📜
ဧကူနဝီသတိမ ပရိစ္ဆေဒ
ဗောဓိ အာဂမနော
မဟာဗောဓိရက္ခဏတ္ထံ ¶ ၊ အဋ္ဌာရသ ရထေ သဘော၊
ဒေဝကုလာနိ ဒတွာန၊ အဋ္ဌာမစ္စာ ကုလာနိ စ။
အဋ္ဌ ဗြာဟ္မဏကုလာနိ၊ အဋ္ဌ ဝဿကုလာနိ စ၊
ဂေါပကာနံ တရစ္ဆာနံ၊ ကုလိင်္ဂါနံ ကုလာနိ စ။
တထေဝ ပေသကာရာနံ၊ ကုမ္ဘကာရာနမေဝ စ၊
သဗ္ဗေ သဉ္စာပိ သေနီနံ၊ နာဂယက္ခာနမေဝ စ။
ဟေမသဇ္ဇုဃဋေစေဝ၊ ဒတွာ အဋ္ဌဋ္ဌ မာနဒေါ၊
အာရောပေတွာ မဟာဗောဓိံ၊ နာဝံ ဂင်္ဂါယ ဘူသိတံ။
သင်္ဃမိတ္တ မဟာထေရီ၊ သဟေ ကဒသ ဘိက္ခုနိံ၊
တထေဝါ’ရောပယိတွာန၊ အရိဋ္ဌပမုခေပိ စ။
နဂရာ နိက္ခမိတွာန၊ ဝိဉ္ဇာဋဝိမတိစ္စသော၊
တာမလိတ္ထိံ အနုပ္ပတ္တော၊ သတ္တာဟေနေ’ဝ ဘူပတိ။
အစ္စုဠာ ရာဟိ ပူဇာယိ၊ ဒေဝါနာဂါနရာပိ စ၊
မဟာဗောဓိံ ပူဇယန္တာ၊ သတ္တာဟေန’ဝုပါဂမုံ။
မဟာသမုဒ္ဒတီရမှိ၊ မဟာဗောဓိံ မဟီပတိ၊
ဌပါပေတွာန ပူဇေသိ၊ မဟာရဇ္ဇေန သော ပုန။
မဟာဗောဓိံ မဟာရဇ္ဇေ၊ အဘိသိဉ္စီယကာမဒေါ၊
အဂ္ဂသိရ သုက္ကပက္ခေ၊ ဒိနေ ပါဋိပဒေ တတော။
ဥစ္စာရေတုံ မဟာဗောဓိံ၊ တေဟိယေဝ’ဋ္ဌ အဋ္ဌဟိ၊
သာလမူလမှိ ဒိန္နေဟိ၊ ဓာတုဂ္ဂတကုလေဟိ သော။
ဥက္ခိပိတွာ မဟာဗောဓိံ၊ ဂလမတ္တံ ဇလံ တဟိံ၊
ဩဂါဟေတွာ သနာဝါယ၊ ပတိဋ္ဌာပယိ သာဓုကံ။
နာဝံ ¶ အာရောပယိတွာ တံ၊ မဟာထေရိံ သထေရိကံ၊
မဟာရိဋ္ဌံ မဟာမစ္စံ၊ ဣဒံ ဝစနမဗြဝိ။
‘‘အဟံ ရဇ္ဇေန တိက္ခတ္တုံ၊ မဟာဗောဓိမပူဇယိံ၊
ဧဝ မေဝါ’ဘိ ပူဇေတု၊ ရာဇာ ရဇ္ဇေန မေ သခါ’’။
ဣဒံ ဝတွာ မဟာရာဇာ၊ တီရေ ပဉ္ဇလိကော ဌိတော၊
ဂစ္ဆမာနံ မဟာဗောဓိံ၊ ပဿံ အဿူနိဝတ္တယိ။
မဟာဗောဓိ ဝိယောဂေန၊
ဓမ္မာ သောကော သသောကဝါ၊
ကန္နိတွာ ပရိဒေဝိတွာ၊
အဂမာသိ သကံ ပုရံ။
မဟာဗောဓိ သမာရုဠှာ၊ နာဝါပက္ခန္ဓီ တောယဓိံ၊
သမန္တာ ယောဇနေ ဝိစီ၊ သန္နိသီဒိ မဟဏ္ဏဝေ။
ပုပ္ဖိံသု ပဉ္စဝဏ္ဏာနိ၊ ပဒုမာနိ သမန္တတော၊
