📜

သမုစ္စယ သင်္ဂဟ ပရမတ္ထဒီပနီ

၁၆၂။ ဧဝံ ဆဟိ ပရိစ္ဆေဒေဟိ စတ္တာရော ပရမတ္ထေ ဒဿေတွာ ဣဒါနိ တေသံ တံတံရာသိသင်္ခါတံ သမုစ္စယံ ဒဿေန္တော အာဒိဂါထ မာဟ။ ယေ သလက္ခဏာ ဒွါသတ္တတိဝိဓာ ဝတ္ထုဓမ္မာ မယာ ဝုတ္တာ။ ဣဒါနိ တေသံ သမုစ္စယံ ယထာယောဂံ ပဝက္ခာမီတိ ယောဇနာ။ တတ္ထ သလက္ခဏာဝတ္ထုဓမ္မာတိ ပဒေဟိ ဒသဝိဓာနိ အနိပ္ဖန္နရူပါနိ ပဋိက္ခိပတိ။ န ဟိ တာနိ အတ္တနော အာဝေနိကဘူတေန သဘာဝ လက္ခဏေန အနိစ္စတာဒိ သာမညလက္ခဏေနစ သလက္ခဏာနိ ဟောန္တိ။ ဧကန္တပရမတ္ထတာယ အဘာဝတော။ တတောယေဝစ ဝတ္ထုဓမ္မာစ နဟောန္တိ။ သရူပတော အနုပလဗ္ဘမာနတ္တာ။ ဒဗ္ဗဝါစကော ဟိ ဣဓ ဝတ္ထုသဒ္ဒေါ။ ဒဗ္ဗဉ္စနာမ ဣဓ သရူပတော လဗ္ဘမာနော သဘာဝေါ ဧဝ။ ဧတေန နိဗ္ဗာနဿပိ မဂ္ဂဖလ ပစ္စဝေက္ခနဉာဏေသု သရူပတော လဗ္ဘမာန သဘာဝတာ ဝုတ္တာ ဟောတိ။ အနိပ္ဖန္နရူပါနံ ဝိယ စ ဝတ္ထုဓမ္မ သန္နိဿယေန ဒိဿမာနဓမ္မမတ္တဘာဝံ ဝါ ပညတ္တိဓမ္မာနံ ဝိယ ပရိကပ္ပိတာကာရမတ္တဘာဝံဝါ သသဝိသာဏ ကစ္ဆပလောမာဒီနံ ဝိယ သဗ္ဗသော အဘူတ ပရိကပ္ပိတ မတ္တဘာဝံဝါ နိဝါရေတီတိ ဝေဒိတဗ္ဗံ။ ဧတ္ထစ ဒွါသတ္တတိဝိဓာသလက္ခဏာဝတ္ထုဓမ္မာတိ ဝစနေ ပယောဇနံ နဒိဿတိ။ တေသု ဟိ ဒွါသတ္တတိဝိဓေသု ဧကစ္စေ ဧဝ ဓမ္မာ ပုရိမေသု တီသု သင်္ဂဟေသု အာဂတာ။ ပစ္ဆိမေစ သဗ္ဗသင်္ဂဟေ အနိပ္ဖန္နရူပါနိပိ အဓိပ္ပေတာနိဧဝါတိ။ ဧတ္ထစ ဝတ္ထုဓမ္မာသလက္ခဏာတိ ပဒေဟိ အနိပ္ဖန္နရူပါနံ သလက္ခဏတာ ပဋိက္ခိပနေ ယံ ဝတ္တဗ္ဗံ။ တံ ရူပသမုဒ္ဒေသ ဒီပနိယံ ဝုတ္တမေဝါတိ။ ဧကန္တာကုသလဇာတိယာနံ အာသဝ စတုက္ကာဒီနံ သင်္ဂဟော အကုသလသင်္ဂဟော၊ န အကုသလ သမ္ပယုတ္တတ္တာယေဝ အကုသလဘူတာနံ စိတ္တဖဿာဒီနန္တိ။ ကုသလာ ကုသလာဗျာကတမိဿကာနံ သင်္ဂဟော မိဿကသင်္ဂဟော။

ဗောဓိ ဝုစ္စတိ စတူသု မဂ္ဂေသု ဉာဏံ၊ ဗုဇ္ဈန္တိ ဧတာယာတိ ကတွာ။ ဗောဓိယာ ပက္ခာ ဗောဓိပက္ခာ။ ဗောဓိသမ္ဘာရာတိ အတ္ထော။ ဗောဓိ ပက္ခေသု ဘဝါ အန္တောဂဓာတိ ဗောဓိပက္ခိယာ။ တေသံ သင်္ဂဟောတိ ဗောဓိပက္ခိယသင်္ဂဟော။ သဗ္ဗေသံ အနဝသေသာနံ ပရမတ္ထဓမ္မာနံ သင်္ဂဟော သဗ္ဗသင်္ဂဟော။ စိရပါရိဝါသိယဋ္ဌေန မဒနိယဋ္ဌေနစ အာသဝ သဒိသတ္တာ အာသဝါ။ ယဒိစ တဒုဘယဋ္ဌေန အာသဝါနာမ သိယုံ။ ဣမေ လောဘာဒယော ဧဝ အာသဝါနာမ သိယုံ။ ပုပ္ဖာသဝါဒယော ဟိ လောကေ ဆ ပဉ္စ ရတ္တိမတ္တံ ဝါ သတ္တဋ္ဌရတ္တိမတ္တံ ဝါ သယံပိ ကုမ္ဘေသု ပရိဝါသံ ဂဏှန္တိ။ ကုမ္ဘေစ ပရိဝါသံ ဂါဟာပေန္တိ။ ဣမေ ပန အနမတဂ္ဂေ သံသာရေ သယံပိ သတ္တသန္တာနေ ပရိဝါသံ ဂဏှန္တိ။ သတ္တသန္တာနဉ္စ ပရိဝါသံ ဂါဟာပေန္တိ။ သကလံ သတ္တသန္တာနံ သဒါ အာသဝပူရိတမေဝ ဟောတိ။ ယထာဟ-စက္ခုံ လောကေ ပိယရူပံ သာတရူပံ ဧတ္ထေသာ တဏှာ ဥပ္ပဇ္ဇမာနာ ဥပ္ပဇ္ဇတိ။ ဧတ္ထ နိဝီသမာနာ နိဝီသတီတိအာဒိ။ တတ္ထ ဧသာ တဏှာ ပရိယုဋ္ဌာနဝသေန ဥပ္ပဇ္ဇမာနာ ဧတ္ထေဝ ဥပ္ပဇ္ဇတိ။ ဥပ္ပဇ္ဇိတွာစ ပုန အနုသယဘာဝေန ပရိဝါသံ ကတွာ နိဝီသမာနာ ဧတ္ထေဝ နိဝီသတီတိ အတ္ထော။ ယာဝစ အရိယမဂ္ဂဓောဝနံ နလဗ္ဘတိ။ တာဝ သန္တာနံ ဂူထပူရိတကူပံ ဝိယ ဒုဗ္ဗိသောဓံ ကတွာ ပဝတ္တတိ။ ပုပ္ဖာသဝါဒယောစ မဒံ ဇနေန္တာ မုဟုတ္တမေဝ ဇနေန္တိ။ ဣမေ ပန ယာဝ အရိယမဂ္ဂံ နလဘတိ။ တာဝ နိစ္စမဒံ ဇနေန္တိ။ တသ္မာ ဧကန္တေန ဣမေယေဝ စိရပါရိဝါသိယဋ္ဌေန မဒနိ ယဋ္ဌေနစ အာသဝါနာမ ဘဝိတုံ အရဟန္တီတိ။

ဝိသန္ဒနဋ္ဌေနဝါ အာသဝသဒိသတ္တာ အာသဝါ၊ ယထာ ဟိ ကုဓိတ ကုဋ္ဌိနော မဟာဝဏမုခေဟိ ယူသသင်္ခါတော အာသဝေါ ဝိသန္ဒိတွာ ပိလောတိကခဏ္ဍာနိ ဒူသေတိ၊ ဧဝံ ဣမေပိ ဆဟိဒွါရေဟိ ဝိသန္ဒိတွာ ဆဠာရမ္မဏာနိဒူသေန္တီတိ။ အာယတံဝါ သံသာရဒုက္ခံ သဝန္တိပသဝန္တိ ဝဍ္ဎေန္တီတိ အာသဝါ။ အထဝါ၊ ဘဝတော အာဘဝဂ္ဂါ ဓမ္မတော အာဂေါတြတုမှာ သဝန္တိ အာရမ္မဏကရဏဝသေန ပဝတ္တန္တီတိ အာသဝါ။ အာသဒ္ဒဿ အဝဓိအတ္ထဇောတကတ္တာ။ အဝဓိစ ဒုဝိဓော မရိယာဒဝိသယော အဘိဝိဓိဝိသယောစာတိ တတ္ထ ယဿ သမ္ဗန္ဓိနီကြိယာ အဝဓိဘူတံ အတ္တာနံ ဗဟိကတွာ ပဝတ္တတိ။ သော မရိယာဒဝိသယော နာမ။ ယထာ အာပါတလိပုတ္တာ ဒေဝေါ ဝုဋ္ဌောတိ။ ယဿ သမ္ဗန္ဓိနီကြိယာ အဝဓိဘူတံ အတ္တာနံ ဗျာပေတွာ အန္တော ကတွာ ပဝတ္တတိ၊ သော အဘိဝိဓိဝိသယောနာမ။ ယထာ အာဗြဟ္မလောကာ ဘဂဝတော ကိတ္တိသဒ္ဒေါ အဗ္ဘုဂ္ဂတောတိ။ ဣဓ ပန အဘိဝိဓိဝိသယော ဒဋ္ဌဗ္ဗော။ တသ္မာ ဘဝဂ္ဂဉ္စ ဂေါတြဘုဉ္စ ဗျာပေတွာ အန္တော ကတွာ သဝန္တီတိ အတ္ထော ဝေဒိတဗ္ဗော။

[၂၀၄] ဝိဘာဝနိယံ ပန

အဝဓိစ မရိယာဒအဘိဝိဓိဝသေန ဒုဝိဓောတိ ဝတွာ ပုန တံ ဝိဘာဝေန္တော ‘‘တတ္ထ အာပါတလိပုတ္တာ ဒေဝေါ ဝုဋ္ဌောတိအာဒီသုဝိယ ကြိယံ ဗဟိကတွာ ပဝတ္တော မရိယာဒေါ။ အာဘဝဂ္ဂါသဒ္ဒေါ အဗ္ဘုဂ္ဂတောတိအာဒီသုဝိယ ကြိယံ ဗျာပေတွာ ပဝတ္တော အဘိဝိဓီ’’တိ ဝဒတိ။ တံ န ယုဇ္ဇတိ။

န ဟိ အဝဝိဓိဝိသယဘူတော ဘဝဂ္ဂေါ လောကတ္တယဗျာပကံ သဒ္ဒဿ အဗ္ဘုဂ္ဂမနကြိယံ ဗျာပေတွာ ပဝတ္တတိ။ နစ အဝဓိဘူတော အတ္ထော ကြိယံ ဗဟိဝါ အန္တောဝါ ကတွာ ပဝတ္တတီတိ ယုတ္တော။ ကြိယာဧဝ ပန တံ ဗဟိဝါ အန္တောဝါ ကတွာ ပဝတ္တတီတိ ယုတ္တော။ ဧဝဉ္စ ကတွာ မူလဋီကာယံ-ဒုဝိဓောဟိ အဝဓိ အဘိဝိဓိဝိသယော အနဘိဝိဓိဝိသယောစ။ အဘိဝိဓိဝိသယံ ကြိယာဗျာပေတွာ ပဝတ္တတိ၊ အာဘဝဂ္ဂါ ဘဂဝတော ယသော ဂတောတိ။ ဣတရံ ဗဟိကတွာ၊ အာပါတလိပုတ္တာ ဝုဋ္ဌော ဒေဝေါတိ။ ကာမေတိ ဣစ္ဆတီတိ ကာမော။ သောဧဝ အာသဝေါတိ ကာမာသဝေါ။ ကာမီယတိဝါ ဩဠာရိကေန ကာမေန ဣစ္ဆီယတီတိ ကာမော။ ပဉ္စကာမဂုဏမုခေန ဒေသိတော သဗ္ဗော ကာမာဝစရဓမ္မော။ ဣဓ ပန တံ နာမေန တဒါရမ္မဏာ တဏှာဧဝ အဓိပ္ပေတာ၊ ကာမောဧဝ အာသဝေါတိ ကာမာသဝေါ။ ကာမာဝစရဓမ္မေသု အဿာဒနာဘိနန္ဒန ဝသေန ပဝတ္တော ကာမရာဂေါ။ ထေရေန ပန အယမတ္ထောဝ ဣစ္ဆိတော။ ဝက္ခတိ ဟိ ကာမဘဝ နာမေန တဗ္ဗတ္ထုကာ တဏှာ အဓိပ္ပေတာတိ။

[၂၀၅] ဝိဘာဝနိယံ ပန

ပုရိမတ္ထောဝ ဝုတ္တော။ သော အနုပပန္နော၊ ထေရမတာနုဂတဿ ဣဓာဓိပ္ပေတဿ အတ္ထဿ အဝုတ္တတ္တာ။

ဘဝါသဝေါတိ ဧတ္ထ ဒုဝိဓော ဘဝေါ ကမ္မဘဝေါ ဥပပတ္တိဘဝေါ စ။ တတ္ထ မဟဂ္ဂတကုသလဓမ္မာ ကမ္မဘဝေါ။ တံနိဗ္ဗတ္တာ ဝိပါက ဓမ္မာ ဥပပတ္တိဘဝေါ။ ဣဓပိ ဘဝသဒ္ဒေန တဒါရမ္မဏာ တဏှာဧဝ အဓိပ္ပေတာ။ ဘဝေါဧဝ အာသဝေါတိ ဘဝါသဝေါ။ တသ္မိံ ဒုဝိဓေ ဘဝေ နိကန္တိဝသေန ပဝတ္တော ရူပါရူပရာဂေါ။

[၂၀၆] ယံ ပန ဝိဘာဝနိယံ

‘‘သဿတ ဒိဋ္ဌိသဟဂတောစ ရာဂေါ ဧတ္ထေဝ သင်္ဂယှတီ’’တိ ဝုတ္တံ။ တံ န ယုတ္တံ။

ဘဝါသဝေါ စတူသု ဒိဋ္ဌိဂတ ဝိပ္ပယုတ္တ လောဘသဟဂတေသု စိတ္တုပ္ပာဒေသု ဥပ္ပဇ္ဇတီတိ ဟိ အဋ္ဌကထာကဏ္ဍေ ဝုတ္တံ။ ယတ္ထ ပန ကာမတဏှာ ဘဝတဏှာ ဝိဘဝတဏှာတိ အာဂတံ။ တတ္ထေဝ သဿတဒိဋ္ဌိ သဟဂတော ရာဂေါ ယာကာစိ ကုသလာကုသလ ကမ္မဘဝနိကန္တိ ယာကာစိ ဥပပတ္တိဘဝပတ္ထနာ။ သဗ္ဗာ ဘဝတဏှာယံ သင်္ဂဟိတာတိ ယုတ္တာ။ ဣဓ ပန ယထာဝုတ္တံ ဘဝါသဝံ ထပေတွာ သဗ္ဗော လောဘော ကာမာသဝေ ဧဝ သင်္ဂဟိတောတိ ယုတ္တောတိ။

[၂၀၇] ဧတေနေဝ ယဉ္စ တတ္ထ ဝုတ္တံ။

‘‘တတိယော ဘာဒိဋ္ဌိသဟဂတော’’တိ။ တံပိ ပဋိက္ခိတ္တံ ဟောတိ။

ယာကာစိ ဒိဋ္ဌိ ဒိဋ္ဌာသဝေါ။ ယောကောစိ မောဟော အဝိဇ္ဇာသဝေါ။ ဧတ္ထ သိယာ၊ ကသ္မာ ဣမေ ဧဝ အာသဝါတိ ဝုတ္တာ။ နနု အညေပိ မာနာဒယော စိရပါရိဝါသိယဋ္ဌာဒိယုတ္တာ ဧဝ ဟောန္တီတိ။ သစ္စံ။ ဣမေသု ပန ကာမာသဝေ ပရိဝုဋ္ဌေ သတိ သဗ္ဗေကာမဝိသယာ မာနာဒယော ပရိဝုဋ္ဌာဧဝ ဟောန္တိ။ တသ္မိံ ဝိမုတ္တေ ဝိမုတ္တာဧဝ၊ တထာ ဘဝါသဝေ ပရိဝုဋ္ဌေ သတိ ဘဝဝိသယာ။ ဒိဋ္ဌာသဝေစ ပရိဝုဋ္ဌေ သတိ ဒိဋ္ဌိဝိသယာတိ။ အဝိဇ္ဇာပန တေသံ တိဏ္ဏံပိ မူလဘူတာတိ။ ဣတိ ဣမေ ဧဝ ပါရိဝါသိယဋ္ဌာဒီသု ပဓာနဘူတာ ဟောန္တိ။ ဣတရေ ပန တဒနုဗန္ဓမတ္တာဧဝ သမ္ပဇ္ဇန္တီတိ န တေ အာသဝါတိ ဝိသုံ ဝတ္တုံ အရဟန္တီတိ။ အတ္တနိ ပတိတံ ဇနံ အနဿာသိကံ ကတွာ အဇ္ဈောတ္ထ ရန္တော ဟနတိ မာရေတီတိ ဩဃော။ ပကတိမဟောဃော။ တထာ အဝဟနနဋ္ဌေန ဒုတ္တရဋ္ဌေနစ ဩဃသဒိသာတိ ဩဃာ။ ယဒိစ အဝဟညနဋ္ဌေစ ဒုတ္တရဋ္ဌေနစ ဩဃာနာမ သိယုန္တိအာဒိကော ပသင်္ဂေါ မာနာဒီနဉ္စ ဩဃဘာဝ ပရိဟာရော ဝုတ္တ နယေန ဝေဒိတဗ္ဗော။

ဝဋ္ဋသ္မိံဝါ ဘဝယန္တကေဝါ သတ္တေ ယောဇေန္တီတိ ယောဂါ။ ဘဝန္တရစုတိယာ သဟ ဘဝန္တရပဋိသန္ဓိံ ဂန္တေန္တိ ဃဋေန္တီတိ ဂန္ထာ။ အဘိဇ္ဈာတိ သဗ္ဗဿ ရာဂဿေတံ နာမံ။ တသ္မာ ရူပါရူပ ရာဂါပိ ဧတ္ထ သင်္ဂဟိတာတိ ဒဋ္ဌဗ္ဗာ။ ဗျာပါဒေါတိပိ သဗ္ဗော ဒေါသော ဧဝ။ ဣဒံ သစ္စာတိ နိဝေသောတိ ဣဒမေဝ သစ္စံ၊ မောဃမညန္တိ ပဝတ္တော မိစ္ဆာဘိနိဝေသော။ ဝဋ္ဋဒုက္ခတော ဝိမုတ္တိယာ အမဂ္ဂဘူတံယေဝ ဂေါသီလဂေါဝတာဒိကံ ပရတော အာမသနံ တထာ တထာ ကပ္ပေတွာ ဂဟဏံ သီလဗ္ဗတပရာမာသော။ ဧတ္ထစ ပရတောတိ ဘူတသဘာဝပစ္စနိကတောတိ အတ္ထော။ ကာယသဒ္ဒေါ ပန သဗ္ဗတ္ထ ရူပကာယေ နာမကာယေစ ပဝတ္တောတိ အတိတကာယေန ပစ္စုပ္ပန္န ကာယံ ပစ္စုပ္ပန္နကာယေနစ အနာဂတကာယံ ဂန္ထေတိ ဃဋေတီတိ ကာယဂန္ထော။ အထဝါ၊ ကာယေ ဂဏ္ဌောတိ ကာယဂဏ္ဌော။ အဇ္ဈတ္တ ဂဏ္ဌောတိ အတ္ထော။ နိဂဏ္ဌောနာဋပုတ္တောတိအာဒီသုဝိယ ဂဏ္ဌသဒ္ဒေါ ဂဏ္ဌိယံ ပဝတ္တော။ ဘုသံ အာဒိယန္တိ အမုဉ္စနဂါဟံ ဂဏှန္တီတိ ဥပါဒါနာနိ။ ကိလေသဘူတော ကာမောဧဝ ဥပါဒါနံ ကာမု ပါဒါနံ။ ဝတ္ထုဘူတံဝါ ကာမံ ဥပါဒိယတီတိ ကာမုပါဒါနံ။

ဒွါသဋ္ဌိဒိဋ္ဌိယော တိဝိဓ မဟာဒိဋ္ဌိယော အညာပိဝါ သာသနေ လောကေစ သန္ဒိဿမာနာ ဝိပရီတဂါဟဘူတာ ဒိဋ္ဌိယော ဒိဋ္ဌုပါဒါနံ။ ယထာဂဟိတံဝါ ပုရိမဒိဋ္ဌိံ ဣဒမေဝ သစ္စံ မောဃမညန္တိ ဥပါဒိယတီတိ ဒိဋ္ဌုပါဒါနံ။ ဂေါဏကုက္ကုရာဒီနံ တံတံပကတိစာရိတ္တံ သီလံ နာမ။ တမေဝ သုဋ္ဌုံ သမာဒိန္နံ ဝတံနာမ။ တဒုဘယံ သံသာရမုတ္တိယာ မဂ္ဂေါတိ ဒဠှဂဟဏံ သီလဗ္ဗတု ပါဒါနံ နာမ။ အတ္တဝါဒုပါဒါနန္တိ ဧတ္ထ အတ္တာ ဝုစ္စတိ ပရိကပ္ပဗုဒ္ဓိယာ ဂဟိတော ဧကေကသ္မိံ သတ္တ သန္တာနေ ပဓာနိဿရော။ ယံ လောကိယမဟာဇနာ သတ္တောတိဝါ ပုဂ္ဂလောတိဝါ ဇီဝေါတိဝါ တထာဂတောတိဝါ လောကောတိဝါ သဉ္ဇာနန္တိ။ ယဉ္စ နာနာတိတ္ထိယာ ဣဿရနိမ္မိတံဝါ အဓိစ္စသမုပ္ပန္နံဝါ အစ္စန္တသဿတံဝါ ဧကစ္စသဿတံဝါ ဥစ္ဆေဒံဝါ ပညပေန္တီတိ။ တံ အတ္တာနံ အဘိဝဒန္တိစေဝ ဥပါဒိယန္တိစ သတ္တာ ဧတေနာတိ အတ္တဝါ ဒုပါဒါနံ။ ဝီသတိဝိဓာ သက္ကာယဒိဋ္ဌိ။ တတ္ထ အဘိဝဒန္တီတိ ဝိသိဋ္ဌံ ပဓာနံ ကတွာ ဝဒန္တိ။ ဥပါဒိယန္တီတိ ဒဠှံ အာဒိယန္တိ။ ယထာဟ –

တတ္ထ ကတမာ သက္ကာယဒိဋ္ဌိ။ ဣဓ အဿုတဝါ ပုထုဇ္ဇနော ရူပံ အတ္တတော သမနုပဿတိ။ ရူပဝန္တံဝါ အတ္တာနံ။ အတ္တနိ ဝါ ရူပံ။ ရူပသ္မိံဝါ အတ္တာနံ။ ဝေဒနံ အတ္တတော သမနုပဿတိ။ ဝေဒနာဝန္တံဝါ အတ္တာနံ။ အတ္တနိဝါ ဝေဒနံ။ ဝေဒနာပဝါ အတ္တာနံ။ သညံ။ သင်္ခါရေ။ ဝိညာဏန္တိ။

