📜
ပဉ္စတိံသတိမပရိစ္ဆေဒ
ဒွါဒသရာဇကော
အာမဏ္ဍဂါမဏျဘယော၊ မဟာဒါဌိကအစ္စယေ၊
နဝဝဿနဋ္ဌမာသေ၊ ရဇ္ဇံ ကာရေသိ တံ သုတော။
ဆတ္တာတိ ဆတ္တံ ကာရေသိ၊ မဟာထူပေ မနောရမေ၊
တထေဝ ပါဒဝေဒိဉ္စ၊ မုဒ္ဓဝေဒိဉ္စ ကာရယိ။
တထေဝ လောဟပါသာဒ၊ ထူပဝှေ ပေါသထဝှယေ၊
ကာရေသိ ကုစ္ဆိအာဇိရံ၊ ကုစ္ဆိအာဠိန္ဒမေဝ စ။
ဥဘယတ္ထာပိ ¶ ကာရေသိ၊ စာရုံ ရတနပဏ္ဍပံ၊
ရဇတလေဏ ဝိဟာရဉ္စ၊ ကာရာပေသိ နရာဓိပေ။
မဟာဂါမေဏ္ဍဝါပိံသော၊ ပဿေ ကာရိယ ဒက္ခိဏေ၊
ဒက္ခိဏဿ ဝိဟာရဿ၊ အဒါသိ ပုညဒက္ခိဏော။
မာဃာတံ သကလေ ဒီပေ၊ ကာရေသိ မနုဇာဓိပေါ၊
ဝလ္လိဖလာနိ သဗ္ဗာနိ၊ ရောပါပေတွာ တဟိံ တဟိံ။
မံ သကုဘဏ္ဍကံ နာမ၊ အာမဏ္ဍိယ မဟီပတိ၊
ပတ္တံ ပူရာပယိတွာန၊ ကာရေတွာ ဝတ္ထစုမ္ဗဋံ။
ဒါပေသိ သဗ္ဗသင်္ဃဿ၊ ဝိပ္ပသန္နေန စေတသာ၊
ပတ္တေ ပူရာပယိတွာ သော၊ အာမဏ္ဍ ဂါမဏိဝိဒူ။
တင်္ကနိဋ္ဌောကဏိရာဇာ-တိဿော ဃာတိယ တာတရံ၊
တီဏိ ဝဿာနိ နဂရေ၊ ရဇ္ဇံ ကာရေသိ ခတ္တိယော။
ဥပေါသထဃရဋ္ဋံ ဧသာ၊ နိစ္ဆိနိ စေကိယဝှယေ၊
ရာဇာပရာဓကမ္မမှိ၊ ပုတ္တေ သဋ္ဌိတု ဘိက္ခဝေါ။
သဟောဍ္ဍေ ဂါဟယိတွာန၊ ရာဇာ စေတိယ ပဗ္ဗတေ၊
ခိပါပေသိ ကဏိရဝှေ၊ ပဗ္ဘာရမှိ အသီလကေ။
ကဏိရာဇာ အစ္စယေန၊ အာမဏ္ဍဂါမဏိ သုတော၊
စူဠာဘယော ဝဿမေကံ၊ ရဇ္ဇံ ကာရေသိ ခတ္တိယော။
သော ဂေါဏကနဒီတီရေ၊ ပုရပဿမှိ ဒက္ခိဏေ၊
ကာရာပေသိ မဟီပါလော၊ ဝိဟာရေ စူဠဂလ္လကံ။
စူဠာဘယဿ’စ္စ ယေန၊ သီဝလိ တံ ကနိဋ္ဌိကာ၊
အာမဏ္ဍဓီတာ စတုရော၊ မာသေ ရဇ္ဇမကာရယိ။
အာမဏ္ဍ ဘာဂိနေယျာ တု၊ သီဝလိံ အပနီယတံ၊
ဣဠနာဂေါတိ နာမေန၊ ဆတ္တံ ဥဿာပယိ ပုရေ။
တိဿဝါပိံ ဂတေ တသ္မိံ၊ အာဒိဝဿေ နရာဓိပေ၊
တံ ဟိတွာ ပုရမာဂဉ္ဆုံ၊ ဗဟဝေါလမ္ဗကဏ္ဏကာ။
