📜
စတုတ္တိံသတိမ ပရိစ္ဆေဒ
ဧကာဒသရာဇဒီပနော
တဒစ္စယေ မဟာစူလီ-မဟာတိဿော အကာရယိ၊
ရဇ္ဇံ စုဒ္ဒသဝဿာနိ၊ ဓမ္မေန စ သမေန စ။
သဟတ္ထေန ကတံ ဒါနံ၊ သော သုတွာန မဟပ္ဖလံ၊
ပဌမေယေဝ ဝဿမှိ၊ ဂန္တွာ အညာတဝေသဝါ။
ကတွာန သာလိလဝနံ၊ လဒ္ဓါယ ဘတိယာ တတော၊
ပိဏ္ဍပါတံ မဟာသုမ္မ-ထေရဿာ’ဒါ မဟီပတိ။
သောဏ္ဏဂိရိမှိ ပုန သော၊ တီဏိဝဿာနိ ခတ္တိယော၊
ဂုဠယန္တမှိ ကတွာန၊ ဘတိံလဒ္ဓါ ဂုဠေ တတော။
တေ ဂုဠေ အာဟရာပေတွာ၊ ပုရံ အာဂမ္မ ဘူပတိ၊
ဘိက္ခုသင်္ဃဿ ပါဒါသိ၊ မဟာဒါနံ မဟီပတိ။
တိံသဘိက္ခုသဟဿဿ၊ အဒါ အစ္ဆာဒနာနိ စ၊
ဒွါဒသန္နံ သဟဿာနံ၊ ဘိက္ခူနီနံ တထေဝ စ။
ကာရယိတွာ ¶ မဟီပါလော၊ ဝိဟာရံ သုပ္ပတိဋ္ဌိတံ၊
သဋ္ဌိဘိက္ခု သဟဿဿ၊ တိစီဝရမဒါပယိ။
တိံသ သဟဿ သင်္ခါနံ၊ ဘိက္ခုနီနဉ္စ ဒါပယိ၊
မဏ္ဍဝါပိ ဝိဟာရံ သော၊ တထာ အဘယဂလ္လကံ။
ဝင်္ဂုပဋ္ဋင်္ဂဂလ္လဉ္စ၊ ဒီဃဗာဟုကဂလ္လကံ၊
ဝါလဂါမ ဝိဟာရဉ္စ၊ ရာဇာ သောယေဝ ကာရယိ။
ဧဝံ သဒ္ဓါယ သော ရာဇာ၊ ကတွာ ပုညာနိနေကဓာ၊
စတုဒ္ဒသန္နံ ဝဿာနံ၊ အစ္စယေန ဒိဝံ အဂါ။
ဝဋ္ဋဂါမဏိနော ပုတ္တော၊ စောရနာဂေါတိ ဝိဿုတော၊
မဟာစူဠိဿရဇ္ဇမှိ၊ စောရော ဟုတွာ စရိတဒါ။
မဟာစူဠေ ဥပရတေ၊ ရဇ္ဇံ ကာရယိ အာဂတော၊
အတ္တနော စောရကာလေ သော၊ နိဝါသံ ယေသုနာလဘိ။
အဋ္ဌရသဝိဟာရေ တေ၊ ဝိဒ္ဓံသာပေသိ ဒုမ္မတိ၊
ရဇ္ဇံ ဒွါဒသဝဿာနိ၊ စောရနာဂေါ အကာရယိ။
လောကန္တရိက နိရယံ၊ ပါပေါသောဥပပဇ္ဇထ၊
တဒစ္စယေ မဟာစူဠှိ-ရညော ပုတ္တော အကာရယိ။
ရဇ္ဇံ တီဏေဝ ဝဿာနိ၊ ရာဇာတိဿော’တိ ဝိဿုတော၊
စောရနာဂဿ ဒေဝီတု၊ ဝီသမံ ဝီသမာနုလာ။
ဝီသံ ဒတွာန မာရေသိ၊ ဗလတ္ထေရတ္တမာနသာ၊
