📜
တေတ္တိံသတိမ ပရိစ္ဆေဒ
ဒသရာဇကော
ဒုဋ္ဌဂါမဏိရညော ¶ တု၊ ရဇ္ဇေဌိတာ ဇနာ အဟူ၊
သာလိရာဇကုမာရောတိ၊ ဟဿာသိ ဝိဿုတော သုတော။
အတီဝ ဓညော သော အာသိ၊ ပုညကမ္မရတော သဒါ၊
အတီဝ စာရုရုပါယ၊ သတ္တော စဏ္ဍာလိယာ အဟု။
အသောကမာလာဒေဝိံတံ၊ သမ္ဗန္ဓံ ပုဗ္ဗဇာတိယာ၊
ရူပေနာ’တိ ပိယာယန္တော၊ သော ရဇ္ဇံ နေဝကာမယိ။
ဒုဋ္ဌဂါမဏိဘာတာ’သော၊ သဒ္ဓါတိဿော တဒစ္ဆယေ၊
ရဇ္ဇံ ကာရေဿာ’ဘိသိတ္တော၊ အဋ္ဌာရဿ သမာ’သမော။
ဆက္ကကမ္မံ သုဓာကမ္မံ၊ ဟတ္ထိပါကာရမေဝ စ၊
မဟာထူပဿ ကာရေသိ၊ သော သဒ္ဓါကတနာမကော။
ဒီပေန လောဟပါသာဒေါ၊ ဥဍ္ဍိယှိတ္ထ သုသင်္ခတော၊
ကာရေသိ လောဟပါသာဒံ၊ ပုန သော သတ္တဘူမကံ။
နဝုတိသတသဟဿဂ္ဃော၊ ပါသာဒေါ အာသိ သော တဒါ၊
ဒက္ခိဏဂီရိဝိဟာရံ၊ ကလ္လကလေဏ မေဝ စ။
ကုဠုမ္ဗာလဝိဟာရဉ္စ၊ တထာပေတ္တင်္ဂ ဝါလိကံ၊
ဝေလင်္ဂဝဋ္ဋိကဉ္စေဝ၊ ဒုဗ္ဗလဝါပိတိဿတံ။
ဒုရတိဿကဝါပိဉ္စ၊ တထာမာတုဝိဟာရကံ၊
ကာရေသိ အာဒီဃဝါပိံ၊ ဝိဟာရံယောဇန ယောဇနေ။
ဒီဃဝါပိဝိဟာရဉ္စ၊ ကာရေသိ သဟစေတိယံ၊
နာနာရတနကစ္ဆန္နံ၊ တတ္ထ ကာရေသိ စေတိယေ။
သန္ဓိယံ သန္ဓိယံ တတ္ထ၊ ရထစက္ကပ္ပမာဏကံ၊
သောဝဏ္ဏမာလံ ကာရေတွာ၊ လဂ္ဂါပေသိ မနောရမံ။
စတုရာသီတိသဟဿာနံ ¶ ၊ ဓမ္မက္ခန္ဓာနမိဿရော၊
စတုရာသီတိသဟဿာနိ၊ ပူဇာစာပိ အကာရယိ။
ဧဝံ ပုညာနိ ကတွာ သော၊ အနေကာနိ မဟီပတိ၊
ကာယဿဘေဒါ ဒေဝေသု၊ တုသိတေသု’ပပဇ္ဇထ။
သဒ္ဓါတိဿပကာရာဇေ၊ ဝသန္တေ ဒီဃဝါပိယံ၊
လဇ္ဇီတိဿော ဇေဋ္ဌသုတော၊ ဂိရိကုမ္ဘိမနာမကံ။
ဝိဟာရံ ကာရယိ ရမ္မံ၊ တံကနိဋ္ဌသုတော ပန၊
ထုလ္လတ္ထနော အကာရေသိ၊ ဝိဟာရံ ကန္ဒရဝှယံ။