တဟိံ အဒိသွာ တေ ရာဇာ၊ ကုဒ္ဓါ တေဟိ အကာရယိ၊
မဒ္ဒယံ ဝါပိယာ ပဿေ၊ မဟာထူပဉ္ဇသံသယံ။
တေသံ ¶ ဝိစာရကေ ကတွာ၊ စဏ္ဍာလေ စ ဌပါပယိ၊
တေန ကုဒ္ဓါလမ္ဗကဏ္ဏာ၊ သဗ္ဗေ ဟုတွာန ဧကတော။
ရာဇာနံ တံ ဂဟေတွာန၊ ရုန္ဓိတွာန သကေ ဃရေ၊
သယံ ရဇ္ဇံ ဝိစာရေသုံ၊ ရညော ဒေဝီ တဒါ သကံ။
ပုတ္တံ စန္ဒမုခသိဝံ၊ မဏ္ဍယိတွာ ကုမာရကံ၊
ဒတွာန ဟတ္ထေ ဓာတီနံ၊ မင်္ဂလဟတ္ထိ သန္တိကေ။
ပေသေသိ ဝတွာ သန္ဒေသံ၊ နေတွာ တံ ဓာတိယော တဟိံ၊
ဝဒိံသု ဒေဝိသန္ဒေသံ၊ သဗ္ဗံ မင်္ဂလ ဟတ္ထိနော။
‘‘အယံ တေ သာဓိနော ပုတ္တော၊
သာမိကော စာရကေ ဌိတော၊
အရိဟိ ဃာတတော သေသော၊
တယာ ဃာတော ဣမဿ တု။
တွမေနံ ကိရ ဃာတေဟိ၊ ဣဒံ ဒေဝိဝစော’’ဣတိ၊
ဝတွာ တု သယာပေသုံ၊ ပါဒမူလမှိ ဟတ္ထိနော။
ဒုက္ခိတော သော ရုဒိတွာန၊ နာဂေါ ဘေတွာန အာဠကံ၊
ပဝိသိတွာ မဟာဝတ္ထုံ၊ ဒွါရံ ပါတိယ ထာမသာ။
ရညော နိသိန္နင်္ဂဏမှိ၊ ဥဂ္ဃာဋေတွာ ကဝါဋကံ၊
နိသီဒါပိယ တံ ခန္ဓေ၊ မဟာတိတ္ထမုပါဂမိ။
နာဝံ အာရော ပယိတွာန၊ ရာဇာနံ တတ္ထ ကုဉ္ဇရော၊
ပစ္ဆိမော ဒဓိတီရေန၊ သယံ မလယ မာရုဟီ။
ပရတီရေ ဝသိတွာ သော၊ တီဏိဝဿာနိ ခတ္တိယော၊
ဗလကာယံ ဂဟေတွာန၊ အာဂါ နာဝါတိ ရောဟဏံ။
တိတ္ထေ သက္ခရသောဗ္ဘမှိ၊ ဩတရိတွာန ဘူပတိ၊
အကာသိ ရောဟဏေ တတ္ထ၊ မဟန္တံ ဗလသင်္ဂဟံ။
ရညော မင်္ဂလဟတ္ထိသော၊ ဒက္ခိဏံ မလယံ တတော၊
ရောဟဏံယေ’ဝုပါဂဉ္ဆိ၊ တဿ ကမ္မာနိ ကာတဝေ။
မဟာပဒုမနာမဿ၊ တတ္ထ ဇာတကဘာဏိနော၊
တုလာဓာရဝှဝါသိဿ၊ မဟာထေရဿ သန္တိကေ။
ကပိဇာတကံ ¶ သုတွာန၊ ဗောဓိသတ္တေ ပသာဒဝါ၊
နာဂမဟာဝိဟာရံ သော၊ ဇိယာမုတ္တဓနုဿတံ။
ကတွာ ကာရေသိ ထူပဉ္စ၊ ဝဍ္ဎာပေသိ ယထာဌိတံ၊
