📜
နမော တဿ ဘဂဝတော အရဟတော သမ္မာသမ္ဗုဒ္ဓဿ
မဟာဝံသပါဠိ
ပထမပရိစ္ဆေဒ
မဟိယင်္ဂဏာဂမနံ
နမဿိတွာန ¶ သမ္ဗုဒ္ဓံ၊ သုသုဒ္ဓံ သုဒ္ဓဝံသဇံ၊
မဟာဝံသံ ပဝက္ခာမိ၊ နာနာနူနာဓိကာရိကံ။
ပေါရာဏေဟိ ကတော’ပေသော၊ အတိဝိတ္ထာရိတော ကွစိ၊
အတီဝ ကွစိ သံခိတ္တော၊ အနေကပုနရုတ္တကော။
ဝဇ္ဇိတံ တေဟိ ဒေါသေဟိ၊ သုခဂ္ဂဟဏဓာရဏံ၊
ပသာဒသံဝေဂကရံ၊ သုတိတော စ ဥပါဂတံ။
ပသာဒဇနကေ ဌာနေ၊ တထာ သံဝေဂကာရကေ၊
ဇနယန္တော ပသာဒဉ္စ၊ သံဝေဂဉ္စ သုဏာထ တံ။
ဒီပင်္ကရဉှိ သမ္ဗုဒ္ဓံ၊ ပဿိတွာ နော ဇိနော ပုရာ၊
လောကံ ဒုက္ခာ ပမောစေတုံ၊ ဗောဓာယ ပဏိဓိံ အကာ။
တတော တဉ္စေဝ သမ္ဗုဒ္ဓံ၊ ကောဏ္ဍညံ မင်္ဂလံ မုနိံ၊
သုမနံ ရေဝတံ ဗုဒ္ဓံ၊ သောဘိတဉ္စ မဟာမုနိံ။
အနောမဒဿိံ သမ္ဗုဒ္ဓံ၊ ပဒုမံ နာရဒံ ဇိနံ၊
ပဒုမုတ္တရသမ္ဗုဒ္ဓံ၊ သုမေဓဉ္စ တထာဂတံ။
သုဇာတံ ပိယဒဿိဉ္စ၊ အတ္ထဒဿိဉ္စ နာယကံ၊
ဓမ္မဒဿိဉ္စ သိဒ္ဓတ္ထံ၊ တိဿံ ဖုဿဇိနံ တထာ။
ဝိပဿိံ သိခီသမ္ဗုဒ္ဓံ၊ သမ္ဗုဒ္ဓံ ဝေဿဘုံ ဝိဘုံ၊
ကကုသန္ဓဉ္စ သမ္ဗုဒ္ဓံ၊ ကောဏာဂမနမေဝ စ။
ကဿပံ သုဂတဉ္စ’မေ၊ သမ္ဗုဒ္ဓေ စတုဝီသတိ၊
အာရာဓေတွာ မဟာဝီရော၊ တေဟိ ဗောဓာယ ဗျာကတော။
ပုရေတွာ ¶ ပါရမီ သဗ္ဗာ၊ ပတွာ သမ္ဗောဓိမုတ္တမံ၊
ဥတ္တမော ဂေါတမော ဗုဒ္ဓါ၊ သတ္တေ ဒုက္ခာ ပမောစယိ။
မဂဓေသု ရုဝေလာယံ၊ ဗောဓိမူလေ မဟာမုနိ၊
ဝိသာခပုဏ္ဏမာယံ သော၊ ပတ္တော သမ္ဗောဓိမုတ္တမံ။
သတ္တာဟာနိ တဟိံ သတ္တ၊ သော ဝိမုတ္တိသုခံ ပရံ၊
ဝိန္ဒန္တံ မဓုရတ္တဉ္စ၊ ဒဿယန္တော ဝသီ ဝသိ။
တတော ဗာရာဏသိံ ဂန္တွာ၊ ဓမ္မစက္ကံ ပဂတ္တယိ၊
တတ္ထ ဝဿ ဝသန္တော’ဝ၊ သဋ္ဌိံ အရဟတံ အကာ။
တေ ဓမ္မဒေသနတ္ထာယ၊ ဝိဿဇ္ဇေတွာန ဘိက္ခဝေါ၊
ဝိနေတွာ စ တတော တိံသ-သဟာ ယေ ဘဒ္ဒဝဂ္ဂိယေ။
သဟဿဇဋိလေ နာထော၊ ဝိနေတုံ ကဿပါဒိကေ၊
ဟေမန္တေ ဥရုဝေလာယံ၊ ဝသိတေ ပရိပါစယံ။
ဥရုဝေလကဿပဿ၊ မဟာယညေ ဥပဋ္ဌိတေ၊