ပိတရာ ထုလ္လတ္ထနကော၊ ဘာတုသန္တိကမာယတာ၊
သဟေဝါ’ဟ ဝိဟာရဿ၊ သင်္ဃဘောဂတ္ထမတ္တနော။
သဒ္ဓါတိဿေဥပရတေ၊ သဗ္ဗေ’မစ္စာ သမာဂတာ၊
ထူပါရာမေ ဘိက္ခုသင်္ဃံ၊ သကလံ သန္နိပါတိယ။
သင်္ဃာနုညာယရဋ္ဌဿ၊ ရက္ခဏတ္ထံ ကုမာရကံ၊
အဘိသိဉ္စုံ ထုလ္လတ္ထနံ၊ တံ သုတွာ လဇ္ဇီတိဿတော။
ဣဓာဂန္တွာ ဂဟေတွာ တံ၊ သယံ ရဇ္ဇမကာရယိ၊
မာသဉ္စေဝ ဒသာဟဉ္စ၊ ရာဇာ ထုလ္လတ္ထနော ပန။
တိဿောသမံ လဇ္ဇီတိဿော၊ သင်္ဃော ဟုတွာ အနာဒရော၊
‘‘န ဇာနိံသု ယထာဝုဍ္ဎံ’’ မီတိ တံ ပရိဘာသယိ။
ပစ္ဆာ သင်္ဃံ ခမာပေတွာ၊ ဒဏ္ဍကမ္မတ္ထမိဿရော၊
တီဏိ သတသဟဿာနိ၊ ဒတွာန ဥရုစေတိယေ။
သိလာမယာနိ ကာရေသိ၊ ပုပ္ဖယာနာနိ တီဏိသော၊
အထော သတသဟဿေန၊ စိတာပေသိ စ အန္တရာ။
မဟာထူပထူပါရာမာနံ၊ ဘူမိံဘူမိဿရော သမံ၊
ထူပါရာမေ စ ထူပဿ၊ သိလာကဉ္စုက မုတ္တမံ။
ထူပါရာမဿ ပုရတော၊ သိလာထူပကမေဝ စ၊
လဇ္ဇီကာသနသာလဉ္စ၊ ဘိက္ခုသင်္ဃဿ ကာရယိ။
ကဉ္စုကံ ¶ ကဏ္ဋကေ ထူပေ၊ ကာရာပေသိ သိလာမယံ၊
ဒတွာန သတသဟဿံ၊ ဝိဟာရေ စေတိယဝှယေ။
ဂိရိကုမ္ဘိလနာမဿ၊ ဝိဟာရဿ မဟမှိ သော၊
သဋ္ဌိဘိက္ခုသဟဿာနံ၊ တိစီဝရမဒါပယိ။
အရိဋ္ဌဝိဟာရံ ကာရေသိ၊ တထာကန္ဒရဟိနကံ၊
ဂါမိကာနဉ္စ ဘိက္ခူနံ၊ ဘေသဇ္ဇာနိ အဒါပယိ။
ကိမိစ္ဆကံ တဏ္ဍုလဉ္စ၊ ဘိက္ခုနီနမဒါပယိ၊
သမာနဝ’ဌမာသဉ္စ၊ ရဇ္ဇံ သော ကာရယီ ဣဓ။
မတေ လဇ္ဇိကတိဿမှိ၊ ကနိဋ္ဌော တဿ ကာရယိ၊
ရဇ္ဇံ ဆဠေဝ ဝဿာနိ၊ ခလ္လာဋနာဂနာမကော။
လောဟပါသာဒပရိဝါရေ၊ ပါသာဒေ’တိ မနောရမေ၊
လောဟပါသာဒသောဘတ္ထံ၊ ဧသော ဒွတ္တိံသကာရယိ။
မဟာထူပဿ ပရိတော၊ စာရုနော ဟေမမာလိနော၊