တိဿဝါပိဉ္စ ကာရေသိ၊ တထာ ဒုရဝှဝါပိကံ။
သော ဂဟေတွာ ဗလံ ရာဇာ၊ ယုဒ္ဓါယ အဘိနိက္ခမိ၊
တံ သုတွာ လမ္ဗကဏ္ဏာ စ၊ ယုဒ္ဓါယ အဘိသံယုတာ။
ပပလ္လက္ခန္ဓဒွါရမှိ၊ ခေတ္တေ ဟိင်္ကရဝါပိကေ၊
ယုဒ္ဓံ ဥဘိန္နံ ဝတ္တိတ္ထ၊ အညမညဝိဟေသနံ။
နာဝါကိလန္တဒေဟတ္တာ၊ ပေါသာ သီဒန္တိ ရာဇိနော၊
ရာဇာ နာမံ သာဝယိတွာ၊ သယံ ပါဝိသိ တေန သော။
တေန ဘီတာလမ္ဗကဏ္ဏာ၊ သယိံသု ဥဒရေန သော၊
တေသံ သီသာနိ ဆိန္ဒိတွာ၊ ရတနာဘိသမံကရိ။
တိက္ခတ္တုမေဝန္တုကတေ၊ ကရုဏာယ မဟီပတိ၊
‘‘အမာရေတွာ’ဝ ဂဏှာထ၊ ဇီဝဂ္ဂါဟ’န္တိ အဗြုဝိ။
တတော ဝိဇိတသင်္ဂါမော၊ ပုရံ အာဂမ္မ ဘူပတိ၊
ဆတ္တံ ဥဿာပယိတွာန တိဿဝါပိ ဆဏံ အဂါ။
ဇလကီဠာယ ဥဂ္ဂန္တွာ၊ သုမဏ္ဍိတပသာဓိတော၊
အတ္တနော သိရိသမ္ပတ္တိံ၊ ဒိသွာ တဿန္တရာယိကေ။
လမ္ဗကဏ္ဏေ သရိတွာန၊ ကုဒ္ဓါ သော ယောဇယီရထေ၊
ယုဂပရမ္ပရာ တေသံ၊ ပုရတော ပါဝိသီ ပုရံ။
မဟာဝတ္ထုဿ ဥမ္မာရေ၊ ဌတွာ ရာဇာဏပေသိ သော၊
‘‘ဣမေသံ သီသမုမ္မာရေ၊ အသ္မိံ ဆိန္ဒထ ဘော’’ဣတိ။
ဂေါဏာ ဧတေရထေ ယုတ္တာ၊ တဝ ဟောန္တိ ရထေသဘ၊
သိင်္ဂံခုရဉ္စ ဧတေသံ၊ ဆေဒါပယတ ဘော’’ဣတိ။
မာတုယာ အထ သညတ္တော၊ သီသစ္ဆေဒံ နိဝါရိယ၊
နာသဉ္စ ပါဒင်္ဂုဋ္ဌဉ္စ၊ တေသံ ရာဇာ အဆေဒယိ။
ဟတ္ထိဝုတ္ထံ ဇနပဒံ၊ အဒါ ဟတ္ထိဿ ခတ္တိယော၊
ဟတ္ထိဘောဂေါ ဇနပဒေါ၊ ဣတိ တေနာသိ နာမတော။
ဧဝံ အနုရာဓပုရေ၊ ဣဠာနာဂေါ မဟီပတိ၊
ဆဗ္ဗဿာနိ အနုနာနိ၊ ရဇ္ဇံ ကာရေသိ ခတ္တိယော။
ဣဠနာဂစ္စယေ ¶ တဿ၊ ပုတ္တော စန္ဒမုခေါသိဝေါ၊
အဋ္ဌဝဿံ သတ္တမာသံ၊ ရာဇာ ရဇ္ဇမကာရယိ။
မဏိကာရဂါမေ ဝါပိ၊ ကာရာပေတွာ မဟီပတိ၊
ဣဿရသမဏဝှဿ၊ ဝိဟာရဿ အဒါသိ သော။
တဿ ရညော မဟေသီ စ၊ သင်္ဂါမေ ပတ္တိမတ္တနော၊