တသ္မိံယေဝဗလတ္ထေသာ၊ အနုလာရတ္တမာနသာ။
တိဿံ ဝီသေနဃာတေတွာ၊ တဿ ရဇ္ဇမဒါသိသာ၊
သီဝေါ နာမ ဗလတ္ထောသော၊ ဇေဋ္ဌဒေါဝါရိကော တဟိံ။
ကတွာ မဟေသိံ အနုလံ၊ ဝဿံ မာသဒွယာ’စိကံ၊
ရဇ္ဇံ ကာရေသိ နဂရေ၊ ဝဋုကေ ဒမိဠေ’နုလာ။
ရတ္တာ ဝီသေန တံ ဟန္တွာ၊ ဝဋုကေ ရဇ္ဇမပ္ပယိ၊
ဝဋုကော ဒမိဠော သော ဟိ၊ ပုရေ နဂရဝဍ္ဎကီ။
မဟေသိံ အနုလံ ကတွာ၊ ဝဿံ မာသဒွယာဓိကံ၊
ရဇ္ဇံ ကာရေသိ နဂရေ၊ အနုလာ တတ္ထ အာဂတံ။
ပဿိတွာ ဒါရုဘတိကံ၊ တသ္မိံ သာရတ္တမာနသာ၊
ဟန္တွာ ဝိသေန ဝဋုကံ၊ တဿ ရဇ္ဇံ သမပ္ပယိ။
ဒါရုဘတိကတိဿော ¶ သော၊ မဟေသိံ ကရိယာနုလံ၊
ဧကမာသာဓိကံ ဝဿံ၊ ပုရေ ရဇ္ဇမကာရယိ။
ကာရေသိ သော ပေါက္ခရဏိံ၊ မဟာမေဃဝနေ လဟုံ၊
နိလီယေ နာမ ဒမိဠေ၊ သာ ပုရောဟိတဗြာဟ္မဏေ။
ရာဂေန ရတ္တာ အနုလာ၊ တေန သံဝါသကာမိနီ၊
ဒါရုဘတိကတိဿံတံ၊ ဝီသံ ဒတွာန ဃာတိယ။
နိလီယဿ အဒါ ရဇ္ဇံ၊ သောပိ နိလီယဗြာဟ္မဏော၊
တံ မဟေသိံ ကရိတွာန၊ နိစ္စံ တာယ ဥပဋ္ဌိတော။
ရဇ္ဇံ ကာရေသိ ဆမ္မာသံ၊ အနုရာဓပုရေ ဣဓ၊
ဒွတ္တိံသာယ ဗလတ္ထေဟိ၊ ဝတ္ထုကာမာ ယထာရုစိံ။
ဝီသေန တံ ဃာတယိတွာ၊ နိလီယံ ခတ္တိယာနုလာ၊
ရဇ္ဇံ သာ အနုလာဒေဝီ၊ စတုမာသမကာရယိ။
မဟာစူဠိကရာဇဿ၊ ပုတ္တော ဒုတိယကော ပန၊
ကူဋကဏ္ဏတိဿော နာမ၊ ဘီတော သော’နုလဒေဝိယာ။
ပလာယိတွာ ပဗ္ဗဇိတွာ၊ ကာလေ ပတ္တဗလော ဣဓ၊
အာဂန္တွာ ဃာတယိတွာ၊ တံ အနုလံ ဒုဋ္ဌမာနသံ။
ရဇ္ဇံ ကာရေသိ ဒွါဝီသံ၊ ဝဿာနိ မနုဇာဓိပေါ၊
မဟာဥပေါသထာဂါရံ၊ အကာ စေတိယပဗ္ဗတေ။
ဃရဿ တဿ ပုရတော၊ သိလာထူပမကာရယိ၊
ဗောဓိံ ရောပေသိ တတ္ထေဝ၊ သောဝ စေတိယေပဗ္ဗတေ။
ပေလဂါမဝိဟာရဉ္စ၊ အန္တရဂင်္ဂါယ ကာရယိ၊
