📜
တေဝီသတိမ ပရိစ္ဆေဒ
ယောဓလာဘော
ဗလလက္ခဏရူပေတိ ¶ ၊
တေဇောဇဝဂုဏေဟိ စ၊
အဂ္ဂေါ ဟုတွာ မဟာကာယော၊
သော စ ကဏ္ဍူလဝါရဏော။
နန္ဒီမိတ္တော သုရနိမိလော၊ မဟာသောဏော ဂေါဋ္ဌယိမ္ဗရော၊
ထေရပုတ္တာဘယော ဘရဏော၊ ဝေဠုသုမနော တထေဝ စ။
ခဉ္ဇဒေဝေါ ဖုဿဒေဝေါ၊ လဘိယျ ဝသဘောပိ စ၊
ဧတေ ဒသ မဟာယောဓာ၊ တဿာ’ဟေသုံ မဟဗ္ဗလာ။
အဟု ဧဠာရရာဇဿ၊ မိတ္တော နာမ စမူပတိ၊
တဿ ကမ္မန္တဂါမမှိ၊ ပါစီနခဏ္ဍရာဇိယာ။
စိတ္တပဗ္ဗတသာမန္တာ၊ အဟု ဘဂိနိယာ သုတော၊
ကောသောဟိတဝတ္ထဂုယှော၊ မာတုလဿေဝ နာမတော။
ဒူရမ္ပိ ပရိသပ္ပန္တံ၊ ဒဟရံ တံ ကုမာရကံ၊
အာဗဇ္ဈ နန္ဒိယာ ကဋျံ၊ နိသဒမှိ အဗန္ဓိသု။
နိသဒံ ကဍ္ဎတော တဿ၊ ဘူမိယံ ပရိသပ္ပတော၊
ဥမ္မာရာတိက္ကမေ နန္ဒိ၊ သာ ဆဇ္ဇတိ ယတော တတော။
နန္ဒိမိတ္တောတိ ဉာယိတ္ထ၊ ဒသနာဂဗလော အဟု၊
ဝုဒ္ဓါ နဂရမာဂမ္မ၊ သော ဥပဋ္ဌာသိ မာတုလံ။
ထူပါဒီသု အသက္ကာရံ၊ ကရောန္တော ဒမိဠေ တဒါ၊
ဦရုံ အက္ကမ္မပါဒေန၊ ဟတ္ထေန ဣတရံ တုသော။
ဂဟေတွာ သမ္ပဒါလေတွာ၊ ဗဟိက္ခပတိံ ထာမဝါ၊
ဒေဝါ အန္တရဓာပေန္တိ၊ တေန ခိတ္တံ ကဠေဝရံ။
ဒမိဠာနံ ခယံ ဒိသွာ၊ ရညော အာရောစယိံ သုတံ၊
‘‘သဟောဋ္ဋံ ဂဏှထေတံ’’တိ၊ ဝုတ္တံ ကာတုံ န သက္ခိသုံ။
စိန္တေသိ ¶ နန္ဒိမိတ္တော သော၊ ‘‘ဧဝမ္ပိ ကရတော မမ၊
ဇနက္ခယော ကေဝလဉှိ၊ နတ္ထိ သာသနဇောတနံ။
ရောဟဏေ ခတ္တိယာ သန္တိ၊ ပသန္နံ ရတနတ္တယေ၊
တတ္ထ ကတွာ ရာဇသေဝံ၊ ဂဏှိတွာ ဒမိဠေ’ခိလေ။
ရဇ္ဇံ ဒတွာ ခတ္တိယာနံ၊ ဇောတေဿံ ဗုဒ္ဓသာသနံ’’၊
ဣတိ ဂန္တွာ ဂါမဏိဿ၊ တံ ကုမာရဿ သာဝယိ။
မာတုယာ မန္တယိတွာ သော၊ သက္ကာရံ တဿ ကာရယိ၊
သက္ကတော နန္ဒိမိတ္တော သော၊ ယောဓော ဝသိ တဒန္တိကေ။
ကာကဝဏ္ဏော တိဿရာဇာ၊ ဝါရေတုံ ဒမိဠိသဒါ၊
မဟာဂင်္ဂါယ တိတ္ထေသု၊ ရက္ခံ သဗ္ဗေသု ကာရယိ။
အဟု ဒီဃာဘယော နာမ၊ ရညော’ည ဘရိယာ သုတော၊