တဿေဝါ’ဒါ ဝိဟာရဿ၊ ဒမိဠဒေဝီတိ ဝိဿုတာ။
တံ တိဿဝါပီ ကီဠာယ၊ ဟန္တွာ စန္ဒမုခံ သိဝံ၊
ယသဠာလကတိဿော’တိ၊ ဝိဿုတော တင်္ကနိဋ္ဌကော။
အနုရာဓပုရေ ရမ္မေ၊ လင်္ကာဘုဝဒနေ သုဘေ၊
သတ္တဝဿာနဋ္ဌမာသေ၊ ရာဇာ ရဇ္ဇမကာရယိ။
ဒေါဝိရိကဿ ဒတ္တဿ၊ ပုတ္ထော ဒေါဝါရိကော သယံ၊
ရညော သဒိသရူပေန၊ အဟောသိ သုဘနာမဝါ။
သုဘံ ဗလတ္ထံ တံ ရာဇာ၊ ရာဇဘူသာယ ဘူသိယ၊
နိသိဒါပိယ ပလ္လင်္ကေ၊ ဟာသတ္ထံ ယသဠာလကော။
သီသစောဠံ ဗလတ္ထဿ၊ သသီသေ ပဋိမုဉ္စိယ၊
ယဋ္ဌိံ ဂဟေတွာ ဟတ္ထေန၊ ဒွါရမူလေ ဌိတော သယံ။
ဝန္ဒန္တေသု အမစ္စေသု၊ နိသိန္နံ အာသနမှိ တံ၊
ရာဇာ ဟသတိ ဧဝံ သော၊ ကုရုတေ အန္တရန္တရာ။
‘‘ဗလတ္ထော ဧကဒိဝသံ၊ ရာဇာနံ ဟသမာနကံ၊
အယံ ဗလတ္ထော ကသ္မာ မေ၊ သမ္မုခါဟသတီ’’တိ သော။
မာရာပယိတွာ ရာဇာနံ၊ ဗလတ္ထော သော သုဘော ဣဓ၊
ရဇ္ဇံ ကာရေသိ ဆဗ္ဗဿံ၊ သုဘရာဇာတိ ဝိဿုတော။
ဒွိသု မဟာဝိဟာရေသု၊ သုဘရာဇာ မနောရမံ၊
ပရိဝေဏပန္တိံ သုဘ-နာမကံယေဝ ကာရယိ။
ဥရုဝေလသမီပမှိ၊ တထာ ဝေလ္လိဝိဟာရကံ၊
ပုရတ္ထိမေ ဧကဒွါရံ၊ ဂင်္ဂန္တေ နန္ဒိဂါမကံ။
လမ္ဗကဏ္ဏသုတော ¶ ဧကော၊ ဥတ္တရပဿဝါသိကော၊
သေနာပတိမုပဋ္ဌာသိ၊ ဝသဘော နာမ မာတုလံ။
ဟေဿတိ ဝသဘော နာမ၊ ရာဇာ’တိ သုတိယာသဒါ၊
ဃာတေတိ ရာဇာဒီပမှိ၊ သဗ္ဗေ ဝသဘနာမကေ။
‘‘ရညော ဒဿာမ ဝသတံ၊ ဣမ’’န္တိ ဘရိယာယ သော၊
သေနာပတိမန္တယိတွာ၊ ပါတော ရာဇကုလံ အဂါ။
ဂစ္ဆတော တေန သဟသာ၊ တမ္ဗုလံ စုဏ္ဏဝဇ္ဇိတံ၊
ဟတ္ထမှိ ဝသဘဿာ’ဒါ၊ တံ သာဓု ပရိရက္ခိတုံ။
ရာဇဂေဟဿ ဒွါရမှိ၊ တမ္ဗုလံ စုဏ္ဏဝဇ္ဇိတံ၊
သေနာပတိ ဥဒိက္ခိတွာ၊ တံ စုဏ္ဏတ္ထံ ဝိသဇ္ဇယိ။
သေနာပတိဿ ဘရိယာ၊ စုဏ္ဏတ္ထံ ဝသဘံ ဂတံ၊
