📜
ဒွါဒသမ ပရိစ္ဆေဒ
နာနာဒေသပသာဒေါ
ထေရော မောဂ္ဂလိပုတ္တော သော၊ ဇိနသာသန ဇောတကော၊
နိဋ္ဌာပေတွာန သံဂီတိံ၊ ပေက္ခမာနော အနာဂတံ။
သာသနဿ ပတိဋ္ဌာနံ၊ ပစ္စန္တေသု အဝေက္ခိယ၊
ပေသေသိ ကတ္တိကေ မာသေ၊ တေတေ ထေရေ တဟိံ တဟိံ။
ထေရံ ကသ္မီရဂန္ဓာရံ၊ မဇ္ဈန္တိကမပေသယိ၊
အပေသယီ မဟာဒေဝ-တ္ထေရံ မဟိသမဏ္ဍလံ။
ဝနဝါသိံ အပေသယိ၊ ထေရံ ရက္ခိတနာမကံ၊
တထာ’ပရန္တကံ ယောန-ဓမ္မရက္ခိတနာမကံ။
မဟာရဋ္ဌံ မဟာဓမ္မ-ရက္ခိတတ္ထေရ နာမကံ၊
မဟာရက္ခိတ ထေရံ တံ၊ ယောန လောကမပေသယိ။
ပေသေသိ မဇ္ဈိမံ ထေရံ၊ ဟိမဝန္တပဒေသကံ၊
သုဝဏ္ဏဘူမိံ ထေရေ ဒွေ၊ သောဏမုတ္တရ မေဝ စ။
မဟာမဟိန္ဒတ္ထေရံ တံ၊ ထေရ ဣဋ္ဋိယမုတ္တိယံ၊
သမ္ဗလံ ဘဒ္ဒသာလဉ္စ၊ သကေ သဒ္ဓိဝိဟာရိကေ။
လံကာဒီပေ ¶ မနုညမှိ၊ မနုညံ ဇိနသာသနံ၊
ပတိဋ္ဌာပေထ တုမှေ’တိ၊ ပဉ္စ ထေရေ အပေသယိ။
တဒါ ကသ္မီရဂန္ဓာရေ၊ ပက္ကံ သဿံ မဟိဒ္ဓိကော၊
အရဝါလော နာဂရာဇာ၊ ဝဿံ ကရကသညိတံ။
ဝဿာ ပေတွာ သမုဒ္ဒသ္မိံ၊ သဗ္ဗံ ခိပတိဒါရုဏော၊
တတြ မဇ္ဈန္တိကတ္ထေရော၊ ခိပ္ပံ ဂန္တွာ ဝိဟာယသာ။
အရဝါလဒဟေဝါရိ-ပိဋ္ဌေ စင်္ကမနာဒိကေ၊
အကာသိ ဒိသွာ တံနာဂါ၊ ရုဋ္ဌာရညော နိဝေဒယုံ။
နာဂရာဇာ’ထရုဋ္ဌော သော၊ ဝိဝိဓာ ဘိသိကာ’ကရိ၊
ဝါတာ မဟန္တာ ဝါယန္တိ၊ မေဃော ဂဇ္ဇတိ ဝဿတိ။
ဖလန္တျ’သနိယော ဝိဇ္ဇု၊ နိစ္ဆရန္တိ တတော တတော၊
မဟိရုဟာ ပဗ္ဗတာနံ၊ ကူဋာနိ ပပတန္တိ စ။
ဝိရူပရူပါ နာဂါ စ၊ ဘိံသာပေန္တိ သမန္တတော၊
သယံ ဓုပါယတိ ဇလတိ၊ အက္ကောသန္တော အနေကဓာ။
သဗ္ဗံ တံ ဣဒ္ဓိယာ ထေရော၊ ပဋိဗာဟိယ ဘိံသနံ၊
အဝေါစ နာဂရာဇံ တံ၊ ဒဿေန္တော ဗလမုတ္တမံ။
သဒေဝ ကောပိ စေ လောကော၊ အာဂန္တွာ တာသယေယျ မံ၊
န မေ ပဋိဗလော အဿ၊ ဇနေတုံ ဘယဘေရဝံ။
သစေ’ပိ တွံ မဟိံ သဗ္ဗံ၊ သသမုဒ္ဒံ သပဗ္ဗတံ၊
ဥက္ခိပိတွာ မဟာနာဂ၊ ခိပေယျာသိ မမော’ပရိ။
နေဝ မေ သက္ကုဏေယျာသိ၊ ဇနေတုံ ဘယဘေရဝံ၊
အညဒတ္ထု တဝေ‘ဝ’ဿ၊ ဝိဃာတော ဥရဂါဓိပ။
တံသုတွာ နိမ္မဒဿ’ဿ၊ ထေရော ဓမ္မမဒေသယိ၊