တဿ’တ္တနော နာဂမနေ၊ ဣစ္ဆာစာရံ ဝိဇာနိယ။
ဥတ္တရကုရုတော ဘိက္ခံ၊ အာဟရိတွာ ရိမဒ္ဒနော၊
အနောတတ္တဒဟေ ဘုတွာ၊ သာယနှသမယေ သယံ။
ဗောဓိတော နဝမေ မာသေ၊ ဖုဿပုဏ္ဏမိယံ ဇိနော၊
လင်္ကာဒီပံ ဝိသောဓေတုံ၊ လင်္ကာဒီပမုပါဂမိ။
သာသနုဇ္ဇောတနံ ဌာနံ၊ လံကာ ဉာတာ ဇိနေန ဟိ၊
ယက္ခပုဏ္ဏာယ လင်္ကာယ၊ ယက္ခာ နိဗ္ဗာ သိယာတိ စ။
ဉာတောဝ လင်္ကာမဇ္ဈမှိ၊ ဂင်္ဂါဘီရေ မနောရမေ၊
တိယောဇနာယ တေ ရမ္မေ၊ ဧကယောဇနဝိတ္ထတေ။
မဟာနာဂဝနုယျာနေ၊ ယက္ခသင်္ဂါမဘူမိယာ၊
လင်္ကာဒီပဋ္ဌယက္ခာနံ၊ မဟာယက္ခသမာဂမော။
ဥပါဂတော တံ သုဂတော၊ မဟာယက္ခသမာဂမံ၊
သမာဂမဿ မဇ္ဈမှိ၊ တတ္ထ တေသံ သိရောပရိ။
မဟိယင်္ဂဏထူပဿ၊ ဌာနေ ဝေဟာယသံ ဇိနော၊
ဝုဋ္ဌိဝါတန္ဓကာရေသိ၊ တေသံ သံဝေဇနံ အကာ။
တေ ဘယဋ္ဌာ’ဘယံ ယက္ခာ၊ အယာစုံ အဘယံ ဇိနံ၊
ဇိနော အဘယဒေါ အာဟ၊ ယက္ခေ တေ’တိ ဘယဒ္ဒီတေ။
ယက္ခာ ¶ ဘယံ ဝေါ ဒုက္ခဉ္စ၊ ဟရိဿာမိ ဣဒံ အဟံ၊
တုမှေ နိသဇ္ဇဌာနံ မေ၊ သမဂ္ဂါ ဒေထ နော ဣဓ။
အာဟု တေ သုဂတံ ယက္ခာ၊ ဒေမ မာရိသ တေ ဣဓ၊
သဗ္ဗေပိ သကလံ ဒီပံ၊ ဒေဟိ နော အဘယံ တုဝံ။
ဘယံ သီတံ တမံ တေသံ၊ ဟန္တွာ တံ ဒိန္နဘူမိယံ၊
စမ္မက္ခန္ဓံ အတ္ထရိတွာ၊ တတ္ထာ’ သီနော ဇိနော တတော။
စမ္မက္ခဏ္ဍံ ပသာရေသိ၊ အာဒိတ္တံ တံ သမန္တတော၊
ဃမ္မာဘိဘူတာ တေ ဘီတာ၊ ဌိတာ အန္တေ သမန္တတော။
ဂိရိဒီပံ တတော နာထော၊ ရမ္မံ တေသံ ဣဓာ’နယိ၊
တေသု တတ္ထ ပဝိဋ္ဌေသု၊ ယထာဌာနေ ဌပေသိ စ။
နာထော တံ သံခိပိ ဓမ္မံ၊ တဒါ ဒေဝါ သမာဂမုံ၊
တသ္မိံ သမာဂမေ တေသံ၊ သတ္ထာ ဓမ္မ မဒေသယိ။
နေကေသံ ပါဏကောဋီနံ၊ ဓမ္မာဘိသမယော အဟု၊
သရဏေသု စ သီလေသု၊ ဌိတာ အာသုံ အသံခိယာ။
သောတာပတ္တိဖလံ ပတွာ၊ သေလေ သုမနကူဋကေ၊
မဟာသုမနဒေဝိန္ဒော၊ ပူဇိယံ ယာစိ ပူဇိယံ။
သိရံ ပရာမသိတွာန၊ နီလာမလသိရောရုဟော၊
ပါဏိမတ္တေအဒါ ကေသေ၊ တဿ ပါဏ ဟိတော ဇိနော။