ဝတွာ ရဟဿံ ဒတွာ စ၊ သဟဿံ တံ ပလာပယိ။
မဟာဝိဟာရဌာနံ သော၊ ဂန္တွာန ဝသဘော ပန၊
တတ္ထ ထေရေဟိ ခိရန္န-ဝတ္ထေဟိ ကတသင်္ဂဟော။
တတော ပရံ ကုဋ္ဌိနော စ၊ ရာဇဘာဝါယ နိစ္ဆိတံ၊
သုတွာန ဝစနံဟဋ္ဌော၊ ‘‘စောရော ဟေဿ’’န္တိ နိစ္ဆိတော။
လဒ္ဓသမတ္ထပုရိသေ၊ ဂါမဃာတံ တတော ပရံ၊
ကရောန္တော ရောဟဏံ ဂန္တွာ၊ ကပလ္လပုဝေါပဒေသတော။
ကမေန ရဋ္ဌံ ကဏှန္ထော၊ သမ္ပတ္တဗလဝါဟနော၊
သော ရာဇာ ဒွီဟိ ဝဿေဟိ၊ အာဂမ္မ ပုရသန္တိကံ။
သုဘရာဇံ ရဏေ ဟန္တွာ၊ ဝသဘော သော မဟဗ္ဗလော၊
ဥဿာပယိ ပုရေဘတ္တံ၊ မာတုလော’ပိ ရဏေ ပတိ။
တံ မာတုလဿ သရိရံ၊ ပုဗ္ဗဘူတောပကာရိကံ၊
အကာသိ ဝသဘော ရာဇာ၊ မဟေသိံ မေတ္တနာမိကံ။
သောဟောရပါဌကံ ပုစ္ဆိ၊ အာယုပ္ပမာဏမတ္တနော၊
‘‘အာဟ ဒွါဒသဝဿာနိ’’၊ ရဟောယေဝဿ သောပိ စ။
ရဟဿံ ရက္ခဏတ္ထာယ၊ သဟဿံ တဿာ ဒါပိယ၊
သင်္ဃံ သော သန္နိပါတေတွာ၊ ဝန္ဒိတွာ ပုစ္ဆိ ဘူပတိ။
‘‘သိယာနု ¶ ဘန္တေ အာယုဿ၊ ဝဍ္ဎနကာရဏံ’’ဣတိ၊
‘‘အတ္ထီ’’တိ သင်္ဃော အာစိက္ခိ၊ အန္တရာယဝိမောစနံ။
ပရိဿာဝနဒါနဉ္စ၊ အာဝါသဒါန မေဝ စ၊
ဂိလာနဝတ္တဒါနဉ္စ၊ ဒါတဗ္ဗံ မနုဇာဓိပ။
‘‘ကာတဗ္ဗံ ဇိဏ္ဏကာဝါသ-ပဋိသင်္ခရဏံ တထာ၊
ပဉ္စသီလသမာဒါနံ၊ ကတွာ တံ သာဓုရက္ခိယံ။
ဥပေါသထူပဝါသော စ၊ ကတ္တဗ္ဗော’ ပေါသထေ’’ဣတိ၊
ရာဇာ သာဓူတိ ဂန္တွာန၊ တထာ သဗ္ဗံ မကာသိ သော။
တိဏ္ဏံ တိဏ္ဏဉ္စ ဝဿာနံ၊ အစ္စယေန မဟီပတိ၊
ဒီပမှိ သဗ္ဗသင်္ဃဿ၊ တိစီဝရမဒါပယိ။
အနာဂတာနံ ထေရာနံ၊ ပေသယိတွာန ဒါပယိ၊
ဒွတ္တိံသာယဟိ ဌာနေသု၊ ဒါပေသိ မဓုပါယသံ။
စတုသဋ္ဌိယာ စ ဌာနေသု၊ မဟာဒါနံတု မိဿကံ၊
သဟဿဝဋ္ဋိ စတုသု၊ ဌာနေသု စ ဇလာပယိ။
