📜
နမော တဿ ဘဂဝတော အရဟတော သမ္မာသမ္ဗုဒ္ဓဿ
မဟာပဏာမပါဌ
(ဗုဒ္ဓဝန္ဒနာ)
သော ¶ ၊ ကော၊ နေ၊ သံ၊
သတ္ထာ၊ နေသံ၊ ခေမံ၊ ဒါတာ၊
ဟေဠာတ-က္ကာရော သော၊ ဇန္တူနံ၊ နော မာ နု၊
သော လောကန္ဓံ၊ ဟန္တွာ နက္ကော၊
သတ္တမ္ဗောဇံ၊ ဗောဓေတာ နု။
ဇိနသူရိယော၊ တိဘဝနဘေ၊
မုဟတိမိရံ၊ အဘိတပယေ။
ဇေနော ဇိနမူလေ၊ ဒိသွာ ဇနကာယံ၊
သံသာရနိမုဂ္ဂံ၊ သဗ္ဗညုတ မိစ္ဆံ။
ဟိတွာ ကရုပေတံ၊ မောက္ခံ ပဏိဓာနံ၊
ဝတ္တေသိ ဒယာဏာ၊ ယော တံ မုနိ ဝန္ဒေ။
သုတာယုဘရိယာ မေ၊ ဓနင်္ဂမပိ စဇ္ဇံ။
စိနံ ဗုဓိနိဒါနေ၊ အဂါ မုနိယံ မေတံ။
သော သသဇာတိယ ဒေဟံ၊ စဇ္ဇိယ ဒါနဝရဉ္စ၊
နာဂုသဘော ဝရသီလံ၊ ပူရယိ သမ္ပရိစာဂေါ။
နေက္ခမ္မဂ္ဂံ ရာဇာ ဟုတွာ၊ သေနဗ္ဗိဒွါ ပညာသေဋ္ဌံ၊
ဝေဒေဟိန္ဒော ဝီရုက္ကံသံ၊ ခန္တီဝါဒီ ခန္တီသေဋ္ဌံ။
သော သုတသောမော တထဂံ၊ တေမိယ ဓိဋ္ဌာနဝရံ၊
ဧကဘုဂေါ မေတ္တဝရံ၊ လောမဟသောပေက္ခတရံ။
ပါရမီ ¶ တိဒုက္ကရာဝ၊ ပူရိယာန သေဋ္ဌဗောဓိ၊
ပါပုဏိတ္ထ ယော အနန္တ-ဓမ္မသာရဒံ နမာမိ။
ပဟာယ စက္ကဝတ္တိကံ၊ ကရောပနီတ မဒ္ဒိယံ၊
ဘုသိဓရေ သသေနကံ၊ အဇေနိ ပါပိမံ နမေ။
အထုတ္တရံ ဇယာကရံ၊ ဗဟူပကာရတံ ဇိနော၊
ပဋိစ္စ နိမ္မိသက္ခိဘိ၊ ဥဒိက္ခတေ နမာမိ တံ။
စင်္ကမေ မရုဝိမတိ ယော၊ ဆိန္ဒယံ ကမိ ရတနိယေ၊
ဣဒ္ဓိပါဋိဟိရဏကရော၊ စက္ခုမံ တမဘိပဏမေ။
အထ ရတနဃရေ ဗုဒ္ဓါ၊ ဆဒိဓိတိ ဇနယံ သင်္ချံ၊
သီမီသာ တမဘိဓမ္မံ ယော၊ သုရနရမဟိတံ ဝန္ဒေ။
နိဂြောဓန္တိက နုဗ္ဘဝီ သုခံ၊ ဓမ္မံ ယော ဝိစိနံ နဓီဝရော၊
ကိစ္ဆာလဒ္ဓ မနညဗောဓိယံ၊ ဝန္ဒေ တံ သုဂတံ နိဂြောစရံ။
သဗ္ဘောဂေဟိ ထ မုစလိန္ဒေန၊
နာဂိန္ဒေန ရဟသိ ပါဝုတ္တော၊
သောချံ ယော နုဘဝိ ဝိမုတ္တိံတံ၊
ဝန္ဒေ မာရာဇိ အတုလပ္ပညော။
ကာရုဏိကော ရာဇာယတနေ ယော၊
ဘောဇ မုဠာရံ ဘောဇ္ဇရသေကံ၊
ဝါသ မကာ နန္တဂ္ဂုဏဓာရော၊
ဧကဂတော ဝန္ဒာမိ မဟေသီ။
ကေယျံ ကေယျံ အဘိဇယကေတုံ၊
ဇေယျံ ဇေယျံ ဝရဇယပါနံ၊