အန္တလိက္ခေ ပဝဇ္ဇိံသု၊ အနေက တူရိယာနိ စ။
ဒေဝတာဟိ အနေကာဟိ၊ ပူဇာ’နေကာ ပဝတ္တိတာ၊
ဂဟေတုဉ္စ မဟာဗောဓိ၊ နာဂါ’ကာသုံ ဝိကုဗ္ဗနံ။
သင်္ဃမိတ္တာ မဟာထေရိ၊ အဘိညာဗလပါရဂါ၊
သုပဏ္ဏရူပါ ဟုတွာန၊ တေ တာသေသိ မဟောရဂေ။
တေ တာသိတာ မဟာထေရိံ၊ ယာစိတွာန မဟောရဂါ၊
နယိတွာန မဟာဗေမဓိံ၊ ဘုဇင်္ဂဘဝနံ တတော။
သတ္တာဟံ နာဂရဇ္ဇေန၊ ပူဇာဟိ ဝိဝိဓာဟိ စ၊
ပူဇယိတွာန အာနေတွာ၊ နာဝါယံ ဌပယိံသု တေ။
တဒဟေဝ မဟာဗောဓိ၊ ဇမ္ဗုကောလမိဓဂမာ၊
ဒေဝါနံပိယတိဿော တု၊ ရာဇာ လောကဟိတေ ရတော။
သုမနာ သာမဏေရမှာ၊ ပုဗ္ဗေ သုတတဒါဂမော၊
မဂ္ဂသိရာဒိဒိနဃော၊ ပဘုတိ ဝစသာဒရော။
ဥတ္တရဒွါရတော ¶ ယာဝ၊ ဇမ္ဗုကောလံ မဟာပထံ၊
ဝိဘူသယိတွာ သကလံ၊ မဟာဗောဓိဂတာသယော။
သမုဒ္ဒါသနသာလာယ၊ ဌာနေ ဌတွာ မဟဏ္ဏဝေ၊
အာဂစ္ဆန္တံ မဟာဗောဓိံ၊ မဟာထေရိဒ္ဓိယာ’ဒ္ဒသ။
တသ္မိံဌာနေ ကတာ သာလာ၊ ပကာ သေတုံ တမဗ္ဘုတံ၊
သမုဒ္ဒါသနသာလာတိ၊ နာမေနာ‘သိ’ဓ ပါကဋာ။
မဟာထေရာနုဘာဝေန၊ သဒ္ဓိံ ထေရေဟိ တေဟိ စ၊
တဒဟေဝ’ဂမာ ရာဇာ၊ ဇမ္ဗုကောလံ သ သေနကော။
မဟာဗောဓာ ဂမေပီတိ-ဝေဂေနု’န္နော ဥဒါနယံ၊
ဂလပ္ပမာဏံ သလိလံ၊ ဝိဂါဟေတွာ သုဝိဂ္ဂဟော။
မဟာဗောဓိံ သောဠသဟိ၊ ကုလေဟိ သဟ မုဒ္ဓနာ၊
အာဒါယော’ရောပယိတွာန၊ ဝေလာယံ မဏ္ဍပေ သုဘေ။
ဌပယိတွာန လံကိန္ဒော၊ လံကာရဇ္ဇေန ပူဇယိ၊
သောဠသန္နံ သမပ္ပေတွာ၊ ကုလာနံ ရဇ္ဇမတ္တနော။
သယံ ဒေါဝါရိကဌာနေ၊ ဌတွာန ဒိဝသေ တယော၊
တတ္ထေဝ ပူဇံ ကာရေသိ၊ ဝိဝိဓံ မနုဇာဓိပေါ။
မဟာဗောဓိံ ဒသမိယံ၊ အာရောပေတွာ ရထေသုဘေ၊
အာနယန္တော မနုဿိန္ဒော၊ ဒုမိန္ဒံ တံ ဌပါပယိ။
ပါစိနဿ ဝိဟာရဿ၊ ဌာနေ ဌာနဝိစက္ခဏော၊
ပါတရာသံ ပဝတ္တေသိ၊ သသင်္ဃဿ ဇနဿ သော။
မဟာမဟိန္ဒထေရေ’တ္ထ၊ ကတံ ဒသဗလေန တံ၊
ကထေသိ နာဂဒမနံ၊ ရညော တဿ အသေသတော။