တတ္ထ ရူပံ အတ္တတော သမနုပဿတီတိ ရူပမေဝ အတ္တာတိ ဂဏှာတိ။ ရူပဝန္တံဝါ အတ္တာနန္တိ အတ္တာ မေ ရူပဝါတိ ဂဏှာတိ။ အတ္တနိ ဝါ ရူပန္တိ အတ္တာနံ ပဋိစ္စ ရူပံ တိဋ္ဌတီတိ ဂဏှာတိ။ ရူပသ္မိံဝါ အတ္တာနန္တိ ရူပံ ပဋိစ္စ အတ္တာ တိဋ္ဌတီတိ ဂဏှာတိ။ ကထံ ရူပကာယံ ဥဒ္ဒိဿ အဇ္ဇ အဟံ ထဒ္ဓါမှီတိ ဝါ အဇ္ဇ အဟံ မုဒုကောမှီတိဝါ ဝဒန္တော ပထဝိ သင်္ခါတံ ရူပံ အတ္တတော သမနုပဿတိနာမ။ အဇ္ဇ မမ ကာယော ထဒ္ဓါတိဝါ မုဒူတိဝါ ဝဒန္တော သေသဓမ္မေဝါ ဓမ္မမုတ္တကံဝါ အတ္တာနံ ဂဟေတွာ တံ အတ္တာနံ ပထဝီဝန္တံ သမနုပဿတိနာမ။ အဇ္ဇ ထဒ္ဓဘာဝေါဝါ မုဒုဘာဝေါဝါ မယိ ဇာတောတိ ဝဒန္တော အတ္တနိ ပထဝိံသ မနုပဿတိနာမ။ အဇ္ဇာဟံ ထဒ္ဓဘာဝေ ဌိတောမှိ မုဒုဘာဝေ ဌိတော မှီတိ ဝဒန္တောပထဝိမှိ အတ္တာနံ သမနုဿတိနာမ။ အယံ ပထဝိမှိ စတုရာဝတ္ထိကာယ သံက္ကာယဒိဋ္ဌိယာ ပဝတ္တာကာရော။ သေသေသု သတ္တဝီသတိရူပေသု ယထာသမ္ဘဝံ ဝတ္တဗ္ဗော။ အဟံ မရာမိ မရိဿာမီတိအာဒိနာ ဟိ အနိစ္စတာယံပိ သာဒိဋ္ဌိ ပဝတ္တတိယေဝ။ သေသရူပေသု ဝတ္တဗ္ဗံ နတ္ထိ။ ဣဒံ နာမ အဟံ ပုဗ္ဗေ သံဘုဉ္ဇိံ။ အဇ္ဇ သံဘုဉ္ဇာမိ။ ပရတော သံဘုဉ္ဇိဿာမီတိဝါ သုခိတောမှိ ဒုက္ခိတောမှီတိဝါ ဝေဒနံ အတ္တတော သမနုပဿတိ။ အဇ္ဇ မမ ကာယော သုခိတော ဒုက္ခိတောတိဝါ မမစိတ္တံ သုခိတံ ဒုက္ခိတန္တိဝါ အတ္တာနံ ဝေဒနာဝန္တံ သမနုပဿတိ။ အဇ္ဇသုခံဝါ ဒုက္ခံဝါ မယိဇာတန္တိ အတ္တနိ ဝေဒနံ သမနုပဿတိ။ အဇ္ဇာဟံ သုခိတ ဘာဝေ ဌိတောမှိ ဒုက္ခိတဘာဝေ ဌိတောမှီတိ ဝေဒနာယ အတ္တာနံ သမနုပဿတီတိ။

သညာယ သဗ္ဗေသုစ ပညာသမတ္တေသု သင်္ခါရေသု ဝိသုံ ဝိသုံ ဝိတ္ထာရေတွာ ဝတ္တဗ္ဗော။ အဟံ ပဿာမီတိ စက္ခုဝိညာဏံ အတ္တတော သမနုပဿတိ။ ဒဿနံ မေတိ အတ္တာနံ ဝိညာဏဝန္တံ သမနုပဿတိ။ မယိဒဿနံနာမ အတ္ထီတိ အတ္တနိ ဝိညာဏံ သမနုပဿတိ၊ အဟံ ဒဿနေ သမတ္ထောမှီတိ ဝိညာဏသ္မိံ အတ္တာနံ သမနုပဿတိ။ ဧသေ ဝနယော သေသေသု ပဉ္စသု ဝိညာဏေသူတိ။ အဟ မသ္မိ အဟံ ဧကော သတ္တော ဧကောပုဂ္ဂလော ဧကော ဇီဝေါ ဧကော လောကော ဧကော နရော မနုဿော ဒေဝေါသက္ကော ဗြဟ္မာတိဝါ အဟံဂစ္ဆာမိ အဟံ တိဋ္ဌာမိ အဟံ နိသီဒါမိ အဟံ နိပ္ပဇ္ဇာမိ အဟံ သမိဉ္ဇေမိ ပသာရေမီတိအာဒိနာ ဝါ ခန္ဓပဉ္စကံဝါ ဧကမေကံဝါ ခန္ဓံ သမူဟတော ဂဟေတွာ ပဝတ္တိပိ ဝတ္တဗ္ဗာ။ အပရိညာတဝတ္ထုကာနဉှိ ဧကမုဟုတ္တ မတ္တေပိ ယံကိဉ္စိ အတ္တနောဝါ ပရဿဝါ အတ္တပဋိသံယုတ္တဝစနံ ကထေန္တာနံ စိတ္တံဝါ ဝစနံဝါ ယထာဝုတ္တေ ရူပါရူပဓမ္မေ ကဒါစိ အတ္တတော ဥပါဒိယိတွာ ပဝတ္တတိ။ ကဒါစိ အတ္တပရိဝါရ ဘာဝေန။ ကဒါစိ အတ္တနိဿိတဘာဝေန။ ကဒါစိ အတ္တနိဿယဘာဝေန။ ကဒါစိ ဧကေကဓမ္မဝသေန။ ကဒါစိ သမူဟဓမ္မဝသေနာတိ။

ယသ္မာ ပန အတ္တနိမိတ္တံနာမ ဝသဝတ္တနာကာရံ ပဋိစ္စ ဥပဋ္ဌာတိ။ ဝသဝတ္တနာ ကာရောစ ရူပါရူပဓမ္မာနံ ပစ္စယာယတ္တ ဝုတ္တိကတ္တံ ခဏိ ကတ္တဉ္စ သုဋ္ဌု ပဿန္တာနံ နတ္ထိ။ တသ္မာ ပရိညာတဝတ္တုကာနံ အတ္တ ပဋိသံယုတ္တဝစနံ ကထေန္တာနံပိ စိတ္တံ ပဒုမိနိပတ္တေ ဥဒကဗိန္ဒု ဝိယ တေသု ဓမ္မေသု အလဂ္ဂိတွာဧဝ ပဝတ္တတီတိ ဝေဒိတဗ္ဗံ။ သတ္တာနံ စိတ္တသန္တာနေ ကုသလေ ဓမ္မေ အနုပ္ပန္နေဝါ ဥပ္ပာဒေတုံ ဥပ္ပန္နေဝါ ဝါ သေတုံ အဒတွာ နီဝါရေန္တီတိ နီဝရဏာနိ။ ကာမနဋ္ဌေန ကာမော၊ ဆန္ဒနဋ္ဌေနဆန္ဒောတိ ကာမစ္ဆန္ဒော။ ဗလဝရာဂေါ။ သောဧဝနီဝရဏန္တိ ကာမစ္ဆန္ဒနီဝရဏံ။ ပဋ္ဌာနေအာရုပ္ပေကာမစ္ဆန္ဒံ နီဝရဏံ ပဋိစ္စဥဒ္ဓစ္စနီဝရဏန္တိ ဝုတ္တတ္တာ ပန ထပေတွာ ရူပါရူပရာဂေ အဝသေသော သဗ္ဗောလောဘော ကာမစ္ဆန္ဒေ အသင်္ဂဟိတောနာမ နတ္ထိ။ ဈာနပဋိပက္ခဘာဝေါပန ပဉ္စကာမဂုဏိကရာဂဿေဝ ဟောတီတိ ဝေဒိတဗ္ဗော။ ဗျာပဇ္ဇနံ ဗျာပါဒေါ။ စိတ္တဿ ပူတိဘာဝေါတိ အတ္ထော။ ယောကောစိဒေါသော။ ကသ္မာ ပနေတ္ထ ထိနမိဒ္ဓ နီဝရဏန္တိ စ ဥဒ္ဓစ္စ ကုက္ကုစ္စ နီဝရဏန္တိ စ ဒွေ ဒွေ ဓမ္မာ ဧကံ နီဝရဏံ ကတွာ ဝုတ္တာတိ။ ကိစ္စတော ပစ္စယတော ပဋိပက္ခတောစ သဒိသတ္တာ။ တထာ ဟိ ကိစ္စတော တာဝ ထိနမိဒ္ဓဒွယံ စိတ္တုပ္ပာဒါနံ လီနဘာဝါ ပါဒနကိစ္စံ။ ဥဒ္ဓစ္စကုက္ကုစ္စဒွယံ အဝူပသန္တဘာဝါပါဒနကိစ္စံ။ ပစ္စယတော ပုရိမဒွယံ တန္ဒိဝိဇမ္ဘိ တတာပစ္စယံ။ ပစ္ဆိမဒွယံ ဉာတိဗျသနာဒိဝိတက္ကပစ္စယံ။ ပဋိပက္ခတော ပုရိမဒွယံ ဝီရိယပဋိပက္ခံ။ ပစ္ဆိမဒွယံ သမထပဋိပက္ခန္တိ။

အနုသေန္တီတိ အနုသယာ။ အနုရူပံ ကာရဏံ လဘိတွာ ဥပ္ပဇ္ဇန္တီတိ အတ္ထော။ အနုအနု သေန္တီတိဝါ အနုသယာ။ ယာဝ မဂ္ဂံ နပဋိလဘတိ။ တာဝ အန္တရာ အပရိက္ခိယျမာနာ ဟုတွာ ကာရဏလာဘေ သတိ ပုနပ္ပုနံ ဥပ္ပဇ္ဇန္တီတိ အတ္ထော။ ဥပ္ပဇ္ဇနဉ္စေတ္ထ အပ္ပဟီနဋ္ဌေန ဥပ္ပဇ္ဇနာ ရဟဘာဝေါ ဝေဒိတဗ္ဗော။ န ပန သရူပတော ဥပ္ပတ္တိ၊ ကထံ ဝိညာ ယတီတိ စေ။ ယဿ ကာမရာဂါနုသယော ဥပ္ပဇ္ဇတိ၊ တဿေဝ ပဋိဃာနုသယော ဥပ္ပဇ္ဇတီတိ ဝုတ္တတ္တာ။ ဧဝဉ္စ ကတွာ ပါဠိယံ ပုထုဇ္ဇနဿ သတ္တပိ အနုသယာ အနုသယဝါရေ သဟ အနုသေန္တီတိ ဥပ္ပဇ္ဇနဝါရေ သဟ ဥပ္ပဇ္ဇန္တီတိ ဝုတ္တာ။ ယထာဟ ပုထုဇ္ဇနဿ အဝိဇ္ဇာနုသယောစ အနုသေတိ။ ကာမရာဂ။ ပဋိဃ။ မာန။ ဒိဋ္ဌိ။ ဝိစိကိစ္ဆာ။ ဘဝရာဂနုသယောစ အနုသေတီတိ။ တထာ ဥပ္ပဇ္ဇနဝါရေပီတိ။

အပိစ၊ သရူပတော ပရိယုဋ္ဌာနံ အပတွာ သန္တာနေ ပဝတ္တမာနေဟိ ကုသလာကုသလာ ဗျာကတစိတ္တုပ္ပာဒေဟိ သဟ အနုရူပါ အဝိရုဒ္ဓါ ဟုတွာ သေန္တိ။ ဝိသုံ သမ္ပယုတ္တဓမ္မဘာဝေန အဝုဋ္ဌိတာ ဟုတွာ သယိတာ ဟောန္တီတိ အနုသယာ။ အနု အနု သေန္တီတိဝါ အနုသယာ။ ပကတိယာ ယထာနုသယိတေသုဧဝ ကာမရာဂါဒီသု ပုနပ္ပုနံ ဥပ္ပဇ္ဇိတွာ ဒိဂုဏ တိဂုဏာဒိ ဝသေန ပုနပ္ပုနံ သေန္တိ။ သယနာကာရေန ဥပရုပရိ ပလိဝေဌေန္တီတိ အတ္ထော။

တီသု ရာဂါဒီနံ အဝတ္ထာသု ပထမာဝတ္ထာယ ဌိတာနံ ကာမရာဂါ ဒီနမေတံ အဓိဝစနံ။ တိဿော ဟိ အဝတ္ထာ အနုသယာဝတ္ထာ ပရိယုဋ္ဌာနာဝတ္ထာ ဝီတိက္ကမာဝတ္ထာတိ။ တတ္ထ ယေ ကာမရာဂါဒယော ဥပ္ပဇ္ဇိတွာ ကာယင်္ဂဝါစင်္ဂံ စာလေန္တိ၊ တေသံ တထာပဝတ္တာ အဝတ္ထာ ဝီတိက္ကမာဝတ္ထာနာမ။ ယေ မနသ္မိံ ဧဝ ဇဝနစိတ္တသဟဇာတာ ဟုတွာ ပဝတ္တန္တိ၊ တေသံ တထာပဝတ္တာ အဝတ္ထာ ပရိယုဋ္ဌာနာဝတ္ထာနာမ။ ယေ ပန ဇဝနသဟဇာတဘာဝံပိ အပတွာ ဝါသနာဓာတုယော ဝိယ စိက္ကသန္တာနာ နုသယိတာ ဟုတွာ ပရိယုဋ္ဌာနပ္ပတ္တိယာ ဗီဇဘာဝေန တိဋ္ဌန္တိ၊ သုဘနိမိတ္တာဒိကေစ အာရမ္မဏေ အာပါတမာဂတေ ယေသံ ဝသေန အာဝဇ္ဇနံ ရာဂါဒိပါတုဘာဝတ္ထာယ အယောနိသော ဘဝင်္ဂံ အာဝဋ္ဋေတိ၊ အဘာဝိတဉ္စ စိတ္တံ ယေသံ ဝသေန ဒမထံ နဥပေတိ၊ တေသံ တထာ ပဝတ္တာ အဝတ္ထာ အနုသယာဝတ္ထာနာမ။ တဒဝတ္ထိကာ ကာမရာဂါဒယော အနုသယာနာမ။ တေ ပန အပရမတ္ထဘူတာပိ န ဟောန္တိ။ ဧကန္တပရမတ္ထဇာတိကတ္တာ။ နစ ကုသလာဗျာကတဘူတာ ဧကန္တာကုသလဇာတိကတ္တာ။ နာပိ ကုသလာဗျာကတဝိရုဒ္ဓါ၊ ဝိသုံ သမ္ပယုတ္တဓမ္မဘာဝေန အနုပလဒ္ဓတ္တာ။ နာပိ ကာလတ္တယဝိနိမုတ္တာ၊ တေကာလိကဓမ္မသန္နိဿယေန ပဝတ္တနတော။ ယဒါ ပန တေ သမုဋ္ဌ ဟိတွာ ပရိယုဋ္ဌာနဘာဝံ ဂစ္ဆန္တိ၊ တဒါ ဝိသုံ သမ္ပယုတ္တဓမ္မ ဘာဝဉ္စ ဂစ္ဆန္တိ။ သာရမ္မဏာဒိဘာဝေါစ တေသံ ပရိဗျတ္တော ဟောတိ။ ဧတဒတ္ထံ သန္ဓာယ ကထာဝတ္ထုမှိ တေသံ သာရမ္မဏဓမ္မဘာဝေါ သင်္ခါရက္ခန္ဓဘာဝေါစ ပတိဋ္ဌာပိတော ဟောတီတိ။

ယထာ ပန ဖလဓာရိမှိ ရုက္ခမှိ ဝိသကဏ္ဋကေ ဒိန္နေ ရုက္ခာနုသယိတော ဖလုပ္ပတ္တိယာ ပစ္စယဘူတော သိနေဟော ပရိက္ခယံ ဂစ္ဆတိ။ သမယေ ဥပ္ပဇ္ဇိဿမာနာနိ ဖလာနိ နုပ္ပဇ္ဇန္တိ။ ဧဝံ သာနုသယေ စိတ္တ သန္တာနေ ယသ္မိံ ခဏေ မဂ္ဂေါ ပါတုဘဝတိ၊ တသ္မိံ သဟမဂ္ဂုပ္ပာဒါ သော သော အနုသယော ပရိက္ခယံ ဂစ္ဆတိ။ ပရိက္ခီဏဿ ပန ပုန ပရိယုဋ္ဌာနံနာမ နတ္ထိ၊ ကုတော ဝီတိက္ကမောတိ ဣမမတ္ထံ သန္ဓာယ မဂ္ဂေါ အနာဂတသာမညံ ကိလေသဇာတံ ပဇဟတီတိ တတ္ထ တတ္ထ ဝုတ္တော။ တတ္ထ အနာဂတသာမညန္တိ အနာဂတသမ္မတံ၊ န ဧကန္တ အနာဂတံ။ တေနေဝ ဟိ အဋ္ဌကထာယံ မဂ္ဂေါ ယေကိလေသေ ပဇဟတိ၊ တေ အတီတာကိဝါ အနာဂတာတိဝါ ပစ္စုပ္ပန္နာတိဝါ နဝတ္တဗ္ဗာတိ ဝုတ္တံ။ ဧတေနစ မဂ္ဂေါ ကိလေသမုခေန ယာနိ ကုသလာကုသလကမ္မာနိစ ဥပါဒိန္နကခန္ဓပဉ္စကေစ ပဇဟတိ၊ တေ အတီတာတိဝါအနာဂတာတိဝါ ပစ္စုပ္ပန္နာတိဝါ နဝတ္တဗ္ဗာတိ ဒီပေတိ။ ယဒိ ဧဝံ မဂ္ဂေန ပဟီနာ သဗ္ဗေ တေဘူမကဓမ္မာ ကာလဝိမုတ္တာနာမ အတင်္ခတာ နာမ အပစ္စယာနာမ သိယုန္တိ။န။ တေကာလိကဇာတိကတ္တာ သင်္ခတ သပစ္စယဇာတိကတ္တာ စ။ တေ ဟိ မဂ္ဂေ အနုပ္ပန္နေ ဣမေ နာမဓမ္မာ ဥပ္ပဇ္ဇိဿန္တိ နိရုဇ္ဈိဿန္တီတိ ဧဝံ သင်္ခတလက္ခဏံ အာဟစ္စ ဉာဏေန ဂဟိတတ္တာ လက္ခဏဝသေန တေဘူမကာဒိဘာဝံ ဘဇန္တီတိ။ ဧဝဉ္စ ကတွာ ဝိသုံ သမ္ပယုတ္တဓမ္မဘာဝံ အပတ္တာနံ အနုသယာဝတ္ထာယ ဝါ ဝါသနာဝတ္ထာယဝါ ကမ္မသမင်္ဂီတာဝတ္ထာယဝါ အာသယဇ္ဈာသယာ ဓိမုတ္တိစရိတဝတ္ထာသုဝါ ဌိတာနံ သဘာဝါနံ ဇာတိဝသေန ပရမတ္ထ ဓမ္မတာ အကုသလာဒိတာစ ပစ္စေတဗ္ဗာ ဟောတီတိ။

[၂၀၈] ဝိဘာဝနိယံ ပန

‘‘အပ္ပဟီနာ ဟိ ကိလေသာ ကာရဏလာဘေ သတိ ဥပ္ပဇ္ဇနာ ရဟာ သန္တာနေ အနုအနုသယိတာ ဝိယ ဟောန္တီတိ တဒဝတ္ထာ အနုသယာတိ ဝုစ္စန္တိ။ တေ ပန နိပ္ပရိယာယတော အနာဂတ ကိလေသာ။ အတီတပစ္စုပ္ပန္နာပိ တံသဘာဝတ္တာ တထာ ဝုစ္စန္တီ’’တိ ဝုတ္တံ။ တတ္ထ အနုသယာနာမ သန္တာနေ ကဒါစိပိ အနုပ္ပန္န ပုဗ္ဗာ အနာဂတ ကိလေသာ ဧဝါတိ ကတွာ သန္တာနေ အနု အနုသယိတာ ဝိယ ဟောန္တီတိ ဝုတ္တံ။ တံ န ယုဇ္ဇတိ။

န ဟိ တေ အနုအနုသယိတာ ဝိယ ဟောန္တိ။ ဧကန္တေန အနုသယိတာဧဝ ဟောန္တီတိ။

[၂၀၉] ယဉ္စ တတ္ထ

‘‘တေ ပန နိပ္ပရိယာယတော အနာဂတကိလေသာ’’တိ ဝုတ္တံ။ တံပိ န ယုတ္တံ။

န ဟိ မဂ္ဂေန အပ္ပဟီနာ အနုသယာ အနာဂတာနာမ ဟောန္တိ။ ပဟီနာပိစ နိပ္ပရိယာယတော အနာဂတာတိ နသက္ကာ ဝတ္တုံ။ အနာဂတ သာမညဿ အဓိပ္ပေတတ္တာတိ။ ဧတေန အတီတပစ္စုပ္ပန္နာပိ တံသဘာဝတ္တာတထာ ဝုစ္စန္တီတိ ဣဒံဝိပဋိက္ခိတ္တံ ဟောတိ။ အပိစ၊ ဥပ္ပာဒဋ္ဌိတိဘင်္ဂ ပတ္တာနံဧဝ ဧကန္တေန တေကာလိကတာ ဟောတီတိ တဒပတ္တာနံ အနုသယာနံ ပစ္စုပ္ပန္နတာ ပရိယာယောဝ ဝတ္တုံ ယုတ္တော။ ဧဝဉ္စ ကတွာ ပါဠိယံ ယဿ ကာမရာဂနုသယော ဥပ္ပဇ္ဇတိ၊ တဿ ပဋိဃာနုသယော ဥပ္ပဇ္ဇတီတိအာဒိနာ ပစ္စုပ္ပန္နကာလိကော ဥပ္ပာဒဝါရော ဧဝ ဝုတ္တော၊ န နိရောဓဝါရော၊ နစ အတီတာနာဂတ ဝါရာတိ။ ယံ ပန ပဋိသမ္ဘိဒါမဂ္ဂေ ဟဉ္စိ ပစ္စုပ္ပန္နေ ကိလေသေ ပဇဟတိ။ တေန ဟိ ရတ္တော ရာဂံ ပဇဟတိ၊ ဒုဋ္ဌော ဒေါသံ၊ မုဠှော မောဟန္တိ ဝုတ္တံ။ တံ ပရိယုဋ္ဌာနပတ္တာနံ ဧကန္တပစ္စုပ္ပန္နက္ခဏံ သန္ဓာယ ဝုတ္တန္တိ ဒဋ္ဌဗ္ဗံ။ တေနေဝ ဟိ အဋ္ဌကထာယံ ဝတ္တမာနုပ္ပန္နံ ဘုတွာ ဝိဂတုပ္ပန္နံ ဩကာသကတုပ္ပန္နံ သမုဒါစာရုပ္ပန္နန္တိ စတုဗ္ဗိဓံ ဥပ္ပန္နံ န မဂ္ဂဝဇ္ဈံ။ ဘူမိလဒ္ဓုပ္ပန္နံ အာရမ္မဏာ ဓိဂ္ဂဟိ တုပ္ပန္နံ အဝိက္ခမ္ဘိတုပ္ပန္နံ အသမုဂ္ဃာဋိတုပ္ပန္နန္တိ စတုဗ္ဗိဓံ မဂ္ဂဝဇ္ဈန္တိ ဝုတ္တံ။ တတ္ထ ဝတ္တမာနုပ္ပန္နံ သမုဒါ စာရုပ္ပန္နန္တိ ဣဒံ ဒွယံ ခဏပစ္စုပ္ပန္နမေဝ။ ဘုတွာဝိဂတုပ္ပန္နံ အတီတမေဝ။ ဩကာသ ကတုပ္ပန္နံ အနာဂတမေဝ။ တဒုဘယံ ပန ပစ္စုပ္ပန္နသမီပတ္တာ ဥပ္ပန္နန္တိ ဝုတ္တံ။ သမီပပစ္စုပ္ပန္နန္တိ ဝုတ္တံ ဟောတိ။

