောဇနံ။ တေန သော တတ္ထ ယာပေတိ၊ မာတုကုစ္ဆိဂတော တိရောတိ

ကသ္မာ ဝုတ္တန္တိ။ ပါကဋာဟာရေန တဿ ယက္ခဿ ဗောဓနတ္ထန္တိ။ ဣမဿကာယဿာတိ ဂဗ္ဘသေယျကာနံ တာဝ ပဋိသန္ဓိစိတ္တဿ ဥပ္ပာဒက္ခဏေ ဧကသမုဋ္ဌာနိကဿ ဌိတိဘင်္ဂက္ခဏေသု ဒွိသမုဋ္ဌာနိ ကဿ တတောပရံ တိသမုဋ္ဌာနိကဿ ဩဇာဖရဏကာလေ စတုသမုဋ္ဌာနိကဿစ ကာယဿ။ ဣတရေသံပိ ယထာသမ္ဘဝံ ဝတ္တဗ္ဗံ။ ရူပလောကေ ပန ဝိနာပိ ဒုဝိဓေန ဩဇာဟာရကိစ္စေန အပ္ပနာပတ္တ ကမ္မဝိသေသေန သိဒ္ဓဿ သုစိရံပိ အဒ္ဓါနံ ဖရိတုံ သမတ္ထဿ ရူပ ဇီဝိတိန္ဒြိယဿ တထာရူပါနဉ္စ ဘဝင်္ဂပရိယာပန္နာနံ အရူပါဟာရာနံ ဝသေန အနေကကပ္ပာနိပိ အတ္တဘာဝဿ ပဝတ္တိ ဝေဒိတဗ္ဗာ။ ဧတေနုပါယေန ကမ္မဇကာယဗဟုတရေသု ဒေဝေသု ပေတနိရယေသုစ သုစိရံပိ ကာလံ ဗဟိဒ္ဓါဟာရေန ဝိနာ အတ္တဘာဝဿ ပဝတ္တိ ဝတ္တဗ္ဗာ။ တေသု ပန အဇ္ဈတ္တာဟာရောပိ လဗ္ဘတိယေဝါတိ ကိဉ္စာပိ ဩက္ကန္တိက္ခဏေ ဝိပါကက္ခန္ဓာပိ ဝတ္ထုဿ ဝိပ္ပယုတ္တပစ္စယာ ဟောန္တိ။ တေ ပန စိတ္တစေတသိကာဓမ္မာ သဟဇာတရူပါနန္တိ ဧတ္ထ သင်္ဂယှိဿန္တီတိ ကတွာ ဩက္ကန္တိက္ခဏေဝတ္ထုဝိပါကာနန္တိ ဝုတ္တံ။

သဗ္ဗထာတိ သဗ္ဗပကာရံ သဟဇာတန္တိအာဒိနာ ယောဇေတဗ္ဗံ။ ပကာရောစ တိဝိဓော ဟောတိ သဟဇာတပစ္စယောတိအာဒိဝသေန ဝေဒိတဗ္ဗော။ ရူပဇီဝိတမိစ္စယန္တိ ဧဝံ ပေါရာဏေဟိ ဝုတ္တော အယံ အတ္ထိပစ္စယော အဝိဂတပစ္စယောစာတိ ယောဇေတဗ္ဗံ။ နနု ကဗဠီကာရာဟာရော ရူပဇီဝိတိန္ဒြိယဉ္စ သဟဇာတေ သင်္ဂဟေတဗ္ဗံ။ ဧဝဉှိ သတိ တိဝိဓောဝ အတ္ထိပစ္စယော သိယာတိ။န။ သဟဇနနသင်္ခါတဿ သဟုပ္ပာဒနလက္ခဏဿ အဘာဝါ။ သဟုပ္ပာဒနလက္ခဏော ဟိ သဟဇာတပစ္စယော။ ကဗဠီကာရာဟာရောစ ဩဇဋ္ဌမကရူပါနိ ဥပ္ပာဒေန္တောပိ အတ္တနော ဌိတိက္ခဏေဧဝ ဥပ္ပာဒေတိ၊ နော ဥပ္ပာဒက္ခဏေ။ ယထာစ မဟာဘူတာ သဟဇာတရူပါနိ ဥပတ္ထမ္ဘန္တာ အတ္တနာ သဟ ဥပ္ပာဒနပုဗ္ဗကာဧဝ ဥပတ္ထမ္ဘန္တိ၊ န တထာ သော အာဟာရော။ သော ပန ဝိနာဝ သဟုပ္ပာဒနကိစ္စေန သဟဇာတာနိပိ အသဟဇာတာနိပိ ဥပတ္ထမ္ဘတီတိ ရူပဇီဝိတံပိ သဟ ဥပ္ပာဒနကိစ္စေန ဝိနာဝ သဟ ဇာတရူပါနိ အနုပါလေတိ။ ဣတိ ဣမေ ဒွေပိ ဓမ္မာ သဟဇာတ လက္ခဏာဘာဝါဧဝ သဟဇာတပစ္စယေ အသင်္ဂဟိတာ။ ဣဒါနိ သဗ္ဗေပိ စတုဝီသတိပစ္စယာ သင်္ဂယှမာနာ စတ္တာရောပစ္စယာ ဟောန္တီတိ ဒဿေတုံ အာရမ္မဏူပနိဿယ။လ။ သမောဓာနံ ဂစ္ဆန္တီတိ ဝုတ္တံ။ တတြာယံ သမောဓာနဝိဓိ၊ စတုဝီသတိယာ ပစ္စယေသု အဓိပတိ ပစ္စယော တာဝ ဒုဝိဓော အာရမ္မဏသဟဇာတဝသေန။ တတ္ထ အာရမ္မဏာဓိပတိ တီသု ကမ္မဝဇ္ဇေသု သမောဓာနံ ဂစ္ဆတိ။ အာရမ္မဏ မတ္တံပိ ဟိ ကမ္မေန သဟ သမောဓာနံ နဂစ္ဆတိ။ ကုတော အဓိပတိ ဘူတန္တိ။

