📜
နမော တဿ ဘဂဝတော အရဟတော သမ္မာသမ္ဗုဒ္ဓဿ
စူဠဂန္ထဝံသပါဠိ
၁။ ပိဋကတ္တယပရိစ္ဆေဒေါ
နမဿေတွာန သမ္ဗုဒ္ဓံ၊ အဂ္ဂဝံသဝရံဝရံ၊
နတွာန ဓမ္မံ ဗုဒ္ဓဇံ၊ သင်္ဃဉ္စာပိနိရင်္ဂဏံ။
ဂန္ထဝံသမ္ပိ နိဿာယ၊ ဂန္ထဝံသံ ပကထိဿံ၊
တိပေဋကသမာဟာရံ၊ သာဓုနံ ဇင်္ဃဒါသကံ။
ဝိမတိနောဒနမာရမ္ဘံ၊ တံ မေ သုဏာထ သာဓဝေါ၊
သဗ္ဗမ္ပိ ဗုဒ္ဓဝစနံ၊ ဝိမုတ္တိ စ သဟေတုကံ။
ဟောတိ ဧကဝိဓံယေဝ၊ တိဝိဓံ ပိဋကေန စ၊
တဉ္စ သဗ္ဗမ္ပိ ကေဝလံ၊ ပဉ္စဝိဓံ နိကာယတော။
အင်္ဂတော စ နဝဝိဓံ၊ ဓမ္မက္ခန္ဓဂဏနတော၊
စတုရာသီတိ သဟဿ၊ ဓမ္မက္ခန္ဓပဘေဒနန္တိ။
ကထံ ပိဋကတော ပိဋကဉှိ တိဝိဓံ ဟောတိ?
ဝိနယပိဋကံ၊ အဘိဓမ္မပိဋကံ သုတ္တန္တပိဋကန္တိ။ တတ္ထ ကတမံ ဝိနယ ပိဋကံ? ပါရာဇိကကဏ္ဍံ၊ ပါစိတ္တိယကဏ္ဍံ၊ မဟာဝဂ္ဂကဏ္ဍံ၊ စုလ္လဝဂ္ဂကဏ္ဍံ၊ ပရိဝါရကဏ္ဍန္တိ။ ဣမာနိ ကဏ္ဍာနိ ဝိနယပိဋကံ နာမ။
ကတမံ အဘိဓမ္မပိဋကံ? ဓမ္မသင်္ဂဏီ-ပကရဏံ၊ ဝိဘင်္ဂ-ပကရဏံ၊ ဓာတုကထာ-ပကရဏံ၊ ပုဂ္ဂလပညတ္တိ-ပကရဏံ၊ ကထာဝတ္ထု-ပကရဏံ၊ ယမက-ပကရဏံ၊ ပဋ္ဌာန-ပကရဏန္တိ။ ဣမာနိ သတ္တ ပကရဏာနိ အဘိဓမ္မပိဋကံ နာမ။ ကတမံ သုတ္တန္တပိဋကံ? သီလက္ခန္ဓဝဂ္ဂါဒိကံ၊ အဝသေသံ ဗုဒ္ဓဝစနံ သုတ္တန္တပိဋကံ နာမ။
ကထံ နိကာယတော? နိကာယာ ပဉ္စ ဝိဓာ ဟောန္တိ။ ဒီဃနိကာယော၊ မဇ္ဈိမနိကာယော၊ သံယုတ္တနိကာယော၊ အင်္ဂုတ္တရနိကာယော၊ ခုဒ္ဒကနိကာယောတိ။
တတ္ထ ကတမော ဒီဃ-နိကာယော? သီလက္ခန္ဓဝဂ္ဂေါ၊ မဟာဝဂ္ဂေါ၊ ပါထိကဝဂ္ဂေါတိ၊ ဣမေ တယော ဝဂ္ဂါ ဒီဃနိကာယော နာမ။ ဣမေသု တီသု ဝဂ္ဂေသု၊ စတုတိံသ ဝဂ္ဂါနိ စ ဟောန္တိ။ [စတုတိံသေဝ သုတ္တန္တာ၊ သီလက္ခန္ဓဝဂ္ဂါဒိကာ၊ ယဿ ဘဝန္တိ သော ယေဝ ဒီဃနိကာယ နာမ ဟောတိ။]
