📜
ဆတ္တိံသတိမ ပရိစ္ဆေဒ
တယောဒသ ရာဇကော
မဟလ္လနာဂစ္စယေန ¶ ၊ ပုတ္တော ဘာတိကတိဿကော၊
စတုဝီသတိဝဿာနိ၊ လံကာရဇ္ဇမကာရယိ။
မဟာဝိဟာရေ ပါကာရံ၊ ကာရာပေသိ သမန္တတော၊
ဂဝရတိဿဝိဟာရံ၊ သော ကာရယိတွာ မဟီပတိ။
မဟာဂါမဏိကံ ဝါပိံ၊ ဝိဟာရဿ’ဿ’ဒါသိ စ၊
ဝိဟာရဉ္စ အကာရေသိ၊ ဘာတိယတိဿ နာမကံ။
ကာရေသုပေါသထာဂါရံ၊ ထူပါရာမေ မနောရမေ၊
ရန္ဓကဏ္ဍကဝါပိဉ္စ၊ ကာရာပေသိ မဟီပတိ။
သတ္တေသု မုဒုစိတ္တောသော၊ သင်္ဃမှိ တိဗ္ဗဂါရဝေါ၊
ဥဘတောသင်္ဃေ မဟီပါလော၊ မဟာဒါနံ ပဝတ္တယိ။
ဘာတိကတိဿစ္စယေန၊ တဿ ကနိဋ္ဌတိဿကော၊
အဋ္ဌဝီသသမာရဇ္ဇံ၊ လံကာဒီပေ အကာရယိ။
ဘူတာရာမ ¶ မဟာနာဂ၊ ထေရသ္မိံ သော ပသီဒိယ၊
ကာရေသိ ရတနပါသာဒံ၊ အဘယဂိရိမှိ သာဓုကံ။
အဘယဂိရိမှိ ပါကာရံ၊ မဟာပရိဝေဏမေဝ စ၊
ကာရေသိ မဏိသောမဝှေ၊ မဟာပရိဝေဏမေဝ စ။
တတ္ထေဝ စေတိယဃရံ၊ အမ္ဗတ္ထလေ တထေဝ စ၊
ကာရေသိ ပဋိသင်္ခါရံ၊ နာဂဒီပေ ဃရေ ပန။
မဟာဝိဟာရသီမံသော၊ မဒ္ဒိတွာ တတ္ထ ကာရယိ၊
ကုက္ကုဋဂိရိ ပရိဝေဏ၊ ပန္တိံ သက္ကစ္စ ဘူပတိ။
မဟာဝိဟာရေ ကာရေသိ၊ ဒွါဒသ မနုဇာဓိပေါ၊
မဟာစတုရဿပါသာဒေ၊ ဒဿနေယျေမနောရမေ။
ဒက္ခိဏဝိဟာရ ထူပမှိ၊ ကဉ္စုကဉ္စ အကာရယိ၊
ဘတ္တသာလံ မဟာမေဃ၊ ဝနာသိမဉ္စ မဒ္ဒိယ။
မဟာဝိဟာရပါကာရံ၊ ပဿတော အပနီယသော၊
မဂ္ဂံ ဒက္ခိဏဝိဟာရ၊ ဂါမိဉ္စာပိ အကာရယိ။
ဘူတာရာမ ဝိဟာရဉ္စ၊ ရာမဂေါဏကမေဝ စ၊
တထေဝ နန္ဒတိဿဿ၊ အာရာမဉ္စ အကာရယိ။
ပါစိနတော အနုဠာတိဿ၊ ပဗ္ဗတံ ဂင်္ဂရာဇိယံ၊
နိယေလတိဿာရာမဉ္စ၊ ပိဠ ပိဋ္ဌိ ဝိဟာရကံ။
ရာဇမဟာဝိဟာရဉ္စ၊ ကာရေသိ မနုဇာဓိပေါ၊
သောယေဝ တီသု ဌာနေသု၊ ကာရေသု’ပေါသထာလယံ။
ကလျာဏီက ဝိဟာရေ စ၊ မဏ္ဍလဂိရိကေ တထာ၊
ဒုဗ္ဗလဝါပိတိဿဝှေ၊ ဝိဟာရေသု ဣမေသု ဟိ။