ဧတ္ထ သိယာ၊ ကသ္မာ အာရမ္မဏမတ္တံပိ။လ။ န ဂစ္ဆတီတိ ဝုတ္တံ။ နနု ကမ္မာရမ္မဏာပိ ပဋိသန္ဓိဘဝင်္ဂစုတိယော ဟောန္တီတိ။ သစ္စံ။ ဧတ္ထ ပန မူလဋီကာယံ ကမ္မံ ပန တသ္မိံ ကတေ ပဝတ္တမာနာနံ ကတူပစိတ ဘာဝေန ကမ္မပစ္စယော ဟောတိ။ န အာရမ္မဏာကာရေန။ ဝိသယ မတ္တတာဝသေနစ အာရမ္မဏပစ္စယော ဟောတိ။ န သန္တာနဝိသေသနံ ကတွာ ဖလုပ္ပာဒနသင်္ခါတေန ကမ္မပစ္စယာကာရေန။ တသ္မာ တေ ပစ္စယာကာရဝိသဘာဂတ္တာ သဟ ဃဋနံ နဂစ္ဆန္တီတိ ဝိသဇ္ဇိတန္တိ။ သဟဇာတာဓိပတိ ပန အတ္ထိပစ္စယေ။ နိဿယပစ္စယော တိဝိဓော သဟဇာတော ဝတ္ထုပုရေဇာတော ဝတ္ထာရမ္မဏပုရေဇာတောတိ။ တတ္ထ ပုရိမာ ဒွေ အတ္ထိပစ္စယေ၊ ပစ္ဆိမော ပန ဒွီသု အာရမ္မဏတ္ထိ ပစ္စယေသု။ သော စေ ဂရုကတော ဟောတိ ဥပနိဿယေပီတိ။ ပုရေဇာတပစ္စယော တိဝိဓော အာရမ္မဏပုရေဇာတော ဝတ္ထုပုရေ ဇာတော ဝတ္ထာရမ္မဏပုရေဇာတောတိ။ တတ္ထ ဝတ္ထုပုရေဇာတော အတ္ထိပစ္စယေ။ ဣတရေ ဒွေ ဒွီသု အာရမ္မဏတ္ထိပစ္စယေသု။ တေစေ ဂရုကတာ ဟောန္တိ။ ဥပနိဿယေပီတိ။ ကမ္မပစ္စယော ဒုဝိဓော သဟဇာတော နာနာက္ခဏိကောတိ။ တတ္ထ သဟဇာတော အတ္ထိပစ္စယေ။ နာနာက္ခဏိကော ပန ဒုဝိဓော ဗလဝါ ဒုဗ္ဗလောစ။ တတ္ထစ ဗလဝါ ဒုဝိဓော အကာလိကော ကာလိကောစ၊ တဒုဘယာပိ ဥပနိဿယေ။ ဒုဗ္ဗလော ပန ဝိသုံ ကမ္မပစ္စယောယေဝ။ သဗ္ဗော အာဟာရပစ္စယော သဗ္ဗောစ ဣန္ဒြိယပစ္စယော အတ္ထိပစ္စယေ။

ဝိပ္ပယုတ္တပစ္စယော စတုဗ္ဗိဓော သဟဇာတော ဝတ္ထုပုရေဇာတော ဝတ္ထာရမ္မဏပုရေဇာတော ပစ္ဆာဇာတောတိ။ တတ္ထ ပုရိမာ ဒွေ ပစ္ဆိမောစ အတ္ထိပစ္စယေ။ တတီယော ပန ဒွီသု အာရမ္မဏတ္ထိ ပစ္စယေသု။ သော စေ ဂရုကတော ဟောတိ၊ ဥပနိဿယေပီတိ။ သေသေသု ပန သတ္တရသပစ္စယေသု ဟေတု၊ သဟဇာတ၊ အညမည၊ ဝိပါက၊ ဈာန၊ မဂ္ဂ၊ သမ္ပယုတ္တ၊ အဝိဂတဝသေန အဋ္ဌပစ္စယာ ပစ္ဆာ ဇာတောစ အတ္ထိပစ္စယေ။ အနန္တရ သမနန္တရ အာသေဝန နတ္ထိ ဝိဂတ ဝသေန ပဉ္စပစ္စယာ ဥပနိဿယေတိ။ ဣတိ သဗ္ဗေပိ စတုဝီသတိပစ္စယာ သဘာဂသင်္ဂဟဝသေန သံခိပ္ပမာနာ အာရမ္မဏာဒီသု စတူသု ပစ္စယေသု သမောဓာနံ ဂစ္ဆန္တီတိ။

[၂၃၆] ဝိဘာဝနိယံ ပန

တေသု စတူသု ဧကေကသ္မိံပိ သဗ္ဗေ စတုဝီသတိပစ္စယာ သမောဓာနံ ဂစ္ဆန္တီတိ ဣမိနာ အဓိပ္ပာယေန ယံ ဝုတ္တံ ‘‘နဟိ သော ကောစိပစ္စယောတိ’’အာဒိ။ တံ သဗ္ဗံပိ အာစရိယဿ မတိမတ္တမေဝ။

[၂၃၇] ယဉှိ တတ္ထ

‘‘နဟိ သော ကောစိပစ္စယော အတ္ထိ။ ယော စိတ္တစေတသိ ကာနံ အာရမ္မဏဘာဝံ နဂစ္ဆေယျာတိ’’ ဝုတ္တံ၊ တံ တာဝ န ယုဇ္ဇတိ။ နဟိ ဣဓ ဓမ္မသရူပမတ္တေန သမောဓာနံ အဓိပ္ပေတံ။ ပစ္စယဋ္ဌေန သဟေဝ အဓိပ္ပေတံ။ နစ ဟေတာဒိပစ္စယဋ္ဌော အာရမ္မဏာဒိပစ္စယဋ္ဌော ဟောတီတိ။ ဧသနယော ‘‘သက သကပစ္စယုပ္ပန္နဿစ ဥပနိဿယဘာဝံ နဂစ္ဆတီတိ’’ ဧတ္ထာပိ။