ကတမော မဇ္ဈိမနိကာယော? မူလပဏ္ဏာသော၊ မဇ္ဈိမပဏ္ဏာသော၊ ဥပရိပဏ္ဏာသောတိ၊ ဣမေ တယော ပဏ္ဏာသာ မဇ္ဈိမနိကာယော နာမ။ ဣမေသု တီသု ပဏ္ဏာသေသု ဒွေပညာသာဓိက-သုတ္တ-သတာနိ ဟောန္တိ [ဒိယဍ္ဎသတသုတ္တန္တာ၊ ဒွိ သုတ္တံ ယဿ သန္တိသော၊ မဇ္ဈိမနိကာယော နာမော မူလပဏ္ဏာသမာဒိ ဟောတိ။]
ကတမော သံယုတ္တနိကာယော? သဂါထာဝဂ္ဂေါ၊ နိဒါနဝဂ္ဂေါ၊ ခန္ဓကဝဂ္ဂေါ၊ သဠာယတနဝဂ္ဂေါ၊ မဟာဝဂ္ဂေါတိ၊ ဣမေ ပဉ္စ ဝဂ္ဂါ သံယုတ္တနိကာယော နာမ။ ဣမေသု ပဉ္စသု ဝဂ္ဂေသု ဒွါသဋ္ဌိသုတ္တသတ္တသတာဓိကသတ္တ-သုတ္တသဟဿာနိ ဟောန္တိ။ [ဒွါသဋ္ဌိ-သတ္တ-သတာနိ၊ သတ္တသဟဿကာနိ စ။] သုတ္တာနိ ယဿ ဟောန္တိ သော၊ သဂါထာဒိကဝဂ္ဂကော၊ သံယုတ္တနိကာယော နာမော ဝေဒိတဗ္ဗော စ ဝိညူနာတိ။
ကတမော အင်္ဂုတ္တရနိကာယော? ဧက္ကနိပါတော၊ ဒုက္ကနိပါတော၊ တိက္ကနိပါတော၊ စတုက္ကနိပါတော၊ ပဉ္စကနိပါတော၊ ဆက္ကနိပါတော၊ သတ္တကနိပါတော၊ အဋ္ဌကနိပါတော၊ နဝကနိပါတော၊ ဒသကနိပါတော၊ ဧကာဒသနိပါတောတိ၊ ဣမေ ဧကာဒသ နိပါတာ အင်္ဂုတ္တရနိကာယော နာမ။ ဣမေသု ဧကာဒသ နိပါတေသု သတ္တ-ပညာသ-ပဉ္စ-သတာဓိကနဝ-သုတ္တ-သဟဿာနိ ဟောန္တိ။ [နဝသုတ္တသဟဿာနိ၊ ပဉ္စသတမတ္တာနိ စ၊ သတ္တပညာသာဓိကာနိ၊ သုတ္တာနိ ယဿ ဟောန္တိ သော၊ အင်္ဂုတ္တရနိကာယောတိ၊ ဧက္ကနိပါတကာဒိကောတိ။]
ကတမော ခုဒ္ဒကနိကာယော? ခုဒ္ဒကပါဌော၊ ဓမ္မပဒံ၊ ဥဒါနံ၊ ဣတိဝုတ္တကံ၊ သုတ္တနိပါတော၊ ဝိမာနဝတ္ထု၊ ပေတဝတ္ထု၊ ထေရကထာ၊ ထေရီကထာ၊ ဇာတကံ၊ မဟာနိဒ္ဒေသော၊ ပဋိသမ္ဘိဒါမဂ္ဂေါ၊ အပဒါနံ၊ ဗုဒ္ဓဝံသော၊ စရိယာပိဋကံ၊ ဝိနယပိဋကံ၊ အဘိဓမ္မပိဋကန္တိ။ ဣမေသု သတ္တရသသု ဂန္ထေသု အနေကာနိ သုတ္တ-သဟဿာနိ ဟောန္တိ။ [အနေကာနိ သုတ္တ-သဟဿာနိ၊ နိဒ္ဒိဋ္ဌာနိ မဟေသိနာ၊ နိကာယေ ပဉ္စမေ ဣမေ၊ ခုဒ္ဒကေ ဣတိ ဝိသုတေတိ။]