ပေယျံ ပေယျံ သုဝိစိ နမေ တံ၊
နေယျံ နေယျံ သမတမုပေက္ခိံ။
သတ္တ စ သတ္တာဟေ ဝိဇိတာဝီ၊
ခေပိယ နိဂြောဓံ ပုန ဂန္တွာ၊
ဓမ္မသုဒုဒ္ဒသျံ ပတိ ဇာတော၊
ဓမ္မကထာ ပ္ပောသုက္က ဝိတက္ကော။
မရုဂဏေဟိ ¶ ဗြဟ္မုနာ သမံ၊
ရတနဒါမမေရုဏာ ဒဒါ၊
သမဘိယာစိတော ပဋိဿဝံ၊
ဒသဗလော နမာမိ ဒေသိတုံ။
ဂန္တွာ ဣသိပ္ပာတက္ကာနနဉ္စ၊
သတ္ထာ မိဂဒ္ဒါယံ ဒေသယိတ္ထ၊
သစ္စပ္ပကာရံ ယော ဓမ္မစက္က-
သုတ္တံ နမေ ဆဗ္ဗီဓံသု တာဝ။
ရညော မဂဓဿ ကတပ္ပဋိညော၊
ဂန္တွာနထ ရာဇဂဟံ ဝိနေတိ၊
သတ္တေ မလရောဂယုတေ ဂဒဂ္ဂံ၊
ပါယေတုန တံ ပဏမေ ဘိသက္ကံ။
သကျာဓိဝါသေ ကပိလေ သညတိံ၊
မာနဒ္ဓဇံ ဘိန္ဒိယ မိဒ္ဓိဝါတာ၊
ဓမ္မာမတံ ပါယိ ပိတုပ္ပဘုတိ၊
ဝန္ဒာမိ သကျိန္ဒ မနောမဒဿိံ။
အနာထပိဏ္ဍောတိ ဝှယေန နန္တ-
ဒ္ဓနံ စဇိတွာ သုကတေ ဝိဟာရေ၊
ဝိဟာသိ ဘိယျော ဇနတာ ဟိတတ္ထံ၊
သုဓမ္မဘေရိံ ဝဒယံ ဘိဝန္ဒေ။
ဥပေတပုညံ ဝရလက္ခဏောကံ-
ဏောကံ ဝိသုဒ္ဓံ ဇလိတပ္ပဒီမံ၊
ဒီပံ ပဇာနံ အနိဃံ နဝဇ္ဇံ-
နဝဇ္ဇဝါစံ သုဂတံ နမာမိ။
မုနိဘာနု ဓမ္မပဘာဟိ ဇန-
မ္ဗုဇ မုဒ္ဓတန္ဓတမော သုတပေါ၊
ကရုဏာရုဏော သမဗောဓယိ ယော၊
ဘဝိသီတလတ္တပနော ပဏမေ။
ဣန္ဒု ဝိယမ္ဗရမဇ္ဈတလေ ယော၊
ရာဇတိ တာရဂဏေန မုနိန္ဒော၊
အရိယဂဏပ္ပရိတော တိဘဝေ တံ၊
သာဒရ မုဂ္ဂတသောဘ မဝန္ဒိ။
မူလာမူလာ ¶ တိံသတိပါရမိယော၊
သာခါသာခါ မဇ္ဈိမဇ္ဈာနကာယာ၊
ပတ္တာပတ္တာ ဗုဒ္ဓစက္ခုနိ ယဿ၊
ပုပ္ဖာပုပ္ဖာ ကာရုဏာ မဂ္ဂခန္ဓော။
သာရာသာရာ ယမကာ ဖေဂ္ဂုဘိညာ၊
သဗ္ဗာလမ္ဗင်္ကုရကံ သီလဝဏ္ဋံ၊
သေသာဓမ္မာ မဓုပက္ကပ္ဖလာနိ၊
ရံသီဆလ္လီ သုတစာ လက္ခဏာနိ။
ဆာယုပဂါ သုံ ပုထုနရဒေဝါ၊
မာရဇိဒီပင်္ကရ မဟိဇာတံ၊
ပတ္ထတနန္တဉ္စ ကုသလဗီဇံ၊
ဧကရုဟံ ပါဒပမုနိ ဝန္ဒေ။
မာရတိတ္ထိယရိပုံ တမဉ္စ ယော၊
ဓံသယံ နဂရဓမ္မ မာပယံ၊
သီလနီဝရဏ ဒွါရကောဋ္ဌကံ၊
ဧသိကာပရမသဒ္ဓ မုတ္တမံ။
ဒွါရပါလသုယတံ သတိဋာလံ၊
ဉာဏစစ္စရ သိဃာဋပဒိဒ္ဓိံ၊
ဓမ္မမဂ္ဂကုဋိသာလ သဟိတ္တံ၊
