📜

၅။ ပကိဏ္ဏက-ပရိစ္ဆေဒေါ

နာမံ အာရောပနံ ပေါတ္ထကံ ဂန္ထကာရဿ စ။ လေခံလေခါပနဉ္စေဝ၊ ဝဒါမိ တဒနန္တရန္တိ။ တတ္ထ စတုရာသီတိယာ ဓမ္မက္ခန္ဓသဟဿာနိ ပိဋက၊ နိကာယင်္ဂ၊ ဝဂ္ဂ၊ နိပါတာဒိကံ နာမံ၊ ကေနာရောပိတံ၊ ကတ္ထ အာရောပိတံ၊ ကဒါ အာရောပိတံ၊ ကိမတ္ထံ အာရောပိတန္တိ? တတြာယံ ပိဝိသဇ္ဇနာကေန အာရောပိတန္တိ ပဉ္စသတခီဏာသဝေဟိ အာရောပိတံ။ တေဟိ သဗ္ဗဗုဒ္ဓဝစနံ သင်္ဂါယန္တိ၊ ဣဒံ ပိဋကံ၊ အယံ နိကာယော၊ ဣဒံ အင်္ဂံ၊ အယံ ဝဂ္ဂေါ၊ အယံ နိပါတောတိ။ ဧဝမာဒိကံ နာမံ အာရောပေန္တိ။ ကတ္ထ အာရောပိတန္တိ? ရာဇဂဟေ ဝေဘာရပဗ္ဗတဿ ပါဒေ ဓမ္မမဏ္ဍပ္ပေ အာရောပိတံ။ ကဒါ အာရောပိတန္တိ? ဘဂဝတော ပရိနိဗ္ဗုတေ ပဌမသင်္ဂါယနကာလေ အာရောပိတံ။ ကိမတ္ထံ အာရောပိတန္တိ? ဓမ္မက္ခန္ဓာနံ ဝေါဟာရသုခတ္ထာယ သုခဓာရဏတ္ထာယ စ အာရောပိတံ။ သင်္ဂီတိကာလေ ပဉ္စသတာ ခီဏာသဝါ တေသဉ္စ ဓမ္မက္ခန္ဓာနံ နာမ ဝဂ္ဂနိပါတတော။ ဣမဿ ဓမ္မက္ခန္ဓဿ အယံ နာမော ဟောတု၊ ဣမဿ စ ပကရဏဿ အယံ နာမောတိ၊ အဗြဝုံ သဗ္ဗံ နာမာဒိကံ ကိစ္စံ အကံသု။ တေ ခီဏာသဝါ၊ ယဒိ နာမာဒိကံ ကိစ္စံ အကတံ န သုပါကတံ တသ္မာ ဝေါဟာရသုခတ္ထာယနာမာဒိကံ ကိစ္စံ ကတံ အနာဂတေ ပနတ္ထာယ နာမာဒိကံ ပဝတ္တိတံ အသဉ္ဇာတနာမော န သုဋ္ဌု ပါကတော သဗ္ဗသော ဘဝေတိ။ ဓမ္မက္ခန္ဓာနံ နာမ ဒီပနာ နိဋ္ဌိတာ။

စတုရာသီတိ ဓမ္မက္ခန္ဓသဟဿာနိ ကေန ပေါတ္ထကေ အာရောပိတာနိ၊ ကဒါ အာရောပိတာနိ၊ ကိမတ္ထံ အာရောပိတာနီတိ။ တတြာယံ ဝိသဇ္ဇနာ ကေနာရောပိတာနိတိ? ခီဏာသဝမဟာနာဂေဟိ အာရောပိတာနိ။ ကတ္ထ အာရောပိတာနီတိ? လင်္ကာဒီပေ အာရောပိတာနိ။ ကဒါ အာရောပိတာနီတိ? သဒ္ဓါတိဿဿရာဇိနော ပုတ္တဿ ဝဋ္ဋဂါမနိ ရာဇဿ ကာလေ အာရောပိတာနိ။ ကိမတ္ထံ အာရောပိတာနီတိ? ဓမ္မက္ခန္ဓာနံ အဝိဓံသနတ္ထာယ သဒ္ဓမ္မဋ္ဌိတိယာ စ အာရောပိတာနိ။

