📜

ကမ္မဋ္ဌာန သင်္ဂဟ ပရမတ္ထဒီပနီ

၁၇၀။ ဧဝံ အဋ္ဌဟိ ပရိစ္ဆေဒေဟိ သပစ္စယပဘေဒံ နာမရူပ ဝိဘာဂံ ဒဿေတွာ ဣဒါနိ ဝိဒိတနာမရူပ ဝိဘာဂဿ ကမ္မဋ္ဌာနဝိဓာနံ ဒဿေန္တော သမထဝိပဿနာနန္တိအာဒိ မာဟ။ ဣတော ပစ္စယ သင်္ဂဟတော ပရံ သမထဝိပဿနာနံ ဘာဝနာနံ ဒုဝိဓံပိ ကမ္မဋ္ဌာနံ ယထာက္ကမံ ပဝက္ခာမီတိ ယောဇနာ။ တတ္ထ ကိလေသေ အညေပိဝါ ဝိတက္ကာဒယော ဩဠာရိကဓမ္မေ သမေတီတိ သမထော။ တထာ ပဝတ္တော ဧကဂ္ဂတာသင်္ခါတော သမာဓိ။ ဝိသေသေန ပဿန္တိ ဧတာယာတိ ဝိပဿနာ။ အနိစ္စာနုပဿနာဒိကာ ဘာဝနာပညာ။ တာယ ဟိ ယောဂိနော ခန္ဓေသု လောကိယမဟာဇနေန ပဿိတံ ဣတ္ထိပုရိသာဒိကံ နိစ္စသုခါဒိကဉ္စ အတိက္ကမိတွာ ဝိသေသေန အနိစ္စာဒိကမေဝ ပဿန္တီတိ။ ဘာဝေတဗ္ဗာတိ ဘာဝနာ။ ဘာဝေန္တိဝါ စိတ္တသန္တာနံ ဧတာဟီတိ ဘာဝနာ။ ကိရိယာ ကမ္မံ။ တိဋ္ဌတိ ဧတ္ထာတိ ဌာနံ။ ကမ္မဿ ဌာနန္တိ ကမ္မဋ္ဌာနံ။ ဝီရိယာရဗ္ဘသင်္ခါတဿ ယောဂကမ္မဿ ပဝတ္တိဋ္ဌာနန္တိ အတ္ထော။ ကသိဏမဏ္ဍလာဒိကံ ကသိဏဘာဝနာဒိကဉ္စ။ အာဒိမဇ္ဈ ပရိယောသာနာနဉှိ သမုဒါယဘူကံ ဧကမေတံ ပထဝီကသိဏ ဘာဝနာဒိကံ ဘာဝနာကမ္မံပိ အတ္တနော အဝယဝဘူတဿ ယောဂ ကမ္မဿ ပဝတ္တိဋ္ဌာနံ သမ္ဘဝတီတိ။

ဝိဘာဝနိယံ ပန

ဥတ္တရုတ္တရ ယောဂကမ္မဿ ပဒဋ္ဌာနတာယ ကမ္မဋ္ဌာနဘူတံ ဘာဝနာဝိဓိဉ္စာတိပိ ဝုတ္တံ။ တမ္ပိ ယုဇ္ဇတိယေဝ။

ယောဂကမ္မမေဝဝါ သုခဝိသေသာနံ အဓိဋ္ဌာနဋ္ဌေနဌာနန္တိ ကမ္မဋ္ဌာနံ။ တတ္ထာတိ တသ္မိံ ဒုဝိဓေပိ ကမ္မဋ္ဌာနေ။ သမထသင်္ဂဟေတိ သမထ ကမ္မဋ္ဌာနသင်္ဂဟေ။ ဒသကသိဏာနီတိ ဒသကသိဏမဏ္ဍလာနိ ကသိဏဇ္ဈာနာနိစ။ တဒုဘယာနိပိ ဟိ ယောဂါနုယောဂသင်္ခါတဿ သမထ ကမ္မဿ ပဝတ္တိဋ္ဌာနတ္တာ သမထကမ္မဋ္ဌာနာနိနာမ ဟောန္တီတိ။ ဒသအသုဘာတိ ဒသအသုဘဝတ္ထူနိ အသုဘဇ္ဈာနာနိစ။ ဒသအနုဿတိ ယောတိ ဗုဒ္ဓဂုဏာဒီနိ ဒသအနုဿတိဋ္ဌာနာနိ အနုဿရဏသတိ ယောစ။ သေသာနိပိ ယထာနုရူပံ ဝတ္တဗ္ဗာနီတိ။ စရဏံ စရိယာ။ သမုဒါစရဏန္တိ အတ္ထော။ ပဝတ္တိဗဟုလတာတိ ဝုတ္တံ ဟောတိ။ ရာဂဿ စရိယာ ရာဂစရိယာ။ ရာဂစရိတာတိ ပါဌော၊ သော အဋ္ဌကထာယံ နတ္ထိ၊ ပုဂ္ဂလဋ္ဌာနေဧဝ သော ယုတ္တောတိ။ ဧသနယော သေသေသုပိ။

[၂၄၃] ယော ပန ဝိဘာဝနိယံ

စရိယာနံ သံသဂ္ဂဘေဒေါ ဝုတ္တော။ သော ဣဓ နာဓိပ္ပေတော။

နဟိ ကမ္မဋ္ဌာနာနံနာမ သံသဂ္ဂစရိတဿပိ ဧကဿ ဒွေ တီဏိ ဒါတဗ္ဗာနိ ဟောတီတိ။ တေနေဝ ဟိ သော ဘေဒေါ အဋ္ဌကထာယံ နဂရုကတောတိ။ သဗ္ဗာပိ အပ္ပနာယ ပုဗ္ဗဘာဂပဝတ္တာ ကာမာဝစရ ဘာဝနာ ပရိကမ္မဘာဝနာနာမ။ သာ ပန အပ္ပနာယ အာသန္နေ ဒူရေတိ ဒုဝိဓာ ဟောတိ။ တတ္ထ ယာ အာသန္နေ၊ သာ အပ္ပနံ ဥပေစ္စ သမီပေ ဌတွာ ပဝတ္တတ္တာ ဥပစာရဘာဝနာတိ ဝုစ္စတိ။ ဣတရာ ပန ပရိကမ္မ ဘာဝနာဧဝနာမ။ ဣတိ ပရိကမ္မဘာဝနာပိ သမာနာ ပုဗ္ဗာပရဝိသေသ ပါကဋဘာဝတ္ထံ အဋ္ဌကထာသု ဒွီဟိ နာမေဟိ ဂဟိတာတိ ဝုတ္တံ ပရိကမ္မဘာဝနာ။လ။ တိဿောဘာဝနာတိ တာသံ ပန ဝိသေသော ပရတော အာဂမိဿတိ။ ပရိကမ္မနိမိတ္တန္တိ ပရိကမ္မဘာဝနာယ အာရမ္မဏဘူတံ ကသိဏမဏ္ဍလာဒိနိမိတ္တံ။ တဉ္စ တဿာ အာရမ္မဏ ဘာဝေန ဧကံပိ သမာနံ ပုဗ္ဗာပရဝိသေသပါကဋဘာဝတ္ထံ ပရိကမ္မနိမိတ္တံ ဥဂ္ဂဟနိမိတ္တန္တိ ဒွိဓာ ဘိန္ဒိတွာ ဝုတ္တံ။ တေသံပိ ဝိသေသော အာဂမိဿတိ။ ဝိဒတ္ထိစတုရင်္ဂုလသင်္ခါတေန ပရိတ္တပမာဏေနဝါ ခလ မဏ္ဍလာဒိသင်္ခါတေန မဟန္တပမာဏေနဝါ ကတံ အကတံဝါ ပထဝီ မဏ္ဍလတလမေဝ အသေသဖရိတဗ္ဗဋ္ဌေန ကသိဏန္တိ ပထဝီကသိဏံ။ သကလသဒ္ဒပရိယာယော ဟိ ကသိဏသဒ္ဒေါ။ ယထာ ကသိဏေန ဇမ္ဗုဒီပဿာတိ။ တသ္မာ ယတ္တကေ ပထဝီတလေ နိမိတ္တံ ဂဏှာတိ၊ တတ္တကံ စိတ္တေန အသေသံ ဖရိတွာ ဧဝ ဂဟေတဗ္ဗံ ဟောတိ။ န ပန တဿ ဧကဒေသေ ဌတွာတိ၊ တေန ဝုတ္တံ ပထဝီမဏ္ဍလတလမေဝ အသေသဖရိတဗ္ဗဋ္ဌေန ကသိဏန္တိ ပထဝီကသိဏန္တိ။ ဧသနယော သေသကသိဏေသုပီတိ။ ဧတ္ထစ၊ အဝိဘူတဝဏ္ဏာယ ပထဝိယာ ဧက တလဘာဝေနသန္နိဝိဋ္ဌာသဏ္ဌာနပညတ္တိဣဓပထဝီကသိဏံနာမ ။ တထာ အာပေါကသိဏံ တေဇောကသိဏဉ္စ။ ဖုဋ္ဌဋ္ဌာနေ စိတ္တေန သဏ္ဌာနံ ကတွာ ဂဟိတာ ဝါယုဝဋ္ဋိ ဝါယောကသိဏံနာမ။ နီလဝဏ္ဏဝိသိဋ္ဌာဧကာ သဏ္ဌာနပညတ္တိ နီလကသိဏံနာမ။ တထာ ပီတလောဟိတော ဒါတကသိဏာနိပိ။ စန္ဒသူရိယအဂ္ဂေါဘာသဝိသိဋ္ဌာ ကတ္ထစိ ဒိဿမာနာ သဏ္ဌာနပညတ္တိ အာလောကကသိဏံနာမ။ တိတ္တိဆိဒ္ဒဝါတ ပါနဆိဒ္ဒါဒီသု ဒိဿမာနာ အာကာသဝိသိဋ္ဌာ သဏ္ဌာနပညတ္တိ အာကာသကသိဏံနာမာတိ။ အတိဝိယ ဓုမာတံ သုနဘာဝံ ဂတန္တိ ဥဒ္ဓုမာတံ။ တဒေဝ ကုစ္ဆိတတ္တာ ဥဒ္ဓုမာတကံ။ တထာဘူတဿ ဆဝသရီရဿေတံ နာမံ။ တဒေဝ ပူတိဘာဝံ ဂတကာလေ ပုရိမဝဏ္ဏံ ဝိဇဟိတွာ ပုန နီလဘာဝံ ပတ္တံ ဝိနီလကံ။ တဒေဝ ပုန ပစ္စိတွာ တတော တတော ဝိသန္ဒမာနပုဗ္ဗယုတ္တံ ဝိပုဗ္ဗကံ။ ယုဒ္ဓဘူမိယာဒီသု သတ္ထေန မဇ္ဈေ ဆိန္ဒိတွာ ထပိတံ ဝိရူပဆိန္နသရီရံ ဝိစ္ဆိန္နကံနာမ။ သောဏ သိင်္ဂါလာဒီဟိ ဝိဝိဓာကာရေန ခါယိတပဒေသယုတ္တံ သရီရံ ဝိက္ခာယိတကံနာမ။ သောဏသိင်္ဂါလာဒီဟိ ဧဝ ခဏ္ဍာခဏ္ဍိကံ ကတွာ အပကဍ္ဎိတွာ တတော တတော ခိတ္တအင်္ဂပစ္စင်္ဂယုတ္တံ သရီရံ ဝိတ္တက္ခိကံ နာမ။ အင်္ဂပစ္စင်္ဂေသု သတ္ထေန ဟနိတွာ ခဏ္ဍာခဏ္ဍိကံ ကတွာ တတော တတော ခိတ္တအင်္ဂပစ္စင်္ဂယုတ္တံ သရီရံ ဟတဝိက္ခိတ္တကံနာမ။ ပဂ္ဃရိတ လောဟိတသရီရံ လောဟိတကံ နာမ။ ပုဠုဝပရိပူရံ သရီရံ ပုဠုဝကံ။ သကလော အဋ္ဌိသင်္ဃာဋောဝါ ဧကမေကံဝါ အဋ္ဌိ အဋ္ဌိကံ နာမ။ ပုနပ္ပုနံ နိရန္တရံ သရဏံ အနုဿတိ။ ဗုဒ္ဓဂုဏဿ အနုဿတိ ဗုဒ္ဓါနုဿတိ။ ဧသ နယော သေသာသုပီတိ။ တတ္ထ အရဟတာဒိဂုဏော ဗုဒ္ဓဂုဏောနာမ။ သွက္ခာတတာဒိဂုဏော ဓမ္မဂုဏောနာမ။ သုပ္ပဋိပန္နတာဒိဂုဏော သင်္ဃဂုဏော နာမ။ အတ္တနော သီလဿ အခဏ္ဍတာဒိ ဂုဏော သီလဂုဏောနာမ။ အတ္တနော ဒါနဿ ဝိဂတမလမစ္ဆေရတာဒိ ဂုဏော စာဂဂုဏောနာမ။ အတ္တာနံ ဒေဝတ္တံဝါ သက္ကတ္တံဝါ ဗြဟ္မတ္တံဝါ ဝဟိတုံ သမတ္ထာ အတ္တနော သဒ္ဓါဒိဂုဏာ ဒေဝတာဂုဏာနာမ။ ဝတ္တ ပဋိပတ္တိဝသေနဝါ ဓုတင်္ဂသမာဒါနဝသေနဝါ ဈာနသမာပတ္တိဝသေနဝါ ဝိပဿနာဝသေနဝါ အတ္တနော သန္တာနေ စိရံဝိကာလံ ဝိက္ခမ္ဘိတာနံ ကာမရာဂါဒီနံ ဝူပသမော အတ္တနာအဓိဂတနိဗ္ဗာနဉ္စ ဥပသမောနာမ။ ဧကဘဝပရိယာပန္နဿ အတ္တနော ခန္ဓသန္တာနဿ ဘေဒေါ မရဏံ နာမ။ ကေသကာယာဒီနံ နာနာကာယာနံ သမူဟဘူတော အယံ ကာယော ကာယောနာမ။ အတ္တနိ နိရန္တရံ ပဝတ္တမာနာ အဿာသ ပဿာသာ အာနာပါဏံနာမ။ မိဇ္ဇတိ သိနိယှတီတိ မေတ္တာ။ ယံ အာရဗ္ဘ ဥပ္ပဇ္ဇတိ။ တဿ ဟိတသုခံ အဝိပ္ပကိဏ္ဏံ ကတွာ သင်္ဂဏှတီတိ အတ္ထော။ မိတ္တဿဝါ ဧသာ မိတ္တေသုဝါ ဘဝါတိ မေတ္တာ။ အတ္ထတော ပန ပရသတ္တာနံ ဟိတူပသံဟာရဝသေန ပဝတ္တော အဒေါသောဧဝ။ ပရသတ္တာနံ ဟိတူပသံဟာရ ဟိတမောဒန အဟိတာပနယနသင်္ခါတံ ဗျာပါရတ္တယံ ပဟာယ တေသံ ကမ္မသကတာနုဗြူဟနဝသေန ဥပပတ္တိတော ယုတ္တိတော ပေက္ခတီတိ ဥပေက္ခာ။ တထာ ပဝတ္တာ တတြမဇ္ဈတ္တတာဧဝ။ အပ္ပမာဏေသုသတ္တေသု ဘဝါတိ အပ္ပမညာ။ န ဟိ ဧတ္တကေသု ဧဝ သတ္တေသု ဧတာ ပဝတ္တေတဗ္ဗာ။ န တတော အညေသူတိ ဧဝံ ဧတာသံ ဝိသယပရိစ္ဆေဒေါနာမ အတ္ထီတိ။ ဧဝံသန္တေပိ အာဒိကမ္မိ ကေန အာဒိတော ဧကသ္မိံ ပုဂ္ဂလေ အတ္တနော ဘာဝနာစိတ္တံ လဒ္ဓါသေဝနံ လဒ္ဓဝိသေသဉ္စ ကတွာ ပစ္ဆာ ဒွီသု တီသူတိအာဒိနာ ဝဍ္ဎိတွာ သီမသမ္ဘေဒေါစ ဩဓိသောဖရဏ အနောဓိသောဖရဏ ဒိသာဖရဏာနိဝ ကတ္တဗ္ဗာနီတိ။ ယံ ပန ဝိဘင်္ဂေ မေတ္တာသဟဂတေန စေတသာ ဧကံ ဒိသံ ဖရိတွာ ဝိဟရတီတိအာဒိနာ ပဋိသမ္ဘိဒါမဂ္ဂေစ သဗ္ဗေသတ္တာ အဝေရာ ဟောန္တူတိအာဒိနာ မေတ္တာဝိဓာနံ နာမ ဝုတ္တံ။ တံ မေတ္တာဈာနေ ဝသီဘာဝပ္ပတ္တာနံ ဝသေန ဝုတ္တန္တိ ဒဋ္ဌဗ္ဗံ။ ဧတာ ပန ဝိသေသေန ဒေါသပက္ခိကာနံ ကိလေသာနံ ဥဇုပဋိပက္ခဘူတာ ဟောန္တီတိ တံသမင်္ဂိနောစ နိစ္စံ သောမ္မဟဒယဘာဝေန ဗြဟ္မသဒိ သတ္တာ ဗြဟ္မာနောနာမ။ တေသံ ဝိဟာရောတိ ဗြဟ္မဝိဟာရော။ သေဋ္ဌာနံဝါ သေဋ္ဌဘူတောဝါ ဝိဟာရောတိ ဗြဟ္မဝိဟာရောတိ။ အာဟာရေတိ အသိတ ပီတ ခါယိတ သာယိတ ဝသေန စတုပ္ပဘေဒေ အဇ္ဈောဟဋာဟာရေ။ ပဋိကူလသညာတိ အာဟာရဟေတု အနုဘဝိတဗ္ဗာနံ ဒုက္ခဓမ္မာနံ ပစ္စဝေက္ခနဝသေန သရသပဋိကူလတာ ပစ္စဝေက္ခနဝသေန အာသယနိဓာန ပက္ကာပက္ကဖလနိဿန္ဒပစ္စဝေက္ခန ဝသေန စ တတ္ထ နိကန္တိ ပဟာနသညာ။ စတုဓာတုဝဝတ္ထာနန္တိ သရီရဂတာနံ ပထဝိအာဒီနံ စတုန္နံ မဟာဓာတူနံ သလက္ခဏာ ဒိဝသေန ဝိသုံ ဝိသုံ ပရိစ္ဆိန္ဒိတွာ သမနုပဿနံ။ တဉှိ စတဿော ဓာတုယော ဝဝတ္ထပိယန္တိ ဝိနိစ္ဆိယန္တိ သလ္လက္ခိယန္တိ ဧတေနာတိ စတုဓာတုဝဝတ္ထာနန္တိ ဝုစ္စတီတိ။ အသုဘသညာ ဘာဝေတဗ္ဗာ ရာဂဿပဟာနာယာတိ ဝစနတော ဒသအသုဘာ။လ။ ရာဂစရိတဿ သပ္ပာယာတိ ဝုတ္တံ။ တတ္ထ ရာဂေန စရတီတိ ရာဂစရိတော။ သော ဟိ ကာမံ ကဒါစိ ဒေါသေန စရတိ။ ကဒါစိ မောဟေန။ ကဒါစိ သဒ္ဓါဒီသုပိ အညတရေန။ ရာဂေါ ပနဿ ဥဿန္နော။ တသ္မာ ဥဿန္နေန ရာဂေန သော ရာဂစရိတောတိ သင်္ချံ ဂစ္ဆတီတိ။ ဧသနယော သေသေသုပိ။ မေတ္တာ ဘာဝေတဗ္ဗာ ဗျာပါဒဿ ပဟာနာယာတိ ဝစနတော မေတ္တာဒီနံ တိဏ္ဏံ ဗြဟ္မဝိဟာရာနံ ယထာက္ကမံ ဗျာပါဒဝိဟိံသာ အရတီနံ နိဿရဏတာဝစနတော သုပရိသုဒ္ဓါနဉ္စ ဝဏ္ဏကသိဏာနံ ဒေါသဝတ္ထုတ္တာဘာဝတော စတဿောအပ္ပမညာယော။လ။ ဒေါသစရိတဿာတိ ဝုတ္တံ။ ဧတ္ထစ အာဒိကမ္မိကဿေဝါယံ စရိယဝိဘာဂေါ။ ဥပေက္ခာစ အာဒိကမ္မိကဿ နသမ္ဘဝတိ။ ဝက္ခတိဟိ ဥပေက္ခာပဉ္စမဇ္ဈာနိကာတိ။ တသ္မာ ယဿ ပုရိမာ တိဿော သပ္ပာယာ။ တဿ တဒနုဂတိကာ ဥပေက္ခာပိ သပ္ပာယာနာမ ဟောတီတိ ကတွာ စတဿော အပ္ပမညာယောတိ ဝုတ္တန္တိ ဒဋ္ဌဗ္ဗံ။ ဣတရထာ နိဿရဏဉှေတံ ရာဂဿ။ ယဒိဒံ ဥပေက္ခာ စေတော ဝိမုတ္တီတိ ဝစနတော ဥပေက္ခာ ရာဂစရိတဿာတိ ဝတ္တဗ္ဗံ သိယာတိ။ နီလာဒီနိစ စတ္တာရိ ကသိဏာနီတိ ဣဒဉ္စ မနာပိယရူပါနိ နီလာဒီနိ သန္ဓာယ ဝုတ္တံ။ အမနာပိယာနိ ပန တာနိ ရာဂစရိတဿေဝ သပ္ပာယာနီတိ။ အာနာပါဏသတိ ဘာဝေတဗ္ဗာ ဝိတက္ကုပစ္ဆေဒါယာတိ ဝစနတော အာနာပါဏံဝိတက္ကစရိတဿာတိ ဝုတ္တံ။ မောဟစရိတော ပန ပကတိယာ ပမာဒဗဟုလော ဟောတိ ဝိက္ခိတ္တစိတ္တောစ။ အာနာပါဏဉ္စနာမ နိရန္တရံ ပဝတ္တမာနံ တဿ သတိံ ဥပ္ပာဒေန္တံ ဝိယ ပဝတ္တတီတိ တံ မောဟစရိတဿသပ္ပာယန္တိ ဝုတ္တံ သိယာ။

