📜
တိဂုမ္ဗစေတိယ ထောမနာ
နမော တဿ ဘဂဝတော အရဟတော သမ္မာသမ္ဗုဒ္ဓဿ
ယော ¶ ဒီပင်္ကရမူလမှိ၊ ပဒံ ဟတ္တဂတံ စဇိ၊
သမ္မာသမ္ဗောဓိ မာကင်္ခံ၊ ဝန္ဒေ တဿ သိရောရုဟံ။
(ပထျာဝတ္တဂါထာ)။
ပူရေတွာ ဗောဓိသမ္ဘာရ-မဟေသံ ယော အနုတ္တရံ၊
အလတ္ထ ဗုဒ္ဓတ္တံ တဿ၊ ကေသဓာတုဝရံ နမေ။
(ပထျာဝတ္တဂါထာ)။
လဒ္ဓါ ဗုဒ္ဓတ္တံ ဆဌာန-မတိက္ကမ္မ ပဝေဒယိ၊
ဝိမုတ္တိံ ရာဇာယတနေ၊ တဿ ကေသဝရံ နမေ။
(ရကာရ ဘကာရဝိပုလာ ပထျာဝတ္တဂါထာ)။
တတ္ထ သက္ကဒတ္တိယမ္ပိ၊ နာဂလတံ ဟရီတကံ၊
အနောတတ္တောဒကံ ဘုဉ္ဇိ၊ ဝန္ဒေ တဿ သိရောရုဟံ။
(ရကာရဝိပုလာ ပထျာဝတ္တဂါထာ)။
တဒါ ¶ မုဂ္ဂသေလပတ္တံ၊ မဟာရာဇူဟိ ဒိန္နကံ၊
တထာဂတော ပဋိဂ္ဂဏှိ၊ ဝန္ဒာမိ တဿ သီသဇံ။
(ရကာရဝိပုလာ ပထျာဝတ္တဂါထာ)။
တဒါ ဒွိန္နံ ဒွေဘာတိက-ဇနေဟိ မဓုပိဏ္ဍိကံ၊
ပရိဘုဉ္ဇေသိ မန္ထမ္ပိ၊ တဿ သီသသိရိံ နမေ။
(တကာရဝိပုလာ ပထျာဝတ္တဂါထာ)။
ယော တပုဿဘလ္လိကာနံ၊ တဒါ ဒွိသရဏံ အဒါ၊
လောကမှိ သဗ္ဗပဌမံ၊ တဿ သီရိဝဟံ နမေ။
(ရကာရ နကာရ ဝိပုလာပထျာဝတ္တဂါထာ)။
တဒါ ¶ တတ္ထုပဋ္ဌကာနံ၊ တေသံ ကေသေ အဒါ အဌ၊
လောကဟိတ မပေက္ခန္တော၊ နာထော ယော တဿ တေ နမေ။
(ရကာရဝိပုလာ ပထျာဝတ္တဂါထာ)။
တေပိ တံ အာဟာရိတွာန၊ ပေါက္ခရဗ္ဗတိယံ ကရုံ၊
သဇီဝကေသ စေတိယံ၊ နမေတံ သဗ္ဗပုဗ္ဗကံ။
(မကာရဝိပုလာ ပထျာဝတ္တဂါထာ)။
ဥပေါသထုပေါသထမှိ၊ မုဉ္စန္တံ နီလရသ္မိယော၊
ဘဂဝါဝ လောကအတ္ထံ၊ ကရောန္တံ တံ သဒါ နမေ။
(ရကာရဝိပုလာ ပထျာဝတ္တဂါထာ)။
စူဠာမဏိဒုဿစေတျံ ¶ ၊ ကာလမှိ ဗောဓိသတ္တကေ၊
ဗုဒ္ဓကာလေ ဣဒံ သဗ္ဗ-ပဌမံ တံ နမာမဟံ။
(ရကာရဝိပုလာ ပထျာဝတ္တဂါထာ)။
နမာမဟံ ဝန္ဒာမဟံ၊ ပူဇေမဟံ သိရောရုဟံ၊
ပုညမိဒံ ဘဝတု မေ၊ ပစ္စယော အာသဝက္ခယေ။
(တကာရ နကာရဝိပုလာ ပထျာဝတ္တဂါထာ)။
တိဂုမ္ဗစေတိယထောမနာ နိဋ္ဌိတာ။