ကနိဋ္ဌတိဿစ္စယေန၊ တဿ ပုတ္တော အကာရယိ၊
ရဇ္ဇံ ဒွေယေဝ ဝဿာနိ၊ စူဠနာဂေါတိ ဝိဿုတော။
စူဠနာဂကနိဋ္ဌောတု၊ ရာဇာဃာတိယ ဘာတိကံ၊
ဧကဝဿံ ကုဍ္ဍနာဂေါ၊ ရဇ္ဇံ လံကာယ ကာရယိ။
မဟာပေဠဉ္စ ဝဍ္ဎေသိ၊ ဧကနာဠိကဆာတကေ၊
ဘိက္ခုသတာနံ ပဉ္စန္နံ၊ အဗ္ဘောစ္ဆိန္နံ မဟီပတိ။
ကုဍ္ဍနာဂဿ ¶ ရညော တု၊ ဒေဝီယာ ဘာတုကော တဒါ၊
သေနာပတိ သိရိနာဂေါ၊ စောရော ဟုတွာန ရာဇိနော။
ဗလဝါဟန သမ္ပန္နော၊ အာဂမ္မ နဂရန္တိကံ၊
ရာဇဗလေန ယုဇ္ဈန္တော၊ ကုဍ္ဍနာဂံ မဟီပတိံ။
ပလာပေတွာ လဒ္ဓဇယော၊ အနုရာဓ ပုရေ ဝရေ၊
လံကာရဇ္ဇမကာရေသိ၊ ဝဿာနေကူနဝီသတိ။
မဟာထူပဝရေ ဆတ္တံ၊ ကာရာပေတွာန ဘူပတိ၊
သုဝဏ္ဏကမ္မံ ကာရေသိ၊ ဒဿနေယျံ မနောရမံ။
ကာရေသိ လောဟပါသာဒံ၊ သံခိတ္တံ ပဉ္စဘူမကံ၊
မဟာဗောဓိ စတုဒွါရေ၊ သောပါနံ ပုနကာရယိ။
ကာရေတွာ ဆတ္တပါသာဒံ၊ မဟေ ပူဇမကာရယိ၊
ကုလမ္ဗဏဉ္စ ဒီပသ္မိံ၊ ဝိဿဇ္ဇေသိ ဒယာပရော။
သိရိနာဂစ္စယေ တဿ၊ ပုတ္တော တိဿော အကာရယိ၊
ရဇ္ဇံ ဒွါဝီသဝဿာနိ၊ ဓမ္မဝေါဟာရ ကောဝိဒေါ။
ဌပေသိ သော ဟိ ဝေါဟာရံ၊ ဟိံသာ မုတ္တံ ယတောဣဓ၊
ဝေါဟာရက တိဿရာဇာ၊ ဣတိ နာမံ တတော အဟု။
ကမ္ဗုဂါမကဝါသိဿ၊ ဒေဝတ္ထေရဿ သန္တိကေ၊
ဓမ္မံ သုတွာ ပဋိကမ္မံ၊ ပဉ္စာဝါသေ အကာရယိ။
မဟာတိဿဿ ထေရဿ၊ အနုရာ ရာမဝါသိနော၊
ပသန္နော မုစေလပဋ္ဋနေ၊ ဒါန ဝဋ္ဋမကာရယိ။
တိဿရာဇ မဏ္ဍပဉ္စ၊ မဟာဝိဟာရဒွယေပိ သော၊
မဟာဗောဓိဃရေ ပါစိ၊ လောဟရူပဒ္ဓယမ္ပိ စ။
သတ္တပဏ္ဏိကပါသာဒံ၊ ကာရေတွာ သုခဝါသကံ၊
မာသေ မာသေ သဟဿံ သော၊ မဟာဝိဟာရဿ ဒါပယိ။
အဘယဂိရိဝိဟာရေ၊ ဒက္ခိဏမူလသဝှယေ၊
မရိစဝဋ္ဋိ ဝိဟာရမှိ၊ ကုလာလိတိဿသဝှယေ။
မဟိယင်္ဂဏ ဝိဟာရမှိ၊ မဟာဂါမကသဝှယေ၊
မဟာနာဂတိဿဝှမှိ၊ တထာ ကလျာဏီကဝှယေ။
ဣတိ ¶ အဋ္ဌသု ထူပေသု၊ ဆတ္တကမ္မမကာရယိ၊