ဘူမိလဒ္ဓုပ္ပန္နံနာမ အတ္တနော ခန္ဓေသု အနုသယိတာနံ မဂ္ဂေန အပ္ပဟီနာနံ အနုသယာနံဧဝ နာမံ။ အာရမ္မဏာဓိဂ္ဂဟိတုပ္ပန္နံ နာမ သုဘနိမိတ္တာဒိကေ အာရမ္မဏေ သကိံ ဇဝိတွာ ယာဝ တမ္မူလကော ပရိယုဋ္ဌာနဝေဂေါ န ဝူပသမ္မတိ၊ တာဝ အဓိမတ္တထာမဂတ ဘာဝေန ဌိတာနံ တေသညေဝ နာမံ။ အနုသယာ ဟိ နာမ အနမတဂ္ဂေ သံသာရေ ပုနပ္ပုနံ ပရိယုဋ္ဌာနပတ္တာနံ ကိလေသာနံ ဝသေန ဥပရုပရိ ထိရ တရ ဒဠှတရ ပတ္တိယာ ပကတိယာပိ ထာမဂတာဧဝနာမ ဟောန္တိ။ န ယေနဝါ တေနဝါ ဝါယာမေန ပဇဟိတုံ သက္ကုဏေယျာ။ ဧဝံ သန္တေပိ ယဒါ ယော ယော အနုသယော ပစ္စယလာဘေန ပရိယုဋ္ဌာန ဗဟုလော ဟောတိ၊ တဒါ သော သော ဝိသေသေန အဓိမတ္တထာမ ဂတဘာဝံ ပတွာ ဌိတော ဟောတိ။ ယဒါ ယော ယော ပဋိပက္ခဓမ္မ သမာဒါနေန နိဂ္ဂဟပတ္တော ဟောတိ၊ တဒါ သော သော မန္ဒထာမ ဂတဘာဝံ ပတွာ ဌိတော ဟောတီတိ။ အဝိက္ခမ္ဘိတုပ္ပန္နံနာမ သမထ ဝိပဿနာဟိ သုဋ္ဌုအနိဂ္ဂဟိတာနံ တေသညေဝ နာမံ။ အသမုဂ္ဃာဋိ တုပ္ပန္နံနာမ မဂ္ဂေန အပ္ပဟီနာနံ ဘူမိလဒ္ဓါနံ တေသံဧဝ နာမန္တိ။ ယသ္မာ ပန လောကုတ္တရဓမ္မာနာမ ကိလေသာနံ အစ္စန္တပဋိပက္ခာ ဟောန္တီတိ ဟေဋ္ဌိမာ မဂ္ဂဋ္ဌဖလဋ္ဌာ သေက္ခာ အတ္တနော မဂ္ဂဖလက္ခဏေသု ဥပရိ မဂ္ဂါဇ္ဈေဟိပိ အနုသယေဟိ သာနုသယာတိဝါ နိရာနုသယာတိဝါ ထာမဝတာတိဝါ အထာမဂတာတိဝါ နဝတ္တဗ္ဗာ။ တသ္မာ အနုသယာနံ တာဒိသေ ပစ္စုပ္ပန္န ဘာဝေ သတိပိ ဟဉ္စိ ပစ္စုပ္ပန္နေ ကိလေသေ ပဇဟတိ။ တေနဟိ ထာမဂတော အနုသယံ ပဇဟတီတိ ဝုတ္တ ဒေါသော နတ္ထီတိ ဝေဒိတဗ္ဗောတိ။ ကာမရာဂေါဧဝ အနုသယော ကာမရာဂါနုသယော။

သံယောဇေန္တိ ဗန္ဓန္တီတိ သံယောဇနာနိ၊ တာနိ ပန သက္ကာယဒိဋ္ဌိ ဝိစိကိစ္ဆာ သီလဗ္ဗတပရာမာသော ကာမစ္ဆန္ဒော ဗျာပါဒေါတိ ပဉ္စ ဩရမ္ဘာဂိယာနိ။ ရူပရာဂေါ အရူပရာဂေါ မာနော ဥဒ္ဓစ္စံ အဝိဇ္ဇာတိ ပဉ္စ ဥဒ္ဓံဘာဂိယာနီတိ သုတ္တန္တေ အဘိဓမ္မေစ ဒသသံယောဇနာနိ အာဂတာနိ။ ဣတရာနိ ပန အဘိဓမ္မေဧဝ အာဂတာနီတိ တတော ဝိသေသကရဏတ္ထံ သုတ္တန္တေတိ ဝုတ္တံ။ ကမော ပန ဒွိန္နံပိ ပါဠိယာ နသမေတိ။ သဘာဂ ဓမ္မသင်္ဂဟဝသေန ပန ဣဓ အညထာ ကမော ဝုတ္တော သိယာတိ။ စိတ္တံ ကိလိဿန္တိ ဝိဗာဓေန္တိ ဥပတာပေန္တိစာတိ ကိလေသာ။ ကိလိဿန္တိဝါ မလီနဘာဝံ နိဟီနဘာဝဉ္စ ဂစ္ဆန္တိ သတ္တာ ဧတေဟီတိ ကိလေသာ။ ကာမဘဝနာမေနာတိ ဝတ္ထုကာမဒီပကေန ကာမနာမေန ရူပါရူပဘဝဒီပကေန စ ဘဝနာမေန။ တာဒိသံ ကာမ ဘဝသင်္ခါတံ အာရမ္မဏဘူတံ ဝတ္ထု ဧတိဿာတိ တဗ္ဗတ္ထုကာ။ တထာ ပဝတ္တန္တိ သီလဗ္ဗတာနိ ပရတော အာမသနာကာရေန ဣဒံ မေ သစ္စံ မောဃမညန္တိ အဘိနိဝိသနာကာရေန ခန္ဓေသု အတ္တာဘိနိဝေသာကာရေနစ ပဝတ္တံ။ ဝတ္ထုတောတိ သဘာဝဓမ္မတော။ အယံ ပါပသင်္ဂဟော အကုသလင်္ဂဟော နဝဓာ ဝုတ္တောတိ ယောဇနာ။ [အကုသလသင်္ဂဟော]

၁၆၃။ မိဿက သင်္ဂဟေ ပါဏာတိပါတာဒီနိ ပါပကမ္မာနိ ကရောန္တာနံပိ စိတ္တဿ အာရမ္မဏေ ဥဇုကရဏံနာမ ဈာနေန ဝိနာ န သိဇ္ဈတီတိ ဝုတ္တံ သတ္တဈာနင်္ဂါနီတိ။ ကလျာဏေဝါ ပါပကေဝါ အာရမ္မဏေ ဥဇုကံ စိတ္တပဋိပါဒနသင်္ခါတဿ ဥပနိဇ္ဈာယန ကိစ္စဿ အင်္ဂါနီတိ အတ္ထော။ တတ္ထ ဒေါမနဿံ အကုသလဇ္ဈာနင်္ဂံ။ သေသာနိ ကုသလာကုသလာဗျာကတာနီတိ။ ကလျာဏကမ္မ ပါပကမ္မသင်္ခါတာသု သုဂတိ ဒုဂ္ဂတိ ဝိဝဋ္ဋသင်္ခါတာသုစ နာနာဒိသာသု တံတံဒိသာတိ မုခပ္ပဝတ္တိသင်္ခါတာ စိတ္တဿ ဂတိနာမ သမ္မာဝါ မိစ္ဆာဝါ ပဝတ္တေဟိ ဒဿနာဒီဟိ ဧဝ သိဇ္ဈတီတိ ဝုတ္တံ ဒွါဒသမဂ္ဂင်္ဂါနီတိ။ စိတ္တဿ ဥဇုဂတိယာဝါ ဝင်္ကဂတိယာဝါ ဂမနဿ ပထင်္ဂါနိ ဥပါယင်္ဂါနီတိ အတ္ထော။ တတ္ထ မိစ္ဆာဒိဋ္ဌိ မိစ္ဆာသင်္ကပ္ပ မိစ္ဆာဝါယာမ မိစ္ဆာသမာဓယော ပါပကမ္မ ဒုဂ္ဂတိဘဝ သင်္ခါတာသု အဟိတဒိသာသု စိတ္တဿ ဝင်္ကဂတိယာ ဂမနဿ ဥပါယင်္ဂါနိ၊ ဣတရာနိ ကလျာဏကမ္မ သုဂတိဘဝ ဝိဝဋ္ဋဓမ္မသင်္ခါတာသု ဟိတဒိသာသု ဥဇုဂတိယာတိ ဒဋ္ဌဗ္ဗံ။ တတ္ထ ပါဏာတိပါတကမ္မေ ဝိတက္က ဝိစာရ ဒေါမနဿေကဂ္ဂတာ သင်္ခါတံ စတုရင်္ဂိကဇ္ဈာနံ မိစ္ဆာသင်္ကပ္ပ မိစ္ဆာဝါယာမ မိစ္ဆာသမာဓိ သင်္ခါတော တိယင်္ဂီကမဂ္ဂေါစ ဝေဒိတဗ္ဗော။ ဧဝံ သေသေသု သုစရိတဒုစ္စရိတကမ္မေသု ဈာနမဂ္ဂါ ဥဒ္ဓရိတဗ္ဗာ။ ဝိဘင်္ဂေ ပန သုတ္တန္တေသုစ မိစ္ဆာဝါစာ မိစ္ဆာကမ္မန္တော မိစ္ဆာအာဇီဝေါ မိစ္ဆာသတီတိ ဣမေပိ စတ္တာရော အာဂတာ။ ဣမေ ပန ဝိသုံ စေတသိကဓမ္မာ နဟောန္တိ။ တထာ တထာ ပဝတ္တာနံ စတုန္နံ ခန္ဓာနံ အဓိဝစနန္တိ ကတွာ ဣဓ နဂဟိတာ။

[၂၁၀] ယံ ပန ဝိဘာဝနိယံ

‘‘သုဂတိ ဒုဂ္ဂတီနံ နိဗ္ဗာနဿ စ အဘိမုခံ ပါပနတော မဂ္ဂါ၊ တေသံ ပထဘူတာနိ အင်္ဂါနိ မင်္ဂါနီ’’တိ ဝုတ္တံ၊ တံ န သုန္ဒရံ၊

န ဟိ အင်္ဂါနိ မဂ္ဂါနံ ပထဘူတာနိနာမ ဟောန္တိ၊ မဂ္ဂသဒ္ဒေါယေဝ ပထပရိယာယော အဋ္ဌကထာသု ဝုတ္တော န အင်္ဂသဒ္ဒေါတိ၊

[၂၁၁] ယဉ္စ တတ္ထ

‘‘မဂ္ဂဿဝါ အဋ္ဌင်္ဂိကဿ အင်္ဂါနိ မဂ္ဂင်္ဂါနီ’’တိ ဝုတ္တံ။ တံပိ အနုပပန္နံ။

ဣဓ ဟိ ကတ္ထစိ စိတ္တေ တိယင်္ဂိကော ကတ္ထစိ စတုရင်္ဂိကောတိအာဒိနာ နာနာမဂ္ဂေါဝ အဓိပ္ပေတောတိ။ အာဓိပစ္စဋ္ဌေန ဣန္ဒြိယာနိ။ ကိဉ္စ အာဓိပစ္စံ။ အတ္တာဓီနဝုတ္တိကေ ဓမ္မေ အတ္တနော ဂတိယံ သဗ္ဗသော ဝတ္တေတုံ သမတ္ထဘာဝေါ။ ဣတိ တေသု တေသု ကိစ္စေသု အတ္တနော အာဓိပစ္စသင်္ခါတံ ဣန္ဒဋ္ဌံ ကရောန္တိ သာဓေန္တီတိ ဣန္ဒြိယာနိ။ ဣန္ဒဋ္ဌံ ကာရေန္တီတိပိ ဣန္ဒြိယာနိ။ ဣဿရာ အဓိပတိနောတိ ဝုတ္တံ ဟောတိ။ တတ္ထ ပဉ္စစက္ခာဒီနိ ဒဿနာဒိကိစ္စေသု စက္ခုဝိညာဏာဒီနံ ဣဿရာဟောန္တိ။ ဗလဝဒုဗ္ဗလမန္ဒ တိက္ခာဒီသု အတ္တာကာရာနုဝတ္တာပနတော။ ဘာဝဒွယံ ဣတ္ထာကာရာဒိဝသေန ပဝတ္တိယံ စတုသမုဋ္ဌာနိက ရူပါနံ သကလခန္ဓပဉ္စကဿေဝ ဝါ ဣဿရော ဟောတိ။ အညထာ အပ္ပဝတ္တိတော။ တထာ ဟိ ယသ္မိံ သန္တာနေ ပဋိသန္ဓိယံ ဣတ္ထိဘာဝေါ ပဝတ္တတိ။ တသ္မိံ သဗ္ဗေ ကမ္မာဒိပစ္စယာ စတုသမုဋ္ဌာနရူပသန္တတိံ သမုဋ္ဌာပေန္တာ ဣတ္ထာကာရသဟိတမေဝ သမုဋ္ဌာပေန္တိ၊ နော အညထာ။ ဆန္ဒစိတ္တာဓိပ္ပာယာပိ တသ္မိံ မန္ဒာကာရသဟိတာဝ ပဝတ္တန္တိ။ တဗ္ဗိပရီတေန ပုရိသသန္တာနံ ဝေဒိတဗ္ဗံ။ ဇီဝိတဒွယံ ရူပါ ရူပသန္တတီနံ ရတ္တိ ဒိဝ မာသ သံဝစ္ဆရာနုက္ကမေန အဒ္ဓါနဖရဏေ သဟဇာတဓမ္မာနံ ဣဿရော ဟောတိ။ တေသံ တဒါယတ္တဝုတ္တိ ကတ္တာ။ မနော ဝိဇာနနကိစ္စေ။ ဝေဒနာပဉ္စကံ တထာ တထာ အာရမ္မဏရသာနုဘဝနေ။ သဒ္ဓါ အာရမ္မဏာဝီမုစ္စနေ။ ဝီရိယံ ကမ္မနိ အလီန ဝုတ္တိဘာဝေ။ သတိ အာရမ္မဏုပဋ္ဌာနေ။ သမာဓိ အာရမ္မဏေ နိစ္စလဋ္ဌိ တိယံ။ ပညာ အသမ္မောဟကိစ္စေ သမ္ပယုတ္တဓမ္မာနံ ဣဿရော ဟောတိ။ အနညာဘိဘဝနီယဘာဝေန ပဝတ္တနတော။ ယထာ ဟိ သိလာယံ ပထဝီ သဟဇာတေဟိ အနဘိဘဝနီယာ ဟောတိ။ အတ္တနာဝတေ အဘိဘဝိတွာ ဝိသုံ အဝိဇ္ဇမာနေဝိယ ကတွာ ပဝတ္တတိ။ ယထာ စ ဥဒကေ အာပေါ အဂ္ဂိမှိ တေဇော ဝါတေ ဝါယော။ ဧဝံ သမ္ပဒမိဒံ ဒဋ္ဌဗ္ဗံ။

အညာယိတ္ထ ပဋိဝိဇ္ဈိတ္ထာတိ အညာတံ။ န အညာတံ အနညာတံ။ စတုသစ္စဓမ္မော။ အမတံဝါ ပဒံ။ အနညာတံ ဉဿာမိ ဇာနိဿာမီတိ အနညာတညဿာမိ။ အာချာတိကံပိ ဟိ ပဒံ သညာသဒ္ဒဘာဝေ ဌိတံ နာမိကဋ္ဌာနေ တိဋ္ဌတိ။ ယထာ မက္ခလိဂေါသာလော ဧဟိပဿိ ကောတိ။ ဧဝဉှိ သတိ တဿ ပဒန္တရေန သဟ သမာသဘာဝေါ နဝိရုဇ္ဈတီတိ။ အနညာတညဿာမီတိ ဧဝံ ပဋိပန္နဿ ဣန္ဒြိယံ အနညာ တညဿာမီတိန္ဒြိယံ။ အာဒိမနသိကာရတော ပဋ္ဌာယ တာဒိသေန ဥဿာဟေန သဟ ဝိပဿနံ အာရဘန္တဿ တသ္မိံ ဥဿာဟေ အပဋိပဿဒ္ဓေယေဝ သောတာမတ္တိမဂ္ဂံ ပဋိလဘန္တဿ ဣန္ဒြိယန္တိ ဝုတ္တံ ဟောတိ။ အာဇာနာတီတိ အညံ။ တမေဝ ဣန္ဒြိယန္တိ အညိန္ဒြိယံ၊ ပထမမဂ္ဂေန အနညာတံ ဉတွာပိ ကိလေသပ္ပဟာနကိစ္စဿ အပရိနိဋ္ဌိတတ္တာ တဿ ဇာနနကိစ္စဿ ဝိပ္ပကတဘာဝေန ယထာ ဒိဋ္ဌေ တသ္မိံ စတုသစ္စဓမ္မေ အမတပဒေဧဝ ဝါ ပုနပ္ပုနံ ဇာနနကိစ္စ ယုတ္တာနံ ဣန္ဒြိယန္တိ ဝုတ္တံ ဟောတိ။ အညာတာဝိန္ဒြိယန္တိ အညာ တာဝိနော ပရိနိဋ္ဌိတ အာဇာနန ကိစ္စဿ ခီဏာသဝဿ ဣန္ဒြိယန္တိ အညာတာဝိန္ဒြိယံ။ တိဝိဓံ ပေတံ တထာရူပေ ဇာနနေ သမ္ပယုတ္တ ဓမ္မာနံ ဣဿရော ဟောတီတိ ဝေဒိတဗ္ဗံ။

တတ္ထ ဣမေသံ သတ္တာနံ ပါကဋေ ရူပကာယေ အတ္တဂါဟဒဠှတ္တံ တဗ္ဗိမုတ္တိစ ဣမေသံ အပရိညာယ ပရိညာယစ ဟောတီတိ ဒီပေတုံ အာဒိတော ပဉ္စ ပသာဒိန္ဒြိယာနိ ဝုတ္တာနိ။ တဿ အတ္တဿ ဣတ္ထိပုမ တာဘေဒေါ ဣမေသံ ဝသေန ဟောတိ။ တသ္မိံ ဝါ ဣတ္ထိပုရိသ ဂါဟော တဗ္ဗိမုတ္တိစ ဣမေသံ အပရိညာယ ပရိညာယစ ဟောတီတိ ဒီပေတုံ ကဒနန္တရံ ဘာဝိန္ဒြိယဒွယံ ဝုတ္တံ။ သောစ အတ္တာ ဣမဿ ဝသေန ဇီဝသညံ လဘတိ။ တသ္မိံဝါ ဇီဝဂါဟော တဗ္ဗိမုတ္တိစ ဣမဿ အပရိညာယ ပရိညာယစ ဟောတီတိ ဒီပေတုံ တဒနန္တရံ ဇီဝိတိန္ဒြိယံ ဝုတ္တံ။ ဣဒံ ပန ဘာဝိန္ဒြိယတော ပုရေ ဝတ္တဗ္ဗံပိ ရူပါရူပ မိဿကတ္တာ ဣဓ ဝုတ္တန္တိ ဒဋ္ဌဗ္ဗံ။ နာမကာယေ အတ္တဂါဟဒဠှတ္တံ တဗ္ဗိမုတ္တိစ ဣမဿ အပရိညာယ ပရိညာယစ ဟောတီတိ ဒီပေတုံ နာမိန္ဒြိယေသု မနိန္ဒြိယံ အာဒိတော ဝုတ္တံ။ သောစ အရူပီ အတ္တာ ဣမေသံ ဝသေန သံကိလိဋ္ဌော ဝိပ္ဖန္ဒိတောစ ဟောတိ။ တသ္မိံဝါ သုခိတဒုက္ခိတဂါဟော တဗ္ဗိမုတ္တိစ ဣမေသံ အပရိညာယ ပရိညာယစ ဟောတီတိ ဒီပေတုံ တဒနန္တရံ ပေဒနိန္ဒြိယပဉ္စကံ ဝုတ္တံ။ တဿ သံကိလိဋ္ဌဿ ဝေါဒါနပ္ပတ္တိယာ တံတံဂါဟဝိမုတ္တိယာဝါ ပဋိပတ္တိဒဿနတ္ထံ တဒနန္တရံ သဒ္ဓါဒိပဉ္စိန္ဒြိယံ ဝုတ္တံ။ တာယ ပဋိပတ္တိယာ ဝေါဒါနပ္ပတ္တိ ယာ အာဒိ မဇ္ဈ ပရိယောသာန ဒဿနတ္ထံ အန္တေ တီဏိ လောကုတ္တရိန္ဒြိယာနိ ဝုတ္တာနီတိ။

[၂၁၂] ဝိဘာဝနိယံ ပန

‘‘ဧတ္တာဝတာ အဓိပ္ပေတတ္ထသိဒ္ဓီတိ အညေသံ အဂဟဏန္တိ’’ ဝုတ္တံ။ တံ န ယုဇ္ဇတိ။

နဟိ သန္တေသုပိ အညေသု ဣန္ဒြိယဘာဝါရဟေသု ဓမ္မေသု ဧတ္တာဝတာ အဓိပ္ပေတတ္ထသိဒ္ဓိယာ တေသံ အညေသံ ဘဂဝတော ထေရဿစ အဂဟဏန္တိ ယုတ္တံ ဝတ္တုံ။ ဣန္ဒြိယဘာဝါရဟဿ အညဿ အသမ္ဘဝတော။ ယဒိ ဟိ သမ္ဘဝေယျ၊ သတံပိ သဟဿံပိ ဂဏှိဿတိယေဝါတိ။ ဗလိယန္တိ ဥပ္ပန္နုပ္ပန္နေ ပဋိပက္ခဓမ္မေ သဟန္တိ မဒ္ဒန္တီတိ ဗလာနိ။ ယထာ အဗလာနံ ဗလိယန္တိ။ မဒ္ဒန္တေနံ ပရိဿယာတိ။ ဧတ္ထစ အဗလာတိ ဒုဗ္ဗလာ။ နန္တိ ဟီနဝီရိယံ ဇနံ။ ဗလိယန္တီတိ ဗလသာ ကရောန္တိ အဇ္ဈောတ္ထရန္တိ။ ပရိဿယာတိ အဗလာ ရာဂါဒိ ပရိဿယာတိ အတ္ထော။ အပိစ၊ ပဋိပက္ခဓမ္မေဟိ အကမ္ပိယဋ္ဌေန အက္ခော ဘဏိယဋ္ဌေန ဗလာနိနာမ။ တသ္မာ အဿဒ္ဓိယသင်္ခါတေန ပဋိပက္ခဓမ္မေန ကမ္ပေတုံ အသက္ကုဏေယျတာ သဒ္ဓါဗလံနာမ။ ကောသဇ္ဇသင်္ခါတေန ကမ္ပေတုံ အသက္ကုဏေယျတာ ဝီရိယဗလံနာမ။ မုဋ္ဌသစ္စေန ကမ္ပေတုံ အသက္ကုဏေယျတာသတိဗလံနာမ။ ဥဒ္ဓစ္စေန ကမ္ပေတုံ အသက္ကုဏေယျတာသမာဓိဗလံနာမ။ အဝိဇ္ဇာယကမ္ပေတုံ အသက္ကုဏေယျတာ ပညာဗလံ နာမ။ သေသဒုကဒွယံ ပန အညမညံ ပဋိပက္ခေနယောဇေတဗ္ဗံ။

[၂၁၃] ဝိဘာဝနိယံ ပန

ပါပဗလဒုကံ ပဋိပက္ခေန ယောဇေတုံ နလဗ္ဘတီတိ ကတွာ ‘‘အဟိရိကာနောတ္တပ္ပဒွယံ ပန သမ္ပယုတ္တဓမ္မေသု ထိရဘာဝေ နေဝါတိ’’ ဝုတ္တံ။ တံ န သုန္ဒရံ။

