📜
ပဉ္စဒသမ ပရိစ္ဆေဒ
မဟာဝိဟာရ ပဋိဂ္ဂဟကော
ဟတ္ထိသာလာပိ သမ္ဗာဓာ၊ ဣတိ တတ္ထ သမာဂတာ၊
တေ နန္ဒနဝနေ ရမ္မေ၊ ဒက္ခိဏဒွါရတော ဗဟိ။
ရာဇုယျာနေ ဃနစ္ဆာယေ၊ သီတလေ နီလသဒ္ဒလေ၊
ပညာပေသုံ အာသနာနိ၊ ထေရာနံ သာဒရာ နရာ။
နိက္ခမ္မ ဒက္ခိဏဒွါရာ၊ ထေရော တတ္ထ နိသီဒိ စ၊
မဟာကုလီနာ စာ’ဂမ္မ၊ ဣတ္ထိယော ဗဟုကာ တဟိံ။
ထေရံ ¶ ဥပနိသီဒိံသု၊ ဥယျာနံ ပူရယန္တိယော၊
ဗာလပဏ္ဍိတသုတ္တန္တံ၊ တာသံ ထေရော အဒေသယိ။
သဟဿံ ဣတ္ထိယော တာသု၊ ပဌမံ ဖလမဇ္ဈဂုံ၊
ဧဝံ တတ္ထေဝ ဥယျာနေ၊ သာယဏှသမယော အဟု။
တတော ထေရာ နိက္ခမိံသု၊ ‘‘ယာမ တံ ပဗ္ဗတံ’’ ဣတိ၊
ရညော ပဋိနိဝေဒေသုံ၊ သီဃံ ရာဇာ ဥပါဂမိ။
ဥပါဂမ္မာ’ဗြဝီ ထေရံ၊ ‘‘သာယံ ဒူရော စ ပဗ္ဗတော၊
ဣဓေဝ နန္ဒနုယျာနေ၊ နိဝါသော ဖာသုကော ဣတိ။
ပုရဿ အစ္စာသန္နတ္တာ၊ ‘‘အသာရုပ္ပ’’န္တိ ဘာသိတေ၊
‘‘မဟာမေဃဝနုယျာနံ၊ နာတိဒူရာတိ သန္တိကေ။
ရမ္မံ ဆာယူဒကူပေတံ၊ နိဝါသော တတ္ထ ရောစတု၊
နိဝတ္တိတဗ္ဗံ ဘန္တေ’’န္တိ၊ ထေရော တတ္ထ နိဝတ္တယိ။
တသ္မိံ နိဝတ္တဌာနမှိ၊ ကဒမ္ဗနဒိယန္တိကေ၊
နိဝတ္တစေတိယံ နာမ၊ ကတံ ဝုစ္စတိ စေတိယံ။
တံ နန္ဒနာ ဒက္ခိဏေန၊ နယံ ထေရံ ရထေသဘော၊
မဟာမေဃဝနုယျာနံ၊ ပါစိနဒွါရကံ နယိ။
တတ္ထ ရာဇဃရေ ရမ္မေ၊ မဉ္စပီဌာနိ သာဓုကံ၊
သာဓူတိ သန္ထရာပေတွာ၊ ‘‘ဝသတေ’တ္တ သုခံ’’ ဣတိ။
ရာဇာ ထေရေ’ဘိဝါဒေတွာ၊ အမစ္စပရိဝါရိတော၊
ပုရံ ပါဝိသိ ထေရာ တု၊ တံ ရတ္တိံ တတ္ထ တေ ဝသုံ။
ပဘာတေယေဝ ပုပ္ဖာနိ၊ ဂါဟေတွာ ဓရဏီပတိ၊
ထေရေ ဥပစ္စ ဝန္ဒိတွာ၊ ပူဇေတွာ ကုသုမေဟိ စ။
ပုစ္ဆိ ကစ္စိ သုခံ ဝုဋ္ဌံ၊ ဥယျာနံ ဖာသုကံ ဣတိ၊
သုခံ ဝုတ္ထံ မဟာရာဇ၊ ဥယျာနံ ယတိ ဖာသုကံ။
အာရာမော ကပ္ပတေ ဘန္တေ၊ သင်္ဃဿာ’’တိ အပုစ္ဆိ သော၊
‘‘ကပ္ပတေ’’ဣတိ ဝတွာန၊ ကပ္ပာကပ္ပေသု ကောဝိဒေါ။
ထေရော ဝေဠုဝနာရာမ၊ ပဋိဂ္ဂဟဏမဗြဝိ၊
တံ သုတွာ အဘိဟဋ္ဌော သော၊ တုဋ္ဌဟဋ္ဌော မဟာဇနော။
ထေရာနံ ¶ ဝန္ဒနတ္ထာယ၊ ဒေဝီ တု အနုလာဂတာ၊
သဒ္ဓိံ ပဉ္စသတိတ္ထီဟိ၊ ဒုတိယံ ဖလမဇ္ဈဂါ။
သာ ပဉ္စသတာ ဒေဝီ၊ အနုလာ’ဟ မဟီပတိ၊
‘‘ပဗ္ဗဇိဿာမ ဒေဝါ’’တိ၊ ရာဇာ ထေရမဝေါစ သော။
ပဗ္ဗာဇေထ ဣမာယော’’တိ၊ ထေရော အာဟ မဟီပတိံ၊
‘‘န ကပ္ပတိ မဟာရာဇ၊ ပဗ္ဗာဇေတုံ ထိယော ဟိနော။
အတ္ထိ ပါဋလိပုတ္တသ္မိံ၊ ဘိက္ခုနီ မေ ကနိဋ္ဌိကာ၊
သင်္ဃမိတ္တာတိ နာမေန၊ ဝိဿုတာ သာ ဗဟုဿုတာ။
နရိန္ဒသမဏိန္ဒဿ၊ မဟာဗောဓိဒုမိန္ဒတော၊
ဒက္ခိဏံ သာခမာဒါယ၊ တထာ ဘိက္ခုနိယော ဝရာ။
အာဂစ္ဆတူ’တိ ပေသေဟိ၊ ရညော နော ပိတု သန္တိကံ၊
ပဗ္ဗာဇေဿတိ သာ ထေရီ၊ အာဂတာ ဣတ္ထိယော ဣမာ။
‘‘သာဓု’’တိ ဝတွာ ဂဏှိတွာ၊ ရာဇာ ဘိင်္ကာရမုတ္တမံ၊
‘‘မဟာမေဃဝနုယျာနံ၊ ဒမ္မိ သင်္ဃဿိ’မံ ဣတိ။
မဟိန္ဒထေရဿ ကရေ၊ ဒက္ခိဏောဒကမာ’ကိရီ၊
မဟိယာ ပတိတေ တောယေ၊ အကမ္ပိတ္ထ မဟာ မဟီ။
‘‘တသ္မာ ကမ္ပတိ ဘူမီ’’တိ၊ ဘူမိပါလော အပုစ္ဆိ တံ၊
ပတိဋ္ဌိတတ္တာ ဒီပမှိ၊ သာသနဿာ’တိ သော ဗြဝိ။
ထေရဿ ဥပနာမေသိ၊ ဇာတိပုပ္ဖာနိ ဇာတိမာ၊
ထေရော ရာဇဃရံ ဂန္တွာ၊ တဿ ဒက္ခိဏတော ဌိတော။
ရုက္ခမှိ ပိစုလေ အဋ္ဌ၊ ပုပ္ဖမုဋ္ဌီ သမောကိရီ၊
တတ္ထာပိ ပုထဝီ ကမ္ပိ၊ ပုဋ္ဌော တဿာ’ဟ ကာရဏံ။