မူကနာဂသေနာပတိ၊ ဝိဟာရေ ဒက္ခိဏေ တထာ။
မရိစ ဝဋ္ဋိ ဝိဟာရမှိ၊ ပုတ္တဘာဂဝှယေ တထာ၊
ဣဿရသမဏဝှမှိ၊ တိဿဝှေ နာဂဒီပကေ။
ဣတိ ဆသု ဝိဟာရေသု၊ ပါကာရဉ္စ အကာရယိ၊
ကာရေသု’ ပေါသထာဂါရံ၊ အနုရာရာမသဝှယေ။
အရိယဝံသကထာဌာနေ၊ လံကာဒီပေခိလေပိ စ၊
ဒါန ဝဋ္ဋံ ဌပါပေသိ၊ သဒ္ဓမ္မေ ဂါရဝေန သော။
တိဏီ သတသဟဿာနိ၊ ဒတွာန မနုဇာဓိပေါ၊
ဣဏတော သယိကေ ဘိက္ခူ၊ မောစေသိ သာသနပ္ပိယော။
မဟာ ဝေသာခ ပူဇံ သော၊ ကာရေတွာ ဒီပဝါသိနံ၊
သဗ္ဗေ သံယေဝ ဘိက္ခူနံ၊ တိစီဝရမဒါပယိ။
ဝေတုလ္လဝါဒံ မဒ္ဒိတွာ၊ ကာရေတွာ ပါပနိဂ္ဂဟံ၊
ကပိလေန အမစ္စေန၊ သာသနံ ဇောတယီစ သော။
ဝိဿုတော’ဘယနာဂေါ’တိ၊ ကနိဋ္ဌော တဿရာဇိနော၊
ဒေဝိယာ တဿ သံသဋ္ဌော၊ ဉာတော ဘီတော သဘာတရာ။
ပလာယိတွာ ဟလ္လတိတ္ထံ၊ ဂန္တွာန သဟသေဝကော၊
ကုဒ္ဓါ ဝိယ မာတုလဿ၊ ဟတ္ထပါဒဉ္စ ဆေဒယိ။
ရာဇိနော ရဋ္ဌတေဒတ္ထံ၊ ဌပေတွာန ဣဓေဝ တံ၊
သုနခေါပမံ ဒဿယိတွာ၊ ဂဟေတွာ’တိ သိနိဒ္ဓကေ။
တတ္ထေဝ နာဝံ အာရုယှ၊ ပရတီရမဂါသယံ၊
သုဘဝေါ မာတုလော တု၊ ဥပဂမ္မ မဟီပတိ။
သုဟဒေါ ဝိယ ဟုတွာန၊ တသ္မိံ ရဋ္ဌမဘိန္ဒိသော၊
အဘယော တံ ဇာနနတ္ထံ၊ ဒူတံ ဣဓ ဝိသဇ္ဇယိ။
တံ ဒိသွာ ပူဂရုက္ခံ သော၊ သမန္တာ ကုန္တနာဠိယာ၊
ပရိဗ္ဘမန္တော မဒ္ဒိတွာ၊ ကတွာ ဒုဗ္ဗလမူလကံ။
ဗာဟုနာယေဝ ပါတေတွာ၊ တဇ္ဇေတွာ တံ ပလာပယိ၊
ဒူတော ဂန္တွာ အဘယဿ၊ တံ ပဝတ္တိံ ပဝေဒယိ။
ဉတွာ’ဘယော ¶ တံ ဒမိဠေ၊ အာဒါယ ဗသုကေ တတော၊
နဂရန္တိကမာဂဉ္ဆိ၊ ဘာတရာ သဟ ယုဇ္ဈိတုံ။
တံ ဉတွာန ပလာယိတွာ၊ အဿမာရုယှဒေဝိယာ၊
မလယံ အာဂမာ ရာဇာ၊ တံကနိဋ္ဌော’နု ဗန္ဓိယ။
ရာဇာနံ မလယေ ဟန္တွာ၊ ဒေဝီမာဒါယ အာဂတော၊
ကာရေသိ နဂရေ ရဇ္ဇံ၊ အဋ္ဌဝဿာနိ ဘူပတိ။