တတ္ထေဝ ဝဏ္ဏကံ နာမ၊ မဟာမာတိကမေဝ စ။
အမ္ဗဒုဂ္ဂမဟာဝါပိံ၊ ဘယောလုပ္ပလမေဝ စ၊
သတ္တဟတ္ထုစ္စပါကာရံ၊ ပုရဿ ပရိခံ တထာ။
မဟာဝတ္ထုမှိ အနုလံ၊ ဈာပယိတွာ အသညတံ၊
အပနီယ တတော ထောကံ၊ မဟာဝတ္ထုမကာရယိ။
ပဒုမဿရဝနုယျာနံ၊ နဂရေယေဝ ကာရယိ၊
မတာ’ဿ ဒန္တေ ဓောဝိတွာ၊ ပဗ္ဗဇိ ဇိနသာသနေ။
ကုလသန္တကေ ¶ ဃရဋ္ဌာနေ၊ မာတုဘိက္ခုနုပဿယံ၊
ကာရေသိ ဒန္တဂေဟန္တိ၊ ဝိဿတော အာသိ တေန သော။
တဒစ္စယေ တဿ ပုတ္တော၊ နာမကော ဘာတိကာဘယော၊
အဋ္ဌဝီသတိဝဿာနိ၊ ရဇ္ဇံ ကာရေသိ ခတ္တိယော။
မဟာဒါဋ္ဌိကရာဇဿ၊ ဘာတိကတ္တာမဟီပတိ၊
ဒီပေ ‘‘ဘာတိကရာဇာ’’တိ၊ ပါကဋော အာသိ ဓမ္မိကော။
ကာရေသိ လောဟပါသာဒေ၊ ပဋိသင်္ခါရမေတ္ထသော၊
မဟာထူပေ ဝေဒိကာ ဒွေ၊ ထူပဝှေ’ပေါသထဝှယံ။
အတ္တနော ဗလိမုဇ္ဈိတွာ၊ နဂရဿ သမန္တတော၊
ရောပါပေတွာ ယောဇနမှိ၊ သုမနာန’ဇ္ဇုကာနိ စ။
ပါဒဝေစိကတော ယာဝ၊ ဓုရစ္ဆတ္တာနရာဓိပေါ၊
စတုရင်္ဂလဗဟလေန၊ ဂန္ဓေန ဥရုစေတိယံ။
လိမ္ပာပေတွာန ပုပ္ဖာနိ၊ ဝဏ္ဋေဟိ တတ္ထ သာဓုကံ၊
နိဝေသိတွာန ကောရေသိ၊ ထူပံ မာလာဂုလောပမံ။
ပုနဒွင်္ဂုလဗဟလာယ၊ မနောသိလာယ စေတိယံ၊
လိမ္ပာပေတွာန ကာရေသိ၊ တထေဝ ကုသုမာစိတံ။
ပုန သောပါနတော ယာဝ၊ ဓုရစ္ဆတ္တာဝ စေတိယံ၊
ပုပ္ဖေဟိ ဩကိရာပေတွာ၊ ဆာဒေသိ ပုပ္ဖရာသိနော။
ဥဋ္ဌာပေတွာန ယန္တေဟိ၊ ဇလံ အဘယဝါပိတော၊
ဇလေဟိ ထူပံ သေဝန္တော၊ ဗလပူဇမကာရယိ။
သကဋသတေန မုတ္တာနံ၊ သဒ္ဓိံ တေလေန သာဓုကံ၊
မဒ္ဒါပေတွာ သုဓာပိဏ္ဍံ၊ သုဓာကမ္မမကာရယိ။
ပဝါလဇာလံ ကာရေတွာ၊ တံ ခိပါပိယ စေတိယေ၊
သောဝဏ္ဏာနိ ပဒုမာနိ၊ စက္ကမတ္တာနိ သန္ဓိသု။
လဂ္ဂါပေတွာ တတော မုတ္တာ-ကလာပေ ယာဝ ဟေဋ္ဌိမာ၊
