📜
သောဠသမ ပရိစ္ဆေဒ
စေတိယပဗ္ဗတဝိဟာရ ပဋိဂ္ဂဟကော
ပုရေ ¶ စရိတွာ ပိဏ္ဍာယ၊ ကရိတွာ ဇနသင်္ဂဟံ၊
ရာဇဂေဟမှိ ဘုဉ္ဇန္တော၊ ကာရေန္တော ရာဇသင်္ဂဟံ။
ဆဗ္ဗသဒိဝသေ ထေရော၊ မဟာမေဃဝနေ ဝသီ၊
အာသဠှသုက္ကပက္ခဿ၊ တေရသေ ဒိဝသေ ပန။
ရာဇဂေဟမှိ ဘုဉ္ဇိတွာ၊ မဟာရညော မဟာမတိ၊
မဟာ’ပ္ပမာဒသုတ္တန္တံ၊ ဒေသယိတွာ တတော စ သော။
ဝိဟာရကရဏံ ဣစ္ဆံ၊ တတ္ထ စေတိယပဗ္ဗတေ၊
နိက္ခမ္မ ပုရိမဒွါရာ၊ အဂါ စေတိယပဗ္ဗတံ။
ထေရံ တတ္ထ ဂတံ သုတွာ၊ ရထံ အာရုယှ ဘူပတိ၊
ဒေဝိယော ဒွေ စ အာဒါယ၊ ထေရဿာနုပဒံ အကာ။
ထေရာ နာဂစတုက္ကမှိ၊ နဟာတွာ ရဟဒေ တဟိံ၊
ပဗ္ဗတာရောဟဏတ္ထာယ၊ အဋ္ဌံသု ပဋိပါဋိယာ။
ရာဇာ ရထာ တဒေါ’ရုယှ၊ သဗ္ဗေ ထေရေ’ဘိဝါဒယိ၊
ဥဏှေ ကိလန္တေ ကိံရာဇ၊ အာဂတောသီ’တိ အဟုတေ။
တုမှာကံ ဂမနာသင်္ကီ၊ အာဂတောမှီ’တိ ဘာသိတေ၊
ဣဓေဝ ဝဿံ ဝသိတုံ၊ အာဂတမှာ’တိ ဘာသိယ။
တဿူပနာယိကံ ထေရော၊ ခန္ဓကံ ခန္ဓကောဝိဒေါ၊
ကထေသိ ရညော တံ သုတွာ၊ ဘာဂိနေယျော စ ရာဇိနော။
မဟာရိဋ္ဌော မဟာမစ္စော၊ ပဉ္စပညာသဘာတုဟိ၊
သဒ္ဓိံ ဇေဋ္ဌကနိဋ္ဌေဟိ၊ ရာဇာနမဘိတော ဌိတော။
ယာစိတွာ တဒဟု စေဝ၊ ပဗ္ဗဇုံ ထေရသန္တိကေ၊
ပတ္တာရဟတ္တံ သဗ္ဗေပိ၊ တေ ခုရဂ္ဂေ မဟာမတီ။
ကန္တကစေတိယဌာနေ၊ ပရိတော တဒဟေဝ သော၊
ကမ္မာနိ အာရဘာပေတွာ၊ လေဏာနိ အဋ္ဌသဋ္ဌိယော။
အဂမာသိ ¶ ပုရံ ရာဇာ၊ ထေရာ တတ္ထေဝ တေ ဝသုံ၊
ကာလေ ပိဏ္ဍာယ နဂရံ၊ ပဝိသန္တာ’နုကမ္ပကာ။
နိဋ္ဌိတေ လေဏကမ္မမှိ၊ အာသဠှိပုဏ္ဏမာသိယံ၊
ဂန္တွာ အဒါသိ ထေရာနံ၊ ရာဇာ ဝိဟာရဒက္ခိဏံ။
ဒွတ္တိံသမာဠကာနဉ္စ၊ ဝိဟာရဿ စ တဿ ခေါ၊
သီမံ သီမာတိဂေါ ထေရော၊ ဗန္ဓိတွာ တဒဟေဝ သော။
တေသံ ပဗ္ဗဇ္ဇာပေက္ခာနံ၊ အကာသိ ဥပသမ္ပဒံ၊
သဗ္ဗေသံ သဗ္ဗပဌမံ၊ ဗဒ္ဓေ တုမ္ဗရုမာဠကေ။
ဧတေ ဒွါသဋ္ဌိ အရဟန္တော၊ သဗ္ဗေ စေတိယပဗ္ဗတေ၊
တတ္ထ ဝဿံ ဥပဂန္တွာ၊ အကံသု ရာဇသင်္ဂဟံ။
ဒေဝမနုဿဂဏဂဏိတံ တံ၊
တဉ္စ ဂဏံ ဂုဏဝိတ္ထတကိတ္တိံ၊
ယာနမုပစ္စ စ မာနယမာနာ၊
ပုညစယံ ဝိပုလံ အကရိံသူတိ။
သုဇနပသာဒသံဝေဂတ္ထာယ ကတေ မဟာဝံသေ
စေတိယပဗ္ဗတဝိဟာရပဋိဂ္ဂဟကော နာမ
သောဠသမော ပရိစ္ဆေဒေါ။