သမ္ပယုတ္တဓမ္မေသု ထိရဘာဝေါတိစ ပဋိပက္ခေဟိ အကမ္ပိယတာ တိစ အတ္ထတော နာနတ္တာဘာဝတောတိ။ ဝီရိယသမာဓိဗလာနိ ကုသလာကုသလာဗျာကတာနိ။ အဟိရိကာနောတ္တပ္ပာနိ အကုသလဗလာနိ။ သေသာနိ ကုသလာဗျာကတာနီတိ။ အဓိပတီတိ ဧတ္ထ ပတီတိ သာမိ ဣဿရော။ သော ပန ပဒေသ ဣဿရော သကလိဿရောတိ ဒုဝိဓော။ တတ္ထ ဣန္ဒြိယာနိ ပရေသံ ဝိသယေ သယံ ပရဝသေ ဝတ္တိတွာ အတ္တနော ဝိသယေဧဝ ပရေဟိ အတ္တနော ဝသေ ဝတ္တာပေန္တီတိ ပဒေသိဿရာ နာမ။ ပုဗ္ဗာတိ သင်္ခါရဝသေန ပုဗ္ဗာဂမနဝသေန ဝါ ဝိသေသေတွာ ပဝတ္တံ အဓိပတိဋ္ဌာနံ ပတွာ ပန အညော ဒုတိယော ဣဿရောနာမ နတ္ထိ။ တသ္မာ အဓိကော ပတီတိ အဓိပတိ။ အတ္တာ ဓီနဝုတ္တီနံ ပတီတိ အဓိပတီတိစ ဝဒန္တိ။

ဆန္ဒောဧဝ အဓိပတီတိ ဆန္ဒာဓိပတိ။ ဆန္ဒဝတော ကိံနာမ ကမ္မံ နသိဇ္ဈတီတိ ဧဝံ ပုဗ္ဗာဘိသင်္ခါရဝသေနဝါ ပုဗ္ဗေ အတီတဘဝေသု သုဋ္ဌု အာသေဝိတဆန္ဒာဂမနဝသေနဝါ တေသု တေသု ကလျာဏ ပါပကမ္မေသု သမ္ပယုတ္တဓမ္မေ မဟောဃောဝိယ တိဏပဏ္ဏကသဋေ အတ္တပရာဓီနေ နိစ္စံ ပဂ္ဂဟိတဓုရေ ကတွာ ပဝတ္တော ကတ္တုကမျတာ ဆန္ဒော။ ဧသ နယော သေသေသုပိ။ နနု စေတ္ထ ပစ္ဆိမာ တယော ဓမ္မာ အဓိပတိဘာဝံ ဂဏှန္တာ ဣန္ဒြိယဘာဝံ အဝိဇဟိတွာဝ ဂဏှန္တီတိ အဓိပတိဘူတာဝ သမာနာ ဣန္ဒြိယကိစ္စဝသေန ပရဝသေပိ ဝတ္တန္တီတိ။ သစ္စံ၊ အညံ ပန အဓိပတိကိစ္စံ၊ အညံ ဣန္ဒြိယကိစ္စန္တိ နတ္ထေတ္ထ ဒေါသောတိ။ ယထာ ဟိ ရာဇာ စက္ကဝတ္တီ ဧကဿ အတ္တနော ပုရောဟိတဿ သန္တိကေ ဧကံ ဒိဗ္ဗဝိဇ္ဇံ ဂဏှာတိ။ န ဧတ္တာဝတာ ရာဇာ စက္ကဝတ္တိနာမ နဟောတိ။ နစ ဝိဇ္ဇာဟေတု အညဿ ဝသေန ဝတ္တတိ။ အညဉှိ စက္ကဝတ္တိ ရဇ္ဇကိစ္စံ၊ အညံ ဝိဇ္ဇာဂဟဏ ကိစ္စန္တိ။ ဧဝံ သမ္ပဒမိဒံ ဒဋ္ဌဗ္ဗံ။ တတ္ထ အဓိပတိကိစ္စံနာမ တံတံကိစ္စ ဝိသေသံ အနပေက္ခိတွာ အတုလျဗလေန အဘိဘဝိတွာ သဟဇာတ ဓမ္မေ အတ္တနော အတ္တနော ကိစ္စေသု အနိဝတ္တမာနေ ကတွာ ဓုရ ဝါဟိတာ။ ဣန္ဒြိယကိစ္စံ ပန ဝိဇာနနာဒိကိစ္စံ အာရဗ္ဘ ပဝုစ္စတီတိ။

အာဟရန္တိ သဟဇာတာဒိပစ္စယသာမညတော အတိရေကေန အသာဓာရဏပစ္စယသတ္တိဝိသေသေန ဟရန္တိ ပဝတ္တေန္တီတိ အာဟာရာ။ အာဟရန္တိဝါ အဇ္ဈတ္တသမ္ဘူတာ တေ တေ ပစ္စယဓမ္မာ ပစ္စယုပ္ပန္နဓမ္မာစ အတ္တာနဉ္စေဝ အတ္တနော အတ္တနော ပစ္စယကိစ္စံ ပစ္စယုပ္ပန္နကိစ္စဉ္စ သုဋ္ဌု ဟရန္တိ ဝဟန္တိ ဧတေဟီတိ အာဟာရာ။ ယထာဟသဗ္ဗေ သတ္တာ အာဟာရဋ္ဌိတိကာတိ။ ဧတ္ထစ သဗ္ဗေ သတ္တာတိ ဧတေန သဗ္ဗေ အဇ္ဈတ္တသမ္ဘူတာ ပစ္စယပစ္စယုပ္ပန္နဓမ္မာ ဝုတ္တာ။ အာဟာရဋ္ဌိတိကာတိ ပစ္စယဋ္ဌိတိကာ။ ယထာရဟံ စတုဝီသတိပစ္စယေဟိ ဌိတိသဘာဝါတိ အတ္ထော။ နနုစေတ္ထ ပစ္စယာဟာရောဝ ဝုတ္တော။ န အာဟာရပစ္စယော။ ဣဓ ပန စတုဗ္ဗိဓော အာဟာရပစ္စယဓမ္မောဝ ဝုတ္တောတိ။ သစ္စံ၊ ပစ္စယဋ္ဌေန ပန အာဟာရနာမကာနံ သဗ္ဗေသံ စတုဝီသတိပစ္စယဓမ္မာနံ မဇ္ဈေ ယေဓမ္မာ စတ္တာရော အာဟာရာတိ ဝိသေသေတွာ ဝုတ္တာ။ တေ တေသံ ပစ္စယာဟာရာနံပိ အာဟာရဘူတာတိ သိဒ္ဓါ ဟောန္တီတိ။ ဣမသ္မိံ အတ္ထေ စတုန္နံ အာဟာရာနံ မဟန္တ ဘာဝေါ ပါကဋော ဟောတီတိ။

တတ္ထ ယထာ ယဝဗီဇာနံဝါ သာလိဗီဇာနံဝါ အာနုဘာဝေါ နာမ ကဠိရင်္ကုရာနံ ဥပ္ပာဒါန ပဓာနံ ဟောတိ။ တတောပရံ ပန သဿဘာဝံ ပတွာ ဆ ပဉ္စ မာသေ ဝဍ္ဎိယာဝါ ဌိတိယာဝါ ပထဝိ ရသအာပေါရသာနံ အာနုဘာဝေါ ပဓာနံ ဟောတိ။ ဧဝမေဝံ ကဗဠီ ကာရာဟာရူပဇီဝီနံ ကာမသတ္တာနံ ကမ္မဿ အာနုဘာဝေါနာမ ပဋိသန္ဓိရူပုပ္ပာဒနေ ပဓာနံ ဟောတိ။ တတောပရံ ပန ယာဝတာယုကံ ဝဍ္ဎီယာဝါဌိတိယာဝါ ဥတုအာဟာရာနံ အာနုဘာဝေါ ပဓာနံ ဟောတိ။ ကမ္မဇရူပါနိ ဟိ ယာဝ အာသန္နမရဏာ ပဝတ္တမာနာနိပိ ဥတုအာဟာရေဟိ အနုဂ္ဂဟိတာနိဧဝ ပဝတ္တန္တိ။ ဥတုစ အာဟာရု ပတ္ထမ္ဘိတောယေဝ အတ္တနော ကိစ္စံ ကရောတိ။ တသ္မာ တေသံ သတ္တာနံ စတုသန္တတိရူပံ ကဗဠီကာရာဟာရေန အနုပတ္ထမ္ဘီယမာနံ စိရံ နပဝတ္တတိ။ ဥပတ္ထမ္ဘီယမာနံဧဝ ယာဝတာယုကံ ပဝတ္တတိ။ ယထာစ သကုဏာဝါ ဍံသမကသာ ဒယောဝါ တုဏ္ဍေန အာဟာရံ ဂဟေတွာ အတ္တဘာဝံ ပေါသေန္တိ။ တုဏ္ဍေ အသန္တေ အာဟာရံ အလဘန္တာ မရန္တိ။ ဧဝမေဝ ဣမေ သတ္တာ ဖဿေန အာရမ္မဏေသု ရသံ ဂဟေတွာ ဝေဒနာသင်္ခါတံ ဥပဘောဂပရိဘောဂံ သမ္ပာဒေတွာ တဏှာဝေပုလ္လံ ပတွာ တိဝိဓံ ဝဋ္ဋံ ပူရေတွာ ယာဝဇ္ဇတနာပိ ဝဋ္ဋေ အနုကဏ္ဌမာနာ ပဝတ္တန္တိ။

ယဒိ ဟိ ဖဿောနာမ န သိယာ၊ အာရမ္မဏရသံ အလဘိတွာ ဝေဒနာ ပရိဘောဂရဟိတေန တဏှုပ္ပတ္တိယာ ဩကာသော နတ္ထီတိ တိဝိဓဝဋ္ဋမေဝ နသိယာတိ။ ယထာစ တေ သကုဏာဒယော ပက္ခေ ဝိယူဟိတွာ အန္တရာ အပတမာနာ ရုက္ခတော ရုက္ခံ ဝနတော ဝနံ ဝိစရိတွာ အတ္တာနံ ယာပေန္တိ။ ပက္ခေသု အသန္တေသု ဂမနံ အသမ္ပာဒေန္တာ ပတိတွာ မရန္တိ။ ဧဝမေဝံ ဣမေ သတ္တာ အာယူဟနလက္ခဏာယ စေတနာယ စေတယိတွာ ကမ္မသမင်္ဂိတံ သမ္ပာဒေတွာ ဘဝတော ဘဝံ ဝိစရိတွာ ယာဝဇ္ဇတနာ ဝဋ္ဋေ သံသရန္တိ။ ယဒိ ဟိ စေတနာနာမ န သိယာ၊ ကမ္မဝဋ္ဋဿ အဘာဝေါ။ တဒဘာဝေစ ဝိပါကဝဋ္ဋဿ အဘာဝေါ။ တဒဘာဝေစ တဒနုသယိတဿ ကိလေသဝဋ္ဋဿ အဘာဝေါတိ ဝဋ္ဋံနာမ န သိယာတိ။ ယထာစ တေ သကုဏာဒယော စက္ခုနာ ဂေါစရဋ္ဌာနံဝါ တံတံဒိသာဘာဂံဝါ ဝိဘာဝေတွာ ယာဝဇီဝံ အတ္တာနံ ယာပေန္တိ။ စက္ခုသ္မိံ အသန္တေ ကိဉ္စိဂဟေတဗ္ဗဝတ္ထုံဝါ ဂန္တဗ္ဗဋ္ဌာနံဝါ အလဘိတွာ တတ္ထေဝ မရန္တိ။ ဧဝမေဝံ သမ္ပယုတ္တာ ဓမ္မာ အာရမ္မဏဝိဇာနလက္ခဏေန ဝိညာဏေန တံတံအာရမ္မဏံ လဘိတွာ တသ္မိံ တသ္မိံ ဖဿာဒယော ဥပ္ပာဒေတွာ တိဝိဓံ ဝဋ္ဋံ ဝဋ္ဋေန္တိ။ ယဒိ ဟိ ဝိညာဏံနာမ န သိယာ၊ ဖဿာဒီနံ အာရမ္မဏလာဘောယေဝ နတ္ထီတိ ဝဋ္ဋမေဝ န သိယာတိ။ တေနာဟ စတ္တာရော အာဟာရာ။လ။ ဝိညာဏံ စတုတ္ထန္တိ။ သံယုတ္တကေစ –

စတ္တာရောမေ ဘိက္ခဝေ အာဟာရာ ဘူတာနံ ဝါ သတ္တာနံ ဌိတိယာ သမ္ဘဝေသီနံဝါ သတ္တာနံ အနုဂ္ဂဟာယ ကဗဠီကာရော အာဟာရော ဩဠာရိကောဝါ သုခုမောဝါ၊ ဖဿော ဒုတီယော၊ မနောသဉ္စေတနာ တတီယာ၊ ဝိညာဏံ စတုတ္ထန္တိ ဝုတ္တံ။

တတ္ထ ဘူတာနန္တိ ဝုဒ္ဓိပ္ပတ္တာနံ။ သမ္ဘဝေသီနန္တိ ကလလာဒိ ကာလေ ဌိတာနံ။ စတုန္နံပန အာဟာရာနံ ယထာသမ္ဘဝံ အနမတဂ္ဂေ သံသာရဝဋ္ဋေဝါ တသ္မိံ တသ္မိံ ဘဝေဝါ ဌိတိယာဝါ အနုဂ္ဂဟာယဝါ ပဝတ္တိ အာကာရော ဝုတ္တနယေန ဝေဒိတဗ္ဗော။ အဋ္ဌကထာယံ ပန ကောပနေတ္ထ အာဟာရော။ ကိံ အာဟာရေတီတိ။ ကဗဠီကာရာ ဟာရော ဩဇဋ္ဌမကရူပါနိ အာဟာရေတိ။ ဖဿာဟာရော တိဿော ဝေဒနာ။ မနောသဉ္စေတနာဟာရော တယော ဘဝေ။ ဝိညာဏာ ဟာရော ပဋိသန္ဓိနာမရူပန္တိ ဝုတ္တံ။ တံ ပါကဋဖလဝသေန ဝုတ္တန္တိ ဒဋ္ဌဗ္ဗံ။ ဩဇဋ္ဌမကရူပုပ္ပာဒနံ ပန ကဗဠီကာရာဟာရဿ မဟန္တံ ကိစ္စံ နဟောတိ။ စတုသန္တတိရူပုပတ္ထမ္ဘနမေဝ မဟန္တံ။ တေနေဝ ဟိ ပါဠိယံ ဌိတိယာတိစ အနုဂ္ဂဟာယာတိစ ဝုတ္တံ။

အပိစ ယထာ ဥပနိဿယာသေဝနပစ္စယာ သုတ္တန္တိ ကပရိယာယာ အဘိဓမ္မပရိယာယာတိစ ဒုဝိဓာ ဟောန္တိ။ တထာ အာဟာရပစ္စယောပိ ဒုဝိဓော။ တတ္ထ ယံ ဝုတ္တံ မနောသဉ္စေတနာဟာရော တယောဘဝေတိ။ တံ သုတ္တန္တိကပရိယာယံ သန္ဓာယ ဝုတ္တံ။ နဟိ ပဋ္ဌာနေ အရူပါ ဟာရာ အသဟဇာတာနံ ဓမ္မာနံ အာဟာရဋ္ဌေန ပစ္စယာနာမ ဟောန္တီတိ။ ပဉ္စဝိညာဏေသု ဈာနင်္ဂါနိ နလဗ္ဘန္တိ။ တာနိ ဟိ ဒုဗ္ဗလကိစ္စဋ္ဌာနဝတ္ထုကတ္တာ ရူပါဒီသု အဘိနိပါတမတ္တာနိ ဟောန္တီတိ န တေသု ဝိဇ္ဇမာနာ ဝေဒနာ ဧကဂ္ဂတာ ဈာနကိစ္စံ သာဓေန္တီတိ။ ဝိတက္ကပစ္ဆိမကံ ဈာနန္တိစ ဝုတ္တံ။ ဈာနင်္ဂါနံ နာယကဘူတောစ ဝိတက္ကော တေသု နတ္ထီတိ တတ္ထ တာဝေဒနာ ဧကဂ္ဂတာယော တံ န သာဓေန္တီတိ။ ဝီရိယုပတ္ထမ္ဘရဟိတာ ဓမ္မာ သမ္ပယုတ္တဓမ္မေသု ထိရဘာဝပ္ပတ္တာ နဟောန္တီတိ အဝီရိယေသု သောဠသာဟေတုကစိတ္တေသု သမာဓိဗလကိစ္စံ န သာဓေတိ။ ဝီရိယပစ္ဆိမကံ ဗလန္တိ ဟိ ဝုတ္တန္တိ အာဟ အဝီရိယေသု ဗလာနိ နလဗ္ဘန္တီတိ။ ဟေတုရဟိတာ စ ဓမ္မာ ဝဋ္ဋဿ ဝိဝဋ္ဋဿစ ပတ္တိယာ ပထဘာဝံ နဂစ္ဆန္တိ။ ဟေတုပစ္ဆိမကော မဂ္ဂေါတိ ဟိ ဝုတ္တန္တိ အာဟ အဟေတုကေသု မဂ္ဂင်္ဂါနိ န လဗ္ဘန္တီတိ။ ဝိစိကိစ္ဆာသမ္ပယုတ္တေစိတ္တေ ဧကဂ္ဂတာ အဓိမောက္ခရဟိ တတ္တာ ဧကန္တေန သံသပ္ပနသဘာဝါယ ဝိစိကိစ္ဆာယ အဘိဘူတတ္တာ စ မဂ္ဂိန္ဒြိယဗလဘာဝါယ ဗလဝတီ နဟောတီတိ ဝုတ္တံ ဝိစိကိစ္ဆာ စိတ္တေ ဧကဂ္ဂတာ မဂ္ဂိန္ဒြိယဗလဘာဝံ န ဂစ္ဆတီတိ။ ဒွိဟေတုက တိဟေတုက ဇဝနေသွေဝါတိ ဧတ္ထ ဒွိဟေတုက တိဟေတုကသဒ္ဒေန မောမူဟဒွယဟသနဇဝနာနိ နိဝတ္တေတိ။ ဇဝနသဒ္ဒေန တိဘူမကာနိ ဒွိဟေတုကတိဟေတုကဝိပါကာနိ နိဝတ္တေတိ။

[၂၁၄] ဝိဘာဝနိယံ ပန

‘‘ဒွိဟေတုကတိဟေတုကဂဟဏေန ဧကဟေတုကေသု အဓိပတီနံ အဘာဝံ ဒဿေတီ’’တိ ဝုတ္တံ၊ ဇဝနဘာဝသာမညတ္တာ ပန ဟသနစိတ္တေပိ တေသံ အဘာဝေါ ဒဿေတဗ္ဗောယေဝ ဟောတီတိ။

ယထာသမ္ဘဝန္တိ လဒ္ဓပုဗ္ဗာတိ သင်္ခါရဿ လဒ္ဓပုဗ္ဗာဂမဿ စ ဧကေကဿ အဓိပတိနော သမ္ဘဝါနုရူပံ ဧကောဝ လဗ္ဘတိ။ န ဒုတိယော။ ဣတရထာ အဓိပတိဧဝ နသိယာတိ။ ဧဝဉ္စ ကတွာ ပဋ္ဌာနေ ယထာ ဣန္ဒြိယပစ္စယဝိဘင်္ဂေ အရူပိနောဣန္ဒြိယာ သမ္ပယုတ္တကာနံဓမ္မာနံ တံသမုဋ္ဌာနာနဉ္စ ရူပါနံ ဣန္ဒြိယပစ္စယေန ပစ္စယောတိ ဝုတ္တံ။ န တထာ အဓိပတိပစ္စယဝိဘင်္ဂေ။ တတ္ထ ပန ဆန္ဒာဓိပတိ ဆန္ဒသမ္ပယုတ္တကာနန္တိအာဒိနာ ဧကေကာဓိပတိ ဝိဘာဂဝသေနေဝ ဝုတ္တန္တိ။ ဧဝဉှိ သတိ အဓိပတိ ဣန္ဒြိယာနံ ဝိသေသော ပါကဋော ဟောတီတိ။ နဝေရိတာတိ နဝ ဤရိတာ ကထိတာ။ ကုသလာ ကုသလာ ဗျာကတေဟိ သမာကိဏ္ဏော ကုသလာဒိ သမာကိဏ္ဏော။ [မိဿကသင်္ဂဟော]

၁၆၄။ စတ္တာရိ သစ္စာနိ ဗုဇ္ဈတီတိ ဗောဓိ။ ဗုဇ္ဈန္တိဝါ တာနိ တံ သမင်္ဂိနော ဧတာယာတိ ဗောဓိ။ စတုမဂ္ဂဉာဏံ။ ဝုတ္တဉှေတံ မဟာ နိဒ္ဒေသေ ဗောဓိ ဝုစ္စတိ စတူသု မဂ္ဂေသု-ဉာဏန္တိ။ ပက္ခောတိ ကောဋ္ဌာသော သမ္ဘာရော။ ဗောဓိယာ ပက္ခေ ဘဝါတိ ဗောဓိပက္ခိယာ။ အဓိသီလာ ဓိစိတ္တာ ဓိပညာ သင်္ခါတာသု တီသု သိက္ခာသု ပရိယာပန္နာနံ သတ္ထုသာသနဓမ္မာနံ ဧတံနာမံ။ တေ ပန ကောဋ္ဌာသတော သတ္တ ဝိဓာ ဟောန္တီတိ အာဟ စတ္တာရောသတိပဋ္ဌာနာတိအာဒိ။ သမ္ပယုတ္တ ဓမ္မေသု ပမုခါ ပဓာနာ ဟုတွာ ကာယာဒီသု အာရမ္မဏေသု တိဋ္ဌန္တိ နာနာရမ္မဏေသု စိတ္တဂမနံ နိဝတ္တေတွာ တေသွေဝ ကာယာဒီသု စိတ္တ နိဗန္ဓနဝသေန ပဝတ္တန္တီတိ ပဋ္ဌာနာနိ။ သတိဧဝ ပဋ္ဌာနာနီတိ သတိ ပဋ္ဌာနာနိ။ စတ္တာရိသတိပဋ္ဌာနာနီတိ ဝတ္တဗ္ဗေ ဓမ္မဘာဝံ အပေက္ခိတွာ စတ္တာရောသတိပဋ္ဌာနာ တိဝုတ္တန္တိ ဒဋ္ဌဗ္ဗံ။ ကာယေအနုပဿနာ ကာယာ နုပဿနာ။ ရူပကာယေ ရူပသမူဟေ အဿာသပဿာသာဒိကဿ အဝယဝကာယဿ တံတံကာယဘာဝေနဝါ အနိစ္စာဒိဘာဝေနဝါ ယာဝ တသ္မိံ တသ္မိံ ကာယေ သမ္မောဟော ပဟိယျတိ။ တာဝ ပုနပ္ပုနံ နိရန္တရံ သမနုပဿနာတိ အတ္ထော။ နဝပ္ပဘေဒါသု ဝေဒနာသု သုခဝေဒနာဒိ ကာယအဝယဝဝေဒနာယ တံတံ ဝေဒနာဘာဝေန ဥဒယဗ္ဗယဝသေန စ အနုပဿနာ ဝေဒနာနုပဿနာ။ သောဠသ ပဘေဒေသု သရာဂါ ဒီသု စိတ္တေသု သရာဂါဒိကဿ အဝယဝစိတ္တဿ တံတံ စိတ္တဘာဝေန ဥဒယဗ္ဗယဝသေနစ အနုပဿနာ စိတ္တာနုပဿနာ။ ပဉ္စပဘေဒေသု နီဝရဏာဒီသု ဓမ္မေသု ကာမစ္ဆန္ဒာဒိကဿ အဝယဝဓမ္မဿ တံ တံ ဓမ္မဘာဝေန ဥဒယဗ္ဗယဝသေနစ အနုပဿနာ ဓမ္မာနုပဿနာ။

[၂၁၅] ယံ ပန ဝိဘာဝနိယံ

‘‘ကုစ္ဆိတာနံ ကေသာဒီနံ အာယောတိ ကာယော။ အဿာသ ပဿာသာနံဝါ သမူဟော ကာယော’’တိ ဝုတ္တံ။ တံ န သုန္ဒရ မေဝ။

[၂၁၆] ယဉ္စ တတ္ထ

‘‘ကာယဿ အနုပဿနာ ကာယာနုပဿနာ’’တိ ဝုတ္တံ။ တံပိ န သုန္ဒရံ။

ကာယေ ကာယာနုပဿီ ဝိဟရတီတိ ဟိ ဝုတ္တံ။ ဧတေန ဟိ ကာယေ အနုပဿနာ ကာယာနုပဿနာတိ အယမတ္ထောဝ ပဓာနတော ဒဿိတောတိ။