ပဒုမာ’လမ္ဗယိတွာန၊ မဟာထူပမပူဇယိ။
ဂဏသဇ္ဈာယသဒ္ဒံ ¶ သော၊ ဓာတုဂဗ္ဘမှိတာဒိနိ၊
သုတွာ ‘‘အဒိသွာ တံနာ’ဟံ၊ ဝုဋ္ဌဟိဿန္တိ နိစ္ဆိတော။
ပါစိနာဒိကမူလမှိ၊ အနာဟာရော နိပဇ္ဇထ၊
ထေရာ ဒွါရံ မာပယိတွာ၊ ဓာတုဂဗ္ဘံ နယိံသု တံ။
ဓာတုဂဗ္ဘဝိဘူတိံသော၊ သဗ္ဗံ ဒိသွာ မဟီပတိ၊
နိက္ခန္တော တာဒိသေဟေဝ၊ ပေါတ္ထရူပေဟိ ပူဇယိ။
မဓုဂန္ဓေဟိ ဂန္ဓေဟိ၊ ဃဋေဟိ သရသေဟိ စ၊
အဉ္ဇနဟရိတာလေဟိ၊ တထာမနောသိလာဟိ စ။
မနောသိလာသု ဝဿေန၊ ဘဿိတွာ စေတိယင်္ဂဏေ၊
ဌိတာသု ဂေါပ္ဖမတ္တာသု၊ ရစိတေ ပု’ပ္ပလေဟိ စ။
ထူပင်္ဂဏမှိ သကလေ၊ ပုရိတေ ဂန္ဓကဒ္ဒမေ၊
စိတ္တကိလဉ္ဇဆိဒ္ဒေသု၊ ရစိတေ ပု’ပ္ပလေဟိ စ။
ဝါရယိတွာ ဝါရိမဂ္ဂံ၊ တထေဝ ပုရိတေ ဃဋေ၊
ဒီပဝဋ္ဋိဟိ နေကာနိ၊ ကတဝဋ္ဋိသိခါဟိ စ။
မဓုကတေလမှိ တထာ၊ တိလတေလေ တထေဝ စ၊
တထေဝ ပဋ္ဋဝဋ္ဋီနံ၊ သု ဗဟူဟိ သိခါဟိ စ။
ယထာဝုတ္တေဟိ ဧတေဟိ၊ မဟာထူပဿ ခတ္တိယော၊
သတ္တက္ခတ္တုံ သတ္တက္ခတ္တုံ၊ ပူဇာ’ကာသိ ဝိသုံ ဝိသုံ။
အနုဝဿဉ္စ နိယတံ၊ သုဓာမင်္ဂလမုတ္တမံ၊
ဗောဓိသိနာနပူဇာ စ၊ တထေဝ ဥရုဗောဓိယာ။
မဟာဝေသာခ ပူဇာ စ၊ ဥဠာရာ အဋ္ဌဝီသတိ၊
စတုရာသီတိ သဟဿာနိ၊ ပူဇာ စ အနုဠာရိကာ။
ဝိဝိဓံ နဋနစ္စဉ္စ၊ နာနာတူရိယဝါဒိတံ၊
မဟာထူပေ မဟာပူဇံ၊ သဒ္ဓါနုန္နော အကာရယိ။
ဒိဝသဿ စ တိက္ခတ္တုံ၊ ဗုဒ္ဓုပ္ပဋ္ဌာနမာဂမာ၊
ဒွိက္ခတ္တုံ၊ ပုပ္ဖဘေရိဉ္စ၊ နိယတံ သော အကာရယိ။
နိယတဉ္စနဒါနဉ္စ၊ ပဝါရဏာဒါနမေဝ စ၊
တေလဖာဏိတဝတ္ထာဒိ-ပရိက္ခာရံ သမဏာရဟံ။
ဗဟုံ ¶ ပါဒါသိ သင်္ဃဿ၊ စေတိယခေတ္တမေဝ စ၊
စေတိယေ ပရိကမ္မတ္ထံ၊ အဒါသိ တတ္ထ ခတ္တိယော။
သဒါ ဘိက္ခုသဟဿဿ၊ ဝိဟာရေ စေတိယပဗ္ဗတေ၊
