📜
ဧကာဒသမ ပရိစ္ဆေဒ
ဒေဝါနံပိယတိဿာဘိသေကော
တဿစ္စယေ ¶ တဿ သုတော၊ မုဋသိဝေါ’တိ ဝိဿုတော၊
သုဝဏ္ဏပါလိယာ ပုတ္တော၊ ပတ္တော ရဇ္ဇမနာကုလံ။
မဟာမေဃဝနုယျာနံ၊ နာမနုဂဂုဏောဒိတံ၊
ဖလပုပ္ဖတရုပေတံ၊ သော ရာဇာ ကာရယိ သုဘံ။
ဥယျာနဌာနဂ္ဂဟဏေ၊ မဟာမေဃော အကာလဇော၊
ပါဝဿိတေန ဥယျာနံ၊ မဟာမေဃဝနံ အဟု။
သဋ္ဌိဝဿာနိ မုဋသိဝေါ၊ ရာဇာ ရာဇ္ဇမကာရယိ၊
အနုရာဓေ ပုရဝရေ၊ လံကာ ဘုဝဒနေ သုဘေ။
တဿ ပုတ္တာ ဒသာ’ဟေသုံ၊ အညမညဟိတေသိနော၊
ဒုဝေ ဓီတာ စာ’နုကုလာ၊ ကုလာနုစ္ဆဝိကာ အဟူ။
ဒေဝါနံ ပိယတိဿောတိ၊ ဝိဿုတော ဒုတိယော သုတော၊
တေသု ဘာတူသု သဗ္ဗေသု၊ ပုညာပညာဓိကော အဟု။
ဒေဝါနံ ပိယတိဿော သော၊ ရာဇာ’သိ ပိတုအစ္စယေ၊
တဿာ’ဘိသေကေန သမံ၊ ဗဟူန’စ္ဆရိယာန’ဟုံ။
လံကာဒီပမှိ သကလေ၊ နိဓယော ရတနာနိ စ၊
အန္တောဌိတာနိ ဥဂ္ဂန္တွာ၊ ပထဝီတလမာရုဟုံ။
လံကာဒီပသမီပမှိ၊ ဘိန္နနာဝါဂတာနိ စ၊
တတြဇာတာနိ စ ထလံ၊ ရတနာနိ သမာရုဟုံ။
ဆာတပဗ္ဗတပါဒမှိ၊ တိဿော စ ဝေဠုယဋ္ဌိယော၊
ဇာတာရထပတောဒေန၊ သမာနာ ပရိမာဏတော။
တာသု ဧကာလတာယဋ္ဌိ၊ ရဇတာ’ဘာ တဟိံ လတာ၊
သုဝဏ္ဏာဝဏ္ဏာရုစိရာ၊ ဒိဿန္တေတာ မနောရမာ။
ဧကာ ကုသုမာ ယဋ္ဌီတု၊ ကုသုမာနိ တဟိံ ပန၊
နာနာနိ နာနာဝဏ္ဏာနိ၊ ဒိဿန္တေ’တိ ဖုဋာနိ စ။
ဧကာသကုဏယဋ္ဌိတု ¶ ၊ တဟိံ ပက္ခိမိဂါ ဗဟူ၊
နာနာ စ နာနာဝဏ္ဏာ စ၊ သဇီဝါ ဝိယ ဒိဿရေ။
ဘယဂဇရထာမလကာ၊ ဝလယင်္ဂုလိဝေဌကာ၊
ကကုဓဖလာပါကတိကာ၊ ဣစ္စေတာ အဋ္ဌဇာတိယော။
မုတ္တာသမုဒါ ဥဂ္ဂန္တွာ၊ တီရေ ဝဋ္ဋိ ဝိယ ဌိတာ၊
ဒေဝါနံ ပိယတိဿဿ၊ သဗ္ဗံ ပုညဝိဇမ္ဘိတံ။
ဣန္ဒနီလံ ဝေဠုရိယံ၊ လောဟိတင်္ကမဏိဓိ’မေ၊
ရဇတာနိ ပနေ’တာနိ၊ မုတ္တာ တာ တာဝယဋ္ဌိယော။
သတ္တဟဗ္ဘန္တရေယေဝ၊ ရညော သန္တိကမာဟရုံ၊
တာနိ ဒိသွာ ပတီတော သော၊ ရာဇာ ဣတိ ဝိစိန္တယိ။
ရတနာနိ အနဂ္ဃာနိ၊ ဓမ္မာသောကော ဣမာနိမေ၊
သဟာယော’ရဟတေနာ’ညော၊ တဿ ဒဿံ ဣမာန’တော။
ဒေဝါနံ ပိယတိဿော စ၊ ဓမ္မာသောကော စ တေ ဣမေ၊
ဒွေ အဒိဋ္ဌသဟာယာဟိ၊ စိရပ္ပဘုတိ ဘူပတိ။
ဘာဂိနေယျံ မဟာရိဋ္ဌံ၊ အမစ္စံ ပမုခံ တတော၊
ဒိဇံ အမစ္စံ ဂဏတံ၊ ရာဇာ တေ စတုရော ဇနေ။
ဒူတော ကတွာန ပါဟေသိ၊ ဗလောဃပရိဝါရိတေ၊
ဂါဟာ ပေတွာ အနဂ္ဃာနိ၊ ရတနာနိ ဣမာနိ သော။
မဏိဇာတီ စ တိဿော တာ၊ တိဿော စ ရထယဋ္ဌိယော၊