ပါသာဏဝေဒိံ ကာရေသိ၊ မဟာဗောဓိသမန္တတော၊
လောဟပါသာဒင်္ဂဏမှိ၊ ရာဇာ မဏ္ဍပမေဝ စ။
ဒွိဟိ သတသဟဿေဟိ၊ နေကဝတ္ထာနိ ဘာဂိယ၊
ဒီပမှိ ဘိက္ခုသင်္ဃဿ၊ ဝတ္ထဒါနမဒါသိ သော။
အဘယဿ’စ္စယေ ဘာတု၊ တဿဿ တဿ အတြဇော၊
ဒွေဝဿာနိ သိရိနာဂေါ၊ လံကာရဇ္ဇ မကာရယိ။
ပဋိသင်္ခရိယ ပါကာရံ၊ မဟာဗောဓိသမန္တတော၊
မဟာဗောဓိဃရဿေဝ၊ သောယေဝ ဝါလိကာတလေ။
မူစေလရုက္ခပရတော၊ ဟံသဝဋ္ဋံ မနောရမံ၊
မဟန္တံ မဏ္ဍပဉ္စေဝ၊ ကာရာပေသိ မဟီပတိ။
ဝိဇယကုမာရကော နာမ၊ သိရိနာဂဿ အတြဇော၊
ပိတုနော အစ္စယေ ရဇ္ဇံ၊ ဧကဝဿမကာရယိ။
လမ္ဗကဏ္ဏာ တယော အာသုံ၊ သဟာတာ မဟိယင်္ဂဏေ၊
သင်္ဃတိဿော သင်္ဃဗောဓိ၊ တတိယော ဂေါဋ္ဌကာဘယော။
တေ တိဿဝါပိမရိယာဒ-ဂတော အန္ဓော ဝိစက္ခဏော၊
ရာဇုပဋ္ဌာနမာယန္တေ၊ ပဒသဒ္ဒေန အဗြဝိ။
‘‘ပထဝီသာမိနော ဧတေ၊ တယော ဝဟတိဘူ’ဣတိ၊
တံ သုတွာ အဘယော ပစ္ဆာ၊ ယန္တော ပုစ္ဆိ ပုနာဟသော။
တဿ ဝံသော ဌဿတီတိ၊
ပုန ပုစ္ဆိတမေဝ သော၊
‘‘ပစ္ဆိမဿာ’’တိ သော အာဟ၊
တံ သုတွာ ဒွီဟိသောအဂါ။
တေ ¶ ပုရံ ပဝိသိတွာန၊ တယော ရညော’တိ ဝလ္လဘော၊
ရာဇကိစ္စာနိ သာဓေန္တာ၊ ဝသန္တာ ရာဇသန္တိကေ။
ဟန္တွာ ဝိဇယရာဇာနံ၊ ရာဇဂေဟမှိ ဧကတော၊
သေနာပတိံသင်္ဃတိဿံ၊ ဒုဝေရဇ္ဇေ’ဘိသေစယုံ။
ဧဝံ သော အဘိသိတ္တောဝ၊ အနုရာဓပုရုတ္တမေ၊
ရဇ္ဇံ စတ္တာရိ ဝဿာနိ၊ သင်္ဃတိဿော အကာရယိ။
မဟာထူပမှိ ဆတ္တဉ္စ၊ ဟေမကမ္မဉ္စ ကာရယိ၊
ဝိသုံ သတသဟဿဂ္ဃေ၊ စတုရော စ မဟာမဏိ။
မဇ္ဈေ စတုန္နံ သူရိယာနံ၊ ဌပါပေသိ မဟီပတိ၊
ထူပဿ မုဒ္ဓနိ တထာ-နဂ္ဃဝဇိရစုမ္ဗဋံ။
သော ဆတ္တမဟပူဇာယ၊ သင်္ဃဿ မနုဇာဓိပေါ၊
စတ္တာလီသသဟဿဿ၊ ဆ စီဝရမဒါပယိ။
တံ မဟာဒေဝထေရေန၊ ဒါမဂလ္လက ဝါသိနော၊
ဒေသိတံ ခန္ဓကေ သုတ္တံ၊ ယာဂါနိသံသ ဒီပနံ။
သုတွာ ပသန္နော သင်္ဃဿ၊ ယာဂုဒါနမဒါပယိ၊