အဟောသိ တိဏ္ဏံ ဗုဒ္ဓါနံ၊ ကာလေ’ပိ ဣဓ မာလကော၊
နရိန္ဒသင်္ဃကမ္မတ္ထံ၊ ဘဝိဿတိ ဣဒါနိပိ။
ရာဇဂေဟာ ဥတ္တရတော၊ စာရုပေါက္ခရဏိံ အဂါ၊
တတ္တကာ နေဝ ပုပ္ဖာနိ၊ ထေရော တတ္ထာပိ ဩကိရိ။
တတ္ထာ’ပိ ပုထုဝီ ကမ္ပိ၊ ပုဋ္ဌော တဿာ’ဟ ကာရဏံ၊
‘‘ဇန္တဃရ ပေါက္ခရဏီ၊ အယံ ဟေဿတိ ဘူမိပ’’။
တဿေဝ ¶ ရာဇဂေဟဿ၊ ဂန္တွာန ဒွါရကောဋ္ဌကံ၊
တတ္တကေဟေ’ဝ ပုပ္ဖေဟိ၊ တံ ဌာနံ ပူဇယီ ဣသိ။
တတ္ထာပိ ပုထုဝီကမ္ပိ၊ ဟဋ္ဌလောမော အတီဝသော၊
ရာဇာ တံ ကာရဏံ ပုစ္ဆိ၊ ထေရော တဿာ’ဟ ကာရဏံ။
ဣမမှိ ကပ္ပေ ဗုဒ္ဓါနံ၊ တိဏ္ဏန္နံ ဗောဓိရုက္ခတော၊
အာနေတွာ ဒက္ခိဏာသာခါ၊ ရောပိတာ ဣဓ ဘူမိပ။
တထာဂတဿ အမှာကံ၊ ဗောဓိသာခါပိ ဒက္ခိဏာ၊
ဣမသ္မိံယေဝ ဌာနမှိ၊ ပတိဋ္ဌိဿတိ ဘူမိပ။
တတော’ဂမာ မဟာထေရော၊ မဟာမုစလမာလကံ၊
တတ္တကာနေဝ ပုပ္ဖာနိ၊ တသ္မိံ ဌာနေ သမောကိရိ။
တထာပိ ပုထဝီ ကမ္ပိ၊ ပုဋ္ဌော တဿာ’ဟ ကာရဏံ၊
သင်္ဃဿု ပေါသထာ ဂါရံ၊ ဣဓ ဟေဿတိ ဘူမိပ။
ပဉှမ္ဗမာလကဋ္ဌာနံ၊ တတော’ဂမာ မဟီပတိ၊
သုပက္ကံ အမ္ဗပက္ကဉ္စ၊ ဝဏ္ဏဂန္ဓရသုတ္တမံ။
မဟန္တံ ဥပနာမေသိ၊ ရညော ဥယျာနပါလကော၊
တံ ထေရဿုပနာမေသိ၊ ရာဇာ အတိမနောရမံ။
ထေရော နိသီဒနာကာရံ၊ ဒဿေသိ ဇနတာ ဟိတော၊
အတ္ထရာပေသိ တတ္ထေဝ၊ ရာဇာ အတ္ထရဏံ ဝရံ။
အဒါ တတ္ထ နိသိန္နဿ၊ ထေရဿမ္ဗံ မဟီပတိ၊
ထေရော တံ ပရိဘုဉ္ဇိတွာ၊ ရောပနတ္ထာယ ရာဇိနော။
အမ္ဗဋ္ဌိကံ အဒါ ရာဇာ၊ တံ သယံ တတ္ထ ရောပယိ၊
ဟတ္ထေ တဿောပရိထေရော၊ ဓောဝိ တဿ ဝိရုဠှိယာ။
တံ ခဏံယေဝ ဗီဇမှာ၊ တမှာ နိက္ခမ္မ အင်္ကုရော၊
ကမေနာ’တိ မဟာရုက္ခော၊ ပတ္တပက္ကဓရော အဟု။
တံ ပါဋိဟာရိယံ ဒိသွာ၊ ပရိသာ သာ သရာဇိကာ၊
နမဿမာနာ အဋ္ဌာသိ၊ ထေရေ ဟတ္ထတနုရုဟာ။
ထေရော ¶ တဒါ ပုပ္ဖမုဋ္ဌိ၊ အဋ္ဌ တတ္ထ သမောကိရိ၊
တထာပိ ပုထဝီကမ္ပိ၊ ပုဋ္ဌော တဿာ’ဟ ကာရဏံ။
သင်္ဃဿပ္ပန္နလာဘာနံ၊ အနေကေသံ နရာဓိပ၊
သင်္ဂမ္မဘာဇနဌာနံ၊ ဣဒံ ဌာနံ ဘဝိဿတိ။
တတော ဂန္တွာ စတုဿာလ-ဌာနံ တတ္ထ သမောကိရိ၊
တတ္တကာနေဝ ပုပ္ဖာနိ၊ ကမ္ပိ တတ္ထာပိ မေဒိနီ။
တံ ကမ္ပကာရဏံ ပုစ္ဆိ၊ ရာဇာ ထေရော ဝိယာကရိ၊
တိဏ္ဏန္နံ ပုဗ္ဗဗုဒ္ဓါနံ၊ ရာဇုယျာန ပဋိဂ္ဂဟေ။
ဒါန ဝတ္ထုနာ’ဟဋာနိ၊ ဒီပဝါသီဟိ သဗ္ဗတော၊
ဣဓ ဌပေတွာ ဘောဇေသုံ၊ သသင်္ဃေ သုဂတေ တယော။
ဣဒါနိ ပန ဧတ္ထေဝ၊ စတုဿာလာ ဘဝိဿတိ၊
သင်္ဃဿ ဣဓ ဘတ္တဂ္ဂံ၊ ဘဝိဿတိ နရာဓိပ။
မဟထူပဌိတဌာနံ၊ ဌာနာဌာနဝိဒူတတော၊
အဂမာသိ မဟာထေရော၊ မဟိန္ဒော ဒီပဒီပနော။
တဒါ အန္တောပရိက္ခေပေ၊ ရာဇုယျာနဿ ခုဒ္ဒိကာ၊
ကကုဓဝှာ အဟု ဝါပီ၊ တဿော’ပရိ ဇလန္တိကေ။
ထူပါရဟံ ထလဌာနံ၊ အဟု ထေရေ တဟိံ ဂတေ၊
ရညော စမ္ပကပုပ္ဖာနံ၊ ပုဋကာန’ဋ္ဌ အာဟရုံ။
တာနိ စမ္ပကပုပ္ဖာနိ၊ ရာဇာ ထေရဿု’ပါနယိ၊
ထေရော စမ္ပကပုပ္ဖေဟိ၊ တေဟိ ပူဇေသိ တံ ဖလံ။
တတ္ထာပိ ပုထဝီ ကမ္ပိ၊ ရာဇာ တံ ကမ္ပကာရဏံ၊
ပုစ္ဆိ ထေရော’နု ပုဗ္ဗေန၊ အာဟတံ ကမ္ပကာရဏံ။
ဣဒံ ဌာနံ မဟာရာဇ၊ စတုဗုဒ္ဓ နိသေဝိတံ၊
ထူပါရဟံ ဟိတတ္ထာယ၊ သုခတ္ထာယ စ ပါဏိနံ။
ဣမမှိ ကပ္ပေ ပဌမံ၊ ကကုသန္ဓော ဇိနော အဟု၊
သဗ္ဗ ဓမ္မဝိဒူ သတ္ထာ၊ သဗ္ဗလောကာနုကမ္ပကော။