[၂၄၄] ဝိဘာဝနိယံ ပန

ဗုဒ္ဓိဝိသယဘာဝေန မောဟပဋိပက္ခတ္တာတိ ကာရဏံ ဝုတ္တံ။ တံ ယုတ္တံ ဝိယ န ဒိဿတိ။

ဧဝဉှိ သတိ သော ဗုဒ္ဓိစရိတေန သဟ ဝတ္တဗ္ဗော သိယာတိ။ ကာမဉ္စ ဗုဒ္ဓဂုဏာဒယောပိ ဧကန္တေန ဗုဒ္ဓိဝိသယာဧဝ ဟောန္တိ။ တေ ပန ဝိသေသတော သဒ္ဓံ ဥပဗြူဟယန္တီတိ ဝုတ္တံ ဗုဒ္ဓါနုဿတိ အာဒယော။လ။ သဒ္ဓါစရိတဿာတိ။ ပရမတ္ထတော သုခုမတရာနိ မရဏာဒီနိ ဝိပုလဗုဒ္ဓီနံ ဧဝ ဝိသယာနာမ ဟောန္တီတိ ဝုတ္တံ မရဏ။ လ။ ဗုဒ္ဓိစရိတဿာတိ။ သေသာနိပနသဗ္ဗာနိပီတိ စတ္တာရိ ဘူတ ကသိဏာနိ ဒွေ အာလောကာကာသကသိဏာနိ စတ္တာရော အာရုပ္ပာစာတိ ဒသဝိဓာနိ ကမ္မဋ္ဌာနာနိ။ တတ္ထာပီတိ တေသု ဒသသု သေသ ကမ္မဋ္ဌာနေသုပိ။ ပုထုလံ ခလမဏ္ဍလာဒိပမာဏံ မောဟစရိတဿ သပ္ပာယံ။ သမ္ဗာဓသ္မိဉှိ ဩကာသေ စိတ္တံ ဘိယျော သံမောဟံ အာပဇ္ဇတီတိ။ ခုဒ္ဒကံ ဝိဒတ္ထိစတုရင်္ဂုလပမာဏံ ဝိတက္ကစရိတဿေဝ သပ္ပာယံ။ မဟန္တဉှိ ဝိတက္ကသန္ဓာဝနဿ ပစ္စယော ဟောတီတိ။ တတ္ထစ ဝိတက္ကစရိတဿေဝါတိ ဧတ္ထ ဧဝသဒ္ဒေါ ခုဒ္ဒကန္တိပဒေ ယုဇ္ဇတိ။ ဝိတက္ကစရိတဿ ခုဒ္ဒကမေဝ သပ္ပာယံ။ န ပုထုလန္တိ။ သဗ္ဗဉ္စေတံ ဥဇုဝိပစ္စနိကဝသေနစေဝ အတိသပ္ပာယတာယစ ဝုတ္တံ။ ရာဂါဒီနံ ပန အဝိက္ခမ္ဘိကာ သဒ္ဓါဒီနဉ္စ အနုပကာရိကာ ကုသလဘာဝနာနာမ နတ္ထီတိပိ အဋ္ဌကထာယံ ဝုတ္တံ။ သဗ္ဗတ္ထာပီတိ သဗ္ဗေသုပိ စတ္တာလီသ ကမ္မဋ္ဌာနေသု။ ပရိကမ္မဘာဝနာ လဗ္ဘတေဝ ပရိကမ္မေန ဝိနာ ဧကဿပိ ကမ္မဋ္ဌာနဿ အသမ္ပဇ္ဇနတော။ ဒသသုကမ္မဋ္ဌာနေသုဥပစာရဘာဝနာဝ သမ္ပဇ္ဇတိ နတ္ထိ အပ္ပနာ။ ကသ္မာ ဣတိ စေ။ ဗုဒ္ဓ ဓမ္မ သင်္ဃ သီလ စာဂ ဒေဝတာ ဥပသမ ဂုဏာနံ တာဝ ဂမ္ဘီရတာယ နာနာပ္ပကာရဂုဏာ နုဿရဏာဓိမုတ္တတာယဂါတိ ဟိ အဋ္ဌကထာယံ ဝုတ္တံ။ တတ္ထ ဂမ္ဘီရ တာယာတိ ဧတေန ဧကေကဿပိ ဂုဏပဒဿ ဂမ္ဘီရတ္တာ တဗ္ဗိသယော သမာဓိ မဟာသမုဒ္ဒေ သသကော ဝိယ တတ္ထ အပ္ပနံ ပတွာ နိစ္စလဘာဝေန ပတိဋ္ဌာတုံ နသက္ကောတီတိ ဒဿေတိ။ နာနာပ္ပကာရ ဂုဏာနုဿရဏာဓိမုတ္တတာယဝါတိ ဧတေန တေသံ ဂုဏာနံ အတပ္ပ နိယသဘာဝတ္တာ ဧတ္တကေဧဝ ဂုဏပဒေ ဌတွာ အပ္ပနံ ပါပေဿာမီတိ အတ္တနော စိတ္တံ သန္ဓာရေတုံပိ နသက္ကောတီတိ ဒဿေတီတိ။ သေသေသု ပန မရဏသညာဝဝတ္ထာနေသု မရဏံ တာဝ သဘာဝ ဓမ္မတ္တာ သံဝေဇနီယဓမ္မတ္တာစ ဣတရာနိစ ဒွေ သဘာဝဓမ္မတာယ ဂမ္ဘီရတ္တာ အပ္ပနာယ ပတိဋ္ဌာ နဟောန္တီတိ။ ယဒိဧဝံ ကသ္မာ လောကုတ္တရဇ္ဈာနာနိ အတိဂမ္ဘီရေ နိဗ္ဗာနသင်္ခါတေ သဘာဝဓမ္မေ အပ္ပနံ ပါပုဏန္တိ။ ဒုတီယစတုတ္ထာရုပ္ပဇ္ဈာနာနိစ ပထမတတီယာရုပ္ပ သင်္ခါတေ သဘာဝဓမ္မေတိ။ ဝုစ္စတေ၊ လောကုတ္တရဇ္ဈာနာနိ တာဝ ဝိသုဒ္ဓိတော သမ္မသနဉာဏတောစ ပဋ္ဌာယ အနုက္ကမေန ဥပရုပရိပဝတ္တာနံ ဝိသုဒ္ဓိဘာဝနာနံ ဗလေန အတိဂမ္ဘီရေပိ နိဗ္ဗာနသင်္ခါတေ သဘာဝဓမ္မေ အပ္ပနာဘာဝေန ပတိဋ္ဌာတုံ သက္ကောန္တိ။ အာရုပ္ပဇ္ဈာနာနိစ အပ္ပနာပတ္တဿေဝ ပဉ္စမဇ္ဈာနသမာဓိဿ ဥဒယမတ္တာနိ ဟောန္တီတိ အာရမ္မဏသမတိက္ကမနမတ္တကရဏေန သဘာဝဓမ္မေပိ အာရမ္မဏေ အပ္ပနာဘာဝေန ပတိဋ္ဌာတုံ သက္ကောန္တီတိ။ တတ္ထာပီတိ တေသု သမတိံသအပ္ပနာကမ္မဋ္ဌာနေသုပိ။ ပဉ္စကဇ္ဈာနေ နိယုတ္တာနိ ပဉ္စကဇ္ဈာနိ ကာနိ။ ဈာနပဉ္စကဿ အာရမ္မဏဘာဝယောဂျာနီတိ ဝုတ္တံဟောတိ။ ပဋိကူလာရမ္မဏာနိနာမ အတိအနိဋ္ဌာနိ လူခါနိ စိတ္တရဘိဇနနေ ပရိဒုဗ္ဗလာနိ ဟောန္တီတိ န တာနိ အတ္တနိ စိတ္တံ ရောစေတွာ ထပေတုံ သက္ကောန္တိ။ တသ္မာ ဝိတက္ကေန ဝိနာ စိတ္တံ တတ္ထ ဧကဂ္ဂံ ဟုတွာ န တိဋ္ဌတိ။ ဝိတက္ကဗလေနေဝ တိဋ္ဌတီတိ ဝုတ္တံ ဒသအသုဘာ။လ။ ပထမဇ္ဈာနိကာတိ။ ယဒိဧဝံ ကထံ တေသု သောမနဿဇ္ဈာနံ ဟောတီတိ နီဝရဏသန္တာပံ ပဟာနဗလေနစေဝ တံ တံ အာနိသံသဒဿန ဉာဏဗလေနစ။ ဗျာဓိဒုက္ခပီဠိတဿ ရောဂိနော ဝမနဝိရေစနပဝတ္တိယံ ဝိယ ဗဟုံ ဒါနိ ဝေတ္တနံ လဘိဿာမီတိ အာနိသံသဒဿာဝိနော ပုပ္ဖစ္ဆဋ္ဋကဿ ဂူထရာသိဒဿနေ ဝိယ စာတိ ဒဋ္ဌဗ္ဗံ။ မေတ္တာဒယော တယော ဗြဟ္မဝိဟာရာ ဒေါမနဿသမုဋ္ဌိတာနံ ဗျာပါဒဝိဟိံ သာအရတီနံ နိဿရဏဘူတာ ဟောန္တီတိ န တေ ကဒါစိ သောမနဿေန ဝိနာ အပ္ပနံ ပါပုဏန္တီတိ ဝုတ္တံ မေတ္တာဒယော တယော စတုက္ကဇ္ဈာနိကာတိ။ ဥပေက္ခာ ပန သတ္တေသု သဗ္ဗသော ဥဒါသိနပက္ခေ ဌတွာ ဘာဝိတဗ္ဗတ္တာ ကဒါစိပိ ဥပေက္ခာဝေဒနာယ ဝိနာ အပ္ပနံ နပါပုဏာတီတိ ဝုတ္တံ ဥပေက္ခာပဉ္စမဇ္ဈာနိကာတိ။ စတ္တာရောပနအာရုပ္ပာတိ ကသိဏုဂ္ဃာဋိမာကာသာဒီနိ စတ္တာရိ အာရုပ္ပာရမ္မဏာနိ။ သဗ္ဗတ္ထာပီတိ သဗ္ဗေသုပိ စတ္တာလီသကမ္မဋ္ဌာနေသု။ ယထာရဟန္တိ တံတံအာရမ္မဏာနုရူပံ။ အာရမ္မဏေန ဝိနာ ပရိကမ္မံနာမ န သိဇ္ဈတိ။ အာရမ္မဏဿ သုဋ္ဌု ဒဠှဝိဘူတဂဟဏသင်္ခါတေန ဥဂ္ဂဟေန ဝိနာ အာရမ္မဏသမ္ပတ္တိ နာမ နတ္ထိ။ အသတိစ အာရမ္မဏသမ္ပတ္တိယာ ဥပစာရဇ္ဈာနံပိ တာဝ န သမ္ပဇ္ဇတိ။ ပဂေဝ အပ္ပနာဈာနန္တိ ဝုတ္တံ ပရိကမ္မနိမိတ္တံ။လ။ လဗ္ဘန္တေဝါတိ။ တတ္ထ သဗ္ဗတ္ထာပီတိ သဗ္ဗေသုပိ စတ္တာလီသကမ္မဋ္ဌာနေသု။ ယထာရဟန္တိ တံတံကမ္မဋ္ဌာနာနုရူပံ။ ပရိယာယေနာတိ ဣဒံ ပန ကဿစိ အာရမ္မဏဿ စက္ခုနာ ပဿန္တဿေဝ အဝိဘူတတရတ္တာ ဝုတ္တံ။ ယတ္ထ ပန ပထမံ သဘာဝဓမ္မံ ဂဏှိတွာ ပစ္ဆာ တာဒိသေ တဒါကာရေ တံသဏ္ဌာနေ ပညတ္တာရမ္မဏေ ဥပစာရောဝါ အပ္ပနာဝါ ပဝတ္တတိ။ တတ္ထေဝ ပဋိဘာဂနိမိတ္တံနာမ လဗ္ဘတီတိ ဝုတ္တံ ပဋိဘာဂ နိမိတ္တံပနာတိအာဒိ။ ဝုတ္တမေဝတ္ထံ ဒဠှံ ကရောန္တော တတ္ထဟီတိအာဒိမာဟ။ ဧဝံ သမထကမ္မေ ပထမံ ဥဂ္ဂဟကောသလ္လံ ဒဿေတွာ ဣဒါနိ အာဒိတော ပဋ္ဌာယ ဘာဝနာဝိဓာနံ ဒဿေန္တော ကထန္တိအာဒိ မာဟ။ နိမိတ္တံ ဥဂ္ဂဏှန္တဿာတိ အာရမ္မဏဿ ယထာ သဏ္ဌိတံ အာကာရံ စိတ္တေ ဥပရုပရိ ဝိဘူတံ ကတွာ ဂဏှန္တဿ သမနုပဿန္တဿ။ သာစဘာဝနာတိ ဥဂ္ဂဟဏာကာရေန ပဝတ္တ ဇဝနဝီထိပရံပရသင်္ခါတာ သာ စိတ္တဘာဝနာ ပရိကမ္မဘာဝနာ နာမ။ ပုနပ္ပုနံ ကရဏဝသေန ဝဍ္ဎနာကာရသဏ္ဌိတတ္တာ။ သမုဂ္ဂဟိတံ ဟောတီတိ ဝတွာ ယထာ သုဋ္ဌု ဥဂ္ဂဟိတံ သမုဂ္ဂဟိတံနာမ ဟောတိ တံ ဒဿေတုံ စက္ခုနာပဿန္တဿေဝမနောဒွါရဿ အာပါတမာဂတန္တိ ဝုတ္တံ။ တတ္ထ မနောဒွါရဿအာပါတမာဂတန္တိ စက္ခူနိ နိမ္မိလိတွာဝါ အညသ္မိံ ဌာနေ ဌတွာဝါ အာဝဇ္ဇန္တဿ စက္ခုနာ ဒိဋ္ဌသဒိသံ မနောဒွါရေ ပစ္စုပဋ္ဌိတံ ဟောတိ။ ဥဂ္ဂဟနိမိတ္တံနာမ။ သုဋ္ဌု အဝိနဿမာနံ ကတွာ ဂဟိတတ္တာ။ သာစ ဘာဝနာ သမာဓိယတိ။ န တာဝ ဘာဝနန္တရဘာဝံ ပါပုဏာတီတိ အဓိပ္ပာယော။ တထာ သမာဟိတဿာတိ တေန မတ္ထကပတ္တေန ပရိကမ္မသမာဓိနာ သမာဟိတဿ ဧတဿ ယောဂိနော။ တတောပရန္တိ ဥဂ္ဂဟနိမိတ္တုပ္ပတ္တိ တော ပရံ။ ဘာဝနမနုယုဉ္ဇန္တဿ စိတ္တေ သန္နိသိန္နန္တိ သမ္ဗန္ဓော။ တတ္ထ အနုယုဉ္ဇန္ထဿာတိ နိရန္တရံ ပဒဟန္တဿ။ တပ္ပဋိဘာဂန္တိ သဘာဝ ဓမ္မဘူတေန တေန ဥဂ္ဂဟနိမိတ္တေန သဒိသံ။ ဝတ္ထုဓမ္မဝိမုစ္စိတန္တိ မေဃဝလာဟကန္တရတောဝါ ရာဟုမုခတောဝါ နိက္ခန္တစန္ဒမဏ္ဍလံ ဝိယ သဘာဝဓမ္မဘူတာ ဥဂ္ဂဟနိမိတ္တတော ဝိမုစ္စိတွာ ဝိသုံ ဥပဋ္ဌိတံ။ တတောယေဝ ပညတ္တိသင်္ခါတံ နိမိတ္တပညတ္တိဣတိ ကထိတံ။ ဘာဝနာ မယန္တိ ကေဝလံ ဘာဝနာစိတ္တဗလေန ပသိဒ္ဓံ။ အာလမ္ဗဏန္တိ တဒေဝ သမုဂ္ဂဟိတံ နိမိတ္တာလမ္ဗဏံ စိတ္တေသန္နိသန္နံသမပ္ပိတံဟောတီတိ မနောဒွါရိကစိတ္တသန္တာနေ သန္နိသိန္နံ နိစ္စလဘာဝေန သဏ္ဌိတံ ဟုတွာ သုဋ္ဌု အပ္ပိတံ ပဝေသိတံ ဟောတိ။ တန္တိ နိမိတ္တာလမ္ဗဏံ ပဝုစ္စတီတိ သမ္ဗန္ဓော။ ယသ္မာ စန္ဒမဏ္ဍလာဒိကဿ ဝိယ တဿ နိမိတ္တာလမ္ဗဏဿ ပရိသုဒ္ဓပရိယောဒါတဘာဝေန ဥပဋ္ဌိတတာနာမ ကိလေသမလဝိက္ခမ္ဘနေန ပရိသုဒ္ဓပရိယောဒါတဘာဝံ ပတွာ ဩဘာသဇာတဿ စိတ္တဿ ဝသေနေဝ ဟောတိ။ န တဿ အာလမ္ဗဏဿ ဝသေန။ နဟိ ပညတ္တိ ဓမ္မေ တာဒိသော ဂုဏောနာမ ဥပလဗ္ဘတီတိ။ တသ္မာ ပဋိဘာဂ နိမိတ္တေ သမုပ္ပန္နေ နီဝရဏသင်္ခါတာနံ ပဋိဗန္ဓကဓမ္မာနံ ဝိက္ခမ္ဘိတတာ သိဒ္ဓါ ဟောတီတိ ဝုတ္တံ တတောပဋ္ဌာယာတိအာဒိ။ ပဋိဗန္ဓန္တိ နီဝါရေန္တိ နိဿရဏပက္ခိကံ စိတ္တံ ပါတေန္တီတိ ပဋိဗန္ဓာ။ နီဝရဏ ဓမ္မာ။ ဝိသေသေန ပဟီနာ ပဋိဗန္ဓာ ဧတာယာတိ ပဋိဗန္ဓဝိပ္ပဟီနာ။ သမာသေဝန္တဿာတိ သုဋ္ဌု အာသေဝန္တဿ။ သတ္တဝိဓံ နိမိတ္တ ရက္ခဏဝိဓာနံ သမ္ပာဒေတွာ စက္ကဝတ္တိဂဗ္ဘံ ဝိယ သုဋ္ဌု ရက္ခိတွာ ပုနပ္ပုနံ ဘာဝနာဝသေန သေဝန္တဿာတိ အတ္ထော။

အာဝါသော ဂေါစရော ဘဿံ၊ ပုဂ္ဂလော ဘောဇနံ ဥတု၊

ဣရိယာပထောတိ သတ္တေ တေ၊ အသပ္ပာယေ ဝိဝဇ္ဇယေ။

သပ္ပာယေ သတ္တ သေဝေထ၊ ဧဝဉှိ ပဋိပဇ္ဇတော၊

နစိရေနေဝ ကာလေန၊ ဟောတိ ကဿစိ အပ္ပနာတိ ဟိ ဝုတ္တံ။

ရူပါဝစရပထမဇ္ဈာနံအပ္ပေတီတိ ကာမတဏှာယ ဝိသယဘာဝံ အတိက္ကမိတွာ သာတိသယံ သဏှသုခုမဘာဝပ္ပတ္တံ ဥပစာရဇ္ဈာနတော သတဂုဏေနဝါ သဟဿဂုဏေနဝါ ထိရတရဇ္ဈာနင်္ဂယုတ္တံ ရူပါဝစရ သင်္ခါတံ ပထမဇ္ဈာနံ တသ္မိံ နိမိတ္တေ အနုပဝိသိတွာ ဝိယ ဝတ္တတီတိ အတ္ထော။ တမေဝ ပထမဇ္ဈာနံ ဝသီဘူတံ ကတွာတိ သမ္ဗန္ဓော။ ပဉ္စသု ဝသီတာသု ပန ပထမဇ္ဈာနတော ဝုဋ္ဌာယ ပထမံ ဝိတက္ကံ အာဝဇ္ဇတိ။ တတော ဝိစာရံ။ တတော ပီတိံ။ တတော သုခံ။ တတော သမာဓိံ။ တတော ပုန ဝိတက္ကံ။ တတော ဝိစာရန္တိ ဧဝံ ပုနပ္ပုနံ ဈာနင်္ဂါနိ အာဝဇ္ဇန္တဿ ယဒါ တံတံဈာနင်္ဂါလမ္ဗဏာ စိတ္တဝါရာ အန္တရန္တရာ ကတိပယဘဝင်္ဂေဟိ အန္တရိတာ ဟုတွာ နိရန္တရဘူတာ ဝိယ ပဝတ္တန္တိ။ တဒါ အာဝဇ္ဇန ပစ္စဝေက္ခန ဝသိတာယော ဝသီဘူတာနာမ ဟောန္တိ။ ဧတာ ပန သဗ္ဗညုဗုဒ္ဓါနံ မတ္ထကပ္ပတ္တာ ဟောန္တိ။ တေသဉှိ ယမကပါဋိ ဟာရိယာဒိကာလေသု လဟုကပဝတ္တိံ ဣစ္ဆန္တာနံ တံတံဈာနင်္ဂါ ရမ္မဏာစိတ္တဝါရာပိ စတုပဉ္စဇဝနိကာဧဝ ပဝတ္တန္တိ။ အန္တရဘဝင်္ဂါနိပိ ပစ္ဆိမဝါရဿ ဥပစာရ ဘူတာနိ ဘဝင်္ဂ စလန သင်္ခါတာနိ ဒွေဧဝ ပဝတ္တန္တိ။ ယတ္ထ အပရံ ဈာနင်္ဂံ အာပါတ မာဂစ္ဆတိ။ နဟိ အာရမ္မဏေ အာပါတံ အနာဂတေ ဘဝင်္ဂံ စလတိ။ နစ ဝိနာ ဘဝင်္ဂစလနေန အာဝဇ္ဇနုပ္ပတ္တိနာမ အတ္ထီတိ။ ထပေတွာ သဗ္ဗညုဗုဒ္ဓေ အညေသံ ဝသိဘာဝပတ္တာနံပိ အန္တရန္တရာ ဘဝင်္ဂစာရေ ဂဏနာနာမ နတ္ထီတိ ပဋိသမ္ဘိဒါမဂ္ဂဋ္ဌကထာယံ ဝုတ္တံ။ ဝိသုဒ္ဓိမဂ္ဂေ ပန အယံ ပန မတ္ထကပ္ပတ္တာဝသီ ဘဂဝတော ယမကပါဋိဟာရိယကာလေ လဗ္ဘတိ။ အညေသံဝါ ဧဝရူပေ ကာလေတိ ဝုတ္တံ။ ဈာနဿ သီဃတရံ သမာပဇ္ဇနသမတ္ထတာ သမာပဇ္ဇနဝသီနာမ။ တေနေဝ ဟိ ပါဠိယံ သမာပဇ္ဇနေ ဒန္ဓာယိတတ္တံ နတ္ထီတိ ဝုတ္တံ။ ဧသနယော သေသာသုပီတိ။ တထာ သမာပဇ္ဇိတံ ဈာနံ အစ္ဆရာမတ္တာဒိဝသေန အတိပရိတ္တကံပိ ခဏံ ထပေတုံ သမတ္ထတာ အဓိဋ္ဌာနဝသီနာမ။ သမာပဇ္ဇိတဇ္ဈာနတော သီဃတရံ ဝုဋ္ဌာတုံ သမတ္ထတာ ဝုဋ္ဌာနဝသီနာမ။ ပစ္စဝေက္ခနဝသီ ပန အာဝဇ္ဇနဝသိယာ သိဒ္ဓါယ သိဒ္ဓါဧဝ ဟောတီတိ။

ဝိဘာဝနိယံ ပန

ယတ္တကံ ကာလံ ဣစ္ဆတိ။ တတ္တကံ စိရတရံ ဈာနံ ထပေတုံ သမတ္ထတာ အဓိဋ္ဌာနဝသိတာနာမာတိပိ ဝုတ္တံ။ တထာ ပရိစ္ဆိန္န ကာလတော အန္တော အဝုဋ္ဌဟိတွာ ယထာပရိစ္ဆိန္နကာလဝသေနေဝ ဝုဋ္ဌာနသမတ္ထတာ ဝုဋ္ဌာနဝသိတာနာမာတိ။ တံပိ ယုဇ္ဇတိယေဝ။