သော တံ သုဝဏ္ဏစင်္ကောဋ-ဝရေနာဒါယ သတ္ထုနော၊
နိသိန္နဋ္ဌာနရစိတေ၊ နာနာရတနသဉ္စယေ။
သဗ္ဗတော သတ္တရတနေ၊ တေ ဌပေတွာ သိရောရုဟေ၊
သော ဣန္ဒနီလထူပေန၊ ပိဒဟေသိ နမဿိ စ။
ပရိနိဗ္ဗုတမှိ သမ္ဗုဒ္ဓေ၊ စိတကတော စ ဣဒ္ဓိယာ၊
အာဒါယ ဇိနဂီဝဋ္ဌိံ၊ ထေရော သရဘူနာမကော။
ထေရဿ သာရိပုတ္တဿ၊ သိဿော အာနီယ စေတိယေ၊
တသ္မိံယေဝ ဌပေတွာန၊ ဘိက္ခူဟိ ပရိဝါရိတော။
ဆာဒါပေတွာ မေဒဝဏ္ဏ-ပါသာဏေဟိ မဟိဒ္ဓိကော၊
ထူပံ ဒွါဒသဟတ္ထုစ္စံ၊ ကာရာပေတွာန ပက္ကမိ။
ဒေဝါနံပိယတိဿဿ၊ ရညော ဘာတုကုဓာရကော၊
ဥဒ္ဓစူဠာဘယော နာမ၊ ဒိသွာ စေတိယ မဗ္ဘုတံ။
တံ ¶ ဆာဒယိတွာ ကာရေသိ၊ တိံသဟတ္ထုစ္စ စေတိယံ၊
မဒ္ဒန္တော ဒမိဠေ ရာဇာ၊ တတြဋ္ဌော ဒုက္ခဂါမဏိ။
အသီတိဟတ္ထံ ကာရေသိ၊ တဿ ကဉ္ဇုကစေတိယံ၊
မဟိယင်္ဂဏထူပေါယ-မေသော ဧဝံ ပတိဋ္ဌိတော။
ဧဝံ ဒီပမိမံကတွာ၊ မနုဿာရဟမိဿရော၊
ဥရုဝေလမဂါ ဓီရော၊ ဥရုဝီရ ပရက္ကမောတိ။
မဟိယင်္ဂဏာဂမနံ နိဋ္ဌိတံ။
နာဂဒီပါဂမန
မဟာကာရုဏိကော သတ္ထာ၊ သဗ္ဗလောကဟိတေ ရတော၊
ဗောဓိတော ပဉ္စမေ ဝဿေ၊ ဝသံ ဇေတဝနေ ဇိနော။
မဟောဒရဿ နာဂဿ၊ တထာ စူဠောဒရဿ စ၊
မာတုလဘာဂိနေယျာနံ၊ မဏိပလ္လင်္ကဟေတုကံ။
ဒိသွာ သပါရိသဇ္ဇာနံ၊ သင်္ဂါမံ ပစ္စုပဋ္ဌိတံ၊
သမ္ဗုဒ္ဓါ စိတ္တမာသဿ၊ ကာဠပက္ခေ ဥပေါသထေ။
ပါတောယေဝ သမာဒါယ၊ ပဝရံ ပတ္တစီဝရံ၊
အနုကမ္ပာယ နာဂါနံ၊ နာဂဒီပမုပါဂမိ။
မဟာဒရော’ပိသော နာဂေါ၊ တဒါ ရာဇာ အဟိဒ္ဓိကော၊
သမုဒ္ဒေ နာဂဘဝနေ၊ ဒသဒ္ဓသတယောဇနေ။
ကဏိဋ္ဌိကာ တဿ ကဏှာ၊ ဝဍ္ဎမာနမှိ ပဗ္ဗတေ၊
နာဂရာဇဿ ဒိန္နာ’သိ၊ တဿ စူဠောဒရော သုတော။
တဿ မာတာ မဟာမာတု၊ မဏိပလ္လင်္ကမုတ္တမံ၊
ဒတွာ ကာလကတာ နာဂီ၊ မာတုလေန တထာ ဟိ သော။
အဟောသိ ဘာဂိနေယျဿ၊ သင်္ဂါမော ပစ္စုပဋ္ဌိတော၊
ပဗ္ဗတေယျာ’ပိ နာဂါ တေ၊ အဟေသုဉှိ မဟိဒ္ဓိကာ။
သမိဒ္ဓိသုမနော နာမ၊ ဒေဝေါ ဇေတဝနေ ဌိတံ၊