ကစ္ဆကတိတ္ထေ ဂင်္ဂါယ၊ တေန ရက္ခမကာရယိ။
သော ရက္ခာကရဏတ္ထာယ၊ သမန္တာ ယောဇနဒွယေ၊
မဟာကုလမှာ ဧကေကံ၊ ပုတ္တံ အာဏာပယိ တဟိံ။
ကောဋ္ဌိဝါလေ ဇနပဒေ၊ ဂါမေ ခဏ္ဍကဝိဋ္ဌိကေ၊
သတ္တပုတ္တော ကုလပတိ၊ သင်္ဃော နာမာ’သိ ဣဿရော။
တဿာပိ ဓူတံ ပါဟေသိ၊ ရာဇပုတ္တော သုတတ္ထိကော၊
သတ္တမော နိမိလော နာမ၊ ဒသဟတ္ထိဗလော သုတော။
တဿ အကမ္မသီလတ္တာ၊ ခီယန္တာ ဆပိ ဘာတရော၊
ရောစယုံ တဿ ဂမနံ၊ န တု မာတာ ပိတာ ပန။
ကုဇ္ဈိတွာ သေသဘာတူနံ၊ ပါတောယေဝ တိယောဇနံ၊
ဂန္တွာ သုရဂ္ဂမေယေဝ၊ ရာဇပုတ္တံ အပဿိသော။
သော တံ ဝိမံသနတ္ထာယ၊ ဒူရေ ကိစ္စေ နိယောဇယိ၊
စေတိယ ပဗ္ဗတာ သန္နေ၊ ဒွါရ မဏ္ဍလဂါမကေ။
ဗြာဟ္မဏော ကုဏ္ဍလော နာမ၊ ဝိဇ္ဇ တေ မေ သဟာယကော၊
သမုဒ္ဒပါရေ ဘဏ္ဍာနိ၊ တဿ ဝိဇ္ဇန္တိ သန္တိကေ။
ဂန္တွာ တံ တေန ဒိန္နာနိ၊ ဘဏ္ဍကာနိ ဣဓာ’ဟရ၊
ဣတိ ဝတွာန ဘောဇေတွာ၊ လေခံ ဒတွာ ဝိဿဇ္ဇယိ။
တတော နဝ ယောဇနဉှိ၊ အနုရာဓပုရံ ဣဒံ၊
ပုဗ္ဗဏှေယေဝ ဂန္တွာန၊ သော တံ ဗြာဟ္မဏ မဒ္ဒသ။
‘‘နှတွာ ¶ ဝါပိယံ တာတ၊ ဧဟီ’’တိ အာဟ ဗြာဟ္မဏော၊
ဣဓာ’နာဂတ ပုဗ္ဗတ္တာ၊ နှတွာန တိဿဝါပိယံ။
မဟာဗောဓိဉ္စ ပူဇေတွာ၊ ထူပါရာမေ စ စေတိယံ၊
နဂရံ ပဝိသိတွာန၊ ပဿိတွာ သကလံ ပုရံ။
အာပဏာ ဂန္ဓမာဒါယ၊ ဥတ္တရ ဒွါရတော တတော၊
နိက္ခမ္မုပ္ပလ ခေတ္တမှာ၊ ဂဟေတွာ ဥပ္ပလာနိ စ။
ဥပါဂမိ ဗြာဟ္မဏံ တံ၊ ပုဋ္ဌော တေနာ’ဟ သော ဂတိံ၊
သုတွာ သော ဗြာဟ္မဏော တဿ၊ ပုဗ္ဗာဂမမိဓာဂမံ။
ဝိမှိတော စိန္တယီ ဧဝံ၊ ‘‘ပုရိသာ ဇာနီယော အယံ၊
သစေ ဇာနေယျ ဧဠာရော၊ ဣမံ ဟတ္ထေ ကရိဿတိ။
တသ္မာ’ယံ ဒမိဠာ’သန္နေ၊ ဝါသေတုံ နေဝ အရဟတိ၊
ရာဇပုတ္တဿ ပိတုနော၊ သန္တိကေ ဝါသမရဟတိ’’။
ဧဝ မေဝံ လိခိတွာန၊ လေခံ တဿ သမပ္ပယိ၊
ပုဏ္ဏဝဍ္ဎန ဝတ္ထာနိ၊ ပဏ္ဏာကာရေ ဗဟူပိ စ။
ဒတွာ တံ ဘောဇယိတွာ စ၊ ပေသေသီ သခိသန္တိကံ၊
သော ဝဍ္ဎမာနစ္ဆာယာယံ၊ ဂတွာ ရာဇသုတန္တိ ကံ။
လေခဉ္စ ပဏ္ဏာကာရေ စ၊ ရာဇပုတ္တဿ အပ္ပယိ၊
တုဋ္ဌော အာဟ ‘‘သဟဿေန၊ ပသာဒေထ ဣမ’’န္တိ သော။
ဣဿံ ကရိံသု တဿ’ညေ၊ ရာဇပုတ္တဿ သေဝကာ၊
သော တံ ဒသသဟဿေန၊ ပသာဒါပေသိ ဒါရကံ။
တဿ ကေသံ လိခါပေတွာ၊ ဂင်္ဂါယေဝ နဟာပိယ၊
ပုဏ္ဏဝဍ္ဎန ဝတ္ထယုဂံ၊ ဂန္ဓမာလဉ္စ သုန္ဒရံ၊
အစ္ဆာဒေတွာ ဝိလိမ္ပေတွာ၊ မဏ္ဍယိတွာ သုရူပကံ။
သီသံ ဒုကူလပဋ္ဋေန၊ ဝေဌယိတွာ ဥပါနယုံ၊
အတ္တနော ပရိဟာရေန၊ ဘတ္တံ တဿ အဒါပယိ။
အတ္တနော ဒသသဟဿ-အဂ္ဃနသယနံ သုဘံ၊
သယနတ္ထံ အဒါပေသိ၊ တဿ ယောဓဿ ခတ္တိယော။
သော ¶ သဗ္ဗံ ဧကတော ကတွာ၊ နေတွာ မာတာပိတန္တိကံ၊
မာတုယာ ဒသသဟဿံ၊ သယနံ ပိတုနော အဒါ။
တံယေဝ ရတ္တိံ အာဂန္တွာ၊ ရက္ခဌာနေ အဒ္ဒဿယိ၊
ပဘာတေ ရာဇပုတ္တော တံ၊ သုတွာ တုဋ္ဌမနော အဟု။
ဒတွာ ပရိစ္ဆဒံ တဿ၊ ပရိဝါရဇနံ တထာ၊
ဒတွာ ဒသသဟဿာနီ၊ ပေသေသိ ပိတုသန္တိကံ။
ယောဓော ဒသသဟဿာနိ၊ နေတွာ မာတာပိတန္တိကံ၊
တေသံ ဒတွာ ကာကဝဏ္ဏ-တိဿော ရာဇာ မုပါဂမိ။
သော ဂါမဏိကုမာရဿ၊ တမပ္ပေသိ မဟီပတိ၊
သက္ကတော သုရနိမိလော၊ ယောဓော ဝသိ တဒန္တိကေ။
ကုဋုမ္ဗရိကဏ္ဏိကာယံ၊
ဟုန္ဒရီဝါပိ ဂါမကေ၊
တိသဿ အဋ္ဌမော ပုတ္တော၊
အဟောသိ သောဏ နာမကော။
သတ္တဝဿိကကာလေပိ၊ တာလဂစ္ဆေ အလုဉ္စိ သော၊
ဒသ ဝဿိကကာလမှိ၊ တာလေ လုဉ္စိမဟဗ္ဗလော။
ကာလေ န သော မဟာသောဏော၊
ဒသ ဟတ္ထိ ဗလော အဟု၊
ရာဇာ တံ တာဒိသံ သုတွာ၊
ဂဟေတွာ ပိတုသန္တိကာ။
ဂါမဏိဿ ကုမာရဿ၊ အဒါသိ ပေါသနတ္ထိကော၊
တေန သော လဒ္ဓသက္ကာရော၊ ယောဓော ဝသိ တဒန္တိကေ။
ဂိရိနာမေ ဇနပဒေ၊ ဂါမေ နိစ္ဆေလဝိဋ္ဌိကေ၊
ဒသဟတ္ထိဗလော အာသိ၊ မဟာနာဂဿ အတြဇော။
လကုဏ္ဋကသရီရတ္တာ၊ အဟု ဂေါဋ္ဌက နာမကော၊
ကရောန္တိ ကေဠိပရိဟာသံ၊ တဿ ဇေဋ္ဌာ ဆ ဘာတရော။
တေ ဂန္တွာ မာသခေတ္တတ္ထံ၊ ကောဋ္ဋယိတွာ မဟာဝနံ၊
