📜
ဝါသမာလိနီကျ
နမော တဿ ဘဂဝတော အရဟတော သမ္မာသမ္ဗုဒ္ဓဿ
ဝုဍ္ဎောပိ ¶ ဇိနာနံ၊ ဗုဒ္ဓါသိ ဝိဇာနံ၊
ပုဗ္ဗောဒိတိ မာဟံ၊ ကုဗ္ဗောမိ ဝိမာနံ။
(တနုမဇ္ဈာဂါထာ)
မဟာသမတကူလံ၊ နရာပဝရပူဇံ၊
ဇဟာ အဘယပူရံ၊ နမာ ကနကရူပံ။
(ကုမာရလလိတာဂါထာ)
နရာသဘသုဗုဒ္ဓံ ¶ ၊ ပဇာမတနုရုတ္တံ၊
ဒယာကရမုဒုတ္တံ၊ နမာမ ဟ ဥသုက္ကံ။
(ကုမာရလလိတာဂါထာ)
ဟိတံ ဝဟသုသီလော၊ ပမောဒတိ သုခတ္တေ၊
နမေ တမပဗုဒ္ဓံ၊ ဇိနံ ဂတသုခန္တံ။
(ကုမာရလလိတာဂါထာ)
ဗန္ဓု စ သန္တကိလေသော၊ ယော ပိတဝဏ္ဏပဘာသော၊
ဂေါတမဂေါတ္တသုညတော၊ တဿ နမော နရသီဟော။
(စိတြပဒါဂါထာ)
ဗုဒ္ဓံ ¶ သုဒ္ဓံ လောကေသီတံ၊ ဥက္ကံ ယုတ္တံ ယောဂေ ဟံ၊
ဝန္တာတီတံ ဩဃေ သီဒံ၊ ဝန္ဒာပီဟံ သောကေဟီဟံ။
(ဝိဇ္ဇုမ္မာလာဂါထာ)
ဘောဂဝတီ ယောပခမီ၊ သီတဒယာ လောကသခါ၊
ဓာတုတယေ ကိတ္တိ သ ဝေ၊ ဒါတု ဇယေ-တဿ စ မေ၊
(မာဏဝကဂါထာ)
မာနိတော လုခေါ ရုတောထ၊ သန္နိဘော သုဘော သုခေါ စ၊
ဇာနိတော ဓရော နမော စ၊ တဿ ယော ထုတော ဂုဏောဝ။
(သမာနိကာဂါထာ)
ဇယံ ¶ ဓဇံ ပဇာပုဂေ၊ ဌိတံ လိလံ မဟာသုခေ၊
သုဘံ ဖုဋံ ပဘံ နမေ၊ ဟိတံ သုခံ ဒဒါတု မေ။
(ပမာဏိကာဂါထာ)
ပုဏ္ဏပုညဇနိတသုဘံ၊ ဇာတိဉာတိထုတိယဂုဏံ၊
ဘေဒဝေရဝိမလဇိနံ၊ ဉာဏပါဒစရဏ-မဟံ။
(ဟလမုခီဂါထာ)
သတိ မတိ သုစိ ယော-ဘာသော၊ ထုတိ မုနိ သုခိတော ကာယော၊
မနုဇပုမသုတော နာထော၊ ဇယဝရ မု-သဘော ဒါတော။
(ဘုဇဂသုသုဂါထာ)
ယော ¶ ဗုဒ္ဓါ ပဝရော လိလော ပုဂေ၊
လောကုတ္တော အဘယော ဌိတော သုခေ၊
ဥတ္တိဏ္ဏံ နိသဘံ ဟိတံ ဝဟေ၊
မောနိန္ဒံ ဝိမလံ ဇိနံ နမေ။
(သုဒ္ဓဝိရာဇိတဂါထာ)
ဒေဝိန္ဒံ ဝရဂဏထေရိန္ဒံ၊
နိဋ္ဌာနံ ဘဝဇနနိဗ္ဗာနံ၊
နိဒ္ဒေါသံ ရဏရဇနိပ္ဖောဋံ၊