[၂၁၇] ယဉ္စ တတ္ထ

‘‘ဝေဒနာနံ ဝသေန အနုပဿနာ’’တိ ဝုတ္တံ။ တံပိ န သုန္ဒရံ။ ဝေဒနာသု ဝေဒနာနုပဿီတိ ဟိ ဝုတ္တံ။ တထာ စိတ္တာနုပဿနာ ပဒေပိ။

[၂၁၈] ယံပိ တတ္ထ

‘‘သညာသင်္ခါရာနံ ဓမ္မာနံ ဘိန္နလက္ခဏာနမေဝ အနုပဿနာ ဓမ္မာနုပဿနာ’’တိ ဝုတ္တံ။ တံပိ န သုန္ဒရမေဝ။

န ဟိ ကတ္ထစိ ပါဠိယံ သညာသင်္ခါရာဝ ဝိသေသေတွာ ဓမ္မာတိ ဝုတ္တာ အတ္ထီတိ။ ပါဠိယဉှိ ဆနီဝရဏာ ပထမံ ဓမ္မာတိ ဝုတ္တာ။ တတော ပဉ္စုပါဒါနက္ခန္ဓာ။ တတော ဒွါဒသာယတနာနိ။ တတော သတ္တဗောဇ္ဈင်္ဂါ။ တတော စတ္တာရိ သစ္စာနီတိ။ ယဒိဧဝံ ဧကာယ ဓမ္မာနုပဿနာယ ဝုတ္တာယ ဣတရာပိ သိဒ္ဓါတိ သတိပဋ္ဌာနံ ဧကမေဝ ဝတ္တဗ္ဗံ၊ န စတ္တာရောတိ။န။ ယော ဟိ ဓမ္မာနုပဿနာယံ ရူပက္ခန္ဓော ဝုတ္တော။ သော ရုပ္ပနလက္ခဏာနုပဿနဝသေန ဝုတ္တော။ ရုပ္ပနလက္ခဏဉှိ နိဗ္ဗတ္တိတပရ မတ္ထဓမ္မော။ သောစ တထာ အနုပဿန္တဿ ဝိသေသတော သုခုမဿ အတ္တဝိပလ္လာသဿ ပဟာနာယ ဟောတီတိ။ ကာယောတိ ပန တံတံ သမူဟဘူတရူပဓမ္မဝသေန ဝေဒိတဗ္ဗော။ နရုပ္ပနလက္ခဏဝသေန။ နစ တံတံ ကာယဘာဝေန ဂဟိတော တံတံ ရူပဓမ္မသမူဟော နိဗ္ဗတ္တိတ ပရမတ္ထဓမ္မောနာမ ဟောတိ။ ပညတ္တိမိဿကတ္တာ။ သောစ တထာ အနုပဿန္တဿ ဝိသေသတော ဩဠာရိကဿ သုဘာဒိ ဝိပလ္လာသဿ ပဟာနာယ ဟောတီတိ။ တထာ ဝေဒနာစိတ္တေသုပိ ဩဠာရိကဝိပလ္လာသော သုခုမဝိပလ္လာသောတိ ဒွေ ဒွေ ဝိပလ္လာသာ ဟောန္တိ။ တတ္ထ အတ္တုပနိဗန္ဓာ နိစ္စသုခ ဝိပလ္လာသာ ဩဠာရိကာ။ အတ္တဝိပလ္လာသော သုခုမော။ တတ္ထ ဝေဒနာ စိတ္တာ နုပဿနာ ဩဠာရိကဝိပလ္လာသာနံ ပဟာနာယ ဝိသုံ ဝုတ္တာ။ ဓမ္မေသု ဝေဒနာက္ခန္ဓဝိညာဏက္ခန္ဓာ သုခုမ ဝိပလ္လာသ ပဟာနာယာတိ။ တသ္မာ စတ္တာရောဝ သတိပဋ္ဌာနာ ဝတ္တဗ္ဗာတိ။ သမ္မာ ပဒဟန္တိ ဧတေဟီတိ သမ္မပ္ပဓာနာနိ။ ကာမံ တစောစ နှာရုစ၊ အဋ္ဌိစ အဝသိဿတု။ ဥပဿုဿတု မေ သရီရေ မံသလောဟိတံ။ ယန္တံ ပုရိသထာမေန ပုရိသပရက္ကမေန ပတ္တဗ္ဗံ။ န တံ အပတွာ ဝီရိယဿ သဏ္ဌာနံ ဘဝိဿတီတိ ဧဝံ အနိဝတ္တနဝုတ္တိ ဝသေန ပဝတ္တဿ သမ္မာဝါယာမဿ ဧတံ နာမံ။ သော ပန တထာ ပဝတ္တော ဧကောပိ သမာနော ကိစ္စသိဒ္ဓိဝသေန စတုဓာ ဟောတီတိ။ ဝုတ္တံ ဥပ္ပန္နာနန္တိအာဒိ။

တတ္ထ ဥပ္ပန္နာနံပါပကာနန္တိ အသုကသ္မိံ ကာလေ ဒေသေ ဌာနေ ဝါ အဟံ ဣဒဉ္စိဒဉ္စ နာမ ပါပံ အကာသိံ၊ ဣဒဉ္စိဒဉ္စနာမ မယှံ ဥပ္ပန္နန္တိ ဧဝံ အတ္တနော သန္တာနေ ဥပ္ပန္နဘာဝေန ဝိဒိတာနံ အကုသလာနံ။ ပဟာနာယာတိ တေသံ အတ္တနော သန္တာနေ အဇ္ဇတဂ္ဂေ ယာဝပရိနိဗ္ဗာနာပုန အနုပ္ပာဒဓမ္မတာပါဒနကရဏတ္ထံ။ ဝါယာမောတိ သီလ ပူရဏ သမထ ဝိပဿနာဘာဝနာကမ္မေသု ဒဠှံ ဝါယာမော။ အနုပ္ပန္နာနန္တိ အတ္တနော သန္တာနေ ဥပ္ပန္နပုဗ္ဗန္တိ အဝိဒိတာနံ ပရသန္တာနေသုဝါ သုတ္တန္တေသုဝါ ဒိသွာဝါ သုတွာဝါ ဝိဒိတာနံ။ အနုပ္ပာဒါယာတိ ယေသံ အကုသလ မူလာနံ အတ္ထိတာယ ဣမေသံ သတ္တာနံ ဤဒိသာနိ ကိလေသဇာတာနိ ဝါ ပါပကမ္မာနိဝါ ဥပ္ပဇ္ဇန္တိ။ တာနိ မယိ ဝိဇ္ဇန္တိဧဝ။ အဟံပိ တေဟိ ကိလေသေဟိဝါ ကမ္မေဟိဝါ အပရိမုတ္တောယေဝ။ အဟံပိ သွေဝါ ပရသုဝေဝါ ဘဝန္တရေသုဝါ တာနိ အတ္တနော သန္တာနေ ဥပ္ပာဒေဿာ မိယေဝါတိ ဧဝံ ပစ္စဝေက္ခိတွာ တေသံ အကုသလမူလာနံ အတ္တနော သန္တာနေ ဥပ္ပတ္တိယာ ပစ္စယသမုစ္ဆိန္ဒနတ္ထံ။ အနုပ္ပန္နာနံကုသလာနန္တိ စတုဘူမကေသု ကုသလဓမ္မေသု သတ္တဝိသုဒ္ဓိပဘေဒေသု ဣမေနာမ ဝိသုဒ္ဓိဓမ္မာ မယာ အပ္ပတ္တာ အနဓိဂတာဧဝ ဟောန္တီတိ ဧဝံ ဉတွာ သမယေ အနတိက္ကန္တေဧဝ အပ္ပတ္တာနံ အနဓိဂတာနံ ဥပရိ ဝိသုဒ္ဓိဓမ္မာနံ အဓိဂမနတ္ထာယ။

ဥပ္ပန္နာနံ ကုသလာနံ ဘိယျော ဘာဝါယာတိ ယာနိ သီလာဒီနိ ကုသလာနိ မယိ ဥပ္ပန္နာနိ။ တာနိ ယာဝ နိယာမံ နဩက္ကမန္တိ၊ တာဝ မယှံ ဧတာနီတိ ဝတ္တုံ နာရဟန္တိ။ သွေဝါ ပရသုဝေဝါ ဘဝန္တရံ ပတွာဝါ ဘိဇ္ဇိဿန္တိ ယေဝါတိ ဧဝံ ပစ္စဝေက္ခိတွာ အတ္တနော သန္တာနေ ဥပ္ပန္နာနံ တေသံ သဗ္ဗသော အကုပ္ပဓမ္မတာပါဒနဝသေန သုဋ္ဌုတရံ ဝဍ္ဎနတ္ထာယ။ ဧတေသု ပန စတူသု မုခေသု ယေန ကေနစိ ဧကေန မုခေန ဥပ္ပန္နော ဝါယာမော စတုကိစ္စသာဓကောဧဝ ဟောတီတိ ဝေဒိတဗ္ဗော။ အဋ္ဌကထာယံ ပန မဂ္ဂက္ခဏေ ဧဝ ဧကဿ တဿ စတုကိစ္စသာဓကတာ ဝုတ္တာတိ။

ဣဇ္ဈနံ ဣဒ္ဓိ၊ တဿ တဿ ယောဂကမ္မဿ သိဒ္ဓိ သမိဒ္ဓိ နိဗ္ဗတ္တီတိ အတ္ထော။ သာ ပန သင်္ခေပတော အဘိညေယျာနံ ဓမ္မာနံ အဘိညာသိဒ္ဓိ၊ ပရိညေယျာနံ ပရိညာသိဒ္ဓိ၊ ပဟာတဗ္ဗာနံ ပဟာနသိဒ္ဓိ၊ သစ္ဆိကာ တဗ္ဗာနံ သစ္ဆိကရဏသိဒ္ဓိ၊ ဘာဝေတဗ္ဗာနံ ဘာဝနာသိဒ္ဓီတိ ပဉ္စဝိဓာ ဟောတိ။ ဣဇ္ဈတီတိဝါ ဣဒ္ဓိ သတ္ထုသာသနေ ယောဂကမ္မေန ဣဇ္ဈန္တာနံ သဗ္ဗေသံ မဟဂ္ဂတ လောကုတ္တရဓမ္မာနံ နာမံ။ ပဇ္ဇတိ ဧတေနာတိ ပါဒေါ။ ဣဒ္ဓိယာ ပါဒေါတိ ဣဒ္ဓိပါဒေါ။ ဣဒ္ဓိပတ္တိယာ ဗလဝုပါယော ပဓာနကာရဏန္တိ ဝုတ္တံ ဟောတိ။ သော ပန စတုန္နံ အဓိပတိဓမ္မာနံ ဝသေန စတုဓာ ဟောတီတိ ဝုတ္တံ စတ္တာရော ဣဒ္ဓိပါဒါတိအာဒိ။ အဓိပတိဘူတော ဆန္ဒောဝ ဣဒ္ဓိပါဒေါတိ ဆန္ဒိဒ္ဓိပါဒေါ။ ဧသနယော သေသေသုပီတိ။ ဧတ္ထစ သဗ္ဗေ မဟဂ္ဂတာနုတ္တရဘူတာ ဥတ္တရိမနုဿ ဓမ္မာနာမ နပါကတိကေန ဆန္ဒေနဝါ ဝီရိယေနဝါ စိတ္တေနဝါ ပညာယ ဝါ အဓိဂန္တဗ္ဗာ ဟောန္တိ။ ယေန ကေနစိ ပလိဗောဓေန ပဋိဗာဟိတုံ အသက္ကုဏေယျေန အဓိပတိဘာဝပတ္တေန ဆန္ဒာဒိနာဧဝ အဓိဂန္တဗ္ဗာ။ တသ္မာ ဣမေ စတ္တာရော ဓမ္မာ အဓိပတိဘူတာဝ ဣဓ အဓိပ္ပေတာတိ ဒဋ္ဌဗ္ဗာတိ။

[၂၁၉] ယံပန ဝိဘာဝနိယံ

‘‘ဣဇ္ဈတိ အဓိဋ္ဌာနာဒိကံ ဧတာယာတိ ဣဒ္ဓိ၊ ဣဒ္ဓိဝိဓညာဏံ။ ဣဒ္ဓိယာ ပါဒေါ ဣဒ္ဓိပါဒေါ’’တိ ဝုတ္တံ။ တံ သံယုတ္တကေ ကတမာစ ဘိက္ခဝေ ဣဒ္ဓိ။ ဣဓ ဘိက္ခဝေ ဘိက္ခု အနေကဝိဟိတံ ဣဒ္ဓိဝိဓံ ပစ္စနုဘောတိ။ ဧကောပိ ဟုတွာ ဗဟုဓာ ဟောတိ။လ။ ယာဝ ဗြဟ္မလောကာပိ ကာယေန ဝသံ ဝတ္တေတိ။ အယံ ဝုစ္စတိ ဘိက္ခဝေ ဣဒ္ဓီတိ ဣမာယ ပါဠိယာ သမေတိ။ ဧဝံသန္တေပိ ဣဓ အဘိဓမ္မပရိယာယောဝ အဓိပ္ပေတောတိ တံ န ယုဇ္ဇတိယေဝ။

ဝိဘင်္ဂေ ပန ပထမဝါရေ လောကိယ လောကုတ္တရမိဿကာ စိတ္တ စေတသိကရာသီဧဝ ဣဒ္ဓိပါဒါတိ ဝုတ္တာ။ အဋ္ဌကထာယဉ္စ-ပထမဇ္ဈာန ပရိကမ္မံဟိ ဣဒ္ဓိပါဒေါနာမ။ ပထမဇ္ဈာနံ ဣဒ္ဓိနာမ။လ။ နေဝသညာ နာသညာယတနဇ္ဈာနပရိကမ္မံ ဣဒ္ဓိပါဒေါနာမ။ နေဝသညာနာသညာ ယတနဇ္ဈာနံ ဣဒ္ဓိနာမ။ သောတာပတ္တိမဂ္ဂဿ ဝိပဿနာ ဣဒ္ဓိပါဒေါ နာမ။ သောတာပတ္တိမဂ္ဂေါ ဣဒ္ဓိနာမ။လ။ အရဟတ္တမဂ္ဂဿ ဝိပဿနာ ဣဒ္ဓိပါဒေါနာမ။ အရဟတ္တမဂ္ဂေါ ဣဒ္ဓိနာမာတိစ။ ပထမဇ္ဈာနံ ဣဒ္ဓိပါဒေါနာမ။ ဒုတိယဇ္ဈာနံ ဣဒ္ဓိနာမ။ လ။ အာကိဉ္စညာယတနဇ္ဈာနံ ဣဒ္ဓိ ပါဒေါနာမ။ နေဝသညာ နာသညာ ယတနဇ္ဈာနံ ဣဒ္ဓိနာမ။ သောတာ ပတ္တိမဂ္ဂေါ ဣဒ္ဓိပါဒေါနာမ။ သကဒါဂါမိမဂ္ဂေါ ဣဒ္ဓိနာမ။လ။ အရဟတ္တမဂ္ဂေါ ဣဒ္ဓိနာမာတိ စ ဝုတ္တံ။ တံတံ ပါဒကဇ္ဈာနံ ဣဒ္ဓိပါဒေါနာမ။ တတော တတော ဝုဋ္ဌဟိတွာ ဥပ္ပာဒိတမဂ္ဂေါ ဣဒ္ဓိနာမာတိပိ ဝတ္တုံ ဝဋ္ဋတိယေဝ။ ဣဓ ပန ဥတ္တရစူဠဘာဇနိယေ အာဂတနယေန စတ္တာရော အဓိပတိဓမ္မာဧဝ ဣဒ္ဓိပါဒါတိ ဝုတ္တာ။

တတ္ထ ပန လောကုတ္တရဘူတာဧဝ အဓိပ္ပေတာ။ ဣဓ လောကိယ လောကုတ္တရ မိဿကဘူတာတိ။ ဣန္ဒြိယဗလာနိ အတ္ထတော ဟေဋ္ဌာ ဝုတ္တာနေဝ။ ပါကဋဋ္ဌာနတော ပန စတူသု သောတာပတ္တိယင်္ဂေသု သဒ္ဓါယ ထာမော ဝေဒိတဗ္ဗော။ ယထာဟ-ကတ္ထ ဘိက္ခဝေ သဒ္ဓိန္ဒြိယံ ဒဋ္ဌဗ္ဗံ။ စတူသု သောတာပတ္တိယင်္ဂေသု ဧတ္ထ သဒ္ဓိန္ဒြိယံ ဒဋ္ဌဗ္ဗန္တိ။ စတူသု သမ္မပ္ပဓာနေသု ဝီရိယဿ။ ယထာဟ-ကတ္ထ ဘိက္ခဝေ ဝီရိယိန္ဒြိယံ ဒဋ္ဌဗ္ဗံ။ စတူသု သမ္မပ္ပဓာနေသု ဧတ္ထ ဝီရိယိန္ဒြိယံ ဒဋ္ဌဗ္ဗန္တိ။ စတူသု သတိပဋ္ဌာနေသု သတိယာ။ ယထာဟ-ကတ္ထ ဘိက္ခဝေသတိန္ဒြိယံ ဒဋ္ဌဗ္ဗံ။ စတူသု သတိပဋ္ဌာနေသုဧတ္ထ သတိန္ဒြိယံ ဒဋ္ဌဗ္ဗန္တိ။ စတူသု ဈာနေသု သမာဓိဿ။ ယထာဟ-ကတ္ထ ဘိက္ခဝေ သမာဓိန္ဒြိယံ ဒဋ္ဌဗ္ဗံ။ စတူသု ဈာနေသု ဧတ္ထ သမာဓိန္ဒြိယံ ဒဋ္ဌဗ္ဗန္တိ။ စတူသု အရိယသစ္စေသု ပညာယ ထာမော ဝေဒိတဗ္ဗော။ ယထာဟ-ကတ္ထ ဘိက္ခဝေ ပညိန္ဒြိယံ ဒဋ္ဌဗ္ဗံ။ စတူသု အရိယသစ္စေသု ဧတ္ထ ပညိန္ဒြိယံ ဒဋ္ဌဗ္ဗန္တိ။ သမ္ဗောဓိ ဝုစ္စတိ စတူသု မဂ္ဂေသု ဉာဏံ၊ သမန္တတော ဗုဇ္ဈတိ ပဋိဝိဇ္ဈတိ ဗုဇ္ဈန္တိ ဝါ ဧတာယာတိ ကတွာ။ သာ ဟိ စတုသစ္စဓမ္မံ ဗုဇ္ဈမာနာ ဧကက္ခဏေ သောဠသဟိ အတ္ထေဟိ သဒ္ဓိံ သမန္တတော ဗုဇ္ဈတိ၊ န ဧကဒေသ တောတိ တဿာ သမ္ဗောဓိယာ သမုဋ္ဌာပနဋ္ဌေန သမ္ဗောဓိယာ အင်္ဂေါ သဟကာရီဗလဝပစ္စယောတိ သမ္ဗောဇ္ဈင်္ဂေါ။ သတိဧဝ သမ္ဗောဇ္ဈင်္ဂေါ သတိသမ္ဗောဇ္ဈင်္ဂေါ။ သာ ဟိ ကာယာဒီသု စတူသု အတ္တနော ဂေါစရေသု ဘာဝနာဝသေန သုဋ္ဌုသံဝဍ္ဎမာနာ အနုပုဗ္ဗေန သဗ္ဗပမာဒ ပက္ခံ ဝိဓမေတွာ သဗ္ဗံ အပ္ပမာဒပက္ခဉ္စ ပူရေတွာ စတုမဂ္ဂညာဏ သင်္ခါတံ သမ္ဗောဓိံ သမုဋ္ဌာပေတီတိ။ ဝိပဿနာယ ဘူမိဘူတေ အဇ္ဈတ္တ ဗဟိဒ္ဓါဓမ္မေ ဝိစိနာတိ ကက္ခဠတ္တဖုသနာဒီဟိ အနိစ္စတာဒီဟိစ ဝိဝိဓာ ကာရေဟိ စုဏ္ဏဝိစုဏ္ဏံ ကုရုမာနောဝိယ တေသု ဒဋ္ဌဗ္ဗာကာရံ အသေသံ ဥပဓာရေတီတိ ဓမ္မဝိစယော။ သောဧဝ သမ္ဗောဇ္ဈင်္ဂေါတိ ဓမ္မဝိစယ သမ္ဗောဇ္ဈင်္ဂေါ။ သောပိ ဟိ အတ္တနော ဂေါစရဘူတေသု တေသု ဓမ္မေသု ဘာဝနာဝသေန သုဋ္ဌုသံဝဍ္ဎမာနော အနုပုဗ္ဗေန သဗ္ဗံသမ္မောဟ ပက္ခံ ဝိဓမေတွာ သဗ္ဗံ အသမ္မောဟပက္ခံ ပူရေတွာ သယံ စတုမဂ္ဂဉာဏ သမ္ဗောဓိ ဟုတွာ သမုဋ္ဌဟတီတိ။ သမ္မပ္ပဓာနဝီရိယမေဝ သမ္ဗောဇ္ဈင်္ဂေါတိ ဝီရိယသမ္ဗောဇ္ဈင်္ဂေါ။ တမ္ပိ ဟိ စတုဗ္ဗိဓေသု အတ္တနော ဂေါစရေသု ဘာဝနာဝသေန သုဋ္ဌု သံဝဍ္ဎမာနံ အနုပုဗ္ဗေန သဗ္ဗံ ကုသလေသု ဓမ္မေသု လီနသင်္ကောစ ကောသဇ္ဇပက္ခံ ကိလေသဇာတံ ဝိဓမေတွာ သဗ္ဗံ ဓုရသံပဂ္ဂဟပက္ခံ ပူရေတွာ ဝုတ္တပ္ပကာရံ သမ္ဗောဓိံ သမုဋ္ဌာ ပေတီတိ။

ပီတိယေဝ သမ္ဗောဇ္ဈင်္ဂေါ ပီတိ သမ္ဗောဇ္ဈင်္ဂေါ။ သာပိ ဟိ ဝုတ္တပ္ပကာရေသု ဂေါစရေသု သုဋ္ဌု သံဝဍ္ဎမာနာ ကုသလေသု ဓမ္မေသု သဗ္ဗံ စိတ္တဿ အရတိဥက္ကဏ္ဌပက္ခံ ဝိဓမေတွာ သဗ္ဗံ ဓမ္မရတိ ဓမ္မနန္ဒိဓမ္မာရာမ ပက္ခံ ပူရေတွာ ဝုတ္တပ္ပကာရံ သမ္ဗောဓိံ သမုဋ္ဌာပေတိ။ ပဿဒ္ဓိဧဝ သမ္ဗောဇ္ဈင်္ဂေါ ပဿဒ္ဓိ သမ္ဗောဇ္ဈင်္ဂေါ။ သာပိ ဟိ ဝုတ္တပကာရေသု ဂေါစရေသု ဘာဝနာဝသေန သုဋ္ဌု သံဝဍ္ဎမာနာ သဗ္ဗံ စိတ္တဿ သာရမ္ဘ ဒရထပက္ခံ ဝိဓမေတွာ သဗ္ဗံ ဝူပသန္တသီတလပက္ခံ ပူရေတွာ ဝုတ္တပ္ပကာရံ သမ္ဗောဓိံ သမုဋ္ဌာပေတိ။ သမာဓိဧဝ သမ္ဗောဇ္ဈင်္ဂေါတိ သမာဓိ သမ္ဗောဇ္ဈင်္ဂေါ။ တဿ သမ္ဗောဓိသမုဋ္ဌာပနတာ ပါကဋာ။ တတြမဇ္ဈတ္တတာ သင်္ခါတာ ဥပေက္ခာဧဝ သမ္ဗောဇ္ဈင်္ဂေါတိ ဥပေက္ခာ သမ္ဗောဇ္ဈင်္ဂေါ။ သာပိဟိ ဝုတ္တပ္ပကာရေသု သတိအာဒီနံ ဂေါစရေသု ဘာဝနာဝသေန သုဋ္ဌု သံဝဍ္ဎမာနာ သဗ္ဗံ စိတ္တဿ လီနုဒ္ဓစ္စပက္ခံ ဝိဓမေတွာ သမဝါဟိတပက္ခံ ပူရေတွာ ဝုတ္တပ္ပကာရံ သမ္ဗောဓိံ သမုဋ္ဌာပေတီတိ။ သမ္မာ အဝိပရီတတော ဒဿနံ သမ္မာဒိဋ္ဌိ။ သာ ပန ဒုက္ခေ ဉာဏံ၊ ဒုက္ခသမုဒယေ ဉာဏံ၊ ဒုက္ခနိရောဓေ ဉာဏံ၊ ဒုက္ခနိရော ဓဂါမိနိပဋိပဒါယ ဉာဏန္တိ စတုဗ္ဗိဓာ ဟောတိ။ သမ္မာ အဝိပရီတတော သံကပ္ပနံ သမ္မာသင်္ကပ္ပော။ ယထာ သမ္မာဒိဋ္ဌိ ဒဋ္ဌဗ္ဗသဘာဝေသု ဖရမာနာ ပဝတ္တတိ တထာ တဿာ သံဝိဓာနန္တိ အတ္ထော။ တေနေဝ ဟိ သော ပညာက္ခန္ဓေ သင်္ဂဟိတောတိ။ ယထာဟ-ယာစာဝုသော ဝိသာခ သမ္မာဒိဋ္ဌိ၊ ယောစ သမ္မာသင်္ကပ္ပော၊ ဣမေ ဓမ္မာ ပညာက္ခန္ဓေ သင်္ဂဟိတာတိ။ သမ္မာဝါစာ ဒယော ပုဗ္ဗေ ဝုတ္တတ္ထာယေဝ။ သမ္မာ ဝါယမန္တိ ဧကေနာတိ သမ္မာဝါယာမော။ စတုကိစ္စသာဓကံ သမ္မပ္ပဓာန ဝီရိယံ။ ပဿဒ္ဓိဒွယံ ပဿဒ္ဓိသာမညေန ဧကံ ကတွာ စုဒ္ဒသေတေ သဘာဝတောတိ ဝုတ္တံ။ သတ္တဓာတိ ဝုတ္တပ္ပကာရာနံ သတိပဋ္ဌာနစတုက္က သမ္မပ္ပဓာနစတုက္ကာဒီနံ ဝသေန သတ္တဓာ။ ဣဒါနိ တေသံ စုဒ္ဒသန္နံ ကိစ္စာနံ ဌာနဘေဒံ ဒဿေတုံ သင်္ကပ္ပပဿဒ္ဓိစာတိအာဒိမာဟ။