ထေရဿ သုတွာ ကာရေတွာ၊ သညာဏာနိ တဟိံ တဟိံ၊
ပရိဘုတ္တေသု ဌာနေသု၊ နိသဇ္ဇာဒီဟိ သတ္ထုနာ။
တိဝက္ကဿ ဗြာဟ္မဏဿ၊ ဂါမဒွါရေ စ ဘူပတိ၊
ဌပါပေတွာ မဟာဗောဓိံ၊ ဌာနေသု တေသု တေသု စ။
သုဒ္ဓဝါလုက သန္ထာရေ၊ နာနာပုပ္ဖသမာကုလေ၊
ပဂ္ဂဟိတဓဇေ မဂ္ဂေ၊ ပုပ္ဖဂ္ဃိကဝိဘူသိတေ။
မဟာဗောဓိံ ¶ ပူဇယန္တော၊ ရတ္တိန္ဒိဝ မတန္ဒိတော၊
အာနယိတွာ စုဒ္ဒသိယံ၊ အနုရာဓ ပုရန္တိကံ။
ဝဍ္ဎမာနကစ္ဆာယာယ၊ ပုရံ သာဓု ဝိဘူသိတံ၊
ဥတ္တရေန စ ဒွါရေန၊ ပူဇယန္တော ပဝေသိယ။
ဒက္ခိဏေန စ ဒွါရေန၊ နိက္ခမိတွာ ပဝေသိယ၊
မဟာ မေဃဝနာရာမံ၊ စတုဗုဒ္ဓနိသေဝိတံ။
သုမနဿေဝ ဝစသာ၊ ပဒေသံ သာဓုသင်္ခတံ၊
ပုဗ္ဗဗောဓိဌိတဋ္ဌာနံ၊ ဥပနေတွာ မနောရမံ။
ကုလေဟိ သော သောဠသဟိ၊ ရာဇာ လင်္ကာရဓာရိဟိ၊
ဩရောပေတွာ မဟာဗောဓိံ၊ ပတိဋ္ဌာ ပေတု မောဿဇ္ဇိ။
ဟတ္ထတော မုတ္တမတ္တသာ၊ အသီတိရတနံ နဘံ၊
ဥဂ္ဂန္တွာန ဌိတာ မုဉ္စိ၊ ဆဗ္ဗဏ္ဏာ ရသ္မိယော သုဘာ။
ဒီပေ ပတ္ထရိယာ’ဟစ္စ၊ ဗြဟ္မလောကံ ဌိတာ အဟု၊
သူရိယတ္ထင်္ဂမနာယာဝ၊ ရသ္မိယော တာ မနောရမာ။
ပုရိသာ ဒသသဟဿာနိ၊ ပသန္နာ ပါဋိဟာရိယေ၊
ဝိပဿိတွာနာ’ရဟတ္ထံ၊ ပတွာန ဣဓ ပဗ္ဗဇုံ။
ဩရောဟိတွာ မဟာဗောဓိ၊ သူရိယတ္ထင်္ဂမေ တတော၊
ရောဟိဏိယာ ပတိဋ္ဌာသိ၊ မဟိယံ ကမ္ပိ မေဒိနီ။
မူလာနိ တာနိ ဥဂ္ဂန္တွာ၊ ကဋာဟမုခဝဋ္ဋိတော၊
ဝိနန္ဓန္တာ ကဋာဟံ တံ၊ ဩတရိံသု မဟီတလံ။
ပတိဋ္ဌိတံ မဟာဗောဓိံ၊ ဇနာ သဗ္ဗေ သမဂတာ၊
ဂန္ဓမာလာဒိ ပူဇာဟိ၊ ပူဇယိံသု သမန္တတော။
မဟာမေဃော ပဝဿိတ္ထ၊ ဟိမဂဗ္ဘာ သမန္တတော၊
မဟာဗောဓိံ ဆာဒယိံသု၊ သီတလာနိ ဃနာနိ စ။
သတ္တာဟာနိ မဟာဗောဓိံ၊ တဟိံယေဝ အဒဿနာ၊
ဟိမဂဗ္ဘေ သန္နိသီဒိ၊ ပသာဒဇနနီ ဇနေ။
သတ္တာဟာ တိက္ကမေ မေဃာ၊ သဗ္ဗေ အပဂမိံသု တေ၊
မဟာဗောဓိ စ ဒိဿိတ္ထ၊ ဆဗ္ဗဏ္ဏာ ရံသိယောပိ စ။
မဟာမဟိန္ဒတ္ထေရောစ၊ သင်္ဃမိတ္တာ စ ဘိက္ခုနီ၊