ဝန္ဒေ-ဟံ သုဘမုခသောဏ္ဏေမံ။
(ပဏဝဂါထာ)
ဂေါတမဂေါတ္တေ ¶ ကေတုဝ ဉာတံ၊
လောကဇခေတ္တေ မေရုဝ ဇာတံ၊
ထန္ဒိလဇေဋ္ဌေ ဘေဒိတမာရံ၊
ပဏ္ဍိတမဇ္ဈေ မေဓိဝ ဘာဏံ၊
မန္တိယ ဝန္ဒေ သေဝိတနာထံ။
(ရုမ္မဝတီဂါထာ)
ဗုဒ္ဓါ သုက္ကော အမိတဂုဏီသော၊
ယုတ္တော မုတ္တော သသိဝ တိမီတော၊
ခေ ယော တေဇော တပသိဝ အက္ကော၊
ဖေလော ထေတော တဝ နမကာရော။
(မတ္တာဂါထာ)
ယော ¶ ဇိတမာရေ ဝေ အဇိ သဗ္ဗံ၊
ထော မိတသာရေ ဟေ-ဓိတပတ္တံ၊
သံသိတပုဏ္ဏော သော နမိ တဿ၊
ပဏ္ဍိတဖုလ္လော သော မတိကဿ။
(စမ္ပကမာလာဂါထာ)
ကနကရူပ ¶ မူပမေယျကံ၊
ပဝရသူရ ပူဇသေဝတံ၊
ကမလဘူမ ဓူရဒေသကံ၊
နရမရူပ ရူ နမေ တ-ဟံ။
(မနောရမာဂါထာ)
ဒေဝေ ဂတေ ဒွေဝါရာ ဂမာသိ၊
သေလေ စလေ ယေ ဉာတာ ပစာယိ၊
ဥဒ္ဓံ တလေ တေဝါသံ အကာသိ၊
ဗုဒ္ဓံ မတေ ဧသာဟံ နမာမိ။
(ဥဗ္ဘာသကန္တဂါထာ)
ဥက္ကေ သုနုတံ ပုထုကဉ္စ ထေရံ၊
ဝုတ္တေ သုခုမံ ဥဇုကံ တထေတံ၊
ဒိဗ္ဗေ ပဋိမံ ကိရိယံ ဝဒေတံ၊
ဣဒ္ဓေ မဟိတံ ကထိတံ နမေဟံ။
(ဥပဋ္ဌိတဂါထာ)
၂၀။ ဒိဗ္ဗဿ ¶ ပူရေ ပဝရေဟိ ဂုတ္တော၊
သိဒ္ဓတ္ထ ဘူတေ နဂရေဟိ ဝုဋ္ဌော၊
သင်္ကဿ ပူရေ မ-ဂဏေဟိ ဗုဒ္ဓါ၊
အညတ္ထ ပူဇေ ပနမေ နိ ကုဗ္ဗော။
(ဣန္ဒဝဇိရာဂါထာ)
သုဘံ ထုတံ ယော ရဇတံ ဗလတ္ထံ၊
ယုဂံ ဟုတံ သော ကနကံ ကမတ္ထံ၊
စိတံ ဌိတံ လောဟိတကံ မနာပံ၊
လိလံ ဣတံ သောရစိ တံ နမာဟံ။
(ဥပေန္ဒဝဇိရာဂါထာ)
ပိနိတံ ¶ ဝိဏံ သခိလံ ယဇိ တံ၊
သုသုခံ ဓုဇံ ဗိလုဝံ နိယုတံ၊
ဌပိယံ သိမံ ထုနုတံ ပုထုလံ၊
နမိ ဟံ ခိဏံ သုခုမံ မုဒုကံ။
(သုမုခီဂါထာ)
သောဂတိ ¶ ဗောဓယိံ ဂါဟိယ ပတ္တံ၊
ဩတရိ သောနမိ ဇာနိတ အတ္ထံ၊
ဘူပတိ ပူဇယိ သာကိယ ဝံသံ၊
သူဇဓိ ဦပဓိ ဘာသိတ ဓမ္မံ။
(ဒေါဓကဂါထာ)