မဟာတိတ္ထဝှယံ အာသိ၊ မဟာမေဃဝနံ ဣဒံ၊
နဂရံ အဘယံ နာမ၊ ပုရတ္ထိမဒိသာယ’ဟု။
ကဒမ္ဗ နဒိယာ ပါရေ၊ တတ္ထ ရာဇာ’ဘယော အဟု၊
ဩဇဒီပေါတိ နာမေန၊ အယံ ဒီပေါ တဒါအဟု။
ရက္ခသေဟိ ¶ ဇနဿေ’တ္ထ၊ ရောဂေါ ပဇ္ဇရကော အဟု၊
ကကုသန္ဓော ဒသဗလော၊ ဒိသွာန တဒုပဒ္ဒဝံ။
တံ ဂန္တွာ သတ္တဝိနယံ၊ ပဝတ္တိံ သာသနဿ စ၊
ကာတုံ ဣမသ္မိံ ဒီပသ္မိံ၊ ကရုဏာ ဗလစောဒိတော။
စတ္တာလီသသဟဿေဟိ၊ တာဒီဟိ ပရိဝါရိတော၊
နဘသာ’ဂမ္မ အဋ္ဌာသိ၊ ဒေဝကူဋမှိ ပဗ္ဗတေ။
သမ္ဗုဒ္ဓဿာ’နုဘာဝေန၊ ရောဂေါ ပဇ္ဇရကော ဣဓ၊
ဥပသန္တော မဟာရာဇ၊ ဒီပမှိ သကလေ တဒါ။
ကတ္ထ ဌိတော အဓိဋ္ဌာသိ၊ နရိဿရ မုနိဿရော၊
သဗ္ဗေ မံ အဇ္ဇ ပဿန္တု၊ ဩဇဒီပမှိ မာနုသာ။
အာဂန္တုကာမာ သဗ္ဗေဝ၊ မနုဿာ မမ သန္တိကံ၊
အာဂစ္ဆန္တု အကိစ္ဆေန၊ ခိပ္ပဉ္စာပိ မဟာမုနိ။
ဩဘာသယန္တံ မုနိန္ဒံ တံ၊ ဩဘာသန္တဉ္စ ပဗ္ဗတံ၊
ရာဇာ စ နာဂရာ စေဝ၊ ဒိသွာ ခိပ္ပံ ဥပါဂမုံ။
ဒေဝတာ ဗလိဒါနတ္ထံ၊ မနုဿာ စ တဟိံ ဂတာ၊
ဒေဝတာ ဣတိ မညိံသု၊ သသင်္ဃံ လောကနာယကံ။
ရာဇာ သော မုနိရာဇံ တံ၊ အတိဟဋ္ဌော’ဘိ ဝါဒိယ၊
နိမန္တယိတွာ ဘတ္တေန၊ အာနေတွာ ပုရသန္တိ ကံ။
သသင်္ဃဿ မုနိန္ဒဿ၊ နိသဇ္ဇာရဟမုတ္တမံ၊
ရမဏီယမိဒံ ဌာန-မသမ္ဗာဓန္တိ စိန္တိယ။
ကာရိတေ မဏ္ဍပေ ရမ္မေ၊ ပလ္လင်္ကေသု ဝရေ သုတံ၊
နိသီဒါပေသိ သမ္ဗုဒ္ဓံ၊ သသင်္ဃံ ဣဓ ဘူပတိ။
နိသိန္နမ္ပိ စ ပဿန္တာ၊ သသင်္ဃံ လောကနာယကံ၊
ဒီပေ မနုဿာ အာနေသုံ၊ ပဏ္ဏာကာရေ သမန္တတော။
အတ္တနော ခဇ္ဇဘောဇ္ဇေဟိ၊ တေဟိ တေဟာ’ဘတေဟိ စ၊
သန္တပ္ပေသိ သသင်္ဃံ တံ၊ ရာဇာ သော လောကနာယကံ။
ဣဓေဝ ပစ္ဆာဘတ္တံ တံ၊ နိသိန္နဿ ဇိနဿ သော၊
မဟာ တိတ္ထကမုယျာနံ၊ ရာဇာ’ဒါ ဒက္ခိဏံ ဝရံ။
အကာလပုပ္ဖာ ¶ လင်္ကာရေ၊ မဟာတိတ္ထဝနေ တဒါ၊
ပဋိဂ္ဂဟိတေ ဗုဒ္ဓေန၊ အကမ္ပိတ္ထ မဟာမဟီ။
ဧတ္ထေဝ သော နိသီဒိတွာ၊ ဓမ္မံ ဒေသေသိ နာယကော၊
စတ္တာလီသ သဟဿာနိ၊ ပတ္တာ မဂ္ဂဖလံ နရာ။
ဒိဝါဝိဟာရံ ကတွာန၊ မဟာတိတ္ထဝနေ ဇိနော၊
သာယဏှသမယေ ဂန္တွာ၊ ဗောဓိဌာနာရဟံ မဟိ။
နိသိန္နော တတ္ထ အပ္ပေတွာ၊ သမာဓိံ ဝုဋ္ဌိတော တတော၊
ဣတိ စိန္တယိ သမ္ဗုဒ္ဓါ၊ ဟိတတ္ထံ ဒီပဝါသိနံ။
အာဒါယ ဒက္ခိဏံ သာခံ၊ ဗောဓိတော မေ သိရီသတော၊
အာဂစ္ဆတု ရူပနန္ဒာ၊ ဘိက္ခုနီ သဟဘိက္ခုနီ။
တဿ တံ စိတ္တမညာယ၊ သာ ထေရီ တဒနန္တရံ၊
ဂဟေတွာ တတ္ထ ရာဇာနံ၊ ဥပသင်္ကမ္မ တံ တရုံ။
လေခံ ဒက္ခိဏသာခါယ၊ ဒါပေတွာန မဟိဒ္ဓိကာ၊
မနောသိလာယ ဆိန္နံ တံ၊ ဌိတံ ဟေမကဋာဟကေ။
ဣဒ္ဓိယာ ဗောဓိမာဒါယ၊ သပဉ္စသတ ဘိက္ခုနီ၊
ဣဓာ’နေတွာ မဟာရာဇ၊ ဒေဝတာ ပရိဝါရိတာ။
သသုဝဏ္ဏ ကဋာဟံ တံ၊ သမ္ဗုဒ္ဓေန ပသာရိတေ၊
ဌပေသိ ဒက္ခိဏေ ဟတ္ထေ၊ တံ ဂဟေတွာ တထာဂတော။
ပတိဋ္ဌာပေတုံ ပါဒါသိ၊ ဗောဓိံ ရညော’ဘယဿ တံ၊
မဟာတိတ္ထမှိ ဥယျာနေ၊ ပတိဋ္ဌာပေသိ ဘူပတိ။
တတော ဂန္တွာန သမ္ဗုဒ္ဓါ၊
ဣတော ဥတ္တရတော ပန၊
သိရီသမာလကေ ရမ္မေ၊
နိသီဒိတွာ တထာဂတော။
ဇနဿ ဓမ္မံ ဒေသေသိ၊ ဓမ္မာဘိသမယော တဟိံ၊
ဝီသတိယာ သဟဿာနံ၊ ပါဏာနံ အာသိ ဘူမိပ။
တတောပိ ဥတ္တရံ ဂန္တွာ၊ ထူပရာမမဟိံ ဇိနော၊
နိသိန္နော တတ္ထ အပ္ပေတွာ၊ သမာဓိံ ဝုဋ္ဌိတော တတော။