တတော သရဏသီလေသု၊ နာဂရာဇာ ပတိဋ္ဌဟိ။
တထေဝ စတုရာသီတိ-သဟဿာနိ ဘုဇင်္ဂမာ၊
ဟိမဝန္တေဝ ဂန္ဓဗ္ဗာ၊ ယက္ခာ ကုမ္ဘဏ္ဍကာ ဗဟူ။
ပဏ္ဍကော နာမ ယက္ခော တု၊ သဒ္ဓိံဟာရိတ ယက္ခိယာ၊
ပဉ္စသတေဟိ ပုတ္တေဟိ၊ ဖလံ ပါပုဏိ အာဒိကံ။
‘‘မာ’’ဒါနိ ¶ ကောဓံ ဇနိယိတ္ထ၊ ဣတော ဥဒ္ဓံ ယထာပုရေ၊
သသဃာတဉ္စ မာ’ကတ္ထ၊ သုခကာမာဟိ ပါဏိနော။
ကရောထ မေတ္တံ သတ္တေသု၊ ဝသန္တု မနုဇာ သုခံ၊
ဣတိ တေနာ’နုသိဋ္ဌာ တေ၊ တထေဝ ပဋိပဇ္ဇိသုံ။
တတော ရတနပလ္လင်္ကေ၊ ထေရံ သော ဥရဂါဓိပေါ၊
နိသီဒါပိယ အဋ္ဌာသိ၊ ဗီဇမာနော တဒန္တိကေ။
တဒါ ကသ္မီရဂန္ဓာရ-ဝါသိနော မနုဇာ’ဂတာ၊
နာဂရာဇဿ ပူဇတ္ထံ၊ မန္တွာ ထေရံ မဟိဒ္ဓိကံ။
ထေရမေဝါ’ဘိ ဝါဒေတွာ၊ ဧကမန္တံ နိသီဒိသုံ၊
တေသံ ဓမ္မမဒေသေသိ၊ ထေရော အာသိဝိသောပမံ။
အသီတိယာ သဟဿာနံ၊ ဓမ္မာဘိသမယော အဟု၊
သတသဟဿ ပုရိသာ၊ ပဗ္ဗဇုံ ထေရသန္တိကေ။
တတောပ္ပဘုပတိ ကသ္မိရ-ဂန္ဓာရံ တေ ဣဒါနိပိ၊
အာသုံ ကာသာဝ ပဇ္ဇောတာ၊ ဝတ္ထုတ္တယပရာယနာ။
ဂန္တွာ မဟာဒေဝတ္ထေရော၊ ဒေသံ မဟိသမဏ္ဍလံ၊
သုတ္တန္တံ ဒေဝဒူတံ သော၊ ကထေသိ ဇနမဇ္ဈဂေါ။
စတ္တာလီသ သဟဿာနိ၊ ဓမ္မစက္ခုံ ဝိသောဓယုံ၊
စတ္တာလီသ သဟဿာနိ၊ ပဗ္ဗဇိံသု တဒန္တိကေ။
ဂန္တွာ’ထ ရက္ခိတတ္ထေရော၊ ဝနဝါသိံ နဘေ ဌိတော၊
သံယုတ္တမနမတဂ္ဂံ၊ ကထေသိ ဇနမဇ္ဈဂေါ။
သဋ္ဌိ နရသဟဿာနံ၊ ဓမ္မာဘိသမယော အဟု၊
သတ္တတိံသ သဟဿာနိ၊ ပဗ္ဗဇိံသု တဒန္တိကေ။
ဝိဟာရာနံ ပဉ္စသတံ၊ တသ္မိံဒေသေ ပတိဋ္ဌဟိ၊
ပတိဋ္ဌာပေသိ တတ္ထေဝံ၊ ထေရော သော ဇိနသာသနံ။
ဂန္တွာ’ပရန္တကံ ထေရော၊ ယောနကော ဓမ္မရက္ခိတော၊
အဂ္ဂိက္ခန္ဓောပမံ သုတ္တံ၊ ကထေတွာ ဇနမဇ္ဈဂေါ။
သတ္တတိံသ သဟဿာနိ၊ ပါဏေ တတ္ထ သမာဂတေ၊
ဓမ္မာမတမပါယေသိ၊ ဓမ္မာ ဓမ္မေသု ကောဝိဒေါ။
ပုရိသာနဉ္စ သဟဿဉ္စ၊ ဣတ္ထိယော စ တတော’ဓိကာ၊
ခတ္တိယာနံ ကုလာယေဝ၊ နိက္ခမိတွာန ပဗ္ဗဇုံ။
မဟာရဋ္ဌမိသီ ¶ ဂန္တွာ၊ သော မဟာဓမ္မရက္ခိတော၊
မဟာနာရဒကဿပဝှံ၊ ဇာတကံ ကထယီ တဟိံ။
မဂ္ဂဖလံ ပါပုဏိံသု၊ စတုရာသီတိ သဟဿကာ၊