ပါဠိယဉှိ ပထမဇ္ဈာနံ ယတ္ထိစ္ဆကံ ယဒိစ္ဆကံ ယာဝတိစ္ဆကံ အဓိဋ္ဌာတိ။ အဓိဋ္ဌာနာယ ဒန္ဓာယိတတ္တံ နတ္ထီတိအာဒိနာ သီဃတရံဝါ ဟောတု။ စိရတရံဝါ။ ယတ္တကံ ကာလံ ဈာနံ ထပေတုံဝါ ယတ္တကေ ကာလေ တတော ဥဋ္ဌာတုံဝါ ဣစ္ဆတိ။ တတ္တကံ ကာလံ အနူနံဝါ အနဓိကံဝါ ကတွာ အဓိဋ္ဌာတုံဝါ ဝုဋ္ဌာတုံဝါ သမတ္ထတာပိ ဒဿိတာယေဝ ဟောတီတိ။ ဧဝဉ္စသတိ ဝုဋ္ဌာနဝသိတာပိ အဓိဋ္ဌာနဝသိတာယ သိဒ္ဓါယ သိဒ္ဓါဧဝါတိ တာသံ ဒွိန္နံ ဝိသေသကပ္ပနာပိ နိပ္ပယောဇနာ ဟောတီတိ ဒဋ္ဌဗ္ဗာ။ ဝသနံ ဝသီ။ သမတ္ထတာတိ အတ္ထော။ ဣဿရ ဘာဝေါတိ ဝုတ္တံ ဟောတိ။ ဝသီဧဝ ဝသိတာ။ ယထာ ဒေဝေါဧဝ ဒေဝတာတိ။ ကတွာ ပဒဟတောတိ သမ္ဗန္ဓော။ ဝိတက္ကာဒိကံ ဩဠာရိကင်္ဂံ ပဟာနာယာတိ ဧတ္ထ ပထမဇ္ဈာနံ တာဝ ဝသီဘူတံ ကတွာ ဌိတဿ ဝိတက္ကော ဩဠာရိကတော ဥပဋ္ဌာတိ။ တဒါ အဟောဝတမေ အဝိတက္ကံ ဈာနံ အဿာတိ ဧဝမဿ အဇ္ဈာသယော သဏ္ဌာတိ။ တဒါ အဝိတက္ကံ ဈာနံ သမာပဇ္ဇိဿာမီတိ ပုန တသ္မိံ ပဋိဘာဂနိမိတ္တေ ပရိကမ္မံ ကရောန္တဿ သာ ဘာဝနာ ဝိတက္ကဝိရာဂဘာဝနာနာမ ဟောတိ။ သာပိ ယာဝ ဝိတက္ကေ နိကန္တိ န ပရိယာဒိယတိ၊ တာဝ ပရိကမ္မဘာဝနာနာမ။ ပရိယာဒိန္နာယ ပန ဝိတက္ကနိကန္တိယာ ဥပစာရ ဘာဝနာနာမ ဟောတိ။ ဧသနယော သေသဇ္ဈာနုပစာရေသုပိ။ ဧဝံ တံတံဈာနင်္ဂဝိရာဂဘာဝနာဗလေန ဝိတက္ကာဒိကဿ ဩဠာရိကဿ တဿ တဿ ဈာနင်္ဂဿ ပဇဟနတ္ထာယ။ ဝိစာရာဒိသုခုမင်္ဂုပ္ပတ္တိယာတိ ဝိစာရာဒီနံ သုခုမာနံ စတုန္နံ တိဏ္ဏံ ဒွိန္နံ ပုန ဒွိန္နံဝါ ဈာနင်္ဂါနံ တေန တေန ဝိတက္ကာဒိနာ ဩဠာရိကေန အင်္ဂေန ဝိနာ ပုန ဥပ္ပတ္တိယာ။ ပါဟတောတိ ပဒဟန္တဿ။ ပဓာနနာမကံ အာတာပဝီရိယံ ကရောန္တဿာတိ အတ္ထော။ ဒုတီယဇ္ဈာနာဒယောတိ ဒုတီယဇ္ဈာနာဒီနိ သေသရူပါဝစရဇ္ဈာနာနိ။ ယထာရဟန္တိ ဣဒံ ဒွါဝီသကမ္မဋ္ဌာနေသု ဒုတီယဇ္ဈာနာဒီနံ အနုရူပါနိ ကသိဏအာနာပါဏာနိ သန္ဓာယ ဝုတ္တံ။ အဝသေသေသု ပန အဋ္ဌာရသကမ္မဋ္ဌာနေသု ယသ္မာ အရူပဇ္ဈာနာနိ နာမ အာရမ္မဏာတိက္ကမနဝသေနေဝ ပဝတ္တန္တိ။ တဒတိက္ကမနတ္ထဉ္စ ကသိဏုဂ္ဃာဋနံနာမ ဟောတိ။ တသ္မာ ယေသု တဒုဂ္ဃာဋနံ သမ္ဘဝတိ။ တာနိယေဝ ကသိဏာနိ ဒဿေတုံ အာကာသဝဇ္ဇိတကသိဏေသူတိ ဝုတ္တံ။ အာကာသကသိဏဉှိ ဥဂ္ဃာဋီယမာနံပိ အာကာသ မေဝ ဟောတီတိ နတ္ထိ တတ္ထ တဒတိက္ကမနသမ္ဘဝေါတိ။ ဥဂ္ဃာဋေတွာတိ ယထာဒိဋ္ဌေ ကသိဏနိမိတ္တေ ကသိဏနိမိတ္တသညံ အကတွာ တတ္ထ အာကာသံ အနန္တံ အာကာသံ အနန္တန္တိ အာကာသသညံ ပဝတ္တေန္တဿ စိတ္တေ တံကသိဏနိမိတ္တံ အန္တရဓာယတိ။ တပ္ပမာဏံ အာကာသမေဝ ဥပဋ္ဌာတိ။ ဧဝံ ကသိဏသညာဝိဓမနေန အာကာသသညာပဝတ္တနေနစ ယံကိဉ္စိ ကသိဏံ ဥဂ္ဃာဋေတွာ ဝိယောဇေတွာတိ အတ္ထော။ လဒ္ဓံ အာကာသံ အာရဗ္ဘာတိ ပါဋ္ဌသေသေန သမ္ဗန္ဓော။ ဧသနယော ပထမာ ရုပ္ပဝိညာဏန္တိအာဒီသုပိ။ အနန္တဝသေနာတိ အနန္တံ အာကာသန္တိ ဧဝံ ပဝတ္တမနသိကာရဝသေန။ သန္တမေတံ ပဏီတမေတန္တိ ပရိကမ္မံ ကရောန္တဿာတိ ဧတ္ထ တထာ သမ္ဘာဝေတွာ ပရိကမ္မံ ကရောန္တဿပိ အာရမ္မဏဿ သမတိက္ကန္တတ္တာ ဥပရိ ဈာနံ ဟောတိယေဝါတိ ဝုတ္တံ စတုတ္ထာရုပ္ပမပ္ပေတီတိ။ ပရိကမ္မံကတွာတိ သော ဘဂဝါ ဣတိပိ အရဟန္တိအာဒိနာ သမနုဿရဏပရိကမ္မံ ကတွာ။ တသ္မိန္တိ တသ္မိံ ဗုဒ္ဓဂုဏာဒိကေ အာလမ္ဗဏေ။ ဘူမတ္ထေ စေတံ ဘုမ္မဝစနံ။ နိမိတ္တေတိ တဿ အာရမ္မဏဿ အာကာရသင်္ခါတေ နိမိတ္တေ။ ဘာဝလက္ခဏေ စေတံ ဘုမ္မဝစနံ။ သာဓုကမုဂ္ဂဟိတေတိ အာရမ္မဏဿ ဝိဘူတတရ ဝသေနဝါ စိတ္တဿ တသ္မိံ နိန္နပေါဏပဗ္ဘာရဝသေနဝါ သုဋ္ဌု ဥဂ္ဂဟိတေ။ ဥပစာရောစ သမ္ပဇ္ဇတိ အရိယသာဝကာနံ ဒိဋ္ဌသစ္စာနန္တိ အဓိပ္ပာယော။ ဣတရေသံပိ ဝါ မရဏသညာဝဝတ္ထာနေသူတိ။ ဧတ္ထစ နီဝရဏဝိက္ခမ္ဘနေန ဈာနင်္ဂပါတုဘာဝေနစဥပစာရသမ္ပဒါ ဝေဒိတဗ္ဗာ။ ဧဝံ စတ္တာလီသကမ္မဋ္ဌာနေသုယထာရဟံသမထဇ္ဈာနာနံ ပဝတ္တိံ ဒဿေတွာဣဒါနိတေသုသမထဇ္ဈာနေသုကသိဏဇ္ဈာနာနံ နိသန္ဒဘူတံအဘိညာ ပဝတ္တိံ ဒဿေတုံ အဘိညာဝသေနပဝတ္တမာနန္တိအာဒိ ဝုတ္တံ။ တတ္ထ ယော ကတာဓိကာရော ဟောတိ။ အာသန္နဘဝေ သမထဇ္ဈာနေသု ကတာဘိယောဂေါဝါ ဟောတိ၊ ပူရိတဗောဓိသမ္ဘာရော မဟာပုရိသ ဇာတိကောဝါ။ တဿ အဋ္ဌဝိဓေသု နဝဝိဓေသုဝါ သမထဇ္ဈာနေသုသိဇ္ဈ မာနေသု အဘိညာပိ သိဇ္ဈတိယေဝ။ ရူပဇ္ဈာနမတ္တေသုပိ သိဇ္ဈန္တေသု သိဇ္ဈတိ ယေဝါတိပိ ဝဒန္တိ။ တေနေဝ ဟိ အဋ္ဌသာလိနိယံ ဝိသုဒ္ဓိမဂ္ဂေစ အာရုပ္ပဇ္ဈာနာနံပစ္စယဘာဝံအနုပဂတဿပိအာကာသကသိဏဇ္ဈာနဿ အဘိညာပါဒကတာသမ္ဘဝေါ ဝုတ္တောတိ။ ဒီဃနိကာယဋ္ဌကထာယံ ပန နဟိ အဋ္ဌသု သမာပတ္တီသု စုဒ္ဒသဟာကာရေဟိ စိဏ္ဏဝသီဘာဝံ ဝိနာ ဥပရိ အဘိညာဓိဂမော ဟောတီတိ ဝုတ္တံ။ တံ ပန ထပေတွာ ပုရိသ ဝိသေသေ အဝသေသာနံ ဗဟူနံ အာဒိကမ္မိကကုလပုတ္တာနံ သာဓာရဏဝသေန ဝုတ္တန္တိ ယုတ္တံ။ တေနေဝ ဟိ ဝိသုဒ္ဓိမဂ္ဂေ ဣမေဟိ ပန စုဒ္ဒသဟိ အာကာရေဟိ စိတ္တံ အပရိဒမေတွာ ပုဗ္ဗေ အဘာဝိတဘာဝနော အာဒိကမ္မိကော ယောဂါဝစရော ဣဒ္ဓိဝိကုဗ္ဗနံ သမ္ပာဒေဿတီတိ နေတံ ဌာနံ ဝိဇ္ဇတီတိ ဝုတ္တံ။ တသ္မာ တာဒိသာနံ အဋ္ဌသု သမာပတ္တီသု စိဏ္ဏဝသီဘာဝါနံ အဘိညာကမ္မေ အာဒိကမ္မိကကုလပုတ္တာနံ ကသိဏာ နုလောမတော ကသိဏပဋိလောမတောတိအာဒိနာ နယေန ဝုတ္တေဟိ စုဒ္ဒသဟိ အာကာရေဟိ အတ္တနော ရူပပဉ္စမဇ္ဈာနစိတ္တံ ပရိဒမေတွာ တိက္ခံ သူရံ အဘိနီဟာရက္ခမံ ကတွာ ဣဒါနိ ဣဒ္ဓိဝိကုဗ္ဗနံ ကရိဿာ မီတိ အာရဘန္တာနံ အဘိညာဝသေန ပဝတ္တမာနံ ပန ရူပါဝစရပဉ္စ မဇ္ဈာနံ ရူပါဒီသု ဆသု အာလမ္ဗဏေသု ယထာရဟံ အပ္ပေတီတိ ယောဇနာ ဝေဒိတဗ္ဗာ။ အဘိညာပါဒကပဉ္စမဇ္ဈာနာ ဝုဋ္ဌဟိတွာတိ အဘိညာယ ပါဒကတ္ထာယ ယံအဘိညာဇာတိကံ ရူပါဝစရပဉ္စမဇ္ဈာနံ သဗ္ဗပထမံ သမာပဇ္ဇိယတိ။ တတော ဘဝင်္ဂပဝတ္တိဝသေန ဝုဋ္ဌဟိတွာ။ အဓိဋ္ဌာတဗ္ဗန္တိ အဓိဋ္ဌေယျံ။ သဝတ္ထုကံ သတရူပသဟဿရူပါဒိကံ နိမ္မိတရူပံ။ တံ အဓိဋ္ဌေယျံ အာဒိ ယဿ အဝတ္ထုကဿ အာဝိဘာဝတိရောဘာဝါဒိကဿ ကမ္မဿာတိ အဓိဋ္ဌေယျာဒိကံ။ အာဝဇ္ဇိတွာ ပရိကမ္မံကရောန္တဿာတိ ဧတ္ထ ဣဒ္ဓိဝိဓေ တာဝ ယံယံသတာဒိကံ နိမ္မိတရူပံဝါ အာဝိဘာဝါဒိကံ နိမ္မိတကမ္မံဝါ နိပ္ဖာဒေတုံ ဣစ္ဆတိ။ တံ တံ အဝဇ္ဇိတွာ သလ္လက္ခေတွာ သတံ ဟောမိ သဟဿံ ဟောမီတိဝါ သတံ ဟောတု သဟဿံ ဟောတူတိဝါ ဣဒဉ္စိဒဉ္စ ဟောတု ဧဝဉ္စေဝဉ္စ ဟောတူတိဝါ ပရိကမ္မံ ကရောန္တဿ။ ဒိဗ္ဗသောတာဒီသု ပန ယံ ယံ အာရမ္မဏံ သောတုံဝါ ပဿိတုံဝါ ဇာနိတုံဝါ အနုဿရိတုံဝါ ဣစ္ဆတိ။ တံ တံ သလ္လက္ခေတွာ အသုကဿ အသုကာနံဝါ သဒ္ဒံ သုဏောမီတိအာဒိနာ ပရိကမ္မံ ကရောန္တဿ။ အဋ္ဌကထာယံ ပန ပရိကမ္မံ ကတွာ ပုန ပါဒကဇ္ဈာနသမာပဇ္ဇနံ အာဂတမေဝ။ ယထာဟ အဘိညာပါဒကဇ္ဈာနံ သမာပဇ္ဇိတွာ ဝုဋ္ဌာယ သစေ သတံ ဣစ္ဆတိ။ သတံ ဟောမီတိ ပရိကမ္မံ ကတွာ ပုန အဘိညာပါဒကံ ဈာနံ သမာပဇ္ဇိတွာ ဝုဋ္ဌာယ အဓိဋ္ဌာတိ။ အဓိဋ္ဌာနစိတ္တေန သဟေဝ သတံ ဟောတီတိ။ တတ္ထစ အာဒိတော ပါဒကဇ္ဈာနသမာပဇ္ဇနံ ပရိကမ္မ စိတ္တဿ သမာဒါနတ္ထာယ ဟောတိ။ ပစ္ဆိမံ ပန အဘိညာယ အနု ဗလပ္ပဒါနတ္ထာယာတိ။ တထာ ဟိ ပါဒကဇ္ဈာနဗလေန သုဋ္ဌု သမာဟိတံ ပရိကမ္မစိတ္တံနာမ အတ္တနော ဝိသယေ အဘိညာစိတ္တဂတိကံ ဟောတိ။ ပုဗ္ဗေနိဝါသာနုဿရဏကာလေ တေနေဝ စိတ္တေန တသ္မိံ ဘဝေ အတီတံ ဓမ္မဇာတံ ယာဝ ပဋိသန္ဓိယာ ဇာနာတိ။ တေနေဝ ဟိ အဋ္ဌကထာယံ တံသမ္ပယုတ္တံ ဉာဏံ ပရိကမ္မသမာဓိဉာဏန္တိ ဝုတ္တံ။ အတီတံသဉာဏန္တိပိ ဝုစ္စတီတိ။ သေသာဘိညာသုပိ တဿ ဉာဏဿ ဝိသယဝိသေသော ယထာရဟံ ဝတ္တဗ္ဗောတိ။ ထေရေန ပန ပစ္ဆိမံ ပါဒကဇ္ဈာနသမာပဇ္ဇနံနာမ န သဗ္ဗေသံ ဟောတိ။ န ဟိ အဘိညာသု ဝသီဘာဝပတ္တာနံ ပုန ပါဒကဇ္ဈာနေန ကိစ္စံ အတ္ထီတိ ကတွာ တံ ဣဓ နဂဟိတန္တိ ဒဋ္ဌဗ္ဗံ။ ရူပါဒီသုအာလမ္ဗဏေသုယထာရဟမပ္ပေတီတိ ဧတ္ထ ဣဒ္ဓိဝိဓဉာဏံ တာဝ တေကာလိကဘူတေသု ဆသု အာရမ္မဏေသု ပဝတ္တတိ။ တဉှိ ရူပါဒီသု ဆသု အာရမ္မဏဓမ္မေသု ယံ ယံ နိပ္ဖာဒေတိ။ တံ တံ အာရမ္မဏံ ကတွာ ပဝတ္တတိ။ ပါဒကဇ္ဈာနစိတ္တံ ပန ကာယဂတိကံ အဓိဋ္ဌဟိတွာ ဒိဿမာနေနကာယေန အာကာသေဂမနကာလေ အတီတံ ပါဒကဇ္ဈာနစိတ္တံ အာရဗ္ဘ ပဝတ္တတိ။ ကာယံ စိတ္တဂတိကံ အဓိဋ္ဌဟိတွာ အဒိဿမာနေန ကာယေန ဂမနကာလေ ပစ္စုပ္ပန္နံ ရူပကာယံ အာရဗ္ဘ ပဝတ္တတိ။ တထာပဝတ္တမာနဿ ပန တဿ ဉာဏဿ ကိဉ္စိရူပံ အာရမ္မဏ မတ္တံ ဟောတိ။ ကိဉ္စိ အာရမ္မဏပုရေဇာတံ။ ကိဉ္စိ ဝတ္ထာရမ္မဏ ပုရေဇာတံ ဟောတီတိ ဒဋ္ဌဗ္ဗံ။ အနာဂတေ ဣဒံနာမ ဟောတူတိ အဓိဋ္ဌာန ကာလေ အနာဂတံ တံတံရူပဓမ္မံ အာရဗ္ဘ ပဝတ္တတီတိ။ ပစ္စုပ္ပန္နော သဒ္ဒေါ ဒိဗ္ဗသောတဿ အာရမ္မဏံ ဟောတိ။ အတီတေ သတ္တဒိဝသာနိ အနာဂတေ သတ္တဒိဝသာနီတိ ဧတ္ထန္တရေ ကာလေ အတီတာ နာဂတပစ္စုပ္ပန္နဘူတံ ပရဿစိတ္တံ စတ္တာရောဝါ ခန္ဓာ စေတောပရိယ ဉာဏဿ။ စိတ္တဉှိ ဇာနန္တော တံ သမ္ပယုတ္တဓမ္မံပိ ဣစ္ဆန္တော ဇာနိဿတိယေဝ။ ဧဝဉ္စ ကတွာ ပဋ္ဌာနေ ကုသလာ ခန္ဓာ စေတော ပရိယဉာဏဿ ယထာကမ္မုပဂဉာဏဿ အာရမ္မဏပစ္စယေန ပစ္စယောတိ ဉာဏဒွယံ ဧကတော ကတွာ ဝုတ္တံ။ ဧတ္ထစ အဋ္ဌကထာယံ တာဝ ပရစိတ္တဿ ပစ္စုပ္ပန္နာလမ္ဗဏတာနာမ သန္တတိဝသေနဝါ အဒ္ဓါ ဝသေနဝါ ယောဇိတာ။ ယဒိ ဟိ ခဏိကဝသေန ယောဇေယျ။ အာဝဇ္ဇနေ ပစ္စုပ္ပန္နံ ယံကိဉ္စိ ဧကံ စိတ္တံ အာဝဇ္ဇေတွာ နိရုဒ္ဓေ ဇဝနာနိပိ တဒေဝ အာဝဇ္ဇနေန သဒ္ဓိံ နိရုဒ္ဓံ အတီတံ ဂဏှန္တီတိ တာနိ ကာလတော အာဝဇ္ဇနေန သဟ ဘိန္နာလမ္ဗဏာနိ နာမ ဟောန္တိ။ နစ အနိဋ္ဌေ မဂ္ဂဖလဝီထိတော အညသ္မိံ ဌာနေ ကာလမတ္တေနာပိ တေသံ တေန သဟ ဘိန္နာလမ္ဗဏတာ အဋ္ဌကထာစရိယေဟိ အနု မတာတိ။ တသ္မာ ဤဒိသေသု ဌာနေသု ပစ္စုပ္ပန္နံနာမ သန္တတိဝသေန အဒ္ဓါဝသေနစ ဂဟေတုံ ယုတ္တန္တိ။ မူလဋီကာယံ ပန ခဏိကပစ္စုပ္ပန္န ဝသေနေဝ ယောဇိတံ။ နဟိ အဘိဓမ္မေ အတီတာရမ္မဏတ္တိကံ သန္တတိ အဒ္ဓါနဝသေနေဝ ဝုတ္တန္တိ သက္ကာ ဝတ္တုံ။ ဣတရထာ ပစ္စုပ္ပန္နော ဓမ္မော ပစ္စုပ္ပန္နဿ ဓမ္မဿ အနန္တရပစ္စယေန ပစ္စယော အာသေဝနပစ္စယေန ပစ္စယောတိ ဝတ္တဗ္ဗော သိယာ။ န တု ဝုတ္တော။ အတီတော ဓမ္မော ပစ္စုပ္ပန္နဿ ဓမ္မဿ အနန္တရပစ္စယေန ပစ္စယော အာသေဝနပစ္စယေန ပစ္စယောတိစ္စေဝ ပန ဝုတ္တော၊ တသ္မာ အာဝဇ္ဇနာဒီနိ သဗ္ဗာနိ စိတ္တာနိ ပစ္စေကံ အတ္တနာ ခဏဝသေန သဟုပ္ပန္နာနိ ပရဿ စိတ္တာနိဂဏှန္တီတိ ယုတ္တံ၊ နစ တာနိ ဓမ္မတော ဘိန္နာ လမ္ဗဏာနိနာမ ဟောန္တိ။ ဂဟဏာ ကာရဿ အဘိန္နတ္တာ။ အာဝဇ္ဇနံပိ ဟိ စိတ္တန္တေဝ အာဝဇ္ဇတိ။ ဇဝနာနိစ စိတ္တံ စိတ္တန္တေဝ ဇဝန္တိ။ တာနိစ သဗ္ဗာနိ စိတ္တာနိဧဝ ဟောန္တီတိ။ အတီတာနန္တရ စုတိတော ပန ပဋ္ဌာယ အတီတာ ခန္ဓာ ခန္ဓုပနိ ဗန္ဓာ နာမ ဂေါတ္တကသိဏ နိမိတ္တာဒိကာ ပညတ္တိယော နိဗ္ဗာနဉ္စ ပုဗ္ဗေနိဝါသဉာဏဿ အာရမ္မဏံ ဟောတိ။ ပစ္စုပ္ပန္နံ ရူပါရမ္မဏံ ဒိဗ္ဗစက္ခုဿာတိ ဧဝံ ရူပါဒီသု ဆသု အာလမ္ဗဏေသု ယထာရဟ မပ္ပေတီတိ။ ဣဒါနိ အဘိညာဝသေန ပဝက္ခဿ တဿ ပဉ္စမဇ္ဈာနဿ ကိစ္စဘေဒေန ပဘေဒံ ဒဿေတုံ ဣဒ္ဓိဝိဓန္တိအာဒိဂါထ မာဟ။ တတ္ထ ယံ ယံ အဓိဋ္ဌာတိ။ ယထာ ယထာစ အဓိဋ္ဌာတိ။ တဿ တဿ တထာ တထာဝါ ဣဇ္ဈန သင်္ခါတော ဝိဓော ကောဋ္ဌာသော ပကာရောဝါ ဧတဿာတိ ဣဒ္ဓိဝိဓံ။ တံ ပန တိဝိဓံ အဓိဋ္ဌာ နိဒ္ဓိ ဝိကုဗ္ဗနိဒ္ဓိ မနောမယိဒ္ဓိ ဝသေန။ တတ္ထ အတ္တနော ပကတိဝဏ္ဏံ အဝိဇဟိတွာ တဿေဝ သတ သဟဿာဒိ ဗဟုဘာဝ ကရဏ ဝသေနဝါ အာကာသဂမနာဒိဝသေန ဝါ ဗဟိဒ္ဓါ နာနာဝဏ္ဏ ပါဋိဟာရိယ ဒဿန ဝသေနဝါ ပဝတ္တိတာ ဣဒ္ဓိ အဓိဋ္ဌာနိဒ္ဓိနာမ။ ပကတိဝဏ္ဏံ ပန ဝိဇဟိတွာ အတ္တာနမေဝ ကုမာရဝဏ္ဏနာဂဝဏ္ဏာဒိကံ ကတွာ ဒဿနဝသေန ပဝတ္တိတာ ဣဒ္ဓိ ဝိကုဗ္ဗနိဒ္ဓိနာမ။ အတ္တနော သရီရဗ္ဘန္တရေ အညံ သဗ္ဗသော အတ္တနာ သဒိသံ သရီရံ နိမ္မိနိတွာ နီဟရိတွာ ဒဿနဝသေန ပဝတ္တိတာ ဣဒ္ဓိ မနောမယိဒ္ဓိနာမ။ ဒိဝေ ဘဝံ ဒိဗ္ဗံ။ ဒေဝလောကေ ဇာတန္တိ အတ္ထော။ ဒိဗ္ဗဉ္စ တံ သောတဉ္စာတိ ဒိဗ္ဗသောတံ။ ဒေဝါနံ ဥဠာရကမ္မနိဗ္ဗတ္တာ ဒူရေပိ ပဋိစ္ဆန္နေပိ အာရမ္မဏသမ္ပဋိစ္ဆနသမတ္ထံ ပသာဒသောတံ။ ဒိဗ္ဗသောတသဒိသတ္တာ ပန ဣဒံ အဘိညာဉာဏံပိ ဒိဗ္ဗသောတန္တိ ဝုစ္စတိ။ ကသိဏဇ္ဈာန သင်္ခါတေနဝါ ဒိဗ္ဗဝိဟာရေန ပဋိလဒ္ဓတ္တာ သယဉ္စ တသ္မိံ ဒိဗ္ဗဝိဟာရေ ပရိယာပန္နတ္တာ ဒိဗ္ဗဉ္စ တံ သောတဉ္စာတိ ဒိဗ္ဗသောတံ။ ပရဿ စိတ္တံ ဝိဇာနန္တိ ဧတေနာတိ ပရစိတ္တဝိဇာနနံ။ တဒေဝ စေတောပရိယာယန္တိ ပရိစ္ဆိဇ္ဇ ဇာနန္တိ ဧတေနာတိ ကတွာ စေတောပရိယဉာဏန္တိပိ ဝုစ္စတိ။ ပုဗ္ဗေ နိဝါသော ဝုစ္စတိ အတီတဘဝေသု အတ္တနော ဆသု ဒွါရေသု အာပါတံ အာဂတာ သုဋ္ဌု ဝိဒိတာ ဓမ္မာ။ ပုဗ္ဗေ အတီတဇာတီသု ဂေါစရ နိဝါသဝသေန နိဝသိံသု အတ္တနော ဆဒွါရိကာနိ စိတ္တာနိ ဧတ္ထာတိ ကတွာ။ သဗ္ဗညုဗုဒ္ဓါနံ ပန ပရေသံ ဆဒွါရဂဟိတာပိ ဓမ္မာ ပုဗ္ဗေ နိဝါသော ဟောတိယေဝ၊ ပုဗ္ဗေ နိဝါသဿ အနုဿရဏံ ပုဗ္ဗေနိဝါသာနုဿတိ။ ဣဓ ပန တံ သမ္ပယုတ္တဉာဏံ အဓိပ္ပေတံ။ ပုဗ္ဗေ ဝုတ္တနယေန ဒိဗ္ဗဉ္စ တံ စက္ခုစာတိ ဒိဗ္ဗစက္ခု။ တံ သဒိသတ္တာ ဣဒံ အဘိညာဉာဏံပိ ဒိဗ္ဗစက္ခူတိ ဝုစ္စတိ။ ဒိဗ္ဗဝိဟာရ ဝသေန ပဋိလဒ္ဓတ္တာ သယဉ္စ ဒိဗ္ဗဝိဟာရသန္နိဿိတတ္တာ ဒိဗ္ဗဉ္စ တံ စက္ခုစာတိ ဒိဗ္ဗစက္ခု။ ယထာကမ္မုပဂဉာဏံ အနာဂတံသဉာဏန္တိ ဣမာနိ ဒွေ ဉာဏာနိ ဣမဿေဝ ပရိဘဏ္ဍဉာဏာနိနာမ။ နဟိ တေသံ ပဋိလာဘတ္ထာယ ဝိသုံ စိတ္တပရိဒမနပရိကမ္မံနာမ အတ္ထိ။ ဒိဗ္ဗစက္ခုဉာဏေ ပဋိလဒ္ဓေ တေသံပိ ပဋိလဒ္ဓတ္တာတိ။ တတ္ထ ဒိဗ္ဗစက္ခုနာ နိရယေသု ဒုက္ခံ ဒေဝေသုဝါ သုခံ အနုဘဝန္တေ သတ္တေ ဒိသွာ တေသံ အတီတံ ကမ္မံ ဇာနိဿာမီတိ ပရိကမ္မံ ကရောန္တဿ တံ ကမ္မာရမ္မဏံ ယထာကမ္မုပဂဉာဏံ ပဝတ္တတိ။ တတော စဝိတွာ ကတ္ထ ဘဝိဿန္တီတိ တေသံ အနာဂတေ ပဝတ္တိံ ပဿိဿာမီတိ ပရိကမ္မံ ကရောန္တဿ တေသံ အနာဂတခန္ဓာရမ္မဏံ အနာဂတံသဉာဏံ ပဝတ္တတိ။ ပုဗ္ဗေ နိဝါသာနုဿတိ ဉာဏံ ဝိယစ သဗ္ဗံပိ အနာဂတဓမ္မဇာတံ ဧတဿ အာရမ္မဏံ ဟောတိယေဝ။ ဧတဉှိ အတ္တနော ဝိသယေ သဗ္ဗညုတဉာဏဂတိကန္တိ အဋ္ဌကထာယံ ဝုတ္တံ။