သင်္ခဉ္စ ဒက္ခိဏာဝတ္တံ၊ မုတ္တာ ဇာတီ စ အဋ္ဌ တာ။
အာရုယှ ဇမ္ဗုကောလမှိ၊ နာဝံ သတ္တဒိနေန တေ၊
သုခေန တိတ္ထံ လဒ္ဓါန၊ သတ္တာဟေန တတော ပုန။
ပါဋလိပုတ္တံ ဂန္တွာန၊ ဓမ္မာသောကဿ ရာဇိနော၊
အဒံသု ပဏ္ဏာကာရေတေ၊ ဒိသွာ တာနိ ပသီဒိ သော။
ရတနာနိ’ဒိသာနေတ္ထ၊ နတ္ထိ မေ ဣတိ စိန္တိယ၊
အဒါ သေနာပတိဋ္ဌာနံ၊ တုဋ္ဌော’ရိဋ္ဌဿ ဘူပတိ။
ပေါရောဟိစ္စဗြာဟ္မဏဿ၊ ဒဏ္ဍနာယတံ ပန၊
အဒါသိ တဿာ’မစ္စဿ၊ သေဋ္ဌိတ္တံ ဂဏကဿ တု။
တေသံ အနပ္ပကေ ဘောဂေ၊ ဒတွာ ဝါသဃရာနိ စ၊
မဟာမစ္စေဟိ မန္တေန္တော၊ ပဿိတွာ ပဋိပါဘတံ။
ဝါလဗီဇနီ ¶ မုဏှိသံ၊ ခဂ္ဂံ ဆတ္တဉ္စ ပါဒုကံ၊
မောဠိံ ဝတံ သပါမင်္ဂံ၊ ဘိင်္ကာရံ ဟရိစန္ဒနံ။
အဓောဝိမံ ဝတ္ထကောဋိံ၊ မဟဂ္ဃံ ဟတ္ထပုဉ္ဆနိံ၊
နာဂါ’ဟဋံ အဉ္ဇနဉ္စ၊ အရုဏာဘဉ္စ မတ္တိကံ။
အနောတတ္တောဒကဉ္စေဝ၊ ဂင်္ဂါသလိလမေဝ စ၊
သင်္ခဉ္စ နန္ဒိယာဝဋ္ဋံ၊ ဝဍ္ဎမာနံ ကုမာရိကံ။
ဟေမဘောဇနကဏ္ဍဉ္စ၊ သိဝိကဉ္စ မဟာရဟံ၊
ဟရီဋကံ အာမလကံ၊ မဟဂ္ဃံ အမတောသဓံ။
သုကာဟဋာနံ သာလီနံ၊ သဋ္ဌိဝါဟသတာနိ စ၊
အဘိသေကော ပကရဏံ၊ ပရိဝါရဝိသေသိတံ။
ဒတွာ ကာလေ ဘဟာယဿ၊ ပဏ္ဏာကာရေ နရိဿရော၊
ဒူတေ ပါဟေသိသဒ္ဓမ္မ-ပဏ္ဏာကာရမိမမ္ပိစ။
အဟံ ဗုဒ္ဓဉ္စ ဓမ္မဉ္စ၊ သင်္ဃဉ္စ သရဏံ ဂတော၊
ဥပါသကတ္တံ ဒေသေသိံ၊ သကျပုတ္တဿ သာသနေ။
တွမ္ပိမာနိ ရတနာနိ၊ ဥတ္တမာနိ နရုတ္တမ၊
စိတ္တံ ပသာဒယိတွာန၊ သဒ္ဓါယ သရဏံ ဝဇ။
‘‘ကရောထ မေ သဟာယဿ၊ အဘိသေကံ ပုနော’’ ဣတိ၊
ဝတွာ သဟယာ’မစ္စေတေ၊ သက္ကရိတွာ စ ပေသယိ။
ပဉ္စမာသေ ဝသိတွာန၊ တေ မစ္စာ’တိဝသက္ကတာ၊
ဝေသာခသုက္ခပက္ခာဒိ-ဒိနေ ဒူတာ ဝိနိဂ္ဂတာ။
တာမလိတ္တိယမာရုယှ၊ နာဝံ တေဇမ္ဗုကောလကေ၊
ဩရုယှ ကူပံ ပဿိံသု၊ ပတွာ ဒွါဒသိယံ ဣဓ။
အဒံသု ပဏ္ဏာကာရေ တေ၊ ဒူတာ လံကာဒီပဿတေ၊
တေသံ မဟန္တံ သက္ကာရံ၊ လံကာပတိ အကာရယိ။
တေ မဂ္ဂသိရမာသဿ၊ အာဒိစန္ဒောဒယေဇိနေ၊
အဘိသိတ္တဉ္စ လံကိန္ဒံ၊ အမစ္စာ သာမိဘတ္တိနော။
ဓမ္မာသောကဿ ဝစနံ၊ ဝတွာ သာမိ ဟိတေရတာ၊
ပုနောပိ အဘိသိဉ္စိံသု၊ လံကာဟိတသုခေရတံ။
ဝေသာခေ ¶ နရပတိ ပုဏ္ဏမာယမေဝံ၊
ဒေဝါနံ ပိယဝစနော ပဂူဠနာမော၊
လံကာယံ ပဝီတတပီတိ ဥဿဝါယံ၊
အတ္တာနံ ဇနသုခဒေါ’ဘိသေစယီ သောတိ။
သုဇနပ္ပသာဒသံဝေဂတ္ထာယ ကတေ မဟာဝံသေ
ဒေဝါနံပိယတိဿာဘိသေကောနာမ
ဧကာဒသမော ပရိစ္ဆေဒေါ။