စတ္တာရော-မေ ယာစိတေ သော ပဝုတ္ထေ၊
လဒ္ဓါ ဘောဂေ ကာမိတေ ဩဃမုတ္တေ၊
ကတ္တာ တောသေ-တံ နမေ စောလယုတ္တေ၊
တတ္ထာ-လောကေ တံပတေ ခေါ ပဒုက္ကေ။
(သာလိနီဂါထာ)
သတ္တာ-လောကော ¶ သရိတော ယော ဓဇုက္ကံ၊
တတ္ထာ-ဂေါပေါ ရစိယော-နောဇ-မုဒ္ဓံ၊
ဘဒ္ဒါ-သောကော-ပစိတော-ဘော ပဗုဒ္ဓံ၊
သဒ္ဓါယောဂေါ ဘဇိ သော-ဟော-နမုစ္စံ။
(ဝါတောမ္ပီဂါထာ)
ဉာတမရူနံ ဥပရိ ဌိတာနံ၊
ဝါလပသူကံ ဟုဝတိ ဇိနာနံ၊
ဒေဝသုယာမော ဇိနမိတိ ဉာတော၊
တေန သုခါ-ဘော ဝိနမိ ဣဒါ သော။
(သိရီဂါထာ)
ပုဏ္ဏကေန ¶ ကုသုမေန သေဝတံ၊
ကုဉ္ဇရေဝ ထုနုတေန ခေ ဂတံ၊
သုန္ဒရေန နမိ တေန မေ ဇယံ၊
ပုညတေဇကရိ-ဓေသ ဝေ ဒဒံ။
(ရထောဒ္ဓတာဂါထာ)
မာတု အာယု ခိဏု-ကေ ဣဟ ပုဗ္ဗေ၊
တာသု သာဓု ဝိသုတေ-ဒိသကုစ္စေ၊
ဝါတ တာလ ခစိတေနိ-ဓ သောဏ္ဏေ၊
‘‘တာတ တာတ’’ ယဇိ တေ-တိသ ဝန္ဒေ။
(သွာဂတဂါထာ)
ဥပရိ ¶ ကမလယောနိ သောဘိတံ၊
ဇုဟတိ ဓဝလဇောတိ-ဒေါသိတံ၊
သုကရိ ယ-မတဗောဓိ-မောစိတံ၊
သုနမိ စရဏလောကိ-ဓော-ရိမံ။
(ဘဒ္ဒိကာဂါထာ)
ဝနေ ¶ ဇိနော ယော ဝိနယံ သုပေက္ခိ-မံ၊
မတေ ဌိတော-ဘော ဒိဇကံ ဒုဗဇ္ဇိတံ၊
အဃေ-နိဓော ခေါဘိ-တရံ မုနေ-စ္ဆိ-ဒံ၊
နမေ-ဘိတော ဗောဓိမဟံ လုခ-ဇ္ဈိတံ။
(ဝံသဋ္ဌဂါထာ)
ယော ဇာတိ-ဒေါမာနီ-မုပါသိ လမ္ဗိ တံ၊
ကောဓေဟိ လောကေဟိ ဒုဘာသိ ပဏ္ဍိတံ၊
ပူရေပိ မူလေပိ ပဟာသိ ဒိဋ္ဌိကံ၊
သဗ္ဗေဟိ ပတ္တေဟိ နမာမိ ဣစ္ဆိတံ။
(ဣန္ဒဝံသာဂါထာ)
ဝေရဉ္ဇကေ ¶ ပူရဝရေ ဝိဘူသိတေ၊
နေလဉ္ဇနေ ဒူမဝနေ ဝိကူဇိတေ၊
ခေမင်္ကရေ ထူလတရေ ဝိဒူ သိတေ၊
ဧတ-င်္ဂမေ ပူန နမေ ဝိရူပိ ဝေ။
(ဣန္ဒဝံသာဂါထာ)
အဓုနာပိ သ သာရိသုတော နိမလံ၊
တမုပါသိ မတာပိ ကုတော စိ နယံ၊