ဓမ္မံ ¶ ဒေသေသိ သမ္ဗုဒ္ဓါ၊ ပရိသာယ တဟိံပန၊
ဒသပါဏ သဟဿာနိ၊ ပတ္တမဂ္ဂဖလာန’ဟုံ။
အတ္တနော ဓမ္မကရဏံ၊ မနုဿာနံ နမဿိတုံ၊
ဒတွာ သပရိဝါရံ တံ၊ ဌပေတွာ ဣဓ ဘိက္ခုနိံ။
သဟ ဘိက္ခုသဟဿေန၊ မဟာဒေဝဉ္စ သာဝကံ၊
ဌပေတွာ ဣဓ သမ္ဗုဒ္ဓါ၊ တတော ပါစိနတော ပန။
ဌိတော ရတနမာလမှိ၊ ဇနံ သမနုသာသိယ၊
သသင်္ဃော နဘမုဂ္ဂန္တွာ၊ ဇမ္ဗုဒီပံ ဇိနော အဂါ။
ဣမမှိ ကပ္ပေ ဒုတိယံ၊ ကောဏာဂမန နာယကော၊
အဟု သဗ္ဗဝိဒူ သတ္ထာ၊ သဗ္ဗလောကာနုကမ္ပကော။
မဟာနာမဝှယံ အာသိ၊ မဟာမေဃဝနံ ဣဒံ၊
ဝဍ္ဎမာနပုရံ နာမ၊ ဒက္ခိဏာယ ဒိသာယ’ဟု။
သမိဒ္ဓါ နာမ နာမေန၊ တတ္ထ ရာဇာ တဒါ အဟု၊
နာမေန ဝရဒီပေါ’တိ၊ အယံ ဒီပေါ တဒါ အဟု။
ဒုဗ္ဗုဋ္ဌုပဒ္ဒဝေါ ဧတ္ထ၊ ဝရဒီပေ တဒါ အဟု၊
ဇိနော သကောဏာဂမနော၊ ဒိသွာန တဒုပဒ္ဒဝံ။
တံ ဟုတွာ သတ္တဝိနယံ၊ ပဝတ္တိံ သာသနဿ စ၊
ကာတုံ ဣမသ္မိံ ဒီပသ္မီံ၊ ကရုဏာ ဗလစောဒိတော။
တိံသ ဘိက္ခုသဟဿေဟိ၊ တာဒီဟိ ပရိဝါရိတော၊
နဘသာ’ဂမ္မ အဋ္ဌာသိ၊ နဘေ သုမနကူဋကေ။
သမ္ဗုဒ္ဓဿာ’နုဘာဝေန၊ ဒုဗ္ဗုဋ္ဌိ သာ ခယံ ဂတာ၊
သာသနာန္တရဓာနတ္တာ၊ သုဝုဋ္ဌိ စ တဒါအဟု။
တတ္တ ဌိတော အဓိဋ္ဌာသိ၊ နရိဿရမုနိဿရော၊
သဗ္ဗေဝ အဇ္ဇ ပဿန္တု၊ ဝရဒီပမှိ မာနုသာ။
အာဂန္တုကာမာ သဗ္ဗေဝ၊ မနုဿာ မမ သန္တိကံ၊
အာဂစ္ဆန္တု အကိစ္ဆေန၊ ခိပ္ပဉ္စာ’တိ မဟာမုနိ။
မဟာသတ္တံ မုနိန္ဒံ တံ၊ ဩဘာသန္တဉ္စ ပဗ္ဗတံ၊
ရာဇာ စ နာဂရာ စေဝ၊ ဒိသွာ ခိပ္ပမုပါဂမုံ။
ဒေဝတာဗလိဒါနတ္ထံ ¶ ၊ မနုဿာ စ တဟိံ ဂတာ၊
ဒေဝတာ ဣတိ မညိံသု၊ သသင်္ဃံ လောကနာယကံ။
ရာဇာ သော မုနိရာဇံ တံ၊ အတိဟဋ္ဌော’ဘိဝါဒိယ၊
နိမန္တယိတွာ ဘတ္တေန၊ အာနေတွာ ပုရသန္တိကံ။
သသင်္ဃဿ မုနိန္ဒဿ၊ နိသဇ္ဇာရဟ မုတ္တမံ၊
ရမဏီယမိဒံ ဌာနံ၊ အသမ္ဗာဓန္တိ စိန္တိယ။
ကာရိတေ မဏ္ဍပေ ရမ္မေ၊ ပလ္လင်္ကေသု ဝရေသု တံ၊
နိသီဒါပယိ သမ္ဗုဒ္ဓံ၊ သသင်္ဃံ ဣဓ ဘူပတိ။
နိသိန္နမ္ပိ’ဓ ပဿန္တာ၊ သသင်္ဃံ လောကနာယကံ၊
ဒီပေ မနုဿာ အာနေသုံ၊ ပဏ္ဏာကာရေ သမန္တတော။
အတ္တနော ခဇ္ဇဘောဇ္ဇေဟိ၊
တေဟိ တေဟာ’ဘ တေဟိ စ၊
သန္တပ္ပေသိ သသင်္ဃံ တံ၊
ရာဇာ သော လောက နာယကံ။
ဣဓေဝ ပစ္ဆာဘတ္တံ တံ၊ နိသိန္နဿ ဇိနဿ သော၊
မဟာနာမကမုယျာနံ၊ ရာဇာ’ဒါ ဒက္ခိဏံ ဝရံ။
အကာလပုပ္ဖာလင်္ကာရေ၊ မဟာနာမဝနေ တဒါ၊
ပဋိဂ္ဂဟိတေ ဗုဒ္ဓေန၊ အကမ္ပိတ္ထ မဟာမဟီ။
ဧတ္ထေဝ သော နိသီဒိတွာ၊ ဓမ္မံ ဒေသေသိ နာယကော၊
တဒါ တိံသ သဟဿာနိ၊ ပတ္တာ မဂ္ဂဖလံ နရာ။
ဒိဝါဝိဟာရံ ကတွာန၊ မဟာနာမဝနေ ဇိနော၊
သာယဏှသမယေ ဂန္တွာ၊ ပုဗ္ဗဓောဓိဌိတံ မဟိံ။
နိသိန္နော တတ္ထ အပ္ပေတွာ၊ သမာဓိံ ဝုဋ္ဌိတော တတော၊
ဣတိ စိန္တေသိ သမ္ဗုဒ္ဓါ၊ ဟိတတ္ထံ ဒီပဝါသိနံ။
အာဒါယ ဒက္ခိဏံ သာခံ၊ မမောဒုမ္ဗရဗောဓိတော၊
အာယာတု ကနကဒတ္တာ၊ ဘိက္ခုနီ သဟဘိက္ခုနီ။
တဿ တံ စိတ္တမညာယ၊ သာ ထေရီ တဒနန္တရံ၊
ဂဟေတွာ တတ္ထ ရာဇာနံ၊ ဥပသင်္ကမ္မ တံ တရုံ။
လေခံ ¶ ဒက္ခိဏသာခါယ၊ ဒါပေတွာန မဟိဒ္ဓိကာ၊
မနောသိလာယ ဆိန္နံ တံ၊ ဌိတံ ဟေမကဋာဟကေ။
ဣဒ္ဓိယာ ဗောဓိမာဒါယ၊ သပဉ္စသဟဘိက္ခုနီ၊
ဣဓာဂန္တွာ မဟာရာဇ၊ ဒေဝတာပရိဝါရိတာ။
သသုဝဏ္ဏကဋာဟံ တံ၊ သမ္ဗုဒ္ဓေန ပသာရိတေ၊