နဂရဿ စတုဒွါရေ၊ သက္ကစ္စဉ္စေဝ သာဓု စ။
သော အန္တရန္တရေ ရာဇာ၊ ဇမ္ဗုပက္ကာနိ ခါဒိတုံ၊
သဟောရောဓော သဟာမစ္စော၊ အဂါပါစိန ဒီပကံ။
ဥပဒ္ဒုတံ’ဿ ဂမနေ၊ မနုဿာ ပါစိ ဝါသိနော၊
ဝိသံ ဖလေသု ယော ဇေသုံ၊ ရာဇဘောဇ္ဇာယ ဇမ္ဗုယာ။
ခါဒိတွာ ဇမ္ဗုပက္ကာနိ၊ တာနိ တတ္ထေဝ သော မတော၊
သေနာပတိ သင်္ဃဓဗာဓီံ-ဘယော ရဇ္ဇေ’ဘိသေစယိ။
ရာဇာသိရိ သင်္ဃ ဗောဓိ၊ ဝိဿုတော ပဉ္စသီလဝါ၊
အနုရာဓပုရေ ရဇ္ဇံ၊ ဒုဝေ ဝဿာနိ ကာရယိ။
မဟာဝိဟာရေ ကာရေသိ၊ သလာကဂ္ဂံ မနောရမံ၊
တဒါဒီပေ မနုဿေသော၊ ဉတွာ ဒုဗ္ဗုဋ္ဌုပဒ္ဒုတေ။
ကရုဏာယ ကမ္ပိတမနော၊ မဟာထူပင်္ဂဏေ သယံ၊
နိပဇ္ဇိ ဘူမိယံ ရာဇာ၊ ကတွာန ဣတိ နိစ္ဆယံ။
‘‘ပဝဿိတွာန ¶ ဒေဝေန၊ ဇလေနုပလာဝိတေ မယိ၊
နဟေဝ ဝုဋ္ဌဟိဿာမိ၊ မရမာနောပဟံ ဣဓ’’။
ဧဝံ နိပန္နေ ဘူမိန္ဒေ၊ ဒေဝေါ ပါဝဿိ တာဝဒေ၊
လံကာဒီပမှိ သကလေ၊ ပိဏယန္တော မဟာမဟိံ။
တထာပိ နုဋ္ဌဟတိသော၊ အပိလာပနတော ဇလေ၊
အာဝရိံသု တတော’မစ္စာ၊ ဇလနိဂ္ဂမနာဠိယော။
တတော ဇလမှိ ပိလဝံ၊ ရာဇာ ဝုဋ္ဌာသိ ဓမ္မိကော၊
ကရုဏာယနုဒိ ဧဝံ၊ ဒီပေ ဒုဗ္ဗုဋ္ဌိကာဘယံ။
စောရာတဟိံ တဟိံ ဇာတာ၊ ဣတိ သုတွာန ဘူပတိ၊
စောရေ အာဏာပယိတွာန၊ ရဟဿေန ပလာပီယ။
အာဏာပေတွာ ရဟဿေန၊ မတာနံ သော ကလေဝရံ၊
အဂ္ဂီဟိ ဥတ္တာသေတွာန၊ ဟနိတံ စောရုပဒ္ဒဝံ။
ဧကော ယက္ခော ဣဓာဂမ္မ၊ ရတ္တက္ခော ဣတိ ဝိဿုတော၊
ကရောတိ ရတ္တာန’က္ခီတိ၊ မနုဿာနံ တဟိံ တဟိံ။
အညမညမပေက္ခိတွာ၊ ဘာယိတွာ ရတ္တနေတ္တတံ၊
နရာမရန္တိ တေ ယက္ခော၊ သောဘက္ခေသိ အသင်္ကိတော။
ရာဇာ ဥပဒ္ဒဝံ တေသံ၊ သုတွာ သန္တတ္တမာနသော၊
ဧကော’ပဝါသ ဂဗ္ဘမှိ၊ ဟုတွာ အဋ္ဌင်္ဂုပေါသထိ။
‘‘အပဿိတွာန တံ ယက္ခံ၊ န စုဋ္ဌာမီ’’တိ သော သယိ၊