ဓမ္မသေနပတိသာရိဇဘူတံ။
ဒုတိယသုတပရောဟိတံ မဟာ-
ဓုတဂုဏဓရမဂ္ဃ ဒဿိကံ၊
ဝိနယစိနက ဓမ္မရက္ခကံ၊
တိဘဝပတိက ဓမ္မရာဇိယံ။
သုတံ သုတံ သဗ္ဗဓိ သဇ္ဇနံဇနံ၊
မိတံ မိတံ နန္တဂုဏာလယံ လယံ၊
ဟုတံ ဟုတံ ဇန္တုနမာနမံ နမံ၊
ဘဝေ ဘဝေ တေဘဝမင်္ဂလံ ဂလံ။
လောကာဘိရာမံ ရမဏေယျဝေဒုရံ၊
လောကန္တဂုံ အန္တုဘယာနုပါဂတံ၊
လောကဒ္ဓဇံ မာနဓဇပ္ပဟာရကံ၊
လောကဂ္ဂရုံ အဂ္ဂရု ပစ္စယေ နမေ။
မကုဋဂ္ဂဖလံ ¶ နယနဉ္စနိကံ၊
သဝနဗ္ဘုသနံ ဝဒနဗ္ဘုသနံ၊
ဂလမဏ္ဍနမိဒ္ဓိ မနညုရသံ၊
ကိရိယညုဒရံ ဒွိခဏညုကရံ။
ကဋိဝိဘူသန မဇ္ဈိမညဏကံ၊
ဒယဝိလေပန ဓာရဏမဏ္ဍနံ၊
ပဋခိလညုနိဝတ္ထ မနုတ္တရံ၊
မုနိမရုတ္တမ မေက မဟံ နမေ။
သတိဝရ သုစကံ ဣဗ္ဘဂ္ဂပညံ၊
သုဝီရိယဝသုဝါဟံ ပီတိသေလံ၊
ဂဟပတိသမထဂ္ဂံ ထီပသဒ္ဓိံ၊
အသဏိယသုနုပေက္ခံ သတ္တဘောဂံ။
စတုဒိသိကိဒ္ဓိပ္ပဒ မသဟာယံ၊
သုပရိဝုတံ ခတ္တိယဝိရဇာနံ၊
သုစိပရိသံ ဒေဝနရ မနာပံ၊
ဒသဗလစက္ကာဓိပတိ ဘိဝန္ဒေ။
သမာဓိဗ္ဗဟိဒ္ဓံ သတိစ္ဆဋ္ဌသေလံ၊
ဝိရပ္ပဉ္စမာ ဇီဝမဇ္ဈံ သုကမ္မ-
တ္တတိယံ သုဝါစာဒုတိယံ ဘိသေဋ္ဌံ၊
သမာတက္ကပုဗ္ဗဉ္စ သတ္တပ္ပဝါရံ။
ဝိဝိဓဉာဏပဘုတိဗ္ဗသာကရံ၊
ဗဟုမဟိဒ္ဓိက မရူန မာသယံ၊
ဓုံဝပဘာဇလိတရာမဏေယျကံ၊
သုဂတနေရုနဂရာဇ မာနမေ။
သီလဇ္ဇလံ ရတနဓမ္မ မာကရံ၊
ဘိညာဝိစိံ သတိကုလဋ္ဌိ ဂမ္ဘိရံ၊
ဝိတ္ထိဏ္ဏဉာဏ မရိယောဒဇာသယံ၊
အဋ္ဌမ္ဗီဓစ္ဆရိယကံ အသန္ဒနံ။
ဗဟုနဇ္ဇမောသရဏ မေကရသံ၊
ဒုရုပဂ္ဂမံ အစိတသမ္ဘရိနံ၊
ပုထုပေါတပုညဝတမေဝ နမေ၊
ဒွီပဒုတ္တမဏ္ဏဝ နဒိန္ဒဝရံ။
အဘိနိဟရဓနုံ ¶ ဂုဏပါရမိံ၊
နဠမတိမနဗာဇရဟမ္မုခါ၊
ဓိတိသမိတသရေန သုဓာရယံ၊
မလမ ဂဂဏ မေကပဝေဒနာ။
ယော ပါဝေဓေသိံ အဂ္ဂမဂ္ဂဉ္စ တူဏိံ၊
ဓမ္မာလင်္ကာရဗ္ဗမ္မ မေကဗ္ဗလံ တံ၊
နေတ္တိံသာနန္တဉာဏ ဂီရေလ္လိမန္တံ၊
သဗ္ဗညုဿာသံ ဣဒ္ဓိဒဏ္ဍံ နမာမိ။
ဝရတပဝုဋ္ဌိ သုဗီဇကသဒ္ဓါ၊
မတိယုဂနင်္ဂလ ဟီရုတပီသာ၊
သုသမထရဇ္ဇု သတိဒွိဇတုတ္တံ၊
ဝီရိယဒုရာဝဟ သစ္စနိဒါနံ။