စေတိယပဗ္ဗတေ စေဝ၊ ထူပါရာမေ စ စေတိယေ၊
မဟာထူပေ မဟာဗောဓိ-ဃရေ ဣတိ ဣမေသု ဟိ။
စိတ္တလကူဋေ ကာရေသိ၊ ဒသထူပေ မနောရမေ၊
ဒီပေ’ခိလမှိ အာဝါသေ၊ ဇိဏ္ဏေ စ ပဋိသင်္ခရိ။
ဝလ္လိယေရဝိဟာရေ စ၊ ထေရဿ သော ပသီဒိယ၊
မဟာဝလ္လိဂေါတ္တံ နာမ၊ ဝိဟာရဉ္စ အကာရယိ။
ကာရေသိ အနုရာရာမံ၊ မဟာဂါမဿ သန္တိကေ၊
ဟေဠိဂါမဋ္ဌကရိသ၊ သဟဿံ တဿ ဒါပယိ။
မုစေလဝိဟာရံ ကာရေတွာ၊ သော တိဿဝဍ္ဎမာနကေ၊
အာဠိသာရောဒကဘာဂံ၊ ဝိဟာရဿ အဒါပယိ။
ကလမ္ဗတိတ္ထေ ထူပမှိ၊ ကာရေသိဋ္ဌိကကဉ္စုကံ၊
ကာရေသုပေါသထာ ဂါရံ၊ ဝဋ္ဋိတေလတ္ထ မဿတု။
သဟဿကရီသဝါပိံသော ¶ ၊ ကာရာပေတွာ အဒါသိ စ၊
ကာရေသုပေါသထာဂါရံ၊ ဝိဟာရေ ကုမ္ဘိဂလ္လကေ။
သောယေ’ဝု ပေါသထာဂါရံ၊ ဣဿရသမဏကေ ဣဓ၊
ထူပါရာမေထူပဃရံ၊ ကာရာပေသိ မဟီပတိ။
မဟာဝိဟာရေ ပရိဝေဏ၊ ပန္တိံ ပစ္ဆိမပေက္ခိနိံ၊
ကာရေသိ စ စတုသာလဉ္စ၊ ဇိဏ္ဏကံ ပဋိသင်္ခရိ။
စတုဗုဒ္ဓပဋိမာရမ္မံ၊ ပဋိမာနံဃရံတထာ၊
မဟာဗောဓိင်္ဂဏေ ရမ္မေ၊ ရာဇာ သောယေဝ ကာရယိ။
တဿ ရညော မဟေသီ သာ၊ ဝုတ္တနာမာ မနောရမံ၊
ထူပံ ထူပဃရဉ္စေဝ၊ ရမ္မံ တထေဝ ကာရယိ။
ထူပါရာမေ ထူပဃရံ၊ နိဋ္ဌာပေတွာ မဟီပတိ၊
တဿ နိဋ္ဌာပိတမဟေ၊ မဟာဒါနမဒါသိ စ။
ယုတ္တာနံ ဗုဒ္ဓဝစနေ၊ ဘိက္ခူနံ ပစ္စယမ္ပိ စ၊
ဘိက္ခူနံ ဓမ္မကထိကာနံ၊ သပ္ပိဖာဏိတမေဝ စ။
နဂရဿ စတုဒွါရေ၊ ကပဏဝဋ္ဋဉ္စ ဒါပယိ၊
ဂိလာနာနဉ္စ ဘိက္ခူနံ၊ ဂိလာနဝဋ္ဋမေဝ စ။
မယေတ္တိံ ရာဇုပ္ပလဝါပိံ၊ ဝဟကောလမ္ဗဂါမကံ၊
မဟာနိက ဝိတ္တဝါပိံ၊ မဟာရာမောတ္တိ မေဝ စ။
ကေဟာလံ ကာဠိဝါပိဉ္စ၊ စမ္ဗုဋ္ဌိံ ဝါတမင်္ဂနံ၊
အဘိဝဍ္ဎမာနကဉ္စ၊ ဣစ္စေကာဒသ ဝါပိယော။
ဒွါဒသ မာတိကာ စေဝ၊ သုဘိက္ခတ္ထမကာရယိ၊