ဧတ္ထ ပန ယော သကသကပစ္စယုပ္ပန္နဿ ဥပနိဿယဘာဝံ နဂစ္ဆတိ။ နဟိ သော ကောစိ ပစ္စယော အတ္ထီတိ ယောဇနာ။

[၂၃၈] ယဉ္စ တတ္ထ

‘‘ကမ္မဟေတုကတ္တာစ လောကပ္ပဝတ္တိယာ ဖလဟေတူပစာရ ဝသေန သဗ္ဗေပိ ကမ္မသဘာဝံ နာတိဝတ္တန္တီတိ’’ ဝုတ္တံ။

[၂၃၉] ယဉ္စ

‘‘တေစ ပရမတ္ထတော လောကသမ္မုတိဝသေနစ ဝိဇ္ဇမာနာ ယေဝါတိ’’ ဝုတ္တံ။ တဒုဘယံ ပန သဗ္ဗသော သာသနယုတ္တိ ယာပိ ဝိရုဒ္ဓမေဝါတိ။

ဧတ္ထာတိ ဧတသ္မိံ ပဋ္ဌာနနယေ။ သဗ္ဗတ္ထာပီတိ သဗ္ဗေသု သဟ ဇာတသဘာဂေသု ပစ္စယေသု။ ယသ္မာ ပန ပဋိသန္ဓိဝိညာဏံနာမ နာမရူပါနံ အညမညပဋိဗဒ္ဓဩကာသေ စုတိပရိစ္ဆိန္နဿ သကလဿ တဿ တဿ ဘဝဿ သီသဘူတံ ဗီဇဘူတဉ္စ ဟောတိ။ ယတော သကလကာယဘူတဿ နာနာရူပါရူပသန္တာနဿ နိဗ္ဗတ္တိ ဟောတိ။ ဗီဇတော ဝိယ မဟာရုက္ခဿ။ ယထာဟ –

ဝိညာဏဉ္စ ဟိ အာနန္ဒ မာတုကုစ္ဆိသ္မိံ န ဩက္ကမိဿထ။ အပိနုခေါ နာမရူပံ မာတုကုစ္ဆိသ္မိံ သမုစ္စိဿထာတိ။ နော ဟေတံ ဘန္တေ။ ဝိညာဏဉ္စ ဟိ အာနန္ဒ မာတုကုစ္ဆိသ္မိံ ဩက္ကမိတွာ ဝေါက္ကမိဿထ။ အပိနုခေါ နာမရူပံ ဣတ္ထတ္တာယ အဘိနိဗ္ဗတ္တိဿထာတိ။ နောဟေတံ ဘန္တေ။ ဝိညာဏဉ္စ ဟိ အာနန္ဒ ဒဟရဿေဝ သတော ဝေါစ္ဆိဇ္ဇိဿထ ကုမာရဿဝါ ကုမာရိကာယဝါ။ အပိနုခေါ နာမရူပံ ဝုဒ္ဓိံ ဝိရုဠှိံ ဝေပုလ္လံ အာပဇ္ဇိဿထာတိ။ နောဟေတံ ဘန္တေ။ တသ္မာ ဟိ အာနန္ဒ ဧသေဝ ဟေတု ဧသ နိဒါနံ ဧသ သမုဒယော ဧသ ပစ္စယော နာမရူပဿ။ ယဒိဒံ ဝိညာဏန္တိ။

တတ္ထ သမုစ္စိဿထာတိ ဝဍ္ဎိဿထ။ နာမရူပဉှိ ဝိညာဏဿ ဝဍ္ဎိယေဝါတိ။ ဝေါက္ကမိဿထာတိ ဘိဇ္ဇိဿထ။ ဣတ္ထတ္ထာယာတိ ဤဒိသဿ အတ္တဘာဝဿ အတ္ထာယာတိ အတ္ထော။ ဝုဒ္ဓိံ ဝိရုဠှိံ ဝေပုလ္လန္တိ ပထမဝယဝသေန ဝုဒ္ဓိံ။ မဇ္ဈိမဝယဝသေန ဝိရုဠှိံ။ ပစ္ဆိမဝယဝသေန ဝေပုလ္လန္တိ အဋ္ဌကထာယံ ဝုတ္တံ။ တသ္မာ ပဋိသန္ဓိက္ခဏေ ရူပုပ္ပတ္တိယာ ဧကန္တေန ဝိညာဏပစ္စယတာ ဝေဒိတဗ္ဗာ။ ဧဝံ ဥပ္ပန္နဉ္စ ပနေတံ ပဋိသန္ဓိရူပံ ပုန သယံ တသ္မိံ ဘဝေ ယာဝ စုတိယာ ပဝတ္တမာနာနံ သဗ္ဗာသံ စတုသမုဋ္ဌာနိကရူပသန္တတီနံ သိတ ဘူတံ ဗီဇဘူတဉ္စ ဟောတိ။ အတိဗလဝန္တံပိ ဟိ စိတ္တံ ပုရိမုပ္ပန္နာယ ရူပပဝေဏိယာ အသတိ ရူပံ ဇနေတုံ နသက္ကောတိ။ ဧဝံ ဥတု အာဟာရာပီတိ။ တတောယေဝ ဟိ အရူပဘဝေ ကာမာဝစရာဒီနိ ရူပဇနကစိတ္တာနိပိ တတ္ထ ရူပံ နဇနေန္တီတိ။ အသညသတ္တေပိ ဥတု သမုဋ္ဌာနရူပသန္တတိယော ပထမုပ္ပန္နာယ ကမ္မဇရူပသန္တတိယာ ဝိဇ္ဇ မာနတ္တာဧဝ ဥပ္ပဇ္ဇန္တီတိ။ ဝုတ္တဉှိ ဝိဘင်္ဂဋီကာယံ အရူပံ ပန ရူပဿ ဩကာသော န ဟောတီတိ ယသ္မိံ ရူပေ သတိ စိတ္တံ အညံ ရူပံ ဥပ္ပာဒေယျ။ တဒေဝ တတ္ထ နတ္ထီတိ အတ္ထော။ ပုရိမရူပဿာပိ ဟိ ပစ္စယဘာဝေါ အတ္ထိ ပုတ္တဿ ပိတိသဒိသတာဒဿနတောတိ။ ဧတ္ထစ ပုတ္တဿ ပိတိသဒိသတာဒဿနတောတိ ဧတေန ဣမမတ္ထံ ဒဿေတိ။ ယထာ တိဏရုက္ခာနံ ဗီဇဘာဝသင်္ခါတံ နိယာမရူပံနာမ အတ္ထိ။ ယဿ အာနုဘာဝေန တန္နိဗ္ဗတ္တာတိဏရုက္ခာ ဝဍ္ဎန္တာ ယထာဝါ တထာဝါ အဝဍ္ဎိတွာအတ္တနာ သမာနဗီဇေဟိဧဝ တိဏရုက္ခေဟိ သဗ္ဗသော သဒိသာ ကာရံ ဂဟေတွာ ဝဍ္ဎန္တိ။ ဧဝမေဝံ ဂဗ္ဘသေယျကာနံ သတ္တာနံ ယောနိ ဘာဝသင်္ခါတံ နိယာမ ရူပံနာမ အတ္ထိ။ ယဿာနုဘာဝေန တေ သမာန ဇာတိကေဟိဧဝ ကုလေဟိ ဝိသေသတော မာတာပိတူဟိ ဧဝ သဗ္ဗသော သဒိသရူပသဏ္ဌာနာ ဟောန္တိ။ ဣတိ ဗီဇနိယာမော ဝိယ ယောနိနိယာမောပိ ဟောတိ။ သောစ ပဋိသန္ဓိရူပဿေဝ အာနုဘာဝေါတိ ဝေဒိတဗ္ဗော။