ဝတိသံဝရံ သောရတမောစနဉ္စံ၊
သရဏာ နိဝတ္တဗ္ဗဟနတ္ထံ ယဿ၊
အမတပ္ဖလံ နေကရသေဟုပေတံ၊
သုဂတံ မဟာကဿက မာဘိဝန္ဒေ။
ဒေဝဂ္ဂေါ တိဒသပုရေ ဝရာသနေ ယော၊
ဒေဝါနံ ဇနိကပဘုတိနံ ဘိဓမ္မံ၊
ဗာလက္ကောဝ လဠယမာစလေ တိမာသံ၊
ဒေသေသျာ ပရဝိသယံ နမေ အဇေယျော။
မဟာယသော ဝိဝိဓသုဘပ္ပကာသကံ၊
ကုရူသု ယော အမိတဂုဏော တမောနုဒေါ၊
ပရပ္ပဝါဒဟရိ သုဘာနုယောဂိနံ၊
နမာမိ တံ ကထယိ သတိပ္ပဌာနကံ။
သမထကပလိကော သသ္နေဟသမ္မာသတိ၊
ပရမမတိဂိနီ သဝဋ္ဋိပရက္ကမော၊
သကလဇုတိကရော သုဓမ္မပဒီပကော၊
ဣမ မုပဇလိတော ဇိနေန နမာမဟံ။
ဝိဂတဂတမလံ မလဂတဝိဂတံ၊
မဟိတ ဟိတမနံ မနဟိတမဟိတံ၊
ဝိဘဝဘဝကရံ ကရဘဝဝိဘဝံ၊
သုဇန ဇနဂုဏံ ဂုဏဇနသုဇနံ။
သီလဂ္ဂဒဏ္ဍဝိစိတံ ¶ သုသမာဓိပတ္တံ၊
သောဘာသမုဇ္ဇလ မနန္တဂ ဉာဏသီခံ၊
သဒ္ဓမ္မသေဋ္ဌရတနဉ္စ တိလောကကေတုံ၊
ဝန္ဒာမိ လောစနဘိသေက သုသောဘယုတ္တံ။
ဝိနယနယ မနယဝိနယ မနမိတံ၊
ဝိဇယဇယ မဇယဝိဇယ မတုလိတံ၊
ဝိဘဇဘဇ မဘဇဝိဘဇ မနနကံ၊
ဝိသမသမ မသမဝိသမ မဘိနမေ။
ပရမရမ မရမပရမ မတိဂုဏံ၊
ပဂဟဂတိ မဂတိပဂတ မမမကံ၊
ပစယစယ မစယပပယ မနဏကံ၊
ပကတကတ မကတပကတ မစလကံ။
ဥဇုက မယနမဂ္ဂေ မောက္ခဒေသံ နိယာသိ၊
ဝရရထကုဇရေန စမ္မစက္ကေန သတ္ထာ၊
ဟိရိတပဒုကပါလမ္ဗေန ဓမ္မဿုတေန၊
သတိနိဝရယုတေန ပ္ပာဋိဟိရဒ္ဓဇေန။
အဝိဟနနက္ခိနာ သုယမ နေမုပက္ခရာ၊
ဥဒရိယမဗ္ဘိနာ ပရိပုရင်္ဂသစ္စိနာ၊
ကုသလဝိဘူသိနာ နိမဒကုပ္ပရေန ယော၊
အခရနတေသိနာ ဂုပိတသိလနန္ဒနာ။
အနုသနုဃာတိနာ မတိပုရေဇဝေန ကာလ-
ညုတမတိသာရိကေ န စ ဝိသာရဒတ္ထိဒဏ္ဍာ၊
သတိတုဒ ဓီတိရသ္မိ မနဒမ္မသိန္ဓဝေန၊
ဝိနယဂဏေ နမာမိ တ မတုလျသတ္ထဝါဟံ။
ယမက္ကဂ္ဂိဇာလံ ပရဝိသယ မစ္ဆေရသဟိတံ၊
ဒုဒိဋ္ဌန္ဓုဗ္ဗာဟံ ယုဂဂဟဏတိတ္ထီန မကရီ၊
ဗဟူနံ မဇ္ဈေ ယော ရတနကမနေ ပါဋိဟရိယံ၊
ဇယက္ကေတုဿာပိ တ မဘိနမိ ကဏ္ဋမ္ဗသမိပေ။
နခဇုတိရဇံ စက္ကင်္ဂေါပေတ ပါဒဝရမ္ဗုဇံ၊
သုဘသိရိမတော ရံသိဇာလင်္ဂုလိဒသသံသုဘိံ၊