သလာကဝတ္တဘတ္တဉ္စ၊ သော ဒါပေသိ စ ဘူပတိ။
စိန္တာမဏိမုစေလဝှေ၊ ဥပဋ္ဌာနတ္တယေ စ သော၊
တထာ ပဒုမဃရေ ဆတ္တ-ပါသာဒေ စ မနောရမေ။
ဘောဇေန္တော ပဉ္စဌာနမှိ၊ ဘိက္ခူဂန္ထဓုရေ ယုတေ၊
ပစ္စယေဟိ ဥပဋ္ဌာသိ၊ သဒါ ဓမ္မေ သဂါရဝေါ။
ပေါရာဏရာဇနိယာတံ၊ ယံကိဉ္စိ သာသနဿိတံ၊
အကာသိ ပုညကမ္မံသော၊ သဗ္ဗံ ဘာတိကဘူပတိ။
တဿ ဘာဘကရာဇဿ၊ အစ္စယေ တံ ကနိဋ္ဌကော၊
မဟာဒါဌိမဟာနာဂ-နာမော ရဇ္ဇမကာရယိ။
ဒွါဒသံယေဝ ဝဿာနိ၊ နာနာပုညပရာယနော၊
မဟာထူပမှိ ကိဉ္ဇက္ခ- ပါသာဏေ အတ္ထရာပယိ။
ဝါလိကာမရိယာဒဉ္စ၊ ကာရေသိ ဝိတ္ထတင်္ဂဏံ၊
ဒီပေ သဗ္ဗဝိဟာရေသု၊ ဓမ္မာသနမဒါပယိ။
အမ္ဗတ္ထလ မဟာထူပံ၊ ကာရာပေသိ မဟီပတိ၊
စ ယေအနိဋ္ဌမာနမှိ၊ သရိတွာ မုနိနော ဂုဏံ။
စဇိတွာန သကံ ပါဏံ၊ နိပဇ္ဇိတွာ သယံ တဟိံ၊
ဌပယိတွာ စယံ တဿ၊ နိဋ္ဌာပေတွာန စေတိယံ။
စတုဒွါရေ ဌပါပေသိ၊ စတုရော ရတနဂ္ဃိကေ၊
သုသိပ္ပိကေဟိ သုဝိဘတ္တေ၊ နာနာရတနဇောတိတေ။
စေတိယေ ပဋိမောစေတွာ၊ နာနာရတနကဉ္စုကံ၊
ကဉ္စန ဗုဗ္ဗုလဉ္စေတ္ထ၊ မုတ္တောလမ္ဗဉ္စ ဒါပယိ။
စေတိယ ပဗ္ဗတာဝဋ္ဋေ၊ အလင်္ကရိယ ယောဇနံ၊
ယောဇာပေတွာ စတုဒွါရံ၊ သမန္တာ စာရုဝီထိကံ။
ဝီထိယာ ဥဘတော ပဿေ၊ အာပဏာနိ ပသာရိယ၊
ဓဇဂ္ဃိက တော ရဏာနိ၊ မဏ္ဍယိတွာ တဟိံ တဟိံ။
ဒီပမာလာ ¶ သမုဇ္ဇောတံ၊ ကာရယိတွာ သမန္တတော၊
နဋနစ္စာနိ ဂီတာနိ၊ ဝါဒိတာနိ စ ကာရယိ။
မဂ္ဂေ ကဒမ္ဗနဒိတော၊ ယာဝစေတိယ ပဗ္ဗတာ၊
ဂန္တုံ ဓောတေဟိ ပါဒေဟိ၊ ကာရယိ’တ္ထရဏတ္ထတံ။
သနစ္စဂီတဝါဒေဟိ၊ သမဇ္ဇမကရုံ တဟိံ၊
နဂရဿ စတုဒွါရေ၊ မဟာ ဒါနဉ္စ ဒါပယိ။
အကာသိ သကလေ ဒီပေ၊ ဒီပမာလာနိရန္တရံ၊