ဝါလိကင်္ဂဏမရိယာဒံ၊ ပါကာရဉ္စ အကာရယိ။
သောဝကုရုန္ဒပါသကံ၊ ဝိဟာရဉ္စ အကာရယိ၊
ပုညကမ္မာနိစညာနိ၊ ကာရာပေသိ မဟီပတိ။
တံ မဟာရတ္တတောနာမ၊ သေနာပတိ မဟီပတိံ၊
ခလ္လာဋနာဂရာဇာနံ၊ နဂရေယေဝ အဂ္ဂဟိ။
တဿ ရညော ကနိဋ္ဌောတု၊ ဝဋ္ဋဂါမဏိနာမကော၊
တံ ဒုဋ္ဌသေနာပတိကံ၊ ဟန္တွာ ရဇ္ဇမကာရယိ။
ခလ္လာဋနာဂရညောသော၊ ပုတ္တကံ သကဘာတုနော၊
မဟာစူလိကနာမာနံ၊ ပုတ္တဌာနေ ဌပေသိ စ။
တမ္မာတရံ နုဠာဒေဝိံ၊ မဟေသိဉ္စ အကာသိသော၊
ပီတိဌာနေ ဌိတတာ’ဿ၊ ပီတိရာဇာတိ အဗြဝုံ။
ဧဝံ ရဇ္ဇေ’ဘိသိတ္တဿ၊ တဿ မာသမှိ ပဉ္စမေ၊
ရောဟဏေ နကုလနဂရေ၊ ဧကော ဗြာဟ္မဏစေဋတော။
တိယော ¶ နာမ ဗြာဟ္မဏဿ၊ ဝစော သုတွာ အပဏ္ဍိတော၊
စောရော အသု မဟာတဿ၊ ပရိဝါရော အဟောသိ စ။
သဂဏာသတ္တဒမိဠာ၊ မဟာတိတ္ထမှိ ဩတရုံ၊
တဒါ ဗြာဟ္မဏတိယော စ၊ တေ သတ္တဒမိဠာပိစ။
ဆက္ကတ္ထာယ ဝိသဇ္ဇေသုံ၊ လေခံ ဘူပတိသန္တိကံ၊
ရာဇာ ဗြာဟ္မဏတိယဿ၊ လေခံ ပေသေသိ နီတိမာ။
‘‘ရဇ္ဇံ တဝ ဣဒါနေဝ၊ ဂဏှ တွံ ဒမိဠေ’’ ဣတိ၊
သာဓူတိ သော ဒမိဠေဟိ၊ ယုဇ္ဈိ ဂဏှိံသု တေ တု တံ။
တတော တေ ဒမိဠာ ယုဒ္ဓံ၊ ရညာ သဟ ပဝတ္တယုံ၊
ကောဠမ္ဗာလကသာမန္တာ၊ ယုဒ္ဓေ ရာဇာ ပရာဇိတော။
တိတ္ထာရာမဒုဝါရေန၊ ရထာရုဠှော ပလာယတိ၊
ပဏ္ဍုကာဘယရာဇေန၊ တိတ္ထာရာမောဟိ ကာရိတော၊
ဝါသိတော စ တဒါ အာသိ၊ ဧကဝီသတိ ရာဇုသူ။
တံ ဒိသွာ ပလာယန္တံ၊ နိဂဏ္ဌောဂိရိနာမကော၊
‘‘ပလာယတိ မဟာကာဠ-သီဟဠော’’တိ ဘုသံ ရဝိ။
တံ သုတွာန မဟာရာဇာ၊ ‘‘သိဒ္ဓေ မမ မနောရထေ၊
ဝိဟာရံ ဧတ္ထ ကာရေဿံ’’၊ ဣစ္စေဝံ စိန္တယီ တဒါ။
သဂဗ္ဘံ အနုလာဒေဝိံ၊ အဂ္ဂဟီ ရက္ခိယာ ဣတိ၊