ကရုဏာယိ ဓ ယာစိ ဗုဓော ဝိနယံ၊
ဂရုကာပိ နမာမိ သု-ယော ဇိတ-ဟံ။
(တောဋကဂါထာ)
ဇနဝရော ¶ မုနိ သော သရိတော ဝနေ၊
ဝသဘတော ဥဒိတော-ပရိ ဂေါတမေ၊
ဂမနသော ဂုဏိကော ဂမိ-တော နမေ၊
နဂရ-ဒေါ ဇုတိ-မော ဃတိတော-သထေ။
(ဒုတဝိလမ္ဗိတဂါထာ)
ဘဂဝတိ ¶ ကုဋိဂါရေ ယော နိသိန္နေ၊
ဓနဝတိ သုဝိသာလေ-ကော ဣသိန္ဒေ၊
ယ-မလဘိ မုနိ လာဘေ မောလိဆိန္နေ၊
သ ပနမိ ဇုတိ-မာသေ-တော ကိလိန္နေ။
(ပုဋဂါထာ)
ပဌပိတ-မိစ္စဿ သိဒတု သဗ္ဗံ၊
ပဌမိ-ဓ သိက္ခဿ ဟိတသုခတ္ထံ၊
ပဝဒိယ ဂိဒ္ဓဿ ခိဏလုခတ္ထံ၊
ပနမိ စ ကိစ္စဿ သိခမုကပ္ပံ။
(ကုသုမဝိစိတ္တာဂါထာ)
နိလောဘာသိ ¶ ဓူမေဟိ ယု-စ္စော ဝိလာသေ၊
ဌိတော စာ-ဘိ ဘူ တေဟိ ရုက္ခော-ဒိဂါဟေ၊
ယိ-တော တာနိ ပူရေပိ လုဒ္ဓါ ဒွိဝါရေ၊
ဇိနော-ကာသိ ပူဇေမိ ဗုဒ္ဓါ ဟိတာ-သေ။
(ဘုဇင်္ဂပ္ပယာတဂါထာ)
ဇနရမေ ¶ ဒသသရေ ဝိသာလကေ၊
မုနိဝရေ ကုဋိဃရေ-ရိယာပထေ၊
ဓုတတရေ-သုဘကထေ စဇိ သ ဝေ၊
တတိယကေ-တ-မိဓ ဝေ ဌပိ နမေ။
(ပိယံဝဒါဂါထာ)
ဝေသာလိကေ တု ဝသိ ကာတု စာတုကံ၊
တေ ဉာဟိ တေသု လဘိ-ဓာ-မုကာ-မုကံ၊
နေဂါမိကေသု ဘဇိ ဖာသု သာ-ယုကံ၊
ဧတာ-ဓိကေသု နမိ-ကာသု-ဒါ-တုလံ။
(လလိတာဂါထာ)
ဝဒိ ¶ သုပ္ပိယော ဒုဝစနံ တမတော၊
သဟိ မုတ္တိကော ဂုဏကထံ တထတော၊
ဂမိ မာဏဝေါ ဒုရပထံ စရတော၊
နမိ သာဓဝေါ ဗုဓဝရံ ပရသော။
(ပမိတက္ခရာဂါထာ)
ယု-ပဂမိ ဝိမလော သခိလော တဒါ၊
ယုဝဝတိ-ပိဝနော ရမိ ယော ဗြဟ္မာ၊
ဧကသယိ ¶ ဌိတတော ကထိ ခေါ ဂုဏေ၊
ဧသ နမိ ဇိန-မော ပဓိ-ဒေါ-ဇုကေ။
(ဥဇ္ဇလာဂါထာ)
ဇာနံ သဗ္ဗေသံ ဒေသိ ယော ခေါ-ဓိမုတ္တံ၊
အာနန္ဒတ္ထေရံ ဝေဒိတော စောဠိသုတ္တံ၊
ကာယဿမ္မုခေ ကာတုနော-လောကိယံ-သေ၊
ဌာန-ဿ-ပ္ပုဂေ ကာရုဏော ဟောတိ ဝန္ဒေ။