တဿ သော ဓမ္မတေဇေန၊ အဂါ ယက္ခော တဒန္တိကံ။
တေန ‘‘ကောသီ’’တိ ပုဋ္ဌော စ၊ သော ‘‘အဟ’’န္တိ ပဝေဒယိ၊
‘‘ကသ္မာ ပဇံ မေ ဘက္ခေသိ၊ မာ ခါဒ’’ဣတိ သောဗြဝိ။
‘‘ဧကသ္မိံ မေ ဇနပဒေ၊ နရေ ဒေဟီ’’တိ သောဗြဝိ၊
‘‘န သက္ကာ ဣတိ ဝုတ္တေ သော၊ ကမေနေကံတိ အဗြဝိ။
‘‘အညံ န သက္ကာ ဒါတုံ မေ၊ မံ ခါဒ’’ ဣတိ သောဗြဝိ၊
‘‘န သက္ကာ’’ဣတိ တံ ယာစိ၊ ဂါမေ ဂါမေ ဗလိဉ္စ သော။
သာဓူတိ ဝတွာ ဘူမိန္ဒော၊ ဒိပမ္ပိ သကလေပိ စ၊
ဂါမဝရေ နိဝေသေတွာ၊ ဗလိံတဿ အဒါပယိ။
မဟာသတ္တေန ¶ တေနေဝ၊ သဗ္ဗဘူတာနုကမ္ပိနာ၊
မဟာရောဂဘယံ ဇာတံ၊ ဒီပဒီပေန နာသိတံ။
သော ဘဏ္ဍာဂါရိကော ရညော၊
အမစ္စော ဂေါဋ္ဌတာဘယော၊
စေရော ဟုတွာ ဥတ္တရတော၊
နဂရံ သမုပါဂမိ။
ပရိဿာဝနမာဒါယ၊ ရာဇာ ဒက္ခိဏဒွါရတော၊
ပရဟိံသမရောစေန္တော၊ ဧကကောဝ ပလာယိ သော။
ပုဋဘတ္တံ ဂဟေတွာန၊ ဂစ္ဆန္တော ပုရိတော ပထိ၊
ဘတ္တဘောဂါယရာဇာနံ၊ နိဗန္ဓိတ္ထ ပုနပ္ပုနံ။
ဇလံ ပရိဿာဝယိတွာ၊ ဘုဉ္ဇိတွာန ဒယာလုကော၊
တဿေဝံ’နုဂ္ဂဟံ ကာတုံ၊ ဣဒံ ဝစနမဗြုဝိ။
‘‘သင်္ဃဗောဓိ အဟံ ရာဇာ၊ ဂဟေတွာ မမဘော သီရံ၊
ဂေါဋ္ဌာဘယဿ ဒဿေဟိ၊ ဗဟုံ ဒဿတိ တေ ဓနံ။
န ဣစ္ဆိတော တထာကာတုံ၊ တဿတ္ထာယ မဟီပတိ၊
နိသိန္နောယေဝ အမရိ၊ သော သီသံ တဿ အာဒိယ။
ဂေါဋ္ဌာဘယဿ ဒဿေသိ၊ သောတု ဝိမှိတမာနသော၊
ဒတွာ တဿ ဓနံ ရညော၊ သက္ကာရံ သာဓုကာရယိ။
ဧဝံ ဂေါဋ္ဌာဘယော ဧသော၊ မေဃဝဏ္ဏာဘယော’တိ စ၊
ဝိဿုတော တေရသ သမာ၊ လံကာရဇ္ဇမကာရယိ။
မဟာဝတ္ထုံ ကာရယိတွာ၊ ဝတ္ထုဒွါရမှိ မဏ္ဍပံ၊
ကာရယိတွာ မဏ္ဍယိတွာ၊ သော ဘိက္ခု တတ္ထ သင်္ဃတော။
အဋ္ဌုတ္တရသဟဿာနိ၊ နိသီဒေတွာ ဒိနေ ဒိနေ၊
ယာဂုခဇ္ဇက ဘောဇ္ဇေဟိ၊ သာဒူဟိ ဝိဝိဓေဟိ စ။
သစီဝရေဟိ ကပ္ပေတွာ၊ မဟာဒါနံ ပဝတ္တယိ၊