မဟာစူဠ မဟာနာဂ-ကုမာရေစာပီ ရက္ခိယေ။
ရထဿ လဟုဘာဝတ္ထံ၊ ဍတွာ စူဠာမဏိံသုဘံ၊
ဩတာရေသိ သောမဒေဝိံ၊ တဿ’နုညာယ ဘူပတိ။
ယုဒ္ဓါယဂမနေယေဝ၊ ပုတ္တကေ ဒွေ စ ဒေဝိယော၊
ဂါဟယိတွာန နိက္ခန္တော၊ သင်္ကိတော သော ပရာဇယေ။
အသက္ကုဏိတွာ ဂါဟေတုံ၊ ပတ္တံ ဘုတ္တံ ဇိနေန တံ၊
ပလာယိတွာ ဝေဿဂီရိ-ဝနေ အဘိနိယိယိသော။
ကုတ္ထိက္ကုလမဟာတိဿ-ထေရော ဒိသွာ တဟံ တု တံ၊
ဘတ္တံ ပါဒါ အနာမဋ္ဌံ၊ ပိဏ္ဍဒါနံ ဝိဝဇ္ဇိယ။
အထ ¶ ကေတကိပတ္တမှိ၊ လိခိတွာ ဟဋ္ဌမာနသော၊
သင်္ဃဘောဂံ ဝိဟာရဿ၊ တဿ ပါဒါမဟီပတိ။
တတော ဂန္တွာ သိလာသောဗ္ဘ-ကဏ္ဍကမှိ ဝသီ တတော၊
ဂန္တွာန မာတုဝေလင်္ဂေ၊ သာလဂလသမီပဂေါ။
တတ္ထဒ္ဒသ ဒိဋ္ဌပုဗ္ဗံ၊ ထေရံ ထေရော မဟီပတိံ၊
ဥပဋ္ဌာကဿ အပ္ပေသိ၊ တနသိဝဿ သာဓုကံ။
တဿ သော တနသိဝဿ၊ ရဋ္ဌိကဿ’န္တိကေ တဟိံ၊
ရာဇာ စုဒ္ဒသဝဿာနိ၊ ဝသီ တေန ဥပဋ္ဌိတော။
သတ္တသု ဒမီဠေသွေ’ကော၊ သောမာဒေဝိံ မဒါဝဟံ၊
ရာဂရတ္တော ဂဟေတွာန၊ ပရတီရမဂါလဟုံ။
ဧကောပတ္တံ ဒသဗလဿ၊ အနုရာဓပုရေ ဌိတံ၊
အာဒါယ တေန သန္တုဋ္ဌော၊ ပရတီရမဂါလဟုံ။
ပုဠဟတ္ထော တု ဒမိဠော၊ တီဏိဝဿာနိ ကာရယိ၊
ရဇ္ဇံ သေနာပတိံ ကတွာ၊ ဒမိဠံ ဗာဟိယဝှယံ။
ပုဠဟတ္ထံ ဂဟေတွာ တံ၊ ဒူရေ ဝဿာနိ ဗာဟီယော၊
ရဇ္ဇံ ကာရေသိ တဿာ’သိ၊ ပဏယမာရော စမူပတိ။
ဗာဟီယံ တံ ဂဟေတွာန၊ ရာဇာ’သိ ပဏယမာရကော၊
သတ္တဝဿာနိ တဿာ’သိ၊ ပိဠယမာရော စမူပတိ။
ပဏယမာရံ ဂဟေတွာ သော၊ ရာဇာသိ ပီဠယမာရကော၊
သတ္တမာသာနိ တဿာသိ၊ ဒါဌိယော တု စမူပတိ။
ပီဠယမာရံ ဂဟေတွာ သော၊ ဒါဌိယော ဒမိဠော ပန၊
ရဇ္ဇံ’နုရာဓနဂရေ၊ ဒုဝေ ဝဿာနိ ကာရယိ။