(ဝေဿဒေဝီ ဂါထာ)
သုကထိယ ¶ မဇ္ဈိမသီလ-မပရံ၊
ယု-ပစိတ-မေတ္ထိ-ဓ စီရ-မနယံ၊
ဗုဓယိ စ ဘဇ္ဇိတ-မီဏဝတရံ၊
သုနမိ ပဝဇ္ဇိတ-မီဟ-မမလံ။
(တာမရသဂါထာ)
မဟကဉှိ သီလမ္ပိ အဘာသိ ကန္တေ၊
ဗြဟ္မထန္ဒိလီ မမှိ မနာပိ ရမ္မေ၊
စလကမ္ပိ ဂီရမ္ပိ ကဒါစိ အမ္ဗေ၊
ဝရပဏ္ဍိ ခီဏမ္ပိ နမာမိ တံ ဝေ။
(ကမလာဂါထာ)
မောဟန္တေ ¶ ဇိနိ ပဌမေ ဇယေ ဇိတာယံ၊
သောရမ္မေ ဣသိပတနေ ဝနေ နိဝါသံ။
ခေါဘန္တေ ကိရိ သကလေ ဝဒေ ဝိလာသံ၊
ဃောရံဝေ ဝိနိဒမနေ နမေ ဇိနာ-ဟံ။
(ပဟာသိနီဂါထာ)
ဒိဝါရကံ ဗဇနဂရံ ဖိတံ ဝသေ၊
နိသာယ တံ ဇနဂဏနံ ဌိတံ မတေ၊
ဝိဇာနကံ တမဇဋကံ သိတံ ဝနေ၊
ဟိတာဝဟံ နရပဝရံ ဣမံ နမေ။
(ရုစိရဂါထာ)
ရစိတ-မဝိရလံ ¶ မနုဿ မထာ ပဏံ၊
ပသိယ တတိယကံ စတုတ္ထ မကာ သယံ၊
ကရိတ-မဓိကတံ အခုဗ္ဘမလာ သဘံ၊
ဇဟိတဂတိပရံ ပနုဇ္ဇ နမာမ-ဟံ။
(ပရာဇိတာဂါထာ)
နဂရ-မဇယ-မေသ နိဝသိ ထ ပရေ၊
မဟတိ သ မဏိကေ သကုဏကုဇဝနေ၊
ယပတိ ဝသတိ ဝေ ဟိတသိဝဝဟနေ၊
သုရတ မုဘယမေ-သိတ မိမ ပနမေ။
(ပဟရဏကလိကာဂါထာ)
ဆဋ္ဌံ ¶ ဝသေ အထု-ဒ တတ္ထ ဝနေ မုနေ သံ၊
သဗ္ဗံ ဓရေ မကုလပဗ္ဗတကေ ဥပေဒံ၊
စတ္တံ မလေ မနုဇ မတ္ထဝသေ သုဒေသံ၊
ဘတ္တံ နမေ လဟုက မပ္ပ မရေ ဓုနေ တံ။
(ဝသန္တတိလကဂါထာ)
နုန ¶ ဥပဝသတိ ဣဓ ထ ပုန ပရိမေ၊
သုခဂုဏမဟတိ တိဒသပုရ အဇိတေ၊
ယုဂနုတ မဝဒိ ဝိတထ မုဃတရိ ဝေ၊
ဟုတထုန မနမိ သိမဒ တုလ မရိယေ။
(သသိကလာဂါထာ)
ဇိနပတိ သုသုမာရံ ဘေသကလ္လာဝနေ-သံ၊
နိဝသတိ ပုထုဉာဏံ ခွေ-သ နန္ဒာလယေ-တံ၊
ဝိမလ-မိ ဓု-ဇုကာယံ ဘေဒသန္တာပ-သေသံ၊
ဝိဇဟ-ပိ သုခုမာလံ ဧသမန္တာ နမေ-ဟံ။
(မာလိနီဂါထာ)
မဟတိ ¶ သုကန္တိယေ အထ စ တတ္ထ သီတလေ၊
ဝသတိ ကုသမ္ဗိယေ နဝမဝဿ-ပီ-တရေ၊