အပိစ၊ အယံ ယောနိနိယာမောနာမ ကလလကာလာဒီသု ပုတ္တာနံ သရီရေသု မာတာပိတူဟိ သမုဒါဂတံ ဥတုဇရူပသန္တာနံဧဝ။ ယဿ အာနုဘာဝေန တံသန္တာနံ သမာနဇာတိကသတ္တသဏ္ဌာနသဒိသံ အတ္တနော ဉာတိကုလသဒိသဉ္စ ဟောတိ။ ယထာဟိဣတ္ထိဘာဝါဒိရူပံ သတ္တာနံ ဣတ္ထိလိင်္ဂါဒီနိ ဗီဇရူပဉ္စ တိဏရုက္ခာနံ တံတံဝဏ္ဏသဏ္ဌာနာ ဒီနိ နိယာမေတိ။ ဧဝံ ယောနိရူပံ နာနာဇာတိဝသေန သတ္တာနံ နိယာမကံ ဝဝတ္ထာပကံ ဟောတီတိ။ ဧတ္တာဝတာ ပဝတ္တိယံ ထပေတွာ စိတ္တဇရူပံ သဗ္ဗေသံ တိသမုဋ္ဌာနိကရူပါနံ ဥပ္ပတ္တိယာ စိတ္တနိရပေက္ခတာ ပုရိမုပ္ပန္န ရူပပဝေဏိ ပဋိဗဒ္ဓတာစ သာဓိတာ ဟောတိ။ တေနေဝစ တေသံ စိတ္တဿ ဌိတိဘင်္ဂက္ခဏေသုပိ စိတ္တရဟိတေ နိရောဓသမာပတ္တိ ကာလေပိ ဥပ္ပတ္တိ ဟောတီတိ။ တေန ဝုတ္တံ သဟဇာတရူပန္တိ ပနေတ္ထာတိအာဒိ။ ဣတီတိအာဒိ နိဂမနံ။ တတ္ထ သမ္ဘဝံတိ ယထာ သမ္ဘဝံ။ သမ္ဘဝါတိဝါ သမ္ဘူတာ။ အဇ္ဈတ္တဉ္စာတိ အဇ္ဈတ္တဘူတာစ။ ဗဟိဒ္ဓါစာတိ ဗဟိဒ္ဓါဘူတာစ။ သင်္ခတာတိ သင်္ခတဘူတာ။ အသင်္ခတာတိ အသင်္ခတဘူတာ။ ဧဝံ တေကာလိကာစ ကာလမုတ္တာစ အဇ္ဈတ္တဗဟိဒ္ဓါ သမ္ဘူတာစ။ တထာ သင်္ခတာသင်္ခတဘူတာစ ပညတ္တိ နာမရူပါနံ ဝသေန တိဝိဓာ ဌိတာ ဓမ္မာ ပဋ္ဌာနေ သဗ္ဗထာ စတုဝီသတိ ပစ္စယာနာမ ဟောန္တီတိ ယောဇနာ။ ဧတ္ထစ တိဝိဓာ ဌိတာနံ ဓမ္မာနံ တေကာလိကာဒိဘာဝေ သတိ စတုဝီသတိပစ္စယာနံပိ ယထာသမ္ဘဝံ တေကာလိကာဒိဘေဒေါ သိဒ္ဓါ ဟောတိ။ တတ္ထ အာရမ္မဏအဓိပတိ ဥပနိဿယပစ္စယာ တေကာလိကာ ကာလမုတ္တာစ ဟောန္တိ။