ဓရမာနော ဟိ ဘဂဝါ၊ အမှာကံ သုဂတောဓီရော၊

နိကာယေ ပဉ္စဒေသေတိ၊ ယာဝ နိဗ္ဗာနဂမနာ။

သဗ္ဗေပိ တေ ဘိက္ခု အာဒိ၊ မနသာ ဝစသာဟာရော၊

သဗ္ဗေ စ ဝါစုဂ္ဂတာ ဟောန္တိ၊ မဟာပညာသတိဝရာ။

နိဗ္ဗူတေ လောကနာထမှိ၊ တတော ဝဿသတံ ဘဝေ၊

အရိယာနရိယာ စာပိ စ၊ သဗ္ဗေ ဝါစုဂ္ဂတာ ဓုဝံ။

တတော ပရံ အဋ္ဌရသံ၊ ဒွိသတံဝဿ ဂဏနံ၊

သဗ္ဗေ ပုထုဇ္ဇနာ စေဝ၊ အရိယာ စ သဗ္ဗေပိတေ။

မနသာဝစသာယေဝ၊ ဝါစုဂ္ဂတာဝ သဗ္ဗဒါ၊

ဒုဋ္ဌဂါမဏိရညော စ၊ ကာလေ ဝါစုဂ္ဂတာ ဓုဝံ။

အရိယာနရိယာပိ စ၊ နိကာယေ ဓာရဏာသဒါ၊

တတော ပရမှိ ရာဇာ စ၊ တတော စုတော စ တုသိတေ။

ဥပ္ပဇ္ဇိ ဒေဝ လောကေ သော၊ ဒေဝေဟိ ပရိဝါရိတော၊

သဒ္ဓါ တိဿောတိ နာမေန၊ တဿ ကနိဋ္ဌကော ဟိတော။

တတော လဒ္ဓရဋ္ဌော ဟောတိ၊ ဗုဒ္ဓသာသနပါလကော။

တဒါ ကာလေ ဘိက္ခူ အာသုံ၊ သဗ္ဗေ ဝါစုဂ္ဂတာ သဒါ၊

နိကာယေ ပဉ္စဝေဓေဝ၊ ယာဝ ရညော စ ဓာရဏာ၊

တတော စုတော သော ရာဇာ စ၊ တုဿီတေ ဥပပဇ္ဇတိ၊

ဒေဝလောကေဋ္ဌိတော သန္တော၊ တဒါ ဝါစုဂ္ဂတာ တတော။

တဿ ပုတ္တာပိ အဟေသုံ၊ အနေကာ ဝရဇ္ဇံ ဂတာ၊

အနုက္ကမေန စုတတေ၊ ဒေဝလောကံ ဂတာ ဓုဝံ၊

တဒါပိတေ သဗ္ဗေ ဘိက္ခူ၊ ဝါစုဂ္ဂတာဝ သဗ္ဗဒါ၊

နိကာယေ ပဉ္စဝိဓေဝ၊ ဓာရဏာဝသတိမတာ။

တတော ပရံ ပေါတ္ထကေသု၊ နိကာယာ ပဉ္စ ပိဋ္ဌိတာ၊

တဒါ အဋ္ဌကထာ ဋီကာ၊ သဗ္ဗေ ဂန္ထာ ပေါတ္ထကေ ဂတာ၊

သဗ္ဗေ ပေါတ္ထေသု ယေ ဂန္ထာ၊ ပါဠိ အဋ္ဌကထာ ဋီကာ၊

သံဋ္ဌိတာသံ ဌိတာ ဟောန္တိ၊ သဗ္ဗေပိ နော န သန္တိတေ။

တဒါ တေ ပေါတ္ထကေယေဝ၊ နိကာယာ ပိဌိတာ ခိလာ၊

တဒါ အဋ္ဌကထာဒီနိ၊ ဘဝန္တီတိ ဝဒန္တိ စ။

ပရိဟာရော ပဏ္ဍိတေဟိ ဝတ္တဗ္ဗောဝ၊

လင်္ကာဒီပဿ ရညောဝ၊ သဒ္ဓါ တိဿဿ ရာဇိနော။

ပုတ္တကော လင်္ကာဒီပဿ၊ ဣဿရော ဓမ္မိကော ဝရော၊

တဒါ ခီဏာသဝါ သဗ္ဗေ၊ ဩလောကေန္တိ အနဂတေ။

ခီဏာသဝါ ပဿန္တိ တေ၊ ဒုပညေဝ ပုထုဇ္ဇနေ၊

သဗ္ဗေပိ တေ ဘိက္ခူ အာသုံ၊ ဗဟုံတရာ ပုထုဇ္ဇနာ၊

န သက္ခိဿန္တိ တေ ပဉ္စ၊ နိကာယေ ဝါစုဂ္ဂတံ ဣတိ၊

ပေါတ္ထကေသု သဗ္ဗေ ပဉ္စ၊ အာရောပေန္တိ ခီဏာသဝါ။

သဒ္ဓမ္မဋ္ဌိတိ စိရတ္တာယ၊ ဇနာနံ ပုညတ္ထာယ စ၊

တတော ပဋ္ဌာယတေ သဗ္ဗေ၊ နိကာယာ ဟောန္တိ ပေါတ္ထကေ၊

အဋ္ဌကထာ ဋီကာ သဗ္ဗေ၊ တေ ဟောန္တိ ပေါတ္ထကေဋ္ဌိတာ။

တတော ပဋ္ဌာယတေ သဗ္ဗေ၊ ဘိက္ခု အာဒိ မဟာဂဏာ၊

ပေါတ္ထကေသု ဌိတေယေဝ၊ သဗ္ဗေ ပဿန္တိ သဗ္ဗဒါ။

[ပေါတ္ထကေ အာရောပန ဒီပကာ နိဋ္ဌိတာ။]