တဿ ဘာဂံ ဌပေတွာန၊ ဂန္တွာ တဿ နိဝေဒယုံ။
သော ¶ ဂန္တွာ တံ ခဏံယေဝ၊ ရုက္ခေ ဣမ္ဗရသညိတေ၊
လုဉ္စိတွာန သမံ ကတွာ၊ ဘူမိံ ဂန္တွာ နိဝေဒယိ။
ဂန္တွာန ဘာတရော တဿ၊ ဒိသွာ ကမ္မန္တ မဗ္ဘုတံ၊
တဿ ကမ္မံ ကိတ္တယန္တာ၊ အာဂစ္ဆိံသု တဒန္တိကံ။
တဒုပါဒါယ သော အာသိ၊ ဂေါဋ္ဌယိမ္ဗရနာမကော၊
တထေဝ ရာဇာ ပါဟေသိ၊ တမ္ဗိ ဂါမဏိသန္တိကံ။
ကောဋိပဗ္ဗတသာမန္တာ၊ ကိတ္တိဂါမမှိ ဣဿရော၊
ရောဟဏော နာမ ဂဟပတိ၊ ဇာတံ ပုတ္တကမတ္တနော။
သမာန နာမံ ကာရေသိ၊ ဂေါဋ္ဌကာဟယရာဇိနော၊
ဒါရကော သော ဗလီ အာသိ၊ ဒသဒွါဒသဝဿိကော။
အသက္ကုဏေယျပါသာဏေ၊ ဥဒ္ဓတ္တုံ စတုပဉ္စဟိ၊
ကီဠမာနော ခိပိ တဒါ၊ သော ကီဠာဂုဠကေ ဝိယ။
တဿ သောဠသဝဿဿ၊ ပိတာ ဂဒမကာရယိ၊
အဋ္ဌတိံသင်္ဂုလဝဋ္ဋံ၊ သောဠသဟတ္ထဒီဃကံ။
ကာလာနံ နာဠိကေရာနံ၊
ခန္ဓေ အာဟစ္စ တာယ သော၊
တေ ပါတယိတွာ တေနေဝ၊
ယော ဓော သော ပါကဋော အဟု။
တထေဝ ရာဇာ ပါဟေသိ၊ တမ္ပိ ဂါမဏိသန္တိကေ၊
ဥပဋ္ဌာကော မဟာသုမ္မ-ထေရဿာ’သိ ပိတာ ပန။
သော မဟာသုမ္မထေရဿ၊ ဓမ္မံ သုတွာ ကုဋုမ္ဗိကော၊
သောတာပတ္တိဖလံ ပတ္တော၊ ဝိဟာရေ ကောဠပဗ္ဗတေ။
သောတု သဉ္ဇာတသံဝေဂေါ၊ အာရောစေတွာန ရာဇိနော၊
ဒတွာ ကုဋုမ္ဗံ ပုတ္တဿ၊ ပဗ္ဗဇိ ထေရသန္တိကေ။
ဘာဝနံ အနုယုဉ္ဇိတွာ၊ အရဟတ္တမပါပုဏိ၊
ပုတ္တော တေန’ဿ ပညာယိ၊ ထေရပုတ္တာဘယော ဣတိ။
ကပ္ပကန္ဒရဂါမမှိ၊ ကုမာရဿ သုတော အဟု၊
ဘရဏော နာမ သော ကာလေ၊ ဒသဒွါဒသဝဿိကေ။
ဒါရကေဟိ ¶ ဝနံ ဂန္တွာ’-နုဗန္ဓိတွာ သသေ ဗဟူ၊
ပါဒေန ပဟရိတွာန၊ ဒွိခဏ္ဍံ ဘူမိယံ ခိပိ။
ဂါမိကေဟိ ဝနံ ဂန္တွာ၊ သောဠသဝဿိကော ပန၊
တထေဝ ပါတေသိ လဟုံ၊ မိဂ ဂေါကဏ္ဏသူကရေ။
ဘရဏော သော မဟာယောဓော၊
တေနေဝ ပါကဋော အဟု၊
တထေဝ ရာဇာ ဝါသေသိ၊
တမ္ပိ ဂါမဏိသန္တိကေ။
ဂိရိဂါမေ ဇနပဒေ၊ ကုဋုမ္ဗိယင်္ဂဏဂါမကေ၊
ကုဋုမ္ပိဝသဘော နာမ၊ အဟောသိ တတ္ထ သမ္မတော။