ဝိဘာဝနိယံ ပန

အနာဂတေ သတ္တဒိဝသတော ပဋ္ဌာယ စိတ္တစေတသိကဓမ္မာ ဒုတီယဒိဝသတော ပဋ္ဌာယ ယံကိဉ္စိ အာရမ္မဏံ ဧတဿ ဝိသယောတိ အဓိပ္ပေတံ။ တမ္ပိ ယုတ္တံဝိယ ဒိဿတိ။

နဟိ ဘဝန္တရေပိ အနာဝတဓမ္မေ ဇာနိတုံ သမတ္ထံ ဧတံ ဣမသ္မိံ ဘဝေ အနာဂတဓမ္မေ နဇာနာတီတိ သက္ကာ ဘဝိတုံ။ ယထာ စေတံ၊ တထာ ပုဗ္ဗေနိဝါသဉာဏံပိ ဣမသ္မိံ ဘဝေ ပရသန္တာနဂတေ အတီတဓမ္မေတိ။ ပါဠိယံ ပန အဋ္ဌကထာသုစ ဘဝန္တရဂတဓမ္မေဟိ ဧဝ ဉာဏဒွယံ ယောဇိတံ။ တံ ပန အသာဓာရဏကာလဝသေန အာနုဘာဝဝိသေသပါကဋတ္ထံ ယောဇိတန္တိ ယုတ္တံ သိယာတိ။ ဂေါစရဘေဒေါတိ ဒသကသိဏာဒီသု ဂေါစရေသု သမထဇ္ဈာနာနံ ပဝတ္တိဘေဒေါ။