ယော ကောစိ ပဏ္ဍိတော ဓီရော၊ အဋ္ဌကထာဒိကံ ဂန္ထံ ကရောတိ ဝါ ကာရာပေတိ ဝါ၊ တဿ အနန္တကော ဟောတိ ပုညသံစယော၊ အနန္တကော ဟောတိ ပုညာနိသံသော။ စတုရာသီတိ စေတိယသဟဿ ကရဏသဒိသော၊ စတုရာသီတိ ဗုဒ္ဓရူပသဟဿ ကရဏသဒိသော၊ စတုရာသီတိ ဗောဓိရုက္ခသဟဿရောပနသဒိသော၊ စတုရာသီတိ ဝိဟာရသဟဿ ကရဏသဒိသော၊ ယော စ ဗုဒ္ဓဝစနမဉ္ဇူသံ ကရောတိ ဝါ ကာရာပေတိ ဝါ၊ ယော စ ဗုဒ္ဓဝစနံ မဏ္ဍနံ ကရောတိ ဝါ ကာရာပေတိ ဝါ၊ ယော စ ဗုဒ္ဓဝစနံ လေခံ ကရောတိ ဝါ ကာရာပေတိ ဝါ၊ ယော စ ပေါတ္ထကံ ဝါ၊ ယော စ ပေါတ္ထကမူလံ ဝါ၊ ဒေတိ ဝါ ဒါပေတိ ဝါ၊ ယော စ တေလံ ဝါ စုဏ္ဏံ ဝါ၊ ဓညံ ဝါ ပေါတ္ထကဘဉ္ဇနတ္ထာယ ယံ ကိဉ္စိ နိတ္ထံ ဝါ ပေါတ္ထကဆိဒ္ဒေ အာဝုနတ္ထာယ၊ ယံ ကိဉ္စိ သုတ္တံ ဝါ ကဋ္ဌဖလကဒွယံ ဝါ ပေါတ္ထကံ ပုဋနတ္ထာယ ယံ ကိဉ္စိ ဝတ္ထံ ဝါ၊ ပေါတ္ထက-ဗန္ဓနတ္ထာယ၊ ယံ ကိဉ္စိ ယောတ္တံ ဝါ ပေါတ္ထကလာပ ပူဋနတ္ထာယ ယံ ကိဉ္စိ ထဝိကံ ဒေတိ ဝါ ဒါပေတိ ဝါ။

ယော စ ဟရိတာလေန ဝါ မနောသိလာယ ဝါ၊ သုဝဏ္ဏေန ဝါ ရဇတေန ဝါ ပေါတ္ထကမဏ္ဍနံ ဝါ ကဋ္ဌဖလကမဏ္ဍနံ ဝါ ကရောတိ ဝါ ကာရာပေတိ ဝါ၊ တဿ အနန္တကော ဟောတိ ပုညသံစယော၊ အနန္တကော ဟောတိ ပုညာနိသံသော။ စတုရာသီတိ စေတိယသဟဿ ကရဏသဒိသော၊ စတုရာသီတိ ဝိဟာရသဟဿ ကရဏသဒိသော။