ဂုတ္တတ္ထ ပုရပါကာရံ၊ စေဝ မုစ္စမကာရယိ။
ဂေါပုရဉ္စ စတုဒွါရေ၊ မဟာဝတ္ထုဉ္စ ကာရယိ၊
သရံ ကာရေသိ ဥယျာနေ၊ ဟံသေတတ္ထဝိသဇ္ဇယိ။
ပုရေ ဗဟူ ပေါက္ခရဏီ၊ ကာရာပေတွာ တဟိံ တဟိံ၊
ဥမ္မဂ္ဂေန ဇလံ တတ္ထ၊ ပဝေသေသိ မဟီပတိ။
ဧဝံ ¶ နာနာဝိဓံ ပုညံ၊ ကတွာ ဝသဘဘူပတိ၊
ဟတန္တရာယော သော ဟုတွာ၊ ပုညကမ္မေ သဒါဒရော။
စတုတ္တာသီသဝဿာနိ၊ ပုရေ ရဇ္ဇမကာရယိ၊
စတုတ္တာလီသဝေသာခ၊ ပူဇာ ယော စ အကာရယိ။
သုဘရာဇာ ဓရန္တော သော၊ အတ္တနော ဧကဓီတရံ၊
ဝသဘေန ဘယာသံကီ၊ အပ္ပေသိ’ဌိက ဝဍ္ဎကိံ။
အတ္တနော ကမ္ဗလဉ္စေဝ၊ ရာဇာ ဘဏ္ဍာနိ စ’ပ္ပယိ၊
ဝသဘေန ဟတေ တသ္မိံ၊ တမာဒါသိဋ္ဌဝဍ္ဎကီ။
ဓီတိဌာနေ ဌပေတွာန၊ ဝဍ္ဎေတိ အတ္တနော ဃရေ၊
သကမ္မံ ကရတော တဿ၊ ဘတ္တံ အာဟရိ ဒါရိကာ။
သာ နိရောဓသမာပန္နံ၊ တဒမ္ဗပုပ္ဖ ဂုမ္ဗကေ၊
သတ္တမေ ဒိဝသေ ဒိသွာ၊ ဘတ္တံ မေဓာဝီနီ အဒါ။
ပုန ဘတ္တံ ရန္ဓယိတွာ၊ ပိတုနော ဘတ္တမာဟရိ၊
ပပဉ္စကာရဏံ ပုဋ္ဌာ၊ တမတ္ထံ ပိတုနော ဝဒိ။
တုဋ္ဌော ပုနပ္ပုနဉ္စေ’သော၊ ဘတ္တံ ထေရဿ ဒါပယိ၊
ဝိဿတ္ထော’နာဂတံ ဒိသွာ၊ ထေရော အာဟ ကုမာရိကံ။
‘‘တဝဣဿရိယေဇာတေ၊ ဣမံ ဌာနံ ကုမာရိကေ၊
သရေယျာသီ’တိ ထေရော တု၊ တဒါ စ ပရိနိဗ္ဗုတော။
သကေ သော ဝသဘော ရာဇာ၊ ဝယပ္ပတ္တမှိ ပုတ္တကေ၊
ဝင်္ကနာသိကတိဿမှိ၊ ကညံတဿာနုရူပိကံ။
ဂဝေသာပေသိ ပုရိသာ၊ တံ ဒိသွာန ကုမာရိကံ၊
ဣဋ္ဌကဝဍ္ဎကီဂါမေ၊ ဣတ္ထိလက္ခဏ ကောဝိဒါ။
ရညော နိဝေဒယုံ ရာဇာ၊ တမာဏာပေတုမာရဘိ၊
တဿာဟ ရာဇဓီတတ္တံ၊ ဣဋ္ဌကဝဍ္ဎကီ တဒါ။
သုဘရညော တု ဓီတတ္တံ၊ ကမ္ဗလာဒီဟိ ဉာပယိ၊
ရာဇာ တုဋ္ဌော သုတဿာ’ဒါ၊ တံ သာဓု ကတမင်္ဂလံ။
ဝသဘဿစ္စယေ ပုတ္တော၊ ဝင်္ကနာသိက တိဿကော၊