သမထကမ္မဋ္ဌာနနယော။

၁၇၁။ သဗ္ဗလောကိယမဟာဇနေဟိ ယထာဒိဋ္ဌံ ပုဂ္ဂလသတ္တဣတ္ထိ ပုရိသာဒိကံ နိစ္စ ဓုဝ သုခ အတ္တ နိမိတ္တဉ္စ အတိက္ကမိတွာ ဝိသေသေန ပဿန္တိ ဧတာယာတိ ဝိပဿနာ။ ကိရိယာ ကမ္မံ။ ဘာဝနာပယောဂေါ။ ဝိပဿနာယ ကမ္မံ ဝိပဿနာကမ္မံ။ ဝိပဿနာ ဧဝ ဝါ ကမ္မန္တိ ဝိပဿနာ ကမ္မံ။ ဝိပဿနာကမ္မဿ ဌာနံ အဓိဋ္ဌာနံ ဘုမီတိ ဝိပဿနာကမ္မဋ္ဌာနံ။ ခန္ဓာဒိဓမ္မဇာတံ။ ဝိပဿနာ ကမ္မမေဝ ဝါ ဥတ္တရုတ္တရဿ ဘာဝနာ ဝိသေသဿ အာနိသံသဝိသေသဿဝါ ဌာနံ အာသန္နကာရဏန္တိ ဝိပဿနာကမ္မဋ္ဌာနံ။ တသ္မိံ ဝိပဿနာကမ္မဋ္ဌာနေ သတ္တဝိဓေန ဝိသုဒ္ဓိ သင်္ဂဟော တီဏိ လက္ခဏာနီတိအာဒိနာ သမ္ဗန္ဓော။ နိစ္စသီလမေဝ သယဉ္စ ဒုဿိလျမလတော ဝိသုဒ္ဓတ္တာ ကာယံ ဝါစဉ္စ တတော ဝိသောဓနတော ဝိသုဒ္ဓီတိ သီလဝိသုဒ္ဓိ။ သုဘာဝိတ စိတ္တသန္တာနမေဝ သယဉ္စ နီဝရဏမလတော ဝိသုဒ္ဓတ္တာ တံသမင်္ဂိပုဂ္ဂလဉ္စ တတော ဝိသောဓနတော ဝိသုဒ္ဓီတိ စိတ္တဝိသုဒ္ဓိ။ စိတ္တသီသေန စေတ္ထ သမာဓိ အဓိပ္ပေတော။ ဓမ္မဝဝတ္ထာနဉာဏသင်္ခါတာ ဒိဋ္ဌိဧဝ တံ သမင်္ဂိပုဂ္ဂလံ သက္ကာယဒိဋ္ဌိမလတော ဝိသောဓနတော ဝိသုဒ္ဓီတိ ဒိဋ္ဌိဝိသုဒ္ဓိ။ သောဠသဝိဓံ အဋ္ဌဝိဓံ ကင်္ခံ ဝိတရန္တိ အတိက္ကမန္တိ ဧတာယာတိ ကင်္ခါဝိတရဏာ။ ပစ္စယပရိဂ္ဂဟဉာဏံ။ သာ ဧဝ တံသမင်္ဂိပုဂ္ဂလံ အဟေတု ဒိဋ္ဌိ ဝိသမဟေတုဒိဋ္ဌီဟိ သဒ္ဓိံ ယထာဝုတ္တာဟိ ဒုဝိဓာဟိ ကင်္ခါဟိ ဝိသောဓနတော ဝိသုဒ္ဓီတိ ကင်္ခါဝိတရဏဝိသုဒ္ဓိ။ မဂ္ဂေါစ အမဂ္ဂေါစ မဂ္ဂါမဂ္ဂါ။ တတ္ထ ဉာဏဒဿနဝိသုဒ္ဓါဓိဂမနဿ ဥပါယဘူတော မနသိကာရဝိဓိဝါ အရိယမဂ္ဂေါဝါ မဂ္ဂေါနာမ။ တဿ အနုပါယဘူတော မနသိကာရောဝါ အဓိမာနဝတ္ထူနိဝါ အမဂ္ဂေါနာမ။ မဂ္ဂဿ မဂ္ဂတော အမဂ္ဂဿစ အမဂ္ဂတော ဇာနနံ ဒဿနဉ္စ မဂ္ဂါမဂ္ဂဉာဏဒဿနံ။ တမေဝ တံသမင်္ဂီပုဂ္ဂလံ အမဂ္ဂေ မဂ္ဂသညာယ ဝိသောဓနတော ဝိသုဒ္ဓီတိ မဂ္ဂါမဂ္ဂဉာဏဒဿနဝိသုဒ္ဓိ နာမ။ ဥပရိ ဝိသေသံ ပဋိပဇ္ဇန္တိ ဧတာယာတိ ပဋိပဒါ။ ဝိပဿနာပရံပရသင်္ခါတော ပုဗ္ဗဘာဂမဂ္ဂေါ။ ပဋိပဒါဘူတံ ဉာဏဒဿနန္တိ ပဋိပဒါဉာဏဒဿနံ။ တမေဝ နိစ္စသညာဒိတော ဝိသုဒ္ဓတ္တာ ဝိသုဒ္ဓီတိ ပဋိပဒါဉာဏဒဿနဝိသုဒ္ဓိနာမ၊ အရိယမဂ္ဂဉာဏသင်္ခါတ ဉာဏဒဿနမေဝ သမ္မောဟမလတော ဝိသုဒ္ဓတ္တာ ဝိသုဒ္ဓီတိ ဉာဏဒဿနဝိသုဒ္ဓိနာမ။ ဧတ္ထစ သုတမယာဒိဝသေန သိဒ္ဓံ အနုမာန ဉာဏံပိ ဉာဏမေဝါတိ တံ ပဋိက္ခိပိတွာ အတ္ထပစ္စက္ခဉာဏမေဝ ဂဟေတုံ သဗ္ဗတ္ထ ဒဿနဂဟဏံ ကတန္တိ ဝေဒိတဗ္ဗံ။ လက္ခီယန္တိ သလ္လက္ခီယန္တိ ဣမေ အနိစ္စာဧဝါတိ ဧကန္တေန ဝိနိစ္ဆီယန္တိ ဓမ္မာ ဧတေနာတိ လက္ခဏံ အနိစ္စတာ ဧဝ လက္ခဏန္တိ အနိစ္စလက္ခဏံ။ ပုဗ္ဗပဒေ ဘာဝပစ္စယလောပေါ။ အညောဟိ အနိစ္စော၊ အညာ အနိစ္စတာတိ။ တတ္ထ ယထာဂမနကြိယာယောဂေန ပုရိသော ဂတောတိ ဝုစ္စတိ။ န ပန ဂမန ကြိယာ ပုရိသော။ နစ ပုရိသော ဂမနကြိယာ။ အညာ ဟိ ကြိယာ၊ အညော ပုရိသော။ တထာ အနိစ္စတာယောဂေန သဗ္ဗော သင်္ခတဓမ္မော အနိစ္စောတိ ဝုစ္စတိ။ န ပန အနိစ္စတာ သော ဓမ္မော၊ နစ သော ဓမ္မော အနိစ္စတာ။ အညာ ဟိ အနိစ္စတာ၊ အညော သော ဓမ္မောတိ။ ကတမာ ပန သာ အနိစ္စတာတိ။ ဝိပရိဏာမာ ကာရော။ ဇီရဏာကာရော ဘိဇ္ဇနာကာရောတိ ဝုတ္တံ ဟောတိ။ တံ ပန အာကာရံ ဒိသွာ တဒါကာရဝန္တေ ဓမ္မေ ဉာဏံ ပဝတ္တတိ အယံ ဓမ္မော အနိစ္စောတိ။ တသ္မာ သာ အနိစ္စတာယေဝ ဣဓ လက္ခဏန္တိပိ ဝုစ္စတီတိ။ ဧသနယော သေသေသုပိ ဒွီသု။ တတ္ထ ပန အဘိဏှသံပဋိပီဠနာကာရော ဒုက္ခတာနာမ။ အဝသဝတ္တနာကာရော အနတ္တတာနာမာတိ။ ယထာဝုတ္တာယ ပန အနိစ္စတာယ သဟ အနိစ္စဿ ဓမ္မဿ အနိစ္စေန ဝါ ဓမ္မေန သဟ အနိစ္စတာယ အနုအနုပဿနာ အနိစ္စာနုပဿနာ။ ဧသ နယော သေသာသုပိ ဒွီသု။ ယာဝ သရီရေ ဓမ္မာနံ တိဝိဓလက္ခဏယုတ္တတာ အတ္တနော ဉာဏေန ပညာယတိ။ တာဝ တေသု တိဝိဓလက္ခဏဝိဘာဝနဝသေန ပုနပ္ပုနံ မသနံ အာမသနံ သမ္မသနံ။ သမ္မသနာကာရေန ပဝတ္တံ ဉာဏံ သမ္မသနဉာဏံ။ ဥဒယော ဝုစ္စတိ တံတံ ခဏာနုရူပံ တံတံ ပစ္စယာနုရူပဉ္စ နဝနဝါနံ ဓမ္မာနံ ပါတု ဘာဝေါ စေဝ ဥပရုပရိ ဝဍ္ဎနဉ္စ။ ဝယော ဝုစ္စတိ ယတ္ထ ယတ္ထ လဒ္ဓပစ္စယာ နဝနဝါ ဓမ္မာ ပါတုဘဝန္တိ စေဝ ဝဍ္ဎန္တိစ။ တတ္ထ တတ္ထ အလဒ္ဓပစ္စယာနံ ပုရာဏဓမ္မာနံ အန္တရဓာနံ။ သမူဟ သန္တတိဝသေန ပန ဥဒယပက္ခဿဝါ ဝယပက္ခဿဝါ သမနုပဿနဉာဏံ ဥဒယဗ္ဗယဉာဏံ။ တေသု ပန ဒွီသု ပက္ခေသု ဥဒယကောဋ္ဌာသောနာမ ဥပရုပရိ ပါကဋော ဟုတွာ အာဂစ္ဆတိ။ ဝယကောဋ္ဌာသော ပန အပါကဋော။ သော ဧဝ စ အနိစ္စတာယ ပရမာ ကောဋီတိ တဿေဝ သုဋ္ဌုတရံ သမနုပဿနဉာဏံ ဘင်္ဂဉာဏံ။ ဘင်္ဂေ ဒိဋ္ဌေ ဧဝံ ဘိဇ္ဇနသဘာဝါနံ ဓမ္မာနံ အနေကသဟဿသောက ဒုက္ခဝတ္ထုဘာဝေန တထာ တထာ ဘာယိတဗ္ဗပကာရသမနုပဿနဉာဏံ ဘယဉာဏံ နာမ။ လောကေ ပန ကိဉ္စိ ဘယဝတ္ထုံ ပဿန္တာပိ အာသန္နေ အညသ္မိံ ပဋိသရဏေ သတိ န ဘာယန္တိ။ အသတိ ဧဝ ဘာယန္တိ။ ဧဝံ ဘာယိတဗ္ဗာနံ တေသံ သဗ္ဗသော အညပဋိသရဏာဘာဝဒဿနံ အာဒီနဝဉာဏံ နာမ။ ကုတောစိ ပဋိသရဏာဘာဝေန တေဟိ ဥက္ကဏ္ဌတာကာရ သဟိတံ ဝိပဿနာဉာဏံ နိဗ္ဗိဒါဉာဏံနာမ။ နိဗ္ဗိန္ဒီယမာနေဟိ တေဟိ အတ္တာနံ ဝိမုစ္စိတုံ အဇ္ဈာသယသဟိတံ ဝိပဿနာဉာဏံ မုစ္စိတုကမျတာဉာဏံ နာမ။ သုဋ္ဌု မုစ္စိတုံ ဣစ္ဆန္တဿ သီဃံ မုစ္စနတ္ထံ တေသံ ဓမ္မာနံ စတ္တာလီသာယ အာကာရေဟိ အနေကာဒီနဝရာသိ ဘာဝ ပဋိသင်္ခါနဝသေန သုဋ္ဌုဝိပ္ဖာရတရံ ပဝတ္တမာနံ ဝိပဿနာ ဉာဏံ ပဋိသင်္ခါဉာဏံ နာမ။ တေသံ ပန အနေကာဒီနဝရာသိဘာဝေ သုဋ္ဌု ဒိဋ္ဌေ သင်္ခါရေသု နိကန္တိယာ ပရိယာဒိန္နာယ ဣဒါနိ မုစ္စနုပါယော လဒ္ဓါတိ အဓိမတ္တဗျာပါရံ အကတွာ သမေန ဝါယာမေန သင်္ခါရေ ပရိဂ္ဂဏှန္တဿ သင်္ခါရပရိဂ္ဂဟေ မဇ္ဈတ္တာကာရသဟိတံ သင်္ခါရေသုဝါ ဘယဉ္စ နန္ဒိဉ္စ ပဟာယ ဥဒါသိနဘာဝသဟိတံ ဝိပဿနာဉာဏံ သင်္ခါရုပေက္ခာဉာဏံနာမ။ ဥပရိ မဂ္ဂပ္ပဝတ္တိံ ဝဟိတုံ သမတ္ထဘာဝေန မဂ္ဂုပ္ပတ္တိယာ အနုလောမေဟိ ထာမဗလေဟိ သမ္ပန္နံ ဝိပဿနာဉာဏံ အနုလောမဉာဏံ နာမ။ ဟေဋ္ဌိမာနံဝါ ဉာဏာနံတံ အနုလောမံ ဟောတိ လက္ခဏတ္တယဿ သုဋ္ဌုတရံ ဝိဘာဝနတော။ ဥပရိမဂ္ဂဿဝါ အနုလောမံ ဟောတိ တဿ ပရိကမ္မဘာဝတော၊ ပဒဋ္ဌာနတ္တာစာတိပိ အနုလောမဉာဏံ နာမာတိ။ အတ္တ ဇီဝသုညတာဒဿန ဗလေန ခန္ဓေသု ကိလေသဗန္ဓနတော ဝိမုစ္စမာနော မဂ္ဂေါ သုညတာဝိမောက္ခော နာမ။ သင်္ခါရာနံ ယာနိ နိမိတ္တာနိ ကိလေသာနံ အဝဿယော ဟောတိ။ တာနိ ဝိဓမိတွာ သဗ္ဗသော ဓမ္မာနံ အနာထ ဘာဝ ဒဿန ဗလေန ဝိမုစ္စမာနော မဂ္ဂေါ အနိမိတ္တောဝိမောက္ခော နာမ။ သင်္ခါရေသု သဗ္ဗသော အဿာသာဘာဝ ဒဿနဗလေန ဝိမုစ္စမာနော မဂ္ဂေါ အပ္ပဏိဟိတောဝိမောက္ခောနာမ။ သုညတာနုပဿနာတိ အနတ္တာနုပဿနာ။ သာ ဟိ ဓမ္မာနံ သမူဟဃန သန္တတိဃန ကိစ္စဃန အာရမ္မဏဃနေသု တံတံဃန ဝိနိဗ္ဘုဇ္ဇန ဝသေန ပဝတ္တတ္တာ အတ္တာ ဣတိ ဂဟေတဗ္ဗဿ ကဿစိ သာရဿ အဘာဝါနုပဿနတော သုညတာနုပဿနာတိ ဝုစ္စတိ။ အနိမိတ္တာ နုပဿနာတိ အနိစ္စာနုပဿနာ။ သာပိ ဟိ သန္တတိ ဝိစ္ဆေဒန ဝသေန ပဝတ္တတ္တာ အဟန္တိ ဂဟိတဿ နိမိတ္တဿ ဝိဓမနတော အနိမိတ္တာနုပဿနာတိ ဝုစ္စတိ။ အပဏိဟိတာနုပဿနာတိ ဒုက္ခာ နုပဿနာ။ သာပိ ဟိ မဟာအာဒီနဝရာသိ ဘာဝ ဝိဘာဝနဝသေန ပဝတ္တတ္တာ ဣဒံ မမ ဧတံ မမာတိ ဂဟေတဗ္ဗဿ ကဿစိ ပဏိဟိတ ဂုဏဿ အဘာဝါနုပဿနတော အပ္ပဏိဟိတာနုပဿနာတိ ဝုစ္စတီတိ။ ပါတိမောက္ခသံဝရသီလန္တိ ဝိနယပညတ္တိသီလံ။ တဉှိ သဗ္ဗလော ကိယသီလာနံ ဇေဋ္ဌကတ္တာ ပတိစ ဟောတိ။ စတုဘူမကကုသလာနံ အာဒိပဘဝဘူတတ္တာ မုခဉ္စ။ ဣတိ ပတိမုခဋ္ဌေန ပါတိမောက္ခန္တိ ဝုစ္စတိ။ တမေဝစ ဒုဿိလျမဂ္ဂဿ သံဝရဏတော ပိဒဟနတော သံဝရောတိ ဝုစ္စတီတိ။ ယေသံ ဓမ္မာနံ ဥပ္ပတ္တိယာ စက္ခာဒီနိ ဣန္ဒြိယာနိ ဝိဖန္ဒိတာနိ ဟောန္တိ။ လောလာနိ ဟောန္တိ။ တဒနုဗန္ဓာစ အကုသလဓမ္မာ ဥပ္ပဇ္ဇန္တိ။ တေသံ ဥပ္ပတ္တိ မဂ္ဂဿ သံဝရဏဝသေန ပဝတ္တမာနာ သတိ ဣန္ဒြိယ သံဝရောနာမ။ သော ဧဝ သီလန္တိ ဣန္ဒြိယသံဝရသီလံ။ အာဇီဝန္တိ ဇီဝိတံ ကပ္ပေန္တိ ဧတေနာတိ အာဇီဝေါ။ ပစ္စယပရိယေသနဝါယာမော။ သောယေဝ ဗုဒ္ဓပဋိကုဋ္ဌေဟိ ပုပ္ဖဒါနာဒီဟိ မိစ္ဆာပယောဂေဟိ တိဝိဓကုဟနဝတ္ထုဟိစ ပရိသုဒ္ဓတ္တာ အာဇီဝပါရိသုဒ္ဓိနာမ။ သာ ဧဝ သီလန္တိ သမာသော။ တထာရူပေန ပရိသုဒ္ဓေန ဘိက္ခာစာရာဒိနာ ပယောဂေန ပဋိလဒ္ဓါနံ ပစ္စယာနံ ပဋိဂ္ဂဟဏ ပရိဘုဉ္ဇနကာလေသု သမ္မောဟဿ ဂေဓဿ မဒဿ ပမာဒဿစ ပဟာနတ္ထံ တံတံပယောဇနမရိယာဒံဝါ ပဋိကူလလက္ခဏံဝါ ဓာတုမတ္တလက္ခဏံဝါ ပရိဂ္ဂဟဏ ပစ္စဝေက္ခနဝသေန ပဝတ္တံ ပစ္စယသေဝနေ ပဋိသင်္ခါဉာဏံ ပစ္စယ သန္နိဿိတသီလံနာမ။ ပရိသုဇ္ဈတီတိ ပရိသုဒ္ဓိ။ ပရိသုဒ္ဓိဧဝ ပါရိသုဒ္ဓိ။ သာ ဧဝ သီလန္တိ သမာသော။ စတ္တာရိ ပါရိသုဒ္ဓိသီလာနီတိ စတုပါရိ သုဒ္ဓိသီလံ။ စိတ္တဝိသုဒ္ဓီတိ ဧတ္ထ စိတ္တသဒ္ဒေန သမာဓိ နိဒ္ဒိဋ္ဌောတိ ဝုတ္တံ ဒုဝိဓောပိသမာဓိ စိတ္တဝိသုဒ္ဓိနာမာတိ။ လက္ခဏရသပစ္စုပဋ္ဌာနပဒဋ္ဌာန ဝသေနာတိ ဧတ္ထ ဓမ္မာနံ ပစ္စတ္တသဘာဝေါ လက္ခဏံနာမ။ အဂ္ဂိဿ ဥဏှတ္တံ ဝိယ။ တေန သဘာဝေန သာဓေတဗ္ဗံ ကိစ္စံဝါ သာဓနပစ္စယာ ပဋိလဒ္ဓဂုဏသင်္ခါတာ သမ္ပတ္တိဝါ ရသောနာမ။ အဂ္ဂိဿ ပရိဝါစန ဇောတနာနိ ဝိယ။ သာ ဧဝ သမ္ပတ္တိဝါ ကာရိယသင်္ခါတံ ဖလံဝါ ပစ္စုပဋ္ဌာနံနာမ။ အဂ္ဂိဿ ဓူမော ဝိယ။ အတ္တနော ဥပ္ပတ္တိယာ အသာဓာရဏပစ္စယသင်္ခါတံ အာသန္နကာရဏံ ပဒဋ္ဌာနံနာမ။ တေသံ ဝသေန နာမဿစ ရူပဿစ ပရိဂ္ဂဟော ဉာဏေန ပရိစ္ဆိန္ဒိတွာ ဂဟဏံ နာမရူပဝဝတ္ထာနံ ဒိဋ္ဌိဝိသုဒ္ဓိနာမ။ ဧတ္ထစ ပရိဂ္ဂဟော ဒုဝိဓော သင်္ခေပ ပရိဂ္ဂဟော ဝိတ္ထာရပရိဂ္ဂဟောတိ။ တတ္ထ အဇ္ဈတ္တဓမ္မေ ဒွိဓာ ကတွာ ဣဒံ နာမမေဝ၊ န ရူပံ။ ဣဒံ ရူပမေဝ၊ န နာမံ။ အညံ နာမံ အညံ ရူပံ။ တဒုဘယတောစ အညော အတ္တာဝါ ဇီဝေါဝါ သတ္တောဝါ ပုဂ္ဂလောဝါ မနုဿောဝါ ဒေဝေါဝါ ဗြဟ္မာဝါ နတ္ထီတိ ဧဝံ ပစ္စက္ခတော သုဒိဋ္ဌံ ကတွာ ပရိဂ္ဂဏှနံ သင်္ခေပပရိဂ္ဂဟောနာမ။ ဉာဏုတ္တရိကောဟိ ပုဂ္ဂလော ဧတ္တကမတ္တေနပိ သက္ကာယဒိဋ္ဌိံ ဝိက္ခမ္ဘေတုံ သက္ကောတိ သဒ္ဓိံ သညာ စိတ္တဝိပလ္လာသေဟီတိ။ တယော ဟိ ဝိပလ္လာသာ။ ယထာဟ-အနတ္တနိ အတ္တာတိ သညာဝိပလ္လာသော စိတ္တဝိပလ္လာသော ဒိဋ္ဌိဝိပလ္လာသောတိ။ တတ္ထ သတ္ထုသာသနဓမ္မေ သုဋ္ဌု ပတိဋ္ဌိတေန သဒ္ဓါမတ္တေနပိ ဒိဋ္ဌိ ဝိပလ္လာသော ဝိက္ခမ္ဘိတော ဟောတိ။ ဣတရေ ပန နာမရူပပရိဂ္ဂဟေ ကတေယေဝ ဝိက္ခမ္ဘိတာ ဟောန္တိ။ ယာဝစ ဧတေ ဒွေ အဝိက္ခမ္ဘိတာ ဟောန္တိ။ တာဝ နာမရူပပရိဂ္ဂဟောစ အပရိသုဒ္ဓါယေဝ ဟောတိ။ တံမူလိကာစ ကိလေသဓမ္မာ အဝိက္ခမ္ဘိတာ ဧဝ ဟောန္တီတိ အပိစ။ စတုန္နံ အာဟာရာနံ ဝသေန စတုဓာ၊ ပဉ္စန္နံ ခန္ဓာနံ ဝသေန ပဉ္စဓာ၊ ဆန္နံ ဓာတူနံ ဝသေန ဆဓာတိအာဒိနာ နယေန နာမရူပံ ပရိဂ္ဂဟေ တဗ္ဗမေဝ။ တတ္ထ ဆ ဓာတုယောနာမ ပထဝိဓာတု အာပေါဓာတု တေဇောဓာတု ဝါယောဓာတု အာကာသဓာတု ဝိညာဏဓာတုယော။ ပက္ကုသာတိ ကုလပုတ္တော ဟိ ဣမာ ဆ ဓာတုယော ပရိဂ္ဂဏှိတွာ အနာဂါမိဖလံ ပတွာ စပိတွာ သုဒ္ဓါဝါသေသု နိဗ္ဗတ္တောတိ။ ယတ္တကေ ဝါ ပန ဓမ္မေ ပရိဂ္ဂဏှန္တော အတ္တာ မေတိ ပဝတ္တမာနေ သညာစိတ္တဒိဋ္ဌိ ဝိပလ္လာသေ ဝိက္ခမ္ဘေတုံ သက္ကောတိ။ တတ္တကာပိ ပရိဂ္ဂဟေတဗ္ဗာ ယေဝါတိ။ ဣမသ္မိံ ပန သင်္ဂဟပကရဏေ ယော ယော စိတ္တစေတသိက ဝိဘာဂေါ ရူပဝိဘာဂေါစ ဟေဋ္ဌာ ဝုတ္တော။ တဿ သဗ္ဗဿ ဝသေန နာမရူပဿ ပရိဂ္ဂဏှနံ ဝိတ္ထာရပရိဂ္ဂဟောနာမ။ အယံပန အာဒိကမ္မိကာနံ အဝိသယော။ ပဋိဝိဒ္ဓစတုသစ္စာနံ ပန အာဘိဓမ္မိကတ္ထေရာနံ ဧဝ ဝိသယောတိ ဝေဒိတဗ္ဗော။ နာမရူပံ ပရိဂ္ဂဏှန္တဿ ပန နာမရူပ မတ္တတော ဥဒ္ဓံ အညဿ ကဿစိ အဘာဝဒဿနတောစ သရီရဗ္ဘန္တရေ ဇီဝသညိတော အတ္တာ အတ္ထိ။ သော ကရောတိ၊ သော ပဋိသံဝေဒေတိ၊ သံသရတိ၊ သန္ဓာဝတီတိ ဧဝံ ပဝတ္တာ ဒိဋ္ဌိ ပဟီယတိ။ သုဒ္ဓေ နာမေ ဧဝဝါရူပေ ဧဝဝါ ပုဂ္ဂလသတ္တကြိယသညိတာနံ ဤဟာဗျာပါရာနံ သဗ္ဗသော အဘာဝဒဿနတော တဒုဘယသံယောဂေဧဝ တေသံ လဗ္ဘမာနတာ ဒဿနတောစ တဒုဘယံဝါ ဧကမေကံဝါ ဥဒ္ဒိဿ အတ္တာတိ ပဝတ္တာ ဒိဋ္ဌိ ပဟီယတိ။ အတ္တာ ဇီဝေါ သတ္တော ပုဂ္ဂလော မနုဿော ဒေဝေါ ဗြဟ္မာတိ ဧဝမာဒီသု ဝေါဟာရေသုစ ဝေါဟာရ မတ္တေ အဋ္ဌတွာ အတ္တာနာမ ဧကန္တတော အတ္ထိ ဇီဝေါနာမ ဧကန္တတော အတ္ထီတိအာဒိနာ တဒတ္ထာဘိနိဝေသဝသေန အတိဓာဝနဉ္စ ပဟီယတီတိ ဒဋ္ဌဗ္ဗံ။ တဒတ္ထာဘိနိဝေသောတိစ အတ္တာနာမ အတ္ထိ ဇီဝေါနာမ အတ္ထီတိအာဒိနာ ဒဠှတရံ အဘိနိဝေသော။ အတိဓာဝနန္တိ နာမရူပံ အတ္တာတိအာဒိနာ ဂဟဏံ။ ပစ္စယပရိဂ္ဂဟောတိ ဧတ္ထပိ ဒုဝိဓော ပစ္စယပရိဂ္ဂဟော သင်္ခေပတော ဝိတ္ထာရတော စာတိ။ တတ္ထ ဝတ္ထာရမ္မဏဝသေန နာမဿ စိတ္တောတုကာဟာရဝသေန ရူပဿ အဝိဇ္ဇာတဏှုပါဒါနကမ္မဝသေန တဒုဘယဿစ ပစ္စယံ ပရိဂ္ဂဏှန္တော သင်္ခေပတော ပရိဂ္ဂဏှာတိနာမ။ ဟေဋ္ဌာ ပစ္စယသင်္ဂဟေ ဝိဘတ္တေဟိ ပဋိစ္စသမုပ္ပာဒနယ ပဋ္ဌာနနယေဟိ ပရိဂ္ဂဏှန္တော ဝိတ္ထာရတော ပရိဂ္ဂဏှာတိနာမ။ ဧတ္ထပိ ပဋ္ဌာနနယေန ပရိဂ္ဂဟော အာဒိကမ္မိကာနံ အဝိသယောဧဝ။ ပစ္စယံ ပရိဂ္ဂဏှန္တဿပန ယထာဝဝတ္ထိတဿ သဗ္ဗဿ နာမရူပဿ သဗ္ဗသော ပစ္စယာယတ္တဝုတ္တိကတာဒဿနတော အဟေတုကဒိဋ္ဌိ ပဟီယတိ။ အတ္တနော အနုရူပပစ္စယသာမဂ္ဂိယာ ဝိနာ အညထာ ပဝတ္တိယာ အဒဿနတော ဣဿရနိမ္မာန ကာလနိမ္မာနာဒိကာ ဝိသမဟေတုဒိဋ္ဌိစ ပဟီယတိ။ ဟေတုသမ္ဘာရပစ္စယေဟိ ကမ္မပ္ပဝတ္တိယာ ဝိပါကပ္ပဝတ္တိယာစ အညဿ ကမ္မကာရကဿဝါ ဝိပါက ဝေဒကဿဝါ ကတ္တုနော အဘာဝဒဿနတော ကာရက ဝေဒက ဒိဋ္ဌိ ပဟီယတိ။ အနမတဂ္ဂေစ သံသာရေ တီသု အဒ္ဓါသု ဟေတုဖလ ပရံပရာဝသေန ကေဝလဿ နာမရူပမတ္တဿေဝ ပဝတ္တိဒဿနတော အဟောသိံ နုခေါ အဟမတီတမဒ္ဓါနန္တိ ဧဝမာဒိကာယ ပုဂ္ဂလသတ္တ ဝိသယာယ သောဠသဝိဓာယ ကင်္ခါယစ အတိက္ကမော ဟောတိ။ သဘာဝဓမ္မပဝတ္တိယာစ သုဋ္ဌု ဒိဋ္ဌာယ ဒေသနာဓမ္မဿ သုဓမ္မတာ ဒဿနတော ဗုဒ္ဓသုဗုဒ္ဓတဉ္စ ဒိသွာ သတ္ထရိ ကင်္ခတိ ဓမ္မေ ကင်္ခတီတိအာဒိနယပဝတ္တာ အဋ္ဌဝိဓာပိ ကင်္ခါ ပဟီယတီတိ။ လောကုတ္တရဓမ္မာနံ သင်္ခတာနံပိ သတံ အသမ္မသနုပဂတ္တာ တေဘူမကသင်္ခါရေသူတိ ဝုတ္တံ။ အနုသယသမူဟနတ္ထဉ္စ သမ္မသနန္တိ ကတွာ ယတ္ထ ကာမရာဂါဒယော အနုသယာ အနုသေန္တိ။ တေယေဝ ဓမ္မာ သမ္မသနာရဟာ ဟောန္တီတိ ဝုတ္တံ တေဘူမကသင်္ခါရေသူတိ။ ဣမဿ စ ပဒဿ လက္ခဏတ္တယံ သမ္မသန္တဿာတိ ဣမိနာ သမ္ဗန္ဓော။ အတီတာဒိဘေဒဘိန္နေသူတိ အတီတာနာဂတပစ္စုပ္ပန္နဇ္ဈတ္တဗဟိဒ္ဓါဒီဟိ ဧကာဒသဟိ ဘေဒေဟိ ဘိန္နေသု။ ခန္ဓာဒိနယံအာရဗ္ဘာတိ ပဋိသမ္ဘိဒါမဂ္ဂေ ဝိဘတ္တံ ခန္ဓပဉ္စကံ ဒွါရဆက္ကံ အာရမ္မဏဆက္ကံ ဝိညာဏဆက္ကံ ဖဿဆက္ကံ ဝေဒနာဆက္ကံ သညာဆက္ကန္တိ ဧဝမာဒိကံ သမ္မသနဘူမိဝိဘာဂနယံ အာရဗ္ဘ အနုဂန္တွာ တံနယာနုသာရေနာတိ အတ္ထော။ တတ္ထ ပန တေဝီသတိယာ ဓမ္မကောဋ္ဌာသေသု ယဿ ယော ကောဋ္ဌာသော ပါကဋော ဟောတိ။ တေန တံ ဂဟေတွာ သမ္မသနံ အာရဘိတဗ္ဗံ။ သက္ကောန္တေန ပန သဗ္ဗမ္ပိ ဂဟေတွာ အာရဘိတဗ္ဗမေဝ။ ကလာပဝသေနသံခိပိတွာတိ ခန္ဓပဉ္စကေန ယေ ရူပံ တာဝ အတီတာနာဂတပစ္စုပ္ပန္နာဒိဘေဒဘိန္နံပိ သမာနံ သဗ္ဗံ ဧကရူပပိဏ္ဍဘာဝေန သံခိပိတွာ ဧသ နယော ဝေဒနာ ဒီသုပီတိ။ တတြာယံ နယော။ ယံကိဉ္စိ ရူပံ အတီတာနာဂတပစ္စုပ္ပန္နံ အဇ္ဈတ္တံဝါ ဗဟိဒ္ဓါဝါ ဩဠာရိတံဝါ သုခုမံဝါ ဟီနံဝါ ပဏီတံဝါ ယံ ဒူရေ သန္တိကေဝါ။ သဗ္ဗံ ရူပံ အနိစ္စံ ခယဋ္ဌေန ဒုက္ခံ ဘယဋ္ဌေန အနတ္တာ အသာရကဋ္ဌေန။ ယာကာစိ ဝေဒနာ။လ။ ယာကာစိ သညာ။လ။ ယေကေစိ သင်္ခါရာ။လ။ ယံကိဉ္စိ ဝိညာဏံ။လ။ သဗ္ဗံ ဝိညာဏံ အနိစ္စံ ခယဋ္ဌေန။ ဒုက္ခံ ဘယဋ္ဌေန အနတ္တာ အသာရကဋ္ဌေနာတိ။ ဧတ္ထစ သဗ္ဗံ ရူပံ။လ။ သဗ္ဗံ ဝိညာဏန္တိ ဂဟဏမေဝ ကလာပဝသေန သင်္ခိပနန္တိ ဒဋ္ဌဗ္ဗံ။ အနိစ္စံခယဋ္ဌေနာတိ ဧတ္ထ ရူပံ အနိစ္စံ ခယဋ္ဌေန။ ဝေဒနာ အနိစ္စာ။ သညာ အနိစ္စာ။ သင်္ခါရာ အနိစ္စာ။ ဝိညာဏံ အနိစ္စံ ခယဋ္ဌေနာတိအာဒိနာ နယေန သမ္မသိတဗ္ဗဓမ္မပရိဂ္ဂဟေန သဟေဝ သမ္မသနံ ကာတဗ္ဗံ။ ဣတရထာ သမ္မသနံ န ရုဟတိ။ တဒတ္ထဿ ပန ပါကဋတ္တာ ဣဓ အနိစ္စံ ခယဋ္ဌေနာတိအာဒိနာ သမ္မသနပဒမေဝ ထေရေန ဂဟိတန္တိ ဒဋ္ဌဗ္ဗံ။ တတ္ထ ရူပံ အနိစ္စံ ခယဋ္ဌေနာတိ တံတံရူပံ ဉာဏေန ဒဠှံ ဂဟေတွာ အယံ ပထဝိဓာတု အနိစ္စာ ခယဋ္ဌေန။ အယံ အာပေါဓာတု အနိစ္စာ ခယဋ္ဌေနာတိအာဒိနာ သမ္မသနံ ကာတဗ္ဗံ။ တတ္ထ ဣမသ္မိံ ကာယေ သဗ္ဗံ ထဒ္ဓကြိယာမတ္တံ ပထဝီနာမ။ သာစ ကြိယာ သီတုဏှပရိဝတ္တိယာဝါ ပရိဝတ္တတိ။ နာနာဟာရပရိဝတ္တိယာ ဝါ နာနာစိတ္တပရိဝတ္တိယာဝါ နာနိရိယာပထပရိဝတ္တိယာဝါ နာနာ ကာယိကကြိယာ ပရိဝတ္တိယာဝါ ပရိဝတ္တတိ။ နာနာသန္တတိ သင်္ကန္တိ ဟောတီတိ အတ္ထော။ တတ္ထ နဝနဝါသု ကြိယာသန္တတီသု ပါတုဘောန္တီသု ပုဗ္ဗပုဗ္ဗကြိယာသန္တတိယော နဿန္တိ။ ယသ္မာစ သန္တတိ နာမ ဓမ္မတော ဝိသုံ နတ္ထိ၊ တသ္မာ နဝနဝသန္တတီနံ ပါတုဘာဝေါနာမ နဝနဝကြိယာနံ ဥပ္ပတ္တိဧဝ။ ပုဗ္ဗပုဗ္ဗသန္တတီနံ နဿနံနာမ ပုဗ္ဗပုဗ္ဗ ကြိယာနံ ဘိဇ္ဇနမေဝါတိ။ ဧဝံ အတ္တနော ကာယေ နာနာထဒ္ဓကြိယာနံ ပရိဝတ္တိံ ပဿန္တော ပထဝိဓာတုယာ ခယဝယံ ပဿတိ။ တဉ္စ ပဿန္တော တံသဟဇာတာနံ ရူပါနံ ခယဝယံ ပဿတိယေဝ။ အာပေါ နာမ အာဗန္ဓနကြိယာမတ္တံ။ တေဇောနာမ သီတကြိယာမတ္တံ ဥဏှ ကြိယာမတ္တဉ္စ။ ဝါယောနာမ ဝိတ္ထမ္ဘနကြိယာမတ္တံ။ ဣမာစ ကြိယာ ခဏေ ခဏေ ပရိဝတ္တန္တိယေဝ။ ဣမာသဉ္စ၊ ဝိသုံ ဝိသုံ သန္တတိပရိဝတ္တိံ ပဿန္တော အာပါဒီနံ တံသဟဇာတရူပါနဉ္စ ခယဝယံ ပဿတိ။ သန္တတိပရိဝတ္တိံ ပန ဗဟိဒ္ဓါ စက္ခုနာ ဒိသွာ ဇာနာတိ၊ သရီရဗ္ဘန္တရေ ပန ကာယသံဖဿေန ဇာနာတိ။ သန္တတိသရီရဘူတာနံ ပန ဓာတူနံ ခယဝယံ ဉာဏေနဧဝ ပဿတိ။ တသ္မာ အတ္တနော သရီရဗ္ဘန္တရေ တံတံသန္တတိ ပရိဝတ္တိံ ဉတွာဝါ တထာ တထာ ကပ္ပေတွာ ဝါ ရူပဓာတူနံ အနိစ္စတ္တံ ဉာဏေန သုဒိဋ္ဌံ ကတွာ ပုနပ္ပုနံ သမ္မသိတဗ္ဗံ။ သေသခန္ဓေသုပိ တံတံသန္တတိနာနာတ္တံ ဉတွာ ဝေဒနာဒီနံ ခယဝယံ သုဒိဋ္ဌံ ကတွာ သမ္မသနံ ကာတဗ္ဗန္တိ။ ဘယဋ္ဌေနာတိ ဘာယိတဗ္ဗဋ္ဌေန။ ယဉှိ အနိစ္စံ ဟောတိ။ ခဏမတ္တေပိ ဝိပရိဏာမဓမ္မံ။ တံ ဧကန္တေန ဘာယိတဗ္ဗမေဝ။ ကသ္မာ၊ တဉှိ ယော အဘာယိတွာ ဝိဿာသံ ကရောတိ။ ဧတံ မေတိ အတ္တနော အင်္ဂံ ကတွာ ပရိဟရတိ။ တံ အပရိယန္တေဟိ အနေကသဟဿေဟိ အဘိသင်္ခရဏဒုက္ခေဟိဝါ ဝိပရိဏာမဒုက္ခေဟိဝါ အဘိဏှံ ပီဠေတိ။ ဗာဓတိ။ ဣတိ နာနာဒုက္ခဓမ္မေဟိ အဘိဏှံ သမ္ပဋိပီဠနသဘာဝတ္တာ ဧကန္တေန ဘာယိတဗ္ဗဋ္ဌေန ဒုက္ခံနာမာတိ။ အတ္တပဋိပက္ခတ္တာ အနတ္တာ။ ယော ဟိ ဣတော ဥဒ္ဓံ မယှံ အဗ္ဘန္တရိမတရောနာမ နတ္ထီတိ ဧဝံ ပရမဇ္ဈတ္တဘာဝေန ပရိဂ္ဂဟိတော ဟောတိ။ သော အတ္တာတိ ဝုစ္စတိ။ ကတမော ပန တထာပရိဂ္ဂဟိ တဗ္ဗောတိ။ ယော အတ္တနော ဝသေ သဗ္ဗသော ဝတ္တတိ။ ယထာ ဝုတ္တေဟိ အဘိသင်္ခရဏကိစ္စေဟိ ဝိနာ ကေဝလံ အတ္တနော ဆန္ဒေနဝါ ဝသေနဝါ အဇ္ဈာသယေနဝါ အာဏာဝိဓာနေနဝါ နိစ္စံ အဝိရဇ္ဈမာနော ပဝတ္တတိ။ သော တထာ ပရိဂ္ဂဟေတဗ္ဗောတိ။ တထာရူပေါ ဧဝ ဟိ ဓမ္မော နိစ္စံ သုခကာမာနံ ဒုက္ခပဋိကူလာနံ သတ္တာနံ အတ္တကိစ္စံ ကရောတိ နာမာတိ။ ယော ပန နိစ္စံ သုခကာမာနံ တေသံ ယထာပဝတ္တံ သုခံ ဝိဒ္ဓံသေတိ ဝိကိရေတိ။ ဒုက္ခပဋိကူလာနံ တေသံ အဘိသင်္ခရဏာဒိ မူလကံ နာနာဒုက္ခံ ဇနေတိ ဝဍ္ဎေတိ။ သော အတ္တပဋိပက္ခောဧဝ ဟောတိ။ ဣဒဉ္စ ရူပံ ဧဒိသမေဝ ဟောတိ။ ဣတိ အတ္တကိစ္စဿ အကရဏတော အတ္တပဋိပက္ခကိစ္စဿ ကရဏတောစ ရူပံ အနတ္တာနာမာတိ။ ကသ္မာ ပနေတံ အတ္တနော ဝသေ နဝတ္တတိ အတ္တကိစ္စံ န ကရောတိ အတ္တပဋိပက္ခကိစ္စံ ကရောတီတိ အာဟ အသာရကဋ္ဌေနာတိ။ တတ္ထ သာရောနာမ ပစ္စယသာမဂ္ဂိယာ ဝိနာ ကေဝလံ အဇ္ဈာသယမတ္တေန ဥပ္ပဇ္ဇိတုံဝါ ဥပ္ပဇ္ဇိတွာစ ပစ္စယုပတ္ထမ္ဘေန ဝိနာ ယဒိစ္ဆကံ ပတိဋ္ဌာတုံ ဝါ သမတ္ထဘာဝသင်္ခါတော ထာမဗလဝိသေသော ဝုစ္စတိ။ ရူပံ ပန သယံပိ ဧဝရူပေါ သာရောနာမ န ဟောတိ။ နစ ဧဝရူပေန သာရေန ယုတ္တန္တိ။ နဟိ တဿ ပစ္စယသာမဂ္ဂိယာ ဝိနာ ဥပ္ပဇ္ဇိတုံဝါ ဥပ္ပဇ္ဇိတွာပိ ပစ္စယုပတ္ထမ္ဘေန ဝိနာ ခဏမတ္တံပိ ပတိဋ္ဌာတုံဝါ ထာမောဝါ ဗလံဝါ အတ္ထိ။ ယဉ္စ အတ္တနော ထာမေန ဗလေန ဝိနာ ကေဝလံ ပစ္စယသာမဂ္ဂိ ဗလေနေဝ ဥပ္ပဇ္ဇတိ။ ပစ္စယုပတ္ထမ္ဘေနေဝ ပတိဋ္ဌာတိ။ တံ အနေက သဟဿာနိ ပစ္စယာဘိသင်္ခရဏဒုက္ခာနိ ဇနေတွာ ဧကန္တေန နိစ္စံ အတ္တပဋိပက္ခကိစ္စံ ကရောတိ၊ ပီဠေတိ၊ ဗာဓတိယေဝါတိ။ ဧသနယော ဝေဒနာ အနိစ္စာ ခယဋ္ဌေနာတိအာဒီသု။ ဣတိ လက္ခဏတ္တယံ သမ္မ သန္တဿာတိ သမ္ဗန္ဓော။ အဒ္ဓါနဝသေနာတိ ဧကေကဘဝပရိစ္ဆိန္နဿ ပဝတ္တကာလဿ ဝသေန။ နဟိ ဘဝန္တရေ ဥပ္ပန္နံ ခန္ဓပဉ္စကံ အညံ ဘဝန္တရံ ဂစ္ဆတိ။ တသ္မိံ တသ္မိံ ဘဝေဧဝ အသေသံ နိရုဇ္ဈတီတိ။ အပိစ၊ ဧကသ္မိံ ဘဝေပိ တိဏ္ဏံ ဝယာနံ မန္ဒာဒီနံ ဒသန္နံ ဒသကာနံ သံဝစ္ဆရဥတု မာသ ပက္ခတိထိ အဟောရတ္တိ ယာမ ပဟာရာဒီနဉ္စ ဝသေန အဒ္ဓါနဘေဒေါ ယောဇေတဗ္ဗော။ သန္တတိဝသေနာတိ သဘာဂေကသန္တာနဝသေန ပဝတ္တမာနာယ ရူပသန္တတိယာဝါ အရူပ သန္တတိယာဝါ ဝသေန။ ခဏဝသေနာတိ ရူပါရူပဓမ္မာနံ အာယု ပရိမာဏသင်္ခါတဿ ခဏဿ ဝသေန။ ဧတ္ထစ ခဏဝသေန သမ္မသနံနာမ သဗ္ဗညုဗုဒ္ဓါနံ ဧဝ ဝိသယော သိယာ၊ န သာဝကာနံ။ နဟိ တေ ဧဝံ ပရိတ္တကေ ခဏေ ဥပ္ပာဒံဝါ နိရောဓံဝါ သမ္ပာပုဏိတုံ သက္ကောန္တီတိ။ တသ္မာ အဒ္ဓါသန္တတိဝသေန သမ္မသနမေဝ ဣဓာ ဓိပ္ပေတန္တိ ဒဋ္ဌဗ္ဗံ။ လက္ခဏတ္တယံသမ္မသန္တဿာတိ တေသု တေဘူမက သင်္ခါရေသု ဓမ္မေသု တိလက္ခဏာနိ အာရောပေတွာ တေ ဓမ္မေ ပုနပ္ပုနံ အာမသန္တဿ ပရိမဇ္ဇန္တဿ။ တေသံ ဓမ္မာနံ အနိစ္စ ဇာတိကတံဝါ ဒုက္ခဇာတိကတံဝါ အနတ္တဇာတိကတံဝါ ဉာဏေ သုဋ္ဌု ပါကဋံ ကရောန္တဿာတိ အတ္ထော။ ဝိသေသတော ပန ဣမသ္မိံ ဉာဏေ အနိစ္စလက္ခဏဒဿနမေဝ ပဓာနံ။ တသ္မိံ ဒိဋ္ဌေယေဝ ဣတရာနိ ကမေန ဒိဋ္ဌာနိ ဟောန္တိ။ အဒိဋ္ဌေစ အဒိဋ္ဌာနီတိ။ တသ္မာ အာဒိတော အနိစ္စလက္ခဏဿေဝ သုဋ္ဌု ပါကဋဘာဝေါ အဓိပ္ပေတောတိ။ တေသွေဝါတိ တေဘူမကသင်္ခါရေသု ဧဝ။ ပစ္စယဝသေနာတိ ရူပက္ခန္ဓေ တာဝ အဝိဇ္ဇာတဏှုပါဒါနကမ္မာဟာရသင်္ခါတာနံ ပစ္စယာနံ ဝသေန။ ဝေဒနာသညာသင်္ခါရေသု ပန အာဟာရဋ္ဌာနေ ဖဿော ဝတ္တဗ္ဗော။ ဝိညာဏေစ နာမရူပံ။ တတြာယံ နယော။ အတီတာနန္တရဘဝေ အဝိဇ္ဇာတဏှုပါဒါန ကမ္မေသု အပ္ပဟီနဝသေန သမုဒိတေသု ဣမသ္မိံ ဘဝေ ပဋိသန္ဓိတော ပဋ္ဌာယ ရူပသန္တတိယော ဝေဒနာသညာသင်္ခါရ ဝိညာဏသန္တတိယောစ သမုဒေန္တိ။ ယာဝ မရဏကာလာ ခဏေ ခဏေ နာနာကလာပဝသေန ဥဒေန္တိ ပသဝန္တိ။ တေသု ပန တသ္မိံ ဘဝေ ဧဝ ပဟီနဝသေန နိရုဒ္ဓေသု တာ ရူပါရူပသန္တတိယော နိရုဇ္ဈန္တိ။ ဘဝန္တရေ ပုန အနုပ္ပာဒသင်္ခါတံ နိရောဓံ ပါပုဏန္တိ။ ဧတ္ထ ပန ယထာ ဥဒကေ သတိ မစ္ဆာနာမ ဟောန္တိ၊ အသတိ န ဟောန္တိ။ ဧဝံ ကမ္မဇေသု နာမရူပေသု သတိ ဣတရာနိ နာမရူပါနိ ဟောန္တိ။ အသတိ န ဟောန္တီတိ ဣတရာနိ သဗ္ဗာနိ ကမ္မဇေသု သင်္ဂဟေတွာ ကမ္မဝသေန ဥဒယဗ္ဗယဝိဓာနံ ဂဟိတန္တိ ဒဋ္ဌဗ္ဗံ။ ဧဝံ အဝိဇ္ဇာတဏှုပါဒါနကမ္မပစ္စယာနံ ဝသေန ပဉ္စက္ခန္ဓဿ ဥဒယဗ္ဗယပဝတ္တိ ဟောတီတိ။ ကမ္မဝသေန ပန ဣမသ္မိံ ဘဝေ သမုဒေန္တာနိပိ ပဋိသန္ဓိတော ပဋ္ဌာယ ခဏေ ခဏေ ကဗဠီကာရာဟာရူပတ္ထမ္ဘနံ လဒ္ဓါ ဧဝ ယထာ ပဝတ္တရူပသန္တတိယော အနုဗန္ဓ မာနာ နဝနဝါ ရူပသန္တတိယော သမုဒေန္တိ။ အလဒ္ဓါ ပန နိရုဇ္ဈန္တိ။ တံ သန္တတိယံ ပုန အနုပ္ပာဒသင်္ခါတံ ဧကဘဝနိရောဓံ ပါပုဏန္တိ၊ ယထာ ပဝတ္တသန္တတိယော ဝါ ဆိဇ္ဇန္တိ ဘိဇ္ဇန္တိ အန္တရဓာယန္တီတိ။