အဝဟိ သုခ-န္တိမေ ပဇဟ-မတ္ထ-မီ-ဓ ဝေ၊
ပနမိ နုဒံ ဟိနေ သကလသတ္ထဝသယေ။
(ပဘဒ္ဒကဂါထာ)
ယုဓဝတိ ပါလိလေယျက ဝနေ ပဟာယ နာဂေ၊
ဥပဌဟိ နာဂိ-ဓေ-သ ဒသမေ ဇဟာယ ဗာလေ၊
သုခဝသိ ကာယိကေ စ မနကေ တဒါသ သာတေ၊
ယုတ-မဓိ ဝါဟိတေ စ ပနမေ ပယာတ မာရေ။
(ဝါဏိနီဂါထာ)
ဣတော ¶ ပတ္တေ နာဠေ ဝသတိ ဒိဇဂါမေပိ ဒသမေ၊
ဟိတောပတ္ထေနာ-ယေက အဓိကိ-ဓ ဝါဒေဟိ ဝဒကေ၊
ဝိလောမတ္ထေဟာ-နေက-သဟိ ဌိတ-မာဃေပိ သမယေ၊
ဝိယောဂတ္ထေ-တာ-နေဇ-မပိ ပိဟဝါသေဟိ ပနမေ။
(သိခရဏီဂါထာ)
ဒွိအဓိကိ-တရေ ¶ ဝေရဉ္ဇာယံ တတော ဒသမံ ပရေ၊
နိဝသိ နိလကေ ခေဒင်္ဃာတံ ကရော ပရမံ ဝနေ၊
ကိလမိ ဣဓ ဝေ ဝေဟင်္ဂါနံ မနောရမကံ ဝသေ၊
ဝိရဇိ-သိဂဏေ မေဓင်္ကာရံ အသောကဒဒံ နမေ။
(ဟိရိဏီဂါထာ)
ယော သမ္ပုဏ္ဏေ ဥပရိ တိရသေ စာလိယေ ပဗ္ဗတေပိ၊
သောဘံ ဖုလ္လေ သုဝသိ ဣတရေ ကာမိတေ အပ္ပမေဟိ၊
သာဝတ္ထိက္ကေနု-ဒ စတုဒသေ ကာရိတေ အာလယေပိ၊
ကာမော-စ္ဆိဒ္ဒေ တု ဘယ မုနမေ ဉာတိမေ ဒွါရကေဟိ။
(မန္ဒက္ကန္တာဂါထာ)
သက္ကော ¶ ကပ္ပိလေ ကရိယ မဒကေ နိဂ္ဂဟော ယောတိ ပဉ္စေ၊
ဒက္ခော ကပ္ပိယေ ဝသိဓ ယမကေ ဣဒ္ဓကော ဘောဟိ အညေ၊
ယက္ခော ဒဗ္ဗိကေ ဒမိယ နဂရေ သောဠသေ-တောပိ ဝင်္ကေ၊
အဂ္ဂေါ-ဃတ္တိတေ ပစိယ ပနမေ ဗောဓကေ မောနိပညေ။
(ကုသုမိတလတာဝေလ္လိတဂါထာ)
ဒုလဒ္ဓေ ¶ ပူရေ ယောပရိ စ ဒသတော ရာဇဂေဟံ ဘဇန္တော၊
တု သတ္တေ ကူလေ ခေါ ကရိ ဓ ယပတော ဝါသမေဇံ ဇဟန္တော၊
ဒုမဋ္ဌေ ပူနေသော ရမိတ-စလတော ဋ္ဌာရသေတံ ဒဒံ သော၊
ဂုဏဿေ ဝူပေတော နမိဓ ကရဘော ကာယခေဒံ သဟန္တော။
(မေဃဝိပ္ဖုဇ္ဇိတဂါထာ)
စာလီယေ ¶ ပရိမေ တထေဝ အစလေ-ကူနေပိ ဝီသေ လိလံ၊
ဘာဂီ စေ သ ဟိတေ ပဂေဝ ပဝသေ သူရေဟိ နိသေဝိတံ၊