[၂၂၀] ယံပန ဝိဘာဝနိယံ

‘‘သတ္တဓာ တတ္ထ သင်္ဂဟောတိ ဝတွာ ပုန တံ ဒဿေတုံ သင်္ကပ္ပပဿဒ္ဓိစာတိအာဒိမာဟာ’’တိ ဝုတ္တံ။ တံ န ယုဇ္ဇတိ။

န ဟိ တတ္ထ သတ္တ သရူပံ လဗ္ဘတီတိ။ သင်္ကပ္ပော ဝိရတိတ္တယဉ္စ ဧကံ မဂ္ဂင်္ဂဋ္ဌာနံ ပါပုဏာတိ။ ပဿဒ္ဓိစ ပီတိစ ဥပေက္ခာစ ဧကံ ဗောဇ္ဈင်္ဂဋ္ဌာနံ။ ဆန္ဒောစ စိတ္တဉ္စ ဧကံ ဣဒ္ဓိပါဒဋ္ဌာနန္တိ ဧဝံ နဝဓမ္မာ ဧကဋ္ဌာနိကာ ဟောန္တိ။ ဧကံ ဝီရိယံ စတုသမ္မပ္ပဓာန ဣဒ္ဓိ ပါဒိန္ဒြိယ ဗလဗောဇ္ဈင်္ဂ မဂ္ဂင်္ဂ ဝသေန နဝဋ္ဌာနိကံ။ ဧကာ သတိ စတုသတိပဋ္ဌာန ဣန္ဒြိယ ဗလ ဗောဇ္ဈင်္ဂ မဂ္ဂင်္ဂ ဝသေန အဋ္ဌဋ္ဌာနိကာ။ ဧကော သမာဓိ ဣန္ဒြိယ ဗလ ဗောဇ္ဈင်္ဂ မဂ္ဂင်္ဂ ဝသေန စတုဋ္ဌာနိကော။ ဧကာပညာ ဣဒ္ဓိပါဒိန္ဒြိယ ဗလ ဗောဇ္ဈင်္ဂ မဂ္ဂင်္ဂ ဝသေန ပဉ္စဋ္ဌာနိကာ။ ဧကာ သဒ္ဓါ ဣန္ဒြိယ ဗလ ဝသေန ဒုဋ္ဌာနိကာတိ။ တေ ပန သတ္တတိံသ ပဘေဒါ ဓမ္မာ ပုဗ္ဗဘာဂေ နာနာရမ္မဏာ နာနာခဏိကာစ ဟောန္တိ။ မဂ္ဂဖလေသု ပန နဝဋ္ဌာနိကံ ဝီရိယံ ဧကမေဝ နိဗ္ဗာနံ အာရမ္မဏံကတွာ နဝသုဌာနေသု အတ္တ ပဋိပက္ခာနံ ပါပ ဓမ္မာနံ ပစ္စယ ယမုဂ္ဃာတဝသေန နဝ ကိစ္စာနိ သာဓယမာနံ ဧကမေဝ ပဝတ္တတိ။ ဧသ နယော အဋ္ဌဋ္ဌာနိကာဒီသု။ တသ္မာ တေ ဧကက္ခဏေ ဧကစိတ္တေ သဗ္ဗေ ဧကတော ဥပလဗ္ဘန္တီတိ ဝုတ္တံ သဗ္ဗေ လောကုတ္တရေ ဟောန္တီတိ။ နဝါသင်္ကပ္ပ ပီတိယောတိ ဧတ္ထ ဝါသဒ္ဒေါ ကွစိ သဒ္ဒတ္ထော။ သင်္ကပ္ပော ကွစိ ဒုတီယဇ္ဈာနိကာ ဒိကေပီတိစ ကွစိ စတုတ္ထဇ္ဈာနိကာဒိကေ လောကုတ္တရေ နဟောန္တီတိ အတ္ထော။

လောကိယေပီတိ သီလဝိသောဓနာဒိဝသေန ပဝတ္တေ ကာမာ ဝစရကုသလာဒိကေ လောကိယကုသလ ကြိယစိတ္တုပ္ပာဒေပိ။ ယထာ ယောဂန္တိ သီလဝိသောဓနကမ္မ သမထကမ္မနာမရူပပရိဂ္ဂဟာဒိကမ္မေသု ယုဇ္ဇိတဗ္ဗာနံ ဝိရတိတ္တယာဒီနံ အနုရူပံ။ ဆဗ္ဗိသုဒ္ဓိပဝတ္တိယန္တိ သီလ ဝိသုဒ္ဓါဒီနံ ဆန္နံ ဝိသုဒ္ဓီနံ အနုက္ကမေန ပဝတ္တိကာလေ။ ဧတေန ဒိဋ္ဌေဝ ဓမ္မေ မဂ္ဂဖလပတိဋ္ဌာဘာဝတ္ထာယ ပူရိတေ စတုပါရိသုဒ္ဓိ သီလေပိ သဒ္ဓါသတိအာဒယော ဗောဓိပက္ခိယေသု သင်္ဂဟိတာ ဧဝ ဟောန္တိ။ တထာ မဂ္ဂပါဒကတ္ထာယ ဥပ္ပာဒိတေသု မဟဂ္ဂတဇ္ဈာနေသု မီတိ ဒဿေတိ။ တထာ ဟိ ဗောဇ္ဈင်္ဂသံယုတ္တကေ –

ဧဝံ ဘာဝိတော ခေါ ကုဏ္ဍလိယ ဣန္ဒြိယသံဝရော တီဏိ သုစရိတာနိ ပရိပူရေတိ။ ဧဝံ ဘာဝိတာနိ တီဏိ သုစရိတာနိ စတ္တာရော သတိပဋ္ဌာနေ ပရိပူရေန္တိ။ ဧဝံ ဘာဝိတာ စတ္တာရော သတိပဋ္ဌာနာ သတ္တ ဗောဇ္ဈင်္ဂေ ပရိပူရေန္တိ။ ဧဝံ ဘာဝိတာ သတ္တ ဗောဇ္ဈင်္ဂေ ဝိဇ္ဇာဝိမုတ္တိယော ပရိပူရေန္တီတိ ဝုတ္တံ။

အဋ္ဌကထာယံပိ နကေဝလံ ဗလဝဝိပဿနာ မဂ္ဂဖလေသုဧဝ ဗောဇ္ဈင်္ဂေ ဥဒ္ဓရန္တိ။ ဝိပဿနာပါဒက ကသိဏဇ္ဈာန အာနာပါဏာ သုက ဗြဟ္မဝိဟာရဇ္ဈာနေသုပိ ဥဒ္ဓရန္တီတိ ဝုတ္တံ။ [ဗောဓိပက္ခိယသင်္ဂဟော]

၁၆၅။ သဗ္ဗသင်္ဂဟေ ပဉ္စက္ခန္ဓာတိ ပဉ္စ ရာသယော။ အတီတာဒိ ဘေဒ ဘိန္နာနံ ရူပါနံ ခန္ဓော ရာသီတိ ရူပက္ခန္ဓော။ ဧကသ္မိံ ရုပ္ပန လက္ခဏေ ရာသိံ ကတွာ ဉာဏေန ပရိဂ္ဂဟိတာ ရူပဓမ္မာဧဝ။ တထာ ဧကသ္မိံ ဝေဒယိတလက္ခဏေ သဉ္ဇာနန လက္ခဏေ ရာသိံ ကတွာ ပရိဂ္ဂဟိတာ အတီတာဒိဘေဒဘိန္နာ ဝေဒနာသညာယော ဝေဒနာက္ခန္ဓော သညာက္ခန္ဓော စနာမ။ သင်္ခရောန္တီတိ သင်္ခါရာ။ ဖဿ စေတနာ ဒယော။ တေဟိ ဆသုဝါ ဥပပတ္တိဒွါရေသု တီသုဝါ ကမ္မဒွါရေသု ဧကတော သင်္ဂမ္မ သမာဂမ္မ ဖုသနစေတယိတာဒီဟိ အတ္တနော အတ္တနော ကိစ္စေဟိ ဒဿနသဝနာဒီနိ သာဓာရဏကိစ္စာနိဝါ ကာယိက ဝါစသိကမာနသိကာနိဝါ သယန နိသဇ္ဇဋ္ဌာန ဂမန ကထန စိန္တနာဒီနိ သဗ္ဗာနိ ကိစ္စာနိ ကရောန္တိ ဝိဒဟန္တီတိ။ ဝုတ္တဉှေတံ သံယုတ္တကေ –

ကိဉ္စ ဘိက္ခဝေ သင်္ခါရေ ဝဒေထ။ သင်္ခတံ အဘိသင်္ခရောန္တီတိ ခေါ ဘိက္ခဝေ တသ္မာ သင်္ခါရာတိ ဝုစ္စန္တိ။ ကိဉ္စ သင်္ခတံ အဘိ သင်္ခရောန္တိ၊ ရူပံ ရူပတ္ထာယ သင်္ခတံ အဘိသင်္ခရောန္တိ။ ဝေဒနံ ဝေဒနတ္ထာယ သင်္ခတံ အဘိသင်္ခရောန္တိ။ သညံ သညတ္ထာယ သင်္ခတ အဘိသင်္ခရောန္တိ။ သင်္ခါရေ သင်္ခါရတ္ထာယ သင်္ခတ မဘိသင်္ခရောန္တိ။ ဝိညာဏံ ဝိညာဏတ္ထာယ သင်္ခတ မဘိ သင်္ခရောန္တီတိ။ သင်္ခတ မဘိသင်္ခရောန္တီတိ ခေါ ဘိက္ခဝေ တသ္မာ သင်္ခါရာတိ ဝုစ္စန္တီတိ။

တတ္ထ ရူပံ ရူပတ္ထာယ သင်္ခတမဘိသင်္ခရောန္တီတိ ယသ္မိံ ယသ္မိံ ကာလေ သယန နိသဇ္ဇာဒိဝသေန ပဝတ္တာ ယာ ယာ ရူပဝိကတိ ဣစ္ဆီယတိ၊ တသ္မိံတသ္မိံ ကာလေ တဿာ တဿာ ရူပဝိကတိယာ ဇာတတ္ထာယ ဣရိယာပထ ပရိဝတ္တနာဒိ ဝသေန တံ တံ ရူပဝိကတိံ သင်္ခတံ အဘိသင်္ခရောန္တီတိ အတ္ထော။ ခဇ္ဇဘောဇ္ဇာဒိကံ ဝတ္ထာလင်္ကာရာဒိကံ မဉ္စ ပီဌ ဂေဟ ရထာဒိကံ သဗ္ဗံ ဥပဘောဂ ပရိဘောဂဘူတံ ဗာဟိရ ရူပံပိ ဂဟေတွာ ယောဇေတုံ ဝဋ္ဋတိယေဝ။ ဝေဒနန္တိ ဒိဋ္ဌဓမ္မိကံ သမ္ပရာယိကဉ္စ သဗ္ဗံပိ ဝေဒနံ။ တတ္ထ ဒိဋ္ဌဓမ္မိကံ ဝေဒနံ သင်္ခတံ အဘိသင်္ခရောန္တာ စိတ္တကမ္မနစ္စဂီတာဒီနိ တံ တံ ဝေဒနုပကရဏာနိ သမ္ပာဒန ဝသေန သမ္ပရာယိကဉ္စ အဘိသင်္ခရောန္တာ မာနုသကံဝါ ဒိဗ္ဗံဝါ တံတံ ဝေဒနံ ပတ္ထေတွာ ဒါန သီလာဒိ သမ္ပာဒန ဝသေန အဘိသင်္ခရောန္တိ။ ဧသနယော သေသေသုပိ။ သင်္ခါရေသု ပန ဖဿံ ဖဿတ္ထာယ စေတနံ စေတနတ္ထာယာတိအာဒိနာ ဒါနံ ဒါနတ္ထာယ သီလံ သီလတ္ထာယ ပါဏာတိပါတံ ပါဏာတိပါတတ္ထာယာတိအာဒိနာ ဝါ သဗ္ဗံ လောကပဝတ္တိံ ဉတွာ ဝိတ္ထာရေတဗ္ဗာတိ။ ဧတ္ထ သိယာ၊ ကသ္မာ သင်္ခါရေသု ပါကဋာ စေတနာဒယော ဝိတက္ကာဒယော လောဘာဒယော သဒ္ဓါသတိပညာဒယောစ ဓမ္မေ ဝိသုံ ဝိသုံ ခန္ဓဘာဝေန အဝတွာ ဝေဒနာသညာဝ ဝုတ္တာတိ။ ဝုစ္စတေ။

ယထာ ဟိ ဆေကော မဟာဘိသက္ကော ဘေသဇ္ဇမူလာနိ ဂဟေတွာ စုဏ္ဏံ ကရောန္တော တေသု မူလေသု ဣမာနိ ထူလာနိပိ မုဒူနိ ဟောန္တိ။ ဣမာနိ ခုဒ္ဒကာနိပိ ကက္ခဠာနိ ဟောန္တီတိ ဉတွာ တတော ပထမတရံ ကက္ခဠာနိ ဝိသုံ ဥဒ္ဓရိတွာ သုဋ္ဌု ကောဋ္ဋေတွာ စုဏ္ဏံ ကရောတိ။ သေသာနိ ပန သဗ္ဗာနိ မုဒူနိ ဧကတော ကတွာ ကောဋ္ဋေတွာ စုဏ္ဏံ ကရောတိ။ တတော ဥဘယာနိ မိဿေတွာ သိလာယံ ပိသေတွာ ဘေသဇ္ဇကမ္မေ ဥပနေတိ။ ဧဝံ ကရောန္တော နကိလမတိ။ ဧဝမေဝံ ဘဂဝါပိ နာမရူပဓမ္မေသု တိလက္ခဏံ အာရောပေတွာ နိစ္စသုခအတ္တ ဝိပလ္လာသာနံ ပဟာနတ္ထာယ အနုယုဉ္ဇန္တာ ဒေဝမနုဿာ ဝိဘာဂေ အကတေ တီသု ဓမ္မေသု ကိလမိဿန္တီတိ ဉတွာ နာမဓမ္မေသု ဝေဒနာသညာစိတ္တသင်္ခါတေ တယော ဓမ္မေ ဝိသုံ ဥဒ္ဓရိတွာ ဧကမေကံ ခန္ဓံ နာမ ကတွာ ဒေသေသိ။ တထာ ဟိ ယထာ မစ္ဆာနာမ ဥဒကေ သတိ ဥက္ကဏ္ဌိတာ နာမ နတ္ထိ။ အသတိ ပန ဧကန္တေန ဥက္ကဏ္ဌိတာယေဝ ဟောန္တိ။ ယထာဝါ မဓုကရာဝါ ဘမရာဝါ ယသ္မိံ ဝနေ ပုပ္ဖရသ ဖလရသေ လဘန္တိ၊ တတ္ထ ဥက္ကဏ္ဌိတာနာမ နတ္ထိ။ အလဘမာနာ ပန ဧကန္တေန ဥက္ကဏ္ဌိတာဧဝ ဟောန္တိ။ ဧဝမေဝ ဣမေသံ သတ္တာနံ သုခ သညိတေသု ပတိသရဏေသု ဝေဒနာသဒိသံ ပတိသရဏံနာမ နတ္ထိ။ မနုဿဒေဝဗြဟ္မသမ္ပတ္တိယော အဿာဒေန္တာပိ သုခဝေဒနတ္ထာယဧဝ အဿာဒေန္တိ။ ယဒိစ တာဟိ ဝိနာ ယထိစ္ဆိတံ သုခဝေဒနံ လဘေယျုံ။ ကောနာမ တာ သာဒိယိဿတိ။ တထာ ဖဿစေတနာဒီဟိ ဝိတက္ကဝိစာရဝီရိယာဒီဟိ လောဘဒေါသာဒီဟိ သဒ္ဓါသတိပညာဒီဟိ စ သင်္ခါရက္ခန္ဓဓမ္မေဟိ ဒိဋ္ဌဓမ္မိကံ သမ္ပရာယိကဉ္စ ယံကိဉ္စိ သင်္ခတံ အဘိသင်္ခရောန္တာပိ သုခဝေဒနတ္ထာယဧဝ အဘိသင်္ခရောန္တိ။ ယဒိစ တာဒိသေန အဘိသင်္ခရဏေန ဝိနာပိ ယထိစ္ဆိတံ သုခံ လဘေယျုံ၊ တေဟိ ဓမ္မေဟိ အတ္ထော နတ္ထီတိ ကောနာမ တေ ဓမ္မေ အဘိသင်္ခရိဿတီတိ။

ဣတိ သုခသညိတေသု ဓမ္မေသု ဝေဒနာနာမ ဣမေသံ သတ္တာနံ ပရမုက္ကံသဂတံ သုခသညိတဋ္ဌာနံ ဟောတိ။ တသ္မာ ဘဂဝါ တံ ဝိသုံ ဧကံ ခန္ဓံ ကတွာ ခန္ဓဒေသနံ ဒေသေတီတိ။ တထာ ဣမေသံ သတ္တာနံ အတ္တသညိတေသု ပတိသရဏေသု သညာသဒိသံ ပတိသရဏံ နာမ နတ္ထိ။ တထာ ဟိ တသ္မိံ တသ္မိံ သတ္တနိကာယေ ဥပ္ပန္နာ တေ တေ သတ္တာ အတ္တာနော အတ္တနော ဝိသယေသု သဗ္ဗံ ဇာနိတဗ္ဗံ သညာယ သဉ္ဇာနိတွာ ဝိညုတ္တံ အာပဇ္ဇန္တိ။ တထာ ဝိညုတ္တံ အာပဇ္ဇန္တာ ယတ္တကံ ပရေ ဇာနန္တိ။ တတ္တကံ မယံပိ ဇာနာမ။ ကော အမှာကံ ဥတ္တရိတရောတိ ဧဝံ လောကေ ဉာဏသမ္မဘံ သညံ ပရမံ အတ္တာနံ ကတွာ ဝိစရန္တိ။ ဣတိ အတ္တသညိတေသု ဓမ္မေသု သညာနာမ ဣမေသံ သတ္တာနံ ပရမုက္ကံ သဂတံ အတ္တသညိတဋ္ဌာနံ ဟောတိ။ တသ္မာ ဘဂဝါတံပိ ဝိသုံ ဧကံ ခန္ဓံ ကတွာ ခန္ဓဒေသနံ ဒေသေတီတိ။ တထာ ဣမေသံ သတ္တာနံ နိစ္စသညိတေသု ပတိသရဏေသု စိတ္တသဒိသံ ပတိသံရဏံ နာမ နတ္ထိ။ တထာ ဟိ သတ္တာ သုခံ ဒုက္ခံနာမ အနိစ္စံ သုခပတ္တာနံ ဒုက္ခံ နတ္ထိ။ ဒုက္ခ ပတ္တာနံ သုခံ နတ္ထီတိဝါ။ သညာနာမ အနိစ္စာ၊ ကဒါစိ ပမုဿတိ ကဒါစိ နပမုဿတီတိဝါ။ ဝီရိယံနာမ အနိစ္စံ။ ကဒါစိ အာရဘတိ၊ ကဒါစိ န အာရဘတီတိဝါ။ လောဘောနာမ အနိစ္စော။ ကဒါစိ ဥပ္ပဇ္ဇတိ၊ ကဒါစိ နဥပ္ပဇ္ဇတီတိဝါ။ ဒေါသောနာမ အနိစ္စော။ ကဒါစိ ဥပ္ပဇ္ဇတိ၊ ကဒါစိ န ဥပ္ပဇ္ဇတီတိဝါ။ သဒ္ဓါနာမ အနိစ္စာ။ ကဒါစိ ပသန္နစိတ္တော ဟောတိ၊ ကဒါစိ အပ္ပသန္နစိတ္တော ဟောတီတိဝါ။ ပညာနာမ အနိစ္စာ။ ဇာနိတဗ္ဗံပိ ကဒါစိ ဇာနာတိ၊ ကဒါစိ န ဇာနာတီတိဝါ ဧဝံ စေတသိကဓမ္မာနံ အနိစ္စ ဘာဝေါနာမ ကေသဉ္စိ လောကိယဇနာနံပိ ပါကဋော ဟောတိ။ န ပန စိတ္တဿ။ န ဟိ သတ္တာ စိတ္တံနာမ အနိစ္စံ။ ကဒါစိ ဥပ္ပဇ္ဇတိ၊ ကဒါစိ န ဥပ္ပဇ္ဇတီတိ ဂဏှန္တိ။ တံ ပန သယံ နိစ္စံ ပဝတ္တမာနံ ဟုတွာ ကဒါစိ သုခေန ယုတ္တံ ဟောတိ၊ ကဒါစိ ဒုက္ခေနာတိအာဒိနာ တသ္မိံ နိစ္စသညမေဝ ဥပ္ပာဒေန္တီတိ။ ဣတိ စိတ္တံနာမ နိစ္စသညိတေသု ဓမ္မေသု ပရမုက္ကံ သဂတံ နိစ္စသညိတဋ္ဌာနံ ဟောတိ။ တသ္မာ ဘဂဝါ တံပိ ဝိသုံ ဧကံ ခန္ဓံ ကတွာ ခန္ဓဒေသနံ ဒေသေတီတိ။

[၂၂၁] ယံပန ဝိဘာဝနိယံ

‘‘ဘာဇန ဘောဇန ဗျဉ္ဇန ဘတ္တကာရက ဘုဉ္ဇက ဝိကပ္ပဝသေန ပဉ္စေဝ ဝုတ္တာ’’တိ ဝတွာ တံ ဝိဘာဝန္တေန ‘‘ရူပဉှိ ဝေဒနာ နိဿယတ္တာ ဘာဇနဋ္ဌာနိယံ။ ဝေဒနာ ဘုဉ္ဇိတဗ္ဗတ္တာ ဘောဇနဋ္ဌာနိယာ။ သညာ ဝေဒနဿာဒ လာဘ ဟေတုတ္တာ ဗျဉ္ဇနဋ္ဌာနိယာ။ သင်္ခါရာ အဘိသင်္ခရဏတော ဘတ္တကာရကဋ္ဌာနိယာ။ ဝိညာဏံ ဥပဘုဉ္ဇကတ္တာ ဘုဉ္ဇကဋ္ဌာနိယံ။ ဧတ္တာဝတာစ အဓိပ္ပေ တတ္ထသိဒ္ဓီတိ ပဉ္စေဝ ဝုတ္တာ’’တိ ဝုတ္တံ။ တံ သာရတော နဒဋ္ဌဗ္ဗံ။