ဝေဒနာသညာသင်္ခါရာ ပန ဗဟိဒ္ဓါ အာရမ္မဏေသု အာပါတာဂတေသု အာရမ္မဏသမ္ဖဿံ လဒ္ဓါဧဝ ဆဒွါရိကာ ကုသလာကုသလဝိပါက ကြိယဘူတာ သမုဒေန္တိ။ နဝနဝါ သန္တတိယော ပါတုဘဝန္တိ။ အလဒ္ဓါ ပန နိရုဇ္ဈန္တိ။ သန္တတိံ န ဃဋေန္တိ။ ဝိညာဏံစ သဟဇာတ နာမေစ ဝတ္ထုရူပေစ ပဝတ္တမာနေဧဝ ပဝတ္တတိ။ နိဝတ္တမာနေ နိဝတ္တတီတိ။ ခဏဝသေနာတိ ဝုတ္တပ္ပကာရေ ပစ္စယေ အနပေက္ခိတွာ ကေဝလံ နာမရူပါနံ ပဝတ္တိက္ခဏဝသေန။ ခဏသဒ္ဒေန စေတ္ထ သမ္မသနဉာဏေ ဝုတ္တရူပသန္တတိ နာမသန္တတိယောပိ ဂဟေတဗ္ဗာ။ နဟိ သာဝကာနံ ဉာဏံ ခဏဝသေန နာမရူပါနံ ဥဒယံဝါ ဝယံ ဝါ သမ္ပာပုဏိတုံ သက္ကောတီတိ။ ယထာ ပန ရတ္တန္ဓကာရေ အန္တော လေဏေ မဟန္တော တမောခန္ဓော ဇာယတိ။ ဒီပံ ဇာလေန္တဿ ပန ဒီပေါဘာသော ဧကက္ခဏေ ဧဝ သကလံ အန္တောလေဏံ ဖရမာနော ဥဒေတိ။ တမောခန္ဓော ဝေတိ။ အာလောကဿ ဥဒယော ဟောတိ။ တမောခန္ဓဿ ဝယော။ ပုန ဒီပေ နိဗ္ဗာပီယမာနေ တမောခန္ဓဿ ဥဒယော ဟောတိ။ အာလောကဿ ဝယော။ ဧဝ မေဝံ သရီရေ နာနာဥတုဝသေနဝါ နာနာဟာရဝသေနဝါ နာနာစိတ္တ ဝသေနဝါ နာနိရိယာပထဝသေနဝါ နာနာပယောဂဝသေနဝါ ဥဒယပက္ခာနံ ဝယပက္ခာနဉ္စ နာနာသန္တတီနံ ဥဒယဉ္စ ဥဒယတော ဝယဉ္စ ဝယတော သုဒိဋ္ဌံ ကတွာ သမနုပဿန္တဿာတိ အတ္ထော။ ဧဝံ သမနုပဿန္တဿ ပန အာရဒ္ဓဝိပဿကဘာဝံ ပတ္တဿ ဥဒယဗ္ဗယ ဉာဏေ တိက္ခေ သူရေ ဝဟန္တေ ဒသဝိဓာ ဝိပဿနုပက္ကိလေသသင်္ခါတာ ပါရိပန္ထကဓမ္မာ ဥပ္ပဇ္ဇန္တိ။ တေ ဒဿေတုံ ဩဘာသောတိအာဒိဂါထ မာဟ။ တတ္ထ ဩဘာသောတိ ဝိပဿနာ စိတ္တသမုဋ္ဌိတော သရီရောဘာသော။ ပီတီတိ ဝိပဿနာစိတ္တသမ္ပယုတ္တာ ပဉ္စဝိဓာ ပီတိ။ ပဿဒ္ဓီတိ ဒုဝိဓာပဿဒ္ဓိ။ အဓိမောက္ခောတိ သဒ္ဓါဓိမောက္ခော။ ပဂ္ဂဟောတိ ဝီရိယံ။ သုခန္တိ သောမနဿံ။ ဉာဏန္တိ ဝိပဿနာ ဉာဏံ။ ဥပဋ္ဌာနန္တိ သတိ။ ဥပေက္ခာတိ တတြမဇ္ဈတ္တုပေက္ခာ စေဝ အာဝဇ္ဇနုပေက္ခာ စ။ နိကန္တီတိ ဩဘာသာဒီဟိ သဟ ဝိပဿနာယ အာလယံ ကုရုမာနာ သုခုမာ တဏှာ။ အယမေဝ ပန ဧကန္တတော ဝိပဿနုပက္ကိလေသော ဟောတိ။ ဩဘာသာဒယော ပန တဿာ ဝတ္ထုဘူတတ္တာ ဥပက္ကိလေသာတိ ဝုတ္တာ။ တေသု ဟိ ဥပ္ပဇ္ဇမာနေသု န ဝတ မေ ဣတော ပုဗ္ဗေ ဧဝရူပေါ ဩဘာသော ဥပ္ပန္နပုဗ္ဗော။ ဧဝရူပါ ပီတိ။လ။ ဥပေက္ခာ ဥပ္ပန္နပုဗ္ဗာ အဒ္ဓါ မဂ္ဂံ ပတ္တောသ္မိ။ ဖလံ ပတ္တောသ္မီတိ ဧဝံ အဿာဒသဟိတာ အမဂ္ဂေ မဂ္ဂသညာ အဖလေ ဖလသညာ ဥပ္ပဇ္ဇတိ။ တဒါ ကောစိ အဗျတ္တော ယောဂါဝစရော ကမ္မဋ္ဌာနံ ဝိဿဇ္ဇေတွာ အဓိမာနဝသေန ဝိက္ခိပန္တော ဝိစရတီတိ။ ဗျတ္တော ပန တာဝဒေဝ သဘိံ ပဋိလဘိတွာ ဣဒါနိ မမ ဧတေသု ဩဘာသာဒီသု ဧတံ မမ ဧသော ဟ မသ္မိ ဧသော မေ အတ္တာတိ စိတ္တဿ နိကာမနာကာရော ပညာယတိ။ နစ လောကုတ္တရဓမ္မောနာမ ဤဒိသဿ နိကာမနဿ ဝတ္ထု။ အဒ္ဓါ မမ သံကိလေသဓမ္မော ဥပ္ပန္နော။ သော ဝဍ္ဎမာနော မံ နိယျာနမုခတော ပါတေတွာ ဝဋ္ဋမုခေ ယောဇေဿတိ။ ဟန္ဒ တေသွေဝ လက္ခဏတ္တယံ အာရောပေတွာ နိကန္တိံ သောဓေတွာ ယထာပဝတ္တံ ဝိပဿနာဝီထိံ ပဋိပါဒေဿာမီတိ တေ ဩဘာသာဒယော ဧဝ တာဝ ပရိဂ္ဂဏှာတိ။ အယံ မေ ဩဘာသော အနိစ္စော ခယဋ္ဌေန ဒုက္ခော ဘယဋ္ဌေန အနတ္တာ အသာရကဋ္ဌေနာတိအာဒိနာ သမ္မသတီတိ အတ္ထော။ ဧဝံ တေ ဩဘာသာဒိကေ ဝိပဿနာယ ဥပက္ကိလေသဘူတေ ပရိပန္ထ ဓမ္မေ ပရိဂ္ဂဏှိတွာ တပ္ပရိဂ္ဂဟဝသေန တေသု နိကန္တိံ ပရိယာဒိ ယိတွာ ဌိတဿ ဥပ္ပန္နံ မဂ္ဂါမဂ္ဂလက္ခဏဝဝတ္ထာနဉာဏံ မဂ္ဂါမဂ္ဂဉာဏ ဒဿနဝိသုဒ္ဓိနာမ။ အမဂ္ဂေသု ဩဘာသာဒီသု မဂ္ဂသညာမလတော ယထာ ဝုတ္တနိကန္တိမလတောစ ဝိသုဒ္ဓတ္တာ။ တဉှိ ဉာဏံ တေသု နိကန္တိယာပိ ဝိက္ခမ္ဘိတာယ ဧဝ ဩဘာသာဒိပဋိဗန္ဓတော သုဋ္ဌု ပရိသုဒ္ဓံနာမ ဟောတီတိ။

[၂၄၅] ဝိဘာဝနိယံ ပန

အနိစ္စာဒိဝသေန ဩဘာသာဒိ ပဋိဗန္ဓပရိဂ္ဂဟံ ဝိသုံ အဝတွာ မဂ္ဂါမဂ္ဂဇာနနမတ္တေနေဝ မဂ္ဂါမဂ္ဂဉာဏဒဿနဝိသုဒ္ဓိနာမ ဝုတ္တာ။ သာ အဋ္ဌကထာယ န သမေတိ။