ကာရိတေ ရမိကေ ပရေ စ နဂရေ ပူရေပိ ဝီသေ ဣမံ၊
ဟာရိတေ ဝသိမေ ဇဟေန ပနမေ မူလေပိ ခီဏေ ဇိတံ။
(သဒ္ဒူလဝိက္ကီလိတဂါထာ)
ပဉ္စပဉ္စ-မာကရေ တတောပိ ပိဏ္ဍကေန ဇေတကာနနေ စ၊
အညမည-မာဒရေန ယော နိသိန္နကေန တေ စ မာပယေဝ၊
ပုဗ္ဗပုဗ္ဗအာရာမေ ပယောဇိ-ပါသိကာယ ဝါရမာဝသေဓ၊
သုဒ္ဓသုဒ္ဓ-မာမလေန ပေါရိယာတိမာယ မာနသာ နမေသ။
(ဝုတ္တဂါထာ)
ပုညေနာ’နေန ¶ သံသာရမုပဓိ သုစိ သပ္ပူရိသေ ဝေါ ပသေဝေ၊
တေဟာ ဒိန္နံ သုဂါဟော သုစိပရိသဥပေတော အရောဂေါ ဘဝေယျံ၊
ဒီဃာယူကော မဟာပည ယသဓနသုလာဘော စ ကလျာဏမိတ္တော၊
လောကာဒိဗ္ဗော စ မဂ္ဂေါ သမမတိပရိဝါရောဝ နိဗ္ဗာနပတ္တော။
(သဒ္ဓရာဂါထာ)
က။
နဿတိ ¶ သာသနေ ဆနဝုတာဓိကေ စ တိဝိသေ သတေ ကလိယုဂေ၊
ဒွေသတစုဒ္ဒသာဓိကသဟဿကေ သကလရဋ္ဌကံ ခုဘိ ဂတေ၊
ဘာတိကယုဒ္ဓကေန နဂရံ တဒါ ဘဝတိ ဆာရိကာ ယတိဂဏော၊
ဒုက္ခဂတော မဟာပဟရဏေဟိ ဇိဝိတခယမ္ပိ ဧတိ ပိဋကေ။
(ဘဒ္ဒကဂါထာ)
ခ။
ဥဒိသက ¶ စေတျကေပိ ဝိကိရိယ နာသတိ ဓ သော ထိရော သဂဏတော၊
ဝိဇဟိယ ပုရတော တ္တရဝနေက ကုမ္ဘကရဂါမကံ နိဝသယေ၊
သတဂဏကေဟိ တတ္ထ ဇနကောပိ ‘‘ဘောတ ဣဓ ဝါသ သဗ္ဗယတိနံ၊
ဥပဋ္ဌဟမီ’’တိ တမှိ ကတိပါဟနံ ဝသတိ ခေါ ဝိမံသိယ သုခံ။
(လလိတဂါထာ)
ဂ။
တတ္ထ အရညေ ရမိတော သုစရိ သဒ္ဓမ္မ-တိမာနိ သုယတီဟိ တိပီကော၊
ဓူရသုယုတ္တော ပရိဂါဟိယ သုဇာတော သုပဋ္ဌာတိ ကုနဒိတ-မုယာနံ၊
သော သတမစ္စေဟိ ကတံ နဂရိ ဒံ တဿ စ ပါစိန ရဟ ဓိကကောသေ၊
ပစ္စယနာယာသု ဒ ဆာယဗဟုကော သုဒ္ဓယတိပိ ဣဓ ဝသနကာလေ။
(တနုဂါထာ)
ဃ။
ဖဂ္ဂုဏမာသေ ဆဒိနေ ရစိယ နိဋ္ဌံဝ ဂတော ပရမရိ ဣမိနာ-ယံ၊
သိဇ္ဈတု ပေမံ ဝတ ရက္ခတု သုဒေဝေါ ဥဒ ဝဍ္ဎတု ဇိနဝစနေ တံ၊
ဝါသမာလိနီ နိဋ္ဌိတာ။