အနုရာဓပုရေ ရဇ္ဇံ၊ တီဏိ ဝဿာနိ ကာရယိ။
သော ¶ ဂေါဏနဒိယာ တီရေ၊ မဟာမင်္ဂလနာမကံ၊
ဝိဟာရံ ကာရယိ ရာဇာ၊ ဝင်္ကနာသိကတိဿကော။
မဟာမတ္တာ တု ဒေဝီ သာ၊ သရန္တီ ထေရဘာသိတံ၊
ဝိဟာရကာရဏတ္ထာယ၊ အကာသိ ဓနသဉ္စယံ။
ဝင်္ကနာသိကတိဿဿ၊ အစ္စယေ ကာရယီ သုတော၊
ရဇ္ဇံ ဗာဝီသဝဿာနိ၊ ဂဇ္ဇဗာဟုကဂါမဏိ။
သုတွာ သော မာတုဝစနံ၊ မာတုဒတ္ထာယ ကာရယိ၊
ကဒမ္ဗပုပ္ဖဌာနမှိ၊ ရာဇမာတုဝိဟာရကံ။
မာတာ သတသဟဿံ သာ၊ ဘူမိအတ္ထောယ ပဏ္ဍိတာ၊
အဒါ မဟာဝိဟာရဿ၊ ဝိဟာရဉ္စ အကာရ ယိ။
သယမေဝ အကာရေသိ၊ တတ္ထ ထူပံ သိလာမယံ၊
သင်္ဃဘောဂဉ္စ ပါဒါသိ၊ ကိဏိတွာန တတော တတော။
အဘယုတ္တရ မဟာထူပံ၊ ဝဍ္ဎာပေတွာ စိတာပယိ၊
စတုဒွါရေ စ တတ္ထေဝ၊ အာဒိမုခမကာရယိ။
ဂါမဏိတိဿဝါပိံ သော၊ ကာရာပေတွာ မဟီပတိ၊
အဘယဂိရိ ဝိဟာရဿ၊ ပါကဝဋ္ဋာယ’ဒါသိ စ။
မရိစဝဋ္ဋိကထူပမှိ၊ ကဉ္စုကဉ္စ အကာရယိ၊
ကိဏိတွာ သတသဟဿေန၊ သင်္ဃဘောဂမဒါသိ စ။
ကာရေသိ ပစ္ဆိမေ ဝဿေ၊ ဝိဟာရံ ရာမကဝှယံ၊
မဟေဇသနသာလဉ္စ၊ နဂရမှိ အကာရယိ။
ဂဇဗာဟုဿစ္စယေန၊ သသုရော တဿ ရာဇိနော၊
ရဇ္ဇံ မဟလ္လကော နာဂေါ၊ ဆဗ္ဗဿာနိ အကာရယိ။
ပုရတ္ထိမေ ပေဇလကံ၊ ဒက္ခိဏေ ကောဋိ ပဗ္ဗတံ၊
ပစ္ဆိမေ ဒကပါသာဏေ၊ နာဂဒီပေ သာလိပဗ္ဗတံ။
ဗီဇဂါမေ တနဝေဠိံ၊ ရောဟဏေ ဇနပဒေ ပန၊
တောဗ္ဗလနာဂပဗ္ဗတဉ္စ၊ အန္တောဋ္ဌေ ဂိရိဟာလိကံ။
ဧတေ ¶ သတ္တ ဝိဟာရေ သော၊ မဟလ္လနာဂဘူပတိ၊
ပရိတ္တေနပိ ကာလေန၊ ကာရာပေသိ မဟာမတီ။
ဧဝံ အသာရေဟိ ဓနေဟိ သာရံ၊
ပုညာနိ ကတွာန ဗဟူနိ ပညာ၊
အာဒေန္တိ ဗာလာ ပန ကာမ ဟေတု၊
ဗဟူနိ ပါပါနိ ကရောန္တာ မောဟာ’တိ။
သုဇနပ္ပသာဒသံဝေဂတ္ထာယ ကတေ မဟာဝံသေ
ဒွါဒသ ရာဇကော နာမ
ပဉ္စတိံသတိမော ပရိစ္ဆေဒေါ။