ပဝရသိရသာ ဒေဝါဒေဝါ သဒါ န ပိလန္ဓယုံ၊
တ မတိဝ မနောရမ္မံ တိတ္တီကရာ နမိ ယဿ ကေ။
ဗုဒ္ဓါပျေကော ¶ နိဓနဂုဏိနော ဝဏ္ဏယေ ယာဝဇီဝံ၊
ကာမံ အညံ ကထမဘဏ မာသုံ ခိယေထာ ယုကပ္ပော၊
န တွေဝါ ယံ ခယ မုပဝဇ္ဇေ ယဿ ဝဏ္ဏော အနန္တော၊
တံ သဗ္ဗညုံ သကလရိရီ နေကနာထံ နမာမိ။
ပါဒိဒီပါဒံ ဒွိနယနဒိဇံ ဓမ္မကာယံ ဓိသောဏ္ဍံ၊
ဘာဏီသောဏ္ဍဂ္ဂံ သရဏသိရသိံ မဂ္ဂါဝါလံ သုဘင်္ဂံ၊
သီလာလင်္ကာရံ ဝိမလိဘဝု တံ သတ္တတိဋ္ဌိဓိဒဗ္ဗံ၊
နာထေဘိန္ဒဂ္ဂံ ဖလကရိဏုကံ မောက္ခဘောဇံ နမာမိ။
မလာလောဠုလ္လောလံ အတိဘယဇနံ ဒုဂ္ဂသံသာရသိန္ဒုံ၊
ဖိယဗ္ဘာနိဂ္ဂါဟော သိဝတဋမုခေါ နာဝိ ကဇ္ဇေဋ္ဌနာထော၊
ပဒပ္ပာရက္ကာမံ ဗဟုဇနဂဏံ ဧကမဂ္ဂတ္တရမှိ၊
သမာရောပေတွာ မတ္တရိ တ မတုလသာဒရဉ္စာ ဘိဝန္ဒေ။
ဗျာမံသုဂ္ဃနဓာရ မက္ကုဠုသတဗ္ဘာဏုဇ္ဇလန္တတ္တနံ၊
ဥက္ကံသဇ္ဇုတိ ကေတုမာလဝိစိတံ သဒ္ဓမ္မဇောတိန္ဓရံ၊
ဗုန္ဒိန္နိဂ္ဂတပဇ္ဇလန္တ ဒိဓိတိံ အဇ္ဇတ္ထနာ ယာဝ စ၊
ဝန္ဒေတံ မုနိ သကျပုင်္ဂဝ မဟံ ပုဏ္ဏိန္ဒုဝတ္တမ္ပိ စ။
သတ္တမံတမံ ဝိနာသကံသကံ ဒဒံ ဝိနေယျကာနမေဝ၊
ဘာဝနံဝနံ ဓုလီကရံ ကရံ တိဒုက္ကရံ ပဇာဘိဘုဉ္ဇ၊
ဂါရဝံရဝံ မနောဟရံဟရံ နရာနရာနယံ နမာမိ၊
သာဒရံဒရံ ဝိနောဒကံဒကံ ပဝဿကံ ပဇာနမိဝ။
ဗုဒ္ဓါ နိဂြောဓဗိမ္ဗော မုဒုကရစရဏော ဗြဟ္မဃောသေဏိဇင်္ဃော၊
ကောသစ္ဆာဒင်္ဂဇာတော ပုနရပိ သုဂတော သုပ္ပတိဋ္ဌိတပါဒေါ၊
မုဒေါဒါတုဏ္ဏလောမော အထမပိ သုဂတော ဗြဟ္မုဇုဂ္ဂတ္တဘာဝေါ၊
နီလက္ခီ ဒီဃပဏှီ သုခုမမလဆဝီ ထောမျရဿဂ္ဂသဂ္ဂီ။
စတ္တာလီသဂ္ဂဒန္တော သမကလပနဇော အန္တရံသပ္ပပီဏော၊
စက္ကေနင်္ကီတပါဒေါ အဝိရဠဒသနော မာရဇုဿင်္ခပါဒေါ၊
တိဋ္ဌန္တောနောမေန္တော ဘယကရမုဒုနာ ဇဏ္ဏုကာနာ မသန္တော၊
ဝဋ္ဋက္ခန္ဓော ဇိနော ဂေါတရုဏပခုမကော သီဟပုဗ္ဗဍ္ဎုကာယော။
သတ္တပ္ပီဏော စ ဒီဃင်္ဂုလံ မထ သုဂတော လောမကူပေကလောမော၊
သမ္ပန္နောဒါတဒါဌော ကနကသမတစော နီလမုဒ္ဓဂ္ဂလောမော၊