ရာဇာယတနမာဒါယ၊ အတ္တနော ဘဝနံ သုဘံ။
ဗုဒ္ဓါနုမတိယာယေဝ၊ ဆတ္တာကာရံ ဇိနောပရိ၊
ဓာရယန္တော ဥပါဂဉ္ဆိ၊ ဌာနံ တံ ပုဗ္ဗဝုဋ္ဌကံ။
ဒေဝေါ ¶ ဟိ သော နာဂဒီပေ၊ မနုဿော’နန္တရေ ဘဝေ၊
အဟောသိ ရာဇာယတန-ဌိတဌာနေ သ အဒ္ဒသ။
ပစ္စေကဗုဒ္ဓ ဘုဉ္ဇန္တေ၊ ဒိသွာ စိတ္တံ ပသာဒိယ၊
ပတ္တသောဓနသာခါယော၊ တေသံ ပါဒါသိ တေန သော။
နိဗ္ဗတ္တိတသ္မိံ ရုက္ခသ္မိံ၊ ဇေတုယျာနေ မနောရမေ၊
ဒွါရကောဋ္ဌကပဿမှိ၊ ပစ္ဆာ ဗဟိ အဟောသိ သော။
ဒေဝါတိဒေဝေါ ဒေဝဿ၊ တဿ ဝုဒ္ဓိဉ္စ ပဿိယ၊
ဣဒံ ဌာန ဟိတတ္ထဉ္စ၊ တံ သရုက္ခံ ဣဓာနယိ။
သင်္ဂါမမဇ္ဈေ အာကာသေ၊ နိသိန္နော တတ္ထ နာယကော၊
တမံ တမောနုဒေါ တေသံ၊ နာဂါနံ ဟိံသနံ အကာ။
အဿာသေန္တော ဘယဋ္ဋေ တေ၊ အာလောကံ ပဝိဒ္ဓံသယိ၊
တေ ဒိသွာ သုဂတံ တုဋ္ဌာ၊ ပါဒေ ဝန္ဒိံသု သတ္ထုနော။
တေသံ ဓမ္မမဒေသေသိ၊ သာမဂ္ဂိကရဏံ ဇိနော၊
ဥဘော’ပိ တေ ပတီတာ တံ၊ ပလ္လင်္ကံ မုနိနော အဒုံ။
သတ္ထာ ဘူမိဂတော တတ္ထ၊ ပသီဒိသွာန အာသနေ၊
တေဟိ ဒိဗ္ဗန္နပါနေဟိ၊ နာဂရာဇေဟိ တပ္ပိတော။
တေ ဇလဋ္ဌေ တလဋ္ဌေ စ၊ ဘုဇဂေ’သီတိကောဋိယော၊
သရဏေသု စ သီလေသု၊ ပတိဋ္ဌာပေသိ နာယကော။
မဟောဒရဿ နာဂဿ၊ မာတုလော မဏိအက္ခိကော၊
ကလျာဏိယံ နာဂရာဇာ၊ ယုဒ္ဓံ ကာတုံ တဟိံ ဂတော။
ဗုဒ္ဓဂါမမှိ ပဌမေ၊ သုတွာ သဒ္ဓမ္မဒေသနံ၊
ဌိတော သရဏသီလေသု၊ တတ္ထာ’ယာစိ တထာဂတံ။
မဟတီ အနုကမ္ပာနော၊ ကတာ နာထ တယာ အယံ၊
တဝါနာဂမနေ သဗ္ဗေ၊ မယံ ဘသ္မီ ဘဝါမဟေ။
အနုကမ္ပာ မဟီ ပိတေ၊ ဝိသုံ ဟောတု မဟောဒယ၊
ပုနရာဂမနေနေတ္ထ၊ ဝါသဘူမိံ မမာ မမ။
အဓိဝါသယိတွာ ဘဂဝါ၊ တုဏှိဘာဝေ နိဓာဂမံ၊
ပတိဋ္ဌာပေသိ တတ္ထေဝ၊ ရာဇာယတနစေတိယံ။
တဉ္စပိ ¶ ရာဇာယတနံ၊ ပလ္လဉ္စင်္က မဟာရဟံ၊
အပ္ပေသိ နာဂရာဇူနံ၊ လောကနာထော နမဿိတုံ။
ပရိဘောဂစေတိယံ မယှံ၊ နာဂရာဇာ နမဿထ၊
တံ ဘဝိဿတိ ဝေါတာတာ၊ ဟိတာယ စ သုခါယ စ။