န ဟိ တံ အဋ္ဌကထာယံ ဧတပ္ပရမဝိနိစ္ဆယေ အာဂတံ။ ဥပမာဒီပနေဧဝ အာဂတံ။ န စ ဘဂဝတာ ဘာဇနာဒိဝိကပ္ပသိဒ္ဓိမတ္တံ ဥဒ္ဒိဿ ပဉ္စေဝ ခန္ဓာ ဝုတ္တာတိ သက္ကာ ဝတ္တုံ။ တထာသိဒ္ဓဿ အတ္ထဿ ပယောဇနာဘာဝတောတိ။

[၂၂၂] ယဉ္စ တတ္ထ

‘‘ဒေသနာက္ကမေပိ ဣဒမေဝ ကာရဏံ။ ယတ္ထ ဘုဉ္ဇတိ၊ ယဉ္စ ဘုဉ္ဇတိ၊ ယေနစ ဘုဉ္ဇတိ၊ ယောစ ဘောဇကော၊ ယောစ ဘုဉ္ဇိတာ။ တေသံ အနုက္ကမေန ဒဿေတုကာမတ္တာ’’တိ ဝုတ္တံ။ တံပိ အသာရံ။

စတုန္နံ ဥပါဒါနာနံ ဝိသယဘူတာ ခန္ဓာ ဥပါဒါနက္ခန္ဓာ။ သဗ္ဗ သဘာဂဓမ္မ ပရိယာဒါနဝသေန သာသဝါ အနာသဝါစ ဓမ္မာ ပဉ္စက္ခန္ဓာတိ ဝုတ္တာ၊ ဝိပဿနာ ဘူမိပရိဂ္ဂဟဝသေန သာသဝါဧဝ ပဉ္စုပါဒါနက္ခန္ဓာတိ ဝုတ္တာ။ အာယတန္တိ အတ္တနော ဖလုပ္ပတ္တိယာ ဘုသံ ဥဿဟန္တာ ဝိယ ဟောန္တီတိ အာယတနာနိ။ အာယတနသဒ္ဒေါ ပန ဆသု အဇ္ဈတ္တိကေသု ဒွါရဓမ္မေသု ပဝတ္တမာနော သဉ္ဇာတိဒေသဋ္ဌေန နိဝါသဋ္ဌာနဋ္ဌေန အာကရဋ္ဌေန၊ ဆသု ဗာဟိရေသု အာရမ္မဏဓမ္မေသု ပဝတ္တမာနော သမောသရဏဋ္ဌေန၊ ဥဘယတ္ထပိ ကာရဏဋ္ဌေန ပဝတ္တတိ။ တတ္ထ စိတ္တ စေတသိကာ ဓမ္မာ ဧကသ္မိံဝါ ဘဝေ အနမတဂ္ဂေဝါ သံသာရေ ပုနပ္ပုနံ သဟ ဇာယမာနာ စက္ခာဒီသု ဆသု ဒွါရပဒေသေသုဧဝ ဇာယန္တိ၊ န အညတ္ထ။ သန္တာနာနုဗန္ဓဝသေန နိဝသန္တာပိ တေသွေဝ နိဝသန္တိ၊ န အညတ္ထ။ အာကိရိတွာ ထပိတာ ဝိယ ပဝတ္တမာနာပိ တေသွေဝ ပဝတ္တန္တိ၊ န အညတ္ထ။ တသ္မာ စက္ခာဒီနိ ဆသဉ္ဇာတိဒေသဋ္ဌေန နိဝါသဋ္ဌာနဋ္ဌေန အာကရဋ္ဌေနစ အာယတနာနိနာမ။ ဒေဝါယတနံ ဝိယ အဓိဋ္ဌာနဋ္ဌေနာတိပိ ဝတ္တုံ ဝဋ္ဋတိယေဝ။

ယထာစ သမ္ပန္နပုပ္ဖဖလေသု ခေမေသု ရုက္ခေသု တတော တတော ပက္ခိနော နိလိနတ္ထာယ အာဟာရတ္ထာယစ နိစ္စံ သမောသရန္တိ။ ဧဝံ ရူပါဒီသု ဆသုဌာနေသု တတော တတော စိတ္တစေတသိကာ ဓမ္မာ အာရမ္မဏကရဏတ္ထာယ နိစ္စံ သမောသရန္တိ။ တသ္မာ ရူပါဒီနိ ဆ သမောသရဏဋ္ဌေန အာယတနာနိနာမ။ တဒုဘယာနိ ပန တေသံ စိတ္တ စေတသိကာနံ ကာရဏဋ္ဌေန အာယတနာနိနာမ။ စက္ခုစ တံ အာယတနဉ္စာတိ စက္ခာယတနံ။ ဧဝံ သေသာနိ။ တတ္ထ စက္ခုသောတာနိ သတ္တာနံ ဟိတကြိယာသု ဗဟုပကာရတ္တာ ကာမရူပ ဗျာပိတတ္တာ စ ပါကဋာနီတိအာဒိမှိ ဝုတ္တာနိ။ တေဟိ အာသန္နတ္တာ တဒနန္တရံ ဃာနံ။ တတော ဇိဝှာတိ ဣမာနိ စတ္တာရိ ပဒေသာယတနာနိနာမ။ တတော သကလကာယဗျာပကော ကာယော။ တတော တေသံ သဗ္ဗေသံ ဂေါစရဝိသယဂ္ဂါဟကံ မနောတိ။ သေသာနိ ပန တေသံ ဝိသယတ္တာ တဒနုက္ကမေနေဝ ဝုတ္တာနီတိ။

ကဿစိ ပန ပုဂ္ဂလဿဝါ သတ္တဿဝါ မနုဿဿဝါ ဒေဝဿဝါ ဗြဟ္မုနောဝါ ဝသေ အဝတ္တိတွာ အတ္တနောဧဝ သဘာဝံ ဓာရေန္တီတိ ဓာတုယော။ ဝိသုံ ဝိသုံ ဝဝတ္ထိတသဘာဝတ္တာဝါ ယထာသဘာဝံ ဓာရီယန္တိ သလ္လက္ခီယန္တိ ဝဝတ္ထပီယန္တီတိ ဓာတုယော။ အပိစ၊ နိဿတ္တ နိဇ္ဇီဝဋ္ဌေန ဓာတုယော။ တတ္ထ နိဿတ္တဋ္ဌေနာတိ သတ္တာကာရာ ဘာဝဋ္ဌေန သတ္တကိစ္စာဘာဝဋ္ဌေန။ ကော ပနေတ္ထ သတ္တာကာရော ကိံ သတ္တကိစ္စန္တိ။ ဇီဝယောဂေါ သတ္တာကာရော။ ဤဟာစ ဗျာပါရော စ သတ္တကိစ္စံ။ နိဇ္ဇီဝဋ္ဌေနာတိ ဧကသ္မိံ ဘဝေ ယာဝ နမရတိ။ ဘဝပရံပရာယဝါ ယာဝ သံသာရော န နိဝတ္တတိ။ တာဝ အဘိဇ္ဇမာနော အစ္ဆိဇ္ဇမာနော ဧကောဝ ဝတ္တတီတိ ဧဝံ ဂဟိတဿ ဇီဝဿ အဘာဝဋ္ဌေန။ စက္ခာဒယောစ ဓမ္မာ သဗ္ဗသော သတ္တာကာရရဟိတာ သတ္တ ကိစ္စရဟိတာစ ဟောန္တိ။ နစ သယံ ဇီဝါနာမ ဟောန္တိ။ နာပိ ဇီဝယောဂါတိ။ ဣတိ နိဿတ္တဋ္ဌေန နိဇ္ဇီဝဋ္ဌေနစတေဓာတုယောနာမာတိ။ တေသံ ပန ဒဋ္ဌဗ္ဗာကာရော အဋ္ဌကထာယံ ဝုတ္တော။ ယထာဟ-ဘေရိတလံ ဝိယ စက္ခုဓာတု ဒဋ္ဌဗ္ဗာ။ ဒဏ္ဍော ဝိယ ရူပဓာတု။ သဒ္ဒေါဝိယ စက္ခုဝိညာဏဓာတု။ တထာ အာဒါသတလံ ဝိယ စက္ခုဓာတု။ မုခံ ဝိယ ရူပဓာတု။ မုခနိမိတ္တံ ဝိယ စက္ခုဝိညာဏဓာတု။ အထဝါ၊ ဥစ္ဆုယန္တ ကိလယန္တံ ဝိယ စက္ခုဓာတု။ ယန္တစက္ကယဋ္ဌိ ဝိယ ရူပဓာတု။ ဥစ္ဆုရသ တေလာနိ ဝိယ စက္ခုဝိညာဏဓာတု။ တထာ အဓရာရဏိ ဝိယ စက္ခုဓာတု။ ဥတ္တရာရဏိ ဝိယ ရူပဓာတု။ အဂ္ဂိ ဝိယ စက္ခုဝိညာဏဓာတု။ ဧသနယော သောတဝိညာဏဓာတုအာဒီသု။ မနောဓာတု ပန ယထာသမ္ဘဝတော စက္ခုဝိညာဏဓာတုအာဒီနံ ပုရေစရာနုစရာ ဝိယ ဒဋ္ဌဗ္ဗာ။

ဓမ္မဓာတုယာ ဝေဒနာက္ခန္ဓော သလ္လမိဝ သူလမိဝစ ဒဋ္ဌဗ္ဗော။ သညာ သင်္ခါရက္ခန္ဓာ ဝေဒနာသလ္လ သူလယောဂါ အာတုရာ ဝိယ ဒဋ္ဌဗ္ဗာ။ ပုထုဇ္ဇနာနံဝါ သညာ အာသာ ဒုက္ခဇနနတော ရိတ္တမုဋ္ဌိ ဝိယ အယထာဘုစ္စနိမိတ္တဂါဟတော ဝနမိဂေါဝိယ။ သင်္ခါရာ ပဋိသန္ဓိယံ ပက္ခိပနတော အင်္ဂါရကာသုယံ ခိပနပုရိသာ ဝိယ။ ဇာတိဒုက္ခာနုဗန္ဓတော ရာဇပုရိသာနုဗန္ဓစောရော ဝိယ။ သဗ္ဗာနတ္ထာဝဟဿ ခန္ဓသန္တာနဿ ဟေတုတော ဝိသရုက္ခဗီဇာနိ ဝိယ။ ရူပံ နာနာဝိဓုပဒ္ဒဝနိမိတ္တတော ခုရ စက္ကံဝိယ ဒဋ္ဌဗ္ဗံ။ အသင်္ခတာပိဓာတု အမတတော သန္တတော ခေမတော စ ဒဋ္ဌဗ္ဗာ။ ကသ္မာ၊ သဗ္ဗာနတ္ထပဋိပက္ခဘူတတ္တာ။ မနောဝိညာဏဓာတု ဂဟိတာရမ္မဏံ မုဉ္စိတွာပိ အညံ ဂဟေတွာ ပဝတ္တနတော ဝနမက္ကဋော ဝိယ၊ ဒုဒ္ဒမနတော အဿခလုင်္ဂေါ ဝိယ၊ ယတ္ထ ကာမနိပါတိတော ဝေဟာသံ ခိတ္တဒဏ္ဍော ဝိယ၊ လောဘဒေါသာဒိ နာနာပ္ပကာရ ကိလေသယောဂတော ရင်္ဂနဋော ဝိယ ဒဋ္ဌဗ္ဗာတိ။ အရိယသစ္စာနီတိ ဧတ္ထ သန္တဿ ဓမ္မဿ ဘာဝေါ သစ္စံ။ သန္တဿာတိ ဘူတဿ တထဿ အဝိပရီတဿ။ အပိစ၊ ကေနဋ္ဌေန သစ္စန္တိ။ တထဋ္ဌေန အဝိတထဋ္ဌေန အနညထဋ္ဌေန။ ယဉှိ စက္ခုဿ ဒုက္ခတ္တံ၊ တံ တထံ ဟောတိ အဝိတထံ အနညထံ။ ဒုက္ခဒုက္ခ သင်္ခါရဒုက္ခ ဝိပရိဏာမဒုက္ခ သင်္ခါတေဟိ တီဟိ ဒုက္ခေဟိ တံ သမင်္ဂိပုဂ္ဂလဿ အဘိဏှပီဠနတော။ တတ္ထ သင်္ခါရဒုက္ခံ နာမ ကမ္မဇာနံ ဥပ္ပတ္တိယာ ပဂေဝ တံတံကမ္မာ ဘိသင်္ခရဏဒုက္ခံ။ တထာ ဥတုဇာဒီနံ ဥပ္ပတ္တိယာ ပဂေဝ တံတံ ဥတုစိတ္တာဟာရာနံ အဘိသင်္ခရဏဒုက္ခံ။

စက္ခု ဟိ နာမ ရူပိဗြဟ္မာနံပိ ပုရိမဘဝေ ဈာနဘာဝနာ သင်္ခါတံ မဟန္တံ ကမ္မာဘိသင်္ခရဏ ဒုက္ခံ အနုဘဝန္တာနံယေဝ ဥပ္ပဇ္ဇတိ။ နော အညထာ။ ကာမသတ္တာနံ ပန ပုရိမဘဝေ ကမ္မသင်္ခါရဒုက္ခံ အနုဘဝိတွာ ဥပ္ပန္နံပိ ယာဝဇီဝံ ပဝတ္တိယာ အာဟာရာဒိသင်္ခါရဒုက္ခဉ္စ ပဋိဇဂ္ဂန ဒုက္ခဉ္စ အနုဘဝန္တာနညေဝ ပဝတ္တတိ၊ နော အညထာ။ ပဝတ္တမာနဉ္စ ပစ္စယဝေကလ္လေဝါ ဇာတေ အန္တရာယေဝါ အာဂတေ ယဒါကဒါစိ ဘိဇ္ဇတိ။ မရဏကာလံ ပတွာ ပန ဧကန္တေန ဘိဇ္ဇတိယေဝ။ တသ္မာ တံ အဿာဒေတွာ တဒတ္ထာယ ကမ္မံဝါ အာဟာရာဒိပစ္စယံဝါ ပဋိဇဂ္ဂနံ ဝါ သင်္ခရောန္တာနံ အနမတဂ္ဂေ သံသာရေ သင်္ခါရဒုက္ခဿ ပရိယန္တောနာမ နတ္ထိ။ ဣတိ သဗ္ဗံ စက္ခု အပရိယန္တေန သင်္ခါရဒုက္ခေန ပုဂ္ဂလံ အဘိဏှံ ပီဠေတိယေဝ။ ဣဒမဿ သင်္ခါရဒုက္ခံ။ ဣဒံ စက္ခု နာမ ပစ္စယဝေကလ္လေဝါ ဇာတေ အန္တရာယေဝါ အာဂတေ ယဒါ ကဒါစိ ဘိဇ္ဇနဇာတိကံ။ တသ္မာ တဿ ဘိဇ္ဇနဘယေန ပဂေဝ ပစ္စယ သမ္ပာဒနဒုက္ခံ ရက္ခာဝရဏဂုတ္တိသံဝိဓာနဒုက္ခံ ဘိဇ္ဇနနိမိတ္တာနိ ဒိသွာ ဝါ ဘိဇ္ဇမာနေဝါ ဘိန္နေဝါ သောစနပရိဒေဝနာဒိဒုက္ခဉ္စ ဝိပရိဏာမ ဒုက္ခံနာမ။ ဣတိ သဗ္ဗံ စက္ခု အပရိယန္တေန ဝိပရိဏာမဒုက္ခေန ပုဂ္ဂလံ အဘိဏှံ ပီဠေတိယေဝ။ ဣဒမဿ ဝိပရိဏာမဒုက္ခံ။ ဒုက္ခဒုက္ခံ ပန တဒုဘယေန ဒုက္ခေန သဟေဝ သိဇ္ဈတိ။ ဧဝံ စက္ခု ဒုက္ခဒုက္ခ သင်္ခါရ ဒုက္ခ ဝိပရိဏာမ ဒုက္ခသင်္ခါတေဟိ တီဟိ ဒုက္ခေဟိ တံ သမင်္ဂိပုဂ္ဂလံ အဘိဏှံ ပီဠေတိယေဝ။ ယဉ္စ တဿ တထာပီဠနံ၊ တံ တထံ ဟောတိ၊ အဝိတထံ၊ အနညထံ။ တသ္မာ စက္ခု ဒုက္ခသစ္စံနာမ။ ဧသ နယော သောတာဒီသု တေဘူမကဓမ္မေသု။

သေသသစ္စေသုပိ ယံ လောဘဿေဝ ဒုက္ခသမုဒယတ္တံ။ ယံ နိဗ္ဗာနဿေဝ ဒုက္ခနိရောဓတ္တံ။ ယံ အဋ္ဌင်္ဂိကမဂ္ဂဿေဝ ဒုက္ခနိရောဓမဂ္ဂတ္တံ တံ ကထံ ဟောတီတိအာဒိနာ ဝတ္တဗ္ဗံ။ ယာဝစ လောဘော န ပဟိယျတိ။ တာဝ စက္ခာဒီနိ အဿာဒေတိယေဝ။ ယာဝစ တာနိ အဿာဒေတိ။ တာဝ တေသံ ပဝတ္တိယာ ကမ္မာဒီနိ သင်္ခရောန္တိယေဝ။ ယာဝစ ကမ္မာဒီနိ သင်္ခရောန္တိ။ တာဝ စက္ခာဒီနိ ပဝတ္တန္တိယေဝ။ ယာဝစတာနိ ပဝတ္တန္တိ။ တာဝ တေသံ ဝုတ္တပ္ပကာရေဟိ သင်္ခါရ ဒုက္ခာဒီဟိ နမုစ္စတိယေဝ။ တသ္မာ လောဘဿ ဒုက္ခသမုဒယတ္တံ တထံ ဟောတိ။ စက္ခာဒီသုစ ပဝတ္တမာနေသု ဝုတ္တပ္ပကာရံ သဗ္ဗံ ဒုက္ခံ အာဂစ္ဆတိယေဝ။ အပဝတ္တမာနေသု နာဂစ္ဆတိ။ တသ္မာ တေသံ ပဝတ္တိနိရောဓဘူတဿ နိဗ္ဗာနဿေဝ ဒုက္ခနိရောဓတ္တံ တထံ ဟောတိ။ တထာ လောဘပဟာနတော အညော ဒုက္ခမုတ္တိမဂ္ဂေါနာမ နတ္ထိ။ အဋ္ဌင်္ဂိကမဂ္ဂေါစ ဥပ္ပဇ္ဇ မာနော ဧကန္တေန တံ ပဇဟတိ။ တသ္မာ အဋ္ဌင်္ဂိကမဂ္ဂဿေဝ ဒုက္ခနိရောဓမဂ္ဂတ္တံ တထံ ဟောတိ၊ အဝိတထံ၊ အနညထန္တိ။

ဧဝံသန္တေပိ သစ္စသဒ္ဒေါ ပရိယာယ သစ္စေသုပိ ဝတ္တတီတိ ဝုတ္တံ စတ္တာရိအရိယသစ္စာနီတိ။ တတ္ထ ဒုက္ခသစ္စေ တာဝ သက္ကာယပရိယာ ပန္နာ အဇ္ဈတ္တဓမ္မာဧဝ အရိယသစ္စံနာမ။ တေယေဝ ဟိ အသ္မိမာနဿ အဓိဋ္ဌာနဘူတာ ဟုတွာ ယာဝတံ မာနံ န သမူဟနတိ။ တာဝ ဒုက္ခကိစ္စံ ကရောန္တိ။ ဒုက္ခပရိညာစနာမ ယာဝဒေဝ အသ္မိမာနသမုဂ္ဃာတာယ ဟောတိ။ အသ္မိမာနောစ တေသွေဝ အဇ္ဈတ္တဓမ္မေသု နိဝိသတီတိ တေသု ပရိညာတေသု ပရိညာကိစ္စံ သိဒ္ဓမေဝ ဟောတီတိ။ တဗ္ဗိပရီ တေန ပန အနိန္ဒြိယ ဗဒ္ဓဓမ္မာ မဂ္ဂဖလဓမ္မာစ အဋ္ဌင်္ဂိကဝဇ္ဇာ ဥဒယဗ္ဗယ ပီဠနတော သင်္ခါရဒုက္ခဝိပရိဏာမဒုက္ခေဟိစ အပရိမုတ္တတ္တာ ဒုက္ခသစ္စံ နာမ။ သမုဒယသစ္စေ ဧကော လောဘောယေဝ အရိယသစ္စံနာမ။ သောဟိ အတ္တသမင်္ဂိနော သတ္တေ အတ္တနိစ အာရမ္မဏဓမ္မေသုစ အဿာဒံ ဇနယိတွာ နိစ္စံ ဝဋ္ဋဒုက္ခတော အနုက္ကဏ္ဌမာနေ ကရောတီတိ တေသံ လောဘသဒိသော အညော ဉာတိဝါ မိတ္တောဝါ သဟာယောဝါ အတ္တာဝါ အတ္တနိယံဝါ နတ္ထိဝိယ ခါယတိ။ တသ္မာ တံသဒိသော အညော ကောစိ ဝဋ္ဋဒုက္ခသံဝိဓာယကောနာမ နတ္ထိ။ တဉ္စ ပဇဟိတုံ သက္ကောန္တဿ အညော ဒုဇ္ဇဟောနာမ နတ္ထိ။ အဝသေသာပန သဗ္ဗေပိ သာသဝါ ကုသလာကုသလဓမ္မာ သမုဒယသစ္စံနာမ။

ဧတ္ထ သိယာ၊ နနု အဝိဇ္ဇာပိ သဗ္ဗဿ ဝဋ္ဋဒုက္ခဿ မူလဘာဝေန ဝုတ္တာတိ သာပိ သမုဒယေ အရိယသစ္စေဧဝ ဝတ္တဗ္ဗာတိ။ ဝုစ္စတေ၊ ယထာဟိ ဧကော ဆေကော ဥယျာနပါလော သမ္ပတ္တိယုတ္တံ ဘူမိ ဘာဂံ လဘိတွာ အတ္တနော ဉာဏဗလေန ဘူမိဘာဂဉ္စ နာနာဗီဇာနိစ အဘိသင်္ခရိတွာ နန္ဒနသဒိသံ ဥယျာနံ မာပေသိ။ တတ္ထ ဘူမိ ဥယျာန ပါလဿ ဗီဇာနံ ရုက္ခာနဉ္စ ပတိဋ္ဌာနကိစ္စံ သာဓေတိ။ ဗီဇာနိစ အင်္ကုရုပ္ပာဒနကိစ္စံ သာဓေန္တိ၊ ဥယျာနပါလောယေဝ ပန သဗ္ဗကိစ္စာနိ သာဓေတိ။ သော ဟိ ဘူမိယံ ဗီဇေသု ရုက္ခေသုစ ယံယံ ကတ္တဗ္ဗံ ဟောတိ။ တံ သဗ္ဗံ ကရောတိ။ မမေတန္တိ ပရိဂ္ဂဏှာတိ ရက္ခတိ။ တတော ဥပ္ပန္နေ ဘောဂေ ဘုဉ္ဇတိ။ တသ္မာ ကော ဣဒံ မာပေသိ၊ ကဿေဒံ ဥယျာနန္တိ ဝုတ္တေ ဥယျာနပါလောယေဝ မာပေသိ။ တဿေဒံ ဥယျာနံ ဣစ္စေဝ ဝုစ္စတိ။ န ဘူမိံ မာပေသိ။ ဗီဇာနိ မာပေန္တိ။ တေသံ ဣဒံ ဥယျာနန္တိ ဝုစ္စတိ။ ကာ ပန ဥယျာနသမ္ပတ္တိယာ ပစ္စယပရံပရာတိ ဝုတ္တေ ပန ဘူမိဧဝ အာဒိတော ဝတ္တဗ္ဗာ။ န ဥယျာနပါလော။ နစ ဗီဇာနီတိ။ ဧဝံ သမ္ပဒမိဒံ ဒဋ္ဌဗ္ဗံ။ ပဋိစ္စသမုပ္ပာဒ နယဉှိ ပတွာ ပစ္စယပရံ ပရဝသေန ဒုက္ခ ဓမ္မာနံ ပဝတ္တိ နိဝတ္တိဝိဓာနေ အဝိဇ္ဇာဧဝ အာဒိ ပဘဝပဓာနဘူတာ ဟောတိ၊ န တဏှာ။ သစ္စဒေသနာယံ ပန တေသံ နိဗ္ဗတ္တကဓမ္မဝိဓာနေ တဏှာဧဝ သာမိဇေဋ္ဌက ပဓာနဘူတာ ဟောတိ။ န အဝိဇ္ဇာတိ နတ္ထိ သမုဒယာရိယသစ္စဘာဝေ အဝိဇ္ဇာယ ဩကာသောတိ ဒဋ္ဌဗ္ဗော။ ကိလေသာနံ တဒင်္ဂနိရောဓဝိက္ခမ္ဘန နိရောဓာ နိရောဓသစ္စံနာမ။ နိဗ္ဗာနံ နိရောဓာရိယသစ္စံနာမ။ ဆသု လောကိယဝိသုဒ္ဓီသု မဂ္ဂင်္ဂါနိ မဂ္ဂသစ္စံ နာမ။ အဋ္ဌင်္ဂိကော လောကုတ္တရမဂ္ဂေါဧဝ မဂ္ဂအရိယသစ္စံနာမာတိ။