သမ္ဗုဒ္ဓါ ထူလဇိဝှော အထ သီဟဟနုကော ဇာလိကပ္ပာဒဟတ္ထော၊
နာထော ဥဏှီသသီသော ဣတိ ဂုဏသဟိတံ တံ မဟေသိံ နမာမိ။
ဝဋ္ဋစိတာနုပုဗ္ဗကသုဘင်္ဂုလီ ¶ ရုဟိရမဋ္ဌတုင်္ဂနခကော၊
နိဂ္ဂုဠဂေါပ္ဖကော သမပဒေါ သီဟောသဘိဘ ဟံသသန္နိဘကမော၊
ဒက္ခိဏတာဝတက္ကမိ သမန္တမဏ္ဍလ နိဂဏ္ဌိ ဇာဏုသုဘကော၊
ဗျဉ္ဇနပုဏ္ဏပေါသတနု နာဘိဂမ္ဘီရ အဆိဒ္ဒဒက္ခိဏဝဋော။
ဒွိရဒကရပ္ပကာသုရုဘုဇော သုဝိဗ္ဘဇနုပုဗ္ဗမဋ္ဌအနုနာ-
နုနအလိနာနုပုဗ္ဗရုစိရ တ္တိလာဒိရဟိတဗ္ဗိသုဒ္ဓတနုကော၊
ဒသသတကောဋိ ဟတ္ထိဗလဓာရဏော ကနကတုင်္ဂနာသိကသုဘော၊
သုရုဟိရဒန္တမံသထ သုစိသိနိဒ္ဓဒသနော ထ လောကသရဏော။
သုဒ္ဓပသာဒိန္ဒြိ စ ဝဋ္ဋတရဒါဌော ရုဟိရောဋ္ဌ စ သုရနရနာထော၊
အာယတသောဘဗ္ဗဒနော ထ မုနိ ဂမ္ဘီရုဇုကာယတသုရုစိရလေခေါ၊
ဗျာမပဘာမဏ္ဍလဗုန္ဒိ သုပုရဂ္ဂဏ္ဏိ စ အာယတဝိသဋသုဘက္ခီ၊
ပဉ္စပသာဒက္ခိ စ ကုဉ္စိကသုဘဂ္ဂပခုမော မုဒုတနုရုဏဇိဝှော။
သောမ္မသိနိဒ္ဓ တျုဇ္ဇလကောမလ ဝရုဏဝိမလတနု စ အမိတဂုဏော၊
ကောမလ ဒက္ခိဏာဝဋ အဉ္ဇနဘိဒသရိသနိလက မုဒုတနုရုဟော၊
ဒက္ခိဏဝဋ္ဋကောမလ သဏုသမသုနိလ အလုလိတ သိရရုဟိ ဇိနော၊
သောဘဏသဏ္ဌာနော ထ သိနိဒ္ဓသိရရုဟိ စ သုပစိတသတကုသလ ဇော။
နိဂ္ဂုဠောနိဂ္ဂန္တိစ္ဆတ္တဿရိသအတိသုဘဂသိရ စာယတာရုစိ ကဏ္ဏကော၊
သောသဏ္ဌာနဿဏှာဟာရာနုကမပဟုတဘမုထ သုအာယတဗ္ဘမုကော စ သော၊
သုဂ္ဂန္ဓဂ္ဂတ္တော မုဒ္ဓိစာထ ဝဒနိ စ ပုထုလကနလာဋ အာယတသောဘဏော၊
အဿာသပ္ပဿာသာတိဿဏု ဓရမသမသမ နမိ ကေတုမာလဝိစိတ္တကံ။
ဗုဒ္ဓုပ္ပာဒေါ ကိမင်္ဂံ အတိဒုလဘတရံ ဃောသမတ္တမ္ပိ လောကေ၊
တသ္မာ နာနပ္ပကာရံ သပရဟိတသုခံ ဝိဒ္ဓသူ ပတ္ထယန္တာ၊
ယာတိဋ္ဌတ္ထာဝ ဟံ တံ သုရနရသရဏံ အန္တရာယပ္ပဟာနံ၊
ပုညက္ခေတ္တေကဘူတံ သုဂတမဝိရတံ သာဓု ဝန္ဒန္တု သန္တော။
ခေတ္တဝရင်္ဂတတ္ထုတိပုရေ ဇဝပဏမ တေဇသာ ဣဓ ဘဝေ၊
ရောဂဘယာဒျုပဒ္ဒဝဟတော အနုနသုခ ဘောဂပုညမတိကော၊
ဒေဝမနုဿဘောဂပဝရံ ပရတ္ထနုဘာဝဉ္စ အန္တိမဘဝေ၊