[၂၄၀] ဝိဘာဝနိယံ ပန

‘‘အာရမ္မဏအဓိပတိဥပနိဿယပစ္စယာနံ တိကာလိကာနန္တိ’’ ဝုတ္တံ။ တံ န ယုဇ္ဇတိ။

ပညတ္တိနိဗ္ဗာနာနံပိ ကာလမုတ္တာနံ တေသု ပဝိဋ္ဌတ္တာတိ။ တတ္ထ ဣမသ္မိံ ဘဝေ အဘိနဝါနံ ဓနဓညဘောဂါနံဝါ ဝိဇ္ဇာသိပ္ပသုတပရိ ယတ္တီနံဝါ သီလသမာဓိပညာနံဝါ ဘဝန္တရေ ဘဝသမ္ပတ္တိဘောဂ သမ္ပတ္တိ မဂ္ဂဖလသမ္ပတ္တီနံဝါ ပဋိလာဘတ္ထာယ ပုဗ္ဗယောဂံ ကရောန္တဿ အနာဂတာနံ တာသံ ဥပနိဿယပစ္စယတာ ဝေဒိတဗ္ဗာ။ ပဋ္ဌာနေ ပန အနာဂတံ စက္ခုသမ္ပဒံ ပတ္ထယမာနော သောတ၊ ဃာန၊ ဇိဝှာ၊ ကာယသမ္ပဒံ၊ ဝဏ္ဏသမ္ပဒံ၊ သဒ္ဒ၊ ဂန္ဓ၊ ရသ၊ ဖောဋ္ဌဗ္ဗသမ္ပဒံ ပတ္ထယမာနော အနာဂတေ ခန္ဓေ ပတ္ထယမာနော ဒါနံ ဒေတိ သီလံ သမာဒိယတီတိအာဒိနာ ဘဝန္တရပရိယာပန္နာဧဝ သမ္ပတ္တိယော ဝုတ္တာ။ တာ ပန ဒါနာဒီနံ ကမ္မာနံ အနုရူပဝသေန ဝုတ္တာတိ ဒဋ္ဌဗ္ဗာ။ ကမ္မပစ္စယော ပန ပစ္စုပ္ပန္နာတီတဝသေန ဒွိကာလိကော။ အနန္တရ သမနန္တရ အာသေဝန နတ္ထိ ဝိဂတ ပစ္စယာ အတီတကာလိကာ။ သေသာ ပန္နရသ ပစ္စယာ ပစ္စုပ္ပန္နကာလိကာတိ။ အဇ္ဈတ္တဗဟိဒ္ဓါဒုကေ အာရမ္မဏာ ဓိပတိ သဟဇာတ အညမည နိဿယ ဥပနိဿယ ပုရေဇာတ အာဟာရ အတ္ထိ အဝိဂတာ အဇ္ဈတ္တဗဟိဒ္ဓါ ဟောန္တိ။ သေသာ စုဒ္ဒသ ပစ္စယာ အဇ္ဈတ္တာဝ။ အာရမ္မဏ အဓိပတိ ဥပနိဿယာ သင်္ခတာ အသင်္ခတာစ ဟောန္တိ။ သေသာ သင်္ခတာဝါတိ။ ပဉ္စဝိဓံပိအရူပန္တိ ပဝုစ္စတိ။ ကသ္မာ၊ ကဒါစိပိ ရူပသင်္ခါတံ သဏ္ဌာနတ္ထံ အနုပဂမနတော နာမန္တိစ ပဝုစ္စတိ။ ကသ္မာ၊ အဓိဝစနသင်္ခါတနာမာဘိဓာနဝသေနေဝ သုဏန္တေဟိ ဂဟေတဗ္ဗဘာဝုပဂမနတောတိ။

၁၆၉။ ပညပီယတီတိ ပညတ္တိ။ အယံပိ ဧကော ဝစနတ္ထောတိ လောကိယမဟာဇနေဟိ ထပီယတိ။ ဝေါဟရီယတိ စေဝ သမ္ပဋိစ္ဆီ ယတိစာတိ အတ္ထော။ ယောကောစိ သမ္မုတိသစ္စဘူတော ဗျဉ္ဇနတ္ထော။ တထာ ပညာပေတဗ္ဗာ အတ္ထာ ပညပီယန္တိ ဧတာယာတိ ပညတ္တိ။ ဗျဉ္ဇနတ္ထဇောတကော ပညတ္တိသဒ္ဒေါတိ ဧဝံ ဒုဝိဓာ ပညတ္တီတိ ဝုတ္တံ တတောအဝသေသာ။လ။ ဒုဝိဓာဟောတီတိ။ တတ္ထ ပညာပီယတ္တာ ပညတ္တီတိ အတ္ထ ပညတ္တိမာဟ။ ပညာပနတောပညတ္တီတိ သဒ္ဒပညတ္တိံ။ တံတံဘူတဝိပရိဏာမာကာရန္တိ ပထဝိယာဒီနံ တေသံ တေသံ မဟာဘူတာနံ အဓိမတ္တဘာဝပ္ပကာရသင်္ခါတံ တထာ တထာ ပရိဏာ မာကာရံ။ ပဝတ္တိဝိသေသာကာရန္တိ အတ္ထော။ ဥပါဒါယာတိ ပဋိစ္စ။ နိဿာယ။ ပထမံ စိတ္တေန ဂဟေတွာတိ အတ္ထော။ တထာတထာ ပညတ္တာတိ အယံ ပထဝီနာမ အယံ ပဗ္ဗတောနာမာတိ ဧဝမာဒိ နယေန မဟာဇနေန ပညတ္တာ၊ ကထိတာ၊ ဝေါဟရိတာတိ အတ္ထော။ ပထဝိပဗ္ဗတာဒိကာတိအာဒိသဒ္ဒေန နဒိ သမုဒ္ဒါဒိကာယော သင်္ဂဏှတိ။ အယံ သမူဟပညတ္တိနာမ။