တထာ ပရိပန္ထဝိမုတ္တဿာတိ တထာ ပရိဂ္ဂဟေတွာ တတော ဝိပဿနုပက္ကိလေသပရိပန္ထတော ဝိမုတ္တဿ ယာဝါနုလောမာတိ ယာဝအနုလောမဉာဏာ။ တိလက္ခဏံ အာရောပေတွာတိ သမ္ဗန္ဓော။ ဝိပဿနာပရိပါကံအာဂမ္မာတိ သင်္ခါရုပေက္ခာဘာဝံ ပတွာ တိဝိဓ ဝိမောက္ခမုခဘာဝပ္ပတ္တိယာစေဝ သတ္တအရိယပုဂ္ဂလဝိဘာဂဿ ပစ္စယ ဘာဝပ္ပတ္တိယာစ ဝိပဿနာဉာဏဿ ပရိပါကံ အာဂမ္မ ပဋိစ္စ။ ဣဒါနိ အပ္ပနာ ဥပ္ပဇ္ဇိဿတီတိ ဝတ္တဗ္ဗက္ခဏေတိ သမ္ဗန္ဓော။ အပ္ပနာ တိစ သောတာပတ္တိမဂ္ဂအပ္ပနာ။ ဒွေတီဏိဝိပဿနာစိတ္တာနီတိ တိက္ခပညဿ ဒွေ ဝိပဿနာစိတ္တာနိ။ မန္ဒပညဿ တီဏိ ဝိပဿနာစိတ္တာနိ။ ယံကိဉ္စီတိ တီသု လက္ခဏေသု အညတရံ ယံကိဉ္စိ။ ယာသိခါပတ္တာသာနုလောမာသင်္ခါရုပေက္ခာတိ မတ္ထကပတ္တာ အနုလောမဉာဏသဟိတာ ယာ သင်္ခါရုပေက္ခာ အတ္ထိ။ သာ ဝုဋ္ဌာနဂါမိနိဝိပဿနာတိစ ဝုစ္စတီတိ ယောဇနာ။ သင်္ခါရုပေက္ခာဉာဏံ အနုလောမဉာဏန္တိ ဣမာနိ ဒွေ ဉာဏာနိ ဝုဋ္ဌာနဂါမိနိ ဝိပဿနာနာမာတိ ဝုစ္စန္တီတိ ဝုတ္တံ ဟောတိ။ ဣဒံ ပန ပရိပါကဂတဝိပဿနာ ဒဿနဝစနံ။ ဧတ္ထစ ဝုဋ္ဌာနန္တိ မဂ္ဂေါ ဝုစ္စတိ။ သော ဟိ ဝိပဿနာဉာဏဿ အာရမ္မဏဘူတ သင်္ခါရနိမိတ္တတောဝါ သယံ သံယောဇနဝတ္ထုဘာဝတောဝါ ဝုဋ္ဌာတိ။ တံ သမင်္ဂိပုဂ္ဂလံဝါ ပုထုဇ္ဇနဘာဝတော သမုဒယပဟာနဝသေန ဝဋ္ဋ ပဝတ္တတောစ ဝုဋ္ဌာပေတိ။ တသ္မာ ဝုဋ္ဌာနန္တိ ဝုစ္စတိ။ အဝဿံ ဝုဋ္ဌာနံ ဂစ္ဆန္တိ ဧတာယာတိ ဝုဋ္ဌာနဂါမိနီတိ ဧဝံ ဒွိန္နံ ဉာဏာနံ ဝုဋ္ဌာန ဂါမိနိဘာဝေါ ဝေဒိတဗ္ဗော။ တတောပရန္တိ ဒွိန္နံဝါ တိဏ္ဏံဝါ ဝိပဿနာ စိတ္တာနံ ပဝတ္တိယာ ပရံ နိဗ္ဗာနံ အာလမ္ဗိတွာတိ မဂ္ဂဿ အာဝဇ္ဇနဋ္ဌာနိယံ ဟုတွာ တဿ ပုရေစရဘာဝေန နိဗ္ဗာနမေဝ အာရမ္မဏံ ကတွာ။ တတော ယေဝစ တံ ဝိပဿနာနာမံ နလဘတီတိ။ ပုထုဇ္ဇန ဂေါတ္တမဘိဘဝန္တန္တိ ဧတေန ဂေါတ္တံ ဘဝတိ အဘိဘဝတီတိ ဂေါတြဘု။ ဂေါတ္တန္တိ စေတ္ထ ပရိပုဏ္ဏကိလေသ သမာယောဂေန အနရိယဘာဝသင်္ခါတာ ပုထုဇ္ဇနဇာတိ ဝုစ္စတီတိ ဣမမတ္ထံ ဒဿေတိ။ အရိယဂေါတ္တမဘိသမ္ဘောန္တဉ္စာတိ ဧတေန ဂေါတ္တံ ဘဝတိ ပါပုဏာတီတိ ဂေါတြဘု။ ဂေါတ္တန္တိစ တံတံ ကိလေသ ဝိသုဒ္ဓဘာဝ သင်္ခါတာ အရိယဇာတိ ဝုစ္စတီတိ ဣမမတ္ထံ ဒဿေတိ။ မဂ္ဂေါ အပ္ပနာ ဝီထိံ ဩတရတီတိ သမ္ဗန္ဓော။ ဒုက္ခသစ္စံပရိဇာနန္တောတိ တေဘူမက ဓမ္မာနံ ဧကန္တဒုက္ခဘာဝံ ပရိစ္ဆိဇ္ဇ ဇာနန္တော။ ပရိဇာနနဉ္စေတ္ထ တေသံ ဒုက္ခဘာဝ ပဋိစ္ဆာဒကဿ သမ္မောဟဿ ပဟာနမေဝ ဒဋ္ဌဗ္ဗံ။ သမုဒယ သစ္စံပဇဟန္တောတိ အတ္တနော စိတ္တသန္တာနေ အနုသယဘာဝေန ပဝတ္တမာနံ တဏှာသင်္ခါတံ သမုဒယသစ္စံ ဧကဒေသေနဝါ အနဝသေသေနဝါ အပစ္ဆာဝတ္တိကံ ကတွာ ပဇဟန္တော။ နိရောဓသစ္စံသစ္ဆိကရောန္တောတိ စက္ခုမာ ဝိယ နဘမဇ္ဈေ ဝိရောစမာနံ စန္ဒမဏ္ဍလံ အတ္တနော သန္တာနေ ဧကဒေသဿဝါ သကလဿဝါ ကိလေသ ဝဋ္ဋဿဝါ အာယတိံ ဘာဝိနော ဝိပါကဝဋ္ဋဿံဝါ အတ္တနော သန္တာနေ ပုန အနုပ္ပာဒဓမ္မဘာပတ္တိဝသေန နိရောဓသင်္ခါတံ နိဗ္ဗာနံ ပစ္စက္ခံ ကရောန္တော။ မဂ္ဂသစ္စံဘာဝနာဝသေနာတိ ဣတော ပုဗ္ဗေ အနမတဂ္ဂေ သံသာရေ အနုပ္ပန္နပုဗ္ဗဿ အဋ္ဌင်္ဂိကဿ မဂ္ဂသစ္စဿ ဥပ္ပာဒနသင်္ခါတာယ ဘာဝနာယ ဝသေန။ မဂ္ဂစေတနာယ ပန အာနန္တရိကဖလတ္တာ တင်္ခဏေ အပနီတဂ္ဂိကေ ပဒေသေ ပုန ဥဒကံ အာသိဉ္စိတွာ နိဗ္ဗာပေန္တော ဝိယ မဂ္ဂါနုကူလပဝတ္တိဝသေန ဒုက္ခပရိဇာနနာဒီနိ စတ္တာရိ ကိစ္စာနိ အနုကုဗ္ဗန္တာနိ တတောပရံ ဒွေဝါ တီဏိဝါ ဖလစိတ္တာနိ ပဝတ္တန္တိ။ တတောပရံ ဘဝင်္ဂပါတော ဟောတီတိ ဒဿေတုံ တတောပရန္တိအာဒိမာဟ။ ယထာ ပန ပသာဒစက္ခုနာဝါ ဒိဗ္ဗစက္ခုနာဝါ ကိဉ္စိရူပံ ပဿန္တဿ တာနိ စက္ခူနိ တံ ရူပံ ပစ္စက္ခံ ကတွာ ပစ္ဆာ တဿ ပုဂ္ဂလဿပိ ပစ္စက္ခတော ပါတုဘူတံ ကတွာ နိရုဇ္ဈန္တိ။ န တာဝ တေသံ ဥပ္ပတ္တိက္ခဏေ တံ ရူပံ တဿ အဟံ ဣဒံနာမ ပဿာမီတိ ပါကဋံ ဟောတိ။ ပစ္ဆာ ပန ပစ္စဝေက္ခန ဝါရေသု ပဝတ္တမာနေသုဧဝ တံရူပံ တဒနုဗန္ဓာစ နာနာကာရာ တဿ ပါတုဘူတာ ဟောန္တိ။ ဧဝမေဝံ ဣဓပိ ပစ္စဝေက္ခနဝါရေသု ပဝတ္တမာနေသုဧဝ နိဗ္ဗာနဉ္စ တဒနုဗန္ဓာနိ မဂ္ဂဖလာဒီနိစ ပါတုဘဝန္တီတိ ဝုတ္တံ ပုနဘဝင်္ဂံ။လ။ ပဝတ္တန္တီတိ။ ဣဒါနိ ပစ္စဝေက္ခနဉာဏဿ ဘူမိံ ဒဿေတုံ မဂ္ဂံဖလဉ္စနိဗ္ဗာနန္တိအာဒိဂါထ မာဟ။ တတ္ထ ပဏ္ဍိတောတိ အရိယာယ ပညာယ သမန္နာဂတော ဖလဋ္ဌော။ ဟီနေတိ ပဟီနေ။ သေသေတိ အပဟီနေ ဥပရိမဂ္ဂဝဇ္ဈေ။ ဣမာနိ ပန ဒွေ ပဟီနာဝသိဋ္ဌကိလေသပစ္စဝေက္ခနာနိ ကေသဉ္စိ ဇီဝိတသမသီသိပုဂ္ဂလာနံ ကိလေသ ဝိဘာဂေသု အကောဝိဒါနဉ္စ နလဗ္ဘန္တီတိ ဝုတ္တံ ပစ္စဝေက္ခတိဝါနဝါတိ။ ဧတ္ထစ ဝိသုဒ္ဓိမဂ္ဂေ တာဝ သဗ္ဗပထမံ မဂ္ဂပစ္စဝေက္ခနံ ဝုတ္တံ။ တတော ဖလပစ္စဝေက္ခနံ။ တတော ပဟီနကိလေသပစ္စဝေက္ခနံ။ တတော အဝသိဋ္ဌကိလေသပစ္စဝေက္ခနံ။ အဝသာနေ နိဗ္ဗာနပစ္စဝေက္ခနံ ဝုတ္တံ။ ပဋိသမ္ဘိဒါမဂ္ဂဋ္ဌကထာယံ ပန သဗ္ဗပထမံ ကိလေသပစ္စဝေက္ခနံ အဓိပ္ပေတံ။ ဝုတ္တဉှိ တတ္ထ ပစ္စဝေက္ခနေသု ပထမံ ကိလေသပစ္စဝေက္ခနံ ဟောတိ။ တတော မဂ္ဂဖလနိဗ္ဗာနပစ္စဝေက္ခနာနီတိ။ တံ ပန ပါဠိယံ ပစ္စဝေက္ခန ဉာဏဿ နိဒ္ဒေသတော ပုဗ္ဗေ ပထမံ ဆိန္နမနုပဿနေ ပညာဝိမုတ္တိ ဉာဏန္တိ ဧဝံ ဝိသုံ ဝိမုတ္တိဉာဏဿ အာဂတတ္တာ ဝုတ္တံ။ တတ္ထ ဆိန္နန္တိ တေန တေန မဂ္ဂေန သမုစ္ဆိန္နံ ကိလေသဇာတန္တိ အတ္ထော။ ပါဠိ အနု သာရေန ဝုစ္စမာနေ ပန ပထမံ ပဟီနံ ကိလေသာနံ ပစ္စဝေက္ခနံ။ တတော ပစ္စေကံ မဂ္ဂင်္ဂဗောဇ္ဈင်္ဂါဒီနံ ပစ္စဝေက္ခနံ။ တတော တေသံ အာရမ္မဏဘူတဿ နိဗ္ဗာနဿ ပစ္စဝေက္ခနံ။ တတော ဖလဓမ္မာနံ ပစ္စဝေက္ခနံ။ တတော တေသံ အာရမ္မဏဘူတဿ နိဗ္ဗာနဿ ပစ္စဝေက္ခနန္တိ ဝတ္တဗ္ဗံ ဟောတိ။ ပါဠိယဉှိ ပစ္စဝေက္ခနဉာဏနိဒ္ဒေသေ နိဗ္ဗာနံ မဂ္ဂဝါရေပိ ဖလဝါရေပိ ဒွိက္ခတ္တုံ အာဂတန္တိ။ ဣတိ နိဗ္ဗာနပစ္စဝေက္ခနံ နာမ ဣတရေသံ ပစ္စဝေက္ခနာနံ အာဒိမှိဝါ မဇ္ဈေ အန္တရန္တရာဝါ အဝသာနေဝါ ယတ္ထကတ္ထစိ ပဝတ္တတီတိ သိဒ္ဓံ ဟောတိ။ တထာ ကိလေသပစ္စဝေက္ခနံပိ မဂ္ဂဖလပစ္စဝေက္ခနာနံ အာဒိမှိဝါ ပစ္ဆာဝါတိ။ ဧဝဉှိ သတိ မဂ္ဂံ ဖလဉ္စ နိဗ္ဗာနန္တိ အယံ ဂါထာပိ အဝိရုဒ္ဓါ ဟောတီတိ။ ဧဝဉ္စ ကတွာ အဓိမာနနိဒ္ဒေသဋ္ဌကထာသု သော ဟိ မဂ္ဂဖလနိဗ္ဗာန ပဟီန ကိလေသာ ဝသိဋ္ဌကိလေသ ပစ္စဝေက္ခနေန သဉ္ဇာတသောမနဿော အရိယဂုဏပဋိဝေဓေ နိက္ကင်္ခေါတိ ဝုတ္တံ။ ဧတ္ထစ သောတာပန္နဿ ပဉ္စ ပစ္စဝေက္ခနာနိ ဟောန္တိ။ တထာ သကဒါဂါမိဿ ပဉ္စ။ အနာဂါမိဿ ပဉ္စ။ အရဟတော ပန အဝသိဋ္ဌကိလေသောနာမ နတ္ထီတိ စတ္တာရီတိ ဧကူနဝီသတိ ပစ္စဝေက္ခနာနိ ဟောန္တီတိ။ ဣဒဉ္စ ပရိပုဏ္ဏ ဝသေန လဗ္ဘမာနံ သန္ဓာယ ဝုတ္တံ။ အပရိပုဏ္ဏံပိ ပန ဟောတိယေဝ။ တထာ ဟိ စူဠဒုက္ခက္ခန္ဓသုတ္တအဋ္ဌကထာယံ သာ ပန န သဗ္ဗေသံ ပရိပုဏ္ဏာ ဟောတိ။ ဧကော ဟိ ပဟီနကိလေသမေဝ ပစ္စဝေက္ခတိ။ ဧကော အဝသိဋ္ဌကိလေသမေဝ။ ဧကော မဂ္ဂမေဝ။ ဧကော ဖလမေဝ။ ဧကောနိဗ္ဗာနမေဝ။ ဣမာသု ပန ပဉ္စသုပစ္စဝေက္ခနာသု ဧကံဝါဒွေဝါ နော လဒ္ဓုံ နဝဋ္ဋတီတိ ဝုတ္တံ။ ဧဝံ ဆဗ္ဗိသုဒ္ဓိကမေန ဘာဝေတဗ္ဗော စတုဗ္ဗိဓော မဂ္ဂေါ ဉာဏဒဿနဝိသုဒ္ဓိနာမ ဝုစ္စတီတိ သမ္ဗန္ဓော။ မဂ္ဂသဒ္ဒေန စေတ္ထ စတုဗ္ဗိဓံ မဂ္ဂဉာဏံ တဒနုကူလပဝတ္တိဝသေန ဖလဉာဏဉ္စ ဂဟိတန္တိ ဒဋ္ဌဗ္ဗံ။ ဧတ္ထာတိ ဝိပဿနာကမ္မဋ္ဌာနေ။ တတ္ထာတိ တေသု အနုပဿနာ မဂ္ဂဖလေသု။ အဘိနိဝိသနံ အဘိနိဝေသော။ ဟေဋ္ဌာ သိလာပထဝိယံ နိခါတသိနေရုပါဒဿ ဝိယ အဇ္ဈတ္တခန္ဓေသု ဒဠှံ ဂဟေတွာ ပဝတ္တီတိ အတ္ထော။ အတ္တာ ဣတိ အဘိနိဝေသော အတ္တာဘိနိဝေသော။ တံ အတ္တာဘိနိဝေသံ။ မုဉ္စန္တီတိ အဇ္ဈတ္တဓမ္မာနံ ကေဝလံ ပစ္စယာယတ္တ ဝုတ္တိတာယ ခဏဘင်္ဂဿစ အဒိဋ္ဌတ္တာ သော အဘိနိဝေသော ပဝတ္တတိ။ တသ္မာ တံ ဒွယံ သုဒိဋ္ဌံ ကတွာ ရူပံ အနတ္တာ ဝေဒနာ အနတ္တာတိအာဒိနာ ပုနပ္ပုနံ သမနုပဿနာဝသေန တံ အဘိနိဝေသံ ဝိမောစယမာနာတိ အတ္ထော။ ဝိမောက္ခမုခံ ဟောတိ၊ သုညတဝိမောက္ခ သင်္ခါတဿ မဂ္ဂဿ ဖလဿစ ပဝေသနဒွါရဘူတတ္တာ၊ ဝိပလ္လာသ နိမိတ္တန္တိ ဝိပရီတဝသေန အာသနံ ဥပဂမနံ ပဝတ္တနံဝါ ဝိပလ္လာသော။ အနိစ္စေ နိစ္စန္တိ ဥပဂမနံ ပဝတ္တနံဝါတိ အတ္ထော။ သော ဧဝ ကိလေ သုပ္ပတ္တိယာ အာသန္နကာရဏတ္တာ နိမိတ္တန္တိ ဝိပလ္လာသနိမိတ္တံ။ မုဉ္စန္တီတိ အဇ္ဈတ္တဓမ္မာနံ ခဏဘင်္ဂဿ အဒိဋ္ဌတ္တာ တံနိမိတ္တံ ဟောတီတိ တေသံ ခဏဘင်္ဂံ သုဒိဋ္ဌံ ကတွာ ရူပံ အနိစ္စံ ဝေဒနာ အနိစ္စာတိအာဒိနာ ပုနပ္ပုနံ သမနုပဿနာဝသေန တံနိမိတ္တံ ဝိမောစယမာနာတိ အတ္ထော။ တဏှာပဏိဓိန္တိ တဏှာဧဝ အဘိသင်္ဂဝသေန အာရမ္မဏေ စိတ္တဿ ပဏိဒဟနတော ဒဠှံ ထပနတော ပဏိဓီတိ တဏှာပဏိဓိ။ တံတဏှာ ပဏိဓိံ။ မုဉ္စန္တီတိ အဇ္ဈတ္တဓမ္မာနံ မဟာအာဒီနဝရာသိဘာဝဿ အဒိဋ္ဌတ္တာ သောပဏိဓိ ဟောတီတိ တေသံ မဟာအာဒီနဝရာသိဘာဝံ သုဒိဋ္ဌံ ကတွာ ရူပံဒုက္ခံ ဝေဒနာဒုက္ခာတိအာဒိနာ ပုနပ္ပုနံ သမနုပဿနာဝသေန တံပဏိဓိံ ဝိမောစယမာနာတိ အတ္ထော။ တသ္မာတိ ယသ္မာ ဧတာ ဝိမောက္ခမုခဘူတာ တိဿော အနုပဿနာ ဧဝံ ဝိသေသ နာမိကာ ဟောန္တိ။ တသ္မာ။ ယသ္မာ သင်္ခါရေသု သုညတဒဿနဝသေန အတ္ထသိဒ္ဓိနာမ ကေဝလံ အတ္တာကိနိဝေသဘူတဿ ဒိဋ္ဌိဂါဟဿ ပဋိပက္ခဘူတဿ ဉာဏဿေဝ အာနုဘာဝေါ ဟောတိ၊ တသ္မာ တထာ သမနုပဿိတွာ ဝိမုဉ္စန္တဿ ဝိပဿနာပိ မဂ္ဂေါပိ သဟဇာတဉာဏ ကိစ္စေန နာမံ လဘတီတိ ဝုတ္တံ ယဒိဝုဋ္ဌာန။လ။ သုညတောဝိမောက္ခော နာမဟောတိမဂ္ဂေါတိ။ အနိစ္စဒဿနဝသေန အတ္ထသိဒ္ဓိနာမ နိမိတ္တာတိ နိဝေသဘူတဿ မာနဂါဟဿ ပဋိပက္ခဘူတာယ သဒ္ဓါယပိ အာနုဘာဝေါ။ တသ္မာ တထာ သမနုပဿိတွာ ဝိမုစ္စန္တဿ ဝိပဿနာပိ မဂ္ဂေါပိ သဟဇာတသဒ္ဓါ ကိစ္စေန နာမံ လဘတီတိ ဝုတ္တံ ယဒိအနိစ္စတော။လ။ အနိမိတ္တော ဝိမောက္ခောနာမာတိ။ ဒုက္ခဒဿနဝသေန အတ္ထသိဒ္ဓိနာမ ပဏိဓိသင်္ခါတ တဏှာဂါဟပဋိပက္ခဘူတဿ သမာဓိဿပိ အာနုဘာဝေါ။ တသ္မာ တထာ သမနုပဿိတွာ ဝိမုစ္စန္တဿ ဝိပဿနာပိ မဂ္ဂေါပိ သဟဇာတသမာဓိကိစ္စေန နာမံ လဘတီတိ ဝုတ္တံ။ ယဒိ ဒုက္ခတော။ လ။ အပ္ပဏိဟိတော ဝိမောက္ခောနာမာတိ။ ဝုတ္တဉှေတံ ပဋိသမ္ဘိဒါမဂ္ဂေ အနိစ္စတော မနသိကရောတော သဒ္ဓိန္ဒြိယံ အဓိမတ္တံ ဟောတိ။ ဒုက္ခတော မနသိကရောတော သမာဓိန္ဒြိယံ အဓိမတ္တံ ဟောတိ။ အနတ္တတော မနသိကရောတော ပညိန္ဒြိယံ အဓိမတ္တံ ဟောတီတိ။ မဂ္ဂေ ပန တိဏ္ဏံ ဓမ္မာနံ ကိစ္စဝိသေသောနာမ ဝိပဿနာဂမနဝသေနေဝ သိဒ္ဓါတိ ဝုတ္တံ မဂ္ဂေါ။ လ။ နာမာနိ လဘတီတိ။ တတ္ထ သုညတဝိမောက္ခေန ဝိမုတ္တော အရိယသာဝကော သောတာပတ္တိမဂ္ဂက္ခဏေ ဓမ္မာနုသာရီနာမ ဟောတိ။ မဇ္ဈေ ဆသု မဂ္ဂဖလက္ခဏေသု ဒိဋ္ဌိပ္ပတ္တော နာမ။ အရဟတ္တဖလက္ခဏေ ပညာဝိမုတ္တောနာမ။ အနိမိတ္တဝိမောက္ခေန ဝိမုတ္တော သောတာပတ္တိမဂ္ဂက္ခဏေ သဒ္ဓါနုသာရီနာမ။ ဥပရိ သတ္တသု ဌာနေသု သဒ္ဓါဝိမုတ္တောနာမ။ အပဏိဟိတဝိမောက္ခေန ဝိမုတ္တော ပန အဋ္ဌသုပိ ဌာနေသု ကာယသက္ခိနာမ။ သောယေဝ အရူပဇ္ဈာနံ ပါဒကံ ကတွာ ဝိမုတ္တော အရဟတ္တဖလေ ဌိတော ဥဘတောဘာဂဝိမုတ္တော နာမာတိ ဧတ္တာဝတာ ယံ ဟေဋ္ဌာ ဝုတ္တံ ဝိပဿနာပရိပါကမာဂမ္မာတိ သင်္ခါရုပေက္ခာဘာဝံ ပတွာ တိဝိဓဝိမောက္ခမုခဘာဝပ္ပတ္တိယာစေဝ သတ္တအရိယပုဂ္ဂလဝိဘာဂဿ ပစ္စယဘာဝပ္ပတ္တိယာစ ဝိပဿနာဉာဏဿ ပရိပါကံ အာဂမ္မ ပဋိစ္စာတိ။ တံ သရူပတော နိဒ္ဒိဋ္ဌံ ဟောတီတိ။ မဂ္ဂဝီထိယံ ဖလဉ္စ မဂ္ဂါဂမန ဝသေန တထာ တီဏိ နာမာနိ လဘတီတိ ယောဇနာ။ ယထာဝုတ္တနယေန ဝိပဿန္တာနန္တိ ယဒိ အနတ္တတော ဝိပဿတီတိအာဒိနာ ဝုတ္တပ္ပကာရနယေန ဝိပဿန္တာနံ စတုန္နံ ဖလဋ္ဌာနံ ပုဂ္ဂလာနံ။ ယထာသကံဖလန္တိ သောတာပန္နဿ သောတာပတ္တိဖလံ။ သကဒါဂါမိဿ သကဒါဂါမိဖလန္တိအာဒိနာ နယေန အတ္တနော အတ္တနော သန္တကဘူတံ ယံ ယံ ဖလံ ဝိပဿနာဂမန ဝသေနေဝ သုညတာဒိဝိမောက္ခောတိစ ဝုစ္စတိ။ နမဂ္ဂါဂမနဝသေနာတိ အဓိပ္ပာယော။ ဧတ္ထစ ဝိပဿနာဂမန ဝသေန မဂ္ဂဿ အနိမိတ္တ နာမလာဘောနာမ သုတ္တန္တိကပရိယာယေန ဝုတ္တော။ အဘိဓမ္မေ ပန အနိမိတ္တော နာမမဂ္ဂေါ နအာဂတော။ နဟိ သော နိပ္ပရိယာယတော အနိမိတ္တောနာမ ဟောတိ။ ဟီနပဏီတာဒိဝသေန ဝိဘာဂါရဟဿ သင်္ခါရနိမိတ္တဿ သဗ္ဘာဝတော။ တေနေဝ ဟိဿ ဒုက္ခပဋိပဒါ ဒန္ဓာ ဘိညာဒိဝသေနဝါ ပါရမိဓမ္မာနံ ပရိတ္တမဟန္တာဒိဝသေနဝါ ဟီန ပဏီတ ပဏီတတရ ပဏီတတမ ဝိဘာဂေါ သန္ဒိဿတီတိ။ အဋ္ဌကထာယံ ပန အနိစ္စာနုပဿနာ သင်္ခါရေသု နိစ္စနိမိတ္တံ ဝိဓမနဝသေန ပဝတ္တတ္တာ အနိမိတ္တာနုပဿနာနာမ သမာနာပိ သယံ သင်္ခါရနိမိတ္တေ ပရိယာပန္နတ္တာ ဧကန္တေန အတ္တနောနာမံ မဂ္ဂဿ ဒါတုံ နသက္ကောတိ။ တသ္မာ မဂ္ဂေါ အဘိဓမ္မ ပရိယာယေန အနိမိတ္တနာမံ နလဘတီတိ ဝုတ္တံ။ သုတ္တန္တိကပရိယာယေန ပန ယထာ ပထဝိကသိဏာရမ္မဏံ ဈာနံ ပထဝိကသိဏန္တိ ဝုစ္စတိ။ ဧဝံ သုညတာဒိနာမံ နိဗ္ဗာနံ အာရမ္မဏံ ကတွာ ပဝတ္တာနိ မဂ္ဂဖလာနိပိ အာရမ္မဏဝသေနပိ သုညတာဒိနာမံ လဘန္တိ။ အာရမ္မဏကရဏဝသေန ပန သမ္ပယောဂဝသေနဝါ ပလိဗောဓကရာစ နိမိတ္တကရာစ ပဏိဓိကရာစ ရာဂါဒယော ကိလေသဓမ္မာ တေသု နတ္ထိ။ တသ္မာ တာနိ အညံ အာဂမနံဝါ အာရမ္မဏံဝါ အနပေက္ခိတွာ အတ္တနော သဘာဝေနပိ သုညတာဒိနာမံ လဘန္တီတိ ဒဿေတုံ အာရမ္မဏဝသေနာတိအာဒိ ဝုတ္တံ။ တတ္ထ သရသဝသေနာတိ အတ္တနော သဘာဝေန။ နာမတ္တယန္တိ သုညတာဒိ နာမတ္တိကံ။ သဗ္ဗတ္ထာတိ သဗ္ဗာသု မဂ္ဂဝီထိ ဖလသမာပတ္တိဝီထီသု။ သဗ္ဗေသံပီတိ သဗ္ဗေသံပိ မဂ္ဂဖလာနံ။ သမမေဝါတိ သမာနမေဝ။ သဒိသမေဝ။ ဧတ္ထပနာတိ ဧတေသု ပန ယထာဝုတ္တေသု မဂ္ဂဖလေသု။ ယသ္မာ သဗ္ဗာဒိဋ္ဌိယောစ သောဠသဝိဓာ ဝိစိကိစ္ဆာစ အတ္တဒိဋ္ဌိမူလိကာ ဧဝ ဟောန္တိ။ အတ္တဒိဋ္ဌိယာ နိရုဒ္ဓါယ နိရုဇ္ဈန္တိ သဗ္ဗာနိစ အပါယဂါမိ ကမ္မာနိနာမ အတ္တဒိဋ္ဌိယာ သတိယာဧဝ ဝိပစ္စန္တိ။ အသတိယာ န ဝိပစ္စန္တိ။ ဒိဋ္ဌသစ္စာနဉ္စ သာ ဒိဋ္ဌိ သဗ္ဗသော ပဟီနာ ဟောတိ။ တသ္မာ သောတာပတ္တိမဂ္ဂံ။လ။ ပဟီနာပါယ ဂမနောတိ ဝုတ္တံ။ အပါယံ ဂစ္ဆန္တိ ဧတေဟီတိ အပါယဂမနာနိ။ ဒိဋ္ဌိဝိစိကိစ္ဆာဝိပ္ပယုတ္တာ အကုသလဓမ္မာစေဝ ပုဗ္ဗေကတဒုစ္စရိတကမ္မာနိစ။ ပဟီနာနိ အပါယဂမနာနိ ဧတဿာတိ ပဟီနာပါယဂမနော။ ပဋိဝိဒ္ဓစတုသစ္စာနံ ပဟီနအတ္တဒိဋ္ဌီနံ ဗောဓိပက္ခိယဓမ္မာ ဧကန္တေန ဥပရူပရိ ဝဍ္ဎနပက္ခေ ဌိတာ ဟောန္တိ။ ကိလေသဓမ္မာ ပန ဟာယနပက္ခေ။ တသ္မာ တေ အနုက္ကမေန ပရိဟာယိတွာ ဂစ္ဆန္တာ ဥပရိမ ကောဋိယာ သတ္တဟိ ဘဝေဟိ သဗ္ဗသော ပရိက္ခယံ ဂစ္ဆန္တီတိ ဝုတ္တံ သတ္တက္ခတ္တုပရမောသောတာပန္နောနာမ ဟောတီတိ၊ တတ္ထ သတ္တက္ခတ္တုသဒ္ဒေန သတ္တပဋိသန္ဓိဂဟဏဝါရာ ဝုစ္စန္တိ။ ပရမောတိ ဥက္ကံသပရိစ္ဆေဒေါ။ ဣတိ သတ္တက္ခတ္တုံ ပရမော ဧတဿာတိ။ သတ္တက္ခတ္တုပရမော။ သော ပန ဒေဝေသု သတ္တက္ခတ္တု ပရမော၊ မနုဿေသု သတ္တက္ခတ္တု ပရမော၊ ဥဘယတ္ထ သတ္တက္ခတ္တု ပရမောတိ တိဝိဓော ဟောတိ။ ယထာဟ –