ဧကဝီသဒိနာ နေဝံ၊ နိဗဒ္ဓဉ္စဿ ကာရယိ။
မဟာဝိဟာရေ ကာရေသိ၊ သိလာမဏ္ဍပ မုတ္တမံ၊
လောဟပါသာဒထမ္ဘေ စ၊ ပရိဝတ္တိယ ဌာပယိ။
မဟာဗောဓိ ¶ သိလာဝေဒိံ၊ ဥတ္တရဒွါရတောရဏံ၊
ပတိဋ္ဌာပေသိ ထမ္ဘေ စ၊ စကုကဏ္ဏေ သစက္ကကေ။
တိဿော သီလာပဋိမာယော၊ တီသု ဒွါရေသု ကာရယိ၊
ဌပါပေသိ စ ပလ္လင်္ကံ၊ ဒက္ခိဏမှိ သိလာမယံ။
ပဓာနဘူမိံ ကာရေသိ၊ မဟာဝိဟာရပစ္ဆတော၊
ဒီပမှိ ဇိဏ္ဏကာဝါသံ၊ သဗ္ဗဉ္စ ပဋိသင်္ခရိ။
ထူပါရာမေ ထူပဃရံ၊ ထေရမ္ဗတ္ထလကေ တထာ၊
အာရာမေ မဏိသောမဝှေ၊ ပဋိသင်္ခါရယိ စ သော။
ထူပါရာမေ မဏိသောမာ-ရာမေ မရိစဝဋ္ဋကေ၊
ဒက္ခိဏဝှ ဝိဟာရေ စ၊ ဥပေါသထဃရာနိ စ။
မေဃဝဏ္ဏာဘယဝှဉ္စ၊ နဝဝိဟာရမကာရယိ၊
ဝိဟာရမဟပူဇာယံ၊ ပိဏ္ဍေတွာ ဒီပဝါသီနံ။
တိံသဘိက္ခုသဟဿာနံ၊ ဆစီဝရမဒါသိ စ၊
မဟာဝေသာခပူဇဉ္စ၊ တဒါ ဧဝံ အကာရယိ။
အနုဝဿဉ္စ သင်္ဃဿ၊ ဆစီဝရမဒါမယိ၊
ပါပကာနံ နိဂ္ဂဟေန၊ သောဓေန္တော သာသနံ တု သော။
ဝေတုလ္လဝါဒိနော ဘိက္ခူ၊ အဘယဂိရိနိဝါသိနော၊
ဂါဟယိတွာသဋ္ဌိမတ္တေ၊ ဇိနသာသနကဏ္ဋကေ။
ကတွာန နိဂ္ဂဟံ တေသံ၊ ပရတိရေ ခိပါပယိ၊
တတ္ထ ခိတ္တဿ ထေရဿ၊ နိဿိတော ဘိက္ခုစောဠိကော။
သင်္ဃမိတ္တော’တိနာမေန၊ ဘူတိဝိဇ္ဇာဒိကောဝိဒေါ၊
မဟာဝိဟာရေ ဘိက္ခုနံ၊ ကုဇ္ဈိတွာန ဣဓဂမာ။
ထူပါရာမေ သန္နိပါတံ၊ ပဝိသိတွာ အသညတော၊
သင်္ဃပါလဿ ပရိဝေဏ၊ ဝါသိတ္ထေရဿ တတ္ထ သော။
ဂေါဋ္ဌာသယဿ ထေရဿ၊ မာတုလဿ’ဿ ရာဇိနော၊
ရညော နာမေနာ‘‘လပန္တော၊ ဝစနံ ပဋိဗာဟိယ။
ရညော ကုလူပဂေါ အာသိ၊ ရာဇာ တသ္မိံ ပသီဒိယ၊
ဇေဋ္ဌပုတ္တံ ဇေဋ္ဌတိဿံ၊ မဟာသေနံ ကနိဋ္ဌကံ။
အပ္ပေသိ ¶ တဿ ဘိက္ခုဿ၊ သော သင်္ဂဏှိ ဒုတိယကံ၊
ဥပနန္ဓိ တသ္မိံ ဘိက္ခုသ္မိံ၊ ဇေဋ္ဌတိဿော ကုမာရကော။
ပိတုနော အစ္စယေ ဇေဋ္ဌ၊ သိဿော ရာဇာအဟောသိသော၊