[၂၄၁] ဝိဘာဝနိယံ ပန

‘‘သဏ္ဌာနပညတ္တီတိ’’ ဝုတ္တာ။ သာ ယုတ္တာ ဝိယ နဒိဿတိ။

နဟိ ဣဓ သဏ္ဌာနံ ပဓာနံ ဟောတီတိ။ သမ္ဘာရသန္နိဝေသာကာရန္တိ ကဋ္ဌာဒီနံ သမ္ဘာရာနံ တထာ တထာ သန္နိဝေသာကာရံ။ ဧတ္ထာပိ အာဒိသဒ္ဒေန နာဝါဒယော သင်္ဂဏှတိ။ အယံ သဏ္ဌာန ပညတ္တိ။ ကဋ္ဌာဒယော ဧဝ ဟိ ဂေဟာကာရေန သဏ္ဌိတာ ဂေဟန္တိ ရထာကာရေန သဏ္ဌိတာ ရထောတိ ဝုစ္စန္တီတိ။

[၂၄၂] ဝိဘာဝနိယံ ပန

‘‘သမူဟပညတ္တီတိ’’ ဝုတ္တံ။ တံ န ယုဇ္ဇတိ။

နဟိ ဣဓ သမူဟော ပဓာနန္တိ။ ပုရိသပုဂ္ဂလာဒိကာ သတ္တပညတ္တိ ဥပါဒါပညတ္တီတိပိ ဝုစ္စတိ။ စန္ဒာဝဋ္ဋနာဒိကန္တိ စန္ဒသူရိယာဒီနံ သိနေရုံ ပဒက္ခိဏံ ကတွာ အာဝဋ္ဋနာဒိကံ။ ယတော စန္ဒိမသူရိယာ ဥဒေန္တိ၊ သာ ပုဗ္ဗဒိသာနာမ။ ပုဗ္ဗတရံ လဒ္ဓပ္ပကာသတ္တာ။ ယတ္ထ ပန အတ္ထံ ဂစ္ဆန္တိ၊ သာ ပစ္ဆိမဒိသာနာမ။ ပစ္ဆာလဒ္ဓပကာသတ္တာ။ တာသံ ဒက္ခိဏပဿာ ဒိသာ ဝုဍ္ဎိအတ္ထေန ဒက္ခိဏဒိသာနာမ။ ဣတရာ ပန ဥစ္စတရဋ္ဌေန ဥတ္တရာဒိသာတိ ဝုစ္စတိ။ ယဒါ သူရိယော ဥဒေတိ၊ တဒါ သကလဿ အဟဿ ပုဗ္ဗဘာဂတ္တာ ပုဗ္ဗနှောတိ ဝုစ္စတီတိ။ ဧဝမာဒိကာ ဒိသာ ပညတ္တိ ကာလပညတ္တိယောနာမ။ အာဒိသဒ္ဒေန ထလနိန္နာဒိကာ ဒေသပညတ္တိ သင်္ဂဟိတာတိ။ အသမ္ဖုဋ္ဌာကာရန္တိ မဟာဘူတာနံ အညမညံ အသမ္ဖုသနာကာရံ။ အယံ အာကာသပညတ္တိနာမ။ တံ တံ ဘူတနိမိတ္တန္တိ ပထဝီကသိဏာဒိကံ ဥဒ္ဓုမာတကာဒိကဉ္စ ဘူတနိမိတ္တံ။ နီလကသိဏာဒိကံ ဝဏ္ဏနိမိတ္တဉ္စ ဧတ္ထေဝ သင်္ဂယှတိ။ ဘာဝနာ ဝိသေသန္တိ ပရိကမ္မာဒိကံ ဘာဝနာဝိသေသံစ။ ဧတေန ပရိကမ္မနိမိတ္တ ဥဂ္ဂဟနိမိတ္တ ပဋိဘာဂနိမိတ္တာနံ သိဒ္ဓကာရဏံ ဝဒတိ။ အယံ နိမိတ္တပညတ္တိနာမ။

ဧဝမာဒိဘေဒါတိ ဧတ္ထ အာဒိသဒ္ဒေန အဋ္ဌကထာယံ အာဂတာ ဥပါဒါပညတ္တိ ဥပနိဓာပညတ္တိအာဒယော သင်္ဂဟိတာ။ ပရမတ္ထတော အဝိဇ္ဇမာနာပီတိ ဧတေန သမ္မုတိတော လဒ္ဓဘာဝံ ဒဿေတိ။ တေနေဝ ဟိ တာသံ ဝိဇ္ဇမာနဘာဝံ ဂဟေတွာ တထာ တထာ ဝေါဟရန္တာနံ မုသာဝါဒေါနာမ နဟောတီတိ။ အတ္ထစ္ဆာယာကာရေနာတိ တံ တံ ဘူတာဒီနံ ပရမတ္ထာနံ သမူဟသဏ္ဌာနာဒိဆာယာကာရေန။ အတ္ထစ္ဆာ ယာကာရေနာတိဝါ သဒ္ဒါဘိဓေယျသင်္ခါတေန ဒဗ္ဗပဋိဗိမ္ဗာကာရေန သဝိဂ္ဂဟာကာရေနာတိ အတ္ထော၊ တံတံဥပါဒါယာတိ ပရမတ္ထဓမ္မာနံ တံတံပဝတ္တိဝိသေသံ ဥပါဒါယ။ ဥပနိဓာယာတိ ဩလုမ္ဗိယ။ ပရိကပ္ပိယမာနာတိ ပရိကပ္ပဗုဒ္ဓိယာ ပရိကပ္ပေတွာ ဂယှမာနာ။ ဧတ္ထ ပန ဧဝမာဒိပဘေဒါ အာလမ္ဗဏဘူတာ ပရိကပ္ပိယမာနာ သဗ္ဗာ ပညတ္တိ ပညာပီယတီတိ အတ္ထေန ပညတ္တီတိ ယောဇနာ။ သင်္ခါယတီတိ ဂဏီယတိ။ ဂဏနုပဂံ ကတွာ ထပီယတီတိ အတ္ထော။ သမညာယတီတိ သမ္မန္နီယတိ။ နာမံ၊ နာမကမ္မံ၊ နာမဓေယျံ၊ နိရုတ္တိ၊ ဗျဉ္ဇနံ၊ အဘိလာပေါတိ ဣမေ ဆ နာမ နာမကမ္မာ။ တတ္ထ အတ္ထေ နမတီတိ နာမံ။ အတ္ထဝိသယံ ဧဝ ဟုတွာ ပဝတ္တတီတိ အတ္ထော။ အတ္တနိစ အတ္ထံ နာမေတီတိ နာမံ။ ပိဋကတ္တယသင်္ခါတေ ဟိ နာမေ သတိ တဒုဂ္ဂဏှန္တာနံ သဗ္ဗေ တဒတ္ထာ ပဒေပဒေ ဝါကျေဝါကျေ အာဂစ္ဆန္တိ ယေဝါတိ။