တတ္ထာ’ဂဉ္ဆုံသပရိသာ၊ ရာဇာ သပရိသောပိ စ။
ခတ္တိယာ ¶ ကာဇရဂ္ဂါမေ၊ စန္ဒနဂ္ဂါမ ခတ္တိယာ၊
တိဝက္က ဗြာဟ္မဏော စေဝ၊ ဒီပဝါသီ ဇနာပိ စ။
ဒေဝါနုဘာဝေနာ’ဂဉ္ဆုံ၊ မဟာဗောဓိ မဟုဿုက္ကာ၊
မဟာသမာဂမေ တသ္မိံ၊ ပါဋိဟာရိယဝိမှိတေ။
ပက္ကံ ပါစိနသာခါယ၊ ပေက္ခတံ ပက္က’မက္ခတံ၊
ထေရော ပတန္တမာဒါယ၊ ရောပေတုံ ရာဇိနော အဒါ။
ပံသူနံ ဂန္ဓမိဿာနံ၊ ပုဏ္ဏေ သောဏ္ဏ ကဋာဟကေ၊
မဟာသနဿ ဌာနေ တံ၊ ဌပိတံ ရောပ’ယိဿရော။
ပေက္ခတံယေဝ သဗ္ဗေသံ၊ ဥဂ္ဂန္တွာ အဋ္ဌ အင်္ကုရာ၊
ဇာယိံသု ဗောဓိတရုဏာ၊ အဋ္ဌံသု စတုဟတ္ထကာ။
ရာဇာ တေ ဗောဓိတရုဏေ၊ ဒိသွာ ဝိမှိတမာနသော၊
သေတစ္ဆတ္တေန ပူဇေသိ၊ အဘိသေကမဒါသိ စ။
ပတိဋ္ဌာပေသိ အဋ္ဌန္နံ၊ ဇမ္ဗုကောလမှိ ပဋ္ဋနေ၊
မဟာဗောဓိ ဌိတ ဌာနေ၊ နာဝါယော ရောဟနေ တဒါ။
တိဝက္ကဗြာဟ္မဏဂါမေ၊ ထူပါရာမေ တထေဝ စ၊
ဣဿရသမဏာရာမေ၊ ပဌမေ စေတိယင်္ဂဏေ။
စေတိယ ပဗ္ဗတာ ရာမေ၊ တထာ ကာဇရဂါမကေ၊
စန္ဒနဂါမကေ စာတိ၊ ဧကေကံ ဗောဓိလဋ္ဌိကံ။
သေသာ စတုပက္ကဇာတာ၊ ဒွတ္တိံသ ဗောဓိလဋ္ဌိယော၊
သမန္တာ ယောဇနဌာနေ၊ ဝိဟာရေသု တဟိံ တဟိံ။
ဒီပါဝါသီ ဇနဿေဝ၊ ဟိတတ္ထာယ ပတိဋ္ဌိတေ၊
မဟာဗောဓိ ဒုမိန္ဒမှိ၊ သမ္မာသမ္ဗုဒ္ဓ တေဇသာ။
အနုလာသာသ ပရိသာ၊ သင်္ဃမိတ္တာယ ထေရိယာ၊
သန္တိကေ ပဗ္ဗဇိတွာန၊ အရဟတ္တမပါပုဏိ။
အရိဋ္ဌော သော ပဉ္စသတ-ပရိဝါရော စ ခတ္တိယော၊
ထေရန္တိကေ ပဗ္ဗဇိတွာ၊ အရဟတ္တမပါပုဏိ။
ယာနိ သေဋ္ဌိကုလာန’ဋ္ဌ-မဟာဗောဓိမိဓာဟရုံ၊
ဗောဓာဟရကုလာနီတိ၊ တာနိ တေန ပဝုစ္စရေ။
ဥပါသိကာ ဝိဟာရောတိ၊ ဉာတေ ဘိက္ခုနုပဿယေ၊
သသင်္ဃာ သင်္ဃမိတ္တာ သာ၊ မဟာထေရီ တဟိံ ဝသိ။
အဂါရတ္တယပါမောက္ခေ ¶ ၊ အဂါရေ တတ္ထ ကာရယိ၊
ဒွါဒသ တေသု ဧကသ္မိံ၊ မဟာဂါရေ ဌပါပယိ။
မဟာဗောဓိသမေတာယ၊ နာဝါယ ကူပယဋ္ဌိကံ၊