ဝေဠော ဇနပဒေါ တဿ၊ သုမနော ဂိရိဘောဇကော၊
သဟာယဿ သုတေ ဇာတေ၊ ပဏ္ဏာကာရပုရဿရာ။
ဂန္တွာ ဥဘော သကံ နာမံ၊ ဒါရကဿ အကာရယုံ၊
တံ ဝုဒ္ဓံ အတ္တနော ဂေဟေ၊ ဝါသေသိ သိရိဘောဇကော။
တဿေ’ကော သိန္ဓဝေါ ပေါသံ၊ ကဉ္စိနာ ရောဟိတုံ အဒါ၊
ဒိသွာ တု ဝေဠုသုမနံ၊ အယံ အရောဟကော မမ။
အနုရူပေါ’တိ စိန္တေတွာ၊
ပဟဋ္ဌော ဟေသိတံ အကာ၊
တံ ဉတွာ ဘောဇကော ‘‘အဿံ၊
အာရောဟာ’’တိ တမာဟသော။
သော အဿံ အာရုဟိတွာ တံ၊ သီဃံ ဓာဝယိ မဏ္ဍလေ၊
မဏ္ဍလေ သကလေ အဿော၊ ဧကာဗဒ္ဓါ အဒိဿိ သော။
နိသီဒိ ဓာဝတော စ’ဿ၊ ဝဿဟာရော’ဝ ပိဋ္ဌိယံ၊
မောစေတိပိ ဥတ္တရိယံ၊ ဗန္ဓတိပိ အနာဒရော။
တံ ဒိသွာ ပရိသာ သဗ္ဗာ၊ ဥက္ကုဋ္ဌိံ သမ္ပဝတ္တယိ၊
ဒတွာ ဒသသဟဿာနိ၊ တဿ သော ဂိရိဘောဇကော။
ရာဇာနုစ္ဆဝိကော’ယံတိ၊ ဟဋ္ဌော ရညော အဒါသိ တံ၊
ရာဇာ တံ ဝေဠုသုမနံ၊ အတ္တနောယေဝ သန္တိကေ။
ကာရေတွာ ¶ တဿ သက္ကာရံ၊ ဝါသေသိ ဗဟုမာနယံ၊
နကုလနဂရကဏ္ဏိကာယံ၊ ဂါမေ မဟိန္ဒ ဒေါဏိကေ။
အဘယဿ’န္တိမေ ပုတ္တော၊ ဒေဝေါနာမာ’သိ ထာမဝါ၊
ဤသကံ ပန ခဉ္ဇတ္တာ၊ ခဉ္ဇဒေဝေါတိ တံ ဝိဒုံ။
မိဂမံ ဂါမဝါသီဟိ၊ သဟ ဂန္တွာန သော တဒါ၊
မဟိသေ အနုဗန္ဓိတွာ၊ မဟန္တေ ဥဋ္ဌိတုဋ္ဌိတေ။
ဟတ္ထေန ပါဒေ ဂဏှိတွာ၊ ဘမေတွာ သီသမတ္ထကေ၊
အသုမှ ဘူမိံ စုဏ္ဏေတိ၊ တေသံ အဋ္ဌီနိ မာဏဝေါ။
တံ ပဝတ္တိံ သုဏိတွာဝ၊ ခဉ္ဇဒေဝံ မဟီပတိ၊
ဝါသေသိ အာဟရာပေတွာ၊ ဂါမဏိဿေ’ဝ သန္တိကေ။
စိတ္တလပဗ္ဗတာ’သန္နေ၊ ဂါမေ ကပိဋ္ဌနာမကေ၊
ဥပ္ပလဿ သုတော အာသိ၊ ဖုဿဒေဝေါတိ နာမကော။
ဂန္တွာ သဟ ကုမာရေဟိ၊ ဝိဟာရံ သော ကုမာရကော၊
ဗောဓိယာ ပူဇိတံ သင်္ခံ၊ အာဒါယ ဓမိထာမသာ။
အသနီပါတသဒ္ဒေါဝ၊ သဒ္ဒေါ တဿ မဟာ အဟု၊
ဥမ္မတ္တာ ဝိယ အာသုံ တေ၊ ဘီတာ သဗ္ဗေပိ ဒါရကာ။
တေန သော အာသိ ဥမ္မာဒ-ဖုဿ ဒေဝေါတိ ပါကဋော၊
ဓနုသိပ္ပံ အကာရေသိ၊ တဿ ဝံသာဂတံ ပိတာ။
