📜
အနညသာဓာရဏဒီပနီဂါထာ
အဗ္ဘုဂ္ဂတာ ယဿ ဂုဏာ အနန္တာ၊
တိဗုဒ္ဓခေတ္တေကဒိဝါကရောတိ၊
ဇာနာတိ သော လောကမိမံ ပရဉ္စ၊
သစေတနဉ္စေဝ အစေတနဉ္စ၊
သကဿ သန္တာနဂတံ ပရေသံ၊
ဗျတီတမပ္ပတ္တကမတြဘူတံ။
အနန္တသတ္တေသု စ လောကဓာတုသု၊
ဧကောဝ သဗ္ဗေပိ သမာ န တေန၊
ဒိသာသု ပုဗ္ဗာဒိသု စက္ကဝါဠာ၊
သဟဿသင်္ခါယပိ အပ္ပမေယျာ၊
ယေ တေသု ဒေဝါ မနုဇာ စ ဗြဟ္မာ၊
ဧကတ္ထ သင်္ဂမ္မ ဟိ မန္တယန္တာ။
အနာဒိကာလာဂတနာမရူပိနံ၊
ယထာသကံ ဟေတုဖလတ္တဝုတ္တိနံ၊
တဗ္ဘာဝဘာဝိတ္တမသမ္ဘုဏန္တာ၊
နာနာဝိပလ္လာသမနုပဝိဋ္ဌာ။
ကမ္မပ္ပဝတ္တိဉ္စ ဖလပ္ပဝတ္တိံ၊
ဧကတ္တနာနတ္တနိရီဟဓမ္မတံ၊
ဝိညတ္တိသန္တာနဃနေန ဆန္နတော၊
သိဝဉ္ဇသံ နော ဘဏိတုံ သမတ္ထာ။
ဧကော ဝ သော သန္တိကရော ပဘင်္ကရော၊
သင်္ခါယ ဉေယျာနိ အသေသိတာနိ၊
တေသဉှိ မဇ္ဈေ ပရမာသမ္ဘီဝဒံ၊
သိဝဉ္ဇသံ ဒီပယိတုံ သမတ္ထော။
သော ဂေါတမော သကျသုတော မုနိန္ဒော၊
သဗ္ဗဿ လောကဿ ပဒီပဘူတော၊
အနန္တသတ္တေ ဘဝဗန္ဓနမှာ၊
မောစေသိ ကာရုညဖလာနုပေက္ခီ။