ဧကသ္မိံ ပိယ မေကသ္မိံ၊ အရိတ္တံ တေဟိ တေဝိဒုံ။
ဇာတေ အညနိကာယေပိ၊ အဂါရာ ဒွါဒသာပိ တေ၊
ဟတ္ထာဠက ဘိက္ခုနီဟိ၊ ဝဠဉ္ဇယိံသု သဗ္ဗဒါ။
ရညော မင်္ဂလဟတ္ထိ သော၊ ဝိစရန္တော ယထာသုခံ၊
ပုရဿ ဧကပဿမှိ၊ ကန္ဒရန္တမှိ သီတလေ။
ကဒမ္ဗပုပ္ဖဂုမ္ဗန္တေ၊ အဋ္ဌာသိ ဂေါစရံ စရံ၊
ဟတ္ထိံ တတ္ထရတံ ဉတွာ၊ အကံသု တတ္ထ အာဠှကံ။
အထေက ဒိဝသံ ဟတ္ထီ၊ နဂဏှိ ကဗဠာနိ သော၊
ဒီပပ္ပသာဒကံ ထေရံ၊ ရာဇာ သော ပုစ္ဆိတံ မတံ။
ကဒမ္ဗပုပ္ဖဂုမ္ဗသ္မိံ၊ ထူပဿ ကရဏံ ကရီ၊
ဣစ္ဆတီတိ မဟာထေရော၊ မဟာရာဇဿ အဗြဝိ။
သဓာတုကံ တတ္ထ ထူပံ၊ ထူပဿ ဃရမေဝ စ၊
ခိပ္ပံ ရာဇာ အကာရေသိ၊ နိစ္စံ ဇနဟိတေရတော။
သင်္ဃမိတ္တာ မဟာထေရီ၊ သုညာဂါရာဘိလာသိနီ၊
အာကိဏ္ဏတ္တာ ဝိဟာရဿ၊ ဝုဿမာနဿ တဿ သာ။
ဝုဒ္ဓတ္ထိနီ သာသနဿ၊ ဘိက္ခုနီနံ ဟိတာယ စ၊
ဘိက္ခုနုပဿယံ အညံ၊ ဣစ္ဆမာနာ ဝိစက္ခဏာ။
ဂန္တွာ စေတိယဂေဟံ တံ၊ ပဝိဝေကသုခံ ဘုသံ၊
ဒိဝါဝိဟာရံ ကပ္ပေသိ၊ ဝိဟာရကုသလာ’မလာ။
ထေရိယာ ဝန္ဒနတ္ထာယ၊ ရာဇာ ဘိက္ခုနုပဿယံ၊
ဂန္တွာ တတ္ထ ဂတံ သုတွာ၊ ဂန္တွာန တတ္ထ ဝန္ဒိယ။
သမ္မောဒိတွာ တာယ သဒ္ဓိံ၊ တတ္ထာဂမနကာရဏံ၊
တဿာ ဉတွာ အဓိပ္ပာယံ၊ အဓိပ္ပာယ ဝိဒူ ဝိဒူ။
သမန္တာ ထူပဂေဟဿ၊ ရမ္မံ ဘိက္ခုနုပဿယံ၊
ဒေဝါနံပိယတိဿော သော၊ မဟာရာဇာ အကာရယိ။
ဟတ္ထာဠှကသမီပမှိ ¶ ၊ ကတော ဘိက္ခုနုပဿယော၊
ဟတ္ထာဠှကဝိဟာရောတိ၊ ဝိဿုတော အာသိ တေန သော။
သုမိတ္တာ သင်္ဃမိတ္တာ သာ၊ မဟာထေရီ မဟာမတီ၊
တသ္မိဉှိ ဝါသံ ကပ္ပေသိ၊ ရမ္မေ ဘိက္ခုနုပဿယေ။
ဧဝံ လံကာ လောကဟိတံ သာသနဝုဒ္ဓိံ၊
သံသောဓေန္တော ဧသ မဟာဗောဓိ ဒုမိန္ဒော၊
လံကာဒီပေ ရမ္မေ မဟာမေဃဝနသ္မိံ၊
အဋ္ဌာ သီဃံ ကာလမနေကဗ္ဘူတယုတ္တောတိ။
သုဇနပ္ပသာဒသံဝေဂတ္ထာယ ကတေ မဟာဝံသေ
ဗောဓိအာဂမနော နာမ
ဧကူနဝီသတိမော ပရိစ္ဆေဒေါ။