ဘဝေ နိဗ္ဗတ္တမာနော သော၊ သီလဂုဏမုပါဂတာ၊

မဟာ တေဇော သဒါ ဟောတိ၊ သီဟနာဒေါ ဝိသာရဒေါ။

အာယုဝဏ္ဏဗလုပ္ပေတော၊ ဓမ္မကာမော ဘဝေ သဒ္ဒါ၊

ဒေဝမနုဿလောကေသု၊ မဟေသက္ခော အနာမယော။

ဘဝေ နိဗ္ဗတ္တမာနော သော၊ ပညဝါ သုသမာဟိတော၊

အဓိပစ္စ ပရိဝါရော၊ သဗ္ဗသုခါဓိ ဂစ္ဆတိ။

သဒ္ဒေါဟီရိမာ ဝဒညူ၊ သံဝိဂ္ဂ မာနသော ဘဝေ၊

အင်္ဂပစ္စင်္ဂ သမ္ပန္နော၊ အာရောဟ ပရိဏာဟဝါ။

သဗ္ဗေ သတ္တာပိ ယော လောကေ၊ သဗ္ဗတ္ထ ပူဇိတာဘဝေ၊

ဒေဝမနုဿ သဉ္စရော၊ မိတ္တသဟာယ ပါလိတော။

ဒေဝမနုဿ သမ္ပတ္တိံ၊ အနုဘောတိ ပုနပ္ပုနံ၊

အရဟတ္တ ဖလံ ပတ္တော၊ နိဗ္ဗာနံ ပါပုဏိဿတိ။

ပဋိသမ္ဘိဒါ စတဿော၊ အဘိညာ ဆဗ္ဗိဓေ ဝရေ၊

ဝိမောက္ခေ အဋ္ဌကေ သေဋ္ဌေ၊ ဂမိဿတိ အနာဂတေ။

တသ္မာဟိ ပဏ္ဍိတော ပေါသော၊ သံပဿံ ဟိတ မတ္တနော၊

ကာရေယျ သာမ ဂန္ထေ စ၊ အညေ စာပိ ကာရာပယေ။

ပေါတ္ထကေ စ ဌိတေ ဂန္ထေ၊ ပါဠိ အဋ္ဌကထာဒိကေ၊

ဓမ္မမဉ္ဇူသာ ဂန္ထေ စ၊ လေခံ ကရေ ကာရာပယေ။

ပေါတ္ထကံ ပေါတ္ထကမူလဉ္စ၊ တေသံ စုလ္လထူသမ္ပိ စ၊

ပိလောတိကာဒိကံ သုတ္တံ၊ ကဋ္ဌဖလဒွယမှိ စ။

ဓမ္မဗန္ဓနတ္ထာယ စ၊ ယံ ကိဉ္စိ မဟဂ္ဃံ ဝတ္ထံ၊

ဓမ္မဗန္ဓနယောတ္တဉ္စ၊ ယံ ကိဉ္စိ ထဝိကမ္ပိ စ။

ဒဒေယျ ဓမ္မခေတ္တမှိ၊ ဝိပ္ပဿန္နေန စေတသာ၊

အညော စာပိ ဒဇ္ဇာပေယျ၊ မိတ္တသဟာယဗန္ဓဝေတိ။

ဂန္ထာကရလေခလေခါပနာနိသံသ ဒီပနာ နိဋ္ဌိတာ။

[ဣတိ စူလဂန္ထဝံသေ ပကိဏ္ဏကဒီပကော နာမ ပဉ္စမော ပရိစ္ဆေဒေါ။]

သောဟံ ဟံသာရဋ္ဌ ဇာတော၊ နန္တပညောတိ ဝိဿုတော

သဒ္ဓါ သီလ ဝီရပ္ပေတော၊ ဓမ္မရသံ ဂဝေသနော။

သောဟံ တတော ဂန္တွာ စိမံ၊ ဇိန နဝံ ယံ ပူရံ၊

သဗ္ဗ ဓမ္မံ ဝိစိနန္တော၊ ဝီသတိ ဝဿမာဂတော။

သဗ္ဗ ဓမ္မံ ဝိဿေဇ္ဇေန္တော၊ ကိကာရေ နေဝ ဘိက္ခုနော၊

ဆ ဝဿာနံ ဂဏံ ဘိတွာ၊ ကာမာနံ အဘိမဒ္ဒနံ။

သန္တိ သဘာ စ နိဗ္ဗာနံ၊ ဂဝေသိဉ္စ ပုနပ္ပုနံ၊

ဝသန္တောဟံ၊ ဝနာရမ္မံ၊ ပိဋကတ္တယ သင်္ဂဟံ၊

ဂန္ထဝံသံ ဣမံ ခုဒ္ဒံ၊ အရိယသင်္ဃဒါသကန္တိ။

ဣတိ ပါမောဇ္ဇတ္ထာယ အရညဝါသိနာ၊ နန္ဒပညာစရိယေန ကတော စူဠဂန္ထဝံသော နိဋ္ဌိတော။

ဓမ္မဝဋံသကနာမေန ဝိသုတော ထေရော၊ ယံ ပကရဏံ လိက္ခိတံ တံ ပရိပုဏ္ဏံ တေန ပုညေန တံ ပိဋကံ ပရိသိပ္ပံ ပရိနိဋ္ဌိတံ။

မမေဝ သိဿသမူဟာနဉ္စ ပရိသိပ္ပံ ပရိနိဋ္ဌိတံ။ တဝေ သိဿာနူ သိဿာနိ စ၊ ပရိသိပ္ပံ ပရိနိဋ္ဌိတံ။

စူဠဂန္ထဝံသော နိဋ္ဌိတော။