ဌပေသိ ဒက္ခိဏေ ဟတ္ထေ၊ တံ ဂဟေတွာ တထာဂတော။
ပတိဋ္ဌာပေတုံ ရညော’ဒါ၊ သမိဒ္ဓဿ သတံ တဟိံ၊
မဟာနာမမှိ ဥယျာနေ၊ ပတိဋ္ဌာပေသိ ဘူပတိ။
တတော ဂန္တွာန သမ္ဗုဒ္ဓါ၊ သိရီသမာလကုတ္တရေ၊
ဇနဿ ဓမ္မံ ဒေသေသိ၊ နိသိန္နော နာဂမာလကေ။
တံ ဓမ္မဒေသနံ သုတွာ၊ ဓမ္မာဘိသမယော တဟိံ၊
ဝီသတိယာ သဟဿာနံ၊ ပါဏာနံ အာသိ ဘူမိပ။
ပုဗ္ဗဗုဒ္ဓနိသိန္နံ တံ၊ ဌာနံ ဂန္တွာ ပုရုတ္တရံ၊
နိသိန္နော တတ္ထ အပ္ပေတွာ၊ သမာဓိံ ဝုဋ္ဌိတော တတော။
ဓမ္မံ ဒေသေသိ သမ္ဗုဒ္ဓါ၊ ပရိသာယ တဟိံ ပန၊
ဒသပါဏသဟဿာနိ၊ ပတ္တာ မဂ္ဂဖလံ အဟုံ။
ကာယဗန္ဓနဓာတုံ သော၊ မနုဿေဟိ နမဿိတုံ၊
ဒတွာ သပရိဝါရံ တံ၊ ဌပေတွာ ဣဓ ဘိက္ခုနိံ။
သဟ ဘိက္ခုသဟဿေန၊ မဟာသုမ္မဉ္စ သာဝကံ၊
ဌပေတွာ ဣဓ သမ္ဗုဒ္ဓါ၊ ဩရံ ရတနမာလတော။
ဌပေတွာ သုဒဿနေ မာလေ၊ ဇနံ သမနုသာသိယ၊
သသင်္ဃော နဘမုဂ္ဂမ္မ၊ ဇမ္ဗုဒီပံ ဇိနော အဂါ။
ဣမမှိ ကပ္ပေ တတိယံ၊ ကဿပေါ ဂေါတ္တတော ဇိနော၊
အဟု သဗ္ဗဝိဒူ သတ္ထာ၊ သဗ္ဗလောကာနုကမ္ပကော။
မဟာမေဃဝနံ အာသိ၊ မဟာသာဂရနာမကံ၊
ဝိသာလံ နာမ နဂရံ၊ ပစ္ဆိမာယ ဒိသာယ’ဟု။
ဇယန္တော နာမ နာမေန၊ တတ္ထ ရာဇာ တဒါ အဟု၊
နာမေန မဏ္ဍဒီပေါတိ၊ အယံ ဒီပေါ တဒါ အဟု။
တဒါ ¶ ဇယန္တရညော စ၊ ရညော ကနိဋ္ဌဘာတု စ၊
ယုဒ္ဓံ ဥပဋ္ဌိတံ အာသိ၊ ဘိံသနံ သတ္တဟိံသနံ။
ကဿပေါ သော ဒသဗလော၊ တေန ယုဒ္ဓေန ပါဏိနံ၊
မဟန္တံ ဗျသနံ ဒိသွာ၊ မဟာကာရုဏိကော မုနိ။
တံ ဟန္တွာ သတ္တဝိနယံ၊ ပဝတ္တိံ သာသနဿ စ၊
ကာတုံ ဣမသ္မိံ ဒီပသ္မိံ၊ ကရုဏာဗလစောဒိတော။
ဝီသတိယာ သဟဿေဟိ၊ တာဒီဟိ ပရိဝါရိတော၊
နဘသာ’ဂမ္မ အဋ္ဌာသိ၊ သုဘကူဋမှိ ပဗ္ဗတေ။
တတြဌိတော အဓိဋ္ဌာသိ၊ နရိဿရ မုနိဿရော၊
‘‘သဗ္ဗေ မံ အဇ္ဇ ပဿန္တု၊ မဏ္ဍဒီပမှိ မာနုသာ။
အာဂန္တုကာမာ သဗ္ဗေဝ၊ မာနုသာ မမ သန္တိကံ၊
အာဂစ္ဆန္တု အကိစ္ဆေန၊ ခိပ္ပဉ္စာ’တိ မဟာမုနိ။
ဩဘာသန္တံ မုနိန္ဒံ တံ၊ ဩဘာသန္တဉ္စ ပဗ္ဗကံ၊
ရာဇာ စ နာဂရာ စေဝ၊ ဒိသွာ ခိပ္ပံ ဥပါဂမုံ။
အတ္တနော အတ္တနော ပတ္တ-ဝိဇယာယ ဇနာ ဗဟူ၊
ဒေဝတာ ဗလိဒါနတ္ထံ၊ တံ ပဗ္ဗတမုပါဂတာ။
ဒေဝတာ ဣတိ မညိံသု၊ သသင်္ဃံ လောကနာယကံ၊
ရာဇာ စ သော ကုမာရော စ၊ ယုဒ္ဓမုဇ္ဈိံသု ဝိမှိတာ။
ရာဇာ သော မုနိရာဇံ တံ၊ အတိဟဋ္ဌော’ဘိဝါဒိယ၊
နိမန္တယိတွာ ဘတ္တေန၊ အာနေတွာ ပုရသန္တိကံ။
သသင်္ဃဿ မုနိန္ဒဿ၊ နိသဇ္ဇာရဟမုတ္တမံ၊
ရမဏီယမိဒံ ဌာန-မသမ္ဗာဓန္တိ စိန္တိယ။
ကာရိတေ မဏ္ဍပေ ရမ္မေ၊ ပလ္လင်္ကေသု ဝရေသု တံ၊
နိသီဒါပေသိ သမ္ဗုဒ္ဓံ၊ သသင်္ဃံ ဣဓ ဘူပတိ။
နိသိန္နမ္ပိဓ ပဿန္တာ၊ သသင်္ဃံ လောကနာယကံ၊
ဒီပေ မနုဿာ အာနေသုံ၊ ပဏ္ဏာကာရေ သမန္တတော။
အတ္တနော ခဇ္ဇဘောဇ္ဇေဟိ၊ တေဟိ တေဟာ’ဘတေဟိ စ၊
သသန္တပ္ပေသိ သသင်္ဃံ တံ၊ ရာဇာ သော လောကနာယကံ။
ဣဓေ’ဝ ပစ္ဆာဘတ္တံ တံ၊ နိသိန္နဿ ဇိနဿ သော၊
မဟာသာဂရမုယျာနံ၊ ရာဇာ’ဒါ ဒက္ခိဏံ ဝရံ။
အကာလပုပ္ဖလင်္ကာရေ ¶ ၊ မဟာသာဂရကာနနေ၊
ပဋိဂ္ဂဟိတေ ဗုဒ္ဓေန၊ အကမ္ပိတ္ထ မဟာမဟီ။
ဧတ္ထေဝ သော နိသီဒိတွာ၊ ဓမ္မံ ဒေသေသိ နာယကော၊
တဒါ ဝီသံ သဟဿာနိ၊ သောတာပတ္တိဖလံ နရာ။
ဒိဝါ ဝိဟာရံ ကတွာန၊ မဟာသာဂရကာနနေ၊