အညတရော တိဗောဓိပဝရေ ဘဝိဿတိ ယထာသယံ ကတနတော။
ပုညေနာနေန ¶ သောဟံ နိပုဏဇဝမတိ ပေမဝါစော သခီလော၊
သဒ္ဓါ ကလျာဏမိတ္တောတိသရဏဂမနော သီလဝါ စာဂယောဂေါ၊
ဟိရောတ္တပ္ပီ သုဒက္ခော အဝိတသုစရိတော ဓိတိမာ သစ္စဘာဏီ၊
ဗာဟုဿစ္စိ ဝိဘာဂိ သပရဟိတကရော ဝဂ္ဂုရာဝေါ ဘိရုပေါ။
ဒီဃဇ္ဇီဝိ နိရောဂေါ သုစိကုလပဿုတော ဓမ္မရတ္တော ဝိရတ္တော၊
နိစ္စာပလျော ကတညု အတိမုဒုဇုမနော သာဓုဘာဝါဒိဝိညူ၊
ဓမ္မာဇီဝေါ ဘဝေယျံ ဗဟုကုသလရတော အပ္ပကောဓော အလုဒ္ဓါ၊
ဧဝဉ္စညံ ကရေယျံ ပဏိဓိ စရိမကေ မောက္ခနိဗ္ဗာနဘာဂီ။
(၁) မဟာကထံ ဗုဒ္ဓဃောသော၊ တနုမေဝ ကရံအပိ၊
စဇံ ဟေယျာ ဒိယာ ဒေယျံ၊ အကရိတ္ထ ယထာ တထာ။
(၂) မဟာပဏာမပေါရာဏံ၊ ကိဉ္စိ ဧဝ ပုနပ္ပုနံ၊
ကာမောက္ကမံ ဒုဓာရဉ္စ၊ စဇံ ဒေယျာ ဒိယညတ္ထ။
(၃) သုတဇ္ဇယ အနုဘဝ-ဋ္ဌပနတ္ထေန လဉ္ဆိနာ၊
သုတေန ဂရုနာနေန၊ ကတောယံ ပဏာမော နဝေါ။
(၄) ဧကက္ခရာယ ဂါထာယော၊ ယာဝ ဆဗ္ဗိသတက္ခရာ၊
ဇာတိယ ပဇ္ဇသတ္တတျာ၊ သင်္ခတော စတုရာဓိကာ။
(၅) အဋ္ဌာဓိကာ သဟေဝုယျော- ဇနာဒီဟိ မိဒံ နတံ၊
ယထာဝုတ္တတ္ထကာ ကာမာ၊ ယေ နိစ္စံ ဓာရယန္တု တေ။
ရာဇာတိရာဇာတိမနောဟရော ယော၊
ဒေဝါတိဒေဝါတိဂုဏောဃဓာရီ၊
ဗြဟ္မာတိဗြဟ္မာတိဘဝန္တဂူ တံ၊
သင်္ဃာတိသင်္ဃာတိဝိရာဝ ဝန္ဒေ။
အနင်္ဂနင်္ဂံ နရဒေဝဒေဝံ၊
အနိဉ္ဇနိဉ္ဇံ ဘယတာဏတာဏံ၊
အနဏ္ဍနဏ္ဍဉ္စ အနာထနာထံ၊
ခယန္တယန္တံ ပဏမာမိ မာမိ။
တမ္ဗသိနိဒ္ဓတုင်္ဂနခကော နုံဝဋ္ဋသုစိတုရင်္ဂုလိ စ မုနိသော၊
သီဟုသဘောဘဟံသသမဂေါ နိဂူဠသမ ဂေါပ္ဖကာယတမုခေါ၊
ကောမလဒက္ခာဏာဝဋတနုရုဟော သုစိမလုဇ္ဇလာဘသရိရော၊
ပဉ္စပသာဒယုတ္တနယနော သုဂန္ဓမုခတုင်္ဂနာသိကယုတော။
ကောဋိသဟဿနာဂဗလိကော ¶ သုရတ္တမဓရော သုဝဋ္ဋဒသနော၊
အာယတသဏုလောမဘမူကော မုဒုတ္တနုကရတ္တ ဇိဝှသဟိတော၊
ဆတ္တသမာနသောဘဏသိရော သုကေသဝရ ကေတုမာလဝိစိတော၊
ဣစ္စနုဗျဉ္ဇနေဘိ သဟိတံ မုနိန္ဒပဝရံ နမာမိ သိရသာ။