တေရသန္တု သဟဿာနိ၊ ပဗ္ဗဇိံသု တဒန္တိကေ။
ဂန္တွာန ယောနဝိသယံ၊ သော မဟာဓမ္မရက္ခိတော ဣသိ၊
ကာဠကာရာမ သုတ္တန္တံ၊ ကထေသိ ဇနမဇ္ဈဂေါ။
ပါဏသတ သဟဿာနိ၊ သဟဿာနိ စ သတ္တတိ၊
မဂ္ဂဖလံ ပါပုဏိံသု၊ ဒသ သဟဿာနိ ပဗ္ဗဇုံ။
ဂန္တွာ စတူဟိ ထေရေဟိ၊ ဒေသေသိ မဇ္ဈိမော ဣသိ၊
ဟိမဝန္တပဒေသသ္မိံ၊ ဓမ္မစက္ကပဝတ္တနံ။
မဂ္ဂဖလပါပုဏိံသု၊ အသီတိပါဏ ကောဋိယော၊
ဝိသုံ တေ ပဉ္စရဋ္ဌာနိ၊ ပဉ္စထေရာ ပသာဒယုံ။
ပုရိသသတသဟဿာနိ၊ ဧကေကဿေဝ သန္တိကေ၊
ပဗ္ဗဇိံသု ပသာဒေန၊ သမ္မာသမ္ဗုဒ္ဓ သာသနေ။
သဒ္ဓိံ ဥတ္တရထေရေန၊ သောဏတ္ထေရော မဟိဒ္ဓိကော၊
သုဝဏ္ဏဘူမိံ အဂမာ၊ တသ္မိံ တု သမယေ ပန။
ဇာတေ ဇာတေ ရာဇဂေဟေ၊ ဒါရကေ ရုဒ္ဒရက္ခသီ၊
သမုဒ္ဒတော နိက္ခမိတွာ၊ ဘက္ခိတွာ ပန ဂစ္ဆတိ။
တသ္မိံ ခဏေ ရာဇဂေဟေ၊
ဇာတော ဟောတိ ကုမာရကော၊
ထေရေ မနုဿာ ပဿိတွာ၊
ရက္ခသာနံ သဟာယကာ။
ဣတိ စိန္တိယ မာရေတုံ၊ သာ ယုဝါ ဥပသင်္ကမုံ၊
‘‘ကိမေတန္တိ’’စ ပုစ္ဆိတွာ၊ ထေရံ တေ ဧဝ မာဟုတေ။
သမဏာ မယံ ဟိမဝန္တာ၊ န ရက္ခသိ သဟာယကာ၊
ရက္ခသီ သာ သပရိသာ၊ နိက္ခန္တာ ဟောတိ သာဂရာ။
တံ ဒိသွာန မဟာရာဝံ၊ ဝိရဝိံသု မဟာဇနာ၊
ဒိဂုဏေ ရက္ခသေ ထေရော၊ မာပယိတွာ ဘယာနကေ။
တံ ¶ ရက္ခသိံ သပရိသံ၊ ပရိက္ခိပိ သမန္တတော၊
ဣဒံ ဣမေဟိ ဥဒ္ဓန္တိ၊ မန္တွာ ဘီတာ ပလာယိသာ။
တဿ ဒေသဿ အာရက္ခံ၊ ဌပေတွာန သမန္တတော၊
တသ္မိံ သမာဂမေ ထေရော၊ ဗြဟ္မဇာလမဒေသယိ။
သရဏေသု စ သီလေသု၊ အဋ္ဌံသု ဗဟဝေါ ဇနာ၊
သဋ္ဌိယာ တု သဟဿာနံ၊ ဓမ္မာဘိသမယော အဟု။
အဍ္ဎုဍ္ဎာနိ သဟဿာနိ၊ ပဗ္ဗဇုံ ကုလဒါရကာ၊
ပဗ္ဗဇိံသု ဒိယဍ္ဎန္တု၊ သဟဿံ ကုလဓီတရော။
တတောပ္ပဘုတိ သဉ္ဇာတေ၊ ရာဇဂေဟေ ကုမာရကေ၊
နာမံ ကရိံသု ရာဇာနော၊ သောဏုတ္တရ သနာမကေ။
မဟာဇနဿာပိ ဇိနဿ ကဍ္ဎနံ၊
ဝိဟာယ ပတ္တံ အမတံ သုခမ္ပိတေ၊
ကရိံသု လောကဿ ဟိတံ တဟိံ တဟိံ၊
ဘဝေယျ ယော လောကဟိတေ ပမာဒဝါတိ။
သုဇနပ္ပသာဒ သံဝေဂတ္ထာယ ကတေ မဟာဝံသေ
နာနာဒေသပသာဒေါ နာမ ဒွါဒသမော ပရိစ္ဆေဒေါ။