ဧဝံ ဒမိဠရာဇူနံ၊ တေသံ ပဉ္စန္နမေဝဟိ၊
ဟောန္တိ စုဒ္ဒသဝဿာနီ၊ သတ္တမာသာ စ ဥတ္တရိံ။
ဂတာယ တု နိဝါသတ္ထံ၊ မလယေ’နုလဒေဝိယာ၊
ဘရိယာကနသိဝဿ၊ ပါဒါပဟရိ ပစ္ဆိယံ။
ကုဇ္ဈိတွာ ရောဒမာနာသာ၊ ရာဇာနံ ဥပသကိမိ၊
တံ သုတွာ တနသိဝေါသော၊ မနုမာဒါယ နိက္ခမိ။
ဒေဝိယာ ¶ ဝစနံ သုတွာ၊ တဿ အာဂမနာ ပုရာ၊
ဒွိပုတ္တံ ဒေဝိမာဒါယ၊ တတော ရာဇာ’ပိ နိက္ခမိ။
ဓနုံ သန္ဓာယ အာယန္တံ၊ သီဝံ ဝိဇ္ဈိ မဟာသီဝေါ၊
ရာဇာ နာမံ ဘာဝယိတွာ၊ အကာသိ ဇိနသင်္ဂဟံ။
အလတ္ထ အဋ္ဌာမစ္စေစ၊ မဟန္တေ ယောဓသမ္မတေ၊
ပရိဝါရော မဟာအာသီ၊ ပရိဟာရော စ ရာဇိနော။
ကုမ္ဘီလကမဟာတိဿ-ထေရ ဒိသွာ မဟာယသော၊
အစ္ဆဂလ္လဝိဟာရမှိ၊ ဗုဒ္ဓပူဇမကာရယိ။
ဝတ္ထုံ သောဓေတုမာရုဠှော၊ အကာသစေတိယင်္ဂဏံ၊
ကဝိသီသေ အမစ္စမှိ၊ ဩရောဟန္တောမဟီပတိ။
အာရောဟန္တော သဒေဝိကော၊ ဒိသွာ မဂ္ဂေ နိသိန္နကံ၊
‘‘န နိပန္နော’’တိ ကုဇ္ဈိတွာ၊ ကဝိသီသံ အဃာတယိ။
သေသာ သတ္တအမစ္စာဝိ၊ နိဗ္ဗိန္နာ တေန ရာဇိနာ၊
တဿ’န္တိကာ ပလာယိတွာ၊ ပက္ကမန္တာ ယထာရုစိ။
မဂ္ဂေ ဝိလုတ္တာ စောရေဟိ၊ ဝိဟာရံ ဟမ္ဗုဂလ္လကံ၊
ပဝိသိတွာန အဒ္ဒက္ခုံ၊ တိဿတ္ထေရံ ဗဟုဿုတံ။
စတုနေကာယိကော ထေရော၊ ယထာလဒ္ဓါနိ ဒါပယိ၊
ဝတ္ထဖာဏိတတေလာနိ၊ တဏ္ဍုလာ ပါဟုဏာ တထာ။
အဿတ္ထကာလေ ထေရော သော၊
‘‘ကုဟိံယာတာ’’တိ ပုစ္ဆိတေ၊
အတ္တာနံ အာဝီကတွာ တေ၊
တံ ပဝတ္တိံ နိဝေဒယုံ။
‘‘ကာရေတုံ ကေဟိ သက္ကာ နု၊ ဇိနသာသနပဂ္ဂဟံ၊
ဒမိဠေဟိ ဝါ’ထ ရညာ၊ ဣတိ ပုဋ္ဌာ တု တေ ပန။
‘‘ရညော သက္ကာ’’တိ အာဟံသု၊ သညာပေတွာန တေ ဣတိ၊
ဥဘော တိဿ မဟာတိဿ-ထေရာ အာဒါယ တေ တတော။