သဒ္ဒဝေဓိ ဝိဇ္ဇုဝေဓီ၊ ဝါလဝေဓီ စ သော အဟု၊
ဝါလုကာပုဏ္ဏသကဋံ၊ ဗဒ္ဓဓမ္မသတံ တထာ။
အသနော ဒုမ္ဗရမယံ၊ အဋ္ဌသောဠသအင်္ဂုလံ၊
တထာ အယော လောဟမယံ၊ ပဋ္ဋံဒိ စတုရင်္ဂလိ။
နိဗ္ဗေဓယတိကဏ္ဏေန၊ ကဏ္ဍော တေန ဝိသဇ္ဇိတော၊
ထလေ အဋ္ဌုသဘံ ယာတိ၊ ဇလေ တု ဥသဘံ ပန။
တံ သုဏိတွာ မဟာရာဇာ၊ ပဝတ္တိံ ပိတုသန္တိကာ၊
တမ္ပိ အာဏာပယိတွာန၊ ဂါမဏိမှိ အဝါသယိ။
တုလာဓာရနဂါသန္နေ၊ ဝိဟာရဝါပိ ဂါမကေ၊
မတ္တကုဋုမ္ဗိဿ သုတော၊ အဟု ဝသဘနာမကော။
တံ ¶ သုဇာတသရီရတ္တာ၊ လဘိယ ဝသဘံ ဝိဒုံ၊
သော ဝီသတိဝဿုဒ္ဒေသမှိ၊ မဟာကာယဗလော အဟု။
အာဒါယ သော ကတိပယော၊ ပုရိသေယေဝ အာရဘိ၊
ခေတ္တတ္ထိကော မဟာဝါပိံ၊ ကရောန္တော တံ မဟဗ္ဗလော။
ဒသဟိ ဒွါဒသဟိ ဝါ၊ ဝဟိတဗ္ဗေ ဓုရေဟိပိ၊
ဝဟန္တော ပံသုပိဏ္ဍေ သော၊ လဟုံ ဝါပိံ သမာပယိ။
တေန သော ပါကဋော အာသိ၊ တမ္ပိ အာဒါယ ဘူမိပေါ၊
ဒတွာ တံ တဿ သက္ကာရံ၊ ဂါမဏိဿ အဒါသိ တံ။
ဝသဘောဒကဝါရောတိ၊ ကံ ခေတ္တံ ပါကဋံ အဟု၊
ဧဝံ လဘိယာဝသဘော၊ ဝသိ ဂါမဏိသန္တိကေ။
မဟာယောဓာနမေတေသံ၊ ဒသန္နမ္ပိ မဟိပတိ၊
ပုတ္တဿ သက္ကာရသမံ၊ သက္ကာရံ ကာရယိ တဒါ။
အာမန္တေတွာ မဟာယောဓေ၊ ဒသာပိ စ ဒိသမ္ပတိ၊
‘‘ယောဓေ ဒသဒသေ’ကေကော၊ ဧသထာ’တိ ဥဒါဟရိ။
တေ တထေဝါ’နယုံ ယောဓေ၊ တေသမ္ပာဟ မဟီပတိ၊
တဿ ယောဓသဟဿာပိ၊ တထေဝ ပရိယေသိတုံ။
တထာ တေပါ’နယုံ ယောဓေ၊ တေသမ္ပာဟံ မဟီပတိ၊
ပုနယောဓသဟဿဿ၊ တထေဝ ပရိယေသိတုံ။
တထာ တေပါ’နယုံ ယောဓေ၊ သဗ္ဗေ သမ္ပိဏ္ဍိတာ တု တေ၊
ဧကာဒသသဟဿာနိ၊ ယောဓာသတံ တထာ ဒသ။
သဗ္ဗေ တေ လဒ္ဓသက္ကာရာ၊ ဘူမိပါလေန သဗ္ဗဒါ၊
ဂါမဏိံ ရာဇပုတ္တံ တံ၊ ဝသိံသု ပရိဝါရိယ။
ဣတိ သုစရိတဇာတဗ္ဘုတံ၊
သုဏိယ နရော မတိမာ သုခတ္တိကော၊
အကုသလပထတော ပရမ္မုခေါ၊
ကုသလပထေ’ဘိရမေယျ သဗ္ဗဒါတိ။
သုဇနပ္ပသာဒသံဝေဂတ္ထာယ ကတေ မဟာဝံသေ
ယောဓလာဘော နာမ
တေဝီသတိမော ပရိစ္ဆေဒေါ။