ပိတု သာရီရ သက္ကာရေ၊ နိဂ္ဂန္တုံ နိစ္ဆမာနကေ။
ဒုဋ္ဌာမစ္စေ နိဂ္ဂဟေတုံ၊ သယံ နိက္ခမ္မ ဘူပတိ၊
ကနိဋ္ဌံ ပုရတော ကတွာ၊ ပိတုကာယံ အနန္တရံ။
တတော အမစ္စေ ကတွာန၊ သယံ ဟုတွာန ပစ္ဆတော၊
ကနိဋ္ဌေ ပိတုကာယေ စ၊ နိက္ခန္တေ တဒနန္တရံ။
ဒွါရံ သံဝရယိတွာန၊ ဒုဋ္ဌမစ္စေ နိဃာတိယ၊
သူလေ အပ္ပေသိ ပိတုနော၊ စိတကာယသမန္တတော။
တေန’ဿ ကမ္မုနာ နာမံ၊ ကက္ခလောပပဒံအဟု၊
သင်္ဃမိတ္တောတု သော ဘိက္ခု၊ ဘီတော တသ္မိံ နရာဓိပါ။
တဿာဘိသေကသမကာလံ၊ မဟာသေနေန မန္တိယ၊
တဿာဘိသေကံ ပေက္ခန္တော၊ ပရတီရံ ဂတော ဣတော။
ပိတရာ သော ဝိပ္ပကတံ၊ လောဟပါသာဒ မုတ္တမံ၊
ကောဋိဓနံ အဂ္ဃနကံ၊ ကာရေသိ သတ္တဘူမကံ။
သဋ္ဌိသတသဟဿဂ္ဃံ၊ ပူဇယိတွာ မဏိံတဟိံ၊
ကာရေသိ ဇေဋ္ဌတိဿောတံ၊ မဏိပါသာဒနာမကံ။
မဏိ ဒုဝေ မဟဂ္ဃေ စ၊ မဟာထူပေ အပူဇယိ၊
မဟာဗောဓိဃရေ တီဏိ၊ တောရဏာနိ စ ကာရယိ။
ကာရယိတွာ ဝိဟာရံ သော၊ ပါစိနတိဿ ပဗ္ဗတံ၊
ပဉ္စဝါသေသု သင်္ဃဿ၊ အဒါသိ ပုထုဝီ ပတိ။
ဒေဝါနံပိယတိဿေန၊ သော ပတိဋ္ဌာပိတံ ပုရာ၊
ထူပါရာမေ ဥရုသိလာ၊ ပဋိမံ စာရုဒဿနံ။
နေတွာန ထူပါရာမဝှံ၊ ဇေဋ္ဌတိဿော မဟီပဟိ၊
ပတိဋ္ဌာပေသိ အာရာမေ၊ ပါစိနတိဿ ပဗ္ဗတေ။
ကာဠမတ္တိကဝါပိံသော၊ အဒါစေတိယ ပဗ္ဗတေ၊
ဝိဟာရ ပါသာဒ မဟံ၊ မဟာဝေသာခမေဝ စ။
ကတွာ ¶ တိံသ သဟဿဿ၊ သင်္ဃဿ’ဒါ ဆစီဝရံ၊
အာဠမ္ဗဂါမဝါပိံသော၊ ဇေဋ္ဌတိဿော အကာရယိ။
ဧဝံ သော ဝိဝိဓံ ပုညံ၊ ပါသာဒကရဏာဒိကံ၊
ကာရေန္တော ဒသဝဿာနိ၊ ရာဇာ ရဇ္ဇမကာရယိ။
ဣတိ ဗဟုဝိဓ ပုည ဟေတု ဘူတာ၊
နရပတိတာ ဗဟုပါပဟေတု စာတိ၊
မဓုရမိဝ ဝိသေနမိဿမန္နံ၊
သုဇနမနော ဘဇတေ န တံ ကဒါပိ။
သုဇနပ္ပသာဒ သံဝေဂတ္ထာယ ကတေ မဟာဝံသေ
တယောဒသရာဇကောနာမ
ဆတ္တိံသတိမော ပရိစ္ဆေဒေါ။