သလိလေပိ သမုဒ္ဒဿ၊ သမန္တာ ယောဇနန္တရေ။
စေတိယဿ မဟေတေန၊ ပူဇာ သာ ကာရိတာ သုဘာ၊
ဂိရိဘဏ္ဍာ မဟာပူဇာ၊ ဥဠာရာ ဝုစ္စတေ ဣဓ။
သမာဂတာနံ ဘိက္ခူနံ၊ တသ္မိံ ပူဇာ သမာဂမေ၊
ဒါနံ အဋ္ဌသု ဌာနေသု၊ ဌပါပေတွာ မဟီပတိ။
တာဠယိတွာန တတြဋ္ဌာ၊ အဋ္ဌသောဝဏ္ဏဘေရိယော၊
စတုဝီသသဟဿာနံ၊ မဟာဒါနံ ပဝတ္တယိ။
ဆစီဝရာနိ ပါဒါသိ၊ ဗန္ဓမောက္ခဉ္စ ကာရယိ၊
စတုဒွါရေနွာပိတေဟိ၊ သဒါ ကမ္မမကာရယိ။
ပုဗ္ဗရာဇူဟိ ဌပိတံ၊ ဘာတရံ ဌပိတံ တထာ၊
ပုညကမ္မံ အဟာပေတွာ၊ သဗ္ဗံ ကာရယိဘူပတိ။
အတ္တာနံ ဒေဝိံပုတ္တေ ဒွေ၊ ဟတ္ထိံ အဿဉ္စ မင်္ဂလံ၊
ဝါရိယန္တော’ပိ သင်္ဃေန၊ သင်္ဃဿာ’ဒါသိ ဘူပတိ။
ဆသတ သဟဿဂ္ဃကံ၊ ဘိက္ခုသင်္ဃဿ သော အဒါ၊
သတသဟဿဂ္ဃနကံ၊ ဘိက္ခူနီနံ ဂဏဿ တု။
ဒတွာန ကပ္ပိယံ ဘဏ္ဍံ၊ ဝိဝိဓံ ဝိဓိကောဝိဒေါ၊
အတ္တာနဉ္စ’ဝ သေသေ စ၊ သင်္ဃတော အဘိနီဟရိ။
ကာလာယန ကဏ္ဏိကမှိ၊ မဏိနာဂ ပဗ္ဗတဝှယံ၊
ဝိဟာရဉ္စ ကဠဝှယံ၊ ကာရေသိ မနုဇာဓိပေါ။
ကုဗု ¶ ဗန္ဓနဒီတီရေ၊ သမုဒ္ဒဝိဟာရမေဝ စ၊
ဟုဝါဝကဏ္ဏိကေ စူဠ၊ နဂပဗ္ဗတသဝှယံ။
ပါသာဏဒီပကဝှမှိ၊ ဝိဟာရေ ကာရိတေ သယံ၊
ပါနိယံ ဥပနိတဿ၊ သာမဏေရဿ ခတ္တိယော။
ဥပစာရေ ပသီဒိတွာ၊ သမန္တာ အဋ္ဌယောဇနံ၊
သင်္ဃဘောဂမဒါတဿ၊ ဝိဟာရဿ မဟီပတိ။
မဏ္ဍဝါပိ ဝိဟာရေ စ၊ သာမဏေရဿ ခတ္တိယော၊
တုဋ္ဌော ဝိဟာရံ ဒါပေသိ၊ သင်္ဃေ ဘောဂံ တထေဝ သော။
ဣတိ ဝိဘဝမနပ္ပံ သာဓုပညာ လဘိတွာ၊
ဝိဂတမဒပမာဒါစတ္တ ကာမပသင်္ဂါ၊
အကရိယဇနခေဒံ ပုညကမ္မာဘိရာမာ၊
ဝိပုလဝိဝိဓပုညံ သုပ္ပန္နာကရောန္တီတိ။
သုဇနပ္ပသာဒသံဝေဂတ္ထာယ ကတေ မဟာဝံသေ
ဧကာဒသရာဇဒီပနော နာမ
စတုတ္တိံသတိမော ပရိစ္ဆေဒေါ။