အပိစ သုဏန္တာနံ ဉာဏံ တံတံအတ္ထာဘိမုခံ နာမေတီတိ နာမံ နာမဂဟဏဝသေန ကတ္တဗ္ဗတ္တာ နာမမေဝ ကမ္မန္တိ နာမကမ္မံ။ ဓီယတိ ဓာရီယတီတိ ဓေယျံ။ နာမမေဝ ဓေယျန္တိ နာမဓေယျံ။ အဝိဒိတပက္ခေ ဌိတော အတ္ထော ဧတာယ တတော နီဟရိတွာ ဝုစ္စတိ ကထီယတီတိ နိရုတ္တိ။ အတ္ထဿ ဗျဉ္ဇနတော ပါကဋကရဏတော ဗျဉ္ဇနံ။ အဘိဗျတ္တံ ကတွာ လပီယတိ ကထီယတိ အတ္ထော ဧတေနာတိ အဘိလာပေါ။ ဧတ္ထစ ဝဏ္ဏပညတ္တိ၊ အက္ခရပညတ္တိ၊ သရပညတ္တိ၊ ဒီဃပညတ္တိ၊ ရဿ ပညတ္တိ။ ဗျဉ္ဇနဝဂ္ဂဃောသာဃောသပညတ္တိ၊ လိင်္ဂပညတ္တိ။ ပဒပညတ္တိ၊ ဝါကျပညတ္တိယောပိ ဧတဿေဝ ပဘေဒါတိ ဒဋ္ဌဗ္ဗာ။ ပရမတ္ထတော ဝိဇ္ဇမာနေသု အတ္ထေသု ပဝတ္တာ ပညတ္တိ ဝိဇ္ဇမာနပညတ္တိ နာမ။ အဝိဇ္ဇ မာနေသု ဘူမိပဗ္ဗတာဒီသု ပဝတ္တာ ပညတ္တိ အဝိဇ္ဇမာနပညတ္တိ နာမ။ ဧတာ ဧဝ သမာသဋ္ဌာနံ ပတွာ ဒွိပဒသံယောဂဝသေန ဣတရာ စတဿောပိ ဟောန္တီတိ ဒဿေတုံ တတ္ထာတိအာဒိ ဝုတ္တံ။ ဧတာယ ပညာပေန္တီတိ ဧတေန ဝိဇ္ဇမာနံ အတ္ထံ ပညပေန္တိ ဧတာယာတိ ဝိဇ္ဇမာနပညတ္တီတိ ဣမမတ္ထံ ဝဒတိ။ ဧသနယော ပရတ္ထပိ။ ဆ အဘိညာ အဿာတိ ဆဠဘိညောတိ ကတွာ ဝိသေသနဘူတာနံ ဆန္နံ အဘိညာနံ ဝိဇ္ဇမာနတ္တာ ဝိသေသိတဗ္ဗဘူတဿ ပုဂ္ဂလဿ အဝိဇ္ဇမာနတ္တာ ဆဠ ဘိညောတိ ဝိဇ္ဇမာနေနအဝိဇ္ဇမာနပညတ္တိ နာမ။ ဣတ္ထီ အဝိဇ္ဇမာနာ သဒ္ဒေါ ဝိဇ္ဇမာနောတိ ဣတ္ထိယာသဒ္ဒေါ ဣတ္ထိသဒ္ဒေါတိ အဝိဇ္ဇမာနေန ဝိဇ္ဇမာန ပညတ္တိ နာမ။ စက္ခုစ စက္ခုဝိညာဏဉ္စ ဥဘယံပိ ဝိဇ္ဇာမာနန္တိ စက္ခုသ္မိံ ဝိညာဏံ စက္ခုဝိညာဏန္တိ ဝိဇ္ဇမာနေနဝိဇ္ဇမာနပညတ္တိ နာမ။ ရာဇာစ ပုတ္တောစ ဒွေပိ အဝိဇ္ဇမာနာဧဝါတိ ရညော ပုတ္တော ရာဇပုတ္တောတိ အဝိဇ္ဇမာနေနအဝိဇ္ဇမာနပညတ္တိနာမာတိ ဣမမတ္ထံ ဒဿေန္တော ဥဘိန္နန္တိအာဒိမာဟ။