ရာဇိနော သန္တိကံ နေတွာ၊ အညမညံ ခမာပယုံ၊
ရာဇာ စ တေ အမစ္စာ စ၊ ထေရော ဧဝ မယာစယုံ။
သိဒ္ဓေ ¶ ကမ္မေ ပေသိတေနော၊ ဂန္တဗ္ဗံ သန္တိကံ ဣတိ၊
ထေရာ ဒတွာ ပဋိညံ တေ၊ ယထာဌာနမဂဉ္ဆိသုံ။
အနုရာဓပုရံ ရာဇာ၊ အာဂန္တွာန မဟာယသော၊
ဒါဌိကံ ဒမိဠံ ဟန္တွာ၊ သယံ ရဇ္ဇမကာရယိ။
တတော နိဂဏ္ဌာရာမံ တံ၊ ဝိဒ္ဓံသေတွာ မဟီပတိ၊
ဝိဟာရံ ကာရယိ တတ္ထ၊ ဒွါဒသ ပရိဝေဏကံ။
မဟာဝိဟာရပဋ္ဌာနာ၊ ဒွီသု ဝဿသ တေသု စ၊
သတ္တရသသု ဝဿေသု၊ ဒသမာသာ’မိကေသု စ။
တထာ ဒိနေသု ဒသသု၊ အတိက္ကန္တေသု သာဒရော၊
အဘယဂိရိ ဝိဟာရံသော၊ ပတိဋ္ဌာပေသိ ဘူပတိ။
အက္ကောသိယိတွာ တေ ထေရေ၊ တေသု ပုဗ္ဗုပကာရိနော၊
တံ မဟာတိဿ ထေရဿ၊ ဝိဟာရံ မာနဒေါ အဒါ။
ဂိရိဿ ယသ္မာ ဂါရာမေ၊ ရာဇာ ကာရေသိ သောဘယော၊
တသ္မာ’ဘယ ဂိရိတွေဝ၊ ဝိဟာရော နာမကော အဟု။
အာဏာပေတွာ သောမာဒေဝိံ၊
ယထာ ဌာနေ ဌပေသိသော၊
တဿာတန္နာမကံ ကတွာ၊
သောမာရာမ မကာရယိ။
ရထာ ဩရောပိတာ သာ ဟိ၊ တသ္မိံဌာနေ ဝရင်္ဂနာ၊
ကဒ္ဒမ္ဗပုပ္ဖ ဂုမ္ဗမှိ၊ နိလိနာ တတ္ထ အဒ္ဒသ။
မုတ္တယန္တံ သာမဏေရံ၊ မဂ္ဂံ ဟတ္ထေန ဆာဒိယ၊
ရာဇာ တဿ ဝစော သုတွာ၊ ဝိဟာရံ တတ္ထ ကာရယိ။
မဟာထူပဿုတ္တရတော၊
စေတိယံ ဥစ္စဝတ္ထုကံ၊
သိလာ သောဘကဏ္ဍကံ နာမ၊
ရာဇာ သောယေဝ ကာရယိ။
တေသု သတ္တသု ယောဓေသု၊ ဥတ္တိယော နာမ ကာရယိ၊
နဂရမှာ ဒက္ခိဏတော၊ ဝိဟာရံ ဒက္ခိဏဝှယံ။
တတ္တေဝ ¶ မူလဝေါကာသ၊ ဝီဟာရံ မူလနာမကော၊
အမစ္စော ကာရယီ တေန၊ သောပိ တံနာမကော အဟု။
ကာရေသိ သာလိယာရာမံ၊ အမစ္စော သာလိယဝှယော၊
ကာရေသိ ပဗ္ဗတာရာမံ၊ အမစ္စော ပဗ္ဗတဝှယော။