ဣစ္စေဝမာဒိံ သုဂတော၊ နာဂါနံ အနုသာသနံ၊
ကတွာ ဇေတဝနံ ဧဝ၊ ဂတော လောကာနုကမ္ပကောတိ။
နာဂဒီပါဂမနံ
ကလျာဏာဂမနံ
တတော သော တတိယေ ဝဿေ၊
နာဂိန္ဒော မဏိအက္ခိကော၊
ဥပသင်္ကမ္မ သမ္ဗုဒ္ဓံ၊
သတသင်္ဃံ နိမန္တယိ။
ဗောဓိတော အဋ္ဌမေ ဝဿေ၊ ဝသံ ဇေတဝနေ ဇိနော၊
နာထော ပဉ္စဟိ ဘိက္ခူနံ၊ သတေဟိ ပရိဝါရိတော။
ဒုတိယေ ဒိဝသေ ဘတ္တ-ကာလေ အာရောစိတေ ဇိနော၊
ရမ္မေ ဝေသာခမာသမှိ၊ ပုဏ္ဏမာယံ မုနိဿရော။
တတ္ထေဝ ပါရုပိတွာန၊ သင်္ဃာဋိံ ပတ္တမာဒိယ၊
အာဂါ ကလျာဏိဒေသံ တံ၊ မဏိအက္ခိနိဝေသနံ။
ကလျာဏိ စေတိယဌာနေ၊ ကတေ ရတနမဏ္ဍပေ၊
မဟာရဟမှိ ပလ္လင်္ကေ၊ သဟသင်္ဃေနု’ပါဝိသိ။
ဒိဗ္ဗေဟိ ခဇ္ဇဘောဇ္ဇေဟိ၊ သဂဏော သဂဏံ ဇိနံ၊
နာဂရာဇာ ဓမ္မရာဇံ၊ သန္တပ္ပေသိ သုမာနသော။
တတ္ထ ဓမ္မံ ဒေသယိတွာ၊ သတ္ထာ လောနုကမ္ပကော၊
ဥဂ္ဂန္တွာ သုမနေ ကူဋေ၊ ပဒံ ဒဿေသိ နာယကော။
တသ္မိံ ပဗ္ဗတပါဒမှိ၊ သဟသင်္ဃော ယထာသုခံ၊
ဒိဝါ ဝိဟာရံ ကတွာန၊ ဒီဃဝါပိ မုပါဂမိ။
တတ္ထ ¶ စေတိယဌာနမှိ၊ သသင်္ဃောဝ နိသီဒိယ၊
သမာဓိံ အပ္ပယီ နာထော၊ ဌာနာဂါရဝပတ္တိယာ။
တတော ဝုဋ္ဌာယ ဌာနမှာ၊ ဌာနာဌာနေသု ကောဝိဒေါ၊
မဟာမေဃဝနာရာမ-ဌာနမာဂ မဟာမုနိ။
မဟာဗောဓိဌိတဌာနေ၊ နိသီဒိတွာ သသာဝကော၊
သမာဓိံ အပ္ပယီ နာထော၊ မဟာထူပဌိတေ တထာ။
ထူပါရာမမှိ ထူပဿ၊ ဌိတဌာနေ တထေဝ စ၊
သမာဓိတော’ထ ဝုဋ္ဌာယ၊ သိလာစေတိယဌာနဂေါ။
သဟာဂတေ ဒေဝဂဏော၊ ဂဏီ သမနုသာသိယ၊
တတော ဇေတဝနံ ဗုဒ္ဓါ၊ ဗုဒ္ဓသဗ္ဗတ္ထကော အဂါ။
ဧဝံ လင်္ကာယ နာထော၊ ဟိတမမိတမတီ အာယတိံ ပေက္ခမာနော၊
တသ္မိံ ကာလမှိ လံကာသုရဘုဇဂဂဏာဒီနမတ္ထဉ္စ ပဿံ၊
အာဂါ တိက္ခတ္တုမေတံ အတိဝိပုလဒယော လောကဒီပေါ သုဒီပံ၊
ဒီပေါ တေနာယမာသိ သုဇနဗဟုမနော ဓမ္မဒီပါဝ ဘာသီတိ။
ကလျာဏာဂမနံ
သုဇနပ္ပသာဒသံဝေဂတ္ထာယ ကတေ မဟာဝံသေ
တထာဂတာဘိဂမနံ နာမ
ပဌမော ပရိစ္ဆေဒေါ။