သာယနှေ သုဂတော ဂန္တွာ၊ ပုဗ္ဗဗောဓိဋ္ဌိတံ မဟိံ။
နိသိန္နော တတ္ထ အပ္ပေတွာ၊ သမာဓိံ ဝုဋ္ဌိတော တတော၊
ဣတိ စိန္တေသိ သမ္ဗုဒ္ဓါ၊ ဟိတတ္ထံ ဒီပဝါသိနံ။
အာဒါယ ဒက္ခိဏံ သာခံ၊ မမ နိဂြောဓဗောဓိတော၊
သုဓမ္မာ ဘိက္ခုနီ ဧတု၊ ဣဒါနိ သဟဘိက္ခုနီ။
တဿ တံ စိတ္တမညာယ၊ သာ ထေရီ တဒနန္တရံ၊
ဂဟေတွာ တတ္ထ ရာဇာနံ၊ ဥပသင်္ကမ္မ တံ တရုံ။
လေခံ ဒက္ခိဏသာခါယ၊ ဒါပေတွာန မဟိဒ္ဓိကာ၊
မနောသိလာယ ဆိန္နံ တံ၊ ဌိတံ ဟေမကဋာယကေ။
ဣဒ္ဓိယာ ဗောဓိမာဒါယ၊ သပဉ္စသတဘိက္ခုနီ၊
ဣဓာနေတွာ မဟာရာဇ၊ ဒေဝတာပရိဝါရိတာ။
သသုဝဏ္ဏကဋာဟံ တံ၊ သမ္ဗုဒ္ဓေန ပသာရိတေ၊
ဌပေသိ ဒက္ခိဏေ ဟတ္ထေ၊ တံ ဂဟေတွာ တထာဂတော။
ပတိဋ္ဌာပေတုံ ရညော’ဒါ၊ ဇယန္တဿ သတံ တဟိံ၊
မဟာသာဂရမုယျာနေ၊ ပတိဋ္ဌာပေသိ ဘူပတိ။
တတော ဂန္တွာန သမ္ဗုဒ္ဓါ၊ နာဂမာဠကဥတ္တရေ၊
ဓနဿ ဓမ္မံ ဒေသေသိ၊ နိသိန္နော’သောကမာဠကေ။
တံ ဓမ္မဒေသနံ သုတွာ၊ ဓမ္မာဘိသမယော တဟိံ၊
အဟု ပါဏသဟဿာနံ၊ စတုန္နံ မနုဇာဓိပ။
ပုဗ္ဗဗုဒ္ဓနိသိတံ တံ၊ ဌာနံ ဂန္တွာ ပုနုတ္တရံ၊
နိသိန္နော တတ္ထ အပ္ပေတွာ၊ သမာဓိံ ဝုဋ္ဌိတော တတော။
ဓမ္မံ ဒေသေသိ သမ္ဗုဒ္ဓါ၊ ပရိသာယ တဟိံ ပန၊
ဒသပါဏသဟဿာနိ၊ ပတ္တမဂ္ဂဖလာန’ဟုံ။
ဇလသာဋိကဓာတုံ ¶ သော၊ မနဿေဟိ နမဿိတုံ၊
ဒတွာ သပရိဝါရံ တံ၊ ဌပေတွာ ဣဓ ဘိက္ခုနီ။
သဟ ဘိက္ခုသဟဿေန၊ သဗ္ဗနန္ဒိဉ္စ သာဝကံ၊
ဌပေတွာ နဒီတော ဩရံ၊ သော သုဒဿနမာဠတော။
သောမနဿေ မာဠကသ္မိံ၊ ဇနံ သမနုသာသိယ၊
သင်္ဃေန နဘမုဂ္ဂန္တွာ၊ ဇမ္ဗုဒီပံ ဇိနော အဂါ။
အဟု ဣမသ္မိံ ကပ္ပသ္မိံ၊ စတုတ္ထံ ဂေါတမော ဇိနော၊
သဗ္ဗဓမ္မဝိဒူ သတ္ထာ၊ သဗ္ဗလောကာနုကမ္ပကော။
ပဌမံ သော ဣဓာဂန္တွာ၊ ယက္ခနိဒ္ဓမနံ အကာ၊
ဒုတိယံ ပုနရာဂမ္မ၊ နာဂါနံ ဒမနံ အကာ။
ကလျာဏိယံ မဏိအက္ခိ နာဂေနာ’ဘိနိမန္တိတော၊
တတိယံ ပုနရာဂမ္မ၊ သသင်္ဃော တတ္ထ ဘုဉ္ဇိယ။
ပုဗ္ဗဗောဓိဌိတဌာနံ၊ ထူပဌာနမိဒမ္ပိ စ၊
ပရိဘောဂဓာတုဌာနဉ္စ၊ နိသဇ္ဇာယော’ပဘုဉ္ဇိယ။
ပုဗ္ဗဗုဒ္ဓဌိတဋ္ဌာနာ၊ ဩရံ ဂန္တွာ မဟာမုနိ၊
လံကာဒီပေ လောကဒီပေါ၊ မနုဿာဘာဝတော တဒါ။
ဒီပဋ္ဌံ ဒေဝသင်္ဃဉ္စ၊ နာဂေ သမနုသာသိယ၊
သသင်္ဃော နဘမုဂ္ဂန္တွာ၊ ဇမ္ဗုဒီပံ ဇိနော အဂါ။
ဧဝံ ဌာနမိဒံ ရာဇ၊ စတုဗုဒ္ဓနိသေဝိတံ၊
တသ္မိံ ဌာနေ မဟာရာဇ၊ ထူပေါ ဟေဿတိ’နာဂတေ။
ဗုဒ္ဓသာရီရဓာတူနံ၊ ဒေါဏဓာတုနိဓာနဝါ၊
ဝီသံဟတ္ထသတံ ဥစ္စော၊ ဟေမမာလီ’တိ ဝိဿုတော။
အဟမေဝ ကာရေဿာမိ၊ ဣစ္ဆာဟ ပုထဝိဿရော၊
ဣဓ အညာနိ ကိစ္စာနိ၊ ဗဟူနိ တဝ ဘူမိပ။
တာနိ ကာရေဟိ နတ္တာတေ၊ ကာရေဿတိ ဣမံ ပန၊
မဟာနာဂဿ တေ ဘာတု၊ ဥပရာဇဿ အတြဇော။
သော ယဋ္ဌာလယတိဿောတိ၊ ရာဇာ ဟေဿတ’နာဂတေ၊
ရာဇာ ဂေါဋ္ဌာဘယော နာမ၊ တဿ ပုတ္တော ဘဝိဿတိ။
တဿ ¶ ပုတ္တော ကာကဝဏ္ဏ-တိဿော နာမ ဘဝိဿတိ၊
တဿ ရညော သုတော ရာဇ၊ မဟာရာဇာ ဘဝိဿတိ။
ဒုဋ္ဌဂါမဏိသဒ္ဒေန၊ ပါကဋော’ဘယနာမကော၊
ကာရေဿတီ’ဓ ထူပံ သော၊ မဟာ တေဇိဒ္ဓိဝိက္ကမော။
ဣစ္စာဟ ထေရော ထေရဿ၊ ဝစနေ နေ’တ္ထ ဘူပတိ၊
ဥဿာပေသိ သိလာထမ္ဘံ၊ တံ ပဝတ္တိံ လိခါပိယ။
ရမ္မံ မဟာမေဃဝနံ၊ တိဿာရာမံ မဟာမဟီ၊
မဟာမဟိန္ဒထေရော သော၊ ပဋိဂ္ဂယှ မဟိဒ္ဓိကော။
အကမ္ပော ကမ္ပယိတွာန၊ မဟိံ ဌာနေသု အဋ္ဌသု၊