ဥတ္တရတိဿရာမန္တု၊ တိဿာမစ္စော အကာရယိ၊
ဝိဟာရေ နိဋ္ဌိတေ ရမ္မေ၊ တိဿထေရ မုပစ္စတေ။
‘‘တုမှာကံ ပဋိသန္ထာရ၊ ဝသေန’မှေဟိ ကာရိတေ၊
ဝိဟာရေ ဒေမ တုမှာကံ၊ ဣတိ ဝတွာ အဒံသု စ။
ထေရော သဗ္ဗတ္ထဝါသေသိ၊ တေ တေ ဘိက္ခူ ယထာ ရဟံ၊
အမစ္စာ’ဒံသု သင်္ဃဿ၊ ဝိဝိဓေ သမဏာရဟေ။
ရာဇာ သကဝိဟာရမှိ၊ ဝသန္တေ သမုပဋ္ဌဟိ၊
ပစ္စယေဟိ အနုနေဟိ၊ တေန တေ ဗဟဝေါ အဟုံ။
ထေရံ ကုလေဟီ သံသဋ္ဌံ၊ မဟာတိဿောတိ ဝိဿုတံ၊
ကုလသံသဋ္ဌ ဒေါသေန၊ သင်္ဃော တံ နီဟရိ ဣတော။
တဿ သိဿော ဗဟလမဿု-
တိဿတ္ထေရောတိ ပိဿုတော၊
ကုဒ္ဓါ’ဘယဂိရိံ ဂန္တွာ၊
ဝသိ ပက္ခံ ဝဟံ တဟိံ။
တတောပ္ပဘုတိ တေ ဘိက္ခူ၊ မဟာဝိဟာရနာဂမုံ၊
ဧဝံ တေ’ဘယဂိရိကာ၊ နိဂ္ဂတာ ထေရဝါဒတော။
ပဘိန္နာ’ဘယဂိရိကေဟိ၊ ဒက္ခိဏဝိဟာရိကာယတိ၊
ဧဝံ တေ ထေရဝါဒီဟိ၊ ပဘိန္နာ ဘိက္ခဝေါ ဒွိဓာ။
မဟာ အဘယဘိက္ခူ တေ၊ ဝဍ္ဎေတုံ ဒီပဝါသိနော၊
ဝဋ္ဋဂါမဏိဘူမိန္ဒော၊ ပတ္တိံ နာမ အဒါသိ သော။
ဝိဟာရပရိဝေဏာနိ၊ ဃဋာဗဒ္ဓေ အကာရယိ၊
‘‘ပဋိသင်္ခရဏံ ဧဝံ၊ ဟေဿတီတိ ဝိစိန္တိယ။
ပိဋကတ္တယပါဠိဉ္စ၊ တဿ အဋ္ဌကထမ္ပိ စ၊
မုခပါဌေန အာနေသုံ၊ ပုဗ္ဗေ ဘိက္ခူ မဟာမတိ။
ဟာနိံ ¶ ဒိသွာန သတ္တာနံ၊ တဒါ ဘိက္ခူ သမာဂတာ၊
စိရဋ္ဌိတတ္ထံ ဓမ္မဿ၊ ပေါတ္ထကေသု လိခါပယုံ။
ဝဋ္ဋဂါမဏိ အဘယော၊ ရာဇာ ရဇ္ဇမကာရယိ၊
ဣတိ ဒွါဒသဝဿာနိ၊ ပဉ္စမာသေသု အာဒိတော။
ဣတီ ပရဟိတ မတ္တနော ဟိတဉ္စ၊
ပဋိလဘိယိဿရိယံ ကရောတိ ပညော၊
ဝိပုလမပိ ကုဗုဒ္ဓိလဒ္ဓဘောဝံ၊
ဥဘယဟိတံ န ကရောတိ ဘောဂလုဒ္ဓါ’တိ။
သုဇနပ္ပသာဒသံဝေဂတ္ထာယ ကတေ မဟာဝံသေ
ဒသရာဇကော နာမ
တေတ္တိံသတိမော ပရိစ္ဆေဒေါ။