အရိယသဒ္ဒေါ စေတ္ထ ကတ္ထစိ ကဒါစိ ကေသဉ္စိ ကုတောစိ ကထဉ္စိ အဝိတထဘာဝေန ဥတ္တမတ္ထဝါစကောတိ။ ဝိဘာဝနိယံ ပန အဋ္ဌကထာယံ ဝုတ္တနယေန သစ္စသဒ္ဒဿ အတ္ထော ဝိဘာဝိတော ဒုက္ခံအရိယ သစ္စန္တိ ဧတ္ထ ပီဠနဋ္ဌော၊ သင်္ခတဋ္ဌော၊ သန္တာပဋ္ဌော၊ ဝိပရိဏာမဋ္ဌောတိ ဣမေဟိ စတူဟိ အတ္ထေဟိ စက္ခာဒိကဿ ဧကေကဿ တေဘူမကဓမ္မဿ ဒုက္ခသစ္စတာ ဝေဒိတဗ္ဗာ။ တတ္ထ သင်္ခတဋ္ဌ ဝိပရိဏာမဋ္ဌာ ပုဗ္ဗေ သင်္ခါရ ဒုက္ခဝိပရိဏာမဒုက္ခေသု ဝုတ္တနယာဧဝ။ ပဒတ္ထတောပန ပစ္စယေဟိ သင်္ခရီယတီတိ သင်္ခတော။ ပဂေဝ ကမ္မာဒိပစ္စယာဘိသင်္ခရဏဒုက္ခေန ဝိနာ န ဥပ္ပဇ္ဇတိ၊ နပဝတ္တတီတိ ဝုတ္တံ ဟောတိ။ ဝိရူပေါ ဟုတွာ ပရိဏာမော ဝိပရိဏာမော။ ပရိဟာနိစေဝ ပရိဘေဒေါစ။ ပီဠနဋ္ဌောတိ ဧတ္ထ ပီဠိတဗ္ဗန္တိ ပီဠနံ။ ပီဠေတီတိ ပီဠနံ။ ပီဠီယတေ ပီဠနံ။ အတ္ထောတိ သဘာဝေါ။ ပီဠနံ အတ္ထော ယဿာတိ ဝိဂ္ဂဟော။ တတ္ထ ယထာ ဧကိဿာ ဒုဂ္ဂတိတ္ထိယာ ကုစ္ဆိမှိ ပုတ္တော ဥပ္ပဇ္ဇတိ။ သောစ နာနာရောဂေဟိ သယံ နိစ္စံ ပီဠိတော ဟုတွာ ပဋိဇဂ္ဂနဒုက္ခေဟိ မာတရဉ္စ နိစ္စံ ပီဠေတိယေဝ။ ယဉ္စ တဿာ ကုစ္ဆိမှိ တာဒိသဿ ပုတ္တဿ ဥပ္ပဇ္ဇနံ၊ တဉ္စ တဿာ ဣတ္ထိယာ ပီဠနကိစ္စမေဝ ဟောတိ။ ဧဝမေဝံ ယေ စက္ခာဒယော ဓမ္မာ ဇရာမရဏေဟိ နိစ္စံ ပီဠီယန္တိ၊ တေ ပဋိဇဂ္ဂနဒုက္ခေဟိ တံ သမင်္ဂီနံ ပုဂ္ဂလံ နိစ္စံ ပီဠေန္တိယေဝ။ ယဉ္စ တဿ သန္တာနေ တေသံ ဥပ္ပဇ္ဇနံ၊ တဉ္စ တဿ ပီဠနကိစ္စမေဝါတိ။ ယထာဟယော ဘိက္ခဝေ စက္ခုဿ ဥပ္ပာဒေါ ဌိတိ အဘိနိဗ္ဗတ္တိ ပါတုဘာဝေါ။ ဒုက္ခဿေသော ဥပ္ပာဒေါ။ ရောဂါနံ ဌိတိ ဇရာမရဏဿ ပါတုဘာဝေါ။ ယော ဘိက္ခဝေ သောတဿ ဃာနဿ ဇိဝှာယ ကာယဿ မနဿ ဥပ္ပာဒေါတိအာဒိ။

သန္တာပဋ္ဌောတိ ရာဂဂ္ဂိအာဒီဟိ ဧကာဒသဟိ အဂ္ဂီဟိ ဘုသံ ပရိဒယှနဋ္ဌော။ ယထာဟ –

စက္ခုံ အာဒိတ္တံ။ ကေန အာဒိတ္တံ။ ရာဂဂ္ဂိနာ အာဒိတ္တံ။ ဒေါသဂ္ဂိနာ။ မောဟဂ္ဂိနာ။ ဇာတိယာ။ ဇရာယ။ မရဏေန။ သောကေန။ ပရိဒေဝေန။ ဒုက္ခေန။ ဒေါမနဿေန။ ဥပါယာသေန အာဒိတ္တန္တိ ဝဒါမိ။ သောတံ အာဒိတ္တံ။ ဃာနံ အာဒိတ္တံ။ ဇိဝှာ အာဒိတ္တာ။ ကာယော အာဒိတ္တော။ မနော အာဒိတ္တောတိ။

အာဒိပနံ သန္တာပနံ ပရိဒယှနန္တိ ဣဓ အတ္ထတော ဧကန္တိ။ ဧတ္ထ သိယာ၊ အရိယမဂ္ဂေါပိ စိရကာလံ ပါရမိတာဘိသင်္ခရဏဒုက္ခေန အန္တိမဘဝေစ သီလာဒိဝိသုဒ္ဓိဘာဝနာဘိသင်္ခရဏဒုက္ခေန ပုဂ္ဂလံ သုသံ ပီဠေတိယေဝ။ တထာ ဝိပရိဏာမဓမ္မောစ။ တသ္မာ သောပိ ပိဠနာဒိအတ္ထေန ဒုက္ခသစ္စသင်္ဂဟော သိယာတိ။န။ သဗ္ဗဒုက္ခသန္တိ ဝံဟတ္တာ။ သော ဟိ ဝုတ္တပ္ပကာရံ အဘိသင်္ခရဏဒုက္ခံ ပရိပုဏ္ဏံ အနုဘူတဿ ပုဂ္ဂလဿ သကိံ ဥပ္ပဇ္ဇမာနော သဗ္ဗံ ကိလေသဇာတံ ခေပေန္တော ဥပ္ပဇ္ဇတိ။ နိရုဇ္ဈမာနောစ သဗ္ဗံ အာယတိံ အနမတဂ္ဂေ သံသာရေ ဝဋ္ဋဒုက္ခံ ဝူပသမေန္တော နိရုဇ္ဈတိ။ ဝူပသန္တံစ အနာဂတ ဒုက္ခံ ဥပါဒါယ ဝုတ္တပ္ပကာရံ အဘိသင်္ခရဏဒုက္ခံ ဂဏနုပဂံ နဟောတိ။ ဘိဇ္ဇန္တောစ အနုတ္တရံ ဝိမုတ္တိသုခံ ဒတွာဝ ဘိဇ္ဇတိ။ တသ္မာ တဿ ဝိပရိဏာမပစ္စယာပိ ပုဂ္ဂလဿ ကာစိ ဟာနိနာမ နတ္ထီတိ န သော ဒုက္ခသစ္စသင်္ဂဟောတိ။ လောကိယဓမ္မာ ပန ဥပ္ပဇ္ဇမာနာ ပဝတ္တ မာနာစ ပုဗ္ဗေ ဝုတ္တပကာရေဟိ သင်္ခါရဒုက္ခေဟိ ဘုသံ ပီဠေတွာ ဧဝ ဥပ္ပဇ္ဇန္တိ ပဝတ္တန္တိစ။ နိရုဇ္ဈမာနာ မဟန္တံ ပရိဠာဟဒုက္ခံ ဇနေတွာ အပရိယန္တေ ခုရစက္ကသဒိသေ ဝဋ္ဋဒုက္ခယန္တေ ပုဂ္ဂလံ ယောဇေန္တာဝ နိရုဇ္ဈန္တိ။ တသ္မာ တေဧဝ ပီဠနာဒိအတ္ထေဟိ ဧကန္တဒုက္ခာ ဟောန္တီတိ။ ဧတေန နိဗ္ဗာနဿပိ သမ္ပာပကပစ္စယာဘိသင်္ခရဏလေသံ ဂဟေတွာ ဒုက္ခသစ္စတ္တပသင်္ဂေါ နိဝတ္တိတော ဟောတီတိ။

ဒုက္ခသမုဒယောအရိယသစ္စန္တိ ဧတ္ထ ဘဝါဘဝသင်္ခါတံ ဒုက္ခက္ခန္ဓံ သမုဒေတိ။ ပုနပ္ပုနံ အဗ္ဗောစ္ဆိန္နံ ကတွာ ဥဒယတိ ဥဋ္ဌာပေတိ ဝဍ္ဎေတိဝါတိ ဒုက္ခသမုဒယော၊ အာယူဟနဋ္ဌော၊ နိဒါနဋ္ဌော၊ သံယောဂဋ္ဌော၊ ပလိဗောဓဋ္ဌောတိ စတူဟိ အတ္ထေဟိ လောဘဿ ဒုက္ခသမုဒယတာ ဝေဒိတဗ္ဗာ။ တတ္ထ အာယူဟနဋ္ဌောတိ ဘဝါဘဝ သင်္ခါတဿ ဧကေကသ္မိံ ဘဝေပိ ဝတ္ထုကာမပဋိသံယုတ္တဿ ဒုက္ခက္ခန္ဓဿ ဘိယျော ပရိဗျူဟနဋ္ဌော ရာသိကရဏဋ္ဌော နိဒါနဋ္ဌောတိ တဒေဝ နိရန္တရံ ကတွာ အနုပ္ပဒါနဋ္ဌော နိယျာတနဋ္ဌောတိ ဝုတ္တံ ဟောတိ။ သံယောဂဋ္ဌောတိ ဒုက္ခက္ခန္ဓသ္မိံဧဝ ဒဠှံ ဗန္ဓနဋ္ဌော။ ပလိဗောဓဋ္ဌောတိ တတော တဿ တဿ မုစ္စနုပါယဿ နီဝါရဏ ဝသေန ပလိဗုန္ဓနဋ္ဌော ဥပရုန္ဓနဋ္ဌောတိ အတ္ထော။ ဒုက္ခနိရောဓော အရိယသစ္စန္တိ ဧတ္ထ ဝဋ္ဋဒုက္ခဿ နိရုဇ္ဈနံ အနုပ္ပာဒ ဓမ္မတာပတ္တိ ဝသေန ခိယျာနံ ဒုက္ခနိရောဓော။ ဒုက္ခံ ဝါ နိရုဇ္ဈတိ နပဝတ္တတိ ဧတသ္မိန္တိ ဒုက္ခနိရောဓော။ နိဿရဏဋ္ဌော ဝိဝေကဋ္ဌော၊ အသင်္ခတဋ္ဌော၊ အမတဋ္ဌောတိ စတူဟိ အတ္ထေဟိ နိဗ္ဗာနဿ ဒုက္ခနိရောဓတာ ဝေဒိတဗ္ဗာ။ တတ္ထ နိဿရဏဋ္ဌောတိ နိဿရဏ ဝိမုတ္တိယာ ဝိမုစ္စနဋ္ဌော။ ဝိဝေကဋ္ဌောတိ ဝဋ္ဋဒုက္ခပလိဗောဓတော ဝိဝိစ္စနဋ္ဌော။ အသင်္ခတဋ္ဌောတိ သင်္ခါရဒုက္ခဿ အဘာဝဋ္ဌော။ အမတဋ္ဌောတိ မရဏဒုက္ခဿ အဘာဝဋ္ဌောတိ။

ဒုက္ခနိရောဓဂါမိနိပဋိပဒါတိ ဧတ္ထ ဒုက္ခနိရောဓံ ဂမေတိ သမ္ပာပေတီတိ ဒုက္ခနိရောဓဂါမိနီ။ အတ္တနော သန္တာနေ ပဋိလာဘကရဏ ဝသေန ပဋိပဇ္ဇိတဗ္ဗာတိ ပဋိပဒါ။ ဒုက္ခနိရောဓဂါမိနီစ သာ ပဋိပဒါ စာတိ ဝိဂ္ဂဟော။ နိယျာနဋ္ဌော၊ ဟေတွဋ္ဌော၊ ဒဿနဋ္ဌော၊ အဓိပတေယျဋ္ဌောတိ စတူဟိ အတ္ထေဟိ အဋ္ဌင်္ဂိကမဂ္ဂဿ ဒုက္ခနိရောဓမဂ္ဂတာ ဝေဒိတဗ္ဗာ။ တတ္ထ နိယျာနဋ္ဌောတိ အဝိဇ္ဇာပစ္စယာ သင်္ခါရာတိအာဒိကံ ဝဋ္ဋသောတံ ပဋိနိဝတ္တေတွာ အဝိဇ္ဇာနိရောဓာ သင်္ခါရနိရောဓောတိအာဒိကံ ဝဋ္ဋပဋိသောတံ အဘိမုခံ နိဂ္ဂမနဋ္ဌော။ ဟေတွဋ္ဌောတိ သဗ္ဗေသံ အရိယဂုဏာနံ သုပ္ပတိဋ္ဌိတဘာဝ သာဓနဋ္ဌော။ ဒဿနဋ္ဌောတိ အညာဏအဒဿနသင်္ခါတဿ သမ္မောဟဿ ပဟာန ဝသေန စတုသစ္စဓမ္မဿ ပဋိဝိဇ္ဈနဋ္ဌော။ အဓိပတေယျဋ္ဌောတိ တဏှာ ဒါသဗျဝိမုတ္တိယာ ဘူဇိဿဘာဝပတ္တိဝသေန သယမေဝ အတ္တနော အဓိပတိ ဟုတွာ ဝိရောစနဋ္ဌော။ လောကိယမဂ္ဂါ ဟိ တဏှာယ အာရမ္မဏဘာဝေ ဌိတာ တဏှာဒါသဗျံ နာတိဝတ္တန္တီတိ။ ဧတ္ထစ ဣမေ သတ္တာနာမ ဧကန္တေန ဒုက္ခပဋိကူလာ ဟောန္တိ ဒုက္ခဘီရုကာ။ ယေစ အတ္တနိ ဒုက္ခံ ဇနေန္တိ။ တေသု ဝေရိသညံ ဥပ္ပာဒေန္တိ။ အတ္တနော ပန ဧကန္တဒုက္ခံဝါ ဧကန္တဒုက္ခဇနကံဝါ တေ နဇာနန္တိ။ တသ္မာ တေ အတ္တနော ဒုက္ခမုတ္တိယာ ယံ ယံ ကမ္မံ အာယူဟန္တိ။ တံ တံ အတ္တနော ဒုက္ခဝဍ္ဎိယာဧဝ သမ္ပဇ္ဇတိ။ ကိံ ပန ဧကန္တဒုက္ခံ၊ ကိံစ ဧကန္တ ဒုက္ခဇနကန္တိ။ အတီတာနာဂတပစ္စုပ္ပန္နဘူတာ အတ္တနော အတ္တနော အတ္တဟာဝပရိယာပန္နာ တေဘူမကဓမ္မာဧဝ အတ္တနော အတ္တနော ဧကန္တဒုက္ခာနာမ။ ကသ္မာ၊ တေဟိ မုတ္တေဧဝ သဗ္ဗဒုက္ခေဟိ မုစ္စနတော၊ အမုတ္တေစ အမုစ္စနတောတိ။ အတ္တနော တဏှာဧဝ အတ္တနော ဧကန္တဒုက္ခဇနကံနာမ။ ကသ္မာ၊ တာယ ပဟီနာယဧဝ ဧကန္တ ဒုက္ခေဟိ မုစ္စနတော၊ အပဟီနာယစ အမုစ္စနတောတိ။

တထာ ဣမေ သတ္တာ ဧကန္တေန သုခကာမာ ဟောန္တိ သုခါဘိနန္ဒိနော။ ယေစ အတ္တနိ သုခံ ဇနေန္တိ။ တေသု ပိယမိတ္တသညံ ဥပ္ပာဒေန္တိ။ အတ္တနောပန ဧကန္တသုခံဝါ ဧကန္တသုခမဂ္ဂံဝါတေ နဇာနန္တိ။ တသ္မာ တေ အတ္တနော သုခဝဍ္ဎိယာ ယံ ယံ ကမ္မံ အာယူဟန္တိ။ တံ တံ အတ္တနော ဒုက္ခဝဍ္ဎိယာဧဝ သမ္ပဇ္ဇတိ။ ကိံ ပန ဧကန္တသုခံ ကောစ ဧကန္တ သုခမဂ္ဂေါတိ။ ဧကန္တဒုက္ခဓမ္မဿ အဘာဝေါဧဝ အတ္တနော ဧကန္တ သုခံနာမ။ ဧကန္တဒုက္ခဇနကဿ ပဟာနမဂ္ဂေါဧဝ အတ္တနော ဧကန္တ သုခမဂ္ဂေါနာမာတိ ဣမမတ္ထံ ဒဿေန္တော ဣမာနိ စတုသစ္စပဒါနိ ကထေသီတိ ဝေဒိတဗ္ဗံ။

[၂၂၃] ယံ ပန ဝိဘာဝနိယံ

‘‘ဒုက္ခဿ အနုပ္ပာဒနိရောဓော ဧတ္ထ ဧတေနာတိဝါ ဒုက္ခနိရောဓော’’တိ ဝုတ္တံ။ တတ္ထ ဧတေနာတိ ဣဒံ နယုဇ္ဇတိ။

န ဟိ နိဗ္ဗာနံ ဒုက္ခဿ အနုပ္ပာဒနိရောဓ ကြိယာသာဓနေ ဒုက္ခေန သဟကာရီ ကာရဏံ ဟောတီတိ။ သေသစေတသိကာတိ ဝေဒနာ သညာဟိ သေသာ ပညာသ စေတသိကာ။ အတီတာဒိဝသေန တိဝိဓ ဘိန္နာနံ အဇ္ဈတ္တာဒိ ဩဠာရိကာဒိ ဟီနာဒိ ဒူရာဒိဝသေန ဒုဝိဓဘိန္နာနဉ္စ ဓမ္မာနံ ရာသဋ္ဌေန ခန္ဓဝေါဟာရော ဟောတိ။ နိဗ္ဗာနဿ ပန တာဒိ သော ဘေဒေါ နတ္ထီတိ ဝုတ္တံ ဘေဒါဘာဝေနာတိအာဒိ။ တဉှိ အတီတာဒိကေ တိဝိဓဘေဒေ ဧကံပိ န ဟောတိ။ ကသ္မာ။ အနိဒ္ဒိသိတဗ္ဗ ဓမ္မတ္တာ။ တဉှိ တေကာလိကဓမ္မာနံ ခယဝိရာဂနိရောဓဘူတော အနိမိတ္တ ဓမ္မောယေဝ ဟောတိ။ တသ္မာ ဣဒံ အတီတေ အသုကဗုဒ္ဓကာလေ နိဗ္ဗာနံ။ ဣဒံ အနာဂတေ။ ဣဒံ ဧတရဟီတိ ဧဝံ ကာလဘေဒေန နိဒ္ဒိသိတဗ္ဗံ နဟောတိ။ တထာ ဒိသာ ဒေသဌာနဘေဒေန ပရိနိဗ္ဗုတပုဂ္ဂလဘေဒေန စ။ ကေဝလံ ပန အနမတဂ္ဂေ သံသာရဝဋ္ဋေ ယတ္တကာနိ အနတ္ထ ပဒါနိ ဒိဿန္တိ။ တပ္ပဋိပက္ခသိဒ္ဓေဟိ ဂုဏပဒေဟိဧဝ တံ ကထေ တဗ္ဗန္တိ။ ဒုကေသု ပန အဇ္ဈတ္တဒုကံ ပတွာ တံ ဗဟိဒ္ဓါဧဝ ဟောတိ။ န အဇ္ဈတ္တံ။ ဩဠာရိကဒုကံ ပတွာ သုခုမမေဝ ဟောတိ၊ န ဩဠာရိကံ။ ဟီနဒုကံ ပတွာ ပဏီတမေဝ ဟောတိ၊ န ဟီနံ။ ဒူရေ ဒုကံ ပတွာ ဒူရေဧဝ ဟောတိ၊ န သန္တိကေတိ။ ခန္ဓသင်္ဂဟနိဿဋန္တိ ခန္ဓသင်္ဂဟတော ဝိမုတ္တံ။

ဒွါရာလမ္ဗဏဘေဒေနာတိ ဒွါရဆက္က အာရမ္မဏဆက္ကာနံ ဘေဒေန။ အာယတနာနိ ဒွါဒသ ဘဝန္တီတိ ယောဇနာ။ ဧတ္ထစ ဒွါရဆက္ကံ ဓမ္မာရမ္မဏံဧဝါတိ သေသဓမ္မာလမ္ဗဏံ သန္ဓာယ အာရမ္မဏဆက္ကံ ဝုတ္တန္တိ ဒဋ္ဌဗ္ဗံ။ ဒွါရာ။လ။ ပရိယာယေနာတိ ဆန္နံ ဒွါရာနံ ဆန္နံ အာလမ္ဗဏာနံ တေသု ဒွါရာလမ္ဗဏေသု ဥပ္ပန္နာနံ ဝိညာဏာနဉ္စ ကမေန ဓာတုယော အဋ္ဌာရသ ဘဝန္တီတိ ယောဇနာ။ ဧတ္ထပိ ဒွါရဆက္ကေ မနောဒွါရံ ဝိညာဏေကဒေသမေဝ ဟောတိ။ ဒွါရဆက္ကံ ဝိညာဏသတ္တကဉ္စ ဓမ္မာ လမ္ဗဏေကဒေသမေဝါတိ။ မဂ္ဂေါ လောကုတ္တရော မဂ္ဂေါနာမ မတောတိ ယောဇနာ။ မဂ္ဂယုတ္တာ ဧကူနတိံသဓမ္မာ ဖလဘူတာစ သတ္တတိံသ ဓမ္မာ စတုသစ္စ ဝိနိဿဋာ စတူဟိ အရိယသစ္စေဟိ ဝိနိဿဋာ ဝိမုတ္တာ။ ယမေတ္ထ ဝတ္တဗ္ဗံ၊ တံ ဟေဋ္ဌာ ဝုတ္တမေဝါတိ။

ဣတိ ပရမတ္ထဒီပနိယာနာမ အဘိဓမ္မတ္ထသင်္ဂဟဿ

စတုတ္ထဝဏ္ဏနာယ သမုစ္စယ သင်္ဂဟဿ

ပရမတ္ထဒီပနာ နိဋ္ဌိတာ။