📜
၁၀။ စိနရဋ္ဌသာသနဝံသကထာမဂ္ဂေါ
၁၀။ တတော ပရံ ပဝက္ခာမိ စီနရဋ္ဌသာသနဝံသကထာမဂ္ဂံ ယထာဋ္ဌဝိတမာတိကာဝသေန။
တတိယသင်္ဂီတာဝသာနေ ဟိ မဟာမောဂ္ဂလိပုတ္တတိဿတ္ထေရော မဇ္ဈိမတ္ထေရံ စိနရဋ္ဌံ ပေသေသိ၊-တွံ ဧတံ ရဋ္ဌံ ဂန္တွာ ဧတ္ထ သာသနံ ပတိဋ္ဌာပေဟီတိ။
မဇ္ဈိမတ္ထေရောစ ကဿပဂေါတ္တရေန အဠကရေဝတ္ထေရေန ဒုန္ဒဘိယတ္ထေရေန မဟာရေဝတ္ထေရေနစ သဒ္ဓိံ ဟိမဝန္တပ္ပဒေသေ ပဉ္စစီနရဋ္ဌံ ဂန္တွာ ဓမ္မစက္ကပ္ပဝတ္တနသုတ္တန္တကထာယတံ ဒေသံ ပသာဒေတွာ အသီတိပါဏကောဋိယော မဂ္ဂဖလရတနာနိ ပဋိလာဘေသိ။ ပဉ္စပိစ တေ ထေရာ ပဉ္စရဋ္ဌာနိ ပသာဒေသုံ။ ဧကမေကဿ သန္တိကေ သဟဿမတ္တာ ပဗ္ဗဇိံသု။ ဧဝံ တေ တတ္ထ သာသနံ ပတိဋ္ဌာပေသုံ။
ဂန္တွာ မဇ္ဈိမတ္ထေရော၊ ဟိမဝန္တံ ပသာဒယိ၊
ယက္ခသေနံ ပကာသေန္တော၊ ဓမ္မစက္ကပ္ပဝတ္တနန္တိ။
တတ္ထ ကိရ မနုဿာ ယေဘုယျေန စန္ဒီပရမီသွာရာနံ ယက္ခာနံ ပူဇံ ¶ ကရောန္တိ။ တေနေဝ တေ ပဉ္စ ထေရာ တေသံ ယက္ခသေနံ ပကာသယိတွာ ဓမ္မံ ဒေသေသုံ။ ကသ္မီရဂန္ဓာရရဋ္ဌံ ပန ကဒါစိ ကဒါစိ စီနရဋ္ဌိန္ဒဿ ဝိဇိတံ ဟောတိ၊ ကဒါစိ ကဒါစိ ပန ဝိသုံ ဟောတိ။ တဒါ ပန ဝိသုံယေဝ အဟောသီတိ ဒဋ္ဌဗ္ဗံ။
စီရနဋ္ဌေ ပန ဘဂဝတော သာသနံ ဒုဗ္ဗလံယေဝ ဟုတွာ အဋ္ဌာသိ၊ န ထိရံ ဟုတွာ။ တေနေဝ ဣဒါနိ တတ္ထ ကတ္ထစိယေဝ သာသနံ ဆာယာမတ္တံဝ ပညာယတိ၊ ဝါတဝေဂေန ဝိကိဏ္ဏအဗ္ဘံဝိယ တိဋ္ဌတီတိ။
ဣတိ သာသနဝံသေ စီနရဋ္ဌသာသနဝံသကထာမဂ္ဂေါ နာမ
ဒသမော ပရိစ္ဆေဒေါ။
ဧဝံ သဗ္ဗေန သဗ္ဗံ သာသနဝံသကထာမဂ္ဂေါ နိဋ္ဌိတော။
ဧတ္တာဝတာစ –
လင်္ကာဂတေန သန္တေန၊ စိတြဉာဏေန ဘိက္ခုနာ၊
သရဏင်္ကရနာမေန၊ သဒ္ဓမ္မဋ္ဌိတိကာမိနာ။
ဒူရတောယေဝ ဒီပမှာ၊ သုမင်္ဂလေန ဇောတိနာ၊
ဝိသုဒ္ဓသီလိနာစေဝ၊ ဒီပန္တရဋ္ဌဘိက္ခုနာ။
အညေဟိစာဘိယာစိတော၊ ပညာသာမီတိ နာမကော၊
အကာသိံ သုဋ္ဌုကံ ဂန္ထံ၊ သာသနဝံသပ္ပဒီပိကံ။
ဒွိသတေစ သဟဿေစ၊ တေဝီသာဓိကေ ဂတေ၊
ပုဏ္ဏာယံ မိဂသီရဿ၊ နိဋ္ဌံ ဂတာဝ သဗ္ဗသော။
ကောစိ ဧတ္ထေဝ ဒေါသော စေ၊ ပညာယတိ သုစိတ္တကာ၊
တံ ခမန္တု စ သုဒ္ဓိယာ၊ ဂဏှန္တု ယုတ္တိကံ ဟဝေတိ။