ကထံ အင်္ဂတော အင်္ဂဟိ နဝ ဝိဓံ ဟောတိ? သုတ္တံ၊ ဂေယျံ၊ ဝေယျာကရဏံ၊ ဂါထာ၊ ဥဒါနံ၊ ဣတိဝုတ္တကံ၊ ဇာတကံ၊ အဗ္ဘုတဓမ္မံ၊ ဝေဒလ္လန္တိ၊ နဝပ္ပဘေဒံ ဟောတိ။ တတ္ထ ဥဘတော ဝိဘင်္ဂနိဒ္ဒေသခန္ဓကပရိဝါရာ၊ သုတ္တနိပါတေ၊ မင်္ဂလသုတ္တ၊ ရတနသုတ္တ၊ တုဝဋ္ဋကသုတ္တာနိ။ အညမ္ပိ သုတ္တနာမကံ တထာဂတဝစနံ၊ သုတ္တန္တိ ဝေဒိတဗ္ဗံ။ သဗ္ဗံ သဂါထကံ ဂေယျန္တိ ဝေဒိတဗ္ဗံ။ ဝိသေသနသံယုတ္တကေ သကလောပိ သဂါထကဝဂ္ဂေါ၊ သကလံ အဘိဓမ္မပိဋကံ နိဂါထကဉ္စ သုတ္တယဉ္စ အညမ္ပိ အဋ္ဌဟိ အင်္ဂေဟိ အသင်္ဂဟိတံ ဗုဒ္ဓဝစနံ တံ ဝေယျာကရဏန္တိ ဝေဒိတဗ္ဗံ။ ဓမ္မပဒံ၊ ထေရကထာ၊ ထေရီကထာ၊ သုတ္တနိပါတေ၊ နော သုတ္တနာမိကာ သုဒ္ဓိကဂါထာ၊ ဂါထာတိ ဝေဒိတဗ္ဗာ။ သောမနဿ ဉာဏမယိကဂါထာ ပဋိက-သံယုတ္တာ ဒွေ အသီတိသုတ္တန္တာ ဥဒါနန္တိ ဝေဒိတဗ္ဗာ။ ဝုတ္တဉှေတံ ဘဂဝတာတိအာဒိနယပ္ပဝတ္တာ ဒသုတ္တရသတသုတ္တန္တာ၊ ဣတိဝုတ္တကန္တိ ဝေဒိတဗ္ဗာ။ အပဏ္ဏကဇာတကာဒီနိ ပညာသာဒိကာနိ။ ပဉ္စဇာတကသတာနိ၊ ဇာတကန္တိ ဝေဒိတဗ္ဗံ။ စတ္တာရော မေ ဘိက္ခဝေ အစ္ဆရိယာ အဘူတဓမ္မာ၊ အာနန္ဒေတိအာဒိနယပ္ပဝတ္တာ သဗ္ဗေပိ အစ္ဆရိယ အဘူတဓမ္မပဋိသံယုတ္တာ သုတ္တန္တာ အဘူတဓမ္မန္တိ ဝေဒိတဗ္ဗာ။ စုလ္လဝေဒလ္လ၊ မဟာဝေဒလ္လ၊ သမ္မာဒိဋ္ဌိ၊ သက္ကပဉှ၊ သင်္ခါရဘာဇနိယ၊ မဟာပုဏ္ဏမသုတ္တန္တာဒယော သဗ္ဗေပိ ဝေဒဉ္စ တုဋ္ဌိဉ္စ လဒ္ဓါ [ပုစ္ဆ] လဒ္ဓါ ပုစ္ဆိတသုတ္တန္တာ၊ ဝေဒလ္လန္တိ ဝေဒိတဗ္ဗာ။ ကတမာနိ စတုရာသီတိ ဓမ္မက္ခန္ဓသဟဿာနိ ဒုဇာနာနိ၊ စတုရာသီတိ ဓမ္မက္ခန္ဓသဟဿာနိ သစေ ဝိတ္ထာရေန ကထိဿံ အတိပပဉ္စော ဘဝိဿတိ။ တသ္မာ နယ ဝသေန ကထိဿာမိ။ ဧကံ ဝတ္ထု၊ ဧကော ဓမ္မက္ခန္ဓော၊ ဧကံ နိဒါနံ ဧကော ဓမ္မက္ခန္ဓော၊ ဧကံ ပဉှာ ပုစ္ဆန္တံ ဧကော ဓမ္မက္ခန္ဓော၊ ဧကံ ပဉှာ ဝိသဇ္ဇနံ ဧကော ဓမ္မက္ခန္ဓော၊ စတုရာသီတိ ဓမ္မက္ခန္ဓသဟဿာနိ ကေန ဘာသိတာနိ၊ ကတ္ထ ဘာသိတာနိ၊ ကဒါ ဘာသိတာနိ၊ ကမာရဗ္ဘ ဘာသိတာနိ၊ ကိမတ္ထံ ဘာသိတာနိ၊ ကေန ဓာရိတာနိ၊ ကေနာဘတာနိ၊ ကိမတ္ထံ ပရိယာပုဏိတဗ္ဗာနိ။ တတြာယံ ဝိသဇ္ဇနာ၊ ကေန ဘာသိတာနီတိ? ဗုဒ္ဓါနု ဗုဒ္ဓေဟိ ဘာသိတာနိ။ ကတ္ထ ဘာသိတာနီတိ? ဒေဝေသု စ မာနုဿေသု စ၊ ဘာသိတာနိ။ ကဒါ ဘာသိတာနီတိ? ဘဂဝတော ဓရမာနကာလေ စေဝ ပစ္ဆိမကာလေ စ ဘာသိတာနိ။ ကတမာရဗ္ဘ ဘာသိတာနီတိ? ပဉ္စဝဂ္ဂိယာဒိကေ ဝေနေယျ ဗန္ဓဝေ အာရဗ္ဘ ဘာသိတာနီတိ။ ကိမတ္ထံ ဘာသိတာနီတိ? တိဝဇ္ဇဉ္စ အဝဇ္ဇဉ္စ ဉတွာ ဝဇ္ဇံ ပဟာယ အဝဇ္ဇေ ပဋိပတ္တိတွာ နိဗ္ဗာနပရိယန္တေ။ ဒိဋ္ဌ-ဓမ္မိကသမ္ပရာယိကတ္ထေ သမ္ပာပုဏိတုံ။
ကေန ဓာရိတာနီတိ? အနုဗုဒ္ဓေဟိ စေဝ သိဿာနုသိဿေဟိ စ ဓာရိတာနိ။ ကေနာ ဘတာနီတိ? အာစရိယ ပရံပရေဟိ အာဘတာနိ။ ကိမတ္ထံ ပရိယာပုဏိတဗ္ဗာနီတိ? ဝဇ္ဇဉ္စ အဝဇ္ဇဉ္စ ဉတွာ ဝဇ္ဇံ ပဟာယ အဝဇ္ဇေ ပဋိပတ္တိတွာ နိဗ္ဗာနပရိယန္တေ ဒိဋ္ဌဓမ္မိကသမ္ပရာယိကတ္ထေ၊ သံပါပုဏိတုံ၊ ယဒေဝံ တာယ နိဗ္ဗာနပရိယန္တေ ဒိဋ္ဌဓမ္မိကသမ္ပရာယိကတ္ထေ သာဓိကာနိ ဟောန္တိ။ တေဝ တတ္ထ ကေဟိ အပ္ပမတ္တေန ပရိယာပုဏိတဗ္ဗာနိ ဓာရေတဗ္ဗာနိ ဓာရေတဗ္ဗာနိ ဝါစေတဗ္ဗာနိ သဇ္ဈာယံ ကာတဗ္ဗာနီတိ [ဣတိ စုလ္လဂန္ထဝံသေ ပိဋကတ္တယ ဒီပကော နာမ ပဌမော ပရိစ္ဆေဒေါ။]