သကလမလေဟိ သော မုနိ သုဒူရတာယ စ မလာရိနိံ ဟတတယာ၊
တိဘဝရထေ သမာနိတမနာရကာနိ စ နမာလယော နရဝရော၊
မလကရဏေ ရဟာရဟ မနန္တဉေယျ မဘိဇာနနာ မုနိ တထာ၊
စရဏယုတော တိဝိဇ္ဇိ စ သုဝါစတာ သုဂမနာ ဇနေသု သုဂတော။
လောကဝိဒူ သော နိတလောကတယတာ သာကလတော အသမနရဒမာ သော၊
သာရထိ ဇိနော အနုသာသနကရော သတ္ထဝဟော ဒုပထတရဏသတ္တာ၊
ဗုဇ္ဈတိ သာမံ စတုသစ္စမခိလံ ဗောဓယိ ဇန္တုဂဏမိတိ စ ဗုဒ္ဓါ၊
ဘာကရအာဘာဖုဋပင်္ကဇသမော မဂ္ဂိယဉာဏဖုဝိကသိတော စ။
ဘဂ္ဂကိလေသော သော ဘဂဝါ တိဘဝ ဝမိတ ဂမန သုဇန ဘဇနတော၊
သော ဘဇိ သဒ္ဓမ္မေ ပဝိဘတ္တ သရသ ဆဘဂယုတ ဂရုကရဏိယတော၊
သတ္တနိကာယေ ကေနပိတုလျဂုဏမပမိတ သိရိဃံနဇုတိသုသုဘံ၊
ဒေဝနရာနံ ဧကပတိဋ္ဌ မဝိတထုတိယသ မသကိ မဘံနမေ။
ဗုဒ္ဓုပ္ပာဒေါ ကိမ္မင်္ဂံ ဘော အတိဒုလဘတရမိဓ ဘဝေ သုဃောသ မပါပရော၊
တသ္မာ ပတ္ထေန္တာ သဗ္ဗညုံ ဝိဝိဓဟိတသုခ မနဓိကံ နမန္တု စ သာဓဝေါ၊
ပုညေနာနေနေတေ ဒိဋ္ဌေ ဘယအဃံပီဠနဋ္ဌ ဝိရဟိတာ ပရတ္ထ စုဘော သုဘေ၊
ဘုတွာနန္တေ ဝေ ဟေဿန္တေ အဝိကလသုခသိရိမတိကာ အနုတ္တရ ဘာဂိနော။
သော စက္ကောပေတပါဒေါ မုဒုဘုဇစရဏော သုပ္ပတိဋ္ဌိတပါဒေါ၊
ဧဏီဇင်္ဃော စ ဗုဒ္ဓါ ကနကနိဘတစော အာယတပဏှိ နာထော၊
ကောသောနဒ္ဓင်္ဂဇာတော အတိသုဓုမဆဝီ ဇာလိကပ္ပာနဟေဋ္ဌာ၊
ဥဿင်္ခပါဒယုတ္တော အဘိနိလနယနော အာယတင်္ဂုလိယောဂေါ။
ဌိတော ¶ ခေါ နော နမန္တော ကိရုဘယပုထုနာဇာဏုယော အာမသန္တော၊
လောမကူပေကေကလောမော သမတလဒသနော အဉ္ဇနုဒ္ဓဂ္ဂလောမော၊
ဗြဟ္မဒ္ဒေဟုဇ္ဇုဂတ္တော အဝိရဠမုခတော သတ္တကင်္ဂုဿဒေါ သော၊
နိဂြောဓပ္ပာရိဗိမ္ဗော မိဂပတိဟနုကော သီဟပုဗ္ဗဍ္ဎကာယော။
ပုဏ္ဏတ္တာလီသဒန္တော သုပဟုတရသနော သောဘဏောဒါတဒါဌော၊
သဏှောဒါတုဏ္ဏလောမော သမဝဋလဂလော အန္တရံသပိဏော သော၊
ဗြဟ္မဂ္ဃောသော မုနိန္ဒော ပုနပိ ဂုပခုမော ဥဏှိသသမ္ဖုလ္လသီသော၊
ဗာတ္တိံသင်္ဂေါပသောဘံ မုဒုရသဟဏီ လောကဇေဋ္ဌံ နမေ တံ။
မဟာပဏာမ နိဋ္ဌိတာ။