ကတမောစ ပုဂ္ဂလော သတ္တက္ခတ္တုပရမော ဣဓေကစ္စော ပုဂ္ဂလော တိဏ္ဏံ သံယောဇနာနံ ပရိက္ခယာ သောတာပန္နော ဟောတိ၊ အဝိနိပါတဓမ္မော နိယတော၊ သမ္ဗောဓိပရာယနော၊ သော သတ္တက္ခတ္တုံ ဒေဝေစ မနုဿေစ သန္ဓာဝိတွာ သံသရိတွာ ဒုက္ခဿန္တံ ကရောတိ။ အယံ ဝုစ္စတိ ပုဂ္ဂလော သတ္တက္ခတ္တု ပရမောတိ။

ဧတ္ထ ဟိ စ သဒ္ဒေါ အနိယမတ္ထော။ ဧတေန ယောစ ဒေဝေဧဝ သတ္တက္ခတ္တုံ သံသရတိ။ ယောစ မနုဿေဧဝ သတ္တက္ခတ္တုံ သံသရတိ။ ယောစ ဒေဝေစ မနုဿေစ မိဿကဘဝ ဝသေန သတ္တက္ခတ္တုံ သံသရတိ။ တိဝိဓော ပေသော သတ္တက္ခတ္တု ပရမောနာမာတိ ဒဿေတိ။ အဋ္ဌကထာယံ ပန မိဿကဘဝ ဝသေနဿ အတ္ထော ဝုတ္တော။ ဧတ္ထစ ယသ္မာ မဟဂ္ဂတဇ္ဈာနဿစ ဥပရိမဂ္ဂ ဝိပဿနာ ယစ အာနုဘာဝံ အနပေက္ခိတွာ ကေဝလံ ဣမဿ မဂ္ဂဿ အာနုဘာဝဂတိယာ ဧဝ သတ္တက္ခတ္တုပရမောနာမ ဝုတ္တော။ သောစ ပါဠိယံ ကတမေသံ ပဉ္စန္နံ ဣဓ နိဋ္ဌာ။ သတ္တက္ခတ္တုပရမဿ ကောလံ ကောလဿ ဧကဗီဇိဿ သကဒါဂါမိဿ ယောစ ဒိဋ္ဌေဝဓမ္မေ အရဟာတိ ဝုတ္တတ္တာ ကာမဘဝေဧဝ ဈာနရဟိတော သုက္ခဝိပဿကောဝါ ပရိဟီနဇ္ဈာနောဝါ ဒဋ္ဌဗ္ဗော။ တေနေဝစ ပဋိသမ္ဘိဒါမဂ္ဂဋ္ဌ ကထာယံ တယောပိ ဣမေ သောတာပန္နာ ကာမဘဝဝသေန ဝုတ္တာ။ ရူပါရူပဘဝေ ပန ဗဟုကာပိ ပဋိသန္ဓိယော ဂဏှန္တီတိ ဝုတ္တံ။ အင်္ဂုတ္တရဋ္ဌကထာယဉ္စ အဋ္ဌမံ ဘဝန္တိ ကာမဘဝေ အဋ္ဌမံ ပဋိသန္ဓိန္တိ ဝုတ္တံ။ တသ္မာ ယေ ကာမဘဝေယေဝ သတ္တဝါရတော ဩရံဝါ ဒိဋ္ဌဓမ္မေ ယေဝဝါ ဥပရိမဂ္ဂံ ဂဏှန္တိ။ တေသံ တထာရူပေါ ပဝတ္တိဝိသေသော ဥပရိ မဂ္ဂဝိပဿနာဗလေန သိဒ္ဓါတိ ဝေဒိတဗ္ဗော။ တထာ ဟိ အဋ္ဌကထာသု ဥပရိ တိဏ္ဏံ မဂ္ဂါနံ ဝိပဿနာ နိယာမေတီတိ ဝုတ္တံ။ ယေ ပန ဒိဋ္ဌဓမ္မေဝါ သက္ကအနာထပိဏ္ဍိကဝိသာခါဒယော ဝိယ သတ္တသု ဘဝေသု ယတ္ထကတ္ထစိ ဘဝေဝါ ဈာနံ ဥပ္ပာဒေတွာ ဗြဟ္မလောကံ ဂစ္ဆန္တိ။ ယေစ ဗြဟ္မလောကေယေဝ သောတာပတ္တိမဂ္ဂံ လဘိတွာ တတ္ထေဝ ပရိနိဗ္ဗာယန္တိ။ တေသံ တထာရူပေါ ပဝတ္တိ ဝိသေသော မဟဂ္ဂတဇ္ဈာနဗလေန သိဒ္ဓါတိ။ ယသ္မာစ ပါဠိယံ သတ္တက္ခတ္တုံ ဒေဝေစာတိ ဧတေန ကာမဘဝေ သတ္တ ဩပပါတိက ပဋိသန္ဓိယော ဒဿေတိ။ သတ္တက္ခတ္တုံ မနုဿေစာတိ ဧတေန သတ္တ ဂဗ္ဘသေယျကပဋိသန္ဓိယော ဒဿေတီတိ ဥဘယေန စုဒ္ဒသ ပဋိသန္ဓိယော ဒဿိတာ ဟောန္တိ။ တသ္မာ တေန ပရိယာယေန လဗ္ဘမာနေ စုဒ္ဒသဘဝေ သန္ဓာယ သက္ကပဉှသုတ္တေ –

ဣတော သတ္တ တတော သတ္တ၊ သံသရာနိ စတုဒ္ဒသာတိ ဝုတ္တံ။ တထာ အင်္ဂုတ္တရေစ တိကနိပါတေ သစေ ဥဒါယိ အာနန္ဒော အဝိတရာဂေါ ကာလံ ကရေယျ၊ တေန စိတ္တပသာဒေန သတ္တက္ခတ္တုံ ဒေဝေသု ဒေဝရဇ္ဇံ ကရေယျ။ သတ္တက္ခတ္တုံ ဣမသ္မိံယေဝ ဇမ္ဗုဒီပေ မဟာရဇ္ဇံ ကရေယျ။ အပိစ ဥဒါယိ အာနန္ဒော ဒိဋ္ဌေဝဓမ္မေ ပရိနိဗ္ဗာ ယိဿတီတိ ဝုတ္တံ။ ကေစိ ပန ဣမေဟိ သုတ္တပဒေဟိ သတ္တက္ခတ္တု ပရမဿ သောတာပန္နဿ ကာမဘဝေ စုဒ္ဒသ ပဋိသန္ဓိယော ဣစ္ဆန္တိ။ မဟာဝဂ္ဂသံယုတ္တဋီကာယဉ္စ ကေစိ ပန ကာမဘဝေ သတ္တက္ခတ္တုံဧဝ ဥပ္ပဇ္ဇတိ၊ န တတော ဥဒ္ဓန္တိ ဝဒန္တိ။ တံ ဝီမံသိတဗ္ဗန္တိ ဝုတ္တံ။ ဝိဘင်္ဂေ ပန တတ္ထ တတ္ထ အဋ္ဌာနသုတ္တေသုစ အဋ္ဌာနမေတံ အနဝကာသော ယံ ဒိဋ္ဌိသမ္ပန္နော ပုဂ္ဂလော အဋ္ဌမံ ဘဝံ နိဗ္ဗတ္တေယျ၊ နေတံ ဌာနံ ဝိဇ္ဇတီတိစ၊ အင်္ဂုတ္တရေ ဆက္ကနိပါတေ အဘဗ္ဗော ဒိဋ္ဌသမ္ပန္နော ပုဂ္ဂလော အဋ္ဌမံ ဘဝံ နိဗ္ဗတ္တေတုန္တိ စ၊ မဟာနိဒ္ဒေသေ အဇိတပဉှေ သောဟာပတ္တိမဂ္ဂဉာဏေန အဘိသင်္ခါရဝိညာဏဿ၊ နိရောဓေန သတ္တဘဝေ ထပေတွာ အနမ တဂ္ဂေသံသာရေ ယေ ဥပ္ပဇ္ဇေယျုံ နာမဉ္စ ရူပဉ္စ၊ ဧတ္ထေတေ နိရုဇ္ဈန္တိ။ ဝူပသမန္တိ။ အတ္ထံ ဂစ္ဆန္တိ။ ပဋိပဿမ္ဘန္တီတိစ၊ ဧဝံ ဒဠှံ ကတွာ ဝုတ္တတ္တာ ယထာဝုတ္တနယေနေဝ တေသံ သုတ္တပဒါနံ အတ္ထော ဝေဒိတဗ္ဗောတိ။ ရာဂဒေါသမောဟာနန္တိ ကာမရာဂဿ ဒေါသဿ တဒေကဋ္ဌမောဟဿစ။ တနုကရတ္တာတိ ယထာ သောတာပန္နသန္တာနေ ဥပ္ပဇ္ဇန္တာ ဓမ္မိကေသု ကာမဝတ္ထူသု ဗလဝန္တာ ဟုတွာ ဥပ္ပဇ္ဇန္တိ။ ယတော တေသံ မေထုနဝတ္ထုသမာယောဂေါပိ ပဝတ္တတိ၊ တထာ ဥပ္ပဇ္ဇိတုံ အသမတ္ထေ ကတွာ သံလိခနဝသေန တနုကရဏတော။ အဓိစ္စုပ္ပတ္တိဝသေနစ ပရိယုဋ္ဌာနမန္ဒတာဝသေနစ တနုကဘာဝံ သာဓနတောတိ အတ္ထော။ တတ္ထ အဓိစ္စုပ္ပတ္တိဝသေနာတိ ကဒါစိ စိရေန ဥပ္ပတ္တိဝသေန။ ပရိယုဋ္ဌာနမန္ဒတာယာတိ စိရေန ဥပ္ပဇ္ဇန္တာနံပိ မန္ဒတရံ ပရိယုဋ္ဌာနဝသေန။ မဟာသိဝတ္ထေရေန ပန တေသံပိ မေထုနဝတ္ထု သမာယောဂေါ ဣစ္ဆိတော။ သော မဟာဋ္ဌကထာယံ ပဋိက္ခိတ္တော။ ယဉ္စ ဆက္ကနိပါတေ မိဂါသာလဝတ္ထုမှိ အဗြဟ္မစာရိနောပိ ဣသိဒတ္တဿ ဗြာဟ္မဏဿ သကဒါဂါမိတ္တံ ဘဂဝတာ ဗျာကတံ၊ တံပိ တဿ အာသန္နမရဏကာလေ အဓိဂမဝသေန ဗျာကတန္တိ ဝေဒိတဗ္ဗံ။ သကိံဒေဝ ဣမံ လောကံ အာဂန္တွာ အာဂမနတော သကဒါဂါမီနာမ ဟောတီတိ ယောဇနာ။ ယမေတ္ထ ဝတ္တဗ္ဗံ၊ တံ ဟေဋ္ဌာ ပထမပရိစ္ဆေဒေ ဝုတ္တမေဝ။ အရဟတ္တံဘာဝေတွာတိ အရဟတ္တမဂ္ဂံ ဘာဝေတွာခီဏာ စတ္တာရော အာသဝါ ယဿာတိ ခီဏာသဝေါ။ ဒက္ခိဏာ ဝုစ္စတိ ကမ္မဉ္စ ကမ္မဖလဉ္စ သဒ္ဒဟိတွာ အာယတိံ ဖလပဋိလာဘတ္ထာယ ဒိန္နဒါနံ။ ဒက္ခန္တိ ဝဍ္ဎန္တိ သတ္တာ ဧတာယာတိ ကတွာ။ တာယ ပန ဒက္ခိဏာယ ဝိပတ္တိကရာနံ ကိလေသာနံ သဗ္ဗသော အဘာဝတော သမ္ပတ္တိကရာနဉ္စ သီလက္ခန္ဓာဒိဂုဏာနံ သဗ္ဗသော ပရိပုဏ္ဏတ္တာ ဒက္ခိဏေယျေသု အဂ္ဂေါ ဇေဋ္ဌကော ဟုတွာ တံဒက္ခိဏံ ပဋိဂ္ဂဟိတုံ အရဟတီတိ အဂ္ဂဒက္ခိဏေယျော။ ပုဂ္ဂလဘေဒေါတိ စတုန္နံ ဖလဋ္ဌပုဂ္ဂလာနံ သင်္ခေပဘေဒေါ။ ဝိတ္ထာရဘေဒေါ ပန ဧဝံ ဝေဒိတဗ္ဗော၊ အဋ္ဌကထာသု တာဝ စတုဝီသတိ သောတာပန္နာ၊ ဒွါဒသ သကဒါဂါမိနော၊ အဋ္ဌစတ္တာလီသ အနာဂါမိနော၊ ဒွါဒသ အရဟန္တောတိ ဖလဋ္ဌာနံ ဆန္နဝုတိဘေဒေါ ဝုတ္တော။ တတ္ထ သဒ္ဓါဓိမုတ္တော ပညာဓိမုတ္တောတိ ဒွေ သောတာပန္နာ ဟောန္တိ။ တေ ဧကဗီဇီ ကောလံကောလော သတ္တက္ခတ္တုပရမောစာတိ တီဟိ ဂုဏိတာ ဆ။ ပုန စတူဟိ ပဋိပဒါဟိ ဂုဏိတာ စတုဝီသတိ ဟောန္တိ။ တိဝိဓ ဝိမောက္ခစတုပဋိပဒါနံ ပန ဘေဒေန ဒွါဒသ သကဒါဂါမိနော ဒွါဒသ အရဟန္တောစ ဟောန္တိ။ အနာဂါမိနော ပန အဝိဟေသု တာဝ တယော အန္တရာပရိနိဗ္ဗာယိနော၊ ဧကော ဥပဟစ္စ ပရိနိဗ္ဗာယီ၊ ဧကော ဥဒ္ဓံ သောတော အကနိဋ္ဌဂါမီတိ ပဉ္စ။ တေယေဝ သသင်္ခါရပရိနိဗ္ဗာယီ အသင်္ခါရပရိနိဗ္ဗာယီစာတိ ဒွီဟိ ဂုဏိတာ ဒသ။ တထာ အတပ္ပသု ဒဿသုဒဿီသု တိစတ္တာလီသ ဟောန္တိ။ အကနိဋ္ဌေ ပန ဥဒ္ဓံသောတော အကနိဋ္ဌဂါမီနာမ နတ္ထီတိ စတ္တာရော သသင်္ခါရပရိနိဗ္ဗာယိနော စတ္တာရော အသင်္ခါရပရိနိဗ္ဗာယိနောတိ အဋ္ဌာတိ။ သဗ္ဗေ အဋ္ဌစတ္တာလီသ ဟောန္တီတိ။ သုတ္တနိပါတဋ္ဌကထာယံ ပန ဒွါဒသ သောတာပန္နာ၊ ဒွါဒသ သကဒါဂါမိနော၊ စတုဝီသတိ အနာဂါမိနော၊ ဒွေ အရဟန္တော၊ စတ္တာရော မဂ္ဂဋ္ဌာတိ စတုပညာသ ဟောန္တိ။ တေယေဝ သဒ္ဓါဓုရ ပညာဓုရ ဝသေန ဒွီဟိ ဂုဏိတာ အဋ္ဌသတံ ပုဂ္ဂလာ ဟောန္တီတိ အာဂတော။ ဧတ္ထာတိ ဧတသ္မိံ ပုဂ္ဂလဘေဒေ။ သဗ္ဗေသံပီတိ စတုန္နံ ဖလဋ္ဌာနံပိ သာဓာရဏာဝ။ န နိရောဓသမာပတ္တိ ဝိယ ဧကစ္စာနံဧဝ သာဓာရဏာတိ အဓိပ္ပာယော။ အတိဝိယ မမာယိတဿ အဘိနိန္ဒိ တဿ အဇ္ဈောသိတဿ အတ္တနော စိတ္တသန္တာနဿ အပဝတ္တိကရဏံ နာမ ဗဟလရာဂဝိမုတ္တာနံဧဝ သိဇ္ဈတီတိ ဝုတ္တံ၊ အနာဂါမီနဉ္စေဝ အရဟန္တာနဉ္စလဗ္ဘတီတိ။ တေသံပိ အဋ္ဌသမာပတ္တိလာဘီနံ ကာမရူပဘဝဂတာနညေဝ ဣဓ ဂဟဏံ ဒဋ္ဌဗ္ဗံ။ ကသ္မာ၊ အာဒိတော ပဋ္ဌာယ အနုပုဗ္ဗနိရောဓဗလေနေဝ ဂန္တဗ္ဗတ္တာ။ တေနာဟ တတ္ထာတိအာဒိ။ တတြာယံ ဝိဓိ၊ ပထမဇ္ဈာနံ သမာပဇ္ဇိတွာ ဝုဋ္ဌာယ တတ္ထ ဂတေ သင်္ခါရေ အနိစ္စတော ဒုက္ခတော အနတ္တတော ဝိပဿတိ။ တတော ဒုတီယဇ္ဈာနံ သမာပဇ္ဇိတွာ ဝုဋ္ဌာယ တတ္ထဂတေ သင်္ခါရေ တထေဝ ဝိပဿတိ။ တတော တတီယံ ဈာနံ။ တတော စတုတ္ထံ ဈာနံ။ တတော ပဉ္စမံ ဈာနံ။ တတော အာကာသာနဉ္စာယတနံ။ တတော ဝိညာဏဉ္စာ ယတနံ သမာပဇ္ဇိတွာ ဝုဋ္ဌာယ တတ္ထဂတေ သင်္ခါရေ တထေဝ ဝိပဿတိ။ တတော အာကိဉ္စညာယတနံ သမာပဇ္ဇိတွာ ဝုဋ္ဌာယ နာနာဗဒ္ဓအဝိကောပနံ သင်္ဃပတိမာနနံ သတ္ထုပက္ကောသနံ အဒ္ဓါန ပရိစ္ဆေဒေါတိ ဣမံ စတုဗ္ဗိဓံ ပုဗ္ဗကိစ္စံ ကရောတိ။ တတော နေဝသညာ နာသညာယတနံ သမာပဇ္ဇတိ။ ဧကံဝါ ဒွေဝါ စိတ္တဝါရေ အတိက္ကမိတွာ အစိတ္တကော ဟောတိ နိရောဓံ ဖုသတီတိ။ တတ္ထတတ္ထေဝါတိ တတော တတော ဈာနတော တသ္မိံ တသ္မိံ ဝုဋ္ဌိတကာလေဧဝ။ ဝိပဿန္တောတိ နိရောဓဿ သမထ ဝိပဿနာ ယုဂနန္ဓဗလေနေဝ ပတ္တဗ္ဗတ္တာ ဝိပဿနာဗလေနပိ စိတ္တသန္တာနဿ သဏှသုခုမဘာဝါ ပါဒနတ္ထံ ဣဒံ ပထမဇ္ဈာနံ အနိစ္စန္တိအာဒိနာ နယေန ဝိပဿန္တော။ ယာဝအာကိဉ္စညာယတနံဂန္တွာတိ ယာဝ အာကိဉ္စညာယတနဇ္ဈာနံ၊ တာဝ သမာပဇ္ဇနဝုဋ္ဌာနဝိပဿနာဝသေန ဂန္တွာ။ အာဝဇ္ဇနာဓိဋ္ဌာန ပစ္စဝေက္ခနာနိပေတ္ထ ဣစ္ဆိတဗ္ဗာနိယေဝ။ တေနေဝ ဟိ ပဋိသမ္ဘိဒါမဂ္ဂေ ပဉ္စဝိဓာ ဝသိယော နိရောဓပရိကမ္မေသု ဝုတ္တာတိ။ တတောပရန္တိ အာကိဉ္စညာယတနဇ္ဈာနဂတေ သင်္ခါရေဝိပဿနာနန္တရံ၊ အဓိဋ္ဌာတဗ္ဗန္တိ အဓိဋ္ဌေယျံ။ အတ္တနော သရီရာဗန္ဓေ ပရိက္ခာရေ ထပေတွာ နာနာဗန္ဓာနိ စိဝရာဒီနိ ပရိက္ခာရာနိ အဂ္ဂိအာဒိနာ ပရိဿယေန မာဝိနဿန္တူတိဝါ၊ ဧကသီမာယံ သင်္ဃကမ္မေ ကရီယမာနေ သင်္ဃော မံ ပဘိမာနေဿတိ၊ တဒါ ဝုဋ္ဌဟာမီတိဝါ၊ သတ္ထာ မံ ကေနစိကာရဏေန ပက္ကောသာ ပေဿတိ၊ တဒါ ဝုဋ္ဌဟာမီတိဝါ အဓိဋ္ဌာနကိစ္စံ။ အာဒိသဒ္ဒေန နိရောဓဗ္ဘန္တရေဧဝ မရဏံ နုခေါ မေ ဘဝိဿတီတိ ဧဝံ ပဝတ္တော အဒ္ဓါန ပရိစ္ဆေဒေါ ဂဟိတော။ ဒွိန္နံ။လ။ ဝေါစ္ဆိဇ္ဇတိစိတ္တသန္တတိ တဒတ္ထာယ အာဒိတော ပဋ္ဌာယ တထာရူပဿ ပယောဂဝိသေသဿ သုဋ္ဌု ကတတ္တာ။ တတောတိ တသ္မိံ ကာလေ။ အနာဂါမိနော အနာဂါမိ ဖလစိတ္တံ နိရာဝဇ္ဇနံပိ နိပ္ပရိကမ္မံပီတိ အဓိပ္ပာယော။ တထာဟိ အာဒိတော ပဋ္ဌာယ ပုနပ္ပုနံ ပဝတ္တိတံ ဝိပဿနာပရိကမ္မမေဝ တဿ ပရိကမ္မဋ္ဌာနေ တိဋ္ဌတိ။ န ဝိသုံ အာသန္နပရိကမ္မံ နာမ အတ္ထီတိ။ ပစ္စဝေက္ခနန္တိ ဖလပစ္စဝေက္ခနံ။ ဧဝံ ဒုဝိဓံ ကမ္မဋ္ဌာနနယံ နိဒ္ဒိသိတွာ ဣဒါနိ ယဒတ္ထံ သော နိဒ္ဒိသီယတိ၊ တဒတ္ထေ သောတုဇနေ နိယောဇေန္တော ဘာဝေ တဗ္ဗန္တိ ဂါထမာဟ။ တတ္ထ ပဋိပဇ္ဇိတဗ္ဗာတိ ပဋိပတ္တိ။ ပဋိပဇ္ဇန္တိဝါ ဧတာယ ဥပရုပရိ ဝိသေသန္တိ ပဋိပတ္တိ။ သီလာဒိဓမ္မော။ ရသီယတိ နိရာမိသသုခါနုဘဝနဝသေန အနုဘဝီယတီတိ ရသော။ ဈာနမဂ္ဂ ဖလဘူတော အဓိဂမဓမ္မော။ အရဟတ္တ ဖလမေဝဝါ။ တဒုဘယံ ပဋိစ္စ ဥပ္ပန္နပီတိသောမနဿမေဝဝါ။ ပဋိပတ္တိယာ ရသော ပဋိပတ္တိ ရသော။ သောဧဝ အဿာဒိတဗ္ဗဋ္ဌေန အဿာဒေါ စာတိ ပဋိပတ္တိ ရသဿာဒေါ။ သာသနေ ပဋိပတ္တိရသဿာဒံ ပတ္ထယန္တေန ဘိက္ခုနာ ဣစ္စေဝံ မယာ နိဒ္ဒိဋ္ဌံ ဥတ္တမံ ဘာဝနာဒွယံ ဘာဝေတဗ္ဗန္တိ သမ္ဗန္ဓော။

ဣတိ ပရမတ္ထဒီပနိယာနာမ အဘိဓမ္မတ္ထသင်္ဂဟဿ

စတုတ္ထဝဏ္ဏနာယ ကမ္မဋ္ဌာနသင်္ဂဟဿ

ပရမတ္ထဒိပနာ နိဋ္ဌိတာ။