ဧတ္ထ ပန ဝစနတော စ ဝစနတ္ထတောစ ဝိနိမုတ္တာ သဒ္ဒသဘာဝါ နာမပညတ္တိနာမ ဝိသုံ နတ္ထီတိ ဝဒန္တိ။ တံ န ယုဇ္ဇတိ။ အတ္ထဇောတက ဘာဝေန ဝိသုံ သိဒ္ဓတ္တာ။ သဒ္ဒေါ ဟိ နာမ အက္ခရပဒဗျဉ္ဇနဘာဝံ ဥပဂတောယေဝ အတ္ထဇောတနေ သမတ္ထော ဟောတိ။ ပရမတ္ထ သဒ္ဒေါစ ခဏိကော စုဏ္ဏဝိစုဏ္ဏဘူတော တဗ္ဘာဝံ ဥပဂတော နဟောတီတိ။ တသ္မာ သဒ္ဒသဘာဝါနာမ ပညတ္တိနာမ ဝိသုံ အတ္ထိယေဝ။ အတ္ထိဘာဝေါစဿာ ဝစနသဒ္ဒံ သုတွာ အနန္တရေ အက္ခရ ပဒ ဗျဉ္ဇနဂေါစရစိတ္တဿ တဒနန္တရေစ တဒတ္ထဝိဇာနနစိတ္တဿ ပဝတ္တိယာ ပါကဋောတိ ဒဿေန္တော ဂါထာဒွယံ အာဟ။ တတ္ထ ဝစီဃောသာ နုသာရေနာတိ ဥစ္စာရိယမာနသဒ္ဒသင်္ခါတဿ ဝစီဃောသဿ အာရမ္မဏကရဏသင်္ခါတေန အနုသာရေန ဥပ္ပန္နာယ သောတဝိညာဏ ဝီထိယာ ပဝတ္တိယာ အနန္တရေ ဥပ္ပန္နဿ မနောဒွါရဿ ဂေါစရ ဘူတာ သာယံ ပညတ္တီတိ သမ္ဗန္ဓော။ ကီဒိသီ ပန သာယံ ပညတ္တီတိ အာဟ အတ္ထာယဿာ။လ။ တတောပရန္တိ။ တတ္ထ တတောပရန္တိ တတော နာမပညတ္တာရမ္မဏဿ မနောဒွါရဿ ဥပ္ပတ္တိတော ပရံ အတ္ထာ ဝိညာယန္တီတိ သမ္ဗန္ဓော။ ယဿာ နာမပညတ္တိယာ အနုသာရေန ပရမတ္ထပညတ္တိဘူတာ အတ္ထာ ဝိညာယန္တိ။ သာ အယံ ပညတ္တိ လောကသင်္ကေတနိမ္မိတာတိ ဝိညေယျာတိ ယောဇနာ။

ဧတ္ထစ သောတဝိညာဏဝီထိယာတိ ဧတ္ထ အတီတသဒ္ဒမတ္တာ ရမ္မဏာ တဒနုဝတ္တိကာနာမ မနောဝိညာဏဝီထိပိ သင်္ဂဟိတာတိ ဒဋ္ဌဗ္ဗာ။ ဝုတ္တဉှိ သာရတ္ထဒီပနိယံ-တေန ဝုတ္တဝစနေ ယတ္တကာနိ အက္ခရာနိ ဟောန္တိ။ တေသု ဧကမေကံ ပစ္စုပ္ပန္နံ အတီတဉ္စ ဂဟေတွာ သောတ ဝိညာဏဝီထိယာ မနောဝိညာဏဝီထိယာစ ဥပ္ပဇ္ဇိတွာ နိရုဒ္ဓါယ အဝသာနေ တာနိ အက္ခရာနိ သမ္ပိဏ္ဍေတွာ အက္ခရသမူဟံ ဂဟေတွာ ဧကာ မနောဝိညာဏဝီထိ ဥပ္ပဇ္ဇိတွာ နိရုဇ္ဈတိ။ တဒနန္တရံ အယံ အက္ခရသမူဟော ဧတဿ နာမန္တိ နာမပညတ္တိဂဟဏဝသေန အပရာယ မနောဝိညာဏ ဝီထိယာ ဥပ္ပဇ္ဇိတွာ နိရုဒ္ဓါယ တဒနန္တရံ ဥပ္ပန္နာယ မနောဝိညာဏ ဝီထိယာ အယမေတဿ အတ္ထောတိ ပကတိယာ တဒတ္ထဝိဇာနနံ သမ္ဘဝတီတိ။ မဏိသာရမဉ္ဇူသာယံ ပန တဒနုဝတ္တိကဝီထိတော ပရံ ဧကံ ဝိနိစ္ဆယဝီထိံ ဝိညတ္တိဂဟဏဝီထိဉ္စ ဝဒတိ။ တတော ပရံ ဧကက္ခရေ သဒ္ဒေ ဧကတ္ထဇောတိကာယ နာမပညတ္တိယာ ဂဟဏံ ဟောတိ။ ယာ ဝဒန္တဿ ပုဗ္ဗဘာဂေ မနသာ ဝဝတ္ထာပိတော ပညတ္တိသဒ္ဒေါနာမ ဝုစ္စတိ။ တတောပရံ တဒတ္ထဂဟဏန္တိ။ ဤဒိသေသု ပန ဌာနေသု တတ္ထ တတ္ထ ဇဝနဝီထိဝါရာနံ ပဋိပါဋိကထနံနာမ ပဓာနပါကဋဂဟဏဝသေနေဝါတိ ဒဋ္ဌဗ္ဗံ။ ဧကစ္ဆရက္ခဏေ အနေက ကောဋိသတသဟဿာနိ စိတ္တာနိ ဥပ္ပဇ္ဇန္တီတိ ဟိ ဝုတ္တံ။ တထာ –

ဧကမတ္တော ဘဝေ ရဿော၊ ဒွိမတ္တော ဒီဃမုစ္စတေ၊

တိမတ္တောတုပ္လုတော ဉေယျော၊ ဗျဉ္ဇနံ အဒ္ဓမတ္တိကန္တိစံ။

န စ ပရမတ္ထသဒ္ဒသင်္ဃာဋာနံ သတသဟဿံပိ ဧကက္ခရံနာမ ဘဝိတုံ ပဟောတိ။ တသ္မာ ဣဓ ဗဟုံ ဝိစာရဏာ အမှေဟိ နကတာတိ။

ဣတိ ပရမတ္ထဒီပနိယာနာမ အဘိဓမ္မတ္ထသင်္ဂဟဿ

စတုတ္ထဝဏ္ဏနာယ အဋ္ဌမဿ ပစ္စယသင်္ဂဟဿ

ပရမတ္ထဒီပနာ နိဋ္ဌိတာ။