ပိဏ္ဍာယ ပဝိသိတွာန၊ နဂရံ သာဂရူပမံ။
ရညော ဃရေ ဘတ္တကိစ္စံ၊ ကတွာ နိက္ခမ္မ မန္ဒိရံ၊
နိသဇ္ဇ နန္ဒနဝနေ၊ အဂ္ဂိက္ခန္ဓောပမံ တဟိံ။
သုတ္တံ ဇနဿ ဒေသေတွာ၊ သဟဿံ မာနုသေ တဟိံ၊
ပါပယိတွာ မဂ္ဂဖလံ၊ မဟာမေဃဝနေ ဝသိ။
တတိယေ ဒိဝသေ ထေရော၊ ရာဇဂေဟမှိ ဘုဉ္ဇိယ၊
နိသဇ္ဇ နန္ဒနဝနေ၊ ဒေသိယာ’သိဝိသောပမံ။
ပါပယိတွာ’ဘိသမယံ၊ သဟဿပုရိသေ တတော၊
တိဿာရာမံ အဂါ ထေရော၊ ရာဇာ စ သုတဒေသနော။
ထေရံ ဥပနိသီဒိတွာ၊ သော ပုစ္ဆိ ဇိနသာသနံ၊
ပတိဋ္ဌိတန္နု ဘန္တေ’တိ၊ န တာဝ မနုဇာ’ဓိပ။
ဥပေါသထာဒိကမ္မတ္ထံ၊ ဇိနာ’ဏာယ ဇနာဓိပ၊
သီမာယ ဣဓ ဗဒ္ဓါယ၊ ပတိဋ္ဌိဿတိ သာသနံ။
ဣစ္စ’ဗြဝိ မဟာထေရော၊ တံ ရာဇာ ဣဒမဗြဝိ၊
သမ္ဗုဒ္ဓါ’ဏာယ အန္တောဟံ၊ ဝဿိဿာမိ ဇုတိန္ဓရ။
တသ္မာ ကတွာ ပုရံ အန္တော-သီမံ ဗန္ဓထ သဇ္ဇုကံ၊
ဣစ္စာ’ဗြဝိ မဟာရာဇာ၊ ထေရော တံ ဣဓမဗြဝိ။
ဧဝံ သတိ တုဝံယေဝ၊ ပဇာန ပုထဝိဿရ၊
သီမာယ ဂမနဋ္ဌာနံ၊ ဗန္ဓိဿာမ မယံ ဟိတံ။
‘‘သာဓူ’’တိ ¶ ဝတွာ ဘူမိန္ဒော၊ ဒေဝိန္ဒော ဝိယ နန္ဒနာ၊
မဟာမေဃဝနာရမ္မာ၊ ပါဝိသိ မန္ဒိရံ သကံ။
စတုတ္ထေ ဒိဝသေ ထေရော၊ ရညော ဂေဟမှိ ဘုဉ္ဇိယ၊
နိသဇ္ဇ နန္ဒနဝနေ၊ ဒေသေသ’နမနဂ္ဂိယံ။
ပါယေတွာ’မတပါနံ သော၊ သဟဿပုရိသေ တဟိံ၊
မဟာမေဃဝနာရာမံ၊ မဟာထေရော ဥပါဂမိ။
ပါတော ဘေရိံ စရာပေတွာ၊ မဏ္ဍယိတွာ ပုရံ ဝရံ၊
ဝိဟာရဂါမိမဂ္ဂဉ္စ၊ ဝိဟာရဉ္စ သမန္တတော။
ရထေသဘော ရထဋ္ဌော သော၊ သဗ္ဗာလင်္ကာရဘူသိတော၊
သဟာမစ္စော သဟောရောဓော၊ သယောဂ္ဂဗလဝါဟနော။
မဟတာ ပရိဝါရေန၊ သကာရာမမုပါဂမိ၊
တတ္ထ ထေရေ ဥပဂန္တွာ၊ ဝန္ဒိတွာ ဝန္ဒနာရဟေ။
သဟ ထေရေဟိ ဂန္တွာန၊ နဒိယော’ပရိတိတ္ထကံ၊
တတော ကသန္တော အဂမိ၊ ဟေမနင်္ဂလမာဒိယ။
မဟာပဒုမော ကုဉ္ဇရော စ၊ ဥဘော နာဂါ သုမင်္ဂလာ၊
သုဝဏ္ဏနင်္ဂလေ ယုတ္တာ၊ ပဌမေ ကုန္တမာဠကေ။
စတုရင်္ဂမဟာ သေနော၊ သဟ ထေရေဟိ ခတ္တိယော၊
ဂဟေတွာ နင်္ဂလံ သီတံ၊ ဒဿယိတွာ အရိန္ဒမော။
သမလင်္ကတံ ပုဏ္ဏဃဋံ၊ နာနာရာဂံ ဓဇံ သုဘံ၊
ပါတိံ စန္ဒနစုဏ္ဏဉ္စ၊ သောဏ္ဏရဇတ ဒဏ္ဍကံ။
အာဒါသံ ပုပ္ဖဘရိတံ၊ သမုဂ္ဂံ ကုသုမဂ္ဃိယံ၊
တောရဏကဒလီဆတ္တာဒိံ၊ ဂဟိတိတ္ထိ ပရိဝါရိတော။
နာနာတုရိယ သင်္ဃုဋ္ဌော၊ ဗလောဃ ပရိဝါရိတော၊
ထုတိမင်္ဂလဂီတေဟိ၊ ပူရယန္တော စတုဒ္ဒိသံ။
သာဓုကာရ နိနာဒေတိ၊ စေလုက္ခေပသတေဟိ စ၊
မဟတာ ဆဏပုဇာယ၊ ကသန္တော ဘူမိပေါ အဂါ။
ဝိဟာရဉ္စ ပုရဉ္စေဝ၊ ကုရုမာနော ပဒက္ခိဏံ၊
သီမာယ ဂမနဌာနံ၊ နဒိံ ပတွာ သမာပယိ။
ကေနကေန နိမိတ္တေန၊ သီမာ ဧတ္ထ ဂတာတိ စေ၊
ဧဝံ သီမာဂတဌာနံ၊ ဣစ္ဆမာနာ နိဗောဓထ။
နဇ္ဇာပါသာဏတိတ္ထမှိ ¶ ၊ ပါသာဏေ ကုဍ္ဍဝါဋကံ၊
တတော ကုမ္ဗလဝါဋံ တံ၊ မဟာနိပံ တတော အဂါ။
တတော ကုကုဓပါဠိင်္ဂေါ၊ မဟာအင်္ဂဏဂေါ တတော၊
တတော ခုဇ္ဇမဓုလဉ္စ၊ မရုတ္တပေါက္ခရဏိံတတော။
ဝိဇယာရာမ ဥယျာနေ၊ ဥတ္တရဒွါရကောဋ္ဌ ဂေါ၊
ဂဇကုမ္ဘက ပါသာဏံ၊ ထုသဝဋ္ဌိက မဇ္ဈဂေါ။
အဘယေ ဗလာကပါသာဏံ၊ မဟာသုသာန မဇ္ဈဂေါ၊
ဒီဃပါသာဏကံ ဂန္တွာ၊ ကမ္မာရဒေဝ ဂါမတော။
နိဂြောဓ မင်္ဂဏံ ဂန္တွာ၊ ဟိယဂလ္လသမီပကေ၊
ဒိယာဝသဗြာဟ္မဏဿ၊ ဒေဝေါကံ ပုဗ္ဗဒက္ခိဏံ။
တတော တေလုမပါလိင်္ဂေါ၊
တတော တာလစတုက္ကဂေါ၊
အဿမဏ္ဍလဝါမေန၊
ဒွေ ကဒမ္ဗာ အဇာယိသုံ။
တတော မရုမ္ဗတိတ္တင်္ဂေါ၊ တတော ဥဒ္ဓံ နိဒိံ အဂါ၊
ပဌမ စေတိယ ပါစိနေ၊ ဒွေ ကဒမ္ဗာ အဇာယိသုံ။
သေနိန္ဒဂုတ္တရဇ္ဇမှိ၊ ဒမိဠာ ဒကသုဒ္ဓိကာ၊
နဒိံ ဒူရန္တိ ဗန္ဓိတွာ၊ နဂရာသန္နမကံသု တံ။
ဇီဝ မာနကဒမ္ဗဉ္စ၊ အန္တောသီမဂတံ အဟု၊
မတက ဒမ္ဗတီရေန၊ သီမာဥဒ္ဒကဒမ္ဗဂါ။
သီဟသိနာ နတိတ္ထေန၊ ဥဂ္ဂန္တွာ တီရတော ဝဇံ၊
ပါသာဏတိတ္ထံ ဂန္တွာန၊ နိမိတ္တံ ဃဋ္ဋယိ ဣသိ။
နိမိတ္တေတု ပနေ’တသ္မိံ၊ ဃဋ္ဋိတေ ဒေဝမာနုသာ၊
သာဓုကာရံ ပဝတ္တေသုံ၊ သာသနံ သုပ္ပတိဋ္ဌိတံ။
ရညော ဒိန္နာယ သီတာယ၊ နိမိတ္တေ ပရိကိတ္တယိ၊
ဒွတ္တိံသမာဠကတ္ထဉ္စ၊ ထူပါရာမတ္ထမေဝ စ။
နိမိတ္တေ ကိတ္တယိတွာန၊ မဟာထေရော မဟာမတိ၊
သီမန္တရနိမိတ္တေ စ၊ ကိတ္တယိတွာ ယထာဝိဓိံ။
အဗန္ဓီ ¶ သဗ္ဗာ သီမာယော၊ တသ္မိံယေဝ ဒိနေဝသီ၊
မဟာမဟီ အကမ္ပိတ္ထ၊ သီမာဗန္ဓေ သမာပိတေ။
ပဉ္စမေ ဒိဝသေ ထေရော၊ ရညော ဂေဟမှိ ဘုဉ္ဇိယ၊
နိသဇ္ဇ နန္ဒနဝနေ၊ သုတ္တန္တံ ခဇ္ဇနီယကံ။
မဟာဇနဿ ဒေသေတွာ၊ သဟဿံ မာနုသေ တဟိံ၊
ပါယေတွာ အမတံ ပါနံ၊ မဟာမေဃဝနေ ဝသီ။
ဆဋ္ဌေပိ ဒိဝသေ ထေရော၊ ရညောဂေဟမှိ ဘုဉ္ဇိယ၊
နိသဇ္ဇ နန္ဒနဝနေ၊ သုတ္တ ဂေါမယ ပိဏ္ဍိကံ။
ဒေသယိတွာ ဒေသနညူ၊ မဟဿံယေဝ မာနုသေ၊
ပါပယိတွာ’ဘိသမယံ၊ မဟာ မေဃဝနေ ဝသီ။
သတ္တမေပိ ဒိနေ ထေရော၊ ရာဇဂေဟမှိ ဘုဉ္ဇိယ၊
နိသဇ္ဇ နန္ဒနဝနေ၊ ဓမ္မစက္ကပ္ပဝတ္တနံ။
သုတ္တန္တံ ဒေသယိတွာန၊ သဟဿံယေဝ မာနုသေ၊
ပါပယိတွာ’ဘိသမယံ၊ မဟာ မေဃဝနေ ဝသိ။
ဧဝဉှိ အဋ္ဌ နဝမ-သဟဿာနိ ဇုတိန္ဓရော၊
ကာရယိတွာ’ဘိသမယံ၊ ဒိဝသေဟေဝ သတ္တတိ။
တံ မဟာနန္ဒနဝနံ၊ ဝုစ္စတေ တေန တာဒိနာ၊
သာသနဇောတိတဋ္ဌာန-မီတိ ဇောတိဝနံ ဣတိ။
တိဿရာမမှိ ကာရေသိ၊
ရာဇာ ထေရဿ အာဒိတော၊
ပါသာဒံ သီဃမုက္ကာယ၊
သုက္ခာ ပေတွာန မတ္တိကာ။
ပါသာဒေါ ကာဠကာဘာသော၊
အာသိ သော တေန တံ တဟိံ၊
ကာဠပါသာဒ ပရိဝေဏ-မီတိ သင်္ခမုပါဂတံ။
တတော မဟာဗောဓိဃရံ၊ လောဟပါသာဒ မေဝ စ၊
သလာကဂ္ဂဉ္စ ကာရေသိ၊ ဘတ္တသာလဉ္စ သာဓုကံ။
ဗဟူနိ ¶ ပရိဝေဏာနိ၊ သာဓု ပေါက္ခရဏီပိ စ၊
ရတ္တိဌာန ဒိဝါဌာန-ပဘုတီနိ စ ကာရယိ။
တဿ နဟာနပါပဿ၊ နှာနပေါက္ခရဏီတဋေ၊
သုနဟာတပရိဝေဏန္တိ၊ ပရိဝေဏံ ပဝုစ္စတိ။
တဿ စင်္ကမိတဌာနေ၊ ဒီပ ဒီပဿ သာဓုနော၊
ဝုစ္စတေ ပရိဝေဏံ တံ၊ ဒီဃစင်္ကမနံ ဣတိ။
အဂ္ဂဖလသမာပတ္တိံ၊ သမာပဇ္ဇ ယဟိံ တုသော၊
ဖလဂ္ဂ ပရိဝေဏန္တိ၊ ဧတံ တေန ပဝုစ္စတိ။
အပဿိယ အပဿေနံ၊ ထေရော တတ္ထ နိသီဒိသော၊
ထေရာ ပဿယ ပရိဝေဏံ၊ ဧတံ တေန ပဝုစ္စတိ။
ဗဟူ မရုဂဏာ ယတ္ထ၊ ဥပါသိံသု ဥပစ္စတံ၊
တေနေဝ တံ မရုဂဏ-ပရိဝေဏန္တိ ဝုစ္စတိ။
သေနာပတိတဿ ရညော၊ ထေရဿ ဒီဃသန္ဒကော၊
ကာရေသိ စူဠပါသာဒံ၊ မဟာထမ္ဘေဟိ အဋ္ဌဟိ။
ဒီဃသန္ဒ သေနာပတိ-ပရိဝေဏန္တိ တံ တဟိံ၊
ဝုစ္စတေ ပရိဝေဏံ တံ၊ ပမုခံ ပမုခါကရံ။
ဒေဝါနံပိယဝစနော’ပဂုဠနာမော၊
လံကာယံ ပဌမမိမံ မဟာဝိဟာရံ၊
ရာဇာ သော သုမတိမဟာမဟိန္ဒထေရံ၊
အာဂမ္မာ မလမတိမေတ္ထကာရယိတ္ထာတိ။
သုဇနပ္ပသာဒ သံဝေဂတ္ထာယ ကတေ မဟာဝံသေ
မဟာဝိဟာရပဋိဂ္ဂဟကော နာမ
ပန္နရသမော ပရိစ္ဆေဒေါ။